kṛṣṇa yajurvēdīya taittirīya saṃhitāyā-ntṛtīyakāṇḍē dvitīyaḥ praśnaḥ – pavamānagrāhādīnāṃ vyākhyānaṃ
ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥
yō vai pava̍mānānāmanvārō̠hān. vi̠dvān. yaja̠tē-‘nu̠ pava̍mānā̠nā rō̍hati̠ na pava̍mānē̠bhyō-‘va̍ chChidyatē śyē̠nō̍-‘si gāya̠traCha̍ndā̠ anu̠ tvā-”ra̍bhē sva̠sti mā̠ sa-mpā̍raya supa̠rṇō̍-‘si tri̠ṣṭupCha̍ndā̠ anu̠ tvā-”ra̍bhē sva̠sti mā̠ sa-mpā̍raya̠ saghā̍-‘si̠ jaga̍tīChandā̠ anu̠ tvā-”ra̍bhē sva̠sti mā̠ sampā̍ra̠yētyā̍hai̠tē [ ] 1
vai pava̍mānānāmanvārō̠hāstān. ya ē̠vaṃ vi̠dvān. yaja̠tē-‘nu̠ pava̍mānā̠nā rō̍hati̠ na pava̍mānē̠bhyō-‘va̍ chChidyatē̠ yō vai pava̍mānasya̠ santa̍ti̠ṃ vēda̠ sarva̠māyu̍rēti̠ na pu̠rā-”yu̍ṣa̠ḥ pra mī̍yatē paśu̠mā-nbha̍vati vi̠ndatē̎ pra̠jā-mpava̍mānasya̠ grahā̍ gṛhya̠ntē-‘tha̠ vā a̍syai̠tē-‘gṛ̍hītā drōṇakala̠śa ā̍dhava̠nīya̍ḥ pūta̠bhṛ-ttān. yadagṛ̍hītvōpāku̠ryā-tpava̍māna̠ṃ vi- [-tpava̍māna̠ṃ vi, Chi̠ndyā̠-ttaṃ vi̠chChidya̍māna-] 2
chChi̍ndyā̠-ttaṃ vi̠chChidya̍māna-maddhva̠ryōḥ prā̠ṇō-‘nu̠ vichChi̍dyē-tōpayā̠magṛ̍hītō-‘si pra̠jāpa̍tayē̠ tvēti̍ drōṇakala̠śama̠bhi mṛ̍śē̠dindrā̍ya̠ tvētyā̍dhava̠nīya̠ṃ viśvē̎bhyastvā dē̠vēbhya̠ iti̍ pūta̠bhṛta̠-mpava̍mānamē̠va ta-thsa-nta̍nōti̠ sarva̠māyu̍rēti̠ na pu̠rā-”yu̍ṣa̠ḥ pramī̍yatē paśu̠mā-nbha̍vati vi̠ndatē̎ pra̠jām ॥ 3 ॥
(ē̠tē – vi – dvicha̍tvārigṃśachcha) (a. 1)
trīṇi̠ vāva sava̍nā̠nyatha̍ tṛ̠tīya̠gṃ̠ sava̍na̠mava̍ lumpantyana̠gṃ̠śu ku̠rvanta̍ upā̠gṃ̠śugṃhu̠tvōpāgṃ̍śupā̠trē-‘gṃ̍śuma̠vāsya̠ tantṛ̍tīyasava̠nē̍ ‘pi̠sṛjyā̠bhi ṣu̍ṇuyā̠dyadā̎pyā̠yaya̍ti̠ tēnāgṃ̍śu̠madyada̍bhiṣu̠ṇōti̠ tēna̍rjī̠ṣi sarvā̎ṇyē̠va ta-thsava̍nānyagṃśu̠manti̍ śu̠krava̍nti sa̠māva̍dvīryāṇi karōti̠ dvau sa̍mu̠drau vita̍tāvajū̠ryau pa̠ryāva̍rtētē ja̠ṭharē̍va̠ pādā̎ḥ । tayō̠ḥ paśya̍ntō̠ ati̍ yantya̠nya-mapa̍śyanta̠- [yantya̠nya-mapa̍śyantaḥ, sētu̠nā-‘ti̍] 4
-ssētu̠nā-‘ti̍ yantya̠nyam ॥ dvē dradha̍sī sa̠tatī̍ vasta̠ ēka̍ḥ kē̠śī viśvā̠ bhuva̍nāni vi̠dvān । ti̠rō̠dhāyai̠tyasi̍ta̠ṃ vasā̍na-śśu̠kramā da̍ttē anu̠hāya̍ jā̠ryai ॥ dē̠vā vai yadya̠jñē-‘ku̍rvata̠ tadasu̍rā akurvata̠ tē dē̠vā ē̠ta-mma̍hāya̠jñama̍paśya̠-ntama̍tanvatāgnihō̠traṃ vra̠tama̍kurvata̠ tasmā̠-ddvivra̍ta-ssyā̠-ddvirhya̍gnihō̠tra-ñjuhva̍ti paurṇamā̠saṃ ya̠jña-ma̍gnīṣō̠mīya̍- [-ma̍gnīṣō̠mīya̎m, pa̠śuma̍kurvata] 5
-mpa̠śuma̍kurvata dā̠rśyaṃ ya̠jñamā̎gnē̠ya-mpa̠śuma̍kurvata vaiśvadē̠va-mprā̍tassava̠na -ma̍kurvata varuṇapraghā̠sā-nmāddhya̍dinna̠gṃ̠ sava̍nagṃ sākamē̠dhā-npi̍tṛya̠jña-ntrya̍mbakāg-stṛtīyasava̠nama̍kurvata̠ tamē̍ṣā̠masu̍rā ya̠jña -ma̠nvavā̍jigāgṃsa̠-nta-nnā-‘nvavā̍ya̠-ntē̎-‘bruvannaddhvarta̠vyā vā i̠mē dē̠vā a̍bhūva̠nniti̠ tada̍ddhva̠rasyā̎ ‘ddhvara̠tva-ntatō̍ dē̠vā abha̍va̠-nparā-‘su̍rā̠ ya ē̠vaṃ vi̠dvān-thsōmē̍na̠ yaja̍tē̠ bhava̍tyā̠tmanā̠ parā̎ ‘sya̠ bhrātṛ̍vyō bhavati ॥ 6 ॥
