മംഗളശ്ലോകാഃ
മംഗളം ഭഗവാന്വിഷ്ണുര്മംഗളം മധുസൂദനഃ ।
മംഗളം പുംഡരീകാക്ഷോ മംഗളം ഗരുഡധ്വജഃ ॥ 1
മംഗളം കോസലേംദ്രായ മഹനീയഗുണാബ്ധയേ ।
ചക്രവര്തിതനൂജായ സാര്വഭൌമായ മംഗളമ് ॥ 2
വേദവേദാംതവേദ്യായ മേഘശ്യാമലമൂര്തയേ ।
പുംസാം മോഹനരൂപായ പുണ്യശ്ലോകായ മംഗളമ് ॥ 3
വിശ്വാമിത്രാംതരംഗായ മിഥിലാനഗരീപതേഃ ।
ഭാഗ്യാനാം പരിപാകായ ഭവ്യരൂപായ മംഗളമ് ॥ 4
പിതൃഭക്തായ സതതം ഭ്രാതൃഭിഃ സഹ സീതയാ ।
നംദിതാഖിലലോകായ രാമചംദ്രായ മംഗളമ് ॥ 5
ത്യക്തസാകേതവാസായ ചിത്രകൂടവിഹാരിണേ ।
സേവ്യായ സര്വയമിനാം ധീരോദാത്തായ മംഗളമ് ॥ 6
സൌമിത്രിണാ ച ജാനക്യാ ചാപബാണാസിധാരിണാ ।
സംസേവ്യായ സദാ ഭക്ത്യാ സാനുജായാസ്തു മംഗളമ് ॥ 7
ദംഡകാരണ്യവാസായ ഖംഡിതാമരശത്രവേ ।
ഗൃധ്രരാജായ ഭക്തായ മുക്തിദായാസ്തു മംഗളമ് ॥ 8
സാദരം ശബരീദത്തഫലമൂലാഭിലാഷിണേ ।
സൌലഭ്യപരിപൂര്ണായ സത്ത്വോദ്യുക്തായ മംഗളമ് ॥ 9
ഹനൂമത്സമവേതായ ഹരീശാഭീഷ്ടദായിനേ ।
വാലിപ്രമഥനായാസ്തു മഹാധീരായ മംഗളമ് ॥ 10
ശ്രീമതേ രഘുവീരായ സേതുലംഘിതസിംധവേ ।
ജിതരാക്ഷസരാജായ രണധീരായ മംഗളമ് ॥ 11
ആസാദ്യ നഗരീം ദിവ്യാമഭിഷിക്തായ സീതയാ ।
രാജാധിരാജരാജായ രാമഭദ്രായ മംഗളമ് ॥ 12
വിഭീഷണകൃതേ പ്രീത്യാ വിശ്വാഭീഷ്ടപ്രദായിനേ ।
ജാനകീപ്രാണനാഥായ സദാ രാമായ മംഗളമ് ॥ 13
—-
ശ്രീരാമം ത്രിജഗദ്ഗുരും സുരവരം സീതാമനോനായകം
ശ്യാമാംഗം ശശികോടിപൂര്ണവദനം ചംചത്കലാകൌസ്തുഭമ് ।
സൌമ്യം സത്യഗുണോത്തമം സുസരയൂതീരേ വസംതം പ്രഭും
ത്രാതാരം സകലാര്ഥസിദ്ധിസഹിതം വംദേ രഘൂണാം പതിമ് ॥ 14
ശ്രീരാഘവം ദശരഥാത്മജമപ്രമേയം
സീതാപതിം രഘുവരാന്വയരത്നദീപമ് ।
ആജാനുബാഹുമരവിംദദളായതാക്ഷം
രാമം നിശാചരവിനാശകരം നമാമി ॥ 15
ശ്രീരാമചംദ്ര കരുണാകര രാഘവേംദ്ര
രാജേംദ്രചംദ്ര രഘുവംശസമുദ്രചംദ്ര ।
സുഗ്രീവനേത്രയുഗളോത്പല-പൂര്ണചംദ്ര
സീതാമനഃകുമുദചംദ്ര നമോ നമസ്തേ ॥ 16
സീതാമനോമാനസരാജഹംസ
സംസാരസംതാപഹര ക്ഷമാവന് ।
ശ്രീരാമ ദൈത്യാംതക ശാംതരൂപ
ശ്രീതാരകബ്രഹ്മ നമോ നമസ്തേ ॥ 17
വിഷ്ണോ രാഘവ വാസുദേവ നൃഹരേ ദേവൌഘചൂഡാമണേ ।
സംസാരാര്ണവകര്ണധാരക ഹരേ കൃഷ്ണായ തുഭ്യം നമഃ ॥ 18
സുഗ്രീവാദിസമസ്തവാനരവരൈസ്സംസേവ്യമാനം സദാ ।
വിശ്വാമിത്രപരാശരാദിമുനിഭിസ്സംസ്തൂയമാനം ഭജേ ॥ 19
രാമം ചംദനശീതലം ക്ഷിതിസുതാമോഹാകരം ശ്രീകരം
വൈദേഹീനയനാരവിംദമിഹിരം സംപൂര്ണചംദ്രാനനമ് ।
രാജാനം കരുണാസമേതനയനം സീതാമനോനംദനം
സീതാദര്പണചാരുഗംഡലലിതം വംദേ സദാ രാഘവമ് ॥ 20
ജാനാതി രാമ തവ നാമരുചിം മഹേശോ
ജാനാതി ഗൌതമസതീ ചരണപ്രഭാവമ് ।
ജാനാതി ദോര്ബലപരാക്രമമീശചാപോ
ജാനാത്യമോഘപടുബാണഗതിം പയോധിഃ ॥ 21
മാതാ രാമോ മത്പിതാ രാമചംദ്രോ
ഭ്രാതാ രാമോ മത്സഖാ രാഘവേശഃ ।
സര്വസ്വം മേ രാമചംദ്രോ ദായാളു-
ര്നാന്യം ദൈവം നൈവ ജാനേ ന ജാനേ ॥ 22
വിമലകമലനേത്രം വിസ്ഫുരന്നീലഗാത്രം
തപനകുലപവിത്രം ദാനവധ്വംതമിത്രമ് ।
ഭുവനശുഭചരിത്രം ഭൂമിപുത്രീകളത്രം
ദശരഥവരപുത്രം നൌമി രാമാഖ്യമിത്രമ് ॥ 23
മാര്ഗേ മാര്ഗേ ശാഖിനാം രത്നവേദീ
വേദ്യാം വേദ്യാം കിന്നരീബൃംദഗീതമ് ।
ഗീതേ ഗീതേ മംജുലാലാപഗോഷ്ഠീ
ഗോഷ്ഠ്യാം ഗോഷ്ഠ്യാം ത്വത്കഥാ രാമചംദ്ര ॥ 24
വൃക്ഷേ വൃക്ഷേ വീക്ഷിതാഃ പക്ഷിസംഘാഃ
സംഘേ സംഘേ മംജുലാമോദവാക്യമ് ।
വാക്യേ വാക്യേ മംജുലാലാപഗോഷ്ഠീ
ഗോഷ്ഠ്യാം ഗോഷ്ഠ്യാം ത്വത്കഥാ രാമചംദ്ര ॥ 25
ദുരിതതിമിരചംദ്രോ ദുഷ്ടകംജാതചംദ്രഃ
സുരകുവലയചംദ്രസ്സൂര്യവംശാബ്ധിചംദ്രഃ ।
സ്വജനനിവഹചംദ്രശ്ശത്രുരാജീവചംദ്രഃ
പ്രണതകുമുദചംദ്രഃ പാതു മാം രാമചംദ്രഃ ॥ 26
കള്യാണദം കൌശികയജ്ഞപാലം
കളാനിധിം കാംചനശൈലധീരമ് ।
കംജാതനേത്രം കരുണാസമുദ്രം
കാകുത്സ്ഥരാമം കലയാമി ചിത്തേ ॥ 27
രാജീവായതലോചനം രഘുവരം നീലോത്പലശ്യാമലം
മംദാരാംചിതമംഡപേ സുലലിതേ സൌവര്ണകേ പുഷ്പകേ ।
ആസ്ഥാനേ നവരത്നരാജിഖചിതേ സിംഹാസനേ സംസ്ഥിതം
സീതാലക്ഷ്മണലോകപാലസഹിതം വംദേ മുനീംദ്രാസ്പദമ് ॥ 28
ധ്യായേ രാമം സുധാംശും നതസകലഭവാരണ്യതാപപ്രഹാരമ് ।
