ōṃ śrī paramātmanē namaḥ
atha chaturdaśō’dhyāyaḥ
guṇatrayavibhāgayōgaḥ
śrī bhagavānuvācha
paraṃ bhūyaḥ pravakṣyāmi jñānānāṃ jñānamuttamam ।
yajjñātvā munayaḥ sarvē parāṃ siddhimitō gatāḥ ॥1॥
idaṃ jñānamupāśritya mama sādharmyamāgatāḥ ।
sargē’pi nōpajāyantē pralayē na vyathanti cha ॥2॥
mama yōnirmahadbrahma tasmingarbhaṃ dadhāmyaham ।
sambhavaḥ sarvabhūtānāṃ tatō bhavati bhārata ॥3॥
sarvayōniṣu kauntēya mūrtayaḥ sambhavanti yāḥ ।
tāsāṃ brahma mahadyōniḥ ahaṃ bījapradaḥ pitā ॥4॥
sattvaṃ rajastama iti guṇāḥ prakṛtisambhavāḥ ।
nibadhnanti mahābāhō dēhē dēhinamavyayam ॥5॥
tatra sattvaṃ nirmalatvāt prakāśakamanāmayam ।
sukhasaṅgēna badhnāti jñānasaṅgēna chānagha ॥6॥
rajō rāgātmakaṃ viddhi tṛṣṇāsaṅgasamudbhavam ।
tannibadhnāti kauntēya karmasaṅgēna dēhinam ॥7॥
tamastvajñānajaṃ viddhi mōhanaṃ sarvadēhinām ।
pramādālasyanidrābhiḥ tannibadhnāti bhārata ॥8॥
sattvaṃ sukhē sañjayati rajaḥ karmaṇi bhārata ।
jñānamāvṛtya tu tamaḥ pramādē sañjayatyuta ॥9॥
rajastamaśchābhibhūya sattvaṃ bhavati bhārata ।
rajaḥ sattvaṃ tamaśchaiva tamaḥ sattvaṃ rajastathā ॥10॥
sarvadvārēṣu dēhē’smin prakāśa upajāyatē ।
jñānaṃ yadā tadā vidyāt vivṛddhaṃ sattvamityuta ॥11॥
lōbhaḥ pravṛttirārambhaḥ karmaṇāmaśamaḥ spṛhā ।
rajasyētāni jāyantē vivṛddhē bharatarṣabha ॥12॥
aprakāśō’pravṛttiścha pramādō mōha ēva cha ।
tamasyētāni jāyantē vivṛddhē kurunandana ॥13॥
yadā sattvē pravṛddhē tu pralayaṃ yāti dēhabhṛt ।
tadōttamavidāṃ lōkān amalānpratipadyatē ॥14॥
rajasi pralayaṃ gatvā karmasaṅgiṣu jāyatē ।
tathā pralīnastamasi mūḍhayōniṣu jāyatē ॥15॥
karmaṇaḥ sukṛtasyāhuḥ sāttvikaṃ nirmalaṃ phalam ।
rajasastu phalaṃ duḥkham ajñānaṃ tamasaḥ phalam ॥16॥
sattvātsañjāyatē jñānaṃ rajasō lōbha ēva cha ।
pramādamōhau tamasaḥ bhavatō’jñānamēva cha ॥17॥
ūrdhvaṃ gachChanti sattvasthāḥ madhyē tiṣṭhanti rājasāḥ ।
jaghanyaguṇavṛttisthāḥ adhō gachChanti tāmasāḥ ॥18॥
nānyaṃ guṇēbhyaḥ kartāraṃ yadā draṣṭā’nupaśyati ।
guṇēbhyaścha paraṃ vētti madbhāvaṃ sō’dhigachChati ॥19॥
guṇānētānatītya trīn dēhī dēhasamudbhavān ।
janmamṛtyujarāduḥkhaiḥ vimuktō’mṛtamaśnutē ॥20॥
arjuna uvācha
kairliṅgaistrīnguṇānētān atītō bhavati prabhō ।
kimāchāraḥ kathaṃ chaitān trīnguṇānativartatē ॥21॥
śrī bhagavānuvācha
prakāśaṃ cha pravṛttiṃ cha mōhamēva cha pāṇḍava ।
na dvēṣṭi sampravṛttāni na nivṛttāni kāṅkṣati ॥22॥
udāsīnavadāsīnaḥ guṇairyō na vichālyatē ।
guṇā vartanta ityēva yō’vatiṣṭhati nēṅgatē ॥23॥
samaduḥkhasukhaḥ svasthaḥ samalōṣṭāśmakāñchanaḥ ।
tulyapriyāpriyō dhīraḥ tulyanindātmasaṃstutiḥ ॥24॥
mānāpamānayōstulyaḥ tulyō mitrāripakṣayōḥ ।
sarvārambhaparityāgī guṇātītaḥ sa uchyatē ॥25॥
māṃ cha yō’vyabhichārēṇa bhaktiyōgēna sēvatē ।
sa guṇānsamatītyaitān brahmabhūyāya kalpatē ॥26॥
brahmaṇō hi pratiṣṭhā’ham amṛtasyāvyayasya cha ।
śāśvatasya cha dharmasya sukhasyaikāntikasya cha ॥27॥
॥ ōṃ tatsaditi śrīmadbhagavadgītāsu upaniṣatsu brahmavidyāyāṃ
yōgaśāstrē śrīkṛṣṇārjunasaṃvādē guṇatrayavibhāgayōgō chaturdaśō’dhyāyaḥ ॥