kṛṣṇa yajurvēdīya taittirīya saṃhitāyā-mpañchamakāṇḍē prathamaḥ praśnaḥ – ukhyāgnikathanaṃ
ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥
sā̠vi̠trāṇi̍ juhōti̠ prasū̎tyai chaturgṛhī̠tēna̍ juhōti̠ chatu̍ṣpādaḥ pa̠śava̍ḥ pa̠śūnē̠vā-‘va̍ rundhē̠ chata̍srō̠ diśō̍ di̠kṣvē̍va prati̍ tiṣṭhati̠ Chandāgṃ̍si dē̠vēbhyō ‘pā̎-‘krāma̠-nna vō̍ bhā̠gāni̍ ha̠vyaṃ va̍kṣyāma̠ iti̠ tēbhya̍ ē̠tachcha̍tu-rgṛhī̠tama̍-dhāraya-npurō-‘nu vā̠kyā̍yai yā̠jyā̍yai dē̠vatā̍yai vaṣaṭkā̠rāya̠ yachcha̍turgṛhī̠ta-ñju̠hōti̠ Chandāg̍syē̠va ta-tprī̍ṇāti̠ tānya̍sya prī̠tāni̍ dē̠vēbhyō̍ ha̠vyaṃ va̍hanti̠ ya-ṅkā̠mayē̍ta̠ [ya-ṅkā̠mayē̍ta, pāpī̍yān-thsyā̠dityēkai̍ka̠-] 1
pāpī̍yān-thsyā̠dityēkai̍ka̠-ntasya̍ juhuyā̠-dāhu̍tībhirē̠vaina̠mapa̍ gṛhṇāti̠ pāpī̍yā-nbhavati̠ ya-ṅkā̠mayē̍ta̠ vasī̍yān-thsyā̠diti̠ sarvā̍ṇi̠ tasyā̍-‘nu̠drutya̍ juhuyā̠dāhu̍tyai̠vaina̍ma̠bhi kra̍mayati̠ vasī̍yā-nbhava̠tyathō̍ ya̠jñasyai̠vaiṣā-‘bhikrā̎mti̠rēti̠ vā ē̠ṣa ya̍jñamu̠khā-dṛddhyā̠ yō̎-‘gnērdē̠vatā̍yā̠ ētya̠ṣṭāvē̠tāni̍ sāvi̠trāṇi̍ bhavantya̠ṣṭākṣa̍rā gāya̠trī gā̍ya̠trō̎- [gā̍ya̠traḥ, a̠gnistēnai̠va] 2
-‘gnistēnai̠va ya̍jñamu̠khādṛddhyā̍ a̠gnērdē̠vatā̍yai̠ naitya̠ṣṭau sā̍vi̠trāṇi̍ bhava̠ntyāhu̍tirnava̠mī tri̠vṛta̍mē̠va ya̍jñamu̠khē viyā̍tayati̠ yadi̍ kā̠mayē̍ta̠ Chandāgṃ̍si yajñayaśa̠sēnā̎ ‘rpayēya̠mityṛcha̍manta̠mā-ṅku̍ryā̠chChandāg̍syē̠va ya̍jñayaśa̠sēnā̎ ‘rpayati̠ yadi̍ kā̠mayē̍ta̠ yaja̍mānaṃ yajñayaśa̠sēnā̎-‘rpayēya̠miti̠ yaju̍ranta̠ma-ṅku̍ryā̠-dyaja̍mānamē̠va ya̍jñayaśa̠sēnā̎-‘rpayatyṛ̠chā stōma̠gṃ̠ sama̍rdha̠yē- [sama̍rdha̠yēti̍, ā̠ha̠ samṛ̍ddhyai] 3
-tyā̍ha̠ samṛ̍ddhyai cha̠turbhi̠rabhri̠mā da̍ttē cha̠tvāri̠ Chandāgṃ̍si̠ Chandō̍bhirē̠va dē̠vasya̍ tvā savi̠tuḥ pra̍sa̠va ityā̍ha̠ prasū̎tyā a̠gnirdē̠vēbhyō̠ nilā̍yata̠ sa vēṇu̠-mprā-‘vi̍śa̠-thsa ē̠tāmū̠timanu̠ sama̍chara̠-dya-dvēṇō̎-ssuṣi̠ragṃ su̍ṣi̠rā-‘bhri̍rbhavati sayōni̠tvāya̠ sa yatra̍ya̠trā-‘va̍sa̠-tta-tkṛ̠ṣṇama̍bhava-tkalmā̠ṣī bha̍vati rū̠pasa̍mṛddhyā ubhayata̠ḥ, kṣṇūrbha̍vatī̠taśchā̠-‘-muta̍śchā̠-‘rkasyā-va̍ruddhyai vyāmamā̠trī bha̍vatyē̠tāva̠dvai puru̍ṣē vī̠rya̍ṃ vī̠rya̍sammi̠tā ‘pa̍rimitā bhava̠tya-pa̍rimita̠syā-‘ va̍ruddhyai̠ yō vana̠spatī̍nā-mphala̠grahi̠-ssa ē̍ṣāṃ vī̠ryā̍vā-nphala̠grahi̠rvēṇu̍-rvaiṇa̠vī bha̍vati vī̠rya̍syā va̍ruddhyai ॥ 4 ॥
(kā̠mayē̍ta – gāya̠trō̎ – ‘rdha̠yēti̍ – cha – sa̠ptavigṃ̍śatiścha) (a. 1)
vyṛ̍ddha̠ṃ vā ē̠ta-dya̠jñasya̠ yada̍ya̠juṣkē̍ṇa kri̠yata̍ i̠māma̍gṛbhṇa-nraśa̠nā-mṛ̠tasyētya̍śvābhi̠dhānī̠mā da̍ttē̠ yaju̍ṣkṛtyai ya̠jñasya̠ samṛ̍ddhyai̠ pratū̎rtaṃ vāji̠nnā dra̠vētyaśva̍-ma̠bhi da̍dhāti rū̠pamē̠vā-‘syai̠ta-nma̍hi̠māna̠ṃ vyācha̍ṣṭē yu̠ñjāthā̠gṃ̠ rāsa̍bhaṃ yu̠vamiti̍ garda̠bha-masa̍tyē̠va ga̍rda̠bha-mprati̍ ṣṭhāpayati̠ tasmā̠daśvā̎-dgarda̠bhō-‘sa̍ttarō̠ yōgē̍yōgē ta̠vasta̍ra̠mityā̍ha̠ [ta̠vasta̍ra̠mityā̍ha, yōgē̍yōga] 5
yōgē̍yōga ē̠vaina̍ṃ yuṅktē̠ vājē̍vājē havāmaha̠ ityā̠hānna̠ṃ vai vājō-‘nna̍mē̠vāva̍ rundhē̠ sakhā̍ya̠ indra̍mū̠taya̠ ityā̍hēndri̠yamē̠vāva̍ rundhē̠ ‘gnirdē̠vēbhyō̠ nilā̍yata̠ ta-mpra̠jāpa̍ti̠ranva̍vinda-tprājāpa̠tyō-‘śvō ‘śvē̍na̠ sa-mbha̍ra̠tyanu̍vittyai pāpavasya̠saṃ vā ē̠ta-tkri̍yatē̠ yachChrēya̍sā cha̠ pāpī̍yasā cha samā̠na-ṅkarma̍ ku̠rvanti̠ pāpī̍yā̠n̠.- [pāpī̍yān, hyaśvā̎-dgarda̠bhō-‘śva̠-] 6
-hyaśvā̎-dgarda̠bhō-‘śva̠-mpūrva̍-nnayanti pāpavasya̠-sasya̠ vyāvṛ̍ttyai̠ tasmā̠chChrēyāgṃ̍sa̠-mpāpī̍yā-npa̠śchādanvē̍ti ba̠hurvai bhava̍tō̠ bhrātṛ̍vyō̠ bhava̍tīva̠ khalu̠ vā ē̠ṣa yō̎-‘gni-ñchi̍nu̠tē va̠jryaśva̍ḥ pra̠tūrva̠nnēhya̍va̠-krāma̠nna-śa̍stī̠rityā̍ha̠ vajrē̍ṇai̠va pā̠pmāna̠-mbhrātṛ̍vya̠mava̍ krāmati ru̠drasya̠ gāṇa̍patyā̠dityā̍ha rau̠drā vai pa̠śavō̍ ru̠drādē̠va [ ] 7
