গৃত্সমদ উবাচ ।
বিঘ্নেশবীর্যাণি বিচিত্রকাণি
বংদীজনৈর্মাগধকৈঃ স্মৃতানি ।
শ্রুত্বা সমুত্তিষ্ঠ গজানন ত্বং
ব্রাহ্মে জগন্মংগলকং কুরুষ্ব ॥ 1 ॥
এবং মযা প্রার্থিত বিঘ্নরাজ-
-শ্চিত্তেন চোত্থায বহির্গণেশঃ ।
তং নির্গতং বীক্ষ্য নমংতি দেবাঃ
শংভ্বাদযো যোগিমুখাস্তথাহম্ ॥ 2 ॥
শৌচাদিকং তে পরিকল্পযামি
হেরংব বৈ দংতবিশুদ্ধিমেবম্ ।
বস্ত্রেণ সংপ্রোক্ষ্য মুখারবিংদং
দেবং সভাযাং বিনিবেশযামি ॥ 3 ॥
দ্বিজাদিসর্বৈরভিবংদিতং চ
শুকাদিভির্মোদসুমোদকাদ্যৈঃ ।
সংভাষ্য চালোক্য সমুত্থিতং তং
সুমংডপং কল্প্য নিবেশযামি ॥ 4 ॥
রত্নৈঃ সুদীপ্তৈঃ প্রতিবিংবিতং তং
পশ্যামি চিত্তেন বিনাযকং চ ।
তত্রাসনং রত্নসুবর্ণযুক্তং
সংকল্প্য দেবং বিনিবেশযামি ॥ 5 ॥
সিদ্ধ্যা চ বুদ্ধ্যা সহ বিঘ্নরাজ
পাদ্যং কুরু প্রেমভরেণ সর্বৈঃ ।
সুবাসিতং নীরমথো গৃহাণ
চিত্তেন দত্তং চ সুখোষ্ণভাবম্ ॥ 6 ॥
ততঃ সুবস্ত্রেণ গণেশমাদৌ
সংপ্রোক্ষ্য দূর্বাদিভিরর্চযামি ।
চিত্তেন ভাবপ্রিয দীনবংধো
মনো বিলীনং কুরু তে পদাব্জে ॥ 7 ॥
কর্পূরকৈলাদিসুবাসিতং তু
সুকল্পিতং তোযমথো গৃহাণ ।
আচম্য তেনৈব গজানন ত্বং
কৃপাকটাক্ষেণ বিলোকযাশু ॥ 8 ॥
প্রবালমুক্তাফলহাটকাদ্যৈঃ
সুসংস্কৃতং হ্যংতরভাবকেন ।
অনর্ঘ্যমর্ঘ্যং সফলং কুরুষ্ব
মযা প্রদত্তং গণরাজ ঢুংঢে ॥ 9 ॥
সৌগংধ্যযুক্তং মধুপর্কমাদ্যং
সংকল্পিতং ভাবযুতং গৃহাণ ।
পুনস্তথাচম্য বিনাযক ত্বং
ভক্তাংশ্চ ভক্তেশ সুরক্ষযাশু ॥ 10 ॥
সুবাসিতং চংপকজাতিকাদ্যৈ-
-স্তৈলং মযা কল্পিতমেব ঢুংঢে ।
গৃহাণ তেন প্রবিমর্দযামি
সর্বাংগমেবং তব সেবনায ॥ 11 ॥
ততঃ সুখোষ্ণেন জলেন চাহ-
-মনেকতীর্থাহৃতকেন ঢুংঢে ।
চিত্তেন শুদ্ধেন চ স্নাপযামি
স্নানং মযা দত্তমথো গৃহাণ ॥ 12 ॥
ততঃ পযঃস্নানমচিংত্যভাব
গৃহাণ তোযস্য তথা গণেশ ।
পুনর্দধিস্নানমনাময ত্বং
চিত্তেন দত্তং চ জলস্য চৈব ॥ 13 ॥
ততো ঘৃতস্নানমপারবংদ্য
সুতীর্থজং বিঘ্নহর প্রসীদ ।
গৃহাণ চিত্তেন সুকল্পিতং তু
ততো মধুস্নানমথো জলস্য ॥ 14 ॥
সুশর্করাযুক্তমথো গৃহাণ
স্নানং মযা কল্পিতমেব ঢুংঢে ।
ততো জলস্নানমঘাপহংতৃ
