kṛṣṇa yajurvēdīya taittirīya saṃhitāyāṃ saptamakāṇḍē chaturthaḥ praśnaḥ – satrakarmanirūpaṇaṃ
ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥
bṛha̠spati̍rakāmayata̠ śranmē̍ dē̠vā dadhī̍ra̠-ngachChē̍ya-mpurō̠dhāmiti̠ sa ē̠ta-ñcha̍turvigṃśatirā̠tra-ma̍paśya̠-ttamā-‘ha̍ra̠-ttēnā̍yajata̠ tatō̠ vai tasmai̠ śraddē̠vā ada̍dha̠tāga̍chCha-tpurō̠dhāṃ ya ē̠vaṃ vi̠dvāgṃsa̍-śchaturvigṃśatirā̠tra-māsa̍tē̠ śradē̎bhyō manu̠ṣyā̍ dadhatē̠ gachCha̍nti purō̠dhā-ñjyōti̠rgaurāyu̠riti̍ trya̠hā bha̍vantī̠yaṃ vāva jyōti̍ra̠ntari̍kṣa̠-ṅgaura̠sā-vāyu̍- [-vāyu̍ḥ, i̠mānē̠va] 1
-ri̠mānē̠va lō̠kāna̠bhyārō̍hantyabhi pū̠rva-ntrya̠hā bha̍vantyabhipū̠rvamē̠va su̍va̠rgaṃ lō̠kama̠bhyārō̍ha̠ntyasa̍tra̠ṃ vā ē̠ta-dyada̍Chandō̠maṃ yachCha̍ndō̠mā bhava̍nti̠ tēna̍ sa̠tra-ndē̠vatā̍ ē̠va pṛ̠ṣṭhairava̍ rundhatē pa̠śūñCha̍ndō̠mairōjō̠ vai vī̠rya̍-mpṛ̠ṣṭhāni̍ pa̠śava̍-śChandō̠mā ōja̍syē̠va vī̠ryē̍ pa̠śuṣu̠ prati̍ tiṣṭhanti bṛha-drathanta̠rābhyā̎ṃ yantī̠yaṃ vāva ra̍thanta̠rama̠sau bṛ̠hadā̠bhyāmē̠va [ ] 2
ya̠ntyathō̍ a̠nayō̍rē̠va prati̍ tiṣṭhantyē̠tē vai ya̠jñasyā̎mja̠sāya̍nī sru̠tī tābhyā̍mē̠va su̍va̠rgaṃ lō̠kaṃ ya̍nti chaturvigṃśatirā̠trō bha̍vati̠ chatu̍rvigṃśatirardhamā̠sā-ssa̍ṃvathsa̠ra-ssa̍ṃvathsa̠ra-ssu̍va̠rgō lō̠ka-ssa̍ṃvathsa̠ra ē̠va su̍va̠rgē lō̠kē prati̍ tiṣṭha̠ntyathō̠ chatu̍rvigṃśatyakṣarā gāya̠trī gā̍ya̠trī bra̍hmavarcha̠sa-ṅgā̍yatri̠yaiva bra̍hmavarcha̠samava̍ rundhatē ‘tirā̠trāva̠bhitō̍ bhavatō brahmavarcha̠sasya̠ pari̍gṛhītyai ॥ 3 ॥
(a̠sāvāyu̍ – rā̠bhyāmē̠va – pañcha̍chatvārigṃśachcha) (a. 1)
yathā̠ vai ma̍nu̠ṣyā̍ ē̠va-ndē̠vā agra̍ āsa̠-ntē̍-‘kāmaya̠ntā-‘va̍rti-mpā̠pmāna̍-mmṛ̠tyu-ma̍pa̠hatya̠ daivīgṃ̍ sa̠gṃ̠sada̍-ṅgachChē̠mēti̠ ta ē̠ta-ñcha̍turvigṃśatirā̠tra-ma̍paśya̠-ntamā-‘ha̍ra̠-ntēnā̍yajanta̠ tatō̠ vai tē-‘va̍rti-mpā̠pmāna̍-mmṛ̠tyu-ma̍pa̠hatya̠ daivīgṃ̍ sa̠gṃ̠sada̍magachCha̠n̠. ya ē̠vaṃ vi̠dvāgṃsa̍-śchaturvigṃśatirā̠tra-māsa̠tē-‘va̍rtimē̠va pā̠pmāna̍-mapa̠hatya̠ śriya̍-ṅgachChanti̠ śrīrhi ma̍nu̠ṣya̍sya̠ [śrīrhi ma̍nu̠ṣya̍sya, daivī̍ sa̠gṃ̠sa-jjyōti̍-] 4
daivī̍ sa̠gṃ̠sa-jjyōti̍-ratirā̠trō bha̍vati suva̠rgasya̍ lō̠kasyānu̍khyātyai̠ pṛṣṭhya̍-ṣṣaḍa̠hō bha̍vati̠ ṣa-ḍvā ṛ̠tava̍-ssaṃvathsa̠rasta-mmāsā̍ ardhamā̠sā ṛ̠tava̍ḥ pra̠viśya̠ daivīgṃ̍ sa̠gṃ̠sada̍magachCha̠n̠. ya ē̠vaṃ vi̠dvāgṃsa̍-śchaturvigṃśatirā̠tramāsa̍tē saṃvathsa̠ramē̠va pra̠viśya̠ vasya̍sīgṃ sa̠gṃ̠sada̍-ṅgachChanti̠ traya̍strayastri̠gṃ̠śā a̠vastā̎-dbhavanti̠ traya̍strayastri̠gṃ̠śāḥ pa̠rastā̎-ttrayastri̠gṃ̠śairē̠vōbha̠yatō ‘va̍rti-mpā̠pmāna̍mapa̠hatya̠ daivīgṃ̍ sa̠gṃ̠sada̍-mmaddhya̠tō [sa̠gṃ̠sada̍-mmaddhya̠taḥ, ga̠chCha̠nti̠ pṛ̠ṣṭhāni̠ hi] 5
ga̍chChanti pṛ̠ṣṭhāni̠ hi daivī̍ sa̠gṃ̠sajjā̠mi vā ē̠ta-tku̍rvanti̠ ya-ttraya̍strayastri̠gṃ̠śā a̠nvañchō̠ maddhyē-‘ni̍ruktō bhavati̠ tēnājā̎myū̠rdhvāni̍ pṛ̠ṣṭhāni̍ bhavantyū̠rdhvā-śCha̍ndō̠mā u̠bhābhyāgṃ̍ rū̠pābhyāgṃ̍ suva̠rgaṃ lō̠kaṃ ya̠ntyasa̍tra̠ṃ vā ē̠ta-dyada̍Chandō̠maṃ yachCha̍ndō̠mā bhava̍nti̠ tēna̍ sa̠tra-ndē̠vatā̍ ē̠va pṛ̠ṣṭhairava̍ rundhatē pa̠śūñCha̍ndō̠mairōjō̠ vai vī̠rya̍-mpṛ̠ṣṭhāni̍ pa̠śava̍- [pa̠śava̍ḥ, Cha̠ndō̠mā ōja̍syē̠va] 6
