kṛṣṇa yajurvēdīya taittirīya saṃhitāyāṃ saptamakāṇḍē pañchamaḥ praśnaḥ – satraviśēṣābhidhānaṃ
ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥
gāvō̠ vā ē̠ta-thsa̠tra-mā̍satāśṛ̠ṅgā-ssa̠tī-śśṛṅgā̍ṇi nō jāyantā̠ iti̠ kāmē̍na̠ tāsā̠-ndaśa̠māsā̠ niṣa̍ṇṇā̠ āsa̠nnatha̠ śṛṅgā̎ṇyajāyanta̠ tā uda̍tiṣṭha̠nnarā̠thsmētyatha̠ yāsā̠-nnājā̍yanta̠ tā-ssa̍ṃvathsa̠ra-mā̠ptvōda̍tiṣṭha̠ -nnarā̠thsmēti̠ yāsā̠-ñchājā̍yanta̠ yāsā̎-ñcha̠ na tā u̠bhayī̠ru-da̍tiṣṭha̠-nnarā̠thsmēti̍ gōsa̠traṃ vai [gōsa̠traṃ vai, sa̠ṃva̠thsa̠rō ya] 1
sa̍ṃvathsa̠rō ya ē̠vaṃ vi̠dvāgṃsa̍-ssaṃvathsa̠ra-mu̍pa̠yantyṛ̍ddhnu̠vantyē̠va tasmā̎-ttūpa̠rā vārṣi̍kau̠ māsau̠ partvā̍ charati sa̠trābhi̍jita̠gg̠hya̍syai̠ tasmā̎-thsaṃvathsara̠sadō̠ ya-tki-ñcha̍ gṛ̠hē kri̠yatē̠ tadā̠pta-mava̍ruddha-ma̠bhiji̍ta-ṅkriyatē samu̠draṃ vā ē̠tē pra pla̍vantē̠ yē sa̍ṃvathsa̠ramu̍pa̠yanti̠ yō vai sa̍mu̠drasya̍ pā̠ra-nna paśya̍ti̠ na vai sa tata̠ udē̍ti saṃvathsa̠rō [udē̍ti saṃvathsa̠raḥ, vai sa̍mu̠dra-] 2
vai sa̍mu̠dra-stasyai̠ta-tpā̠raṃ yada̍tirā̠trau ya ē̠vaṃ vi̠dvāgṃsa̍-ssaṃvathsa̠ra-mu̍pa̠yantyanā̎rtā ē̠vōdṛcha̍-ṅgachChantī̠yaṃ vai pūrvō̍-‘tirā̠trō̍ ‘sāvutta̍rō̠ mana̠ḥ pūrvō̠ vāgutta̍raḥ prā̠ṇaḥ pūrvō̍-‘pā̠na utta̍raḥ pra̠rōdha̍na̠-mpūrva̍ u̠daya̍na̠mutta̍rō̠ jyōti̍ṣṭōmō vaiśvāna̠rō̍ ‘tirā̠trō bha̍vati̠ jyōti̍rē̠va pu̠rastā̎ddadhatē suva̠rgasya̍ lō̠kasyā-nu̍khyātyai chaturvi̠gṃ̠śaḥ prā̍ya̠ṇīyō̍ bhavati̠ chatu̍rvigṃśati-rardhamā̠sā- [chatu̍rvigṃśati-rardhamā̠sāḥ, sa̠ṃva̠thsa̠raḥ] 3
-ssa̍ṃvathsa̠raḥ pra̠yanta̍ ē̠va sa̍ṃvathsa̠rē prati̍ tiṣṭhanti̠ tasya̠ trīṇi̍ cha śa̠tāni̍ ṣa̠ṣṭiścha̍ stō̠trīyā̠stāva̍tī-ssaṃvathsa̠rasya̠ rātra̍ya u̠bhē ē̠va sa̍ṃvathsa̠rasya̍ rū̠pē ā̎pnuvanti̠ tē saggsthi̍tyā̠ ari̍ṣṭyā̠ utta̍rai̠rahō̍bhiścharanti ṣaḍa̠hā bha̍vanti̠ ṣa-ḍvā ṛ̠tava̍-ssaṃvathsa̠ra ṛ̠tuṣvē̠va sa̍ṃvathsa̠rē prati̍ tiṣṭhanti̠ gauśchā-”yu̍ścha maddhya̠ta-sstōmau̍ bhavata-ssaṃvathsa̠rasyai̠va tanmi̍thu̠na-mma̍ddhya̠tō [tanmi̍thu̠na-mma̍ddhya̠taḥ, da̠dha̠ti̠ pra̠jana̍nāya̠] 4
da̍dhati pra̠jana̍nāya̠ jyōti̍ra̠bhitō̍ bhavati vi̠mōcha̍namē̠va tachChandāg̍syē̠va ta-dvi̠mōka̍ṃ ya̠ntyathō̍ ubha̠yatō̎jyōtiṣai̠va ṣa̍ḍa̠hēna̍ suva̠rgaṃ lō̠kaṃ ya̍nti brahmavā̠dinō̍ vada̠ntyāsa̍tē̠ kēna̍ ya̠ntīti̍ dēva̠yānē̍na pa̠thēti̍ brūyā̠chChandāgṃ̍si̠ vai dē̍va̠yāna̠ḥ panthā̍ gāya̠trī tri̠ṣṭub-jaga̍tī̠jyōti̠rvai gā̍ya̠trī gaustri̠ṣṭugāyu̠rjaga̍tī̠ yadē̠tē stōmā̠ bhava̍nti dēva̠yānē̍nai̠va [ ] 5
ta-tpa̠thā ya̍nti samā̠nagṃ sāma̍ bhavati dēvalō̠kō vai sāma̍ dēvalō̠kādē̠va naya̍ntya̠nyāa̍nyā̠ ṛchō̍ bhavanti manuṣyalō̠kō vā ṛchō̍ manuṣyalō̠kādē̠vānyama̍nya-ndēvalō̠kama̍bhyā̠rōha̍ntō yantyabhiva̠rtō bra̍hmasā̠ma-mbha̍vati suva̠rgasya̍ lō̠kasyā̠bhivṛ̍tyā abhi̠ji-dbha̍vati suva̠rgasya̍ lō̠kasyā̠bhiji̍tyai viśva̠ji-dbha̍vati̠ viśva̍sya̠ jityai̍ mā̠simā̍si pṛ̠ṣṭhānyupa̍ yanti mā̠simā̎syatigrā̠hyā̍ gṛhyantē mā̠simā̎syē̠va vī̠rya̍-ndadhati mā̠sā-mprati̍ṣṭhityā u̠pari̍ṣṭānmā̠sā-mpṛ̠ṣṭhānyupa̍ yanti̠ tasmā̍du̠pari̍ṣṭā̠dōṣa̍dhaya̠ḥ phala̍-ṅgṛhṇanti ॥ 6 ॥
(gō̠sa̠traṃ vā – ē̍ti saṃvathsa̠rō̎ – ‘rdhamā̠sā – mi̍thu̠na-mma̍ddhya̠tō – dē̍va̠yānē̍nai̠va – vī̠rya̍ṃ – trayō̍daśa cha) (a. 1)
