Download as PDF 📄

ଅଥ ଚତୁର୍ଥସ୍ତୋତ୍ରମ୍

ନିଜପୂର୍ଣସୁଖାମିତବୋଧତନୁଃ ପରଶକ୍ତିରନଂତଗୁଣଃ ପରମଃ ।
ଅଜରାମରଣଃ ସକଲାର୍ତିହରଃ କମଲାପତିରୀଡ୍ୟତମୋଽଵତୁ ନଃ ॥ 1॥

ୟଦସୁପ୍ତିଗତୋଽପି ହରିଃ ସୁଖଵାନ୍ ସୁଖରୂପିଣମାହୁରତୋ ନିଗମାଃ ।
ସ୍ଵମତିପ୍ରଭଵଂ ଜଗଦସ୍ୟ ୟତଃ ପରବୋଧତନୁଂ ଚ ତତଃ ଖପତିମ୍ ॥ 2॥ (ସୁମତିପ୍ରଭଵମ୍)
ବହୁଚିତ୍ରଜଗତ୍ ବହୁଧାକରଣାତ୍ପରଶକ୍ତିରନଂତଗୁଣଃ ପରମଃ ।
ସୁଖରୂପମମୁଷ୍ୟପଦଂ ପରମଂ ସ୍ମରତସ୍ତୁ ଭଵିଷ୍ୟତି ତତ୍ସତତମ୍ ॥ 3॥

ସ୍ମରଣେ ହି ପରେଶିତୁରସ୍ୟ ଵିଭୋର୍ମଲିନାନି ମନାଂସି କୁତଃ କରଣମ୍ ।
ଵିମଲଂ ହି ପଦଂ ପରମଂ ସ୍ଵରତଂ ତରୁଣାର୍କସଵର୍ଣମଜସ୍ୟ ହରେଃ ॥ 4॥

ଵିମଲୈଃ ଶ୍ରୁତିଶାଣନିଶାତତମୈଃ ସୁମନୋଽସିଭିରାଶୁ ନିହତ୍ୟ ଦୃଢମ୍ ।
ବଲିନଂ ନିଜଵୈରିଣମାତ୍ମତମୋଭିଦମୀଶମନଂତମୁପାସ୍ଵ ହରିମ୍ ॥ 5॥

ନ ହି ଵିଶ୍ଵସୃଜୋ ଵିଭୁଶଂଭୁପୁରଂଦର ସୂର୍ୟମୁଖାନପରାନପରାନ୍ ।
ସୃଜତୀଡ୍ୟତମୋଽଵତି ହଂତି ନିଜଂ ପଦମାପୟତି ପ୍ରଣତାଂ ସ୍ଵଧିୟା ॥ 6॥

ପରମୋଽପି ରମେଶିତୁରସ୍ୟ ସମୋ ନ ହି କଶ୍ଚିଦଭୂନ୍ନ ଭଵିଷ୍ୟତି ଚ ।
କ୍ଵଚିଦଦ୍ୟତନୋଽପି ନ ପୂର୍ଣସଦାଗଣିତେଡ୍ୟଗୁଣାନୁଭଵୈକତନୋଃ ॥ 7॥

ଇତି ଦେଵଵରସ୍ୟ ହରେଃ ସ୍ତଵନଂ କୃତଵାନ୍ ମୁନିରୁତ୍ତମମାଦରତଃ ।
ସୁଖତୀର୍ଥପଦାଭିହିତଃ ପଠତସ୍ତଦିଦଂ ଭଵତି ଧ୍ରୁଵମୁଚ୍ଚସୁଖମ୍ ॥ 8॥

ଇତି ଶ୍ରୀମଦାନଂଦତୀର୍ଥଭଗଵତ୍ପାଦାଚାର୍ୟ ଵିରଚିତଂ
ଦ୍ଵାଦଶସ୍ତୋତ୍ରେଷୁ ଚତୁର୍ଥସ୍ତୋତ୍ରଂ ସଂପୂର୍ଣମ୍