અગ્રે કુરૂણામથ પાંડવાનાં
દુઃશાસનેનાહૃતવસ્ત્રકેશા ।
કૃષ્ણા તદાક્રોશદનન્યનાથા
ગોવિંદ દામોદર માધવેતિ ॥ 1॥
શ્રીકૃષ્ણ વિષ્ણો મધુકૈટભારે
ભક્તાનુકંપિન્ ભગવન્ મુરારે ।
ત્રાયસ્વ માં કેશવ લોકનાથ
ગોવિંદ દામોદર માધવેતિ ॥ 2॥
વિક્રેતુકામા કિલ ગોપકન્યા
મુરારિપાદાર્પિતચિત્તવૃત્તિઃ ।
દધ્યાદિકં મોહવશાદવોચદ્
ગોવિંદ દામોદર માધવેતિ ॥ 3॥
ઉલૂખલે સંભૃતતંડુલાંશ્ચ
સંઘટ્ટયંત્યો મુસલૈઃ પ્રમુગ્ધાઃ ।
ગાયંતિ ગોપ્યો જનિતાનુરાગા
ગોવિંદ દામોદર માધવેતિ ॥ 4॥
કાચિત્કરાંભોજપુટે નિષણ્ણં
ક્રીડાશુકં કિંશુકરક્તતુંડમ્ ।
અધ્યાપયામાસ સરોરુહાક્ષી
ગોવિંદ દામોદર માધવેતિ ॥ 5॥
ગૃહે ગૃહે ગોપવધૂસમૂહઃ
પ્રતિક્ષણં પિંજરસારિકાણામ્ ।
સ્ખલદ્ગિરાં વાચયિતું પ્રવૃત્તો
ગોવિંદ દામોદર માધવેતિ ॥ 6॥
પર્ય્યંકિકાભાજમલં કુમારં
પ્રસ્વાપયંત્યોઽખિલગોપકન્યાઃ ।
જગુઃ પ્રબંધં સ્વરતાલબંધં
ગોવિંદ દામોદર માધવેતિ ॥ 7॥
રામાનુજં વીક્ષણકેલિલોલં
ગોપી ગૃહીત્વા નવનીતગોલમ્ ।
આબાલકં બાલકમાજુહાવ
ગોવિંદ દામોદર માધવેતિ ॥ 8॥
વિચિત્રવર્ણાભરણાભિરામે-
ઽભિધેહિ વક્ત્રાંબુજરાજહંસિ ।
સદા મદીયે રસનેઽગ્રરંગે
ગોવિંદ દામોદર માધવેતિ ॥ 9॥
અંકાધિરૂઢં શિશુગોપગૂઢં
સ્તનં ધયંતં કમલૈકકાંતમ્ ।
સંબોધયામાસ મુદા યશોદા
ગોવિંદ દામોદર માધવેતિ ॥ 10॥
ક્રીડંતમંતર્વ્રજમાત્મજં સ્વં
સમં વયસ્યૈઃ પશુપાલબાલૈઃ ।
પ્રેમ્ણા યશોદા પ્રજુહાવ કૃષ્ણં
ગોવિંદ દામોદર માધવેતિ ॥ 11॥
યશોદયા ગાઢમુલૂખલેન
ગોકંઠપાશેન નિબધ્યમાનઃ ।
રુરોદ મંદં નવનીતભોજી
ગોવિંદ દામોદર માધવેતિ ॥ 12॥
નિજાંગણે કંકણકેલિલોલં
ગોપી ગૃહીત્વા નવનીતગોલમ્ ।
આમર્દયત્પાણિતલેન નેત્રે
ગોવિંદ દામોદર માધવેતિ ॥ 13॥
ગૃહે ગૃહે ગોપવધૂકદંબાઃ
સર્વે મિલિત્વા સમવાયયોગે ।
પુણ્યાનિ નામાનિ પઠંતિ નિત્યં
ગોવિંદ દામોદર માધવેતિ ॥ 14॥
મંદારમૂલે વદનાભિરામં
બિંબાધરે પૂરિતવેણુનાદમ્ ।
ગોગોપગોપીજનમધ્યસંસ્થં
ગોવિંદ દામોદર માધવેતિ ॥ 15॥
ઉત્થાય ગોપ્યોઽપરરાત્રભાગે
સ્મૃત્વા યશોદાસુતબાલકેલિમ્ ।
ગાયંતિ પ્રોચ્ચૈર્દધિ મંથયંત્યો
ગોવિંદ દામોદર માધવેતિ ॥ 16॥
જગ્ધોઽથ દત્તો નવનીતપિંડો
ગૃહે યશોદા વિચિકિત્સયંતી ।
ઉવાચ સત્યં વદ હે મુરારે
ગોવિંદ દામોદર માધવેતિ ॥ 17॥
અભ્યર્ચ્ય ગેહં યુવતિઃ પ્રવૃદ્ધ-
પ્રેમપ્રવાહા દધિ નિર્મમંથ ।
ગાયંતિ ગોપ્યોઽથ સખીસમેતા
ગોવિંદ દામોદર માધવેતિ ॥ 18॥
ક્વચિત્ પ્રભાતે દધિપૂર્ણપાત્રે