gāvō̠ vā ē̠ta-thsa̠tramā̍satāśṛ̠ṅgā-ssa̠tī-śśṛṅgā̍ṇi̠ siṣā̍santī̠stāsā̠-ndaśa̠ māsā̠ niṣa̍ṇṇā̠ āsa̠nnatha̠ śṛṅgā̎ṇyajāyanta̠ tā a̍bruva̠nnarā̠thsmō-tti̍ṣṭhā̠māva̠ ta-ṅkāma̍maruthsmahi̠ yēna̠ kāmē̍na̠ nyaṣa̍dā̠mēti̠ tāsā̍mu̠ tvā a̍bruvanna̠rdhāvā̠ yāva̍tī̠rvā-”sā̍mahā ē̠vēmaudvā̍da̠śau māsau̍ saṃvathsa̠ragṃ sa̠pāndyō-tti̍ṣṭhā̠mēti̠ tāsā̎- [tāsā̎m, dvā̠da̠śē mā̠si] 7
-ndvāda̠śē mā̠si śṛṅgā̍ṇi̠ prāva̍rtanta śra̠ddhayā̠ vā-‘śra̍ddhayā vā̠ tā i̠mā yāstū̍pa̠rā u̠bhayyō̠ vāva tā ā̎rdhnuva̠n̠. yāścha̠ śṛṅgā̠ṇyasa̍nva̠n̠. yāśchōrja̍ma̠vāru̍ndhata̠rdhnōti̍ da̠śasu̍ mā̠sū̎ttiṣṭha̍nnṛ̠ddhnōti̍ dvāda̠śasu̠ ya ē̠vaṃ vēda̍ pa̠dēna̠ khalu̠ vā ē̠tē ya̍nti vi̠ndati̠ khalu̠ vai pa̠dēna̠ ya-ntadvā ē̠tadṛ̠ddhamaya̍na̠-ntasmā̍ dē̠ta-dgō̠sani̍ ॥ 8 ॥
(ti̠ṣṭhā̠mēti̠ tāsā̠ṃ – tasmā̠-d- dvē cha̍) (a. 2)
pra̠tha̠mē mā̠si pṛ̠ṣṭhānyupa̍ yanti maddhya̠ma upa̍ yantyutta̠ma upa̍ yanti̠ tadā̍hu̠ryāṃ vai trirēka̠syāhna̍ upa̠sīda̍nti da̠hraṃ vai sā-‘pa̍rābhyā̠-ndōhā̎bhyā-ndu̠hē-‘tha̠ kuta̠-ssā dhō̎kṣyatē̠ yā-ndvāda̍śa̠ kṛtva̍ upa̠sīda̠ntīti̍ saṃvathsa̠ragṃ sa̠pāndyō̎tta̠mē mā̠si sa̠kṛ-tpṛ̠ṣṭhānyupē̍yu̠sta-dyaja̍mānā ya̠jña-mpa̠śūnava̍ rundhatē samu̠draṃ vā [samu̠draṃ vai, ē̠tē̍-‘navā̠rama̍pā̠ra-mpra] 9
ē̠tē̍-‘navā̠rama̍pā̠ra-mpra pla̍vantē̠ yē sa̍ṃvathsa̠ramu̍pa̠yanti̠ ya-dbṛ̍ha-drathanta̠rē a̠nvarjē̍yu̠ryathā̠ maddhyē̍ samu̠drasya̍ pla̠vama̠nvarjē̍yustā̠dṛ-ktadanu̍thsarga-mbṛha-drathanta̠rābhyā̍mi̠tvā pra̍ti̠ṣṭhā-ṅga̍chChanti̠ sarvē̎bhyō̠ vai kāmē̎bhya-ssa̠ndhirdu̍hē̠ ta-dyaja̍mānā̠-ssarvā̠n kāmā̠nava̍ rundhatē ॥ 10 ॥
(sa̠mu̠draṃ vai – chatu̍strigṃśachcha) (a. 3)
sa̠mā̠nya̍ ṛchō̍ bhavanti manuṣyalō̠kō vā ṛchō̍ manuṣyalō̠kādē̠va na ya̍ntya̠nyada̍nya̠-thsāma̍ bhavati dēvalō̠kō vai sāma̍ dēvalō̠kādē̠vānyama̍nya-mmanuṣyalō̠ka-mpra̍tyava̠rōha̍ntō yanti̠ jaga̍tī̠magra̠ upa̍ yanti̠ jaga̍tī̠ṃ vai Chandāgṃ̍si pra̠tyava̍rōhantyā-graya̠ṇa-ṅgrahā̍ bṛ̠ha-tpṛ̠ṣṭhāni̍ trayastri̠gṃ̠śaggstōmā̠-stasmā̠-jjyāyāgṃ̍sa̠-ṅkanī̍yā-npra̠tyava̍rōhati vaiśvakarma̠ṇō gṛ̍hyatē̠viśvā̎nyē̠va tēna̠ karmā̍ṇi̠ yaja̍mānā̠ ava̍ rundhata ādi̠tyō [ādi̠tyaḥ, gṛ̠hya̠ta̠ i̠yaṃ vā] 11
gṛ̍hyata i̠yaṃ vā adi̍tira̠syāmē̠va prati̍ tiṣṭhantya̠nyō̎-‘nyō gṛhyētē mithuna̠tvāya̠ prajā̎tyā avānta̠raṃ vai da̍śarā̠trēṇa̍ pra̠jāpa̍tiḥ pra̠jā a̍sṛjata̠ ya-dda̍śarā̠trō bhava̍ti pra̠jā ē̠va ta-dyaja̍mānā-ssṛjanta ē̠tāgṃ ha̠ vā u̍da̠ṅka-śśau̎lbāya̠na-ssa̠trasyardhi̍muvācha̠ ya-dda̍śarā̠trōya-dda̍śarā̠trō bhava̍ti sa̠trasyardhyā̠ athō̠ yadē̠va pūrvē̠ṣvaha̍ssu̠ vilō̍ma kri̠yatē̠ tasyai̠vai ( )-ṣā śānti̍ḥ ॥ 12 ॥
(ā̠di̠tya – stasyai̠va – dvē cha̍) (a. 4)
yadi̠ sōmau̠ sagṃsu̍tau̠ syātā̎-mmaha̠ti rātri̍yai prātaranuvā̠ka-mu̠pāku̍ryā̠-tpūrvō̠ vācha̠-mpūrvō̍ dē̠vatā̠ḥ pūrva̠-śChandāgṃ̍si vṛṅktē̠ vṛṣa̍ṇvatī-mprati̠pada̍-ṅkuryā-tprātassava̠nādē̠vaiṣā̠mindra̍ṃ vṛ̠ṅktē ‘thō̠ khalvā̍hussavanamu̠khē-sa̍vanamukhē kā̠ryēti̍ savanamu̠khā-thsa̍vanamukhā-dē̠vaiṣā̠mindra̍ṃ vṛṅktē saṃvē̠śāyō̍pavē̠śāya̍ gāyatri̠yāstri̠ṣṭubhō̠ jaga̍tyā anu̠ṣṭubha̍ḥ pa̠ṅktyā a̠bhibhū̎tyai̠ svāhā̠ Chandāgṃ̍si̠ vai sa̍ṃvē̠śa u̍pavē̠śa-śChandō̍bhi-rē̠vaiṣā̠- [u̍pavē̠śa-śChandō̍bhi-rē̠vaiṣā̎m, Chandāgṃ̍si] 13
-ñChandāgṃ̍si vṛṅktē saja̠nīya̠gṃ̠ śasya̍ṃ viha̠vyagṃ̍ śasya̍ma̠gastya̍sya kayāśu̠bhīya̠gṃ̠ śasya̍mē̠tāva̠dvā a̍sti̠ yāva̍dē̠ta-dyāva̍dē̠vāsti̠ tadē̍ṣāṃ vṛṅktē̠ yadi̍ prātassava̠nē ka̠laśō̠ dīryē̍ta vaiṣṇa̠vīṣu̍ śipivi̠ṣṭava̍tīṣu stuvīra̠n̠.yadvai ya̠jñasyā̍-ti̠richya̍tē̠ viṣṇu̠-ntachChi̍pivi̠ṣṭama̠bhyati̍ richyatē̠ tadviṣṇu̍-śśipivi̠ṣṭō-‘ti̍rikta ē̠vāti̍rikta-ndadhā̠tyathō̠ ati̍riktēnai̠vā-ti̍riktamā̠ptvā-‘va̍ rundhatē̠ yadi̍ ma̠ddhyandi̍nē̠ dīryē̍ta vaṣaṭkā̠rani̍dhana̠gṃ̠ sāma̍ kuryurvaṣaṭkā̠rō vai ya̠jñasya̍ prati̠ṣṭhā pra̍ti̠ṣṭhāmē̠vaina̍-dgamayanti̠ yadi̍ tṛtīyasava̠na ē̠tadē̠va ॥ 14 ॥