ശ്യാമം ശാംതം സുരേംദ്രം സുരമുനിവിനുതം കോടിസൂര്യപ്രകാശമ് ।
സീതാസൌമിത്രിസേവ്യം സുരനരസുഗമം ദിവ്യസിംഹാസനസ്ഥമ് ।
സായാഹ്നേ രാമചംദ്രം സ്മിതരുചിരമുഖം സര്വദാ മേ പ്രസന്നമ് ॥ 29
ഇംദ്രനീലമണിസന്നിഭദേഹം
വംദനീയമസകൃന്മുനിബൃംദൈഃ ।
ലംബമാനതുലസീവനമാലം
ചിംതയാമി സതതം രഘുവീരമ് ॥ 30
സംപൂര്ണചംദ്രവദനം സരസീരുഹാക്ഷം
മാണിക്യകുംഡലധരം മുകുടാഭിരാമമ് ।
ചാംപേയഗൌരവസനം ശരചാപഹസ്തം
ശ്രീരാമചംദ്രമനിശം മനസാ സ്മരാമി ॥ 31
മാതുഃ പാര്ശ്വേ ചരംതം മണിമയശയനേ മംജുഭൂഷാംചിതാംഗമ് ।
മംദം മംദം പിബംതം മുകുളിതനയനം സ്തന്യമന്യസ്തനാഗ്രമ് ।
അംഗുള്യാഗ്രൈഃ സ്പൃശംതം സുഖപരവശയാ സസ്മിതാലിംഗിതാംഗമ് ।
ഗാഢം ഗാഢം ജനന്യാ കലയതു ഹൃദയം മാമകം രാമബാലമ് ॥ 32
രാമാഭിരാമം നയനാഭിരാമം
വാചാഭിരാമം വദനാഭിരാമമ് ।
സര്വാഭിരാമം ച സദാഭിരാമം
വംദേ സദാ ദാശരഥിം ച രാമമ് ॥ 33
രാശബ്ദോച്ചാരമാത്രേണ മുഖാന്നിര്യാതി പാതകാഃ ।
പുനഃ പ്രവേശഭീത്യാ ച മകാരസ്തു കവാടവത് ॥ 34
അനര്ഘമാണിക്യവിരാജമാന-
ശ്രീപാദുകാലംകൃതശോഭനാഭ്യാമ് ।
അശേഷബൃംദാരകവംദിതാഭ്യാം
നമോ നമോ രാമപദാംബുജാഭ്യാമ് ॥ 35
ചലത്കനകകുംഡലോല്ലസിതദിവ്യഗംഡസ്ഥലം
ചരാചരജഗന്മയം ചരണപദ്മഗംഗാശ്രയമ് ।
ചതുര്വിധഫലപ്രദം ചരമപീഠമധ്യസ്ഥിതം
ചിദംശമഖിലാസ്പദം ദശരഥാത്മജം ചിംതയേ ॥ 36
സനംദനമുനിപ്രിയം സകലവര്ണവേദാത്മകം
സമസ്തനിഗമാഗമസ്ഫുരിതതത്ത്വസിംഹാസനമ് ।
സഹസ്രനയനാബ്ജജാദ്യമരബൃംദസംസേവിതം
സമഷ്ടിപുരവല്ലഭം ദശരഥാത്മജം ചിംതയേ ॥ 37
ജാഗ്രത്സ്വപ്നസുഷുപ്തി-കാലവിലസത്തത്ത്വാത്മചിന്മാത്രകം
ചൈതന്യാത്മകമാധിപാപരഹിതം ഭൂമ്യാദിതന്മാത്രകമ് ।
ശാംഭവ്യാദിസമസ്തയോഗകുലകം സാംഖ്യാദിതത്ത്വാത്പരം
ശബ്ദാവാച്യമഹം നമാമി സതതം വ്യുത്പത്തിനാശാത്പരമ് ॥ 38
ഇക്ഷ്വാകുവംശാര്ണവജാതരത്നം
സീതാംഗനായൌവനഭാഗ്യരത്നമ് ।
വൈകുംഠരത്നം മമ ഭാഗ്യരത്നം
ശ്രീരാമരത്നം ശിരസാ നമാമി ॥ 39
ഇക്ഷ്വാകുനംദനം സുഗ്രീവപൂജിതം
ത്രൈലോക്യരക്ഷകം സത്യസംധം സദാ ।
രാഘവം രഘുപതിം രാജീവലോചനം
രാമചംദ്രം ഭജേ രാഘവേശം ഭജേ ॥ 40
ഭക്തപ്രിയം ഭക്തസമാധിഗമ്യം
ചിംതാഹരം ചിംതിതകാമധേനുമ് ।
സൂര്യേംദുകോടിദ്യുതിഭാസ്വരം തം
രാമം ഭജേ രാഘവരാമചംദ്രമ് ॥ 41
ശ്രീരാമം ജനകക്ഷിതീശ്വരസുതാവക്ത്രാംബുജാഹാരിണം
ശ്രീമദ്ഭാനുകുലാബ്ധികൌസ്തുഭമണിം ശ്രീരത്നവക്ഷസ്സ്ഥലമ് ।
ശ്രീകംഠാദ്യമരൌഘരത്നമകുടാലംകാരപാദാംബുജം
ശ്രീവത്സോജ്ജ്വലമിംദ്രനീലസദൃശം ശ്രീരാമചംദ്രം ഭജേ ॥ 42
രാമചംദ്ര ചരിതാകഥാമൃതം
ലക്ഷ്മണാഗ്രജഗുണാനുകീര്തനമ് ।
രാഘവേശ തവ പാദസേവനം
സംഭവംതു മമ ജന്മജന്മനി ॥ 43
അജ്ഞാനസംഭവ-ഭവാംബുധിബാഡബാഗ്നി-
രവ്യക്തതത്ത്വനികരപ്രണവാധിരൂഢഃ ।
സീതാസമേതമനുജേന ഹൃദംതരാളേ
പ്രാണപ്രയാണസമയേ മമ സന്നിധത്തേ ॥ 44
രാമോ മത്കുലദൈവതം സകരുണം രാമം ഭജേ സാദരം
രാമേണാഖിലഘോരപാപനിഹതീ രാമായ തസ്മൈ നമഃ ।
രാമാന്നാസ്തി ജഗത്രയൈകസുലഭോ രാമസ്യ ദാസോഽസ്മ്യഹം
രാമേ പ്രീതിരതീവ മേ കുലഗുരോ ശ്രീരാമ രക്ഷസ്വ മാമ് ॥ 45
വൈദേഹീസഹിതം സുരദ്രുമതലേ ഹൈമേ മഹാമംടപേ ।
മധ്യേപുഷ്പകമാസനേ മണിമയേ വീരാസനേ സംസ്ഥിതമ് ।
അഗ്രേ വാചയതി പ്രഭംജനസുതേ തത്ത്വം മുനിഭ്യഃ പരമ് ।
വ്യാഖ്യാംതം ഭരതാദിഭിഃ പരിവൃതം രാമം ഭജേ ശ്യാമലമ് ॥ 46
വാമേ ഭൂമിസുതാ പുരസ്തു ഹനുമാന്പശ്ചാത്സുമിത്രാസുത-
ശ്ശത്രുഘ്നോ ഭരതശ്ച പാര്ശ്വദളയോര്വായ്വാദികോണേഷ്വപി ।
സുഗ്രീവശ്ച വിഭീഷണശ്ച യുവരാട് താരാസുതോ ജാംബവാന്
മധ്യേ നീലസരോജകോമലരുചിം രാമം ഭജേ ശ്യാമലമ് ॥ 47
കേയൂരാംഗദകംകണൈര്മണിഗണൈര്വൈരോചമാനം സദാ
രാകാപര്വണിചംദ്രകോടിസദൃശം ഛത്രേണ വൈരാജിതമ് ।
ഹേമസ്തംഭസഹസ്രഷോഡശയുതേ മധ്യേ മഹാമംഡപേ
ദേവേശം ഭരതാദിഭിഃ പരിവൃതം രാമം ഭജേ ശ്യാമലമ് ॥ 48
സാകേതേ ശരദിംദുകുംദധവളേ സൌഘേ മഹാമംടപേ ।
പര്യസ്താഗരുധൂപധൂമപടലേ കര്പൂരദീപോജ്ജ്വലേ ।
സുഗ്രീവാംഗദവായുപുത്രസഹിതം സൌമിത്രിണാ സേവിതം
ലീലാമാനുഷവിഗ്രഹം രഘുപതിം രാമം ഭജേ ശ്യാമലമ് ॥ 49
ശാംതം ശാരദചംദ്രകോടിസദൃശം ചംദ്രാഭിരാമാനനം
