ସ୍ଫୁରତ୍ସହସ୍ରାରଶିଖାତିତୀଵ୍ରଂ
ସୁଦର୍ଶନଂ ଭାସ୍କରକୋଟିତୁଲ୍ୟମ୍ ।
ସୁରଦ୍ଵିଷାଂ ପ୍ରାଣଵିନାଶି ଵିଷ୍ଣୋଃ
ଚକ୍ରଂ ସଦାଽହଂ ଶରଣଂ ପ୍ରପଦ୍ୟେ ॥ 1 ॥
ଵିଷ୍ଣୋର୍ମୁଖୋତ୍ଥାନିଲପୂରିତସ୍ୟ
ୟସ୍ୟ ଧ୍ଵନିର୍ଦାନଵଦର୍ପହଂତା ।
ତଂ ପାଂଚଜନ୍ୟଂ ଶଶିକୋଟିଶୁଭ୍ରଂ
ଶଂଖଂ ସଦାଽହଂ ଶରଣଂ ପ୍ରପଦ୍ୟେ ॥ 2 ॥
ହିରଣ୍ମୟୀଂ ମେରୁସମାନସାରାଂ
କୌମୋଦକୀଂ ଦୈତ୍ୟକୁଲୈକହଂତ୍ରୀମ୍ ।
ଵୈକୁଂଠଵାମାଗ୍ରକରାଗ୍ରମୃଷ୍ଟାଂ
ଗଦାଂ ସଦାଽହଂ ଶରଣଂ ପ୍ରପଦ୍ୟେ ॥ 3 ॥
ୟଜ୍ଜ୍ୟାନିନାଦଶ୍ରଵଣାତ୍ସୁରାଣାଂ
ଚେତାଂସି ନିର୍ମୁକ୍ତଭୟାନି ସଦ୍ୟଃ ।
ଭଵଂତି ଦୈତ୍ୟାଶନିବାଣଵର୍ଷୈଃ
ଶାର୍ଙ୍ଗଂ ସଦାଽହଂ ଶରଣଂ ପ୍ରପଦ୍ୟେ ॥ 4 ॥
ରକ୍ଷୋଽସୁରାଣାଂ କଠିନୋଗ୍ରକଂଠ-
-ଚ୍ଛେଦକ୍ଷରତ୍କ୍ଷୋଣିତ ଦିଗ୍ଧସାରମ୍ ।
ତଂ ନଂଦକଂ ନାମ ହରେଃ ପ୍ରଦୀପ୍ତଂ
ଖଡ୍ଗଂ ସଦାଽହଂ ଶରଣଂ ପ୍ରପଦ୍ୟେ ॥ 5 ॥
ଇମଂ ହରେଃ ପଂଚମହାୟୁଧାନାଂ
ସ୍ତଵଂ ପଠେଦ୍ୟୋଽନୁଦିନଂ ପ୍ରଭାତେ ।
ସମସ୍ତ ଦୁଃଖାନି ଭୟାନି ସଦ୍ୟଃ
ପାପାନି ନଶ୍ୟଂତି ସୁଖାନି ସଂତି ॥ 6 ॥
ଵନେ ରଣେ ଶତ୍ରୁ ଜଲାଗ୍ନିମଧ୍ୟେ
ୟଦୃଚ୍ଛୟାପତ୍ସୁ ମହାଭୟେଷୁ ।
ପଠେତ୍ଵିଦଂ ସ୍ତୋତ୍ରମନାକୁଲାତ୍ମା
ସୁଖୀଭଵେତ୍ତତ୍କୃତ ସର୍ଵରକ୍ଷଃ ॥ 7 ॥
ୟଚ୍ଚକ୍ରଶଂଖଂ ଗଦଖଡ୍ଗଶାରଂଗିଣଂ
ପୀତାଂବରଂ କୌସ୍ତୁଭଵତ୍ସଲାଂଛିତମ୍ ।
ଶ୍ରିୟାସମେତୋଜ୍ଜ୍ଵଲଶୋଭିତାଂଗଂ
ଵିଷ୍ଣୁଂ ସଦାଽହଂ ଶରଣଂ ପ୍ରପଦ୍ୟେ ॥
ଜଲେ ରକ୍ଷତୁ ଵାରାହଃ ସ୍ଥଲେ ରକ୍ଷତୁ ଵାମନଃ ।
ଅଟଵ୍ୟାଂ ନାରସିଂହଶ୍ଚ ସର୍ଵତଃ ପାତୁ କେଶଵଃ ॥
ଇତି ପଂଚାୟୁଧ ସ୍ତୋତ୍ରମ୍ ॥