ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ತೃತೀಯಕಾಣ್ಡೇ ದ್ವಿತೀಯಃ ಪ್ರಶ್ನಃ – ಪವಮಾನಗ್ರಾಹಾದೀನಾಂ-ವ್ಯಾಁಖ್ಯಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಯೋ ವೈ ಪವ॑ಮಾನಾನಾಮನ್ವಾರೋ॒ಹಾನ್. ವಿ॒ದ್ವಾನ್. ಯಜ॒ತೇ-ಽನು॒ ಪವ॑ಮಾನಾ॒ನಾ ರೋ॑ಹತಿ॒ ನ ಪವ॑ಮಾನೇ॒ಭ್ಯೋ-ಽವ॑ ಚ್ಛಿದ್ಯತೇ ಶ್ಯೇ॒ನೋ॑-ಽಸಿ ಗಾಯ॒ತ್ರಛ॑ನ್ದಾ॒ ಅನು॒ ತ್ವಾ-ಽಽರ॑ಭೇ ಸ್ವ॒ಸ್ತಿ ಮಾ॒ ಸ-ಮ್ಪಾ॑ರಯ ಸುಪ॒ರ್ಣೋ॑-ಽಸಿ ತ್ರಿ॒ಷ್ಟುಪ್ಛ॑ನ್ದಾ॒ ಅನು॒ ತ್ವಾ-ಽಽರ॑ಭೇ ಸ್ವ॒ಸ್ತಿ ಮಾ॒ ಸ-ಮ್ಪಾ॑ರಯ॒ ಸಘಾ॑-ಽಸಿ॒ ಜಗ॑ತೀಛನ್ದಾ॒ ಅನು॒ ತ್ವಾ-ಽಽರ॑ಭೇ ಸ್ವ॒ಸ್ತಿ ಮಾ॒ ಸಮ್ಪಾ॑ರ॒ಯೇತ್ಯಾ॑ಹೈ॒ತೇ [ ] 1
ವೈ ಪವ॑ಮಾನಾನಾಮನ್ವಾರೋ॒ಹಾಸ್ತಾನ್. ಯ ಏ॒ವಂ-ವಿಁ॒ದ್ವಾನ್. ಯಜ॒ತೇ-ಽನು॒ ಪವ॑ಮಾನಾ॒ನಾ ರೋ॑ಹತಿ॒ ನ ಪವ॑ಮಾನೇ॒ಭ್ಯೋ-ಽವ॑ ಚ್ಛಿದ್ಯತೇ॒ ಯೋ ವೈ ಪವ॑ಮಾನಸ್ಯ॒ ಸನ್ತ॑ತಿಂ॒-ವೇಁದ॒ ಸರ್ವ॒ಮಾಯು॑ರೇತಿ॒ ನ ಪು॒ರಾ-ಽಽಯು॑ಷಃ॒ ಪ್ರ ಮೀ॑ಯತೇ ಪಶು॒ಮಾ-ನ್ಭ॑ವತಿ ವಿ॒ನ್ದತೇ᳚ ಪ್ರ॒ಜಾ-ಮ್ಪವ॑ಮಾನಸ್ಯ॒ ಗ್ರಹಾ॑ ಗೃಹ್ಯ॒ನ್ತೇ-ಽಥ॒ ವಾ ಅ॑ಸ್ಯೈ॒ತೇ-ಽಗೃ॑ಹೀತಾ ದ್ರೋಣಕಲ॒ಶ ಆ॑ಧವ॒ನೀಯಃ॑ ಪೂತ॒ಭೃ-ತ್ತಾನ್. ಯದಗೃ॑ಹೀತ್ವೋಪಾಕು॒ರ್ಯಾ-ತ್ಪವ॑ಮಾನಂ॒-ವಿಁ- [-ತ್ಪವ॑ಮಾನಂ॒-ವಿಁ, ಛಿ॒ನ್ದ್ಯಾ॒-ತ್ತಂ-ವಿಁ॒ಚ್ಛಿದ್ಯ॑ಮಾನ-] 2
ಚ್ಛಿ॑ನ್ದ್ಯಾ॒-ತ್ತಂ-ವಿಁ॒ಚ್ಛಿದ್ಯ॑ಮಾನ-ಮದ್ಧ್ವ॒ರ್ಯೋಃ ಪ್ರಾ॒ಣೋ-ಽನು॒ ವಿಚ್ಛಿ॑ದ್ಯೇ-ತೋಪಯಾ॒ಮಗೃ॑ಹೀತೋ-ಽಸಿ ಪ್ರ॒ಜಾಪ॑ತಯೇ॒ ತ್ವೇತಿ॑ ದ್ರೋಣಕಲ॒ಶಮ॒ಭಿ ಮೃ॑ಶೇ॒ದಿನ್ದ್ರಾ॑ಯ॒ ತ್ವೇತ್ಯಾ॑ಧವ॒ನೀಯಂ॒-ವಿಁಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯ॒ ಇತಿ॑ ಪೂತ॒ಭೃತ॒-ಮ್ಪವ॑ಮಾನಮೇ॒ವ ತ-ಥ್ಸ-ನ್ತ॑ನೋತಿ॒ ಸರ್ವ॒ಮಾಯು॑ರೇತಿ॒ ನ ಪು॒ರಾ-ಽಽಯು॑ಷಃ॒ ಪ್ರಮೀ॑ಯತೇ ಪಶು॒ಮಾ-ನ್ಭ॑ವತಿ ವಿ॒ನ್ದತೇ᳚ ಪ್ರ॒ಜಾಮ್ ॥ 3 ॥
(ಏ॒ತೇ – ವಿ – ದ್ವಿಚ॑ತ್ವಾರಿಗ್ಂಶಚ್ಚ) (ಅ. 1)
ತ್ರೀಣಿ॒ ವಾವ ಸವ॑ನಾ॒ನ್ಯಥ॑ ತೃ॒ತೀಯ॒ಗ್ಂ॒ ಸವ॑ನ॒ಮವ॑ ಲುಮ್ಪನ್ತ್ಯನ॒ಗ್ಂ॒ಶು ಕು॒ರ್ವನ್ತ॑ ಉಪಾ॒ಗ್ಂ॒ಶುಗ್ಂಹು॒ತ್ವೋಪಾಗ್ಂ॑ಶುಪಾ॒ತ್ರೇ-ಽಗ್ಂ॑ಶುಮ॒ವಾಸ್ಯ॒ ತನ್ತೃ॑ತೀಯಸವ॒ನೇ॑ ಽಪಿ॒ಸೃಜ್ಯಾ॒ಭಿ ಷು॑ಣುಯಾ॒ದ್ಯದಾ᳚ಪ್ಯಾ॒ಯಯ॑ತಿ॒ ತೇನಾಗ್ಂ॑ಶು॒ಮದ್ಯದ॑ಭಿಷು॒ಣೋತಿ॒ ತೇನ॑ರ್ಜೀ॒ಷಿ ಸರ್ವಾ᳚ಣ್ಯೇ॒ವ ತ-ಥ್ಸವ॑ನಾನ್ಯಗ್ಂಶು॒ಮನ್ತಿ॑ ಶು॒ಕ್ರವ॑ನ್ತಿ ಸ॒ಮಾವ॑ದ್ವೀರ್ಯಾಣಿ ಕರೋತಿ॒ ದ್ವೌ ಸ॑ಮು॒ದ್ರೌ ವಿತ॑ತಾವಜೂ॒ರ್ಯೌ ಪ॒ರ್ಯಾವ॑ರ್ತೇತೇ ಜ॒ಠರೇ॑ವ॒ ಪಾದಾಃ᳚ । ತಯೋಃ॒ ಪಶ್ಯ॑ನ್ತೋ॒ ಅತಿ॑ ಯನ್ತ್ಯ॒ನ್ಯ-ಮಪ॑ಶ್ಯನ್ತ॒- [ಯನ್ತ್ಯ॒ನ್ಯ-ಮಪ॑ಶ್ಯನ್ತಃ, ಸೇತು॒ನಾ-ಽತಿ॑] 4
-ಸ್ಸೇತು॒ನಾ-ಽತಿ॑ ಯನ್ತ್ಯ॒ನ್ಯಮ್ ॥ ದ್ವೇ ದ್ರಧ॑ಸೀ ಸ॒ತತೀ॑ ವಸ್ತ॒ ಏಕಃ॑ ಕೇ॒ಶೀ ವಿಶ್ವಾ॒ ಭುವ॑ನಾನಿ ವಿ॒ದ್ವಾನ್ । ತಿ॒ರೋ॒ಧಾಯೈ॒ತ್ಯಸಿ॑ತಂ॒-ವಁಸಾ॑ನ-ಶ್ಶು॒ಕ್ರಮಾ ದ॑ತ್ತೇ ಅನು॒ಹಾಯ॑ ಜಾ॒ರ್ಯೈ ॥ ದೇ॒ವಾ ವೈ ಯದ್ಯ॒ಜ್ಞೇ-ಽಕು॑ರ್ವತ॒ ತದಸು॑ರಾ ಅಕುರ್ವತ॒ ತೇ ದೇ॒ವಾ ಏ॒ತ-ಮ್ಮ॑ಹಾಯ॒ಜ್ಞಮ॑ಪಶ್ಯ॒-ನ್ತಮ॑ತನ್ವತಾಗ್ನಿಹೋ॒ತ್ರಂ-ವ್ರಁ॒ತಮ॑ಕುರ್ವತ॒ ತಸ್ಮಾ॒-ದ್ದ್ವಿವ್ರ॑ತ-ಸ್ಸ್ಯಾ॒-ದ್ದ್ವಿರ್ಹ್ಯ॑ಗ್ನಿಹೋ॒ತ್ರ-ಞ್ಜುಹ್ವ॑ತಿ ಪೌರ್ಣಮಾ॒ಸಂ-ಯಁ॒ಜ್ಞ-ಮ॑ಗ್ನೀಷೋ॒ಮೀಯ॑- [-ಮ॑ಗ್ನೀಷೋ॒ಮೀಯ᳚ಮ್, ಪ॒ಶುಮ॑ಕುರ್ವತ] 5
-ಮ್ಪ॒ಶುಮ॑ಕುರ್ವತ ದಾ॒ರ್ಶ್ಯಂ-ಯಁ॒ಜ್ಞಮಾ᳚ಗ್ನೇ॒ಯ-ಮ್ಪ॒ಶುಮ॑ಕುರ್ವತ ವೈಶ್ವದೇ॒ವ-ಮ್ಪ್ರಾ॑ತಸ್ಸವ॒ನ -ಮ॑ಕುರ್ವತ ವರುಣಪ್ರಘಾ॒ಸಾ-ನ್ಮಾದ್ಧ್ಯ॑ದಿನ್ನ॒ಗ್ಂ॒ ಸವ॑ನಗ್ಂ ಸಾಕಮೇ॒ಧಾ-ನ್ಪಿ॑ತೃಯ॒ಜ್ಞ-ನ್ತ್ರ್ಯ॑ಮ್ಬಕಾಗ್-ಸ್ತೃತೀಯಸವ॒ನಮ॑ಕುರ್ವತ॒ ತಮೇ॑ಷಾ॒ಮಸು॑ರಾ ಯ॒ಜ್ಞ -ಮ॒ನ್ವವಾ॑ಜಿಗಾಗ್ಂಸ॒-ನ್ತ-ನ್ನಾ-ಽನ್ವವಾ॑ಯ॒-ನ್ತೇ᳚-ಽಬ್ರುವನ್ನದ್ಧ್ವರ್ತ॒ವ್ಯಾ ವಾ ಇ॒ಮೇ ದೇ॒ವಾ ಅ॑ಭೂವ॒ನ್ನಿತಿ॒ ತದ॑ದ್ಧ್ವ॒ರಸ್ಯಾ᳚ ಽದ್ಧ್ವರ॒ತ್ವ-ನ್ತತೋ॑ ದೇ॒ವಾ ಅಭ॑ವ॒-ನ್ಪರಾ-ಽಸು॑ರಾ॒ ಯ ಏ॒ವಂ-ವಿಁ॒ದ್ವಾನ್-ಥ್ಸೋಮೇ॑ನ॒ ಯಜ॑ತೇ॒ ಭವ॑ತ್ಯಾ॒ತ್ಮನಾ॒ ಪರಾ᳚ ಽಸ್ಯ॒ ಭ್ರಾತೃ॑ವ್ಯೋ ಭವತಿ ॥ 6 ॥
