અથ અષ્ટમસ્તોત્રમ્
વંદિતાશેષવંદ્યોરુવૃંદારકં ચંદનાચર્ચિતોદારપીનાંસકમ્ ।
ઇંદિરાચંચલાપાંગનીરાજિતં મંદરોદ્ધારિવૃત્તોદ્ભુજાભોગિનમ્ ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 1॥
સૃષ્ટિસંહારલીલાવિલાસાતતં પુષ્ટષાડ્ગુણ્યસદ્વિગ્રહોલ્લાસિનમ્ ।
દુષ્ટનિઃશેષસંહારકર્મોદ્યતં હૃષ્ટપુષ્ટાતિશિષ્ટ (અનુશિષ્ટ) પ્રજાસંશ્રયમ્ ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 2॥
ઉન્નતપ્રાર્થિતાશેષસંસાધકં સન્નતાલૌકિકાનંદદશ્રીપદમ્ ।
ભિન્નકર્માશયપ્રાણિસંપ્રેરકં તન્ન કિં નેતિ વિદ્વત્સુ મીમાંસિતમ્ ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 3॥
વિપ્રમુખ્યૈઃ સદા વેદવાદોન્મુખૈઃ સુપ્રતાપૈઃ ક્ષિતીશેશ્વરૈશ્ચાર્ચ્ચિતમ્ ।
અપ્રતર્ક્યોરુસંવિદ્ગુણં નિર્મલં સપ્રકાશાજરાનંદરૂપં પરમ્ ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 4॥
અત્યયો યસ્ય (યેન) કેનાપિ ન ક્વાપિ હિ પ્રત્યયો યદ્ગુણેષૂત્તમાનાં પરઃ ।
સત્યસંકલ્પ એકો વરેણ્યો વશી મત્યનૂનૈઃ સદા વેદવાદોદિતઃ ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 5॥
પશ્યતાં દુઃખસંતાનનિર્મૂલનં દૃશ્યતાં દૃશ્યતામિત્યજેશાર્ચિતમ્ ।
નશ્યતાં દૂરગં સર્વદાપ્યાઽત્મગં વશ્યતાં સ્વેચ્છયા સજ્જનેષ્વાગતમ્ ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 6॥
અગ્રજં યઃ સસર્જાજમગ્ર્યાકૃતિં વિગ્રહો યસ્ય સર્વે ગુણા એવ હિ ।
ઉગ્ર આદ્યોઽપિ યસ્યાત્મજાગ્ર્યાત્મજઃ સદ્ગૃહીતઃ સદા યઃ પરં દૈવતમ્ ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 7॥
અચ્યુતો યો ગુણૈર્નિત્યમેવાખિલૈઃ પ્રચ્યુતોઽશેષદોષૈઃ સદા પૂર્તિતઃ ।
ઉચ્યતે સર્વવેદોરુવાદૈરજઃ સ્વર્ચિતો બ્રહ્મરુદ્રેંદ્રપૂર્વૈઃ સદા ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 8॥
ધાર્યતે યેન વિશ્વં સદાજાદિકં વાર્યતેઽશેષદુઃખં નિજધ્યાયિનામ્ ।
પાર્યતે સર્વમન્યૈર્નયત્પાર્યતે કાર્યતે ચાખિલં સર્વભૂતૈઃ સદા ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 9॥
સર્વપાપાનિયત્સંસ્મૃતેઃ સંક્ષયં સર્વદા યાંતિ ભક્ત્યા વિશુદ્ધાત્મનામ્ ।
શર્વગુર્વાદિગીર્વાણ સંસ્થાનદઃ કુર્વતે કર્મ યત્પ્રીતયે સજ્જનાઃ ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 10॥
અક્ષયં કર્મ યસ્મિન્ પરે સ્વર્પિતં પ્રક્ષયં યાંતિ દુઃખાનિ યન્નામતઃ ।
અક્ષરો યોઽજરઃ સર્વદૈવામૃતઃ કુક્ષિગં યસ્ય વિશ્વં સદાઽજાદિકમ્ ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 11॥
નંદિતીર્થોરુસન્નામિનો નંદિનઃ સંદધાનાઃ સદાનંદદેવે મતિમ્ ।
મંદહાસારુણા પાંગદત્તોન્નતિં વંદિતાશેષદેવાદિવૃંદં સદા ।
પ્રીણયામો વાસુદેવં દેવતામંડલાખંડમંડનં પ્રીણયામો વાસુદેવમ્ ॥ 12॥
ઇતિ શ્રીમદાનંદતીર્થભગવત્પાદાચાર્ય વિરચિતં
દ્વાદશસ્તોત્રેષુ અષ્ટમસ્તોત્રં સંપૂર્ણમ્