ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ತೃತೀಯಕಾಣ್ಡೇ ಪ್ರಥಮಃ ಪ್ರಶ್ನಃ – ನ್ಯೂನಕರ್ಮಾಭಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಪ್ರ॒ಜಾಪ॑ತಿರಕಾಮಯತ ಪ್ರ॒ಜಾ-ಸ್ಸೃ॑ಜೇ॒ಯೇತಿ॒ ಸ ತಪೋ॑-ಽತಪ್ಯತ॒ ಸ ಸ॒ರ್ಪಾನ॑ಸೃಜತ॒ ಸೋ॑-ಽಕಾಮಯತ ಪ್ರ॒ಜಾ-ಸ್ಸೃ॑ಜೇ॒ಯೇತಿ॒ ಸದ್ವಿ॒ತೀಯ॑ಮತಪ್ಯತ॒ ಸ ವಯಾಗ್॑ಸ್ಯ ಸೃಜತ॒ ಸೋ॑-ಽಕಾಮಯತ ಪ್ರ॒ಜಾ-ಸ್ಸೃ॑ಜೇ॒ಯೇತಿ॒ ಸ ತೃ॒ತೀಯ॑ಮತಪ್ಯತ॒ ಸ ಏ॒ತ-ನ್ದೀ᳚ಖ್ಷಿತವಾ॒ದ-ಮ॑ಪಶ್ಯ॒-ತ್ತಮ॑ವದ॒-ತ್ತತೋ॒ ವೈ ಸ ಪ್ರ॒ಜಾ ಅ॑ಸೃಜತ॒ ಯ-ತ್ತಪ॑ಸ್ತ॒ಪ್ತ್ವಾ ದೀ᳚ಖ್ಷಿತವಾ॒ದಂ-ವಁದ॑ತಿ ಪ್ರ॒ಜಾ ಏ॒ವ ತದ್ಯಜ॑ಮಾನ- [ತದ್ಯಜ॑ಮಾನಃ, ಸೃ॒ಜ॒ತೇ॒ ಯದ್ವೈ] 1
-ಸ್ಸೃಜತೇ॒ ಯದ್ವೈ ದೀ᳚ಖ್ಷಿ॒ತೋ॑-ಽಮೇ॒ದ್ಧ್ಯ-ಮ್ಪಶ್ಯ॒ತ್ಯಪಾ᳚ಸ್ಮಾದ್ದೀ॒ಖ್ಷಾಕ್ರಾ॑ಮತಿ॒ ನೀಲ॑ಮಸ್ಯ॒ ಹರೋ॒ ವ್ಯೇ᳚ತ್ಯಬ॑ದ್ಧ॒-ಮ್ಮನೋ॑ ದ॒ರಿದ್ರ॒-ಞ್ಚಖ್ಷು॒-ಸ್ಸೂರ್ಯೋ॒ ಜ್ಯೋತಿ॑ಷಾ॒ಗ್॒ಶ್ರೇಷ್ಠೋ॒ ದೀಖ್ಷೇ॒ ಮಾ ಮಾ॑ಹಾಸೀ॒ರಿತ್ಯಾ॑ಹ॒ ನಾಸ್ಮಾ᳚ದ್ದೀ॒ಖ್ಷಾ-ಽಪ॑ಕ್ರಾಮತಿ॒ ನಾಸ್ಯ॒ ನೀಲ॒-ನ್ನ ಹರೋ॒ ವ್ಯೇ॑ತಿ॒ ಯದ್ವೈ ದೀ᳚ಖ್ಷಿ॒ತಮ॑ಭಿ॒ವರ್ಷ॑ತಿದಿ॒ವ್ಯಾ ಆಪೋ-ಽಶಾ᳚ನ್ತಾ॒ ಓಜೋ॒ ಬಲ॑-ನ್ದೀ॒ಖ್ಷಾ- [ಬಲ॑-ನ್ದೀ॒ಖ್ಷಾಮ್, ತಪೋ᳚-ಽಸ್ಯ॒-] 2
-ನ್ತಪೋ᳚-ಽಸ್ಯ॒-ನಿರ್ಘ್ನ॑ನ್ತ್ಯುನ್ದ॒ತೀ-ರ್ಬಲ॑-ನ್ಧ॒ತ್ತೌಜೋ॑ ಧತ್ತ॒ ಬಲ॑-ನ್ಧತ್ತ॒ ಮಾ ಮೇ॑ ದೀ॒ಖ್ಷಾ-ಮ್ಮಾ ತಪೋ॒ನಿರ್ವ॑ಧಿ॒ಷ್ಟೇತ್ಯಾ॑ಹೈ॒ ತದೇ॒ವ ಸರ್ವ॑ಮಾ॒ತ್ಮ-ನ್ಧ॑ತ್ತೇ॒ ನಾಸ್ಯೌಜೋ॒ ಬಲ॒-ನ್ನ ದೀ॒ಖ್ಷಾ-ನ್ನ ತಪೋ॒ನಿರ್ಘ್ನ॑ನ್ತ್ಯ॒ಗ್ನಿರ್ವೈ ದೀ᳚ಖ್ಷಿ॒ತಸ್ಯ॑ ದೇ॒ವತಾ॒ ಸೋ᳚-ಽಸ್ಮಾದೇ॒ತರ್ಹಿ॑ತಿ॒ರ ಇ॑ವ॒ ಯರ್ಹಿ॒ ಯಾತಿ॒ ತಮೀ᳚ಶ್ವ॒ರಗ್ಂ ರಖ್ಷಾಗ್ಂ॑ಸಿ॒ ಹನ್ತೋ᳚- [ಹನ್ತೋಃ᳚, ಭ॒ದ್ರಾದ॒ಭಿ-] 3
-ರ್ಭ॒ದ್ರಾದ॒ಭಿ-ಶ್ರೇಯಃ॒ ಪ್ರೇಹಿ॒ಬೃಹ॒ಸ್ಪತಿಃ॑ ಪುರ ಏ॒ತಾ ತೇ॑ ಅ॒ಸ್ತ್ವಿತ್ಯಾ॑ಹ॒ಬ್ರಹ್ಮ॒ ವೈ ದೇ॒ವಾನಾ॒-ಮ್ಬೃಹ॒ಸ್ಪತಿ॒ಸ್ತಮೇ॒ವಾನ್ವಾ ರ॑ಭತೇ॒ ಸ ಏ॑ನ॒ಗ್ಂ॒ ಸ-ಮ್ಪಾ॑ರಯ॒ತ್ಯೇ ದಮ॑ಗನ್ಮ ದೇವ॒ಯಜ॑ನ-ಮ್ಪೃಥಿ॒ವ್ಯಾ ಇತ್ಯಾ॑ಹ ದೇವ॒ಯಜ॑ನ॒ಗ್ಗ್॒ ಹ್ಯೇ॑ಷ ಪೃ॑ಥಿ॒ವ್ಯಾ ಆ॒ಗಚ್ಛ॑ತಿ॒ ಯೋ ಯಜ॑ತೇ॒ ವಿಶ್ವೇ॑ ದೇ॒ವಾ ಯದಜು॑ಷನ್ತ॒ ಪೂರ್ವ॒ ಇತ್ಯಾ॑ಹ॒ ವಿಶ್ವೇ॒ ಹ್ಯೇ॑ತದ್ದೇ॒ವಾ ಜೋ॒ಷಯ॑ನ್ತೇ॒ ಯದ್ಬ್ರಾ᳚ಹ್ಮ॒ಣಾ ಋ॑ಖ್ಸಾ॒ಮಾಭ್ಯಾಂ॒-ಯಁಜು॑ಷಾ ಸ॒ನ್ತರ॑ನ್ತ॒ ಇತ್ಯಾ॑ಹರ್ಖ್ಸಾ॒ಮಾಭ್ಯಾ॒ಗ್॒ ಹ್ಯೇ॑ಷ ಯಜು॑ಷಾ ಸ॒ನ್ತರ॑ತಿ॒ ಯೋ ಯಜ॑ತೇ ರಾ॒ಯಸ್ಪೋಷೇ॑ಣ॒ ಸಮಿ॒ಷಾ-ಮ॑ದೇ॒ಮೇತ್ಯಾ॑-ಹಾ॒-ಽಶಿಷ॑ಮೇ॒ವೈ ತಾಮಾ ಶಾ᳚ಸ್ತೇ ॥ 4 ॥
(ಯಜ॑ಮಾನೋ – ದೀ॒ಖ್ಷಾಗ್ಂ – ಹನ್ತೋ᳚ – ರ್ಬ್ರಾಹ್ಮ॒ಣಾ -ಶ್ಚತು॑ರ್ವಿಗ್ಂಶತಿಶ್ಚ) (ಅ. 1)
ಏ॒ಷ ತೇ॑ ಗಾಯ॒ತ್ರೋ ಭಾ॒ಗ ಇತಿ॑ ಮೇ॒ ಸೋಮಾ॑ಯ ಬ್ರೂತಾದೇ॒ಷ ತೇ॒ ತ್ರೈಷ್ಟು॑ಭೋ॒ ಜಾಗ॑ತೋ ಭಾ॒ಗ ಇತಿ॑ ಮೇ॒ ಸೋಮಾ॑ಯ ಬ್ರೂತಾಚ್ಛನ್ದೋ॒ಮಾನಾ॒ಗ್ಂ॒ ಸಾಮ್ರಾ᳚ಜ್ಯ-ಙ್ಗ॒ಚ್ಛೇತಿ॑ ಮೇ॒ ಸೋಮಾ॑ಯ ಬ್ರೂತಾ॒-ದ್ಯೋ ವೈ ಸೋಮ॒ಗ್ಂ॒ ರಾಜಾ॑ನ॒ಗ್ಂ॒ ಸಾಮ್ರಾ᳚ಜ್ಯಂ-ಲೋಁ॒ಕ-ಙ್ಗ॑ಮಯಿ॒ತ್ವಾ ಕ್ರೀ॒ಣಾತಿ॒ ಗಚ್ಛ॑ತಿ॒ ಸ್ವಾನಾ॒ಗ್ಂ॒ ಸಾಮ್ರಾ᳚ಜ್ಯ॒-ಞ್ಛನ್ದಾಗ್ಂ॑ಸಿ॒ ಖಲು॒ ವೈ ಸೋಮ॑ಸ್ಯ॒ ರಾಜ್ಞ॒-ಸ್ಸಾಮ್ರಾ᳚ಜ್ಯೋ ಲೋ॒ಕಃ ಪು॒ರಸ್ತಾ॒-ಥ್ಸೋಮ॑ಸ್ಯ ಕ್ರ॒ಯಾದೇ॒ವಮ॒ಭಿ ಮ॑ನ್ತ್ರಯೇತ॒ ಸಾಮ್ರಾ᳚ಜ್ಯಮೇ॒ವೈ- [ಸಾಮ್ರಾ᳚ಜ್ಯಮೇ॒ವ, ಏ॒ನಂ॒-ಲೋಁ॒ಕ-ಙ್ಗ॑ಮಯಿ॒ತ್ವಾ] 5
