kṛṣṇa yajurvēdīya taittirīya saṃhitāyā-mpañchamakāṇḍē saptamaḥ praśnaḥ-upānuvākyāvaśiṣṭakarmanirūpaṇaṃ
ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥
yō vā aya̍thādēvatama̠gni-ñchi̍nu̠ta ā dē̠vatā̎bhyō vṛśchyatē̠ pāpī̍yā-nbhavati̠ yō ya̍thādēva̠ta-nna dē̠vatā̎bhya̠ ā vṛ̍śchyatē̠ vasī̍yā-nbhavatyāgnē̠yyā gā̍yatri̠yā pra̍tha̠mā-ñchiti̍ma̠bhi mṛ̍śē-ttri̠ṣṭubhā̎ dvi̠tīyā̠-ñjaga̍tyā tṛ̠tīyā̍manu̠ṣṭubhā̍ chatu̠rthī-mpa̠ṅktyā pa̍ñcha̠mīṃ ya̍thādēva̠tamē̠vāgni-ñchi̍nutē̠ na dē̠vatā̎bhya̠ ā vṛ̍śchyatē̠ vasī̍yā-nbhava̠tīḍā̍yai̠ vā ē̠ṣā vibha̍ktiḥ pa̠śava̠ iḍā̍ pa̠śubhi̍rēna- [pa̠śubhi̍rēnam, chi̠nu̠tē̠ yō vai] 1
-ñchinutē̠ yō vai pra̠jāpa̍tayē prati̠ prōchyā̠gni-ñchi̠nōti̠ nā-”rti̠mārchCha̠-tyaśvā̍va̠bhita̍stiṣṭhētā-ṅkṛ̠ṣṇa u̍ttara̠ta-śśvē̠tō dakṣi̍ṇa̠stāvā̠labhyēṣṭa̍kā̠ upa̍ daddhyādē̠tadvai pra̠jāpa̍tē rū̠pa-mprā̍jāpa̠tyō-‘śva̍-ssā̠kṣādē̠va pra̠jāpa̍tayē prati̠prōchyā̠gni-ñchi̍nōti̠ nā-”rti̠mārchCha̍tyē̠tadvā ahnō̍ rū̠paṃ yachChvē̠tō-‘śvō̠ rātri̍yai kṛ̠ṣṇa ē̠tadahnō̍ [ē̠tadahna̍ḥ, rū̠paṃ yadiṣṭa̍kā̠] 2
rū̠paṃ yadiṣṭa̍kā̠ rātri̍yai̠ purī̍ṣa̠miṣṭa̍kā upadhā̠syañChvē̠ta-maśva̍ma̠bhi mṛ̍śē̠-tpurī̍ṣamupadhā̠syan kṛ̠ṣṇama̍hōrā̠trābhyā̍mē̠vaina̍-ñchinutē hiraṇya pā̠tra-mmadhō̎ḥ pū̠rṇa-nda̍dāti madha̠vyō̍ ‘sā̠nīti̍ sau̠ryā chi̠trava̠tyā-‘vē̎kṣatē chi̠tramē̠va bha̍vati ma̠ddhyandi̠nē-‘śva̠mava̍ ghrāpayatya̠sau vā ā̍di̠tya indra̍ ē̠ṣa pra̠jāpa̍tiḥ prājāpa̠tyō-‘śva̠stamē̠va sā̠kṣādṛ̍ddhnōti ॥ 3 ॥
(ē̠na̠ – mē̠tadahnō̠ – ‘ṣṭācha̍tvārigṃśachcha) (a. 1)
tvāma̍gnē vṛṣa̠bha-ñchēki̍tāna̠-mpuna̠ryuvā̍na-ñja̠naya̍nnu̠pāgā̎m । a̠sthū̠ri ṇō̠ gārha̍patyāni santu ti̠gmēna̍ nō̠ brahma̍ṇā̠ sagṃ śi̍śādhi ॥ pa̠śavō̠ vā ē̠tē yadiṣṭa̍kā̠śchityā̎-ñchityāmṛṣa̠bhamupa̍ dadhāti mithu̠namē̠vāsya̠ ta-dya̠jñē ka̍rōti pra̠jana̍nāya̠ tasmā̎-dyū̠thēyū̍tha ṛṣa̠bhaḥ ॥ sa̠ṃva̠thsa̠rasya̍ prati̠māṃ yā-ntvā̍ rātryu̠pāsa̍tē । pra̠jāgṃ su̠vīrā̎-ṅkṛ̠tvā viśva̠māyu̠rvya̍śñavat ॥ prā̠jā̠pa̠tyā- [prā̠jā̠pa̠tyām, ē̠tāmupa̍] 4
-mē̠tāmupa̍ dadhātī̠yaṃ vā vaiṣaikā̎ṣṭa̠kā yadē̠vaikā̎ṣṭa̠kāyā̠manna̍-ṅkri̠yatē̠ tadē̠vaitayāva̍ rundha ē̠ṣā vai pra̠jāpa̍tēḥ kāma̠dughā̠ tayai̠va yaja̍mānō̠-‘muṣmi̍-~ṃllō̠kē̎-‘gni-ndu̍hē̠ yēna̍ dē̠vā jyōti̍ṣō̠rdhvā u̠dāya̠n̠ yēnā̍-”di̠tyā vasa̍vō̠ yēna̍ ru̠drāḥ । yēnāṅgi̍rasō mahi̠māna̍-māna̠śustēnai̍tu̠ yaja̍māna-ssva̠sti ॥ su̠va̠rgāya̠ vā ē̠ṣa lō̠kāya̍ [lō̠kāya̍, chī̠ya̠tē̠ yada̠gniryēna̍] 5
chīyatē̠ yada̠gniryēna̍ dē̠vā jyōti̍ṣō̠rdhvā u̠dāya̠nnityukhya̠gṃ̠ sami̍ndha̠ iṣṭa̍kā ē̠vaitā upa̍ dhattē vānaspa̠tyā-ssu̍va̠rgasya̍ lō̠kasya̠ sama̍ṣṭyai śa̠tāyu̍dhāya śa̠tavī̎ryāya śa̠tōta̍yē ‘bhimāti̠ṣāhē̎ । śa̠taṃ yō na̍-śśa̠radō̠ ajī̍tā̠nindrō̍ nēṣa̠dati̍ duri̠tāni̠ viśvā̎ ॥ yē cha̠tvāra̍ḥ pa̠thayō̍ dēva̠yānā̍ anta̠rā dyāvā̍pṛthi̠vī vi̠yanti̍ । tēṣā̠ṃ yō ajyā̍ni̠- majī̍ti-mā̠vahā̠-ttasmai̍ nō dēvā̠ḥ [nō dēvāḥ, pari̍ dattē̠ha sarvē̎ ।] 6
