kṛṣṇa yajurvēdīya taittirīya saṃhitāyā-ñchaturthakāṇḍē ṣaṣṭhaḥ praśnaḥ – pariṣēchana-saṃskārābhidhānaṃ
ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥
aśma̠nnūrja̠-mparva̍tē śiśriyā̠ṇāṃ vātē̍ pa̠rjanyē̠ varu̍ṇasya̠ śuṣmē̎ । a̠dbhya ōṣa̍dhībhyō̠ vana̠spati̠bhyō-‘dhi̠ sambhṛ̍tā̠-ntā-nna̠ iṣa̠mūrja̍-ndhatta maruta-ssagṃ rarā̠ṇāḥ ॥ aśmagg̍stē̠ kṣuda̠mu-ntē̠ śugṛ̍chChatu̠ ya-ndvi̠ṣmaḥ ॥ sa̠mu̠drasya̍ tvā̠-‘vāka̠yā-‘gnē̠ pari̍ vyayāmasi । pā̠va̠kō a̠smabhyagṃ̍ śi̠vō bha̍va ॥ hi̠masya̍ tvā ja̠rāyu̠ṇā-‘gnē̠ pari̍ vyayāmasi । pā̠va̠kō a̠smabhyagṃ̍ śi̠vō bha̍va ॥ upa̠- [upa̍, jmannupa̍] 1
-jmannupa̍ vēta̠sē-‘va̍ttara-nna̠dīṣvā । agnē̍ pi̠ttama̠pāma̍si ॥ maṇḍū̍ki̠ tābhi̠rā ga̍hi̠ sēma-nnō̍ ya̠jñam । pā̠va̠kava̍rṇagṃ śi̠va-ṅkṛ̍dhi ॥ pā̠va̠ka ā chi̠taya̍ntyā kṛ̠pā । kṣāma̍-nruru̠cha u̠ṣasō̠ na bhā̠nunā̎ ॥ tūrva̠-nna yāma̠nnēta̍śasya̠ nū raṇa̠ ā yō ghṛ̠ṇē । na ta̍tṛṣā̠ṇō a̠jara̍ḥ ॥ agnē̍ pāvaka rō̠chiṣā̍ ma̠ndrayā̍ dēva ji̠hvayā̎ । ā dē̠vān [ā dē̠vān, va̠kṣi̠ yakṣi̍ cha ।] 2
va̍kṣi̠ yakṣi̍ cha ॥ sa na̍ḥ pāvaka dīdi̠vō-‘gnē̍ dē̠vāgṃ i̠hā-” va̍ha । upa̍ ya̠jñagṃ ha̠viścha̍ naḥ ॥ a̠pāmi̠da-nnyaya̍nagṃ samu̠drasya̍ ni̠vēśa̍nam । a̠nya-ntē̍ a̠sma-tta̍pantu hē̠taya̍ḥ pāva̠kō a̠smabhyagṃ̍ śi̠vō bha̍va ॥ nama̍stē̠ hara̍sē śō̠chiṣē̠ nama̍stē astva̠rchiṣē̎ । a̠nya-ntē̍ a̠sma-tta̍pantu hē̠taya̍ḥ pāva̠kō a̠smabhyagṃ̍ śi̠vō bha̍va ॥ nṛ̠ṣadē̠ va- [nṛ̠ṣadē̠ vaṭ, a̠phsu̠ṣadē̠ va-ḍva̍na̠sadē̠] 3
-ḍa̍phsu̠ṣadē̠ va-ḍva̍na̠sadē̠ va-ḍba̍rhi̠ṣadē̠ vaṭ-thsu̍va̠rvidē̠ vaṭ ॥ yē dē̠vā dē̠vānā̎ṃ ya̠jñiyā̍ ya̠jñiyā̍nāgṃ saṃva-thsa̠rīṇa̠mupa̍ bhā̠gamāsa̍tē । a̠hu̠tādō̍ ha̠viṣō̍ ya̠jñē a̠smin-thsva̠ya-ñju̍huddhva̠-mmadhu̍nō ghṛ̠tasya̍ ॥ yē dē̠vā dē̠vēṣvadhi̍ dēva̠tvamāya̠n̠ yē brahma̍ṇaḥ pura ē̠tārō̍ a̠sya । yēbhyō̠ nartē pava̍tē̠ dhāma̠ ki-ñcha̠na na tē di̠vō na pṛ̍thi̠vyā adhi̠ snuṣu̍ ॥ prā̠ṇa̠dā [prā̠ṇa̠dāḥ, a̠pā̠na̠dā vyā̍na̠dā-] 4
a̍pāna̠dā vyā̍na̠dā-ścha̍kṣu̠rdā va̍rchō̠dā va̍rivō̠dāḥ । a̠nya-ntē̍ a̠sma-tta̍pantu hē̠taya̍ḥ pāva̠kō a̠smabhyagṃ̍ śi̠vō bha̍va ॥ a̠gnisti̠gmēna̍ śō̠chiṣā̠ yagṃsa̠dviśva̠-nnya̍triṇa̎m । a̠gnirnō̍ vagṃsatē ra̠yim ॥ sainā-‘nī̍kēna suvi̠datrō̍ a̠smē yaṣṭā̍ dē̠vāgṃ āya̍jiṣṭha-ssva̠sti । ada̍bdhō gō̠pā u̠ta na̍ḥ para̠spā agnē̎ dyu̠madu̠ta rē̠va-ddi̍dīhi ॥ 5 ॥
(upa̍-dē̠vān-vaṭ-prā̍ṇa̠dā-śchatu̍śchatvārigṃśachcha) (a. 1)
ya i̠mā viśvā̠ bhuva̍nāni̠ juhva̠dṛṣi̠r̠hōtā̍ niṣa̠sādā̍ pi̠tā na̍ḥ । sa ā̠śiṣā̠ dravi̍ṇami̠chChamā̍naḥ parama̠chChadō̠ vara̠ ā vi̍vēśa ॥ vi̠śvaka̍rmā̠ mana̍sā̠ yadvihā̍yā dhā̠tā vi̍dhā̠tā pa̍ra̠mōta sa̠ndṛk । tēṣā̍mi̠ṣṭāni̠ sami̠ṣā ma̍danti̠ yatra̍ sapta̠r̠ṣī-npa̠ra ēka̍mā̠huḥ ॥ yō na̍ḥ pi̠tā ja̍ni̠tā yō vi̍dhā̠tā yō na̍-ssa̠tō a̠bhyā sajja̠jāna̍ । 6