pa̠śū-nni̠ryāchyā̠-”tmanē̠ karma̍ kurutē pū̠ṣṇā sa̠yujā̍ sa̠hētyā̍ha pū̠ṣā vā addhva̍nāgṃ sannē̠tā sama̍ṣṭyai̠ purī̍ṣāyatanō̠ vā ē̠ṣa yada̠gniraṅgi̍rasō̠ vā ē̠tamagrē̍ dē̠vatā̍nā̠gṃ̠ sama̍bhara-npṛthi̠vyā-ssa̠dhasthā̍da̠gni-mpu̍rī̠ṣya̍-maṅgira̠sva-dachChē̠hītyā̍ha̠ sāya̍tanamē̠vaina̍-ndē̠vatā̍bhi̠-ssa-mbha̍ratya̠gni-mpu̍rī̠ṣya̍-maṅgira̠sva- dachChē̍ma̠ ityā̍ha̠ yēna̍ [ ] 8
sa̠ṅgachCha̍tē̠ vāja̍mē̠vāsya̍ vṛṅktē pra̠jāpa̍tayē prati̠prōchyā̠gni-ssa̠mbhṛtya̠ ityā̍huri̠yaṃ vai pra̠jāpa̍ti̠stasyā̍ ē̠tachChrōtra̠ṃ yadva̠lmīkō̠-‘gni-mpu̍rī̠ṣya̍-maṅgira̠sva-dbha̍riṣyāma̠ iti̍ valmīkava̠pāmupa̍ tiṣṭhatē sā̠kṣādē̠va pra̠jāpa̍tayē prati̠prōchyā̠-‘gnigṃ sa-mbha̍ratya̠gni-mpu̍rī̠ṣya̍-maṅgira̠sva-dbha̍rāma̠ ityā̍ha̠ yēna̍ sa̠gañchCha̍tē̠ vāja̍mē̠vāsya̍ vṛ̠ṅktē ‘nva̠gniru̠ṣasā̠magra̍- [-‘nva̠gniru̠ṣasā̠magra̎m, a̠khya̠dityā̠hā-] 9
-makhya̠dityā̠hā-nu̍khyātyā ā̠gatya̍ vā̠jyaddhva̍na ā̠kramya̍ vāji-npṛthi̠vīmityā̍hē̠chChatyē̠vaina̠-mpūrva̍yā vi̠ndatyutta̍rayā̠ dvābhyā̠mā kra̍mayati̠ prati̍ṣṭhityā̠ anu̍rūpābhyā̠-ntasmā̠danu̍rūpāḥ pa̠śava̠ḥ prajā̍yantē̠ dyaustē̍ pṛ̠ṣṭha-mpṛ̍thi̠vī sa̠dhastha̠mityā̍hai̠bhyō vā ē̠taṃ lō̠kēbhya̍ḥ pra̠jāpa̍ti̠-ssamai̍raya-drū̠pamē̠vāsyai̠-tanma̍hi̠māna̠ṃ vyācha̍ṣṭē va̠jrī vā ē̠ṣa yadaśvō̍ da̠-dbhira̠nyatō̍dadbhyō̠ bhūyā̠ṃ lōma̍bhirubha̠yāda̍dbhyō̠ ya-ndvi̠ṣyā-ttama̍dhaspa̠da-ndhyā̍yē̠-dvajrē̍ṇai̠vainagg̍ stṛṇutē ॥ 10 ॥
(ā̠ha̠ – pāpī̍yān – ru̠drādē̠va – yēnā – ‘gra̍ṃ – ~ṃva̠jrī vai – sa̠ptada̍śa cha) (a. 2)
utkrā̠mō-da̍kramī̠diti̠ dvābhyā̠mutkra̍mayati̠ prati̍ṣṭhityā̠ anu̍rūpābhyā̠-ntasmā̠danu̍rūpāḥ pa̠śava̠ḥ prajā̍yantē̠ ‘pa upa̍ sṛjati̠ yatra̠ vā āpa̍ upa̠ gachCha̍nti̠ tadōṣa̍dhaya̠ḥ prati̍ tiṣṭha̠ntyōṣa̍dhīḥ prati̠tiṣṭha̍ntīḥ pa̠śavō-‘nu̠ prati̍ tiṣṭhanti pa̠śūn. ya̠jñō ya̠jñaṃ yaja̍mānō̠ yaja̍māna-mpra̠jāstasmā̍da̠pa upa̍ sṛjati̠ prati̍ṣṭhityai̠ yada̍ddhva̠ryu-ra̍na̠gnāvāhu̍ti-ñjuhu̠yāda̠ndhō̎ ‘ddhva̠ryu- [-‘ddhva̠ryuḥ, syā̠-drakṣāgṃ̍si] 11
-ssyā̠-drakṣāgṃ̍si ya̠jñagṃ ha̍nyu̠r̠hira̍ṇyamu̠pāsya̍ juhōtyagni̠vatyē̠va ju̍hōti̠ nāndhō̎-‘ddhva̠ryurbhava̍ti̠ na ya̠jñagṃ rakṣāgṃ̍si ghnanti̠ jigha̍rmya̠gni-mmana̍sā ghṛ̠tēnētyā̍ha̠ mana̍sā̠ hi puru̍ṣō ya̠jñama̍bhi̠gachCha̍ti prati̠kṣyanta̠-mbhuva̍nāni̠ viśvētyā̍ha̠ sarva̠gg̠ hyē̍ṣa pra̠tya-ṅkṣēti̍ pṛ̠thu-nti̍ra̠śchā vaya̍sā bṛ̠hanta̠mityā̠hā-‘lpō̠ hyē̍ṣa jā̠tō ma̠hā- [ma̠hān, bhava̍ti̠] 12
-nbhava̍ti̠ vyachi̍ṣṭha̠mannagṃ̍ rabha̠saṃ vidā̍na̠mityā̠hā ‘nna̍mē̠vā-‘smai̎ svadayati̠ sarva̍masmai svadatē̠ ya ē̠vaṃ vēdā ”tvā̍ jigharmi̠ vacha̍sā ghṛ̠tēnētyā̍ha̠ tasmā̠-dya-tpuru̍ṣō̠ mana̍sā-‘bhi̠gachCha̍ti̠ ta-dvā̠chā va̍datya ra̠kṣasētyā̍ha̠ rakṣa̍sā̠mapa̍hatyai̠ marya̍śrī-sspṛha̠ya-dva̍rṇō a̠gnirityā̠hā-pa̍chitimē̠vā-‘smi̍-ndadhā̠tya-pa̍chitimā-nbhavati̠ ya ē̠vaṃ- [ya ē̠vam, vēda̠ mana̍sā̠ tvai] 13
-~ṃvēda̠ mana̍sā̠ tvai tāmāptu̍marhati̠ yāma̍ddhva̠ryura̍-na̠gnāvāhu̍ti-ñju̠hōti̠ mana̍svatībhyā-ñjuhō̠tyāhu̍tyō̠rāptyai̠ dvābhyā̠-mprati̍ṣṭhityai yajñamu̠khē ya̍jñamukhē̠ vai kri̠yamā̍ṇē ya̠jñagṃ rakṣāgṃ̍si jighāgṃ santyē̠tarhi̠ khalu̠ vā ē̠ta-dya̍jñamu̠khaṃ yarhyē̍na̠-dāhu̍ti-raśñu̠tē pari̍ likhati̠ rakṣa̍sā̠mapa̍hatyai ti̠sṛbhi̠ḥ pari̍ likhati tri̠vṛdvā a̠gniryāvā̍nē̠vā-‘gnistasmā̠-drakṣā̠g̠syapa̍ hanti [hanti, gā̠ya̠tri̠yā pari̍] 14
