મંગળશ્લોકાઃ
મંગળં ભગવાન્વિષ્ણુર્મંગળં મધુસૂદનઃ ।
મંગળં પુંડરીકાક્ષો મંગળં ગરુડધ્વજઃ ॥ 1
મંગળં કોસલેંદ્રાય મહનીયગુણાબ્ધયે ।
ચક્રવર્તિતનૂજાય સાર્વભૌમાય મંગળમ્ ॥ 2
વેદવેદાંતવેદ્યાય મેઘશ્યામલમૂર્તયે ।
પુંસાં મોહનરૂપાય પુણ્યશ્લોકાય મંગળમ્ ॥ 3
વિશ્વામિત્રાંતરંગાય મિથિલાનગરીપતેઃ ।
ભાગ્યાનાં પરિપાકાય ભવ્યરૂપાય મંગળમ્ ॥ 4
પિતૃભક્તાય સતતં ભ્રાતૃભિઃ સહ સીતયા ।
નંદિતાખિલલોકાય રામચંદ્રાય મંગળમ્ ॥ 5
ત્યક્તસાકેતવાસાય ચિત્રકૂટવિહારિણે ।
સેવ્યાય સર્વયમિનાં ધીરોદાત્તાય મંગળમ્ ॥ 6
સૌમિત્રિણા ચ જાનક્યા ચાપબાણાસિધારિણા ।
સંસેવ્યાય સદા ભક્ત્યા સાનુજાયાસ્તુ મંગળમ્ ॥ 7
દંડકારણ્યવાસાય ખંડિતામરશત્રવે ।
ગૃધ્રરાજાય ભક્તાય મુક્તિદાયાસ્તુ મંગળમ્ ॥ 8
સાદરં શબરીદત્તફલમૂલાભિલાષિણે ।
સૌલભ્યપરિપૂર્ણાય સત્ત્વોદ્યુક્તાય મંગળમ્ ॥ 9
હનૂમત્સમવેતાય હરીશાભીષ્ટદાયિને ।
વાલિપ્રમથનાયાસ્તુ મહાધીરાય મંગળમ્ ॥ 10
શ્રીમતે રઘુવીરાય સેતુલંઘિતસિંધવે ।
જિતરાક્ષસરાજાય રણધીરાય મંગળમ્ ॥ 11
આસાદ્ય નગરીં દિવ્યામભિષિક્તાય સીતયા ।
રાજાધિરાજરાજાય રામભદ્રાય મંગળમ્ ॥ 12
વિભીષણકૃતે પ્રીત્યા વિશ્વાભીષ્ટપ્રદાયિને ।
જાનકીપ્રાણનાથાય સદા રામાય મંગળમ્ ॥ 13
—-
શ્રીરામં ત્રિજગદ્ગુરું સુરવરં સીતામનોનાયકં
શ્યામાંગં શશિકોટિપૂર્ણવદનં ચંચત્કલાકૌસ્તુભમ્ ।
સૌમ્યં સત્યગુણોત્તમં સુસરયૂતીરે વસંતં પ્રભું
ત્રાતારં સકલાર્થસિદ્ધિસહિતં વંદે રઘૂણાં પતિમ્ ॥ 14
શ્રીરાઘવં દશરથાત્મજમપ્રમેયં
સીતાપતિં રઘુવરાન્વયરત્નદીપમ્ ।
આજાનુબાહુમરવિંદદળાયતાક્ષં
રામં નિશાચરવિનાશકરં નમામિ ॥ 15
શ્રીરામચંદ્ર કરુણાકર રાઘવેંદ્ર
રાજેંદ્રચંદ્ર રઘુવંશસમુદ્રચંદ્ર ।
સુગ્રીવનેત્રયુગળોત્પલ-પૂર્ણચંદ્ર
સીતામનઃકુમુદચંદ્ર નમો નમસ્તે ॥ 16
સીતામનોમાનસરાજહંસ
સંસારસંતાપહર ક્ષમાવન્ ।
શ્રીરામ દૈત્યાંતક શાંતરૂપ
શ્રીતારકબ્રહ્મ નમો નમસ્તે ॥ 17
વિષ્ણો રાઘવ વાસુદેવ નૃહરે દેવૌઘચૂડામણે ।
સંસારાર્ણવકર્ણધારક હરે કૃષ્ણાય તુભ્યં નમઃ ॥ 18
સુગ્રીવાદિસમસ્તવાનરવરૈસ્સંસેવ્યમાનં સદા ।
વિશ્વામિત્રપરાશરાદિમુનિભિસ્સંસ્તૂયમાનં ભજે ॥ 19
રામં ચંદનશીતલં ક્ષિતિસુતામોહાકરં શ્રીકરં
વૈદેહીનયનારવિંદમિહિરં સંપૂર્ણચંદ્રાનનમ્ ।
રાજાનં કરુણાસમેતનયનં સીતામનોનંદનં
સીતાદર્પણચારુગંડલલિતં વંદે સદા રાઘવમ્ ॥ 20
જાનાતિ રામ તવ નામરુચિં મહેશો
જાનાતિ ગૌતમસતી ચરણપ્રભાવમ્ ।
જાનાતિ દોર્બલપરાક્રમમીશચાપો
જાનાત્યમોઘપટુબાણગતિં પયોધિઃ ॥ 21
માતા રામો મત્પિતા રામચંદ્રો
ભ્રાતા રામો મત્સખા રાઘવેશઃ ।
સર્વસ્વં મે રામચંદ્રો દાયાળુ-
ર્નાન્યં દૈવં નૈવ જાને ન જાને ॥ 22
વિમલકમલનેત્રં વિસ્ફુરન્નીલગાત્રં
તપનકુલપવિત્રં દાનવધ્વંતમિત્રમ્ ।
ભુવનશુભચરિત્રં ભૂમિપુત્રીકળત્રં
દશરથવરપુત્રં નૌમિ રામાખ્યમિત્રમ્ ॥ 23
માર્ગે માર્ગે શાખિનાં રત્નવેદી
વેદ્યાં વેદ્યાં કિન્નરીબૃંદગીતમ્ ।
ગીતે ગીતે મંજુલાલાપગોષ્ઠી
ગોષ્ઠ્યાં ગોષ્ઠ્યાં ત્વત્કથા રામચંદ્ર ॥ 24
વૃક્ષે વૃક્ષે વીક્ષિતાઃ પક્ષિસંઘાઃ
સંઘે સંઘે મંજુલામોદવાક્યમ્ ।
વાક્યે વાક્યે મંજુલાલાપગોષ્ઠી
ગોષ્ઠ્યાં ગોષ્ઠ્યાં ત્વત્કથા રામચંદ્ર ॥ 25
દુરિતતિમિરચંદ્રો દુષ્ટકંજાતચંદ્રઃ
સુરકુવલયચંદ્રસ્સૂર્યવંશાબ્ધિચંદ્રઃ ।
સ્વજનનિવહચંદ્રશ્શત્રુરાજીવચંદ્રઃ
પ્રણતકુમુદચંદ્રઃ પાતુ માં રામચંદ્રઃ ॥ 26
કળ્યાણદં કૌશિકયજ્ઞપાલં
કળાનિધિં કાંચનશૈલધીરમ્ ।
કંજાતનેત્રં કરુણાસમુદ્રં
કાકુત્સ્થરામં કલયામિ ચિત્તે ॥ 27
રાજીવાયતલોચનં રઘુવરં નીલોત્પલશ્યામલં
મંદારાંચિતમંડપે સુલલિતે સૌવર્ણકે પુષ્પકે ।
આસ્થાને નવરત્નરાજિખચિતે સિંહાસને સંસ્થિતં
સીતાલક્ષ્મણલોકપાલસહિતં વંદે મુનીંદ્રાસ્પદમ્ ॥ 28
ધ્યાયે રામં સુધાંશું નતસકલભવારણ્યતાપપ્રહારમ્ ।
