kṛṣṇa yajurvēdīya taittirīya saṃhitāyāṃ saptamakāṇḍē prathamaḥ praśnaḥ- aśvamēdhagatamantrāṇāmabhidhānaṃ
ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥
pra̠jana̍na̠-ñjyōti̍ra̠gni-rdē̠vatā̍nā̠-ñjyōti̍rvi̠rāṭ Chanda̍sā̠-ñjyōti̍rvi̠rā-ḍvā̠chō̎-‘gnau sa-nti̍ṣṭhatē vi̠rāja̍ma̠bhi sampa̍dyatē̠ tasmā̠-ttajjyōti̍ruchyatē̠ dvau stōmau̎ prātassava̠naṃ va̍hatō̠ yathā̎ prā̠ṇaśchā̍-‘pā̠naścha̠ dvau māddhya̍dinna̠gṃ̠ sava̍na̠ṃ yathā̠ chakṣu̍ścha̠ śrōtra̍-ñcha̠ dvau tṛ̍tīyasava̠naṃ yathā̠ vākcha̍ prati̠ṣṭhā cha̠ puru̍ṣasammitō̠ vā ē̠ṣa ya̠jñō-‘sthū̍ri̠- [ya̠jñō-‘sthū̍riḥ, ya-ṅkāma̍-ṅkā̠maya̍tē̠] 1
-rya-ṅkāma̍-ṅkā̠maya̍tē̠ tamē̠tēnā̠bhya̍śñutē̠ sarva̠gg̠ hyasthū̍riṇā-‘bhyaśñu̠tē̎ ‘gniṣṭō̠mēna̠ vai pra̠jāpa̍tiḥ pra̠jā a̍sṛjata̠ tā a̍gniṣṭō̠mēnai̠va parya̍gṛhṇā̠-ttāsā̠-mpari̍gṛhītānā-maśvata̠rō-‘tya̍pravata̠ tasyā̍nu̠hāya̠rēta̠ ā-‘da̍tta̠ ta-dga̍rda̠bhē nya̍mā̠r-ṭtasmā̎-dgarda̠bhō dvi̠rētā̠ athō̍ āhu̠rvaḍa̍bāyā̠-nnya̍mā̠rḍiti̠ tasmā̠-dvaḍa̍bā dvi̠rētā̠ athō̍ āhu̠-rōṣa̍dhīṣu̠- [āhu̠-rōṣa̍dhīṣu, nya̍mā̠rḍiti̠] 2
-nya̍mā̠rḍiti̠ tasmā̠dōṣa̍dha̠yō ‘na̍bhyaktā rēbha̠ntyathō̍ āhuḥ pra̠jāsu̠ nya̍mā̠rḍiti̠ tasmā̎-dya̠mau jā̍yētē̠ tasmā̍daśvata̠rō na pra jā̍yata̠ ātta̍rētā̠ hi tasmā̎-dba̠r̠hiṣyana̍vakLipta-ssarvavēda̠sē vā̍ sa̠hasrē̠ vā-‘va̍ kLi̠ptō-‘ti̠ hyapra̍vata̠ ya ē̠vaṃ vi̠dvāna̍gniṣṭō̠mēna̠ yaja̍tē̠ prājā̍tāḥ pra̠jā ja̠naya̍ti̠ pari̠ prajā̍tā gṛhṇāti̠ tasmā̍dāhurjyēṣṭhaya̠jña iti̍ [ ] 3
pra̠jāpa̍ti̠rvāva jyēṣṭha̠-ssa hyē̍tēnāgrē-‘ya̍jata pra̠jāpa̍tirakāmayata̠ pra jā̍yē̠yēti̠ sa mu̍kha̠tastri̠vṛta̠-nnira̍mimīta̠ tama̠gnirdē̠vatā ‘nva̍sṛjyata gāya̠trī Chandō̍ rathanta̠ragṃ sāma̍ brāhma̠ṇō ma̍nu̠ṣyā̍ṇāma̠jaḥ pa̍śū̠nā-ntasmā̠-ttē mukhyā̍ mukha̠tō hyasṛ̍jya̠ntōra̍sō bā̠hubhyā̎-mpañchada̠śa-nnira̍mimīta̠ tamindrō̍ dē̠vatā ‘nva̍sṛjyata tri̠ṣṭu-pChandō̍ bṛ̠ha- [bṛ̠hat, sāma̍ rāja̠nyō̍] 4
-thsāma̍ rāja̠nyō̍ manu̠ṣyā̍ṇā̠mavi̍ḥ paśū̠nā-ntasmā̠-ttē vī̠ryā̍vantō vī̠ryā̎ddhyasṛ̍jyanta maddhya̠ta-ssa̍ptada̠śa-nnira̍mimīta̠ taṃ viśvē̍ dē̠vā dē̠vatā̠ anva̍sṛjyanta̠ jaga̍tī̠ Chandō̍ vai rū̠pagṃ sāma̠ vaiśyō̍ manu̠ṣyā̍ṇā̠-ṅgāva̍ḥ paśū̠nā-ntasmā̠-tta ā̠dyā̍ anna̠dhānā̠ddhya sṛ̍jyanta̠ tasmā̠-dbhūyāgṃ̍sō̠ ‘nyēbhyō̠ bhūyi̍ṣṭhā̠ hi dē̠vatā̠ anvasṛ̍jyanta pa̠tta ē̍kavi̠gṃ̠ śa-nnira̍mimīta̠ tama̍nu̠ṣṭu-pChandō- [tama̍nu̠ṣṭu-pChanda̍ḥ, anva̍sṛjyata] 5
-‘nva̍sṛjyata vairā̠jagṃ sāma̍ śū̠drō ma̍nu̠ṣyā̍ṇā̠-maśva̍ḥ paśū̠nā-ntasmā̠-ttau bhū̍tasa-ṅkrā̠miṇā̠vaśva̍ścha śū̠draścha̠ tasmā̎chChū̠drō ya̠jñē-‘na̍vakLiptō̠ na hi dē̠vatā̠ anvasṛ̍jyata̠ tasmā̠-tpādā̠vupa̍ jīvataḥ pa̠ttō hyasṛ̍jyētā-mprā̠ṇā vai tri̠vṛda̍rdhamā̠sāḥ pa̍ñchada̠śaḥ pra̠jāpa̍ti-ssaptada̠śastraya̍ i̠mē lō̠kā a̠sāvā̍di̠tya ē̍kavi̠gṃ̠śa ē̠tasmi̠n vā ē̠tē śri̠tā ē̠tasmi̠-nprati̍ṣṭhitā̠ ya ē̠vaṃ vēdai̠tasmi̍nnē̠va śra̍yata ē̠tasmi̠-nprati̍ tiṣṭhati ॥ 6 ॥
(asthū̍ri̠ – rōṣa̍dhīṣu – jyēṣṭhaya̠jña iti̍ – bṛ̠ha – da̍nu̠ṣṭu-pChanda̠ḥ – prati̍ṣṭhitā̠ – nava̍ cha) (a. 1)