(Chandō̍bhirē̠vaiṣā̠ – mavai – kā̠nnavigṃ̍śa̠tiścha̍) (a. 5)
ṣa̠ḍa̠hai-rmāsā̎m-thsa̠mpādyā-‘ha̠ru-thsṛ̍janti ṣaḍa̠hairhi māsā̎m-thsa̠mpaśya̍ntya-rdhamā̠sairmāsā̎m-thsa̠mpādyāha̠ru-thsṛ̍jantya-rdhamā̠sairhi māsā̎m-thsa̠mpaśya̍ntyamāvā̠sya̍yā̠ māsā̎m-thsa̠mpādyāha̠ru-thsṛ̍jantyamāvā̠sya̍yā̠ hi māsā̎m-thsa̠mpaśya̍nti paurṇamā̠syā māsā̎m-thsa̠mpādyā-‘haru-thsṛ̍janti paurṇamā̠syā hi māsā̎m-thsa̠mpaśya̍nti̠ yō vai pū̠rṇa ā̍si̠ñchati̠ parā̠ sa si̍ñchati̠ yaḥ pū̠rṇādu̠dacha̍ti [ ] 15
prā̠ṇama̍smi̠nthsa da̍dhāti̠ ya-tpau̎rṇamā̠syā māsā̎m-thsa̠pāndyāha̍ru-thsṛ̠janti̍ saṃvathsa̠rāyai̠va ta-tprā̠ṇa-nda̍dhati̠ tadanu̍ sa̠triṇa̠ḥ prāṇa̍nti̠ yadaha̠rnō-thsṛ̠jēyu̠ryathā̠ dṛti̠rupa̍naddhō vi̠pata̍tyē̠vagṃ sa̍ṃvathsa̠rō vi pa̍tē̠dārti̠-mārchChē̍yu̠rya-tpau̎rṇamā̠syā māsā̎m-thsa̠pāndyāha̍ru-thsṛ̠janti̍ saṃvathsa̠rāyai̠va tadu̍dā̠na-nda̍dhati̠ tadanu̍ sa̠triṇa̠ u- [sa̠triṇa̠ ut, a̠na̠nti̠ nā-”rti̠-mārchCha̍nti] 16
-da̍nanti̠ nā-”rti̠-mārchCha̍nti pū̠rṇamā̍sē̠ vai dē̠vānāgṃ̍ su̠tō ya-tpau̎rṇamā̠syā māsā̎m-thsa̠pāndyāha̍ru-thsṛ̠janti̍ dē̠vānā̍mē̠va ta-dya̠jñēna̍ ya̠jña-mpra̠tyava̍rōhanti̠ vi vā ē̠ta-dya̠jña-ñChi̍ndanti̠ ya-thṣa̍ḍa̠hasa̍tanta̠gṃ̠ santa̠mathāha̍ru-thsṛ̠janti̍ prājāpa̠tya-mpa̠śumā la̍bhantē pra̠jāpa̍ti̠-ssarvā̍ dē̠vatā̍ dē̠vatā̍bhirē̠va ya̠jñagṃ sa-nta̍nvanti̠ yanti̠ vā ē̠tē sava̍nā̠dyē-‘ha̍- [sava̍nā̠dyē-‘ha̍ḥ, u̠-thsṛ̠janti̍] 17
-ru-thsṛ̠janti̍ tu̠rīya̠-ṅkhalu̠ vā ē̠ta-thsava̍na̠ṃ ya-thsā̎nāṃ̠yyaṃ ya-thsā̎nāṃ̠yya-mbhava̍ti̠ tēnai̠va sava̍nā̠nna ya̍nti samupa̠hūya̍ bhakṣayantyē̠tath- sō̍mapīthā̠ hyē̍tarhi̍ yathāyata̠naṃ vā ē̠tēṣāgṃ̍ savana̠bhājō̍ dē̠vatā̍ gachChanti̠ yē-‘ha̍ru-thsṛ̠jantya̍nusava̠na-mpu̍rō̠ḍāśā̠-nnirva̍panti yathāyata̠nādē̠va sa̍vana̠bhājō̍ dē̠vatā̠ ava̍ rundhatē̠ ‘ṣṭāka̍pālā-nprātassava̠na ēkā̍daśakapālā̠-nmāddhya̍ndinē̠ sava̍nē̠ dvāda̍śakapālāg-stṛtīyasava̠nē Chandāg̍syē̠vā-”ptvā -‘va̍ rundhatē vaiśvadē̠va-ñcha̠ru-ntṛ̍tīyasava̠nē nirva̍panti vaiśvadē̠vaṃ vai tṛ̍tīyasava̠na-ntēnai̠va tṛ̍tīyasava̠nānna ya̍nti ॥ 18 ॥
(u̠dacha̠ – tyu – dyē-‘ha̍ – rā̠ptvā – pañcha̍daśa cha) (a. 6)
u̠thsṛjyāṃ(3)nōthsṛjyā(3)miti̍ mīmāgṃsantē brahmavā̠dina̠-stadvā̍huru̠-thsṛjya̍mē̠vētya̍-māvā̠syā̍yā-ñcha paurṇamā̠syā-ñchō̠-thsṛjya̠mityā̍hurē̠tē hi ya̠jñaṃ vaha̍ta̠ iti̠ tē tvāva nōthsṛjyē̠ ityā̍hu̠ryē a̍vānta̠raṃ ya̠jña-mbhē̠jātē̠ iti̠ yā pra̍tha̠mā vya̍ṣṭakā̠ tasyā̍mu̠-thsṛjya̠mityā̍hurē̠ṣa vai mā̠sō vi̍śa̠ra iti̠ nā-”di̍ṣṭa̠- [nā-”di̍ṣṭam, uthsṛ̍jēyu̠-] 19
-muthsṛ̍jēyu̠-ryadādi̍ṣṭa-muthsṛ̠jēyu̍ryā̠dṛśē̠ puna̍ḥ paryāplā̠vē maddhyē̍ ṣaḍa̠hasya̍ sa̠pandyē̍ta ṣaḍa̠hairmāsā̎m-thsa̠pāndya̠ ya-thsa̍pta̠ma- maha̠stasmi̠nnu-thsṛ̍jēyu̠-stada̠gnayē̠ vasu̍matē purō̠ḍāśa̍ma̠ṣṭāka̍pāla̠-nnirva̍pēyurai̠ndra-ndadhīndrā̍ya ma̠rutva̍tē purō̠ḍāśa̠mēkā̍daśakapālaṃ vaiśvadē̠va-ndvāda̍śakapālama̠gnērvai vasu̍mataḥ prātassava̠naṃ yada̠gnayē̠ vasu̍matē purō̠ḍāśa̍ma̠ṣṭāka̍pāla-nni̠rvapa̍nti dē̠vatā̍mē̠va ta-dbhā̠ginī̎-ṅku̠rvanti̠ [-ṅku̠rvanti̍, sava̍na] 20