શ્યામં શાંતં સુરેંદ્રં સુરમુનિવિનુતં કોટિસૂર્યપ્રકાશમ્ ।
સીતાસૌમિત્રિસેવ્યં સુરનરસુગમં દિવ્યસિંહાસનસ્થમ્ ।
સાયાહ્ને રામચંદ્રં સ્મિતરુચિરમુખં સર્વદા મે પ્રસન્નમ્ ॥ 29
ઇંદ્રનીલમણિસન્નિભદેહં
વંદનીયમસકૃન્મુનિબૃંદૈઃ ।
લંબમાનતુલસીવનમાલં
ચિંતયામિ સતતં રઘુવીરમ્ ॥ 30
સંપૂર્ણચંદ્રવદનં સરસીરુહાક્ષં
માણિક્યકુંડલધરં મુકુટાભિરામમ્ ।
ચાંપેયગૌરવસનં શરચાપહસ્તં
શ્રીરામચંદ્રમનિશં મનસા સ્મરામિ ॥ 31
માતુઃ પાર્શ્વે ચરંતં મણિમયશયને મંજુભૂષાંચિતાંગમ્ ।
મંદં મંદં પિબંતં મુકુળિતનયનં સ્તન્યમન્યસ્તનાગ્રમ્ ।
અંગુળ્યાગ્રૈઃ સ્પૃશંતં સુખપરવશયા સસ્મિતાલિંગિતાંગમ્ ।
ગાઢં ગાઢં જનન્યા કલયતુ હૃદયં મામકં રામબાલમ્ ॥ 32
રામાભિરામં નયનાભિરામં
વાચાભિરામં વદનાભિરામમ્ ।
સર્વાભિરામં ચ સદાભિરામં
વંદે સદા દાશરથિં ચ રામમ્ ॥ 33
રાશબ્દોચ્ચારમાત્રેણ મુખાન્નિર્યાતિ પાતકાઃ ।
પુનઃ પ્રવેશભીત્યા ચ મકારસ્તુ કવાટવત્ ॥ 34
અનર્ઘમાણિક્યવિરાજમાન-
શ્રીપાદુકાલંકૃતશોભનાભ્યામ્ ।
અશેષબૃંદારકવંદિતાભ્યાં
નમો નમો રામપદાંબુજાભ્યામ્ ॥ 35
ચલત્કનકકુંડલોલ્લસિતદિવ્યગંડસ્થલં
ચરાચરજગન્મયં ચરણપદ્મગંગાશ્રયમ્ ।
ચતુર્વિધફલપ્રદં ચરમપીઠમધ્યસ્થિતં
ચિદંશમખિલાસ્પદં દશરથાત્મજં ચિંતયે ॥ 36
સનંદનમુનિપ્રિયં સકલવર્ણવેદાત્મકં
સમસ્તનિગમાગમસ્ફુરિતતત્ત્વસિંહાસનમ્ ।
સહસ્રનયનાબ્જજાદ્યમરબૃંદસંસેવિતં
સમષ્ટિપુરવલ્લભં દશરથાત્મજં ચિંતયે ॥ 37
જાગ્રત્સ્વપ્નસુષુપ્તિ-કાલવિલસત્તત્ત્વાત્મચિન્માત્રકં
ચૈતન્યાત્મકમાધિપાપરહિતં ભૂમ્યાદિતન્માત્રકમ્ ।
શાંભવ્યાદિસમસ્તયોગકુલકં સાંખ્યાદિતત્ત્વાત્પરં
શબ્દાવાચ્યમહં નમામિ સતતં વ્યુત્પત્તિનાશાત્પરમ્ ॥ 38
ઇક્ષ્વાકુવંશાર્ણવજાતરત્નં
સીતાંગનાયૌવનભાગ્યરત્નમ્ ।
વૈકુંઠરત્નં મમ ભાગ્યરત્નં
શ્રીરામરત્નં શિરસા નમામિ ॥ 39
ઇક્ષ્વાકુનંદનં સુગ્રીવપૂજિતં
ત્રૈલોક્યરક્ષકં સત્યસંધં સદા ।
રાઘવં રઘુપતિં રાજીવલોચનં
રામચંદ્રં ભજે રાઘવેશં ભજે ॥ 40
ભક્તપ્રિયં ભક્તસમાધિગમ્યં
ચિંતાહરં ચિંતિતકામધેનુમ્ ।
સૂર્યેંદુકોટિદ્યુતિભાસ્વરં તં
રામં ભજે રાઘવરામચંદ્રમ્ ॥ 41
શ્રીરામં જનકક્ષિતીશ્વરસુતાવક્ત્રાંબુજાહારિણં
શ્રીમદ્ભાનુકુલાબ્ધિકૌસ્તુભમણિં શ્રીરત્નવક્ષસ્સ્થલમ્ ।
શ્રીકંઠાદ્યમરૌઘરત્નમકુટાલંકારપાદાંબુજં
શ્રીવત્સોજ્જ્વલમિંદ્રનીલસદૃશં શ્રીરામચંદ્રં ભજે ॥ 42
રામચંદ્ર ચરિતાકથામૃતં
લક્ષ્મણાગ્રજગુણાનુકીર્તનમ્ ।
રાઘવેશ તવ પાદસેવનં
સંભવંતુ મમ જન્મજન્મનિ ॥ 43
અજ્ઞાનસંભવ-ભવાંબુધિબાડબાગ્નિ-
રવ્યક્તતત્ત્વનિકરપ્રણવાધિરૂઢઃ ।
સીતાસમેતમનુજેન હૃદંતરાળે
પ્રાણપ્રયાણસમયે મમ સન્નિધત્તે ॥ 44
રામો મત્કુલદૈવતં સકરુણં રામં ભજે સાદરં
રામેણાખિલઘોરપાપનિહતી રામાય તસ્મૈ નમઃ ।
રામાન્નાસ્તિ જગત્રયૈકસુલભો રામસ્ય દાસોઽસ્મ્યહં
રામે પ્રીતિરતીવ મે કુલગુરો શ્રીરામ રક્ષસ્વ મામ્ ॥ 45
વૈદેહીસહિતં સુરદ્રુમતલે હૈમે મહામંટપે ।
મધ્યેપુષ્પકમાસને મણિમયે વીરાસને સંસ્થિતમ્ ।
અગ્રે વાચયતિ પ્રભંજનસુતે તત્ત્વં મુનિભ્યઃ પરમ્ ।
વ્યાખ્યાંતં ભરતાદિભિઃ પરિવૃતં રામં ભજે શ્યામલમ્ ॥ 46
વામે ભૂમિસુતા પુરસ્તુ હનુમાન્પશ્ચાત્સુમિત્રાસુત-
શ્શત્રુઘ્નો ભરતશ્ચ પાર્શ્વદળયોર્વાય્વાદિકોણેષ્વપિ ।
સુગ્રીવશ્ચ વિભીષણશ્ચ યુવરાટ્ તારાસુતો જાંબવાન્
મધ્યે નીલસરોજકોમલરુચિં રામં ભજે શ્યામલમ્ ॥ 47
કેયૂરાંગદકંકણૈર્મણિગણૈર્વૈરોચમાનં સદા
રાકાપર્વણિચંદ્રકોટિસદૃશં છત્રેણ વૈરાજિતમ્ ।
હેમસ્તંભસહસ્રષોડશયુતે મધ્યે મહામંડપે
દેવેશં ભરતાદિભિઃ પરિવૃતં રામં ભજે શ્યામલમ્ ॥ 48
સાકેતે શરદિંદુકુંદધવળે સૌઘે મહામંટપે ।
પર્યસ્તાગરુધૂપધૂમપટલે કર્પૂરદીપોજ્જ્વલે ।
સુગ્રીવાંગદવાયુપુત્રસહિતં સૌમિત્રિણા સેવિતં
લીલામાનુષવિગ્રહં રઘુપતિં રામં ભજે શ્યામલમ્ ॥ 49
શાંતં શારદચંદ્રકોટિસદૃશં ચંદ્રાભિરામાનનં