ನಂ॑-ಲೋಁ॒ಕ-ಙ್ಗ॑ಮಯಿ॒ತ್ವಾ ಕ್ರೀ॑ಣಾತಿ॒ ಗಚ್ಛ॑ತಿ॒ ಸ್ವಾನಾ॒ಗ್ಂ॒ ಸಾಮ್ರಾ᳚ಜ್ಯಂ॒-ಯೋಁ ವೈ ತಾ॑ನೂನ॒ಪ್ತ್ರಸ್ಯ॑ ಪ್ರತಿ॒ಷ್ಠಾಂ-ವೇಁದ॒ ಪ್ರತ್ಯೇ॒ವ ತಿ॑ಷ್ಠತಿ ಬ್ರಹ್ಮವಾ॒ದಿನೋ॑ ವದನ್ತಿ॒ ನ ಪ್ರಾ॒ಶ್ಞನ್ತಿ॒ ನ ಜು॑ಹ್ವ॒ತ್ಯಥ॒ ಕ್ವ॑ ತಾನೂನ॒ಪ್ತ್ರ-ಮ್ಪ್ರತಿ॑ ತಿಷ್ಠ॒ತೀತಿ॑ ಪ್ರ॒ಜಾಪ॑ತೌ॒ ಮನ॒ಸೀತಿ॑ ಬ್ರೂಯಾ॒-ತ್ತ್ರಿರವ॑ ಜಿಘ್ರೇ-ತ್ಪ್ರ॒ಜಾಪ॑ತೌ ತ್ವಾ॒ ಮನ॑ಸಿ ಜುಹೋ॒ಮೀತ್ಯೇ॒ಷಾ ವೈ ತಾ॑ನೂನ॒ಪ್ತ್ರಸ್ಯ॑ ಪ್ರತಿ॒ಷ್ಠಾ ಯ ಏ॒ವಂ-ವೇಁದ॒ ಪ್ರತ್ಯೇ॒ವ ತಿ॑ಷ್ಠತಿ॒ ಯೋ [ಪ್ರತ್ಯೇ॒ವ ತಿ॑ಷ್ಠತಿ॒ ಯಃ, ವಾ ಅ॑ದ್ಧ್ವ॒ರ್ಯೋಃ] 6
ವಾ ಅ॑ದ್ಧ್ವ॒ರ್ಯೋಃ ಪ್ರ॑ತಿ॒ಷ್ಠಾಂ-ವೇಁದ॒ ಪ್ರತ್ಯೇ॒ವ ತಿ॑ಷ್ಠತಿ॒ ಯತೋ॒ ಮನ್ಯೇ॒ತಾನ॑ಭಿಕ್ರಮ್ಯ ಹೋಷ್ಯಾ॒ಮೀತಿ॒ ತ-ತ್ತಿಷ್ಠ॒ನ್ನಾ ಶ್ರಾ॑ವಯೇದೇ॒ಷಾ ವಾ ಅ॑ದ್ಧ್ವ॒ರ್ಯೋಃ ಪ್ರ॑ತಿ॒ಷ್ಠಾ ಯ ಏ॒ವಂ-ವೇಁದ॒ ಪ್ರತ್ಯೇ॒ವ ತಿ॑ಷ್ಠತಿ॒ ಯದ॑ಭಿ॒ಕ್ರಮ್ಯ॑ ಜುಹು॒ಯಾ-ತ್ಪ್ರ॑ತಿ॒ಷ್ಠಾಯಾ॑ ಇಯಾ॒-ತ್ತಸ್ಮಾ᳚-ಥ್ಸಮಾ॒ನತ್ರ॒ ತಿಷ್ಠ॑ತಾ ಹೋತ॒ವ್ಯ॑-ಮ್ಪ್ರತಿ॑ಷ್ಠಿತ್ಯೈ॒ ಯೋ ವಾ ಅ॑ದ್ಧ್ವ॒ರ್ಯೋ-ಸ್ಸ್ವಂ-ವೇಁದ॒ ಸ್ವವಾ॑ನೇ॒ವ ಭ॑ವತಿ॒ ಸ್ರುಗ್ವಾ ಅ॑ಸ್ಯ॒ ಸ್ವಂ-ವಾಁ॑ಯ॒ವ್ಯ॑ಮಸ್ಯ॒ [ವಾ॑ಯ॒ವ್ಯ॑ಮಸ್ಯ, ಸ್ವ-ಞ್ಚ॑ಮ॒ಸೋ᳚-ಽಸ್ಯ॒] 7
ಸ್ವ-ಞ್ಚ॑ಮ॒ಸೋ᳚-ಽಸ್ಯ॒ ಸ್ವಂ-ಯಁದ್ವಾ॑ಯ॒ವ್ಯಂ॑-ವಾಁ ಚಮ॒ಸಂ-ವಾಁ-ಽನ॑ನ್ವಾರಭ್ಯಾ-ಽಽಶ್ರಾ॒ವಯೇ॒-ಥ್ಸ್ವಾದಿ॑ಯಾ॒-ತ್ತಸ್ಮಾ॑ ದನ್ವಾ॒ರಭ್ಯಾ॒ ಽಽಶ್ರಾವ್ಯ॒ಗ್ಗ್॒ ಸ್ವಾದೇ॒ವ ನೈತಿ॒ ಯೋ ವೈ ಸೋಮ॒ಮ- ಪ್ರ॑ತಿಷ್ಠಾಪ್ಯ ಸ್ತೋ॒ತ್ರ-ಮು॑ಪಾಕ॒ರೋತ್ಯ ಪ್ರ॑ತಿಷ್ಠಿತ॒-ಸ್ಸೋಮೋ॒ ಭವ॒ತ್ಯಪ್ರ॑ತಿಷ್ಠಿತ॒-ಸ್ಸ್ತೋಮೋ- ಽಪ್ರ॑ತಿಷ್ಠಿತಾ-ನ್ಯು॒ಕ್ಥಾನ್ಯಪ್ರ॑ತಿಷ್ಠಿತೋ॒ ಯಜ॑ಮಾ॒ನೋ ಽಪ್ರ॑ತಿಷ್ಠಿತೋ ಽಧ್ವ॒ರ್ಯುರ್ವಾ॑ ಯ॒ವ್ಯಂ॑-ವೈಁ ಸೋಮ॑ಸ್ಯ ಪ್ರತಿ॒ಷ್ಠಾ ಚ॑ಮ॒ಸೋ᳚-ಽಸ್ಯ ಪ್ರತಿ॒ಷ್ಠಾ ಸೋಮ॒-ಸ್ಸ್ತೋಮ॑ಸ್ಯ॒ ಸ್ತೋಮ॑ ಉ॒ಕ್ಥಾನಾ॒-ಙ್ಗ್ರಹಂ॑-ವಾಁ ಗೃಹೀ॒ತ್ವಾ ಚ॑ಮ॒ಸಂ-ವೋಁ॒ನ್ನೀಯ॑ ಸ್ತೋ॒ತ್ರಮು॒ಪಾ ಕು॑ರ್ಯಾ॒-ತ್ಪ್ರತ್ಯೇ॒ವ ಸೋಮಗ್ಗ್॑ ಸ್ಥಾ॒ಪಯ॑ತಿ॒ ಪ್ರತಿ॒ಸ್ತೋಮ॒-ಮ್ಪ್ರತ್ಯು॒ಕ್ಥಾನಿ॒ ಪ್ರತಿ॒ ಯಜ॑ಮಾನ॒ಸ್ತಿಷ್ಠ॑ತಿ॒ ಪ್ರತ್ಯ॑ದ್ಧ್ವ॒ರ್ಯುಃ ॥ 8 ॥
(ಏ॒ವ – ತಿ॑ಷ್ಠತಿ॒ ಯೋ – ವಾ॑ಯ॒ವ್ಯ॑ಮಸ್ಯ॒ – ಗ್ರಹಂ॒-ವೈಁ – ಕಾ॒ನ್ನ – ವಿಗ್ಂ॑ಶ॒ತಿಶ್ಚ॑) (ಅ. 2)
ಯ॒ಜ್ಞಂ-ವಾಁ ಏ॒ತ-ಥ್ಸ-ಮ್ಭ॑ರನ್ತಿ॒ ಯ-ಥ್ಸೋ॑ಮ॒ಕ್ರಯ॑ಣ್ಯೈ ಪ॒ದಂ-ಯಁ॑ಜ್ಞಮು॒ಖಗ್ಂ ಹ॑ವಿ॒ರ್ಧಾನೇ॒ ಯರ್ಹಿ॑ ಹವಿ॒ರ್ಧಾನೇ॒ ಪ್ರಾಚೀ᳚ ಪ್ರವ॒ರ್ತಯೇ॑ಯು॒ಸ್ತರ್ಹಿ॒ ತೇನಾಖ್ಷ॒ಮುಪಾ᳚-ಞ್ಜ್ಯಾ-ದ್ಯಜ್ಞಮು॒ಖ ಏ॒ವ ಯ॒ಜ್ಞಮನು॒ ಸನ್ತ॑ನೋತಿ॒ ಪ್ರಾಞ್ಚ॑ಮ॒ಗ್ನಿ-ಮ್ಪ್ರ ಹ॑ರ॒ನ್ತ್ಯು-ತ್ಪತ್ನೀ॒ಮಾ ನ॑ಯ॒ನ್ತ್ಯನ್ವನಾಗ್ಂ॑ಸಿ॒ ಪ್ರ ವ॑ರ್ತಯ॒ನ್ತ್ಯಥ॒ ವಾ ಅ॑ಸ್ಯೈ॒ಷ ಧಿಷ್ಣಿ॑ಯೋ ಹೀಯತೇ॒ ಸೋ-ಽನು॑ ಧ್ಯಾಯತಿ॒ ಸ ಈ᳚ಶ್ವ॒ರೋ ರು॒ದ್ರೋ ಭೂ॒ತ್ವಾ [ ] 9
ಪ್ರ॒ಜಾ-ಮ್ಪ॒ಶೂನ್. ಯಜ॑ಮಾನಸ್ಯ॒ ಶಮ॑ಯಿತೋ॒ರ್ಯರ್ಹಿ॑ ಪ॒ಶುಮಾ ಪ್ರೀ॑ತ॒ಮುದ॑ಞ್ಚ॒-ನ್ನಯ॑ನ್ತಿ॒ ತರ್ಹಿ॒ ತಸ್ಯ॑ ಪಶು॒ಶ್ರಪ॑ಣಗ್ಂ ಹರೇ॒-ತ್ತೇನೈ॒ವೈನ॑-ಮ್ಭಾ॒ಗಿನ॑-ಙ್ಕರೋತಿ॒ ಯಜ॑ಮಾನೋ॒ ವಾ ಆ॑ಹವ॒ನೀಯೋ॒ ಯಜ॑ಮಾನಂ॒-ವಾಁ ಏ॒ತದ್ವಿ ಕ॑ರ್ಷನ್ತೇ॒ ಯದಾ॑ಹವ॒ನೀಯಾ᳚-ತ್ಪಶು॒ಶ್ರಪ॑ಣ॒ಗ್ಂ॒ ಹರ॑ನ್ತಿ॒ ಸ ವೈ॒ವ ಸ್ಯಾನ್ನಿ॑ರ್ಮ॒ನ್ಥ್ಯಂ॑-ವಾಁ ಕುರ್ಯಾ॒-ದ್ಯಜ॑ಮಾನಸ್ಯ ಸಾತ್ಮ॒ತ್ವಾಯ॒ ಯದಿ॑ ಪ॒ಶೋರ॑ವ॒ದಾನ॒-ನ್ನಶ್ಯೇ॒ದಾಜ್ಯ॑ಸ್ಯ ಪ್ರತ್ಯಾ॒ಖ್ಯಾಯ॒ಮವ॑ ದ್ಯೇ॒-ಥ್ಸೈವ ತತಃ॒ ಪ್ರಾಯ॑ಶ್ಚಿತ್ತಿ॒ರ್ಯೇ ಪ॒ಶುಂ-ವಿಁ॑ಮಥ್ನೀ॒ರನ್. ಯಸ್ತಾನ್ ಕಾ॒ಮಯೇ॒ತಾ ಽಽರ್ತಿ॒ಮಾರ್ಚ್ಛೇ॑ಯು॒ರಿತಿ॑ ಕು॒ವಿದ॒ಙ್ಗೇತಿ॒ ನಮೋ॑ ವೃಕ್ತಿವತ್ಯ॒ರ್ಚಾ-ಽಽಗ್ನೀ᳚ದ್ಧ್ರೇ ಜುಹುಯಾ॒ನ್ನಮೋ॑ ವೃಕ್ತಿಮೇ॒ವೈಷಾಂ᳚-ವೃಁಙ್ಕ್ತೇ ತಾ॒ಜಗಾರ್ತಿ॒ಮಾರ್ಚ್ಛ॑ನ್ತಿ ॥ 10 ॥
(ಭೂ॒ತ್ವಾ – ತತಃ॒ – ಷಡ್ವಿಗ್ಂ॑ಶತಿಶ್ಚ) (ಅ. 3)