yō dē̠vānā̎-nnāma̠dhā ēka̍ ē̠va tagṃ sa̍mpra̠śña-mbhuva̍nā yantya̠nyā ॥ ta ā-‘ya̍janta̠ dravi̍ṇa̠gṃ̠ sama̍smā̠ ṛṣa̍ya̠ḥ pūrvē̍ jari̠tārō̠ na bhū̠nā । a̠sūrtā̠ sūrtā̠ raja̍sō vi̠mānē̠ yē bhū̠tāni̍ sa̠makṛ̍ṇvanni̠māni̍ ॥ na taṃ vi̍dātha̠ ya i̠da-ñja̠jānā̠nya-dyu̠ṣmāka̠manta̍ra-mbhavāti । nī̠hā̠rēṇa̠ prāvṛ̍tā̠ jalpyā̍ chāsu̠tṛpa̍ uktha̠ śāsa̍ścharanti ॥ pa̠rō di̠vā pa̠ra ē̠nā [pa̠ra ē̠nā, pṛ̠thi̠vyā pa̠rō] 7
pṛ̍thi̠vyā pa̠rō dē̠vēbhi̠rasu̍rai̠rguhā̠ yat । kagg svi̠dgarbha̍-mpratha̠ma-nda̍ddhra̠ āpō̠ yatra̍ dē̠vā-ssa̠maga̍chChanta̠ viśvē̎ ॥ tamidgarbha̍-mpratha̠ma-nda̍ddhra̠ āpō̠ yatra̍ dē̠vā-ssa̠maga̍chChanta̠ viśvē̎ । a̠jasya̠ nābhā̠vaddhyēka̠-marpi̍ta̠ṃ yasmi̍nni̠daṃ viśva̠-mbhuva̍na̠madhi̍ śri̠tam ॥ vi̠śvaka̍rmā̠ hyaja̍niṣṭa dē̠va ādi-dga̍ndha̠rvō a̍bhava-ddvi̠tīya̍ḥ । tṛ̠tīya̍ḥ pi̠tā ja̍ni̠tauṣa̍dhīnā- [pi̠tā ja̍ni̠tauṣa̍dhīnām, a̠pā-ṅgarbha̠ṃ vya̍dadhā-tpuru̠trā ।] 8
-ma̠pā-ṅgarbha̠ṃ vya̍dadhā-tpuru̠trā ॥ chakṣu̍ṣaḥ pi̠tā mana̍sā̠ hi dhīrō̍ ghṛ̠tamē̍nē ajana̠nna̍mānē । ya̠dēdantā̠ ada̍dṛgṃhanta̠ pūrva̠ ādi-ddyāvā̍pṛthi̠vī a̍prathētām ॥ vi̠śvata̍-śchakṣuru̠ta vi̠śvatō̍mukhō vi̠śvatō̍hasta u̠ta vi̠śvata̍spāt । sa-mbā̠hubhyā̠-nnama̍ti̠ sa-mpata̍trai̠ rdyāvā̍pṛthi̠vī ja̠naya̍-ndē̠va ēka̍ḥ ॥ kigg svi̍dāsī-dadhi̠ṣṭhāna̍-mā̠rambha̍ṇa-ṅkata̠ma-thsvi̠-tkimā̍sīt । yadī̠ bhūmi̍-ñja̠naya̍- [yadī̠ bhūmi̍-ñja̠nayann̍, vi̠śvaka̍rmā̠] 9
-nvi̠śvaka̍rmā̠ vi dyāmaurṇō̎-nmahi̠nā vi̠śvacha̍kṣāḥ ॥ kigg svi̠dvana̠-ṅka u̠ sa vṛ̠kṣa ā̍sī̠dyatō̠ dyāvā̍pṛthi̠vī ni̍ṣṭata̠kṣuḥ । manī̍ṣiṇō̠ mana̍sā pṛ̠chChatēdu̠ tadyada̠ddhyati̍ṣṭha̠-dbhuva̍nāni dhā̠rayann̍ ॥ yā tē̠ dhāmā̍ni para̠māṇi̠ yā-‘va̠mā yā ma̍ddhya̠mā vi̍śvakarmannu̠tēmā । śikṣā̠ sakhi̍bhyō ha̠viṣi̍ svadhāva-ssva̠yaṃ ya̍jasva ta̠nuva̍-ñjuṣā̠ṇaḥ ॥ vā̠chaspati̍ṃ vi̠śvaka̍rmāṇa-mū̠tayē̍ [-mū̠tayē̎, ma̠nō̠yuja̠ṃ vājē̍] 10
manō̠yuja̠ṃ vājē̍ a̠dyā hu̍vēma । sa nō̠ nēdi̍ṣṭhā̠ hava̍nāni jōṣatē vi̠śvaśa̍bhū̠ṃrava̍sē sā̠dhuka̍rmā ॥ viśva̍karman. ha̠viṣā̍ vāvṛdhā̠na-ssva̠yaṃ ya̍jasva ta̠nuva̍-ñjuṣā̠ṇaḥ । muhya̍ntva̠nyē a̠bhita̍-ssa̠patnā̍ i̠hāsmāka̍-mma̠ghavā̍ sū̠rira̍stu ॥ viśva̍karman. ha̠viṣā̠ vardha̍nēna trā̠tāra̠mindra̍-makṛṇōrava̠ddhyam । tasmai̠ viśa̠-ssama̍namanta pū̠rvīra̠yamu̠grō vi̍ha̠vyō̍ yathā-‘sa̍t ॥ sa̠mu̠drāya̍ va̠yunā̍ya̠ sindhū̍nā̠-mpata̍yē̠ nama̍ḥ । na̠dīnā̠gṃ̠ sarvā̍sā-mpi̠trē ju̍hu̠tā vi̠śvaka̍rmaṇē̠ viśvā-‘hāma̍rtyagṃ ha̠viḥ ॥ 11 ॥
(ja̠jānai̠ – nau – ṣa̍dhīnā̠ṃ – bhūmi̍-ñja̠naya̍ – nnū̠tayē̠ – namō̠ – nava̍ cha) (a. 2)
udē̍namutta̠rā-nna̠yāgnē̍ ghṛtēnā-”huta । rā̠yaspōṣē̍ṇa̠ sagṃ sṛ̍ja pra̠jayā̍ cha̠ dhanē̍na cha ॥ indrē̠ma-mpra̍ta̠rā-ṅkṛ̍dhi sajā̠tānā̍-masadva̠śī । samē̍na̠ṃ varcha̍sā sṛja dē̠vēbhyō̍ bhāga̠dhā a̍sat ॥ yasya̍ ku̠rmō ha̠virgṛ̠hē tama̍gnē vardhayā̠ tvam । tasma̍ dē̠vā adhi̍ bravanna̠ya-ñcha̠ brahma̍ṇa̠spati̍ḥ ॥ udu̍ tvā̠ viśvē̍ dē̠vā [viśvē̍ dē̠vāḥ, agnē̠ bhara̍ntu̠ chitti̍bhiḥ ।] 12