বিঘ্নেশ মাযাভ্রমং বারযাশু ॥ 15 ॥
সুযক্ষপংকস্থমথো গৃহাণ
স্নানং পরেশাধিপতে ততশ্চ ।
কৌমংডলীসংভবজং কুরুষ্ব
বিশুদ্ধমেবং পরিকল্পিতং তু ॥ 16 ॥
ততস্তু সূক্তৈর্মনসা গণেশং
সংপূজ্য দূর্বাদিভিরল্পভাবৈঃ ।
অপারকৈর্মংডলভূতব্রহ্ম-
-ণস্পত্যকৈস্তং হ্যভিষেচযামি ॥ 17 ॥
ততঃ সুবস্ত্রেণ তু প্রোংছনং ত্বং
গৃহাণ চিত্তেন মযা সুকল্পিতম্ ।
ততো বিশুদ্ধেন জলেন ঢুংঢে
হ্যাচাংতমেবং কুরু বিঘ্নরাজ ॥ 18 ॥
অগ্নৌ বিশুদ্ধে তু গৃহাণ বস্ত্রে
হ্যনর্ঘ্যমৌল্যে মনসা মযা তে ।
দত্তে পরিচ্ছাদ্য নিজাত্মদেহং
তাভ্যাং মযূরেশ জনাংশ্চ পালয ॥ 19 ॥
আচম্য বিঘ্নেশ পুনস্তথৈব
চিত্তেন দত্তং মুখমুত্তরীযম্ ।
গৃহাণ ভক্তপ্রতিপালক ত্বং
নমো যথা তারকসংযুতং তু ॥ 20 ॥
যজ্ঞোপবীতং ত্রিগুণস্বরূপং
সৌবর্ণমেবং হ্যহিনাথভূতম্ ।
ভাবেন দত্তং গণনাথ তত্ত্বং
গৃহাণ ভক্তোদ্ধৃতিকারণায ॥ 21 ॥
আচাংতমেবং মনসা প্রদত্তং
কুরুষ্ব শুদ্ধেন জলেন ঢুংঢে ।
পুনশ্চ কৌমংডলকেন পাহি বিশ্বং
প্রভো খেলকরং সদা তে ॥ 22 ॥
উদ্যদ্দিনেশাভমথো গৃহাণ
সিংদূরকং তে মনসা প্রদত্তম্ ।
সর্বাংগসংলেপনমাদরাদ্বৈ
কুরুষ্ব হেরংব চ তেন পূর্ণম্ ॥ 23 ॥
সহস্রশীর্ষং মনসা মযা ত্বং
দত্তং কিরীটং তু সুবর্ণজং বৈ ।
অনেকরত্নৈঃ খচিতং গৃহাণ
ব্রহ্মেশ তে মস্তকশোভনায ॥ 24 ॥
বিচিত্ররত্নৈঃ কনকেন ঢুংঢে
যুতানি চিত্তেন মযা পরেশ ।
দত্তানি নানাপদকুংডলানি
গৃহাণ শূর্পশ্রুতিভূষণায ॥ 25 ॥
শুংডাবিভূষার্থমনংতখেলিন্
সুবর্ণজং কংচুকমাগৃহাণ ।
রত্নৈশ্চ যুক্তং মনসা মযা য-
-দ্দত্তং প্রভো তত্সফলং কুরুষ্ব ॥ 26 ॥
সুবর্ণরত্নৈশ্চ যুতানি ঢুংঢে
সদৈকদংতাভরণানি কল্প্য ।
গৃহাণ চূডাকৃতযে পরেশ
দত্তানি দংতস্য চ শোভনার্থম্ ॥ 27 ॥
রত্নৈঃ সুবর্ণেন কৃতানি তানি
গৃহাণ চত্বারি মযা প্রকল্প্য ।
সংভূষয ত্বং কটকানি নাথ
চতুর্ভুজেষু হ্যজ বিঘ্নহারিন্ ॥ 28 ॥
বিচিত্ররত্নৈঃ খচিতং সুবর্ণ-
-সংভূতকং গৃহ্য মযা প্রদত্তম্ ।
তথাংগুলীষ্বংগুলিকং গণেশ
চিত্তেন সংশোভয তত্পরেশ ॥ 29 ॥
বিচিত্ররত্নৈঃ খচিতানি ঢুংঢে
কেযূরকাণি হ্যথ কল্পিতানি ।