નિક્ષિપ્ય મંથં યુવતી મુકુંદમ્ ।
આલોક્ય ગાનં વિવિધં કરોતિ
ગોવિંદ દામોદર માધવેતિ ॥ 19॥
ક્રીડાપરં ભોજનમજ્જનાર્થં
હિતૈષિણી સ્ત્રી તનુજં યશોદા ।
આજૂહવત્ પ્રેમપરિપ્લુતાક્ષી
ગોવિંદ દામોદર માધવેતિ ॥ 20॥
સુખં શયાનં નિલયે ચ વિષ્ણું
દેવર્ષિમુખ્યા મુનયઃ પ્રપન્નાઃ ।
તેનાચ્યુતે તન્મયતાં વ્રજંતિ
ગોવિંદ દામોદર માધવેતિ ॥ 21॥
વિહાય નિદ્રામરુણોદયે ચ
વિધાય કૃત્યાનિ ચ વિપ્રમુખ્યાઃ ।
વેદાવસાને પ્રપઠંતિ નિત્યં
ગોવિંદ દામોદર માધવેતિ ॥ 22॥
વૃંદાવને ગોપગણાશ્ચ ગોપ્યો
વિલોક્ય ગોવિંદવિયોગખિન્નામ્ ।
રાધાં જગુઃ સાશ્રુવિલોચનાભ્યાં
ગોવિંદ દામોદર માધવેતિ ॥ 23॥
પ્રભાતસંચારગતા નુ ગાવસ્-
તદ્રક્ષણાર્થં તનયં યશોદા ।
પ્રાબોધયત્ પાણિતલેન મંદં
ગોવિંદ દામોદર માધવેતિ ॥ 24॥
પ્રવાલશોભા ઇવ દીર્ઘકેશા
વાતાંબુપર્ણાશનપૂતદેહાઃ ।
મૂલે તરૂણાં મુનયઃ પઠંતિ
ગોવિંદ દામોદર માધવેતિ ॥ 25॥
એવં બ્રુવાણા વિરહાતુરા ભૃશં
વ્રજસ્ત્રિયઃ કૃષ્ણવિષક્તમાનસાઃ ।
વિસૃજ્ય લજ્જાં રુરુદુઃ સ્મ સુસ્વરં
ગોવિંદ દામોદર માધવેતિ ॥ 26॥
ગોપી કદાચિન્મણિપંજરસ્થં
શુકં વચો વાચયિતું પ્રવૃત્તા ।
આનંદકંદ વ્રજચંદ્ર કૃષ્ણ
ગોવિંદ દામોદર માધવેતિ ॥ 27॥
ગોવત્સબાલૈઃ શિશુકાકપક્ષં
બધ્નંતમંભોજદલાયતાક્ષમ્ ।
ઉવાચ માતા ચિબુકં ગૃહીત્વા
ગોવિંદ દામોદર માધવેતિ ॥ 28॥
પ્રભાતકાલે વરવલ્લવૌઘા
ગોરક્ષણાર્થં ધૃતવેત્રદંડાઃ ।
આકારયામાસુરનંતમાદ્યં
ગોવિંદ દામોદર માધવેતિ ॥ 29॥
જલાશયે કાલિયમર્દનાય
યદા કદંબાદપતન્મુરારિઃ ।
ગોપાંગનાશ્ચુક્રુશુરેત્ય ગોપા
ગોવિંદ દામોદર માધવેતિ ॥ 30॥
અક્રૂરમાસાદ્ય યદા મુકુંદશ્-
ચાપોત્સવાર્થં મથુરાં પ્રવિષ્ટઃ ।
તદા સ પૌરૈર્જયસીત્યભાષિ
ગોવિંદ દામોદર માધવેતિ ॥ 31॥
કંસસ્ય દૂતેન યદૈવ નીતૌ
વૃંદાવનાંતાદ્ વસુદેવસૂનૂ । (સૂનૌ)
રુરોદ ગોપી ભવનસ્ય મધ્યે
ગોવિંદ દામોદર માધવેતિ ॥ 32॥
સરોવરે કાલિયનાગબદ્ધં
શિશું યશોદાતનયં નિશમ્ય ।
ચક્રુર્લુઠંત્યઃ પથિ ગોપબાલા
ગોવિંદ દામોદર માધવેતિ ॥ 33॥
અક્રૂરયાને યદુવંશનાથં
સંગચ્છમાનં મથુરાં નિરીક્ષ્ય ।
ઊચુર્વિયોગત્ કિલ ગોપબાલા
ગોવિંદ દામોદર માધવેતિ ॥ 34॥
ચક્રંદ ગોપી નલિનીવનાંતે
કૃષ્ણેન હીના કુસુમે શયાના ।
પ્રફુલ્લનીલોત્પલલોચનાભ્યાં
ગોવિંદ દામોદર માધવેતિ ॥ 35॥
માતાપિતૃભ્યાં પરિવાર્યમાણા
ગેહં પ્રવિષ્ટા વિલલાપ ગોપી ।
આગત્ય માં પાલય વિશ્વનાથ