pari̍ dattē̠ha sarvē̎ ॥ grī̠ṣmō hē̍ma̠nta u̠ta nō̍ vasa̠nta-śśa̠ra-dva̠r̠ṣā-ssu̍vi̠tannō̍ astu । tēṣā̍mṛtū̠nāgṃ śa̠ta śā̍radānā-nnivā̠ta ē̍ṣā̠mabha̍yē syāma ॥ i̠du̠va̠thsa̠rāya̍ parivathsa̠rāya̍ saṃvañthsa̠rāya̍ kṛṇutā bṛ̠hannama̍ḥ । tēṣā̎ṃ va̠yagṃ su̍ma̠tau ya̠jñiyā̍nā̠-ñjyōgajī̍tā̠ aha̍tā-ssyāma ॥ bha̠drānna̠-śśrēya̠-ssama̍naiṣṭa dēvā̠stvayā̍-‘va̠sēna̠ sama̍śīmahi tvā । sa nō̍ mayō̠ bhūḥ pi̍tō̠ [mayō̠ bhūḥ pi̍tō, ā vi̍śasva̠] 7
ā vi̍śasva̠ śa-ntō̠kāya̍ ta̠nuvē̎ syō̠naḥ ॥ ajyā̍nīrē̠tā upa̍ dadhātyē̠tā vai dē̠vatā̠ apa̍rājitā̠stā ē̠va pra vi̍śati̠ naiva jī̍yatē brahmavā̠dinō̍ vadanti̠ yada̍rdhamā̠sā māsā̍ ṛ̠tava̍-ssaṃvathsa̠ra ōṣa̍dhī̠ḥ pacha̠ntyatha̠ kasmā̍da̠nyābhyō̍ dē̠vatā̎bhya āgraya̠ṇa-nniru̍pyata̠ ityē̠tā hi ta-ddē̠vatā̍ u̠daja̍ya̠n̠ yadṛ̠tubhyō̍ ni̠rvapē̎-ddē̠vatā̎bhya-ssa̠mada̍-ndaddhyādāgraya̠ṇa-nni̠rupyai̠tā āhu̍tī rjuhōtyardhamā̠sānē̠va māsā̍nṛ̠tūn-thsa̍ṃvathsa̠ra-mprī̍ṇāti̠ na dē̠vatā̎bhya-ssa̠mada̍-ndadhāti bha̠drānna̠-śśrēya̠-ssama̍naiṣṭa dēvā̠ ityā̍ha hu̠tādyā̍ya̠ yaja̍māna̠syā-‘pa̍rābhāvāya ॥ 8 ॥
(pra̠jā̠pa̠tyāṃ – ~ṃlō̠kāya̍ – dēvāḥ – pitō – dadhyādāgraya̠ṇaṃ – pañcha̍vigṃśatiścha) (a. 2)
indra̍sya̠ vajrō̍-‘si̠ vārtra̍ghnastanū̠pā na̍ḥ pratispa̠śaḥ । yō na̍ḥ pu̠rastā̎-ddakṣiṇa̠taḥ pa̠śchā-du̍ttara̠tō̍-‘ghā̠yura̍bhi̠dāsa̍tyē̠tagṃ sō-‘śmā̍namṛchChatu ॥ dē̠vā̠su̠rā-ssaṃya̍ttā āsa̠-ntē-‘su̍rā di̠gbhya ā-‘bā̍dhanta̠ tā-ndē̠vā iṣvā̍ cha̠ vajrē̍ṇa̠ chāpā̍nudanta̠ ya-dva̠jriṇī̍rupa̠dadhā̠tīṣvā̍ chai̠va ta-dvajrē̍ṇa cha̠ yaja̍mānō̠ bhrātṛ̍vyā̠napa̍ nudatē di̠kṣūpa̍ [di̠kṣūpa̍, da̠dhā̠ti̠ dē̠va̠pu̠rā] 9
dadhāti dēvapu̠rā ē̠vaitāsta̍nū̠pānī̠ḥ paryū̍ha̠tē ‘gnā̍viṣṇū sa̠jōṣa̍sē̠mā va̍rdhantu vā̠giṃra̍ḥ । dyu̠mnairvājē̍bhi̠rā ga̍tam ॥ bra̠hma̠vā̠dinō̍ vadanti̠ yanna dē̠vatā̍yai̠ juhva̠tyatha̍ ki-ndēva̠tyā̍ vasō̠rdhārētya̠gni-rvasu̠stasyai̠ṣā dhārā̠ viṣṇu̠-rvasu̠stasyai̠ṣā dhārā̎ ”gnāvaiṣṇa̠vyarchā vasō̠rdhārā̎-ñjuhōti bhāga̠dhēyē̍nai̠vainau̠ sama̍rdhaya̠tyathō̍ ē̠tā- [ē̠tām, ē̠vā-”hu̍ti-] 10
-mē̠vā-”hu̍ti-mā̠yata̍navatī-ṅkarōti̠ yatkā̍ma ēnā-ñju̠hōti̠ tadē̠vāva̍ rundhē ru̠drō vā ē̠ṣa yada̠gnistasyai̠tē ta̠nuvau̍ ghō̠rā-‘nyā śi̠vā-‘nyā yachCha̍taru̠drīya̍-ñju̠hōti̠ yaivāsya̍ ghō̠rā ta̠nūstā-ntēna̍ śamayati̠ ya-dvasō̠rdhārā̎-ñju̠hōti̠ yaivāsya̍ śi̠vā ta̠nūstā-ntēna̍ prīṇāti̠ yō vai vasō̠rdhārā̍yai [vasō̠rdhārā̍yai, pra̠ti̠ṣṭhāṃ vēda̠] 11
prati̠ṣṭhāṃ vēda̠ pratyē̠va ti̍ṣṭhati̠ yadājya̍mu̠chChiṣyē̍ta̠ tasmi̍-nbrahmauda̠na-mpa̍chē̠-tta-mbrā̎hma̠ṇāścha̠tvāra̠ḥ prā-‘śñī̍yurē̠ṣa vā a̠gnirvai̎śvāna̠rō yadbrā̎hma̠ṇa ē̠ṣā khalu̠ vā a̠gnēḥ pri̠yā ta̠nūrya-dvai̎śvāna̠raḥ pri̠yāyā̍mē̠vainā̎-nta̠nuvā̠-mprati̍ ṣṭhāpayati̠ chata̍srō dhē̠nūrda̍dyā̠-ttābhi̍rē̠va yaja̍mānō̠-‘muṣmi̍-~ṃllō̠kē̎-‘gni-ndu̍hē ॥ 12 ॥
(upai̠ – tāṃ – dhārā̍yai̠ – ṣaṭcha̍tvārigṃśachcha) (a. 3)
chitti̍-ñjuhōmi̠ mana̍sā ghṛ̠tēnētyā̠hādā̎bhyā̠ vai nāmai̠ṣā-”hu̍tirvaiśvakarma̠ṇī naina̍-ñchikyā̠na-mbhrātṛ̍vyō dabhnō̠tyathō̍ dē̠vatā̍ ē̠vāva̍ ru̠ndhē ‘gnē̠ tama̠dyēti̍ pa̠ṅktyā ju̍hōti pa̠ṅktyā-”hu̍tyā yajñamu̠khamā ra̍bhatē sa̠pta tē̍ agnē sa̠midha̍-ssa̠ptaji̠hvā ityā̍ha̠ hōtrā̍ ē̠vāva̍ rundhē̠ ‘gnirdē̠vēbhyō-‘pā̎krā-‘ma-dbhāga̠dhēya̍- [-‘pā̎krā-‘ma-dbhāga̠dhēya̎m, i̠chChamā̍na̠stasmā̍] 13
