maṅgaḻaślōkāḥ
maṅgaḻaṃ bhagavānviṣṇurmaṅgaḻaṃ madhusūdanaḥ ।
maṅgaḻaṃ puṇḍarīkākṣō maṅgaḻaṃ garuḍadhvajaḥ ॥ 1
maṅgaḻaṃ kōsalēndrāya mahanīyaguṇābdhayē ।
chakravartitanūjāya sārvabhaumāya maṅgaḻam ॥ 2
vēdavēdāntavēdyāya mēghaśyāmalamūrtayē ।
puṃsāṃ mōhanarūpāya puṇyaślōkāya maṅgaḻam ॥ 3
viśvāmitrāntaraṅgāya mithilānagarīpatēḥ ।
bhāgyānāṃ paripākāya bhavyarūpāya maṅgaḻam ॥ 4
pitṛbhaktāya satataṃ bhrātṛbhiḥ saha sītayā ।
nanditākhilalōkāya rāmachandrāya maṅgaḻam ॥ 5
tyaktasākētavāsāya chitrakūṭavihāriṇē ।
sēvyāya sarvayamināṃ dhīrōdāttāya maṅgaḻam ॥ 6
saumitriṇā cha jānakyā chāpabāṇāsidhāriṇā ।
saṃsēvyāya sadā bhaktyā sānujāyāstu maṅgaḻam ॥ 7
daṇḍakāraṇyavāsāya khaṇḍitāmaraśatravē ।
gṛdhrarājāya bhaktāya muktidāyāstu maṅgaḻam ॥ 8
sādaraṃ śabarīdattaphalamūlābhilāṣiṇē ।
saulabhyaparipūrṇāya sattvōdyuktāya maṅgaḻam ॥ 9
hanūmatsamavētāya harīśābhīṣṭadāyinē ।
vālipramathanāyāstu mahādhīrāya maṅgaḻam ॥ 10
śrīmatē raghuvīrāya sētulaṅghitasindhavē ।
jitarākṣasarājāya raṇadhīrāya maṅgaḻam ॥ 11
āsādya nagarīṃ divyāmabhiṣiktāya sītayā ।
rājādhirājarājāya rāmabhadrāya maṅgaḻam ॥ 12
vibhīṣaṇakṛtē prītyā viśvābhīṣṭapradāyinē ।
jānakīprāṇanāthāya sadā rāmāya maṅgaḻam ॥ 13
—-
śrīrāmaṃ trijagadguruṃ suravaraṃ sītāmanōnāyakaṃ
śyāmāṅgaṃ śaśikōṭipūrṇavadanaṃ chañchatkalākaustubham ।
saumyaṃ satyaguṇōttamaṃ susarayūtīrē vasantaṃ prabhuṃ
trātāraṃ sakalārthasiddhisahitaṃ vandē raghūṇāṃ patim ॥ 14
śrīrāghavaṃ daśarathātmajamapramēyaṃ
sītāpatiṃ raghuvarānvayaratnadīpam ।
ājānubāhumaravindadaḻāyatākṣaṃ
rāmaṃ niśācharavināśakaraṃ namāmi ॥ 15
śrīrāmachandra karuṇākara rāghavēndra
rājēndrachandra raghuvaṃśasamudrachandra ।
sugrīvanētrayugaḻōtpala-pūrṇachandra
sītāmanaḥkumudachandra namō namastē ॥ 16
sītāmanōmānasarājahaṃsa
saṃsārasantāpahara kṣamāvan ।
śrīrāma daityāntaka śāntarūpa
śrītārakabrahma namō namastē ॥ 17
viṣṇō rāghava vāsudēva nṛharē dēvaughachūḍāmaṇē ।
saṃsārārṇavakarṇadhāraka harē kṛṣṇāya tubhyaṃ namaḥ ॥ 18
sugrīvādisamastavānaravaraissaṃsēvyamānaṃ sadā ।
viśvāmitraparāśarādimunibhissaṃstūyamānaṃ bhajē ॥ 19
rāmaṃ chandanaśītalaṃ kṣitisutāmōhākaraṃ śrīkaraṃ
vaidēhīnayanāravindamihiraṃ sampūrṇachandrānanam ।
rājānaṃ karuṇāsamētanayanaṃ sītāmanōnandanaṃ
sītādarpaṇachārugaṇḍalalitaṃ vandē sadā rāghavam ॥ 20
jānāti rāma tava nāmaruchiṃ mahēśō
jānāti gautamasatī charaṇaprabhāvam ।
jānāti dōrbalaparākramamīśachāpō
jānātyamōghapaṭubāṇagatiṃ payōdhiḥ ॥ 21
mātā rāmō matpitā rāmachandrō
bhrātā rāmō matsakhā rāghavēśaḥ ।
sarvasvaṃ mē rāmachandrō dāyāḻu-
rnānyaṃ daivaṃ naiva jānē na jānē ॥ 22
vimalakamalanētraṃ visphurannīlagātraṃ
tapanakulapavitraṃ dānavadhvantamitram ।
bhuvanaśubhacharitraṃ bhūmiputrīkaḻatraṃ
daśarathavaraputraṃ naumi rāmākhyamitram ॥ 23
mārgē mārgē śākhināṃ ratnavēdī
vēdyāṃ vēdyāṃ kinnarībṛndagītam ।
gītē gītē mañjulālāpagōṣṭhī
gōṣṭhyāṃ gōṣṭhyāṃ tvatkathā rāmachandra ॥ 24
vṛkṣē vṛkṣē vīkṣitāḥ pakṣisaṅghāḥ
saṅghē saṅghē mañjulāmōdavākyam ।
vākyē vākyē mañjulālāpagōṣṭhī
gōṣṭhyāṃ gōṣṭhyāṃ tvatkathā rāmachandra ॥ 25
duritatimirachandrō duṣṭakañjātachandraḥ
surakuvalayachandrassūryavaṃśābdhichandraḥ ।
svajananivahachandraśśatrurājīvachandraḥ
praṇatakumudachandraḥ pātu māṃ rāmachandraḥ ॥ 26
kaḻyāṇadaṃ kauśikayajñapālaṃ
kaḻānidhiṃ kāñchanaśailadhīram ।
kañjātanētraṃ karuṇāsamudraṃ
kākutstharāmaṃ kalayāmi chittē ॥ 27
rājīvāyatalōchanaṃ raghuvaraṃ nīlōtpalaśyāmalaṃ
mandārāñchitamaṇḍapē sulalitē sauvarṇakē puṣpakē ।
āsthānē navaratnarājikhachitē siṃhāsanē saṃsthitaṃ
sītālakṣmaṇalōkapālasahitaṃ vandē munīndrāspadam ॥ 28
dhyāyē rāmaṃ sudhāṃśuṃ natasakalabhavāraṇyatāpaprahāram ।
śyāmaṃ śāntaṃ surēndraṃ suramunivinutaṃ kōṭisūryaprakāśam ।