prā̠ta̠ssa̠va̠nē vai gā̍ya̠trēṇa̠ Chanda̍sā tri̠vṛtē̠ stōmā̍ya̠ jyōti̠rdadha̍dēti tri̠vṛtā̎ brahmavarcha̠sēna̍ pañchada̠śāya̠ jyōti̠rdadha̍dēti pañchada̠śēnauja̍sā vī̠ryē̍ṇa saptada̠śāya̠ jyōti̠rdadha̍dēti saptada̠śēna̍ prājāpa̠tyēna̍ pra̠jana̍nēnaikavi̠gṃ̠śāya̠ jyōti̠rdadha̍dēti̠ stōma̍ ē̠va ta-thstōmā̍ya̠ jyōti̠rdadha̍dē̠tyathō̠ stōma̍ ē̠va stōma̍ma̠bhi pra ṇa̍yati̠ yāva̍ntō̠ vai stōmā̠stāva̍nta̠ḥ kāmā̠stāva̍ntō lō̠kā -stāva̍nti̠ jyōtīg̍ṣyē̠tāva̍ta ē̠va stōmā̍nē̠tāva̍ta̠ḥ kāmā̍nē̠tāva̍tō lō̠kānē̠tāva̍nti̠ jyōtī̠g̠ṣyava̍ rundhē ॥ 7 ॥
(tāva̍ntō lō̠kā – strayō̍daśa cha) (a. 2)
bra̠hma̠vā̠dinō̍ vadanti̠ sa tvai ya̍jēta̠ yō̎-‘gniṣṭō̠mēna̠ yaja̍mā̠nō-‘tha̠ sarva̍stōmēna̠ yajē̠tēti̠ yasya̍ tri̠vṛta̍manta̠ryanti̍ prā̠ṇāg-stasyā̠ntarya̍nti prā̠ṇēṣu̠ mē-‘pya̍sa̠diti̠ khalu̠ vai ya̠jñēna̠ yaja̍mānō yajatē̠ yasya̍ pañchada̠śama̍nta̠ryanti̍ vī̠rya̍-ntasyā̠ntarya̍nti vī̠ryē̍ mē-‘pya̍sa̠diti̠ khalu̠ vai ya̠jñēna̠ yaja̍mānō yajatē̠ yasya̍ saptada̠śa-ma̍nta̠ryanti̍ [ ] 8
pra̠jā-ntasyā̠ntarya̍nti pra̠jāyā̠-mmē-‘pya̍sa̠diti̠ khalu̠ vai ya̠jñēna̠ yaja̍mānō yajatē̠ yasyai̍kavi̠gṃ̠śama̍nta̠ryanti̍ prati̠ṣṭhā-ntasyā̠ntarya̍nti prati̠ṣṭhāyā̠-mmē-‘pya̍sa̠diti̠ khalu̠ vai ya̠jñēna̠ yaja̍mānō yajatē̠ yasya̍ triṇa̠vama̍nta̠ryantyṛ̠tūgścha̠ tasya̍ nakṣa̠triyā̎-ñcha vi̠rāja̍ma̠ntarya̍ntyṛ̠tuṣu̠ mē-‘pya̍sannakṣa̠triyā̍yā-ñcha vi̠rājīti̠ [vi̠rājīti̍, khalu̠ vai] 9
khalu̠ vai ya̠jñēna̠ yaja̍mānō yajatē̠ yasya̍ trayastri̠gṃ̠śama̍nta̠ryanti̍ dē̠vatā̠stasyā̠ntarya̍nti dē̠vatā̍su̠ mē-‘pya̍sa̠diti̠ khalu̠ vai ya̠jñēna̠ yaja̍mānō yajatē̠ yō vai stōmā̍nāmava̠ma-mpa̍ra̠matā̠-ṅgachCha̍nta̠ṃ vēda̍ para̠matā̍mē̠va ga̍chChati tri̠vṛdvai stōmā̍nāmava̠mastri̠vṛ-tpa̍ra̠mō ya ē̠vaṃ vēda̍ para̠matā̍mē̠va ga̍chChati ॥ 10 ॥
(sa̠pta̠da̠śama̍nta̠ryanti̍ – vi̠rājīti̠ – chatu̍śchatvārigṃśachcha) (a. 3)
aṅgi̍rasō̠ vai sa̠tramā̍sata̠ tē su̍va̠rgaṃ lō̠kamā̍ya̠-ntēṣāgṃ̍ ha̠viṣmāg̍ścha havi̠ṣkṛchchā̍-‘hīyētā̠-ntāva̍kāmayētāgṃ suva̠rgaṃ lō̠kami̍yā̠vēti̠ tāvē̠ta-ndvi̍rā̠trama̍paśyatā̠-ntamā-‘ha̍ratā̠-ntēnā̍yajētā̠-ntatō̠ vai tau su̍va̠rgaṃ lō̠kamai̍tā̠ṃ ya ē̠vaṃ vi̠dvā-ndvi̍rā̠trēṇa̠ yaja̍tē suva̠rgamē̠va lō̠kamē̍ti̠ tāvaitā̠-mpūrvē̠ṇāhnā ‘ga̍chChatā̠-mutta̍rēṇā- [-mutta̍rēṇa, a̠bhi̠pla̠vaḥ pūrva̠] 11
-bhipla̠vaḥ pūrva̠-maha̍rbhavati̠ gati̠rutta̍ra̠-ñjyōti̍ṣṭōmō-‘gniṣṭō̠maḥ pūrva̠maha̍rbhavati̠ tēja̠stēnāva̍ rundhē̠ sarva̍stōmō-‘tirā̠tra utta̍ra̠gṃ̠ sarva̠syā-”ptyai̠ sarva̠syā-‘va̍ruddhyai gāya̠tra-mpūrvē-‘ha̠nthsāma̍ bhavati̠ tējō̠ vai gā̍ya̠trī gā̍ya̠trī bra̍hmavarcha̠sa-ntēja̍ ē̠va bra̍hmavarcha̠samā̠tma-ndha̍ttē̠ traiṣṭu̍bha̠mutta̍ra̠ ōjō̠ vai vī̠rya̍-ntri̠ṣṭugōja̍ ē̠va vī̠rya̍mā̠tma-ndha̍ttē rathanta̠ra-mpūrvē̍- [rathanta̠ra-mpūrvē̎, aha̠n-thsāma̍] 12
-‘ha̠n-thsāma̍ bhavatī̠yaṃ vai ra̍thanta̠rama̠syāmē̠va prati̍ tiṣṭhati bṛ̠hadutta̍rē̠-‘sau vai bṛ̠hada̠muṣyā̍mē̠va prati̍ tiṣṭhati̠ tadā̍hu̠ḥ kva̍ jaga̍tī chā-‘nu̠ṣṭu-pchēti̍ vaikhāna̠sa-mpūrvē-‘ha̠n-thsāma̍ bhavati̠ tēna̠ jaga̍tyai̠ naiti̍ ṣōḍa̠śyutta̍rē̠ tēnā̍nu̠ṣṭubhō-‘thā̍ ”hu̠rya-thsa̍mā̠nē̎-‘rdhamā̠sē syātā̍-manyata̠rasyāhnō̍ vī̠rya̍manu̍ padyē̠tētya̍-māvā̠syā̍yā̠-mpūrva̠maha̍-rbhava̠tyutta̍rasmi̠-nnutta̍ra̠-nnānai̠vā ‘rdha̍mā̠sayō̎rbhavatō̠ nānā̍vīryē bhavatō ha̠viṣma̍nnidhana̠-mpūrva̠maha̍rbhavati havi̠ṣkṛnni̍dhana̠-mutta̍ra̠-mprati̍ṣṭhityai ॥ 13 ॥