sava̍na-maṣṭā̠bhirupa̍ yanti̠ yadai̠ndra-ndadhi̠ bhava̠tīndra̍mē̠va ta-dbhā̍ga̠dhēyā̠nna chyā̍vaya̠ntīndra̍sya̠ vai ma̠rutva̍tō̠ māddhya̍ndina̠gṃ̠ sava̍na̠ṃ yadindrā̍ya ma̠rutva̍tē purō̠ḍāśa̠mēkā̍daśakapāla-nni̠rvapa̍nti dē̠vatā̍mē̠va ta-dbhā̠ginī̎-ṅku̠rvanti̠ sava̍namēkāda̠śabhi̠rupa̍ yanti̠ viśvē̍ṣā̠ṃ vai dē̠vānā̍mṛbhu̠matā̎-ntṛtīyasava̠naṃya-dvai̎śvadē̠va-ndvāda̍śakapāla-nni̠rvapa̍nti dē̠vatā̍ ē̠va ta-dbhā̠ginī̎ḥ ku̠rvanti̠ sava̍na-ndvāda̠śabhi̠- [sava̍na-ndvāda̠śabhi̍ḥ, upa̍ yanti] 21
-rupa̍ yanti prājāpa̠tya-mpa̠śumā la̍bhantē ya̠jñō vai pra̠jāpa̍ti-rya̠jñasyā-na̍nusargāyābhiva̠rta i̠ta-ṣṣaṇmā̠sō bra̍hmasā̠ma-mbha̍vati̠ brahma̠ vā a̍bhiva̠rtō brahma̍ṇai̠va ta-thsu̍va̠rgaṃ lō̠ka-ma̍bhiva̠rtaya̍ntō yanti pratikū̠lami̍va̠ hīta-ssu̍va̠rgō lō̠ka indra̠ kratu̍-nna̠ ā bha̍ra pi̠tā pu̠trēbhyō̠ yathā̎ । śikṣā̍ nō a̠smi-npu̍ruhūta̠ yāma̍ni jī̠vā jyōti̍-raśīma̠hītya̠-muta̍ āya̠tāgṃ ṣaṇmā̠sō bra̍hmasā̠ma-mbha̍vatya̠yaṃ vai lō̠kō jyōti̍ḥ pra̠jā jyōti̍ri̠mamē̠va tallō̠ka-mpaśya̍ntō-‘bhi̠vada̍nta̠ ā ya̍nti ॥ 22 ॥
(nā-”di̍ṣṭaṃ – ku̠rvanti̍ – dvāda̠śabhi̠ – riti̍- vigṃśa̠tiścha̍) (a. 7)
dē̠vānā̠ṃ vā anta̍-ñja̠gmuṣā̍mindri̠yaṃ vī̠rya̍-mapā̎krāma̠-tta-tkrō̠śēnāvā̍rundhata̠ ta-tkrō̠śasya̍ krōśa̠tvaṃ ya-tkrō̠śēna̠ chātvā̍la̠syāntē̎ stu̠vanti̍ ya̠jñasyai̠vānta̍-ṅga̠tvēndri̠yaṃ vī̠rya̍mava̍ rundhatē sa̠trasyardhyā̍ ”hava̠nīya̠syāntē̎ stuvantya̠gni-mē̠vōpa̍-dra̠ṣṭāra̍-ṅkṛ̠tvardhi̠mupa̍ yanti pra̠jāpa̍tē̠r̠hṛda̍yēna havi̠rdhānē̠-‘nta-sstu̍vanti prē̠māṇa̍mē̠vāsya̍ gachChanti ślō̠kēna̍ pu̠rastā̠-thsada̍sa- [pu̠rastā̠-thsada̍saḥ, stu̠va̠ntyanu̍ślōkēna] 23
-sstuva̠ntyanu̍ślōkēna pa̠śchā-dya̠jñasyai̠vānta̍-ṅga̠tvā ślō̍ka̠bhājō̍ bhavanti na̠vabhi̍-raddhva̠ryuru-dgā̍yati̠ nava̠ vai puru̍ṣē prā̠ṇāḥ prā̠ṇānē̠va yaja̍mānēṣu dadhāti̠ sarvā̍ ai̠ndriyō̍ bhavanti prā̠ṇēṣvē̠vēndri̠ya-nda̍dha̠-tyapra̍tihṛtābhi̠ru-dgā̍yati̠ tasmā̠-tpuru̍ṣa̠-ssarvā̎ṇya̠nyāni̍ śī̠rṣṇō-‘ṅgā̍ni̠ pratya̍chati̠ śira̍ ē̠va na pa̍ñchada̠śagṃra̍thanta̠ra-mbha̍vatīndri̠yamē̠vāva̍ rundhatē saptada̠śa- [saptada̠śam, bṛ̠ha-da̠nnādya̠syā] 24
-mbṛ̠ha-da̠nnādya̠syā-‘va̍ruddhyā̠ athō̠ praiva tēna̍ jāyanta ēkavi̠gṃ̠śa-mbha̠dra-ndvi̠padā̍su̠ prati̍ṣṭhityai̠ patna̍ya̠ upa̍ gāyanti mithuna̠tvāya̠ prajā̎tyai pra̠jā̍patiḥ pra̠jā a̍sṛjata̠ sō̍-‘kāmayatā̠-”sāma̠hagṃ rā̠jya-mparī̍yā̠miti̠ tāsāgṃ̍ rāja̠nēnai̠va rā̠jya-mparyai̠-tta-drā̍ja̠nasya̍ rājana̠tvaṃ ya-drā̍ja̠na-mbhava̍ti pra̠jānā̍mē̠va ta-dyaja̍mānā rā̠jya-mpari̍ yanti pañchavi̠gṃ̠śa-mbha̍vati pra̠jāpa̍tē̠- [pra̠jāpa̍tēḥ, āptyai̍ pa̠ñchabhi̠-stiṣṭha̍nta-sstuvanti] 25
-rāptyai̍ pa̠ñchabhi̠-stiṣṭha̍nta-sstuvanti dēvalō̠kamē̠vābhi ja̍yanti pa̠ñchabhi̠rāsī̍nā manuṣyalō̠kamē̠vābhi ja̍yanti̠ daśa̠ sampa̍dyantē̠ daśā̎kṣarā vi̠rāḍanna̍ṃ vi̠rā-ḍvi̠rājai̠vā-nnādya̠mava̍ rundhatē pañcha̠dhā vi̍ni̠ṣadya̍ stuvanti̠ pañcha̠ diśō̍ di̠kṣvē̍va prati̍tiṣṭha̠ntyēkai̍ka̠yā-‘stu̍tayā sa̠māya̍nti di̠gbhya ē̠vānnādya̠gṃ̠ sa-mbha̍ranti̠ tābhi̍-rudgā̠tō-dgā̍yati di̠gbhya ē̠vā-‘nnādyagṃ̍ [ē̠vā-‘nnādya̎m, sa̠mbhṛtya̠ tēja̍] 26
sa̠mbhṛtya̠ tēja̍ ā̠tma-nda̍dhatē̠ tasmā̠dēka̍ḥ prā̠ṇa-ssarvā̠ṇyaṅgā̎nyava̠tyathō̠ yathā̍ supa̠rṇa u̍tpati̠ṣyañChira̍ utta̠ma-ṅku̍ru̠ta ē̠vamē̠va ta-dyaja̍mānāḥ pra̠jānā̍mutta̠mā bha̍vantyāsa̠ndī-mu̍dgā̠tā ”rō̍hati̠ sāmrā̎jyamē̠va ga̍chChanti plē̠ṅkhagṃ hōtā̠ nāka̍syai̠va pṛ̠ṣṭhagṃ rō̍hanti kū̠rchāva̍ddhva̠ryu-rbra̠ddhnasyai̠va vi̠ṣṭapa̍-ṅgachChantyē̠tāva̍ntō̠ vai dē̍valō̠kāstēṣvē̠va ya̍thāpū̠rva-mprati̍ tiṣṭha̠ntyathō̍ ā̠krama̍ṇamē̠va ta-thsētu̠ṃ yaja̍mānāḥ kurvatē suva̠rgasya̍ lō̠kasya̠ sama̍ṣṭyai ॥ 27 ॥