sītāsaumitrisēvyaṃ suranarasugamaṃ divyasiṃhāsanastham ।
sāyāhnē rāmachandraṃ smitaruchiramukhaṃ sarvadā mē prasannam ॥ 29
indranīlamaṇisannibhadēhaṃ
vandanīyamasakṛnmunibṛndaiḥ ।
lambamānatulasīvanamālaṃ
chintayāmi satataṃ raghuvīram ॥ 30
sampūrṇachandravadanaṃ sarasīruhākṣaṃ
māṇikyakuṇḍaladharaṃ mukuṭābhirāmam ।
chāmpēyagauravasanaṃ śarachāpahastaṃ
śrīrāmachandramaniśaṃ manasā smarāmi ॥ 31
mātuḥ pārśvē charantaṃ maṇimayaśayanē mañjubhūṣāñchitāṅgam ।
mandaṃ mandaṃ pibantaṃ mukuḻitanayanaṃ stanyamanyastanāgram ।
aṅguḻyāgraiḥ spṛśantaṃ sukhaparavaśayā sasmitāliṅgitāṅgam ।
gāḍhaṃ gāḍhaṃ jananyā kalayatu hṛdayaṃ māmakaṃ rāmabālam ॥ 32
rāmābhirāmaṃ nayanābhirāmaṃ
vāchābhirāmaṃ vadanābhirāmam ।
sarvābhirāmaṃ cha sadābhirāmaṃ
vandē sadā dāśarathiṃ cha rāmam ॥ 33
rāśabdōchchāramātrēṇa mukhānniryāti pātakāḥ ।
punaḥ pravēśabhītyā cha makārastu kavāṭavat ॥ 34
anarghamāṇikyavirājamāna-
śrīpādukālaṅkṛtaśōbhanābhyām ।
aśēṣabṛndārakavanditābhyāṃ
namō namō rāmapadāmbujābhyām ॥ 35
chalatkanakakuṇḍalōllasitadivyagaṇḍasthalaṃ
charācharajaganmayaṃ charaṇapadmagaṅgāśrayam ।
chaturvidhaphalapradaṃ charamapīṭhamadhyasthitaṃ
chidaṃśamakhilāspadaṃ daśarathātmajaṃ chintayē ॥ 36
sanandanamunipriyaṃ sakalavarṇavēdātmakaṃ
samastanigamāgamasphuritatattvasiṃhāsanam ।
sahasranayanābjajādyamarabṛndasaṃsēvitaṃ
samaṣṭipuravallabhaṃ daśarathātmajaṃ chintayē ॥ 37
jāgratsvapnasuṣupti-kālavilasattattvātmachinmātrakaṃ
chaitanyātmakamādhipāparahitaṃ bhūmyāditanmātrakam ।
śāmbhavyādisamastayōgakulakaṃ sāṅkhyāditattvātparaṃ
śabdāvāchyamahaṃ namāmi satataṃ vyutpattināśātparam ॥ 38
ikṣvākuvaṃśārṇavajātaratnaṃ
sītāṅganāyauvanabhāgyaratnam ।
vaikuṇṭharatnaṃ mama bhāgyaratnaṃ
śrīrāmaratnaṃ śirasā namāmi ॥ 39
ikṣvākunandanaṃ sugrīvapūjitaṃ
trailōkyarakṣakaṃ satyasandhaṃ sadā ।
rāghavaṃ raghupatiṃ rājīvalōchanaṃ
rāmachandraṃ bhajē rāghavēśaṃ bhajē ॥ 40
bhaktapriyaṃ bhaktasamādhigamyaṃ
chintāharaṃ chintitakāmadhēnum ।
sūryēndukōṭidyutibhāsvaraṃ taṃ
rāmaṃ bhajē rāghavarāmachandram ॥ 41
śrīrāmaṃ janakakṣitīśvarasutāvaktrāmbujāhāriṇaṃ
śrīmadbhānukulābdhikaustubhamaṇiṃ śrīratnavakṣassthalam ।
śrīkaṇṭhādyamaraugharatnamakuṭālaṅkārapādāmbujaṃ
śrīvatsōjjvalamindranīlasadṛśaṃ śrīrāmachandraṃ bhajē ॥ 42
rāmachandra charitākathāmṛtaṃ
lakṣmaṇāgrajaguṇānukīrtanam ।
rāghavēśa tava pādasēvanaṃ
sambhavantu mama janmajanmani ॥ 43
ajñānasambhava-bhavāmbudhibāḍabāgni-
ravyaktatattvanikarapraṇavādhirūḍhaḥ ।
sītāsamētamanujēna hṛdantarāḻē
prāṇaprayāṇasamayē mama sannidhattē ॥ 44
rāmō matkuladaivataṃ sakaruṇaṃ rāmaṃ bhajē sādaraṃ
rāmēṇākhilaghōrapāpanihatī rāmāya tasmai namaḥ ।
rāmānnāsti jagatrayaikasulabhō rāmasya dāsō’smyahaṃ
rāmē prītiratīva mē kulagurō śrīrāma rakṣasva mām ॥ 45
vaidēhīsahitaṃ suradrumatalē haimē mahāmaṇṭapē ।
madhyēpuṣpakamāsanē maṇimayē vīrāsanē saṃsthitam ।
agrē vāchayati prabhañjanasutē tattvaṃ munibhyaḥ param ।
vyākhyāntaṃ bharatādibhiḥ parivṛtaṃ rāmaṃ bhajē śyāmalam ॥ 46
vāmē bhūmisutā purastu hanumānpaśchātsumitrāsuta-
śśatrughnō bharataścha pārśvadaḻayōrvāyvādikōṇēṣvapi ।
sugrīvaścha vibhīṣaṇaścha yuvarāṭ tārāsutō jāmbavān
madhyē nīlasarōjakōmalaruchiṃ rāmaṃ bhajē śyāmalam ॥ 47
kēyūrāṅgadakaṅkaṇairmaṇigaṇairvairōchamānaṃ sadā
rākāparvaṇichandrakōṭisadṛśaṃ Chatrēṇa vairājitam ।
hēmastambhasahasraṣōḍaśayutē madhyē mahāmaṇḍapē
dēvēśaṃ bharatādibhiḥ parivṛtaṃ rāmaṃ bhajē śyāmalam ॥ 48
sākētē śaradindukundadhavaḻē saughē mahāmaṇṭapē ।
paryastāgarudhūpadhūmapaṭalē karpūradīpōjjvalē ।
sugrīvāṅgadavāyuputrasahitaṃ saumitriṇā sēvitaṃ
līlāmānuṣavigrahaṃ raghupatiṃ rāmaṃ bhajē śyāmalam ॥ 49
śāntaṃ śāradachandrakōṭisadṛśaṃ chandrābhirāmānanaṃ
chandrārkāgnivikāsikuṇḍaladharaṃ chandrāvataṃsastutam ।
