ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪಞ್ಚಮಕಾಣ್ಡೇ ಪಞ್ಚಮಃ ಪ್ರಶ್ನಃ – ವಾಯವ್ಯಪಶ್ವಾದ್ಯಾನ-ನ್ನಿರೂಪಣಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಯದೇಕೇ॑ನ ಸಗ್ಗ್ ಸ್ಥಾ॒ಪಯ॑ತಿ ಯ॒ಜ್ಞಸ್ಯ॒ ಸನ್ತ॑ತ್ಯಾ॒ ಅವಿ॑ಚ್ಛೇದಾಯೈ॒ನ್ದ್ರಾಃ ಪ॒ಶವೋ॒ ಯೇ ಮು॑ಷ್ಕ॒ರಾ ಯದೈ॒ನ್ದ್ರಾ-ಸ್ಸನ್ತೋ॒-ಽಗ್ನಿಭ್ಯ॑ ಆಲ॒ಭ್ಯನ್ತೇ॑ ದೇ॒ವತಾ᳚ಭ್ಯ-ಸ್ಸ॒ಮದ॑-ನ್ದಧಾತ್ಯಾಗ್ನೇ॒ಯೀ-ಸ್ತ್ರಿ॒ಷ್ಟುಭೋ॑ ಯಾಜ್ಯಾನುವಾ॒ಕ್ಯಾಃ᳚ ಕುರ್ಯಾ॒-ದ್ಯದಾ᳚ಗ್ನೇ॒ಯೀಸ್ತೇನಾ᳚ ಽಽಗ್ನೇ॒ಯಾ ಯ-ತ್ತ್ರಿ॒ಷ್ಟುಭ॒-ಸ್ತೇನೈ॒ನ್ದ್ರಾ-ಸ್ಸಮೃ॑ದ್ಧ್ಯೈ॒ ನ ದೇ॒ವತಾ᳚ಭ್ಯ-ಸ್ಸ॒ಮದ॑-ನ್ದಧಾತಿ ವಾ॒ಯವೇ॑ ನಿ॒ಯುತ್ವ॑ತೇ ತೂಪ॒ರಮಾ ಲ॑ಭತೇ॒ ತೇಜೋ॒-ಽಗ್ನೇರ್ವಾ॒ಯುಸ್ತೇಜ॑ಸ ಏ॒ಷ ಆ ಲ॑ಭ್ಯತೇ॒ ತಸ್ಮಾ᳚-ದ್ಯ॒ದ್ರಿಯ॑ಙ್ ವಾ॒ಯು- [ವಾ॒ಯುಃ, ವಾತಿ॑] 1
-ರ್ವಾತಿ॑ ತ॒ದ್ರಿಯ॑ಙ್ಙ॒-ಗ್ನಿ-ರ್ದ॑ಹತಿ॒ ಸ್ವಮೇ॒ವ ತ-ತ್ತೇಜೋ-ಽನ್ವೇ॑ತಿ॒ ಯನ್ನ ನಿ॒ಯುತ್ವ॑ತೇ॒ ಸ್ಯಾದುನ್ಮಾ᳚ದ್ಯೇ॒-ದ್ಯಜ॑ಮಾನೋ ನಿ॒ಯುತ್ವ॑ತೇ ಭವತಿ॒ ಯಜ॑ಮಾನ॒ಸ್ಯಾ-ಽನು॑ನ್ಮಾದಾಯ ವಾಯು॒ಮತೀ᳚ ಶ್ವೇ॒ತವ॑ತೀ ಯಾಜ್ಯಾನುವಾ॒ಕ್ಯೇ॑ ಭವತ-ಸ್ಸತೇಜ॒ಸ್ತ್ವಾಯ॑ ಹಿರಣ್ಯಗ॒ರ್ಭ-ಸ್ಸಮ॑ವರ್ತ॒ತಾಗ್ರ॒ ಇತ್ಯಾ॑ಘಾ॒ರಮಾ ಘಾ॑ರಯತಿ ಪ್ರ॒ಜಾಪ॑ತಿ॒ರ್ವೈ ಹಿ॑ರಣ್ಯಗ॒ರ್ಭಃ ಪ್ರ॒ಜಾಪ॑ತೇ-ರನುರೂಪ॒ತ್ವಾಯ॒ ಸರ್ವಾ॑ಣಿ॒ ವಾ ಏ॒ಷ ರೂ॒ಪಾಣಿ॑ ಪಶೂ॒ನಾ-ಮ್ಪ್ರತ್ಯಾ ಲ॑ಭ್ಯತೇ॒ ಯಚ್ಛ್ಮ॑ಶ್ರು॒ಣಸ್ತ- [ಯಚ್ಛ್ಮ॑ಶ್ರು॒ಣಸ್ತತ್, ಪುರು॑ಷಾಣಾಗ್ಂ] 2
-ತ್ಪುರು॑ಷಾಣಾಗ್ಂ ರೂ॒ಪಂ-ಯಁ-ತ್ತೂ॑ಪ॒ರಸ್ತ-ದಶ್ವಾ॑ನಾಂ॒-ಯಁದ॒ನ್ಯತೋ॑ದ॒-ನ್ತ-ದ್ಗವಾಂ॒-ಯಁದವ್ಯಾ॑ ಇವ ಶ॒ಫಾಸ್ತದವೀ॑ನಾಂ॒-ಯಁದ॒ಜಸ್ತದ॒ಜಾನಾಂ᳚-ವಾಁ॒ಯುರ್ವೈ ಪ॑ಶೂ॒ನಾ-ಮ್ಪ್ರಿ॒ಯ-ನ್ಧಾಮ॒ ಯ-ದ್ವಾ॑ಯ॒ವ್ಯೋ॑ ಭವ॑ತ್ಯೇ॒ತ-ಮೇ॒ವೈನ॑ಮ॒ಭಿ ಸ॑ಜಾನ್ನಾ॒ನಾಃ ಪ॒ಶವ॒ ಉಪ॑ ತಿಷ್ಠನ್ತೇ ವಾಯ॒ವ್ಯಃ॑ ಕಾ॒ರ್ಯಾ(3)ಃ ಪ್ರಾ॑ಜಾಪ॒ತ್ಯಾ(3) ಇತ್ಯಾ॑ಹು॒-ರ್ಯ-ದ್ವಾ॑ಯ॒ವ್ಯ॑-ಙ್ಕು॒ರ್ಯಾ-ತ್ಪ್ರ॒ಜಾಪ॑ತೇ-ರಿಯಾ॒ದ್ಯ-ತ್ಪ್ರಾ॑ಜಾಪ॒ತ್ಯ-ಙ್ಕು॒ರ್ಯಾ-ದ್ವಾ॒ಯೋ- [-ದ್ವಾ॒ಯೋಃ, ಇ॒ಯಾ॒ದ್ಯ-] 3
-ರಿ॑ಯಾ॒ದ್ಯ-ದ್ವಾ॑ಯ॒ವ್ಯಃ॑ ಪ॒ಶುರ್ಭವ॑ತಿ॒ ತೇನ॑ ವಾ॒ಯೋರ್ನೈತಿ॒ ಯ-ತ್ಪ್ರಾ॑ಜಾಪ॒ತ್ಯಃ ಪು॑ರೋ॒ಡಾಶೋ॒ ಭವ॑ತಿ॒ ತೇನ॑ ಪ್ರಾ॒ಜಾಪ॑ತೇ॒ರ್ನೈತಿ॒ ಯ-ದ್ದ್ವಾದ॑ಶಕಪಾಲ॒ಸ್ತೇನ॑ ವೈಶ್ವಾನ॒ರಾನ್ನೈತ್ಯಾ᳚ಗ್ನಾ ವೈಷ್ಣ॒ವಮೇಕಾ॑ದಶ-ಕಪಾಲ॒-ನ್ನಿರ್ವ॑ಪತಿ ದೀಖ್ಷಿ॒ಷ್ಯಮಾ॑ಣೋ-॒-ಽಗ್ನಿ-ಸ್ಸರ್ವಾ॑ ದೇ॒ವತಾ॒ ವಿಷ್ಣು॑ರ್ಯ॒ಜ್ಞೋ ದೇ॒ವತಾ᳚ಶ್ಚೈ॒ವ ಯ॒ಜ್ಞ-ಞ್ಚಾ-ಽಽ ರ॑ಭತೇ॒-ಽಗ್ನಿರ॑ವ॒ಮೋ ದೇ॒ವತಾ॑ನಾಂ॒-ವಿಁಷ್ಣುಃ॑ ಪರ॒ಮೋ ಯದಾ᳚ಗ್ನಾ-ವೈಷ್ಣ॒ವ-ಮೇಕಾ॑ದಶಕಪಾಲ-ನ್ನಿ॒ರ್ವಪತಿ ದೇ॒ವತಾ॑ [ದೇ॒ವತಾಃ᳚, ಏ॒ವೋಭ॒ಯತಃ॑] 4
ಏ॒ವೋಭ॒ಯತಃ॑ ಪರಿ॒ಗೃಹ್ಯ॒ ಯಜ॑ಮಾ॒ನೋ-ಽವ॑ ರುನ್ಧೇ ಪುರೋ॒ಡಾಶೇ॑ನ॒ ವೈ ದೇ॒ವಾ ಅ॒ಮುಷ್ಮಿ॑-ಲ್ಲೋಁ॒ಕ ಆ᳚ರ್ಧ್ನುವನ್ ಚ॒ರುಣಾ॒-ಽಸ್ಮಿನ್. ಯಃ ಕಾ॒ಮಯೇ॑ತಾ॒-ಽಮುಷ್ಮಿ॑-ಲ್ಲೋಁ॒ಕ ಋ॑ದ್ಧ್ನುಯಾ॒ಮಿತಿ॒ ಸ ಪು॑ರೋ॒ಡಾಶ॑-ಙ್ಕುರ್ವೀತಾ॒-ಽಮುಷ್ಮಿ॑ನ್ನೇ॒ವ ಲೋ॒ಕ ಋ॑ದ್ಧ್ನೋತಿ॒ ಯದ॒ಷ್ಟಾಕ॑ಪಾಲ॒-ಸ್ತೇನಾ᳚-ಽಽಗ್ನೇ॒ಯೋ ಯ-ತ್ತ್ರಿ॑ಕಪಾ॒ಲಸ್ತೇನ॑ ವೈಷ್ಣ॒ವ-ಸ್ಸಮೃ॑ದ್ಧ್ಯೈ॒ ಯಃ ಕಾ॒ಮಯೇ॑ತಾ॒ಸ್ಮಿ-ಲ್ಲೋಁ॒ಕ ಋ॑ದ್ಧ್ನುಯಾ॒ಮಿತಿ॒ ಸ ಚ॒ರು-ಙ್ಕು॑ರ್ವೀತಾ॒ಗ್ನೇರ್ಘೃ॒ತಂ-ವಿಁಷ್ಣೋ᳚-ಸ್ತಣ್ಡು॒ಲಾ-ಸ್ತಸ್ಮಾ᳚ [-ಸ್ತಸ್ಮಾ᳚ತ್, ಚ॒ರುಃ ಕಾ॒ರ್ಯೋ᳚-ಽಸ್ಮಿನ್ನೇ॒ವ] 5
-ಚ್ಚ॒ರುಃ ಕಾ॒ರ್ಯೋ᳚-ಽಸ್ಮಿನ್ನೇ॒ವ ಲೋ॒ಕ ಋ॑ದ್ಧ್ನೋತ್ಯಾದಿ॒ತ್ಯೋ ಭ॑ವತೀ॒ ಯಂ-ವಾಁ ಅದಿ॑ತಿರ॒ಸ್ಯಾಮೇ॒ವ ಪ್ರತಿ॑ ತಿಷ್ಠ॒ತ್ಯಥೋ॑ ಅ॒ಸ್ಯಾಮೇ॒ವಾಧಿ॑ ಯ॒ಜ್ಞ-ನ್ತ॑ನುತೇ॒ ಯೋ ವೈ ಸಂ॑ವಁಥ್ಸ॒ರಮುಖ್ಯ॒-ಮಭೃ॑ತ್ವಾ॒-ಽಗ್ನಿ-ಞ್ಚಿ॑ನು॒ತೇ ಯಥಾ॑ ಸಾ॒ಮಿ ಗರ್ಭೋ॑-ಽವ॒ಪದ್ಯ॑ತೇ ತಾ॒ದೃಗೇ॒ವ ತದಾರ್ತಿ॒ಮಾರ್ಚ್ಛೇ᳚-ದ್ವೈಶ್ವಾನ॒ರ-ನ್ದ್ವಾದ॑ಶಕಪಾಲ-ಮ್ಪು॒ರಸ್ತಾ॒ನ್ನಿರ್ವ॑ಪೇ-ಥ್ಸಂವಁಥ್ಸ॒ರೋ ವಾ ಅ॒ಗ್ನಿ-ರ್ವೈ᳚ಶ್ವಾನ॒ರೋ ಯಥಾ॑ ಸಂವಁಥ್ಸ॒ರಮಾ॒ಪ್ತ್ವಾ [ ] 6
ಕಾ॒ಲ ಆಗ॑ತೇ ವಿ॒ಜಾಯ॑ತ ಏ॒ವಮೇ॒ವ ಸಂ॑ವಁಥ್ಸ॒ರಮಾ॒ಪ್ತ್ವಾ ಕಾ॒ಲ ಆಗ॑ತೇ॒-ಽಗ್ನಿ-ಞ್ಚಿ॑ನುತೇ॒ ನಾ-ಽಽರ್ತಿ॒ಮಾರ್ಚ್ಛ॑ತ್ಯೇ॒ಷಾ ವಾ ಅ॒ಗ್ನೇಃ ಪ್ರಿ॒ಯಾ ತ॒ನೂರ್ಯ-ದ್ವೈ᳚ಶ್ವಾನ॒ರಃ ಪ್ರಿ॒ಯಾಮೇ॒ವಾಸ್ಯ॑ ತ॒ನುವ॒ಮವ॑ ರುನ್ಧೇ॒ ತ್ರೀಣ್ಯೇ॒ತಾನಿ॑ ಹ॒ವೀಗ್ಂಷಿ॑ ಭವನ್ತಿ॒ ತ್ರಯ॑ ಇ॒ಮೇ ಲೋ॒ಕಾ ಏ॒ಷಾಂ-ಲೋಁ॒ಕಾನಾ॒ಗ್ಂ॒ ರೋಹಾ॑ಯ ॥ 7 ॥
