ଅଥ ତୃତୀୟସ୍ତୋତ୍ରମ୍
କୁରୁ ଭୁଂକ୍ଷ୍ଵ ଚ କର୍ମ ନିଜଂ ନିୟତଂ ହରିପାଦଵିନମ୍ରଧିୟା ସତତମ୍ ।
ହରିରେଵ ପରୋ ହରିରେଵ ଗୁରୁଃ ହରିରେଵ ଜଗତ୍ପିତୃମାତୃଗତିଃ ॥ 1॥
ନ ତତୋଽସ୍ତ୍ୟପରଂ ଜଗଦୀଡ୍ୟତମଂ (ଜଗତୀଡ୍ୟତମଂ) ପରମାତ୍ପରତଃ ପୁରୁଷୋତ୍ତମତଃ ।
ତଦଲଂ ବହୁଲୋକଵିଚିଂତନୟା ପ୍ରଵଣଂ କୁରୁ ମାନସମୀଶପଦେ ॥ 2॥
ୟତତୋଽପି ହରେଃ ପଦସଂସ୍ମରଣେ ସକଲଂ ହ୍ୟଘମାଶୁ ଲୟଂ ଵ୍ରଜତି ।
ସ୍ମରତସ୍ତୁ ଵିମୁକ୍ତିପଦଂ ପରମଂ ସ୍ଫୁଟମେଷ୍ୟତି ତତ୍କିମପାକ୍ରିୟତେ ॥ 3॥
ଶଋଣୁତାମଲସତ୍ୟଵଚଃ ପରମଂ ଶପଥେରିତଂ ଉଚ୍ଛ୍ରିତବାହୁୟୁଗମ୍ ।
ନ ହରେଃ ପରମୋ ନ ହରେଃ ସଦୃଶଃ ପରମଃ ସ ତୁ ସର୍ଵ ଚିଦାତ୍ମଗଣାତ୍ ॥ 4॥
ୟଦି ନାମ ପରୋ ନ ଭଵେତ (ଭଵେତ୍ସ) ହରିଃ କଥମସ୍ୟ ଵଶେ ଜଗଦେତଦଭୂତ୍ ।
ୟଦି ନାମ ନ ତସ୍ୟ ଵଶେ ସକଲଂ କଥମେଵ ତୁ ନିତ୍ୟସୁଖଂ ନ ଭଵେତ୍ ॥ 5॥
ନ ଚ କର୍ମଵିମାମଲ କାଲଗୁଣପ୍ରଭୃତୀଶମଚିତ୍ତନୁ ତଦ୍ଧି ୟତଃ ।
ଚିଦଚିତ୍ତନୁ ସର୍ଵମସୌ ତୁ ହରିର୍ୟମୟେଦିତି ଵୈଦିକମସ୍ତି ଵଚଃ ॥ 6॥
ଵ୍ୟଵହାରଭିଦାଽପି ଗୁରୋର୍ଜଗତାଂ ନ ତୁ ଚିତ୍ତଗତା ସ ହି ଚୋଦ୍ୟପରମ୍ ।
ବହଵଃ ପୁରୁଷାଃ ପୁରୁଷପ୍ରଵରୋ ହରିରିତ୍ୟଵଦତ୍ସ୍ଵୟମେଵ ହରିଃ ॥ 7॥
ଚତୁରାନନ ପୂର୍ଵଵିମୁକ୍ତଗଣା ହରିମେତ୍ୟ ତୁ ପୂର୍ଵଵଦେଵ ସଦା ।
ନିୟତୋଚ୍ଚଵିନୀଚତୟୈଵ ନିଜାଂ ସ୍ଥିତିମାପୁରିତି ସ୍ମ ପରଂ ଵଚନମ୍ ॥ 8॥
ଆନଂଦତୀର୍ଥସନ୍ନାମ୍ନା ପୂର୍ଣପ୍ରଜ୍ଞାଭିଧାୟୁଜା ।
କୃତଂ ହର୍ୟଷ୍ଟକଂ ଭକ୍ତ୍ୟା ପଠତଃ ପ୍ରୀୟତେ ହରିଃ ॥ 9॥
ଇତି ଶ୍ରୀମଦାନଂଦତୀର୍ଥଭଗଵତ୍ପାଦାଚାର୍ୟ ଵିରଚିତଂ
ଦ୍ଵାଦଶସ୍ତୋତ୍ରେଷୁ ତୃତୀୟସ୍ତୋତ୍ରଂ ସଂପୂର୍ଣମ୍