-mi̠chChamā̍na̠stasmā̍ ē̠ta-dbhā̍ga̠dhēya̠-mprāya̍chChannē̠tadvā a̠gnēra̍gnihō̠tramē̠tarhi̠ khalu̠ vā ē̠ṣa jā̠tō yarhi̠ sarva̍śchi̠tō jā̠tāyai̠vāsmā̠ anna̠mapi̍ dadhāti̠ sa ē̍na-mprī̠taḥ prī̍ṇāti̠ vasī̍yā-nbhavati brahmavā̠dinō̍ vadanti̠ yadē̠ṣa gārha̍patyaśchī̠yatē-‘tha̠ kvā̎syā-”hava̠nīya̠ itya̠sāvā̍di̠tya iti̍ brūyādē̠tasmi̠n̠.hi sarvā̎bhyō dē̠vatā̎bhyō̠ juhva̍ti̠ [juhva̍ti, ya ē̠vaṃ vi̠dvāna̠gni-] 14
ya ē̠vaṃ vi̠dvāna̠gni-ñchi̍nu̠tē sā̠kṣādē̠va dē̠vatā̍ ṛddhnō̠tyagnē̍ yaśasvi̠n̠ yaśa̍sē̠ mama̍rpa̠yēndrā̍vatī̠ mapa̍chitī mi̠hā-”va̍ha । a̠ya-mmū̠rdhā pa̍ramē̠ṣṭhī su̠varchā̎-ssamā̠nānā̍mutta̠ma ślō̍kō astu ॥ bha̠dra-mpaśya̍nta̠ upa̍ sēdu̠ragrē̠ tapō̍ dī̠kṣāmṛṣa̍ya-ssuva̠rvida̍ḥ । tata̍ḥ, kṣa̠tra-mbala̠mōja̍ścha jā̠ta-ntada̠smai dē̠vā a̠bhi sa-nna̍mantu ॥ dhā̠tā vi̍dhā̠tā pa̍ra̠mō- [pa̍ra̠mā, u̠ta sa̠ndṛ-kpra̠jāpa̍tiḥ] 15
-ta sa̠ndṛ-kpra̠jāpa̍tiḥ paramē̠ṣṭhī vi̠rājā̎ । stōmā̠-śChandāgṃ̍si ni̠vidō̍ ma āhurē̠tasmai̍ rā̠ṣṭrama̠bhi sa-nna̍māma ॥ a̠bhyāva̍rtaddhva̠mupa̠ mēta̍ sā̠kama̠yagṃ śā̠stā-‘dhi̍patirvō astu । a̠sya vi̠jñāna̠manu̠ sagṃ ra̍bhaddhvami̠ma-mpa̠śchādanu̍ jīvātha̠ sarvē̎ ॥ rā̠ṣṭra̠bhṛta̍ ē̠tā upa̍ dadhātyē̠ṣā vā a̠gnēśchitī̍ rāṣṭra̠bhṛ-ttayai̠vāsmi̍-nrā̠ṣṭra-nda̍dhāti rā̠ṣṭramē̠va bha̍vati̠ nāsmā̎-drā̠ṣṭra-mbhragṃ̍śatē ॥ 16 ॥
(bhā̠ga̠dhēya̠ṃ – juhva̍ti – para̠mā – rā̠ṣṭra-nda̍dhāti – sa̠pta cha̍) (a. 4)
yathā̠ vai pu̠trō jā̠tō mri̠yata̍ ē̠vaṃ vā ē̠ṣa mri̍yatē̠ yasyā̠gnirukhya̍ u̠dvāya̍ti̠ yanni̍rma̠nthya̍-ṅku̠ryā-dvichChi̍ndyā̠-dbhrātṛ̍vyamasmai janayē̠-thsa ē̠va puna̍ḥ pa̠rīddhya̠-ssvādē̠vaina̠ṃ yōnē̎rjanayati̠ nāsmai̠ bhrātṛ̍vya-ñjanayati̠ tamō̠ vā ē̠ta-ṅgṛ̍hṇāti̠ yasyā̠gnirukhya̍ u̠dvāya̍ti mṛ̠tyustama̍ḥ kṛ̠ṣṇaṃ vāsa̍ḥ kṛ̠ṣṇā dhē̠nurdakṣi̍ṇā̠ tama̍sai̠- [tama̍sā, ē̠va tamō̍] 17
-va tamō̍ mṛ̠tyumapa̍ hatē̠ hira̍ṇya-ndadāti̠ jyōti̠rvai hira̍ṇya̠-ñjyōti̍ṣai̠va tamō-‘pa̍ ha̠tē-‘thō̠ tējō̠ vai hira̍ṇya̠-ntēja̍ ē̠vā-”tma-ndha̍ttē̠ suva̠rna gha̠rma-ssvāhā̠ suva̠rnā-‘rka-ssvāhā̠ suva̠rna śu̠kra-ssvāhā̠ suva̠rna jyōti̠-ssvāhā̠ suva̠rna sūrya̠-ssvāhā̠ ‘rkō vā ē̠ṣa yada̠gni-ra̠sā-vā̍di̠tyō̎- [yada̠gni-ra̠sā-vā̍di̠tyaḥ, ā̠śva̠mē̠dhō yadē̠tā] 18
-‘śvamē̠dhō yadē̠tā āhu̍tī rju̠hōtya̍rkā-śvamē̠dhayō̍rē̠va jyōtīgṃ̍ṣi̠ sa-nda̍dhātyē̠ṣa ha̠ tvā a̍rkāśvamē̠dhī yasyai̠tada̠gnau kri̠yata̠ āpō̠ vā i̠damagrē̍ sali̠lamā̍sī̠-thsa ē̠tā-mpra̠jāpa̍tiḥ pratha̠mā-ñchiti̍mapaśya̠-ttāmupā̍dhatta̠ tadi̠yama̍bhava̠-ttaṃ vi̠śvaka̍rmā-‘bravī̠dupa̠ tvā-”yā̠nīti̠ nēha lō̠kō̎-‘stītya̍- [lō̠kō̎-‘stīti̍, a̠bra̠vī̠-thsa] 19
-tyabravī̠-thsa ē̠tā-ndvi̠tīyā̠-ñchiti̍mapaśya̠-ttāmupā̍dhatta̠ tada̠ntari̍kṣamabhava̠-thsa ya̠jñaḥ pra̠jāpa̍timabravī̠dupa̠ tvā-”yā̠nīti̠ nēha lō̠kō̎-‘stītya̍bravī̠-thsa vi̠śvaka̍rmāṇa-mabravī̠dupa̠ tvā-”yā̠nīti̠ kēna̍ mō̠paiṣya̠sīti̠ diśyā̍bhi̠ritya̍bravī̠-tta-ndiśyā̍bhiru̠pai-ttā upā̍dhatta̠ tā diśō̍- [tā diśa̍ḥ, a̠bha̠va̠n-thsa] 20