vīṇāpustakasākṣasūtravilasadvyākhyānamudrākaraṃ
dēvēśaṃ bharatādibhiḥ parivṛtaṃ rāmaṃ bhajē śyāmalam ॥ 50
rāmaṃ rākṣasamardanaṃ raghupatiṃ śakrārividhvaṃsinaṃ
sugrīvēpsitarājyadaṃ surapatēḥ putrāntakaṃ śārṅgiṇam ।
bhaktānāmabhayapradaṃ bhayaharaṃ pāpaughavidhvaṃsinaṃ
sītāsēvitapādapadmayugaḻaṃ rāmaṃ bhajē śyāmalam ॥ 51
kandarpāyutakōṭikōṭitulitaṃ kālāmbudaśyāmalaṃ
kambugrīvamudārakaustubhadharaṃ karṇāvataṃsōtpalam ।
kastūrītilakōjjvalaṃ smitamukhaṃ chinmudrayālaṅkṛtaṃ
sītālakṣmaṇavāyuputrasahitaṃ siṃhāsanasthaṃ bhajē ॥ 52
sākētē navaratnapaṅktikhachitē chitradhvajālaṅkṛtē
vāsē svarṇamayē daḻāṣṭalalitē padmē vimānōttamē ।
āsīnaṃ bharatādisōdarajanaiḥ śākhāmṛgaiḥ kinnaraiḥ
dikpālairmunipuṅgavairnṛpagaṇaissaṃsēvyamānaṃ bhajē ॥ 53
kastūrīghanasārakuṅkumalasachChrīchandanālaṅkṛtaṃ
kandarpādhikasundaraṃ ghananibhaṃ kākutsthavaṃśadhvajam ।
kaḻyāṇāmbharavēṣṭitaṃ kamalayā yuktaṃ kalāvallabhaṃ
kaḻyāṇāchalakārmukapriyasakhaṃ kaḻyāṇarāmaṃ bhajē ॥ 54
muktērmūlaṃ munivarahṛdānandakandaṃ mukundaṃ
kūṭasthākhyaṃ sakalavaradaṃ sarvachaitanyarūpam ।
nādātītaṃ kamalanilayaṃ nādanādāntatattvaṃ
nādātītaṃ prakṛtirahitaṃ rāmachandraṃ bhajē’ham ॥ 55
tārākāraṃ nikhilanilayaṃ tattvamasyādilakṣyaṃ
śabdāvāchyaṃ triguṇarahitaṃ vyōmamaṅguṣṭhamātram ।
nirvāṇākhyaṃ saguṇamaguṇavyōmarandhrāntarasthaṃ
sauṣumnāntaḥ praṇavasahitaṃ rāmachandraṃ bhajē’ham ॥ 56
nijānandākāraṃ nigamaturagārādhitapadaṃ
parabrahmānandaṃ paramapadagaṃ pāpaharaṇam ।
kṛpāpārāvāraṃ paramapuruṣaṃ padmanilayaṃ
bhajē rāmaṃ śyāmaṃ prakṛtirahitaṃ nirguṇamaham ॥ 57
sākētē nagarē samastamahimādhārē jaganmōhanē
ratnastambhasahasramaṇṭapamahāsiṃhāsanē sāmbujē ।
viśvāmitravasiṣṭhagautamaśukavyāsādibhirmaunibhiḥ
dhyēyaṃ lakṣmaṇalōkapālasahitaṃ sītāsamētaṃ bhajē ॥ 58
rāmaṃ śyāmābhirāmaṃ raviśaśinayanaṃ kōṭisūryaprakāśaṃ
divyaṃ divyāstrapāṇiṃ śaramukhaśaradhiṃ chārukōḍaṇḍahastam ।
kālaṃ kālāgnirudraṃ ripukuladahanaṃ vighnavichChēdadakṣaṃ
bhīmaṃ bhīmāṭṭahāsaṃ sakalabhayaharaṃ rāmachandraṃ bhajē’ham ॥ 59
śrīrāmaṃ bhuvanaikasundaratanuṃ dhārādharaśyāmalaṃ
rājīvāyatalōchanaṃ raghuvaraṃ rākēndubimbānanam ।
kōdaṇḍādinijāyudhāśritabhujairbhrāntaṃ vidēhātmajā-
dhīśaṃ bhaktajanāvanaṃ raghuvaraṃ śrīrāmachandraṃ bhajē ॥ 60
śrīvatsāṅkamudārakaustubhalasatpītāmbarālaṅkṛtaṃ
nānāratnavirājamānamakuṭaṃ nīlāmbudaśyāmalam ।
kastūrīghanasāracharchitatanuṃ mandāramālādharaṃ
kandarpāyutasundaraṃ raghupatiṃ sītāsamētaṃ bhajē ॥ 61
sadānandadēvē sahasrārapadmē
galachchandrapīyūṣadhārāmṛtāntē ।
sthitaṃ rāmamūrtiṃ niṣēvē niṣēvē-
‘nyadaivaṃ na sēvē na sēvē na sēvē ॥ 62
sudhābhāsitadvīpamadhyē vimānē
suparvāḻivṛkṣōjjvalē śēṣatalpē ।
niṣaṇṇaṃ ramāṅkaṃ niṣēvē niṣēvē-
‘nyadaivaṃ na sēvē na sēvē na sēvē ॥ 63
chidaṃśaṃ samānandamānandakandaṃ
suṣumnākhyarandhrāntarāḻē cha haṃsam ।
sachakraṃ saśaṅkhaṃ sapītāmbarāṅkaṃ
parañchānyadaivaṃ na jānē na jānē ॥ 64
chaturvēdakūṭōllasatkāraṇākhyaṃ
sphuraddivyavaimānikē bhōgitalpē ।
parandhāmamūrtiṃ niṣaṇṇaṃ niṣēvē
niṣēvē’nyadaivaṃ na sēvē na sēvē ॥ 65
siṃhāsanasthaṃ surasēvitavyaṃ
ratnāṅkitālaṅkṛtapādapadmam ।
sītāsamētaṃ śaśisūryanētraṃ
rāmaṃ bhajē rāghava rāmachandram ॥ 66
rāmaṃ purāṇapuruṣaṃ ramaṇīyavēṣaṃ
rājādhirājamakuṭārchitapādapīṭham ।
sītāpatiṃ sunayanaṃ jagadēkavīraṃ
śrīrāmachandramaniśaṃ kalayāmi chittē ॥ 67
parānandavastusvarūpādisākṣiṃ
parabrahmagamyaṃ parañjyōtimūrtim ।
parāśaktimitrā’priyārādhitāṅghriṃ
parandhāmarūpaṃ bhajē rāmachandram ॥ 68
mandasmitaṃ kuṇḍalagaṇḍabhāgaṃ
pītāmbaraṃ bhūṣaṇabhūṣitāṅgam ।
nīlōtpalāṅgaṃ bhuvanaikamitraṃ
rāmaṃ bhajē rāghava rāmachandram ॥ 69
achintyamavyaktamanantarūpa-
madvaitamānandamanādigamyam ।
puṇyasvarūpaṃ puruṣōttamākhyaṃ
rāmaṃ bhajē rāghava rāmachandram ॥ 70
