ইংদ্রদ্যুম্নঃ পাংড্যখংডাধিরাজ-
স্ত্বদ্ভক্তাত্মা চংদনাদ্রৌ কদাচিত্ ।
ত্বত্ সেবাযাং মগ্নধীরালুলোকে
নৈবাগস্ত্যং প্রাপ্তমাতিথ্যকামম্ ॥1॥
কুংভোদ্ভূতিঃ সংভৃতক্রোধভারঃ
স্তব্ধাত্মা ত্বং হস্তিভূযং ভজেতি ।
শপ্ত্বাঽথৈনং প্রত্যগাত্ সোঽপি লেভে
হস্তীংদ্রত্বং ত্বত্স্মৃতিব্যক্তিধন্যম্ ॥2॥
দগ্ধাংভোধের্মধ্যভাজি ত্রিকূটে
ক্রীডংছৈলে যূথপোঽযং বশাভিঃ ।
সর্বান্ জংতূনত্যবর্তিষ্ট শক্ত্যা
ত্বদ্ভক্তানাং কুত্র নোত্কর্ষলাভঃ ॥3॥
স্বেন স্থেম্না দিব্যদেশত্বশক্ত্যা
সোঽযং খেদানপ্রজানন্ কদাচিত্ ।
শৈলপ্রাংতে ঘর্মতাংতঃ সরস্যাং
যূথৈস্সার্ধং ত্বত্প্রণুন্নোঽভিরেমে ॥4॥
হূহূস্তাবদ্দেবলস্যাপি শাপাত্
গ্রাহীভূতস্তজ্জলে বর্তমানঃ ।
জগ্রাহৈনং হস্তিনং পাদদেশে
শাংত্যর্থং হি শ্রাংতিদোঽসি স্বকানাম্ ॥5॥
ত্বত্সেবাযা বৈভবাত্ দুর্নিরোধং
যুধ্যংতং তং বত্সরাণাং সহস্রম্ ।
প্রাপ্তে কালে ত্বত্পদৈকাগ্র্যসিধ্যৈ
নক্রাক্রাংতং হস্তিবর্যং ব্যধাস্ত্বম্ ॥6॥
আর্তিব্যক্তপ্রাক্তনজ্ঞানভক্তিঃ
শুংডোত্ক্ষিপ্তৈঃ পুংডরীকৈঃ সমর্চন্ ।
পূর্বাভ্যস্তং নির্বিশেষাত্মনিষ্ঠং
স্তোত্রং শ্রেষ্ঠং সোঽন্বগাদীত্ পরাত্মন্ ॥7॥
শ্রুত্বা স্তোত্রং নির্গুণস্থং সমস্তং
ব্রহ্মেশাদ্যৈর্নাহমিত্যপ্রযাতে ।
সর্বাত্মা ত্বং ভূরিকারুণ্যবেগাত্
তার্ক্ষ্যারূঢঃ প্রেক্ষিতোঽভূঃ পুরস্তাত্ ॥8॥
হস্তীংদ্রং তং হস্তপদ্মেন ধৃত্বা
চক্রেণ ত্বং নক্রবর্যং ব্যদারীঃ ।
গংধর্বেঽস্মিন্ মুক্তশাপে স হস্তী
ত্বত্সারূপ্যং প্রাপ্য দেদীপ্যতে স্ম ॥9॥
এতদ্বৃত্তং ত্বাং চ মাং চ প্রগে যো
গাযেত্সোঽযং ভূযসে শ্রেযসে স্যাত্ ।
ইত্যুক্ত্বৈনং তেন সার্ধং গতস্ত্বং
ধিষ্ণ্যং বিষ্ণো পাহি বাতালযেশ ॥10॥