কৃষ্ণ যজুর্বেদীয তৈত্তিরীয সংহিতাযা-ন্দ্বিতীযকাণ্ডে প্রথমঃ প্রশ্নঃ – পশুবিধানং
ও-ন্নমঃ পরমাত্মনে, শ্রী মহাগণপতযে নমঃ,
শ্রী গুরুভ্যো নমঃ । হ॒রিঃ॒ ওম্ ॥
বা॒য॒ব্যগ্গ্॑ শ্বে॒তমা ল॑ভেত॒ ভূতি॑কামো বা॒যুর্বৈ ক্ষেপি॑ষ্ঠা দে॒বতা॑বা॒যুমে॒ব স্বেন॑ ভাগ॒ধেযে॒নোপ॑ ধাবতি॒ স এ॒বৈন॒-ম্ভূতি॑-ঙ্গমযতি॒ ভব॑ত্যে॒বা-তি॑ক্ষিপ্রা দে॒বতেত্যা॑হু॒-স্সৈন॑মীশ্ব॒রা প্র॒দহ॒ ইত্যে॒তমে॒ব সন্তং॑-বাঁ॒যবে॑ নি॒যুত্ব॑ত॒ আ ল॑ভেত নি॒যুদ্বা অ॑স্য॒ ধৃতি॑র্ধৃ॒ত এ॒ব ভূতি॒মুপৈ॒ত্য প্র॑দাহায॒ ভব॑ত্যে॒ব [ ] 1
বা॒যবে॑ নি॒যুত্ব॑ত॒ আ ল॑ভেত॒ গ্রাম॑কামো বা॒যুর্বা ই॒মাঃ প্র॒জা ন॑স্যো॒তা নে॑নীযতে বা॒যুমে॒ব নি॒যুত্ব॑ন্ত॒গ্গ্॒ স্বেন॑ ভাগ॒ধেযে॒নোপ॑ ধাবতি॒ স এ॒বাস্মৈ᳚ প্র॒জা ন॑স্যো॒তা নিয॑চ্ছতি গ্রা॒ম্যে॑ব ভ॑বতি নি॒যুত্ব॑তে ভবতি ধ্রু॒বা এ॒বাস্মা॒ অন॑পগাঃ করোতি বা॒যবে॑ নি॒যুত্ব॑ত॒ আ ল॑ভেত প্র॒জাকা॑মঃ প্রা॒ণো বৈ বা॒যুর॑পা॒নো নি॒যু-ত্প্রা॑ণাপা॒নৌ খলু॒ বা এ॒তস্য॑ প্র॒জাযা॒ [প্র॒জাযাঃ᳚, অপ॑] 2
অপ॑ ক্রামতো॒ যো-ঽল॑-ম্প্র॒জাযৈ॒ স-ন্প্র॒জা-ন্ন বি॒ন্দতে॑ বা॒যুমে॒ব নি॒যুত্ব॑ন্ত॒গ্গ্॒ স্বেন॑ ভাগ॒ধেযে॒নোপ॑ ধাবতি॒ স এ॒বাস্মৈ᳚ প্রাণাপা॒নাভ্যা᳚-ম্প্র॒জা-ম্প্র জ॑নযতি বি॒ন্দতে᳚ প্র॒জাং-বাঁ॒যবে॑ নি॒যুত্ব॑ত॒ আ ল॑ভেত॒ জ্যোগা॑মযাবী প্রা॒ণো বৈ বা॒যুর॑পা॒নো নি॒যু-ত্প্রা॑ণাপা॒নৌ খলু॒ বা এ॒তস্মা॒ দপ॑ক্রামতো॒ যস্য॒ জ্যোগা॒ময॑তি বা॒যুমে॒ব নি॒যুত্ব॑ন্ত॒গ্গ্॒ স্বেন॑ ভাগ॒ধেযে॒নোপ॑ – [ভাগ॒ধেযে॒নোপ॑, ধা॒ব॒তি॒ স] 3
ধাবতি॒ স এ॒বা-ঽস্মি॑-ন্প্রাণাপা॒নৌ দ॑ধাত্যু॒ত যদী॒তাসু॒র্ভব॑তি॒ জীব॑ত্যে॒ব প্র॒জাপ॑তি॒র্বা ই॒দমেক॑ আসী॒-থ্সো॑-ঽকামযত প্র॒জাঃ প॒শূন্-থ্সৃ॑জে॒যেতি॒ স আ॒ত্মনো॑ ব॒পামুদ॑ক্খিদ॒-ত্তাম॒গ্নৌ প্রাগৃ॑হ্ণা॒-ত্ততো॒-ঽজস্তূ॑প॒র-স্সম॑ভব॒-ত্তগ্গ্ স্বাযৈ॑ দে॒বতা॑যা॒ আ ঽল॑ভত॒ ততো॒ বৈ স প্র॒জাঃ প॒শূন॑সৃজত॒ যঃ প্র॒জাকা॑মঃ [ ] 4