agnē̠ bhara̍ntu̠ chitti̍bhiḥ । sa nō̍ bhava śi̠vata̍ma-ssu̠pratī̍kō vi̠bhāva̍suḥ ॥ pañcha̠ diśō̠ daivī̎rya̠jñama̍vantu dē̠vīrapāma̍ti-ndurma̠ti-mbādha̍mānāḥ । rā̠yaspōṣē̍ ya̠jñapa̍ti-mā̠bhaja̍ntīḥ ॥ rā̠yaspōṣē̠ adhi̍ ya̠jñō a̍sthā̠-thsami̍ddhē a̠gnāvadhi̍ māmahā̠naḥ । u̠kthapa̍tra̠ īḍyō̍ gṛbhī̠tasta̠pta-ṅgha̠rma-mpa̍ri̠gṛhyā̍yajanta ॥ ū̠rjā ya-dya̠jñamaśa̍manta dē̠vā daivyā̍ya dha̠rtrē jōṣṭrē̎ । dē̠va̠śrī-śśrīma̍ṇā-śśa̠tapa̍yāḥ [dē̠va̠śrī-śśrīma̍ṇā-śśa̠tapa̍yāḥ, pa̠ri̠gṛhya̍] 13
pari̠gṛhya̍ dē̠vā ya̠jñamā̍yann ॥ sūrya̍raśmi̠r̠hari̍kēśaḥ pu̠rastā̎-thsavi̠tā jyōti̠ruda̍yā̠gṃ̠ aja̍sram । tasya̍ pū̠ṣā pra̍sa̠vaṃ yā̍ti dē̠va-ssa̠paṃśya̠n viśvā̠ bhuva̍nāni gō̠pāḥ ॥ dē̠vā dē̠vēbhyō̍ addhva̠ryantō̍ asthurvī̠tagṃ śa̍mi̠trē śa̍mi̠tā ya̠jaddhyai̎ । tu̠rīyō̍ ya̠jñō yatra̍ ha̠vyamēti̠ tata̍ḥ pāva̠kā ā̠śiṣō̍ nō juṣantām ॥ vi̠māna̍ ē̠ṣa di̠vō maddhya̍ āsta āpapri̠vā-nrōda̍sī a̠ntari̍kṣam । sa vi̠śvāchī̍ra̠bhi- [sa vi̠śvāchī̍ra̠bhi, cha̠ṣṭē̠ ghṛ̠tāchī̍ranta̠rā] 14
-cha̍ṣṭē ghṛ̠tāchī̍ranta̠rā pūrva̠mapa̍ra-ñcha kē̠tum ॥ u̠kṣā sa̍mu̠drō a̍ru̠ṇa-ssu̍pa̠rṇaḥ pūrva̍sya̠ yōni̍-mpi̠turā vi̍vēśa । maddhyē̍ di̠vō nihi̍ta̠ḥ pṛśñi̠raśmā̠ vi cha̍kramē̠ raja̍saḥ pā̠tyantau̎ ॥ indra̠ṃ viśvā̍ avīvṛdhan-thsamu̠dravya̍chasa̠-ṅgira̍ḥ । ra̠thīta̍magṃ rathī̠nāṃ vājā̍nā̠gṃ̠ satpa̍ti̠-mpati̎m ॥ su̠mna̠hūrya̠jñō dē̠vāgṃ ā cha̍ vakṣa̠dyakṣa̍da̠gnirdē̠vō dē̠vāgṃ ā cha̍ vakṣat ॥ vāja̍sya mā prasa̠vēnō̎-dgrā̠bhēṇō-da̍grabhīt । athā̍ sa̠patnā̠gṃ̠ indrō̍ mē nigrā̠bhēṇādha̍rāgṃ akaḥ ॥ u̠dgrā̠bha-ñcha̍ nigrā̠bha-ñcha̠ brahma̍ dē̠vā a̍vīvṛdhann । athā̍ sa̠patnā̍nindrā̠gnī mē̍ viṣū̠chīnā̠n vya̍syatām ॥ 15 ॥
(dē̠vāḥ – śa̠tapa̍yā – a̠bhi – vāja̍sya̠ – ṣaḍvigṃ̍śatiścha ) (a. 3)
ā̠śu-śśiśā̍nō vṛṣa̠bhō na yu̠ddhmō gha̍nāgha̠naḥ, kṣōbha̍ṇa-ścharṣaṇī̠nām । sa̠ṅkranda̍nō-‘nimi̠ṣa ē̍ka vī̠ra-śśa̠tagṃ sēnā̍ ajaya-thsā̠kamindra̍ḥ ॥ sa̠ṅkranda̍nēnā nimi̠ṣēṇa̍ ji̠ṣṇunā̍ yutkā̠rēṇa̍ duśchyava̠nēna̍ dhṛ̠ṣṇunā̎ । tadindrē̍ṇa jayata̠ ta-thsa̍haddhva̠ṃ yudhō̍ nara̠ iṣu̍hastēna̠ vṛṣṇā̎ ॥ sa iṣu̍hastai̠-ssa ni̍ṣa̠ṅgibhi̍rva̠śī saggsra̍ṣṭā̠ sa yudha̠ indrō̍ ga̠ṇēna̍ । sa̠gṃ̠sṛ̠ṣṭa̠ji-thsō̍ma̠pā bā̍huśa̠rdhyū̎rdhvadha̍nvā̠ prati̍hitābhi̠rastā̎ ॥ bṛha̍spatē̠ pari̍ dīyā̠ [pari̍ dīya, rathē̍na] 16
rathē̍na rakṣō̠hā ‘mitrāgṃ̍ apa̠ bādha̍mānaḥ । pra̠bha̠ñjan-thsēnā̎ḥ pramṛ̠ṇō yu̠dhā jaya̍nna̠smāka̍-mēddhyavi̠tā rathā̍nām ॥ gō̠tra̠bhida̍-ṅgō̠vida̠ṃ vajra̍bāhu̠-ñjaya̍nta̠majma̍ pramṛ̠ṇanta̠-mōja̍sā । i̠magṃ sa̍jātā̠ anu̍vīra-yaddhva̠mindragṃ̍ sakhā̠yō-‘nu̠ sagṃ ra̍bhaddhvam ॥ ba̠la̠vi̠jñā̠yaḥ-sthavi̍ra̠ḥ pravī̍ra̠-ssaha̍svān. vā̠jī saha̍māna u̠graḥ । a̠bhivī̍rō a̠bhisa̍tvā sahō̠jā jaitra̍mindra̠ ratha̠māti̍ṣṭha gō̠vit ॥ a̠bhi gō̠trāṇi̠ saha̍sā̠ gāha̍mānō-‘dā̠yō [gāha̍mānō-‘dā̠yaḥ, vī̠ra-śśa̠tama̍nyu̠rindra̍ḥ ।] 17