(utta̍rēṇa – rathanta̠ra-mpūrvē – ‘nvē – ka̍vigṃśatiścha) (a. 4)
āpō̠ vā i̠damagrē̍ sali̠lamā̍sī̠-ttasmi̍-npra̠jāpa̍ti-rvā̠yurbhū̠tvā ‘cha̍ra̠-thsa i̠māma̍paśya̠-ttāṃ va̍rā̠hō bhū̠tvā-‘ha̍ra̠-ttāṃ vi̠śvaka̍rmā bhū̠tvā vya̍mā̠ṭr-thsā-‘pra̍thata̠ sā pṛ̍thi̠vya̍bhava̠-tta-tpṛ̍thi̠vyai pṛ̍thivi̠tva-ntasyā̍maśrāmya-tpra̠jāpa̍ti̠-ssa dē̠vāna̍sṛjata̠ vasū̎-nru̠drānā̍di̠tyā-ntē dē̠vāḥ pra̠jāpa̍timabruva̠-nprajā̍yāmahā̠ iti̠ sō̎-‘bravī̠- [sō̎-‘bravīt, yathā̠-‘haṃ-] 14
-dyathā̠-‘haṃ yu̠ṣmāgstapa̠sā ‘sṛ̍kṣyē̠va-ntapa̍si pra̠jana̍na-michChaddhva̠miti̠ tēbhyō̠-‘gnimā̠yata̍na̠-mprā-‘ya̍chChadē̠tēnā̠-”yata̍nēna śrāmya̠tēti̠ tē̎-‘gninā̠-”yata̍nēnā-‘-śrāmya̠-ntē sa̍ṃvathsa̠ra ēkā̠-ṅgāma̍sṛjanta̠ tāṃ vasu̍bhyō ru̠drēbhya̍ ādi̠tyēbhya̠ḥ prā-‘ya̍chChannē̠tāgṃ ra̍kṣaddhva̠miti̠ tāṃ vasa̍vō ru̠drā ā̍di̠tyā a̍rakṣanta̠ sā vasu̍bhyō ru̠drēbhya̍ ādi̠tyēbhya̠ḥ prājā̍yata̠trīṇi̍ cha [ ] 15
śa̠tāni̠ traya̍strigṃśata̠-ñchātha̠ saiva sa̍hasrata̠mya̍bhava̠-ttē dē̠vāḥ pra̠jāpa̍timabruvan-thsa̠hasrē̍ṇa nō yāja̠yēti̠ sō̎-‘gniṣṭō̠mēna̠ vasū̍nayājaya̠-tta i̠maṃ lō̠kama̍jaya̠-ntachchā̍dadu̠-ssa u̠kthyē̍na ru̠drāna̍yājaya̠-ttē̎-‘ntari̍kṣamajaya̠-ntachchā̍dadu̠-ssō̍-‘tirā̠trēṇā̍-”di̠tyāna̍yājaya̠-ttē̍-‘muṃ lō̠kama̍jaya̠-ntachchā̍-‘dadu̠-stada̠ntari̍kṣa̠ṃ- [-stada̠ntari̍kṣam, vyavai̎ryata̠] 16
-~ṃvyavai̎ryata̠ tasmā̎-dru̠drā ghātu̍kā anāyata̠nā hi tasmā̍dāhu-śśithi̠laṃ vai ma̍ddhya̠ma-maha̍strirā̠trasya̠ vi hi tada̠vairya̠tēti̠ traiṣṭu̍bha-mmaddhya̠masyāhna̠ ājya̍-mbhavati sa̠ṃyānā̍ni sū̠ktāni̍ śagṃsati ṣōḍa̠śinagṃ̍ śagṃsa̠tyahnō̠ dhṛtyā̠ aśi̍thilambhāvāya̠ tasmā̎-ttrirā̠trasyā̎gniṣṭō̠ma ē̠va pra̍tha̠mamaha̍-ssyā̠dathō̠kthyō ‘thā̍-‘tirā̠tra ē̠ṣāṃ lō̠kānā̠ṃ vidhṛ̍tyai̠ trīṇi̍trīṇi śa̠tā-nya̍nūchīnā̠ha-mavya̍vachChinnāni dadā- [dadāti, ē̠ṣāṃ lō̠kānā̠-] 17
-tyē̠ṣāṃ lō̠kānā̠-manu̠ santa̍tyai da̠śata̠-nna vichChi̍ndyā-dvi̠rāja̠-nnēdvi̍chChi̠nadā̠nītyatha̠ yā sa̍hasrata̠myāsī̠-ttasyā̠mindra̍ścha̠ viṣṇu̍ścha̠ vyāya̍chChētā̠gṃ̠ sa indrō̍-‘manyatā̠nayā̠ vā i̠daṃ viṣṇu̍-ssa̠hasra̍ṃ varkṣyata̠ iti̠ tasyā̍makalpētā̠-ndvibhā̍ga̠ indra̠stṛtī̍yē̠ viṣṇu̠stadvā ē̠ṣā-‘bhyanū̎chyata u̠bhā ji̍gyathu̠riti̠ tāṃ vā ē̠tāma̍chChāvā̠ka [ē̠tāma̍chChāvā̠kaḥ, ē̠va] 18
ē̠va śagṃ̍sa̠tyatha̠ yā sa̍hasrata̠mī sā hōtrē̠ dēyēti̠ hōtā̍ra̠ṃ vā a̠bhyati̍richyatē̠ yada̍ti̠richya̍tē̠ hōtā ‘nā̎ptasyā-”payi̠tā ‘thā̍-‘hurunnē̠trē dēyētyati̍riktā̠ vā ē̠ṣā sa̠hasra̠syāti̍rikta unnē̠tartvijā̠mathā̍-”hu̠-ssarvē̎bhya-ssada̠syē̎bhyō̠ dēyētyathā̍-”hurudā̠ kṛtyā̠ sā vaśa̍-ñcharē̠dityathā̍-”hurbra̠hmaṇē̍ chā̠gnīdhē̍ cha̠ dēyēti̠ [dēyēti, dvibhā̍ga-] 19
dvibhā̍ga-mbra̠hmaṇē̠ tṛtī̍yama̠gnīdha̍ ai̠ndrō vai bra̠hmā vai̎ṣṇa̠vō̎-‘gnīdyathai̠va tāvaka̍lpētā̠mityathā̍ ”hu̠ryā ka̍lyā̠ṇī ba̍hurū̠pā sā dēyētyathā̍ ”hu̠ryā dvi̍rū̠pōbha̠yata̍ēnī̠ sā dēyēti̍ sa̠hasra̍sya̠ pari̍gṛhītyai̠ tadvā ē̠ta-thsa̠hasra̠syā-‘ya̍nagṃ sa̠hasragg̍ stō̠trīyā̎-ssa̠hasra̠-ndakṣi̍ṇā-ssa̠hasra̍sammita-ssuva̠rgō lō̠ka-ssu̍va̠rgasya̍ lō̠kasyā̠bhiji̍tyai ॥ 20 ॥
(a̠bra̠vī̠ – chcha̠ – tada̠ntari̍kṣaṃ – dadātya – chChāvā̠ka – ścha̠ dēyēti̍ – sa̠ptacha̍tvārigṃśachcha) (a. 5)
