bhagavati tava tīrē nīramātrāśanō’ham
vigataviṣayatṛṣṇaḥ kṛṣṇamārādhayāmi ।
sakala kaluṣabhaṅgē svargasōpānasaṅgē
taralatarataraṅgē dēvi gaṅgē prasīda ॥ 1 ॥
bhagavati bhavalīlā mauḻimālē tavāmbhaḥ
kaṇamaṇuparimāṇaṃ prāṇinō yē spṛśanti ।
amaranagaranārī chāmara grāhiṇīnāṃ
vigata kalikalaṅkātaṅkamaṅkē luṭhanti ॥ 2 ॥
brahmāṇḍaṃ khaṇḍayantī haraśirasi jaṭāvallimullāsayantī
svarlōkādāpatantī kanakagiriguhāgaṇḍaśailāt skhalantī ।
kṣōṇīpṛṣṭhē luṭhantī duritachayachamūrnirbharaṃ bhartsayantī
pāthōdhiṃ pūrayantī suranagarasaritpāvanī naḥ punātu ॥ 3 ॥
majjanmātaṅga kumbhachyuta madamadirāmōdamattālijālaṃ
snānaiḥ siddhāṅganānāṃ kuchayuga vilasatkuṅkumāsaṅgapiṅgam ।
sāyaṃ prātarmunīnāṃ kuśakusumachayaiśChinnatīrasthanīraṃ
pāyānnō gāṅgamambhaḥ karikalabha karākrānta raṅgastaraṅgam ॥ 4 ॥
ādāvādi pitāmahasya niyama vyāpāra pātrē jalaṃ
paśchātpannagaśāyinō bhagavataḥ pādōdakaṃ pāvanam ।
bhūyaḥ śambhujaṭāvibhūṣaṇa maṇirjahnōrmaharṣēriyaṃ
kanyā kalmaṣanāśinī bhagavatī bhāgīrathī dṛśyatē ॥ 5 ॥
śailēndrādavatāriṇī nijajalē majjajjanōttāriṇī
pārāvāravihāriṇī bhavabhayaśrēṇī samutsāriṇī ।
śēṣāṅgairanukāriṇī haraśirōvallīdaḻākāriṇī
kāśīprāntavihāriṇī vijayatē gaṅgā manōhāriṇī ॥ 6 ॥
kutō vīchirvīchistava yadi gatā lōchanapathaṃ
tvamāpītā pītāmbarapuravāsaṃ vitarasi ।
tvadutsaṅgē gaṅgē patati yadi kāyastanubhṛtāṃ
tadā mātaḥ śāntakratavapadalābhō’pyatilaghuḥ ॥ 7 ॥
gaṅgē trailōkyasārē sakalasuravadhūdhautavistīrṇatōyē
pūrṇabrahmasvarūpē haricharaṇarajōhāriṇi svargamārgē ।
prāyaśchitaṃ yadi syāttava jalakaṇikā brahmahatyādi pāpē
kastvāṃ stōtuṃ samarthaḥ trijagadaghaharē dēvi gaṅgē prasīda ॥ 8 ॥
mātarjāhnavī śambhusaṅgamilitē mauḻau nidhāyāñjaliṃ
tvattīrē vapuṣō’vasānasamayē nārāyaṇāṅghridvayam ।
sānandaṃ smaratō bhaviṣyati mama prāṇaprayāṇōtsavē
bhūyādbhaktiravichyutā hariharādvaitātmikā śāśvatī ॥ 9 ॥
gaṅgāṣṭakamidaṃ puṇyaṃ yaḥ paṭhētprayatō naraḥ ।
sarvapāpavinirmuktō viṣṇulōkaṃ sa gachChati ॥ 10 ॥