সুবর্ণজানি প্রমথাধিনাথ
গৃহাণ দত্তানি তু বাহুষু ত্বম্ ॥ 30 ॥
প্রবালমুক্তাফলরত্নজৈস্ত্বং
সুবর্ণসূত্রৈশ্চ গৃহাণ কংঠে ।
চিত্তেন দত্তা বিবিধাশ্চ মালা
উরোদরে শোভয বিঘ্নরাজ ॥ 31 ॥
চংদ্রং ললাটে গণনাথ পূর্ণং
বৃদ্ধিক্ষযাভ্যাং তু বিহীনমাদ্যম্ ।
সংশোভয ত্বং বরসংযুতং তে
ভক্তিপ্রিযত্বং প্রকটীকুরুষ্ব ॥ 32 ॥
চিংতামণিং চিংতিতদং পরেশ
হৃদ্দেশগং জ্যোতির্মযং কুরুষ্ব ।
মণিং সদানংদসুখপ্রদং চ
বিঘ্নেশ দীনার্থদ পালযস্ব ॥ 33 ॥
নাভৌ ফণীশং চ সহস্রশীর্ষং
সংবেষ্টনেনৈব গণাধিনাথ ।
ভক্তং সুভূষং কুরু ভূষণেন
বরপ্রদানং সফলং পরেশ ॥ 34 ॥
কটীতটে রত্নসুবর্ণযুক্তাং
কাংচীং সুচিত্তেন চ ধারযামি ।
বিঘ্নেশ জ্যোতির্গণদীপনীং তে
প্রসীদ ভক্তং কুরু মাং দযাব্ধে ॥ 35 ॥
হেরংব তে রত্নসুবর্ণযুক্তে
সুনূপুরে মংজিরকে তথৈব ।
সুকিংকিণীনাদযুতে সুবুদ্ধ্যা
সুপাদযোঃ শোভয মে প্রদত্তে ॥ 36 ॥
ইত্যাদি নানাবিধভূষণানি
তবেচ্ছযা মানসকল্পিতানি ।
সংভূষযাম্যেব ত্বদংগকেষু
বিচিত্রধাতুপ্রভবানি ঢুংঢে ॥ 37 ॥
সুচংদনং রক্তমমোঘবীর্যং
সুঘর্ষিতং হ্যষ্টকগংধমুখ্যৈঃ ।
যুক্তং মযা কল্পিতমেকদংত
গৃহাণ তে ত্বংগবিলেপনার্থম্ ॥ 38 ॥
লিপ্তেষু বৈচিত্র্যমথাষ্টগংধৈ-
-রংগেষু তেঽহং প্রকরোমি চিত্রম্ ।
প্রসীদ চিত্তেন বিনাযক ত্বং
ততঃ সুরক্তং রবিমেব ফালে ॥ 39 ॥
ঘৃতেন বৈ কুংকুমকেন রক্তান্
সুতংডুলাংস্তে পরিকল্পযামি ।
ফালে গণাধ্যক্ষ গৃহাণ পাহি
ভক্তান্ সুভক্তিপ্রিয দীনবংধো ॥ 40 ॥
গৃহাণ ভো চংপকমালতীনি
জলপংকজানি স্থলপংকজানি ।
চিত্তেন দত্তানি চ মল্লিকানি
পুষ্পাণি নানাবিধবৃক্ষজানি ॥ 41 ॥
পুষ্পোপরি ত্বং মনসা গৃহাণ
হেরংব মংদারশমীদলানি ।
মযা সুচিত্তেন প্রকল্পিতানি
হ্যপারকাণি প্রণবাকৃতে তু ॥ 42 ॥
দূর্বাংকুরান্বৈ মনসা প্রদত্তাং-
-স্ত্রিপংচপত্রৈর্যুতকাংশ্চ স্নিগ্ধান্ ।
গৃহাণ বিঘ্নেশ্বর সংখ্যযা ত্বং
হীনাংশ্চ সর্বোপরি বক্রতুংড ॥ 43 ॥
দশাংগভূতং মনসা মযা তে
ধূপং প্রদত্তং গণরাজ ঢুংঢে ।
গৃহাণ সৌরভ্যকরং পরেশ
সিদ্ধ্যা চ বুদ্ধ্যা সহ ভক্তপাল ॥ 44 ॥