ચંદ્રાર્કાગ્નિવિકાસિકુંડલધરં ચંદ્રાવતંસસ્તુતમ્ ।
વીણાપુસ્તકસાક્ષસૂત્રવિલસદ્વ્યાખ્યાનમુદ્રાકરં
દેવેશં ભરતાદિભિઃ પરિવૃતં રામં ભજે શ્યામલમ્ ॥ 50
રામં રાક્ષસમર્દનં રઘુપતિં શક્રારિવિધ્વંસિનં
સુગ્રીવેપ્સિતરાજ્યદં સુરપતેઃ પુત્રાંતકં શાર્ંગિણમ્ ।
ભક્તાનામભયપ્રદં ભયહરં પાપૌઘવિધ્વંસિનં
સીતાસેવિતપાદપદ્મયુગળં રામં ભજે શ્યામલમ્ ॥ 51
કંદર્પાયુતકોટિકોટિતુલિતં કાલાંબુદશ્યામલં
કંબુગ્રીવમુદારકૌસ્તુભધરં કર્ણાવતંસોત્પલમ્ ।
કસ્તૂરીતિલકોજ્જ્વલં સ્મિતમુખં ચિન્મુદ્રયાલંકૃતં
સીતાલક્ષ્મણવાયુપુત્રસહિતં સિંહાસનસ્થં ભજે ॥ 52
સાકેતે નવરત્નપંક્તિખચિતે ચિત્રધ્વજાલંકૃતે
વાસે સ્વર્ણમયે દળાષ્ટલલિતે પદ્મે વિમાનોત્તમે ।
આસીનં ભરતાદિસોદરજનૈઃ શાખામૃગૈઃ કિન્નરૈઃ
દિક્પાલૈર્મુનિપુંગવૈર્નૃપગણૈસ્સંસેવ્યમાનં ભજે ॥ 53
કસ્તૂરીઘનસારકુંકુમલસચ્છ્રીચંદનાલંકૃતં
કંદર્પાધિકસુંદરં ઘનનિભં કાકુત્સ્થવંશધ્વજમ્ ।
કળ્યાણાંભરવેષ્ટિતં કમલયા યુક્તં કલાવલ્લભં
કળ્યાણાચલકાર્મુકપ્રિયસખં કળ્યાણરામં ભજે ॥ 54
મુક્તેર્મૂલં મુનિવરહૃદાનંદકંદં મુકુંદં
કૂટસ્થાખ્યં સકલવરદં સર્વચૈતન્યરૂપમ્ ।
નાદાતીતં કમલનિલયં નાદનાદાંતતત્ત્વં
નાદાતીતં પ્રકૃતિરહિતં રામચંદ્રં ભજેઽહમ્ ॥ 55
તારાકારં નિખિલનિલયં તત્ત્વમસ્યાદિલક્ષ્યં
શબ્દાવાચ્યં ત્રિગુણરહિતં વ્યોમમંગુષ્ઠમાત્રમ્ ।
નિર્વાણાખ્યં સગુણમગુણવ્યોમરંધ્રાંતરસ્થં
સૌષુમ્નાંતઃ પ્રણવસહિતં રામચંદ્રં ભજેઽહમ્ ॥ 56
નિજાનંદાકારં નિગમતુરગારાધિતપદં
પરબ્રહ્માનંદં પરમપદગં પાપહરણમ્ ।
કૃપાપારાવારં પરમપુરુષં પદ્મનિલયં
ભજે રામં શ્યામં પ્રકૃતિરહિતં નિર્ગુણમહમ્ ॥ 57
સાકેતે નગરે સમસ્તમહિમાધારે જગન્મોહને
રત્નસ્તંભસહસ્રમંટપમહાસિંહાસને સાંબુજે ।
વિશ્વામિત્રવસિષ્ઠગૌતમશુકવ્યાસાદિભિર્મૌનિભિઃ
ધ્યેયં લક્ષ્મણલોકપાલસહિતં સીતાસમેતં ભજે ॥ 58
રામં શ્યામાભિરામં રવિશશિનયનં કોટિસૂર્યપ્રકાશં
દિવ્યં દિવ્યાસ્ત્રપાણિં શરમુખશરધિં ચારુકોડંડહસ્તમ્ ।
કાલં કાલાગ્નિરુદ્રં રિપુકુલદહનં વિઘ્નવિચ્છેદદક્ષં
ભીમં ભીમાટ્ટહાસં સકલભયહરં રામચંદ્રં ભજેઽહમ્ ॥ 59
શ્રીરામં ભુવનૈકસુંદરતનું ધારાધરશ્યામલં
રાજીવાયતલોચનં રઘુવરં રાકેંદુબિંબાનનમ્ ।
કોદંડાદિનિજાયુધાશ્રિતભુજૈર્ભ્રાંતં વિદેહાત્મજા-
ધીશં ભક્તજનાવનં રઘુવરં શ્રીરામચંદ્રં ભજે ॥ 60
શ્રીવત્સાંકમુદારકૌસ્તુભલસત્પીતાંબરાલંકૃતં
નાનારત્નવિરાજમાનમકુટં નીલાંબુદશ્યામલમ્ ।
કસ્તૂરીઘનસારચર્ચિતતનું મંદારમાલાધરં
કંદર્પાયુતસુંદરં રઘુપતિં સીતાસમેતં ભજે ॥ 61
સદાનંદદેવે સહસ્રારપદ્મે
ગલચ્ચંદ્રપીયૂષધારામૃતાંતે ।
સ્થિતં રામમૂર્તિં નિષેવે નિષેવે-
ઽન્યદૈવં ન સેવે ન સેવે ન સેવે ॥ 62
સુધાભાસિતદ્વીપમધ્યે વિમાને
સુપર્વાળિવૃક્ષોજ્જ્વલે શેષતલ્પે ।
નિષણ્ણં રમાંકં નિષેવે નિષેવે-
ઽન્યદૈવં ન સેવે ન સેવે ન સેવે ॥ 63
ચિદંશં સમાનંદમાનંદકંદં
સુષુમ્નાખ્યરંધ્રાંતરાળે ચ હંસમ્ ।
સચક્રં સશંખં સપીતાંબરાંકં
પરંચાન્યદૈવં ન જાને ન જાને ॥ 64
ચતુર્વેદકૂટોલ્લસત્કારણાખ્યં
સ્ફુરદ્દિવ્યવૈમાનિકે ભોગિતલ્પે ।
પરંધામમૂર્તિં નિષણ્ણં નિષેવે
નિષેવેઽન્યદૈવં ન સેવે ન સેવે ॥ 65
સિંહાસનસ્થં સુરસેવિતવ્યં
રત્નાંકિતાલંકૃતપાદપદ્મમ્ ।
સીતાસમેતં શશિસૂર્યનેત્રં
રામં ભજે રાઘવ રામચંદ્રમ્ ॥ 66
રામં પુરાણપુરુષં રમણીયવેષં
રાજાધિરાજમકુટાર્ચિતપાદપીઠમ્ ।
સીતાપતિં સુનયનં જગદેકવીરં
શ્રીરામચંદ્રમનિશં કલયામિ ચિત્તે ॥ 67
પરાનંદવસ્તુસ્વરૂપાદિસાક્ષિં
પરબ્રહ્મગમ્યં પરંજ્યોતિમૂર્તિમ્ ।
પરાશક્તિમિત્રાઽપ્રિયારાધિતાંઘ્રિં
પરંધામરૂપં ભજે રામચંદ્રમ્ ॥ 68
મંદસ્મિતં કુંડલગંડભાગં
પીતાંબરં ભૂષણભૂષિતાંગમ્ ।
નીલોત્પલાંગં ભુવનૈકમિત્રં
રામં ભજે રાઘવ રામચંદ્રમ્ ॥ 69
અચિંત્યમવ્યક્તમનંતરૂપ-
મદ્વૈતમાનંદમનાદિગમ્યમ્ ।
