॥ śrī ॥
atha śrīmadaṣṭāvakragītā prārabhyatē ॥
janaka uvācha ॥
kathaṃ jñānamavāpnōti kathaṃ muktirbhaviṣyati ।
vairāgyaṃ cha kathaṃ prāptamētad brūhi mama prabhō ॥ 1-1॥
aṣṭāvakra uvācha ॥
muktimichChasi chēttāta viṣayān viṣavattyaja ।
kṣamārjavadayātōṣasatyaṃ pīyūṣavad bhaja ॥ 1-2॥
na pṛthvī na jalaṃ nāgnirna vāyurdyaurna vā bhavān ।
ēṣāṃ sākṣiṇamātmānaṃ chidrūpaṃ viddhi muktayē ॥ 1-3॥
yadi dēhaṃ pṛthak kṛtya chiti viśrāmya tiṣṭhasi ।
adhunaiva sukhī śāntō bandhamuktō bhaviṣyasi ॥ 1-4॥
na tvaṃ viprādikō varṇō nāśramī nākṣagōcharaḥ ।
asaṅgō’si nirākārō viśvasākṣī sukhī bhava ॥ 1-5॥
dharmādharmau sukhaṃ duḥkhaṃ mānasāni na tē vibhō ।
na kartāsi na bhōktāsi mukta ēvāsi sarvadā ॥ 1-6॥
ēkō draṣṭāsi sarvasya muktaprāyō’si sarvadā ।
ayamēva hi tē bandhō draṣṭāraṃ paśyasītaram ॥ 1-7॥
ahaṃ kartētyahammānamahākṛṣṇāhidaṃśitaḥ ।
nāhaṃ kartēti viśvāsāmṛtaṃ pītvā sukhaṃ chara ॥ 1-8॥
ēkō viśuddhabōdhō’hamiti niśchayavahninā ।
prajvālyājñānagahanaṃ vītaśōkaḥ sukhī bhava ॥ 1-9॥
yatra viśvamidaṃ bhāti kalpitaṃ rajjusarpavat ।
ānandaparamānandaḥ sa bōdhastvaṃ sukhaṃ bhava ॥ 1-10॥
muktābhimānī muktō hi baddhō baddhābhimānyapi ।
kiṃvadantīha satyēyaṃ yā matiḥ sā gatirbhavēt ॥ 1-11॥
ātmā sākṣī vibhuḥ pūrṇa ēkō muktaśchidakriyaḥ ।
asaṅgō niḥspṛhaḥ śāntō bhramātsaṃsāravāniva ॥ 1-12॥
kūṭasthaṃ bōdhamadvaitamātmānaṃ paribhāvaya ।
ābhāsō’haṃ bhramaṃ muktvā bhāvaṃ bāhyamathāntaram ॥ 1-13॥
dēhābhimānapāśēna chiraṃ baddhō’si putraka ।
bōdhō’haṃ jñānakhaḍgēna tannikṛtya sukhī bhava ॥ 1-14॥
niḥsaṅgō niṣkriyō’si tvaṃ svaprakāśō nirañjanaḥ ।
ayamēva hi tē bandhaḥ samādhimanutiṣṭhasi ॥ 1-15॥
tvayā vyāptamidaṃ viśvaṃ tvayi prōtaṃ yathārthataḥ ।
śuddhabuddhasvarūpastvaṃ mā gamaḥ kṣudrachittatām ॥ 1-16॥
nirapēkṣō nirvikārō nirbharaḥ śītalāśayaḥ ।
agādhabuddhirakṣubdhō bhava chinmātravāsanaḥ ॥ 1-17॥
sākāramanṛtaṃ viddhi nirākāraṃ tu niśchalam ।
ētattattvōpadēśēna na punarbhavasambhavaḥ ॥ 1-18॥
yathaivādarśamadhyasthē rūpē’ntaḥ paritastu saḥ ।
tathaivā’smin śarīrē’ntaḥ paritaḥ paramēśvaraḥ ॥ 1-19॥
ēkaṃ sarvagataṃ vyōma bahirantaryathā ghaṭē ।
nityaṃ nirantaraṃ brahma sarvabhūtagaṇē tathā ॥ 1-20॥