ചംദ്രാര്കാഗ്നിവികാസികുംഡലധരം ചംദ്രാവതംസസ്തുതമ് ।
വീണാപുസ്തകസാക്ഷസൂത്രവിലസദ്വ്യാഖ്യാനമുദ്രാകരം
ദേവേശം ഭരതാദിഭിഃ പരിവൃതം രാമം ഭജേ ശ്യാമലമ് ॥ 50
രാമം രാക്ഷസമര്ദനം രഘുപതിം ശക്രാരിവിധ്വംസിനം
സുഗ്രീവേപ്സിതരാജ്യദം സുരപതേഃ പുത്രാംതകം ശാര്‍ംഗിണമ് ।
ഭക്താനാമഭയപ്രദം ഭയഹരം പാപൌഘവിധ്വംസിനം
സീതാസേവിതപാദപദ്മയുഗളം രാമം ഭജേ ശ്യാമലമ് ॥ 51
കംദര്പായുതകോടികോടിതുലിതം കാലാംബുദശ്യാമലം
കംബുഗ്രീവമുദാരകൌസ്തുഭധരം കര്ണാവതംസോത്പലമ് ।
കസ്തൂരീതിലകോജ്ജ്വലം സ്മിതമുഖം ചിന്മുദ്രയാലംകൃതം
സീതാലക്ഷ്മണവായുപുത്രസഹിതം സിംഹാസനസ്ഥം ഭജേ ॥ 52
സാകേതേ നവരത്നപംക്തിഖചിതേ ചിത്രധ്വജാലംകൃതേ
വാസേ സ്വര്ണമയേ ദളാഷ്ടലലിതേ പദ്മേ വിമാനോത്തമേ ।
ആസീനം ഭരതാദിസോദരജനൈഃ ശാഖാമൃഗൈഃ കിന്നരൈഃ
ദിക്പാലൈര്മുനിപുംഗവൈര്നൃപഗണൈസ്സംസേവ്യമാനം ഭജേ ॥ 53
കസ്തൂരീഘനസാരകുംകുമലസച്ഛ്രീചംദനാലംകൃതം
കംദര്പാധികസുംദരം ഘനനിഭം കാകുത്സ്ഥവംശധ്വജമ് ।
കള്യാണാംഭരവേഷ്ടിതം കമലയാ യുക്തം കലാവല്ലഭം
കള്യാണാചലകാര്മുകപ്രിയസഖം കള്യാണരാമം ഭജേ ॥ 54
മുക്തേര്മൂലം മുനിവരഹൃദാനംദകംദം മുകുംദം
കൂടസ്ഥാഖ്യം സകലവരദം സര്വചൈതന്യരൂപമ് ।
നാദാതീതം കമലനിലയം നാദനാദാംതതത്ത്വം
നാദാതീതം പ്രകൃതിരഹിതം രാമചംദ്രം ഭജേഽഹമ് ॥ 55
താരാകാരം നിഖിലനിലയം തത്ത്വമസ്യാദിലക്ഷ്യം
ശബ്ദാവാച്യം ത്രിഗുണരഹിതം വ്യോമമംഗുഷ്ഠമാത്രമ് ।
നിര്വാണാഖ്യം സഗുണമഗുണവ്യോമരംധ്രാംതരസ്ഥം
സൌഷുമ്നാംതഃ പ്രണവസഹിതം രാമചംദ്രം ഭജേഽഹമ് ॥ 56
നിജാനംദാകാരം നിഗമതുരഗാരാധിതപദം
പരബ്രഹ്മാനംദം പരമപദഗം പാപഹരണമ് ।
കൃപാപാരാവാരം പരമപുരുഷം പദ്മനിലയം
ഭജേ രാമം ശ്യാമം പ്രകൃതിരഹിതം നിര്ഗുണമഹമ് ॥ 57
സാകേതേ നഗരേ സമസ്തമഹിമാധാരേ ജഗന്മോഹനേ
രത്നസ്തംഭസഹസ്രമംടപമഹാസിംഹാസനേ സാംബുജേ ।
വിശ്വാമിത്രവസിഷ്ഠഗൌതമശുകവ്യാസാദിഭിര്മൌനിഭിഃ
ധ്യേയം ലക്ഷ്മണലോകപാലസഹിതം സീതാസമേതം ഭജേ ॥ 58
രാമം ശ്യാമാഭിരാമം രവിശശിനയനം കോടിസൂര്യപ്രകാശം
ദിവ്യം ദിവ്യാസ്ത്രപാണിം ശരമുഖശരധിം ചാരുകോഡംഡഹസ്തമ് ।
കാലം കാലാഗ്നിരുദ്രം രിപുകുലദഹനം വിഘ്നവിച്ഛേദദക്ഷം
ഭീമം ഭീമാട്ടഹാസം സകലഭയഹരം രാമചംദ്രം ഭജേഽഹമ് ॥ 59
ശ്രീരാമം ഭുവനൈകസുംദരതനും ധാരാധരശ്യാമലം
രാജീവായതലോചനം രഘുവരം രാകേംദുബിംബാനനമ് ।
കോദംഡാദിനിജായുധാശ്രിതഭുജൈര്ഭ്രാംതം വിദേഹാത്മജാ-
ധീശം ഭക്തജനാവനം രഘുവരം ശ്രീരാമചംദ്രം ഭജേ ॥ 60
ശ്രീവത്സാംകമുദാരകൌസ്തുഭലസത്പീതാംബരാലംകൃതം
നാനാരത്നവിരാജമാനമകുടം നീലാംബുദശ്യാമലമ് ।
കസ്തൂരീഘനസാരചര്ചിതതനും മംദാരമാലാധരം
കംദര്പായുതസുംദരം രഘുപതിം സീതാസമേതം ഭജേ ॥ 61
സദാനംദദേവേ സഹസ്രാരപദ്മേ
ഗലച്ചംദ്രപീയൂഷധാരാമൃതാംതേ ।
സ്ഥിതം രാമമൂര്തിം നിഷേവേ നിഷേവേ-
ഽന്യദൈവം ന സേവേ ന സേവേ ന സേവേ ॥ 62
സുധാഭാസിതദ്വീപമധ്യേ വിമാനേ
സുപര്വാളിവൃക്ഷോജ്ജ്വലേ ശേഷതല്പേ ।
നിഷണ്ണം രമാംകം നിഷേവേ നിഷേവേ-
ഽന്യദൈവം ന സേവേ ന സേവേ ന സേവേ ॥ 63
ചിദംശം സമാനംദമാനംദകംദം
സുഷുമ്നാഖ്യരംധ്രാംതരാളേ ച ഹംസമ് ।
സചക്രം സശംഖം സപീതാംബരാംകം
പരംചാന്യദൈവം ന ജാനേ ന ജാനേ ॥ 64
ചതുര്വേദകൂടോല്ലസത്കാരണാഖ്യം
സ്ഫുരദ്ദിവ്യവൈമാനികേ ഭോഗിതല്പേ ।
പരംധാമമൂര്തിം നിഷണ്ണം നിഷേവേ
നിഷേവേഽന്യദൈവം ന സേവേ ന സേവേ ॥ 65
സിംഹാസനസ്ഥം സുരസേവിതവ്യം
രത്നാംകിതാലംകൃതപാദപദ്മമ് ।
സീതാസമേതം ശശിസൂര്യനേത്രം
രാമം ഭജേ രാഘവ രാമചംദ്രമ് ॥ 66
രാമം പുരാണപുരുഷം രമണീയവേഷം
രാജാധിരാജമകുടാര്ചിതപാദപീഠമ് ।
സീതാപതിം സുനയനം ജഗദേകവീരം
ശ്രീരാമചംദ്രമനിശം കലയാമി ചിത്തേ ॥ 67
പരാനംദവസ്തുസ്വരൂപാദിസാക്ഷിം
പരബ്രഹ്മഗമ്യം പരംജ്യോതിമൂര്തിമ് ।
പരാശക്തിമിത്രാഽപ്രിയാരാധിതാംഘ്രിം
പരംധാമരൂപം ഭജേ രാമചംദ്രമ് ॥ 68
മംദസ്മിതം കുംഡലഗംഡഭാഗം
പീതാംബരം ഭൂഷണഭൂഷിതാംഗമ് ।
നീലോത്പലാംഗം ഭുവനൈകമിത്രം
രാമം ഭജേ രാഘവ രാമചംദ്രമ് ॥ 69
അചിംത്യമവ്യക്തമനംതരൂപ-
മദ്വൈതമാനംദമനാദിഗമ്യമ് ।