gāyatri̠yā pari̍ likhati̠ tējō̠ vai gā̍ya̠trī tēja̍sai̠vaina̠-mpari̍gṛhṇāti tri̠ṣṭubhā̠ pari̍ likhatīndri̠yaṃ vai tri̠ṣṭu-gi̍ndri̠yēṇai̠vaina̠-mpari̍ gṛhṇātyanu̠ṣṭubhā̠ pari̍ likhatyanu̠ṣṭu-phsarvā̍ṇi̠ Chandāgṃ̍si pari̠bhūḥ paryā̎ptyai maddhya̠tō̍-‘nu̠ṣṭubhā̠ vāgvā a̍nu̠ṣṭu-ptasmā̎-nmaddhya̠tō vā̠chā va̍dāmō gāyatri̠yā pra̍tha̠mayā̠ pari̍ likha̠tyathā̍-‘nu̠ṣṭubhā-‘tha̍ tri̠ṣṭubhā̠ tējō̠ vai gā̍ya̠trī ya̠jñō̍ ‘nu̠ṣṭugi̍ndri̠ya-ntri̠ṣṭu-ptēja̍sā chai̠vēndri̠yēṇa̍ chōbha̠yatō̍ ya̠jña-mpari̍ gṛhṇāti ॥ 15 ॥
(a̠ndhō̎-‘ddhva̠ryu – rma̠hān – bha̍vati̠ ya ē̠vagṃ – ha̍nti – tri̠ṣṭubhā̠ tējō̠ vai gā̍ya̠trī – trayō̍daśa cha) (a. 3)
dē̠vasya̍ tvā savi̠tuḥ pra̍sa̠va iti̍ khanati̠ prasū̎tyā̠ athō̍ dhū̠ma-mē̠vaitēna̍ janayati̠ jyōti̍ṣmanta-ntvā-‘gnē su̠pratī̍ka̠-mityā̍ha̠ jyōti̍rē̠vaitēna̍ janayati̠ sō̎-‘gnirjā̠taḥ pra̠jā-śśu̠chā-”rpa̍ya̠-tta-ndē̠vā a̍rdha̠rchēnā̍-śamayañChi̠va-mpra̠jābhyō-‘higṃ̍ santa̠mityā̍ha pra̠jābhya̍ ē̠vainagṃ̍ śamayati̠ dvābhyā̎-ṅkhanati̠ prati̍ṣṭhityā a̠pā-mpṛ̠ṣṭhama̠sīti̍ puṣkarapa̠rṇamā [puṣkarapa̠rṇamā, ha̠ra̠tya̠pāṃ vā] 16
ha̍ratya̠pāṃ vā ē̠ta-tpṛ̠ṣṭhaṃ ya-tpu̍ṣkarapa̠rṇagṃ rū̠pēṇai̠vaina̠dā ha̍rati puṣkarapa̠rṇēna̠ sa-mbha̍rati̠ yōni̠rvā a̠gnēḥ pu̍ṣkarapa̠rṇagṃ sayō̍nimē̠vāgnigṃ sambha̍rati kṛṣṇāji̠nēna̠ sambha̍rati ya̠jñō vai kṛ̍ṣṇāji̠naṃ ya̠jñēnai̠va ya̠jñagṃ sambha̍rati̠ ya-dgrā̠myāṇā̎-mpaśū̠nā-ñcharma̍ṇā sa̠mbharē̎-dgrā̠myā-npa̠śūñChu̠chā-‘rpa̍yē-tkṛṣṇāji̠nēna̠ sambha̍ratyāra̠ṇyānē̠va pa̠śū- [pa̠śūn, śu̠chā-‘rpa̍yati̠] 17
-ñChu̠chā-‘rpa̍yati̠ tasmā̎-thsa̠māva̍-tpaśū̠nā-mpra̠jāya̍mānānā-māra̠ṇyāḥ pa̠śava̠ḥ kanī̍yāgṃsa-śśu̠chā hyṛ̍tā lō̍ma̠ta-ssambha̍ra̠tyatō̠ hya̍sya̠ mēddhya̍-ṅkṛṣṇāji̠na-ñcha̍ puṣkarapa̠rṇa-ñcha̠ sagg stṛ̍ṇātī̠yaṃ vai kṛ̍ṣṇāji̠nama̠sau pu̍ṣkarapa̠rṇa-mā̠bhyā-mē̠vaina̍-mubha̠yata̠ḥ pari̍gṛhṇātya̠-gnirdē̠vēbhyō̠ nilā̍yata̠ tamatha̠rvā-‘nva̍paśya̠datha̍rvā tvā pratha̠mō nira̍manthadagna̠ i- [nira̍manthadagna̠ iti̍, ā̠ha̠ ya ē̠vaina̍-] 18
-tyā̍ha̠ ya ē̠vaina̍-ma̠nvapa̍śya̠-ttēnai̠vaina̠gṃ̠ sambha̍rati̠ tvāma̍gnē̠ puṣka̍rā̠dadhītyā̍ha puṣkarapa̠rṇē hyē̍na̠mupa̍śrita̠-mavi̍nda̠-ttamu̍ tvā da̠ddhyaṅṅṛṣi̠rityā̍ha da̠ddhyaṅ vā ā̍tharva̠ṇa-stē̍ja̠svyā̍sī̠-ttēja̍ ē̠vāsmi̍-ndadhāti̠ tamu̍ tvā pā̠thyō vṛṣētyā̍ha̠ pūrva̍mē̠vōdi̠ta-mutta̍rēṇā̠bhi gṛ̍ṇāti [gṛ̍ṇāti, cha̠ta̠sṛbhi̠-ssambha̍rati] 19
chata̠sṛbhi̠-ssambha̍rati cha̠tvāri̠ Chandāgṃ̍si̠ Chandō̍bhirē̠va gā̍ya̠trībhi̍rbrāhma̠ṇasya̍ gāya̠trō hi brā̎hma̠ṇa-stri̠ṣṭugbhī̍ rāja̠nya̍sya̠ traiṣṭu̍bhō̠ hi rā̍ja̠nyō̍ ya-ṅkā̠mayē̍ta̠ vasī̍yān-thsyā̠dityu̠bhayī̍bhi̠stasya̠ sambha̍rē̠-ttēja̍śchai̠vā-‘smā̍ indri̠ya-ñcha̍ sa̠mīchī̍ dadhātyaṣṭā̠bhi-ssambha̍ratya̠ṣṭākṣa̍rā gāya̠trī gā̍ya̠trō̎ ‘gniryāvā̍nē̠vā-‘gnistagṃ sambha̍rati̠ sīda̍ hōta̠rityā̍- -ha dē̠vatā̍ ē̠vāsmai̠ sagṃ sā̍dayati̠ ni hōtēti̍ manu̠ṣyā̎m-thsagṃ sī̍da̠svēti̠ vayāgṃ̍si̠ jani̍ṣvā̠ hi jēnyō̠ agrē̠ ahnā̠mityā̍ha dēva manu̠ṣyānē̠vā-‘smai̠ sagṃsa̍nnā̠-npraja̍nayati ॥ 20
(ai – va pa̠śū – niti̍ – gṛṇāti – hōta̠riti̍ – sa̠ptavigṃ̍śatiścha) (a. 4)
krū̠rami̍va̠ vā a̍syā ē̠ta-tka̍rōti̠ ya-tkhana̍tya̠pa upa̍ sṛja̠tyāpō̠ vai śā̠ntā-śśā̠ntābhi̍rē̠vā-‘syai̠ śuchagṃ̍ śamayati̠ sa-ntē̍ vā̠yurmā̍ta̠riśvā̍ dadhā̠tvityā̍ha prā̠ṇō vai vā̠yuḥ prā̠ṇēnai̠vāsyai̎ prā̠ṇagṃ sa-nda̍dhāti̠ sa-ntē̍ vā̠yurityā̍ha̠ tasmā̎-dvā̠yupra̍chyutā di̠vō vṛṣṭi̍rīrtē̠ tasmai̍ cha dēvi̠ vaṣa̍ḍastu̠ [vaṣa̍ḍastu, tubhya̠mityā̍ha̠] 21