vī̠ra-śśa̠tama̍nyu̠rindra̍ḥ । du̠śchya̠va̠naḥ pṛ̍tanā̠ṣāḍa̍ yu̠ddhyō̎-smāka̠gṃ̠ sēnā̍ avatu̠ pra yu̠thsu ॥ indra̍ āsāṃ-nē̠tā bṛha̠spati̠ rdakṣi̍ṇā ya̠jñaḥ pu̠ra ē̍tu̠ sōma̍ḥ । dē̠va̠sē̠nānā̍-mabhibhañjatī̠nā-ñjaya̍ntīnā-mma̠rutō̍ ya̠ntvagrē̎ ॥ indra̍sya̠ vṛṣṇō̠ varu̍ṇasya̠ rājña̍ ādi̠tyānā̎-mma̠rutā̠gṃ̠ śardha̍ u̠gram । ma̠hāma̍nasā-mbhuvanachya̠vānā̠-ṅghōṣō̍ dē̠vānā̠-ñjaya̍tā̠ muda̍sthāt ॥ a̠smāka̠-mindra̠-ssamṛ̍tēṣu dhva̠jēṣva̠smāka̠ṃ yā iṣa̍va̠stā ja̍yantu । 18
a̠smāka̍ṃ vī̠rā utta̍rē bhavantva̠smānu̍ dēvā avatā̠ havē̍ṣu ॥ uddha̍rṣaya maghava̠nnā-yu̍dhā̠-nyuthsatva̍nā-mmāma̠kānā̠-mmahāgṃ̍si । udvṛ̍trahan vā̠jinā̠ṃ vāji̍nā̠nyu-drathā̍nā̠-ñjaya̍tāmētu̠ ghōṣa̍ḥ ॥ upa̠ prēta̠ jaya̍tā narassthi̠rā va̍-ssantu bā̠hava̍ḥ । indrō̍ va̠-śśarma̍ yachCha tvanā-dhṛ̠ṣyā yathāsa̍tha ॥ ava̍sṛṣṭā̠ parā̍ pata̠ śara̍vyē̠ brahma̍ sagṃśitā । gachChā̠-‘mitrā̠-npra- [gachChā̠-‘mitrā̠-npra, vi̠śa̠ maiṣā̠-] 19
-vi̍śa̠ maiṣā̠-ṅkañcha̠nōchChi̍ṣaḥ ॥ marmā̍ṇi tē̠ varma̍bhiśChādayāmi̠ sōma̍stvā̠ rājā̠ ‘mṛtē̍nā̠bhi-va̍stām । u̠rōrvarī̍yō̠ vari̍vastē astu̠ jaya̍nta̠-ntvāmanu̍ madantu dē̠vāḥ ॥ yatra̍ bā̠ṇā-ssa̠mpata̍nti kumā̠rā vi̍śi̠khā i̍va । indrō̍ na̠statra̍ vṛtra̠hā vi̍śvā̠hā śarma̍ yachChatu ॥ 20 ॥
(dī̠yā̠ – ‘dā̠yō – ja̍yantva̠ – mitrā̠-npra – cha̍tvāri̠gṃ̠śachcha̍) (a. 4)
prāchī̠manu̍ pra̠diśa̠-mprēhi̍ vi̠dvāna̠gnēra̍gnē pu̠rō a̍gnirbhavē̠ha । viśvā̠ āśā̠ dīdyā̍nō̠ vi bhā̠hyūrja̍-nnō dhēhi dvi̠padē̠ chatu̍ṣpadē ॥ krama̍ddhvama̠gninā̠ nāka̠mukhya̠gṃ̠ hastē̍ṣu̠ bibhra̍taḥ । di̠vaḥ pṛ̠ṣṭhagṃ suva̍rga̠tvā mi̠śrā dē̠vēbhi̍rāddhvam ॥ pṛ̠thi̠vyā a̠hamuda̠ntari̍kṣa̠-mā-‘ru̍ha-ma̠ntari̍kṣā̠-ddiva̠mā-‘ru̍ham । di̠vō nāka̍sya pṛ̠ṣṭhā-thsuva̠rjyōti̍ragā- [pṛ̠ṣṭhā-thsuva̠rjyōti̍ragām, a̠ham ।] 21
-ma̠ham ॥ suva̠ryantō̠ nāpē̎kṣanta̠ ā dyāgṃ rō̍hanti̠ rōda̍sī । ya̠jñaṃ yē vi̠śvatō̍dhāra̠gṃ̠ suvi̍dvāgṃsō vitēni̠rē ॥ agnē̠ prēhi̍ pratha̠mō dē̍vaya̠tā-ñchakṣu̍rdē̠vānā̍mu̠ta martyā̍nām । iya̍kṣamāṇā̠ bhṛgu̍bhi-ssa̠jōṣā̠-ssuva̍ryantu̠ yaja̍mānā-ssva̠sti ॥ naktō̠ṣāsā̠ sama̍nasā̠ virū̍pē dhā̠payē̍tē̠ śiśu̠mēkagṃ̍ samī̠chī । dyāvā̠ kṣāmā̍ ru̠kmō a̠ntarvi bhā̍ti dē̠vā a̠gni-ndhā̍raya-ndraviṇō̠dāḥ ॥ agnē̍ sahasrākṣa [agnē̍ sahasrākṣa, śa̠ta̠mū̠rdha̠ñCha̠ta-ntē̎] 22
śatamūrdhañCha̠ta-ntē̎ prā̠ṇā-ssa̠hasra̍mapā̠nāḥ । tvagṃ sā̍ha̠srasya̍ rā̠ya ī̍śiṣē̠ tasmai̍ tē vidhēma̠ vājā̍ya̠ svāhā̎ ॥ su̠pa̠rṇō̍-‘si ga̠rutmā̎-npṛthi̠vyāgṃ sī̍da pṛ̠ṣṭhē pṛ̍thi̠vyā-ssī̍da bhā̠sā-‘ntari̍kṣa̠mā pṛ̍ṇa̠ jyōti̍ṣā̠ diva̠mutta̍bhāna̠ tēja̍sā̠ diśa̠ u-ddṛgṃ̍ha ॥ ā̠juhvā̍na-ssu̠pratī̍kaḥ pu̠rastā̠dagnē̠ svāṃ yōni̠mā sī̍da sā̠ddhyā । a̠smin-thsa̠dhasthē̠ addhyutta̍rasmi̠n viśvē̍ dēvā̠ [addhyutta̍rasmi̠n viśvē̍ dēvāḥ, yaja̍mānaścha sīdata ।] 23