দীপং সুবর্ত্যা যুতমাদরাত্তে
দত্তং মযা মানসকং গণেশ ।
গৃহাণ নানাবিধজং ঘৃতাদি-
-তৈলাদিসংভূতমমোঘদৃষ্টে ॥ 45 ॥
ভোজ্যং চ লেহ্যং গণরাজ পেযং
চোষ্যং চ নানাবিধষড্রসাঢ্যম্ ।
গৃহাণ নৈবেদ্যমথো মযা তে
সুকল্পিতং পুষ্টিপতে মহাত্মন্ ॥ 46 ॥
সুবাসিতং ভোজনমধ্যভাগে
জলং মযা দত্তমথো গৃহাণ ।
কমংডলুস্থং মনসা গণেশ
পিবস্ব বিশ্বাদিকতৃপ্তিকারিন্ ॥ 47 ॥
ততঃ করোদ্বর্তনকং গৃহাণ
সৌগংধ্যযুক্তং মুখমার্জনায ।
সুবাসিতেনৈব সুতীর্থজেন
সুকল্পিতং নাথ গৃহাণ ঢুংঢে ॥ 48 ॥
পুনস্তথাচম্য সুবাসিতং চ
দত্তং মযা তীর্থজলং পিবস্ব ।
প্রকল্প্য বিঘ্নেশ ততঃ পরং তে
সংপ্রোংছনং হস্তমুখে করোমি ॥ 49 ॥
দ্রাক্ষাদিরংভাফলচূতকানি
খার্জূরকার্কংধুকদাডিমানি ।
সুস্বাদযুক্তানি মযা প্রকল্প্য
গৃহাণ দত্তানি ফলানি ঢুংঢে ॥ 50 ॥
পুনর্জলেনৈব করাদিকং তে
সংক্ষালযামি মনসা গণেশ ।
সুবাসিতং তোযমথো পিবস্ব
মযা প্রদত্তং মনসা পরেশ ॥ 51 ॥
অষ্টাংগযুক্তং গণনাথ দত্তং
তাংবূলকং তে মনসা মযা বৈ ।
গৃহাণ বিঘ্নেশ্বর ভাবযুক্তং
সদা সকৃত্তুংডবিশোধনার্থম্ ॥ 52 ॥
ততো মযা কল্পিতকে গণেশ
মহাসনে রত্নসুবর্ণযুক্তে ।
মংদারকার্পাসকযুক্তবস্ত্রৈ-
-রনর্ঘ্যসংছাদিতকে প্রসীদ ॥ 53 ॥
ততস্ত্বদীযাবরণং পরেশ
সংপূজযামি মনসা যথাবত্ ।
নানোপচারৈঃ পরমপ্রিযৈস্তু
ত্বত্প্রীতিকামার্থমনাথবংধো ॥ 54 ॥
গৃহাণ লংবোদর দক্ষিণাং তে
হ্যসংখ্যভূতাং মনসা প্রদত্তাম্ ।
সৌবর্ণমুদ্রাদিকমুখ্যভাবাং
পাহি প্রভো বিশ্বমিদং গণেশ ॥ 55 ॥
রাজোপচারান্বিবিধান্গৃহাণ
হস্ত্যশ্বছত্রাদিকমাদরাদ্বৈ ।
চিত্তেন দত্তান্ গণনাথ ঢুংঢে
হ্যপারসংখ্যান্ স্থিরজংগমাংস্তে ॥ 56 ॥
দানায নানাবিধরূপকাংস্তে
গৃহাণ দত্তান্মনসা মযা বৈ ।
পদার্থভূতান্ স্থিরজংগমাংশ্চ
হেরংব মাং তারয মোহভাবাত্ ॥ 57 ॥
মংদারপুষ্পাণি শমীদলানি
দূর্বাংকুরাংস্তে মনসা দদামি ।
হেরংব লংবোদর দীনপাল
গৃহাণ ভক্তং কুরু মাং পদে তে ॥ 58 ॥
ততো হরিদ্রামবিরং গুলালং
সিংদূরকং তে পরিকল্পযামি ।
সুবাসিতং বস্তু সুবাসভূতৈ-
-র্গৃহাণ ব্রহ্মেশ্বর শোভনার্থম্ ॥ 59 ॥
