কদাচিদ্গোপালান্ বিহিতমখসংভারবিভবান্
নিরীক্ষ্য ত্বং শৌরে মঘবমদমুদ্ধ্বংসিতুমনাঃ ।
বিজানন্নপ্যেতান্ বিনযমৃদু নংদাদিপশুপা-
নপৃচ্ছঃ কো বাঽযং জনক ভবতামুদ্যম ইতি ॥1॥
বভাষে নংদস্ত্বাং সুত ননু বিধেযো মঘবতো
মখো বর্ষে বর্ষে সুখযতি স বর্ষেণ পৃথিবীম্ ।
নৃণাং বর্ষাযত্তং নিখিলমুপজীব্যং মহিতলে
বিশেষাদস্মাকং তৃণসলিলজীবা হি পশবঃ ॥2॥
ইতি শ্রুত্বা বাচং পিতুরযি ভবানাহ সরসং
ধিগেতন্নো সত্যং মঘবজনিতা বৃষ্টিরিতি যত্ ।
অদৃষ্টং জীবানাং সৃজতি খলু বৃষ্টিং সমুচিতাং
মহারণ্যে বৃক্ষাঃ কিমিব বলিমিংদ্রায দদতে ॥3॥
ইদং তাবত্ সত্যং যদিহ পশবো নঃ কুলধনং
তদাজীব্যাযাসৌ বলিরচলভর্ত্রে সমুচিতঃ ।
সুরেভ্যোঽপ্যুত্কৃষ্টা ননু ধরণিদেবাঃ ক্ষিতিতলে
ততস্তেঽপ্যারাধ্যা ইতি জগদিথ ত্বং নিজজনান্ ॥4॥
ভবদ্বাচং শ্রুত্বা বহুমতিযুতাস্তেঽপি পশুপাঃ
দ্বিজেংদ্রানর্চংতো বলিমদদুরুচ্চৈঃ ক্ষিতিভৃতে ।
ব্যধুঃ প্রাদক্ষিণ্যং সুভৃশমনমন্নাদরযুতা-
স্ত্বমাদশ্শৈলাত্মা বলিমখিলমাভীরপুরতঃ ॥5॥
অবোচশ্চৈবং তান্ কিমিহ বিতথং মে নিগদিতং
গিরীংদ্রো নন্বেষ স্ববলিমুপভুংক্তে স্ববপুষা ।
অযং গোত্রো গোত্রদ্বিষি চ কুপিতে রক্ষিতুমলং
সমস্তানিত্যুক্তা জহৃষুরখিলা গোকুলজুষঃ ॥6॥
পরিপ্রীতা যাতাঃ খলু ভবদুপেতা ব্রজজুষো
ব্রজং যাবত্তাবন্নিজমখবিভংগং নিশমযন্ ।
ভবংতং জানন্নপ্যধিকরজসাঽঽক্রাংতহৃদযো
ন সেহে দেবেংদ্রস্ত্বদুপরচিতাত্মোন্নতিরপি ॥7॥
মনুষ্যত্বং যাতো মধুভিদপি দেবেষ্ববিনযং
বিধত্তে চেন্নষ্টস্ত্রিদশসদসাং কোঽপি মহিমা ।
ততশ্চ ধ্বংসিষ্যে পশুপহতকস্য শ্রিযমিতি
প্রবৃত্তস্ত্বাং জেতুং স কিল মঘবা দুর্মদনিধিঃ ॥8॥
ত্বদাবাসং হংতুং প্রলযজলদানংবরভুবি
প্রহিণ্বন্ বিভ্রাণ; কুলিশমযমভ্রেভগমনঃ ।
প্রতস্থেঽন্যৈরংতর্দহনমরুদাদ্যৈবিংহসিতো
ভবন্মাযা নৈব ত্রিভুবনপতে মোহযতি কম্ ॥9॥
সুরেংদ্রঃ ক্রুদ্ধশ্চেত্ দ্বিজকরুণযা শৈলকৃপযাঽ-
প্যনাতংকোঽস্মাকং নিযত ইতি বিশ্বাস্য পশুপান্ ।
অহো কিন্নাযাতো গিরিভিদিতি সংচিংত্য নিবসন্
মরুদ্গেহাধীশ প্রণুদ মুরবৈরিন্ মম গদান্ ॥10॥