(sada̍saḥ-saptada̠śaṃ-pra̠jāpa̍tē-rgāyati di̠gbhya ē̠vānnādya̠ṃ-pratyē-kā̍daśa cha) (a. 8)
a̠rkyē̍ṇa̠ vai sa̍hasra̠śaḥ pra̠jāpa̍tiḥ pra̠jā a̍sṛjata̠ tābhya̠ ilā̎dē̠nnērā̠ṃ lūtā̠mavā̍rundha̠ yada̠rkya̍-mbhava̍ti pra̠jā ē̠va ta-dyaja̍mānā-ssṛjanta̠ ilā̎da-mbhavati pra̠jābhya̍ ē̠va sṛ̠ṣṭābhya̠ irā̠ṃ lūtā̠mava̍ rundhatē̠ tasmā̠dyāgṃ samāgṃ̍ sa̠tragṃ samṛ̍ddha̠-ṅkṣōdhu̍kā̠stāgṃ samā̎-mpra̠jā iṣa̠gg̠ hyā̍sā̠mūrja̍mā̠dada̍tē̠ yāgṃ samā̠ṃ vyṛ̍ddha̠-makṣō̍dhukā̠stāgṃ samā̎-mpra̠jā [samā̎-mpra̠jāḥ, na hyā̍sā̠miṣa̠] 28
na hyā̍sā̠miṣa̠-mūrja̍-mā̠dada̍ta utkrō̠da-ṅku̍rvatē̠ yathā̍ ba̠ndhā-nmu̍muchā̠nā u̍tkrō̠da-ṅku̠rvata̍ ē̠vamē̠va ta-dyaja̍mānā dēvaba̠ndhā-nmu̍muchā̠nā u̍tkrō̠da-ṅku̍rvata̠ iṣa̠mūrja̍mā̠tma-ndadhā̍nā vā̠ṇa-śśa̠tata̍nturbhavati śa̠tāyu̠ḥ puru̍ṣa-śśa̠tēndri̍ya̠ āyu̍ṣyē̠vēndri̠yē prati̍ tiṣṭhantyā̠ji-ndhā̍va̠ntyana̍bhijitasyā̠-bhiji̍tyai dundu̠bhīn-thsa̠māghna̍nti para̠mā vā ē̠ṣā vāgyā du̍ndu̠bhau pa̍ra̠māmē̠va [ ] 29
vācha̠mava̍ rundhatē bhūmidundu̠bhimā ghna̍nti̠ yaivēmāṃ vā-kpravi̍ṣṭā̠ tāmē̠vāva̍ rundha̠tē ‘thō̍ i̠māmē̠va ja̍yanti̠ sarvā̠ vāchō̍ vadanti̠ sarvā̍sāṃ vā̠chāmava̍ruddhyā ā̠rdrēcharma̠n vyāya̍chChētē indri̠yasyā va̍ruddhyā̠ ā-‘nyaḥ krōśa̍ti̠ prānya-śśagṃ̍sati̠ ya ā̠krōśa̍ti pu̠nātyē̠vainā̠nthsa yaḥ pra̠śagṃsa̍ti pū̠tēṣvē̠vā-‘nnādya̍-ndadhā̠tyṛṣi̍kṛta-ñcha̠ [-ndadhā̠tyṛṣi̍kṛta-ñcha̠, vā ē̠tē] 30
vā ē̠tē dē̠vakṛ̍ta-ñcha̠ pūrvai̠rmāsai̠rava̍ rundhatē̠ ya-dbhū̍tē̠chChadā̠gṃ̠ sāmā̍ni̠ bhava̍ntyu̠bhaya̠syāva̍ruddhyai̠ yanti̠ vā ē̠tē mi̍thu̠nādyē sa̍ṃvathsa̠ra-mu̍pa̠yantya̍ntarvē̠di mi̍thu̠nau sa-mbha̍vata̠stēnai̠va mi̍thu̠nānna ya̍nti ॥ 31 ॥
(vyṛ̍ddha̠makṣō̍dhukā̠stāgṃ samā̎-mpra̠jāḥ – pa̍ra̠māmē̠va – cha̍ – tri̠gṃ̠śachcha̍) (a. 9)
charmāva̍ bhindanti pā̠pmāna̍mē̠vaiṣā̠mava̍ bhindanti̠ mā-‘pa̍ rāthsī̠rmā-‘ti̍ vyāthsī̠rityā̍ha sampra̠tyē̍vaiṣā̎-mpā̠pmāna̠mava̍ bhindantyudaku̠mbhāna̍dhini̠dhāya̍ dā̠syō̍ mārjā̠līya̠-mpari̍ nṛtyanti pa̠dō ni̍ghna̠tīri̠damma̍dhu̠-ṅgāya̍ntyō̠ madhu̠ vai dē̠vānā̎-mpara̠ma-ma̠nnādya̍-mpara̠mamē̠vā-nnādya̠mava̍ rundhatē pa̠dō ni ghna̍nti mahī̠yāmē̠vaiṣu̍ dadhati ॥ 32 ॥
(charmai – kā̠nnapa̍ñchā̠śat) (a. 10)
pṛ̠thi̠vyai svāhā̠ ‘ntari̍kṣāya̠ svāhā̍ di̠vē svāhā̍ samplōṣya̠tē svāhā̍ sa̠plaṃva̍mānāya̠ svāhā̠ samplu̍tāya̠ svāhā̍ mēghāyiṣya̠tē svāhā̍ mēghāya̠tē svāhā̍ mēghi̠tāya̠ svāhā̍ mē̠ghāya̠ svāhā̍ nīhā̠rāya̠ svāhā̍ ni̠hākā̍yai̠ svāhā̎ prāsa̠chāya̠ svāhā̎ pracha̠lākā̍yai̠ svāhā̍ vidyōtiṣya̠tē svāhā̍ vi̠dyōta̍mānāya̠ svāhā̍ saṃvi̠dyōta̍mānāya̠ svāhā̎ stanayiṣya̠tē svāhā̎ sta̠naya̍tē̠ svāhō̠ -gragg sta̠naya̍tē̠ svāhā̍ varṣiṣya̠tē svāhā̠ varṣa̍tē̠ svāhā̍ ‘bhi̠varṣa̍tē̠ svāhā̍ pari̠varṣa̍tē̠ svāhā̍ sa̠ṃvarṣa̍tē̠ [sa̠ṃvarṣa̍tē, svāhā̍ ‘nu̠varṣa̍tē̠ svāhā̍] 33
svāhā̍ ‘nu̠varṣa̍tē̠ svāhā̍ śīkāyiṣya̠tē svāhā̍ śīkāya̠tē svāhā̍ śīki̠tāya̠ svāhā̎prōṣiṣya̠tē svāhā̎ pruṣṇa̠tē svāhā̍ paripruṣṇa̠tē svāhō̎-dgrahīṣya̠tē svāhō̎ dgṛhṇa̠tē svāhō-dgṛ̍hītāya̠ svāhā̍ viplōṣya̠tē svāhā̍ vi̠plava̍mānāya̠ svāhā̠ viplu̍tāya̠ svāhā̍ ”taphsya̠tē svāhā̠ ”tapa̍tē ̠svāhō̠-gramā̠tapa̍tē̠ svāha̠ -rgbhya-ssvāhā̠ yaju̍rbhya̠-ssvāhā̠ sāma̍bhya̠-ssvāhā ‘ṅgi̍rōbhya̠-ssvāhā̠ vēdē̎bhya̠-ssvāhā̠ gāthā̎bhya̠-ssvāhā̍ nārāśa̠gṃ̠sībhya̠-ssvāhā̠ raibhī̎bhya̠-ssvāhā̠ sarva̍smai̠ svāhā̎ ॥ 34 ॥