(ಅಪ॑ಶ್ಯನ್ತೋ-ಽ – ಗ್ನೀಷೋ॒ಮೀಯ॑ – ಮಾ॒ತ್ಮನಾ॒ ಪರಾ॒ – ತ್ರೀಣಿ॑ ಚ) (ಅ. 2)
ಪ॒ರಿ॒ಭೂರ॒ಗ್ನಿ-ಮ್ಪ॑ರಿ॒ಭೂರಿನ್ದ್ರ॑-ಮ್ಪರಿ॒ಭೂರ್ವಿಶ್ವಾ᳚-ನ್ದೇ॒ವಾ-ನ್ಪ॑ರಿ॒ಭೂರ್ಮಾಗ್ಂ ಸ॒ಹ ಬ್ರ॑ಹ್ಮವರ್ಚ॒ಸೇನ॒ ಸ ನಃ॑ ಪವಸ್ವ॒ ಶ-ಙ್ಗವೇ॒ ಶ-ಞ್ಜನಾ॑ಯ॒ ಶಮರ್ವ॑ತೇ॒ ಶಗ್ಂ ರಾ॑ಜ॒ನ್ನೋಷ॑ಧೀ॒ಭ್ಯೋ ಽಚ್ಛಿ॑ನ್ನಸ್ಯ ತೇ ರಯಿಪತೇ ಸು॒ವೀರ್ಯ॑ಸ್ಯ ರಾ॒ಯಸ್ಪೋಷ॑ಸ್ಯ ದದಿ॒ತಾರ॑-ಸ್ಸ್ಯಾಮ । ತಸ್ಯ॑ ಮೇ ರಾಸ್ವ॒ ತಸ್ಯ॑ ತೇ ಭಖ್ಷೀಯ॒ ತಸ್ಯ॑ ತ ಇ॒ದಮುನ್ಮೃ॑ಜೇ ॥ ಪ್ರಾ॒ಣಾಯ॑ ಮೇ ವರ್ಚೋ॒ದಾ ವರ್ಚ॑ಸೇ ಪವಸ್ವಾ ಪಾ॒ನಾಯ॑ ವ್ಯಾ॒ನಾಯ॑ ವಾ॒ಚೇ [ವಾ॒ಚೇ, ದ॒ಖ್ಷ॒ಕ್ರ॒ತುಭ್ಯಾ॒-ಞ್ಚಖ್ಷು॑ರ್ಭ್ಯಾ-ಮ್ಮೇ] 7
ದ॑ಖ್ಷಕ್ರ॒ತುಭ್ಯಾ॒-ಞ್ಚಖ್ಷು॑ರ್ಭ್ಯಾ-ಮ್ಮೇ ವರ್ಚೋ॒ದೌ ವರ್ಚ॑ಸೇ ಪವೇಥಾ॒ಗ್॒ ಶ್ರೋತ್ರಾ॑ಯಾ॒ ಽಽತ್ಮನೇ ಽಙ್ಗೇ᳚ಭ್ಯ॒ ಆಯು॑ಷೇ ವೀ॒ರ್ಯಾ॑ಯ॒ ವಿಷ್ಣೋ॒ರಿನ್ದ್ರ॑ಸ್ಯ॒ ವಿಶ್ವೇ॑ಷಾ-ನ್ದೇ॒ವಾನಾ᳚-ಞ್ಜ॒ಠರ॑ಮಸಿ ವರ್ಚೋ॒ದಾ ಮೇ॒ ವರ್ಚ॑ಸೇ ಪವಸ್ವ॒ ಕೋ॑-ಽಸಿ॒ ಕೋ ನಾಮ॒ ಕಸ್ಮೈ᳚ ತ್ವಾ॒ ಕಾಯ॑ ತ್ವಾ॒ ಯ-ನ್ತ್ವಾ॒ ಸೋಮೇ॒ನಾತೀ॑ತೃಪಂ॒-ಯಁ-ನ್ತ್ವಾ॒ ಸೋಮೇ॒ನಾಮೀ॑ಮದಗ್ಂ ಸುಪ್ರ॒ಜಾಃ ಪ್ರ॒ಜಯಾ॑ ಭೂಯಾಸಗ್ಂ ಸು॒ವೀರೋ॑ ವೀ॒ರೈ-ಸ್ಸು॒ವರ್ಚಾ॒ ವರ್ಚ॑ಸಾ ಸು॒ಪೋಷಃ॒ ಪೋಷೈ॒-ರ್ವಿಶ್ವೇ᳚ಭ್ಯೋ ಮೇ ರೂ॒ಪೇಭ್ಯೋ॑ ವರ್ಚೋ॒ದಾ [ವರ್ಚೋ॒ದಾಃ, ವರ್ಚ॑ಸೇ] 8
ವರ್ಚ॑ಸೇ ಪವಸ್ವ॒ ತಸ್ಯ॑ ಮೇ ರಾಸ್ವ॒ ತಸ್ಯ॑ ತೇ ಭಖ್ಷೀಯ॒ ತಸ್ಯ॑ ತ ಇ॒ದಮುನ್ಮೃ॑ಜೇ ॥ ಬುಭೂ॑ಷ॒ನ್ನವೇ᳚ಖ್ಷೇತೈ॒ಷ ವೈ ಪಾತ್ರಿ॑ಯಃ ಪ್ರ॒ಜಾಪ॑ತಿರ್ಯ॒ಜ್ಞಃ ಪ್ರ॒ಜಾಪ॑ತಿ॒ಸ್ತಮೇ॒ವ ತ॑ರ್ಪಯತಿ॒ ಸ ಏ॑ನ-ನ್ತೃ॒ಪ್ತೋ ಭೂತ್ಯಾ॒-ಽಭಿ ಪ॑ವತೇ ಬ್ರಹ್ಮವರ್ಚ॒ಸಕಾ॒ಮೋ-ಽವೇ᳚ಖ್ಷೇತೈ॒ಷ ವೈ ಪಾತ್ರಿ॑ಯಃ ಪ್ರ॒ಜಾಪ॑ತಿರ್ಯ॒ಜ್ಞಃ ಪ್ರ॒ಜಾಪ॑ತಿ॒ಸ್ತಮೇ॒ವ ತ॑ರ್ಪಯತಿ॒ ಸ ಏ॑ನ-ನ್ತೃ॒ಪ್ತೋ ಬ್ರ॑ಹ್ಮವರ್ಚ॒ಸೇನಾ॒ಭಿ ಪ॑ವತ ಆಮಯಾ॒- [ಆಮಯಾ॒ವೀ, ಅವೇ᳚ಖ್ಷೇತೈ॒ಷ ವೈ] 9
-ವ್ಯವೇ᳚ಖ್ಷೇತೈ॒ಷ ವೈ ಪಾತ್ರಿ॑ಯಃ ಪ್ರ॒ಜಾಪ॑ತಿರ್ಯ॒ಜ್ಞಃ ಪ್ರ॒ಜಾಪ॑ತಿ॒ಸ್ತಮೇ॒ವ ತ॑ರ್ಪಯತಿ॒ ಸ ಏ॑ನ-ನ್ತೃ॒ಪ್ತ ಆಯು॑ಷಾ॒-ಽಭಿ ಪ॑ವತೇ-ಽಭಿ॒ಚರ॒ನ್ನವೇ᳚ಖ್ಷೇತೈ॒ಷ ವೈ ಪಾತ್ರಿ॑ಯಃ ಪ್ರ॒ಜಾಪ॑ತಿರ್ಯ॒ಜ್ಞಃ ಪ್ರ॒ಜಾಪ॑ತಿ॒ಸ್ತಮೇ॒ವ ತ॑ರ್ಪಯತಿ॒ ಸ ಏ॑ನ-ನ್ತೃ॒ಪ್ತಃ ಪ್ರಾ॑ಣಾಪಾ॒ನಾಭ್ಯಾಂ᳚-ವಾಁ॒ಚೋ ದ॑ಖ್ಷಕ್ರ॒ತುಭ್ಯಾ॒-ಞ್ಚಖ್ಷು॑ರ್ಭ್ಯಾ॒ಗ್॒ ಶ್ರೋತ್ರಾ᳚ಭ್ಯಾ-ಮಾ॒ತ್ಮನೋ-ಽಙ್ಗೇ᳚ಭ್ಯ॒ ಆಯು॑ಷೋ॒-ಽನ್ತರೇ॑ತಿ ತಾ॒ಜ-ಕ್ಪ್ರ ಧ॑ನ್ವತಿ ॥ 10 ॥
(ವಾ॒ಚೇ-ರೂ॒ಪೇಭ್ಯೋ॑ ವರ್ಚೋ॒ದಾ – ಆ॑ಮಯಾ॒ವೀ – ಪಞ್ಚ॑ಚತ್ವಾರಿಗ್ಂಶಚ್ಚ) (ಅ. 3)
ಸ್ಫ್ಯ-ಸ್ಸ್ವ॒ಸ್ತಿರ್ವಿ॑ಘ॒ನ-ಸ್ಸ್ವ॒ಸ್ತಿಃ ಪರ್ಶು॒ರ್ವೇದಿಃ॑ ಪರ॒ಶುರ್ನ॑-ಸ್ಸ್ವ॒ಸ್ತಿಃ । ಯ॒ಜ್ಞಿಯಾ॑ ಯಜ್ಞ॒ಕೃತ॑-ಸ್ಸ್ಥ॒ ತೇ ಮಾ॒ಸ್ಮಿನ್ ಯ॒ಜ್ಞ ಉಪ॑ ಹ್ವಯದ್ಧ್ವ॒ಮುಪ॑ ಮಾ॒ ದ್ಯಾವಾ॑ಪೃಥಿ॒ವೀ ಹ್ವ॑ಯೇತಾ॒ಮುಪಾ᳚-ಽಽಸ್ತಾ॒ವಃ ಕ॒ಲಶ॒-ಸ್ಸೋಮೋ॑ ಅ॒ಗ್ನಿರುಪ॑ ದೇ॒ವಾ ಉಪ॑ ಯ॒ಜ್ಞ ಉಪ॑ ಮಾ॒ ಹೋತ್ರಾ॑ ಉಪಹ॒ವೇ ಹ್ವ॑ಯನ್ತಾ॒-ನ್ನಮೋ॒-ಽಗ್ನಯೇ॑ ಮಖ॒ಘ್ನೇಮ॒ಖಸ್ಯ॑ ಮಾ॒ ಯಶೋ᳚-ಽರ್ಯಾ॒ದಿತ್ಯಾ॑ಹವ॒ನೀಯ॒ಮುಪ॑ ತಿಷ್ಠತೇ ಯ॒ಜ್ಞೋ ವೈ ಮ॒ಖೋ [ಯ॒ಜ್ಞೋ ವೈ ಮ॒ಖಃ, ಯ॒ಜ್ಞಂ-ವಾಁವ] 11
ಯ॒ಜ್ಞಂ-ವಾಁವ ಸ ತದ॑ಹ॒-ನ್ತಸ್ಮಾ॑ ಏ॒ವ ನ॑ಮ॒ಸ್ಕೃತ್ಯ॒ ಸದಃ॒ ಪ್ರಸ॑ರ್ಪತ್ಯಾ॒ತ್ಮನೋ-ಽನಾ᳚ರ್ತ್ಯೈ॒ ನಮೋ॑ ರು॒ದ್ರಾಯ॑ ಮಖ॒ಘ್ನೇ ನಮ॑ಸ್ಕೃತ್ಯಾ ಮಾ ಪಾ॒ಹೀತ್ಯಾಗ್ನೀ᳚ದ್ಧ್ರ॒-ನ್ತಸ್ಮಾ॑ ಏ॒ವ ನ॑ಮ॒ಸ್ಕೃತ್ಯ॒ ಸದಃ॒ ಪ್ರಸ॑ರ್ಪತ್ಯಾ॒ತ್ಮನೋ-ಽನಾ᳚ರ್ತ್ಯೈ॒ ನಮ॒ ಇನ್ದ್ರಾ॑ಯ ಮಖ॒ಘ್ನ ಇ॑ನ್ದ್ರಿ॒ಯ-ಮ್ಮೇ॑ ವೀ॒ರ್ಯ॑-ಮ್ಮಾ ನಿರ್ವ॑ಧೀ॒ರಿತಿ॑ ಹೋ॒ತ್ರೀಯ॑ಮಾ॒ಶಿಷ॑ಮೇ॒ವೈತಾಮಾ ಶಾ᳚ಸ್ತೈನ್ದ್ರಿ॒ಯಸ್ಯ॑ ವೀ॒ರ್ಯ॑ಸ್ಯಾನಿ॑ರ್ಘಾತಾಯ॒ ಯಾ ವೈ [ ] 12