-śChandō̠mā ōja̍syē̠va vī̠ryē̍ pa̠śuṣu̠ prati̍ tiṣṭhanti̠ traya̍strayastri̠gṃ̠śā a̠vastā̎-dbhavanti̠ traya̍strayastri̠gṃ̠śāḥ pa̠rastā̠nmaddhyē̍ pṛ̠ṣṭhānyurō̠ vai tra̍yastri̠gṃ̠śā ā̠tmā pṛ̠ṣṭhānyā̠tmana̍ ē̠va ta-dyaja̍mānā̠-śśarma̍ nahya̠ntē-‘nā̎rtyai bṛha-drathanta̠rābhyā̎ṃ yantī̠yaṃ vāva ra̍thanta̠rama̠sau bṛ̠hadā̠bhyāmē̠va ya̠ntyathō̍ a̠nayō̍rē̠va prati̍ tiṣṭhantyē̠tē vai ya̠jñasyā̎mja̠sāya̍nī sru̠tī tābhyā̍mē̠va [tābhyā̍mē̠va, su̠va̠rgaṃ lō̠kaṃ ya̍nti̠] 7
su̍va̠rgaṃ lō̠kaṃ ya̍nti̠ parā̎mchō̠ vā ē̠tē su̍va̠rgaṃ lō̠kama̠bhyārō̍hanti̠ yē pa̍rā̠chīnā̍ni pṛ̠ṣṭhānyu̍pa̠yanti̍ pra̠tyaṃ ṣa̍ḍa̠hō bha̍vati pra̠tyava̍rūḍhyā̠ athō̠ prati̍ṣṭhityā u̠bhayō̎rlō̠kayōra̍ ṛ̠ddhvō-tti̍ṣṭhanti tri̠vṛtō-‘dhi̍ tri̠vṛta̠mupa̍ yanti̠ stōmā̍nā̠gṃ̠ sampa̍ttyai prabha̠vāya̠ jyōti̍ragniṣṭō̠mō bha̍vatya̠yaṃ vāva sa kṣayō̠-‘smādē̠va tēna̠ kṣayā̠nna ya̍nti chaturvigṃśatirā̠trō bha̍vati̠ chatu̍rvigṃśatirardhamā̠sā-ssa̍ṃvathsa̠ra-ssa̍ṃvathsa̠ra-ssu̍va̠rgō lō̠ka-ssa̍ṃvathsa̠ra ē̠va su̍va̠rgē lō̠kē prati̍ tiṣṭha̠ntyathō̠ chatu̍rvigṃśatyakṣarā gāya̠trī gā̍ya̠trī bra̍hmavarcha̠sa-ṅgā̍yatri̠yaiva bra̍hmavarcha̠samava̍ rundhatē ‘tirā̠trāva̠bhitō̍ bhavatō brahmavarcha̠sasya̠ pari̍gṛhītyai ॥ 8 ॥
(ma̠nu̠ṣya̍sya – madhya̠taḥ – pa̠śava̠ – stābhyā̍mē̠va – sa̍ṃvathsa̠ra – śchatu̍rvigṃśatiścha) (a. 2)
ṛ̠kṣā vā i̠yama̍lō̠makā̍-”sī̠-thsā-‘kā̍maya̠tauṣa̍dhībhi̠-rvana̠spati̍bhi̠ḥ pra jā̍yē̠yēti̠ saitāstri̠gṃ̠śata̠gṃ̠ rātrī̍rapaśya̠-ttatō̠ vā i̠yamōṣa̍dhībhi̠-rvana̠spati̍bhi̠ḥ prājā̍yata̠ yē pra̠jākā̍māḥ pa̠śukā̍mā̠-ssyusta ē̠tā ā̍sīra̠-npraiva jā̍yantē pra̠jayā̍ pa̠śubhi̍ri̠yaṃ vā a̍kṣuddhya̠-thsaitāṃ vi̠rāja̍mapaśya̠-ttāmā̠tma-ndhi̠tvā-‘nnādya̠mavā̍ ‘ru̠ndhauṣa̍dhī̠- [-‘ru̠ndhauṣa̍dhīḥ, vana̠spatī̎-npra̠jā-] 9
-rvana̠spatī̎-npra̠jā-mpa̠śū-ntēnā̍vardhata̠ sā jē̠māna̍-mmahi̠māna̍-magachCha̠dya ē̠vaṃ vi̠dvāgṃsa̍ ē̠tā āsa̍tē vi̠rāja̍mē̠vā-”tma-ndhi̠tvā-‘nnādya̠mava̍ rundhatē̠ vardha̍ntē pra̠jayā̍ pa̠śubhi̍rjē̠māna̍-mmahi̠māna̍-ṅgachChanti̠ jyōti̍ratirā̠trō bha̍vati suva̠rgasya̍ lō̠kasyānu̍khyātyai̠ pṛṣṭhya̍-ṣṣaḍa̠hō bha̍vati̠ ṣa-ḍvā ṛ̠tava̠-ṣṣaṭ pṛ̠ṣṭhāni̍ pṛ̠ṣṭhairē̠vartūna̠nvā-rō̍hantyṛ̠tubhi̍-ssaṃvathsa̠ra-ntē sa̍ṃvathsa̠ra ē̠va [ ] 10
prati̍ tiṣṭhanti trayastri̠gṃ̠śā-ttra̍yastri̠gṃ̠śamupa̍ yanti ya̠jñasya̠ santa̍tyā̠ athō̎ pra̠jāpa̍ti̠rvai tra̍yastri̠gṃ̠śaḥ pra̠jāpa̍timē̠vā-”ra̍bhantē̠ prati̍ṣṭhityai triṇa̠vō bha̍vati̠ viji̍tyā ēkavi̠gṃ̠śō bha̍vati̠ prati̍ṣṭhityā̠ athō̠ rucha̍mē̠vā-”tma-nda̍dhatē tri̠vṛda̍gni̠ṣṭu-dbha̍vati pā̠pmāna̍mē̠va tēna̠ nirda̍ha̠ntē-‘thō̠ tējō̠ vai tri̠vṛ-ttēja̍ ē̠vā-”tma-nda̍dhatē pañchada̠śa i̍ndrastō̠mō bha̍vatīndri̠ya-mē̠vā-‘va̍ [bha̍vatīndri̠ya-mē̠vā-‘va̍, ru̠ndha̠tē̠ sa̠pta̠da̠śō bha̍vatya̠nnādya̠syā] 11
rundhatē saptada̠śō bha̍vatya̠nnādya̠syā va̍ruddhyā̠ athō̠ praiva tēna̍ jāyanta ēkavi̠gṃ̠śō bha̍vati̠ prati̍ṣṭhityā̠ athō̠ rucha̍mē̠vā-”tma-nda̍dhatē chaturvi̠gṃ̠śō bha̍vati̠ atu̍rvigṃśatirardhamā̠sā-ssa̍ṃvathsa̠ra-ssa̍ṃvathsa̠ra-ssu̍va̠rgō lō̠ka-ssa̍ṃvathsa̠ra ē̠va su̍va̠rgē lō̠kē prati̍ tiṣṭha̠ntyathō̍ ē̠ṣa vai vi̍ṣū̠vān vi̍ṣū̠vantō̍ bhavanti̠ ya ē̠vaṃ vi̠dvāgṃsa̍ ē̠tā āsa̍tē chaturvi̠gṃ̠śā-tpṛ̠ṣṭhānyupa̍ yanti saṃvathsa̠ra ē̠va pra̍ti̠ṣṭhāya̍ [ ] 12