padmāsanasthaṃ surasēvitavyaṃ
padmālayānandakaṭākṣavīkṣyam ।
gandharvavidyādharagīyamānaṃ
rāmaṃ bhajē rāghava rāmachandram ॥ 71
anantakīrtiṃ varadaṃ prasannaṃ
padmāsanaṃ sēvakapārijātam ।
rājādhirājaṃ raghuvīrakētuṃ
rāmaṃ bhajē rāghava rāmachandram ॥ 72
sugrīvamitraṃ sujanānurūpaṃ
laṅkāharaṃ rākṣasavaṃśanāśam ।
vēdāśrayāṅgaṃ vipulāyatākṣaṃ
rāmaṃ bhajē rāghava rāmachandram ॥ 73
sakṛtpraṇatarakṣāyāṃ sākṣī yasya vibhīṣaṇaḥ ।
sāparādhapratīkāraḥ sa śrīrāmō gatirmama ॥ 74
phalamūlāśinau dāntau tāpasau dharmachāriṇau ।
rakṣaḥkulavihantārau bhrātarau rāmalakṣmaṇau ॥ 75
taruṇau rūpasampannau sukumārau mahābalau ।
puṇḍarīka viśālākṣau chīrakṛṣṇājināmbarau ॥ 76
kausalyānayanēnduṃ daśarathamukhāravindamārtāṇḍam ।
sītāmānasahaṃsaṃ rāmaṃ rājīvalōchanaṃ vandē ॥ 77
bharjanaṃ bhavabījānāṃ mārjanaṃ sukhasampadām ।
tarjanaṃ yamadūtānāṃ rāmarāmēti kīrtanam ॥ 78
na jānē jānakī jānē rāma tvannāmavaibhavam ।
sarvēśō bhagavān śambhurvālmīkirvētti vā navā ॥ 79
karataladhṛtachāpaṃ kālamēghasvarūpaṃ
sarasijadaḻanētraṃ chāruhāsaṃ sugātram ।
vichinutavanavāsaṃ vikramōdagravēṣaṃ
praṇamata raghunāthaṃ jānakīprāṇanātham ॥ 80
vidyutsphuranmakarakuṇḍaladīptachāru-
gaṇḍasthalaṃ maṇikirīṭavirājamānam ।
pītāmbaraṃ jaladanīlamudārakāntiṃ
śrīrāmachandramaniśaṃ kalayāmi chittē ॥ 81
ratnōllasajjvalitakuṇḍalagaṇḍabhāgaṃ
kastūrikātilakaśōbhitaphālabhāgam ।
karṇāntadīrghanayanaṃ karuṇākaṭākṣaṃ
śrīrāmachandra mukhamātmani sannidhattam ॥ 82
vaidēhīsahitaṃ cha lakṣmaṇayutaṃ kaikēyiputrānvitaṃ
sugrīvaṃ cha vibhīṣaṇānilasutau nīlaṃ nalaṃ sāṅgadam ।
viśvāmitravasiṣṭhagautamabharadvājādikān mānayan
rāmō mārutisēvitaḥ smaratu māṃ sāmrājyasiṃhāsanē ॥ 83
sakalaguṇanidhānaṃ yōgibhisstūyamānaṃ
bhajitasuravimānaṃ rakṣitēndrādimānam ।
mahitavṛṣabhayānaṃ sītayā śōbhamānaṃ
smaratu hṛdayabhānuṃ brahmarāmābhirāmam ॥ 84
tridaśakumudachandrō dānavāmbhōjachandrō
duritatimirachandrō yōgināṃ jñānachandraḥ ।
praṇatanayanachandrō maithilīnētrachandrō
daśamukharipuchandraḥ pātu māṃ rāmachandraḥ ॥ 85
yannāmaiva sahasranāmasadṛśaṃ yannāma vēdaissamaṃ
yannāmāṅkitavākya-māsurabalastrīgarbhavichChēdanam ।
yannāma śvapachāryabhēdarahitaṃ muktipradānōjjvalaṃ
tannāmā’laghurāmarāmaramaṇaṃ śrīrāmanāmāmṛtam ॥ 86
rājīvanētra raghupuṅgava rāmabhadra
rākēndubimbasadṛśānana nīlagātra ।
rāmā’bhirāma raghuvaṃśasamudbhava tvaṃ
śrīrāmachandra mama dēhi karāvalambam ॥ 87
māṇikyamañjīrapadāravindaṃ
rāmārkasamphullamukhāravindam ।
bhaktābhayaprāpikarāravindāṃ
dēvīṃ bhajē rāghavavallabhāṃ tām ॥ 88
jayatu vijayakārī jānakīmōdakārī
tapanakulavihārī daṇḍakāraṇyachārī ।
daśavadanakuṭhārī daityavichChēdakārī
maṇimakuṭakadhārī chaṇḍakōdaṇḍadhārī ॥ 89
rāmaḥ pitā raghava ēva mātā
rāmassubandhuścha sakhā hitaścha ।
rāmō gururmē paramaṃ cha daivaṃ
rāmaṃ vinā nā’nyamahaṃ smarāmi ॥ 90
śrīrāma mē tvaṃ hi pitā cha mātā
śrīrāma mē tvaṃ hi suhṛchcha bandhuḥ ।
śrīrāma mē tvaṃ hi guruścha gōṣṭhī
śrīrāma mē tvaṃ hi samastamēva ॥ 91
rāmachandracharitāmṛtapānaṃ
sōmapānaśatakōṭisamānam ।
sōmapānaśatakōṭibhirīyā-
jjanma naiti raghunāyakanāmnā ॥ 92
rāma rāma dayāsindhō rāvaṇārē jagatpatē ।
tvatpādakamalāsakti-rbhavējjanmani janmani ॥ 93
śrīrāmachandrēti dayāparēti
bhaktapriyēti bhavabandhanamōchanēti ।
nāthēti nāgaśayanēti sadā stuvantaṃ
māṃ pāhi bhītamaniśaṃ kṛpaṇaṃ kṛpāḻō ॥ 94
ayōdhyānātha rājēndra sītākānta jagatpatē ।
śrīrāma puṇḍarīkākṣa rāmachandra namō’stu tē ॥ 95
hē rāma hē ramaṇa hē jagadēkavīra
hē nātha hē raghupatē karuṇālavāla ।
hē jānakīramaṇa hē jagadēkabandhō
māṃ pāhi dīnamaniśaṃ kṛpaṇaṃ kṛtaghnam ॥ 96
jānāti rāma tava tattvagatiṃ hanūmān ।
jānāti rāma tava sakhyagatiṃ kapīśaḥ ।
jānāti rāma tava yuddhagatiṃ daśāsyō ।
jānāti rāma dhanadānuja ēva satyam ॥ 97
