ত্বামেকদা গুরুমরুত্পুরনাথ বোঢুং
গাঢাধিরূঢগরিমাণমপারযংতী ।
মাতা নিধায শযনে কিমিদং বতেতি
ধ্যাযংত্যচেষ্টত গৃহেষু নিবিষ্টশংকা ॥1॥
তাবদ্বিদূরমুপকর্ণিতঘোরঘোষ-
ব্যাজৃংভিপাংসুপটলীপরিপূরিতাশঃ ।
বাত্যাবপুস্স কিল দৈত্যবরস্তৃণাব-
র্তাখ্যো জহার জনমানসহারিণং ত্বাম্ ॥2॥
উদ্দামপাংসুতিমিরাহতদৃষ্টিপাতে
দ্রষ্টুং কিমপ্যকুশলে পশুপাললোকে ।
হা বালকস্য কিমিতি ত্বদুপাংতমাপ্তা
মাতা ভবংতমবিলোক্য ভৃশং রুরোদ ॥3॥
তাবত্ স দানববরোঽপি চ দীনমূর্তি-
র্ভাবত্কভারপরিধারণলূনবেগঃ ।
সংকোচমাপ তদনু ক্ষতপাংসুঘোষে
ঘোষে ব্যতাযত ভবজ্জননীনিনাদঃ ॥4॥
রোদোপকর্ণনবশাদুপগম্য গেহং
ক্রংদত্সু নংদমুখগোপকুলেষু দীনঃ ।
ত্বাং দানবস্ত্বখিলমুক্তিকরং মুমুক্ষু-
স্ত্বয্যপ্রমুংচতি পপাত বিযত্প্রদেশাত্ ॥5॥
রোদাকুলাস্তদনু গোপগণা বহিষ্ঠ-
পাষাণপৃষ্ঠভুবি দেহমতিস্থবিষ্ঠম্ ।
প্রৈক্ষংত হংত নিপতংতমমুষ্য বক্ষ-
স্যক্ষীণমেব চ ভবংতমলং হসংতম্ ॥6॥
গ্রাবপ্রপাতপরিপিষ্টগরিষ্ঠদেহ-
ভ্রষ্টাসুদুষ্টদনুজোপরি ধৃষ্টহাসম্ ।
আঘ্নানমংবুজকরেণ ভবংতমেত্য
গোপা দধুর্গিরিবরাদিব নীলরত্নম্ ॥7॥
একৈকমাশু পরিগৃহ্য নিকামনংদ-
ন্নংদাদিগোপপরিরব্ধবিচুংবিতাংগম্ ।
আদাতুকামপরিশংকিতগোপনারী-
হস্তাংবুজপ্রপতিতং প্রণুমো ভবংতম্ ॥8॥
ভূযোঽপি কিন্নু কৃণুমঃ প্রণতার্তিহারী
গোবিংদ এব পরিপালযতাত্ সুতং নঃ ।
ইত্যাদি মাতরপিতৃপ্রমুখৈস্তদানীং
সংপ্রার্থিতস্ত্বদবনায বিভো ত্বমেব ॥9॥
বাতাত্মকং দনুজমেবমযি প্রধূন্বন্
বাতোদ্ভবান্ মম গদান্ কিমু নো ধুনোষি ।
কিং বা করোমি পুনরপ্যনিলালযেশ
নিশ্শেষরোগশমনং মুহুরর্থযে ত্বাম্ ॥10॥