dē̠vatā̍ a̠bhyārō̍hanti trayastri̠gṃ̠śā-ttra̍yastri̠gṃ̠śamupa̍ yanti̠ traya̍strigṃśa̠dvai dē̠vatā̍ dē̠vatā̎svē̠va prati̍ tiṣṭhanti triṇa̠vō bha̍vatī̠mē vai lō̠kāstri̍ṇa̠va ē̠ṣvē̍va lō̠kēṣu̠ prati̍ tiṣṭhanti̠ dvāvē̍kavi̠gṃ̠śau bha̍vata̠ḥ prati̍ṣṭhityā̠ athō̠ rucha̍mē̠vā-”tma-nda̍dhatē ba̠hava̍-ṣṣōḍa̠śinō̍ bhavanti̠ tasmā̎-dba̠hava̍ḥ pra̠jāsu̠ vṛṣā̍ṇō̠ yadē̠tē stōmā̠ vyati̍ṣaktā̠ bhava̍nti̠ tasmā̍di̠ya -mōṣa̍dhībhi̠-rvana̠spati̍bhi̠-rvyati̍ṣaktā̠ [-rvyati̍ṣaktā, vyati̍ṣajyantē] 13
vyati̍ṣajyantē pra̠jayā̍ pa̠śubhi̠rya ē̠vaṃ vi̠dvāgṃsa̍ ē̠tā āsa̠tē ‘kLi̍ptā̠ vā ē̠tē su̍va̠rgaṃ lō̠kaṃ ya̍ntyuchchāva̠chān hi stōmā̍nupa̠yanti̠ yadē̠ta ū̠rdhvāḥ kLi̠ptā-sstōmā̠ bhava̍nti kLi̠ptā ē̠va su̍va̠rgaṃ lō̠kaṃ ya̍ntyu̠bhayō̍rē̠bhyō lō̠kayō̎ḥ kalpatē tri̠gṃ̠śadē̠tāstri̠gṃ̠śada̍kṣarā vi̠rāḍanna̍ṃ vi̠rā-ḍvi̠rājai̠vānnādya̠mava̍ rundhatē ‘tirā̠trāva̠bhitō̍ bhavatō̠ ‘nnādya̍sya̠ pari̍gṛhītyai ॥ 14 ॥
(ōṣa̍dhīḥ – saṃvathsa̠ra ē̠vā – ‘va̍ – prati̠ṣṭhāya̠ – vyati̍ṣa̠ktyai – kā̠nnapa̍ñchā̠śachcha̍) (a. 3)
pra̠jāpa̍ti-ssuva̠rgaṃ lō̠kamai̠-tta-ndē̠vā yēna̍yēna̠ Chanda̠sā-‘nu̠ prāyu̍ñjata̠ tēna̠ nā-”pnu̍va̠-nta ē̠tā dvātrigṃ̍śata̠gṃ̠ rātrī̍rapaśya̠-ndvātrigṃ̍śadakṣarā ‘nu̠ṣṭugā-nu̍ṣṭubhaḥ pra̠jāpa̍ti̠-ssvēnai̠va Chanda̍sā pra̠jāpa̍ti-mā̠ptvā ‘bhyā̠ruhya̍ suva̠rgaṃ lō̠kamā̍ya̠n̠. ya ē̠vaṃ vi̠dvāgṃsa̍ ē̠tā āsa̍tē̠ dvātrigṃ̍śadē̠tā dvātrigṃ̍śadakṣarā ‘nu̠ṣṭugā-nu̍ṣṭubhaḥ pra̠jāpa̍ti̠-ssvēnai̠va Chanda̍sā pra̠jāpa̍timā̠ptvā śriya̍-ṅgachChanti̠ [śriya̍-ṅgachChanti, śrīrhi] 15
śrīrhi ma̍nu̠ṣya̍sya suva̠rgō lō̠kō dvātrigṃ̍śadē̠tā dvātrigṃ̍śadakṣarā-‘nu̠ṣṭug-vāga̍nu̠ṣṭu-phsarvā̍mē̠va vācha̍māpnuvanti̠ sarvē̍ vā̠chō va̍di̠tārō̍ bhavanti̠ sarvē̠ hi śriya̠-ṅgachCha̍nti̠ jyōti̠rgaurāyu̠riti̍ trya̠hā bha̍vantī̠yaṃ vāva jyōti̍ra̠ntari̍kṣa̠-ṅgaura̠sāvāyu̍ri̠mānē̠va lō̠kāna̠bhyārō̍hantyabhipū̠rva-ntrya̠hā bha̍vantyabhipū̠rvamē̠va su̍va̠rgaṃ lō̠kama̠bhyārō̍hanti bṛha-drathanta̠rābhyā̎ṃ yantī̠- [-~ṃyanti, i̠yaṃ vāva] 16
-yaṃ vāva ra̍thanta̠rama̠sau bṛ̠hadā̠bhyāmē̠va ya̠ntyathō̍ a̠nayō̍rē̠va prati̍ tiṣṭhantyē̠tē vai ya̠jñasyā̎mja̠sāya̍nī sru̠tī tābhyā̍mē̠va su̍va̠rgaṃ lō̠kaṃ ya̍nti̠ parā̎mchō̠ vā ē̠tē su̍va̠rgaṃ lō̠kama̠bhyārō̍hanti̠ yē parā̍chastrya̠hānu̍pa̠yanti̍ pra̠tya-ntrya̠hō bha̍vati pra̠tyava̍rūḍhyā̠ athō̠ prati̍ṣṭhityā u̠bhayō̎rlō̠kayōr̍. ṛ̠ddhvō-tti̍ṣṭhanti̠ dvātrigṃ̍śadē̠tāstāsā̠ṃ yā stri̠gṃ̠śa-ttri̠gṃ̠śada̍kṣarā vi̠rāḍanna̍ṃ vi̠rā-ḍvi̠rājai̠vā-‘nnādya̠mava̍ rundhatē̠ yē dvē a̍hōrā̠trē ē̠va tē u̠bhābhyāgṃ̍ rū̠pābhyāgṃ̍ suva̠rgaṃ lō̠kaṃ ya̍ntyatirā̠trāva̠bhitō̍ bhavata̠ḥ pari̍gṛhītyai ॥ 17 ॥
(ga̠chCha̠nti̠ – ya̠nti̠ – tri̠gṃ̠śada̍kṣarā̠ – dvāvigṃ̍śatiścha) (a. 4)
dvē vāva dē̍vasa̠trē dvā̍daśā̠haśchai̠va tra̍yastrigṃśada̠haścha̠ ya ē̠vaṃ vi̠dvāgṃsa̍strayastrigṃśada̠hamāsa̍tē sā̠kṣādē̠va dē̠vatā̍ a̠bhyārō̍hanti̠ yathā̠ khalu̠ vai śrēyā̍na̠bhyārū̍ḍhaḥ kā̠maya̍tē̠ tathā̍ karōti̠ yadya̍va̠viddhya̍ti̠ pāpī̍yā-nbhavati̠ yadi̠ nāva̠viddhya̍ti sa̠dṛṃ ya ē̠vaṃ vi̠dvāgṃsa̍strayastrigṃ- śada̠hamāsa̍tē̠ vi pā̠pmanā̠ bhrātṛ̍vyē̠ṇā-” va̍rtantē ‘ha̠rbhājō̠ vā ē̠tā dē̠vā agra̠ ā-‘ha̍ra̠- [ā-‘ha̍rann, aha̠rēkō ‘bha̍ja̠tā-] 18