ಪ್ರ॒ಜಾಪ॑ತೇ॒ರ್ಜಾಯ॑ಮಾನಾಃ ಪ್ರ॒ಜಾ ಜಾ॒ತಾಶ್ಚ॒ ಯಾ ಇ॒ಮಾಃ । ತಸ್ಮೈ॒ ಪ್ರತಿ॒ ಪ್ರ ವೇ॑ದಯಚಿಕಿ॒ತ್ವಾಗ್ಂ ಅನು॑ ಮನ್ಯತಾಮ್ ॥ ಇ॒ಮ-ಮ್ಪ॒ಶು-ಮ್ಪ॑ಶುಪತೇ ತೇ ಅ॒ದ್ಯ ಬ॒ದ್ಧ್ನಾಮ್ಯ॑ಗ್ನೇ ಸುಕೃ॒ತಸ್ಯ॒ ಮದ್ಧ್ಯೇ᳚ । ಅನು॑ ಮನ್ಯಸ್ವ ಸು॒ಯಜಾ॑ ಯಜಾಮ॒ ಜುಷ್ಟ॑-ನ್ದೇ॒ವಾನಾ॑ಮಿ॒ದಮ॑ಸ್ತು ಹ॒ವ್ಯಮ್ ॥ ಪ್ರ॒ಜಾ॒ನನ್ತಃ॒ ಪ್ರತಿ॑ಗೃಹ್ಣನ್ತಿ॒ ಪೂರ್ವೇ᳚ ಪ್ರಾ॒ಣಮಙ್ಗೇ᳚ಭ್ಯಃ॒ ಪರ್ಯಾ॒ಚರ॑ನ್ತಮ್ । ಸುವ॒ರ್ಗಂ-ಯಾಁ॑ಹಿ ಪ॒ಥಿಭಿ॑ ರ್ದೇವ॒ಯಾನೈ॒-ರೋಷ॑ಧೀಷು॒ ಪ್ರತಿ॑ತಿಷ್ಠಾ॒ ಶರೀ॑ರೈಃ ॥ ಯೇಷಾ॒ಮೀಶೇ॑ [ಯೇಷಾ॒ಮೀಶೇ॑, ಪ॒ಶು॒ಪತಿಃ॑] 11
ಪಶು॒ಪತಿಃ॑ ಪಶೂ॒ನಾ-ಞ್ಚತು॑ಷ್ಪದಾಮು॒ತ ಚ॑ ದ್ವಿ॒ಪದಾ᳚ಮ್ । ನಿಷ್ಕ್ರೀ॑ತೋ॒-ಽಯಂ-ಯಁ॒ಜ್ಞಿಯ॑-ಮ್ಭಾ॒ಗಮೇ॑ತು ರಾ॒ಯಸ್ಪೋಷಾ॒ ಯಜ॑ಮಾನಸ್ಯ ಸನ್ತು ॥ ಯೇ ಬ॒ದ್ಧ್ಯಮಾ॑ನ॒ಮನು॑ ಬ॒ದ್ಧ್ಯಮಾ॑ನಾ ಅ॒ಭ್ಯೈಖ್ಷ॑ನ್ತ॒ ಮನ॑ಸಾ॒ ಚಖ್ಷು॑ಷಾ ಚ । ಅ॒ಗ್ನಿಸ್ತಾಗ್ಂ ಅಗ್ರೇ॒ ಪ್ರಮು॑ಮೋಕ್ತು ದೇ॒ವಃ ಪ್ರ॒ಜಾಪ॑ತಿಃ ಪ್ರ॒ಜಯಾ॑ ಸಂವಿಁದಾ॒ನಃ ॥ ಯ ಆ॑ರ॒ಣ್ಯಾಃ ಪ॒ಶವೋ॑ ವಿ॒ಶ್ವರೂ॑ಪಾ॒ ವಿರೂ॑ಪಾ॒-ಸ್ಸನ್ತೋ॑ ಬಹು॒ಧೈಕ॑ರೂಪಾಃ । ವಾ॒ಯುಸ್ತಾಗ್ಂ ಅಗ್ರೇ॒ ಪ್ರಮು॑ಮೋಕ್ತು ದೇ॒ವಃ ಪ್ರ॒ಜಾಪ॑ತಿಃ ಪ್ರ॒ಜಯಾ॑ ಸಂವಿಁದಾ॒ನಃ ॥ ಪ್ರ॒ಮು॒ಞ್ಚಮಾ॑ನಾ॒ [ಪ್ರ॒ಮು॒ಞ್ಚಮಾ॑ನಾಃ, ಭುವ॑ನಸ್ಯ॒ ರೇತೋ॑] 12
ಭುವ॑ನಸ್ಯ॒ ರೇತೋ॑ ಗಾ॒ತು-ನ್ಧ॑ತ್ತ॒ ಯಜ॑ಮಾನಾಯ ದೇವಾಃ । ಉ॒ಪಾಕೃ॑ತಗ್ಂ ಶಶಮಾ॒ನಂ-ಯಁದಸ್ಥಾ᳚ಜ್ಜೀ॒ವ-ನ್ದೇ॒ವಾನಾ॒ಮಪ್ಯೇ॑ತು॒ ಪಾಥಃ॑ ॥ ನಾನಾ᳚ ಪ್ರಾ॒ಣೋ ಯಜ॑ಮಾನಸ್ಯ ಪ॒ಶುನಾ॑ ಯ॒ಜ್ಞೋ ದೇ॒ವೇಭಿ॑-ಸ್ಸ॒ಹ ದೇ॑ವ॒ಯಾನಃ॑ । ಜೀ॒ವ-ನ್ದೇ॒ವಾನಾ॒ಮಪ್ಯೇ॑ತು॒ ಪಾಥ॑-ಸ್ಸ॒ತ್ಯಾ-ಸ್ಸ॑ನ್ತು॒ ಯಜ॑ಮಾನಸ್ಯ॒ ಕಾಮಾಃ᳚ ॥ ಯ-ತ್ಪ॒ಶುರ್ಮಾ॒ಯುಮಕೃ॒ತೋರೋ॑ ವಾ ಪ॒ದ್ಭಿರಾ॑ಹ॒ತೇ । ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸೋ॒ವಿಶ್ವಾ᳚-ನ್ಮುಞ್ಚ॒ತ್ವಗ್ಂಹ॑ಸಃ ॥ ಶಮಿ॑ತಾರ ಉ॒ಪೇತ॑ನ ಯ॒ಜ್ಞ- [ಯ॒ಜ್ಞಮ್, ದೇ॒ವೇಭಿ॑ರಿನ್ವಿ॒ತಮ್ ।] 13
-ನ್ದೇ॒ವೇಭಿ॑ರಿನ್ವಿ॒ತಮ್ । ಪಾಶಾ᳚-ತ್ಪ॒ಶು-ಮ್ಪ್ರಮು॑ಞ್ಚತ ಬ॒ನ್ಧಾದ್ಯ॒ಜ್ಞಪ॑ತಿ॒-ಮ್ಪರಿ॑ ॥ ಅದಿ॑ತಿಃ॒ ಪಾಶ॒-ಮ್ಪ್ರಮು॑ಮೋಕ್ತ್ವೇ॒ತ-ನ್ನಮಃ॑ ಪ॒ಶುಭ್ಯಃ॑ ಪಶು॒ಪತ॑ಯೇ ಕರೋಮಿ ॥ ಅ॒ರಾ॒ತೀ॒ಯನ್ತ॒-ಮಧ॑ರ-ಙ್ಕೃಣೋಮಿ॒ ಯ-ನ್ದ್ವಿ॒ಷ್ಮಸ್ತಸ್ಮಿ॒-ನ್ಪ್ರತಿ॑ ಮುಞ್ಚಾಮಿ॒ ಪಾಶ᳚ಮ್ ॥ ತ್ವಾಮು॒ ತೇ ದ॑ಧಿರೇ ಹವ್ಯ॒ವಾಹಗ್ಂ॑ ಶೃತಙ್ಕ॒ರ್ತಾರ॑ಮು॒ತ ಯ॒ಜ್ಞಿಯ॑-ಞ್ಚ । ಅಗ್ನೇ॒ ಸದ॑ಖ್ಷ॒-ಸ್ಸತ॑ನು॒ರ್॒ಹಿ ಭೂ॒ತ್ವಾ-ಽಥ॑ ಹ॒ವ್ಯಾ ಜಾ॑ತವೇದೋ ಜುಷಸ್ವ ॥ ಜಾತ॑ವೇದೋ ವ॒ಪಯಾ॑ ಗಚ್ಛ ದೇ॒ವಾನ್ತ್ವಗ್ಂ ಹಿ ಹೋತಾ᳚ ಪ್ರಥ॒ಮೋ ಬ॒ಭೂಥ॑ । ಘೃ॒ತೇನ॒ ತ್ವ-ನ್ತ॒ನುವೋ॑ ವರ್ಧಯಸ್ವ॒ ಸ್ವಾಹಾ॑ಕೃತಗ್ಂ ಹ॒ವಿರ॑ದನ್ತು ದೇ॒ವಾಃ ॥ ಸ್ವಾಹಾ॑ ದೇ॒ವೇಭ್ಯೋ॑ ದೇ॒ವೇಭ್ಯ॒-ಸ್ಸ್ವಾಹಾ᳚ ॥ 14 ॥
(ಈಶೇ᳚ – ಪ್ರಮು॒ಞ್ಚಮಾ॑ನಾ – ಯ॒ಜ್ಞಂ – ತ್ವಗ್ಂ – ಷೋಡ॑ಶ ಚ) (ಅ. 4)
ಪ್ರಾ॒ಜಾ॒ಪ॒ತ್ಯಾ ವೈ ಪ॒ಶವ॒ಸ್ತೇಷಾಗ್ಂ॑ ರು॒ದ್ರೋ-ಽಧಿ॑ಪತಿ॒ರ್ಯ-ದೇ॒ತಾಭ್ಯಾ॑-ಮುಪಾ ಕ॒ರೋತಿ॒ ತಾಭ್ಯಾ॑ಮೇ॒ವೈನ॑-ಮ್ಪ್ರತಿ॒ಪ್ರೋಚ್ಯಾ-ಽಽಲ॑ಭತ ಆ॒ತ್ಮನೋ-ಽನಾ᳚ವ್ರಸ್ಕಾಯ॒ ದ್ವಾಭ್ಯಾ॑ಮು॒ಪಾಕ॑ರೋತಿ ದ್ವಿ॒ಪಾದ್ಯಜ॑ಮಾನಃ॒ ಪ್ರತಿ॑ಷ್ಠಿತ್ಯಾ ಉಪಾ॒ಕೃತ್ಯ॒ ಪಞ್ಚ॑ ಜುಹೋತಿ॒ ಪಾಙ್ಕ್ತಾಃ᳚ ಪ॒ಶವಃ॑ ಪ॒ಶೂನೇ॒ವಾ ವ॑ರುನ್ಧೇಮೃ॒ತ್ಯವೇ॒ ವಾ ಏ॒ಷ ನೀ॑ಯತೇ॒ ಯ-ತ್ಪ॒ಶುಸ್ತಂ-ಯಁದ॑ನ್ವಾ॒ರಭೇ॑ತ ಪ್ರ॒ಮಾಯು॑ಕೋ॒ ಯಜ॑ಮಾನ-ಸ್ಸ್ಯಾ॒ನ್ನಾನಾ᳚ ಪ್ರಾ॒ಣೋ ಯಜ॑ಮಾನಸ್ಯ ಪ॒ಶುನೇತ್ಯಾ॑ಹ॒ ವ್ಯಾವೃ॑ತ್ತ್ಯೈ॒ [ವ್ಯಾವೃ॑ತ್ತ್ಯೈ, ಯ-ತ್ಪ॒ಶುರ್ಮಾ॒ಯು-] 15