sōmō̠ vai sa̠hasra̍mavinda̠-ttamindrō ‘nva̍vinda̠-ttau ya̠mō nyāga̍chCha̠-ttāva̍bravī̠dastu̠ mē-‘trā-‘pītyastu̠ hī(3) itya̍brūtā̠gṃ̠ sa ya̠ma ēka̍syāṃ vī̠rya̍-mparya̍paśyadi̠yaṃ vā a̠sya sa̠hasra̍sya vī̠rya̍-mbibha̠rtīti̠ tāva̍bravīdi̠ya-mmamāstvē̠ta-dyu̠vayō̠riti̠ tāva̍brūtā̠gṃ̠ sarvē̠ vā ē̠tadē̠tasyā̎ṃ vī̠rya̍- [ē̠tadē̠tasyā̎ṃ vī̠rya̎m, pari̍] 21
-mpari̍ paśyā̠mō-‘gṃśa̠mā ha̍rāmahā̠ iti̠ tasyā̠magṃśa̠mā-‘ha̍ranta̠ tāma̠phsu prā-‘vē̍śaya̠n-thsōmā̍yō̠dēhīti̠ sā rōhi̍ṇī piṅga̠laika̍hāyanī rū̠pa-ṅkṛ̠tvā traya̍strigṃśatā cha tri̠bhiścha̍ śa̠tai-ssa̠hōdai-ttasmā̠-drōhi̍ṇyā piṅga̠layaika̍hāyanyā̠ sōma̍-ṅkrīṇīyā̠dya ē̠vaṃ vi̠dvā-nrōhi̍ṇyā piṅga̠layaika̍hāyanyā̠ sōma̍-ṅkrī̠ṇāti̠ traya̍strigṃśatā chai̠vāsya̍ tri̠bhiścha̍ [ ] 22
śa̠tai-ssōma̍ḥ krī̠tō bha̍vati̠ sukrī̍tēna yajatē̠ tāma̠phsu prāvē̍śaya̠-nnindrā̍yō̠dēhīti̠ sā rōhi̍ṇī lakṣma̠ṇā pa̍ṣṭhau̠hī vārtra̍ghnī rū̠pa-ṅkṛ̠tvā traya̍strigṃśatā cha tri̠bhiścha̍ śa̠tai-ssa̠hōdai-ttasmā̠-drōhi̍ṇīṃ lakṣma̠ṇā-mpa̍ṣṭhau̠hīṃ vārtra̍ghnī-ndadyā̠dya ē̠vaṃ vi̠dvā-nrōhi̍ṇīṃ lakṣma̠ṇā-mpa̍ṣṭhau̠hīṃ vārtra̍ghnī̠-ndadā̍ti̠ traya̍strigṃśachchai̠vāsya̠ trīṇi̍ cha śa̠tāni̠ sā da̠ttā [da̠ttā, bha̠va̠ti̠ tāma̠phsu] 23
bha̍vati̠ tāma̠phsu prāvē̍śayan ya̠māyō̠dēhīti̠ sā jara̍tī mū̠rkhā ta̍jjagha̠nyā rū̠pa-ṅkṛ̠tvā traya̍strigṃśatā cha tri̠bhiścha̍ śa̠tai-ssa̠hōdai-ttasmā̠jjara̍tī-mmū̠rkhā-nta̍jjagha̠nyā-ma̍nu̠stara̍ṇī-ṅkurvīta̠ ya ē̠vaṃ vi̠dvāñjara̍tī-mmū̠rkhā-nta̍jjagha̠nyā-ma̍nu̠stara̍ṇī-ṅkuru̠tē traya̍strigṃśachchai̠vāsya̠ trīṇi̍ cha śa̠tāni̠ sā-‘muṣmi̍~ṃllō̠kē bha̍vati̠ vāgē̠va sa̍hasrata̠mī tasmā̠- [tasmā̎t, varō̠ dēya̠-ssā] 24
-dvarō̠ dēya̠-ssā hi vara̍-ssa̠hasra̍masya̠ sā da̠ttā bha̍vati̠ tasmā̠-dvarō̠ na pra̍ti̠gṛhya̠-ssā hi vara̍-ssa̠hasra̍masya̠ prati̍gṛhīta-mbhavatī̠yaṃ vara̠ iti̍ brūyā̠dathā̠nyā-mbrū̍yādi̠ya-mmamēti̠ tathā̎-‘sya̠ ta-thsa̠hasra̠-mapra̍tigṛhīta-mbhavatyubhayataē̠nī syā̠-ttadā̍huranyata ē̠nī syā̎-thsa̠hasra̍-mpa̠rastā̠dēta̠miti̠ yaiva vara̍ḥ [vara̍ḥ, ka̠lyā̠ṇī rū̠pasa̍mṛddhā̠ sā] 25
kalyā̠ṇī rū̠pasa̍mṛddhā̠ sā syā̠-thsā hi vara̠-ssamṛ̍ddhyai̠ tāmutta̍rē̠ṇā-”gnī̎ddhra-mparyā̠ṇīyā̍-”hava̠nīya̠syāntē̎ drōṇakala̠śamava̍ ghrāpayē̠dā ji̍ghra ka̠laśa̍-mmahyu̠rudhā̍rā̠ paya̍sva̠tyā tvā̍ viśa̠ntvinda̍va-ssamu̠drami̍va̠ sindha̍va̠-ssā mā̍ sa̠hasra̠ ā bha̍ja pra̠jayā̍ pa̠śubhi̍-ssa̠ha puna̠rmā ”vi̍śatā-dra̠yiriti̍ pra̠jayai̠vaina̍-mpa̠śubhī̍ ra̠yyā sa- [ra̠yyā sam, a̠rdha̠ya̠ti̠ pra̠jāvā̎-] 26
-ma̍rdhayati pra̠jāvā̎-npaśu̠mā-nra̍yi̠mā-nbha̍vati̠ ya ē̠vaṃ vēda̠ tayā̍ sa̠hā-”gnī̎ddhra-mpa̠rētya̍ pu̠rastā̎-tpra̠tīchyā̠-ntiṣṭha̍ntyā-ñjuhuyādu̠bhā ji̍gyathu̠rna parā̍ jayēthē̠ na parā̍ jigyē kata̠raścha̠nainō̎ḥ । indra̍ścha viṣṇō̠ yadapa̍spṛdhēthā-ntrē̠dhā sa̠hasra̠ṃ vi tadai̍rayēthā̠miti̍, trēdhāvibha̠ktaṃ vai tri̍rā̠trē sa̠hasragṃ̍ sāha̠srīmē̠vainā̎-ṅkarōti sa̠hasra̍syai̠vainā̠-mmātrā̎- [-mmātrā̎m, ka̠rō̠ti̠ rū̠pāṇi̍ juhōti] 27
-ṅkarōti rū̠pāṇi̍ juhōti rū̠pairē̠vainā̠gṃ̠ sama̍rdhayati̠ tasyā̍ upō̠tthāya̠ karṇa̠mā ja̍pē̠diḍē̠ rantē-‘di̍tē̠ sara̍svati̠ priyē̠ prēya̍si̠ mahi̠ viśru̍tyē̠tāni̍ tē aghniyē̠ nāmā̍ni su̠kṛta̍-mmā dē̠vēṣu̍ brūtā̠diti̍ dē̠vēbhya̍ ē̠vaina̠mā vē̍daya̠tyanvē̍na-ndē̠vā bu̍ddhyantē ॥ 28 ॥