ગોવિંદ દામોદર માધવેતિ ॥ 36॥
વૃંદાવનસ્થં હરિમાશુ બુદ્ધ્વા
ગોપી ગતા કાપિ વનં નિશાયામ્ ।
તત્રાપ્યદૃષ્ટ્વાઽતિભયાદવોચદ્
ગોવિંદ દામોદર માધવેતિ ॥ 37॥
સુખં શયાના નિલયે નિજેઽપિ
નામાનિ વિષ્ણોઃ પ્રવદંતિ મર્ત્યાઃ ।
તે નિશ્ચિતં તન્મયતાં વ્રજંતિ
ગોવિંદ દામોદર માધવેતિ ॥ 38॥
સા નીરજાક્ષીમવલોક્ય રાધાં
રુરોદ ગોવિંદવિયોગખિન્નામ્ ।
સખી પ્રફુલ્લોત્પલલોચનાભ્યાં
ગોવિંદ દામોદર માધવેતિ ॥ 39॥
જિહ્વે રસજ્ઞે મધુરપ્રિયા ત્વં
સત્યં હિતં ત્વાં પરમં વદામિ ।
આવર્ણયેથા મધુરાક્ષરાણિ
ગોવિંદ દામોદર માધવેતિ ॥ 40॥
આત્યંતિકવ્યાધિહરં જનાનાં
ચિકિત્સકં વેદવિદો વદંતિ ।
સંસારતાપત્રયનાશબીજં
ગોવિંદ દામોદર માધવેતિ ॥ 41॥
તાતાજ્ઞયા ગચ્છતિ રામચંદ્રે
સલક્ષ્મણેઽરણ્યચયે સસીતે ।
ચક્રંદ રામસ્ય નિજા જનિત્રી
ગોવિંદ દામોદર માધવેતિ ॥ 42॥
એકાકિની દંડકકાનનાંતાત્
સા નીયમાના દશકંધરેણ ।
સીતા તદાક્રંદદનન્યનાથા
ગોવિંદ દામોદર માધવેતિ ॥ 43॥
રામાદ્વિયુક્તા જનકાત્મજા સા
વિચિંતયંતી હૃદિ રામરૂપમ્ ।
રુરોદ સીતા રઘુનાથ પાહિ
ગોવિંદ દામોદર માધવેતિ ॥ 44॥
પ્રસીદ વિષ્ણો રઘુવંશનાથ
સુરાસુરાણાં સુખદુઃખહેતો ।
રુરોદ સીતા તુ સમુદ્રમધ્યે
ગોવિંદ દામોદર માધવેતિ ॥ 45॥
અંતર્જલે ગ્રાહગૃહીતપાદો
વિસૃષ્ટવિક્લિષ્ટસમસ્તબંધુઃ ।
તદા ગજેંદ્રો નિતરાં જગાદ
ગોવિંદ દામોદર માધવેતિ ॥ 46॥
હંસધ્વજઃ શંખયુતો દદર્શ
પુત્રં કટાહે પ્રતપંતમેનમ્ ।
પુણ્યાનિ નામાનિ હરેર્જપંતં
ગોવિંદ દામોદર માધવેતિ ॥ 47॥
દુર્વાસસો વાક્યમુપેત્ય કૃષ્ણા
સા ચાબ્રવીત્ કાનનવાસિનીશમ્ ।
અંતઃ પ્રવિષ્ટં મનસા જુહાવ
ગોવિંદ દામોદર માધવેતિ ॥ 48॥
ધ્યેયઃ સદા યોગિભિરપ્રમેયઃ
ચિંતાહરશ્ચિંતિતપારિજાતઃ ।
કસ્તૂરિકાકલ્પિતનીલવર્ણો
ગોવિંદ દામોદર માધવેતિ ॥ 49॥
સંસારકૂપે પતિતોઽત્યગાધે
મોહાંધપૂર્ણે વિષયાભિતપ્તે ।
કરાવલંબં મમ દેહિ વિષ્ણો
ગોવિંદ દામોદર માધવેતિ ॥ 50॥
ભજસ્વ મંત્રં ભવબંધમુક્ત્યૈ
જિહ્વે રસજ્ઞે સુલભં મનોજ્ઞમ્ ।
દ્વૈપાયનાદ્યૈર્મુનિભિઃ પ્રજપ્તં
ગોવિંદ દામોદર માધવેતિ ॥ 51॥
ત્વામેવ યાચે મમ દેહિ જિહ્વે
સમાગતે દંડધરે કૃતાંતે ।
વક્તવ્યમેવં મધુરં સુભક્ત્યા
ગોવિંદ દામોદર માધવેતિ ॥ 52॥
ગોપાલ વંશીધર રૂપસિંધો
લોકેશ નારાયણ દીનબંધો ।
ઉચ્ચસ્વરૈસ્ત્વં વદ સર્વદૈવ
ગોવિંદ દામોદર માધવેતિ ॥ 53॥
જિહ્વે સદૈવં ભજ સુંદરાણિ
નામાનિ કૃષ્ણસ્ય મનોહરાણિ ।