sēvyaṃ śrīrāmamantraṃ śravaṇaśubhakaraṃ śrēṣṭhasujñānimantraṃ
stavyaṃ śrīrāmamantraṃ narakaduritadurvāranirghātamantram ।
bhavyaṃ śrīrāmamantraṃ bhajatu bhajatu saṃsāranistāramantraṃ
divyaṃ śrīrāmamantraṃ divi bhuvi vilasanmōkṣarakṣaikamantram ॥ 98
nikhilanilayamantraṃ nityatattvākhyamantraṃ
bhavakulaharamantraṃ bhūmijāprāṇamantram ।
pavanajanutamantraṃ pārvatīmōkṣamantraṃ
paśupatinijamantraṃ pātu māṃ rāmamantram ॥ 99
praṇavanilayamantraṃ prāṇanirvāṇamantraṃ
prakṛtipuruṣamantraṃ brahmarudrēndramantram ।
prakaṭaduritarāgadvēṣanirṇāśamantraṃ
raghupatinijamantraṃ rāmarāmētimantram ॥ 100
daśarathasutamantraṃ daityasaṃhāramantraṃ
vibudhavinutamantraṃ viśvavikhyātamantram ।
munigaṇanutamantraṃ muktimārgaikamantraṃ
raghupatinijamantraṃ rāmarāmētimantram ॥ 101
saṃsārasāgarabhayāpahaviśvamantraṃ
sākṣānmumukṣujanasēvitasiddhamantram ।
sāraṅgahastamukhahastanivāsamantraṃ
kaivalyamantramaniśaṃ bhaja rāmamantram ॥ 102
jayatu jayatu mantraṃ janmasāphalyamantraṃ
jananamaraṇabhēdaklēśavichChēdamantram ।
sakalanigamamantraṃ sarvaśāstraikamantraṃ
raghupatinijamantraṃ rāmarāmētimantram ॥ 103
jagati viśadamantraṃ jānakīprāṇamantraṃ
vibudhavinutamantraṃ viśvavikhyātamantram ।
daśarathasutamantraṃ daityasaṃhāramantraṃ
raghupatinijamantraṃ rāmarāmētimantram ॥ 104
brahmādiyōgimunipūjitasiddhamantraṃ
dāridryaduḥkhabhavarōgavināśamantram ।
saṃsārasāgarasamuttaraṇaikamantraṃ
vandē mahābhayaharaṃ raghurāmamantram ॥ 105
śatruchChēdaikamantraṃ sarasamupaniṣadvākyasampūjyamantraṃ
saṃsārōttāramantraṃ samuchitasamayē saṅganiryāṇamantram ।
sarvaiśvaryaikamantraṃ vyasanabhujagasandaṣṭasantrāṇamantraṃ
jihvē śrīrāmamantraṃ japa japa saphalaṃ janmasāphalyamantram ॥ 106
nityaṃ śrīrāmamantraṃ nirupamamadhikaṃ nītisujñānamantraṃ
satyaṃ śrīrāmamantraṃ sadamalahṛdayē sarvadārōgyamantram ।
stutyaṃ śrīrāmamantraṃ sulalitasumanassaukhyasaubhāgyamantraṃ
paṭhyaṃ śrīrāmamantraṃ pavanajavaradaṃ pātu māṃ rāmamantram ॥ 107
vyāmōhapraśamauṣadhaṃ munimanōvṛttipravṛttyauṣadhaṃ
daityōnmūlakarauṣadhaṃ bhavabhayapradhvaṃsanaikauṣadham ।
bhaktānandakarauṣadhaṃ tribhuvanē sañjīvanaikauṣadhaṃ
śrēyaḥ prāptikarauṣadhaṃ piba manaḥ śrīrāmanāmauṣadham ॥ 108
sakalabhuvanaratnaṃ sarvaśāstrārtharatnaṃ
samaravijayaratnaṃ sachchidānandaratnam ।
daśamukhahararatnaṃ dānavārātiratnaṃ
raghukulanṛparatnaṃ pātu māṃ rāmaratnam ॥ 109
sakalabhuvanaratnaṃ sachchidānandaratnaṃ
sakalahṛdayaratnaṃ sūryabimbāntaratnam ।
vimalasukṛtaratnaṃ vēdavēdāntaratnaṃ
puraharajaparatnaṃ pātu māṃ rāmaratnam ॥ 110
nigamaśikhararatnaṃ nirmalānandaratnaṃ
nirupamaguṇaratnaṃ nādanādāntaratnam ।
daśarathakularatnaṃ dvādaśāntasstharatnaṃ
paśupatijaparatnaṃ pātu māṃ rāmaratnam ॥ 111
śatamakhasutaratnaṃ ṣōḍaśāntasstharatnaṃ
munijanajaparatnaṃ mukhyavaikuṇṭharatnam ।
nirupamaguṇaratnaṃ nīrajāntasstharatnaṃ
paramapadaviratnaṃ pātu māṃ rāmaratnam ॥ 112
sakalasukṛtaratnaṃ satyavākyārtharatnaṃ
śamadamaguṇaratnaṃ śāśvatānandaratnam ।
praṇayanilayaratnaṃ prasphuṭadyōtiratnaṃ
paramapadaviratnaṃ pātu māṃ rāmaratnam ॥ 113
nigamaśikhararatnaṃ nityamāśāsyaratnaṃ
jananutanṛparatnaṃ jānakīrūparatnam ।
bhuvanavalayaratnaṃ bhūbhujāmēkaratnaṃ
raghukulavararatnaṃ pātu māṃ rāmaratnam ॥ 114
viśālanētraṃ paripūrṇagātraṃ
sītākalatraṃ suravairijaitram ।
kāruṇyapātraṃ jagataḥ pavitraṃ
śrīrāmaratnaṃ praṇatō’smi nityam ॥ 115
hē gōpālaka hē dayājalanidhē hē sadguṇāmbhōnidhē
hē daityāntaka hē vibhīṣaṇadayāparīṇa hē bhūpatē ।
hē vaidēhasutāmanōjavihṛtē hē kōṭimārākṛtē
hē navyāmbujanētra pālaya paraṃ jānāmi na tvāṃ vinā ॥ 116
yasya kiñchidapi nō haraṇīyaṃ
karma kiñchidapi nō charaṇīyam ।
rāmanāma cha sadā smaraṇīyaṃ
līlayā bhavajalaṃ taraṇīyam ॥ 117