( ē̠tadē̠tasyā̎ṃ vī̠rya̍ – masya tri̠bhiścha̍ – da̠ttā – sa̍hasrata̠mī tasmā̍ – dē̠va vara̠ḥ – saṃ – mātrā̠ – mēkā̠nnacha̍tvāri̠gṃ̠śachcha̍) (a. 6)
sa̠ha̠sra̠ta̠myā̍ vai yaja̍māna-ssuva̠rgaṃ lō̠kamē̍ti̠ sainagṃ̍ suva̠rgaṃ lō̠ka-ṅga̍mayati̠ sā mā̍ suva̠rgaṃ lō̠ka-ṅga̍ma̠yētyā̍ha suva̠rgamē̠vaina̍ṃ lō̠ka-ṅga̍mayati̠ sā mā̠ jyōti̍ṣmantaṃ lō̠ka-ṅga̍ma̠yētyā̍ha̠ jyōti̍ṣmantamē̠vaina̍ṃ lō̠ka-ṅga̍mayati̠ sā mā̠ sarvā̠-npuṇyā̎-~ṃllō̠kā-nga̍ma̠yētyā̍ha̠ sarvā̍nē̠vaina̠-mpuṇyā̎ṃ lō̠kā-nga̍mayati̠ sā [sā, mā̠ pra̠ti̠ṣṭhā-ṅga̍maya pra̠jayā̍] 29
mā̎ prati̠ṣṭhā-ṅga̍maya pra̠jayā̍ pa̠śubhi̍-ssa̠ha puna̠rmā-” vi̍śatā-dra̠yiriti̍ pra̠jayai̠vaina̍-mpa̠śubhī̍ ra̠yyā-mprati̍ ṣṭhāpayati pra̠jāvā̎-npaśu̠mā-nra̍yi̠mā-nbha̍vati̠ ya ē̠vaṃ vēda̠ tāma̠gnīdhē̍ vā bra̠hmaṇē̍ vā̠ hōtrē̍ vōdgā̠trē vā̎-‘ddhva̠ryavē̍ vā dadyā-thsa̠hasra̍masya̠ sā da̠ttā bha̍vati sa̠hasra̍masya̠ prati̍gṛhīta-mbhavati̠ yastāmavi̍dvā- [yastāmavi̍dvān, pra̠ti̠gṛ̠hṇāti̠] 30
-npratigṛ̠hṇāti̠ tā-mprati̍gṛhṇīyā̠dēkā̍-‘si̠ na sa̠hasra̠mēkā̎-ntvā bhū̠tā-mprati̍ gṛhṇāmi̠ na sa̠hasra̠mēkā̍ mā bhū̠tā-” vi̍śa̠ mā sa̠hasra̠mityēkā̍mē̠vainā̎-mbhū̠tā-mprati̍gṛhṇāti̠ na sa̠hasra̠ṃ ya ē̠vaṃ vēda̍ syō̠nā-‘si̍ su̠ṣadā̍ su̠śēvā̎ syō̠nā mā ”vi̍śa su̠ṣadā̠ mā ”vi̍śa su̠śēvā̠ mā ”vi̠śē- [mā ”vi̍śa, ityā̍ha] 31
-tyā̍ha syō̠naivainagṃ̍ su̠ṣadā̍ su̠śēvā̍ bhū̠tā-” vi̍śati̠ nainagṃ̍ hinasti brahmavā̠dinō̍ vadanti sa̠hasragṃ̍ sahasrata̠myanvē̠tī(3) sa̍hasrata̠mīgṃ sa̠hasrā(3)miti̠ ya-tprāchī̍mu-thsṛ̠jē-thsa̠hasragṃ̍ sahasrata̠myanvi̍yā̠-tta-thsa̠hasra̍maprajñā̠tragṃ su̍va̠rgaṃ lō̠ka-nna pra jā̍nīyā-tpra̠tīchī̠-muthsṛ̍jati̠ tāgṃ sa̠hasra̠manu̍ pa̠ryāva̍rtatē̠ sā pra̍jāna̠tī su̍va̠rgaṃ lō̠kamē̍ti̠ yaja̍māna -ma̠bhyu-thsṛ̍jati kṣi̠prē sa̠hasra̠-mpra jā̍yata utta̠mā nī̠yatē̎ pratha̠mā dē̠vā-nga̍chChati ॥ 32 ॥
(lō̠kā-nga̍mayati̠ sā – ‘vi̍dvānth – su̠śēvā̠ mā-” vi̍śa̠ – yaja̍māna̠ṃ – dvāda̍śa cha) (a. 7)
atri̍radadā̠daurvā̍ya pra̠jā-mpu̠trakā̍māya̠ sa ri̍richā̠nō̍-‘manyata̠ nirvī̎rya-śśithi̠lō yā̠tayā̍mā̠ sa ē̠ta-ñcha̍tūrā̠tra-ma̍paśya̠-ttamā-‘ha̍ra̠-ttēnā̍yajata̠ tatō̠ vai tasya̍ cha̠tvārō̍ vī̠rā ā-‘jā̍yanta̠ suhō̍tā̠ sū̎dgātā̠ sva̍ddhvaryu̠-ssusa̍bhēyō̠ ya ē̠vaṃ vi̠dvāgścha̍tūrā̠trēṇa̠ yaja̍ta̠ ā-‘sya̍ cha̠tvārō̍ vī̠rā jā̍yantē̠ suhō̍tā̠ sū̎dgātā̠ sva̍ddhvaryu̠-ssusa̍bhēyō̠ yē cha̍turvi̠gṃ̠śāḥ pava̍mānā brahmavarcha̠sa-nta- [brahmavarcha̠sa-ntat, ya u̠dyanta̠-] 33
-dya u̠dyanta̠-sstōmā̠-śśrī-ssā ‘trigg̍ śra̠ddhādē̍va̠ṃ yaja̍māna-ñcha̠tvāri̍ vī̠ryā̍ṇi̠ nōpā̍-‘nama̠-ntēja̍ indri̠ya-mbra̍hmavarcha̠sa-ma̠nnādya̠gṃ̠ sa ē̠tāgścha̠tura̠śchatu̍ṣṭōmā̠n-thsōmā̍na-paśya̠-ttānā-‘ha̍ra̠-ttaira̍yajata̠ tēja̍ ē̠va pra̍tha̠mēnā ‘vā̍rundhēndri̠ya-ndvi̠tīyē̍na brahmavarcha̠sa-ntṛ̠tīyē̍nā̠nnādya̍-ñchatu̠rthēna̠ ya ē̠vaṃ vi̠dvāgścha̠tura̠śchatu̍ṣṭōmā̠n-thsōmā̍nā̠hara̍ti̠ tairyaja̍tē̠ tēja̍ ē̠va pra̍tha̠mēnāva̍ rundha indri̠ya-ndvi̠tīyē̍na brahmavarcha̠sa-ntṛ̠tīyē̍nā̠-‘nnādya̍-ñchatu̠rthēna̠ yāmē̠vātri̠r̠ ṛddhi̠mārdhnō̠-ttāmē̠va yaja̍māna ṛddhnōti ॥ 34 ॥