-‘bhava̠n-thsa pa̍ramē̠ṣṭhī pra̠jāpa̍timabravī̠dupa̠ tvā-”yā̠nīti̠ nēha lō̠kō̎-‘stītya̍bravī̠-thsa vi̠śvaka̍rmāṇa-ñcha ya̠jña-ñchā̎bravī̠dupa̍ vā̠mā ‘yā̠nīti̠ nēha lō̠kō̎-‘stītya̍brūtā̠gṃ̠ sa ē̠tā-ntṛ̠tīyā̠-ñchiti̍mapaśya̠-ttāmupā̍dhatta̠ tada̠sāva̍bhava̠-thsa ā̍di̠tyaḥ pra̠jāpa̍ti-mabravī̠dupa̠ tvā- [-mabravī̠dupa̠ tvā, āyā̠nīti̠] 21
-”yā̠nīti̠ nēha lō̠kō̎-‘stītya̍bravī̠-thsa vi̠śvaka̍rmāṇa-ñcha ya̠jña-ñchā̎bravī̠dupa̍ vā̠mā-‘yā̠nīti̠ nēha lō̠kō̎-‘stītya̍brūtā̠gṃ̠ sa pa̍ramē̠ṣṭhina̍mabravī̠dupa̠ tvā-”yā̠nīti̠ kēna̍ mō̠paiṣya̠sīti̍ lōka-mpṛ̠ṇayētya̍bravī̠-ttaṃ lō̍ka-mpṛ̠ṇayō̠pai-ttasmā̠dayā̍tayāmnī lōka-mpṛ̠ṇā-‘yā̍tayāmā̠ hya̍sā- [hya̍sau, ā̠di̠tyastānṛṣa̍yō] 22
-vā̍di̠tyastānṛṣa̍yō ‘bruva̠nnupa̍ va̠ ā-‘yā̠mēti̠ kēna̍ na u̠paiṣya̠thēti̍ bhū̠mnētya̍bruva̠-ntā-ndvābhyā̠-ñchitī̎bhyāmu̠pāya̠n-thsa pañcha̍chitīka̠-ssama̍padyata̠ ya ē̠vaṃ vi̠dvāna̠gni-ñchi̍nu̠tē bhūyā̍nē̠va bha̍vatya̠bhīmā-~ṃllō̠kāñja̍yati vi̠durē̍na-ndē̠vā athō̍ ē̠tāsā̍mē̠va dē̠vatā̍nā̠gṃ̠ sāyu̍jya-ṅgachChati ॥ 23 ॥
(tama̍sā – ”di̠tyō̎ – ‘stīti̠ – diśa̍ – ādi̠tyaḥ pra̠jāpa̍timabravī̠dupa̍ tvā̠ – ‘sau – pañcha̍chatvārigṃśachcha) (a. 5)
vayō̠ vā a̠gniryada̍gni̠chi-tpa̠kṣiṇō̎-‘śñī̠yā-ttamē̠vāgnima̍dyā̠dā-rti̠mārchChē̎-thsaṃvathsa̠raṃ vra̠ta-ñcha̍rē-thsaṃvathsa̠ragṃ hi vra̠ta-nnāti̍ pa̠śurvā ē̠ṣa yada̠gnirhi̠nasti̠ khalu̠ vai ta-mpa̠śurya ē̍na-mpu̠rastā̎-tpra̠tyañcha̍mupa̠chara̍ti̠ tasmā̎-tpa̠śchā-tprāṃu̍pa̠charya̍ ā̠tmanō-‘higṃ̍sāyai̠ tējō̍-‘si̠ tējō̍ mē yachCha pṛthi̠vīṃ ya̍chCha [pṛthi̠vīṃ ya̍chCha, pṛ̠thi̠vyai mā̍ pāhi̠] 24
pṛthi̠vyai mā̍ pāhi̠ jyōti̍rasi̠ jyōti̍rmē yachChā̠ntari̍kṣaṃ yachChā̠ntari̍kṣānmā pāhi̠ suva̍rasi̠ suva̍rmē yachCha̠ diva̍ṃ yachCha di̠vō mā̍ pā̠hītyā̍hai̠tābhi̠rvā i̠mē lō̠kā vidhṛ̍tā̠ yadē̠tā u̍pa̠dadhā̎tyē̠ṣāṃ lō̠kānā̠ṃ vidhṛ̍tyai svayamātṛ̠ṇṇā u̍pa̠dhāya̍ hiraṇyēṣṭa̠kā upa̍dadhātī̠mē vai lō̠kā-ssva̍yamātṛ̠ṇṇā jyōti̠r̠hira̍ṇya̠ṃ ya-thsva̍yamātṛ̠ṇṇā u̍pa̠dhāya̍ [u̍pa̠dhāya̍, hi̠ra̠ṇyē̠ṣṭa̠kā u̍pa̠dadhā̍tī̠-] 25
hiraṇyēṣṭa̠kā u̍pa̠dadhā̍tī̠mā-nē̠vaitābhi̍-rlō̠kā-ñjyōti̍ṣmataḥ kuru̠tē-‘thō̍ ē̠tābhi̍rē̠vāsmā̍ i̠mē lō̠kāḥ pra bhā̎mti̠ yāstē̍ agnē̠ sūryē̠ rucha̍ udya̠tō diva̍māta̠nvanti̍ ra̠śmibhi̍ḥ । tābhi̠-ssarvā̍bhī ru̠chē janā̍ya naskṛdhi ॥ yā vō̍ dēvā̠-ssūryē̠ ruchō̠ gōṣvaśvē̍ṣu̠ yā rucha̍ḥ । indrā̎gnī̠ tābhi̠-ssarvā̍bhī̠ rucha̍-nnō dhatta bṛhaspatē ॥ rucha̍nnō dhēhi [dhēhi, brā̠hma̠ṇēṣu̠ rucha̠gṃ̠] 26
brāhma̠ṇēṣu̠ rucha̠gṃ̠ rāja̍su naskṛdhi । rucha̍ṃ vi̠śyē̍ṣu śū̠drēṣu̠ mayi̍ dhēhi ru̠chā rucha̎m ॥ dvē̠dhā vā a̠gni-ñchi̍kyā̠nasya̠ yaśa̍ indri̠ya-ṅga̍chChatya̠gniṃ vā̍ chi̠tamī̍jā̠naṃ vā̠ yadē̠tā āhu̍tīrju̠hōtyā̠tmannē̠va yaśa̍ indri̠ya-ndha̍tta īśva̠rō vā ē̠ṣa ārti̠mārtō̠ryō̎-‘gni-ñchi̠nvanna̍dhi̠ krāma̍ti̠ tattvā̍ yāmi̠ brahma̍ṇā̠ vanda̍māna̠ iti̍ vāru̠ṇyarchā [iti̍ vāru̠ṇyarchā, ju̠hu̠yā̠chChānti̍-] 27
ju̍huyā̠chChānti̍-rē̠vaiṣā ‘gnērgupti̍rā̠tmanō̍ ha̠viṣkṛ̍tō̠ vā ē̠ṣa yō̎-‘gni-ñchi̍nu̠tē yathā̠ vai ha̠vi-sskanda̍tyē̠vaṃ vā ē̠ṣa ska̍ndati̠ yō̎-‘gni-ñchi̠tvā striya̍mu̠paiti̍ maitrāvaru̠ṇyā-”mikṣa̍yā yajēta maitrāvaru̠ṇatā̍-mē̠vōpai̎tyā̠tmanō ‘ska̍ndāya̠ yō vā a̠gnimṛ̍tu̠sthāṃ vēda̠rtur-ṛ̍turasmai̠ kalpa̍māna ēti̠ pratyē̠va ti̍ṣṭhati saṃvathsa̠rō vā a̠gnir- [vā a̠gniḥ, ṛ̠tu̠sthā-stasya̍] 28