ಯ-ತ್ಪ॒ಶುರ್ಮಾ॒ಯು-ಮಕೃ॒ತೇತಿ॑ ಜುಹೋತಿ॒ ಶಾನ್ತ್ಯೈ॒ ಶಮಿ॑ತಾರ ಉ॒ಪೇತ॒ನೇತ್ಯಾ॑ಹ ಯಥಾಯ॒ಜುರೇ॒ವೈತದ್ವ॒ಪಾಯಾಂ॒-ವಾಁ ಆ᳚ಹ್ರಿ॒ಯಮಾ॑ಣಾಯಾ-ಮ॒ಗ್ನೇರ್ಮೇಧೋ-ಽಪ॑ ಕ್ರಾಮತಿ॒ ತ್ವಾಮು॒ ತೇ ದ॑ಧಿರೇ ಹವ್ಯ॒ವಾಹ॒ಮಿತಿ॑ ವ॒ಪಾಮ॒ಭಿ ಜು॑ಹೋತ್ಯ॒ಗ್ನೇರೇ॒ವ ಮೇಧ॒ಮವ॑ ರು॒ನ್ಧೇ-ಽಥೋ॑ ಶೃತ॒ತ್ವಾಯ॑ ಪು॒ರಸ್ತಾ᳚-ಥ್ಸ್ವಾಹಾ ಕೃತಯೋ॒ ವಾ ಅ॒ನ್ಯೇ ದೇ॒ವಾ ಉ॒ಪರಿ॑ಷ್ಟಾ-ಥ್ಸ್ವಾಹಾಕೃತಯೋ॒-ಽನ್ಯೇ ಸ್ವಾಹಾ॑ ದೇ॒ವೇಭ್ಯೋ॑ ದೇ॒ವೇಭ್ಯ॒-ಸ್ಸ್ವಾಹೇತ್ಯ॒ಭಿತೋ॑ ವ॒ಪಾ-ಞ್ಜು॑ಹೋತಿ॒ ತಾನೇ॒ವೋಭಯಾ᳚-ನ್ಪ್ರೀಣಾತಿ ॥ 16 ॥
(ವ್ಯಾವೃ॑ತ್ತ್ಯಾ – ಅ॒ಭಿತೋ॑ ವ॒ಪಾಂ – ಪಞ್ಚ॑ ಚ) (ಅ. 5)
ಯೋ ವಾ ಅಯ॑ಥಾದೇವತಂ-ಯಁ॒ಜ್ಞಮು॑ಪ॒ಚರ॒ತ್ಯಾ ದೇ॒ವತಾ᳚ಭ್ಯೋ ವೃಶ್ಚ್ಯತೇ॒ ಪಾಪೀ॑ಯಾ-ನ್ಭವತಿ॒ ಯೋ ಯ॑ಥಾದೇವ॒ತನ್ನ ದೇ॒ವತಾ᳚ಭ್ಯ॒ ಆ ವೃ॑ಶ್ಚ್ಯತೇ॒ ವಸೀ॑ಯಾ-ನ್ಭವತ್ಯಾಗ್ನೇ॒ಯ್ಯರ್ಚಾ ಽಽಗ್ನೀ᳚ದ್ಧ್ರಮ॒ಭಿ ಮೃ॑ಶೇ-ದ್ವೈಷ್ಣ॒ವ್ಯಾ ಹ॑ವಿ॒ರ್ಧಾನ॑ಮಾಗ್ನೇ॒ಯ್ಯಾ ಸ್ರುಚೋ॑ ವಾಯ॒ವ್ಯ॑ಯಾ ವಾಯ॒ವ್ಯಾ᳚ನ್ಯೈನ್ದ್ರಿ॒ಯಾ ಸದೋ॑ ಯಥಾದೇವ॒ತಮೇ॒ವ ಯ॒ಜ್ಞಮುಪ॑ ಚರತಿ॒ ನ ದೇ॒ವತಾ᳚ಭ್ಯ॒ ಆ ವೃ॑ಶ್ಚ್ಯತೇ॒ ವಸೀ॑ಯಾ-ನ್ಭವತಿ ಯು॒ನಜ್ಮಿ॑ ತೇ ಪೃಥಿ॒ವೀ-ಞ್ಜ್ಯೋತಿ॑ಷಾ ಸ॒ಹ ಯು॒ನಜ್ಮಿ॑ ವಾ॒ಯುಮ॒ನ್ತರಿ॑ಖ್ಷೇಣ [ವಾ॒ಯುಮ॒ನ್ತರಿ॑ಖ್ಷೇಣ, ತೇ ಸ॒ಹ] 17
ತೇ ಸ॒ಹ ಯು॒ನಜ್ಮಿ॒ ವಾಚಗ್ಂ॑ ಸ॒ಹ ಸೂರ್ಯೇ॑ಣ ತೇ ಯು॒ನಜ್ಮಿ॑ ತಿ॒ಸ್ರೋ ವಿ॒ಪೃಚ॒-ಸ್ಸೂರ್ಯ॑ಸ್ಯ ತೇ । ಅ॒ಗ್ನಿರ್ದೇ॒ವತಾ॑ ಗಾಯ॒ತ್ರೀ ಛನ್ದ॑ ಉಪಾ॒ಗ್ಂ॒ಶೋಃ ಪಾತ್ರ॑ಮಸಿ॒ ಸೋಮೋ॑ ದೇ॒ವತಾ᳚ ತ್ರಿ॒ಷ್ಟು-ಪ್ಛನ್ದೋ᳚-ಽನ್ತರ್ಯಾ॒ಮಸ್ಯ॒ ಪಾತ್ರ॑ಮ॒ಸೀನ್ದ್ರೋ॑ ದೇ॒ವತಾ॒ ಜಗ॑ತೀ॒ ಛನ್ದ॑ ಇನ್ದ್ರವಾಯು॒ವೋಃ ಪಾತ್ರ॑ಮಸಿ॒ ಬೃಹ॒ಸ್ಪತಿ॑-ರ್ದೇ॒ವತಾ॑-ಽನು॒ಷ್ಟು-ಪ್ಛನ್ದೋ॑ ಮಿ॒ತ್ರಾವರು॑ಣಯೋಃ॒ ಪಾತ್ರ॑ಮಸ್ಯ॒ಶ್ವಿನೌ॑ ದೇ॒ವತಾ॑ ಪ॒ಙ್ಕ್ತಿಶ್ಛನ್ದೋ॒-ಽಶ್ವಿನೋಃ॒ ಪಾತ್ರ॑ಮಸಿ॒ ಸೂರ್ಯೋ॑ ದೇ॒ವತಾ॑ ಬೃಹ॒ತೀ [ ] 18
ಛನ್ದ॑-ಶ್ಶು॒ಕ್ರಸ್ಯ॒ ಪಾತ್ರ॑ಮಸಿ ಚ॒ನ್ದ್ರಮಾ॑ ದೇ॒ವತಾ॑ ಸ॒ತೋ ಬೃ॑ಹತೀ॒ ಛನ್ದೋ॑ ಮ॒ನ್ಥಿನಃ॒ ಪಾತ್ರ॑ಮಸಿ॒ ವಿಶ್ವೇ॑ದೇ॒ವಾ ದೇ॒ವತೋ॒ಷ್ಣಿಹಾ॒ ಛನ್ದ॑ ಆಗ್ರಯ॒ಣಸ್ಯ॒ ಪಾತ್ರ॑ಮ॒ಸೀನ್ದ್ರೋ॑ ದೇ॒ವತಾ॑ ಕ॒ಕುಚ್ಛನ್ದ॑ ಉ॒ಕ್ಥಾನಾ॒-ಮ್ಪಾತ್ರ॑ಮಸಿ ಪೃಥಿ॒ವೀ ದೇ॒ವತಾ॑ ವಿ॒ರಾಟ್ ಛನ್ದೋ᳚ ಧ್ರು॒ವಸ್ಯ॒ ಪಾತ್ರ॑ಮಸಿ ॥ 19 ॥
(ಅ॒ನ್ತರಿ॑ಖ್ಷೇಣ – ಬೃಹ॒ತೀ – ತ್ರಯ॑ಸ್ತ್ರಿಗ್ಂಶಚ್ಚ) (ಅ. 6)
ಇ॒ಷ್ಟರ್ಗೋ॒ ವಾ ಅ॑ದ್ಧ್ವ॒ರ್ಯುರ್ಯಜ॑ಮಾನಸ್ಯೇ॒ಷ್ಟರ್ಗಃ॒ ಖಲು॒ ವೈ ಪೂರ್ವೋ॒-ಽರ್ಷ್ಟುಃ, ಖ್ಷೀ॑ಯತ ಆಸ॒ನ್ಯಾ᳚ನ್ಮಾ॒ ಮನ್ತ್ರಾ᳚-ತ್ಪಾಹಿ॒ ಕಸ್ಯಾ᳚ಶ್ಚಿದ॒ಭಿಶ॑ಸ್ತ್ಯಾ॒ ಇತಿ॑ ಪು॒ರಾ ಪ್ರಾ॑ತರನುವಾ॒ಕಾಜ್ಜು॑ಹುಯಾದಾ॒ತ್ಮನ॑ ಏ॒ವ ತದ॑ದ್ಧ್ವ॒ರ್ಯುಃ ಪು॒ರಸ್ತಾ॒ಚ್ಛರ್ಮ॑ ನಹ್ಯ॒ತೇ-ಽನಾ᳚ರ್ತ್ಯೈ ಸಂವೇಁ॒ಶಾಯ॑ ತ್ವೋಪವೇ॒ಶಾಯ॑ ತ್ವಾ ಗಾಯತ್ರಿ॒ಯಾ ಸ್ತ್ರಿ॒ಷ್ಟುಭೋ॒ ಜಗ॑ತ್ಯಾ ಅ॒ಭಿಭೂ᳚ತ್ಯೈ॒ ಸ್ವಾಹಾ॒ ಪ್ರಾಣಾ॑ಪಾನೌ ಮೃ॒ತ್ಯೋರ್ಮಾ॑ ಪಾತ॒-ಮ್ಪ್ರಾಣಾ॑ಪಾನೌ॒ ಮಾ ಮಾ॑ ಹಾಸಿಷ್ಟ-ನ್ದೇ॒ವತಾ॑ಸು॒ ವಾ ಏ॒ತೇ ಪ್ರಾ॑ಣಾಪಾ॒ನಯೋ॒- [ಏ॒ತೇ ಪ್ರಾ॑ಣಾಪಾ॒ನಯೋಃ᳚, ವ್ಯಾಯ॑ಚ್ಛನ್ತೇ॒] 20
-ರ್ವ್ಯಾಯ॑ಚ್ಛನ್ತೇ॒ ಯೇಷಾ॒ಗ್ಂ॒ ಸೋಮ॑-ಸ್ಸಮೃ॒ಚ್ಛತೇ॑ ಸಂವೇಁ॒ಶಾಯ॑ ತ್ವೋಪವೇ॒ಶಾಯ॒ ತ್ವೇತ್ಯಾ॑ಹ॒ ಛನ್ದಾಗ್ಂ॑ಸಿ॒ ವೈ ಸಂ॑ವೇಁ॒ಶ ಉ॑ಪವೇ॒ಶಶ್ಛನ್ದೋ॑ಭಿರೇ॒ವಾಸ್ಯ॒ ಛನ್ದಾಗ್ಂ॑ಸಿ ವೃಙ್ಕ್ತೇ॒ ಪ್ರೇತಿ॑ವ॒ನ್ತ್ಯಾಜ್ಯಾ॑ನಿ ಭವನ್ತ್ಯ॒ಭಿಜಿ॑ತ್ಯೈ ಮ॒ರುತ್ವ॑ತೀಃ ಪ್ರತಿ॒ಪದೋ॒ ವಿಜಿ॑ತ್ಯಾ ಉ॒ಭೇ ಬೃ॑ಹದ್ರಥನ್ತ॒ರೇ ಭ॑ವತ ಇ॒ಯಂ-ವಾಁವ ರ॑ಥನ್ತ॒ರಮ॒ಸೌ ಬೃ॒ಹದಾ॒ಭ್ಯಾಮೇ॒ವೈನ॑ಮ॒ನ್ತರೇ᳚ತ್ಯ॒ದ್ಯ ವಾವ ರ॑ಥನ್ತ॒ರಗ್ಗ್ ಶ್ವೋ ಬೃ॒ಹದ॑ದ್ಯಾ॒ಶ್ವಾ ದೇ॒ವೈನ॑ಮ॒ನ್ತರೇ॑ತಿ ಭೂ॒ತಂ- [ಭೂ॒ತಮ್, ವಾವ ರ॑ಥನ್ತ॒ರ-] 21