(apa̍śyantō-‘ – gnīṣō̠mīya̍ – mā̠tmanā̠ parā̠ – trīṇi̍ cha) (a. 2)
pa̠ri̠bhūra̠gni-mpa̍ri̠bhūrindra̍-mpari̠bhūrviśvā̎-ndē̠vā-npa̍ri̠bhūrmāgṃ sa̠ha bra̍hmavarcha̠sēna̠ sa na̍ḥ pavasva̠ śa-ṅgavē̠ śa-ñjanā̍ya̠ śamarva̍tē̠ śagṃ rā̍ja̠nnōṣa̍dhī̠bhyō ‘chChi̍nnasya tē rayipatē su̠vīrya̍sya rā̠yaspōṣa̍sya dadi̠tāra̍-ssyāma । tasya̍ mē rāsva̠ tasya̍ tē bhakṣīya̠ tasya̍ ta i̠damunmṛ̍jē ॥ prā̠ṇāya̍ mē varchō̠dā varcha̍sē pavasvā pā̠nāya̍ vyā̠nāya̍ vā̠chē [vā̠chē, da̠kṣa̠kra̠tubhyā̠-ñchakṣu̍rbhyā-mmē] 7
da̍kṣakra̠tubhyā̠-ñchakṣu̍rbhyā-mmē varchō̠dau varcha̍sē pavēthā̠g̠ śrōtrā̍yā̠ ”tmanē ‘ṅgē̎bhya̠ āyu̍ṣē vī̠ryā̍ya̠ viṣṇō̠rindra̍sya̠ viśvē̍ṣā-ndē̠vānā̎-ñja̠ṭhara̍masi varchō̠dā mē̠ varcha̍sē pavasva̠ kō̍-‘si̠ kō nāma̠ kasmai̎ tvā̠ kāya̍ tvā̠ ya-ntvā̠ sōmē̠nātī̍tṛpa̠ṃ ya-ntvā̠ sōmē̠nāmī̍madagṃ supra̠jāḥ pra̠jayā̍ bhūyāsagṃ su̠vīrō̍ vī̠rai-ssu̠varchā̠ varcha̍sā su̠pōṣa̠ḥ pōṣai̠-rviśvē̎bhyō mē rū̠pēbhyō̍ varchō̠dā [varchō̠dāḥ, varcha̍sē] 8
varcha̍sē pavasva̠ tasya̍ mē rāsva̠ tasya̍ tē bhakṣīya̠ tasya̍ ta i̠damunmṛ̍jē ॥ bubhū̍ṣa̠nnavē̎kṣētai̠ṣa vai pātri̍yaḥ pra̠jāpa̍tirya̠jñaḥ pra̠jāpa̍ti̠stamē̠va ta̍rpayati̠ sa ē̍na-ntṛ̠ptō bhūtyā̠-‘bhi pa̍vatē brahmavarcha̠sakā̠mō-‘vē̎kṣētai̠ṣa vai pātri̍yaḥ pra̠jāpa̍tirya̠jñaḥ pra̠jāpa̍ti̠stamē̠va ta̍rpayati̠ sa ē̍na-ntṛ̠ptō bra̍hmavarcha̠sēnā̠bhi pa̍vata āmayā̠- [āmayā̠vī, avē̎kṣētai̠ṣa vai] 9
-vyavē̎kṣētai̠ṣa vai pātri̍yaḥ pra̠jāpa̍tirya̠jñaḥ pra̠jāpa̍ti̠stamē̠va ta̍rpayati̠ sa ē̍na-ntṛ̠pta āyu̍ṣā̠-‘bhi pa̍vatē-‘bhi̠chara̠nnavē̎kṣētai̠ṣa vai pātri̍yaḥ pra̠jāpa̍tirya̠jñaḥ pra̠jāpa̍ti̠stamē̠va ta̍rpayati̠ sa ē̍na-ntṛ̠ptaḥ prā̍ṇāpā̠nābhyā̎ṃ vā̠chō da̍kṣakra̠tubhyā̠-ñchakṣu̍rbhyā̠g̠ śrōtrā̎bhyā-mā̠tmanō-‘ṅgē̎bhya̠ āyu̍ṣō̠-‘ntarē̍ti tā̠ja-kpra dha̍nvati ॥ 10 ॥
(vā̠chē-rū̠pēbhyō̍ varchō̠dā – ā̍mayā̠vī – pañcha̍chatvārigṃśachcha) (a. 3)
sphya-ssva̠stirvi̍gha̠na-ssva̠stiḥ parśu̠rvēdi̍ḥ para̠śurna̍-ssva̠stiḥ । ya̠jñiyā̍ yajña̠kṛta̍-sstha̠ tē mā̠smin ya̠jña upa̍ hvayaddhva̠mupa̍ mā̠ dyāvā̍pṛthi̠vī hva̍yētā̠mupā̎-”stā̠vaḥ ka̠laśa̠-ssōmō̍ a̠gnirupa̍ dē̠vā upa̍ ya̠jña upa̍ mā̠ hōtrā̍ upaha̠vē hva̍yantā̠-nnamō̠-‘gnayē̍ makha̠ghnēma̠khasya̍ mā̠ yaśō̎-‘ryā̠dityā̍hava̠nīya̠mupa̍ tiṣṭhatē ya̠jñō vai ma̠khō [ya̠jñō vai ma̠khaḥ, ya̠jñaṃ vāva] 11
ya̠jñaṃ vāva sa tada̍ha̠-ntasmā̍ ē̠va na̍ma̠skṛtya̠ sada̠ḥ prasa̍rpatyā̠tmanō-‘nā̎rtyai̠ namō̍ ru̠drāya̍ makha̠ghnē nama̍skṛtyā mā pā̠hītyāgnī̎ddhra̠-ntasmā̍ ē̠va na̍ma̠skṛtya̠ sada̠ḥ prasa̍rpatyā̠tmanō-‘nā̎rtyai̠ nama̠ indrā̍ya makha̠ghna i̍ndri̠ya-mmē̍ vī̠rya̍-mmā nirva̍dhī̠riti̍ hō̠trīya̍mā̠śiṣa̍mē̠vaitāmā śā̎staindri̠yasya̍ vī̠rya̍syāni̍rghātāya̠ yā vai [ ] 12