ದೇ॒ವತಾ॒-ಸ್ಸದ॒ಸ್ಯಾರ್ತಿ॑ಮಾ॒ರ್ಪಯ॑ನ್ತಿ॒ ಯಸ್ತಾ ವಿ॒ದ್ವಾ-ನ್ಪ್ರ॒ಸರ್ಪ॑ತಿ॒ ನ ಸದ॒ಸ್ಯಾರ್ತಿ॒ಮಾರ್ಚ್ಛ॑ತಿ॒ ನಮೋ॒-ಽಗ್ನಯೇ॑ ಮಖ॒ಘ್ನ ಇತ್ಯಾ॑ಹೈ॒ತಾ ವೈ ದೇ॒ವತಾ॒-ಸ್ಸದ॒ಸ್ಯಾರ್ತಿ॒ಮಾ-ಽರ್ಪ॑ಯನ್ತಿ॒ ತಾ ಯ ಏ॒ವಂ-ವಿಁ॒ದ್ವಾ-ನ್ಪ್ರ॒ಸರ್ಪ॑ತಿ॒ ನ ಸದ॒ಸ್ಯಾರ್ತಿ॒ಮಾರ್ಚ್ಛ॑ತಿ ದ್ದೃ॒ಢೇ ಸ್ಥ॑-ಶ್ಶಿಥಿ॒ರೇ ಸ॒ಮೀಚೀ॒ ಮಾ-ಽಗ್ಂಹ॑ಸಸ್ಪಾತ॒ಗ್ಂ॒ ಸೂರ್ಯೋ॑ ಮಾ ದೇ॒ವೋ ದಿ॒ವ್ಯಾದಗ್ಂಹ॑ಸಸ್ಪಾತು ವಾ॒ಯುರ॒ನ್ತರಿ॑ಖ್ಷಾ- [ವಾ॒ಯುರ॒ನ್ತರಿ॑ಖ್ಷಾತ್, ಅ॒ಗ್ನಿಃ ಪೃ॑ಥಿ॒ವ್ಯಾ] 13
-ದ॒ಗ್ನಿಃ ಪೃ॑ಥಿ॒ವ್ಯಾ ಯ॒ಮಃ ಪಿ॒ತೃಭ್ಯ॒-ಸ್ಸರ॑ಸ್ವತೀ ಮನು॒ಷ್ಯೇ᳚ಭ್ಯೋ॒ ದೇವೀ᳚ ದ್ವಾರೌ॒ ಮಾ ಮಾ॒ ಸ-ನ್ತಾ᳚ಪ್ತ॒-ನ್ನಮ॒-ಸ್ಸದ॑ಸೇ॒ ನಮ॒-ಸ್ಸದ॑ಸ॒ಸ್ಪತ॑ಯೇ॒ ನಮ॒-ಸ್ಸಖೀ॑ನಾ-ಮ್ಪುರೋ॒ಗಾಣಾ॒-ಞ್ಚಖ್ಷು॑ಷೇ॒ ನಮೋ॑ ದಿ॒ವೇ ನಮಃ॑ ಪೃಥಿ॒ವ್ಯಾ ಅಹೇ॑ ದೈಧಿಷ॒ವ್ಯೋದತ॑ಸ್ತಿಷ್ಠಾ॒-ಽನ್ಯಸ್ಯ॒ ಸದ॑ನೇ ಸೀದ॒ ಯೋ᳚-ಽಸ್ಮ-ತ್ಪಾಕ॑ತರ॒ ಉನ್ನಿ॒ವತ॒ ಉದು॒ದ್ವತ॑ಶ್ಚ ಗೇಷ-ಮ್ಪಾ॒ತ-ಮ್ಮಾ᳚ ದ್ಯಾವಾಪೃಥಿವೀ ಅ॒ದ್ಯಾಹ್ನ॒-ಸ್ಸದೋ॒ ವೈ ಪ್ರ॒ಸರ್ಪ॑ನ್ತ- [ವೈ ಪ್ರ॒ಸರ್ಪ॑ನ್ತಮ್, ಪಿ॒ತರೋ-ಽನು॒] 14
-ಮ್ಪಿ॒ತರೋ-ಽನು॒ ಪ್ರಸ॑ರ್ಪನ್ತಿ॒ ತ ಏ॑ನಮೀಶ್ವ॒ರಾ ಹಿಗ್ಂಸಿ॑ತೋ॒-ಸ್ಸದಃ॑ ಪ್ರ॒ಸೃಪ್ಯ॑ ದಖ್ಷಿಣಾ॒ರ್ಧ-ಮ್ಪರೇ᳚ಖ್ಷೇ॒ತಾ-ಽಗ॑ನ್ತ ಪಿತರಃ ಪಿತೃ॒ಮಾನ॒ಹಂ-ಯುಁ॒ಷ್ಮಾಭಿ॑ರ್ಭೂಯಾಸಗ್ಂ ಸುಪ್ರ॒ಜಸೋ॒ ಮಯಾ॑ ಯೂ॒ಯ-ಮ್ಭೂ॑ಯಾ॒ಸ್ತೇತಿ॒ ತೇಭ್ಯ॑ ಏ॒ವ ನ॑ಮ॒ಸ್ಕೃತ್ಯ॒ ಸದಃ॒ ಪ್ರಸ॑ರ್ಪತ್ಯಾ॒ತ್ಮನೋ-ಽನಾ᳚ರ್ತ್ಯೈ ॥ 15 ॥
(ಮ॒ಖೋ – ವಾ – ಅ॒ನ್ತರಿ॑ಖ್ಷಾತ್ – ಪ್ರ॒ಸರ್ಪ॑ನ್ತಂ॒ – ತ್ರಯ॑ಸ್ತ್ರಿಗ್ಂಶಚ್ಚ) (ಅ. 4)
ಭಖ್ಷೇಹಿ॒ ಮಾ ಽಽವಿ॑ಶ ದೀರ್ಘಾಯು॒ತ್ವಾಯ॑ ಶನ್ತನು॒ತ್ವಾಯ॑ ರಾ॒ಯಸ್ಪೋಷಾ॑ಯ॒ ವರ್ಚ॑ಸೇ ಸುಪ್ರಜಾ॒ಸ್ತ್ವಾಯೇಹಿ॑ ವಸೋ ಪುರೋ ವಸೋ ಪ್ರಿ॒ಯೋ ಮೇ॑ ಹೃ॒ದೋ᳚-ಽಸ್ಯ॒ಶ್ವಿನೋ᳚ಸ್ತ್ವಾ ಬಾ॒ಹುಭ್ಯಾಗ್ಂ॑ ಸಘ್ಯಾಸ-ನ್ನೃ॒ಚಖ್ಷ॑ಸ-ನ್ತ್ವಾ ದೇವ ಸೋಮ ಸು॒ಚಖ್ಷಾ॒ ಅವ॑ ಖ್ಯೇಷ-ಮ್ಮ॒ನ್ದ್ರಾ-ಽಭಿಭೂ॑ತಿಃ ಕೇ॒ತುರ್ಯ॒ಜ್ಞಾನಾಂ॒-ವಾಁಗ್ಜು॑ಷಾ॒ಣಾ ಸೋಮ॑ಸ್ಯ ತೃಪ್ಯತು ಮ॒ನ್ದ್ರಾ ಸ್ವ॑ರ್ವಾ॒ಚ್ಯದಿ॑ತಿ॒ರನಾ॑ಹತ ಶೀರ್ಷ್ಣೀ॒ ವಾಗ್ಜು॑ಷಾ॒ಣಾ ಸೋಮ॑ಸ್ಯ ತೃಪ್ಯ॒ತ್ವೇಹಿ॑ ವಿಶ್ವಚರ್ಷಣೇ [ ] 16
ಶ॒ಮ್ಭೂರ್ಮ॑ಯೋ॒ಭೂ-ಸ್ಸ್ವ॒ಸ್ತಿ ಮಾ॑ ಹರಿವರ್ಣ॒ ಪ್ರಚ॑ರ॒ ಕ್ರತ್ವೇ॒ ದಖ್ಷಾ॑ಯ ರಾ॒ಯಸ್ಪೋಷಾ॑ಯ ಸುವೀ॒ರತಾ॑ಯೈ॒ ಮಾ ಮಾ॑ ರಾಜ॒ನ್. ವಿ ಬೀ॑ಭಿಷೋ॒ ಮಾ ಮೇ॒ ಹಾರ್ದಿ॑ ತ್ವಿ॒ಷಾ ವ॑ಧೀಃ । ವೃಷ॑ಣೇ॒ ಶುಷ್ಮಾ॒ಯಾ-ಽಽಯು॑ಷೇ॒ ವರ್ಚ॑ಸೇ ॥ ವಸು॑ಮ-ದ್ಗಣಸ್ಯ ಸೋಮ ದೇವ ತೇ ಮತಿ॒ವಿದಃ॑ ಪ್ರಾತ॒ಸ್ಸವ॒ನಸ್ಯ॑ ಗಾಯ॒ತ್ರಛ॑ನ್ದಸ॒ ಇನ್ದ್ರ॑ಪೀತಸ್ಯ॒ ನರಾ॒ಶಗ್ಂಸ॑ಪೀತಸ್ಯ ಪಿ॒ತೃಪೀ॑ತಸ್ಯ॒ ಮಧು॑ಮತ॒ ಉಪ॑ಹೂತ॒ಸ್ಯೋಪ॑ಹೂತೋ ಭಖ್ಷಯಾಮಿ ರು॒ದ್ರವ॑-ದ್ಗಣಸ್ಯ ಸೋಮ ದೇವ ತೇ ಮತಿ॒ವಿದೋ॒ ಮಾದ್ಧ್ಯ॑ನ್ದಿನಸ್ಯ॒ ಸವ॑ನಸ್ಯ ತ್ರಿ॒ಷ್ಟುಪ್ಛ॑ನ್ದಸ॒ ಇನ್ದ್ರ॑ಪೀತಸ್ಯ॒ ನರಾ॒ಶಗ್ಂ ಸ॑ಪೀತಸ್ಯ [ ] 17
ಪಿ॒ತೃಪೀ॑ತಸ್ಯ॒ ಮಧು॑ಮತ॒ ಉಪ॑ಹೂತ॒ಸ್ಯೋಪ॑ಹೂತೋ ಭಖ್ಷಯಾಮ್ಯಾದಿ॒ತ್ಯವ॑-ದ್ಗಣಸ್ಯ ಸೋಮ ದೇವ ತೇ ಮತಿ॒ವಿದ॑ಸ್ತೃ॒ತೀಯ॑ಸ್ಯ॒ ಸವ॑ನಸ್ಯ॒ ಜಗ॑ತೀಛನ್ದಸ॒ ಇನ್ದ್ರ॑ಪೀತಸ್ಯ॒ ನರಾ॒ಶಗ್ಂ ಸ॑ಪೀತಸ್ಯ ಪಿ॒ತೃಪೀ॑ತಸ್ಯ॒ ಮಧು॑ಮತ॒ ಉಪ॑ಹೂತ॒ಸ್ಯೋಪ॑ಹೂತೋ ಭಖ್ಷಯಾಮಿ ॥ ಆಪ್ಯಾ॑ಯಸ್ವ॒ ಸಮೇ॑ತು ತೇ ವಿ॒ಶ್ವತ॑-ಸ್ಸೋಮ॒ ವೃಷ್ಣಿ॑ಯಮ್ । ಭವಾ॒ ವಾಜ॑ಸ್ಯ ಸಙ್ಗ॒ಥೇ ॥ ಹಿನ್ವ॑ ಮೇ॒ ಗಾತ್ರಾ॑ ಹರಿವೋ ಗ॒ಣಾ-ನ್ಮೇ॒ ಮಾ ವಿತೀ॑ತೃಷಃ । ಶಿ॒ವೋ ಮೇ॑ ಸಪ್ತ॒ರ್॒ಷೀನುಪ॑ ತಿಷ್ಠಸ್ವ॒ ಮಾ ಮೇ-ಽವಾ॒ನ್ನಾಭಿ॒ಮತಿ॑ [ಮಾ ಮೇ-ಽವಾ॒ನ್ನಾಭಿ॒ಮತಿ॑, ಗಾಃ॒ ।] 18
ಗಾಃ ॥ ಅಪಾ॑ಮ॒ ಸೋಮ॑ಮ॒ಮೃತಾ॑ ಅಭೂ॒ಮಾ-ಽದ॑ರ್ಶ್ಮ॒ ಜ್ಯೋತಿ॒ರವಿ॑ದಾಮ ದೇ॒ವಾನ್ । ಕಿಮ॒ಸ್ಮಾನ್ ಕೃ॑ಣವ॒ದರಾ॑ತಿಃ॒ ಕಿಮು॑ ಧೂ॒ರ್ತಿರ॑ಮೃತ॒ ಮರ್ತ್ಯ॑ಸ್ಯ ॥ ಯನ್ಮ॑ ಆ॒ತ್ಮನೋ॑ ಮಿ॒ನ್ದಾ-ಽಭೂ॑ದ॒ಗ್ನಿಸ್ತ-ತ್ಪುನ॒ರಾ-ಽಹಾ᳚ರ್ಜಾ॒ತವೇ॑ದಾ॒ ವಿಚ॑ರ್ಷಣಿಃ ॥ ಪುನ॑ರ॒ಗ್ನಿಶ್ಚಖ್ಷು॑ರದಾ॒ತ್-ಪುನ॒ರಿನ್ದ್ರೋ॒ ಬೃಹ॒ಸ್ಪತಿಃ॑ । ಪುನ॑ರ್ಮೇ ಅಶ್ವಿನಾ ಯು॒ವ-ಞ್ಚಖ್ಷು॒ರಾ ಧ॑ತ್ತಮ॒ಖ್ಷ್ಯೋಃ ॥ ಇ॒ಷ್ಟಯ॑ಜುಷಸ್ತೇ ದೇವ ಸೋಮ ಸ್ತು॒ತಸ್ತೋ॑ಮಸ್ಯ [ ] 19