ততঃ শুকাদ্যাঃ শিববিষ্ণুমুখ্যা
ইংদ্রাদযঃ শেষমুখাস্তথান্যে ।
মুনীংদ্রকাঃ সেবকভাবযুক্তাঃ
সভাসনস্থং প্রণমংতি ঢুংঢিম্ ॥ 60 ॥
বামাংগকে শক্তিযুতা গণেশং
সিদ্ধিস্তু নানাবিধসিদ্ধিভিস্তম্ ।
অত্যংতভাবেন সুসেবতে তু
মাযাস্বরূপা পরমার্থভূতা ॥ 61 ॥
গণেশ্বরং দক্ষিণভাগসংস্থা
বুদ্ধিঃ কলাভিশ্চ সুবোধিকাভিঃ ।
বিদ্যাভিরেবং ভজতে পরেশ
মাযাসু সাংখ্যপ্রদচিত্তরূপাঃ ॥ 62 ॥
প্রমোদমোদাদযঃ পৃষ্ঠভাগে
গণেশ্বরং ভাবযুতা ভজংতে ।
ভক্তেশ্বরা মুদ্গলশংভুমুখ্যাঃ
শুকাদযস্তং স্ম পুরো ভজংতে ॥ 63 ॥
গংধর্বমুখ্যা মধুরং জগুশ্চ
গণেশগীতং বিবিধস্বরূপম্ ।
নৃত্যং কলাযুক্তমথো পুরস্তা-
-চ্চক্রুস্তথা হ্যপ্সরসো বিচিত্রম্ ॥ 64 ॥
ইত্যাদিনানাবিধভাবযুক্তৈঃ
সংসেবিতং বিঘ্নপতিং ভজামি ।
চিত্তেন ধ্যাত্বা তু নিরংজনং বৈ
করোমি নানাবিধদীপযুক্তম্ ॥ 65 ॥
চতুর্ভুজং পাশধরং গণেশং
তথাংকুশং দংতযুতং তমেবম্ ।
ত্রিনেত্রযুক্তং ত্বভযংকরং তং
মহোদরং চৈকরদং গজাস্যম্ ॥ 66 ॥
সর্পোপবীতং গজকর্ণধারং
বিভূতিভিঃ সেবিতপাদপদ্মম্ ।
ধ্যাযেদ্গণেশং বিবিধপ্রকারৈঃ
সুপূজিতং শক্তিযুতং পরেশম্ ॥ 67 ॥
ততো জপং বৈ মনসা করোমি
স্বমূলমংত্রস্য বিধানযুক্তম্ ।
অসংখ্যভূতং গণরাজ হস্তে
সমর্পযাম্যেব গৃহাণ ঢুংঢে ॥ 68 ॥
আরার্তিকাং কর্পূরকাদিভূতা-
-মপারদীপাং প্রকরোমি পূর্ণাম্ ।
চিত্তেন লংবোদর তাং গৃহাণ
হ্যজ্ঞানধ্বাংতাঘহরাং নিজানাম্ ॥ 69 ॥
বেদেষু বিঘ্নেশ্বরকৈঃ সুমংত্রৈঃ
সুমংত্রিতং পুষ্পদলং প্রভূতম্ ।
গৃহাণ চিত্তেন মযা প্রদত্ত-
-মপারবৃত্ত্যা ত্বথ মংত্রপুষ্পম্ ॥ 70 ॥
অপারবৃত্যা স্তুতিমেকদংতং
গৃহাণ চিত্তেন কৃতাং গণেশ ।
যুক্তাং শ্রুতিস্মার্তভবৈঃ পুরাণৈঃ
সর্বৈঃ পরেশাধিপতে মযা তে ॥ 71 ॥
প্রদক্ষিণা মানসকল্পিতাস্তা
গৃহাণ লংবোদর ভাবযুক্তাঃ ।
সংখ্যাবিহীনা বিবিধস্বরূপা
ভক্তান্ সদা রক্ষ ভবার্ণবাদ্বৈ ॥ 72 ॥
নতিং ততো বিঘ্নপতে গৃহাণ
সাষ্টাংগকাদ্যাং বিবিধস্বরূপাম্ ।
সংখ্যাবিহীনাং মনসা কৃতাং তে
সিদ্ধ্যা চ বুদ্ধ্যা পরিপালযাশু ॥ 73 ॥
ন্যূনাতিরিক্তং তু মযা কৃতং চে-