-nnaha̠rēkō ‘bha̍ja̠tā-ha̠rēka̠stābhi̠rvaitē pra̠bāhu̍gārdhnuva̠n̠. ya ē̠vaṃ vi̠dvāgṃsa̍strayastrigṃśada̠hamāsa̍tē̠ sarva̍ ē̠va pra̠bāhu̍gṛddhnuvanti̠ sarvē̠ grāma̍ṇīya̠-mprāpnu̍vanti pañchā̠hā bha̍vanti̠ pañcha̠ vā ṛ̠tava̍-ssaṃvathsa̠ra ṛ̠tuṣvē̠va sa̍ṃvathsa̠rē prati̍ tiṣṭha̠ntyathō̠ pañchā̎kṣarā pa̠ṅktiḥ pāṅktō̍ ya̠jñō ya̠jñamē̠vāva̍ rundhatē̠ trīṇyā̎śvi̠nāni̍ bhavanti̠ traya̍ i̠mē lō̠kā ē̠- [i̠mē lō̠kā ē̠ṣu, ē̠va lō̠kēṣu̠ prati̍] 19
-ṣvē̍va lō̠kēṣu̠ prati̍ tiṣṭha̠ntyathō̠ trīṇi̠ vai ya̠jñasyē̎mdri̠yāṇi̠ tānyē̠vāva̍ rundhatē viśva̠ji-dbha̍vatya̠nnādya̠syā va̍ruddhyai̠ sarva̍pṛṣṭhō bhavati̠ sarva̍syā̠bhiji̍tyai̠ vāgvai dvā̍daśā̠hō ya-tpu̠rastā̎-ddvādaśā̠ha-mu̍pē̠yuranā̎ptā̠ṃ vācha̠-mupē̍yu-rupa̠dāsu̍kaiṣā̠ṃ vā-khsyā̍-du̠pari̍ṣṭā-ddvādaśā̠hamupa̍ yantyā̠ptāmē̠va vācha̠mupa̍ yanti̠ tasmā̍-du̠pari̍ṣṭā-dvā̠chā va̍dāmō ‘vānta̠raṃ- [va̍dāmō ‘vānta̠ram, vai da̍śarā̠trēṇa̍] 20
-~ṃvai da̍śarā̠trēṇa̍ pra̠jāpa̍tiḥ pra̠jā a̍sṛjata̠ ya-dda̍śarā̠trō bhava̍ti pra̠jā ē̠va ta-dyaja̍mānā-ssṛjanta ē̠tāgṃ ha̠ vā u̍da̠ṅka-śśau̎lbāya̠na-ssa̠trasyardhi̍muvācha̠ ya-dda̍śarā̠trō ya-dda̍śarā̠trō bhava̍ti sa̠trasyardhyā̠ athō̠ yadē̠va pūrvē̠ṣvaha̍ssu̠ vilō̍ma kri̠yatē̠ tasyai̠vaiṣā śānti̍drvyanī̠kā vā ē̠tā rātra̍yō̠ yaja̍mānā viśva̠ji-thsa̠hāti̍rā̠trēṇa̠ pūrvā̠-ṣṣōḍa̍śa sa̠hā ti̍rā̠trēṇōtta̍rā̠-ṣṣōḍa̍śa̠ ya ē̠vaṃ vi̠dvāgṃsa̍strayastrigṃśada̠hamāsa̍ta̠ aiṣā̎-ndvyanī̠kā pra̠jā jā̍yatē ‘tirā̠trāva̠bhitō̍ bhavata̠ḥ pari̍gṛhītyai ॥ 21 ॥
(a̠ha̠ra̠- nnē̠ṣva̍ – vānta̠ragṃ – ṣōḍa̍śa sa̠ha – sa̠ptada̍śa cha) (a. 5)
ā̠di̠tyā a̍kāmayanta suva̠rgaṃ lō̠kami̍yā̠mēti̠ tē su̍va̠rgaṃ lō̠ka-nna prājā̍na̠nna su̍va̠rgaṃ lō̠kamā̍ya̠-nta ē̠tagṃ ṣa̍ṭtrigṃśadrā̠tra-ma̍paśya̠-ntamā-‘ha̍ra̠-ntēnā̍yajanta̠ tatō̠ vai tē su̍va̠rgaṃ lō̠ka-mprājā̍nan-thsuva̠rgaṃ lō̠kamā̍ya̠n̠. ya ē̠vaṃ vi̠dvāgṃsa̍-ṣṣaṭtrigṃśa-drā̠tramāsa̍tē suva̠rgamē̠va lōka-mpra jā̍nanti suva̠rgaṃ lō̠kaṃ ya̍nti̠ jyōti̍-ratirā̠trō [jyōti̍-ratirā̠traḥ, bha̠va̠ti̠ jyōti̍rē̠va] 22
bha̍vati̠ jyōti̍rē̠va pu̠rastā̎-ddadhatē suva̠rgasya̍ lō̠kasyānu̍khyātyai ṣaḍa̠hā bha̍vanti̠ ṣa-ḍvā ṛ̠tava̍ ṛ̠tuṣvē̠va prati̍ tiṣṭhanti cha̠tvārō̍ bhavanti̠ chata̍srō̠ diśō̍ di̠kṣvē̍va prati̍ tiṣṭha̠ntyasa̍tra̠ṃ vā ē̠ta-dyada̍Chandō̠maṃ yachCha̍ndō̠mā bhava̍nti̠ tēna̍ sa̠tra-ndē̠vatā̍ ē̠va pṛ̠ṣṭhairava̍ rundhatē pa̠śūñCha̍ndō̠mairōjō̠ vai vī̠rya̍-mpṛ̠ṣṭhāni̍ pa̠śava̍-śChandō̠mā ōja̍syē̠va [ ] 23
vī̠ryē̍ pa̠śuṣu̠ prati̍ tiṣṭhanti ṣaṭ-trigṃśa-drā̠trō bha̍vati̠ ṣaṭtrigṃ̍śadakṣarā bṛha̠tī bārha̍tāḥ pa̠śavō̍ bṛha̠tyaiva pa̠śūnava̍ rundhatē bṛha̠tī Chanda̍sā̠g̠ svārā̎jyamāśñutā-śñu̠vatē̠ svārā̎jya̠ṃ ya ē̠vaṃ vi̠dvāgṃsa̍-ṣṣaṭtrigṃśa-drā̠tramāsa̍tē suva̠rgamē̠va lō̠kaṃ ya̍ntyatirā̠trāva̠bhitō̍ bhavata-ssuva̠rgasya̍ lō̠kasya̠ pari̍gṛhītyai ॥ 24 ॥
(a̠ti̠rā̠tra – ōja̍syē̠va – ṣaṭtrigṃ̍śachcha) (a. 6)
vasi̍ṣṭhō ha̠tapu̍trō-‘kāmayata vi̠ndēya̍ pra̠jāma̠bhi sā̍dā̠sā-nbha̍vēya̠miti̠ sa ē̠tamē̍kasmā-nnapañchā̠śa-ma̍paśya̠-ttamā-‘ha̍ra̠-ttēnā̍yajata̠ tatō̠ vai sō-‘vi̍ndata pra̠jāma̠bhi sau̍dā̠sāna̍bhava̠dya ē̠vaṃ vi̠dvāgṃsa̍ ēkasmā-nnapañchā̠śamāsa̍tē vi̠ndantē̎ pra̠jāma̠bhi bhrātṛ̍vyā-nbhavanti̠ traya̍stri̠vṛtō̎-‘gniṣṭō̠mā bha̍vanti̠ vajra̍syai̠va mukha̠gṃ̠ sagg śya̍nti̠ daśa̍ pañchada̠śā bha̍vanti pañchada̠śō vajrō̠ [vajra̍ḥ, vajra̍mē̠va] 25