yaja̍mānaścha sīdata ॥ prēddhō̍ agnē dīdihi pu̠rō nō-‘ja̍srayā sū̠rmyā̍ yaviṣṭha । tvāgṃ śaśva̍nta̠ upa̍ yanti̠ vājā̎ḥ ॥ vi̠dhēma̍ tē para̠mē janma̍nnagnē vi̠dhēma̠ stōmai̠rava̍rē sa̠dhasthē̎ । yasmā̠-dyōnē̍ru̠dāri̍thā̠ yajē̠ ta-mpratvē ha̠vīgṃṣi̍ juhurē̠ sami̍ddhē ॥ tāgṃ sa̍vi̠turvarē̎ṇyasya chi̠trāmā-‘haṃ vṛ̍ṇē suma̠tiṃ vi̠śvaja̍nyām । yāma̍sya̠ kaṇvō̠ adu̍ha̠-tprapī̍nāgṃ sa̠hasra̍dhārā̠- [sa̠hasra̍dhārām, paya̍sā ma̠hī-ṅgām ।] 24
-mpaya̍sā ma̠hī-ṅgām ॥ sa̠pta tē̍ agnē sa̠midha̍-ssa̠pta ji̠hvā-ssa̠ptarṣa̍ya-ssa̠pta dhāma̍ pri̠yāṇi̍ । sa̠pta hōtrā̎-ssapta̠dhā tvā̍ yajanti sa̠pta yōnī̠rā pṛ̍ṇasvā ghṛ̠tēna̍ ॥ ī̠dṛ-ñchā̎nyā̠dṛ-ñchai̍tā̠dṛñcha̍ prati̠dṛ-ñcha̍ mi̠taścha̠ sammi̍taścha̠ sabha̍rāḥ ॥ śu̠krajyō̍tiścha chi̠trajyō̍tiścha sa̠tyajyō̍tiścha̠ jyōti̍ṣmāgścha sa̠tyaścha̍rta̠pāśchātyagṃ̍hāḥ । 25
ṛ̠ta̠jichcha̍ satya̠jichcha̍ sēna̠jichcha̍ su̠ṣēṇa̠śchāntya̍mitraścha dū̠rē a̍mitraścha ga̠ṇaḥ ॥ ṛ̠taścha̍ sa̠tyaścha̍ dhru̠vaścha̍ dha̠ruṇa̍ścha dha̠rtā cha̍ vidha̠rtā cha̍ vidhāra̠yaḥ ॥ ī̠dṛkṣā̍sa ētā̠dṛkṣā̍sa ū̠ ṣuṇa̍-ssa̠dṛkṣā̍sa̠ḥ prati̍sadṛkṣāsa̠ ēta̍na । mi̠tāsa̍ścha̠ sammi̍tāsaścha na ū̠tayē̠ sabha̍rasō marutō ya̠jñē a̠sminnindra̠-ndaivī̠rviśō̍ ma̠rutō-‘nu̍vartmānō̠ yathēndra̠-ndaivī̠rviśō̍ ma̠rutō-‘nu̍vartmāna ē̠vami̠maṃ yaja̍māna̠-ndaivī̎ścha̠ viśō̠ mānu̍ṣī̠śchānu̍vartmānō bhavantu ॥ 26 ॥
(a̠gā̠gṃ̠ – sa̠ha̠srā̠kṣa̠ – dē̠vā̠ḥ – sa̠hasra̍dhārā̠ – matyagṃ̍hā̠ – anu̍vartmāna̠ḥ – ṣōḍa̍śa cha) (a. 5)
jī̠mūta̍syēva bhavati̠ pratī̍ka̠ṃ yadva̠rmī yāti̍ sa̠madā̍mu̠pasthē̎ । anā̍viddhayā ta̠nuvā̍ jaya̠ tvagṃ sa tvā̠ varma̍ṇō mahi̠mā pi̍partu ॥ dhanva̍nā̠ gā dhanva̍nā̠-”ji-ñja̍yēma̠ dhanva̍nā tī̠vrā-ssa̠madō̍ jayēma । dhanu̠-śśatrō̍rapakā̠ma-ṅkṛ̍ṇōti̠ dhanva̍nā̠ sarvā̎ḥ pra̠diśō̍ jayēma ॥ va̠kṣyantī̠vēdā ga̍nīganti̠ karṇa̍-mpri̠yagṃ sakhā̍ya-mpariṣasvajā̠nā । yōṣē̍va śiṅktē̠ vita̠tā-‘dhi̠ dhanva̠- [dhanvann̍, jyā i̠yagṃ] 27
-ñjyā i̠yagṃ sama̍nē pā̠raya̍ntī ॥ tē ā̠chara̍ntī̠ sama̍nēva̠ yōṣā̍ mā̠tēva̍ pu̠tra-mbi̍bhṛtāmu̠pasthē̎ । apa̠ śatrūn̍ viddhyatāgṃ saṃvidā̠nē ārtnī̍ i̠mē vi̍ṣphu̠rantī̍ a̠mitrān̍ ॥ ba̠hvī̠nā-mpi̠tā ba̠hura̍sya pu̠traśchi̠śchā kṛ̍ṇōti̠ sama̍nā-‘va̠gatya̍ । i̠ṣu̠dhi-ssaṅkā̠ḥ pṛta̍nāścha̠ sarvā̎ḥ pṛ̠ṣṭhē nina̍ddhō jayati̠ prasū̍taḥ ॥ rathē̠ tiṣṭha̍-nnayati vā̠jina̍ḥ pu̠rō yatra̍yatra kā̠maya̍tē suṣāra̠thiḥ । a̠bhīśū̍nā-mmahi̠māna̍- [mahi̠māna̎m, pa̠nā̠ya̠ta̠ mana̍ḥ] 28
-mpanāyata̠ mana̍ḥ pa̠śchādanu̍ yachChanti ra̠śmaya̍ḥ ॥ tī̠vrā-nghōṣā̎n kṛṇvatē̠ vṛṣa̍pāṇa̠yō-‘śvā̠ rathē̍bhi-ssa̠ha vā̠jaya̍ntaḥ । a̠va̠krāma̍nta̠ḥ prapa̍daira̠mitrā̎n kṣi̠ṇanti̠ śatrū̠gṃ̠rana̍pavyayantaḥ ॥ ra̠tha̠vāha̍nagṃ ha̠vira̍sya̠ nāma̠ yatrā-”yu̍dha̠-nnihi̍tamasya̠ varma̍ । tatrā̠ ratha̠mupa̍ śa̠gmagṃ sa̍dēma vi̠śvāhā̍ va̠yagṃ su̍mana̠syamā̍nāḥ ॥ svā̠du̠ṣa̠gṃ̠ sada̍ḥ pi̠tarō̍ vayō̠dhāḥ kṛ̍chChrē̠śrita̠-śśaktī̍vantō gabhī̠rāḥ । chi̠trasē̍nā̠ iṣu̍balā̠ amṛ̍ddhrā-ssa̠tōvī̍rā u̠ravō̎ vrātasā̠hāḥ ॥ brāhma̍ṇāsa̠ḥ [brāhma̍ṇāsaḥ, pita̍ra̠-] 29