daśarathasutamīśaṃ daṇḍakāraṇyavāsaṃ
śatamakhamaṇinīlaṃ jānakīprāṇalōlam ।
sakalabhuvanamōhaṃ sannutāmbhōdadēhaṃ
bahuḻanutasamudraṃ bhāvayē rāmabhadram ॥ 118
viśālanētraṃ paripūrṇagātraṃ
sītākaḻatraṃ suravairijaitram ।
jagatpavitraṃ paramātmatantraṃ
śrīrāmachandraṃ praṇamāmi chittē ॥ 119
jaya jaya raghurāma śrīmukhāmbhōjabhānō
jaya jaya raghuvīra śrīmadambhōjanētra ।
jaya jaya raghunātha śrīkarābhyarchitāṅghri
jaya jaya raghuvarya śrīśa kāruṇyasindhō ॥ 120
mandāramūlē maṇipīṭhasaṃsthaṃ
sudhāplutaṃ divyavirāṭsvarūpam ।
sabindunādāntakalāntaturya-
mūrtiṃ bhajē’haṃ raghuvaṃśaratnam ॥ 121
nādaṃ nādavinīlachittapavanaṃ nādāntattvapriyaṃ
nāmākāravivarjitaṃ navaghanaśyāmāṅganādapriyam ।
nādāmbhōjamarandamattavilasadbhṛṅgaṃ madāntassthitaṃ
nādāntadhṛvamaṇḍalābjaruchiraṃ rāmaṃ bhajē tārakam ॥ 122
nānābhūtahṛdabjapadmanilayaṃ nāmōjjvalābhūṣaṇam ।
nāmastōtrapavitritatribhuvanaṃ nārāyaṇāṣṭākṣaram ।
nādāntēndugaḻatsudhāplutatanuṃ nānātmachinmātrakam ।
nānākōṭiyugāntabhānusadṛśaṃ rāmaṃ bhajē tārakam ॥ 123
vēdyaṃ vēdaguruṃ viriñchijanakaṃ vēdāntamūrtiṃ sphura-
dvēdaṃ vēdakalāpamūlamahimādhārāntakandāṅkuram ।
vēdaśṛṅgasamānaśēṣaśayanaṃ vēdāntavēdyātmakaṃ
vēdārādhitapādapaṅkajamahaṃ rāmaṃ bhajē tārakam ॥ 124
majjīvaṃ madanugrahaṃ madadhipaṃ madbhāvanaṃ matsukhaṃ
mattātaṃ mama sadguruṃ mama varaṃ mōhāndhavichChēdanam ।
matpuṇyaṃ madanēkabāndhavajanaṃ majjīvanaṃ mannidhiṃ
matsiddhiṃ mama sarvakarmasukṛtaṃ rāmaṃ bhajē tārakam ॥ 125
nityaṃ nīrajalōchanaṃ nirupamaṃ nīvāraśūkōpamaṃ
nirbhēdānubhavaṃ nirantaraguṇaṃ nīlāṅgarāgōjjvalam ।
niṣpāpaṃ nigamāgamārchitapadaṃ nityātmakaṃ nirmalaṃ
niṣpuṇyaṃ nikhilaṃ nirañjanapadaṃ rāmaṃ bhajē tārakam ॥ 126
dhyāyē tvāṃ hṛdayāmbujē raghupatiṃ vijñānadīpāṅkuraṃ
haṃsōhaṃsaparamparādimahimādhāraṃ jaganmōhanam ।
hastāmbhōjagadābjachakramatulaṃ pītāmbaraṃ kaustubhaṃ
śrīvatsaṃ puruṣōttamaṃ maṇinibhaṃ rāmaṃ bhajē tārakam ॥ 127
satyajñānamanantamachyutamajaṃ chāvyākṛtaṃ tatparaṃ
kūṭasthādisamastasākṣimanaghaṃ sākṣādvirāṭtattvadam ।
vēdyaṃ viśvamayaṃ svalīnabhuvanasvārājyasaukhyapradaṃ
pūrṇaṃ pūrṇataraṃ purāṇapuruṣaṃ rāmaṃ bhajē tārakam ॥ 128
rāmaṃ rākṣasavaṃśanāśanakaraṃ rākēndubimbānanaṃ
rakṣōriṃ raghuvaṃśavardhanakaraṃ raktādharaṃ rāghavam ।
rādhāyātmanivāsinaṃ ravinibhaṃ ramyaṃ ramānāyakaṃ
randhrāntargataśēṣaśāyinamahaṃ rāmaṃ bhajē tārakam ॥ 129
ōtaprōtasamastavastunichayaṃ ōṅkārabījākṣaraṃ
ōṅkāraprakṛtiṃ ṣaḍakṣarahitaṃ ōṅkārakandāṅkuram ।
ōṅkārasphuṭabhūrbhuvassuparitaṃ ōghatrayārādhitam
ōṅkārōjjvalasiṃhapīṭhanilayaṃ rāmaṃ bhajē tārakam ॥ 130
sākētē nagarē samastasukhadē harmyē’bjakōṭidyutē
nakṣatragrahapaṅktilagnaśikharē chāntaryapaṅkēruhē ।
vālmīkātriparāśarādimunibhissaṃsēvyamānaṃ sthitaṃ
sītālaṅkṛtavāmabhāgamaniśaṃ rāmaṃ bhajē tārakam ॥ 131
vaikuṇṭhē nagarē suradrumatalē chānandavaprāntarē
nānāratnavinirmitasphuṭapaṭuprākārasaṃvēṣṭitē ।
saudhēndūpalaśēṣatalpalalitē nīlōtpalachChāditē
paryaṅkē śayanaṃ ramādisahitaṃ rāmaṃ bhajē tārakam ॥ 132
vandē rāmamanādipūruṣamajaṃ vandē ramānāyakaṃ
vandē hārikirīṭakuṇḍaladharaṃ vandē sunīladyutim ।
vandē chāpakalambakōjjvalakaraṃ vandē jaganmaṅgaḻaṃ
vandē paṅktirathātmajaṃ mama guruṃ vandē sadā rāghavam ॥ 133
vandē śaunakagautamādyabhinutaṃ vandē ghanaśyāmalaṃ
vandē tārakapīṭhamadhyanilayaṃ vandē jagannāyakam ।
vandē bhaktajanaughadēvivaṭapaṃ vandē dhanurvallabhaṃ
vandē tattvamasītivākyajanakaṃ vandē sadā rāghavam ॥ 134
vandē sūryaśaśāṅkalōchanayugaṃ vandē jagatpāvanaṃ
vandē patrasahasrapadmanilayaṃ vandē purāripriyam ।
vandē rākṣasavaṃśanāśanakaraṃ vandē sudhāśītalaṃ
vandē dēvakapīndrakōṭivinutaṃ vandē sadā rāghavam ॥ 135
vandē sāgaragarvabhaṅgaviśikhaṃ vandē jagajjīvanaṃ