-ವಾಁವ ರ॑ಥನ್ತ॒ರ-ಮ್ಭ॑ವಿ॒ಷ್ಯ-ದ್ಬೃ॒ಹ-ದ್ಭೂ॒ತಾಚ್ಚೈ॒ವೈನ॑-ಮ್ಭವಿಷ್ಯ॒ತಶ್ಚಾ॒ನ್ತರೇ॑ತಿ॒, ಪರಿ॑ಮಿತಂ॒-ವಾಁವ ರ॑ಥನ್ತ॒ರಮಪ॑ರಿಮಿತ-ಮ್ಬೃ॒ಹ-ತ್ಪರಿ॑ಮಿತಾಚ್ಚೈ॒ವೈನ॒-ಮಪ॑ರಿಮಿತಾಚ್ಚಾ॒-ಽನ್ತರೇ॑ತಿ ವಿಶ್ವಾಮಿತ್ರಜಮದ॒ಗ್ನೀ ವಸಿ॑ಷ್ಠೇನಾಸ್ಪರ್ಧೇತಾ॒ಗ್ಂ॒ಸ ಏ॒ತಜ್ಜ॒ಮದ॑ಗ್ನಿ ರ್ವಿಹ॒ವ್ಯ॑ಮ ಪಶ್ಯ॒-ತ್ತೇನ॒ ವೈ ಸ ವಸಿ॑ಷ್ಠಸ್ಯೇನ್ದ್ರಿ॒ಯಂ-ವೀಁ॒ರ್ಯ॑ಮವೃಙ್ಕ್ತ॒ ಯದ್ವಿ॑ಹ॒ವ್ಯಗ್ಂ॑ ಶ॒ಸ್ಯತ॑ ಇನ್ದ್ರಿ॒ಯಮೇ॒ವ ತದ್ವೀ॒ರ್ಯಂ॑-ಯಁಜ॑ಮಾನೋ॒ ಭ್ರಾತೃ॑ವ್ಯಸ್ಯ ವೃಙ್ಕ್ತೇ॒ ಯಸ್ಯ॒ ಭೂಯಾಗ್ಂ॑ಸೋ ಯಜ್ಞಕ್ರ॒ತವ॒ ಇತ್ಯಾ॑ಹು॒-ಸ್ಸ ದೇ॒ವತಾ॑ ವೃಙ್ಕ್ತ॒ ಇತಿ॒ ಯದ್ಯ॑ಗ್ನಿಷ್ಟೋ॒ಮ-ಸ್ಸೋಮಃ॑ ಪ॒ರಸ್ತಾ॒-ಥ್ಸ್ಯಾ-ದು॒ಕ್ಥ್ಯ॑-ಙ್ಕುರ್ವೀತ॒ ಯದ್ಯು॒ಕ್ಥ್ಯ॑-ಸ್ಸ್ಯಾದ॑ತಿರಾ॒ತ್ರ-ಙ್ಕು॑ರ್ವೀತ ಯಜ್ಞಕ್ರ॒ತುಭಿ॑ರೇ॒ವಾಸ್ಯ॑ ದೇ॒ವತಾ॑ ವೃಙ್ಕ್ತೇ॒ ವಸೀ॑ಯಾ-ನ್ಭವತಿ ॥ 22 ॥
(ಪ್ರಾ॒ಣಾ॒ಪಾ॒ನಯೋ᳚ – ರ್ಭೂ॒ತಂ – ವೃಁ॑ಙ್ಕ್ತೇ॒ – ಽಷ್ಟಾವಿಗ್ಂ॑ಶತಿಶ್ಚ) (ಅ. 7)
ನಿ॒ಗ್ರಾ॒ಭ್ಯಾ᳚-ಸ್ಸ್ಥ ದೇವ॒ಶ್ರುತ॒ ಆಯು॑ರ್ಮೇ ತರ್ಪಯತ ಪ್ರಾ॒ಣ-ಮ್ಮೇ॑ ತರ್ಪಯತಾಪಾ॒ನ-ಮ್ಮೇ॑ ತರ್ಪಯತ ವ್ಯಾ॒ನ-ಮ್ಮೇ॑ ತರ್ಪಯತ॒ ಚಖ್ಷು॑ರ್ಮೇ ತರ್ಪಯತ॒ ಶ್ರೋತ್ರ॑-ಮ್ಮೇ ತರ್ಪಯತ॒ ಮನೋ॑ಮೇ ತರ್ಪಯತ॒ ವಾಚ॑-ಮ್ಮೇ ತರ್ಪಯತಾ॒-ಽಽತ್ಮಾನ॑-ಮ್ಮೇ ತರ್ಪಯ॒ತಾಙ್ಗಾ॑ನಿ ಮೇ ತರ್ಪಯತ ಪ್ರ॒ಜಾ-ಮ್ಮೇ॑ ತರ್ಪಯತ ಪ॒ಶೂ-ನ್ಮೇ॑ ತರ್ಪಯತ ಗೃ॒ಹಾ-ನ್ಮೇ॑ ತರ್ಪಯತ ಗ॒ಣಾ-ನ್ಮೇ॑ ತರ್ಪಯತ ಸ॒ರ್ವಗ॑ಣ-ಮ್ಮಾ ತರ್ಪಯತ ತ॒ರ್ಪಯ॑ತ ಮಾ [ ] 23
ಗ॒ಣಾ ಮೇ॒ ಮಾ ವಿ ತೃ॑ಷ॒ನ್ನೋಷ॑ಧಯೋ॒ ವೈ ಸೋಮ॑ಸ್ಯ॒ ವಿಶೋ॒ ವಿಶಃ॒ ಖಲು॒ ವೈ ರಾಜ್ಞಃ॒ ಪ್ರದಾ॑ತೋರೀಶ್ವ॒ರಾ ಐ॒ನ್ದ್ರ-ಸ್ಸೋಮೋ-ಽವೀ॑ವೃಧಂ-ವೋಁ॒ ಮನ॑ಸಾ ಸುಜಾತಾ॒ ಋತ॑ಪ್ರಜಾತಾ॒ ಭಗ॒ ಇದ್ವ॑-ಸ್ಸ್ಯಾಮ । ಇನ್ದ್ರೇ॑ಣ ದೇ॒ವೀರ್ವೀ॒ರುಧ॑-ಸ್ಸಂವಿಁದಾ॒ನಾ ಅನು॑ ಮನ್ಯನ್ತಾ॒ಗ್ಂ॒ ಸವ॑ನಾಯ॒ ಸೋಮ॒ಮಿತ್ಯಾ॒ಹೌಷ॑ಧೀಭ್ಯ ಏ॒ವೈನ॒ಗ್ಗ್॒ ಸ್ವಾಯೈ॑ ವಿ॒ಶ-ಸ್ಸ್ವಾಯೈ॑ ದೇ॒ವತಾ॑ಯೈ ನಿ॒ರ್ಯಾಚ್ಯಾ॒ಭಿ ಷು॑ಣೋತಿ॒ ಯೋ ವೈ ಸೋಮ॑ಸ್ಯಾಭಿಷೂ॒ಯಮಾ॑ಣಸ್ಯ [ಸೋಮ॑ಸ್ಯಾಭಿಷೂ॒ಯಮಾ॑ಣಸ್ಯ, ಪ್ರ॒ಥ॒ಮೋ-ಽಗ್ಂ॑ಶು-] 24
ಪ್ರಥ॒ಮೋ-ಽಗ್ಂ॑ಶು-ಸ್ಸ್ಕನ್ದ॑ತಿ॒ ಸ ಈ᳚ಶ್ವ॒ರ ಇ॑ನ್ದ್ರಿ॒ಯಂ-ವೀಁ॒ರ್ಯ॑-ಮ್ಪ್ರ॒ಜಾ-ಮ್ಪ॒ಶೂನ್. ಯಜ॑ಮಾನಸ್ಯ॒ ನಿರ್ಹ॑ನ್ತೋ॒ಸ್ತಮ॒ಭಿ ಮ॑ನ್ತ್ರಯೇ॒ತಾ-ಽಽ ಮಾ᳚-ಽಸ್ಕಾನ್ಥ್ಸ॒ಹ ಪ್ರ॒ಜಯಾ॑ ಸ॒ಹ ರಾ॒ಯಸ್ಪೋಷೇ॑ಣೇನ್ದ್ರಿ॒ಯ-ಮ್ಮೇ॑ ವೀ॒ರ್ಯ॑-ಮ್ಮಾ ನಿವ॑ರ್ಧೀ॒ರಿತ್ಯಾ॒ಶಿಷ॑ಮೇ॒ವೈತಾಮಾ ಶಾ᳚ಸ್ತ ಇನ್ದ್ರಿ॒ಯಸ್ಯ॑ ವೀ॒ಯ॑ರ್ಸ್ಯ ಪ್ರ॒ಜಾಯೈ॑ ಪಶೂ॒ನಾಮನಿ॑ರ್ಘಾತಾಯ ದ್ರ॒ಫ್ಸಶ್ಚ॑ಸ್ಕನ್ದ ಪೃಥಿ॒ವೀಮನು॒ ದ್ಯಾಮಿ॒ಮಞ್ಚ॒ ಯೋನಿ॒ಮನು॒ ಯಶ್ಚ॒ ಪೂರ್ವಃ॑ । ತೃ॒ತೀಯಂ॒-ಯೋಁನಿ॒ಮನು॑ ಸ॒ಞ್ಚರ॑ನ್ತ-ನ್ದ್ರ॒ಫ್ಸ-ಞ್ಜು॑ಹೋ॒ಮ್ಯನು॑ ಸ॒ಪ್ತ ಹೋತ್ರಾಃ᳚ ॥ 25 ॥
(ತ॒ರ್ಪಯ॑ತ ಮಾ – ಽಭಿಷೂ॒ಯಮಾ॑ಣಸ್ಯ॒ – ಯಶ್ಚ॒ – ದಶ॑ ಚ) (ಅ. 8)
ಯೋ ವೈ ದೇ॒ವಾ-ನ್ದೇ॑ವಯಶ॒ಸೇನಾ॒ರ್ಪಯ॑ತಿ ಮನು॒ಷ್ಯಾ᳚-ನ್ಮನುಷ್ಯಯಶ॒ಸೇನ॑ ದೇವಯಶ॒ಸ್ಯೇ॑ವ ದೇ॒ವೇಷು॒ ಭವ॑ತಿ ಮನುಷ್ಯಯಶ॒ಸೀ ಮ॑ನು॒ಷ್ಯೇ॑ಷು॒ ಯಾ-ನ್ಪ್ರಾ॒ಚೀನ॑-ಮಾಗ್ರಯ॒ಣಾ-ದ್ಗ್ರಹಾ᳚-ನ್ಗೃಹ್ಣೀ॒ಯಾ-ತ್ತಾನು॑ಪಾ॒ಗ್ಂ॒ಶು ಗೃ॑ಹ್ಣೀಯಾ॒ದ್ಯಾನೂ॒ರ್ಧ್ವಾಗ್ಸ್ತಾನು॑ಪಬ್ದಿ॒ಮತೋ॑ ದೇ॒ವಾನೇ॒ವ ತದ್ದೇ॑ವಯಶ॒ಸೇನಾ᳚ರ್ಪಯತಿ ಮನು॒ಷ್ಯಾ᳚-ನ್ಮನುಷ್ಯಯಶ॒ಸೇನ॑ ದೇವಯಶ॒ಸ್ಯೇ॑ವ ದೇ॒ವೇಷು॑ ಭವತಿ ಮನುಷ್ಯಯಶ॒ಸೀ ಮ॑ನು॒ಷ್ಯೇ᳚ಷ್ವ॒ಗ್ನಿಃ ಪ್ರಾ॑ತಸ್ಸವ॒ನೇ ಪಾ᳚ತ್ವ॒ಸ್ಮಾನ್. ವೈ᳚ಶ್ವಾನ॒ರೋ ಮ॑ಹಿ॒ನಾ ವಿ॒ಶ್ವಶ॑ಮ್ಭೂಃ । ಸ ನಃ॑ ಪಾವ॒ಕೋ ದ್ರವಿ॑ಣ-ನ್ದಧಾ॒- [ದ್ರವಿ॑ಣ-ನ್ದಧಾತು, ಆಯು॑ಷ್ಮನ್ತ-] 26