pita̍ra̠-ssōmyā̍sa-śśi̠vē nō̠ dyāvā̍pṛthi̠vī a̍nē̠hasā̎ । pū̠ṣā na̍ḥ pātu duri̠tādṛ̍tāvṛdhō̠ rakṣā̠ māki̍rnō a̠ghaśagṃ̍sa īśata ॥ su̠pa̠rṇaṃ va̍stē mṛ̠gō a̍syā̠ dantō̠ gōbhi̠-ssanna̍ddhā patati̠ prasū̍tā । yatrā̠ nara̠-ssa-ñcha̠ vi cha̠ drava̍nti̠ tatrā̠smabhya̠miṣa̍va̠-śśarma̍ yagṃsann ॥ ṛjī̍tē̠ pari̍ vṛṅgdhi̠ nō-‘śmā̍ bhavatu nasta̠nūḥ । sōmō̠ adhi̍ bravītu̠ nō-‘di̍ti̠- [nō-‘di̍tiḥ, śarma̍ yachChatu ।] 30
-śśarma̍ yachChatu ॥ ā ja̍ṅghanti̠ sānvē̍ṣā-ñja̠ghanā̠gṃ̠ upa̍ jighnatē । aśvā̍jani̠ prachē̍ta̠sō-‘śvā̎m-thsa̠mathsu̍ chōdaya ॥ ahi̍riva bhō̠gaiḥ paryē̍ti bā̠hu-ñjyāyā̍ hē̠ti-mpa̍ri̠bādha̍mānaḥ । ha̠sta̠ghnō viśvā̍ va̠yunā̍ni vi̠dvā-npumā̠-npumāgṃ̍sa̠-mpari̍ pātu vi̠śvata̍ḥ ॥ vana̍spatē vī̠ḍva̍ṅgō̠ hi bhū̠yā a̠sma-thsa̍khā pra̠tara̍ṇa-ssu̠vīra̍ḥ । gōbhi̠-ssanna̍ddhō asi vī̠ḍaya̍svā-”sthā̠tā tē̍ jayatu̠ jētvā̍ni ॥ di̠vaḥ pṛ̍thi̠vyāḥ pa- [pari̍, ōja̠ u-dbhṛ̍ta̠ṃ-] 31
-ryōja̠ u-dbhṛ̍ta̠ṃ vana̠spati̍bhya̠ḥ paryābhṛ̍ta̠gṃ̠ saha̍ḥ । a̠pāmō̠jmāna̠-mpari̠ gōbhi̠rāvṛ̍ta̠mindra̍sya̠ vajragṃ̍ ha̠viṣā̠ ratha̍ṃ yaja ॥ indra̍sya̠ vajrō̍ ma̠rutā̠manī̍ka-mmi̠trasya̠ garbhō̠ varu̍ṇasya̠ nābhi̍ḥ । sēmā-nnō̍ ha̠vyadā̍ti-ñjuṣā̠ṇō dēva̍ ratha̠ prati̍ ha̠vyā gṛ̍bhāya ॥ upa̍ śvāsaya pṛthi̠vīmu̠ta dyā-mpu̍ru̠trā tē̍ manutā̠ṃ viṣṭhi̍ta̠-ñjaga̍t । sa du̍ndubhē sa̠jūrindrē̍ṇa dē̠vairdū̠rā- [dē̠vairdū̠rāt, davī̍yō̠] 32
-ddavī̍yō̠ apa̍sēdha̠ śatrūn̍ ॥ ā kra̍ndaya̠ bala̠mōjō̍ na̠ ā dhā̠ niṣṭa̍nihi duri̠tā bādha̍mānaḥ । apa̍ prōtha dundubhē du̠chChunāgṃ̍ i̠ta indra̍sya mu̠ṣṭira̍si vī̠ḍaya̍sva ॥ ā-‘mūra̍ja pra̠tyāva̍rtayē̠māḥ kē̍tu̠ma-ddu̍ndu̠bhi rvā̍vadīti । samaśva̍parṇā̠śchara̍nti nō̠ narō̠-‘smāka̍mindra ra̠thinō̍ jayantu ॥ 33 ॥
(dhanva̍n – mahi̠māna̠ṃ – brāhma̍ṇā̠sō – ‘di̍tiḥ – pṛthi̠vyāḥ pari̍ – dū̠rā – dēka̍chatvārigṃśachcha) (a. 6)
yadakra̍ndaḥ pratha̠ma-ñjāya̍māna u̠dyan-thsa̍mu̠drādu̠ta vā̠ purī̍ṣāt । śyē̠nasya̍ pa̠kṣā ha̍ri̠ṇasya̍ bā̠hū u̍pa̠stutya̠-mmahi̍ jā̠ta-ntē̍ arvann ॥ ya̠mēna̍ da̠tta-ntri̠ta ē̍namāyuna̠gindra̍ ēṇa-mpratha̠mō addhya̍tiṣṭhat । ga̠ndha̠rvō a̍sya raśa̠nāma̍-gṛbhṇā̠-thsūrā̠daśva̍ṃ vasavō̠ nira̍taṣṭa ॥ asi̍ ya̠mō asyā̍di̠tyō a̍rva̠nnasi̍ tri̠tō guhyē̍na vra̠tēna̍ । asi̠ sōmē̍na sa̠mayā̠ vipṛ̍kta [vipṛ̍ktaḥ, ā̠hustē̠ trīṇi̍ di̠vi bandha̍nāni ।] 34
ā̠hustē̠ trīṇi̍ di̠vi bandha̍nāni ॥ trīṇi̍ ta āhurdi̠vi bandha̍nāni̠ trīṇya̠phsu trīṇya̠nta-ssa̍mu̠drē । u̠tēva̍ mē̠ varu̍ṇaśChan-thsyarva̠n̠. yatrā̍ ta ā̠huḥ pa̍ra̠ma-ñja̠nitra̎m ॥ i̠mā tē̍ vājinnava̠mārja̍nānī̠mā śa̠phānāgṃ̍ sani̠turni̠dhānā̎ । atrā̍ tē bha̠drā ra̍śa̠nā a̍paśyamṛ̠tasya̠ yā a̍bhi̠rakṣa̍nti gō̠pāḥ ॥ ā̠tmāna̍-ntē̠ mana̍sā̠-”rāda̍jānāma̠vō di̠vā [ ] 35