dē̠vatā̠-ssada̠syārti̍mā̠rpaya̍nti̠ yastā vi̠dvā-npra̠sarpa̍ti̠ na sada̠syārti̠mārchCha̍ti̠ namō̠-‘gnayē̍ makha̠ghna ityā̍hai̠tā vai dē̠vatā̠-ssada̠syārti̠mā-‘rpa̍yanti̠ tā ya ē̠vaṃ vi̠dvā-npra̠sarpa̍ti̠ na sada̠syārti̠mārchCha̍ti ddṛ̠ḍhē stha̍-śśithi̠rē sa̠mīchī̠ mā-‘gṃha̍saspāta̠gṃ̠ sūryō̍ mā dē̠vō di̠vyādagṃha̍saspātu vā̠yura̠ntari̍kṣā- [vā̠yura̠ntari̍kṣāt, a̠gniḥ pṛ̍thi̠vyā] 13
-da̠gniḥ pṛ̍thi̠vyā ya̠maḥ pi̠tṛbhya̠-ssara̍svatī manu̠ṣyē̎bhyō̠ dēvī̎ dvārau̠ mā mā̠ sa-ntā̎pta̠-nnama̠-ssada̍sē̠ nama̠-ssada̍sa̠spata̍yē̠ nama̠-ssakhī̍nā-mpurō̠gāṇā̠-ñchakṣu̍ṣē̠ namō̍ di̠vē nama̍ḥ pṛthi̠vyā ahē̍ daidhiṣa̠vyōdata̍stiṣṭhā̠-‘nyasya̠ sada̍nē sīda̠ yō̎-‘sma-tpāka̍tara̠ unni̠vata̠ udu̠dvata̍ścha gēṣa-mpā̠ta-mmā̎ dyāvāpṛthivī a̠dyāhna̠-ssadō̠ vai pra̠sarpa̍nta- [vai pra̠sarpa̍ntam, pi̠tarō-‘nu̠] 14
-mpi̠tarō-‘nu̠ prasa̍rpanti̠ ta ē̍namīśva̠rā higṃsi̍tō̠-ssada̍ḥ pra̠sṛpya̍ dakṣiṇā̠rdha-mparē̎kṣē̠tā-‘ga̍nta pitaraḥ pitṛ̠māna̠haṃ yu̠ṣmābhi̍rbhūyāsagṃ supra̠jasō̠ mayā̍ yū̠ya-mbhū̍yā̠stēti̠ tēbhya̍ ē̠va na̍ma̠skṛtya̠ sada̠ḥ prasa̍rpatyā̠tmanō-‘nā̎rtyai ॥ 15 ॥
(ma̠khō – vā – a̠ntari̍kṣāt – pra̠sarpa̍nta̠ṃ – traya̍strigṃśachcha) (a. 4)
bhakṣēhi̠ mā ”vi̍śa dīrghāyu̠tvāya̍ śantanu̠tvāya̍ rā̠yaspōṣā̍ya̠ varcha̍sē suprajā̠stvāyēhi̍ vasō purō vasō pri̠yō mē̍ hṛ̠dō̎-‘sya̠śvinō̎stvā bā̠hubhyāgṃ̍ saghyāsa-nnṛ̠chakṣa̍sa-ntvā dēva sōma su̠chakṣā̠ ava̍ khyēṣa-mma̠ndrā-‘bhibhū̍tiḥ kē̠turya̠jñānā̠ṃ vāgju̍ṣā̠ṇā sōma̍sya tṛpyatu ma̠ndrā sva̍rvā̠chyadi̍ti̠ranā̍hata śīrṣṇī̠ vāgju̍ṣā̠ṇā sōma̍sya tṛpya̠tvēhi̍ viśvacharṣaṇē [ ] 16
śa̠mbhūrma̍yō̠bhū-ssva̠sti mā̍ harivarṇa̠ pracha̍ra̠ kratvē̠ dakṣā̍ya rā̠yaspōṣā̍ya suvī̠ratā̍yai̠ mā mā̍ rāja̠n. vi bī̍bhiṣō̠ mā mē̠ hārdi̍ tvi̠ṣā va̍dhīḥ । vṛṣa̍ṇē̠ śuṣmā̠yā-”yu̍ṣē̠ varcha̍sē ॥ vasu̍ma-dgaṇasya sōma dēva tē mati̠vida̍ḥ prāta̠ssava̠nasya̍ gāya̠traCha̍ndasa̠ indra̍pītasya̠ narā̠śagṃsa̍pītasya pi̠tṛpī̍tasya̠ madhu̍mata̠ upa̍hūta̠syōpa̍hūtō bhakṣayāmi ru̠drava̍-dgaṇasya sōma dēva tē mati̠vidō̠ māddhya̍ndinasya̠ sava̍nasya tri̠ṣṭupCha̍ndasa̠ indra̍pītasya̠ narā̠śagṃ sa̍pītasya [ ] 17
pi̠tṛpī̍tasya̠ madhu̍mata̠ upa̍hūta̠syōpa̍hūtō bhakṣayāmyādi̠tyava̍-dgaṇasya sōma dēva tē mati̠vida̍stṛ̠tīya̍sya̠ sava̍nasya̠ jaga̍tīChandasa̠ indra̍pītasya̠ narā̠śagṃ sa̍pītasya pi̠tṛpī̍tasya̠ madhu̍mata̠ upa̍hūta̠syōpa̍hūtō bhakṣayāmi ॥ āpyā̍yasva̠ samē̍tu tē vi̠śvata̍-ssōma̠ vṛṣṇi̍yam । bhavā̠ vāja̍sya saṅga̠thē ॥ hinva̍ mē̠ gātrā̍ harivō ga̠ṇā-nmē̠ mā vitī̍tṛṣaḥ । śi̠vō mē̍ sapta̠r̠ṣīnupa̍ tiṣṭhasva̠ mā mē-‘vā̠nnābhi̠mati̍ [mā mē-‘vā̠nnābhi̠mati̍, gā̠ḥ ।] 18