ಶ॒ಸ್ತೋಕ್ಥ॑ಸ್ಯ॒ ಹರಿ॑ವತ॒ ಇನ್ದ್ರ॑ಪೀತಸ್ಯ॒ ಮಧು॑ಮತ॒ ಉಪ॑ಹೂತ॒ಸ್ಯೋಪ॑ಹೂತೋ ಭಖ್ಷಯಾಮಿ ॥ ಆ॒ಪೂರ್ಯಾ॒-ಸ್ಸ್ಥಾ-ಽಽಮಾ॑ ಪೂರಯತ ಪ್ರ॒ಜಯಾ॑ ಚ॒ ಧನೇ॑ನ ಚ ॥ ಏ॒ತ-ತ್ತೇ॑ ತತ॒ ಯೇ ಚ॒ ತ್ವಾಮನ್ವೇ॒ತ-ತ್ತೇ॑ ಪಿತಾಮಹ ಪ್ರಪಿತಾಮಹ॒ ಯೇ ಚ॒ ತ್ವಾಮನ್ವತ್ರ॑ ಪಿತರೋ ಯಥಾಭಾ॒ಗ-ಮ್ಮ॑ನ್ದದ್ಧ್ವ॒-ನ್ನಮೋ॑ ವಃ ಪಿತರೋ॒ ರಸಾ॑ಯ॒ ನಮೋ॑ ವಃ ಪಿತರ॒-ಶ್ಶುಷ್ಮಾ॑ಯ॒ ನಮೋ॑ ವಃ ಪಿತರೋ ಜೀ॒ವಾಯ॒ ನಮೋ॑ ವಃ ಪಿತರ- [ನಮೋ॑ ವಃ ಪಿತರಃ, ಸ್ವ॒ಧಾಯೈ॒] 20
-ಸ್ಸ್ವ॒ಧಾಯೈ॒ ನಮೋ॑ ವಃ ಪಿತರೋ ಮ॒ನ್ಯವೇ॒ ನಮೋ॑ ವಃ ಪಿತರೋ ಘೋ॒ರಾಯ॒ ಪಿತ॑ರೋ॒ ನಮೋ॑ ವೋ॒ ಯ ಏ॒ತಸ್ಮಿ॑-ಲ್ಲೋಁ॒ಕೇಸ್ಥ ಯು॒ಷ್ಮಾಗ್ಸ್ತೇ-ಽನು॒ ಯೇ᳚-ಽಸ್ಮಿ-ಲ್ಲೋಁ॒ಕೇ ಮಾ-ನ್ತೇ-ಽನು॒ ಯ ಏ॒ತಸ್ಮಿ॑-ಲ್ಲೋಁ॒ಕೇ ಸ್ಥ ಯೂ॒ಯ-ನ್ತೇಷಾಂ॒-ವಁಸಿ॑ಷ್ಠಾ ಭೂಯಾಸ್ತ॒ ಯೇ᳚-ಽಸ್ಮಿ-ಲ್ಲೋಁ॒ಕೇ॑-ಽಹ-ನ್ತೇಷಾಂ॒-ವಁಸಿ॑ಷ್ಠೋ ಭೂಯಾಸ॒-ಮ್ಪ್ರಜಾ॑ಪತೇ॒ ನ ತ್ವದೇ॒ತಾನ್ಯ॒ನ್ಯೋ ವಿಶ್ವಾ॑ ಜಾ॒ತಾನಿ॒ ಪರಿ॒ತಾ ಬ॑ಭೂವ । 21
ಯ-ತ್ಕಾ॑ಮಾಸ್ತೇ ಜುಹು॒ಮಸ್ತನ್ನೋ॑ ಅಸ್ತು ವ॒ಯಗ್ಗ್ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥ ದೇ॒ವಕೃ॑ತ॒ಸ್ಯೈನ॑ಸೋ ಽವ॒ಯಜ॑ನಮಸಿ ಮನು॒ಷ್ಯ॑ಕೃತ॒ಸ್ಯೈನ॑ಸೋ ಽವ॒ಯಜ॑ನಮಸಿ ಪಿ॒ತೃಕೃ॑ತ॒ಸ್ಯೈನ॑ಸೋ ಽವ॒ಯಜ॑ನಮಸ್ಯ॒ಫ್ಸು ಧೌ॒ತಸ್ಯ॑ ಸೋಮ ದೇವ ತೇ॒ ನೃಭಿ॑-ಸ್ಸು॒ತಸ್ಯೇ॒ಷ್ಟ ಯ॑ಜುಷ-ಸ್ಸ್ತು॒ತಸ್ತೋ॑ಮಸ್ಯ ಶ॒ಸ್ತೋಕ್ಥ॑ಸ್ಯ॒ ಯೋ ಭ॒ಖ್ಷೋಅ॑ಶ್ವ॒ಸನಿ॒ರ್ಯೋ ಗೋ॒ಸನಿ॒ಸ್ತಸ್ಯ॑ ತೇ ಪಿ॒ತೃಭಿ॑ರ್ಭ॒ಖ್ಷ-ಙ್ಕೃ॑ತ॒ಸ್ಯೋ-ಪ॑ಹೂತ॒ಸ್ಯೋಪ॑ಹೂತೋ ಭಖ್ಷಯಾಮಿ ॥ 22 ॥
(ವಿ॒ಶ್ವ॒ಚ॒ರ್ಷ॒ಣೇ॒ – ತ್ರಿ॒ಷ್ಟುಪ್ಛ॑ನ್ದಸ॒ ಇನ್ದ್ರ॑ಪೀತಸ್ಯ॒ ನರಾ॒ಶಗ್ಂ ಸ॑ಪೀತ॒ಸ್ಯಾ – ಽತಿ॑ -ಸ್ತು॒ತಸ್ತೋ॑ಮಸ್ಯ – ಜೀ॒ವಾಯ॒ ನಮೋ॑ ವಃ ಪಿತರೋ – ಬಭೂವ॒ – ಚತು॑ಶ್ಚತ್ವಾರಿಗ್ಂಶಚ್ಚ) (ಅ. 5)
ಮ॒ಹೀ॒ನಾ-ಮ್ಪಯೋ॑-ಽಸಿ॒ ವಿಶ್ವೇ॑ಷಾ-ನ್ದೇ॒ವಾನಾ᳚-ನ್ತ॒ನೂರ್-ಋ॒ದ್ಧ್ಯಾಸ॑ಮ॒ದ್ಯ ಪೃಷ॑ತೀನಾ॒-ಙ್ಗ್ರಹ॒-ಮ್ಪೃಷ॑ತೀನಾ॒-ಙ್ಗ್ರಹೋ॑-ಽಸಿ॒ ವಿಷ್ಣೋ॒ರ್॒ಹೃದ॑ಯಮ॒ಸ್ಯೇಕ॑ಮಿಷ॒ ವಿಷ್ಣು॒ಸ್ತ್ವಾ-ಽನು॒ ವಿಚ॑ಕ್ರಮೇ ಭೂ॒ತಿರ್ದ॒ದ್ಧ್ನಾ ಘೃ॒ತೇನ॑ ವರ್ಧತಾ॒-ನ್ತಸ್ಯ॑ ಮೇ॒ಷ್ಟಸ್ಯ॑ ವೀ॒ತಸ್ಯ॒ ದ್ರವಿ॑ಣ॒ಮಾ ಗ॑ಮ್ಯಾ॒ಜ್ಜ್ಯೋತಿ॑ರಸಿ ವೈಶ್ವಾನ॒ರ-ಮ್ಪೃಶ್ಞಿ॑ಯೈ ದು॒ಗ್ಧಂ-ಯಾಁವ॑ತೀ॒ ದ್ಯಾವಾ॑ಪೃಥಿ॒ವೀ ಮ॑ಹಿ॒ತ್ವಾ ಯಾವ॑ಚ್ಚ ಸ॒ಪ್ತ ಸಿನ್ಧ॑ವೋ ವಿತ॒ಸ್ಥುಃ । ತಾವ॑ನ್ತಮಿನ್ದ್ರ ತೇ॒ [ತಾವ॑ನ್ತಮಿನ್ದ್ರ ತೇ, ಗ್ರಹಗ್ಂ॑] 23
ಗ್ರಹಗ್ಂ॑ ಸ॒ಹೋರ್ಜಾ ಗೃ॑ಹ್ಣಾ॒ಮ್ಯಸ್ತೃ॑ತಮ್ ॥ ಯ-ತ್ಕೃ॑ಷ್ಣಶಕು॒ನಃ ಪೃ॑ಷದಾ॒ಜ್ಯಮ॑ವಮೃ॒ಶೇಚ್ಛೂ॒ದ್ರಾ ಅ॑ಸ್ಯ ಪ್ರ॒ಮಾಯು॑ಕಾ-ಸ್ಸ್ಯು॒ರ್ಯಚ್ಛ್ವಾ ಽವ॑ಮೃ॒ಶೇಚ್ಚತು॑ಷ್ಪಾದೋ-ಽಸ್ಯ ಪ॒ಶವಃ॑ ಪ್ರ॒ಮಾಯು॑ಕಾ-ಸ್ಸ್ಯು॒ರ್ಯ-ಥ್ಸ್ಕನ್ದೇ॒-ದ್ಯಜ॑ಮಾನಃ ಪ್ರ॒ಮಾಯು॑ಕ-ಸ್ಸ್ಯಾ-ತ್ಪ॒ಶವೋ॒ ವೈ ಪೃ॑ಷದಾ॒ಜ್ಯ-ಮ್ಪ॒ಶವೋ॒ ವಾ ಏ॒ತಸ್ಯ॑ ಸ್ಕನ್ದನ್ತಿ॒ ಯಸ್ಯ॑ ಪೃಷದಾ॒ಜ್ಯಗ್ಗ್ ಸ್ಕನ್ದ॑ತಿ॒ ಯ-ತ್ಪೃ॑ಷದಾ॒ಜ್ಯ-ಮ್ಪುನ॑ರ್ಗೃ॒ಹ್ಣಾತಿ॑ ಪ॒ಶೂನೇ॒ವಾಸ್ಮೈ॒ ಪುನ॑ರ್ಗೃಹ್ಣಾತಿ ಪ್ರಾ॒ಣೋ ವೈ ಪೃ॑ಷದಾ॒ಜ್ಯ-ಮ್ಪ್ರಾ॒ಣೋ ವಾ [ಪೃ॑ಷದಾ॒ಜ್ಯ-ಮ್ಪ್ರಾ॒ಣೋ ವೈ, ಏ॒ತಸ್ಯ॑] 24
ಏ॒ತಸ್ಯ॑ ಸ್ಕನ್ದತಿ॒ ಯಸ್ಯ॑ ಪೃಷದಾ॒ಜ್ಯಗ್ಗ್ ಸ್ಕನ್ದ॑ತಿ॒ ಯ-ತ್ಪೃ॑ಷದಾ॒ಜ್ಯ-ಮ್ಪುನ॑ರ್ಗೃ॒ಹ್ಣಾತಿ॑ ಪ್ರಾ॒ಣಮೇ॒ವಾಸ್ಮೈ॒ ಪುನ॑ರ್ಗೃಹ್ಣಾತಿ॒ ಹಿರ॑ಣ್ಯಮವ॒ಧಾಯ॑ ಗೃಹ್ಣಾತ್ಯ॒ಮೃತಂ॒-ವೈಁ ಹಿರ॑ಣ್ಯ-ಮ್ಪ್ರಾ॒ಣಃ ಪೃ॑ಷದಾ॒ಜ್ಯಮ॒ಮೃತ॑ಮೇ॒ವಾಸ್ಯ॑ ಪ್ರಾ॒ಣೇ ದ॑ಧಾತಿ ಶ॒ತಮಾ॑ನ-ಮ್ಭವತಿ ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯ॒ ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ತಿಷ್ಠ॒ತ್ಯಶ್ವ॒ಮವ॑ ಘ್ರಾಪಯತಿ ಪ್ರಾಜಾಪ॒ತ್ಯೋ ವಾ ಅಶ್ವಃ॑ ಪ್ರಾಜಾಪ॒ತ್ಯಃ ಪ್ರಾ॒ಣ-ಸ್ಸ್ವಾದೇ॒ವಾಸ್ಮೈ॒ ಯೋನೇಃ᳚ ಪ್ರಾ॒ಣ-ನ್ನಿರ್ಮಿ॑ಮೀತೇ॒ ವಿ ವಾ ಏ॒ತಸ್ಯ॑ ಯ॒ಜ್ಞಶ್ಛಿ॑ದ್ಯತೇ॒ ಯಸ್ಯ॑ ಪೃಷದಾ॒ಜ್ಯಗ್ಗ್ ಸ್ಕನ್ದ॑ತಿ ವೈಷ್ಣ॒ವ್ಯರ್ಚಾ ಪುನ॑ರ್ಗೃಹ್ಣಾತಿ ಯ॒ಜ್ಞೋ ವೈ ವಿಷ್ಣು॑ರ್ಯ॒ಜ್ಞೇನೈ॒ವ ಯ॒ಜ್ಞಗ್ಂ ಸ-ನ್ತ॑ನೋತಿ ॥ 25 ॥