പുണ്യസ്വരൂപം പുരുഷോത്തമാഖ്യം
രാമം ഭജേ രാഘവ രാമചംദ്രമ് ॥ 70
പദ്മാസനസ്ഥം സുരസേവിതവ്യം
പദ്മാലയാനംദകടാക്ഷവീക്ഷ്യമ് ।
ഗംധര്വവിദ്യാധരഗീയമാനം
രാമം ഭജേ രാഘവ രാമചംദ്രമ് ॥ 71
അനംതകീര്തിം വരദം പ്രസന്നം
പദ്മാസനം സേവകപാരിജാതമ് ।
രാജാധിരാജം രഘുവീരകേതും
രാമം ഭജേ രാഘവ രാമചംദ്രമ് ॥ 72
സുഗ്രീവമിത്രം സുജനാനുരൂപം
ലംകാഹരം രാക്ഷസവംശനാശമ് ।
വേദാശ്രയാംഗം വിപുലായതാക്ഷം
രാമം ഭജേ രാഘവ രാമചംദ്രമ് ॥ 73
സകൃത്പ്രണതരക്ഷായാം സാക്ഷീ യസ്യ വിഭീഷണഃ ।
സാപരാധപ്രതീകാരഃ സ ശ്രീരാമോ ഗതിര്മമ ॥ 74
ഫലമൂലാശിനൌ ദാംതൌ താപസൌ ധര്മചാരിണൌ ।
രക്ഷഃകുലവിഹംതാരൌ ഭ്രാതരൌ രാമലക്ഷ്മണൌ ॥ 75
തരുണൌ രൂപസംപന്നൌ സുകുമാരൌ മഹാബലൌ ।
പുംഡരീക വിശാലാക്ഷൌ ചീരകൃഷ്ണാജിനാംബരൌ ॥ 76
കൌസല്യാനയനേംദും ദശരഥമുഖാരവിംദമാര്താംഡമ് ।
സീതാമാനസഹംസം രാമം രാജീവലോചനം വംദേ ॥ 77
ഭര്ജനം ഭവബീജാനാം മാര്ജനം സുഖസംപദാമ് ।
തര്ജനം യമദൂതാനാം രാമരാമേതി കീര്തനമ് ॥ 78
ന ജാനേ ജാനകീ ജാനേ രാമ ത്വന്നാമവൈഭവമ് ।
സര്വേശോ ഭഗവാന് ശംഭുര്വാല്മീകിര്വേത്തി വാ നവാ ॥ 79
കരതലധൃതചാപം കാലമേഘസ്വരൂപം
സരസിജദളനേത്രം ചാരുഹാസം സുഗാത്രമ് ।
വിചിനുതവനവാസം വിക്രമോദഗ്രവേഷം
പ്രണമത രഘുനാഥം ജാനകീപ്രാണനാഥമ് ॥ 80
വിദ്യുത്സ്ഫുരന്മകരകുംഡലദീപ്തചാരു-
ഗംഡസ്ഥലം മണികിരീടവിരാജമാനമ് ।
പീതാംബരം ജലദനീലമുദാരകാംതിം
ശ്രീരാമചംദ്രമനിശം കലയാമി ചിത്തേ ॥ 81
രത്നോല്ലസജ്ജ്വലിതകുംഡലഗംഡഭാഗം
കസ്തൂരികാതിലകശോഭിതഫാലഭാഗമ് ।
കര്ണാംതദീര്ഘനയനം കരുണാകടാക്ഷം
ശ്രീരാമചംദ്ര മുഖമാത്മനി സന്നിധത്തമ് ॥ 82
വൈദേഹീസഹിതം ച ലക്ഷ്മണയുതം കൈകേയിപുത്രാന്വിതം
സുഗ്രീവം ച വിഭീഷണാനിലസുതൌ നീലം നലം സാംഗദമ് ।
വിശ്വാമിത്രവസിഷ്ഠഗൌതമഭരദ്വാജാദികാന് മാനയന്
രാമോ മാരുതിസേവിതഃ സ്മരതു മാം സാമ്രാജ്യസിംഹാസനേ ॥ 83
സകലഗുണനിധാനം യോഗിഭിസ്സ്തൂയമാനം
ഭജിതസുരവിമാനം രക്ഷിതേംദ്രാദിമാനമ് ।
മഹിതവൃഷഭയാനം സീതയാ ശോഭമാനം
സ്മരതു ഹൃദയഭാനും ബ്രഹ്മരാമാഭിരാമമ് ॥ 84
ത്രിദശകുമുദചംദ്രോ ദാനവാംഭോജചംദ്രോ
ദുരിതതിമിരചംദ്രോ യോഗിനാം ജ്ഞാനചംദ്രഃ ।
പ്രണതനയനചംദ്രോ മൈഥിലീനേത്രചംദ്രോ
ദശമുഖരിപുചംദ്രഃ പാതു മാം രാമചംദ്രഃ ॥ 85
യന്നാമൈവ സഹസ്രനാമസദൃശം യന്നാമ വേദൈസ്സമം
യന്നാമാംകിതവാക്യ-മാസുരബലസ്ത്രീഗര്ഭവിച്ഛേദനമ് ।
യന്നാമ ശ്വപചാര്യഭേദരഹിതം മുക്തിപ്രദാനോജ്ജ്വലം
തന്നാമാഽലഘുരാമരാമരമണം ശ്രീരാമനാമാമൃതമ് ॥ 86
രാജീവനേത്ര രഘുപുംഗവ രാമഭദ്ര
രാകേംദുബിംബസദൃശാനന നീലഗാത്ര ।
രാമാഽഭിരാമ രഘുവംശസമുദ്ഭവ ത്വം
ശ്രീരാമചംദ്ര മമ ദേഹി കരാവലംബമ് ॥ 87
മാണിക്യമംജീരപദാരവിംദം
രാമാര്കസംഫുല്ലമുഖാരവിംദമ് ।
ഭക്താഭയപ്രാപികരാരവിംദാം
ദേവീം ഭജേ രാഘവവല്ലഭാം താമ് ॥ 88
ജയതു വിജയകാരീ ജാനകീമോദകാരീ
തപനകുലവിഹാരീ ദംഡകാരണ്യചാരീ ।
ദശവദനകുഠാരീ ദൈത്യവിച്ഛേദകാരീ
മണിമകുടകധാരീ ചംഡകോദംഡധാരീ ॥ 89
രാമഃ പിതാ രഘവ ഏവ മാതാ
രാമസ്സുബംധുശ്ച സഖാ ഹിതശ്ച ।
രാമോ ഗുരുര്മേ പരമം ച ദൈവം
രാമം വിനാ നാഽന്യമഹം സ്മരാമി ॥ 90
ശ്രീരാമ മേ ത്വം ഹി പിതാ ച മാതാ
ശ്രീരാമ മേ ത്വം ഹി സുഹൃച്ച ബംധുഃ ।
ശ്രീരാമ മേ ത്വം ഹി ഗുരുശ്ച ഗോഷ്ഠീ
ശ്രീരാമ മേ ത്വം ഹി സമസ്തമേവ ॥ 91
രാമചംദ്രചരിതാമൃതപാനം
സോമപാനശതകോടിസമാനമ് ।
സോമപാനശതകോടിഭിരീയാ-
ജ്ജന്മ നൈതി രഘുനായകനാമ്നാ ॥ 92
രാമ രാമ ദയാസിംധോ രാവണാരേ ജഗത്പതേ ।
ത്വത്പാദകമലാസക്തി-ര്ഭവേജ്ജന്മനി ജന്മനി ॥ 93
ശ്രീരാമചംദ്രേതി ദയാപരേതി
ഭക്തപ്രിയേതി ഭവബംധനമോചനേതി ।
നാഥേതി നാഗശയനേതി സദാ സ്തുവംതം
മാം പാഹി ഭീതമനിശം കൃപണം കൃപാളോ ॥ 94
അയോധ്യാനാഥ രാജേംദ്ര സീതാകാംത ജഗത്പതേ ।
ശ്രീരാമ പുംഡരീകാക്ഷ രാമചംദ്ര നമോഽസ്തു തേ ॥ 95
ഹേ രാമ ഹേ രമണ ഹേ ജഗദേകവീര
ഹേ നാഥ ഹേ രഘുപതേ കരുണാലവാല ।
ഹേ ജാനകീരമണ ഹേ ജഗദേകബംധോ
മാം പാഹി ദീനമനിശം കൃപണം കൃതഘ്നമ് ॥ 96
ജാനാതി രാമ തവ തത്ത്വഗതിം ഹനൂമാന് ।