-ತ್ವಾಯು॑ಷ್ಮನ್ತ-ಸ್ಸ॒ಹಭ॑ಖ್ಷಾ-ಸ್ಸ್ಯಾಮ ॥ ವಿಶ್ವೇ॑ ದೇ॒ವಾ ಮ॒ರುತ॒ ಇನ್ದ್ರೋ॑ ಅ॒ಸ್ಮಾನ॒ಸ್ಮಿ-ನ್ದ್ವಿ॒ತೀಯೇ॒ ಸವ॑ನೇ॒ ನ ಜ॑ಹ್ಯುಃ । ಆಯು॑ಷ್ಮನ್ತಃ ಪ್ರಿ॒ಯಮೇ॑ಷಾಂ॒-ವಁದ॑ನ್ತೋ ವ॒ಯ-ನ್ದೇ॒ವಾನಾಗ್ಂ॑ ಸುಮ॒ತೌ ಸ್ಯಾ॑ಮ ॥ ಇ॒ದ-ನ್ತೃ॒ತೀಯ॒ಗ್ಂ॒ ಸವ॑ನ-ಙ್ಕವೀ॒ನಾಮೃ॒ತೇನ॒ ಯೇ ಚ॑ಮ॒ಸಮೈರ॑ಯನ್ತ । ತೇ ಸೌ॑ಧನ್ವ॒ನಾ-ಸ್ಸುವ॑ರಾನಶಾ॒ನಾ-ಸ್ಸ್ವಿ॑ಷ್ಟಿ-ನ್ನೋ ಅ॒ಭಿ ವಸೀ॑ಯೋ ನಯನ್ತು ॥ ಆ॒ಯತ॑ನವತೀ॒ರ್ವಾ ಅ॒ನ್ಯಾ ಆಹು॑ತಯೋ ಹೂ॒ಯನ್ತೇ॑-ಽನಾಯತ॒ನಾ ಅ॒ನ್ಯಾ ಯಾ ಆ॑ಘಾ॒ರವ॑ತೀ॒ಸ್ತಾ ಆ॒ಯತನ॑ವತೀ॒ರ್ಯಾ- [ಆ॒ಯತನ॑ವತೀ॒ರ್ಯಾಃ, ಸೌ॒ಮ್ಯಾಸ್ತಾ] 27
-ಸ್ಸೌ॒ಮ್ಯಾಸ್ತಾ ಅ॑ನಾಯತ॒ನಾ ಐ᳚ನ್ದ್ರವಾಯ॒ವ-ಮಾ॒ದಾಯಾ॑-ಽಽಘಾ॒ರಮಾ ಘಾ॑ರಯೇದದ್ಧ್ವ॒ರೋ ಯ॒ಜ್ಞೋ॑-ಽಯಮ॑ಸ್ತು ದೇವಾ॒ ಓಷ॑ಧೀಭ್ಯಃ ಪ॒ಶವೇ॑ ನೋ॒ ಜನಾ॑ಯ॒ ವಿಶ್ವ॑ಸ್ಮೈ ಭೂ॒ತಾಯಾ᳚-ಽದ್ಧ್ವ॒ರೋ॑-ಽಸಿ॒ ಸ ಪಿ॑ನ್ವಸ್ವ ಘೃ॒ತವ॑ದ್ದೇವ ಸೋ॒ಮೇತಿ॑ ಸೌ॒ಮ್ಯಾ ಏ॒ವ ತದಾಹು॑ತೀರಾ॒ಯತ॑ನವತೀಃ ಕರೋತ್ಯಾ॒ಯತ॑ನವಾ-ನ್ಭವತಿ॒ ಯ ಏ॒ವಂ-ವೇಁದಾಥೋ॒ ದ್ಯಾವಾ॑ಪೃಥಿ॒ವೀ ಏ॒ವ ಘೃ॒ತೇನ॒ ವ್ಯು॑ನತ್ತಿ॒ ತೇ ವ್ಯು॑ತ್ತೇ ಉಪಜೀವ॒ನೀಯೇ॑ ಭವತ ಉಪಜೀವ॒ನೀಯೋ॑ ಭವತಿ॒ [ಭವತಿ, ಯ ಏ॒ವಂ-ವೇಁದೈ॒ಷ] 28
ಯ ಏ॒ವಂ-ವೇಁದೈ॒ಷ ತೇ॑ ರುದ್ರಭಾ॒ಗೋ ಯ-ನ್ನಿ॒ರಯಾ॑ಚಥಾ॒ಸ್ತ-ಞ್ಜು॑ಷಸ್ವ ವಿ॒ದೇರ್ಗೌ॑ಪ॒ತ್ಯಗ್ಂ ರಾ॒ಯಸ್ಪೋಷಗ್ಂ॑ ಸು॒ವೀರ್ಯಗ್ಂ॑ ಸಂವಁಥ್ಸ॒ರೀಣಾಗ್॑ ಸ್ವ॒ಸ್ತಿಮ್ ॥ ಮನುಃ॑ ಪು॒ತ್ರೇಭ್ಯೋ॑ ದಾ॒ಯಂ-ವ್ಯಁ॑ಭಜ॒-ಥ್ಸ ನಾಭಾ॒ನೇದಿ॑ಷ್ಠ-ಮ್ಬ್ರಹ್ಮ॒ಚರ್ಯಂ॒-ವಁಸ॑ನ್ತ॒-ನ್ನಿರ॑ಭಜ॒-ಥ್ಸ ಆ-ಽಗ॑ಚ್ಛ॒-ಥ್ಸೋ᳚-ಽಬ್ರವೀ-ತ್ಕ॒ಥಾ ಮಾ॒ ನಿರ॑ಭಾ॒ಗಿತಿ॒ ನ ತ್ವಾ॒ ನಿರ॑ಭಾಖ್ಷ॒ಮಿತ್ಯ॑-ಬ್ರವೀ॒ದಙ್ಗಿ॑ರಸ ಇ॒ಮೇ ಸ॒ತ್ರಮಾ॑ಸತೇ॒ ತೇ [ಸ॒ತ್ರಮಾ॑ಸತೇ॒ ತೇ, ಸು॒ವ॒ರ್ಗಂ-ಲೋಁ॒ಕ-ನ್ನ] 29
ಸು॑ವ॒ರ್ಗಂ-ಲೋಁ॒ಕ-ನ್ನ ಪ್ರಜಾ॑ನನ್ತಿ॒ ತೇಭ್ಯ॑ ಇ॒ದ-ಮ್ಬ್ರಾಹ್ಮ॑ಣ-ಮ್ಬ್ರೂಹಿ॒ ತೇ ಸು॑ವ॒ರ್ಗಂ-ಲೋಁ॒ಕಂ-ಯಁನ್ತೋ॒ ಯ ಏ॑ಷಾ-ಮ್ಪ॒ಶವ॒ಸ್ತಾಗ್ಸ್ತೇ॑ ದಾಸ್ಯ॒ನ್ತೀತಿ॒ ತದೇ᳚ಭ್ಯೋ-ಽಬ್ರವೀ॒-ತ್ತೇ ಸು॑ವ॒ರ್ಗಂ-ಲೋಁ॒ಕಂ-ಯಁನ್ತೋ॒ ಯ ಏ॑ಷಾ-ಮ್ಪ॒ಶವ॒ ಆಸ॒-ನ್ತಾನ॑ಸ್ಮಾ ಅದದು॒ಸ್ತ-ಮ್ಪ॒ಶುಭಿ॒ಶ್ಚರ॑ನ್ತಂ-ಯಁಜ್ಞವಾ॒ಸ್ತೌ ರು॒ದ್ರ ಆ-ಽಗ॑ಚ್ಛ॒-ಥ್ಸೋ᳚-ಽಬ್ರವೀ॒ನ್ಮಮ॒ ವಾ ಇ॒ಮೇ ಪ॒ಶವ॒ ಇತ್ಯದು॒ರ್ವೈ – [ ] 30
ಮಹ್ಯ॑ಮಿ॒ಮಾನಿತ್ಯ॑ಬ್ರವೀ॒ನ್ನ ವೈ ತಸ್ಯ॒ ತ ಈ॑ಶತ॒ ಇತ್ಯ॑ಬ್ರವೀ॒-ದ್ಯ-ದ್ಯ॑ಜ್ಞವಾ॒ಸ್ತೌ ಹೀಯ॑ತೇ॒ ಮಮ॒ ವೈ ತದಿತಿ॒ ತಸ್ಮಾ᳚-ದ್ಯಜ್ಞವಾ॒ಸ್ತು ನಾಭ್ಯ॒ವೇತ್ಯ॒ಗ್ಂ॒ ಸೋ᳚-ಽಬ್ರವೀ-ದ್ಯ॒ಜ್ಞೇ ಮಾ ಽಽಭ॒ಜಾಥ॑ ತೇ ಪ॒ಶೂ-ನ್ನಾಭಿ ಮಗ್ಗ್॑ಸ್ಯ॒ ಇತಿ॒ ತಸ್ಮಾ॑ ಏ॒ತ-ಮ್ಮ॒ನ್ಥಿನ॑-ಸ್ಸಗ್ಗ್ ಸ್ರಾ॒ವಮ॑ಜುಹೋ॒-ತ್ತತೋ॒ ವೈ ತಸ್ಯ॑ ರು॒ದ್ರಃ ಪ॒ಶೂ-ನ್ನಾಭ್ಯ॑ಮನ್ಯತ॒ ಯತ್ರೈ॒ತ ಮೇ॒ವಂ-ವಿಁ॒ದ್ವಾ-ನ್ಮ॒ನ್ಥಿನ॑-ಸ್ಸಗ್ಗ್ ಸ್ರಾ॒ವ-ಞ್ಜು॒ಹೋತಿ॒ ನ ತತ್ರ॑ ರು॒ದ್ರಃ ಪ॒ಶೂನ॒ಭಿ ಮ॑ನ್ಯತೇ ॥ 31 ॥
(ದ॒ಧಾ॒ತ್ವಾ॒ – ಯತ॑ನವತೀ॒ರ್ಯಾ – ಉ॑ಪಜೀವ॒ನೀಯೋ॑ ಭವತಿ॒ – ತೇ-ಽ – ದು॒ರ್ವೈ – ಯತ್ರೈ॒ತ – ಮೇಕಾ॑ದಶ ಚ) (ಅ. 9)
ಜುಷ್ಟೋ॑ ವಾ॒ಚೋ ಭೂ॑ಯಾಸ॒-ಞ್ಜುಷ್ಟೋ॑ ವಾ॒ಚಸ್ಪತ॑ಯೇ॒ ದೇವಿ॑ ವಾಕ್ । ಯದ್ವಾ॒ಚೋ ಮಧು॑ಮ॒-ತ್ತಸ್ಮಿ॑-ನ್ಮಾ ಧಾ॒-ಸ್ಸ್ವಾಹಾ॒ ಸರ॑ಸ್ವತ್ಯೈ ॥ ಋ॒ಚಾ ಸ್ತೋಮ॒ಗ್ಂ॒ ಸಮ॑ರ್ಧಯ ಗಾಯ॒ತ್ರೇಣ॑ ರಥನ್ತ॒ರಮ್ । ಬೃ॒ಹ-ದ್ಗಾ॑ಯ॒ತ್ರವ॑ರ್ತನಿ ॥ಯಸ್ತೇ᳚ ದ್ರ॒ಫ್ಸ-ಸ್ಸ್ಕನ್ದ॑ತಿ॒ ಯಸ್ತೇ॑ ಅ॒ಗ್ಂ॒ಶುರ್ಬಾ॒ಹುಚ್ಯು॑ತೋ ಧಿ॒ಷಣ॑ಯೋರು॒ಪಸ್ಥಾ᳚ತ್ । ಅ॒ದ್ಧ್ವ॒ರ್ಯೋರ್ವಾ॒ ಪರಿ॒ ಯಸ್ತೇ॑ ಪ॒ವಿತ್ರಾ॒-ಥ್ಸ್ವಾಹಾ॑ಕೃತ॒ಮಿನ್ದ್ರಾ॑ಯ॒ ತ-ಞ್ಜು॑ಹೋಮಿ ॥ ಯೋ ದ್ರ॒ಫ್ಸೋ ಅ॒ಗ್ಂ॒ಶುಃ ಪ॑ತಿ॒ತಃ ಪೃ॑ಥಿ॒ವ್ಯಾ-ಮ್ಪ॑ರಿವಾ॒ಪಾ- [ಪೃ॑ಥಿ॒ವ್ಯಾ-ಮ್ಪ॑ರಿವಾ॒ಪಾತ್, ಪು॒ರೋ॒ಡಾಶಾ᳚-ತ್ಕರ॒ಮ್ಭಾತ್ ।] 32