vajra̍mē̠va bhrātṛ̍vyēbhya̠ḥ pra ha̍ranti ṣōḍaśi̠ma̍-ddaśa̠mamaha̍-rbhavati̠ vajra̍ ē̠va vī̠rya̍-ndadhati̠ dvāda̍śa saptada̠śā bha̍vantya̠nnādya̠syā va̍ruddhyā̠ athō̠ praiva tairjā̍yantē̠ pṛṣṭhya̍-ṣṣaḍa̠hō bha̍vati̠ ṣaḍvā ṛ̠tava̠-ṣṣaṭ pṛ̠ṣṭhāni̍ pṛ̠ṣṭhairē̠vartūna̠nvārō̍hantyṛ̠tṛbhi̍-ssaṃvathsa̠ra-ntē sa̍ṃvathsa̠ra ē̠va prati̍ tiṣṭhanti̠ dvāda̍śaikavi̠gṃ̠śā bha̍vanti̠ prati̍ṣṭhityā̠ athō̠ rucha̍mē̠vā-”tma- [rucha̍mē̠vā-”tmann, da̠dha̠tē̠ ba̠hava̍-ṣṣōḍa̠śinō̍] 26
-nda̍dhatē ba̠hava̍-ṣṣōḍa̠śinō̍ bhavanti̠ viji̍tyai̠ ṣaḍā̎śvi̠nāni̍ bhavanti̠ ṣaḍvā ṛ̠tava̍ ṛ̠tuṣvē̠va prati̍ tiṣṭhantyūnātiri̠ktā vā ē̠tā rātra̍ya ū̠nāsta-dyadēka̍syai̠ na pa̍ñchā̠śada-ti̍riktā̠sta-dya-dbhūya̍sī-ra̠ṣṭācha̍tvārigṃśata ū̠nāchcha̠ khalu̠ vā ati̍riktāchcha pra̠jāpa̍ti̠ḥ prājā̍yata̠ yē pra̠jākā̍māḥ pa̠śukā̍mā̠-ssyusta ē̠tā ā̍sīra̠-npraiva jā̍yantē pra̠jayā̍ pa̠śubhi̍rvairā̠jō vā ē̠ṣa ya̠jñō yadē̍kasmā-nnapañchā̠śō ya ē̠vaṃ vi̠dvāgṃsa̍ ēkasmā-nnapañchā̠śamāsa̍tē vi̠rāja̍mē̠va ga̍chChantyannā̠dā bha̍vantyati-rā̠trāva̠bhitō̍ bhavatō̠-‘nnādya̍sya̠ pari̍gṛhītyai ॥ 27 ॥
(vajra̍ – ā̠tman – pra̠jayā̠ – dvāvigṃ̍śatiścha) (a. 7)
sa̠ṃva̠thsa̠rāya̍ dīkṣi̠ṣyamā̍ṇā ēkāṣṭa̠kāyā̎-ndīkṣērannē̠ṣā vai sa̍ṃvathsa̠rasya̠ patnī̠ yadē̍kāṣṭa̠kaitasyā̠ṃ vā ē̠ṣa ē̠tāgṃ rātri̍ṃ vasati sā̠kṣādē̠va sa̍ṃvathsa̠ramā̠rabhya̍ dīkṣanta̠ ārta̠ṃ vā ē̠tē sa̍ṃvathsa̠rasyā̠bhi dī̎kṣantē̠ ya ē̍kāṣṭa̠kāyā̠-ndīkṣa̠ntē ‘nta̍nāmānāvṛ̠tū bha̍vatō̠ vya̍sta̠ṃ vā ē̠tē sa̍ṃvathsa̠rasyā̠-‘bhi dī̎kṣantē̠ ya ē̍kāṣṭa̠kāyā̠-ndīkṣa̠ntē-‘nta̍nāmānāvṛ̠tū bha̍vataḥ phalgunī pūrṇamā̠sē dī̎kṣēra̠-nmukha̠ṃ vā ē̠ta- [ē̠tat, sa̠ṃva̠thsa̠rasya̠ ya-tpha̍lgunī-] 28
-thsa̍ṃvathsa̠rasya̠ ya-tpha̍lgunī-pūrṇamā̠sō mu̍kha̠ta ē̠va sa̍ṃvathsa̠ramā̠rabhya̍ dīkṣantē̠ tasyaikai̠va ni̠ryā ya-thsāmmē̎ghyē viṣū̠vān-thsa̠pandya̍tē chitrāpūrṇamā̠sē dī̎kṣēra̠-nmukha̠ṃ vā ē̠ta-thsa̍ṃvathsa̠rasya̠ yachchi̍trāpūrṇamā̠sō mu̍kha̠ta ē̠va sa̍ṃvathsa̠ramā̠rabhya̍ dīkṣantē̠ tasya̠ na kā cha̠na ni̠ryā bha̍vati chatura̠hē pu̠rastā̎-tpaurṇamā̠syai dī̎kṣēra̠-ntēṣā̍mēkāṣṭa̠kāyā̎-ṅkra̠ya-ssa-mpa̍dyatē̠ tēnai̍kāṣṭa̠kā-nna Cha̠mba-ṭku̍rvanti̠ tēṣā̎- [tēṣā̎m, pū̠rva̠pa̠kṣē su̠tyā] 29
-mpūrvapa̠kṣē su̠tyā sa-mpa̍dyatē pūrvapa̠kṣa-mmāsā̍ a̠bhi sa-mpa̍dyantē̠ tē pū̎rvapa̠kṣa u-tti̍ṣṭhanti̠ tānu̠ttiṣṭha̍ta̠ ōṣa̍dhayō̠ vana̠spata̠yō-‘nū-tti̍ṣṭhanti̠ tān ka̍lyā̠ṇī kī̠rtiranū-tti̍ṣṭha̠tyarā̎-thsuri̠mē yaja̍mānā̠ iti̠ tadanu̠ sarvē̍ rāddhnuvanti ॥ 30 ॥
(ē̠ta – chCha̠baṇṭku̍rvanti̠ tēṣā̠ṃ – chatu̍strigṃśachcha) (a. 8)
su̠va̠rgaṃ vā ē̠tē lō̠kaṃ ya̍nti̠ yē sa̠tramu̍pa̠yantya̠bhīndha̍ta ē̠va dī̠kṣābhi̍rā̠tmānagg̍ śrapayanta upa̠sadbhi̠-rdvābhyā̠ṃ lōmāva̍ dyanti̠ dvābhyā̠-ntvacha̠-ndvābhyā̠masṛ̠-ddvābhyā̎-mmā̠gṃ̠sa-ndvābhyā̠masthi̠ dvābhyā̎-mma̠jjāna̍mā̠tmada̍kṣiṇa̠ṃ vai sa̠tramā̠tmāna̍mē̠va dakṣi̍ṇā-nnī̠tvā su̍va̠rgaṃ lō̠kaṃ ya̍nti̠ śikhā̠manu̠ pra va̍panta̠ ṛddhyā̠ athō̠ raghī̍yāgṃsa-ssuva̠rgaṃ lō̠kama̍yā̠mēti̍ ॥ 31 ॥
(su̠va̠rgaṃ – pa̍ñchā̠śat) (a. 9)
bra̠hma̠vā̠dinō̍ vadantyatirā̠traḥ pa̍ra̠mō ya̍jñakratū̠nā-ṅkasmā̠-tta-mpra̍tha̠mamupa̍ ya̠ntītyē̠tadvā a̍gniṣṭō̠ma-mpra̍tha̠mamupa̍ ya̠ntyathō̠kthya̍matha̍ ṣōḍa̠śina̠-mathā̍tirā̠tra-ma̍nupū̠rvamē̠vaita-dya̍jñakra̠tūnu̠pētya̠ tānā̠labhya̍ pari̠gṛhya̠ sōma̍mē̠vaita-tpiba̍nta āsatē̠ jyōti̍ṣṭōma-mpratha̠mamupa̍ yanti̠ jyōti̍ṣṭōmō̠ vai stōmā̍nā̠-mmukha̍-mmukha̠ta ē̠va stōmā̠-npra yu̍ñjatē̠ tē [ ] 32