ജാനാതി രാമ തവ സഖ്യഗതിം കപീശഃ ।
ജാനാതി രാമ തവ യുദ്ധഗതിം ദശാസ്യോ ।
ജാനാതി രാമ ധനദാനുജ ഏവ സത്യമ് ॥ 97
സേവ്യം ശ്രീരാമമംത്രം ശ്രവണശുഭകരം ശ്രേഷ്ഠസുജ്ഞാനിമംത്രം
സ്തവ്യം ശ്രീരാമമംത്രം നരകദുരിതദുര്വാരനിര്ഘാതമംത്രമ് ।
ഭവ്യം ശ്രീരാമമംത്രം ഭജതു ഭജതു സംസാരനിസ്താരമംത്രം
ദിവ്യം ശ്രീരാമമംത്രം ദിവി ഭുവി വിലസന്മോക്ഷരക്ഷൈകമംത്രമ് ॥ 98
നിഖിലനിലയമംത്രം നിത്യതത്ത്വാഖ്യമംത്രം
ഭവകുലഹരമംത്രം ഭൂമിജാപ്രാണമംത്രമ് ।
പവനജനുതമംത്രം പാര്വതീമോക്ഷമംത്രം
പശുപതിനിജമംത്രം പാതു മാം രാമമംത്രമ് ॥ 99
പ്രണവനിലയമംത്രം പ്രാണനിര്വാണമംത്രം
പ്രകൃതിപുരുഷമംത്രം ബ്രഹ്മരുദ്രേംദ്രമംത്രമ് ।
പ്രകടദുരിതരാഗദ്വേഷനിര്ണാശമംത്രം
രഘുപതിനിജമംത്രം രാമരാമേതിമംത്രമ് ॥ 100
ദശരഥസുതമംത്രം ദൈത്യസംഹാരമംത്രം
വിബുധവിനുതമംത്രം വിശ്വവിഖ്യാതമംത്രമ് ।
മുനിഗണനുതമംത്രം മുക്തിമാര്ഗൈകമംത്രം
രഘുപതിനിജമംത്രം രാമരാമേതിമംത്രമ് ॥ 101
സംസാരസാഗരഭയാപഹവിശ്വമംത്രം
സാക്ഷാന്മുമുക്ഷുജനസേവിതസിദ്ധമംത്രമ് ।
സാരംഗഹസ്തമുഖഹസ്തനിവാസമംത്രം
കൈവല്യമംത്രമനിശം ഭജ രാമമംത്രമ് ॥ 102
ജയതു ജയതു മംത്രം ജന്മസാഫല്യമംത്രം
ജനനമരണഭേദക്ലേശവിച്ഛേദമംത്രമ് ।
സകലനിഗമമംത്രം സര്വശാസ്ത്രൈകമംത്രം
രഘുപതിനിജമംത്രം രാമരാമേതിമംത്രമ് ॥ 103
ജഗതി വിശദമംത്രം ജാനകീപ്രാണമംത്രം
വിബുധവിനുതമംത്രം വിശ്വവിഖ്യാതമംത്രമ് ।
ദശരഥസുതമംത്രം ദൈത്യസംഹാരമംത്രം
രഘുപതിനിജമംത്രം രാമരാമേതിമംത്രമ് ॥ 104
ബ്രഹ്മാദിയോഗിമുനിപൂജിതസിദ്ധമംത്രം
ദാരിദ്ര്യദുഃഖഭവരോഗവിനാശമംത്രമ് ।
സംസാരസാഗരസമുത്തരണൈകമംത്രം
വംദേ മഹാഭയഹരം രഘുരാമമംത്രമ് ॥ 105
ശത്രുച്ഛേദൈകമംത്രം സരസമുപനിഷദ്വാക്യസംപൂജ്യമംത്രം
സംസാരോത്താരമംത്രം സമുചിതസമയേ സംഗനിര്യാണമംത്രമ് ।
സര്വൈശ്വര്യൈകമംത്രം വ്യസനഭുജഗസംദഷ്ടസംത്രാണമംത്രം
ജിഹ്വേ ശ്രീരാമമംത്രം ജപ ജപ സഫലം ജന്മസാഫല്യമംത്രമ് ॥ 106
നിത്യം ശ്രീരാമമംത്രം നിരുപമമധികം നീതിസുജ്ഞാനമംത്രം
സത്യം ശ്രീരാമമംത്രം സദമലഹൃദയേ സര്വദാരോഗ്യമംത്രമ് ।
സ്തുത്യം ശ്രീരാമമംത്രം സുലലിതസുമനസ്സൌഖ്യസൌഭാഗ്യമംത്രം
പഠ്യം ശ്രീരാമമംത്രം പവനജവരദം പാതു മാം രാമമംത്രമ് ॥ 107
വ്യാമോഹപ്രശമൌഷധം മുനിമനോവൃത്തിപ്രവൃത്ത്യൌഷധം
ദൈത്യോന്മൂലകരൌഷധം ഭവഭയപ്രധ്വംസനൈകൌഷധമ് ।
ഭക്താനംദകരൌഷധം ത്രിഭുവനേ സംജീവനൈകൌഷധം
ശ്രേയഃ പ്രാപ്തികരൌഷധം പിബ മനഃ ശ്രീരാമനാമൌഷധമ് ॥ 108
സകലഭുവനരത്നം സര്വശാസ്ത്രാര്ഥരത്നം
സമരവിജയരത്നം സച്ചിദാനംദരത്നമ് ।
ദശമുഖഹരരത്നം ദാനവാരാതിരത്നം
രഘുകുലനൃപരത്നം പാതു മാം രാമരത്നമ് ॥ 109
സകലഭുവനരത്നം സച്ചിദാനംദരത്നം
സകലഹൃദയരത്നം സൂര്യബിംബാംതരത്നമ് ।
വിമലസുകൃതരത്നം വേദവേദാംതരത്നം
പുരഹരജപരത്നം പാതു മാം രാമരത്നമ് ॥ 110
നിഗമശിഖരരത്നം നിര്മലാനംദരത്നം
നിരുപമഗുണരത്നം നാദനാദാംതരത്നമ് ।
ദശരഥകുലരത്നം ദ്വാദശാംതസ്സ്ഥരത്നം
പശുപതിജപരത്നം പാതു മാം രാമരത്നമ് ॥ 111
ശതമഖസുതരത്നം ഷോഡശാംതസ്സ്ഥരത്നം
മുനിജനജപരത്നം മുഖ്യവൈകുംഠരത്നമ് ।
നിരുപമഗുണരത്നം നീരജാംതസ്സ്ഥരത്നം
പരമപദവിരത്നം പാതു മാം രാമരത്നമ് ॥ 112
സകലസുകൃതരത്നം സത്യവാക്യാര്ഥരത്നം
ശമദമഗുണരത്നം ശാശ്വതാനംദരത്നമ് ।
പ്രണയനിലയരത്നം പ്രസ്ഫുടദ്യോതിരത്നം
പരമപദവിരത്നം പാതു മാം രാമരത്നമ് ॥ 113
നിഗമശിഖരരത്നം നിത്യമാശാസ്യരത്നം
ജനനുതനൃപരത്നം ജാനകീരൂപരത്നമ് ।
ഭുവനവലയരത്നം ഭൂഭുജാമേകരത്നം
രഘുകുലവരരത്നം പാതു മാം രാമരത്നമ് ॥ 114
വിശാലനേത്രം പരിപൂര്ണഗാത്രം
സീതാകലത്രം സുരവൈരിജൈത്രമ് ।
കാരുണ്യപാത്രം ജഗതഃ പവിത്രം
ശ്രീരാമരത്നം പ്രണതോഽസ്മി നിത്യമ് ॥ 115
ഹേ ഗോപാലക ഹേ ദയാജലനിധേ ഹേ സദ്ഗുണാംഭോനിധേ
ഹേ ദൈത്യാംതക ഹേ വിഭീഷണദയാപരീണ ഹേ ഭൂപതേ ।
ഹേ വൈദേഹസുതാമനോജവിഹൃതേ ഹേ കോടിമാരാകൃതേ
ഹേ നവ്യാംബുജനേത്ര പാലയ പരം ജാനാമി ന ത്വാം വിനാ ॥ 116
യസ്യ കിംചിദപി നോ ഹരണീയം
കര്മ കിംചിദപി നോ ചരണീയമ് ।