(sa̠ṃvarṣa̍tē̠ – raibhī̎bhya̠-ssvāhā̠ – dvē cha̍) (a. 11)
da̠tvatē̠ svāhā̍ ‘da̠ntakā̍ya̠ svāhā̎ prā̠ṇinē̠ svāhā̎ ‘prā̠ṇāya̠ svāhā̠ mukha̍vatē̠ svāhā̍-‘mu̠khāya̠ svāhā̠ nāsi̍kavatē̠ svāhā̍ ‘nāsi̠kāya̠ svāhā̎ ‘kṣa̠ṇvatē̠ svāhā̍-‘na̠kṣikā̍ya̠ svāhā̍ ka̠rṇinē̠ svāhā̍ ‘ka̠rṇakā̍ya̠ svāhā̍ śīrṣa̠ṇvatē̠ svāhā̍-‘śī̠r̠ṣakā̍ya̠ svāhā̍ pa̠dvatē̠ svāhā̍ ‘pā̠dakā̍ya̠ svāhā̎ prāṇa̠tē svāhā ‘prā̍ṇatē̠ svāhā̠ vada̍tē̠ svāhā ‘va̍datē̠ svāhā̠ paśya̍tē̠ svāhā ‘pa̍śyatē̠ svāhā̍ śṛṇva̠tē svāhā ‘śṛ̍ṇvatē̠ svāhā̍ mana̠svinē̠ svāhā̍- [mana̠svinē̠ svāhā̎, a̠ma̠nasē̠ svāhā̍] 35
-‘ma̠nasē̠ svāhā̍ rēta̠svinē̠ svāhā̍ ‘rē̠taskā̍ya̠ svāhā̎ pra̠jābhya̠-ssvāhā̎ pra̠jana̍nāya̠ svāhā̠ lōma̍vatē̠ svāhā̍ ‘lō̠makā̍ya̠ svāhā̎ tva̠chē svāhā̠ ‘tvakkā̍ya̠ svāhā̠ charma̍ṇvatē̠ svāhā̍ ‘cha̠rmakā̍ya̠ svāhā̠ lōhi̍tavatē̠ svāhā̍-‘lōhi̠tāya̠ svāhā̍ māgṃsa̠nvatē̠ svāhā̍ ‘mā̠gṃ̠sakā̍ya̠ svāhā̠ snāva̍bhya̠-ssvāhā̎ ‘snā̠vakā̍ya̠ svāhā̎ stha̠nvatē̠ svāhā̍-‘na̠sthikā̍ya̠ svāhā̍ majja̠nvatē̠ svāhā̍ ‘ma̠jjakā̍ya̠ svāhā̠ ‘ṅginē̠ svāhā̍-‘na̠ṅgāya̠ svāhā̠ ”tmanē̠ svāhā ‘nā̎tmanē̠ svāhā̠ sarva̍smai̠ svāhā̎ ॥ 36 ॥
(ma̠na̠svinē̠ svāhā – ‘nā̎tmanē̠ svāhā̠ – dvē cha̍) (a. 12)
kastvā̍ yunakti̠ sa tvā̍ yunaktu̠ viṣṇu̍stvā yunaktva̠sya ya̠jñasyardhyai̠ mahya̠gṃ̠ sanna̍tyā a̠muṣmai̠ kāmā̠yā-”yu̍ṣē tvā prā̠ṇāya̍ tvā ‘pā̠nāya̍ tvā vyā̠nāya̍ tvā̠ vyu̍ṣṭyai tvā ra̠yyai tvā̠ rādha̍sē tvā̠ ghōṣā̍ya tvā̠ pōṣā̍ya tvā ”rādghō̠ṣāya̍ tvā̠ prachyu̍tyai tvā ॥ 37 ॥
(kastvā̠ – ‘ṣṭātrigṃ̍śat) (a. 13)
a̠gnayē̍ gāya̠trāya̍ tri̠vṛtē̠ rātha̍ntarāya vāsa̠ntāyā̠-ṣṭāka̍pāla̠ indrā̍ya̠ traiṣṭu̍bhāya pañchada̠śāya̠ bārha̍tāya̠ graiṣmā̠yaikā̍daśakapālō̠ viśvē̎bhyō dē̠vēbhyō̠ jāga̍tēbhya-ssaptada̠śēbhyō̍ vairū̠pēbhyō̠ vārṣi̍kēbhyō̠ dvāda̍śakapālō mi̠trāvaru̍ṇābhyā̠-mānu̍ṣṭubhābhyā-mēkavi̠gṃ̠śābhyā̎ṃ vairā̠jābhyāgṃ̍ śāra̠dābhyā̎-mpaya̠syā̍ bṛha̠spata̍yē̠ pāṅktā̍ya triṇa̠vāya̍ śākva̠rāya̠ haima̍ntikāya cha̠ru-ssa̍vi̠tra ā̍tichChanda̠sāya̍ trayastri̠gṃ̠śāya̍ raiva̠tāya̍ śaiśi̠rāya̠ dvāda̍śakapā̠lō ‘di̍tyai̠ viṣṇu̍patnyai cha̠rura̠gnayē̍ vaiśvāna̠rāya̠ dvāda̍śakapā̠lō ‘nu̍matyai cha̠ruḥ kā̠ya ēka̍kapālaḥ ॥ 38 ॥
(a̠gnayē-‘di̍tyā̠ anu̍matyai – sa̠ptacha̍tvārigṃśat) (a. 14)
yō vā a̠gnāva̠gniḥ pra̍hri̠yatē̠ yaścha̠ sōmō̠ rājā̠ tayō̍rē̠ṣa ā̍ti̠thyaṃ yada̍gnīṣō̠mīyō-‘thai̠ṣa ru̠drō yaśchī̠yatē̠ ya-thsañchi̍tē̠-‘gnāvē̠tāni̍ ha̠vīgṃṣi̠ na ni̠rvapē̍dē̠ṣa ē̠va ru̠drō-‘śā̎mta upō̠tthāya̍ pra̠jā-mpa̠śūn yaja̍mānasyā̠bhi ma̍nyēta̠ ya-thsañchi̍tē̠-‘gnāvē̠tāni̍ ha̠vīgṃṣi̍ ni̠rvapa̍ti bhāga̠dhēyē̍nai̠vainagṃ̍ śamayati̠ nāsya̍ ru̠drō-‘śā̎mta [ru̠drō-‘śā̎mtaḥ, u̠pō̠tthāya̍] 39
upō̠tthāya̍ pra̠jā-mpa̠śūna̠bhi ma̍nyatē̠ daśa̍ ha̠vīgṃṣi̍ bhavanti̠ nava̠ vai puru̍ṣē prā̠ṇā nābhi̍rdaśa̠mī prā̠ṇānē̠va yaja̍mānē dadhā̠tyathō̠ daśā̎kṣarā vi̠rāḍanna̍ṃ vi̠rā-ḍvi̠rājyē̠vānnādyē̠ prati̍ tiṣṭhatyṛ̠tubhi̠rvā ē̠ṣa Chandō̍bhi̠-sstōmai̎ḥ pṛ̠ṣṭhaiśchē̍ta̠vya̍ ityā̍hu̠ryadē̠tāni̍ ha̠vīgṃṣi̍ ni̠rvapa̍tyṛ̠tubhi̍rē̠vaina̠-ñChandō̍bhi̠-sstōmai̎ḥ pṛ̠ṣṭhaiśchi̍nutē̠ diśa̍-ssuṣuvā̠ṇēnā̍ – [ ] 40