(ಯ॒ದ್ರಿಯಂ॑-ವಾಁ॒ಯು – ರ್ಯಚ್ಛ್ಮ॑ಶ್ರು॒ಣಸ್ತ-ದ್- ವಾ॒ಯೋ – ರ್ನಿ॒ರ್ವಪ॑ತಿ ದೇ॒ವತಾ॒ – ಸ್ತಸ್ಮಾ॑ – ದಾ॒ಪ್ತ್ವಾ – ಷ್ಟಾತ್ರಿಗ್ಂ॑ಶಚ್ಚ ) (ಅ. 1)
ಪ್ರ॒ಜಾಪ॑ತಿಃ ಪ್ರ॒ಜಾ-ಸ್ಸೃ॒ಷ್ಟ್ವಾ ಪ್ರೇ॒ಣಾ-ಽನು॒ ಪ್ರಾವಿ॑ಶ॒-ತ್ತಾಭ್ಯಃ॒ ಪುನ॒-ಸ್ಸಮ್ಭ॑ವಿತು॒-ನ್ನಾಶ॑ಕ್ನೋ॒-ಥ್ಸೋ᳚-ಽಬ್ರವೀದೃ॒ದ್ಧ್ನವ॒ದಿ-ಥ್ಸ ಯೋ ಮೇ॒ತಃ ಪುನ॑-ಸ್ಸಞ್ಚಿ॒ನವ॒ದಿತಿ॒ ತ-ನ್ದೇ॒ವಾ-ಸ್ಸಮ॑ಚಿನ್ವ॒-ನ್ತತೋ॒ ವೈ ತ ಆ᳚ರ್ಧ್ನುವ॒ನ್॒ ಯ-ಥ್ಸ॒ಮಚಿ॑ನ್ವ॒-ನ್ತಚ್ಚಿತ್ಯ॑ಸ್ಯ ಚಿತ್ಯ॒ತ್ವಂ-ಯಁ ಏ॒ವಂ-ವಿಁ॒ದ್ವಾನ॒ಗ್ನಿ-ಞ್ಚಿ॑ನು॒ತ ಋ॒ದ್ಧ್ನೋತ್ಯೇ॒ವ ಕಸ್ಮೈ॒ ಕಮ॒ಗ್ನಿಶ್ಚೀ॑ಯತ॒ ಇತ್ಯಾ॑ಹುರಗ್ನಿ॒ವಾ- [ಇತ್ಯಾ॑ಹುರಗ್ನಿ॒ವಾನ್, ಅ॒ಸಾ॒ನೀತಿ॒ ವಾ] 8
-ನ॑ಸಾ॒ನೀತಿ॒ ವಾ ಅ॒ಗ್ನಿಶ್ಚೀ॑ಯತೇ ಽಗ್ನಿ॒ವಾನೇ॒ವ ಭ॑ವತಿ॒ ಕಸ್ಮೈ॒ ಕಮ॒ಗ್ನಿಶ್ಚೀ॑ಯತ॒ ಇತ್ಯಾ॑ಹುರ್ದೇ॒ವಾ ಮಾ॑ ವೇದ॒ನ್ನಿತಿ॒ ವಾ ಅ॒ಗ್ನಿಶ್ಚೀ॑ಯತೇ ವಿ॒ದುರೇ॑ನ-ನ್ದೇ॒ವಾಃ ಕಸ್ಮೈ॒ ಕಮ॒ಗ್ನಿಶ್ಚೀ॑ಯತ॒ ಇತ್ಯಾ॑ಹುರ್ಗೃ॒ಹ್ಯ॑ಸಾ॒ನೀತಿ॒ ವಾ ಅ॒ಗ್ನಿಶ್ಚೀ॑ಯತೇ ಗೃ॒ಹ್ಯೇ॑ವ ಭ॑ವತಿ॒ ಕಸ್ಮೈ॒ ಕಮ॒ಗ್ನಿಶ್ಚೀ॑ಯತ॒ ಇತ್ಯಾ॑ಹುಃ ಪಶು॒ಮಾನ॑ಸಾ॒ನೀತಿ॒ ವಾ ಅ॒ಗ್ನಿ- [ವಾ ಅ॒ಗ್ನಿಃ, ಚೀ॒ಯ॒ತೇ॒ ಪ॒ಶು॒ಮಾನೇ॒ವ] 9
-ಶ್ಚೀ॑ಯತೇ ಪಶು॒ಮಾನೇ॒ವ ಭ॑ವತಿ॒ ಕಸ್ಮೈ॒ ಕಮ॒ಗ್ನಿಶ್ಚೀ॑ಯತ॒ ಇತ್ಯಾ॑ಹು-ಸ್ಸ॒ಪ್ತ ಮಾ॒ ಪುರು॑ಷಾ॒ ಉಪ॑ ಜೀವಾ॒ನಿತಿ॒ ವಾ ಅ॒ಗ್ನಿಶ್ಚೀ॑ಯತೇ॒ ತ್ರಯಃ॒ ಪ್ರಾಞ್ಚ॒ಸ್ತ್ರಯಃ॑ ಪ್ರ॒ತ್ಯಞ್ಚ॑ ಆ॒ತ್ಮಾ ಸ॑ಪ್ತ॒ಮ ಏ॒ತಾವ॑ನ್ತ ಏ॒ವೈನ॑ಮ॒ಮುಷ್ಮಿ॑-ಲ್ಲೋಁ॒ಕ ಉಪ॑ ಜೀವನ್ತಿ ಪ್ರ॒ಜಾಪ॑ತಿರ॒ಗ್ನಿಮ॑ಚಿಕೀಷತ॒ ತ-ಮ್ಪೃ॑ಥಿ॒ವ್ಯ॑ಬ್ರವೀ॒ನ್ನ ಮಯ್ಯ॒ಗ್ನಿ-ಞ್ಚೇ᳚ಷ್ಯ॒ಸೇ-ಽತಿ॑ ಮಾ ಧಖ್ಷ್ಯತಿ॒ ಸಾ ತ್ವಾ॑-ಽತಿದ॒ಹ್ಯಮಾ॑ನಾ॒ ವಿ ಧ॑ವಿಷ್ಯೇ॒ [ವಿ ಧ॑ವಿಷ್ಯೇ, ಸ ಪಾಪೀ॑ಯಾ-] 10
ಸ ಪಾಪೀ॑ಯಾ-ನ್ಭವಿಷ್ಯ॒ಸೀತಿ॒ ಸೋ᳚-ಽಬ್ರವೀ॒-ತ್ತಥಾ॒ ವಾ ಅ॒ಹ-ಙ್ಕ॑ರಿಷ್ಯಾಮಿ॒ ಯಥಾ᳚ ತ್ವಾ॒ ನಾತಿ॑ಧ॒ಖ್ಷ್ಯತೀತಿ॒ ಸ ಇ॒ಮಾಮ॒ಭ್ಯ॑ಮೃಶ-ತ್ಪ್ರ॒ಜಾಪ॑ತಿಸ್ತ್ವಾ ಸಾದಯತು॒ ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॒ದೇತೀ॒ಮಾಮೇ॒ವೇಷ್ಟ॑ಕಾ-ಙ್ಕೃ॒ತ್ವೋಪಾ॑-ಧ॒ತ್ತಾ-ನ॑ತಿದಾಹಾಯ॒ ಯ-ತ್ಪ್ರತ್ಯ॒ಗ್ನಿ-ಞ್ಚಿ॑ನ್ವೀ॒ತ ತದ॒ಭಿ ಮೃ॑ಶೇ-ತ್ಪ್ರ॒ಜಾಪ॑ತಿಸ್ತ್ವಾ ಸಾದಯತು॒ ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॒ದೇ- [-ದ್ಧ್ರು॒ವಾ ಸೀ॑ದ, ಇತೀ॒ಮಾಮೇ॒ವೇಷ್ಟ॑ಕಾ] 11
-ತೀ॒ಮಾಮೇ॒ವೇಷ್ಟ॑ಕಾ-ಙ್ಕೃ॒ತ್ವೋಪ॑ ಧ॒ತ್ತೇ-ಽನ॑ತಿದಾಹಾಯ ಪ್ರ॒ಜಾಪ॑ತಿರಕಾಮಯತ॒ ಪ್ರಜಾ॑ಯೇ॒ಯೇತಿ॒ ಸ ಏ॒ತಮುಖ್ಯ॑ಮಪಶ್ಯ॒-ತ್ತಗ್ಂ ಸಂ॑ವಁಥ್ಸ॒ರಮ॑ಬಿಭ॒ಸ್ತತೋ॒ ವೈ ಸ ಪ್ರಾಜಾ॑ಯತ॒ ತಸ್ಮಾ᳚-ಥ್ಸಂವಁಥ್ಸ॒ರ-ಮ್ಭಾ॒ರ್ಯಃ॑ ಪ್ರೈವ ಜಾ॑ಯತೇ॒ ತಂ-ವಁಸ॑ವೋ-ಽಬ್ರುವ॒-ನ್ಪ್ರ ತ್ವಮ॑ಜನಿಷ್ಠಾ ವ॒ಯ-ಮ್ಪ್ರಜಾ॑ಯಾಮಹಾ॒ ಇತಿ॒ ತಂ-ವಁಸು॑ಭ್ಯಃ॒ ಪ್ರಾಯ॑ಚ್ಛ॒-ತ್ತ-ನ್ತ್ರೀಣ್ಯಹಾ᳚ನ್ಯಬಿಭರು॒-ಸ್ತೇನ॒ [-ಸ್ತೇನ॑, ತ್ರೀಣಿ॑] 12
ತ್ರೀಣಿ॑ ಚ ಶ॒ತಾನ್ಯಸೃ॑ಜನ್ತ॒ ತ್ರಯ॑ಸ್ತ್ರಿಗ್ಂಶತ-ಞ್ಚ॒ ತಸ್ಮಾ᳚-ತ್ತ್ರ್ಯ॒ಹ-ಮ್ಭಾ॒ರ್ಯಃ॑ ಪ್ರೈವ ಜಾ॑ಯತೇ॒ ತಾ-ನ್ರು॒ದ್ರಾ ಅ॑ಬ್ರುವ॒-ನ್ಪ್ರ ಯೂ॒ಯಮ॑ಜನಿಢ್ವಂ-ವಁ॒ಯ-ಮ್ಪ್ರಜಾ॑ಯಾಮಹಾ॒ ಇತಿ॒ ತಗ್ಂ ರು॒ದ್ರೇಭ್ಯಃ॒ ಪ್ರಾಯ॑ಚ್ಛ॒-ನ್ತಗ್ಂ ಷಡಹಾ᳚ನ್ಯಬಿಭರು॒ಸ್ತೇನ॒ ತ್ರೀಣಿ॑ ಚ ಶ॒ತಾನ್ಯಸೃ॑ಜನ್ತ॒ ತ್ರಯ॑ಸ್ತ್ರಿಗ್ಂಶತ-ಞ್ಚ॒ ತಸ್ಮಾ᳚-ಥ್ಷಡ॒ಹ-ಮ್ಭಾ॒ರ್ಯಃ॑ ಪ್ರೈವ ಜಾ॑ಯತೇ॒ ತಾನಾ॑ದಿ॒ತ್ಯಾ ಅ॑ಬ್ರುವ॒-ನ್ಪ್ರ ಯೂ॒ಯಮ॑ಜನಿಢ್ವಂ-ವಁ॒ಯ- [-ವಁ॒ಯಮ್, ಪ್ರ ಜಾ॑ಯಾಮಹಾ॒] 13
-ಮ್ಪ್ರ ಜಾ॑ಯಾಮಹಾ॒ ಇತಿ॒ ತಮಾ॑ದಿ॒ತ್ಯೇಭ್ಯಃ॒ ಪ್ರಾಯ॑ಚ್ಛ॒-ನ್ತ-ನ್ದ್ವಾದ॒ಶಾಹಾ᳚ನ್ಯಬಿಭರು॒ಸ್ತೇನ॒ ತ್ರೀಣಿ॑ ಚ ಶ॒ತಾನ್ಯಸೃ॑ಜನ್ತ॒ ತ್ರಯ॑ಸ್ತ್ರಿಗ್ಂಶತ-ಞ್ಚ॒ ತಸ್ಮಾ᳚-ದ್ದ್ವಾದಶಾ॒ಹ-ಮ್ಭಾ॒ರ್ಯಃ॑ ಪ್ರೈವ ಜಾ॑ಯತೇ॒ ತೇನ॒ ವೈ ತೇ ಸ॒ಹಸ್ರ॑ಮಸೃಜನ್ತೋ॒ಖಾಗ್ಂ ಸ॑ಹಸ್ರತ॒ಮೀಂ-ಯಁ ಏ॒ವಮುಖ್ಯಗ್ಂ॑ ಸಾಹ॒ಸ್ರಂ-ವೇಁದ॒ ಪ್ರ ಸ॒ಹಸ್ರ॑-ಮ್ಪ॒ಶೂನಾ᳚ಪ್ನೋತಿ ॥ 14 ॥
(ಅ॒ಗ್ನಿ॒ವಾನ್ – ಪ॑ಶು॒ಮಾನ॑ಸಾ॒ನೀತಿ॒ ವಾ ಅ॒ಗ್ನಿ – ರ್ಧ॑ವಿಷ್ಯೇ – ಮೃಶೇ-ತ್ಪ್ರ॒ಜಾಪ॑ತಿಸ್ತ್ವಾ ಸಾದಯತು॒ ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ ಧ್ರು॒ವಾ ಸೀ॑ದ॒ – ತೇನ॒ – ತಾನಾ॑ದಿ॒ತ್ಯಾ ಅ॑ಬ್ರುವ॒-ನ್ಪ್ರ ಯೂ॒ಯಮ॑ಜನಿಢ್ವಂ-ವಁ॒ಯಂ – ಚ॑ತ್ವಾರಿ॒ಗ್ಂ॒ಶಚ್ಚ॑) (ಅ. 2)