( tat-tēja̍ ē̠vā-ṣṭāda̍śa cha) (a. 8)
ja̠mada̍gni̠ḥ puṣṭi̍kāma-śchatūrā̠trēṇā̍-yajata̠ sa ē̠tā-npōṣāgṃ̍ apuṣya̠-ttasmā̎-tpali̠tau jāma̍dagniyau̠ na sa-ñjā̍nātē ē̠tānē̠va pōṣā̎-npuṣyati̠ ya ē̠vaṃ vi̠dvāgścha̍tūrā̠trēṇa̠ yaja̍tē purōḍā̠śinya̍ upa̠sadō̍ bhavanti pa̠śavō̠ vai pu̍rō̠ḍāśa̍ḥ pa̠śūnē̠vāva̍ ru̠ndhē ‘nna̠ṃ vai pu̍rō̠ḍāśō-‘nna̍mē̠vāva̍ rundhē ‘nnā̠daḥ pa̍śu̠mā-nbha̍vati̠ ya ē̠vaṃ vi̠dvāgścha̍tūrā̠trēṇa̠ yaja̍tē ॥ 35 ॥
(ja̠mada̍gni – ra̠ṣṭācha̍tvārigṃśat) (a. 9)
sa̠ṃva̠thsa̠rō vā i̠damēka̍ āsī̠-thsō̍-‘kāmayata̠rtūn-thsṛ̍jē̠yēti̠ sa ē̠ta-mpa̍ñcharā̠trama̍paśya̠-ttamā-‘ha̍ra̠-ttēnā̍yajata̠ tatō̠ vai sa ṛ̠tūna̍sṛjata̠ ya ē̠vaṃ vi̠dvā-npa̍ñcharā̠trēṇa̠ yaja̍tē̠ praiva jā̍yatē̠ ta ṛ̠tava̍-ssṛ̠ṣṭā na vyāva̍rtanta̠ ta ē̠ta-mpa̍ñcharā̠trama̍paśya̠-ntamā-‘ha̍ra̠-ntēnā̍yajanta̠ tatō̠ vai tē vyāva̍rtanta̠ [vyāva̍rtanta, ya ē̠vaṃ vi̠dvā-npa̍ñcharā̠trēṇa̠] 36
ya ē̠vaṃ vi̠dvā-npa̍ñcharā̠trēṇa̠ yaja̍tē̠ vi pā̠pmanā̠ bhrātṛ̍vyē̠ṇā-” va̍rtatē̠ sārva̍sēni-śśauchē̠yō̍-‘kāmayata paśu̠mān-thsyā̠miti̠ sa ē̠ta-mpa̍ñcharā̠tramā-‘ha̍ra̠-ttēnā̍-‘yajata̠ tatō̠ vai sa sa̠hasra̍-mpa̠śū-nprā-”pnō̠dya ē̠vaṃ vi̠dvā-npa̍ñcharā̠trēṇa̠ yaja̍tē̠ pra sa̠hasra̍-mpa̠śūnā̎pnōti baba̠raḥ prāvā̍haṇi-rakāmayata vā̠chaḥ pra̍vadi̠tā syā̠miti̠ sa ē̠ta-mpa̍ñcharā̠tramā- [ē̠ta-mpa̍ñcharā̠tramā, ā̠ha̠ra̠-ttēnā̍-] 37
-‘ha̍ra̠-ttēnā̍-yajata̠ tatō̠ vai sa vā̠chaḥ pra̍vadi̠tā-‘bha̍va̠dya ē̠vaṃ vi̠dvā-npa̍ñcharā̠trēṇa̠ yaja̍tē pravadi̠taiva vā̠chō bha̍va̠tyathō̍ ēnaṃ vā̠chaspati̠-rityā̍hu̠ranā̎pta-śchatūrā̠trō-‘ti̍rikta-ṣṣaḍ-rā̠trō-‘tha̠ vā ē̠ṣa sa̍pra̠nti ya̠jñō ya-tpa̍ñcharā̠trō ya ē̠vaṃ vi̠dvā-npa̍ñcharā̠trēṇa̠ yaja̍tē sampra̠tyē̍va ya̠jñēna̍ yajatē pañcharā̠trō bha̍vati̠ pañcha̠ vā ṛ̠tava̍-ssaṃvathsa̠ra [ṛ̠tava̍-ssaṃvathsa̠raḥ, ṛ̠tuṣvē̠va sa̍ṃvathsa̠rē] 38
ṛ̠tuṣvē̠va sa̍ṃvathsa̠rē prati̍ tiṣṭha̠tyathō̠ pañchā̎kṣarā pa̠ṅktiḥ pāṅktō̍ ya̠jñō ya̠jñamē̠vāva̍ rundhē tri̠vṛda̍gniṣṭō̠mō bha̍vati̠ tēja̍ ē̠vāva̍ rundhē pañchada̠śō bha̍vatīndri̠yamē̠vāva̍ rundhē saptada̠śō bha̍vatya̠nnādya̠syā-va̍ruddhyā̠ athō̠ praiva tēna̍ jāyatē pañchavi̠gṃ̠śō̎ ‘gniṣṭō̠mō bha̍vati pra̠jāpa̍tē̠rāptyai̍ mahāvra̠tavā̍-na̠nnādya̠syā-va̍ruddhyai viśva̠ji-thsarva̍pṛṣṭhō-‘tirā̠trō bha̍vati̠ sarva̍syā̠bhiji̍tyai ॥ 39 ॥
(tē vyāva̍rtanta – pravadi̠tā syā̠miti̠ sa ē̠ta-mpa̍ñcharā̠tramā – sa̍ṃvathsa̠rō̍- bhiji̍tyai) (a. 10)
dē̠vasya̍tvā savi̠tuḥ pra̍sa̠vē̎-‘śvinō̎rbā̠hubhyā̎-mpū̠ṣṇō hastā̎bhyā̠mā da̍da i̠māma̍gṛbhṇa-nraśa̠nāmṛ̠tasya̠ pūrva̠ āyu̍ṣi vi̠dathē̍ṣu ka̠vyā । tayā̍ dē̠vā-ssu̠tamā ba̍bhūvur-ṛ̠tasya̠ sāma̎m-thsa̠ramā̠rapa̍ntī ॥ a̠bhi̠dhā a̍si̠ bhuva̍namasi ya̠ntā-‘si̍ dha̠rtā-‘si̠ sō̎-‘gniṃ vai̎śvāna̠ragṃ sapra̍thasa-ṅgachCha̠ svāhā̍kṛtaḥ pṛthi̠vyāṃ ya̠ntā rāḍ ya̠ntā-‘si̠ yama̍nō dha̠rtā-‘si̍ dha̠ruṇa̍ḥ kṛ̠ṣyai tvā̠ kṣēmā̍ya tvā ra̠yyai tvā̠ pōṣā̍ya tvā pṛthi̠vyai tvā̠ ‘ntari̍kṣāya tvā di̠vē tvā̍ sa̠tē tvā-‘sa̍tē tvā̠dbhyastvau-ṣa̍dhībhyastvā̠ viśvē̎bhyastvā bhū̠tēbhya̍ḥ ॥ 40 ॥
(dha̠ruṇa̠ḥ – pañcha̍vigṃśatiścha) (a. 11)