સમસ્તભક્તાર્તિવિનાશનાનિ
ગોવિંદ દામોદર માધવેતિ ॥ 54॥
ગોવિંદ ગોવિંદ હરે મુરારે
ગોવિંદ ગોવિંદ મુકુંદ કૃષ્ણ ।
ગોવિંદ ગોવિંદ રથાંગપાણે
ગોવિંદ દામોદર માધવેતિ ॥ 55॥
સુખાવસાને ત્વિદમેવ સારં
દુઃખાવસાને ત્વિદમેવ ગેયમ્ ।
દેહાવસાને ત્વિદમેવ જાપ્યં
ગોવિંદ દામોદર માધવેતિ ॥ 56॥
દુર્વારવાક્યં પરિગૃહ્ય કૃષ્ણા
મૃગીવ ભીતા તુ કથં કથંચિત્ ।
સભાં પ્રવિષ્ટા મનસા જુહાવ
ગોવિંદ દામોદર માધવેતિ ॥ 57॥
શ્રીકૃષ્ણ રાધાવર ગોકુલેશ
ગોપાલ ગોવર્ધન નાથ વિષ્ણો ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 58॥
શ્રીનાથ વિશ્વેશ્વર વિશ્વમૂર્તે
શ્રીદેવકીનંદન દૈત્યશત્રો ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 59॥
ગોપીપતે કંસરિપો મુકુંદ
લક્ષ્મીપતે કેશવ વાસુદેવ ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 60॥
ગોપીજનાહ્લાદકર વ્રજેશ
ગોચારણારણ્યકૃતપ્રવેશ ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 61॥
પ્રાણેશ વિશ્વંભર કૈટભારે
વૈકુંઠ નારાયણ ચક્રપાણે ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 62॥
હરે મુરારે મધુસૂદનાદ્ય
શ્રીરામ સીતાવર રાવણારે ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 63॥
શ્રીયાદવેંદ્રાદ્રિધરાંબુજાક્ષ
ગોગોપગોપીસુખદાનદક્ષ ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 64॥
ધરાભરોત્તારણગોપવેષ
વિહારલીલાકૃતબંધુશેષ ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 65॥
બકીબકાઘાસુરધેનુકારે
કેશીતૃણાવર્તવિઘાતદક્ષ ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 66॥
શ્રીજાનકીજીવન રામચંદ્ર
નિશાચરારે ભરતાગ્રજેશ ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 67॥
નારાયણાનંત હરે નૃસિંહ
પ્રહ્લાદબાધાહર હે કૃપાલો ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 68॥
લીલામનુષ્યાકૃતિરામરૂપ
પ્રતાપદાસીકૃતસર્વભૂપ ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 69॥
શ્રીકૃષ્ણ ગોવિંદ હરે મુરારે
હે નાથ નારાયણ વાસુદેવ ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 70॥
વક્તું સમર્થોઽપિ ન વક્તિ કશ્ચિદ્-
અહો જનાનાં વ્યસનાભિમુખ્યમ્ ।
જિહ્વે પિબસ્વામૃતમેતદેવ
ગોવિંદ દામોદર માધવેતિ ॥ 71॥
ઇતિ શ્રીબિલ્વમંગલાચાર્યવિરચિતં શ્રીગોવિંદદામોદરસ્તોત્રં સંપૂર્ણમ્ ।