અથ તૃતીયસ્તોત્રમ્
કુરુ ભુંક્ષ્વ ચ કર્મ નિજં નિયતં હરિપાદવિનમ્રધિયા સતતમ્ ।
હરિરેવ પરો હરિરેવ ગુરુઃ હરિરેવ જગત્પિતૃમાતૃગતિઃ ॥ 1॥
ન તતોઽસ્ત્યપરં જગદીડ્યતમં (જગતીડ્યતમં) પરમાત્પરતઃ પુરુષોત્તમતઃ ।
તદલં બહુલોકવિચિંતનયા પ્રવણં કુરુ માનસમીશપદે ॥ 2॥
યતતોઽપિ હરેઃ પદસંસ્મરણે સકલં હ્યઘમાશુ લયં વ્રજતિ ।
સ્મરતસ્તુ વિમુક્તિપદં પરમં સ્ફુટમેષ્યતિ તત્કિમપાક્રિયતે ॥ 3॥
શઋણુતામલસત્યવચઃ પરમં શપથેરિતં ઉચ્છ્રિતબાહુયુગમ્ ।
ન હરેઃ પરમો ન હરેઃ સદૃશઃ પરમઃ સ તુ સર્વ ચિદાત્મગણાત્ ॥ 4॥
યદિ નામ પરો ન ભવેત (ભવેત્સ) હરિઃ કથમસ્ય વશે જગદેતદભૂત્ ।
યદિ નામ ન તસ્ય વશે સકલં કથમેવ તુ નિત્યસુખં ન ભવેત્ ॥ 5॥
ન ચ કર્મવિમામલ કાલગુણપ્રભૃતીશમચિત્તનુ તદ્ધિ યતઃ ।
ચિદચિત્તનુ સર્વમસૌ તુ હરિર્યમયેદિતિ વૈદિકમસ્તિ વચઃ ॥ 6॥
વ્યવહારભિદાઽપિ ગુરોર્જગતાં ન તુ ચિત્તગતા સ હિ ચોદ્યપરમ્ ।
બહવઃ પુરુષાઃ પુરુષપ્રવરો હરિરિત્યવદત્સ્વયમેવ હરિઃ ॥ 7॥
ચતુરાનન પૂર્વવિમુક્તગણા હરિમેત્ય તુ પૂર્વવદેવ સદા ।
નિયતોચ્ચવિનીચતયૈવ નિજાં સ્થિતિમાપુરિતિ સ્મ પરં વચનમ્ ॥ 8॥
આનંદતીર્થસન્નામ્ના પૂર્ણપ્રજ્ઞાભિધાયુજા ।
કૃતં હર્યષ્ટકં ભક્ત્યા પઠતઃ પ્રીયતે હરિઃ ॥ 9॥
ઇતિ શ્રીમદાનંદતીર્થભગવત્પાદાચાર્ય વિરચિતં
દ્વાદશસ્તોત્રેષુ તૃતીયસ્તોત્રં સંપૂર્ણમ્