ಯಜು॑ಷಾ॒ ವಾ ಏ॒ಷಾ ಕ್ರಿ॑ಯತೇ॒ ಯಜು॑ಷಾ ಪಚ್ಯತೇ॒ ಯಜು॑ಷಾ॒ ವಿ ಮು॑ಚ್ಯತೇ॒ ಯದು॒ಖಾ ಸಾ ವಾ ಏ॒ಷೈತರ್ಹಿ॑ ಯಾ॒ತಯಾ᳚ಮ್ನೀ॒ ಸಾ ನ ಪುನಃ॑ ಪ್ರ॒ಯುಜ್ಯೇತ್ಯಾ॑ಹು॒ರಗ್ನೇ॑ ಯು॒ಖ್ಷ್ವಾ ಹಿ ಯೇ ತವ॑ ಯು॒ಖ್ಷ್ವಾ ಹಿ ದೇ॑ವ॒ಹೂತ॑ಮಾ॒ಗ್ಂ॒ ಇತ್ಯು॒ಖಾಯಾ᳚-ಞ್ಜುಹೋತಿ॒ ತೇನೈ॒ವೈನಾ॒-ಮ್ಪುನಃ॒ ಪ್ರಯು॑ಙ್ಕ್ತೇ॒ ತೇನಾಯಾ॑ತಯಾಮ್ನೀ॒ ಯೋ ವಾ ಅ॒ಗ್ನಿಂ-ಯೋಁಗ॒ ಆಗ॑ತೇ ಯು॒ನಕ್ತಿ॑ ಯು॒ಙ್ಕ್ತೇ ಯು॑ಞ್ಜಾ॒ನೇಷ್ವಗ್ನೇ॑ [ಯು॑ಞ್ಜಾ॒ನೇಷ್ವಗ್ನೇ᳚, ಯು॒ಖ್ಷ್ವಾ ಹಿ] 15
ಯು॒ಖ್ಷ್ವಾ ಹಿ ಯೇ ತವ॑ ಯು॒ಖ್ಷ್ವಾ ಹಿ ದೇ॑ವ॒ಹೂತ॑ಮಾ॒ಗ್ಂ॒ ಇತ್ಯಾ॑ಹೈ॒ಷ ವಾ ಅ॒ಗ್ನೇರ್ಯೋಗ॒ಸ್ತೇನೈ॒ವೈನಂ॑-ಯುಁನಕ್ತಿ ಯು॒ಙ್ಕ್ತೇ ಯು॑ಞ್ಜಾ॒ನೇಷು॑ ಬ್ರಹ್ಮವಾ॒ದಿನೋ॑ ವದನ್ತಿ॒ ನ್ಯ॑ಙ್ಙ॒ಗ್ನಿಶ್ಚೇ॑ತ॒ವ್ಯಾ(3) ಉ॑ತ್ತಾ॒ನಾ(3) ಇತಿ॒ ವಯ॑ಸಾಂ॒-ವಾಁ ಏ॒ಷ ಪ್ರ॑ತಿ॒ಮಯಾ॑ ಚೀಯತೇ॒ ಯದ॒ಗ್ನಿರ್ಯನ್ನ್ಯ॑ಞ್ಚ-ಞ್ಚಿನು॒ಯಾ-ತ್ಪೃ॑ಷ್ಟಿ॒ತ ಏ॑ನ॒ಮಾಹು॑ತಯ ಋಚ್ಛೇಯು॒ರ್ಯದು॑ತ್ತಾ॒ನ-ನ್ನ ಪತಿ॑ತುಗ್ಂ ಶಕ್ನುಯಾ॒ದಸು॑ವರ್ಗ್ಯೋ-ಽಸ್ಯ ಸ್ಯಾ-ತ್ಪ್ರಾ॒ಚೀನ॑-ಮುತ್ತಾ॒ನ- [-ಮುತ್ತಾ॒ನಮ್, ಪು॒ರು॒ಷ॒ಶೀ॒ರ್॒ಷಮುಪ॑ ದಧಾತಿ] 16
-ಮ್ಪು॑ರುಷಶೀ॒ರ್॒ಷಮುಪ॑ ದಧಾತಿ ಮುಖ॒ತ ಏ॒ವೈನ॒ಮಾಹು॑ತಯ ಋಚ್ಛನ್ತಿ॒ ನೋತ್ತಾ॒ನ-ಞ್ಚಿ॑ನುತೇ ಸುವ॒ರ್ಗ್ಯೋ᳚-ಽಸ್ಯ ಭವತಿ ಸೌ॒ರ್ಯಾ ಜು॑ಹೋತಿ॒ ಚಖ್ಷು॑ರೇ॒ವಾಸ್ಮಿ॒-ನ್ಪ್ರತಿ॑ ದಧಾತಿ॒ ದ್ವಿರ್ಜು॑ಹೋತಿ॒ ದ್ವೇ ಹಿ ಚಖ್ಷು॑ಷೀ ಸಮಾ॒ನ್ಯಾ ಜು॑ಹೋತಿ ಸಮಾ॒ನಗ್ಂ ಹಿ ಚಖ್ಷು॒-ಸ್ಸಮೃ॑ದ್ಧ್ಯೈ ದೇವಾಸು॒ರಾ-ಸ್ಸಂಯಁ॑ತ್ತಾ ಆಸ॒-ನ್ತೇ ವಾ॒ಮಂ-ವಁಸು॒ ಸ-ನ್ನ್ಯ॑ದಧತ॒ ತದ್ದೇ॒ವಾ ವಾ॑ಮ॒ಭೃತಾ॑-ಽವೃಞ್ಜತ॒ ತದ್ವಾ॑ಮ॒ಭೃತೋ॑ ವಾಮಭೃ॒ತ್ತ್ವಂ-ಯಁದ್ವಾ॑ಮ॒ಭೃತ॑ ಮುಪ॒ದಧಾ॑ತಿ ವಾ॒ಮಮೇ॒ವ ತಯಾ॒ ವಸು॒ ಯಜ॑ಮಾನೋ॒ ಭ್ರಾತೃ॑ವ್ಯಸ್ಯ ವೃಙ್ಕ್ತೇ॒ ಹಿರ॑ಣ್ಯಮೂರ್ಧ್ನೀ ಭವತಿ॒ ಜ್ಯೋತಿ॒ರ್ವೈ ಹಿರ॑ಣ್ಯ॒-ಞ್ಜ್ಯೋತಿ॑ರ್ವಾ॒ಮ-ಞ್ಜ್ಯೋತಿ॑ಷೈ॒ವಾಸ್ಯ॒ ಜ್ಯೋತಿ॑ರ್ವಾ॒ಮಂ-ವೃಁ॑ಙ್ಕ್ತೇ ದ್ವಿಯ॒ಜುರ್ಭ॑ವತಿ॒ ಪ್ರತಿ॑ಷ್ಠಿತ್ಯೈ ॥ 17 ॥
(ಯು॒ಞ್ಜಾ॒ನೇಷ್ವಗ್ನೇ᳚-ಪ್ರಾ॒ಚೀನ॑ಮುತ್ತಾ॒ನಂ – ವಾಁ॑ಮ॒ಭೃತಂ॒ – ಚತು॑ರ್ವಿಗ್ಂಶತಿಶ್ಚ) (ಅ. 3)
ಆಪೋ॒ ವರು॑ಣಸ್ಯ॒ ಪತ್ನ॑ಯ ಆಸ॒-ನ್ತಾ ಅ॒ಗ್ನಿರ॒ಭ್ಯ॑ದ್ಧ್ಯಾಯ॒-ತ್ತಾ-ಸ್ಸಮ॑ಭವ॒-ತ್ತಸ್ಯ॒ ರೇತಃ॒ ಪರಾ॑-ಽಪತ॒-ತ್ತದಿ॒ಯಮ॑ಭವ॒ದ್ಯ-ದ್ದ್ವಿ॒ತೀಯ॑-ಮ್ಪ॒ರಾ-ಽಪ॑ತ॒-ತ್ತದ॒ಸಾವ॑ಭವದಿ॒ಯಂ-ವೈಁ ವಿ॒ರಾಡ॒ಸೌ ಸ್ವ॒ರಾಡ್ ಯ-ದ್ವಿ॒ರಾಜಾ॑ವುಪ॒ದಧಾ॑ತೀ॒ಮೇ ಏ॒ವೋಪ॑ ಧತ್ತೇ॒ ಯದ್ವಾ ಅ॒ಸೌ ರೇತ॑-ಸ್ಸಿ॒ಞ್ಚತಿ॒ ತದ॒ಸ್ಯಾ-ಮ್ಪ್ರತಿ॑ ತಿಷ್ಠತಿ॒ ತ-ತ್ಪ್ರ ಜಾ॑ಯತೇ॒ ತಾ ಓಷ॑ಧಯೋ [ಓಷ॑ಧಯಃ, ವೀ॒ರುಧೋ॑] 18
ವೀ॒ರುಧೋ॑ ಭವನ್ತಿ॒ ತಾ ಅ॒ಗ್ನಿರ॑ತ್ತಿ॒ ಯ ಏ॒ವಂ-ವೇಁದ॒ ಪ್ರೈವ ಜಾ॑ಯತೇ-ಽನ್ನಾ॒ದೋ ಭ॑ವತಿ॒ ಯೋ ರೇ॑ತ॒ಸ್ವೀ ಸ್ಯಾ-ತ್ಪ್ರ॑ಥ॒ಮಾಯಾ॒-ನ್ತಸ್ಯ॒ ಚಿತ್ಯಾ॑ಮು॒ಭೇ ಉಪ॑ ದದ್ಧ್ಯಾದಿ॒ಮೇ ಏ॒ವಾಸ್ಮೈ॑ ಸ॒ಮೀಚೀ॒ ರೇತ॑-ಸ್ಸಿಞ್ಚತೋ॒ ಯ-ಸ್ಸಿ॒ಕ್ತರೇ॑ತಾ॒-ಸ್ಸ್ಯಾ-ತ್ಪ್ರ॑ಥ॒ಮಾಯಾ॒-ನ್ತಸ್ಯ॒ ಚಿತ್ಯಾ॑ಮ॒ನ್ಯಾಮುಪ॑ ದದ್ಧ್ಯಾದುತ್ತ॒ಮಾಯಾ॑ಮ॒ನ್ಯಾಗ್ಂ ರೇತ॑ ಏ॒ವಾಸ್ಯ॑ ಸಿ॒ಕ್ತಮಾ॒ಭ್ಯಾಮು॑ಭ॒ಯತಃ॒ ಪರಿ॑ ಗೃಹ್ಣಾತಿ ಸಂವಁಥ್ಸ॒ರ-ನ್ನ ಕ- [ಸಂವಁಥ್ಸ॒ರ-ನ್ನ ಕಮ್, ಚ॒ನ ಪ್ರ॒ತ್ಯವ॑ರೋಹೇ॒ನ್ನ] 19
-ಞ್ಚ॒ನ ಪ್ರ॒ತ್ಯವ॑ರೋಹೇ॒ನ್ನ ಹೀಮೇ ಕಞ್ಚ॒ನ ಪ್ರ॑ತ್ಯವ॒ರೋಹ॑ತ॒ಸ್ತದೇ॑ನಯೋರ್ವ್ರ॒ತಂ-ಯೋಁ ವಾ ಅಪ॑ ಶೀರ್ಷಾಣಮ॒ಗ್ನಿ-ಞ್ಚಿ॑ನು॒ತೇ-ಽಪ॑ಶೀರ್ಷಾ॒-ಽಮುಷ್ಮಿ॑-ಲ್ಲೋಁ॒ಕೇ ಭ॑ವತಿ॒ ಯ-ಸ್ಸಶೀ॑ರ್ಷಾಣ-ಞ್ಚಿನು॒ತೇ ಸಶೀ॑ರ್ಷಾ॒ ಽಮುಷ್ಮಿ॑-ಲ್ಲೋಁ॒ಕೇ ಭ॑ವತಿ॒ ಚಿತ್ತಿ॑-ಞ್ಜುಹೋಮಿ॒ ಮನ॑ಸಾ ಘೃ॒ತೇನ॒ ಯಥಾ॑ ದೇ॒ವಾ ಇ॒ಹಾ-ಽಽಗಮ॑ನ್ ವೀ॒ತಿಹೋ᳚ತ್ರಾ ಋತಾ॒ವೃಧ॑-ಸ್ಸಮು॒ದ್ರಸ್ಯ॑ ವ॒ಯುನ॑ಸ್ಯ॒ ಪತ್ಮ॑ನ್ ಜು॒ಹೋಮಿ॑ ವಿ॒ಶ್ವಕ॑ರ್ಮಣೇ॒ ವಿಶ್ವಾ-ಽಹಾ-ಽಮ॑ರ್ತ್ಯಗ್ಂ ಹ॒ವಿರಿತಿ॑ ಸ್ವಯಮಾತೃ॒ಣ್ಣಾಮು॑ಪ॒ಧಾಯ॑ ಜುಹೋ- [ಜುಹೋತಿ, ಏ॒ತದ್ವಾ] 20
-ತ್ಯೇ॒ತದ್ವಾ ಅ॒ಗ್ನೇ-ಶ್ಶಿರ॒-ಸ್ಸಶೀ॑ರ್ಷಾಣಮೇ॒ವಾಗ್ನಿ-ಞ್ಚಿ॑ನುತೇ॒ ಸಶೀ॑ರ್ಷಾ॒-ಽಮುಷ್ಮಿ॑-ಲ್ಲೋಁ॒ಕೇ ಭ॑ವತಿ॒ ಯ ಏ॒ವಂ-ವೇಁದ॑ ಸುವ॒ರ್ಗಾಯ॒ ವಾ ಏ॒ಷ ಲೋ॒ಕಾಯ॑ ಚೀಯತೇ॒ ಯದ॒ಗ್ನಿಸ್ತಸ್ಯ॒ ಯದಯ॑ಥಾಪೂರ್ವ-ಙ್ಕ್ರಿ॒ಯತೇ ಽಸು॑ವರ್ಗ್ಯಮಸ್ಯ॒ ತ-ಥ್ಸು॑ವ॒ರ್ಗ್ಯೋ᳚ ಽಗ್ನಿಶ್ಚಿತಿ॑ಮುಪ॒ಧಾಯಾ॒ಭಿ ಮೃ॑ಶೇ॒ಚ್ಚಿತ್ತಿ॒ಮಚಿ॑ತ್ತಿ-ಞ್ಚಿನವ॒ದ್ವಿ ವಿ॒ದ್ವಾ-ನ್ಪೃ॒ಷ್ಠೇವ॑ ವೀ॒ತಾ ವೃ॑ಜಿ॒ನಾ ಚ॒ ಮರ್ತಾ᳚-ನ್ರಾ॒ಯೇ ಚ॑ ನ-ಸ್ಸ್ವಪ॒ತ್ಯಾಯ॑ ದೇವ॒ ದಿತಿ॑-ಞ್ಚ॒ ರಾಸ್ವಾ-ದಿ॑ತಿಮುರು॒ಷ್ಯೇತಿ॑ ಯಥಾಪೂ॒ರ್ವಮೇ॒ವೈನಾ॒ಮುಪ॑ ಧತ್ತೇ॒ ಪ್ರಾಞ್ಚ॑ಮೇನ-ಞ್ಚಿನುತೇ ಸುವ॒ರ್ಗ್ಯೋ᳚-ಽಸ್ಯ ಭವತಿ ॥ 21 ॥