gāḥ ॥ apā̍ma̠ sōma̍ma̠mṛtā̍ abhū̠mā-‘da̍rśma̠ jyōti̠ravi̍dāma dē̠vān । kima̠smān kṛ̍ṇava̠darā̍ti̠ḥ kimu̍ dhū̠rtira̍mṛta̠ martya̍sya ॥ yanma̍ ā̠tmanō̍ mi̠ndā-‘bhū̍da̠gnista-tpuna̠rā-‘hā̎rjā̠tavē̍dā̠ vicha̍rṣaṇiḥ ॥ puna̍ra̠gniśchakṣu̍radā̠t-puna̠rindrō̠ bṛha̠spati̍ḥ । puna̍rmē aśvinā yu̠va-ñchakṣu̠rā dha̍ttama̠kṣyōḥ ॥ i̠ṣṭaya̍juṣastē dēva sōma stu̠tastō̍masya [ ] 19
śa̠stōktha̍sya̠ hari̍vata̠ indra̍pītasya̠ madhu̍mata̠ upa̍hūta̠syōpa̍hūtō bhakṣayāmi ॥ ā̠pūryā̠-ssthā-”mā̍ pūrayata pra̠jayā̍ cha̠ dhanē̍na cha ॥ ē̠ta-ttē̍ tata̠ yē cha̠ tvāmanvē̠ta-ttē̍ pitāmaha prapitāmaha̠ yē cha̠ tvāmanvatra̍ pitarō yathābhā̠ga-mma̍ndaddhva̠-nnamō̍ vaḥ pitarō̠ rasā̍ya̠ namō̍ vaḥ pitara̠-śśuṣmā̍ya̠ namō̍ vaḥ pitarō jī̠vāya̠ namō̍ vaḥ pitara- [namō̍ vaḥ pitaraḥ, sva̠dhāyai̠] 20
-ssva̠dhāyai̠ namō̍ vaḥ pitarō ma̠nyavē̠ namō̍ vaḥ pitarō ghō̠rāya̠ pita̍rō̠ namō̍ vō̠ ya ē̠tasmi̍-~ṃllō̠kēstha yu̠ṣmāgstē-‘nu̠ yē̎-‘smi-~ṃllō̠kē mā-ntē-‘nu̠ ya ē̠tasmi̍-~ṃllō̠kē stha yū̠ya-ntēṣā̠ṃ vasi̍ṣṭhā bhūyāsta̠ yē̎-‘smi-~ṃllō̠kē̍-‘ha-ntēṣā̠ṃ vasi̍ṣṭhō bhūyāsa̠-mprajā̍patē̠ na tvadē̠tānya̠nyō viśvā̍ jā̠tāni̠ pari̠tā ba̍bhūva । 21
ya-tkā̍māstē juhu̠mastannō̍ astu va̠yagg syā̍ma̠ pata̍yō rayī̠ṇām ॥ dē̠vakṛ̍ta̠syaina̍sō ‘va̠yaja̍namasi manu̠ṣya̍kṛta̠syaina̍sō ‘va̠yaja̍namasi pi̠tṛkṛ̍ta̠syaina̍sō ‘va̠yaja̍namasya̠phsu dhau̠tasya̍ sōma dēva tē̠ nṛbhi̍-ssu̠tasyē̠ṣṭa ya̍juṣa-sstu̠tastō̍masya śa̠stōktha̍sya̠ yō bha̠kṣōa̍śva̠sani̠ryō gō̠sani̠stasya̍ tē pi̠tṛbhi̍rbha̠kṣa-ṅkṛ̍ta̠syō-pa̍hūta̠syōpa̍hūtō bhakṣayāmi ॥ 22 ॥
(vi̠śva̠cha̠rṣa̠ṇē̠ – tri̠ṣṭupCha̍ndasa̠ indra̍pītasya̠ narā̠śagṃ sa̍pīta̠syā – ‘ti̍ -stu̠tastō̍masya – jī̠vāya̠ namō̍ vaḥ pitarō – babhūva̠ – chatu̍śchatvārigṃśachcha) (a. 5)
ma̠hī̠nā-mpayō̍-‘si̠ viśvē̍ṣā-ndē̠vānā̎-nta̠nūr-ṛ̠ddhyāsa̍ma̠dya pṛṣa̍tīnā̠-ṅgraha̠-mpṛṣa̍tīnā̠-ṅgrahō̍-‘si̠ viṣṇō̠r̠hṛda̍yama̠syēka̍miṣa̠ viṣṇu̠stvā-‘nu̠ vicha̍kramē bhū̠tirda̠ddhnā ghṛ̠tēna̍ vardhatā̠-ntasya̍ mē̠ṣṭasya̍ vī̠tasya̠ dravi̍ṇa̠mā ga̍myā̠jjyōti̍rasi vaiśvāna̠ra-mpṛśñi̍yai du̠gdhaṃ yāva̍tī̠ dyāvā̍pṛthi̠vī ma̍hi̠tvā yāva̍chcha sa̠pta sindha̍vō vita̠sthuḥ । tāva̍ntamindra tē̠ [tāva̍ntamindra tē, grahagṃ̍] 23
grahagṃ̍ sa̠hōrjā gṛ̍hṇā̠myastṛ̍tam ॥ ya-tkṛ̍ṣṇaśaku̠naḥ pṛ̍ṣadā̠jyama̍vamṛ̠śēchChū̠drā a̍sya pra̠māyu̍kā-ssyu̠ryachChvā ‘va̍mṛ̠śēchchatu̍ṣpādō-‘sya pa̠śava̍ḥ pra̠māyu̍kā-ssyu̠rya-thskandē̠-dyaja̍mānaḥ pra̠māyu̍ka-ssyā-tpa̠śavō̠ vai pṛ̍ṣadā̠jya-mpa̠śavō̠ vā ē̠tasya̍ skandanti̠ yasya̍ pṛṣadā̠jyagg skanda̍ti̠ ya-tpṛ̍ṣadā̠jya-mpuna̍rgṛ̠hṇāti̍ pa̠śūnē̠vāsmai̠ puna̍rgṛhṇāti prā̠ṇō vai pṛ̍ṣadā̠jya-mprā̠ṇō vā [pṛ̍ṣadā̠jya-mprā̠ṇō vai, ē̠tasya̍] 24