-ṛ̍tu̠sthā-stasya̍ vasa̠nta-śśirō̎ grī̠ṣmō dakṣi̍ṇaḥ pa̠kṣō va̠r̠ṣāḥ puchChagṃ̍ śa̠radutta̍raḥ pa̠kṣō hē̍ma̠ntō maddhya̍-mpūrvapa̠kṣā-śchita̍yō-‘parapa̠kṣāḥ purī̍ṣa-mahōrā̠trāṇīṣṭa̍kā ē̠ṣa vā a̠gnir-ṛ̍tu̠sthā ya ē̠vaṃ vēda̠rtur-ṛ̍turasmai̠ kalpa̍māna ēti̠ pratyē̠va ti̍ṣṭhati pra̠jāpa̍ti̠rvā ē̠ta-ñjyaiṣṭhya̍kāmō̠ nya̍dhatta̠ tatō̠ vai sa jyaiṣṭhya̍magachCha̠dya ē̠vaṃ vi̠dvāna̠gni-ñchi̍nu̠tē jyaiṣṭhya̍mē̠va ga̍chChati ॥ 29 ॥
(pṛ̠thi̠vīṃ ya̍chCha̠ – ya-thsva̍yamātṛ̠ṇṇā u̍pa̠dhāya̍ – dhēhyṛ̠ – chā – gni – śchi̍nu̠tē – trīṇi̍ cha) (a. 6)
yadākū̍tā-thsa̠masu̍srōddhṛ̠dō vā̠ mana̍sō vā̠ sambhṛ̍ta̠-ñchakṣu̍ṣō vā । tamanu̠ prēhi̍ sukṛ̠tasya̍ lō̠kaṃ yatrarṣa̍yaḥ prathama̠jā yē pu̍rā̠ṇāḥ ॥ ē̠tagṃ sa̍dhastha̠ pari̍ tē dadāmi̠ yamā̠vahā̎chChēva̠dhi-ñjā̠tavē̍dāḥ । a̠nvā̠ga̠ntā ya̠jñapa̍tirvō̠ atra̠ tagg sma̍ jānīta para̠mē vyō̍mann ॥ jā̠nī̠tādē̍na-mpara̠mē vyō̍ma̠-ndēvā̎-ssadhasthā vi̠da rū̠pama̍sya । yadā̠gachChā̎- [yadā̠gachChā̎t, pa̠thibhi̍-rdēva̠yānai̍] 30
-tpa̠thibhi̍-rdēva̠yānai̍-riṣṭāpū̠rtē kṛ̍ṇutā-dā̠vi-ra̍smai ॥ sa-mpra chya̍vaddhva̠-manu̠ sa-mpra yā̠tāgnē̍ pa̠thō dē̍va̠yānā̎n kṛṇuddhvam । a̠smin-thsa̠dhasthē̠ addhyutta̍rasmi̠n viśvē̍ dēvā̠ yaja̍mānaścha sīdata ॥ pra̠sta̠rēṇa̍ pari̠dhinā̎ sru̠chā vēdyā̍ cha ba̠r̠hiṣā̎ । ṛ̠chēmaṃ ya̠jña-nnō̍ vaha̠ suva̍rdē̠vēṣu̠ ganta̍vē ॥ yadi̠ṣṭaṃ ya-tpa̍rā̠dāna̠ṃ yadda̠ttaṃ yā cha̠ dakṣi̍ṇā । ta- [tat, a̠gni-] 31
-da̠gni-rvai̎śvakarma̠ṇa-ssuva̍rdē̠vēṣu̍ nō dadhat ॥ yēnā̍ sa̠hasra̠ṃ vaha̍si̠ yēnā̎gnē sarvavēda̠sam । tēnē̠maṃ ya̠jña-nnō̍ vaha̠ suva̍rdē̠vēṣu̠ ganta̍vē ॥ yēnā̎gnē̠ dakṣi̍ṇā yu̠ktā ya̠jñaṃ vaha̍ntyṛ̠tvija̍ḥ । tēnē̠maṃ ya̠jña-nnō̍ vaha̠ suva̍rdē̠vēṣu̠ ganta̍vē ॥ yēnā̎-‘gnē su̠kṛta̍ḥ pa̠thā madhō̠rdhārā̎ vyāna̠śuḥ । tēnē̠maṃ ya̠jña-nnō̍ vaha̠ suva̍rdē̠vēṣu̠ ganta̍vē ॥ yatra̠ dhārā̠ ana̍pētā̠ madhō̎rghṛ̠tasya̍ cha̠ yāḥ । tada̠gnirvai̎śvakarma̠ṇa-ssuva̍rdē̠vēṣu̍ nō dadhat ॥ 32 ॥
(ā̠gachChā̠t – ta – dvayā̍na̠śu stēnē̠maṃ ya̠jña-nnō̍ vaha̠ suva̍rdē̠vēṣu̠ ganta̍vē̠ – chatu̍rdaśa cha) (a. 7)
yāstē̍ agnē sa̠midhō̠ yāni̠ dhāma̠ yā ji̠hvā jā̍tavēdō̠ yō a̠rchiḥ । yē tē̍ agnē mē̠ḍayō̠ ya inda̍va̠stēbhi̍rā̠tmāna̍-ñchinuhi prajā̠nann ॥ u̠thsa̠nna̠ya̠jñō vā ē̠ṣa yada̠gniḥ kiṃ vā-‘hai̠tasya̍ kri̠yatē̠ kiṃ vā̠ na yadvā a̍ddhva̠ryu-ra̠gnēśchi̠nvanna̍-nta̠rētyā̠tmanō̠ vai tada̠ntarē̍ti̠ yāstē̍ agnē sa̠midhō̠ yāni̠ [sa̠midhō̠ yāni̍, dhāmētyā̍hai̠ṣā] 33
dhāmētyā̍hai̠ṣā vā a̠gnē-ssva̍ya-ñchi̠tira̠gnirē̠va tada̠gni-ñchi̍nōti̠ nāddhva̠ryurā̠tmanō̠-‘ntarē̍ti̠ chata̍sra̠ āśā̠ḥ pracha̍rantva̠gnaya̍ i̠ma-nnō̍ ya̠jña-nna̍yatu prajā̠nann । ghṛ̠ta-mpinva̍nna̠jaragṃ̍ su̠vīra̠-mbrahma̍ sa̠mi-dbha̍va̠tyāhu̍tīnām ॥ su̠va̠rgāya̠ vā ē̠ṣa lō̠kāyōpa̍ dhīyatē̠ ya-tkū̠rmaśchata̍sra̠ āśā̠ḥ pra cha̍rantva̠gnaya̠ ityā̍ha̠ [ityā̍ha, diśa̍ ē̠vaitēna̠] 34