(ಓಷ॑ಧಯಃ॒ – ಕಂ – ಜು॑ಹೋತಿ – ಸ್ವಪ॒ತ್ಯಾಯಾ॒ – ಷ್ಟಾದ॑ಶ ಚ) (ಅ. 4)
ವಿ॒ಶ್ವಕ॑ರ್ಮಾ ದಿ॒ಶಾ-ಮ್ಪತಿ॒-ಸ್ಸ ನಃ॑ ಪ॒ಶೂ-ನ್ಪಾ॑ತು॒ ಸೋ᳚-ಽಸ್ಮಾ-ನ್ಪಾ॑ತು॒ ತಸ್ಮೈ॒ ನಮಃ॑ ಪ್ರ॒ಜಾಪ॑ತೀ ರು॒ದ್ರೋ ವರು॑ಣೋ॒ ಽಗ್ನಿರ್ದಿ॒ಶಾ-ಮ್ಪತಿ॒-ಸ್ಸ ನಃ॑ ಪ॒ಶೂ-ನ್ಪಾ॑ತು॒ ಸೋ᳚-ಽಸ್ಮಾ-ನ್ಪಾ॑ತು॒ ತಸ್ಮೈ॒ ನಮ॑ ಏ॒ತಾ ವೈ ದೇ॒ವತಾ॑ ಏ॒ತೇಷಾ᳚-ಮ್ಪಶೂ॒ನಾ-ಮಧಿ॑ಪತಯ॒-ಸ್ತಾಭ್ಯೋ॒ ವಾ ಏ॒ಷ ಆ ವೃ॑ಶ್ಚ್ಯತೇ॒ ಯಃ ಪ॑ಶುಶೀ॒ರ್॒ಷಾಣ್ಯು॑ಪ॒ ದಧಾ॑ತಿ ಹಿರಣ್ಯೇಷ್ಟ॒ಕಾ ಉಪ॑ ದಧಾತ್ಯೇ॒ತಾಭ್ಯ॑ ಏ॒ವ ದೇ॒ವತಾ᳚ಭ್ಯೋ॒ ನಮ॑ಸ್ಕರೋತಿ ಬ್ರಹ್ಮವಾ॒ದಿನೋ॑ [ಬ್ರಹ್ಮವಾ॒ದಿನಃ॑, ವ॒ದ॒ನ್ತ್ಯ॒ಗ್ನೌ ಗ್ರಾ॒ಮ್ಯಾ-] 22
ವದನ್ತ್ಯ॒ಗ್ನೌ ಗ್ರಾ॒ಮ್ಯಾ-ನ್ಪ॒ಶೂ-ನ್ಪ್ರ ದ॑ಧಾತಿ ಶು॒ಚಾ-ಽಽರ॒ಣ್ಯಾನ॑ರ್ಪಯತಿ॒ ಕಿ-ನ್ತತ॒ ಉಚ್ಛಿಗ್ಂ॑ಷ॒ತೀತಿ॒ ಯದ್ಧಿ॑ರಣ್ಯೇಷ್ಟ॒ಕಾ ಉ॑ಪ॒ದಧಾ᳚ತ್ಯ॒ಮೃತಂ॒-ವೈಁ ಹಿರ॑ಣ್ಯಮ॒ಮೃತೇ॑ನೈ॒ವ ಗ್ರಾ॒ಮ್ಯೇಭ್ಯಃ॑ ಪ॒ಶುಭ್ಯೋ॑ ಭೇಷ॒ಜ-ಙ್ಕ॑ರೋತಿ॒ ನೈನಾನ್॑ ಹಿನಸ್ತಿ ಪ್ರಾ॒ಣೋ ವೈ ಪ್ರ॑ಥ॒ಮಾ ಸ್ವ॑ಯಮಾತೃ॒ಣ್ಣಾ ವ್ಯಾ॒ನೋ ದ್ವಿ॒ತೀಯಾ॑-ಽಪಾ॒ನಸ್ತೃ॒ತೀಯಾ-ಽನು॒ ಪ್ರಾ-ಽಣ್ಯಾ᳚-ತ್ಪ್ರಥ॒ಮಾಗ್ ಸ್ವ॑ಯಮಾತೃ॒ಣ್ಣಾಮು॑ಪ॒ಧಾಯ॑ ಪ್ರಾ॒ಣೇನೈ॒ವ ಪ್ರಾ॒ಣಗ್ಂ ಸಮ॑ರ್ಧಯತಿ॒ ವ್ಯ॑ನ್ಯಾ- [ಸಮ॑ರ್ಧಯತಿ॒ ವ್ಯ॑ನ್ಯಾತ್, ದ್ವಿ॒ತೀಯಾ॑ಮುಪ॒ಧಾಯ॑] 23
-ದ್ದ್ವಿ॒ತೀಯಾ॑ಮುಪ॒ಧಾಯ॑ ವ್ಯಾ॒ನೇನೈ॒ವ ವ್ಯಾ॒ನಗ್ಂ ಸಮ॑ರ್ಧಯ॒ತ್ಯಪಾ᳚ನ್ ಯಾತ್ತೃ॒ತೀಯಾ॑ಮುಪ॒ಧಾಯಾ॑-ಪಾ॒ನೇನೈ॒ವಾಪಾ॒ನಗ್ಂ ಸಮ॑ರ್ಧಯ॒ತ್ಯಥೋ᳚ ಪ್ರಾ॒ಣೈರೇ॒ವೈನ॒ಗ್ಂ॒ ಸಮಿ॑ನ್ಧೇ॒ ಭೂರ್ಭುವ॒-ಸ್ಸುವ॒ರಿತಿ॑ ಸ್ವಯಮಾತೃ॒ಣ್ಣಾ ಉಪ॑ ದಧಾತೀ॒ಮೇ ವೈ ಲೋ॒ಕಾ-ಸ್ಸ್ವ॑ಯಮಾತೃ॒ಣ್ಣಾ ಏ॒ತಾಭಿಃ॒ ಖಲು॒ವೈ ವ್ಯಾಹೃ॑ತೀಭಿಃ ಪ್ರ॒ಜಾಪ॑ತಿಃ॒ ಪ್ರಾ-ಽಜಾ॑ಯತ॒ ಯದೇ॒ತಾಭಿ॒ರ್ವ್ಯಾಹೃ॑ತೀಭಿ-ಸ್ಸ್ವಯಮಾತೃ॒ಣ್ಣಾ ಉ॑ಪ॒ದಧಾ॑ತೀ॒ಮಾನೇ॒ವ ಲೋ॒ಕಾನು॑ಪ॒ಧಾಯೈ॒ಷು [ ] 24
ಲೋ॒ಕೇಷ್ವಧಿ॒ ಪ್ರಜಾ॑ಯತೇ ಪ್ರಾ॒ಣಾಯ॑ ವ್ಯಾ॒ನಾಯಾ॑ಪಾ॒ನಾಯ॑ ವಾ॒ಚೇ ತ್ವಾ॒ ಚಖ್ಷು॑ಷೇ ತ್ವಾ॒ ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದಾ॒ಗ್ನಿನಾ॒ ವೈ ದೇ॒ವಾ-ಸ್ಸು॑ವ॒ರ್ಗಂ-ಲೋಁ॒ಕಮ॑ಜಿಗಾಗ್ಂಸ॒-ನ್ತೇನ॒ ಪತಿ॑ತು॒-ನ್ನಾಶ॑ಕ್ನುವ॒-ನ್ತ ಏ॒ತಾಶ್ಚತ॑ಸ್ರ-ಸ್ಸ್ವಯಮಾತೃ॒ಣ್ಣಾ ಅ॑ಪಶ್ಯ॒-ನ್ತಾ ದಿ॒ಖ್ಷೂಪಾ॑ದಧತ॒ ತೇನ॑ ಸ॒ರ್ವತ॑ಶ್ಚಖ್ಷುಷಾ ಸುವ॒ರ್ಗಂ-ಲೋಁ॒ಕಮಾ॑ಯ॒ನ್॒ ಯಚ್ಚತ॑ಸ್ರ-ಸ್ಸ್ವಯಮಾತೃ॒ಣ್ಣಾ ದಿ॒ಖ್ಷೂ॑ಪ॒ದಧಾ॑ತಿ ಸ॒ರ್ವತ॑ಶ್ಚಖ್ಷುಷೈ॒ವ ತದ॒ಗ್ನಿನಾ॒ ಯಜ॑ಮಾನ-ಸ್ಸುವ॒ರ್ಗಂ-ಲೋಁ॒ಕಮೇ॑ತಿ ॥ 25 ॥
(ಬ್ರ॒ಹ್ಮ॒ವಾ॒ದಿನೋ॒ – ವ್ಯ॑ನ್ಯಾ – ದೇ॒ಷು – ಯಜ॑ಮಾನ॒ – ಸ್ತ್ರೀಣಿ॑ ಚ) (ಅ. 5)
ಅಗ್ನ॒ ಆ ಯಾ॑ಹಿ ವೀ॒ತಯ॒ ಇತ್ಯಾ॒ಹಾ-ಹ್ವ॑ತೈ॒ವೈನ॑-ಮ॒ಗ್ನಿ-ನ್ದೂ॒ತಂ-ವೃಁ॑ಣೀಮಹ॒ ಇತ್ಯಾ॑ಹ ಹೂ॒ತ್ವೈವೈನಂ॑-ವೃಁಣೀತೇ॒ ಽಗ್ನಿನಾ॒-ಽಗ್ನಿ-ಸ್ಸಮಿ॑ದ್ಧ್ಯತ॒ ಇತ್ಯಾ॑ಹ॒ ಸಮಿ॑ನ್ಧ ಏ॒ವೈನ॑ಮ॒ಗ್ನಿರ್ವೃ॒ತ್ರಾಣಿ॑ ಜಙ್ಘನ॒ದಿತ್ಯಾ॑ಹ॒ ಸಮಿ॑ದ್ಧ ಏ॒ವಾಸ್ಮಿ॑ನ್ನಿನ್ದ್ರಿ॒ಯ-ನ್ದ॑ಧಾತ್ಯ॒ಗ್ನೇ-ಸ್ಸ್ತೋಮ॑-ಮ್ಮನಾಮಹ॒ ಇತ್ಯಾ॑ಹ ಮನು॒ತ ಏ॒ವೈನ॑ಮೇ॒ತಾನಿ॒ ವಾ ಅಹ್ನಾಗ್ಂ॑ ರೂ॒ಪಾ- [ರೂ॒ಪಾಣಿ॑, ಅ॒ನ್ವ॒ಹಮೇ॒ವೈನ॑-] 26
-ಣ್ಯ॑ನ್ವ॒ಹಮೇ॒ವೈನ॑-ಞ್ಚಿನು॒ತೇ ಽವಾಹ್ನಾಗ್ಂ॑ ರೂ॒ಪಾಣಿ॑ ರುನ್ಧೇ ಬ್ರಹ್ಮವಾ॒ದಿನೋ॑ ವದನ್ತಿ॒ ಕಸ್ಮಾ᳚-ಥ್ಸ॒ತ್ಯಾದ್ಯಾ॒ತಯಾ᳚ಮ್ನೀರ॒ನ್ಯಾ ಇಷ್ಟ॑ಕಾ॒ ಅಯಾ॑ತಯಾಮ್ನೀ ಲೋಕ-ಮ್ಪೃ॒ಣೇತ್ಯೈ᳚ನ್ದ್ರಾ॒ಗ್ನೀ ಹಿ ಬಾ॑ರ್ಹಸ್ಪ॒ತ್ಯೇತಿ॑ ಬ್ರೂಯಾದಿನ್ದ್ರಾ॒ಗ್ನೀ ಚ॒ ಹಿ ದೇ॒ವಾನಾ॒-ಮ್ಬೃಹ॒ಸ್ಪತಿ॒ಶ್ಚಾ-ಯಾ॑ತಯಾಮಾನೋ ಽನುಚ॒ರವ॑ತೀ ಭವ॒ತ್ಯಜಾ॑ಮಿತ್ವಾಯಾ -ನು॒ಷ್ಟುಭಾ-ಽನು॑ ಚರತ್ಯಾ॒ತ್ಮಾ ವೈ ಲೋ॑ಕ-ಮ್ಪೃ॒ಣಾ ಪ್ರಾ॒ಣೋ॑ ಽನು॒ಷ್ಟು-ಪ್ತಸ್ಮಾ᳚-ತ್ಪ್ರಾ॒ಣ-ಸ್ಸರ್ವಾ॒ಣ್ಯಙ್ಗಾ॒ನ್ಯನು॑ ಚರತಿ॒ ತಾ ಅ॑ಸ್ಯ॒ ಸೂದ॑ದೋಹಸ॒ [ಸೂದ॑ದೋಹಸಃ, ಇತ್ಯಾ॑ಹ॒] 27
ಇತ್ಯಾ॑ಹ॒ ತಸ್ಮಾ॒-ತ್ಪರು॑ಷಿಪರುಷಿ॒ ರಸ॒-ಸ್ಸೋಮಗ್ಗ್॑ ಶ್ರೀಣನ್ತಿ॒ ಪೃಶ್ಞ॑ಯ॒ ಇತ್ಯಾ॒ಹಾನ್ನಂ॒-ವೈಁ ಪೃಶ್ಞ್ಯನ್ನ॑ಮೇ॒ವಾವ॑ ರುನ್ಧೇ॒-ಽರ್ಕೋ ವಾ ಅ॒ಗ್ನಿರ॒ರ್ಕೋ-ಽನ್ನ॒ಮನ್ನ॑ಮೇ॒ವಾವ॑ ರುನ್ಧೇ॒ ಜನ್ಮ॑-ನ್ದೇ॒ವಾನಾಂ॒-ವಿಁಶ॑ಸ್ತ್ರಿ॒ಷ್ವಾ ರೋ॑ಚ॒ನೇ ದಿ॒ವ ಇತ್ಯಾ॑ಹೇ॒ಮಾನೇ॒ವಾಸ್ಮೈ॑ ಲೋ॒ಕಾನ್ ಜ್ಯೋತಿ॑ಷ್ಮತಃ ಕರೋತಿ॒ ಯೋ ವಾ ಇಷ್ಟ॑ಕಾನಾ-ಮ್ಪ್ರತಿ॒ಷ್ಠಾಂ-ವೇಁದ॒ ಪ್ರತ್ಯೇ॒ವ ತಿ॑ಷ್ಠತಿ॒ ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॒ದೇತ್ಯಾ॑ಹೈ॒ಷಾ ವಾ ಇಷ್ಟ॑ಕಾನಾ-ಮ್ಪ್ರತಿ॒ಷ್ಠಾ ಯ ಏ॒ವಂ-ವೇಁದ॒ ಪ್ರತ್ಯೇ॒ವತಿ॑ಷ್ಠತಿ ॥ 28 ॥