ē̠tasya̍ skandati̠ yasya̍ pṛṣadā̠jyagg skanda̍ti̠ ya-tpṛ̍ṣadā̠jya-mpuna̍rgṛ̠hṇāti̍ prā̠ṇamē̠vāsmai̠ puna̍rgṛhṇāti̠ hira̍ṇyamava̠dhāya̍ gṛhṇātya̠mṛta̠ṃ vai hira̍ṇya-mprā̠ṇaḥ pṛ̍ṣadā̠jyama̠mṛta̍mē̠vāsya̍ prā̠ṇē da̍dhāti śa̠tamā̍na-mbhavati śa̠tāyu̠ḥ puru̍ṣa-śśa̠tēndri̍ya̠ āyu̍ṣyē̠vēndri̠yē prati̍tiṣṭha̠tyaśva̠mava̍ ghrāpayati prājāpa̠tyō vā aśva̍ḥ prājāpa̠tyaḥ prā̠ṇa-ssvādē̠vāsmai̠ yōnē̎ḥ prā̠ṇa-nnirmi̍mītē̠ vi vā ē̠tasya̍ ya̠jñaśChi̍dyatē̠ yasya̍ pṛṣadā̠jyagg skanda̍ti vaiṣṇa̠vyarchā puna̍rgṛhṇāti ya̠jñō vai viṣṇu̍rya̠jñēnai̠va ya̠jñagṃ sa-nta̍nōti ॥ 25 ॥
(tē̠ – pṛ̠ṣa̠dā̠jya-mprā̠ṇō vai – yōnē̎ḥ prā̠ṇaṃ – dvāvigṃ̍śatiścha) (a. 6)
dēva̍ savitarē̠ta-ttē̠ prā-”ha̠ ta-tpra cha̍ su̠va pra cha̍ yaja̠ bṛha̠spati̍rbra̠hmā ”yu̍ṣmatyā ṛ̠chō mā gā̍ta tanū̠pā-thsāmna̍-ssa̠tyā va̍ ā̠śiṣa̍-ssantu sa̠tyā ākū̍taya ṛ̠ta-ñcha̍ sa̠tya-ñcha̍ vadata stu̠ta dē̠vasya̍ savi̠tuḥ pra̍sa̠vē stu̠tasya̍ stu̠tama̠syūrja̠-mmahyagg̍ stu̠ta-ndu̍hā̠mā mā̎ stu̠tasya̍ stu̠ta-ṅga̍myāchCha̠strasya̍ śa̠stra- [śa̠stram, a̠syūrja̠-mmahyagṃ̍] 26
-ma̠syūrja̠-mmahyagṃ̍ śa̠stra-ndu̍hā̠mā mā̍ śa̠strasya̍ śa̠stra-ṅga̍myā-dindri̠yāva̍ntō vanāmahē dhukṣī̠mahi̍ pra̠jāmiṣa̎m ॥ sā mē̍ sa̠tyā-”śīrdē̠vēṣu̍ bhūyā-dbrahmavarcha̠sa-mmā-” ga̍myāt ॥ ya̠jñō ba̍bhūva̠ sa ā ba̍bhūva̠ sapraja̍jñē̠ sa vā̍vṛdhē । sa dē̠vānā̠madhi̍-patirbabhūva̠ sō a̠smāgṃ adhi̍patīn karōtu va̠yagg syā̍ma̠ pata̍yō rayī̠ṇām ॥ ya̠jñō vā̠ vai [ ] 27
ya̠jñapa̍ti-ndu̠hē ya̠jñapa̍tirvā ya̠jña-ndu̍hē̠ sa ya-sstu̍taśa̠strayō̠rdōha̠ma vi̍dvā̠n̠. yaja̍tē̠ taṃ ya̠jñō du̍hē̠ sa i̠ṣṭvā pāpī̍yā-nbhavati̠ ya ē̍nayō̠rdōha̍ṃ vi̠dvān. yaja̍tē̠ sa ya̠jña-ndu̍hē̠ sa i̠ṣṭvā vasī̍yā-nbhavati stu̠tasya̍ stu̠tama̠syūrja̠-mmahyagg̍ stu̠ta-ndu̍hā̠mā mā̎ stu̠tasya̍ stu̠ta-ṅga̍myāchCha̠strasya̍ śa̠strama̠syūrja̠-mmahyagṃ̍ śa̠stra-ndu̍hā̠ mā mā̍ śa̠strasya̍ śa̠stra-ṅga̍myā̠dityā̍hai̠ṣa vai stu̍taśa̠strayō̠rdōha̠staṃ ya ē̠vaṃ vi̠dvān. yaja̍tē du̠ha ē̠va ya̠jñami̠ṣṭvā vasī̍yā-nbhavati ॥ 28 ॥
(śa̠straṃ – ~ṃvai – śa̠strandu̍hā̠ṃ – dvāvigṃ̍śatiścha) (a. 7)
śyē̠nāya̠ patva̍nē̠ svāhā̠ vaṭthsva̠yama̍bhigūrtāya̠ namō̍ viṣṭa̠mbhāya̠ dharma̍ṇē̠ svāhā̠ vaṭthsva̠yama̍bhigūrtāya̠ nama̍ḥ pari̠dhayē̍ jana̠pratha̍nāya̠ svāhā̠ vaṭthsva̠yama̍bhigūrtāya̠ nama̍ ū̠rjē hōtrā̍ṇā̠g̠ svāhā̠ vaṭthsva̠yama̍bhigūrtāya̠ nama̠ḥ paya̍sē̠ hōtrā̍ṇā̠g̠ svāhā̠ vaṭthsva̠yama̍bhigūrtāya̠ nama̍ḥ pra̠jāpa̍tayē̠ mana̍vē̠ svāhā̠ vaṭthsva̠yama̍bhigūrtāya̠ nama̍ ṛ̠tamṛ̍tapā-ssuvarvā̠ṭthsvāhā̠ vaṭthsva̠yama̍bhigūrtāya̠ nama̍stṛ̠mpantā̠gṃ̠ hōtrā̠ madhō̎rghṛ̠tasya̍ ya̠jñapa̍ti̠mṛṣa̍ya̠ ēna̍sā- [ēna̍sā, ā̠hu̠ḥ ।] 29
-”huḥ । pra̠jā nirbha̍ktā anuta̠pyamā̍nā madha̠vyau̎ stō̠kāvapa̠ tau ra̍rādha ॥ sa-nna̠stābhyāgṃ̍ sṛjatuvi̠śvaka̍rmā ghō̠rā ṛṣa̍yō̠ namō̍ astvēbhyaḥ । chakṣu̍ṣa ēṣā̠-mmana̍saścha sa̠ndhau bṛha̠spata̍yē̠ mahi̠ ṣa-ddyu̠mannama̍ḥ ॥ namō̍ vi̠śvaka̍rmaṇē̠ sa u̍ pātva̠smāna̍na̠nyān-thsō̍ma̠pā-nmanya̍mānaḥ । prā̠ṇasya̍ vi̠dvān-thsa̍ma̠rē na dhīra̠ ēna̍śchakṛ̠vā-nmahi̍ ba̠ddha ē̍ṣām ॥ taṃ vi̍śvakarma̠- [taṃ vi̍śvakarmann, pra mu̍ñchā sva̠stayē̠] 30