-bhi̠jityā̠ ityā̍hu̠ryadē̠tāni̍ ha̠vīgṃṣi̍ ni̠rvapa̍ti di̠śāma̠bhiji̍tyā ē̠tayā̠ vā indra̍-ndē̠vā a̍yājaya̠-ntasmā̍dindrasa̠va ē̠tayā̠ manu̍-mmanu̠ṣyā̎stasmā̎-nmanusa̠vō yathēndrō̍ dē̠vānā̠ṃ yathā̠ manu̍rmanu̠ṣyā̍ṇāmē̠va-mbha̍vati̠ ya ē̠vaṃ vi̠dvānē̠tayēṣṭyā̠ yaja̍tē̠ digva̍tīḥ purō-‘nuvā̠kyā̍ bhavanti̠ sarvā̍sā-ndi̠śāma̠bhiji̍tyai ॥ 41 ॥
(aśā̎mtaḥ – suṣuvā̠ṇēnai – ka̍chatvārigṃśachcha) (a. 15)
yaḥ prā̍ṇa̠tō ni̍miṣa̠tō ma̍hi̠tvaika̠ idrājā̠ jaga̍tō ba̠bhūva̍ । ya īśē̍ a̠sya dvi̠pada̠śchatu̍ṣpada̠ḥ kasmai̍ dē̠vāya̍ ha̠viṣā̍ vidhēma ॥ u̠pa̠yā̠magṛ̍hītō-‘si pra̠jāpa̍tayē tvā̠ juṣṭa̍-ṅgṛhṇāmi̠ tasya̍ tē̠ dyaurma̍hi̠mā nakṣa̍trāṇi rū̠pamā̍di̠tyastē̠ tēja̠stasmai̎ tvā mahi̠mnē pra̠jāpa̍tayē̠ svāhā̎ ॥ 42 ॥
(yaḥ prā̍ṇa̠tō dyaurā̍di̠tyō̎ – ‘ṣṭātrigṃ̍śat ) (a. 16)
ya ā̎tma̠dā ba̍la̠dā yasya̠ viśva̍ u̠pāsa̍tē pra̠śiṣa̠ṃ yasya̍ dē̠vāḥ । yasya̍ Chā̠yā-‘mṛta̠ṃ yasya̍ mṛ̠tyuḥ kasmai̍ dē̠vāya̍ ha̠viṣā̍ vidhēma ॥ u̠pa̠yā̠magṛ̍hītō-‘si pra̠jāpa̍tayē tvā̠ juṣṭa̍-ṅgṛhṇāmi̠ tasya̍ tē pṛthi̠vī ma̍hi̠mauṣa̍dhayō̠ vana̠spata̍yō rū̠pama̠gnistē̠ tēja̠stasmai̎ tvā mahi̠mnē pra̠jāpa̍tayē̠ svāhā̎ ॥ 43 ॥
(ya ā̎tma̠dāḥ pṛ̍thi̠vya̍gni-rēkā̠nnacha̍tvāri̠gṃ̠śat) (a. 17)
ā brahma̍-nbrāhma̠ṇō bra̍hmavarcha̠sī jā̍yatā̠mā ‘smi-nrā̠ṣṭrē rā̍ja̠nya̍ iṣa̠vya̍-śśūrō̍ mahāra̠thō jā̍yatā̠-ndōgdhrī̍dhē̠nurvōḍhā̍ ‘na̠ḍvānā̠śu-ssapti̠ḥ pura̍ndhi̠ryōṣā̍ ji̠ṣṇū ra̍thē̠ṣṭhā-ssa̠bhēyō̠ yuvā ”sya yaja̍mānasya vī̠rō jā̍yatā-nnikā̠mēni̍kāmē naḥ pa̠rjanyō̍ varṣatu pha̠linyō̍ na̠ ōṣa̍dhayaḥ pachyantāṃ yōgakṣē̠mōna̍ḥ kalpatām ॥ 44 ॥
(ā brahma̠ – nnēka̍chatvārigṃśat )(ā18)
ā-‘krān̍ vā̠jī pṛ̍thi̠vīma̠gniṃ yuja̍makṛta vā̠jyarvā ”krān̍ vā̠jya̍ntari̍kṣaṃ vā̠yuṃ yuja̍makṛta vā̠jyarvā̠ dyāṃ vā̠jyā-‘kragg̍sta̠ sūrya̠ṃ yuja̍makṛta vā̠jyarvā̠ ‘gnistē̍ vāji̠n̠ yuṅṅanu̠ tvā ” ra̍bhē sva̠sti mā̠ sa-mpā̍raya vā̠yustē̍ vāji̠n̠ yuṅṅanu̠ tvā ” ra̍bhē sva̠sti mā̠ sa- [sva̠sti mā̠ sam, pā̠ra̠yā̠ ”di̠tyastē̍] 45
-mpā̍rayā ”di̠tyastē̍ vāji̠n̠ yuṅṅanu̠ tvā ” ra̍bhē sva̠sti mā̠ sa-mpā̍raya prāṇa̠dhṛga̍si prā̠ṇa-mmē̍ dṛgṃha vyāna̠dhṛga̍si vyā̠na-mmē̍ dṛgṃhā ‘pāna̠dhṛga̍syapā̠na-mma̍ dṛgṃha̠ chakṣu̍rasi̠ chakṣu̠rmayi̍ dhēhi̠ śrōtra̍masi̠ śrōtra̠-mmayi̍ dhē̠hyāyu̍ra̠syāyu̠rmayi̍ dhēhi ॥ 46 ॥
(vā̠yustē̍ vāji̠n̠ yuṅṅanu̠ tvā ” ra̍bhē sva̠sti mā̠ saṃ – tricha̍tvārigṃśachcha) (a. 19)
jajñi̠ bīja̠ṃ varṣṭā̍ pa̠rjanya̠ḥ paktā̍ sa̠syagṃ su̍pippa̠lā ōṣa̍dhaya-ssvadhichara̠ṇēyagṃ sū̍pasada̠nō̎-‘gni-ssva̍ddhya̠kṣama̠ntari̍kṣagṃsupā̠vaḥ pava̍māna-ssūpasthā̠nā dyau-śśi̠vama̠sau tapa̍n yathāpū̠rvama̍hōrā̠trē pa̍ñchada̠śinō̎ ‘rdhamā̠sā-stri̠gṃ̠śinō̠ māsā̎ḥ kLi̠ptā ṛ̠tava̍-śśā̠nta-ssa̍ṃvathsa̠raḥ ॥ 47 ॥
(jajñi̠ bīja̠ – mēka̍trigṃśat) (a. 20)
ā̠gnē̠yō̎-‘ṣṭāka̍pāla-ssau̠myaścha̠ru-ssā̍vi̠trō̎-‘ṣṭāka̍pālaḥ pau̠ṣṇaścha̠rū rau̠draścha̠rura̠gnayē̍ vaiśvāna̠rāya̠ dvāda̍śakapālō mṛgākha̠rē yadi̠ nā-”gachChē̍-da̠gnayē-‘gṃ̍hō̠muchē̠-‘ṣṭāka̍pāla-ssau̠rya-mpayō̍ vāya̠vya̍ ājya̍bhāgaḥ ॥ 48 ॥
(ā̠gnē̠ya – śchatu̍rvigṃśatiḥ) (a. 21)
a̠gnayē-‘gṃ̍hō̠muchē̠-‘ṣṭāka̍pāla̠ indrā̍yā-‘gṃhō̠mucha̠ ēkā̍daśakapālō mi̠trāvaru̍ṇābhyā-māgō̠mugbhyā̎-mpaya̠syā̍ vāyōsāvi̠tra ā̍gō̠mugbhyā̎-ñcha̠rura̠śvibhyā̍-māgō̠mugbhyā̎-ndhā̠nā ma̠rudbhya̍ ēnō̠mugbhya̍-ssa̠ptaka̍pālō̠ viśvē̎bhyō dē̠vēbhya̍ ēnō̠mugbhyō̠ dvāda̍śakapā̠lō ‘nu̍matyai cha̠rura̠gnayē̍ vaiśvāna̠rāya̠ dvāda̍śakapālō̠ dyāvā̍pṛthi̠vībhyā̍-magṃhō̠mugbhyā̎-ndvikapā̠laḥ ॥ 49 ॥
(a̠gnayē-‘gṃ̍hō̠muchē̎ – tri̠gṃ̠śat) (a. 22)