(ತೇ॒ – ಪೃ॒ಷ॒ದಾ॒ಜ್ಯ-ಮ್ಪ್ರಾ॒ಣೋ ವೈ – ಯೋನೇಃ᳚ ಪ್ರಾ॒ಣಂ – ದ್ವಾವಿಗ್ಂ॑ಶತಿಶ್ಚ) (ಅ. 6)
ದೇವ॑ ಸವಿತರೇ॒ತ-ತ್ತೇ॒ ಪ್ರಾ-ಽಽಹ॒ ತ-ತ್ಪ್ರ ಚ॑ ಸು॒ವ ಪ್ರ ಚ॑ ಯಜ॒ ಬೃಹ॒ಸ್ಪತಿ॑ರ್ಬ್ರ॒ಹ್ಮಾ ಽಽಯು॑ಷ್ಮತ್ಯಾ ಋ॒ಚೋ ಮಾ ಗಾ॑ತ ತನೂ॒ಪಾ-ಥ್ಸಾಮ್ನ॑-ಸ್ಸ॒ತ್ಯಾ ವ॑ ಆ॒ಶಿಷ॑-ಸ್ಸನ್ತು ಸ॒ತ್ಯಾ ಆಕೂ॑ತಯ ಋ॒ತ-ಞ್ಚ॑ ಸ॒ತ್ಯ-ಞ್ಚ॑ ವದತ ಸ್ತು॒ತ ದೇ॒ವಸ್ಯ॑ ಸವಿ॒ತುಃ ಪ್ರ॑ಸ॒ವೇ ಸ್ತು॒ತಸ್ಯ॑ ಸ್ತು॒ತಮ॒ಸ್ಯೂರ್ಜ॒-ಮ್ಮಹ್ಯಗ್ಗ್॑ ಸ್ತು॒ತ-ನ್ದು॑ಹಾ॒ಮಾ ಮಾ᳚ ಸ್ತು॒ತಸ್ಯ॑ ಸ್ತು॒ತ-ಙ್ಗ॑ಮ್ಯಾಚ್ಛ॒ಸ್ತ್ರಸ್ಯ॑ ಶ॒ಸ್ತ್ರ- [ಶ॒ಸ್ತ್ರಮ್, ಅ॒ಸ್ಯೂರ್ಜ॒-ಮ್ಮಹ್ಯಗ್ಂ॑] 26
-ಮ॒ಸ್ಯೂರ್ಜ॒-ಮ್ಮಹ್ಯಗ್ಂ॑ ಶ॒ಸ್ತ್ರ-ನ್ದು॑ಹಾ॒ಮಾ ಮಾ॑ ಶ॒ಸ್ತ್ರಸ್ಯ॑ ಶ॒ಸ್ತ್ರ-ಙ್ಗ॑ಮ್ಯಾ-ದಿನ್ದ್ರಿ॒ಯಾವ॑ನ್ತೋ ವನಾಮಹೇ ಧುಖ್ಷೀ॒ಮಹಿ॑ ಪ್ರ॒ಜಾಮಿಷ᳚ಮ್ ॥ ಸಾ ಮೇ॑ ಸ॒ತ್ಯಾ-ಽಽಶೀರ್ದೇ॒ವೇಷು॑ ಭೂಯಾ-ದ್ಬ್ರಹ್ಮವರ್ಚ॒ಸ-ಮ್ಮಾ-ಽಽ ಗ॑ಮ್ಯಾತ್ ॥ ಯ॒ಜ್ಞೋ ಬ॑ಭೂವ॒ ಸ ಆ ಬ॑ಭೂವ॒ ಸಪ್ರಜ॑ಜ್ಞೇ॒ ಸ ವಾ॑ವೃಧೇ । ಸ ದೇ॒ವಾನಾ॒ಮಧಿ॑-ಪತಿರ್ಬಭೂವ॒ ಸೋ ಅ॒ಸ್ಮಾಗ್ಂ ಅಧಿ॑ಪತೀನ್ ಕರೋತು ವ॒ಯಗ್ಗ್ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥ ಯ॒ಜ್ಞೋ ವಾ॒ ವೈ [ ] 27
ಯ॒ಜ್ಞಪ॑ತಿ-ನ್ದು॒ಹೇ ಯ॒ಜ್ಞಪ॑ತಿರ್ವಾ ಯ॒ಜ್ಞ-ನ್ದು॑ಹೇ॒ ಸ ಯ-ಸ್ಸ್ತು॑ತಶ॒ಸ್ತ್ರಯೋ॒ರ್ದೋಹ॒ಮ ವಿ॑ದ್ವಾ॒ನ್॒. ಯಜ॑ತೇ॒ ತಂ-ಯಁ॒ಜ್ಞೋ ದು॑ಹೇ॒ ಸ ಇ॒ಷ್ಟ್ವಾ ಪಾಪೀ॑ಯಾ-ನ್ಭವತಿ॒ ಯ ಏ॑ನಯೋ॒ರ್ದೋಹಂ॑-ವಿಁ॒ದ್ವಾನ್. ಯಜ॑ತೇ॒ ಸ ಯ॒ಜ್ಞ-ನ್ದು॑ಹೇ॒ ಸ ಇ॒ಷ್ಟ್ವಾ ವಸೀ॑ಯಾ-ನ್ಭವತಿ ಸ್ತು॒ತಸ್ಯ॑ ಸ್ತು॒ತಮ॒ಸ್ಯೂರ್ಜ॒-ಮ್ಮಹ್ಯಗ್ಗ್॑ ಸ್ತು॒ತ-ನ್ದು॑ಹಾ॒ಮಾ ಮಾ᳚ ಸ್ತು॒ತಸ್ಯ॑ ಸ್ತು॒ತ-ಙ್ಗ॑ಮ್ಯಾಚ್ಛ॒ಸ್ತ್ರಸ್ಯ॑ ಶ॒ಸ್ತ್ರಮ॒ಸ್ಯೂರ್ಜ॒-ಮ್ಮಹ್ಯಗ್ಂ॑ ಶ॒ಸ್ತ್ರ-ನ್ದು॑ಹಾ॒ ಮಾ ಮಾ॑ ಶ॒ಸ್ತ್ರಸ್ಯ॑ ಶ॒ಸ್ತ್ರ-ಙ್ಗ॑ಮ್ಯಾ॒ದಿತ್ಯಾ॑ಹೈ॒ಷ ವೈ ಸ್ತು॑ತಶ॒ಸ್ತ್ರಯೋ॒ರ್ದೋಹ॒ಸ್ತಂ-ಯಁ ಏ॒ವಂ-ವಿಁ॒ದ್ವಾನ್. ಯಜ॑ತೇ ದು॒ಹ ಏ॒ವ ಯ॒ಜ್ಞಮಿ॒ಷ್ಟ್ವಾ ವಸೀ॑ಯಾ-ನ್ಭವತಿ ॥ 28 ॥
(ಶ॒ಸ್ತ್ರಂ – ವೈಁ – ಶ॒ಸ್ತ್ರನ್ದು॑ಹಾಂ॒ – ದ್ವಾವಿಗ್ಂ॑ಶತಿಶ್ಚ) (ಅ. 7)
ಶ್ಯೇ॒ನಾಯ॒ ಪತ್ವ॑ನೇ॒ ಸ್ವಾಹಾ॒ ವಟ್ಥ್ಸ್ವ॒ಯಮ॑ಭಿಗೂರ್ತಾಯ॒ ನಮೋ॑ ವಿಷ್ಟ॒ಮ್ಭಾಯ॒ ಧರ್ಮ॑ಣೇ॒ ಸ್ವಾಹಾ॒ ವಟ್ಥ್ಸ್ವ॒ಯಮ॑ಭಿಗೂರ್ತಾಯ॒ ನಮಃ॑ ಪರಿ॒ಧಯೇ॑ ಜನ॒ಪ್ರಥ॑ನಾಯ॒ ಸ್ವಾಹಾ॒ ವಟ್ಥ್ಸ್ವ॒ಯಮ॑ಭಿಗೂರ್ತಾಯ॒ ನಮ॑ ಊ॒ರ್ಜೇ ಹೋತ್ರಾ॑ಣಾ॒ಗ್॒ ಸ್ವಾಹಾ॒ ವಟ್ಥ್ಸ್ವ॒ಯಮ॑ಭಿಗೂರ್ತಾಯ॒ ನಮಃ॒ ಪಯ॑ಸೇ॒ ಹೋತ್ರಾ॑ಣಾ॒ಗ್॒ ಸ್ವಾಹಾ॒ ವಟ್ಥ್ಸ್ವ॒ಯಮ॑ಭಿಗೂರ್ತಾಯ॒ ನಮಃ॑ ಪ್ರ॒ಜಾಪ॑ತಯೇ॒ ಮನ॑ವೇ॒ ಸ್ವಾಹಾ॒ ವಟ್ಥ್ಸ್ವ॒ಯಮ॑ಭಿಗೂರ್ತಾಯ॒ ನಮ॑ ಋ॒ತಮೃ॑ತಪಾ-ಸ್ಸುವರ್ವಾ॒ಟ್ಥ್ಸ್ವಾಹಾ॒ ವಟ್ಥ್ಸ್ವ॒ಯಮ॑ಭಿಗೂರ್ತಾಯ॒ ನಮ॑ಸ್ತೃ॒ಮ್ಪನ್ತಾ॒ಗ್ಂ॒ ಹೋತ್ರಾ॒ ಮಧೋ᳚ರ್ಘೃ॒ತಸ್ಯ॑ ಯ॒ಜ್ಞಪ॑ತಿ॒ಮೃಷ॑ಯ॒ ಏನ॑ಸಾ- [ಏನ॑ಸಾ, ಆ॒ಹುಃ॒ ।] 29
-ಽಽಹುಃ । ಪ್ರ॒ಜಾ ನಿರ್ಭ॑ಕ್ತಾ ಅನುತ॒ಪ್ಯಮಾ॑ನಾ ಮಧ॒ವ್ಯೌ᳚ ಸ್ತೋ॒ಕಾವಪ॒ ತೌ ರ॑ರಾಧ ॥ ಸ-ನ್ನ॒ಸ್ತಾಭ್ಯಾಗ್ಂ॑ ಸೃಜತುವಿ॒ಶ್ವಕ॑ರ್ಮಾ ಘೋ॒ರಾ ಋಷ॑ಯೋ॒ ನಮೋ॑ ಅಸ್ತ್ವೇಭ್ಯಃ । ಚಖ್ಷು॑ಷ ಏಷಾ॒-ಮ್ಮನ॑ಸಶ್ಚ ಸ॒ನ್ಧೌ ಬೃಹ॒ಸ್ಪತ॑ಯೇ॒ ಮಹಿ॒ ಷ-ದ್ದ್ಯು॒ಮನ್ನಮಃ॑ ॥ ನಮೋ॑ ವಿ॒ಶ್ವಕ॑ರ್ಮಣೇ॒ ಸ ಉ॑ ಪಾತ್ವ॒ಸ್ಮಾನ॑ನ॒ನ್ಯಾನ್-ಥ್ಸೋ॑ಮ॒ಪಾ-ನ್ಮನ್ಯ॑ಮಾನಃ । ಪ್ರಾ॒ಣಸ್ಯ॑ ವಿ॒ದ್ವಾನ್-ಥ್ಸ॑ಮ॒ರೇ ನ ಧೀರ॒ ಏನ॑ಶ್ಚಕೃ॒ವಾ-ನ್ಮಹಿ॑ ಬ॒ದ್ಧ ಏ॑ಷಾಮ್ ॥ ತಂ-ವಿಁ॑ಶ್ವಕರ್ಮ॒- [ತಂ-ವಿಁ॑ಶ್ವಕರ್ಮನ್ನ್, ಪ್ರ ಮು॑ಞ್ಚಾ ಸ್ವ॒ಸ್ತಯೇ॒] 30