-npra mu̍ñchā sva̠stayē̠ yē bha̠kṣaya̍ntō̠ na vasū̎nyānṛ̠huḥ । yāna̠gnayō̠-‘nvata̍pyanta̠ dhiṣṇi̍yā i̠ya-ntēṣā̍mava̠yā duri̍ṣṭyai̠ svi̍ṣṭi-nna̠stā-ṅkṛ̍ṇōtu vi̠śvaka̍rmā ॥ nama̍ḥ pi̠tṛbhyō̍ a̠bhi yē nō̠ akhya̍n. yajña̠kṛtō̍ ya̠jñakā̍mā-ssudē̠vā a̍kā̠mā vō̠ dakṣi̍ṇā̠-nna nī̍nima̠ mā na̠stasmā̠ dēna̍saḥ pāpayiṣṭa । yāva̍ntō̠ vai sa̍da̠syā̎stē sarvē̍ dakṣi̠ṇyā̎stēbhyō̠ yō dakṣi̍ṇā̠-nna [ ] 31
nayē̠daibhyō̍ vṛśchyēta̠ ya-dvai̎śvakarma̠ṇāni̍ ju̠hōti̍ sada̠syā̍nē̠va ta-tprī̍ṇātya̠smē dē̍vāsō̠ vapu̍ṣē chikithsata̠ yamā̠śirā̠ dampa̍tī vā̠mama̍śñu̠taḥ । pumā̎-npu̠trō jā̍yatē vi̠ndatē̠ vasvatha̠ viśvē̍ ara̠pā ē̍dhatē gṛ̠haḥ ॥ ā̠śī̠rdā̠yā dampa̍tī vā̠mama̍śñutā̠mari̍ṣṭō̠ rāya̍-ssachatā̠gṃ̠ samō̍kasā । ya ā-‘si̍cha̠-thsa-ndu̍gdha-ṅku̠mbhyā sa̠hēṣṭēna̠ yāma̠nnama̍ti-ñjahātu̠ saḥ ॥ sa̠rpi̠rgrī̠vī [ ] 32
pīva̍ryasya jā̠yā pīvā̍naḥ pu̠trā akṛ̍śāsō asya । sa̠hajā̍ni̠rya-ssu̍makha̠syamā̍na̠ indrā̍yā̠-”śiragṃ̍ sa̠ha ku̠mbhyā-‘dā̎t ॥ ā̠śīrma̠ ūrja̍mu̠ta su̍prajā̠stvamiṣa̍-ndadhātu̠ dravi̍ṇa̠gṃ̠ sava̍rchasam । sa̠-ñjaya̠n kṣētrā̍ṇi̠ saha̍sā̠-‘hami̍ndra kṛṇvā̠nō a̠nyāgṃ adha̍rānthsa̠patnān̍ ॥ bhū̠tama̍si bhū̠tē mā̍ dhā̠ mukha̍masi̠ mukha̍-mbhūyāsa̠-ndyāvā̍pṛthi̠vībhyā̎-ntvā̠ pari̍gṛhṇāmi̠ viśvē̎ tvā dē̠vā vai̎śvāna̠rāḥ [vai̎śvāna̠rāḥ, prachyā̍vayantu] 33
prachyā̍vayantu di̠vi dē̠vā-ndṛgṃ̍hā̠ntari̍kṣē̠ vayāgṃ̍si pṛthi̠vyā-mpārthi̍vā-ndhru̠va-ndhru̠vēṇa̍ ha̠viṣā-‘va̠ sōma̍-nnayāmasi । yathā̍ na̠-ssarva̠mijjaga̍daya̠kṣmagṃ su̠manā̠ asa̍t । yathā̍ na̠ indra̠ idviśa̠ḥ kēva̍lī̠-ssarvā̠-ssama̍nasa̠ḥ kara̍t । yathā̍ na̠-ssarvā̠ iddiśō̠-‘smāka̠-ṅkēva̍lī̠rasann̍ ॥ 34 ॥
(ēna̍sā – viśvakarma̠n – yō dakṣi̍ṇā̠-nna – sa̍rpirgrī̠vī – vai̎śvana̠rā – ścha̍tvāri̠gṃ̠śachcha̍) (a. 8)
yadvai hōtā̎-‘ddhva̠ryuma̍bhyā̠hvaya̍tē̠ vajra̍mēnama̠bhi prava̍rtaya̠tyuktha̍śā̠ ityā̍ha prātassava̠na-mpra̍ti̠gīrya̠ trīṇyē̠tānya̠kṣarā̍ṇi tri̠padā̍ gāya̠trī gā̍ya̠tra-mprā̍tassava̠na-ṅgā̍yatri̠yaiva prā̍tassava̠nē vajra̍ma̠ntardha̍tta u̠kthaṃ vā̠chītyā̍ha̠ māddhya̍dinna̠gṃ̠ sava̍na-mprati̠gīrya̍ cha̠tvāryē̠tānya̠-kṣarā̍ṇi̠ chatu̍ṣpadā tri̠ṣṭu-ptraiṣṭu̍bha̠-mmāddhya̍dinna̠gṃ̠ sava̍na-ntri̠ṣṭubhai̠va māddhya̍ndinē̠ sava̍nē̠ vajra̍ma̠ntardha̍tta [vajra̍ma̠ntardha̍ttē, u̠kthaṃ vā̠chīndrā̠yētyā̍ha] 35
u̠kthaṃ vā̠chīndrā̠yētyā̍ha tṛtīyasava̠na-mpra̍ti̠gīrya̍ sa̠ptaitānya̠kṣarā̍ṇi sa̠ptapa̍dā̠ śakva̍rī śākva̠rō vajrō̠ vajrē̍ṇai̠va tṛ̍tīyasava̠nē vajra̍ma̠ntardha̍ttē brahmavā̠dinō̍ vadanti̠ sa tvā a̍ddhva̠ryu-ssyā̠dyō ya̍thāsava̠na-mpra̍tiga̠rē Chandāgṃ̍si sampā̠dayē̠-ttēja̍ḥ prāta-ssava̠na ā̠tma-ndadhī̍tēndri̠ya-mmāddhya̍ndinē̠ sava̍nē pa̠śūg stṛ̍tīyasava̠na ityuktha̍śā̠ ityā̍ha prātassava̠na-mpra̍ti̠gīrya̠ trīṇyē̠tānya̠kṣarā̍ṇi [ ] 36