pa̠taya̍nta-mpata̠ṅgam । śirō̍ apaśya-mpa̠thibhi̍-ssu̠gēbhi̍rarē̠ṇubhi̠rjēha̍māna-mpata̠tri ॥ atrā̍ tē rū̠pamu̍tta̠mama̍paśya̠-ñjigī̍ṣamāṇami̠ṣa ā pa̠dē gōḥ । ya̠dā tē̠ martō̠ anu̠ bhōga̠māna̠ḍādi-dgrasi̍ṣṭha̠ ōṣa̍dhīrajīgaḥ ॥ anu̍ tvā̠ rathō̠ anu̠ maryō̍ arva̠nnanu̠ gāvō-‘nu̠ bhaga̍ḥ ka̠nīnā̎m । anu̠ vrātā̍sa̠stava̍ sa̠khyamī̍yu̠ranu̍ dē̠vā ma̍mirē vī̠rya̍- [vī̠rya̎m, tē ।] 36
-ntē ॥ hira̍ṇyaśṛ̠ṅgō-‘yō̍ asya̠ pādā̠ manō̍javā̠ ava̍ra̠ indra̍ āsīt । dē̠vā ida̍sya havi̠radya̍māya̠n̠. yō arva̍nta-mpratha̠mō a̠ddhyati̍ṣṭhat ॥ ī̠rmāntā̍sa̠-ssili̍kamaddhyamāsa̠-ssagṃ śūra̍ṇāsō di̠vyāsō̠ atyā̎ḥ । ha̠gṃ̠sā i̍va śrēṇi̠śō ya̍tantē̠ yadākṣi̍ṣurdi̠vya-majma̠maśvā̎ḥ ॥ tava̠ śarī̍ra-mpatayi̠ṣṇva̍rva̠-ntava̍ chi̠ttaṃ vāta̍ iva̠ dhrajī̍mān । tava̠ śṛṅgā̍ṇi̠ viṣṭhi̍tā puru̠trā-‘ra̍ṇyēṣu̠ jarbhu̍rāṇā charanti ॥ upa̠ [upa̍, prāgā̠chChasa̍naṃ-] 37
prāgā̠chChasa̍naṃ vā̠jyarvā̍ dēva̠drīchā̠ mana̍sā̠ dīddhyā̍naḥ । a̠jaḥ pu̠rō nī̍yatē̠ nābhi̍ra̠syānu̍ pa̠śchā-tka̠vayō̍ yanti rē̠bhāḥ ॥ upa̠ prāgā̎-tpara̠maṃ ya-thsa̠dhastha̠marvā̠gṃ̠ achChā̍ pi̠tara̍-mmā̠tara̍-ñcha । a̠dyā dē̠vān juṣṭa̍tamō̠ hi ga̠myā athā-”śā̎stē dā̠śuṣē̠ vāryā̍ṇi ॥ 38 ॥
(vipṛ̍ktō – di̠vā – vī̠rya̍ – mupai – kā̠nnacha̍tvāri̠gṃ̠śachcha̍) (a. 7)
mā nō̍ mi̠trō varu̍ṇō arya̠mā-”yurindra̍ ṛbhu̠kṣā ma̠ruta̠ḥ pari̍ khyann । ya-dvā̠jinō̍ dē̠vajā̍tasya̠ saptē̎ḥ prava̠kṣyāmō̍ vi̠dathē̍ vī̠ryā̍ṇi ॥ yanni̠rṇijā̠ rēkṇa̍sā̠ prāvṛ̍tasya rā̠ti-ṅgṛ̍bhī̠tā-mmu̍kha̠tō naya̍nti । suprā̍ṅa̠jō mēmya̍-dvi̠śvarū̍pa indrāpū̠ṣṇōḥ pri̠yamapyē̍ti̠ pātha̍ḥ ॥ ē̠ṣa chChāga̍ḥ pu̠rō aśvē̍na vā̠jinā̍ pū̠ṣṇō bhā̠gō nī̍yatē vi̠śvadē̎vyaḥ । a̠bhi̠priya̠ṃ ya-tpu̍rō̠ḍāśa̠marva̍tā̠ tvaṣṭē- [tvaṣṭēt, ē̠na̠gṃ̠ sau̠śra̠va̠sāya̍ jinvati ।] 39
-dē̍nagṃ sauśrava̠sāya̍ jinvati ॥ yaddha̠viṣya̍mṛtu̠śō dē̍va̠yāna̠-ntrirmānu̍ṣā̠ḥ paryaśva̠-nnaya̍nti । atrā̍ pū̠ṣṇaḥ pra̍tha̠mō bhā̠ga ē̍ti ya̠jña-ndē̠vēbhya̍ḥ prativē̠daya̍nna̠jaḥ ॥ hōtā̎-‘ddhva̠ryurāva̍yā agnimi̠ndhō grā̍vagrā̠bha u̠ta śaggstā̠ suvi̍praḥ । tēna̍ ya̠jñēna̠ sva̍raṅkṛtēna̠ svi̍ṣṭēna va̠kṣaṇā̠ ā pṛ̍ṇaddhvam ॥ yū̠pa̠vra̠skā u̠ta yē yū̍pavā̠hāścha̠ṣāla̠ṃ yē a̍śvayū̠pāya̠ takṣa̍ti । yē chārva̍tē̠ pacha̍nagṃ sa̠bhaṃra̍ntyu̠tō [ ] 40
tēṣā̍-ma̠bhigū̎rtirna invatu ॥ upa̠ prāgā̎-thsu̠manmē̍-‘dhāyi̠ manma̍ dē̠vānā̠māśā̠ upa̍ vī̠tapṛ̍ṣṭhaḥ । anvē̍na̠ṃ viprā̠ ṛṣa̍yō madanti dē̠vānā̎-mpu̠ṣṭē cha̍kṛmā su̠bandhu̎m ॥ ya-dvā̠jinō̠ dāma̍ sa̠dānna̠marva̍tō̠ yā śī̍rṣa̠ṇyā̍ raśa̠nā rajju̍rasya । yadvā̍ ghāsya̠ prabhṛ̍tamā̠syē̍ tṛṇa̠gṃ̠ sarvā̠ tā tē̠ api̍ dē̠vēṣva̍stu ॥ yadaśva̍sya kra̠viṣō̠ [yadaśva̍sya kra̠viṣa̍ḥ, makṣi̠kā-”śa̠] 41