પુણ્યસ્વરૂપં પુરુષોત્તમાખ્યં
રામં ભજે રાઘવ રામચંદ્રમ્ ॥ 70
પદ્માસનસ્થં સુરસેવિતવ્યં
પદ્માલયાનંદકટાક્ષવીક્ષ્યમ્ ।
ગંધર્વવિદ્યાધરગીયમાનં
રામં ભજે રાઘવ રામચંદ્રમ્ ॥ 71
અનંતકીર્તિં વરદં પ્રસન્નં
પદ્માસનં સેવકપારિજાતમ્ ।
રાજાધિરાજં રઘુવીરકેતું
રામં ભજે રાઘવ રામચંદ્રમ્ ॥ 72
સુગ્રીવમિત્રં સુજનાનુરૂપં
લંકાહરં રાક્ષસવંશનાશમ્ ।
વેદાશ્રયાંગં વિપુલાયતાક્ષં
રામં ભજે રાઘવ રામચંદ્રમ્ ॥ 73
સકૃત્પ્રણતરક્ષાયાં સાક્ષી યસ્ય વિભીષણઃ ।
સાપરાધપ્રતીકારઃ સ શ્રીરામો ગતિર્મમ ॥ 74
ફલમૂલાશિનૌ દાંતૌ તાપસૌ ધર્મચારિણૌ ।
રક્ષઃકુલવિહંતારૌ ભ્રાતરૌ રામલક્ષ્મણૌ ॥ 75
તરુણૌ રૂપસંપન્નૌ સુકુમારૌ મહાબલૌ ।
પુંડરીક વિશાલાક્ષૌ ચીરકૃષ્ણાજિનાંબરૌ ॥ 76
કૌસલ્યાનયનેંદું દશરથમુખારવિંદમાર્તાંડમ્ ।
સીતામાનસહંસં રામં રાજીવલોચનં વંદે ॥ 77
ભર્જનં ભવબીજાનાં માર્જનં સુખસંપદામ્ ।
તર્જનં યમદૂતાનાં રામરામેતિ કીર્તનમ્ ॥ 78
ન જાને જાનકી જાને રામ ત્વન્નામવૈભવમ્ ।
સર્વેશો ભગવાન્ શંભુર્વાલ્મીકિર્વેત્તિ વા નવા ॥ 79
કરતલધૃતચાપં કાલમેઘસ્વરૂપં
સરસિજદળનેત્રં ચારુહાસં સુગાત્રમ્ ।
વિચિનુતવનવાસં વિક્રમોદગ્રવેષં
પ્રણમત રઘુનાથં જાનકીપ્રાણનાથમ્ ॥ 80
વિદ્યુત્સ્ફુરન્મકરકુંડલદીપ્તચારુ-
ગંડસ્થલં મણિકિરીટવિરાજમાનમ્ ।
પીતાંબરં જલદનીલમુદારકાંતિં
શ્રીરામચંદ્રમનિશં કલયામિ ચિત્તે ॥ 81
રત્નોલ્લસજ્જ્વલિતકુંડલગંડભાગં
કસ્તૂરિકાતિલકશોભિતફાલભાગમ્ ।
કર્ણાંતદીર્ઘનયનં કરુણાકટાક્ષં
શ્રીરામચંદ્ર મુખમાત્મનિ સન્નિધત્તમ્ ॥ 82
વૈદેહીસહિતં ચ લક્ષ્મણયુતં કૈકેયિપુત્રાન્વિતં
સુગ્રીવં ચ વિભીષણાનિલસુતૌ નીલં નલં સાંગદમ્ ।
વિશ્વામિત્રવસિષ્ઠગૌતમભરદ્વાજાદિકાન્ માનયન્
રામો મારુતિસેવિતઃ સ્મરતુ માં સામ્રાજ્યસિંહાસને ॥ 83
સકલગુણનિધાનં યોગિભિસ્સ્તૂયમાનં
ભજિતસુરવિમાનં રક્ષિતેંદ્રાદિમાનમ્ ।
મહિતવૃષભયાનં સીતયા શોભમાનં
સ્મરતુ હૃદયભાનું બ્રહ્મરામાભિરામમ્ ॥ 84
ત્રિદશકુમુદચંદ્રો દાનવાંભોજચંદ્રો
દુરિતતિમિરચંદ્રો યોગિનાં જ્ઞાનચંદ્રઃ ।
પ્રણતનયનચંદ્રો મૈથિલીનેત્રચંદ્રો
દશમુખરિપુચંદ્રઃ પાતુ માં રામચંદ્રઃ ॥ 85
યન્નામૈવ સહસ્રનામસદૃશં યન્નામ વેદૈસ્સમં
યન્નામાંકિતવાક્ય-માસુરબલસ્ત્રીગર્ભવિચ્છેદનમ્ ।
યન્નામ શ્વપચાર્યભેદરહિતં મુક્તિપ્રદાનોજ્જ્વલં
તન્નામાઽલઘુરામરામરમણં શ્રીરામનામામૃતમ્ ॥ 86
રાજીવનેત્ર રઘુપુંગવ રામભદ્ર
રાકેંદુબિંબસદૃશાનન નીલગાત્ર ।
રામાઽભિરામ રઘુવંશસમુદ્ભવ ત્વં
શ્રીરામચંદ્ર મમ દેહિ કરાવલંબમ્ ॥ 87
માણિક્યમંજીરપદારવિંદં
રામાર્કસંફુલ્લમુખારવિંદમ્ ।
ભક્તાભયપ્રાપિકરારવિંદાં
દેવીં ભજે રાઘવવલ્લભાં તામ્ ॥ 88
જયતુ વિજયકારી જાનકીમોદકારી
તપનકુલવિહારી દંડકારણ્યચારી ।
દશવદનકુઠારી દૈત્યવિચ્છેદકારી
મણિમકુટકધારી ચંડકોદંડધારી ॥ 89
રામઃ પિતા રઘવ એવ માતા
રામસ્સુબંધુશ્ચ સખા હિતશ્ચ ।
રામો ગુરુર્મે પરમં ચ દૈવં
રામં વિના નાઽન્યમહં સ્મરામિ ॥ 90
શ્રીરામ મે ત્વં હિ પિતા ચ માતા
શ્રીરામ મે ત્વં હિ સુહૃચ્ચ બંધુઃ ।
શ્રીરામ મે ત્વં હિ ગુરુશ્ચ ગોષ્ઠી
શ્રીરામ મે ત્વં હિ સમસ્તમેવ ॥ 91
રામચંદ્રચરિતામૃતપાનં
સોમપાનશતકોટિસમાનમ્ ।
સોમપાનશતકોટિભિરીયા-
જ્જન્મ નૈતિ રઘુનાયકનામ્ના ॥ 92
રામ રામ દયાસિંધો રાવણારે જગત્પતે ।
ત્વત્પાદકમલાસક્તિ-ર્ભવેજ્જન્મનિ જન્મનિ ॥ 93
શ્રીરામચંદ્રેતિ દયાપરેતિ
ભક્તપ્રિયેતિ ભવબંધનમોચનેતિ ।
નાથેતિ નાગશયનેતિ સદા સ્તુવંતં
માં પાહિ ભીતમનિશં કૃપણં કૃપાળો ॥ 94
અયોધ્યાનાથ રાજેંદ્ર સીતાકાંત જગત્પતે ।
શ્રીરામ પુંડરીકાક્ષ રામચંદ્ર નમોઽસ્તુ તે ॥ 95
હે રામ હે રમણ હે જગદેકવીર
હે નાથ હે રઘુપતે કરુણાલવાલ ।
હે જાનકીરમણ હે જગદેકબંધો
માં પાહિ દીનમનિશં કૃપણં કૃતઘ્નમ્ ॥ 96
જાનાતિ રામ તવ તત્ત્વગતિં હનૂમાન્ ।