vi̠bhūrmā̠trā pra̠bhūḥ pi̠trāśvō̍-‘si̠ hayō̠-‘syatyō̍-‘si̠ narō̠-‘syarvā̍-‘si̠ sapti̍rasi vā̠jya̍si̠ vṛṣā̍-‘si nṛ̠maṇā̍ asi̠ yayu̠rnāmā̎syādi̠tyānā̠-mpatvānvi̍hya̠gnayē̠ svāhā̠ svāhē̎mdrā̠gnibhyā̠g̠ svāhā̎ pra̠jāpa̍tayē̠ svāhā̠ viśvē̎bhyō dē̠vēbhya̠-ssvāhā̠ sarvā̎bhyō dē̠vētā̎bhya i̠ha dhṛti̠-ssvāhē̠ha vidhṛ̍ti̠-ssvāhē̠ha ranti̠-ssvāhē̠ -ha rama̍ti̠-ssvāhā̠ bhūra̍si bhu̠vē tvā̠ bhavyā̍ya tvā bhaviṣya̠tē tvā̠ viśvē̎bhyastvā bhū̠tēbhyō̠ dēvā̍ āśāpālā ē̠ta-ndē̠vēbhyō-‘śva̠-mmēdhā̍ya̠ prōkṣi̍ta-ṅgōpāyata ॥ 41 ॥
(ranti̠-ssvāhā̠ – dvāvigṃ̍śatiścha) (a. 12)
āya̍nāya̠ svāhā̠ prāya̍ṇāya̠ svāhō̎ddrā̠vāya̠ svāhōddru̍tāya̠ svāhā̍ śūkā̠rāya̠ svāhā̠ śūkṛ̍tāya̠ svāhā̠ palā̍yitāya̠ svāhā̠ ”palā̍yitāya̠ svāhā̠ ”valga̍tē̠ svāhā̍ parā̠valga̍tē̠ svāhā̍ ”ya̠tē svāhā̎ praya̠tē svāhā̠ sarva̍smai̠ svāhā̎ ॥ 42 ॥
(āya̍nā̠yōtta̍ramā̠palā̍yitāya̠ ṣaḍvigṃ̍śatiḥ) (a. 13)
a̠gnayē̠ svāhā̠ sōmā̍ya̠ svāhā̍ vā̠yavē̠ svāhā̠ ‘pā-mmōdā̍ya̠ svāhā̍ savi̠trē svāhā̠ sara̍svatyai̠ svāhē-ndrā̍ya̠ svāhā̠ bṛha̠spata̍yē̠ svāhā̍ mi̠trāya̠ svāhā̠ varu̍ṇāya̠ svāhā̠ sarva̍smai̠ svāhā̎ ॥ 43 ॥
(a̠gnayē̍ vā̠yavē̠-‘pā-mmōdā̠yēndrā̍ya̠ trayō̍vigṃśatiḥ) (a. 14)
pṛ̠thi̠vyai svāhā̠ ‘ntari̍kṣāya̠ svāhā̍ di̠vē svāhā̠ sūryā̍ya̠ svāhā̍ cha̠ndrama̍sē̠ svāhā̠ nakṣa̍trēbhya̠-ssvāhā̠ prāchyai̍ di̠śē svāhā̠ dakṣi̍ṇāyai di̠śē svāhā̎ pra̠tīchyai̍ di̠śē svāhō-dī̎chyai di̠śē svāhō̠rdhvāyai̍ di̠śē svāhā̍ di̠gbhya-ssvāhā̍ ‘vāntaradi̠śābhya̠-ssvāhā̠ samā̎bhya̠-ssvāhā̍ śa̠radbhya̠-ssvāhā̍ ‘hōrā̠trēbhya̠-ssvāhā̎ ‘rdhamā̠sēbhya̠-ssvāhā̠ māsē̎bhya̠-ssvāha̠rtubhya̠-ssvāhā̍ saṃvathsa̠rāya̠ svāhā̠ sarva̍smai̠ svāhā̎ ॥ 44 ॥
(pṛ̠thi̠vyai sūryā̍ya̠ nakṣa̍trēbhya̠ḥ prāchyai̍ sa̠ptacha̍tvārigṃśat) (a. 15)
a̠gnayē̠ svāhā̠ sōmā̍ya̠ svāhā̍ savi̠trē svāhā̠ sara̍svatyai̠ svāhā̍ pū̠ṣṇē svāhā̠ bṛha̠spata̍yē̠ svāhā̠ ‘pā-mmōdā̍ya̠ svāhā̍ vā̠yavē̠ svāhā̍ mi̠trāya̠ svāhā̠ varu̍ṇāya̠ svāhā̠ sarva̍smai̠ svāhā̎ ॥ 45 ॥
(a̠gnayē̍ savi̠trē pū̠ṣṇē̍-‘pā-mmōdā̍ya vā̠yavē̠ trayō̍vigṃśatiḥ) (a. 16)
pṛ̠thi̠vyai svāhā̠ ‘ntari̍kṣāya̠ svāhā̍ di̠vē svāhā̠ ‘gnayē̠ svāhā̠ sōmā̍ya̠ svāhā̠ sūryā̍ya̠ svāhā̍ cha̠ndrama̍sē̠ svāhā ‘hnē̠ svāhā̠ rātri̍yai̠ svāha̠rjavē̠ svāhā̍ sā̠dhavē̠ svāhā̍ sukṣi̠tyai svāhā̎ kṣu̠dhē svāhā̍ ”śiti̠mnē svāhā̠ rōgā̍ya̠ svāhā̍ hi̠māya̠ svāhā̍ śī̠tāya̠ svāhā̍ ”ta̠pāya̠ svāhā ‘ra̍ṇyāya̠ svāhā̍ suva̠rgāya̠ svāhā̍ lō̠kāya̠ svāhā̠ sarva̍smai̠ svāhā̎ ॥ 46 ॥
(pṛ̠thi̠vyā a̠gnayē-‘hnē̠ rātri̍yai̠ chatu̍śchatvārigṃśat) (a. 17)
bhuvō̍ dē̠vānā̠-ṅkarma̍ṇā̠-‘pasa̠rtasya̍ pa̠thyā̍-‘si̠ vasu̍bhi-rdē̠vēbhi̍-rdē̠vata̍yā gāya̠trēṇa̍ tvā̠ Chanda̍sā yunajmi vasa̠ntēna̍ tva̠rtunā̍ ha̠viṣā̍ dīkṣayāmi ru̠drēbhi̍-rdē̠vēbhi̍-rdē̠vata̍yā̠ traiṣṭu̍bhēna tvā̠ Chanda̍sā yunajmi grī̠ṣmēṇa̍ tva̠rtunā̍ ha̠viṣā̍ dīkṣayā-myādi̠tyēbhi̍-rdē̠vēbhi̍-rdē̠vata̍yā̠ jāga̍tēna tvā̠ Chanda̍sā yunajmi va̠r̠ṣābhi̍stva̠rtunā̍ ha̠viṣā̍ dīkṣayāmi̠ viśvē̍bhi-rdē̠vēbhi̍-rdē̠vata̠yā ”nu̍ṣṭubhēna tvā̠ Chanda̍sā yunajmi [ ] 47
śa̠radā̎ tva̠rtunā̍ ha̠viṣā̍ dīkṣayā̠myaṅgi̍rōbhi-rdē̠vēbhi̍-rdē̠vata̍yā̠ pāṅktē̍na tvā̠ Chanda̍sā yunajmi hēmantaśiśi̠rābhyā̎-ntva̠rtunā̍ ha̠viṣā̍ dīkṣayā̠myā-‘ha-ndī̠kṣāma̍ruhamṛ̠tasya̠ patnī̎-ṅgāya̠trēṇa̠ Chanda̍sā̠ brahma̍ṇā cha̠rtagṃ sa̠tyē̍-‘dhāgṃ sa̠tyamṛ̠tē̍-‘dhām ॥ ma̠hī mū ̠ṣu >1su̠trāmā̍ṇa >2-mi̠ha dhṛti̠-ssvāhē̠ha vidhṛ̍ti̠-ssvāhē̠ha ranti̠-ssvāhē̠ha rama̍ti̠-ssvāhā̎ ॥ 48 ॥