saggstu̍tā vi̠rāja̍ma̠bhi sa-mpa̍dyantē̠ dvē charchā̠vati̍ richyētē̠ ēka̍yā̠ gaurati̍rikta̠ ēka̠yā-”yu̍rū̠na-ssu̍va̠rgō vai lō̠kō jyōti̠rūrg-vi̠rāṭ-thsu̍va̠rgamē̠va tēna̍ lō̠kaṃ ya̍nti rathanta̠ra-ndivā̠ bhava̍ti rathanta̠ra-nnakta̠mityā̍hu-rbrahmavā̠dina̠ḥ kēna̠ tadajā̠mīti̍ saubha̠ra-ntṛ̍tīyasava̠nē bra̍hmasā̠ma-mbṛ̠ha-ttanma̍ddhya̠tō da̍dhati̠ vidhṛ̍tyai̠ tēnājā̍mi ॥ 33 ॥
(ta – ēkā̠nnapa̍ñchā̠śachcha̍) (a. 10)
jyōti̍ṣṭōma-mpratha̠mamupa̍ yantya̠sminnē̠va tēna̍ lō̠kē prati̍ tiṣṭhanti̠ gōṣṭō̍ma-ndvi̠tīya̠mupa̍ yantya̠ntari̍kṣa ē̠va tēna̠ prati̍ tiṣṭha̠ntyāyu̍ṣṭōma-ntṛ̠tīya̠mupa̍ yantya̠muṣmi̍nnē̠va tēna̍ lō̠kē prati̍ tiṣṭhantī̠yaṃ vāva jyōti̍ra̠ntari̍kṣa̠-ṅgaura̠sāvāyu̠-ryadē̠tān-thstōmā̍-nupa̠yantyē̠ṣvē̍va tallō̠kēṣu̍ sa̠triṇa̍ḥ prati̠ tiṣṭha̍ntō yanti̠ tē saggstu̍tā vi̠rāja̍- [vi̠rāja̎m, a̠bhi sampa̍dyantē̠ dvē] 34
-ma̠bhi sampa̍dyantē̠ dvē charchā̠vati̍ richyētē̠ ēka̍yā̠ gaurati̍rikta̠ ēka̠yā-”yu̍rū̠na-ssu̍va̠rgō vai lō̠kō jyōti̠rūrg-vi̠rāḍūrja̍-mē̠vāva̍ rundhatē̠ tē na kṣu̠dhā ”rti̠mārchCha̠ntyakṣō̍dhukā bhavanti̠ kṣu-thsa̍bāndhā iva̠ hi sa̠triṇō̎ ‘gniṣṭō̠māva̠bhita̍ḥ pra̠dhī tāvu̠kthyā̍ maddhyē̠ nabhya̠-nta-ttadē̠ta-tpa̍ri̠ya-ddē̍vacha̠kraṃ yadē̠tēna̍ [-~ṃyadē̠tēna̍, ṣa̠ḍa̠hēna̠ yanti̍] 35
ṣaḍa̠hēna̠ yanti̍ dēvacha̠kramē̠va sa̠mārō̍ha̠ntyari̍ṣṭyai̠ tē sva̠sti sama̍śñuvatē ṣaḍa̠hēna̍ yanti̠ ṣaḍvā ṛ̠tava̍ ṛ̠tuṣvē̠va prati̍ tiṣṭhantyubha̠yatō̎ jyōtiṣā yantyubha̠yata̍ ē̠va su̍va̠rgē lō̠kē pra̍ti̠tiṣṭha̍ntō yanti̠ dvau ṣa̍ḍa̠hau bha̍vata̠stāni̠ dvāda̠śāhā̍ni̠ sa-mpa̍dyantē dvāda̠śō vai puru̍ṣō̠ dvē sa̠kthyau̎ dvau bā̠hū ā̠tmā cha̠ śira̍ścha cha̠tvāryaṅgā̍ni̠ stanau̎ dvāda̠śau [ ] 36
ta-tpuru̍ṣa̠manu̍ pa̠ryāva̍rtantē̠ traya̍-ṣṣaḍa̠hā bha̍vanti̠ tānya̠ṣṭāda̠śāhā̍ni̠ sa-mpa̍dyantē̠ navā̠nyāni̠ navā̠nyāni̠ nava̠ vai puru̍ṣē prā̠ṇāsta-tprā̠ṇānanu̍ pa̠ryāva̍rtantē cha̠tvāra̍-ṣṣaḍa̠hā bha̍vanti̠ tāni̠ chatu̍rvigṃśati̠rahā̍ni̠ sa-mpa̍dyantē̠ chatu̍rvigṃśatirardhamā̠sā-ssa̍ṃvathsa̠rasta-thsa̍ṃvathsa̠ramanu̍ pa̠ryāva̍rta̠ntē ‘pra̍tiṣṭhita-ssaṃvathsa̠ra iti̠ khalu̠ vā ā̍hu̠rvarṣī̍yā-nprati̠ṣṭhāyā̠ ityē̠tāva̠dvai sa̍ṃvathsa̠rasya̠ brāhma̍ṇa̠ṃ yāva̍nmā̠sō mā̠simā̎syē̠va pra̍ti̠tiṣṭha̍ntō yanti ॥ 37 ॥
(vi̠rāja̍ – mē̠tēna̍ – dvāda̠śā – vē̠tāva̠dvā – a̠ṣṭau cha̍) (a. 11)
mē̠ṣastvā̍ pacha̠taira̍vatu̠ lōhi̍tagrīva̠-śChāgai̎-śśalma̠lirvṛddhyā̍ pa̠rṇō brahma̍ṇā pla̠kṣō mēdhē̍na nya̠grōdha̍śchama̠sairu̍du̠baṃra̍ ū̠rjā gā̍ya̠trī Chandō̍bhistri̠vṛ-thstōmai̠rava̍ntī̠-ssthāva̍ntīstvā-‘vantu pri̠ya-ntvā̎ pri̠yāṇā̠ṃ varṣi̍ṣṭha̠māpyā̍nā-nnidhī̠nā-ntvā̍ nidhi̠patigṃ̍ havāmahē vasō mama ॥ 38 ॥
(mē̠ṣaḥ – ṣa-ṭtrigṃ̍śat) (a. 12)
kūpyā̎bhya̠-ssvāhā̠ kūlyā̎bhya̠-ssvāhā̍ vika̠ryā̎bhya̠-ssvāhā̍ ‘va̠ṭyā̎bhya̠-ssvāhā̠ khanyā̎bhya̠-ssvāhā̠ hradyā̎bhya̠-ssvāhā̠ sūdyā̎bhya̠-ssvāhā̍ sara̠syā̎bhya̠-ssvāhā̍ vaiśa̠ntībhya̠-ssvāhā̍ palva̠lyā̎bhya̠-ssvāhā̠ varṣyā̎bhya̠-ssvāhā̍ ‘va̠rṣyābhya̠-ssvāhā̎ hrā̠dunī̎bhya̠-ssvāhā̠ pṛṣvā̎bhya̠-ssvāhā̠ syanda̍mānābhya̠-ssvāhā̎ sthāva̠rābhya̠-ssvāhā̍ nādē̠yībhya̠-ssvāhā̍ saindha̠vībhya̠-ssvāhā̍ samu̠driyā̎bhya̠-ssvāhā̠ sarvā̎bhya̠-ssvāhā̎ ॥ 39 ॥