(ರೂ॒ಪಾಣಿ॒ – ಸೂದ॑ದೋಹಸ॒ – ಸ್ತಯಾ॒ – ಷೋಡ॑ಶ ಚ) (ಅ. 6)
ಸು॒ವ॒ರ್ಗಾಯ॒ ವಾ ಏ॒ಷ ಲೋ॒ಕಾಯ॑ ಚೀಯತೇ॒ ಯದ॒ಗ್ನಿರ್ವಜ್ರ॑ ಏಕಾದ॒ಶಿನೀ॒ ಯದ॒ಗ್ನಾವೇ॑ಕಾದ॒ಶಿನೀ᳚-ಮ್ಮಿನು॒ಯಾ-ದ್ವಜ್ರೇ॑ಣೈನಗ್ಂ ಸುವ॒ರ್ಗಾಲ್ಲೋ॒ಕಾದ॒ನ್ತರ್ದ॑ದ್ಧ್ಯಾ॒ದ್ಯನ್ನ ಮಿ॑ನು॒ಯಾ-ಥ್ಸ್ವರು॑ಭಿಃ ಪ॒ಶೂನ್ ವ್ಯ॑ರ್ಧಯೇದೇಕಯೂ॒ಪ-ಮ್ಮಿ॑ನೋತಿ॒ ನೈನಂ॒-ವಁಜ್ರೇ॑ಣ ಸುವ॒ರ್ಗಾಲ್ಲೋ॒ಕಾದ॑ನ್ತ॒ರ್ದಧಾ॑ತಿ॒ ನ ಸ್ವರು॑ಭಿಃ ಪ॒ಶೂನ್ ವ್ಯ॑ರ್ಧಯತಿ॒ ವಿ ವಾ ಏ॒ಷ ಇ॑ನ್ದ್ರಿ॒ಯೇಣ॑ ವೀ॒ರ್ಯೇ॑ಣರ್ಧ್ಯತೇ॒ ಯೋ᳚-ಽಗ್ನಿ-ಞ್ಚಿ॒ನ್ವ-ನ್ನ॑ಧಿ॒ಕ್ರಾಮ॑ತ್ಯೈನ್ದ್ರಿ॒ಯ- [-ನ್ನ॑ಧಿ॒ಕ್ರಾಮ॑ತ್ಯೈನ್ದ್ರಿ॒ಯಾ, ಋ॒ಚಾ ಽಽಕ್ರಮ॑ಣ॒-] 29
-ರ್ಚಾ ಽಽಕ್ರಮ॑ಣ॒-ಮ್ಪ್ರತೀಷ್ಟ॑ಕಾ॒ಮುಪ॑ ದದ್ಧ್ಯಾ॒ನ್ನೇನ್ದ್ರಿ॒ಯೇಣ॑ ವೀ॒ರ್ಯೇ॑ಣ॒ ವ್ಯೃ॑ದ್ಧ್ಯತೇ ರು॒ದ್ರೋ ವಾ ಏ॒ಷ ಯದ॒ಗ್ನಿಸ್ತಸ್ಯ॑ ತಿ॒ಸ್ರ-ಶ್ಶ॑ರ॒ವ್ಯಾಃ᳚ ಪ್ರ॒ತೀಚೀ॑ ತಿ॒ರಶ್ಚ್ಯ॒ನೂಚೀ॒ ತಾಭ್ಯೋ॒ ವಾ ಏ॒ಷ ಆ ವೃ॑ಶ್ಚ್ಯತೇ॒ ಯೋ᳚-ಽಗ್ನಿ-ಞ್ಚಿ॑ನು॒ತೇ᳚ ಽಗ್ನಿ-ಞ್ಚಿ॒ತ್ವಾ ತಿ॑ಸೃಧ॒ನ್ವಮಯಾ॑ಚಿತ-ಮ್ಬ್ರಾಹ್ಮ॒ಣಾಯ॑ ದದ್ಯಾ॒-ತ್ತಾಭ್ಯ॑ ಏ॒ವ ನಮ॑ಸ್ಕರೋ॒ತ್ಯಥೋ॒ ತಾಭ್ಯ॑ ಏ॒ವಾ-ಽಽತ್ಮಾನ॒-ನ್ನಿಷ್ಕ್ರೀ॑ಣೀತೇ॒ ಯತ್ತೇ॑ ರುದ್ರ ಪು॒ರೋ [ರುದ್ರ ಪು॒ರಃ, ಧನು॒ಸ್ತ-ದ್ವಾತೋ॒] 30
ಧನು॒ಸ್ತ-ದ್ವಾತೋ॒ ಅನು॑ ವಾತು ತೇ॒ ತಸ್ಮೈ॑ ತೇ ರುದ್ರ ಸಂವಁಥ್ಸ॒ರೇಣ॒ ನಮ॑ಸ್ಕರೋಮಿ॒ ಯತ್ತೇ॑ ರುದ್ರ ದಖ್ಷಿ॒ಣಾ ಧನು॒ಸ್ತ-ದ್ವಾತೋ॒ ಅನು॑ ವಾತು ತೇ॒ ತಸ್ಮೈ॑ ತೇ ರುದ್ರ ಪರಿವಥ್ಸ॒ರೇಣ॒ ನಮ॑ಸ್ಕರೋಮಿ॒ ಯತ್ತೇ॑ ರುದ್ರ ಪ॒ಶ್ಚಾದ್ಧನು॒ಸ್ತ-ದ್ವಾತೋ॒ ಅನು॑ ವಾತು ತೇ॒ ತಸ್ಮೈ॑ ತೇ ರುದ್ರೇದಾವಥ್ಸ॒ರೇಣ॒ ನಮ॑ಸ್ಕರೋಮಿ॒ ಯತ್ತೇ॑ ರುದ್ರೋತ್ತ॒ರಾ-ದ್ಧನು॒ಸ್ತ- [ದ್ಧನು॒ಸ್ತತ್, ವಾತೋ॒] 31
-ದ್ವಾತೋ॒ ಅನು॑ ವಾತು ತೇ॒ ತಸ್ಮೈ॑ ತೇ ರುದ್ರೇದುವಥ್ಸ॒ರೇಣ॒ ನಮ॑ಸ್ಕರೋಮಿ॒ ಯತ್ತೇ॑ ರುದ್ರೋ॒ಪರಿ॒ ಧನು॒ಸ್ತ-ದ್ವಾತೋ॒ ಅನು॑ ವಾತು ತೇ॒ ತಸ್ಮೈ॑ ತೇ ರುದ್ರ ವಥ್ಸ॒ರೇಣ॒ ನಮ॑ಸ್ಕರೋಮಿ ರು॒ದ್ರೋ ವಾ ಏ॒ಷ ಯದ॒ಗ್ನಿ-ಸ್ಸ ಯಥಾ᳚ ವ್ಯಾ॒ಘ್ರಃ ಕ್ರು॒ದ್ಧ-ಸ್ತಿಷ್ಠ॑ತ್ಯೇ॒ವಂ-ವಾಁ ಏ॒ಷ ಏ॒ತರ್ಹಿ॒ ಸಞ್ಚಿ॑ತಮೇ॒ತೈರುಪ॑ ತಿಷ್ಠತೇ ನಮಸ್ಕಾ॒ರೈ-ರೇ॒ವೈನಗ್ಂ॑ ಶಮಯತಿ॒ ಯೇ᳚-ಽಗ್ನಯಃ॑ – [ಯೇ᳚-ಽಗ್ನಯಃ॑, ಪು॒ರೀ॒ಷ್ಯಾಃ᳚] 32
ಪುರೀ॒ಷ್ಯಾಃ᳚ ಪ್ರವಿ॑ಷ್ಟಾಃ ಪೃಥಿ॒ವೀಮನು॑ । ತೇಷಾ॒-ನ್ತ್ವಮ॑ಸ್ಯುತ್ತ॒ಮಃ ಪ್ರಣೋ॑ ಜೀ॒ವಾತ॑ವೇ ಸುವ ॥ ಆಪ॑-ನ್ತ್ವಾ-ಽಗ್ನೇ॒ ಮನ॒ಸಾ ಽಽಪ॑-ನ್ತ್ವಾ-ಽಗ್ನೇ॒ ತಪ॒ಸಾ ಽಽಪ॑-ನ್ತ್ವಾ-ಽಗ್ನೇ ದೀ॒ಖ್ಷಯಾ ಽಽಪ॑-ನ್ತ್ವಾ-ಽಗ್ನ ಉಪ॒ಸದ್ಭಿ॒ರಾಪ॑-ನ್ತ್ವಾ-ಽಗ್ನೇ ಸು॒ತ್ಯಯಾ-ಽಽಪ॑-ನ್ತ್ವಾ-ಽಗ್ನೇ॒ ದಖ್ಷಿ॑ಣಾಭಿ॒ರಾಪ॑-ನ್ತ್ವಾ-ಽಗ್ನೇ ಽವಭೃ॒ಥೇನಾಪ॑-ನ್ತ್ವಾ-ಽಗ್ನೇ ವ॒ಶಯಾ ಽಽಪ॑-ನ್ತ್ವಾ-ಽಗ್ನೇ ಸ್ವಗಾಕಾ॒ರೇಣೇತ್ಯಾ॑ಹೈ॒ ಷಾ ವಾ ಅ॒ಗ್ನೇರಾಪ್ತಿ॒ಸ್ತಯೈ॒ವೈನ॑ಮಾಪ್ನೋತಿ ॥ 33 ॥
(ಐ॒ನ್ದ್ರಿ॒ಯಾ – ಪು॒ರ – ಉ॑ತ್ತ॒ರಾದ್ಧನು॒ಸ್ತ- ದ॒ಗ್ನಯ॑ – ಆಹಾ॒ – ಷ್ಟೌ ಚ॑) (ಅ. 7)
ಗಾ॒ಯ॒ತ್ರೇಣ॑ ಪು॒ರಸ್ತಾ॒ದುಪ॑ ತಿಷ್ಠತೇ ಪ್ರಾ॒ಣಮೇ॒ವಾಸ್ಮಿ॑-ನ್ದಧಾತಿ ಬೃಹ-ದ್ರಥನ್ತ॒ರಾಭ್ಯಾ᳚-ಮ್ಪ॒ಖ್ಷಾವೋಜ॑ ಏ॒ವಾಸ್ಮಿ॑-ನ್ದಧಾತ್ಯೃತು॒ಸ್ಥಾಯ॑ಜ್ಞಾ-ಯ॒ಜ್ಞಿಯೇ॑ನ॒ ಪುಚ್ಛ॑ಮೃ॒ತುಷ್ವೇ॒ವ ಪ್ರತಿ॑ ತಿಷ್ಠತಿ ಪೃ॒ಷ್ಠೈರುಪ॑ ತಿಷ್ಠತೇ॒ ತೇಜೋ॒ ವೈ ಪೃ॒ಷ್ಠಾನಿ॒ ತೇಜ॑ ಏ॒ವಾಸ್ಮಿ॑-ನ್ದಧಾತಿ ಪ್ರ॒ಜಾಪ॑ತಿರ॒ಗ್ನಿಮ॑ಸೃಜತ॒ ಸೋ᳚-ಽಸ್ಮಾ-ಥ್ಸೃ॒ಷ್ಟಃ ಪರಾಂ॑ಐ॒-ತ್ತಂ-ವಾಁ॑ರವ॒ನ್ತೀಯೇ॑ನಾ-ವಾರಯತ॒ ತ-ದ್ವಾ॑ರವ॒ನ್ತೀಯ॑ಸ್ಯ ವಾರವನ್ತೀಯ॒ತ್ವಗ್ಗ್ ಶ್ಯೈ॒ತೇನ॑ ಶ್ಯೇ॒ತೀ ಅ॑ಕುರುತ॒ ತಚ್ಛ್ಯೈ॒ತಸ್ಯ॑ ಶ್ಯೈತ॒ತ್ವಂ- [ಶ್ಯೈತ॒ತ್ವಮ್, ಯ-ದ್ವಾ॑ರವ॒ನ್ತೀಯೇ॑ನೋಪ॒ತಿಷ್ಠ॑ತೇ] 34
-ಯಁ-ದ್ವಾ॑ರವ॒ನ್ತೀಯೇ॑ನೋಪ॒ತಿಷ್ಠ॑ತೇ ವಾ॒ರಯ॑ತ ಏ॒ವೈನಗ್ಗ್॑ ಶ್ಯೈ॒ತೇನ॑ ಶ್ಯೇ॒ತೀ ಕು॑ರುತೇ ಪ್ರ॒ಜಾಪ॑ತೇ॒ರ್ಹೃದ॑ಯೇನಾ-ಪಿಪ॒ಖ್ಷ-ಮ್ಪ್ರತ್ಯುಪ॑ ತಿಷ್ಠತೇ ಪ್ರೇ॒ಮಾಣ॑ಮೇ॒ವಾಸ್ಯ॑ ಗಚ್ಛತಿ॒ ಪ್ರಾಚ್ಯಾ᳚ ತ್ವಾ ದಿ॒ಶಾ ಸಾ॑ದಯಾಮಿ ಗಾಯ॒ತ್ರೇಣ॒ ಛನ್ದ॑ಸಾ॒-ಽಗ್ನಿನಾ॑ ದೇ॒ವತ॑ಯಾ॒-ಽಗ್ನೇ-ಶ್ಶೀ॒ರ್ಷ್ಣಾಗ್ನೇ-ಶ್ಶಿರ॒ ಉಪ॑ ದಧಾಮಿ॒ ದಖ್ಷಿ॑ಣಯಾ ತ್ವಾ ದಿ॒ಶಾ ಸಾ॑ದಯಾಮಿ॒ ತ್ರೈಷ್ಟು॑ಭೇನ॒ ಛನ್ದ॒ಸೇನ್ದ್ರೇ॑ಣ ದೇ॒ವತ॑ಯಾ॒-ಽಗ್ನೇಃ ಪ॒ಖ್ಷೇಣಾ॒ಗ್ನೇಃ ಪ॒ಖ್ಷಮುಪ॑ ದಧಾಮಿ ಪ್ರ॒ತೀಚ್ಯಾ᳚ ತ್ವಾ ದಿ॒ಶಾ ಸಾ॑ದಯಾಮಿ॒ [ದಿ॒ಶಾ ಸಾ॑ದಯಾಮಿ, ಜಾಗ॑ತೇನ॒] 35