(ānu̍ṣṭubhēna tvā̠ Chanda̍sā yuna̠jmyē – kā̠nna pa̍ñchā̠śachcha̍) (a. 18)
ī̠kāṃ̠rāya̠ svāhē-ṅkṛ̍tāya̠ svāhā̠ kranda̍tē̠ svāhā̍ ‘va̠kranda̍tē̠ svāhā̠ prōtha̍tē̠ svāhā̎ pra̠prōtha̍tē̠ svāhā̍ ga̠ndhāya̠ svāhā̎ ghrā̠tāya̠ svāhā̎ prā̠ṇāya̠ svāhā̎ vyā̠nāya̠ svāhā̍ ‘pā̠nāya̠ svāhā̍ sandī̠yamā̍nāya̠ svāhā̠ sandi̍tāya̠ svāhā̍ vichṛ̠tyamā̍nāya̠ svāhā̠ vichṛ̍ttāya̠ svāhā̍ palāyi̠ṣyamā̍ṇāya̠ svāhā̠ palā̍yitāya̠ svāhō̍paraggsya̠tē svāhōpa̍ratāya̠ svāhā̍ nivēkṣya̠tē svāhā̍ nivi̠śamā̍nāya̠ svāhā̠ nivi̍ṣṭāya̠ svāhā̍ niṣathsya̠tē svāhā̍ ni̠ṣīda̍tē̠ svāhā̠ niṣa̍ṇṇāya̠ svāhā̍- [niṣa̍ṇṇāya̠ svāhā̎, ā̠si̠ṣya̠tē svāhā] 49
-”siṣya̠tē svāhā ”sī̍nāya̠ svāhā̍ ”si̠tāya̠ svāhā̍ nipathsya̠tē svāhā̍ ni̠padya̍mānāya̠ svāhā̠ nipa̍nnāya̠ svāhā̍ śayiṣya̠tē svāhā̠ śayā̍nāya̠ svāhā̍ śayi̠tāya̠ svāhā̍ sammīliṣya̠tē svāhā̍ sa̠mīṃla̍tē̠ svāhā̠ sammī̍litāya̠ svāhā̎ svaphsya̠tē svāhā̎ svapa̠tē svāhā̍ su̠ptāya̠ svāhā̎ prabhōthsya̠tē svāhā̎ pra̠buddhya̍mānāya̠ svāhā̠ prabu̍ddhāya̠ svāhā̍ jāgariṣya̠tē svāhā̠ jāgra̍tē̠ svāhā̍ jāgari̠tāya̠ svāhā̠ śuśrū̍ṣamāṇāya̠ svāhā̍ śṛṇva̠tē svāhā̎ śru̠tāya̠ svāhā̍ vīkṣiṣya̠tē svāhā̠ [vīkṣiṣya̠tē svāhā̎, vīkṣa̍māṇāya̠ svāhā̠] 50
vīkṣa̍māṇāya̠ svāhā̠ vīkṣi̍tāya̠ svāhā̍ sagṃhāsya̠tē svāhā̍ sa̠jiṃhā̍nāya̠ svāhō̠-jjihā̍nāya̠ svāhā̍ vivarthsya̠tē svāhā̍ vi̠varta̍mānāya̠ svāhā̠ vivṛ̍ttāya̠ svāhō̎-tthāsya̠tē svāhō̠ttiṣṭha̍tē̠ svāhōtthi̍tāya̠ svāhā̍ vidhaviṣya̠tē svāhā̍ vidhūnvā̠nāya̠ svāhā̠ vidhū̍tāya̠ svāhō̎-tkraggsya̠tē svāhō̠tkrāma̍tē̠ svāhōtkrā̎mtāya̠ svāhā̍ chaṅkramiṣya̠tē svāhā̍ chaṅkra̠myamā̍ṇāya̠ svāhā̍ chaṅkrami̠tāya̠ svāhā̍ kaṇḍūyiṣya̠tē svāhā̍ kaṇḍū̠yamā̍nāya̠ svāhā̍ kaṇḍūyi̠tāya̠ svāhā̍ nikaṣiṣya̠tē svāhā̍ ni̠kaṣa̍māṇāya̠ svāhā̠ nika̍ṣitāya̠ svāhā̠ yadatti̠ tasmai̠ svāhā̠ ya-tpiba̍ti̠ tasmai̠ svāhā̠ yanmēha̍ti̠ tasmai̠ svāhā̠ yachChakṛ̍-tka̠rōti̠ tasmai̠ svāhā̠ rēta̍sē̠ svāhā̎ pra̠jābhya̠-ssvāhā̎ pra̠jana̍nāya̠ svāhā̠ sarva̍smai̠ svāhā̎ ॥ 51 ॥
(niṣa̍ṇṇāya̠ svāhā̍ – vīkṣiṣya̠tē svāhā̍ – ni̠kaṣa̍māṇāya̠ svāhā̍ – sa̠ptavigṃ̍śatiścha) (a. 19)
a̠gnayē̠ svāhā̍ vā̠yavē̠ svāhā̠ sūryā̍ya̠ svāha̠rta-ma̍syṛ̠tasya̠rtama̍si sa̠tyama̍si sa̠tyasya̍ sa̠tya-ma̍syṛ̠tasya̠ panthā̍ asi dē̠vānā̎-ñChā̠yā-‘mṛta̍sya̠ nāma̠ ta-thsa̠tyaṃ ya-ttva-mpra̠jāpa̍ti̠rasyadhi̠ yada̍smin vā̠jinī̍va̠ śubha̠-sspardha̍ntē̠ diva̠-ssūryē̍ṇa̠ viśō̠-‘pō vṛ̍ṇā̠naḥ pa̍vatē ka̠vya-npa̠śu-nna gō̠pā irya̠ḥ pari̍jmā ॥ 52 ॥
(a̠gnayē̍ vā̠yavē̠ sūryā̍yā̠ – ‘ṣṭācha̍tvārigṃśat) (a. 20)
(pra̠jana̍naṃ – prātassava̠nē vai – bra̍hmavā̠dina̠-ssa tvā – aṅgi̍rasa̠- āpō̠ vai – sōmō̠ vai – sa̍hasrata̠myā – tri̍ – rja̠mada̍gniḥ – saṃvathsa̠rō – dē̠vasya̍ -vi̠bhū – rāya̍nāyā̠- ‘gnayē̍ – pṛthi̠vyā – a̠gnayē̍ – pṛthi̠vyai – bhuva̍ – īkāṃ̠rāyā̠ – gnayē̍ vā̠yavē̠ sūryā̍ya – vigṃśa̠tiḥ )
(pra̠jana̍na̠ – maṅgi̍rasa̠ḥ – sōmō̠ vai – pra̍tigṛ̠hṇāti̍ – vi̠bhū – rvīkṣa̍māṇāya̠ – dvipa̍ñchā̠śat)
(pra̠jana̍na̠, mpari̍jmā)
॥ hari̍ḥ ōm ॥
॥ kṛṣṇa yajurvēdīya taittirīya saṃhitāyāṃ saptamakāṇḍē prathamaḥ praśna-ssamāptaḥ ॥