-ತ್ಪು॑ರೋ॒ಡಾಶಾ᳚-ತ್ಕರ॒ಮ್ಭಾತ್ । ಧಾ॒ನಾ॒ಸೋ॒ಮಾನ್ಮ॒ನ್ಥಿನ॑ ಇನ್ದ್ರ ಶು॒ಕ್ರಾ-ಥ್ಸ್ವಾಹಾ॑ಕೃತ॒ಮಿನ್ದ್ರಾ॑ಯ॒ ತ-ಞ್ಜು॑ಹೋಮಿ ॥ ಯಸ್ತೇ᳚ ದ್ರ॒ಫ್ಸೋ ಮಧು॑ಮಾಗ್ಂ ಇನ್ದ್ರಿ॒ಯಾವಾ॒ನ್-ಥ್ಸ್ವಾಹಾ॑ಕೃತಃ॒ ಪುನ॑ರ॒ಪ್ಯೇತಿ॑ ದೇ॒ವಾನ್ । ದಿ॒ವಃ ಪೃ॑ಥಿ॒ವ್ಯಾಃ ಪರ್ಯ॒ನ್ತರಿ॑ಖ್ಷಾ॒-ಥ್ಸ್ವಾಹಾ॑ ಕೃತ॒ಮಿನ್ದ್ರಾ॑ಯ॒ ತ-ಞ್ಜು॑ಹೋಮಿ ॥ ಅ॒ದ್ಧ್ವ॒ರ್ಯುರ್ವಾ ಋ॒ತ್ವಿಜಾ᳚-ಮ್ಪ್ರಥ॒ಮೋ ಯು॑ಜ್ಯತೇ॒ ತೇನ॒ ಸ್ತೋಮೋ॑ ಯೋಕ್ತ॒ವ್ಯ॑ ಇತ್ಯಾ॑ಹು॒ರ್ವಾಗ॑ಗ್ರೇ॒ಗಾ ಅಗ್ರ॑ ಏತ್ವೃಜು॒ಗಾ ದೇ॒ವೇಭ್ಯೋ॒ ಯಶೋ॒ ಮಯಿ॒ ದಧ॑ತೀ ಪ್ರಾ॒ಣಾ-ನ್ಪ॒ಶುಷು॑ ಪ್ರ॒ಜಾ-ಮ್ಮಯಿ॑ [ ] 33
ಚ॒ ಯಜ॑ಮಾನೇ॒ ಚೇತ್ಯಾ॑ಹ॒ ವಾಚ॑ಮೇ॒ವ ತದ್ಯ॑ಜ್ಞಮು॒ಖೇ ಯು॑ನಕ್ತಿ॒ ವಾಸ್ತು॒ ವಾ ಏ॒ತದ್ಯ॒ಜ್ಞಸ್ಯ॑ ಕ್ರಿಯತೇ॒ ಯದ್ಗ್ರಹಾ᳚-ನ್ಗೃಹೀ॒ತ್ವಾ ಬ॑ಹಿಷ್ಪವಮಾ॒ನಗ್ಂ ಸರ್ಪ॑ನ್ತಿ॒ಪರಾ᳚ಞ್ಚೋ॒ ಹಿ ಯನ್ತಿ॒ ಪರಾ॑ಚೀಭಿ-ಸ್ಸ್ತು॒ವತೇ॑ ವೈಷ್ಣ॒ವ್ಯರ್ಚಾ ಪುನ॒ರೇತ್ಯೋಪ॑ ತಿಷ್ಠತೇ ಯ॒ಜ್ಞೋ ವೈ ವಿಷ್ಣು॑ ರ್ಯ॒ಜ್ಞಮೇ॒ವಾಕ॒ರ್ವಿಷ್ಣೋ॒ ತ್ವನ್ನೋ॒ ಅನ್ತ॑ಮ॒-ಶ್ಶರ್ಮ॑ ಯಚ್ಛ ಸಹನ್ತ್ಯ । ಪ್ರ ತೇ॒ ಧಾರಾ॑ ಮಧು॒ಶ್ಚುತ॒ ಉಥ್ಸ॑-ನ್ದುಹ್ರತೇ॒ ಅಖ್ಷಿ॑ತ॒ಮಿತ್ಯಾ॑ಹ॒ ಯದೇ॒ವಾಸ್ಯ॒ ಶಯಾ॑ನಸ್ಯೋಪ॒ಶುಷ್ಯ॑ತಿ॒ ತದೇ॒ವಾಸ್ಯೈ॒ತೇನಾ ಽಽಪ್ಯಾ॑ಯಯತಿ ॥ 34 ॥
(ಪ॒ರಿ॒ವಾ॒ಪಾತ್ – ಪ್ರ॒ಜಾ-ಮ್ಮಯಿ॑ – ದುಹ್ರತೇ॒ – ಚತು॑ರ್ದಶ ಚ) (ಅ. 10)
ಅ॒ಗ್ನಿನಾ॑ ರ॒ಯಿಮ॑ಶ್ಞವ॒-ತ್ಪೋಷ॑ಮೇ॒ವ ದಿ॒ವೇದಿ॑ವೇ । ಯ॒ಶಸಂ॑-ವೀಁ॒ರವ॑ತ್ತಮಮ್ ॥ ಗೋಮಾಗ್ಂ॑ ಅ॒ಗ್ನೇ-ಽವಿ॑ಮಾಗ್ಂ ಅ॒ಶ್ವೀ ಯ॒ಜ್ಞೋ ನೃ॒ವಥ್ಸ॑ಖಾ॒ ಸದ॒ಮಿದ॑ಪ್ರಮೃ॒ಷ್ಯಃ । ಇಡಾ॑ವಾಗ್ಂ ಏ॒ಷೋ ಅ॑ಸುರ ಪ್ರ॒ಜಾವಾ᳚-ನ್ದೀ॒ರ್ಘೋ ರ॒ಯಿಃ ಪೃ॑ಥುಬು॒ಧ್ನ-ಸ್ಸ॒ಭಾವಾನ್॑ ॥ ಆಪ್ಯಾ॑ಯಸ್ವ॒, ಸನ್ತೇ᳚ ॥ ಇ॒ಹ ತ್ವಷ್ಟಾ॑ರಮಗ್ರಿ॒ಯಂ-ವಿಁ॒ಶ್ವರೂ॑ಪ॒ಮುಪ॑ ಹ್ವಯೇ । ಅ॒ಸ್ಮಾಕ॑ಮಸ್ತು॒ ಕೇವ॑ಲಃ ॥ ತನ್ನ॑ಸ್ತು॒ರೀಪ॒ಮಧ॑ ಪೋಷಯಿ॒ತ್ನು ದೇವ॑ ತ್ವಷ್ಟ॒ರ್ವಿ ರ॑ರಾ॒ಣ-ಸ್ಸ್ಯ॑ಸ್ವ । ಯತೋ॑ ವೀ॒ರಃ [ಯತೋ॑ ವೀ॒ರಃ, ಕ॒ರ್ಮ॒ಣ್ಯ॑-ಸ್ಸು॒ದಖ್ಷೋ॑] 35
ಕ॑ರ್ಮ॒ಣ್ಯ॑-ಸ್ಸು॒ದಖ್ಷೋ॑ ಯು॒ಕ್ತಗ್ರಾ॑ವಾ॒ ಜಾಯ॑ತೇ ದೇ॒ವಕಾ॑ಮಃ ॥ಶಿ॒ವಸ್ತ್ವ॑ಷ್ಟರಿ॒ಹಾ-ಽಽ ಗ॑ಹಿ ವಿ॒ಭುಃ ಪೋಷ॑ ಉ॒ತತ್ಮನಾ᳚ । ಯ॒ಜ್ಞೇಯ॑ಜ್ಞೇ ನ॒ ಉದ॑ವ ॥ ಪಿ॒ಶಙ್ಗ॑ರೂಪ-ಸ್ಸು॒ಭರೋ॑ ವಯೋ॒ಧಾ-ಶ್ಶ್ರು॒ಷ್ಟೀ ವೀ॒ರೋ ಜಾ॑ಯತೇ ದೇ॒ವಕಾ॑ಮಃ । ಪ್ರ॒ಜಾ-ನ್ತ್ವಷ್ಟಾ॒ ವಿಷ್ಯ॑ತು॒ ನಾಭಿ॑ಮ॒ಸ್ಮೇ ಅಥಾ॑ ದೇ॒ವಾನಾ॒ಮಪ್ಯೇ॑ತು॒ ಪಾಥಃ॑ ॥ ಪ್ರಣೋ॑ದೇ॒ ವ್ಯಾ, ನೋ॑ ದಿ॒ವಃ ॥ ಪೀ॒ಪಿ॒ವಾಗ್ಂ ಸ॒ಗ್ಂ॒ ಸರ॑ಸ್ವತ॒-ಸ್ಸ್ತನಂ॒-ಯೋಁ ವಿ॒ಶ್ವದ॑ರ್ಶತಃ । ಧುಖ್ಷೀ॒ಮಹಿ॑ ಪ್ರ॒ಜಾಮಿಷ᳚ಮ್ ॥ 36 ॥
ಯೇ ತೇ॑ ಸರಸ್ವ ಊ॒ರ್ಮಯೋ॒ ಮಧು॑ಮನ್ತೋ ಘೃತ॒ಶ್ಚುತಃ॑ । ತೇಷಾ᳚-ನ್ತೇ ಸು॒ಮ್ನಮೀ॑ಮಹೇ ॥ ಯಸ್ಯ॑ ವ್ರ॒ತ-ಮ್ಪ॒ಶವೋ॒ ಯನ್ತಿ॒ ಸರ್ವೇ॒ ಯಸ್ಯ॑ ವ್ರ॒ತಮು॑ಪ॒ತಿಷ್ಠ॑ನ್ತ॒ ಆಪಃ॑ । ಯಸ್ಯ॑ ವ್ರ॒ತೇ ಪು॑ಷ್ಟಿ॒ಪತಿ॒ರ್ನಿವಿ॑ಷ್ಟ॒ಸ್ತಗ್ಂ ಸರ॑ಸ್ವನ್ತ॒ಮವ॑ಸೇ ಹುವೇಮ ॥ ದಿ॒ವ್ಯಗ್ಂ ಸು॑ಪ॒ರ್ಣಂ-ವಁ॑ಯ॒ಸ-ಮ್ಬೃ॒ಹನ್ತ॑ಮ॒ಪಾ-ಙ್ಗರ್ಭಂ॑-ವೃಁಷ॒ಭಮೋಷ॑ಧೀನಾಮ್ । ಅ॒ಭೀ॒ಪ॒ತೋ ವೃ॒ಷ್ಟ್ಯಾ ತ॒ರ್ಪಯ॑ನ್ತ॒-ನ್ತಗ್ಂ ಸರ॑ಸ್ವನ್ತ॒ಮವ॑ಸೇ ಹುವೇಮ ॥ ಸಿನೀ॑ವಾಲಿ॒ ಪೃಥು॑ಷ್ಟುಕೇ॒ ಯಾ ದೇ॒ವಾನಾ॒ಮಸಿ॒ ಸ್ವಸಾ᳚ । ಜು॒ಷಸ್ವ॑ ಹ॒ವ್ಯ- [ಹ॒ವ್ಯಮ್, ಆಹು॑ತ-ಮ್ಪ್ರ॒ಜಾ-ನ್ದೇ॑ವಿ] 37
-ಮಾಹು॑ತ-ಮ್ಪ್ರ॒ಜಾ-ನ್ದೇ॑ವಿ ದಿದಿಡ್ಢಿ ನಃ ॥ ಯಾ ಸು॑ಪಾ॒ಣಿ-ಸ್ಸ್ವ॑ಙ್ಗು॒ರಿ-ಸ್ಸು॒ಷೂಮಾ॑ ಬಹು॒ಸೂವ॑ರೀ । ತಸ್ಯೈ॑ ವಿ॒ಶ್ಪತ್ನಿ॑ಯೈ ಹ॒ವಿ-ಸ್ಸಿ॑ನೀವಾ॒ಲ್ಯೈ ಜು॑ಹೋತನ ॥ ಇನ್ದ್ರಂ॑-ವೋಁ ವಿ॒ಶ್ವತ॒ಸ್ಪರೀ, ನ್ದ್ರ॒-ನ್ನರಃ॑ ॥ ಅಸಿ॑ತವರ್ಣಾ॒ ಹರ॑ಯ-ಸ್ಸುಪ॒ರ್ಣಾ ಮಿಹೋ॒ ವಸಾ॑ನಾ॒ ದಿವ॒ಮು-ತ್ಪ॑ತನ್ತಿ ॥ ತ ಆ-ಽವ॑ವೃತ್ರ॒ನ್-ಥ್ಸದ॑ನಾನಿ ಕೃ॒ತ್ವಾ-ಽಽದಿ-ತ್ಪೃ॑ಥಿ॒ವೀ ಘೃ॒ತೈರ್ವ್ಯು॑ದ್ಯತೇ ॥ ಹಿರ॑ಣ್ಯಕೇಶೋ॒ ರಜ॑ಸೋ ವಿಸಾ॒ರೇ-ಽಹಿ॒ರ್ಧುನಿ॒ರ್ವಾತ॑ ಇವ॒ ಧ್ರಜೀ॑ಮಾನ್ । ಶುಚಿ॑ಭ್ರಾಜಾ ಉ॒ಷಸೋ॒ [ಉ॒ಷಸಃ॑, ನವೇ॑ದಾ॒ ಯಶ॑ಸ್ವತೀ-] 38