tubhya̠mityā̍ha̠ ṣaḍvā ṛ̠tava̍ ṛ̠tuṣvē̠va vṛṣṭi̍-ndadhāti̠ tasmā̠-thsarvā̍nṛ̠tūn. va̍rṣati̠ ya-dva̍ṣaṭku̠ryā-dyā̠tayā̍mā-‘sya vaṣaṭkā̠ra-ssyā̠dyanna va̍ṣaṭku̠ryā-drakṣāgṃ̍si ya̠jñagṃ ha̍nyu̠rvaḍityā̍ha pa̠rōkṣa̍mē̠va vaṣa̍-ṭkarōti̠ nāsya̍ yā̠tayā̍mā vaṣaṭkā̠rō bhava̍ti̠ na ya̠jñagṃ rakṣāgṃ̍si ghnanti̠ sujā̍tō̠ jyōti̍ṣā sa̠hētya̍nu̠ṣṭubhōpa̍ nahyatyanu̠ṣṭu- [nahyatyanu̠ṣṭup, sarvā̍ṇi̠ Chandāgṃ̍si̠] 22
-phsarvā̍ṇi̠ Chandāgṃ̍si̠ Chandāgṃ̍si̠ khalu̠ vā a̠gnēḥ pri̠yā ta̠nūḥ pri̠yayai̠vaina̍-nta̠nuvā̠ pari̍ dadhāti̠ vēdu̍kō̠ vāsō̍ bhavati̠ya ē̠vaṃ vēda̍ vāru̠ṇō vā a̠gnirupa̍naddha̠ udu̍ tiṣṭha svaddhvarō̠rdhva ū̠ ṣuṇa̍ ū̠taya̠ iti̍ sāvi̠trībhyā̠mu-tti̍ṣṭhati savi̠tṛpra̍sūta ē̠vāsyō̠rdhvāṃ va̍ruṇamē̠nimu-thsṛ̍jati̠ dvābhyā̠-mprati̍ṣṭhityai̠ sa jā̠tō garbhō̍ asi̠ [garbhō̍ asi, rōda̍syō̠rityā̍hē̠mē] 23
rōda̍syō̠rityā̍hē̠mē vai rōda̍sī̠ tayō̍rē̠ṣa garbhō̠ yada̠gni-stasmā̍-dē̠vamā̠hāgnē̠ chāru̠rvibhṛ̍ta̠ ōṣa̍dhī̠ṣvityā̍ha ya̠dā hyē̍taṃ vi̠bhara̠ntyatha̠ chāru̍tarō̠ bhava̍ti̠ pra mā̠tṛbhyō̠ adhi̠ kani̍krada-dgā̠ ityā̠hauṣa̍dhayō̠ vā a̍sya mā̠tara̠stābhya̍ ē̠vaina̠-mprachyā̍vayati sthi̠rō bha̍va vī̠ḍva̍ṅga̠ iti̍ garda̠bha ā sā̍dayati̠ [ā sā̍dayati, sa-nna̍hyatyē̠vaina̍-] 24
sa-nna̍hyatyē̠vaina̍-mē̠tayā̎ sthē̠mnē ga̍rda̠bhēna̠ sambha̍rati̠ tasmā̎-dgarda̠bhaḥ pa̍śū̠nā-mbhā̍rabhā̠rita̍mō garda̠bhēna̠ sa-mbha̍rati̠ tasmā̎-dgarda̠bhō-‘pya̍nālē̠śē-‘tya̠nyā-npa̠śū-nmē̎dya̠tyanna̠gg̠ hyē̍nēnā̠-‘rkagṃ sa̠mbhara̍nti garda̠bhēna̠ sambha̍rati̠ tasmā̎-dgarda̠bhō dvi̠rētā̠-ssan kani̍ṣṭha-mpaśū̠nā-mprajā̍yatē̠-‘gnirhya̍sya̠ yōni̍-nni̠rdaha̍ti pra̠jāsu̠ vā ē̠ṣa ē̠tarhyārū̍ḍha̠- [ē̠tarhyārū̍ḍhaḥ, sa ī̎śva̠raḥ pra̠jā-śśu̠chā] 25
-ssa ī̎śva̠raḥ pra̠jā-śśu̠chā pra̠daha̍-śśi̠vō bha̍va pra̠jābhya̠ ityā̍ha pra̠jābhya̍ ē̠vainagṃ̍ śamayati̠ mānu̍ṣībhya̠stvama̍ṅgira̠ ityā̍ha māna̠vyō̍ hi pra̠jā mā dyāvā̍pṛthi̠vī a̠bhi śū̍śuchō̠ mā-‘ntari̍kṣa̠-mmā vana̠spatī̠nityā̍hai̠bhya ē̠vaina̍ṃ lō̠kēbhya̍-śśamayati̠ praitu̍ vā̠jī kani̍krada̠dityā̍ha vā̠jī hyē̍ṣa nāna̍da̠-drāsa̍bha̠ḥ patvē- [patvēti, ā̠ha̠ rāsa̍bha̠ iti̠] 26
-tyā̍ha̠ rāsa̍bha̠ iti̠ hyē̍tamṛṣa̠yō-‘va̍da̠-nbhara̍nna̠gni-mpu̍rī̠ṣya̍mityā̍hā̠-‘gnigg hyē̍ṣa bhara̍ti̠ mā pā̠dyāyu̍ṣaḥ pu̠rētyā̠hā-”yu̍rē̠vā-‘smi̍-ndadhāti̠ tasmā̎-dgarda̠bha-ssarva̠māyu̍rēti̠ tasmā̎-dgarda̠bhē pu̠rā-”yu̍ṣa̠ḥ pramī̍tē bibhyati̠ vṛṣā̠-‘gniṃ vṛṣa̍ṇa̠-mbhara̠nnityā̍ha̠ vṛṣā̠ hyē̍ṣa vṛṣā̠-‘gnira̠pā-ṅgarbhagṃ̍ – [vṛṣā̠-‘gnira̠pā-ṅgarbha̎m, sa̠mu̠driya̠-] 27
samu̠driya̠-mityā̍hā̠-‘pāg hyē̍ṣa garbhō̠ yada̠gniragna̠ ā yā̍hi vī̠taya̠ iti̠ vā i̠mau lō̠kau vyai̍tā̠magna̠ ā yā̍hi vī̠taya̠ iti̠ yadāhā̠ ‘nayō̎rlō̠kayō̠-rvītyai̠ prachyu̍tō̠ vā ē̠ṣa ā̠yata̍nā̠daga̍taḥ prati̠ṣṭhāgṃ sa ē̠tarhya̍ddhva̠ryu-ñcha̠ yaja̍māna-ñcha ddhyāyatyṛ̠tagṃ sa̠tyamityā̍hē̠yaṃ vā ṛ̠tama̠sau [ ] 28
sa̠tyama̠nayō̍rē̠vaina̠-mprati̍ ṣṭhāpayati̠ nā-”rti̠mārchCha̍tyaddhva̠ryurna yaja̍mānō̠ varu̍ṇō̠ vā ē̠ṣa yaja̍mānama̠bhyaiti̠ yada̠gnirupa̍naddha̠ ōṣa̍dhaya̠ḥ prati̍ gṛhṇītā̠gnimē̠ta-mityā̍ha̠ śāntyai̠ vyasya̠n viśvā̠ ama̍tī̠rarā̍tī̠-rityā̍ha̠ rakṣa̍sā̠mapa̍hatyai ni̠ṣīda̍-nnō̠ apa̍ durma̠tigṃ ha̍na̠dityā̍ha̠ prati̍ṣṭhityā̠ ōṣa̍dhaya̠ḥ prati̍mōdaddhva- [prati̍mōdaddhvam, ē̠na̠mityā̠hauṣa̍dhayō̠] 29
-mēna̠mityā̠hauṣa̍dhayō̠ vā a̠gnērbhā̍ga̠dhēya̠-ntābhi̍rē̠vaina̠gṃ̠ sama̍rdhayati̠ puṣpā̍vatī-ssupippa̠lā ityā̍ha̠ tasmā̠dōṣa̍dhaya̠ḥ phala̍-ṅgṛhṇantya̠ yaṃ vō̠ garbha̍ ṛ̠tviya̍ḥ pra̠tnagṃ sa̠dhastha̠mā-‘sa̍da̠dityā̍ha̠ yābhya̍ ē̠vaina̍-mprachyā̠vaya̍ti̠ tāsvē̠vaina̠-mprati̍ṣṭhāpayati̠ dvābhyā̍mu̠pāva̍harati̠ prati̍ṣṭhityai ॥ 30 ॥