diśa̍ ē̠vaitēna̠ pra jā̍nātī̠ma-nnō̍ ya̠jña-nna̍yatu prajā̠nannityā̍ha suva̠rgasya̍ lō̠kasyā̠bhinī̎tyai̠ brahma̍ sa̠mi-dbha̍va̠tyāhu̍tīnā̠-mityā̍ha̠ brahma̍ṇā̠ vai dē̠vā-ssu̍va̠rgaṃ lō̠kamā̍ya̠n̠ ya-dbrahma̍ṇvatyōpa̠dadhā̍ti̠ brahma̍ṇai̠va ta-dyaja̍māna-ssuva̠rgaṃ lō̠kamē̍ti pra̠jāpa̍ti̠rvā ē̠ṣa yada̠gnistasya̍ pra̠jāḥ pa̠śava̠-śChandāgṃ̍si rū̠pagṃ sarvā̠n̠ varṇā̠niṣṭa̍kānā-ṅkuryā-drū̠pēṇai̠va pra̠jā-mpa̠śūn Chandā̠g̠syava̍ ru̠ndhē-‘thō̎ pra̠jābhya̍ ē̠vaina̍-mpa̠śubhya̠-śChandō̎bhyō ‘va̠ruddhya̍ chinutē ॥ 35 ॥
(yānya̠ – gnaya̠ ityā̠hē – ṣṭa̍kānā̠gṃ̠ – ṣōḍa̍śa cha) (a. 8)
mayi̍ gṛhṇā̠myagrē̍ a̠gnigṃ rā̠yaspōṣā̍ya suprajā̠stvāya̍ su̠vīryā̍ya । mayi̍ pra̠jā-mmayi̠ varchō̍ dadhā̠myari̍ṣṭā-ssyāma ta̠nuvā̍ su̠vīrā̎ḥ ॥ yō nō̍ a̠gniḥ pi̍tarō hṛ̠thsva̍ntarama̍rtyō̠ martyāgṃ̍ āvi̠vēśa̍ । tamā̠tma-npari̍ gṛhṇīmahē va̠ya-mmā sō a̠smāgṃ a̍va̠hāya̠ parā̍ gāt ॥ yada̍ddhva̠ryurā̠tmanna̠gnima-gṛ̍hītvā̠-‘gni-ñchi̍nu̠yādyō̎-‘sya̠ svō̎-‘gnistamapi̠ [svō̎-‘gnistamapi̍, yaja̍mānāya] 36
yaja̍mānāya chinuyāda̠gni-ṅkhalu̠ vai pa̠śavō-‘nūpa̍ tiṣṭhantē-‘pa̠krāmu̍kā asmā-tpa̠śava̍-ssyu̠rmayi̍ gṛhṇā̠myagrē̍ a̠gnimityā̍hā̠-”tmannē̠va svama̠gni-ndā̍dhāra̠ nāsmā̎-tpa̠śavō-‘pa̍ krāmanti brahmavā̠dinō̍ vadanti̠ yanmṛchchā-”pa̍śchā̠gnē-ra̍nā̠dya-matha̠ kasmā̎nmṛ̠dā chā̠dbhiśchā̠-‘gniśchī̍yata̠ iti̠ yada̠dbhi-ssa̠ṃ yau- [yada̠dbhi-ssa̠ṃ yauti̍, āpō̠ vai] 37
-tyāpō̠ vai sarvā̍ dē̠vatā̍ dē̠vatā̍bhirē̠vaina̠gṃ̠ sagṃ sṛ̍jati̠ yanmṛ̠dā chi̠nōtī̠yaṃ vā a̠gnirvai̎śvāna̠rō̎-‘gninai̠va tada̠gni-ñchi̍nōti brahmavā̠dinō̍ vadanti̠ yanmṛ̠dā chā̠dbhiśchā̠gniśchī̠yatē-‘tha̠ kasmā̍da̠gniru̍chyata̠ iti̠ yachChandō̍bhi-śchi̠nōtya̠gnayō̠ vai Chandāgṃ̍si̠ tasmā̍da̠gniru̍chya̠tē-‘thō̍ i̠yaṃ vā a̠gnirvai̎śvāna̠rō ya- [a̠gnirvai̎śvāna̠rō yat, mṛ̠dā chi̠nōti̠] 38
-nmṛ̠dā chi̠nōti̠ tasmā̍da̠gniru̍chyatē hiraṇyēṣṭa̠kā upa̍ dadhāti̠ jyōti̠rvai hira̍ṇya̠-ñjyōti̍rē̠vā-‘smi̍-ndadhā̠tyathō̠ tējō̠ vai hira̍ṇya̠-ntēja̍ ē̠vā-”tma-ndha̍ttē̠ yō vā a̠gnigṃ sa̠rvatō̍mukha-ñchinu̠tē sarvā̍su pra̠jāsvanna̍matti̠ sarvā̠ diśō̠-‘bhi ja̍yati gāya̠trī-mpu̠rastā̠dupa̍ dadhāti tri̠ṣṭubha̍-ndakṣiṇa̠tō jaga̍tī-mpa̠śchāda̍nu̠ṣṭubha̍muttara̠taḥ pa̠ṅkti-mmaddhya̍ ē̠ṣa vā a̠gni-ssa̠rvatō̍mukha̠staṃ ya ē̠vaṃ vi̠dvāgśchi̍nu̠tē sarvā̍su pra̠jāsvanna̍matti̠ sarvā̠ diśō̠-‘bhi ja̍ya̠tyathō̍ di̠śyē̍va diśa̠-mpra va̍yati̠ tasmā̎-ddi̠śi di-kprōtā̎ ॥ 39 ॥
(api̍-sa̠ṃyauti̍-vaiśvāna̠rō ya-dē̠ṣa vai-pañcha̍vigṃśatiścha) (a. 9)
pra̠jāpa̍ti-ra̠gni-ma̍sṛjata̠ sō̎-‘smā-thsṛ̠ṣṭaḥ prā-mprā-‘dra̍va̠-ttasmā̠ aśva̠-mpratyā̎sya̠-thsa da̍kṣi̠ṇā-”va̍rtata̠ tasmai̍ vṛ̠ṣṇi-mpratyā̎sya̠-thsa pra̠tyaṅṅā-‘va̍rtata̠ tasmā̍ ṛṣa̠bha-mpratyā̎sya̠-thsa uda̠ṅṅā-‘va̍rtata̠ tasmai̍ ba̠sta-mpratyā̎sya̠-thsa ū̠rdhvō̎-‘drava̠-ttasmai̠ puru̍ṣa̠-mpratyā̎sya̠dya-tpa̍śuśī̠r̠ṣāṇyu̍pa̠dadhā̍ti sa̠rvata̍ ē̠vaina̍- [ē̠vaina̎m, a̠va̠ruddhya̍ chinuta] 40
-mava̠ruddhya̍ chinuta ē̠tā vai prā̍ṇa̠bhṛta̠-śchakṣu̍ṣmatī̠riṣṭa̍kā̠ ya-tpa̍śuśī̠rṣāṇi̠ ya-tpa̍śuśī̠rṣāṇyu̍pa̠dadhā̍ti̠ tābhi̍rē̠va yaja̍mānō̠-‘muṣmi̍-~ṃllō̠kē prāṇi̠tyathō̠ tābhi̍rē̠vāsmā̍ i̠mē lō̠kāḥ pra bhā̎mti mṛ̠dā-‘bhi̠lipyōpa̍ dadhāti mēddhya̠tvāya̍ pa̠śurvā ē̠ṣa yada̠gniranna̍-mpa̠śava̍ ē̠ṣa khalu̠ vā a̠gnirya-tpa̍śuśī̠r̠ṣāṇi̠ ya-ṅkā̠mayē̍ta̠ kanī̍yō̠-‘syā-‘nnagg̍ – [kanī̍yō̠-‘syā-‘nna̎m, syā̠diti̍] 41