ನವೇ॑ದಾ॒ ಯಶ॑ಸ್ವತೀ-ರಪ॒ಸ್ಯುವೋ॒ ನ ಸ॒ತ್ಯಾಃ ॥ ಆ ತೇ॑ ಸುಪ॒ರ್ಣಾ ಅ॑ಮಿನನ್ತ॒ ಏವೈಃ᳚ ಕೃ॒ಷ್ಣೋ ನೋ॑ನಾವ ವೃಷ॒ಭೋ ಯದೀ॒ದಮ್ । ಶಿ॒ವಾಭಿ॒ರ್ನ ಸ್ಮಯ॑ಮಾನಾಭಿ॒ರಾ-ಽಗಾ॒-ತ್ಪತ॑ನ್ತಿ॒ ಮಿಹ॑-ಸ್ಸ್ತ॒ನಯ॑ನ್ತ್ಯ॒ಭ್ರಾ ॥ ವಾ॒ಶ್ರೇವ॑ ವಿ॒ದ್ಯುನ್ಮಿ॑ಮಾತಿ ವ॒ಥ್ಸ-ನ್ನ ಮಾ॒ತಾ ಸಿ॑ಷಕ್ತಿ । ಯದೇ॑ಷಾಂ-ವೃಁ॒ಷ್ಟಿರಸ॑ರ್ಜಿ ॥ ಪರ್ವ॑ತಶ್ಚಿ॒ನ್ಮಹಿ॑ ವೃ॒ದ್ಧೋ ಬಿ॑ಭಾಯ ದಿ॒ವಶ್ಚಿ॒-ಥ್ಸಾನು॑ ರೇಜತ ಸ್ವ॒ನೇ ವಃ॑ । ಯ-ತ್ಕ್ರೀಡ॑ಥ ಮರುತ [ಮರುತಃ, ಋ॒ಷ್ಟಿ॒ಮನ್ತ॒] 39
ಋಷ್ಟಿ॒ಮನ್ತ॒ ಆಪ॑ ಇವ ಸ॒ದ್ಧ್ರಿಯ॑ಞ್ಚೋ ಧವದ್ಧ್ವೇ ॥ ಅ॒ಭಿ ಕ್ರ॑ನ್ದ ಸ್ತ॒ನಯ॒ ಗರ್ಭ॒ಮಾ ಧಾ॑ ಉದ॒ನ್ವತಾ॒ ಪರಿ॑ ದೀಯಾ॒ ರಥೇ॑ನ । ದೃತಿ॒ಗ್ಂ॒ ಸು ಕ॑ರ್ಷ॒ ವಿಷಿ॑ತ॒-ನ್ನ್ಯ॑ಞ್ಚಗ್ಂ ಸ॒ಮಾ ಭ॑ವನ್ತೂ॒ದ್ವತಾ॑ ನಿಪಾ॒ದಾಃ ॥ ತ್ವ-ನ್ತ್ಯಾ ಚಿ॒ದಚ್ಯು॒ತಾ-ಽಗ್ನೇ॑ ಪ॒ಶುರ್ನ ಯವ॑ಸೇ । ಧಾಮಾ॑ ಹ॒ ಯ-ತ್ತೇ॑ ಅಜರ॒ ವನಾ॑ ವೃ॒ಶ್ಚನ್ತಿ॒ ಶಿಕ್ವ॑ಸಃ ॥ ಅಗ್ನೇ॒ ಭೂರೀ॑ಣಿ॒ ತವ॑ ಜಾತವೇದೋ॒ ದೇವ॑ ಸ್ವಧಾವೋ॒-ಽಮೃತ॑ಸ್ಯ॒ ಧಾಮ॑ । ಯಾಶ್ಚ॑ [ ] 40
ಮಾ॒ಯಾ ಮಾ॒ಯಿನಾಂ᳚-ವಿಁಶ್ವಮಿನ್ವ॒ ತ್ವೇ ಪೂ॒ರ್ವೀ-ಸ್ಸ॑ನ್ದ॒ಧುಃ ಪೃ॑ಷ್ಟಬನ್ಧೋ ॥ ದಿ॒ವೋ ನೋ॑ ವೃ॒ಷ್ಟಿ-ಮ್ಮ॑ರುತೋ ರರೀದ್ಧ್ವ॒-ಮ್ಪ್ರಪಿ॑ನ್ವತ॒ ವೃಷ್ಣೋ॒ ಅಶ್ವ॑ಸ್ಯ॒ ಧಾರಾಃ᳚ । ಅ॒ರ್ವಾಂಏ॒ತೇನ॑ ಸ್ತನಯಿ॒ತ್ನುನೇಹ್ಯ॒ಪೋ ನಿ॑ಷಿ॒ಞ್ಚನ್ನಸು॑ರಃ ಪಿ॒ತಾ ನಃ॑ ॥ ಪಿನ್ವ॑ನ್ತ್ಯ॒ಪೋ ಮ॒ರುತ॑-ಸ್ಸು॒ದಾನ॑ವಃ॒ ಪಯೋ॑ ಘೃ॒ತವ॑ದ್ವಿ॒ದಥೇ᳚ಷ್ವಾ॒ ಭುವಃ॑ । ಅತ್ಯ॒-ನ್ನ ಮಿ॒ಹೇ ವಿ ನ॑ಯನ್ತಿ ವಾ॒ಜಿನ॒ಮುಥ್ಸ॑-ನ್ದುಹನ್ತಿ ಸ್ತ॒ನಯ॑ನ್ತ॒ಮಖ್ಷಿ॑ತಮ್ ॥ ಉ॒ದ॒ಪ್ರುತೋ॑ ಮರುತ॒ಸ್ತಾಗ್ಂ ಇ॑ಯರ್ತ॒ ವೃಷ್ಟಿಂ॒- [ವೃಷ್ಟಿ᳚ಮ್, ಯೇ ವಿಶ್ವೇ॑] 41
-ಯೇಁ ವಿಶ್ವೇ॑ ಮ॒ರುತೋ॑ ಜು॒ನನ್ತಿ॑ । ಕ್ರೋಶಾ॑ತಿ॒ ಗರ್ದಾ॑ ಕ॒ನ್ಯೇ॑ವ ತು॒ನ್ನಾ ಪೇರು॑-ನ್ತುಞ್ಜಾ॒ನಾ ಪತ್ಯೇ॑ವ ಜಾ॒ಯಾ ॥ ಘೃ॒ತೇನ॒ ದ್ಯಾವಾ॑ಪೃಥಿ॒ವೀ ಮಧು॑ನಾ॒ ಸಮು॑ಖ್ಷತ॒ ಪಯ॑ಸ್ವತೀಃ ಕೃಣ॒ತಾ-ಽಽಪ॒ ಓಷ॑ಧೀಃ । ಊರ್ಜ॑-ಞ್ಚ॒ ತತ್ರ॑ ಸುಮ॒ತಿ-ಞ್ಚ॑ ಪಿನ್ವಥ॒ ಯತ್ರಾ॑ ನರೋ ಮರುತ-ಸ್ಸಿ॒ಞ್ಚಥಾ॒ ಮಧು॑ ॥ ಉದು॒ತ್ಯಮ್, ಚಿ॒ತ್ರಮ್ ॥ ಔ॒ರ್ವ॒-ಭೃ॒ಗು॒ವಚ್ಛುಚಿ॑ಮಪ್ನವಾನ॒ವದಾ ಹು॑ವೇ । ಅ॒ಗ್ನಿಗ್ಂ ಸ॑ಮು॒ದ್ರವಾ॑ಸಸಮ್ ॥ ಆ ಸ॒ವಗ್ಂ ಸ॑ವಿ॒ತುರ್ಯ॑ಥಾ॒ ಭಗ॑ಸ್ಯೇ ವ ಭು॒ಜಿಗ್ಂ ಹು॑ವೇ । ಅ॒ಗ್ನಿಗ್ಂ ಸ॑ಮು॒ದ್ರವಾ॑ಸಸಮ್ ॥ ಹು॒ವೇ ವಾತ॑ಸ್ವನ-ಙ್ಕ॒ವಿ-ಮ್ಪ॒ರ್ಜನ್ಯ॑ಕ್ರನ್ದ್ಯ॒ಗ್ಂ॒ ಸಹಃ॑ । ಅ॒ಗ್ನಿಗ್ಂ ಸ॑ಮು॒ದ್ರವಾ॑ಸಸಮ್ ॥ 42 ॥
(ವೀ॒ರ – ಇಷಗ್ಂ॑ – ಹ॒ವ್ಯ – ಮು॒ಷಸೋ॑ – ಮರುತ – ಶ್ಚ॒ – ವೃಷ್ಟಿಂ॒ – ಭಗ॑ಸ್ಯ॒ – ದ್ವಾದ॑ಶ ಚ) (ಅ. 11)
(ಪ್ರ॒ಜಾಪ॑ತಿರಕಾಮಯತೈ॒ – ಷ ತೇ॑ ಗಾಯ॒ತ್ರೋ – ಯ॒ಜ್ಞಂ-ವೈಁ – ಪ್ರ॒ಜಾಪ॑ತೇ॒ರ್ಜಾಯ॑ಮಾನಾಃ – ಪ್ರಾಜಾಪ॒ತ್ಯಾ – ಯೋ ವಾ ಅಯ॑ಥಾದೇವತ – ಮಿ॒ಷ್ಟರ್ಗೋ॑ – ನಿಗ್ರಾ॒ಭ್ಯಾ᳚-ಸ್ಸ್ಥ॒ – ಯೋ ವೈ ದೇ॒ವಾ – ಞ್ಜುಷ್ಟೋ॒ – ಽಗ್ನಿನಾ॑ ರ॒ಯಿ – ಮೇಕಾ॑ದಶ )
(ಪ್ರ॒ಜಾಪ॑ತಿರಕಾಮಯತ – ಪ್ರ॒ಜಾಪ॑ತೇ॒ರ್ಜಾಯ॑ಮಾನಾ॒ – ವ್ಯಾಯ॑ಚ್ಛನ್ತೇ॒ – ಮಹ್ಯ॑ಮಿ॒ಮಾ – ನ್ಮಾ॒ಯಾ ಮಾ॒ಯಿನಾ॒ನ್ – ದ್ವಿಚ॑ತ್ವಾರಿಗ್ಂಶತ್)
(ಪ್ರ॒ಜಾಪ॑ತಿರಕಾಮಯತಾ॒, ಅ॒ಗ್ನಿಗ್ಂ ಸ॑ಮು॒ದ್ರವಾ॑ಸಸಂ )
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ತೃತೀಯಕಾಣ್ಡೇ ಪ್ರಥಮಃ ಪ್ರಶ್ನ-ಸ್ಸಮಾಪ್ತಃ ॥