janaka uvācha ॥
tattvavijñānasandaṃśamādāya hṛdayōdarāt ।
nānāvidhaparāmarśaśalyōddhāraḥ kṛtō mayā ॥ 19-1॥
kva dharmaḥ kva cha vā kāmaḥ kva chārthaḥ kva vivēkitā ।
kva dvaitaṃ kva cha vā’dvaitaṃ svamahimni sthitasya mē ॥ 19-2॥
kva bhūtaṃ kva bhaviṣyad vā vartamānamapi kva vā ।
kva dēśaḥ kva cha vā nityaṃ svamahimni sthitasya mē ॥ 19-3॥
kva chātmā kva cha vānātmā kva śubhaṃ kvāśubhaṃ yathā ।
kva chintā kva cha vāchintā svamahimni sthitasya mē ॥ 19-4॥
kva svapnaḥ kva suṣuptirvā kva cha jāgaraṇaṃ tathā ।
kva turīyaṃ bhayaṃ vāpi svamahimni sthitasya mē ॥ 19-5॥
kva dūraṃ kva samīpaṃ vā bāhyaṃ kvābhyantaraṃ kva vā ।
kva sthūlaṃ kva cha vā sūkṣmaṃ svamahimni sthitasya mē ॥ 19-6॥
kva mṛtyurjīvitaṃ vā kva lōkāḥ kvāsya kva laukikam ।
kva layaḥ kva samādhirvā svamahimni sthitasya mē ॥ 19-7॥
alaṃ trivargakathayā yōgasya kathayāpyalam ।
alaṃ vijñānakathayā viśrāntasya mamātmani ॥ 19-8॥