જાનાતિ રામ તવ સખ્યગતિં કપીશઃ ।
જાનાતિ રામ તવ યુદ્ધગતિં દશાસ્યો ।
જાનાતિ રામ ધનદાનુજ એવ સત્યમ્ ॥ 97
સેવ્યં શ્રીરામમંત્રં શ્રવણશુભકરં શ્રેષ્ઠસુજ્ઞાનિમંત્રં
સ્તવ્યં શ્રીરામમંત્રં નરકદુરિતદુર્વારનિર્ઘાતમંત્રમ્ ।
ભવ્યં શ્રીરામમંત્રં ભજતુ ભજતુ સંસારનિસ્તારમંત્રં
દિવ્યં શ્રીરામમંત્રં દિવિ ભુવિ વિલસન્મોક્ષરક્ષૈકમંત્રમ્ ॥ 98
નિખિલનિલયમંત્રં નિત્યતત્ત્વાખ્યમંત્રં
ભવકુલહરમંત્રં ભૂમિજાપ્રાણમંત્રમ્ ।
પવનજનુતમંત્રં પાર્વતીમોક્ષમંત્રં
પશુપતિનિજમંત્રં પાતુ માં રામમંત્રમ્ ॥ 99
પ્રણવનિલયમંત્રં પ્રાણનિર્વાણમંત્રં
પ્રકૃતિપુરુષમંત્રં બ્રહ્મરુદ્રેંદ્રમંત્રમ્ ।
પ્રકટદુરિતરાગદ્વેષનિર્ણાશમંત્રં
રઘુપતિનિજમંત્રં રામરામેતિમંત્રમ્ ॥ 100
દશરથસુતમંત્રં દૈત્યસંહારમંત્રં
વિબુધવિનુતમંત્રં વિશ્વવિખ્યાતમંત્રમ્ ।
મુનિગણનુતમંત્રં મુક્તિમાર્ગૈકમંત્રં
રઘુપતિનિજમંત્રં રામરામેતિમંત્રમ્ ॥ 101
સંસારસાગરભયાપહવિશ્વમંત્રં
સાક્ષાન્મુમુક્ષુજનસેવિતસિદ્ધમંત્રમ્ ।
સારંગહસ્તમુખહસ્તનિવાસમંત્રં
કૈવલ્યમંત્રમનિશં ભજ રામમંત્રમ્ ॥ 102
જયતુ જયતુ મંત્રં જન્મસાફલ્યમંત્રં
જનનમરણભેદક્લેશવિચ્છેદમંત્રમ્ ।
સકલનિગમમંત્રં સર્વશાસ્ત્રૈકમંત્રં
રઘુપતિનિજમંત્રં રામરામેતિમંત્રમ્ ॥ 103
જગતિ વિશદમંત્રં જાનકીપ્રાણમંત્રં
વિબુધવિનુતમંત્રં વિશ્વવિખ્યાતમંત્રમ્ ।
દશરથસુતમંત્રં દૈત્યસંહારમંત્રં
રઘુપતિનિજમંત્રં રામરામેતિમંત્રમ્ ॥ 104
બ્રહ્માદિયોગિમુનિપૂજિતસિદ્ધમંત્રં
દારિદ્ર્યદુઃખભવરોગવિનાશમંત્રમ્ ।
સંસારસાગરસમુત્તરણૈકમંત્રં
વંદે મહાભયહરં રઘુરામમંત્રમ્ ॥ 105
શત્રુચ્છેદૈકમંત્રં સરસમુપનિષદ્વાક્યસંપૂજ્યમંત્રં
સંસારોત્તારમંત્રં સમુચિતસમયે સંગનિર્યાણમંત્રમ્ ।
સર્વૈશ્વર્યૈકમંત્રં વ્યસનભુજગસંદષ્ટસંત્રાણમંત્રં
જિહ્વે શ્રીરામમંત્રં જપ જપ સફલં જન્મસાફલ્યમંત્રમ્ ॥ 106
નિત્યં શ્રીરામમંત્રં નિરુપમમધિકં નીતિસુજ્ઞાનમંત્રં
સત્યં શ્રીરામમંત્રં સદમલહૃદયે સર્વદારોગ્યમંત્રમ્ ।
સ્તુત્યં શ્રીરામમંત્રં સુલલિતસુમનસ્સૌખ્યસૌભાગ્યમંત્રં
પઠ્યં શ્રીરામમંત્રં પવનજવરદં પાતુ માં રામમંત્રમ્ ॥ 107
વ્યામોહપ્રશમૌષધં મુનિમનોવૃત્તિપ્રવૃત્ત્યૌષધં
દૈત્યોન્મૂલકરૌષધં ભવભયપ્રધ્વંસનૈકૌષધમ્ ।
ભક્તાનંદકરૌષધં ત્રિભુવને સંજીવનૈકૌષધં
શ્રેયઃ પ્રાપ્તિકરૌષધં પિબ મનઃ શ્રીરામનામૌષધમ્ ॥ 108
સકલભુવનરત્નં સર્વશાસ્ત્રાર્થરત્નં
સમરવિજયરત્નં સચ્ચિદાનંદરત્નમ્ ।
દશમુખહરરત્નં દાનવારાતિરત્નં
રઘુકુલનૃપરત્નં પાતુ માં રામરત્નમ્ ॥ 109
સકલભુવનરત્નં સચ્ચિદાનંદરત્નં
સકલહૃદયરત્નં સૂર્યબિંબાંતરત્નમ્ ।
વિમલસુકૃતરત્નં વેદવેદાંતરત્નં
પુરહરજપરત્નં પાતુ માં રામરત્નમ્ ॥ 110
નિગમશિખરરત્નં નિર્મલાનંદરત્નં
નિરુપમગુણરત્નં નાદનાદાંતરત્નમ્ ।
દશરથકુલરત્નં દ્વાદશાંતસ્સ્થરત્નં
પશુપતિજપરત્નં પાતુ માં રામરત્નમ્ ॥ 111
શતમખસુતરત્નં ષોડશાંતસ્સ્થરત્નં
મુનિજનજપરત્નં મુખ્યવૈકુંઠરત્નમ્ ।
નિરુપમગુણરત્નં નીરજાંતસ્સ્થરત્નં
પરમપદવિરત્નં પાતુ માં રામરત્નમ્ ॥ 112
સકલસુકૃતરત્નં સત્યવાક્યાર્થરત્નં
શમદમગુણરત્નં શાશ્વતાનંદરત્નમ્ ।
પ્રણયનિલયરત્નં પ્રસ્ફુટદ્યોતિરત્નં
પરમપદવિરત્નં પાતુ માં રામરત્નમ્ ॥ 113
નિગમશિખરરત્નં નિત્યમાશાસ્યરત્નં
જનનુતનૃપરત્નં જાનકીરૂપરત્નમ્ ।
ભુવનવલયરત્નં ભૂભુજામેકરત્નં
રઘુકુલવરરત્નં પાતુ માં રામરત્નમ્ ॥ 114
વિશાલનેત્રં પરિપૂર્ણગાત્રં
સીતાકલત્રં સુરવૈરિજૈત્રમ્ ।
કારુણ્યપાત્રં જગતઃ પવિત્રં
શ્રીરામરત્નં પ્રણતોઽસ્મિ નિત્યમ્ ॥ 115
હે ગોપાલક હે દયાજલનિધે હે સદ્ગુણાંભોનિધે
હે દૈત્યાંતક હે વિભીષણદયાપરીણ હે ભૂપતે ।
હે વૈદેહસુતામનોજવિહૃતે હે કોટિમારાકૃતે
હે નવ્યાંબુજનેત્ર પાલય પરં જાનામિ ન ત્વાં વિના ॥ 116
યસ્ય કિંચિદપિ નો હરણીયં
કર્મ કિંચિદપિ નો ચરણીયમ્ ।