-ನ್ಪ್ರ ಮು॑ಞ್ಚಾ ಸ್ವ॒ಸ್ತಯೇ॒ ಯೇ ಭ॒ಖ್ಷಯ॑ನ್ತೋ॒ ನ ವಸೂ᳚ನ್ಯಾನೃ॒ಹುಃ । ಯಾನ॒ಗ್ನಯೋ॒-ಽನ್ವತ॑ಪ್ಯನ್ತ॒ ಧಿಷ್ಣಿ॑ಯಾ ಇ॒ಯ-ನ್ತೇಷಾ॑ಮವ॒ಯಾ ದುರಿ॑ಷ್ಟ್ಯೈ॒ ಸ್ವಿ॑ಷ್ಟಿ-ನ್ನ॒ಸ್ತಾ-ಙ್ಕೃ॑ಣೋತು ವಿ॒ಶ್ವಕ॑ರ್ಮಾ ॥ ನಮಃ॑ ಪಿ॒ತೃಭ್ಯೋ॑ ಅ॒ಭಿ ಯೇ ನೋ॒ ಅಖ್ಯ॑ನ್. ಯಜ್ಞ॒ಕೃತೋ॑ ಯ॒ಜ್ಞಕಾ॑ಮಾ-ಸ್ಸುದೇ॒ವಾ ಅ॑ಕಾ॒ಮಾ ವೋ॒ ದಖ್ಷಿ॑ಣಾ॒-ನ್ನ ನೀ॑ನಿಮ॒ ಮಾ ನ॒ಸ್ತಸ್ಮಾ॒ ದೇನ॑ಸಃ ಪಾಪಯಿಷ್ಟ । ಯಾವ॑ನ್ತೋ॒ ವೈ ಸ॑ದ॒ಸ್ಯಾ᳚ಸ್ತೇ ಸರ್ವೇ॑ ದಖ್ಷಿ॒ಣ್ಯಾ᳚ಸ್ತೇಭ್ಯೋ॒ ಯೋ ದಖ್ಷಿ॑ಣಾ॒-ನ್ನ [ ] 31
ನಯೇ॒ದೈಭ್ಯೋ॑ ವೃಶ್ಚ್ಯೇತ॒ ಯ-ದ್ವೈ᳚ಶ್ವಕರ್ಮ॒ಣಾನಿ॑ ಜು॒ಹೋತಿ॑ ಸದ॒ಸ್ಯಾ॑ನೇ॒ವ ತ-ತ್ಪ್ರೀ॑ಣಾತ್ಯ॒ಸ್ಮೇ ದೇ॑ವಾಸೋ॒ ವಪು॑ಷೇ ಚಿಕಿಥ್ಸತ॒ ಯಮಾ॒ಶಿರಾ॒ ದಮ್ಪ॑ತೀ ವಾ॒ಮಮ॑ಶ್ಞು॒ತಃ । ಪುಮಾ᳚-ನ್ಪು॒ತ್ರೋ ಜಾ॑ಯತೇ ವಿ॒ನ್ದತೇ॒ ವಸ್ವಥ॒ ವಿಶ್ವೇ॑ ಅರ॒ಪಾ ಏ॑ಧತೇ ಗೃ॒ಹಃ ॥ ಆ॒ಶೀ॒ರ್ದಾ॒ಯಾ ದಮ್ಪ॑ತೀ ವಾ॒ಮಮ॑ಶ್ಞುತಾ॒ಮರಿ॑ಷ್ಟೋ॒ ರಾಯ॑-ಸ್ಸಚತಾ॒ಗ್ಂ॒ ಸಮೋ॑ಕಸಾ । ಯ ಆ-ಽಸಿ॑ಚ॒-ಥ್ಸ-ನ್ದು॑ಗ್ಧ-ಙ್ಕು॒ಮ್ಭ್ಯಾ ಸ॒ಹೇಷ್ಟೇನ॒ ಯಾಮ॒ನ್ನಮ॑ತಿ-ಞ್ಜಹಾತು॒ ಸಃ ॥ ಸ॒ರ್ಪಿ॒ರ್ಗ್ರೀ॒ವೀ [ ] 32
ಪೀವ॑ರ್ಯಸ್ಯ ಜಾ॒ಯಾ ಪೀವಾ॑ನಃ ಪು॒ತ್ರಾ ಅಕೃ॑ಶಾಸೋ ಅಸ್ಯ । ಸ॒ಹಜಾ॑ನಿ॒ರ್ಯ-ಸ್ಸು॑ಮಖ॒ಸ್ಯಮಾ॑ನ॒ ಇನ್ದ್ರಾ॑ಯಾ॒-ಽಽಶಿರಗ್ಂ॑ ಸ॒ಹ ಕು॒ಮ್ಭ್ಯಾ-ಽದಾ᳚ತ್ ॥ ಆ॒ಶೀರ್ಮ॒ ಊರ್ಜ॑ಮು॒ತ ಸು॑ಪ್ರಜಾ॒ಸ್ತ್ವಮಿಷ॑-ನ್ದಧಾತು॒ ದ್ರವಿ॑ಣ॒ಗ್ಂ॒ ಸವ॑ರ್ಚಸಮ್ । ಸ॒-ಞ್ಜಯ॒ನ್ ಖ್ಷೇತ್ರಾ॑ಣಿ॒ ಸಹ॑ಸಾ॒-ಽಹಮಿ॑ನ್ದ್ರ ಕೃಣ್ವಾ॒ನೋ ಅ॒ನ್ಯಾಗ್ಂ ಅಧ॑ರಾನ್ಥ್ಸ॒ಪತ್ನಾನ್॑ ॥ ಭೂ॒ತಮ॑ಸಿ ಭೂ॒ತೇ ಮಾ॑ ಧಾ॒ ಮುಖ॑ಮಸಿ॒ ಮುಖ॑-ಮ್ಭೂಯಾಸ॒-ನ್ದ್ಯಾವಾ॑ಪೃಥಿ॒ವೀಭ್ಯಾ᳚-ನ್ತ್ವಾ॒ ಪರಿ॑ಗೃಹ್ಣಾಮಿ॒ ವಿಶ್ವೇ᳚ ತ್ವಾ ದೇ॒ವಾ ವೈ᳚ಶ್ವಾನ॒ರಾಃ [ವೈ᳚ಶ್ವಾನ॒ರಾಃ, ಪ್ರಚ್ಯಾ॑ವಯನ್ತು] 33
ಪ್ರಚ್ಯಾ॑ವಯನ್ತು ದಿ॒ವಿ ದೇ॒ವಾ-ನ್ದೃಗ್ಂ॑ಹಾ॒ನ್ತರಿ॑ಖ್ಷೇ॒ ವಯಾಗ್ಂ॑ಸಿ ಪೃಥಿ॒ವ್ಯಾ-ಮ್ಪಾರ್ಥಿ॑ವಾ-ನ್ಧ್ರು॒ವ-ನ್ಧ್ರು॒ವೇಣ॑ ಹ॒ವಿಷಾ-ಽವ॒ ಸೋಮ॑-ನ್ನಯಾಮಸಿ । ಯಥಾ॑ ನ॒-ಸ್ಸರ್ವ॒ಮಿಜ್ಜಗ॑ದಯ॒ಖ್ಷ್ಮಗ್ಂ ಸು॒ಮನಾ॒ ಅಸ॑ತ್ । ಯಥಾ॑ ನ॒ ಇನ್ದ್ರ॒ ಇದ್ವಿಶಃ॒ ಕೇವ॑ಲೀ॒-ಸ್ಸರ್ವಾ॒-ಸ್ಸಮ॑ನಸಃ॒ ಕರ॑ತ್ । ಯಥಾ॑ ನ॒-ಸ್ಸರ್ವಾ॒ ಇದ್ದಿಶೋ॒-ಽಸ್ಮಾಕ॒-ಙ್ಕೇವ॑ಲೀ॒ರಸನ್ನ್॑ ॥ 34 ॥
(ಏನ॑ಸಾ – ವಿಶ್ವಕರ್ಮ॒ನ್ – ಯೋ ದಖ್ಷಿ॑ಣಾ॒-ನ್ನ – ಸ॑ರ್ಪಿರ್ಗ್ರೀ॒ವೀ – ವೈ᳚ಶ್ವನ॒ರಾ – ಶ್ಚ॑ತ್ವಾರಿ॒ಗ್ಂ॒ಶಚ್ಚ॑) (ಅ. 8)
ಯದ್ವೈ ಹೋತಾ᳚-ಽದ್ಧ್ವ॒ರ್ಯುಮ॑ಭ್ಯಾ॒ಹ್ವಯ॑ತೇ॒ ವಜ್ರ॑ಮೇನಮ॒ಭಿ ಪ್ರವ॑ರ್ತಯ॒ತ್ಯುಕ್ಥ॑ಶಾ॒ ಇತ್ಯಾ॑ಹ ಪ್ರಾತಸ್ಸವ॒ನ-ಮ್ಪ್ರ॑ತಿ॒ಗೀರ್ಯ॒ ತ್ರೀಣ್ಯೇ॒ತಾನ್ಯ॒ಖ್ಷರಾ॑ಣಿ ತ್ರಿ॒ಪದಾ॑ ಗಾಯ॒ತ್ರೀ ಗಾ॑ಯ॒ತ್ರ-ಮ್ಪ್ರಾ॑ತಸ್ಸವ॒ನ-ಙ್ಗಾ॑ಯತ್ರಿ॒ಯೈವ ಪ್ರಾ॑ತಸ್ಸವ॒ನೇ ವಜ್ರ॑ಮ॒ನ್ತರ್ಧ॑ತ್ತ ಉ॒ಕ್ಥಂ-ವಾಁ॒ಚೀತ್ಯಾ॑ಹ॒ ಮಾದ್ಧ್ಯ॑ದಿನ್ನ॒ಗ್ಂ॒ ಸವ॑ನ-ಮ್ಪ್ರತಿ॒ಗೀರ್ಯ॑ ಚ॒ತ್ವಾರ್ಯೇ॒ತಾನ್ಯ॒-ಖ್ಷರಾ॑ಣಿ॒ ಚತು॑ಷ್ಪದಾ ತ್ರಿ॒ಷ್ಟು-ಪ್ತ್ರೈಷ್ಟು॑ಭ॒-ಮ್ಮಾದ್ಧ್ಯ॑ದಿನ್ನ॒ಗ್ಂ॒ ಸವ॑ನ-ನ್ತ್ರಿ॒ಷ್ಟುಭೈ॒ವ ಮಾದ್ಧ್ಯ॑ನ್ದಿನೇ॒ ಸವ॑ನೇ॒ ವಜ್ರ॑ಮ॒ನ್ತರ್ಧ॑ತ್ತ [ವಜ್ರ॑ಮ॒ನ್ತರ್ಧ॑ತ್ತೇ, ಉ॒ಕ್ಥಂ-ವಾಁ॒ಚೀನ್ದ್ರಾ॒ಯೇತ್ಯಾ॑ಹ] 35
ಉ॒ಕ್ಥಂ-ವಾಁ॒ಚೀನ್ದ್ರಾ॒ಯೇತ್ಯಾ॑ಹ ತೃತೀಯಸವ॒ನ-ಮ್ಪ್ರ॑ತಿ॒ಗೀರ್ಯ॑ ಸ॒ಪ್ತೈತಾನ್ಯ॒ಖ್ಷರಾ॑ಣಿ ಸ॒ಪ್ತಪ॑ದಾ॒ ಶಕ್ವ॑ರೀ ಶಾಕ್ವ॒ರೋ ವಜ್ರೋ॒ ವಜ್ರೇ॑ಣೈ॒ವ ತೃ॑ತೀಯಸವ॒ನೇ ವಜ್ರ॑ಮ॒ನ್ತರ್ಧ॑ತ್ತೇ ಬ್ರಹ್ಮವಾ॒ದಿನೋ॑ ವದನ್ತಿ॒ ಸ ತ್ವಾ ಅ॑ದ್ಧ್ವ॒ರ್ಯು-ಸ್ಸ್ಯಾ॒ದ್ಯೋ ಯ॑ಥಾಸವ॒ನ-ಮ್ಪ್ರ॑ತಿಗ॒ರೇ ಛನ್ದಾಗ್ಂ॑ಸಿ ಸಮ್ಪಾ॒ದಯೇ॒-ತ್ತೇಜಃ॑ ಪ್ರಾತ-ಸ್ಸವ॒ನ ಆ॒ತ್ಮ-ನ್ದಧೀ॑ತೇನ್ದ್ರಿ॒ಯ-ಮ್ಮಾದ್ಧ್ಯ॑ನ್ದಿನೇ॒ ಸವ॑ನೇ ಪ॒ಶೂಗ್ ಸ್ತೃ॑ತೀಯಸವ॒ನ ಇತ್ಯುಕ್ಥ॑ಶಾ॒ ಇತ್ಯಾ॑ಹ ಪ್ರಾತಸ್ಸವ॒ನ-ಮ್ಪ್ರ॑ತಿ॒ಗೀರ್ಯ॒ ತ್ರೀಣ್ಯೇ॒ತಾನ್ಯ॒ಖ್ಷರಾ॑ಣಿ [ ] 36