প॒শুকা॑ম॒-স্স্যা-থ্স এ॒ত-ম্প্রা॑জাপ॒ত্যম॒জ-ন্তূ॑প॒রমা ল॑ভেত প্র॒জাপ॑তিমে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মৈ᳚ প্র॒জা-ম্প॒শূ-ন্প্রজ॑নযতি॒ যচ্ছ্ম॑শ্রু॒ণস্ত-ত্পুরু॑ষাণাগ্ম্ রূ॒পং-যঁ-ত্তূ॑প॒রস্তদশ্বা॑নাং॒-যঁদ॒ন্যতো॑দ॒-ন্ত-দ্গবাং॒-যঁদব্যা॑ ইব শ॒ফাস্তদবী॑নাং॒-যঁদ॒জস্ত-দ॒জানা॑-মে॒তাব॑ন্তো॒ বৈ গ্রা॒ম্যাঃ প॒শব॒স্তা- [প॒শব॒স্তান্, রূ॒পেণৈ॒বাব॑ রুন্ধে] 5
-ন্রূ॒পেণৈ॒বাব॑ রুন্ধে সোমাপৌ॒ষ্ণ-ন্ত্রৈ॒তমা ল॑ভেত প॒শুকা॑মো॒দ্বৌ বা অ॒জাযৈ॒ স্তনৌ॒ নানৈ॒ব দ্বাব॒ভি জাযে॑তে॒ ঊর্জ॒-ম্পুষ্টি॑-ন্তৃ॒তীয॑স্সোমাপূ॒ষণা॑বে॒ব স্বেন॑ ভাগ॒ধেযে॒নোপ॑ ধাবতি॒ তাবে॒বাস্মৈ॑ প॒শূ-ন্প্রজ॑নযত॒-স্সোমো॒ বৈ রে॑তো॒ধাঃ পূ॒ষা প॑শূ॒না-ম্প্র॑জনযি॒তা সোম॑ এ॒বাস্মৈ॒ রেতো॒ দধা॑তি পূ॒ষা প॒শূ-ন্প্র জ॑নয॒ত্যৌদু॑ম্বরো॒ যূপো॑ ভব॒ত্যূর্গ্বা উ॑দু॒ম্বর॒ ঊর্ক্প॒শব॑ ঊ॒র্জৈবাস্মা॒ ঊর্জ॑-ম্প॒শূনব॑ রুন্ধে ॥ 6 ॥
(অপ্র॑দাহায॒ ভব॑ত্যে॒ব – প্র॒জাযা॑ – আ॒ময॑তি বা॒যুমে॒ব নি॒যুত্ব॑ত॒গ্গ্॒ স্বেন॑ ভাগ॒ধেযে॒নোপ॑ – প্র॒জাক॑ম॒ – স্তান্ – যূপ॒ – স্ত্রযো॑দশ চ ) (অ. 1)
প্র॒জাপ॑তিঃ প্র॒জা অ॑সৃজত॒ তা অ॑স্মা-থ্সৃ॒ষ্টাঃ পরা॑চীরায॒-ন্তা বরু॑ণমগচ্ছ॒-ন্তা অন্বৈ॒-ত্তাঃ পুন॑রযাচত॒ তা অ॑স্মৈ॒ ন পুন॑রদদা॒-থ্সো᳚-ঽব্রবী॒-দ্বরং॑-বৃঁণী॒ষ্বাথ॑ মে॒ পুন॑র্দে॒হীতি॒ তাসাং॒-বঁর॒মা ঽল॑ভত॒ স কৃ॒ষ্ণ এক॑শিতিপাদ-ভব॒দ্যো বরু॑ণ গৃহীত॒-স্স্যা-থ্স এ॒তং-বাঁ॑রু॒ণ-ঙ্কৃ॒ষ্ণ-মেক॑শিতিপাদ॒মা-ল॑ভেত॒ বরু॑ণ- [বরু॑ণম্, এ॒ব স্বেন॑] 7