ಜಾಗ॑ತೇನ॒ ಛನ್ದ॑ಸಾ ಸವಿ॒ತ್ರಾ ದೇ॒ವತ॑ಯಾ॒-ಽಗ್ನೇಃ ಪುಚ್ಛೇ॑ನಾ॒ಗ್ನೇಃ ಪುಚ್ಛ॒ಮುಪ॑ ದಧಾ॒ಮ್ಯುದೀ᳚ಚ್ಯಾ ತ್ವಾ ದಿ॒ಶಾ ಸಾ॑ದಯಾ॒ಮ್ಯಾನು॑ಷ್ಟುಭೇನ॒ ಛನ್ದ॑ಸಾ ಮಿ॒ತ್ರಾವರು॑ಣಾಭ್ಯಾಂ ಏ॒ವತ॑ಯಾ॒-ಽಗ್ನೇಃ ಪ॒ಖ್ಷೇಣಾ॒ಗ್ನೇಃ ಪ॒ಖ್ಷಮುಪ॑ ದಧಾಮ್ಯೂ॒ರ್ಧ್ವಯಾ᳚ ತ್ವಾ ದಿ॒ಶಾ ಸಾ॑ದಯಾಮಿ॒ ಪಾಙ್ಕ್ತೇ॑ನ॒ ಛನ್ದ॑ಸಾ॒ ಬೃಹ॒ಸ್ಪತಿ॑ನಾ ದೇ॒ವತ॑ಯಾ॒-ಽಗ್ನೇಃ ಪೃ॒ಷ್ಠೇನಾ॒ಗ್ನೇಃ ಪೃ॒ಷ್ಠಮುಪ॑ ದಧಾಮಿ॒ ಯೋ ವಾ ಅಪಾ᳚ತ್ಮಾನಮ॒ಗ್ನಿ-ಞ್ಚಿ॑ನು॒ತೇ-ಽಪಾ᳚ತ್ಮಾ॒-ಽಮುಷ್ಮಿ॑-ಲ್ಲೋಁ॒ಕೇ ಭ॑ವತಿ॒ ಯ-ಸ್ಸಾತ್ಮಾ॑ನ-ಞ್ಚಿನು॒ತೇ ಸಾತ್ಮಾ॒-ಽಮುಷ್ಮಿ॑-ಲ್ಲೋಁ॒ಕೇ ಭ॑ವತ್ಯಾತ್ಮೇಷ್ಟ॒ಕಾ ಉಪ॑ ದಧಾತ್ಯೇ॒ಷ ವಾ ಅ॒ಗ್ನೇರಾ॒ತ್ಮಾ ಸಾತ್ಮಾ॑ನಮೇ॒ವಾಗ್ನಿ-ಞ್ಚಿ॑ನುತೇ॒ ಸಾತ್ಮಾ॒-ಽಮುಷ್ಮಿ॑-ಲ್ಲೋಁ॒ಕೇ ಭ॑ವತಿ॒ ಯ ಏ॒ವಂ-ವೇಁದ॑ ॥ 36 ॥
(ಶ್ಯೈ॒ತ॒ತ್ವಂ – ಪ್ರ॒ತೀಚ್ಯಾ᳚ ತ್ವಾ ದಿ॒ಶಾ ಸಾ॑ದಯಾಮಿ॒ – ಯ-ಸ್ಸಾತ್ಮಾ॑ನ-ಞ್ಚಿನು॒ತೇ – ದ್ವಾವಿಗ್ಂ॑ಶತಿಶ್ಚ) (ಅ. 8)
ಅಗ್ನ॑ ಉದಧೇ॒ ಯಾ ತ॒ ಇಷು॑ರ್ಯು॒ವಾ ನಾಮ॒ ತಯಾ॑ ನೋ ಮೃಡ॒ ತಸ್ಯಾ᳚ಸ್ತೇ॒ ನಮ॒ಸ್ತಸ್ಯಾ᳚ಸ್ತ॒ ಉಪ॒ ಜೀವ॑ನ್ತೋ ಭೂಯಾ॒ಸ್ಮಾಗ್ನೇ॑ ದುದ್ಧ್ರ ಗಹ್ಯ ಕಿಗ್ಂಶಿಲ ವನ್ಯ॒ ಯಾ ತ॒ ಇಷು॑ರ್ಯು॒ವಾ ನಾಮ॒ ತಯಾ॑ ನೋ ಮೃಡ॒ ತಸ್ಯಾ᳚ಸ್ತೇ॒ ನಮ॒ಸ್ತಸ್ಯಾ᳚ಸ್ತ॒ ಉಪ॒ ಜೀವ॑ನ್ತೋ ಭೂಯಾಸ್ಮ॒ ಪಞ್ಚ॒ ವಾ ಏ॒ತೇ᳚-ಽಗ್ನಯೋ॒ ಯಚ್ಚಿತ॑ಯ ಉದ॒ಧಿರೇ॒ವ ನಾಮ॑ ಪ್ರಥ॒ಮೋ ದು॒ದ್ಧ್ರೋ [ದು॒ದ್ಧ್ರಃ, ದ್ವಿ॒ತೀಯೋ॒] 37
ದ್ವಿ॒ತೀಯೋ॒ ಗಹ್ಯ॑ಸ್ತೃ॒ತೀಯಃ॑ ಕಿಗ್ಂಶಿ॒ಲಶ್ಚ॑ತು॒ರ್ಥೋ ವನ್ಯಃ॑ ಪಞ್ಚ॒ಮಸ್ತೇಭ್ಯೋ॒ ಯದಾಹು॑ತೀ॒ರ್ನ ಜು॑ಹು॒ಯಾದ॑ದ್ಧ್ವ॒ರ್ಯು-ಞ್ಚ॒ ಯಜ॑ಮಾನ-ಞ್ಚ॒ ಪ್ರ ದ॑ಹೇಯು॒ರ್ಯದೇ॒ತಾ ಆಹು॑ತೀರ್ಜು॒ಹೋತಿ॑ ಭಾಗ॒ಧೇಯೇ॑ನೈ॒ವೈನಾ᳚ಞ್ಛಮಯತಿ॒ ನಾ-ಽಽರ್ತಿ॒ಮಾರ್ಚ್ಛ॑ತ್ಯದ್ಧ್ವ॒ರ್ಯುರ್ನ ಯಜ॑ಮಾನೋ॒ ವಾಮ್ಮ॑ ಆ॒ಸ-ನ್ನ॒ಸೋಃ ಪ್ರಾ॒ಣೋ᳚-ಽಖ್ಷ್ಯೋಶ್ಚಖ್ಷುಃ॒ ಕರ್ಣ॑ಯೋ॒-ಶ್ಶ್ರೋತ್ರ॑-ಮ್ಬಾಹು॒ವೋರ್ಬಲ॑-ಮೂರು॒ವೋರೋಜೋ-ಽರಿ॑ಷ್ಟಾ॒ ವಿಶ್ವಾ॒ನ್ಯಙ್ಗಾ॑ನಿ ತ॒ನೂ- [ತ॒ನೂಃ, ತ॒ನುವಾ॑ ಮೇ] 38
-ಸ್ತ॒ನುವಾ॑ ಮೇ ಸ॒ಹ ನಮ॑ಸ್ತೇ ಅಸ್ತು॒ ಮಾ ಮಾ॑ ಹಿಗ್ಂಸೀ॒ರಪ॒ ವಾ ಏ॒ತಸ್ಮಾ᳚-ತ್ಪ್ರಾ॒ಣಾಃ ಕ್ರಾ॑ಮನ್ತಿ॒ ಯೋ᳚-ಽಗ್ನಿ-ಞ್ಚಿ॒ನ್ವನ್ನ॑ಧಿ॒ ಕ್ರಾಮ॑ತಿ॒ ವಾಮ್ಮ॑ ಆ॒ಸ-ನ್ನ॒ಸೋಃ ಪ್ರಾ॒ಣ ಇತ್ಯಾ॑ಹ ಪ್ರಾ॒ಣಾನೇ॒ವಾ-ಽಽತ್ಮ-ನ್ಧ॑ತ್ತೇ॒ ಯೋ ರು॒ದ್ರೋ ಅ॒ಗ್ನೌ ಯೋ ಅ॒ಫ್ಸು ಯ ಓಷ॑ಧೀಷು॒ ಯೋ ರು॒ದ್ರೋ ವಿಶ್ವಾ॒ ಭುವ॑ನಾ-ಽಽವಿ॒ವೇಶ॒ ತಸ್ಮೈ॑ ರು॒ದ್ರಾಯ॒ ನಮೋ॑ ಅ॒ಸ್ತ್ವಾಹು॑ತಿಭಾಗಾ॒ ವಾ ಅ॒ನ್ಯೇ ರು॒ದ್ರಾ ಹ॒ವಿರ್ಭಾ॑ಗಾ [ರು॒ದ್ರಾ ಹ॒ವಿರ್ಭಾ॑ಗಾಃ, ಅ॒ನ್ಯೇ ಶ॑ತರು॒ದ್ರೀಯಗ್ಂ॑] 39
ಅ॒ನ್ಯೇ ಶ॑ತರು॒ದ್ರೀಯಗ್ಂ॑ ಹು॒ತ್ವಾ ಗಾ॑ವೀಧು॒ಕ-ಞ್ಚ॒ರುಮೇ॒ತೇನ॒ ಯಜು॑ಷಾ ಚರ॒ಮಾಯಾ॒ಮಿಷ್ಟ॑ಕಾಯಾ॒-ನ್ನಿ ದ॑ದ್ಧ್ಯಾ-ದ್ಭಾಗ॒ಧೇಯೇ॑ನೈ॒ವೈನಗ್ಂ॑ ಶಮಯತಿ॒ ತಸ್ಯ॒ ತ್ವೈ ಶ॑ತರು॒ದ್ರೀಯಗ್ಂ॑ ಹು॒ತಮಿತ್ಯಾ॑ಹು॒ರ್ಯಸ್ಯೈ॒ತದ॒ಗ್ನೌ ಕ್ರಿ॒ಯತ॒ ಇತಿ॒ ವಸ॑ವಸ್ತ್ವಾ ರು॒ದ್ರೈಃ ಪು॒ರಸ್ತಾ᳚-ತ್ಪಾನ್ತು ಪಿ॒ತರ॑ಸ್ತ್ವಾ ಯ॒ಮರಾ॑ಜಾನಃ ಪಿ॒ತೃಭಿ॑ರ್ದಖ್ಷಿಣ॒ತಃ ಪಾ᳚ನ್ತ್ವಾದಿ॒ತ್ಯಾಸ್ತ್ವಾ॒ ವಿಶ್ವೈ᳚ರ್ದೇ॒ವೈಃ ಪ॒ಶ್ಚಾ-ತ್ಪಾ᳚ನ್ತು ದ್ಯುತಾ॒ನಸ್ತ್ವಾ॑ ಮಾರು॒ತೋ ಮ॒ರುದ್ಭಿ॑ರುತ್ತರ॒ತಃ ಪಾ॑ತು [ ] 40
ದೇ॒ವಾಸ್ತ್ವೇನ್ದ್ರ॑ಜ್ಯೇಷ್ಠಾ॒ ವರು॑ಣರಾಜಾನೋ॒ ಽಧಸ್ತಾ᳚ಚ್ಚೋ॒-ಪರಿ॑ಷ್ಠಾಚ್ಚ ಪಾನ್ತು॒ ನ ವಾ ಏ॒ತೇನ॑ ಪೂ॒ತೋ ನ ಮೇದ್ಧ್ಯೋ॒ ನ ಪ್ರೋಖ್ಷಿ॑ತೋ॒ ಯದೇ॑ನ॒ಮತಃ॑ ಪ್ರಾ॒ಚೀನ॑-ಮ್ಪ್ರೋ॒ಖ್ಷತಿ॒ ಯ-ಥ್ಸಞ್ಚಿ॑ತ॒ಮಾಜ್ಯೇ॑ನ ಪ್ರೋ॒ಖ್ಷತಿ॒ ತೇನ॑ ಪೂ॒ತಸ್ತೇನ॒ ಮೇದ್ಧ್ಯ॒ಸ್ತೇನ॒ ಪ್ರೋಖ್ಷಿ॑ತಃ ॥ 41 ॥
(ದು॒ಧ್ರ – ಸ್ತ॒ನೂ – ರ್ಹ॒ವಿರ್ಭಾ॑ಗಾಃ – ಪಾತು॒ – ದ್ವಾತ್ರಿಗ್ಂ॑ಶಚ್ಚ) (ಅ. 9)
ಸ॒ಮೀಚೀ॒ ನಾಮಾ॑ಸಿ॒ ಪ್ರಾಚೀ॒ ದಿಕ್ತಸ್ಯಾ᳚ಸ್ತೇ॒ ಽಗ್ನಿರಧಿ॑ಪತಿ ರಸಿ॒ತೋ ರ॑ಖ್ಷಿ॒ತಾ ಯಶ್ಚಾಧಿ॑ಪತಿ॒ ರ್ಯಶ್ಚ॑ ಗೋ॒ಪ್ತಾ ತಾಭ್ಯಾ॒-ನ್ನಮ॒ಸ್ತೌನೋ॑ ಮೃಡಯತಾ॒-ನ್ತೇ ಯ-ನ್ದ್ವಿ॒ಷ್ಮೋ ಯಶ್ಚ॑ ನೋ॒ ದ್ವೇಷ್ಟಿ॒ ತಂ-ವಾಁ॒-ಞ್ಜಮ್ಭೇ॑ ದಧಾಮ್ಯೋಜ॒ಸ್ವಿನೀ॒ ನಾಮಾ॑ಸಿ ದಖ್ಷಿ॒ಣಾ ದಿ-ಕ್ತಸ್ಯಾ᳚ಸ್ತ॒ ಇನ್ದ್ರೋ-ಽಧಿ॑ಪತಿಃ॒ ಪೃದಾ॑ಕುಃ॒ ಪ್ರಾಚೀ॒ ನಾಮಾ॑ಸಿ ಪ್ರ॒ತೀಚೀ॒ ದಿ-ಕ್ತಸ್ಯಾ᳚ಸ್ತೇ॒ [ದಿ-ಕ್ತಸ್ಯಾ᳚ಸ್ತೇ, ಸೋಮೋ-ಽಧಿ॑ಪತಿ-] 42