vandē kauśikayāgarakṣaṇakaraṃ vandē guruṇāṃ gurum ।
vandē bāṇaśarāsanōjjvalakaraṃ vandē jaṭāvalkalaṃ
vandē lakṣmaṇabhūmijānvitamahaṃ vandē sadā rāghavam ॥ 136
vandē pāṇḍarapuṇḍarīkanayanaṃ vandē’bjabimbānanaṃ
vandē kambugaḻaṃ karābjayugaḻaṃ vandē lalāṭōjjvalam ।
vandē pītadukūlamambudanibhaṃ vandē jaganmōhanaṃ
vandē kāraṇamānuṣōjjvalatanuṃ vandē sadā rāghavam ॥ 137
vandē nīlasarōjakōmalaruchiṃ vandē jagadvanditaṃ
vandē sūryakulābdhikaustubhamaṇiṃ vandē surārādhitam ।
vandē pātakapañchakapraharaṇaṃ vandē jagatkāraṇaṃ
vandē viṃśatipañchatattvarahitaṃ vandē sadā rāghavam ॥ 138
vandē sādhakavargakalpakataruṃ vandē trimūrtyātmakaṃ
vandē nādalayāntarasthalagataṃ vandē trivargātmakam ।
vandē rāgavihīnachittasulabhaṃ vandē sabhānāyakaṃ
vandē pūrṇadayāmṛtārṇavamahaṃ vandē sadā rāghavam ॥ 139
vandē sāttvikatattvamudritatanuṃ vandē sudhādāyakaṃ
vandē chāruchaturbhujaṃ maṇinibhaṃ vandē ṣaḍabjasthitam ।
vandē brahmapipīlikādinilayaṃ vandē virāṭvigrahaṃ
vandē pannagatalpaśāyinamahaṃ vandē sadā rāghavam ॥ 140
siṃhāsanasthaṃ munisiddhasēvyaṃ
raktōtpalālaṅkṛtapādapadmam ।
sītāsamētaṃ śaśisūryanētraṃ
rāmaṃ bhajē rāghavarāmachandram ॥ 141
śrīrāmabhadrāśritasadgurūṇāṃ
pādāravindaṃ bhajatāṃ narāṇām ।
ārōgyamaiśvaryamanantakīrti-
rantē cha viṣṇōḥ padamasti satyam ॥ 142
daśarathavaraputraṃ jānakīsatkaḻatraṃ
daśamukhaharadakṣaṃ padmapatrāyatākṣam ।
karadhṛtaśarachāpaṃ chārumuktākalāpaṃ
raghukulanṛvarēṇyaṃ rāmamīḍē śaraṇyam ॥ 143
daśamukhagajasiṃhaṃ daityagarvātiraṃhaṃ
kadanabhayadahastaṃ tārakabrahma śastam ।
maṇikhachitakirīṭaṃ mañjulālāpavāṭaṃ
daśarathakulachandraṃ rāmachandraṃ bhajē’ham ॥ 144
rāmaṃ raktasarōruhākṣamamalaṃ laṅkādhināthāntakaṃ
kausalyānayanōtsukaṃ raghuvaraṃ nāgēndratalpasthitam ।
vaidēhīkuchakumbhakuṅkumarajōlaṅkārahāraṃ hariṃ
māyāmānuṣavigrahaṃ raghupatiṃ sītāsamētaṃ bhajē ॥ 145
rāmaṃ rākṣasamardanaṃ raghuvaraṃ daitēyabhidhvaṃsinaṃ
sugrīvēpsitarājyadaṃ surapatērbhītyantakaṃ śārṅgiṇam ।
bhaktānāmabhayapradaṃ bhayaharaṃ pāpaughavidhvaṃsinaṃ
sāmīristutapādapadmayugaḻaṃ sītāsamētaṃ bhajē ॥ 146
yatpādāmbujarēṇunā munisatī muktiṅgatā yanmahaḥ
puṇyaṃ pātakanāśanaṃ trijagatāṃ bhāti smṛtaṃ pāvanam ।
smṛtvā rāghavamapramēyamamalaṃ pūrṇēndumandasmitaṃ
taṃ rāmaṃ sarasīruhākṣamamalaṃ sītāsamētaṃ bhajē ॥ 147
vaidēhīkuchamaṇḍalāgra-vilasanmāṇikyahastāmbujaṃ
chañchatkaṅkaṇahāranūpura-lasatkēyūrahārānvitam ।
divyaśrīmaṇikuṇḍalōjjvala-mahābhūṣāsahasrānvitaṃ
vīraśrīraghupuṅgavaṃ guṇanidhiṃ sītāsamētaṃ bhajē ॥ 148
vaidēhīkuchamaṇḍalōpari-lasanmāṇikyahārāvaḻī-
madhyasthaṃ navanītakōmalaruchiṃ nīlōtpalaśyāmalam ।
kandarpāyutakōṭisundaratanuṃ pūrṇēndubimbānanaṃ
kausalyākulabhūṣaṇaṃ raghupatiṃ sītāsamētaṃ bhajē ॥ 149
divyāraṇyayatīndranāmanagarē madhyē mahāmaṇṭapē
svarṇastambhasahasraṣōḍaśayutē mandāramūlāśritē ।
nānāratnavichitranirmalamahāsiṃhāsanē saṃsthitaṃ
sītālakṣmaṇasēvitaṃ raghupatiṃ sītāsamētaṃ bhajē ॥ 150
kastūrītilakaṃ kapīndraharaṇaṃ kāruṇyavārānnidhiṃ
kṣīrāmbhōdhisutāmukhābjamadhupaṃ kalyāṇasampannidhim ।
kausalyānayanōtsukaṃ kapivaratrāṇaṃ mahāpauruṣaṃ
kaumārapriyamarkakōṭisadṛśaṃ sītāsamētaṃ bhajē ॥ 151
vidyutkōṭidivākaradyutinibhaṃ śrīkaustubhālaṅkṛtaṃ
yōgīndraissanakādibhiḥ parivṛtaṃ kailāsanāthapriyam ।
muktāratnakirīṭakuṇḍaladharaṃ graivēyahārānvitaṃ
vaidēhīkuchasannivāsamaniśaṃ sītāsamētaṃ bhajē ॥ 152
mēghaśyāmalamambujātanayanaṃ vistīrṇavakṣassthalaṃ
bāhudvandvavirājitaṃ suvadanaṃ śōṇāṅghripaṅkēruham ।
nānāratnavichitrabhūṣaṇayutaṃ kōdaṇḍabāṇāṅkitaṃ
trailōkyā’pratimānasundaratanuṃ sītāsamētaṃ bhajē ॥ 153
vaidēhīyutavāmabhāgamatulaṃ vandārumandārakaṃ
vandē prastutakīrtivāsitataruchChāyānukāriprabham ।
vaidēhīkuchakuṅkumāṅkitamahōraskaṃ mahābhūṣaṇaṃ