makṣi̠kā-”śa̠ yadvā̠ svarau̠ svadhi̍tau ri̠ptamasti̍ । yaddhasta̍yō-śśami̠turyanna̠khēṣu̠ sarvā̠ tā tē̠ api̍ dē̠vēṣva̍stu ॥ yadūva̍ddhyamu̠dara̍syāpa̠vāti̠ ya ā̠masya̍ kra̠viṣō̍ ga̠ndhō asti̍ । su̠kṛ̠tā tachCha̍mi̠tāra̍ḥ kṛṇvantū̠ta mēdhagṃ̍ śṛta̠pāka̍-mpachantu ॥ ya-ttē̠ gātrā̍da̠gninā̍ pa̠chyamā̍nāda̠bhi śūla̠-nniha̍tasyāva̠dhāva̍ti । mā ta-dbhūmyā̠mā śri̍ṣa̠ ( )-nmā tṛṇē̍ṣu dē̠vēbhya̠stadu̠śadbhyō̍ rā̠tama̍stu ॥ 42 ॥
(i – du̠tō – kra̠viṣa̍ḥ – śriṣath – sa̠pta cha̍) (a. 8)
yē vā̠jina̍-mpari̠paśya̍nti pa̠kvaṃ ya ī̍mā̠hu-ssu̍ra̠bhirnirha̠rēti̍ । yē chārva̍tō māgṃsabhi̠kṣāmu̠pāsa̍ta u̠tō tēṣā̍ma̠bhigū̎rtirna invatu ॥ yannīkṣa̍ṇa-mmā̠g̠spacha̍nyā u̠khāyā̠ yā pātrā̍ṇi yū̠ṣṇa ā̠sēcha̍nāni । ū̠ṣma̠ṇyā̍-‘pi̠dhānā̍ charū̠ṇāma̠ṅkā-ssū̠nāḥ pari̍ bhūṣa̠ntyaśva̎m ॥ ni̠krama̍ṇa-nni̠ṣada̍naṃ vi̠varta̍na̠ṃ yachcha̠ paḍbī̍śa̠marva̍taḥ । yachcha̍ pa̠pau yachcha̍ ghā̠si- [ghā̠sim, ja̠ghāsa̠ sarvā̠ tā] 43
-ñja̠ghāsa̠ sarvā̠ tā tē̠ api̍ dē̠vēṣva̍stu ॥ mā tvā̠-‘gni-rdhva̍nayi-ddhū̠maga̍ndhi̠rmōkhā bhrāja̍ntya̠bhi vi̍kta̠ jaghri̍ḥ । i̠ṣṭaṃ vī̠tama̠bhigū̎rta̠ṃ vaṣa̍ṭkṛta̠-nta-ndē̠vāsa̠ḥ prati̍ gṛbhṇa̠ntyaśva̎m ॥ yadaśvā̍ya̠ vāsa̍ upastṛ̠ṇantya̍dhīvā̠saṃ yā hira̍ṇyānyasmai । sa̠ndāna̠marva̍nta̠-mpaḍbī̍śa-mpri̠yā dē̠vēṣvā yā̍mayanti ॥ ya-ttē̍ sā̠dē maha̍sā̠ śūkṛ̍tasya̠ pārṣṇi̍yā vā̠ kaśa̍yā [vā̠ kaśa̍yā, vā̠ tu̠tōda̍ ।] 44
vā tu̠tōda̍ । sru̠chēva̠ tā ha̠viṣō̍ addhva̠rēṣu̠ sarvā̠ tā tē̠ brahma̍ṇā sūdayāmi ॥ chatu̍strigṃśa-dvā̠jinō̍ dē̠vaba̍ndhō̠-rvaṅkrī̠-raśva̍sya̠ svadhi̍ti̠-ssamē̍ti । achChi̍drā̠ gātrā̍ va̠yunā̍ kṛṇōta̠ paru̍ṣparuranu̠ghuṣyā̠ vi śa̍sta ॥ ēka̠stvaṣṭu̠raśva̍syā viśa̠stā dvā ya̠ntārā̍ bhavata̠statha̠rtuḥ । yā tē̠ gātrā̍ṇāmṛtu̠thā kṛ̠ṇōmi̠ tātā̠ piṇḍā̍nā̠-mpra ju̍hōmya̠gnau ॥ mā tvā̍ tapa- [tapat, pri̠ya ā̠tmā-] 45
-tpri̠ya ā̠tmā-‘pi̠yanta̠-mmā svadhi̍tista̠nuva̠ ā ti̍ṣṭhipa-ttē । mā tē̍ gṛ̠ddhnu-ra̍viśa̠stā-‘ti̠hāya̍ Chi̠drā gātrā̎ṇya̠sinā̠ mithū̍ kaḥ ॥ na vā u̍vē̠tanmri̍yasē̠ na ri̍ṣyasi dē̠vāgṃ idē̍ṣi pa̠thibhi̍-ssu̠gēbhi̍ḥ । harī̍ tē̠ yuñjā̠ pṛṣa̍tī abhūtā̠mupā̎sthā-dvā̠jī dhu̠ri rāsa̍bhasya ॥ su̠gavya̍-nnō vā̠jī svaśvi̍ya-mpu̠gṃ̠saḥ pu̠trāgṃ u̠ta vi̍śvā̠puṣagṃ̍ ra̠yim । a̠nā̠gā̠stva-nnō̠ adi̍tiḥ kṛṇōtu kṣa̠tra-nnō̠ aśvō̍ vanatāgṃ ha̠viṣmān̍ ॥ 46 ॥
(ghā̠siṃ-kaśa̍yā – tapa-d- ra̠yiṃ – nava̍ cha ) (a. 9)
(aśma̠n – ya i̠mō – dē̍na – mā̠śuḥ – prāchī̎m – jī̠mūta̍sya̠ – yadakra̍ndō̠ – mā nō̍ mi̠trō – yē vā̠jina̠ṃ – nava̍)
(aśma̍n – manō̠yuja̠ṃ – prāchī̠manu̠ – śarma̍ yachChatu̠ – tēṣā̍ma̠bhigū̎rti̠ḥ – ṣaṭcha̍tvārigṃśat)
(aśma̍n, ha̠viṣmān̍)
॥ hari̍ḥ ōm ॥
॥ kṛṣṇa yajurvēdīya taittirīya saṃhitāyā-ñchaturtha kāṇḍē ṣaṣṭhaḥ praśna-ssamāptaḥ ॥
ō-nnamaḥ paramātmanē , śrī mahāgaṇapatayē namaḥ , śrī gurubhyō namaḥ , ha̠ri̠ḥ ōṃ