ತ್ರಿ॒ಪದಾ॑ ಗಾಯ॒ತ್ರೀ ಗಾ॑ಯ॒ತ್ರ-ಮ್ಪ್ರಾ॑ತಸ್ಸವ॒ನ-ಮ್ಪ್ರಾ॑ತಸ್ಸವ॒ನ ಏ॒ವ ಪ್ರ॑ತಿಗ॒ರೇ ಛನ್ದಾಗ್ಂ॑ಸಿ॒ ಸಮ್ಪಾ॑ದಯ॒ತ್ಯಥೋ॒ ತೇಜೋ॒ ವೈ ಗಾ॑ಯ॒ತ್ರೀ ತೇಜಃ॑ ಪ್ರಾತ-ಸ್ಸವ॒ನ-ನ್ತೇಜ॑ ಏ॒ವ ಪ್ರಾ॑ತಸ್ಸವ॒ನ ಆ॒ತ್ಮ-ನ್ಧ॑ತ್ತ ಉ॒ಕ್ಥಂ-ವಾಁ॒ಚೀತ್ಯಾ॑ಹ॒ ಮಾದ್ಧ್ಯ॑ನ್ದಿನ॒ಗ್ಂ॒ ಸವ॑ನ-ಮ್ಪ್ರತಿ॒ಗೀರ್ಯ॑ ಚ॒ತ್ವಾರ್ಯೇ॒ತಾನ್ಯ॒ಖ್ಷರಾ॑ಣಿ॒ ಚತು॑ಷ್ಪದಾ ತ್ರಿ॒ಷ್ಟು-ಪ್ತ್ರೈಷ್ಟು॑ಭ॒-ಮ್ಮಾದ್ಧ್ಯ॑ನ್ದಿನ॒ಗ್ಂ॒ ಸವ॑ನ॒-ಮ್ಮಾದ್ಧ್ಯ॑ದಿನ್ನ ಏ॒ವ ಸವ॑ನೇ ಪ್ರತಿಗ॒ರೇ ಛನ್ದಾಗ್ಂ॑ಸಿ॒ ಸಮ್ಪಾ॑ದಯ॒ತ್ಯಥೋ॑ ಇನ್ದ್ರಿ॒ಯಂ-ವೈಁ ತ್ರಿ॒ಷ್ಟುಗಿ॑ನ್ದ್ರಿ॒ಯ-ಮ್ಮಾದ್ಧ್ಯ॑ದಿನ್ನ॒ಗ್ಂ॒ ಸವ॑ನ- [ಸವ॑ನಮ್, ಇ॒ನ್ದ್ರಿ॒ಯಮೇ॒ವ] 37
-ಮಿನ್ದ್ರಿ॒ಯಮೇ॒ವ ಮಾದ್ಧ್ಯ॑ನ್ದಿನೇ॒ ಸವ॑ನ ಆ॒ತ್ಮ-ನ್ಧ॑ತ್ತ ಉ॒ಕ್ಥಂ-ವಾಁ॒ಚೀನ್ದ್ರಾ॒ಯೇತ್ಯಾ॑ಹ ತೃತೀಯಸವ॒ನ-ಮ್ಪ್ರ॑ತಿ॒ಗೀರ್ಯ॑ ಸ॒ಪ್ತೈತಾನ್ಯ॒ಖ್ಷರಾ॑ಣಿ ಸ॒ಪ್ತಪ॑ದಾ॒ ಶಕ್ವ॑ರೀ ಶಾಕ್ವ॒ರಾಃ ಪ॒ಶವೋ॒ ಜಾಗ॑ತ-ನ್ತೃತೀಯಸವ॒ನ-ನ್ತೃ॑ತೀಯಸವ॒ನ ಏ॒ವ ಪ್ರ॑ತಿಗ॒ರೇ ಛನ್ದಾಗ್ಂ॑ಸಿ॒ ಸಮ್ಪಾ॑ದಯ॒ತ್ಯಥೋ॑ ಪ॒ಶವೋ॒ ವೈ ಜಗ॑ತೀ ಪ॒ಶವ॑ಸ್ತೃತೀಯಸವ॒ನ-ಮ್ಪ॒ಶೂನೇ॒ವ ತೃ॑ತೀಯಸವ॒ನ ಆ॒ತ್ಮ-ನ್ಧ॑ತ್ತೇ॒ ಯದ್ವೈ ಹೋತಾ᳚-ಽದ್ಧ್ವ॒ರ್ಯುಮ॑ಭ್ಯಾ॒ಹ್ವಯ॑ತ ಆ॒ವ್ಯ॑ಮಸ್ಮಿ-ನ್ದಧಾತಿ॒ ತದ್ಯನ್ನಾ- [ತದ್ಯನ್ನ, ಅ॒ಪ॒ಹನೀ॑ತ ಪು॒ರಾ-ಽಸ್ಯ॑] 38
-ಽಪ॒ಹನೀ॑ತ ಪು॒ರಾ-ಽಸ್ಯ॑ ಸಂವಁಥ್ಸ॒ರಾ-ದ್ಗೃ॒ಹ ಆ ವೇ॑ವೀರ॒ಞ್ಛೋಗ್ಂಸಾ॒ ಮೋದ॑ ಇ॒ವೇತಿ॑ ಪ್ರ॒ತ್ಯಾಹ್ವ॑ಯತೇ॒ ತೇನೈ॒ವ ತದಪ॑ ಹತೇ॒ ಯಥಾ॒ ವಾ ಆಯ॑ತಾ-ಮ್ಪ್ರ॒ತೀಖ್ಷ॑ತ ಏ॒ವಮ॑ದ್ಧ್ವ॒ರ್ಯುಃ ಪ್ರ॑ತಿಗ॒ರ-ಮ್ಪ್ರತೀ᳚ಖ್ಷತೇ॒ ಯದ॑ಭಿ ಪ್ರತಿಗೃಣೀ॒ಯಾದ್ಯಥಾ ಽಽಯ॑ತಯಾ ಸಮೃ॒ಚ್ಛತೇ॑ ತಾ॒ದೃಗೇ॒ವ ತದ್ಯದ॑ರ್ಧ॒ರ್ಚಾಲ್ಲುಪ್ಯೇ॑ತ॒ ಯಥಾ॒ ಧಾವ॑ದ್ಭ್ಯೋ॒ ಹೀಯ॑ತೇ ತಾ॒ದೃಗೇ॒ವ ತ-ತ್ಪ್ರ॒ಬಾಹು॒ಗ್ವಾ ಋ॒ತ್ವಿಜಾ॑ಮುದ್ಗೀ॒ಥಾ ಉ॑ದ್ಗೀ॒ಥ ಏ॒ವೋ-ದ್ಗಾ॑ತೃ॒ಣಾ- [ಏ॒ವೋ-ದ್ಗಾ॑ತೃ॒ಣಾಮ್, ಋ॒ಚಃ ಪ್ರ॑ಣ॒ವ] 39
-ಮೃ॒ಚಃ ಪ್ರ॑ಣ॒ವ ಉ॑ಕ್ಥಶ॒ಗ್ಂ॒ಸಿನಾ᳚-ಮ್ಪ್ರತಿಗ॒ರೋ᳚-ಽದ್ಧ್ವರ್ಯೂ॒ಣಾಂ-ಯಁ ಏ॒ವಂ-ವಿಁ॒ದ್ವಾ-ನ್ಪ್ರ॑ತಿಗೃ॒ಣಾತ್ಯ॑ನ್ನಾ॒ದ ಏ॒ವ ಭ॑ವ॒ತ್ಯಾ-ಽಸ್ಯ॑ ಪ್ರ॒ಜಾಯಾಂ᳚-ವಾಁ॒ಜೀ ಜಾ॑ಯತ ಇ॒ಯಂ-ವೈಁ ಹೋತಾ॒-ಽಸಾವ॑ದ್ಧ್ವ॒ರ್ಯುರ್ಯದಾಸೀ॑ನ॒-ಶ್ಶಗ್ಂ ಸ॑ತ್ಯ॒ಸ್ಯಾ ಏ॒ವ ತದ್ಧೋತಾ॒ ನೈತ್ಯಾಸ್ತ॑ ಇವ॒ ಹೀಯಮಥೋ॑ ಇ॒ಮಾಮೇ॒ವ ತೇನ॒ ಯಜ॑ಮಾನೋ ದುಹೇ॒ ಯ-ತ್ತಿಷ್ಠ॑-ನ್ಪ್ರತಿಗೃ॒ಣಾತ್ಯ॒ಮುಷ್ಯಾ॑ ಏ॒ವ ತದ॑ದ್ಧ್ವ॒ರ್ಯುರ್ನೈತಿ॒ [ತದ॑ದ್ಧ್ವ॒ರ್ಯುರ್ನೈತಿ॑, ತಿಷ್ಠ॑ತೀವ॒ ಹ್ಯ॑ಸಾವಥೋ॑] 40
ತಿಷ್ಠ॑ತೀವ॒ ಹ್ಯ॑ಸಾವಥೋ॑ ಅ॒ಮೂಮೇ॒ವ ತೇನ॒ ಯಜ॑ಮಾನೋ ದುಹೇ॒ ಯದಾಸೀ॑ನ॒-ಶ್ಶಗ್ಂಸ॑ತಿ॒ ತಸ್ಮಾ॑ದಿ॒ತಃ ಪ್ರ॑ದಾನ-ನ್ದೇ॒ವಾ ಉಪ॑ ಜೀವನ್ತಿ॒ ಯ-ತ್ತಿಷ್ಠ॑-ನ್ಪ್ರತಿಗೃ॒ಣಾತಿ॒ ತಸ್ಮಾ॑ದ॒ಮುತಃ॑ ಪ್ರದಾನ-ಮ್ಮನು॒ಷ್ಯಾ॑ ಉಪ॑ ಜೀವನ್ತಿ॒ ಯ-ತ್ಪ್ರಾಂಆಸೀ॑ನ॒-ಶ್ಶಗ್ಂಸ॑ತಿ ಪ್ರ॒ತ್ಯ-ನ್ತಿಷ್ಠ॑-ನ್ಪ್ರತಿಗೃ॒ಣಾತಿ॒ ತಸ್ಮಾ᳚-ತ್ಪ್ರಾ॒ಚೀನ॒ಗ್ಂ॒ ರೇತೋ॑ ಧೀಯತೇ ಪ್ರ॒ತೀಚೀಃ᳚ ಪ್ರ॒ಜಾ ಜಾ॑ಯನ್ತೇ॒ ಯದ್ವೈ ಹೋತಾ᳚-ಽದ್ಧ್ವ॒ರ್ಯುಮ॑ಭ್ಯಾ॒ಹ್ವಯ॑ತೇ॒ ವಜ್ರ॑ಮೇನಮ॒ಭಿ ಪ್ರವ॑ರ್ತಯತಿ॒ ಪರಾಂ॒ಆ ವ॑ರ್ತತೇ॒ ವಜ್ರ॑ಮೇ॒ವ ತನ್ನಿ ಕ॑ರೋತಿ ॥ 41 ॥
(ಸವ॑ನೇ॒ ವಜ್ರ॑ಮ॒ನ್ತರ್ಧ॑ತ್ತೇ॒ – ತ್ರೀಣ್ಯೇ॒ತಾನ್ಯ॒ಖ್ಷರಾ॑ಣೀ – ನ್ದ್ರಿ॒ಯ-ಮ್ಮಾಧ್ಯ॑ನ್ದಿನ॒ಗ್ಂ॒ ಸವ॑ನಂ॒ – ನೋ – ದ್ಗಾ॑ತೃ॒ಣಾ – ಮ॑ಧ್ವ॒ರ್ಯುರ್ನೈತಿ॑ – ವರ್ತಯತ್ಯ॒ – ಷ್ಟೌ ಚ॑) (ಅ. 9)