a̠gnayē̠ sama̍nama-tpṛthi̠vyai sama̍nama̠dyathā̠-‘gniḥ pṛ̍thi̠vyā sa̠mana̍madē̠va-mmahya̍-mbha̠drā-ssanna̍taya̠-ssa-nna̍mantu vā̠yavē̠ sama̍namada̠ntari̍kṣāya̠ sama̍nama̠dyathā̍ vā̠yura̠ntari̍kṣēṇa̠ sūryā̍ya̠ sama̍namaddi̠vē sama̍nama̠dyathā̠ sūryō̍ di̠vā cha̠ndrama̍sē̠ sama̍nama̠nnakṣa̍trēbhya̠-ssama̍nama̠dyathā̍ cha̠ndramā̠ nakṣa̍trai̠rvaru̍ṇāya̠ sama̍namada̠dbhya-ssama̍nama̠-dyathā̠ [-ssama̍nama̠-dyathā̎, varu̍ṇō̠-‘dbhi-ssāmnē̠] 50
varu̍ṇō̠-‘dbhi-ssāmnē̠ sama̍namadṛ̠chē sama̍nama̠dyathā̠ sāma̠rchā brahma̍ṇē̠ sama̍nama-tkṣa̠trāya̠ sama̍nama̠dyathā̠ brahma̍ kṣa̠trēṇa̠ rājñē̠ sama̍nama-dvi̠śē sama̍nama̠dyathā̠ rājā̍ vi̠śā rathā̍ya̠-ssama̍nama̠daśvē̎bhya̠-ssama̍nama̠dyathā̠ rathō-‘śvai̎ḥ pra̠jāpa̍tayē̠ sama̍nama-dbhū̠tēbhya̠-ssama̍nama̠dyathā̎ pra̠jāpa̍tirbhū̠tai-ssa̠mana̍madē̠va-mmahya̍-mbha̠drā-ssanna̍taya̠-ssa-nna̍mantu ॥ 51 ॥
(a̠dbhya-ssama̍nama̠dyathā̠-mahya̍ṃ-cha̠tvāri̍ cha) (a. 23)
yē tē̠ panthā̍na-ssavitaḥ pū̠rvyāsō̍-‘rē̠ṇavō̠ vita̍tā a̠ntari̍kṣē । tēbhi̍rnō a̠dya pa̠thibhi̍-ssu̠gēbhī̠ rakṣā̍ cha nō̠ adhi̍ cha dēva brūhi ॥ namō̠-‘gnayē̍ pṛthivi̠kṣitē̍ lōka̠spṛtē̍ lō̠kama̠smai yaja̍mānāya dēhi̠ namō̍ vā̠yavē̎-‘ntarikṣa̠kṣitē̍ lōka̠spṛtē̍ lō̠kama̠smai yaja̍mānāya dēhi̠ nama̠-ssūryā̍ya divi̠kṣitē̍ lōka̠spṛtē̍ lō̠kama̠smai yaja̍mānāya dēhi ॥ 52 ॥
(yē tē̠ – chatu̍śchatvārigṃśat) (a. 24)
yō vā aśva̍sya̠ mēddhya̍sya̠ śirō̠ vēda̍ śīrṣa̠ṇvā-nmēddhyō̍ bhavatyu̠ṣā vā aśva̍sya̠ mēddhya̍sya̠ śira̠-ssūrya̠śchakṣu̠rvāta̍ḥ prā̠ṇaścha̠ndramā̠-śśrōtra̠-ndiśa̠ḥ pādā̍ avāntaradi̠śāḥ parśa̍vō-‘hōrā̠trē ni̍mē̠ṣō̎-‘rdhamā̠sāḥ parvā̍ṇi̠ māsā̎-ssa̠dhānnā̎nyṛ̠tavō-‘ṅgā̍ni saṃvathsa̠ra ā̠tmā ra̠śmaya̠ḥ kēśā̠ nakṣa̍trāṇi rū̠pa-ntāra̍kā a̠sthāni̠ nabhō̍ mā̠gṃ̠sānyōṣa̍dhayō̠ lōmā̍ni̠ vana̠spata̍yō̠ vālā̍ a̠gnirmukha̍ṃ vaiśvāna̠rō vyāttagṃ̍ [vyātta̎m, sa̠mu̠dra u̠dara̍ma̠ntari̍kṣa-] 53
samu̠dra u̠dara̍ma̠ntari̍kṣa-mpā̠yu-rdyāvā̍pṛthi̠vī ā̠ṇḍau grāvā̠ śēpa̠-ssōmō̠ rētō̠ yajja̍ñja̠bhyatē̠ tadvi dyō̍tatē̠ yadvi̍dhūnu̠tē ta-thsta̍nayati̠ yanmēha̍ti̠ tadva̍rṣati̠ vāgē̠vāsya̠ vāgaha̠rvā aśva̍sya̠ jāya̍mānasya mahi̠mā pu̠rastā̎jjāyatē̠ rātri̍rēna-mmahi̠mā pa̠śchādanu̍ jāyata ē̠tau vai ma̍hi̠mānā̠-vaśva̍ma̠bhita̠-ssa-mba̍bhūvatu̠r̠hayō̍ dē̠vāna̍vaha̠ darvā-‘su̍rān vā̠jī ga̍ndha̠rvā-naśvō̍ manu̠ṣyā̎m-thsamu̠drō vā aśva̍sya̠ yōni̍-ssamu̠drō bandhu̍ḥ ॥ 54 ॥
(vyātta̍ – mavaha̠-d- dvāda̍śa cha ) (a. 25)
(gāvō̠ – gāva̠-ssiṣā̍santīḥ- pratha̠mē mā̠si – sa̍mā̠nyō̍ – yadi̠ sōmau̍- ṣaḍa̠hai – ru̠-thsṛjyā(3)n – dē̠vānā̍ – ma̠rkyē̍ṇa̠ – charmā-‘va̍ – pṛthi̠vyai – da̠tvatē̠ – kastvā̠ – ‘gnayē̠ – yō vai – yaḥ prā̍ṇa̠tō – ya ā̎tma̠dā – ā brahma̠ – nnā-‘krā̠n – jajñi̠ bīja̍ – māgnē̠yō̎-‘ṣṭāka̍pālō̠ – ‘gnayē-‘gṃ̍hō̠muchē̠-‘ṣṭāka̍pālō̠ – ‘gnayē̠sama̍nama̠–dyē tē̠ panthā̍nō̠ – yō vā aśva̍sya̠mēddhya̍sya̠ śira̠ḥ – pañcha̍vigṃśatiḥ)
(gāva̍ḥ – samā̠nya̍ḥ – sava̍namaṣṭā̠bhi – rvā ē̠tē dē̠vakṛ̍tañchā – ‘bhi̠jityā̠ ityā̍hu̠ -rvaru̍ṇō̠-‘dbhi-ssāmnē̠ – chatu̍ṣ pañchā̠sat)
(gāvō̠, yōni̍ ssamu̠drō bandhu̍ḥ)
(pra̠janana̍gṃ – sādyāḥ – pra̠java̠ṃ – bṛha̠spati̠ – rgāvaḥ – pañcha̍) (7)
(i̠ṣē, vā̍ya̠vya̍, mpra̠jāpa̍ti, ryuñjā̠nā, ssā̍vi̠trāṇi̍, prāchīna̍vagṃśa, mpra̠jana̍nagṃ, sapta) (7)
॥ hari̍ḥ ōm ॥
॥ kṛṣṇa yajurvēdīya taittirīya saṃhitāyāṃ saptamakāṇḍē pañchamaḥ praśna-ssamāptaḥ ॥
॥ iti taittirīyasaṃhitā samāptā ॥