રામનામ ચ સદા સ્મરણીયં
લીલયા ભવજલં તરણીયમ્ ॥ 117
દશરથસુતમીશં દંડકારણ્યવાસં
શતમખમણિનીલં જાનકીપ્રાણલોલમ્ ।
સકલભુવનમોહં સન્નુતાંભોદદેહં
બહુળનુતસમુદ્રં ભાવયે રામભદ્રમ્ ॥ 118
વિશાલનેત્રં પરિપૂર્ણગાત્રં
સીતાકળત્રં સુરવૈરિજૈત્રમ્ ।
જગત્પવિત્રં પરમાત્મતંત્રં
શ્રીરામચંદ્રં પ્રણમામિ ચિત્તે ॥ 119
જય જય રઘુરામ શ્રીમુખાંભોજભાનો
જય જય રઘુવીર શ્રીમદંભોજનેત્ર ।
જય જય રઘુનાથ શ્રીકરાભ્યર્ચિતાંઘ્રિ
જય જય રઘુવર્ય શ્રીશ કારુણ્યસિંધો ॥ 120
મંદારમૂલે મણિપીઠસંસ્થં
સુધાપ્લુતં દિવ્યવિરાટ્સ્વરૂપમ્ ।
સબિંદુનાદાંતકલાંતતુર્ય-
મૂર્તિં ભજેઽહં રઘુવંશરત્નમ્ ॥ 121
નાદં નાદવિનીલચિત્તપવનં નાદાંતત્ત્વપ્રિયં
નામાકારવિવર્જિતં નવઘનશ્યામાંગનાદપ્રિયમ્ ।
નાદાંભોજમરંદમત્તવિલસદ્ભૃંગં મદાંતસ્સ્થિતં
નાદાંતધૃવમંડલાબ્જરુચિરં રામં ભજે તારકમ્ ॥ 122
નાનાભૂતહૃદબ્જપદ્મનિલયં નામોજ્જ્વલાભૂષણમ્ ।
નામસ્તોત્રપવિત્રિતત્રિભુવનં નારાયણાષ્ટાક્ષરમ્ ।
નાદાંતેંદુગળત્સુધાપ્લુતતનું નાનાત્મચિન્માત્રકમ્ ।
નાનાકોટિયુગાંતભાનુસદૃશં રામં ભજે તારકમ્ ॥ 123
વેદ્યં વેદગુરું વિરિંચિજનકં વેદાંતમૂર્તિં સ્ફુર-
દ્વેદં વેદકલાપમૂલમહિમાધારાંતકંદાંકુરમ્ ।
વેદશૃંગસમાનશેષશયનં વેદાંતવેદ્યાત્મકં
વેદારાધિતપાદપંકજમહં રામં ભજે તારકમ્ ॥ 124
મજ્જીવં મદનુગ્રહં મદધિપં મદ્ભાવનં મત્સુખં
મત્તાતં મમ સદ્ગુરું મમ વરં મોહાંધવિચ્છેદનમ્ ।
મત્પુણ્યં મદનેકબાંધવજનં મજ્જીવનં મન્નિધિં
મત્સિદ્ધિં મમ સર્વકર્મસુકૃતં રામં ભજે તારકમ્ ॥ 125
નિત્યં નીરજલોચનં નિરુપમં નીવારશૂકોપમં
નિર્ભેદાનુભવં નિરંતરગુણં નીલાંગરાગોજ્જ્વલમ્ ।
નિષ્પાપં નિગમાગમાર્ચિતપદં નિત્યાત્મકં નિર્મલં
નિષ્પુણ્યં નિખિલં નિરંજનપદં રામં ભજે તારકમ્ ॥ 126
ધ્યાયે ત્વાં હૃદયાંબુજે રઘુપતિં વિજ્ઞાનદીપાંકુરં
હંસોહંસપરંપરાદિમહિમાધારં જગન્મોહનમ્ ।
હસ્તાંભોજગદાબ્જચક્રમતુલં પીતાંબરં કૌસ્તુભં
શ્રીવત્સં પુરુષોત્તમં મણિનિભં રામં ભજે તારકમ્ ॥ 127
સત્યજ્ઞાનમનંતમચ્યુતમજં ચાવ્યાકૃતં તત્પરં
કૂટસ્થાદિસમસ્તસાક્ષિમનઘં સાક્ષાદ્વિરાટ્તત્ત્વદમ્ ।
વેદ્યં વિશ્વમયં સ્વલીનભુવનસ્વારાજ્યસૌખ્યપ્રદં
પૂર્ણં પૂર્ણતરં પુરાણપુરુષં રામં ભજે તારકમ્ ॥ 128
રામં રાક્ષસવંશનાશનકરં રાકેંદુબિંબાનનં
રક્ષોરિં રઘુવંશવર્ધનકરં રક્તાધરં રાઘવમ્ ।
રાધાયાત્મનિવાસિનં રવિનિભં રમ્યં રમાનાયકં
રંધ્રાંતર્ગતશેષશાયિનમહં રામં ભજે તારકમ્ ॥ 129
ઓતપ્રોતસમસ્તવસ્તુનિચયં ઓંકારબીજાક્ષરં
ઓંકારપ્રકૃતિં ષડક્ષરહિતં ઓંકારકંદાંકુરમ્ ।
ઓંકારસ્ફુટભૂર્ભુવસ્સુપરિતં ઓઘત્રયારાધિતમ્
ઓંકારોજ્જ્વલસિંહપીઠનિલયં રામં ભજે તારકમ્ ॥ 130
સાકેતે નગરે સમસ્તસુખદે હર્મ્યેઽબ્જકોટિદ્યુતે
નક્ષત્રગ્રહપંક્તિલગ્નશિખરે ચાંતર્યપંકેરુહે ।
વાલ્મીકાત્રિપરાશરાદિમુનિભિસ્સંસેવ્યમાનં સ્થિતં
સીતાલંકૃતવામભાગમનિશં રામં ભજે તારકમ્ ॥ 131
વૈકુંઠે નગરે સુરદ્રુમતલે ચાનંદવપ્રાંતરે
નાનારત્નવિનિર્મિતસ્ફુટપટુપ્રાકારસંવેષ્ટિતે ।
સૌધેંદૂપલશેષતલ્પલલિતે નીલોત્પલચ્છાદિતે
પર્યંકે શયનં રમાદિસહિતં રામં ભજે તારકમ્ ॥ 132
વંદે રામમનાદિપૂરુષમજં વંદે રમાનાયકં
વંદે હારિકિરીટકુંડલધરં વંદે સુનીલદ્યુતિમ્ ।
વંદે ચાપકલંબકોજ્જ્વલકરં વંદે જગન્મંગળં
વંદે પંક્તિરથાત્મજં મમ ગુરું વંદે સદા રાઘવમ્ ॥ 133
વંદે શૌનકગૌતમાદ્યભિનુતં વંદે ઘનશ્યામલં
વંદે તારકપીઠમધ્યનિલયં વંદે જગન્નાયકમ્ ।
વંદે ભક્તજનૌઘદેવિવટપં વંદે ધનુર્વલ્લભં
વંદે તત્ત્વમસીતિવાક્યજનકં વંદે સદા રાઘવમ્ ॥ 134
વંદે સૂર્યશશાંકલોચનયુગં વંદે જગત્પાવનં
વંદે પત્રસહસ્રપદ્મનિલયં વંદે પુરારિપ્રિયમ્ ।
વંદે રાક્ષસવંશનાશનકરં વંદે સુધાશીતલં
વંદે દેવકપીંદ્રકોટિવિનુતં વંદે સદા રાઘવમ્ ॥ 135
વંદે સાગરગર્વભંગવિશિખં વંદે જગજ્જીવનં