-ত্তদর্থমংতে মনসা গৃহাণ ।
দূর্বাংকুরান্বিঘ্নপতে প্রদত্তান্
সংপূর্ণমেবং কুরু পূজনং মে ॥ 74 ॥
ক্ষমস্ব বিঘ্নাধিপতে মদীযান্
সদাপরাধান্ বিবিধস্বরূপান্ ।
ভক্তিং মদীযাং সফলাং কুরুষ্ব
সংপ্রার্থযামি মনসা গণেশ ॥ 75 ॥
ততঃ প্রসন্নেন গজাননেন
দত্তং প্রসাদং শিরসাভিবংদ্য ।
স্বমস্তকে তং পরিধারযামি
চিত্তেন বিঘ্নেশ্বরমানতোঽস্মি ॥ 76 ॥
উত্থায বিঘ্নেশ্বর এব তস্মা-
-দ্গতস্ততস্ত্বংতরধানশক্ত্যা ।
শিবাদযস্তং প্রণিপত্য সর্বে
গতাঃ সুচিত্তেন চ চিংতযামি ॥ 77 ॥
সর্বান্নমস্কৃত্য ততোঽহমেব
ভজামি চিত্তেন গণাধিপং তম্ ।
স্বস্থানমাগত্য মহানুভাবৈ-
-র্ভক্তৈর্গণেশস্য চ খেলযামি ॥ 78 ॥
এবং ত্রিকালেষু গণাধিপং তং
চিত্তেন নিত্যং পরিপূজযামি ।
তেনৈব তুষ্টঃ প্রদদাতু ভাবং
বিশ্বেশ্বরো ভক্তিমযং তু মহ্যম্ ॥ 79 ॥
গণেশপাদোদকপানকং চ
হ্যুচ্ছিষ্টগংধস্য সুলেপনং তু ।
নির্মাল্যসংধারণকং সুভোজ্যং
লংবোদরস্যাস্তু হি ভুক্তশেষম্ ॥ 80 ॥
যং যং করোম্যেব তদেব দীক্ষা
গণেশ্বরস্যাস্তু সদা গণেশ ।
প্রসীদ নিত্যং তব পাদভক্তং
কুরুষ্ব মাং ব্রহ্মপতে দযালো ॥ 81 ॥
ততস্তু শয্যাং পরিকল্পযামি
মংদারকার্পাসকবস্ত্রযুক্তাম্ ।
সুবাসপুষ্পাদিভিরর্চিতাং
তে গৃহাণ নিদ্রাং কুরু বিঘ্নরাজ ॥ 82 ॥
সিদ্ধ্যা চ বুদ্ধ্যা সহিতং গণেশ
সুনিদ্রিতং বীক্ষ্য তথাহমেব ।
গত্বা স্ববাসং চ করোমি নিদ্রাং
ধ্যাত্বা হৃদি ব্রহ্মপতিং তদীযঃ ॥ 83 ॥
এতাদৃশং সৌখ্যমমোঘশক্তে
দেহি প্রভো মানসজং গণেশ ।
মহ্যং চ তেনৈব কৃতার্থরূপো
ভবামি ভক্তিরসলালসোঽহম্ ॥ 84 ॥
গার্গ্য উবাচ ।
এবং নিত্যং মহারাজ গৃত্সমদো মহাযশাঃ ।
চকার মানসীং পূজাং যোগীংদ্রাণাং গুরুঃ স্বযম্ ॥ 85 ॥
য এতাং মানসীং পূজাং করিষ্যতি নরোত্তমঃ ।
পঠিষ্যতি সদা সোঽপি গাণপত্যো ভবিষ্যতি ॥ 86 ॥
শ্রাবযিষ্যতি যো মর্ত্যঃ শ্রোষ্যতে ভাবসংযুতঃ ।
স ক্রমেণ মহীপাল ব্রহ্মভূতো ভবিষ্যতি ॥ 87 ॥
যং যমিচ্ছতি তং তং বৈ সফলং তস্য জাযতে ।
অংতে স্বানংদগঃ সোঽপি যোগিবংদ্যো ভবিষ্যতি ॥ 88 ॥
ইতি শ্রীমদাংত্যে মৌদ্গল্যে গণেশমানসপূজা সংপূর্ণম্ ।