॥ aṣṭamaḥ sargaḥ ॥
॥ vilakṣyalakṣmīpatiḥ ॥
atha kathamapi yāminīṃ vinīya smaraśarajarjaritāpi sā prabhātē ।
anunayavachanaṃ vadantamagrē praṇatamapi priyamāha sābhyasūyam ॥ 49 ॥
॥ gītaṃ 17 ॥
rajanijanitagurujāgararāgakaṣāyitamalasanivēśam ।
vahati nayanamanurāgamiva sphuṭamuditarasābhinivēśam ॥
harihari yāhi mādhava yāhi kēśava mā vada kaitavavādaṃ tāmanusara sarasīruhalōchana yā tava harati viṣādam ॥ 50 ॥
kajjalamalinavilōchanachumbanavirachitanīlimarūpam ।
daśanavasanamaruṇaṃ tava kṛṣṇa tanōti tanōranurūpam ॥ 2 ॥
vapuranuharati tava smarasaṅgarakharanakharakṣatarēkham ।
marakataśakalakalitakaladhautalipirēva ratijayalēkham ॥ 3 ॥
charaṇakamalagaladalaktakasiktamidaṃ tava hṛdayamudāram ।
darśayatīva bahirmadanadrumanavakisalayaparivāram ॥ 4 ॥
daśanapadaṃ bhavadadharagataṃ mama janayati chētasi khēdam ।
kathayati kathamadhunāpi mayā saha tava vapurētadabhēdam ॥ 5 ॥
bahiriva malinataraṃ tava kṛṣṇa manō’pi bhaviṣyati nūnam ।
kathamatha vañchayasē janamanugatamasamaśarajvaradūnam ॥ 6 ॥
bhramati bhavānabalākavalāya vanēṣu kimatra vichitram ।
prathayati pūtanikaiva vadhūvadhanirdayabālacharitram ॥ 7 ॥
śrījayadēvabhaṇitarativañchitakhaṇḍitayuvativilāpam ।
śṛṇuta sudhāmadhuraṃ vibudhā vibudhālayatō’pi durāpam ॥ 8 ॥
tadēvaṃ paśyantyāḥ prasaradanurāgaṃ bahiriva priyāpādālaktachChuritamaruṇachChāyahṛdayam ।
mamādya prakhyātapraṇayabharabhaṅgēna kitava tvadālōkaḥ śōkādapi kimapi lajjāṃ janayati ॥ 50 ॥
॥ iti gītagōvindē khaṇḍitāvarṇanē vilakṣyalakṣmīpatirnāma aṣṭhamaḥ sargaḥ ॥