વંદે કૌશિકયાગરક્ષણકરં વંદે ગુરુણાં ગુરુમ્ ।
વંદે બાણશરાસનોજ્જ્વલકરં વંદે જટાવલ્કલં
વંદે લક્ષ્મણભૂમિજાન્વિતમહં વંદે સદા રાઘવમ્ ॥ 136
વંદે પાંડરપુંડરીકનયનં વંદેઽબ્જબિંબાનનં
વંદે કંબુગળં કરાબ્જયુગળં વંદે લલાટોજ્જ્વલમ્ ।
વંદે પીતદુકૂલમંબુદનિભં વંદે જગન્મોહનં
વંદે કારણમાનુષોજ્જ્વલતનું વંદે સદા રાઘવમ્ ॥ 137
વંદે નીલસરોજકોમલરુચિં વંદે જગદ્વંદિતં
વંદે સૂર્યકુલાબ્ધિકૌસ્તુભમણિં વંદે સુરારાધિતમ્ ।
વંદે પાતકપંચકપ્રહરણં વંદે જગત્કારણં
વંદે વિંશતિપંચતત્ત્વરહિતં વંદે સદા રાઘવમ્ ॥ 138
વંદે સાધકવર્ગકલ્પકતરું વંદે ત્રિમૂર્ત્યાત્મકં
વંદે નાદલયાંતરસ્થલગતં વંદે ત્રિવર્ગાત્મકમ્ ।
વંદે રાગવિહીનચિત્તસુલભં વંદે સભાનાયકં
વંદે પૂર્ણદયામૃતાર્ણવમહં વંદે સદા રાઘવમ્ ॥ 139
વંદે સાત્ત્વિકતત્ત્વમુદ્રિતતનું વંદે સુધાદાયકં
વંદે ચારુચતુર્ભુજં મણિનિભં વંદે ષડબ્જસ્થિતમ્ ।
વંદે બ્રહ્મપિપીલિકાદિનિલયં વંદે વિરાટ્વિગ્રહં
વંદે પન્નગતલ્પશાયિનમહં વંદે સદા રાઘવમ્ ॥ 140
સિંહાસનસ્થં મુનિસિદ્ધસેવ્યં
રક્તોત્પલાલંકૃતપાદપદ્મમ્ ।
સીતાસમેતં શશિસૂર્યનેત્રં
રામં ભજે રાઘવરામચંદ્રમ્ ॥ 141
શ્રીરામભદ્રાશ્રિતસદ્ગુરૂણાં
પાદારવિંદં ભજતાં નરાણામ્ ।
આરોગ્યમૈશ્વર્યમનંતકીર્તિ-
રંતે ચ વિષ્ણોઃ પદમસ્તિ સત્યમ્ ॥ 142
દશરથવરપુત્રં જાનકીસત્કળત્રં
દશમુખહરદક્ષં પદ્મપત્રાયતાક્ષમ્ ।
કરધૃતશરચાપં ચારુમુક્તાકલાપં
રઘુકુલનૃવરેણ્યં રામમીડે શરણ્યમ્ ॥ 143
દશમુખગજસિંહં દૈત્યગર્વાતિરંહં
કદનભયદહસ્તં તારકબ્રહ્મ શસ્તમ્ ।
મણિખચિતકિરીટં મંજુલાલાપવાટં
દશરથકુલચંદ્રં રામચંદ્રં ભજેઽહમ્ ॥ 144
રામં રક્તસરોરુહાક્ષમમલં લંકાધિનાથાંતકં
કૌસલ્યાનયનોત્સુકં રઘુવરં નાગેંદ્રતલ્પસ્થિતમ્ ।
વૈદેહીકુચકુંભકુંકુમરજોલંકારહારં હરિં
માયામાનુષવિગ્રહં રઘુપતિં સીતાસમેતં ભજે ॥ 145
રામં રાક્ષસમર્દનં રઘુવરં દૈતેયભિધ્વંસિનં
સુગ્રીવેપ્સિતરાજ્યદં સુરપતેર્ભીત્યંતકં શાર્ંગિણમ્ ।
ભક્તાનામભયપ્રદં ભયહરં પાપૌઘવિધ્વંસિનં
સામીરિસ્તુતપાદપદ્મયુગળં સીતાસમેતં ભજે ॥ 146
યત્પાદાંબુજરેણુના મુનિસતી મુક્તિંગતા યન્મહઃ
પુણ્યં પાતકનાશનં ત્રિજગતાં ભાતિ સ્મૃતં પાવનમ્ ।
સ્મૃત્વા રાઘવમપ્રમેયમમલં પૂર્ણેંદુમંદસ્મિતં
તં રામં સરસીરુહાક્ષમમલં સીતાસમેતં ભજે ॥ 147
વૈદેહીકુચમંડલાગ્ર-વિલસન્માણિક્યહસ્તાંબુજં
ચંચત્કંકણહારનૂપુર-લસત્કેયૂરહારાન્વિતમ્ ।
દિવ્યશ્રીમણિકુંડલોજ્જ્વલ-મહાભૂષાસહસ્રાન્વિતં
વીરશ્રીરઘુપુંગવં ગુણનિધિં સીતાસમેતં ભજે ॥ 148
વૈદેહીકુચમંડલોપરિ-લસન્માણિક્યહારાવળી-
મધ્યસ્થં નવનીતકોમલરુચિં નીલોત્પલશ્યામલમ્ ।
કંદર્પાયુતકોટિસુંદરતનું પૂર્ણેંદુબિંબાનનં
કૌસલ્યાકુલભૂષણં રઘુપતિં સીતાસમેતં ભજે ॥ 149
દિવ્યારણ્યયતીંદ્રનામનગરે મધ્યે મહામંટપે
સ્વર્ણસ્તંભસહસ્રષોડશયુતે મંદારમૂલાશ્રિતે ।
નાનારત્નવિચિત્રનિર્મલમહાસિંહાસને સંસ્થિતં
સીતાલક્ષ્મણસેવિતં રઘુપતિં સીતાસમેતં ભજે ॥ 150
કસ્તૂરીતિલકં કપીંદ્રહરણં કારુણ્યવારાંનિધિં
ક્ષીરાંભોધિસુતામુખાબ્જમધુપં કલ્યાણસંપન્નિધિમ્ ।
કૌસલ્યાનયનોત્સુકં કપિવરત્રાણં મહાપૌરુષં
કૌમારપ્રિયમર્કકોટિસદૃશં સીતાસમેતં ભજે ॥ 151
વિદ્યુત્કોટિદિવાકરદ્યુતિનિભં શ્રીકૌસ્તુભાલંકૃતં
યોગીંદ્રૈસ્સનકાદિભિઃ પરિવૃતં કૈલાસનાથપ્રિયમ્ ।
મુક્તારત્નકિરીટકુંડલધરં ગ્રૈવેયહારાન્વિતં
વૈદેહીકુચસન્નિવાસમનિશં સીતાસમેતં ભજે ॥ 152
મેઘશ્યામલમંબુજાતનયનં વિસ્તીર્ણવક્ષસ્સ્થલં
બાહુદ્વંદ્વવિરાજિતં સુવદનં શોણાંઘ્રિપંકેરુહમ્ ।
નાનારત્નવિચિત્રભૂષણયુતં કોદંડબાણાંકિતં
ત્રૈલોક્યાઽપ્રતિમાનસુંદરતનું સીતાસમેતં ભજે ॥ 153
વૈદેહીયુતવામભાગમતુલં વંદારુમંદારકં
વંદે પ્રસ્તુતકીર્તિવાસિતતરુચ્છાયાનુકારિપ્રભમ્ ।
વૈદેહીકુચકુંકુમાંકિતમહોરસ્કં મહાભૂષણં