-মে॒ব স্বেন॑ ভাগ॒ধেযে॒নোপ॑ ধাবতি॒ স এ॒বৈনং॑-বঁরুণপা॒শা-ন্মু॑ঞ্চতি কৃ॒ষ্ণ এক॑শিতিপা-দ্ভবতি বারু॒ণো হ্যে॑ষ দে॒বত॑যা॒ সমৃ॑দ্ধ্যৈ॒ সুব॑র্ভানুরাসু॒র-স্সূর্য॒-ন্তম॑সা-ঽবিদ্ধ্য॒ত তস্মৈ॑দে॒বাঃ প্রায॑শ্চিত্তি-মৈচ্ছ॒-ন্তস্য॒ য-ত্প্র॑থ॒ম-ন্তমো॒-ঽপাঘ্ন॒ন্-থ্সা কৃ॒ষ্ণা-ঽবি॑রভব॒-দ্য-দ্দ্বি॒তীয॒গ্ম্॒ সা ফল্গু॑নী॒ যত তৃ॒তীয॒গ্ম্॒ সা ব॑ল॒ক্ষী যদ॑দ্ধ্য॒স্থা-দ॒পাকৃ॑ন্ত॒ন্-থ্সা ঽবি॑র্ব॒শা [ ] 8
সম॑ভব॒-ত্তে দে॒বা অ॑ব্রুব-ন্দেবপ॒শুর্বা অ॒যগ্ম্ সম॑ভূ॒-ত্কস্মা॑ ই॒মমা ল॑ফ্স্যামহ॒ ইত্যথ॒ বৈ তর্হ্যল্পা॑ পৃথি॒ব্যাসী॒-দজা॑তা॒ ওষ॑ধয॒স্তামবিং॑-বঁ॒শামা॑দি॒ত্যেভ্যঃ॒ কামা॒যা-ঽল॑ভন্ত॒ ততো॒ বা অপ্র॑থত পৃথি॒ব্য-জা॑য॒ন্তৌষ॑ধযো॒ যঃ কা॒মযে॑ত॒ প্রথে॑য প॒শুভিঃ॒ প্র প্র॒জযা॑ জাযে॒যেতি॒ স এ॒তামবিং॑-বঁ॒শামা॑দি॒ত্যেভ্যঃ॒ কামা॒যা- [কামা॑য, আল॑ভেতা ঽঽদি॒ত্যানে॒ব] 9
-ঽঽল॑ভেতা ঽঽদি॒ত্যানে॒ব কাম॒গ্গ্॒ স্বেন॑ ভাগ॒ধেযে॒নোপ॑ ধাবতি॒ ত এ॒বৈন॑-ম্প্র॒থয॑ন্তি প॒শুভিঃ॒ প্র প্র॒জযা॑ জনযন্ত্য॒-সাবা॑দি॒ত্যো ন ব্য॑রোচত॒ তস্মৈ॑ দে॒বাঃ প্রায॑শ্চিত্তিমৈচ্ছ॒-ন্তস্মা॑ এ॒তা ম॒ল্॒হা আল॑ভন্তা-ঽঽগ্নে॒যী-ঙ্কৃ॑ষ্ণগ্রী॒বীগ্ম্ সগ্ম্॑হি॒তামৈ॒ন্দ্রীগ্ শ্বে॒তা-ম্বা॑র্হস্প॒ত্যা-ন্তাভি॑রে॒বাস্মি॒-ন্রুচ॑মদধু॒র্যো ব্র॑হ্মবর্চ॒স-কা॑ম॒-স্স্যা-ত্তস্মা॑ এ॒তা ম॒ল্॒হা আ ল॑ভেতা- [আ ল॑ভেত, আ॒গ্নে॒যী-ঙ্কৃ॑ষ্ণগ্রী॒বীগ্ম্] 10
(শিখণ্ডি পঞ্চতি)
-ঽঽগ্নে॒যী-ঙ্কৃ॑ষ্ণগ্রী॒বীগ্ম্ সগ্ম্॑হি॒তামৈ॒ন্দ্রীগ্ শ্বে॒তা-ম্বা॑র্হস্প॒ত্যামে॒তা এ॒ব দে॒বতা॒-স্স্বেন॑ ভাগ॒ধেযে॒নোপ॑ ধাবতি॒ তা এ॒বাস্মি॑-ন্ব্রহ্মবর্চ॒স-ন্দ॑ধতি ব্রহ্মবর্চ॒স্যে॑ব ভ॑বতি ব॒সন্তা᳚ প্রা॒তরা᳚গ্নে॒যী-ঙ্কৃ॑ষ্ণ গ্রী॒বীমা ল॑ভেত গ্রী॒ষ্মে ম॒দ্ধ্যন্দি॑নে সগ্ম্হি॒তামৈ॒ন্দ্রীগ্ম্ শ॒রদ্য॑পরা॒হ্ণে শ্বে॒তা-ম্বা॑র্হস্প॒ত্যা-ন্ত্রীণি॒ বা আ॑দি॒ত্যস্য॒ তেজাগ্ম্॑সি ব॒সন্তা᳚ প্রা॒তর্গ্রী॒ষ্মে ম॒দ্ধ্যন্দি॑নে শ॒রদ্য॑পরা॒হ্ণে যাব॑ন্ত্যে॒ব তেজাগ্ম্॑সি॒ তান্যে॒বা- [তান্যে॒ব, অব॑ রুন্ধে] 11