രാമനാമ ച സദാ സ്മരണീയം
ലീലയാ ഭവജലം തരണീയമ് ॥ 117
ദശരഥസുതമീശം ദംഡകാരണ്യവാസം
ശതമഖമണിനീലം ജാനകീപ്രാണലോലമ് ।
സകലഭുവനമോഹം സന്നുതാംഭോദദേഹം
ബഹുളനുതസമുദ്രം ഭാവയേ രാമഭദ്രമ് ॥ 118
വിശാലനേത്രം പരിപൂര്ണഗാത്രം
സീതാകളത്രം സുരവൈരിജൈത്രമ് ।
ജഗത്പവിത്രം പരമാത്മതംത്രം
ശ്രീരാമചംദ്രം പ്രണമാമി ചിത്തേ ॥ 119
ജയ ജയ രഘുരാമ ശ്രീമുഖാംഭോജഭാനോ
ജയ ജയ രഘുവീര ശ്രീമദംഭോജനേത്ര ।
ജയ ജയ രഘുനാഥ ശ്രീകരാഭ്യര്ചിതാംഘ്രി
ജയ ജയ രഘുവര്യ ശ്രീശ കാരുണ്യസിംധോ ॥ 120
മംദാരമൂലേ മണിപീഠസംസ്ഥം
സുധാപ്ലുതം ദിവ്യവിരാട്സ്വരൂപമ് ।
സബിംദുനാദാംതകലാംതതുര്യ-
മൂര്തിം ഭജേഽഹം രഘുവംശരത്നമ് ॥ 121
നാദം നാദവിനീലചിത്തപവനം നാദാംതത്ത്വപ്രിയം
നാമാകാരവിവര്ജിതം നവഘനശ്യാമാംഗനാദപ്രിയമ് ।
നാദാംഭോജമരംദമത്തവിലസദ്ഭൃംഗം മദാംതസ്സ്ഥിതം
നാദാംതധൃവമംഡലാബ്ജരുചിരം രാമം ഭജേ താരകമ് ॥ 122
നാനാഭൂതഹൃദബ്ജപദ്മനിലയം നാമോജ്ജ്വലാഭൂഷണമ് ।
നാമസ്തോത്രപവിത്രിതത്രിഭുവനം നാരായണാഷ്ടാക്ഷരമ് ।
നാദാംതേംദുഗളത്സുധാപ്ലുതതനും നാനാത്മചിന്മാത്രകമ് ।
നാനാകോടിയുഗാംതഭാനുസദൃശം രാമം ഭജേ താരകമ് ॥ 123
വേദ്യം വേദഗുരും വിരിംചിജനകം വേദാംതമൂര്തിം സ്ഫുര-
ദ്വേദം വേദകലാപമൂലമഹിമാധാരാംതകംദാംകുരമ് ।
വേദശൃംഗസമാനശേഷശയനം വേദാംതവേദ്യാത്മകം
വേദാരാധിതപാദപംകജമഹം രാമം ഭജേ താരകമ് ॥ 124
മജ്ജീവം മദനുഗ്രഹം മദധിപം മദ്ഭാവനം മത്സുഖം
മത്താതം മമ സദ്ഗുരും മമ വരം മോഹാംധവിച്ഛേദനമ് ।
മത്പുണ്യം മദനേകബാംധവജനം മജ്ജീവനം മന്നിധിം
മത്സിദ്ധിം മമ സര്വകര്മസുകൃതം രാമം ഭജേ താരകമ് ॥ 125
നിത്യം നീരജലോചനം നിരുപമം നീവാരശൂകോപമം
നിര്ഭേദാനുഭവം നിരംതരഗുണം നീലാംഗരാഗോജ്ജ്വലമ് ।
നിഷ്പാപം നിഗമാഗമാര്ചിതപദം നിത്യാത്മകം നിര്മലം
നിഷ്പുണ്യം നിഖിലം നിരംജനപദം രാമം ഭജേ താരകമ് ॥ 126
ധ്യായേ ത്വാം ഹൃദയാംബുജേ രഘുപതിം വിജ്ഞാനദീപാംകുരം
ഹംസോഹംസപരംപരാദിമഹിമാധാരം ജഗന്മോഹനമ് ।
ഹസ്താംഭോജഗദാബ്ജചക്രമതുലം പീതാംബരം കൌസ്തുഭം
ശ്രീവത്സം പുരുഷോത്തമം മണിനിഭം രാമം ഭജേ താരകമ് ॥ 127
സത്യജ്ഞാനമനംതമച്യുതമജം ചാവ്യാകൃതം തത്പരം
കൂടസ്ഥാദിസമസ്തസാക്ഷിമനഘം സാക്ഷാദ്വിരാട്തത്ത്വദമ് ।
വേദ്യം വിശ്വമയം സ്വലീനഭുവനസ്വാരാജ്യസൌഖ്യപ്രദം
പൂര്ണം പൂര്ണതരം പുരാണപുരുഷം രാമം ഭജേ താരകമ് ॥ 128
രാമം രാക്ഷസവംശനാശനകരം രാകേംദുബിംബാനനം
രക്ഷോരിം രഘുവംശവര്ധനകരം രക്താധരം രാഘവമ് ।
രാധായാത്മനിവാസിനം രവിനിഭം രമ്യം രമാനായകം
രംധ്രാംതര്ഗതശേഷശായിനമഹം രാമം ഭജേ താരകമ് ॥ 129
ഓതപ്രോതസമസ്തവസ്തുനിചയം ഓംകാരബീജാക്ഷരം
ഓംകാരപ്രകൃതിം ഷഡക്ഷരഹിതം ഓംകാരകംദാംകുരമ് ।
ഓംകാരസ്ഫുടഭൂര്ഭുവസ്സുപരിതം ഓഘത്രയാരാധിതമ്
ഓംകാരോജ്ജ്വലസിംഹപീഠനിലയം രാമം ഭജേ താരകമ് ॥ 130
സാകേതേ നഗരേ സമസ്തസുഖദേ ഹര്മ്യേഽബ്ജകോടിദ്യുതേ
നക്ഷത്രഗ്രഹപംക്തിലഗ്നശിഖരേ ചാംതര്യപംകേരുഹേ ।
വാല്മീകാത്രിപരാശരാദിമുനിഭിസ്സംസേവ്യമാനം സ്ഥിതം
സീതാലംകൃതവാമഭാഗമനിശം രാമം ഭജേ താരകമ് ॥ 131
വൈകുംഠേ നഗരേ സുരദ്രുമതലേ ചാനംദവപ്രാംതരേ
നാനാരത്നവിനിര്മിതസ്ഫുടപടുപ്രാകാരസംവേഷ്ടിതേ ।
സൌധേംദൂപലശേഷതല്പലലിതേ നീലോത്പലച്ഛാദിതേ
പര്യംകേ ശയനം രമാദിസഹിതം രാമം ഭജേ താരകമ് ॥ 132
വംദേ രാമമനാദിപൂരുഷമജം വംദേ രമാനായകം
വംദേ ഹാരികിരീടകുംഡലധരം വംദേ സുനീലദ്യുതിമ് ।
വംദേ ചാപകലംബകോജ്ജ്വലകരം വംദേ ജഗന്മംഗളം
വംദേ പംക്തിരഥാത്മജം മമ ഗുരും വംദേ സദാ രാഘവമ് ॥ 133
വംദേ ശൌനകഗൌതമാദ്യഭിനുതം വംദേ ഘനശ്യാമലം
വംദേ താരകപീഠമധ്യനിലയം വംദേ ജഗന്നായകമ് ।
വംദേ ഭക്തജനൌഘദേവിവടപം വംദേ ധനുര്വല്ലഭം
വംദേ തത്ത്വമസീതിവാക്യജനകം വംദേ സദാ രാഘവമ് ॥ 134
വംദേ സൂര്യശശാംകലോചനയുഗം വംദേ ജഗത്പാവനം
വംദേ പത്രസഹസ്രപദ്മനിലയം വംദേ പുരാരിപ്രിയമ് ।
വംദേ രാക്ഷസവംശനാശനകരം വംദേ സുധാശീതലം
വംദേ ദേവകപീംദ്രകോടിവിനുതം വംദേ സദാ രാഘവമ് ॥ 135
വംദേ സാഗരഗര്വഭംഗവിശിഖം വംദേ ജഗജ്ജീവനം