syā̠diti̍ santa̠rā-ntasya̍ paśuśī̠r̠ṣāṇyupa̍ daddhyā̠-tkanī̍ya ē̠vāsyānna̍-mbhavati̠ ya-ṅkā̠mayē̍ta sa̠māva̍da̠syānnagg̍ syā̠diti̍ maddhya̠tastasyōpa̍ daddhyā-thsa̠māva̍-dē̠vāsyānna̍-mbhavati̠ ya-ṅkā̠mayē̍ta̠ bhūyō̠-‘syā-‘nnagg̍ syā̠dityantē̍ṣu̠ tasya̍ vyu̠dūhyōpa̍ daddhyādanta̠ta ē̠vāsmā̠ anna̠mava̍ rundhē̠ bhūyō̠-‘syānna̍-mbhavati ॥ 42 ॥
(ē̠na̠- ma̠syānna̠ṃ – bhūyō̠-‘syā-‘nna̍-mbhavati) (a. 10)
stē̠gā-ndaggṣṭrā̎bhyā-mma̠ṇḍūkā̠n jambhyē̍bhi̠rāda̍kāṃ-khā̠dēnōrjagṃ̍ sagṃ sū̠dēnā-‘ra̍ṇya̠-ñjāmbī̍lēna̠ mṛda̍-mba̠rsvē̍bhi̠-śśarka̍rābhi̠rava̍kā̠mava̍kābhi̠-śśarka̍rāmuthsā̠dēna̍ ji̠hvāma̍vakra̠ndēna̠ tālu̠gṃ̠ sara̍svatī-ñjihvā̠grēṇa̍ ॥ 43 ॥
(stē̠gān – dvāvigṃ̍śatiḥ) (a. 11)
vāja̠gṃ̠ hanū̎bhyāma̠pa ā̠syē̍nā-”di̠tyā-ñChmaśru̍bhi-rupayā̠ma-madha̍rē̠ṇōṣṭhē̍na̠ sadutta̍rē̠ṇānta̍rēṇā-nūkā̠śa-mpra̍kā̠śēna̠ bāhyagg̍ stanayi̠tnu-nni̍rbā̠dhēna̍ sūryā̠gnī chakṣu̍rbhyāṃ vi̠dyutau̍ ka̠nāna̍kābhyāma̠śani̍-mma̠stiṣkē̍ṇa̠ bala̍-mma̠jjabhi̍ḥ ॥ 44 ॥
(vāja̠-mpañcha̍vigṃśatiḥ) (a. 12)
kū̠rmā-ñCha̠phaira̠chChalā̍bhiḥ ka̠piñja̍lā̠nthsāma̠ kuṣṭhi̍kābhirja̠va-ñjaṅghā̍bhiraga̠da-ñjānu̍bhyāṃ vī̠rya̍-ṅku̠hābhyā̎-mbha̠ya-mpra̍chā̠lābhyā̠-ṅguhō̍papa̠kṣābhyā̍-ma̠śvinā̠vagṃ sā̎bhyā̠madi̍tigṃ śī̠rṣṇā nir-ṛ̍ti̠-nnirjā̎lmakēna śī̠rṣṇā ॥ 45 ॥
(kū̠rmān-trayō̍vigṃśatiḥ) (a. 13)
yōktra̠-ṅgṛddhrā̍bhiryu̠gamāna̍tēna chi̠tta-mmanyā̍bhi-ssaṅkrō̠śā-nprā̠ṇaiḥ pra̍kā̠śēna̠ tvacha̍-mparākā̠śēnānta̍rā-mma̠śakā̠n kēśai̠rindra̠gg̠ svapa̍sā̠ vahē̍na̠ bṛha̠spatigṃ̍ śakunisā̠dēna̠ ratha̍mu̠ṣṇihā̍bhiḥ ॥ 46 ॥
(yōktra̠ – mēka̍vigṃśatiḥ) (a. 14)
mi̠trāvaru̍ṇau̠ śrōṇī̎bhyāmindrā̠gnī śi̍kha̠ṇḍābhyā̠-mindrā̠bṛha̠spatī̍ ū̠rubhyā̠mindrā̠viṣṇū̍ aṣṭhī̠vadbhyāgṃ̍ savi̠tāra̠-mpuchChē̍na gandha̠rvāñChēpē̍nā-phsa̠rasō̍ mu̠ṣkābhyā̠-mpava̍māna-mpā̠yunā̍ pa̠vitra̠-mpōtrā̎bhyāmā̠krama̍ṇagg sthū̠rābhyā̎-mprati̠krama̍ṇa̠-ṅkuṣṭhā̎bhyām ॥ 47 ॥
(mi̠trāvaru̍ṇau̠ – dvāvigṃ̍śatiḥ) (a. 15)
indra̍sya krō̠ḍō ‘di̍tyai pāja̠sya̍-ndi̠śā-ñja̠travō̍ jī̠mūtā̎n hṛdayaupa̠śābhyā̍-ma̠ntari̍kṣa-mpuri̠tatā̠ nabha̍ uda̠ryē̍ṇēndrā̠ṇī-mplī̠hnā va̠lmīkā̎n klō̠mnā gi̠rī-nplā̠śibhi̍-ssamu̠dramu̠darē̍ṇa vaiśvāna̠ra-mbhasma̍nā ॥ 48 ॥
(indra̍sya̠ – dvāvi̍śati̠ḥ) (a. 16)
pū̠ṣṇō va̍ni̠ṣṭhura̍ndhā̠hē-ssthū̍ragu̠dā sa̠rpā-ngudā̍bhir-ṛ̠tū-npṛ̠ṣṭībhi̠rdiva̍-mpṛ̠ṣṭhēna̠ vasū̍nā-mpratha̠mā kīka̍sā ru̠drāṇā̎-ndvi̠tīyā̍ ”di̠tyānā̎-ntṛ̠tīyā ‘ṅgi̍rasā-ñchatu̠rthī sā̠ddhyānā̎-mpañcha̠mī viśvē̍ṣā-ndē̠vānāgṃ̍ ṣa̠ṣṭhī ॥ 49 ॥
(pū̠ṣṇa – śchatu̍rvigṃśatiḥ) (a. 17)
ōjō̎ grī̠vābhi̠-rnir-ṛ̍tima̠sthabhi̠rindra̠gg̠ svapa̍sā̠ vahē̍na ru̠drasya̍ vicha̠la-sska̠ndhō̍ ‘hōrā̠trayō̎rdvi̠tīyō̎ ‘rdhamā̠sānā̎-ntṛ̠tīyō̍ mā̠sā-ñcha̍tu̠rtha ṛ̍tū̠nā-mpa̍ñcha̠ma-ssa̍ṃvathsa̠rasya̍ ṣa̠ṣṭhaḥ ॥ 50 ॥
(ōjō̍ – vigṃśa̠tiḥ) (a. 18)
