মহাযোগপীঠে তটে ভীমরথ্যা
বরং পুংডরীকায দাতুং মুনীংদ্রৈঃ ।
সমাগত্য তিষ্ঠংতমানংদকংদং
পরব্রহ্মলিংগং ভজে পাংডুরংগম্ ॥ 1 ॥
তটিদ্বাসসং নীলমেঘাবভাসং
রমামংদিরং সুংদরং চিত্প্রকাশম্ ।
বরং ত্বিষ্টকাযাং সমন্যস্তপাদং
পরব্রহ্মলিংগং ভজে পাংডুরংগম্ ॥ 2 ॥
প্রমাণং ভবাব্ধেরিদং মামকানাং
নিতংবঃ করাভ্যাং ধৃতো যেন তস্মাত্ ।
বিধাতুর্বসত্যৈ ধৃতো নাভিকোশঃ
পরব্রহ্মলিংগং ভজে পাংডুরংগম্ ॥ 3 ॥
স্ফুরত্কৌস্তুভালংকৃতং কংঠদেশে
শ্রিযা জুষ্টকেযূরকং শ্রীনিবাসম্ ।
শিবং শাংতমীড্যং বরং লোকপালং
পরব্রহ্মলিংগং ভজে পাংডুরংগম্ ॥ 4 ॥
শরচ্চংদ্রবিংবাননং চারুহাসং
লসত্কুংডলাক্রাংতগংডস্থলাংতম্ ।
জপারাগবিংবাধরং কংজনেত্রং
পরব্রহ্মলিংগং ভজে পাংডুরংগম্ ॥ 5 ॥
কিরীটোজ্জ্বলত্সর্বদিক্প্রাংতভাগং
সুরৈরর্চিতং দিব্যরত্নৈরনর্ঘৈঃ ।
ত্রিভংগাকৃতিং বর্হমাল্যাবতংসং
পরব্রহ্মলিংগং ভজে পাংডুরংগম্ ॥ 6 ॥
বিভুং বেণুনাদং চরংতং দুরংতং
স্বযং লীলযা গোপবেষং দধানম্ ।
গবাং বৃংদকানংদদং চারুহাসং
পরব্রহ্মলিংগং ভজে পাংডুরংগম্ ॥ 7 ॥
অজং রুক্মিণীপ্রাণসংজীবনং তং
পরং ধাম কৈবল্যমেকং তুরীযম্ ।
প্রসন্নং প্রপন্নার্তিহং দেবদেবং
পরব্রহ্মলিংগং ভজে পাংডুরংগম্ ॥ 8 ॥
স্তবং পাংডুরংগস্য বৈ পুণ্যদং যে
পঠংত্যেকচিত্তেন ভক্ত্যা চ নিত্যম্ ।
ভবাংভোনিধিং তেঽপি তীর্ত্বাংতকালে
হরেরালযং শাশ্বতং প্রাপ্নুবংতি ॥ 9 ॥
ইতি শ্রীমত্পরমহংস পরিব্রাজকাচার্য শ্রীমচ্ছংকরভগবত্পাদাচার্য বিরচিতং শ্রী পাংডুরংগাষ্টকম্ ।