janaka uvācha ॥
kva bhūtāni kva dēhō vā kvēndriyāṇi kva vā manaḥ ।
kva śūnyaṃ kva cha nairāśyaṃ matsvarūpē nirañjanē ॥ 20-1॥
kva śāstraṃ kvātmavijñānaṃ kva vā nirviṣayaṃ manaḥ ।
kva tṛptiḥ kva vitṛṣṇātvaṃ gatadvandvasya mē sadā ॥ 20-2॥
kva vidyā kva cha vāvidyā kvāhaṃ kvēdaṃ mama kva vā ।
kva bandha kva cha vā mōkṣaḥ svarūpasya kva rūpitā ॥ 20-3॥
kva prārabdhāni karmāṇi jīvanmuktirapi kva vā ।
kva tad vidēhakaivalyaṃ nirviśēṣasya sarvadā ॥ 20-4॥
kva kartā kva cha vā bhōktā niṣkriyaṃ sphuraṇaṃ kva vā ।
kvāparōkṣaṃ phalaṃ vā kva niḥsvabhāvasya mē sadā ॥ 20-5॥
kva lōkaṃ kva mumukṣurvā kva yōgī jñānavān kva vā ।
kva baddhaḥ kva cha vā muktaḥ svasvarūpē’hamadvayē ॥ 20-6॥
kva sṛṣṭiḥ kva cha saṃhāraḥ kva sādhyaṃ kva cha sādhanam ।
kva sādhakaḥ kva siddhirvā svasvarūpē’hamadvayē ॥ 20-7॥
kva pramātā pramāṇaṃ vā kva pramēyaṃ kva cha pramā ।
kva kiñchit kva na kiñchid vā sarvadā vimalasya mē ॥ 20-8॥
kva vikṣēpaḥ kva chaikāgryaṃ kva nirbōdhaḥ kva mūḍhatā ।
kva harṣaḥ kva viṣādō vā sarvadā niṣkriyasya mē ॥ 20-9॥
kva chaiṣa vyavahārō vā kva cha sā paramārthatā ।
kva sukhaṃ kva cha vā dukhaṃ nirvimarśasya mē sadā ॥ 20-10॥
kva māyā kva cha saṃsāraḥ kva prītirviratiḥ kva vā ।
kva jīvaḥ kva cha tadbrahma sarvadā vimalasya mē ॥ 20-11॥
kva pravṛttirnirvṛttirvā kva muktiḥ kva cha bandhanam ।
kūṭasthanirvibhāgasya svasthasya mama sarvadā ॥ 20-12॥
kvōpadēśaḥ kva vā śāstraṃ kva śiṣyaḥ kva cha vā guruḥ ।
kva chāsti puruṣārthō vā nirupādhēḥ śivasya mē ॥ 20-13॥
kva chāsti kva cha vā nāsti kvāsti chaikaṃ kva cha dvayam ।
bahunātra kimuktēna kiñchinnōttiṣṭhatē mama ॥ 20-14॥
iti aṣṭāvakragītā samāptā ।
॥ ōṃ tatsat ॥