ಉ॒ಪ॒ಯಾ॒ಮಗೃ॑ಹೀತೋ-ಽಸಿ ವಾಖ್ಷ॒ಸದ॑ಸಿ ವಾ॒ಕ್ಪಾಭ್ಯಾ᳚-ನ್ತ್ವಾ ಕ್ರತು॒ಪಾಭ್ಯಾ॑ಮ॒ಸ್ಯ ಯ॒ಜ್ಞಸ್ಯ॑ ಧ್ರು॒ವಸ್ಯಾ-ಽದ್ಧ್ಯ॑-ಖ್ಷಾಭ್ಯಾ-ಙ್ಗೃಹ್ಣಾ-ಮ್ಯುಪಯಾ॒ಮಗೃ॑ಹೀತೋ-ಽಸ್ಯೃತ॒ಸದ॑ಸಿ ಚಖ್ಷು॒ಷ್ಪಾಭ್ಯಾ᳚-ನ್ತ್ವಾ ಕ್ರತು॒ಪಾಭ್ಯಾ॑ಮ॒ಸ್ಯ ಯ॒ಜ್ಞಸ್ಯ॑ ಧ್ರು॒ವಸ್ಯಾ-ಽದ್ಧ್ಯ॑ಖ್ಷಾಭ್ಯಾ-ಙ್ಗೃಹ್ಣಾಮ್ಯುಪಯಾ॒ಮಗೃ॑ಹೀತೋ-ಽಸಿ ಶ್ರುತ॒ಸದ॑ಸಿ ಶ್ರೋತ್ರ॒ಪಾಭ್ಯಾ᳚-ನ್ತ್ವಾ ಕ್ರತು॒ಪಾಭ್ಯಾ॑ಮ॒ಸ್ಯ ಯ॒ಜ್ಞಸ್ಯ॑ ಧ್ರು॒ವಸ್ಯಾ-ಽದ್ಧ್ಯ॑ಖ್ಷಾಭ್ಯಾ-ಙ್ಗೃಹ್ಣಾಮಿ ದೇ॒ವೇಭ್ಯ॑ಸ್ತ್ವಾ ವಿ॒ಶ್ವದೇ॑ವೇಭ್ಯಸ್ತ್ವಾ॒ ವಿಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯೋ॒ ವಿಷ್ಣ॑ವುರುಕ್ರಮೈ॒ಷ ತೇ॒ ಸೋಮ॒ಸ್ತಗ್ಂ ರ॑ಖ್ಷಸ್ವ॒ [ಸೋಮ॒ಸ್ತಗ್ಂ ರ॑ಖ್ಷಸ್ವ, ತ-ನ್ತೇ॑] 42
ತ-ನ್ತೇ॑ ದು॒ಶ್ಚಖ್ಷಾ॒ ಮಾ-ಽವ॑ ಖ್ಯ॒ನ್ಮಯಿ॒ ವಸುಃ॑ ಪುರೋ॒ವಸು॑ರ್ವಾ॒ಕ್ಪಾ ವಾಚ॑-ಮ್ಮೇ ಪಾಹಿ॒ ಮಯಿ॒ ವಸು॑ರ್ವಿ॒ದದ್ವ॑ಸುಶ್ಚಖ್ಷು॒ಷ್ಪಾಶ್ಚಖ್ಷು॑-ರ್ಮೇ ಪಾಹಿ॒ ಮಯಿ॒ ವಸು॑-ಸ್ಸಂ॒ಯಁದ್ವ॑ಸು-ಶ್ಶ್ರೋತ್ರ॒ಪಾ-ಶ್ಶ್ರೋತ್ರ॑-ಮ್ಮೇ ಪಾಹಿ॒ ಭೂರ॑ಸಿ॒ ಶ್ರೇಷ್ಠೋ॑ ರಶ್ಮೀ॒ನಾ-ಮ್ಪ್ರಾ॑ಣ॒ಪಾಃ ಪ್ರಾ॒ಣ-ಮ್ಮೇ॑ ಪಾಹಿ॒ ಧೂರ॑ಸಿ॒ ಶ್ರೇಷ್ಠೋ॑ ರಶ್ಮೀ॒ನಾಮ॑ಪಾನ॒ಪಾ ಅ॑ಪಾ॒ನ-ಮ್ಮೇ॑ ಪಾಹಿ॒ ಯೋ ನ॑ ಇನ್ದ್ರವಾಯೂ ಮಿತ್ರಾವರುಣಾ-ವಶ್ವಿನಾವಭಿ॒ದಾಸ॑ತಿ॒ ಭ್ರಾತೃ॑ವ್ಯ ಉ॒ತ್ಪಿಪೀ॑ತೇ ಶುಭಸ್ಪತೀ ಇ॒ದಮ॒ಹ-ನ್ತಮಧ॑ರ-ಮ್ಪಾದಯಾಮಿ॒ ಯಥೇ᳚ನ್ದ್ರಾ॒-ಽಹಮು॑ತ್ತ॒ಮಶ್ಚೇ॒ತಯಾ॑ನಿ ॥ 43 ॥
(ರ॒ಖ್ಷ॒ಸ್ವ॒ – ಭ್ರ್ರಾತೃ॑ವ್ಯ॒ – ಸ್ತ್ರಯೋ॑ದಶ ಚ) (ಅ. 10)
ಪ್ರ ಸೋ ಅ॑ಗ್ನೇ॒ ತವೋ॒ತಿಭಿ॑-ಸ್ಸು॒ವೀರಾ॑ಭಿಸ್ತರತಿ॒ ವಾಜ॑ಕರ್ಮಭಿಃ । ಯಸ್ಯ॒ ತ್ವಗ್ಂ ಸ॒ಖ್ಯಮಾವಿ॑ಥ ॥ ಪ್ರ ಹೋತ್ರೇ॑ ಪೂ॒ರ್ವ್ಯಂ-ವಁಚೋ॒-ಽಗ್ನಯೇ॑ ಭರತಾ ಬೃ॒ಹತ್ । ವಿ॒ಪಾ-ಞ್ಜ್ಯೋತೀಗ್ಂ॑ಷಿ॒ ಬಿಭ್ರ॑ತೇ॒ ನ ವೇ॒ಧಸೇ᳚ ॥ ಅಗ್ನೇ॒ ತ್ರೀ ತೇ॒ ವಾಜಿ॑ನಾ॒ ತ್ರೀ ಷ॒ಧಸ್ಥಾ॑ ತಿ॒ಸ್ರಸ್ತೇ॑ ಜಿ॒ಹ್ವಾ ಋ॑ತಜಾತ ಪೂ॒ರ್ವೀಃ । ತಿ॒ಸ್ರ ಉ॑ ತೇ ತ॒ನುವೋ॑ ದೇ॒ವವಾ॑ತಾ॒ಸ್ತಾಭಿ॑ರ್ನಃ ಪಾಹಿ॒ ಗಿರೋ॒ ಅಪ್ರ॑ಯುಚ್ಛನ್ನ್ ॥ ಸಂ-ವಾಁ॒-ಙ್ಕರ್ಮ॑ಣಾ॒ ಸಮಿ॒ಷಾ [ಸಮಿ॒ಷಾ, ಹಿ॒ನೋ॒ಮೀನ್ದ್ರಾ॑-ವಿಷ್ಣೂ॒] 44
ಹಿ॑ನೋ॒ಮೀನ್ದ್ರಾ॑-ವಿಷ್ಣೂ॒ ಅಪ॑ಸಸ್ಪಾ॒ರೇ ಅ॒ಸ್ಯ । ಜು॒ಷೇಥಾಂ᳚-ಯಁ॒ಜ್ಞ-ನ್ದ್ರವಿ॑ಣ-ಞ್ಚ ಧತ್ತ॒ಮರಿ॑ಷ್ಟೈರ್ನಃ ಪ॒ಥಿಭಿಃ॑ ಪಾ॒ರಯ॑ನ್ತಾ ॥ ಉ॒ಭಾ ಜಿ॑ಗ್ಯಥು॒ರ್ನ ಪರಾ॑ ಜಯೇಥೇ॒ ನ ಪರಾ॑ ಜಿಗ್ಯೇ ಕತ॒ರಶ್ಚ॒ನೈನೋಃ᳚ । ಇನ್ದ್ರ॑ಶ್ಚ ವಿಷ್ಣೋ॒ ಯದಪ॑ಸ್ಪೃಧೇಥಾ-ನ್ತ್ರೇ॒ಧಾ ಸ॒ಹಸ್ರಂ॒-ವಿಁ ತದೈ॑ರಯೇಥಾಮ್ ॥ ತ್ರೀಣ್ಯಾಯೂಗ್ಂ॑ಷಿ॒ ತವ॑ ಜಾತವೇದಸ್ತಿ॒ಸ್ರ ಆ॒ಜಾನೀ॑ರು॒ಷಸ॑ಸ್ತೇ ಅಗ್ನೇ । ತಾಭಿ॑ರ್ದೇ॒ವಾನಾ॒ಮವೋ॑ ಯಖ್ಷಿ ವಿ॒ದ್ವಾನಥಾ॑ [ವಿ॒ದ್ವಾನಥ॑, ಭ॒ವ॒ ಯಜ॑ಮಾನಾಯ॒ ಶಂಯೋಁಃ ।] 45
-ಭವ॒ ಯಜ॑ಮಾನಾಯ॒ ಶಂಯೋಁಃ ॥ ಅ॒ಗ್ನಿಸ್ತ್ರೀಣಿ॑ ತ್ರಿ॒ಧಾತೂ॒ನ್ಯಾ ಖ್ಷೇ॑ತಿ ವಿ॒ದಥಾ॑ ಕ॒ವಿಃ । ಸ ತ್ರೀಗ್ಂರೇ॑ಕಾದ॒ಶಾಗ್ಂ ಇ॒ಹ ॥ ಯಖ್ಷ॑ಚ್ಚ ಪಿ॒ಪ್ರಯ॑ಚ್ಚ ನೋ॒ ವಿಪ್ರೋ॑ ದೂ॒ತಃ ಪರಿ॑ಷ್ಕೃತಃ । ನಭ॑ನ್ತಾಮನ್ಯ॒ಕೇ ಸ॑ಮೇ ॥ ಇನ್ದ್ರಾ॑ವಿಷ್ಣೂ ದೃಗ್ಂಹಿ॒ತಾ-ಶ್ಶಮ್ಬ॑ರಸ್ಯ॒ ನವ॒ ಪುರೋ॑ ನವ॒ತಿ-ಞ್ಚ॑- ಶ್ಞಥಿಷ್ಟಮ್ । ಶ॒ತಂ-ವಁ॒ರ್ಚಿನ॑-ಸ್ಸ॒ಹಸ್ರ॑-ಞ್ಚ ಸಾ॒ಕಗ್ಂ ಹ॒ಥೋ ಅ॑ಪ್ರ॒ತ್ಯಸು॑ರಸ್ಯ ವೀ॒ರಾನ್ ॥ ಉ॒ತ ಮಾ॒ತಾ ಮ॑ಹಿ॒ಷ ಮನ್ವ॑ವೇನದ॒ಮೀ ತ್ವಾ॑ ಜಹತಿ ಪುತ್ರ ದೇ॒ವಾಃ । ಅಥಾ᳚ಬ್ರವೀ-ದ್ವೃ॒ತ್ರಮಿನ್ದ್ರೋ॑ ಹನಿ॒ಷ್ಯನ್-ಥ್ಸಖೇ॑ ವಿಷ್ಣೋ ವಿತ॒ರಂ-ವಿಁಕ್ರ॑ಮಸ್ವ ॥ 46 ॥
(ಇ॒ಷಾ – ಽಥ॑ – ತ್ವಾ॒ – ತ್ರಯೋ॑ದಶ ಚ) (ಅ. 11)
(ಯೋ ವೈ ಪವ॑ಮಾನಾನಾಂ॒ – ತ್ರೀಣಿ॑ – ಪರಿ॒ಭೂರಃ – ಸ್ಫ್ಯ-ಸ್ಸ್ವ॒ಸ್ತಿ – ರ್ಭಖ್ಷೇಹಿ॑ – ಮಹೀ॒ನಾ-ಮ್ಪಯೋ॑-ಽಸಿ॒ – ದೇವ॑ ಸವಿತರೇ॒ತತ್ತೇ᳚ – ಶ್ಯೇ॒ನಾಯ॒ – ಯದ್ವೈ ಹೋತೋ॑ – ಪಯಾ॒ಮಗೃ॑ಹೀತೋ-ಽಸಿ ವಾಖ್ಷ॒ಸತ್ – ಪ್ರ ಸೋ ಅ॑ಗ್ನ॒ – ಏಕಾ॑ದಶ )
(ಯೋ ವೈ – ಸ್ಫ್ಯ-ಸ್ಸ್ವ॒ಸ್ತಿಃ – ಸ್ವ॒ಧಾಯೈ॒ ನಮಃ॒ – ಪ್ರಮು॑ಞ್ಚ॒ – ತಿಷ್ಠ॑ತೀವ॒ – ಷಟ್ಚ॑ತ್ವಾರಿಗ್ಂಶತ್ )
(ಯೋ ವೈ ಪವ॑ಮಾನಾನಾ॒ಮ್, ವಿಕ್ರ॑ಮಸ್ವ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ತೃತೀಯಕಾಣ್ಡೇ ದ್ವಿತೀಯಃ ಪ್ರಶ್ನ-ಸ್ಸಮಾಪ್ತಃ ॥