വംദേ കൌശികയാഗരക്ഷണകരം വംദേ ഗുരുണാം ഗുരുമ് ।
വംദേ ബാണശരാസനോജ്ജ്വലകരം വംദേ ജടാവല്കലം
വംദേ ലക്ഷ്മണഭൂമിജാന്വിതമഹം വംദേ സദാ രാഘവമ് ॥ 136
വംദേ പാംഡരപുംഡരീകനയനം വംദേഽബ്ജബിംബാനനം
വംദേ കംബുഗളം കരാബ്ജയുഗളം വംദേ ലലാടോജ്ജ്വലമ് ।
വംദേ പീതദുകൂലമംബുദനിഭം വംദേ ജഗന്മോഹനം
വംദേ കാരണമാനുഷോജ്ജ്വലതനും വംദേ സദാ രാഘവമ് ॥ 137
വംദേ നീലസരോജകോമലരുചിം വംദേ ജഗദ്വംദിതം
വംദേ സൂര്യകുലാബ്ധികൌസ്തുഭമണിം വംദേ സുരാരാധിതമ് ।
വംദേ പാതകപംചകപ്രഹരണം വംദേ ജഗത്കാരണം
വംദേ വിംശതിപംചതത്ത്വരഹിതം വംദേ സദാ രാഘവമ് ॥ 138
വംദേ സാധകവര്ഗകല്പകതരും വംദേ ത്രിമൂര്ത്യാത്മകം
വംദേ നാദലയാംതരസ്ഥലഗതം വംദേ ത്രിവര്ഗാത്മകമ് ।
വംദേ രാഗവിഹീനചിത്തസുലഭം വംദേ സഭാനായകം
വംദേ പൂര്ണദയാമൃതാര്ണവമഹം വംദേ സദാ രാഘവമ് ॥ 139
വംദേ സാത്ത്വികതത്ത്വമുദ്രിതതനും വംദേ സുധാദായകം
വംദേ ചാരുചതുര്ഭുജം മണിനിഭം വംദേ ഷഡബ്ജസ്ഥിതമ് ।
വംദേ ബ്രഹ്മപിപീലികാദിനിലയം വംദേ വിരാട്വിഗ്രഹം
വംദേ പന്നഗതല്പശായിനമഹം വംദേ സദാ രാഘവമ് ॥ 140
സിംഹാസനസ്ഥം മുനിസിദ്ധസേവ്യം
രക്തോത്പലാലംകൃതപാദപദ്മമ് ।
സീതാസമേതം ശശിസൂര്യനേത്രം
രാമം ഭജേ രാഘവരാമചംദ്രമ് ॥ 141
ശ്രീരാമഭദ്രാശ്രിതസദ്ഗുരൂണാം
പാദാരവിംദം ഭജതാം നരാണാമ് ।
ആരോഗ്യമൈശ്വര്യമനംതകീര്തി-
രംതേ ച വിഷ്ണോഃ പദമസ്തി സത്യമ് ॥ 142
ദശരഥവരപുത്രം ജാനകീസത്കളത്രം
ദശമുഖഹരദക്ഷം പദ്മപത്രായതാക്ഷമ് ।
കരധൃതശരചാപം ചാരുമുക്താകലാപം
രഘുകുലനൃവരേണ്യം രാമമീഡേ ശരണ്യമ് ॥ 143
ദശമുഖഗജസിംഹം ദൈത്യഗര്വാതിരംഹം
കദനഭയദഹസ്തം താരകബ്രഹ്മ ശസ്തമ് ।
മണിഖചിതകിരീടം മംജുലാലാപവാടം
ദശരഥകുലചംദ്രം രാമചംദ്രം ഭജേഽഹമ് ॥ 144
രാമം രക്തസരോരുഹാക്ഷമമലം ലംകാധിനാഥാംതകം
കൌസല്യാനയനോത്സുകം രഘുവരം നാഗേംദ്രതല്പസ്ഥിതമ് ।
വൈദേഹീകുചകുംഭകുംകുമരജോലംകാരഹാരം ഹരിം
മായാമാനുഷവിഗ്രഹം രഘുപതിം സീതാസമേതം ഭജേ ॥ 145
രാമം രാക്ഷസമര്ദനം രഘുവരം ദൈതേയഭിധ്വംസിനം
സുഗ്രീവേപ്സിതരാജ്യദം സുരപതേര്ഭീത്യംതകം ശാര്‍ംഗിണമ് ।
ഭക്താനാമഭയപ്രദം ഭയഹരം പാപൌഘവിധ്വംസിനം
സാമീരിസ്തുതപാദപദ്മയുഗളം സീതാസമേതം ഭജേ ॥ 146
യത്പാദാംബുജരേണുനാ മുനിസതീ മുക്തിംഗതാ യന്മഹഃ
പുണ്യം പാതകനാശനം ത്രിജഗതാം ഭാതി സ്മൃതം പാവനമ് ।
സ്മൃത്വാ രാഘവമപ്രമേയമമലം പൂര്ണേംദുമംദസ്മിതം
തം രാമം സരസീരുഹാക്ഷമമലം സീതാസമേതം ഭജേ ॥ 147
വൈദേഹീകുചമംഡലാഗ്ര-വിലസന്മാണിക്യഹസ്താംബുജം
ചംചത്കംകണഹാരനൂപുര-ലസത്കേയൂരഹാരാന്വിതമ് ।
ദിവ്യശ്രീമണികുംഡലോജ്ജ്വല-മഹാഭൂഷാസഹസ്രാന്വിതം
വീരശ്രീരഘുപുംഗവം ഗുണനിധിം സീതാസമേതം ഭജേ ॥ 148
വൈദേഹീകുചമംഡലോപരി-ലസന്മാണിക്യഹാരാവളീ-
മധ്യസ്ഥം നവനീതകോമലരുചിം നീലോത്പലശ്യാമലമ് ।
കംദര്പായുതകോടിസുംദരതനും പൂര്ണേംദുബിംബാനനം
കൌസല്യാകുലഭൂഷണം രഘുപതിം സീതാസമേതം ഭജേ ॥ 149
ദിവ്യാരണ്യയതീംദ്രനാമനഗരേ മധ്യേ മഹാമംടപേ
സ്വര്ണസ്തംഭസഹസ്രഷോഡശയുതേ മംദാരമൂലാശ്രിതേ ।
നാനാരത്നവിചിത്രനിര്മലമഹാസിംഹാസനേ സംസ്ഥിതം
സീതാലക്ഷ്മണസേവിതം രഘുപതിം സീതാസമേതം ഭജേ ॥ 150
കസ്തൂരീതിലകം കപീംദ്രഹരണം കാരുണ്യവാരാംനിധിം
ക്ഷീരാംഭോധിസുതാമുഖാബ്ജമധുപം കല്യാണസംപന്നിധിമ് ।
കൌസല്യാനയനോത്സുകം കപിവരത്രാണം മഹാപൌരുഷം
കൌമാരപ്രിയമര്കകോടിസദൃശം സീതാസമേതം ഭജേ ॥ 151
വിദ്യുത്കോടിദിവാകരദ്യുതിനിഭം ശ്രീകൌസ്തുഭാലംകൃതം
യോഗീംദ്രൈസ്സനകാദിഭിഃ പരിവൃതം കൈലാസനാഥപ്രിയമ് ।
മുക്താരത്നകിരീടകുംഡലധരം ഗ്രൈവേയഹാരാന്വിതം
വൈദേഹീകുചസന്നിവാസമനിശം സീതാസമേതം ഭജേ ॥ 152
മേഘശ്യാമലമംബുജാതനയനം വിസ്തീര്ണവക്ഷസ്സ്ഥലം
ബാഹുദ്വംദ്വവിരാജിതം സുവദനം ശോണാംഘ്രിപംകേരുഹമ് ।
നാനാരത്നവിചിത്രഭൂഷണയുതം കോദംഡബാണാംകിതം
ത്രൈലോക്യാഽപ്രതിമാനസുംദരതനും സീതാസമേതം ഭജേ ॥ 153
വൈദേഹീയുതവാമഭാഗമതുലം വംദാരുമംദാരകം
വംദേ പ്രസ്തുതകീര്തിവാസിതതരുച്ഛായാനുകാരിപ്രഭമ് ।
വൈദേഹീകുചകുംകുമാംകിതമഹോരസ്കം മഹാഭൂഷണം