(a̠stva̠ – nu̠ṣṭu – ba̍si – sādaya̠tyā – rū̍ḍha̠ḥ-patvēti̠-garbha̍-ma̠sau – mō̍daddhva̠ṃ – dvicha̍tvārigṃśachcha) (a. 5)
vā̠ru̠ṇō vā a̠gnirupa̍naddhō̠ vi pāja̠sēti̠ visragṃ̍sayati savi̠tṛpra̍sūta ē̠vāsya̠ viṣū̍chīṃ varuṇamē̠niṃ visṛ̍jatya̠pa upa̍ sṛja̠tyāpō̠ vai śā̠ntā-śśā̠ntābhi̍rē̠vāsya̠ śuchagṃ̍ śamayati ti̠sṛbhi̠rupa̍ sṛjati tri̠vṛdvā a̠gniryāvā̍nē̠vā-gnistasya̠ śuchagṃ̍ śamayati mi̠tra-ssa̠gṃ̠sṛjya̍ pṛthi̠vīmityā̍ha mi̠trō vai śi̠vō dē̠vānā̠-ntēnai̠vai- [dē̠vānā̠-ntēnai̠va, ē̠na̠gṃ̠ sagṃ sṛ̍jati̠] 31
-na̠gṃ̠ sagṃ sṛ̍jati̠ śāntyai̠ yadgrā̠myāṇā̠-mpātrā̍ṇā-ṅka̠pālai̎-ssagṃsṛ̠jē-dgrā̠myāṇi̠ pātrā̍ṇi śu̠chā-‘rpa̍yēdarmakapā̠lai-ssagṃ sṛ̍jatyē̠tāni̠ vā a̍nupajīvanī̠yāni̠ tānyē̠va śu̠chā-‘rpa̍yati̠ śarka̍rābhi̠-ssagṃ sṛ̍jati̠ dhṛtyā̠ athō̍ śa̠ntvāyā̍ jalō̠mai-ssagṃ sṛ̍jatyē̠ṣā vā a̠gnēḥ pri̠yā ta̠nūryada̠jā pri̠yayai̠vaina̍-nta̠nuvā̠ sagṃ sṛ̍ja̠tyathō̠ tēja̍sā kṛṣṇāji̠nasya̠ lōma̍bhi̠-ssagṃ – [lōma̍bhi̠-ssam, sṛ̠ja̠ti̠ ya̠jñō vai] 32
sṛ̍jati ya̠jñō vai kṛ̍ṣṇāji̠naṃ ya̠jñēnai̠va ya̠jñagṃ sagṃ sṛ̍jati ru̠drā-ssa̠bhṛtya̍ pṛthi̠vīmityā̍hai̠tā vā ē̠ta-ndē̠vatā̠ agrē̠ sama̍bhara̠-ntābhi̍rē̠vaina̠gṃ̠ sambha̍rati ma̠khasya̠ śirō̠-‘sītyā̍ha ya̠jñō vai ma̠khastasyai̠ta-chChirō̠ yadu̠khā tasmā̍dē̠vamā̍ha ya̠jñasya̍ pa̠dē stha̠ ityā̍ha ya̠jñasya̠ hyē̍tē [ ] 33
pa̠dē athō̠ prati̍ṣṭhityai̠ prā-‘nyābhi̠-ryachCha̠tyanva̠nyai-rma̍ntrayatē mithuna̠tvāya̠ tryu̍ddhi-ṅkarōti̠ traya̍ i̠mē lō̠kā ē̠ṣāṃ lō̠kānā̠māptyai̠ Chandō̍bhiḥ karōti vī̠rya̍ṃ vai Chandāgṃ̍si vī̠ryē̍ṇai̠vainā̎-ṅkarōti̠ yaju̍ṣā̠ bila̍-ṅkarōti̠ vyāvṛ̍ttyā̠ iya̍tī-ṅkarōti pra̠jāpa̍tinā yajñamu̠khēna̠ sammi̍tā-ndvista̠nā-ṅka̍rōti̠ yāvā̍pṛthi̠vyōrdōhā̍ya̠ chatu̍sstanā-ṅkarōti paśū̠nā-ndōhā̍yā̠ṣṭāsta̍nā-ṅkarōti̠ Chanda̍sā̠-ndōhā̍ya̠ navā̎śri-mabhi̠chara̍taḥ kuryā-ttri̠vṛta̍mē̠va vajragṃ̍ sa̠mbhṛtya̠ bhrātṛ̍vyāya̠ praha̍rati̠ stṛtyai̍ kṛ̠tvāya̠ sā ma̠hīmu̠khāmiti̠ ni da̍dhāti dē̠vatā̎svē̠vainā̠-mprati̍ṣṭhāpayati ॥ 34 ॥
(tēnai̠va – lōma̍bhi̠-ssa – mē̠tē – a̍bhi̠chara̍ta̠ – ēka̍vigṃśatiścha) (a. 6)
sa̠ptabhi̍rdhūpayati sa̠pta vai śī̍rṣa̠ṇyā̎ḥ prā̠ṇā-śśira̍ ē̠ta-dya̠jñasya̠ yadu̠khā śī̠r̠ṣannē̠va ya̠jñasya̍ prā̠ṇā-nda̍dhāti̠ tasmā̎-thsa̠pta śī̠r̠ṣa-nprā̠ṇā a̍śvaśa̠kēna̍ dhūpayati prājāpa̠tyō vā aśva̍-ssayōni̠tvāyā-di̍ti̠stvētyā̍hē̠yaṃ vā adi̍ti̠radi̍tyai̠vādi̍tyā-ṅkhanatya̠syā akrū̍raṅkārāya̠ na hi sva-ssvagṃ hi̠nasti̍ dē̠vānā̎-ntvā̠ patnī̠rityā̍ha dē̠vānā̠ṃ- [dē̠vānā̎m, vā ē̠tā-mpatna̠yō-‘grē̍-‘] 35
-~ṃvā ē̠tā-mpatna̠yō-‘grē̍-‘-kurva̠-ntābhi̍rē̠vainā̎-ndadhāti dhi̠ṣaṇā̠stvētyā̍ha vi̠dyā vai dhi̠ṣaṇā̍ vi̠dyābhi̍-rē̠vainā̍-ma̠bhīndhē̠ gnāstvētyā̍ha̠ Chandāgṃ̍si̠ vai gnā śChandō̍bhi-rē̠vaināg̍ śrapayati̠ varū̎traya̠stvētyā̍ha̠ hōtrā̠ vai varū̎trayō̠ hōtrā̍bhirē̠vainā̎-mpachati̠ jana̍ya̠stvētyā̍ha dē̠vānā̠ṃ vai patnī̠- [patnī̎ḥ, jana̍ya̠stābhi̍-] 36
-rjana̍ya̠stābhi̍-rē̠vainā̎-mpachati ṣa̠ḍbhiḥ pa̍chati̠ ṣaḍvā ṛ̠tava̍ ṛ̠tubhi̍rē̠vainā̎-mpachati̠ dviḥ pacha̠ntvityā̍ha̠ tasmā̠-ddvi-ssa̍ṃvathsa̠rasya̍ sa̠sya-mpa̍chyatē vāru̠ṇyu̍khā-‘bhīddhā̍ mai̠triyōpai̍ti̠ śāntyai̍ dē̠vastvā̍ savi̠tō-dva̍pa̠tvityā̍ha savi̠tṛpra̍sūta ē̠vainā̠-mbrahma̍ṇā dē̠vatā̍bhi̠ru-dva̍pa̠tyapa̍dyamānā pṛthi̠vyāśā̠ diśa̠ ā pṛ̠ṇē- [ā pṛ̠ṇa, ityā̍ha̠] 37