tri̠padā̍ gāya̠trī gā̍ya̠tra-mprā̍tassava̠na-mprā̍tassava̠na ē̠va pra̍tiga̠rē Chandāgṃ̍si̠ sampā̍daya̠tyathō̠ tējō̠ vai gā̍ya̠trī tēja̍ḥ prāta-ssava̠na-ntēja̍ ē̠va prā̍tassava̠na ā̠tma-ndha̍tta u̠kthaṃ vā̠chītyā̍ha̠ māddhya̍ndina̠gṃ̠ sava̍na-mprati̠gīrya̍ cha̠tvāryē̠tānya̠kṣarā̍ṇi̠ chatu̍ṣpadā tri̠ṣṭu-ptraiṣṭu̍bha̠-mmāddhya̍ndina̠gṃ̠ sava̍na̠-mmāddhya̍dinna ē̠va sava̍nē pratiga̠rē Chandāgṃ̍si̠ sampā̍daya̠tyathō̍ indri̠yaṃ vai tri̠ṣṭugi̍ndri̠ya-mmāddhya̍dinna̠gṃ̠ sava̍na- [sava̍nam, i̠ndri̠yamē̠va] 37
-mindri̠yamē̠va māddhya̍ndinē̠ sava̍na ā̠tma-ndha̍tta u̠kthaṃ vā̠chīndrā̠yētyā̍ha tṛtīyasava̠na-mpra̍ti̠gīrya̍ sa̠ptaitānya̠kṣarā̍ṇi sa̠ptapa̍dā̠ śakva̍rī śākva̠rāḥ pa̠śavō̠ jāga̍ta-ntṛtīyasava̠na-ntṛ̍tīyasava̠na ē̠va pra̍tiga̠rē Chandāgṃ̍si̠ sampā̍daya̠tyathō̍ pa̠śavō̠ vai jaga̍tī pa̠śava̍stṛtīyasava̠na-mpa̠śūnē̠va tṛ̍tīyasava̠na ā̠tma-ndha̍ttē̠ yadvai hōtā̎-‘ddhva̠ryuma̍bhyā̠hvaya̍ta ā̠vya̍masmi-ndadhāti̠ tadyannā- [tadyanna, a̠pa̠hanī̍ta pu̠rā-‘sya̍] 38
-‘pa̠hanī̍ta pu̠rā-‘sya̍ saṃvathsa̠rā-dgṛ̠ha ā vē̍vīra̠ñChōgṃsā̠ mōda̍ i̠vēti̍ pra̠tyāhva̍yatē̠ tēnai̠va tadapa̍ hatē̠ yathā̠ vā āya̍tā-mpra̠tīkṣa̍ta ē̠vama̍ddhva̠ryuḥ pra̍tiga̠ra-mpratī̎kṣatē̠ yada̍bhi pratigṛṇī̠yādyathā ”ya̍tayā samṛ̠chChatē̍ tā̠dṛgē̠va tadyada̍rdha̠rchāllupyē̍ta̠ yathā̠ dhāva̍dbhyō̠ hīya̍tē tā̠dṛgē̠va ta-tpra̠bāhu̠gvā ṛ̠tvijā̍mudgī̠thā u̍dgī̠tha ē̠vō-dgā̍tṛ̠ṇā- [ē̠vō-dgā̍tṛ̠ṇām, ṛ̠chaḥ pra̍ṇa̠va] 39
-mṛ̠chaḥ pra̍ṇa̠va u̍kthaśa̠gṃ̠sinā̎-mpratiga̠rō̎-‘ddhvaryū̠ṇāṃ ya ē̠vaṃ vi̠dvā-npra̍tigṛ̠ṇātya̍nnā̠da ē̠va bha̍va̠tyā-‘sya̍ pra̠jāyā̎ṃ vā̠jī jā̍yata i̠yaṃ vai hōtā̠-‘sāva̍ddhva̠ryuryadāsī̍na̠-śśagṃ sa̍tya̠syā ē̠va taddhōtā̠ naityāsta̍ iva̠ hīyamathō̍ i̠māmē̠va tēna̠ yaja̍mānō duhē̠ ya-ttiṣṭha̍-npratigṛ̠ṇātya̠muṣyā̍ ē̠va tada̍ddhva̠ryurnaiti̠ [tada̍ddhva̠ryurnaiti̍, tiṣṭha̍tīva̠ hya̍sāvathō̍] 40
tiṣṭha̍tīva̠ hya̍sāvathō̍ a̠mūmē̠va tēna̠ yaja̍mānō duhē̠ yadāsī̍na̠-śśagṃsa̍ti̠ tasmā̍di̠taḥ pra̍dāna-ndē̠vā upa̍ jīvanti̠ ya-ttiṣṭha̍-npratigṛ̠ṇāti̠ tasmā̍da̠muta̍ḥ pradāna-mmanu̠ṣyā̍ upa̍ jīvanti̠ ya-tprāṃāsī̍na̠-śśagṃsa̍ti pra̠tya-ntiṣṭha̍-npratigṛ̠ṇāti̠ tasmā̎-tprā̠chīna̠gṃ̠ rētō̍ dhīyatē pra̠tīchī̎ḥ pra̠jā jā̍yantē̠ yadvai hōtā̎-‘ddhva̠ryuma̍bhyā̠hvaya̍tē̠ vajra̍mēnama̠bhi prava̍rtayati̠ parā̠ṃā va̍rtatē̠ vajra̍mē̠va tanni ka̍rōti ॥ 41 ॥
(sava̍nē̠ vajra̍ma̠ntardha̍ttē̠ – trīṇyē̠tānya̠kṣarā̍ṇī – ndri̠ya-mmādhya̍ndina̠gṃ̠ sava̍na̠ṃ – nō – dgā̍tṛ̠ṇā – ma̍dhva̠ryurnaiti̍ – vartayatya̠ – ṣṭau cha̍) (a. 9)