ā̠na̠nda-nna̠ndathu̍nā̠ kāma̍-mpratyā̠sābhyā̎-mbha̠yagṃ śi̍tī̠mabhyā̎-mpra̠śiṣa̍-mpraśā̠sābhyāgṃ̍ sūryāchandra̠masau̠ vṛkyā̎bhyāg śyāmaśaba̠lau mata̍snābhyā̠ṃ vyu̍ṣṭigṃ rū̠pēṇa̠ nimru̍kti̠marū̍pēṇa ॥ 51 ॥
(ā̠na̠ndagṃ – ṣōḍa̍śa) (a. 19)
aha̍rmā̠gṃ̠sēna̠ rātri̠-mpīva̍sā̠-‘pō yū̠ṣēṇa̍ ghṛ̠tagṃ rasē̍na̠ śyāṃ vasa̍yā dū̠ṣīkā̍bhir-hrā̠duni̠-maśru̍bhi̠ḥ pṛṣvā̠-ndivagṃ̍ rū̠pēṇa̠ nakṣa̍trāṇi̠ prati̍rūpēṇa pṛthi̠vī-ñcharma̍ṇā Cha̠vī-ñCha̠vyō̍ pākṛ̍tāya̠ svāhā ”la̍bdhāya̠ svāhā̍ hu̠tāya̠ svāhā̎ ॥ 52 ॥
(aha̍ra̠ – ṣṭāvigṃ̍śatiḥ) (a. 20)
a̠gnēḥ pa̍kṣa̠ti-ssara̍svatyai̠ nipa̍kṣati̠-ssōma̍sya tṛ̠tīyā̠-‘pā-ñcha̍tu̠rthyōṣa̍dhīnā-mpañcha̠mī sa̍ṃvathsa̠rasya̍ ṣa̠ṣṭhī ma̠rutāgṃ̍ sapta̠mī bṛha̠spatē̍raṣṭa̠mī mi̠trasya̍ nava̠mī varu̍ṇasya daśa̠mīndra̍syaikāda̠śī viśvē̍ṣā-ndē̠vānā̎-ndvāda̠śī dyāvā̍pṛthi̠vyōḥ pā̠rśvaṃ ya̠masya̍ pāṭū̠raḥ ॥ 53 ॥
(a̠gnē-rēkā̠nna tri̠gṃ̠śat) (a. 21)
vā̠yōḥ pa̍kṣa̠ti-ssara̍svatō̠ nipa̍kṣati-ścha̠ndrama̍sa-stṛ̠tīyā̠ nakṣa̍trāṇā-ñchatu̠rthī sa̍vi̠tuḥ pa̍ñcha̠mī ru̠drasya̍ ṣa̠ṣṭhī sa̠rpāṇāgṃ̍ sapta̠mya̍rya̠mṇō̎-‘ṣṭa̠mī tvaṣṭu̍rnava̠mī dhā̠turda̍śa̠mīndrā̠ṇyā ē̍kāda̠śyadi̍tyai dvāda̠śī dyāvā̍pṛthi̠vyōḥ pā̠rśvaṃ ya̠myai̍ pāṭū̠raḥ ॥ 54 ॥
(vā̠yō – ra̠ṣṭāvigṃ̍śatiḥ) (a. 22)
panthā̍manū̠vṛgbhyā̠gṃ̠ santa̍tigg snāva̠nyā̎bhyā̠gṃ̠ śukā̎-npi̠ttēna̍ hari̠māṇa̍ṃ ya̠knā halī̎kṣṇā-npāpavā̠tēna̍ kū̠śmāñChaka̍bhi-śśava̠rtānūva̍ddhyēna̠ śunō̍ vi̠śasa̍nēna sa̠rpā-~ṃllō̍hitaga̠ndhēna̠ vayāgṃ̍si pakvaga̠ndhēna̍ pi̠pīli̍kāḥ praśā̠dēna̍ ॥ 55 ॥
(panthā̠ṃ – dvāvigṃ̍śatiḥ) (a. 23)
kramai̠ratya̍kramī-dvā̠jī viśvai̎rdē̠vairya̠jñiyai̎-ssaṃvidā̠naḥ । sa nō̍ naya sukṛ̠tasya̍ lō̠ka-ntasya̍ tē va̠yagg sva̠dhayā̍ madēma ॥ 56 ॥
(kramai̍ – ra̠ṣṭāda̍śa) (a. 24)
dyaustē̍ pṛ̠ṣṭha-mpṛ̍thi̠vī sa̠dhastha̍mā̠tmāntari̍kṣagṃ samu̠drō yōni̠-ssūrya̍stē̠ chakṣu̠rvāta̍ḥ prā̠ṇaścha̠ndramā̠-śśrōtra̠-mmāsā̎śchārdhamā̠sāścha̠ parvā̎ṇyṛ̠tavōṅgā̍ni saṃvathsa̠rō ma̍hi̠mā ॥ 57 ॥
(dyau – pañcha̍vigṃśatiḥ) (a. 25)
a̠gniḥ pa̠śurā̍sī̠-ttēnā̍yajanta̠ sa ē̠taṃ lō̠kama̍jaya̠-dyasmi̍nna̠gni-ssa tē̍ lō̠kasta-ñjē̎ṣya̠syathāva̍ jighra vā̠yuḥ pa̠śurā̍sī̠-ttēnā̍yajanta̠ sa ē̠taṃ lō̠kama̍jaya̠-dyasmi̍n vā̠yu-ssa tē̍ lō̠kastasmā̎-ttvā̠-‘ntarē̎ṣyāmi̠ yadi̠ nāva̠jighra̍syādi̠tyaḥ pa̠śurā̍sī̠-ttēnā̍yajanta̠ sa ē̠taṃ lō̠kama̍jaya̠-dyasmi̍-nnādi̠tya-ssa tē̍ lō̠kasta-ñjē̎ṣyasi̠ yadya̍va̠jighra̍si ॥ 58 ॥
(yasmi̍ – nna̠ṣṭau cha̍) (a. 26)
(yō vā aya̍thādēvata̠ – ntvāma̍gna̠ – indra̍sya̠ – chitti̠ṃ – ~ṃyathā̠ vai – vayō̠ vai – yadākū̍tā̠–dyāstē̍ agnē̠ – mayi̍ gṛhṇāmi – pra̠jāpa̍ti̠-ssō̎-‘smāth – stē̠gān – vāja̍ṃ – kū̠rmān – yōktra̍ṃ – mi̠trāvaru̍ṇā̠ – vindra̍sya – pū̠ṣṇa – ōja̍ – āna̠nda – maha̍ – ra̠gnē – rvā̠yōḥ – panthā̠ṃ – kramai̠ – rdyaustē̠ – ‘gniḥ pa̠śurā̍sī̠th – ṣaḍvigṃ̍śatiḥ)
(yō vā – ē̠vā-”hu̍ti – mabhavan – pa̠thibhi̍ – rava̠rudhyā̍ – ”na̠nda – ma̠ṣṭau pa̍ñcha̠śat )
(yō vā aya̍thādēvata̠m, ~ṃyadya̍va̠jighra̍si)
( sā̠vi̠trāṇi̠ – viṣṇu̍mukhā – uthsannaya̠jñō – dē̍vāsu̠rā – yadēkē̍na̠ – hira̍ṇyavarṇā̠ – yō vā̍- sa̠pta ) (7)
॥ hari̍ḥ ōm ॥
॥ kṛṣṇa yajurvēdīya taittirīya saṃhitāyā-mpañchamakāṇḍē saptamaḥ praśna-ssamāptaḥ ॥