-tyā̍ha̠ tasmā̍da̠gni-ssarvā̠ diśō-‘nu̠ vibhā̠tyutti̍ṣṭha bṛha̠tī bha̍vō̠rdhvā ti̍ṣṭha dhru̠vā tvamityā̍ha̠ prati̍ṣṭhityā asu̠rya̍-mpātra̠manā̎chChṛṇṇa̠mā-chChṛ̍ṇatti dēva̠trā-‘ka̍rajakṣī̠rēṇā-”chChṛ̍ṇatti para̠maṃ vā ē̠ta-tpayō̠ yada̍jakṣī̠ra-mpa̍ra̠mēṇai̠vainā̠-mpaya̠sā-”chChṛ̍ṇatti̠ yaju̍ṣā̠ vyāvṛ̍ttyai̠ Chandō̍bhi̠rā chChṛ̍ṇatti̠ Chandō̍bhi̠rvā ē̠ṣā kri̍yatē̠ Chandō̍bhirē̠va Chandā̠g̠syā chChṛ̍ṇatti ॥ 38 ॥
(ā̠ha̠ dē̠vānā̠ṃ – ~ṃvai patnī̎ḥ – pṛṇai̠ – ṣā – ṣaṭ cha̍) (a. 7)
ēka̍vigṃśatyā̠ māṣai̎ḥ puruṣaśī̠r̠ṣa-machChai̎tyamē̠ddhyā vai māṣā̍ amē̠ddhya-mpu̍ruṣaśī̠r̠ṣa-ma̍mē̠ddhyairē̠vā-syā̍-mē̠ddhya-nni̍rava̠dāya̠ mēddhya̍-ṅkṛ̠tvā ”ha̍ra̠tyēka̍vigṃśati-rbhavantyēkavi̠gṃ̠śō vai puru̍ṣa̠ḥ puru̍ṣa̠syā-”ptyai̠ vyṛ̍ddha̠ṃ vā ē̠ta-tprā̠ṇaira̍mē̠ddhyaṃ ya-tpu̍ruṣaśī̠r̠ṣagṃ sa̍pta̠dhā vitṛ̍ṇṇāṃ valmīkava̠pā-mprati̠ ni da̍dhāti sa̠pta vai śī̍rṣa̠ṇyā̎ḥ prā̠ṇāḥ prā̠ṇairē̠vaina̠-thsama̍rdhayati mēddhya̠tvāya̠ yāva̍ntō̠ [yāva̍ntaḥ, vai mṛ̠tyuba̍ndhava̠-] 39
vai mṛ̠tyuba̍ndhava̠-stēṣā̎ṃ ya̠ma ādhi̍patya̠-mparī̍yāya yamagā̠thābhi̠ḥ pari̍gāyati ya̠mādē̠vaina̍-dvṛṅktē ti̠sṛbhi̠ḥ pari̍gāyati̠ traya̍ i̠mē lō̠kā ē̠bhya ē̠vaina̍llō̠kēbhyō̍ vṛṅktē̠ tasmā̠-dgāya̍tē̠ na dēya̠-ṅgāthā̠ hi ta-dvṛ̠ṅktē̎ ‘gnibhya̍ḥ pa̠śūnā la̍bhatē̠ kāmā̠ vā a̠gnaya̠ḥ kāmā̍nē̠vāva̍ rundhē̠ ya-tpa̠śū-nnā-”labhē̠tā-‘na̍varuddhā asya [ ] 40
pa̠śava̍-ssyu̠rya-tparya̍gnikṛtānu-thsṛ̠jē-dya̍jñavēśa̠sa-ṅku̍ryā̠-dya-thsagg̍sthā̠payē̎-dyā̠tayā̍māni śī̠r̠ṣāṇi̍ syu̠rya-tpa̠śūnā̠labha̍tē̠ tēnai̠va pa̠śūnava̍ rundhē̠ ya-tparya̍gnikṛtānu-thsṛ̠jati̍ śī̠rṣṇā-mayā̍tayāmatvāya prājāpa̠tyēna̠ sagg sthā̍payati ya̠jñō vai pra̠jāpa̍tirya̠jña ē̠va ya̠jña-mprati̍ṣṭhāpayati pra̠jāpa̍tiḥ pra̠jā a̍sṛjata̠ sa ri̍richā̠nō̍-‘manyata̠ sa ē̠tā ā̠prīra̍paśya̠-ttābhi̠rvai sa mu̍kha̠ta [sa mu̍kha̠taḥ, ā̠tmāna̠mā ‘prī̍ṇīta̠] 41
ā̠tmāna̠mā ‘prī̍ṇīta̠ yadē̠tā ā̠priyō̠ bhava̍nti ya̠jñō vai pra̠jāpa̍ti-rya̠jñamē̠vaitābhi̍rmukha̠ta ā prī̍ṇā̠tya-pa̍rimitaChandasō bhava̠ntyapa̍rimitaḥ pra̠jāpa̍tiḥ pra̠jāpa̍tē̠rāptyā̍ ūnātiri̠ktā mi̍thu̠nāḥ prajā̎tyai lōma̠śaṃ vai nāmai̠tachChanda̍ḥ pra̠jāpa̍tēḥ pa̠śavō̍ lōma̠śāḥ pa̠śūnē̠vā-‘va̍ rundhē̠ sarvā̍ṇi̠ vā ē̠tā rū̠pāṇi̠ sarvā̍ṇi rū̠pāṇya̠gnau chityē̎ kriyantē̠ tasmā̍dē̠tā a̠gnēśchitya̍sya [a̠gnēśchitya̍sya, bha̠va̠ntyēka̍vigṃ śatigṃ] 42
bhava̠ntyēka̍vigṃ śatigṃ sāmidhē̠nīranvā̍ha̠ rugvā ē̍kavi̠gṃ̠śō rucha̍mē̠va ga̍chCha̠tyathō̎ prati̠ṣṭhāmē̠va pra̍ti̠ṣṭhā hyē̍kavi̠gṃ̠śa-śchatu̍rvigṃśati̠manvā̍ha̠ chatu̍rvigṃśatirardhamā̠sā-ssa̍ṃvathsa̠ra-ssa̍ṃvathsa̠rō̎-‘gnirvai̎śvāna̠ra-ssā̠kṣādē̠va vai̎śvāna̠ramava̍ rundhē̠ parā̍chī̠ranvā̍ha̠ parā̍ṅiva̠ hi su̍va̠rgō lō̠ka-ssamā̎stvā-‘gna ṛ̠tavō̍ vardhaya̠ntvityā̍ha̠ samā̍bhirē̠vā-‘gniṃ va̍rdhaya- [-‘gniṃ va̍rdhayati, ṛ̠tubhi̍-ssaṃvathsa̠raṃ viśvā̠] 43
-tyṛ̠tubhi̍-ssaṃvathsa̠raṃ viśvā̠ ā bhā̍hi pra̠diśa̍ḥ pṛthi̠vyā ityā̍ha̠ tasmā̍da̠gni-ssarvā̠ diśō-‘nu̠ vibhā̍ti̠ pratyau̍hatāma̠śvinā̍ mṛ̠tyuma̍smā̠dityā̍ha mṛ̠tyumē̠vā-‘smā̠dapa̍ nuda̠tyudva̠ya-ntama̍sa̠sparītyā̍ha pā̠pmā vai tama̍ḥ pā̠pmāna̍mē̠vāsmā̠dapa̍ ha̠ntyaga̍nma̠ jyōti̍rutta̠ma-mityā̍hā̠-‘sau vā ā̍di̠tyō jyōti̍rutta̠ma-mā̍di̠tyasyai̠va sāyu̍jya-ṅgachChati̠ na sa̍ṃvathsa̠rasti̍ṣṭhati̠ nāsya̠ śrīsti̍ṣṭhati̠ yasyai̠tāḥ kri̠yantē̠ jyōti̍ṣmatī-mutta̠māmanvā̍ha̠ jyōti̍rē̠vāsmā̍ u̠pari̍ṣṭā-ddadhāti suva̠rgasya̍ lō̠kasyānu̍khyātyai ॥ 44 ॥
(yāva̍ntō – ‘sya – mukha̠ta – śchitya̍sya – vardhaya – tyādi̠tyō̎ – ‘ṣṭāvigṃ̍śatiścha) (a. 8)