વેદાંતૈરુપગીયમાનમસકૃત્સીતાસમેતં ભજે ॥ 154
દેવાનાં હિતકારણેન ભુવને ધૃત્વાઽવતારં ધ્રુવં
રામં કૌશિકયજ્ઞવિઘ્નદલનં તત્તાટકાસંહરમ્ ।
નિત્યં ગૌતમપત્નિશાપદલનશ્રીપાદરેણું શુભં
શંભોરુત્કટચાપખંડનમહાસત્વં ભજે રાઘવમ્ ॥ 155
શ્રીરામં નવરત્નકુંડલધરં શ્રીરામરક્ષામણિં
શ્રીરામં ચ સહસ્રભાનુસદૃશં શ્રીરામચંદ્રોદયમ્ ।
શ્રીરામં શ્રુતકીર્તિમાકરમહં શ્રીરામમુક્તિપ્રદં
શ્રીરામં રઘુનંદનં ભયહરં શ્રીરામચંદ્રં ભજે ॥ 156
રામમિંદીવરશ્યામં રાજીવાયતલોચનમ્ ।
જ્યાઘોષનિર્જિતારાતિં જાનકીરમણં ભજે ॥ 157
દીર્ઘબાહુમરવિંદલોચનં
દીનવત્સલમનાથરક્ષકમ્ ।
દીક્ષિતં સકલલોકરક્ષણે
દૈવતં દશરથાત્મજં ભજે ॥ 158
પ્રાતસ્સ્મરામિ રઘુનાથમુખારવિંદં
મંદસ્મિતં મધુરભાષિ વિશાલફાલમ્ ।
કર્ણાવલંબિચલકુંડલગંડભાગં
કર્ણાંતદીર્ઘનયનં નયનાભિરામમ્ ॥ 159
પ્રાતર્ભજામિ રઘુનાથકરારવિંદં
રક્ષોગણાય ભયદં વરદં નિજેભ્યઃ ।
યદ્રાજસંસદિ વિભિદ્ય મહેશચાપં
સીતાકરગ્રહણમંગળમાપ સદ્યઃ ॥ 160
પ્રાતર્નમામિ રઘુનાથપદારવિંદં
પદ્માંકુશાદિશુભરેખશુભાવહં ચ ।
યોગીંદ્રમાનસમધુવ્રતસેવ્યમાનં
શાપાપહં સપદિ ગૌતમધર્મપત્ન્યાઃ ॥ 161
પ્રાતર્વદામિ વચસા રઘુનાથનામ
વાગ્દોષહારિ સકલં કલુષં નિહંતૃ ।
યત્પાર્વતી સ્વપતિના સહ ભોક્તુકામા
પ્રીત્યા સહસ્રહરિનામસમં જજાપ ॥ 162
પ્રાતઃ શ્રયે શ્રુતિનુતં રઘુનાથમૂર્તિં
નીલાંબુદોત્પલસિતેતરરત્નનીલામ્ ।
આમુક્તમૌક્તિકવિશેષવિભૂષણાઢ્યાં
ધ્યેયાં સમસ્તમુનિભિર્નિજભૃત્યમુખ્યૈઃ ॥ 163
રઘુકુલવરનાથો જાનકીપ્રાણનાથઃ
પિતૃવચનવિધાતા કીશરાજ્યપ્રદાતા ।
પ્રતિનિશિચરનાશઃ પ્રાપ્તરાજ્યપ્રવેશો
વિહિતભુવનરક્ષઃ પાતુ પદ્માયતાક્ષઃ ॥ 164
કુવલયદળનીલઃ પીતવાસાઃ સ્મિતાસ્યો
વિવિધરુચિરભૂષાભૂષિતો દિવ્યમૂર્તિઃ ।
દશરથકુલનાથો જાનકીપ્રાણનાથો
નિવસતુ મમ ચિત્તે સર્વદા રામચંદ્રઃ ॥ 165
જયતુ જયતુ રામો જાનકીવલ્લભોઽયં
જયતુ જયતુ રામશ્ચંદ્રચૂડાર્ચિતાંઘ્રિઃ ।
જયતુ જયતુ વાણીનાથનાથઃ પરાત્મા
જયતુ જયતુ રામોઽનાથનાથઃ કૃપાળુઃ ॥ 166
વદતુ વદતુ વાણી રામરામેતિ નિત્યં
જયતુ જયતુ ચિત્તં રામપાદારવિંદમ્ ।
નમતુ નમતુ દેહં સંતતં રામચંદ્રં
ન ભવતુ મમ પાપં જન્મજન્માંતરેષુ ॥ 167
આનંદરૂપં વરદં પ્રસન્નં
સિંહેક્ષણં સેવકપારિજાતમ્ ।
નીલોત્પલાંગં ભુવનૈકમિત્રં
રામં ભજે રાઘવરામચંદ્રમ્ ॥ 168
લંકાવિરામં રણરંગભીમં
રાજીવનેત્રં રઘુવંશમિત્રમ્ ।
કારુણ્યમૂર્તિં કરુણાપ્રપૂર્તિં
શ્રીરામચંદ્રં શરણં પ્રપદ્યે ॥ 169
સુગ્રીવમિત્રં પરમં પવિત્રં
સીતાકળત્રં નવહેમસૂત્રમ્ ।
કારુણ્યપાત્રં શતપત્રનેત્રં
શ્રીરામચંદ્રં શિરસા નમામિ ॥ 170
શ્રીરાઘવેતિ રમણેતિ રઘૂદ્વહેતિ
રામેતિ રાવણહરેતિ રમાધવેતિ ।
સાકેતનાથસુમુખેતિ ચ સુવ્રતેતિ
વાણી સદા વદતુ રામ હરે હરેતિ ॥ 171
શ્રીરામનામામૃતમંત્રબીજં
સંજીવનં ચેન્મનસિ પ્રતિષ્ઠમ્ ।
હાલાહલં વા પ્રળયાનલં વા
મૃત્યોર્મુખં વા વિતથીકરોતિ ॥ 172
કિં યોગશાસ્ત્રૈઃ કિમશેષવિદ્યા
કિં યાગગંગાદિવિશેષતીર્થૈઃ ।
કિં બ્રહ્મચર્યાશ્રમસંચરેણ
ભક્તિર્નચેત્તે રઘુવંશકીર્ત્યામ્ ॥ 173
ઇદં શરીરં શ્લથસંધિજર્ઝરં
પતત્યવશ્યં પરિણામપેશલમ્ ।
કિમૌષથં પૃચ્છસિ મૂઢ દુર્મતે
નિરામયં રામકથામૃતં પિબ ॥ 174
હે રામભદ્રાશ્રય હે કૃપાળો
હે ભક્તલોકૈકશરણ્યમૂર્તે ।
પુનીહિ માં ત્વચ્ચરણારવિંદં
જગત્પવિત્રં શરણં મમાઽસ્તુ ॥ 175
નીલાભ્રદેહ નિખિલેશ જગન્નિવાસ
રાજીવનેત્ર રમણીયગુણાભિરામ ।
શ્રીદામ દૈત્યકુલમર્દન રામચંદ્ર
ત્વત્પાદપદ્મમનિશં કલયામિ ચિત્તે ॥ 176
શ્રીરામચંદ્ર કરુણાકર દીનબંધો
સીતાસમેત ભરતાગ્રજ રાઘવેશ ।
પાપાર્તિભંજન ભયાતુરદીનબંધો
પાપાંબુધૌ પતિતમુદ્ધર મામનાથમ્ ॥ 177
ઇંદીવરદળશ્યામ-મિંદુકોટિનિભાનનમ્ ।
કંદર્પકોટિલાવણ્યં વંદેઽહં રઘુનંદનમ્ ॥ 175
ઇતિ શ્રીબોધેંદ્રસરસ્વતી કૃત શ્રીરામકર્ણામૃતમ્ ॥