u̠pa̠yā̠magṛ̍hītō-‘si vākṣa̠sada̍si vā̠kpābhyā̎-ntvā kratu̠pābhyā̍ma̠sya ya̠jñasya̍ dhru̠vasyā-‘ddhya̍-kṣābhyā-ṅgṛhṇā-myupayā̠magṛ̍hītō-‘syṛta̠sada̍si chakṣu̠ṣpābhyā̎-ntvā kratu̠pābhyā̍ma̠sya ya̠jñasya̍ dhru̠vasyā-‘ddhya̍kṣābhyā-ṅgṛhṇāmyupayā̠magṛ̍hītō-‘si śruta̠sada̍si śrōtra̠pābhyā̎-ntvā kratu̠pābhyā̍ma̠sya ya̠jñasya̍ dhru̠vasyā-‘ddhya̍kṣābhyā-ṅgṛhṇāmi dē̠vēbhya̍stvā vi̠śvadē̍vēbhyastvā̠ viśvē̎bhyastvā dē̠vēbhyō̠ viṣṇa̍vurukramai̠ṣa tē̠ sōma̠stagṃ ra̍kṣasva̠ [sōma̠stagṃ ra̍kṣasva, ta-ntē̍] 42
ta-ntē̍ du̠śchakṣā̠ mā-‘va̍ khya̠nmayi̠ vasu̍ḥ purō̠vasu̍rvā̠kpā vācha̍-mmē pāhi̠ mayi̠ vasu̍rvi̠dadva̍suśchakṣu̠ṣpāśchakṣu̍-rmē pāhi̠ mayi̠ vasu̍-ssa̠ṃyadva̍su-śśrōtra̠pā-śśrōtra̍-mmē pāhi̠ bhūra̍si̠ śrēṣṭhō̍ raśmī̠nā-mprā̍ṇa̠pāḥ prā̠ṇa-mmē̍ pāhi̠ dhūra̍si̠ śrēṣṭhō̍ raśmī̠nāma̍pāna̠pā a̍pā̠na-mmē̍ pāhi̠ yō na̍ indravāyū mitrāvaruṇā-vaśvināvabhi̠dāsa̍ti̠ bhrātṛ̍vya u̠tpipī̍tē śubhaspatī i̠dama̠ha-ntamadha̍ra-mpādayāmi̠ yathē̎mdrā̠-‘hamu̍tta̠maśchē̠tayā̍ni ॥ 43 ॥
(ra̠kṣa̠sva̠ – bhrrātṛ̍vya̠ – strayō̍daśa cha) (a. 10)
pra sō a̍gnē̠ tavō̠tibhi̍-ssu̠vīrā̍bhistarati̠ vāja̍karmabhiḥ । yasya̠ tvagṃ sa̠khyamāvi̍tha ॥ pra hōtrē̍ pū̠rvyaṃ vachō̠-‘gnayē̍ bharatā bṛ̠hat । vi̠pā-ñjyōtīgṃ̍ṣi̠ bibhra̍tē̠ na vē̠dhasē̎ ॥ agnē̠ trī tē̠ vāji̍nā̠ trī ṣa̠dhasthā̍ ti̠srastē̍ ji̠hvā ṛ̍tajāta pū̠rvīḥ । ti̠sra u̍ tē ta̠nuvō̍ dē̠vavā̍tā̠stābhi̍rnaḥ pāhi̠ girō̠ apra̍yuchChann ॥ saṃ vā̠-ṅkarma̍ṇā̠ sami̠ṣā [sami̠ṣā, hi̠nō̠mīndrā̍-viṣṇū̠] 44
hi̍nō̠mīndrā̍-viṣṇū̠ apa̍saspā̠rē a̠sya । ju̠ṣēthā̎ṃ ya̠jña-ndravi̍ṇa-ñcha dhatta̠mari̍ṣṭairnaḥ pa̠thibhi̍ḥ pā̠raya̍ntā ॥ u̠bhā ji̍gyathu̠rna parā̍ jayēthē̠ na parā̍ jigyē kata̠raścha̠nainō̎ḥ । indra̍ścha viṣṇō̠ yadapa̍spṛdhēthā-ntrē̠dhā sa̠hasra̠ṃ vi tadai̍rayēthām ॥ trīṇyāyūgṃ̍ṣi̠ tava̍ jātavēdasti̠sra ā̠jānī̍ru̠ṣasa̍stē agnē । tābhi̍rdē̠vānā̠mavō̍ yakṣi vi̠dvānathā̍ [vi̠dvānatha̍, bha̠va̠ yaja̍mānāya̠ śaṃyōḥ ।] 45
-bhava̠ yaja̍mānāya̠ śaṃyōḥ ॥ a̠gnistrīṇi̍ tri̠dhātū̠nyā kṣē̍ti vi̠dathā̍ ka̠viḥ । sa trīgṃrē̍kāda̠śāgṃ i̠ha ॥ yakṣa̍chcha pi̠praya̍chcha nō̠ viprō̍ dū̠taḥ pari̍ṣkṛtaḥ । nabha̍ntāmanya̠kē sa̍mē ॥ indrā̍viṣṇū dṛgṃhi̠tā-śśamba̍rasya̠ nava̠ purō̍ nava̠ti-ñcha̍- śñathiṣṭam । śa̠taṃ va̠rchina̍-ssa̠hasra̍-ñcha sā̠kagṃ ha̠thō a̍pra̠tyasu̍rasya vī̠rān ॥ u̠ta mā̠tā ma̍hi̠ṣa manva̍vēnada̠mī tvā̍ jahati putra dē̠vāḥ । athā̎bravī-dvṛ̠tramindrō̍ hani̠ṣyan-thsakhē̍ viṣṇō vita̠raṃ vikra̍masva ॥ 46 ॥
(i̠ṣā – ‘tha̍ – tvā̠ – trayō̍daśa cha) (a. 11)
(yō vai pava̍mānānā̠ṃ – trīṇi̍ – pari̠bhūraḥ – sphya-ssva̠sti – rbhakṣēhi̍ – mahī̠nā-mpayō̍-‘si̠ – dēva̍ savitarē̠tattē̎ – śyē̠nāya̠ – yadvai hōtō̍ – payā̠magṛ̍hītō-‘si vākṣa̠sat – pra sō a̍gna̠ – ēkā̍daśa )
(yō vai – sphya-ssva̠stiḥ – sva̠dhāyai̠ nama̠ḥ – pramu̍ñcha̠ – tiṣṭha̍tīva̠ – ṣaṭcha̍tvārigṃśat )
(yō vai pava̍mānānā̠m, vikra̍masva)
॥ hari̍ḥ ōm ॥
॥ kṛṣṇa yajurvēdīya taittirīya saṃhitāyā-ntṛtīyakāṇḍē dvitīyaḥ praśna-ssamāptaḥ ॥