ṣa̠ḍbhirdī̎kṣayati̠ ṣaḍvā ṛ̠tava̍ ṛ̠tubhi̍rē̠vaina̍-ndīkṣayati sa̠ptabhi̍rdīkṣayati sa̠pta Chandāgṃ̍si̠ Chandō̍bhirē̠vaina̍-ndīkṣayati̠ viśvē̍ dē̠vasya̍ nē̠turitya̍-nu̠ṣṭubhō̎tta̠mayā̍ juhōti̠ vāgvā a̍nu̠ṣṭu-ptasmā̎-tprā̠ṇānā̠ṃ vāgu̍tta̠mai- ka̍smāda̠kṣarā̠danā̎pta-mpratha̠ma-mpa̠da-ntasmā̠-dya-dvā̠chō-‘nā̎pta̠-ntanma̍nu̠ṣyā̍ upa̍ jīvanti pū̠rṇayā̍ juhōti pū̠rṇa i̍va̠ hi pra̠jāpa̍tiḥ [pra̠jāpa̍tiḥ, pra̠jāpa̍tē̠rāpatyai̠] 45
pra̠jāpa̍tē̠rāptyai̠ nyū̍nayā juhōti̠ nyū̍nā̠ddhi pra̠jāpa̍tiḥ pra̠jā asṛ̍jata pra̠jānā̠gṃ̠ sṛṣṭyai̠ yada̠rchiṣi̍ pravṛ̠ñjyā-dbhū̠tamava̍ rundhīta̠ yadaṅgā̍rēṣu bhavi̠ṣyadaṅgā̍rēṣu̠ pravṛ̍ṇakti bhavi̠ṣya dē̠vāva̍ rundhē bhavi̠ṣyaddhi bhūyō̍ bhū̠tā-ddvābhyā̠-mpravṛ̍ṇakti dvi̠pā-dyaja̍māna̠ḥ prati̍ṣṭhityai̠ brahma̍ṇā̠ vā ē̠ṣā yaju̍ṣā̠ sambhṛ̍tā̠ yadu̠khā sā yadbhidyē̠tā-”rti̠mārchChē̠- [-”rti̠mārchChē̎t, yaja̍mānō] 46
-dyaja̍mānō ha̠nyētā̎-‘sya ya̠jñō mitrai̠tāmu̠khā-nta̠pētyā̍ha̠ brahma̠ vai mi̠trō brahma̍nnē̠vainā̠-mprati̍ṣṭhāpayati̠ nā-”rti̠mārchCha̍ti̠ yaja̍mānō̠ nāsya̍ ya̠jñō ha̍nyatē̠ yadi̠ bhidyē̍ta̠ tairē̠va ka̠pālai̠-ssagṃ sṛ̍jē̠-thsaiva tata̠ḥ prāya̍śchitti̠ryō ga̠taśrī̠-ssyānma̍thi̠tvā tasyāva̍ daddhyā-dbhū̠tō vā ē̠ṣa sa svā- [ē̠ṣa sa svām, dē̠vatā̠mupai̍ti̠] 47
-ndē̠vatā̠mupai̍ti̠ yō bhūti̍kāma̠-ssyādya u̠khāyai̍ sa̠mbhavē̠-thsa ē̠va tasya̍ syā̠datō̠ hyē̍ṣa sa̠mbhava̍tyē̠ṣa vai sva̍ya̠mbhūrnāma̠ bhava̍tyē̠va ya-ṅkā̠mayē̍ta̠ bhrātṛ̍vyamasmai janayēya̠mitya̠-nyata̠stasyā̠-”hṛtyā-‘va̍ daddhyā-thsā̠kṣādē̠vāsmai̠ bhrātṛ̍vya-ñjanayatyamba̠rīṣā̠danna̍ kāma̠syāva̍ daddhyādamba̠rīṣē̠ vā anna̍-mbhriyatē̠ sayō̎nyē̠vānna̠- [sayō̎nyē̠vānna̎m, ava̍ rundhē̠] 48
-mava̍ rundhē̠ muñjā̠nava̍ dadhā̠tyūrgvai muñjā̠ ūrja̍mē̠vāsmā̠ api̍ dadhātya̠gnirdē̠vēbhyō̠ nilā̍yata̠ sa kru̍mu̠ka-mprā-‘vi̍śa-tkrumu̠kamava̍ dadhāti̠ yadē̠vāsya̠ tatra̠ nya̍kta̠-nta dē̠vāva̍ rundha̠ ājyē̍na̠ saṃ yau̎tyē̠tadvā a̠gnēḥ pri̠ya-ndhāma̠ yadājya̍-mpri̠yēṇai̠vaina̠-ndhāmnā̠ sama̍rdhaya̠tyathō̠ tēja̍sā̠ [tēja̍sā, vai ka̍kantī̠mā da̍dhāti̠] 49
vai ka̍ṅkatī̠mā da̍dhāti̠ bhā ē̠vāva̍ rundhē śamī̠mayī̠mā da̍dhāti̠ śāntyai̠ sīda̠ tva-mmā̠tura̠syā u̠pastha̠ iti̍ ti̠sṛbhi̍rjā̠tamupa̍ tiṣṭhatē̠ traya̍ i̠mē lō̠kā ē̠ṣvē̍va lō̠kēṣvā̠vida̍-ṅgachCha̠tyathō̎ prā̠ṇānē̠vā-”tma-ndha̍ttē ॥ 50 ॥
( pra̠jāpa̍ti–r ṛchChē̠th – svā – mē̠vānna̠ṃ – tēja̍sā̠ – chatu̍strigṃśachcha) (a. 9)
na ha̍ sma̠ vai pu̠rā-‘gnirapa̍raśuvṛkṇa-ndahati̠ tada̍smai prayō̠ga ē̠varṣi̍rasvadaya̠-dyada̍gnē̠ yāni̠ kāni̠ chēti̍ sa̠midha̠mā da̍dhā̠tyapa̍raśuvṛkṇa-mē̠vāsmai̎ svadayati̠ sarva̍masmai svadatē̠ ya ē̠vaṃ vēdaudu̍mbarī̠mā da̍dhā̠tyūrgvā u̍du̠mbara̠ ūrja̍mē̠vāsmā̠ api̍ dadhāti pra̠jāpa̍tira̠gni-ma̍sṛjata̠ tagṃ sṛ̠ṣṭagṃ rakṣāg̍- [sṛ̠ṣṭagṃ rakṣāg̍ṃsi, a̠ji̠ghā̠gṃ̠sa̠nthsa ē̠ta-] 51
-syajighāgṃsa̠nthsa ē̠ta-drā̎kṣō̠ghnama̍paśya̠-ttēna̠ vai sarakṣā̠g̠syapā̍-‘hata̠ ya-drā̎kṣō̠ghna-mbhava̍tya̠gnērē̠va tēna̍ jā̠tā-drakṣā̠g̠syapa̍ ha̠ntyāśva̍tthī̠mā da̍dhātyaśva̠tthō vai vana̠spatī̍nāgṃ sapatnasā̠hō viji̍tyai̠ vaika̍ṅkatī̠mā da̍dhāti̠ bhā ē̠vāva̍ rundhē śamī̠mayī̠mā da̍dhāti̠ śāntyai̠ sagṃśi̍ta-mmē̠ brahmōdē̍ṣā-mbā̠hū a̍tira̠mityu̍tta̠mē audu̍mbarī [audu̍mbarī, vā̠cha̠ya̠ti̠ brahma̍ṇai̠va] 52
vāchayati̠ brahma̍ṇai̠va kṣa̠tragṃ sagg śya̍ti kṣa̠trēṇa̠ brahma̠ tasmā̎-dbrāhma̠ṇō rā̍ja̠nya̍vā̠natya̠nya-mbrā̎hma̠ṇa-ntasmā̎-drāja̠nyō̎ brāhma̠ṇavā̠natya̠nyagṃ rā̍ja̠nya̍-mmṛ̠tyurvā ē̠ṣa yada̠gnira̠mṛta̠gṃ̠ hira̍ṇyagṃ ru̠kmamanta̍ra̠-mprati̍muñchatē̠ ‘mṛta̍mē̠va mṛ̠tyōra̠ntardha̍tta̠ ēka̍vigṃśatinirbādhō bhava̠tyēka̍vigṃśati̠rvai dē̍valō̠kā dvāda̍śa̠ māsā̠ḥ pañcha̠rtava̠straya̍ i̠mē lō̠kā a̠sāvā̍di̠tya [a̠sāvā̍di̠tyaḥ, ē̠ka̠vi̠gṃ̠śa ē̠tāva̍ntō̠ vai] 53
