brahma ha dēvēbhyō vijigyē tasya ha brahmaṇō vijayē dēvā amahīyanta ॥ 1॥

ta aikṣantāsmākamēvāyaṃ vijayō-‘smākamēvāya-mmahimēti । taddhaiṣāṃ vijajñau tēbhyō ha prādurbabhūva tanna vyajānata kimidaṃ yakṣamiti ॥ 2॥

tē-‘gnimabruvañjātavēda ētadvijānīhi kimidaṃ yakṣamiti tathēti ॥ 3॥

tadabhyadravattamabhyavadatkō-‘sītyagnirvā ahamasmītyabravījjātavēdā vā ahamasmīti ॥ 4॥

tasminstvayi kiṃ vīryamityapīdaꣳ sarva-ndahēyaṃ yadida-mpṛthivyāmiti ॥ 5॥

tasmai tṛṇa-nnidadhāvētaddahēti । tadupaprēyāya sarvajavēna tanna śaśāka dagdhuṃ sa tata ēva nivavṛtē naitadaśakaṃ vijñātuṃ yadētadyakṣamiti ॥ 6॥

atha vāyumabruvanvāyavētadvijānīhi kimētadyakṣamiti tathēti ॥ 7॥

tadabhyadravattamabhyavadatkō-‘sīti vāyurvā ahamasmītyabravīnmātariśvā vā ahamasmīti ॥ 8॥

tasminstvayi kiṃ vīryamityapīdaṃ sarvamādadīya yadida-mpṛthivyāmiti ॥ 9॥

tasmai tṛṇa-nnidadhāvētadādatsvēti tadupaprēyāya sarvajavēna tanna śaśākādātuṃ sa tata ēva nivavṛtē naitadaśakaṃ vijñātuṃ yadētadyakṣamiti ॥ 10॥

athēndramabruvanmaghavannētadvijānīhi kimētadyakṣamiti tathēti tadabhyadravattasmāttirōdadhē ॥ 11॥

sa tasminnēvākāśē striyamājagāma bahuśōbhamānāmumāṃ haimavatī-ntāgṃhōvācha kimētadyakṣamiti ॥ 12॥

॥ iti kēnōpaniṣadi tṛtīyaḥ khaṇḍaḥ ॥