শ্রী গণেশায নমঃ ।
শ্রী মহাদেব উবাচ ।
ততো রামঃ স্বযং প্রাহ হনুমংতমুপস্থিতম্ ।
শঋণু যত্বং প্রবক্ষ্যামি হ্যাত্মানাত্মপরাত্মনাম্ ॥ 1॥
আকাশস্য যথা ভেদস্ত্রিবিধো দৃশ্যতে মহান্ ।
জলাশযে মহাকাশস্তদবচ্ছিন্ন এব হি ।
প্রতিবিংবাখ্যমপরং দৃশ্যতে ত্রিবিধং নভঃ ॥ 2॥
বুদ্ধ্যবচ্ছিন্নচৈতন্যমেকং পূর্ণমথাপরম্ ।
আভাসস্ত্বপরং বিংবভূতমেবং ত্রিধা চিতিঃ ॥ 3॥
সাভাসবুদ্ধেঃ কর্তৃত্বমবিচ্ছিন্নেঽবিকারিণি ।
সাক্ষিণ্যারোপ্যতে ভ্রাংত্যা জীবত্বং চ তথাঽবুধৈঃ ॥ 4॥
আভাসস্তু মৃষাবুদ্ধিরবিদ্যাকার্যমুচ্যতে ।
অবিচ্ছিন্নং তু তদ্ব্রহ্ম বিচ্ছেদস্তু বিকল্পিতঃ ॥ 5॥
অবিচ্ছিন্নস্য পূর্ণেন একত্বং প্রতিপদ্যতে ।
তত্ত্বমস্যাদিবাক্যৈশ্চ সাভাসস্যাহমস্তথা ॥ 6॥
ঐক্যজ্ঞানং যদোত্পন্নং মহাবাক্যেন চাত্মনোঃ ।
তদাঽবিদ্যা স্বকার্যৈশ্চ নশ্যত্যেব ন সংশযঃ ॥ 7॥
এতদ্বিজ্ঞায মদ্ভক্তো মদ্ভাবাযোপপদ্যতে
মদ্ভক্তিবিমুখানাং হি শাস্ত্রগর্তেষু মুহ্যতাম্ ।
ন জ্ঞানং ন চ মোক্ষঃ স্যাত্তেষাং জন্মশতৈরপি ॥ 8॥
ইদং রহস্যং হৃদযং মমাত্মনো মযৈব সাক্ষাত্কথিতং তবানঘ ।
মদ্ভক্তিহীনায শঠায ন ত্বযা দাতব্যমৈংদ্রাদপি রাজ্যতোঽধিকম্ ॥ 9॥
॥ শ্রীমদধ্যাত্মরামাযণে বালকাংডে শ্রীরামহৃদযং সংপূর্ণম্ ॥