വേദാംതൈരുപഗീയമാനമസകൃത്സീതാസമേതം ഭജേ ॥ 154
ദേവാനാം ഹിതകാരണേന ഭുവനേ ധൃത്വാഽവതാരം ധ്രുവം
രാമം കൌശികയജ്ഞവിഘ്നദലനം തത്താടകാസംഹരമ് ।
നിത്യം ഗൌതമപത്നിശാപദലനശ്രീപാദരേണും ശുഭം
ശംഭോരുത്കടചാപഖംഡനമഹാസത്വം ഭജേ രാഘവമ് ॥ 155
ശ്രീരാമം നവരത്നകുംഡലധരം ശ്രീരാമരക്ഷാമണിം
ശ്രീരാമം ച സഹസ്രഭാനുസദൃശം ശ്രീരാമചംദ്രോദയമ് ।
ശ്രീരാമം ശ്രുതകീര്തിമാകരമഹം ശ്രീരാമമുക്തിപ്രദം
ശ്രീരാമം രഘുനംദനം ഭയഹരം ശ്രീരാമചംദ്രം ഭജേ ॥ 156
രാമമിംദീവരശ്യാമം രാജീവായതലോചനമ് ।
ജ്യാഘോഷനിര്ജിതാരാതിം ജാനകീരമണം ഭജേ ॥ 157
ദീര്ഘബാഹുമരവിംദലോചനം
ദീനവത്സലമനാഥരക്ഷകമ് ।
ദീക്ഷിതം സകലലോകരക്ഷണേ
ദൈവതം ദശരഥാത്മജം ഭജേ ॥ 158
പ്രാതസ്സ്മരാമി രഘുനാഥമുഖാരവിംദം
മംദസ്മിതം മധുരഭാഷി വിശാലഫാലമ് ।
കര്ണാവലംബിചലകുംഡലഗംഡഭാഗം
കര്ണാംതദീര്ഘനയനം നയനാഭിരാമമ് ॥ 159
പ്രാതര്ഭജാമി രഘുനാഥകരാരവിംദം
രക്ഷോഗണായ ഭയദം വരദം നിജേഭ്യഃ ।
യദ്രാജസംസദി വിഭിദ്യ മഹേശചാപം
സീതാകരഗ്രഹണമംഗളമാപ സദ്യഃ ॥ 160
പ്രാതര്നമാമി രഘുനാഥപദാരവിംദം
പദ്മാംകുശാദിശുഭരേഖശുഭാവഹം ച ।
യോഗീംദ്രമാനസമധുവ്രതസേവ്യമാനം
ശാപാപഹം സപദി ഗൌതമധര്മപത്ന്യാഃ ॥ 161
പ്രാതര്വദാമി വചസാ രഘുനാഥനാമ
വാഗ്ദോഷഹാരി സകലം കലുഷം നിഹംതൃ ।
യത്പാര്വതീ സ്വപതിനാ സഹ ഭോക്തുകാമാ
പ്രീത്യാ സഹസ്രഹരിനാമസമം ജജാപ ॥ 162
പ്രാതഃ ശ്രയേ ശ്രുതിനുതം രഘുനാഥമൂര്തിം
നീലാംബുദോത്പലസിതേതരരത്നനീലാമ് ।
ആമുക്തമൌക്തികവിശേഷവിഭൂഷണാഢ്യാം
ധ്യേയാം സമസ്തമുനിഭിര്നിജഭൃത്യമുഖ്യൈഃ ॥ 163
രഘുകുലവരനാഥോ ജാനകീപ്രാണനാഥഃ
പിതൃവചനവിധാതാ കീശരാജ്യപ്രദാതാ ।
പ്രതിനിശിചരനാശഃ പ്രാപ്തരാജ്യപ്രവേശോ
വിഹിതഭുവനരക്ഷഃ പാതു പദ്മായതാക്ഷഃ ॥ 164
കുവലയദളനീലഃ പീതവാസാഃ സ്മിതാസ്യോ
വിവിധരുചിരഭൂഷാഭൂഷിതോ ദിവ്യമൂര്തിഃ ।
ദശരഥകുലനാഥോ ജാനകീപ്രാണനാഥോ
നിവസതു മമ ചിത്തേ സര്വദാ രാമചംദ്രഃ ॥ 165
ജയതു ജയതു രാമോ ജാനകീവല്ലഭോഽയം
ജയതു ജയതു രാമശ്ചംദ്രചൂഡാര്ചിതാംഘ്രിഃ ।
ജയതു ജയതു വാണീനാഥനാഥഃ പരാത്മാ
ജയതു ജയതു രാമോഽനാഥനാഥഃ കൃപാളുഃ ॥ 166
വദതു വദതു വാണീ രാമരാമേതി നിത്യം
ജയതു ജയതു ചിത്തം രാമപാദാരവിംദമ് ।
നമതു നമതു ദേഹം സംതതം രാമചംദ്രം
ന ഭവതു മമ പാപം ജന്മജന്മാംതരേഷു ॥ 167
ആനംദരൂപം വരദം പ്രസന്നം
സിംഹേക്ഷണം സേവകപാരിജാതമ് ।
നീലോത്പലാംഗം ഭുവനൈകമിത്രം
രാമം ഭജേ രാഘവരാമചംദ്രമ് ॥ 168
ലംകാവിരാമം രണരംഗഭീമം
രാജീവനേത്രം രഘുവംശമിത്രമ് ।
കാരുണ്യമൂര്തിം കരുണാപ്രപൂര്തിം
ശ്രീരാമചംദ്രം ശരണം പ്രപദ്യേ ॥ 169
സുഗ്രീവമിത്രം പരമം പവിത്രം
സീതാകളത്രം നവഹേമസൂത്രമ് ।
കാരുണ്യപാത്രം ശതപത്രനേത്രം
ശ്രീരാമചംദ്രം ശിരസാ നമാമി ॥ 170
ശ്രീരാഘവേതി രമണേതി രഘൂദ്വഹേതി
രാമേതി രാവണഹരേതി രമാധവേതി ।
സാകേതനാഥസുമുഖേതി ച സുവ്രതേതി
വാണീ സദാ വദതു രാമ ഹരേ ഹരേതി ॥ 171
ശ്രീരാമനാമാമൃതമംത്രബീജം
സംജീവനം ചേന്മനസി പ്രതിഷ്ഠമ് ।
ഹാലാഹലം വാ പ്രളയാനലം വാ
മൃത്യോര്മുഖം വാ വിതഥീകരോതി ॥ 172
കിം യോഗശാസ്ത്രൈഃ കിമശേഷവിദ്യാ
കിം യാഗഗംഗാദിവിശേഷതീര്ഥൈഃ ।
കിം ബ്രഹ്മചര്യാശ്രമസംചരേണ
ഭക്തിര്നചേത്തേ രഘുവംശകീര്ത്യാമ് ॥ 173
ഇദം ശരീരം ശ്ലഥസംധിജര്ഝരം
പതത്യവശ്യം പരിണാമപേശലമ് ।
കിമൌഷഥം പൃച്ഛസി മൂഢ ദുര്മതേ
നിരാമയം രാമകഥാമൃതം പിബ ॥ 174
ഹേ രാമഭദ്രാശ്രയ ഹേ കൃപാളോ
ഹേ ഭക്തലോകൈകശരണ്യമൂര്തേ ।
പുനീഹി മാം ത്വച്ചരണാരവിംദം
ജഗത്പവിത്രം ശരണം മമാഽസ്തു ॥ 175
നീലാഭ്രദേഹ നിഖിലേശ ജഗന്നിവാസ
രാജീവനേത്ര രമണീയഗുണാഭിരാമ ।
ശ്രീദാമ ദൈത്യകുലമര്ദന രാമചംദ്ര
ത്വത്പാദപദ്മമനിശം കലയാമി ചിത്തേ ॥ 176
ശ്രീരാമചംദ്ര കരുണാകര ദീനബംധോ
സീതാസമേത ഭരതാഗ്രജ രാഘവേശ ।
പാപാര്തിഭംജന ഭയാതുരദീനബംധോ
പാപാംബുധൌ പതിതമുദ്ധര മാമനാഥമ് ॥ 177
ഇംദീവരദളശ്യാമ-മിംദുകോടിനിഭാനനമ് ।
കംദര്പകോടിലാവണ്യം വംദേഽഹം രഘുനംദനമ് ॥ 175
ഇതി ശ്രീബോധേംദ്രസരസ്വതീ കൃത ശ്രീരാമകര്ണാമൃതമ് ॥