Print Friendly, PDF & Email

ōṃ śrīparamātmanē namaḥ
atha navamō’dhyāyaḥ
rājavidyārājaguhyayōgaḥ

śrī bhagavānuvācha
idaṃ tu tē guhyatamaṃ pravakṣyāmyanasūyavē ।
jñānaṃ vijñānasahitaṃ yajjñātvā mōkṣyasē’śubhāt॥1॥

rājavidyā rājaguhyaṃ pavitramidamuttamam ।
pratyakṣāvagamaṃ dharmyaṃ susukhaṃ kartumavyayam ॥2॥

aśraddadhānāḥ puruṣāḥ dharmasyāsya parantapa ।
aprāpya māṃ nivartantē mṛtyusaṃsāravartmani ॥3॥

mayā tatamidaṃ sarvaṃ jagadavyaktamūrtinā ।
mat‌sthāni sarvabhūtāni na chāhaṃ tēṣvavasthitaḥ ॥4॥

na cha mat‌sthāni bhūtāni paśya mē yōgamaiśvaram ।
bhūtabhṛnna cha bhūtasthaḥ mamātmā bhūtabhāvanaḥ ॥5॥

yathā”kāśasthitō nityaṃ vāyuḥ sarvatragō mahān ।
tathā sarvāṇi bhūtāni mat‌sthānītyupadhāraya ॥6॥

sarvabhūtāni kauntēya prakṛtiṃ yānti māmikām ।
kalpakṣayē punastāni kalpādau visṛjāmyaham ॥7॥

prakṛtiṃ svāmavaṣṭabhya visṛjāmi punaḥ punaḥ ।
bhūtagrāmamimaṃ kṛtsnam avaśaṃ prakṛtērvaśāt ॥8॥

na cha māṃ tāni karmāṇi nibadhnanti dhanañjaya ।
udāsīnavadāsīnam asaktaṃ tēṣu karmasu ॥9॥

mayādhyakṣēṇa prakṛtiḥ sūyatē sacharācharam ।
hētunā’nēna kauntēya jagadviparivartatē ॥10॥

avajānanti māṃ mūḍhāḥ mānuṣīṃ tanumāśritam ।
paraṃ bhāvamajānantaḥ mama bhūtamahēśvaram ॥11॥

mōghāśā mōghakarmāṇaḥ mōghajñānā vichētasaḥ ।
rākṣasīmāsurīṃ chaiva prakṛtiṃ mōhinīṃ śritāḥ ॥12॥

mahātmānastu māṃ pārtha daivīṃ prakṛtimāśritāḥ ।
bhajantyananyamanasaḥ jñātvā bhūtādimavyayam ॥13॥

satataṃ kīrtayantō māṃ yatantaścha dṛḍhavratāḥ ।
namasyantaścha māṃ bhaktyā nityayuktā upāsatē ॥14॥

jñānayajñēna chāpyanyē yajantō māmupāsatē ।
ēkatvēna pṛthaktvēna bahudhā viśvatōmukham ॥15॥

ahaṃ kraturahaṃ yajñaḥ svadhāhamahamauṣadham ।
mantrō’hamahamēvājyam ahamagnirahaṃ hutam ॥16॥

pitā’hamasya jagataḥ mātā dhātā pitāmahaḥ ।
vēdyaṃ pavitramōṅkāraḥ ṛksāma yajurēva cha ॥17॥

gatirbhartā prabhuḥ sākṣī nivāsaḥ śaraṇaṃ suhṛt ।
prabhavaḥ pralayaḥ sthānaṃ nidhānaṃ bījamavyayam ॥18॥

tapāmyahamahaṃ varṣaṃ nigṛhṇāmyutsṛjāmi cha ।
amṛtaṃ chaiva mṛtyuścha sadasachchāhamarjuna ॥19॥

traividyā māṃ sōmapāḥ pūtapāpāḥ yajñairiṣṭvā svargatiṃ prārthayantē ।
tē puṇyamāsādya surēndralōkam aśnanti divyāndivi dēvabhōgān ॥20॥

tē taṃ bhuktvā svargalōkaṃ viśālaṃ kṣīṇē puṇyē martyalōkaṃ viśanti ।
ēvaṃ trayīdharmamanuprapannāḥ gatāgataṃ kāmakāmā labhantē ॥21॥

ananyāśchintayantō māṃ yē janāḥ paryupāsatē ।
tēṣāṃ nityābhiyuktānāṃ yōgakṣēmaṃ vahāmyaham ॥22॥

yē’pyanyadēvatā bhaktāḥ yajantē śraddhayānvitāḥ ।
tē’pi māmēva kauntēya yajantyavidhipūrvakam ॥23॥

ahaṃ hi sarvayajñānāṃ bhōktā cha prabhurēva cha ।
na tu māmabhijānanti tattvēnātaśchyavanti tē ॥24॥

yānti dēvavratā dēvān pitṝnyānti pitṛvratāḥ ।
bhūtāni yānti bhūtējyāḥ yānti madyājinō’pi mām ॥25॥

patraṃ puṣpaṃ phalaṃ tōyaṃ yō mē bhaktyā prayachChati ।
tadahaṃ bhaktyupahṛtam aśnāmi prayatātmanaḥ ॥26॥

yatkarōṣi yadaśnāsi yajjuhōṣi dadāsi yat ।
yattapasyasi kauntēya tatkuruṣva madarpaṇam ॥27॥

śubhāśubhaphalairēvaṃ mōkṣyasē karmabandhanaiḥ ।
sannyāsayōgayuktātmā vimuktō māmupaiṣyasi ॥28॥

samō’haṃ sarvabhūtēṣu na mē dvēṣyō’sti na priyaḥ ।
yē bhajanti tu māṃ bhaktyā mayi tē tēṣu chāpyaham ॥29॥

api chētsudurāchāraḥ bhajatē māmananyabhāk ।
sādhurēva sa mantavyaḥ samyagvyavasitō hi saḥ ॥30॥

kṣipraṃ bhavati dharmātmā śaśvachChāntiṃ nigachChati ।
kauntēya prati jānīhi na mē bhaktaḥ praṇaśyati ॥31॥

māṃ hi pārtha vyapāśritya yē’pi syuḥ pāpayōnayaḥ ।
striyō vaiśyāstathā śūdrāḥ tē’pi yānti parāṃ gatim ॥32॥

kiṃ punarbrāhmaṇāḥ puṇyāḥ bhaktā rājarṣayastathā ।
anityamasukhaṃ lōkam imaṃ prāpya bhajasva mām ॥33॥

manmanā bhava madbhaktaḥ madyājī māṃ namaskuru ।
māmēvaiṣyasi yuktvaivam ātmānaṃ matparāyaṇaḥ ॥34॥

॥ ōṃ tatsaditi śrīmadbhagavadgītāsu upaniṣatsu brahmavidyāyāṃ
yōgaśāstrē śrīkṛṣṇārjunasaṃvādē rājavidyārājaguhyayōgō nāma navamō’dhyāyaḥ ॥