ē̍kavi̠gṃ̠śa ē̠tāva̍ntō̠ vai dē̍valō̠kāstēbhya̍ ē̠va bhrātṛ̍vyama̠ntarē̍ti nirbā̠dhairvai dē̠vā asu̍rā-nnirbā̠dhē̍-‘kurvata̠ tanni̍rbā̠dhānā̎-nnirbādha̠tva-nni̍rbā̠dhī bha̍vati̠ bhrātṛ̍vyānē̠va ni̍rbā̠dhē ku̍rutē sāvitri̠yā prati̍muñchatē̠ prasū̎tyai̠ naktō̠ṣāsētyutta̍rayā ‘hōrā̠trābhyā̍mē̠vaina̠-mudya̍chChatē dē̠vā a̠gni-ndhā̍raya-ndraviṇō̠dā ityā̍ha prā̠ṇā vai dē̠vā dra̍viṇō̠dā a̍hōrā̠trābhyā̍mē̠vaina̍mu̠dyatya̍ [ ] 54
prā̠ṇairdā̍dhā̠rā ”sī̍na̠ḥ prati̍muñchatē̠ tasmā̠dāsī̍nāḥ pra̠jāḥ prajā̍yantē kṛṣṇāji̠namutta̍ra̠-ntējō̠ vai hira̍ṇya̠-mbrahma̍ kṛṣṇāji̠na-ntēja̍sā chai̠vaina̠-mbrahma̍ṇā chōbha̠yata̠ḥ pari̍gṛhṇāti̠ ṣaḍu̍dyāmagṃ śi̠kya̍-mbhavati̠ ṣaḍvā ṛ̠tava̍ ṛ̠tubhi̍rē̠vaina̠-mudya̍chChatē̠ ya-ddvāda̍śōdyāmagṃ saṃvathsa̠rēṇai̠va mau̠ñja-mbha̍va̠tyūrgvai muñjā̍ ū̠rjaivaina̠gṃ̠ sa ma̍rdhayati supa̠rṇō̍-‘si ga̠rutmā̠nityavē̎kṣatē rū̠pamē̠vāsyai̠tanma̍hi̠māna̠ṃ vyācha̍ṣṭē̠ diva̍-ṅgachCha̠ suva̍ḥ pa̠tētyā̍ha suva̠rgamē̠vaina̍ṃ lō̠ka-ṅga̍mayati ॥ 55 ॥
(rakṣā̠g̠syau – du̍baṃri – ādi̠tya – u̠dyatya̠ – saṃ – chatu̍rvigṃśatiścha) (a. 10)
sami̍ddhō a̠ñjan kṛda̍ra-mmatī̠nā-ṅghṛ̠tama̍gnē̠ madhu̍ma̠-tpinva̍mānaḥ । vā̠jī vaha̍n vā̠jina̍-ñjātavēdō dē̠vānā̎ṃ vakṣi pri̠yamā sa̠dhastha̎m ॥ ghṛ̠tēnā̠ñjanthsa-mpa̠thō dē̍va̠yānā̎-nprajā̠nan vā̠jyapyē̍tu dē̠vān । anu̍ tvā saptē pra̠diśa̍-ssachantāg sva̠dhāma̠smai yaja̍mānāya dhēhi ॥ īḍya̠śchāsi̠ vandya̍ścha vājinnā̠śuśchāsi̠ mēddhya̍ścha saptē । a̠gniṣṭvā̍ [a̠gniṣṭvā̎, dē̠vairvasu̍bhi-ssa̠jōṣā̎ḥ] 56
dē̠vairvasu̍bhi-ssa̠jōṣā̎ḥ prī̠taṃ vahni̍ṃ vahatu jā̠tavē̍dāḥ ॥ stī̠rṇa-mba̠r̠hi-ssu̠ṣṭarī̍mā juṣā̠ṇōru pṛ̠thu pratha̍māna-mpṛthi̠vyām । dē̠vēbhi̍ryu̠ktamadi̍ti-ssa̠jōṣā̎-ssyō̠na-ṅkṛ̍ṇvā̠nā su̍vi̠tē da̍dhātu ॥ ē̠tā u̍ va-ssu̠bhagā̍ vi̠śvarū̍pā̠ vipakṣō̍bhi̠-śśraya̍māṇā̠ udātai̎ḥ । ṛ̠ṣvā-ssa̠tīḥ ka̠vaṣa̠-śśumbha̍mānā̠ dvārō̍ dē̠vī-ssu̍prāya̠ṇā bha̍vantu ॥ a̠nta̠rā mi̠trāvaru̍ṇā̠ chara̍ntī̠ mukha̍ṃ ya̠jñānā̍ma̠bhi sa̍ṃvidā̠nē । u̠ṣāsā̍ vāgṃ [u̠ṣāsā̍ vām, su̠hi̠ra̠ṇyē su̍śi̠lpē] 57
suhira̠ṇyē su̍śi̠lpē ṛ̠tasya̠ yōnā̍vi̠ha sā̍dayāmi ॥ pra̠tha̠mā vāgṃ̍ sara̠thinā̍ su̠varṇā̍ dē̠vau paśya̍ntau̠ bhuva̍nāni̠ viśvā̎ । api̍praya̠-ñchōda̍nā vā̠-mmimā̍nā̠ hōtā̍rā̠ jyōti̍ḥ pra̠diśā̍ di̠śantā̎ ॥ ā̠di̠tyairnō̠ bhāra̍tī vaṣṭu ya̠jñagṃ sara̍svatī sa̠ha ru̠drairna̍ āvīt । iḍōpa̍hūtā̠ vasu̍bhi-ssa̠jōṣā̍ ya̠jña-nnō̍ dēvīra̠mṛtē̍ṣu dhatta ॥ tvaṣṭā̍ vī̠ra-ndē̠vakā̍ma-ñjajāna̠ tvaṣṭu̠rarvā̍ jāyata ā̠śuraśva̍ḥ । 58
tvaṣṭē̠daṃ viśva̠-mbhuva̍na-ñjajāna ba̠hōḥ ka̠rtāra̍mi̠ha ya̍kṣi hōtaḥ ॥ aśvō̍ ghṛ̠tēna̠ tmanyā̠ sama̍kta̠ upa̍ dē̠vāgṃ ṛ̍tu̠śaḥ pātha̍ ētu । vana̠spati̍-rdēvalō̠ka-mpra̍jā̠nanna̠gninā̍ ha̠vyā sva̍di̠tāni̍ vakṣat ॥ pra̠jāpa̍tē̠stapa̍sā vāvṛdhā̠na-ssa̠dyō jā̠tō da̍dhiṣē ya̠jñama̍gnē । svāhā̍kṛtēna ha̠viṣā̍ purōgā yā̠hi sā̠ddhyā ha̠vira̍dantu dē̠vāḥ ॥ 59 ॥
(a̠gniṣṭvā̍ – vā̠ – maśvō̠ – dvicha̍tvārigṃśachcha) (a. 11)
(sā̠vi̠trāṇi̠ – vyṛ̍ddha̠ – mutkrā̍ma – dē̠vasya̍ khanati – krū̠raṃ -~ṃvā̍ru̠ṇaḥ – sa̠ptabhi̠ – rēka̍vigṃśatyā – ṣa̠ḍbhi – rna ha̍ sma̠ – sami̍ddhō a̠ñja – nnēkā̍daśa )
(sā̠vi̠trā – ṇyutkrā̍ma – krū̠raṃ -~ṃvā̍ru̠ṇaḥ – pa̠śava̍-ssyu̠ – rna ha̍ sma̠ – nava̍pañchā̠śat)
(sā̠vi̠trāṇi̍, ha̠vira̍dantu dē̠vāḥ)
॥ hari̍ḥ ōm ॥
॥ kṛṣṇa yajurvēdīya taittirīya saṃhitāyā-mpañchamakāṇḍē prathamaḥ praśna-ssamāptaḥ ॥