ōṃ śrī paramātmanē namaḥ
atha ṣōḍaśō’dhyāyaḥ
daivāsurasampadvibhāgayōgaḥ
śrī bhagavānuvācha
abhayaṃ sattvasaṃśuddhiḥ jñānayōgavyavasthitiḥ ।
dānaṃ damaścha yajñaścha svādhyāyastapa ārjavam ॥1॥
ahiṃsā satyamakrōdhaḥ tyāgaḥ śāntirapaiśunam ।
dayā bhūtēṣvalōluptvaṃ mārdavaṃ hrīrachāpalam ॥2॥
tējaḥ kṣamā dhṛtiḥ śaucham adrōhō nātimānitā ।
bhavanti sampadaṃ daivīm abhijātasya bhārata ॥3॥
dambhō darpō’bhimānaścha krōdhaḥ pāruṣyamēva cha ।
ajñānaṃ chābhijātasya pārtha sampadamāsurīm ॥4॥
daivī sampadvimōkṣāya nibandhāyāsurī matā ।
mā śuchaḥ sampadaṃ daivīm abhijātō’si pāṇḍava ॥5॥
dvau bhūtasargau lōkē’smin daiva āsura ēva cha ।
daivō vistaraśaḥ prōktaḥ āsuraṃ pārtha mē śṛṇu ॥6॥
pravṛttiṃ cha nivṛttiṃ cha janā na vidurāsurāḥ ।
na śauchaṃ nāpi chāchāraḥ na satyaṃ tēṣu vidyatē ॥7॥
asatyamapratiṣṭhaṃ tē jagadāhuranīśvaram ।
aparasparasambhūtaṃ kimanyatkāmahaitukam ॥8॥
ētāṃ dṛṣṭimavaṣṭabhya naṣṭātmānō’lpabuddhayaḥ ।
prabhavantyugrakarmāṇaḥ kṣayāya jagatō’hitāḥ ॥9॥
kāmamāśritya duṣpūraṃ dambhamānamadānvitāḥ ।
mōhādgṛhītvāsadgrāhān pravartantē’śuchivratāḥ ॥10॥
chintāmaparimēyāṃ cha pralayāntāmupāśritāḥ ।
kāmōpabhōgaparamāḥ ētāvaditi niśchitāḥ ॥11॥
āśāpāśaśatairbaddhāḥ kāmakrōdhaparāyaṇāḥ ।
īhantē kāmabhōgārtham anyāyēnārthasañchayān ॥12॥
idamadya mayā labdham imaṃ prāpsyē manōratham ।
idamastīdamapi mē bhaviṣyati punardhanam ॥13॥
asau mayā hataḥ śatṛḥ haniṣyē chāparānapi ।
īśvarō’hamahaṃ bhōgī siddhō’haṃ balavānsukhī ॥14॥
āḍhyō’bhijanavānasmi kō’nyō’sti sadṛśō mayā ।
yakṣyē dāsyāmi mōdiṣyē ityajñānavimōhitāḥ ॥15॥
anēkachittavibhrāntāḥ mōhajālasamāvṛtāḥ ।
prasaktāḥ kāmabhōgēṣu patanti narakē’śuchau ॥16॥
ātmasambhāvitāḥ stabdhāḥ dhanamānamadānvitāḥ ।
yajantē nāmayajñaistē dambhēnāvidhipūrvakam ॥17॥
ahaṅkāraṃ balaṃ darpaṃ kāmaṃ krōdhaṃ cha saṃśritāḥ ।
māmātmaparadēhēṣu pradviṣantō’bhyasūyakāḥ ॥18॥
tānahaṃ dviṣataḥ krūrān saṃsārēṣu narādhamān ।
kṣipāmyajasramaśubhān āsurīṣvēva yōniṣu ॥19॥
āsurīṃ yōnimāpannāḥ mūḍhā janmani janmani ।
māmaprāpyaiva kauntēya tatō yāntyadhamāṃ gatim ॥20॥
trividhaṃ narakasyēdaṃ dvāraṃ nāśanamātmanaḥ ।
kāmaḥ krōdhastathā lōbhaḥ tasmādētattrayaṃ tyajēt ॥21॥
ētairvimuktaḥ kauntēya tamōdvāraistribhirnaraḥ ।
ācharatyātmanaḥ śrēyaḥ tatō yāti parāṃ gatim ॥22॥
yaḥ śāstravidhimutsṛjya vartatē kāmakārataḥ ।
na sa siddhimavāpnōti na sukhaṃ na parāṃ gatim ॥23॥
tasmāchChāstraṃ pramāṇaṃ tē kāryākāryavyavasthitau ।
jñātvā śāstravidhānōktaṃ karma kartumihārhasi ॥24॥
॥ ōṃ tatsaditi śrīmadbhagavadgītāsu upaniṣatsu brahmavidyāyāṃ
yōgaśāstrē śrīkṛṣṇārjunasaṃvādē daivāsurasampadvibhāgayōgō nāma ṣōḍaśō’dhyāyaḥ ॥