vēdāntairupagīyamānamasakṛtsītāsamētaṃ bhajē ॥ 154
dēvānāṃ hitakāraṇēna bhuvanē dhṛtvā’vatāraṃ dhruvaṃ
rāmaṃ kauśikayajñavighnadalanaṃ tattāṭakāsaṃharam ।
nityaṃ gautamapatniśāpadalanaśrīpādarēṇuṃ śubhaṃ
śambhōrutkaṭachāpakhaṇḍanamahāsatvaṃ bhajē rāghavam ॥ 155
śrīrāmaṃ navaratnakuṇḍaladharaṃ śrīrāmarakṣāmaṇiṃ
śrīrāmaṃ cha sahasrabhānusadṛśaṃ śrīrāmachandrōdayam ।
śrīrāmaṃ śrutakīrtimākaramahaṃ śrīrāmamuktipradaṃ
śrīrāmaṃ raghunandanaṃ bhayaharaṃ śrīrāmachandraṃ bhajē ॥ 156
rāmamindīvaraśyāmaṃ rājīvāyatalōchanam ।
jyāghōṣanirjitārātiṃ jānakīramaṇaṃ bhajē ॥ 157
dīrghabāhumaravindalōchanaṃ
dīnavatsalamanātharakṣakam ।
dīkṣitaṃ sakalalōkarakṣaṇē
daivataṃ daśarathātmajaṃ bhajē ॥ 158
prātassmarāmi raghunāthamukhāravindaṃ
mandasmitaṃ madhurabhāṣi viśālaphālam ।
karṇāvalambichalakuṇḍalagaṇḍabhāgaṃ
karṇāntadīrghanayanaṃ nayanābhirāmam ॥ 159
prātarbhajāmi raghunāthakarāravindaṃ
rakṣōgaṇāya bhayadaṃ varadaṃ nijēbhyaḥ ।
yadrājasaṃsadi vibhidya mahēśachāpaṃ
sītākaragrahaṇamaṅgaḻamāpa sadyaḥ ॥ 160
prātarnamāmi raghunāthapadāravindaṃ
padmāṅkuśādiśubharēkhaśubhāvahaṃ cha ।
yōgīndramānasamadhuvratasēvyamānaṃ
śāpāpahaṃ sapadi gautamadharmapatnyāḥ ॥ 161
prātarvadāmi vachasā raghunāthanāma
vāgdōṣahāri sakalaṃ kaluṣaṃ nihantṛ ।
yatpārvatī svapatinā saha bhōktukāmā
prītyā sahasraharināmasamaṃ jajāpa ॥ 162
prātaḥ śrayē śrutinutaṃ raghunāthamūrtiṃ
nīlāmbudōtpalasitētararatnanīlām ।
āmuktamauktikaviśēṣavibhūṣaṇāḍhyāṃ
dhyēyāṃ samastamunibhirnijabhṛtyamukhyaiḥ ॥ 163
raghukulavaranāthō jānakīprāṇanāthaḥ
pitṛvachanavidhātā kīśarājyapradātā ।
pratiniśicharanāśaḥ prāptarājyapravēśō
vihitabhuvanarakṣaḥ pātu padmāyatākṣaḥ ॥ 164
kuvalayadaḻanīlaḥ pītavāsāḥ smitāsyō
vividharuchirabhūṣābhūṣitō divyamūrtiḥ ।
daśarathakulanāthō jānakīprāṇanāthō
nivasatu mama chittē sarvadā rāmachandraḥ ॥ 165
jayatu jayatu rāmō jānakīvallabhō’yaṃ
jayatu jayatu rāmaśchandrachūḍārchitāṅghriḥ ।
jayatu jayatu vāṇīnāthanāthaḥ parātmā
jayatu jayatu rāmō’nāthanāthaḥ kṛpāḻuḥ ॥ 166
vadatu vadatu vāṇī rāmarāmēti nityaṃ
jayatu jayatu chittaṃ rāmapādāravindam ।
namatu namatu dēhaṃ santataṃ rāmachandraṃ
na bhavatu mama pāpaṃ janmajanmāntarēṣu ॥ 167
ānandarūpaṃ varadaṃ prasannaṃ
siṃhēkṣaṇaṃ sēvakapārijātam ।
nīlōtpalāṅgaṃ bhuvanaikamitraṃ
rāmaṃ bhajē rāghavarāmachandram ॥ 168
laṅkāvirāmaṃ raṇaraṅgabhīmaṃ
rājīvanētraṃ raghuvaṃśamitram ।
kāruṇyamūrtiṃ karuṇāprapūrtiṃ
śrīrāmachandraṃ śaraṇaṃ prapadyē ॥ 169
sugrīvamitraṃ paramaṃ pavitraṃ
sītākaḻatraṃ navahēmasūtram ।
kāruṇyapātraṃ śatapatranētraṃ
śrīrāmachandraṃ śirasā namāmi ॥ 170
śrīrāghavēti ramaṇēti raghūdvahēti
rāmēti rāvaṇaharēti ramādhavēti ।
sākētanāthasumukhēti cha suvratēti
vāṇī sadā vadatu rāma harē harēti ॥ 171
śrīrāmanāmāmṛtamantrabījaṃ
sañjīvanaṃ chēnmanasi pratiṣṭham ।
hālāhalaṃ vā praḻayānalaṃ vā
mṛtyōrmukhaṃ vā vitathīkarōti ॥ 172
kiṃ yōgaśāstraiḥ kimaśēṣavidyā
kiṃ yāgagaṅgādiviśēṣatīrthaiḥ ।
kiṃ brahmacharyāśramasañcharēṇa
bhaktirnachēttē raghuvaṃśakīrtyām ॥ 173
idaṃ śarīraṃ ślathasandhijarjharaṃ
patatyavaśyaṃ pariṇāmapēśalam ।
kimauṣathaṃ pṛchChasi mūḍha durmatē
nirāmayaṃ rāmakathāmṛtaṃ piba ॥ 174
hē rāmabhadrāśraya hē kṛpāḻō
hē bhaktalōkaikaśaraṇyamūrtē ।
punīhi māṃ tvachcharaṇāravindaṃ
jagatpavitraṃ śaraṇaṃ mamā’stu ॥ 175
nīlābhradēha nikhilēśa jagannivāsa
rājīvanētra ramaṇīyaguṇābhirāma ।
śrīdāma daityakulamardana rāmachandra
tvatpādapadmamaniśaṃ kalayāmi chittē ॥ 176
śrīrāmachandra karuṇākara dīnabandhō
sītāsamēta bharatāgraja rāghavēśa ।
pāpārtibhañjana bhayāturadīnabandhō
pāpāmbudhau patitamuddhara māmanātham ॥ 177
indīvaradaḻaśyāma-mindukōṭinibhānanam ।
kandarpakōṭilāvaṇyaṃ vandē’haṃ raghunandanam ॥ 175
iti śrībōdhēndrasarasvatī kṛta śrīrāmakarṇāmṛtam ॥