ಸೋಮೋ-ಽಧಿ॑ಪತಿ-ಸ್ಸ್ವ॒ಜೋ॑ ಽವ॒ಸ್ಥಾವಾ॒ ನಾಮಾ॒-ಸ್ಯುದೀ॑ಚೀ॒ ದಿ-ಕ್ತಸ್ಯಾ᳚ಸ್ತೇ॒ ವರು॒ಣೋ-ಽಧಿ॑ಪತಿ-ಸ್ತಿ॒ರಶ್ಚ॑ ರಾಜಿ॒-ರಧಿ॑ಪತ್ನೀ॒ ನಾಮಾ॑ಸಿ ಬೃಹ॒ತೀ ದಿ-ಕ್ತಸ್ಯಾ᳚ಸ್ತೇ॒ ಬೃಹ॒ಸ್ಪತಿ॒-ರಧಿ॑ಪತಿ-ಶ್ಶ್ವಿ॒ತ್ರೋ ವ॒ಶಿನೀ॒ ನಾಮಾ॑ಸೀ॒ಯ-ನ್ದಿ-ಕ್ತಸ್ಯಾ᳚ಸ್ತೇ ಯ॒ಮೋ-ಽಧಿ॑ಪತಿಃ ಕ॒ಲ್ಮಾಷ॑ ಗ್ರೀವೋ ರಖ್ಷಿ॒ತಾ ಯಶ್ಚಾಧಿ॑ಪತಿ॒ ರ್ಯಶ್ಚ॑ ಗೋ॒ಪ್ತಾ ತಾಭ್ಯಾ॒-ನ್ನಮ॒ಸ್ತೌ ನೋ॑ ಮೃಡಯತಾ॒-ನ್ತೇ ಯ-ನ್ದ್ವಿ॒ಷ್ಮೋ ಯಶ್ಚ॑ [ ] 43
ನೋ॒ ದ್ವೇಷ್ಟಿ॒ ತಂ-ವಾಁ॒-ಞ್ಜಮ್ಭೇ॑ ದಧಾಮ್ಯೇ॒ತಾ ವೈ ದೇ॒ವತಾ॑ ಅ॒ಗ್ನಿ-ಞ್ಚಿ॒ತಗ್ಂ ರ॑ಖ್ಷನ್ತಿ॒ ತಾಭ್ಯೋ॒ ಯದಾಹು॑ತೀ॒ರ್ನ ಜು॑ಹು॒ಯಾ-ದ॑ದ್ಧ್ವ॒ರ್ಯು-ಞ್ಚ॒ ಯಜ॑ಮಾನ-ಞ್ಚ ಧ್ಯಾಯೇಯು॒ರ್ಯದೇ॒ತಾ ಆಹು॑ತೀರ್ಜು॒ಹೋತಿ॑ ಭಾಗ॒ಧೇಯೇ॑ನೈ॒ವೈನಾ᳚-ಞ್ಛಮಯತಿ॒ ನಾ-ಽಽರ್ತಿ॒-ಮಾರ್ಚ್ಛ॑ತ್ಯದ್ಧ್ವ॒ರ್ಯುರ್ನ ಯಜ॑ಮಾನೋ ಹೇ॒ತಯೋ॒ ನಾಮ॑ ಸ್ಥ॒ ತೇಷಾಂ᳚-ವಃ ಁಪು॒ರೋ ಗೃ॒ಹಾ ಅ॒ಗ್ನಿರ್ವ॒ ಇಷ॑ವ-ಸ್ಸಲಿ॒ಲೋ ನಿ॑ಲಿ॒ಪಾ-ನ್ನಾಮ॑ [ ] 44
ಸ್ಥ॒ ತೇಷಾಂ᳚-ವೋಁ ದಖ್ಷಿ॒ಣಾ ಗೃ॒ಹಾಃ ಪಿ॒ತರೋ॑ ವ॒ ಇಷ॑ವ॒-ಸ್ಸಗ॑ರೋ ವ॒ಜ್ರಿಣೋ॒ ನಾಮ॑ ಸ್ಥ॒ ತೇಷಾಂ᳚-ವಃ ಁಪ॒ಶ್ಚಾ-ದ್ಗೃ॒ಹಾ-ಸ್ಸ್ವಪ್ನೋ॑ ವ॒ ಇಷ॑ವೋ॒ ಗಹ್ವ॑ರೋ ಽವ॒ಸ್ಥಾವಾ॑ನೋ॒ ನಾಮ॑ ಸ್ಥ॒ ತೇಷಾಂ᳚-ವಁ ಉತ್ತ॒ರಾ-ದ್ಗೃ॒ಹಾ ಆಪೋ॑ ವ॒ ಇಷ॑ವ-ಸ್ಸಮು॒ದ್ರೋ-ಽಧಿ॑ಪತಯೋ॒ ನಾಮ॑ ಸ್ಥ॒ ತೇಷಾಂ᳚-ವಁ ಉ॒ಪರಿ॑ ಗೃ॒ಹಾ ವ॒ರ್॒ಷಂ-ವಁ॒ ಇಷ॒ವೋ-ಽವ॑ಸ್ವಾನ್ ಕ್ರ॒ವ್ಯಾ ನಾಮ॑ ಸ್ಥ॒ ಪಾರ್ಥಿ॑ವಾ॒-ಸ್ತೇಷಾಂ᳚-ವಁ ಇ॒ಹ ಗೃ॒ಹಾ [ಗೃ॒ಹಾಃ, ಅನ್ನಂ॑-ವಁ॒] 45
ಅನ್ನಂ॑-ವಁ॒ ಇಷ॑ವೋ ಽನಿಮಿ॒ಷೋ ವಾ॑ತನಾ॒ಮ-ನ್ತೇಭ್ಯೋ॑ ವೋ॒ ನಮ॒ಸ್ತೇ ನೋ॑ ಮೃಡಯತ॒ ತೇ ಯ-ನ್ದ್ವಿ॒ಷ್ಮೋ ಯಶ್ಚ॑ ನೋ॒ ದ್ವೇಷ್ಟಿ॒ ತಂ-ವೋಁ॒ ಜಮ್ಭೇ॑ ದಧಾಮಿ ಹು॒ತಾದೋ॒ ವಾ ಅ॒ನ್ಯೇ ದೇ॒ವಾ ಅ॑ಹು॒ತಾದೋ॒-ಽನ್ಯೇ ತಾನ॑ಗ್ನಿ॒ಚಿದೇ॒ವೋಭಯಾ᳚-ನ್ಪ್ರೀಣಾತಿ ದ॒ದ್ಧ್ನಾ ಮ॑ಧುಮಿ॒ಶ್ರೇಣೈ॒ತಾ ಆಹು॑ತೀರ್ಜುಹೋತಿ ಭಾಗ॒ಧೇಯೇ॑ನೈ॒ವೈನಾ᳚-ನ್ಪ್ರೀಣಾ॒ತ್ಯಥೋ॒ ಖಲ್ವಾ॑ಹು॒ರಿಷ್ಟ॑ಕಾ॒ ವೈ ದೇ॒ವಾ ಅ॑ಹು॒ತಾದ॒ ಇ- [ಅ॑ಹು॒ತಾದ॒ ಇತಿ॑, ಅ॒ನು॒ಪ॒ರಿ॒ಕ್ರಾಮ॑-] 46
-ತ್ಯ॑ನುಪರಿ॒ಕ್ರಾಮ॑-ಞ್ಜುಹೋ॒ತ್ಯಪ॑ರಿವರ್ಗಮೇ॒ವೈನಾ᳚-ನ್ಪ್ರೀಣಾತೀ॒ಮಗ್ಗ್ ಸ್ತನ॒ಮೂರ್ಜ॑ಸ್ವನ್ತ-ನ್ಧಯಾ॒ಪಾ-ಮ್ಪ್ರಪ್ಯಾ॑ತಮಗ್ನೇ ಸರಿ॒ರಸ್ಯ॒ ಮದ್ಧ್ಯೇ᳚ । ಉಥ್ಸ॑-ಞ್ಜುಷಸ್ವ॒ ಮಧು॑ಮನ್ತಮೂರ್ವ ಸಮು॒ದ್ರಿಯ॒ಗ್ಂ॒ ಸದ॑ನ॒ಮಾ ವಿ॑ಶಸ್ವ ॥ ಯೋ ವಾ ಅ॒ಗ್ನಿ-ಮ್ಪ್ರ॒ಯುಜ್ಯ॒ ನ ವಿ॑ಮು॒ಞ್ಚತಿ॒ ಯಥಾ-ಽಶ್ವೋ॑ ಯು॒ಕ್ತೋ-ಽವಿ॑ಮುಚ್ಯಮಾನಃ॒, ಖ್ಷುದ್ಧ್ಯ॑-ನ್ಪರಾ॒ಭವ॑ತ್ಯೇ॒ವಮ॑ಸ್ಯಾ॒ಗ್ನಿಃ ಪರಾ॑ ಭವತಿ॒ ತ-ಮ್ಪ॑ರಾ॒ಭವ॑ನ್ತಂ॒-ಯಁಜ॑ಮಾ॒ನೋ-ಽನು॒ ಪರಾ॑ ಭವತಿ॒ ಸೋ᳚-ಽಗ್ನಿ-ಞ್ಚಿ॒ತ್ವಾ ಲೂ॒ಖ್ಷೋ [ಲೂ॒ಖ್ಷಃ, ಭ॒ವ॒ತೀ॒ಮಗ್ಗ್ ಸ್ತನ॒] 47
ಭ॑ವತೀ॒ಮಗ್ಗ್ ಸ್ತನ॒-ಮೂರ್ಜ॑ಸ್ವನ್ತ-ನ್ಧಯಾ॒ಪಾಮಿತ್ಯಾಜ್ಯ॑ಸ್ಯ ಪೂ॒ರ್ಣಾಗ್ ಸ್ರುಚ॑-ಞ್ಜುಹೋತ್ಯೇ॒ಷ ವಾ ಅ॒ಗ್ನೇರ್ವಿ॑ಮೋ॒ಕೋ ವಿ॒ಮುಚ್ಯೈ॒ವಾಸ್ಮಾ॒ ಅನ್ನ॒ಮಪಿ॑ ದಧಾತಿ॒ ತಸ್ಮಾ॑ದಾಹು॒ರ್ಯಶ್ಚೈ॒ವಂ-ವೇಁದ॒ ಯಶ್ಚ॒ ನ ಸು॒ಧಾಯಗ್ಂ॑ ಹ॒ ವೈ ವಾ॒ಜೀ ಸುಹಿ॑ತೋ ದಧಾ॒ತೀತ್ಯ॒ಗ್ನಿರ್ವಾವ ವಾ॒ಜೀ ತಮೇ॒ವ ತ-ತ್ಪ್ರೀ॑ಣಾತಿ॒ ಸ ಏ॑ನ-ಮ್ಪ್ರೀ॒ತಃ ಪ್ರೀ॑ಣಾತಿ॒ ವಸೀ॑ಯಾ-ನ್ಭವತಿ ॥ 48 ॥
(ಪ್ರ॒ತೀಚೀ॒ ದಿಕ್ತಸ್ಯಾ᳚ಸ್ತೇ-ದ್ವಿ॒ಷ್ಮೋ ಯಶ್ಚ॑-ನಿಲಿ॒ಮ್ಪಾ ನಾ-ಮೇ॒ ಹ ಗೃ॒ಹಾ-ಇತಿ॑-ಲೂ॒ಖ್ಷೋ-ವಸೀ॑ಯಾ-ನ್ಭವತಿ) (ಅ. 10)
ಇನ್ದ್ರಾ॑ಯ॒ ರಾಜ್ಞೇ॑ ಸೂಕ॒ರೋ ವರು॑ಣಾಯ॒ ರಾಜ್ಞೇ॒ ಕೃಷ್ಣೋ॑ ಯ॒ಮಾಯ॒ ರಾಜ್ಞ॒ ಋಶ್ಯ॑ ಋಷ॒ಭಾಯ॒ ರಾಜ್ಞೇ॑ ಗವ॒ಯ-ಶ್ಶಾ᳚ರ್ದೂ॒ಲಾಯ॒ ರಾಜ್ಞೇ॑ ಗೌ॒ರಃ ಪು॑ರುಷರಾ॒ಜಾಯ॑ ಮ॒ರ್ಕಟಃ॑, ಖ್ಷಿಪ್ರಶ್ಯೇ॒ನಸ್ಯ॒ ವರ್ತಿ॑ಕಾ॒ ನೀಲ॑ಙ್ಗೋಃ॒ ಕ್ರಿಮಿ॒-ಸ್ಸೋಮ॑ಸ್ಯ॒ ರಾಜ್ಞಃ॑ ಕುಲು॒ಙ್ಗ-ಸ್ಸಿನ್ಧೋ᳚-ಶ್ಶಿಗ್ಂಶು॒ಮಾರೋ॑ ಹಿ॒ಮವ॑ತೋ ಹ॒ಸ್ತೀ ॥ 49
(ಇನ್ದ್ರಾ॑ಯ॒ ರಾಜ್ಞೇ॒-ಽಷ್ಟಾವಿಗ್ಂ॑ಶತಿಃ) (ಅ. 11)
ಮ॒ಯುಃ ಪ್ರಾ॑ಜಾಪ॒ತ್ಯ ಊ॒ಲೋ ಹಲೀ᳚ಖ್ಷ್ಣೋ ವೃಷದ॒ಗ್ಂ॒ಶಸ್ತೇ ಧಾ॒ತು-ಸ್ಸರ॑ಸ್ವತ್ಯೈ॒ ಶಾರಿ॑-ಶ್ಶ್ಯೇ॒ತಾ ಪು॑ರುಷ॒ವಾ-ಖ್ಸರ॑ಸ್ವತೇ॒ ಶುಕ॑-ಶ್ಶ್ಯೇ॒ತಃ ಪು॑ರುಷ॒ವಾಗಾ॑ರ॒ಣ್ಯೋ॑-ಽಜೋ ನ॑ಕು॒ಲ-ಶ್ಶಕಾ॒ ತೇ ಪೌ॒ಷ್ಣಾ ವಾ॒ಚೇ ಕ್ರೌ॒ಞ್ಚಃ ॥ 50 ॥
(ಮ॒ಯು – ಸ್ತ್ರಯೋ॑ವಿಗ್ಂಶತಿಃ) (ಅ. 12)
ಅ॒ಪಾ-ನ್ನಪ್ತ್ರೇ॑ ಜ॒ಷೋ ನಾ॒ಕ್ರೋ ಮಕ॑ರಃ ಕುಲೀ॒ಕಯ॒ಸ್ತೇ-ಽಕೂ॑ಪಾರಸ್ಯ ವಾ॒ಚೇ ಪೈ᳚ಙ್ಗರಾ॒ಜೋ ಭಗಾ॑ಯ ಕು॒ಷೀತ॑ಕ ಆ॒ತೀ ವಾ॑ಹ॒ಸೋ ದರ್ವಿ॑ದಾ॒ ತೇ ವಾ॑ಯ॒ವ್ಯಾ॑ ದಿ॒ಗ್ಭ್ಯಶ್ಚ॑ಕ್ರವಾ॒ಕಃ ॥ 51 ॥