(kūpyā̎bhya – śchatvāri̠gṃ̠śat) (a. 13)
a̠dbhya-ssvāhā̠ vaha̍ntībhya̠-ssvāhā̍ pari̠vaha̍ntībhya̠-ssvāhā̍ sama̠ntaṃ vaha̍ntībhya̠-ssvāhā̠ śīghra̠ṃ vaha̍ntībhya̠-ssvāhā̠ śībha̠ṃ vaha̍ntībhya̠-ssvāhō̠graṃ vaha̍ntībhya̠-ssvāhā̍ bhī̠maṃ vaha̍ntībhya̠-ssvāhā-‘mbhō̎bhya̠-ssvāhā̠ nabhō̎bhya̠-ssvāhā̠ mahō̎bhya̠-ssvāhā̠ sarva̍smai̠ svāhā̎ ॥ 40 ॥
(a̠dbhya – ēkā̠nnatri̠gṃ̠śat) (a. 14)
yō arva̍nta̠-ñjighāgṃ̍sati̠ tama̠bhya̍mīti̠ varu̍ṇaḥ ॥ pa̠rō marta̍ḥ pa̠ra-śśvā ॥ a̠ha-ñcha̠ tva-ñcha̍ vṛtraha̠nthsa-mba̍bhūva sa̠nibhya̠ ā । a̠rā̠tī̠vā chi̍dadri̠vō-‘nu̍ nau śūra magṃsatai bha̠drā indra̍sya rā̠taya̍ḥ ॥ a̠bhi kratvē̎mdra bhū̠radha̠ jmanna tē̍ vivyammahi̠māna̠gṃ̠ rajāgṃ̍si । svēnā̠ hi vṛ̠tragṃ śava̍sā ja̠ghantha̠ na śatru̠ranta̍ṃ vivida-dyu̠dhā tē̎ ॥ 41 ॥
(vi̠vi̠da̠-d- dvē cha̍) (a. 15)
namō̠ rājñē̠ namō̠ varu̍ṇāya̠ namō-‘śvā̍ya̠ nama̍ḥ pra̠jāpa̍tayē̠ namō-‘dhi̍pata̠yē ‘dhi̍patira̠syadhi̍pati-mmā ku̠rvadhi̍patira̠ha-mpra̠jānā̎-mbhūyāsa̠-mmā-ndhē̍hi̠ mayi̍ dhēhyu̠pākṛ̍tāya̠ svāhā ”la̍bdhāya̠ svāhā̍ hu̠tāya̠ svāhā̎ ॥ 42 ॥
(nama̠ – ēkā̠nna tri̠gṃ̠śat) (a. 16)
ma̠yō̠bhūrvātō̍ a̠bhi vā̍tū̠srā ūrja̍svatī̠rōṣa̍dhī̠rā ri̍śantām । pīva̍svatīrjī̠vadha̍nyāḥ pibantvava̠sāya̍ pa̠dvatē̍ rudra mṛḍa ॥ yā-ssarū̍pā̠ virū̍pā̠ ēka̍rūpā̠ yāsā̍ma̠gniriṣṭyā̠ nāmā̍ni̠ vēda̍ । yā aṅgi̍rasa̠stapa̍sē̠ha cha̠krustābhya̍ḥ parjanya̠ mahi̠ śarma̍ yachCha ॥ yā dē̠vēṣu̍ ta̠nuva̠maira̍yanta̠ yāsā̠gṃ̠ sōmō̠ viśvā̍ rū̠pāṇi̠ vēda̍ । tā a̠smabhya̠-mpaya̍sā̠ pinva̍mānāḥ pra̠jāva̍tīrindra [ ] 43
gō̠ṣṭhē ri̍rīhi ॥ pra̠jāpa̍ti̠rmahya̍mē̠tā rarā̍ṇō̠ viśvai̎rdē̠vaiḥ pi̠tṛbhi̍-ssaṃvidā̠naḥ । śi̠vā-ssa̠tīrupa̍ nō gō̠ṣṭhamā-‘ka̠stāsā̎ṃ va̠ya-mpra̠jayā̠ sagṃ sa̍dēma ॥ i̠ha dhṛti̠-ssvāhē̠ha vidhṛ̍ti̠-ssvāhē̠ha ranti̠-ssvāhē̠ha rama̍ti̠-ssvāhā̍ ma̠hīmū̠ ṣu1 su̠trāmā̍ṇaṃ2 ॥ 44 ॥
(i̠ndrā̠ – ṣṭātrigṃ̍śachcha) (a. 17)
kigg svi̍dāsī-tpū̠rvachi̍tti̠ḥ kigg svi̍dāsī-dbṛ̠hadvaya̍ḥ । kigg svi̍dāsī-tpiśaṅgi̠lā kigg svi̍dāsī-tpilippi̠lā ॥ dyaurā̍sī-tpū̠rvachi̍tti̠raśva̍ āsī-dbṛ̠hadvaya̍ḥ । rātri̍rāsī-tpiśaṅgi̠lā ‘vi̍rāsī-tpilippi̠lā ॥ ka-ssvi̍dēkā̠kī cha̍rati̠ ka u̍ svijjāyatē̠ puna̍ḥ । kigg svi̍ddhi̠masya̍ bhēṣa̠ja-ṅkigg svi̍dā̠vapa̍na-mma̠hat ॥ sūrya̍ ēkā̠kī cha̍rati [ ] 45
cha̠ndramā̍ jāyatē̠ puna̍ḥ । a̠gnir-hi̠masya̍ bhēṣa̠ja-mbhūmi̍rā̠vapa̍na-mma̠hat ॥ pṛ̠chChāmi̍ tvā̠ para̠manta̍-mpṛthi̠vyāḥ pṛ̠chChāmi̍ tvā̠ bhuva̍nasya̠ nābhi̎m । pṛ̠chChāmi̍ tvā̠ vṛṣṇō̠ aśva̍sya̠ rēta̍ḥ pṛ̠chChāmi̍ vā̠chaḥ pa̍ra̠maṃ vyō̍ma ॥ vēdi̍māhu̠ḥ para̠manta̍-mpṛthi̠vyā ya̠jñamā̍hu̠ rbhuva̍nasya̠ nābhi̎m । sōma̍māhu̠rvṛṣṇō̠ aśva̍sya̠ rētō̠ brahmai̠va vā̠chaḥ pa̍ra̠maṃ vyō̍ma ॥ 46 ॥
(sūrya̍ ēkā̠kī cha̍rati̠ – ṣaṭcha̍tvārigṃśachcha) (a. 18)
abēṃ̠ abāṃ̠lyambi̍kē̠ na mā̍ nayati̠ kaścha̠na । sa̠sastya̍śva̠kaḥ ॥ subha̍gē̠ kāmpī̍lavāsini suva̠rgē lō̠kē sa-mprōrṇvā̍thām । ā-‘hama̍jāni garbha̠dhamā tvama̍jāsi garbha̠dham ॥ tau sa̠ha cha̠tura̍ḥ pa̠da-ssa-mpra sā̍rayāvahai ॥ vṛṣā̍ vāgṃ rētō̠dhā rētō̍ dadhā̠tū-thsa̠kthyō̎rgṛ̠da-ndhē̎hya̠ñjimuda̍ñji̠manva̍ja । ya-sstrī̠ṇā-ñjī̍va̠bhōja̍nō̠ ya ā̍sā- [ya ā̍sām, bi̠la̠dhāva̍naḥ ।] 47