(ಅ॒ಪಾ – ಮೇಕಾ॒ನ್ನವಿಗ್ಂ॑ಶ॒ತಿಃ) (ಅ. 13)
ಬಲಾ॑ಯಾಜಗ॒ರ ಆ॒ಖು-ಸ್ಸೃ॑ಜ॒ಯಾ ಶ॒ಯಣ್ಡ॑ಕ॒ಸ್ತೇ ಮೈ॒ತ್ರಾ ಮೃ॒ತ್ಯವೇ॑-ಽಸಿ॒ತೋ ಮ॒ನ್ಯವೇ᳚ ಸ್ವ॒ಜಃ ಕುಂ॑ಭೀ॒ನಸಃ॑ ಪುಷ್ಕರಸಾ॒ದೋ ಲೋ॑ಹಿತಾ॒ಹಿಸ್ತೇ ತ್ವಾ॒ಷ್ಟ್ರಾಃ ಪ್ರ॑ತಿ॒ಶ್ರುತ್ಕಾ॑ಯೈ ವಾಹ॒ಸಃ ॥ 52 ॥
(ಬಲಾ॑ಯಾ॒ – ಷ್ಟಾದ॑ಶ) (ಅ. 14)
ಪು॒ರು॒ಷ॒ಮೃ॒ಗಶ್ಚ॒ನ್ದ್ರಮ॑ಸೇ ಗೋ॒ಧಾ ಕಾಲ॑ಕಾ ದಾರ್ವಾಘಾ॒ಟಸ್ತೇ ವನ॒ಸ್ಪತೀ॑ನಾಮೇ॒ಣ್ಯಹ್ನೇ॒ ಕೃಷ್ಣೋ॒ ರಾತ್ರಿ॑ಯೈ ಪಿ॒ಕಃ, ಖ್ಷ್ವಿಙ್ಕಾ॒ ನೀಲ॑ಶೀರ್ಷ್ಣೀ॒ ತೇ᳚-ಽರ್ಯ॒ಮ್ಣೇ ಧಾ॒ತುಃ ಕ॑ತ್ಕ॒ಟಃ ॥ 53 ॥
(ಪು॒ರು॒ಷ॒ಮೃ॒ಗೋ᳚-ಽಷ್ಟಾದ॑ಶ) (ಅ. 15)
ಸೌ॒ರೀ ಬ॒ಲಾಕರ್ಶ್ಯೋ॑ ಮ॒ಯೂರ॑-ಶ್ಶ್ಯೇ॒ನಸ್ತೇ ಗ॑ನ್ಧ॒ರ್ವಾಣಾಂ॒-ವಁಸೂ॑ನಾ-ಙ್ಕ॒ಪಿಞ್ಜ॑ಲೋ ರು॒ದ್ರಾಣಾ᳚-ನ್ತಿತ್ತಿ॒ರೀ ರೋ॒ಹಿ-ತ್ಕು॑ಣ್ಡೃ॒ಣಾಚೀ॑ ಗೋ॒ಲತ್ತಿ॑ಕಾ॒ ತಾ ಅ॑ಫ್ಸ॒ರಸಾ॒-ಮರ॑ಣ್ಯಾಯ ಸೃಮ॒ರಃ ॥ 54 ॥
(ಸೌ॒-ರ್ಯ॑ಷ್ಟಾದ॑ಶ) (ಅ. 16)
ಪೃ॒ಷ॒ತೋ ವೈ᳚ಶ್ವದೇ॒ವಃ ಪಿ॒ತ್ವೋ ನ್ಯಙ್ಕುಃ॒ ಕಶ॒ಸ್ತೇ-ಽನು॑ಮತ್ಯಾ ಅನ್ಯವಾ॒ಪೋ᳚-ಽರ್ಧಮಾ॒ಸಾನಾ᳚-ಮ್ಮಾ॒ಸಾ-ಙ್ಕ॒ಶ್ಯಪಃ॒ ಕ್ವಯಿಃ॑ ಕು॒ಟರು॑ರ್ದಾತ್ಯೌ॒ಹಸ್ತೇ ಸಿ॑ನೀವಾ॒ಲ್ಯೈ ಬೃಹ॒ಸ್ಪತ॑ಯೇ ಶಿತ್ಪು॒ಟಃ ॥ 55 ॥
(ಪೃ॒ಷತಾ᳚- ಽಷ್ಟಾದ॑ಶ) (ಅ. 17)
ಶಕಾ॑ ಭೌ॒ಮೀ ಪಾ॒ನ್ತ್ರಃ ಕಶೋ॑ ಮಾನ್ಥೀ॒ಲವ॒ಸ್ತೇ ಪಿ॑ತೃ॒ಣಾ-ಮೃ॑ತೂ॒ನಾ-ಞ್ಜಹ॑ಕಾ ಸಂವಁಥ್ಸ॒ರಾಯ॒ ಲೋಪಾ॑ ಕ॒ಪೋತ॒ ಉಲೂ॑ಕ-ಶ್ಶ॒ಶಸ್ತೇ ನೈರ್॑ಋ॒ತಾಃ ಕೃ॑ಕ॒ವಾಕು॑-ಸ್ಸಾವಿ॒ತ್ರಃ ॥ 56 ॥
(ಶಕಾ॒ – ಽಷ್ಟಾದ॑ಶ ) (ಅ. 18)
ರುರೂ॑ ರೌ॒ದ್ರಃ ಕೃ॑ಕಲಾ॒ಸ-ಶ್ಶ॒ಕುನಿಃ॒ ಪಿಪ್ಪ॑ಕಾ॒ ತೇ ಶ॑ರ॒ವ್ಯಾ॑ಯೈ ಹರಿ॒ಣೋ ಮಾ॑ರು॒ತೋ ಬ್ರಹ್ಮ॑ಣೇ ಶಾ॒ರ್ಗಸ್ತ॒ರಖ್ಷುಃ॑ ಕೃ॒ಷ್ಣ-ಶ್ಶ್ವಾ ಚ॑ತುರ॒ಖ್ಷೋ ಗ॑ರ್ದ॒ಭಸ್ತ ಇ॑ತರಜ॒ನಾನಾ॑ಮ॒ಗ್ನಯೇ॒ ಧೂಙ್ಖ್ಷ್ಣಾ᳚ ॥ 57 ॥
(ರುರು॑ – ರ್ವಿಗ್ಂಶ॒ತಿಃ) (ಅ. 19)
ಅ॒ಲ॒ಜ ಆ᳚ನ್ತರಿ॒ಖ್ಷ ಉ॒ದ್ರೋ ಮ॒ದ್ಗುಃ ಪ್ಲ॒ವಸ್ತೇ॑-ಽಪಾಮದಿ॑ತ್ಯೈ ಹಗ್ಂಸ॒ಸಾಚಿ॑ರಿನ್ದ್ರಾ॒ಣ್ಯೈ ಕೀರ್ಶಾ॒ ಗೃದ್ಧ್ರ॑-ಶ್ಶಿತಿಕ॒ಖ್ಷೀ ವಾ᳚ರ್ಧ್ರಾಣ॒ಸಸ್ತೇ ದಿ॒ವ್ಯಾ ದ್ಯಾ॑ವಾಪೃಥಿ॒ವ್ಯಾ᳚ ಶ್ವಾ॒ವಿತ್ ॥ 58 ॥
(ಅ॒ಲ॒ಜೋ᳚ – ಽಷ್ಟಾದ॑ಶ ) (ಅ. 20)
ಸು॒ಪ॒ರ್ಣಃ ಪಾ᳚ರ್ಜ॒ನ್ಯೋ ಹ॒ಗ್ಂ॒ಸೋ ವೃಕೋ॑ ವೃಷದ॒ಗ್ಂ॒ಶಸ್ತ ಐ॒ನ್ದ್ರಾ ಅ॒ಪಾಮು॒ದ್ರೋ᳚ ಽರ್ಯ॒ಮ್ಣೇ ಲೋ॑ಪಾ॒ಶ-ಸ್ಸಿ॒ಗ್ಂ॒ಹೋ ನ॑ಕು॒ಲೋ ವ್ಯಾ॒ಘ್ರಸ್ತೇ ಮ॑ಹೇ॒ನ್ದ್ರಾಯ॒ ಕಾಮಾ॑ಯ॒ ಪರ॑ಸ್ವಾನ್ ॥ 59 ॥
(ಸು॒ಪ॒ಣೋ᳚ – ಽಷ್ಟಾದ॑ಶ) (ಅ. 21)
ಆ॒ಗ್ನೇ॒ಯಃ ಕೃ॒ಷ್ಣಗ್ರೀ॑ವ-ಸ್ಸಾರಸ್ವ॒ತೀ ಮೇ॒ಷೀ ಬ॒ಭ್ರು-ಸ್ಸೌ॒ಮ್ಯಃ ಪೌ॒ಷ್ಣ-ಶ್ಶ್ಯಾ॒ಮ-ಶ್ಶಿ॑ತಿಪೃ॒ಷ್ಠೋ ಬಾ॑ರ್ಹಸ್ಪ॒ತ್ಯ-ಶ್ಶಿ॒ಲ್ಪೋ ವೈ᳚ಶ್ವದೇ॒ವ ಐ॒ನ್ದ್ರೋ॑-ಽರು॒ಣೋ ಮಾ॑ರು॒ತಃ ಕ॒ಲ್ಮಾಷ॑ ಐನ್ದ್ರಾ॒ಗ್ನ-ಸ್ಸಗ್ಂ॑ಹಿ॒ತೋ॑ ಽಧೋರಾ॑ಮ-ಸ್ಸಾವಿ॒ತ್ರೋ ವಾ॑ರು॒ಣಃ ಪೇತ್ವಃ॑ ॥ 60 ॥
(ಆ॒ಗ್ನೇ॒ಯೋ – ದ್ವಾವಿಗ್ಂ॑ಶತಿಃ) (ಅ. 22)
ಅಶ್ವ॑ಸ್ತೂಪ॒ರೋ ಗೋ॑ಮೃ॒ಗಸ್ತೇ ಪ್ರಾ॑ಜಾಪ॒ತ್ಯಾ ಆ᳚ಗ್ನೇ॒ಯೌ ಕೃ॒ಷ್ಣಗ್ರೀ॑ವೌ ತ್ವಾ॒ಷ್ಟ್ರೌ ಲೋ॑ಮಶಸ॒ಕ್ಥೌ ಶಿ॑ತಿಪೃ॒ಷ್ಠೌ ಬಾ॑ರ್ಹಸ್ಪ॒ತ್ಯೌ ಧಾ॒ತ್ರೇ ಪೃ॑ಷೋದ॒ರ-ಸ್ಸೌ॒ರ್ಯೋ ಬ॒ಲಖ್ಷಃ॒ ಪೇತ್ವಃ॑ ॥ 61 ॥
(ಅಶ್ವಃ॒ – ಷೋಡ॑ಶ) (ಅ. 23)
ಅ॒ಗ್ನಯೇ-ಽನೀ॑ಕವತೇ॒ ರೋಹಿ॑ತಾಞ್ಜಿ-ರನ॒ಡ್ವಾ-ನ॒ಧೋರಾ॑ಮೌ ಸಾವಿ॒ತ್ರೌ ಪೌ॒ಷ್ಣೌ ರ॑ಜ॒ತನಾ॑ಭೀ ವೈಶ್ವದೇ॒ವೌ ಪಿ॒ಶಙ್ಗೌ॑ ತೂಪ॒ರೌ ಮಾ॑ರು॒ತಃ ಕ॒ಲ್ಮಾಷ॑ ಆಗ್ನೇ॒ಯಃ ಕೃ॒ಷ್ಣೋ॑-ಽಜ-ಸ್ಸಾ॑ರಸ್ವ॒ತೀ ಮೇ॒ಷೀ ವಾ॑ರು॒ಣಃ ಕೃ॒ಷ್ಣ ಏಕ॑ಶಿತಿಪಾ॒-ತ್ಪೇತ್ವಃ॑ ॥ 62 ॥
(ಅ॒ಗ್ನಯೇ॒ – ದ್ವಾವಿಗ್ಂ॑ಶತಿಃ) (ಅ. 24)
(ಯದೇಕೇ॑ನ – ಪ್ರ॒ಜಾಪ॑ತಿಃ ಪ್ರೇ॒ಣಾ-ಽನು॒ – ಯಜು॒ಷಾ – ಽಽಪೋ॑ – ವಿ॒ಶ್ವಕ॒ರ್ಮಾ – ಽಗ್ನ॒ ಆ ಯಾ॑ಹಿ – ಸುವ॒ರ್ಗಾಯ॒ ವಜ್ರೋ॑ – ಗಾಯ॒ತ್ರೇಣಾ – ಗ್ನ॑ ಉದಧೇ – ಸ॒ಮೀಚೀ – ನ್ದ್ರಾ॑ಯ – ಮ॒ಯು – ರ॒ಪಾಂ – ಬಲಾ॑ಯ – ಪುರುಷಮೃ॒ಗಃ – ಸೌ॒ರೀ – ಪೃ॑ಷ॒ತಃ – ಶಕಾ॒ – ರುರು॑ – ರಲ॒ಜಃ – ಸು॑ಪ॒ರ್ಣ – ಆ᳚ಗ್ನೇ॒ಯೋ – ಽಶ್ವೋ॒ – ಽಗ್ನಯೇ-ಽನೀ॑ಕವತೇ॒ – ಚತು॑ರ್ವಿಗ್ಂಶತಿಃ)
(ಯದೇಕೇ॑ನ॒ – ಸ ಪಾಪೀ॑ಯಾ – ನೇ॒ತದ್ವಾ ಅ॒ಗ್ನೇ – ರ್ಧನು॒ಸ್ತ-ದ್- ದೇ॒ವಾಸ್ತ್ವೇನ್ದ್ರ॑ಜ್ಯೇಷ್ಠಾ – ಅ॒ಪಾ-ನ್ನಪ್ತ್ರೇ – ಽಶ್ವ॑ಸ್ತೂಪ॒ರೋ – ದ್ವಿಷ॑ಷ್ಟಿಃ)
(ಯದೇಕೇ॒, ನೈಕ॑ಶಿತಿಪಾ॒-ತ್ಪೇತ್ವಃ॑)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪಞ್ಚಮಕಾಣ್ಡೇ ಪಞ್ಚಮಃ ಪ್ರಶ್ನ-ಸ್ಸಮಾಪ್ತಃ ॥