-mbila̠dhāva̍naḥ । pri̠ya-sstrī̠ṇāma̍pī̠chya̍ḥ ॥ ya ā̍sā-ṅkṛ̠ṣṇē lakṣma̍ṇi̠ sardi̍gṛdi-mpa̠rāva̍dhīt ॥ abēṃ̠ abāṃ̠lyambi̍kē̠ na mā̍ yabhati̠ kaścha̠na । sa̠sastya̍śva̠kaḥ ॥ ū̠rdhvā-mē̍nā̠muchChra̍yatā-dvēṇubhā̠ra-ṅgi̠rāvi̍va । athā̎syā̠ maddhya̍mēdhatāgṃ śī̠tē vātē̍ pu̠nanni̍va ॥ abēṃ̠ abāṃ̠lyambi̍kē̠ na mā̍ yabhati̠ kaścha̠na । sa̠sastya̍śva̠kaḥ ॥ yaddha̍ri̠ṇī yava̠matti̠ na [ ] 48
pu̠ṣṭa-mpa̠śu ma̍nyatē । śū̠drā yadarya̍jārā̠ na pōṣā̍ya dhanāyati ॥ abēṃ̠ abāṃ̠lyambi̍kē̠ na mā̍ yabhati̠ kaścha̠na । sa̠sastya̍śva̠kaḥ ॥ i̠yaṃ ya̠kā śa̍kunti̠kā ”hala̠miti̠ sarpa̍ti । āha̍ta-ṅga̠bhē pasō̠ ni ja̍lgulīti̠ dhāṇi̍kā ॥ abēṃ̠ abāṃ̠lyambi̍kē̠ na mā̍ yabhati̠ kaścha̠na । sa̠sastya̍śva̠kaḥ ॥ mā̠tā cha̍ tē pi̠tā cha̠ tē-‘gra̍ṃ vṛ̠kṣasya̍ rōhataḥ । 49
pra su̍lā̠mīti̍ tē pi̠tā ga̠bhē mu̠ṣṭima̍tagṃsayat ॥ da̠dhi̠krāv.ṇṇō̍ akāriṣa-ñji̠ṣṇōraśva̍sya vā̠jina̍ḥ । sura̠bhi nō̠ mukhā̍ kara̠-tpraṇa̠ āyūgṃ̍ṣi tāriṣat ॥ āpō̠ hi ṣṭhā ma̍yō̠bhuva̠stā na̍ ū̠rjē da̍dhātana । ma̠hēraṇā̍ya̠ chakṣa̍sē ॥ yō va̍-śśi̠vata̍mō̠ rasa̠stasya̍ bhājayatē̠ha na̍ḥ । u̠śa̠tīri̍va mā̠tara̍ḥ ॥ tasmā̠ ara̍-ṅgamāma vō̠ yasya̠ kṣayā̍ya̠ jinva̍tha । āpō̍ ja̠naya̍thā cha naḥ ॥ 50 ॥
(ā̠sā̠ – matti̠ na – rō̍hatō̠ – jinva̍tha – cha̠tvāri̍ cha) (a. 19)
bhūrbhuva̠-ssuva̠rvasa̍vastvā ‘ñjantu gāya̠trēṇa̠ Chanda̍sā ru̠drāstvā̎ ‘ñjantu̠ traiṣṭu̍bhēna̠ Chanda̍sā, ”di̠tyāstvā̎-‘ñjantu̠ jāga̍tēna̠ Chanda̍sā̠ ya-dvātō̍ a̠pō aga̍ma̠dindra̍sya ta̠nuva̍-mpri̠yām । ē̠tagg stō̍tarē̠tēna̍ pa̠thā puna̠raśva̠mā va̍rtayāsi naḥ ॥ lājī(3)-ñChāchī(3)n yaśō̍ ma̠mā~ṃ(4) । ya̠vyāyai̍ ga̠vyāyā̍ ē̠ta-ddē̍vā̠ anna̍mattai̠tadanna̍maddhi prajāpatē ॥ yu̠ñjanti̍ bra̠ddhna-ma̍ru̠ṣa-ñchara̍nta̠-mpari̍ ta̠sthuṣa̍ḥ । rōcha̍ntē rōcha̠nā di̠vi ॥ yu̠ñjantya̍sya̠ kāmyā̠ harī̠ vipa̍kṣasā̠ rathē̎ । śōṇā̍ dhṛ̠ṣṇū nṛ̠vāha̍sā ॥ kē̠tu-ṅkṛ̠ṇvanna̍kē̠tavē̠ pēśō̍ maryā apē̠śasē̎ । samu̠ṣadbhi̍rajāyathāḥ ॥ 51 ॥
(bra̠ddhnaṃ – pañcha̍vigṃśatiścha) (a. 20)
prā̠ṇāya̠ svāhā̎ vyā̠nāya̠ svāhā̍ ‘pā̠nāya̠ svāhā̠ snāva̍bhya̠-ssvāhā̍ santā̠nēbhya̠-ssvāhā̠ pari̍santānēbhya̠-ssvāhā̠ parva̍bhya̠-ssvāhā̍ sa̠dhānnē̎bhya̠-ssvāhā̠ śarī̍rēbhya̠-ssvāhā̍ ya̠jñāya̠ svāhā̠ dakṣi̍ṇābhya̠-ssvāhā̍ suva̠rgāya̠ svāhā̍ lō̠kāya̠ svāhā̠ sarva̍smai̠ svāhā̎ ॥ 52 ॥
(prā̠ṇāyā̠ – ṣṭāvigṃ̍śatiḥ) (a. 21)
si̠tāya̠ svāhā ‘si̍tāya̠ svāhā̠ ‘bhihi̍tāya̠ svāhā ‘na̍bhihitāya̠ svāhā̍ yu̠ktāya̠ svāhā ‘yu̍ktāya̠ svāhā̠ suyu̍ktāya̠ svāhō -dyu̍ktāya̠ svāhā̠ vimu̍ktāya̠ svāhā̠ pramu̍ktāya̠ svāhā̠ vañcha̍tē̠ svāhā̍ pari̠vañcha̍tē̠ svāhā̍ sa̠ṃvañcha̍tē̠ svāhā̍ ‘nu̠vañcha̍tē̠ svāhō̠–dvañcha̍tē̠ svāhā̍ ya̠tē svāhā̠ dhāva̍tē̠ svāhā̠ tiṣṭha̍tē̠ svāhā̠ sarva̍smai̠ svāhā̎ ॥ 53 ॥
(si̠tāyā̠ – ṣṭātrigṃ̍śat) (a. 22)
(bṛha̠spati̠-śśra–dya̠thā vā – ṛ̠kṣā vai – pra̠jāpa̍ti̠ryēna̍yēna̠ – dvē vāva dē̍vasa̠trē – ā̍di̠tyā a̍kāmayanta suva̠rgaṃ – ~ṃvasi̍ṣṭhaḥ – saṃvathsa̠rāya̍ -surva̠rgaṃ yē sa̠traṃ – bra̍hmavā̠dinō̍-‘tirā̠trō – jyōti̍ṣṭōmaṃ – mē̠ṣaḥ – kūpyā̎bhyō̠ – ‘dbhyō – yō – namō̍ – mayō̠bhūḥ – kigg svi̠da – mbē̠ – bhūḥ – prā̠ṇāya̍ – si̠tāya̠ – dvāvigṃ̍śatiḥ)
(bṛha̠spati̠ḥ – prati̍ tiṣṭhanti̠ – vai da̍śarā̠trēṇa̍ – suva̠rgaṃ – ~ṃyō arva̍nta̠ṃ – bhū – stripa̍ñchā̠śat)
(bṛha̠spati̠, ssarva̍smai̠ svāhā̎)
॥ hari̍ḥ ōm ॥
॥ kṛṣṇa yajurvēdīya taittirīya saṃhitāyāṃ saptamakāṇḍē chaturthaḥ praśna-ssamāptaḥ ॥