-ঽব॑ রুন্ধে সংবঁথ্স॒র-ম্প॒র্যাল॑ভ্যন্তে সংবঁথ্স॒রো বৈ ব্র॑হ্মবর্চ॒সস্য॑ প্রদা॒তা সং॑বঁথ্স॒র এ॒বাস্মৈ᳚ ব্রহ্মবর্চ॒স-ম্প্র য॑চ্ছতি ব্রহ্মবর্চ॒স্যে॑ব ভ॑বতি গ॒র্ভিণ॑যো ভবন্তীন্দ্রি॒যং-বৈঁ গর্ভ॑ ইন্দ্রি॒যমে॒বাস্মি॑-ন্দধতি সারস্ব॒তী-ম্মে॒ষীমা ল॑ভেত॒ য ঈ᳚শ্ব॒রো বা॒চো বদি॑তো॒-স্সন্ বাচ॒-ন্ন বদে॒-দ্বাগ্বৈ সর॑স্বতী॒ সর॑স্বতীমে॒ব স্বেন॑ ভাগ॒ধেযে॒নোপ॑ ধাবতি॒ সৈবাস্মি॒- [সৈবাস্মিন্ন্॑, বাচ॑-ন্দধাতি] 12
-ন্বাচ॑-ন্দধাতি প্রবদি॒তা বা॒চো ভ॑ব॒ত্যপ॑ন্নদতী ভবতি॒ তস্মা᳚-ন্মনু॒ষ্যা᳚-স্সর্বাং॒-বাঁচং॑-বঁদন্ত্যাগ্নে॒য-ঙ্কৃ॒ষ্ণগ্রী॑ব॒মা ল॑ভেত সৌ॒ম্য-ম্ব॒ভ্রু-ঞ্জ্যোগা॑মযাব্য॒গ্নিং-বাঁ এ॒তস্য॒ শরী॑র-ঙ্গচ্ছতি॒ সোম॒গ্ম্॒ রসো॒ যস্য॒ জ্যোগা॒ময॑ত্য॒গ্নেরে॒বাস্য॒ শরী॑র-ন্নিষ্ক্রী॒ণাতি॒ সোমা॒-দ্রস॑মু॒ত যদী॒তাসু॒র্ভব॑তি॒ জীব॑ত্যে॒ব সৌ॒ম্য-ম্ব॒ভ্রুমা ল॑ভেতা-ঽঽগ্নে॒য-ঙ্কৃ॒ষ্ণগ্রী॑ব-ম্প্র॒জাকা॑ম॒-স্সোমো॒ [সোমঃ॑, বৈ রে॑তো॒ধা] 13
বৈ রে॑তো॒ধা অ॒গ্নিঃ প্র॒জানা᳚-ম্প্রজনযি॒তা সোম॑ এ॒বাস্মৈ॒ রেতো॒ দধা᳚ত্য॒গ্নিঃ প্র॒জা-ম্প্রজ॑নযতি বি॒ন্দতে᳚ প্র॒জামা᳚গ্নে॒য-ঙ্কৃ॒ষ্ণগ্রী॑ব॒মা ল॑ভেত সৌ॒ম্য-ম্ব॒ভ্রুং-যোঁ ব্রা᳚হ্ম॒ণো বি॒দ্যাম॒নূচ্য॒ ন বি॒রোচে॑ত॒ যদা᳚গ্নে॒যো ভব॑তি॒ তেজ॑ এ॒বাস্মি॒-ন্তেন॑ দধাতি॒ য-থ্সৌ॒ম্যো ব্র॑হ্মবর্চ॒স-ন্তেন॑ কৃ॒ষ্ণগ্রী॑ব আগ্নে॒যো ভ॑বতি॒ তম॑ এ॒বাস্মা॒দপ॑ হন্তি শ্বে॒তো ভ॑বতি॒ [ভ॑বতি, রুচ॑মে॒বাস্মি॑-ন্দধাতি] 14
রুচ॑মে॒বাস্মি॑-ন্দধাতি ব॒ভ্রু-স্সৌ॒ম্যো ভ॑বতি ব্রহ্মবর্চ॒সমে॒বাস্মি॒-ন্ত্বিষি॑-ন্দধাত্যা-গ্নে॒য-ঙ্কৃ॒ষ্ণগ্রী॑ব॒মা ল॑ভেত সৌ॒ম্য-ম্ব॒ভ্রুমা᳚গ্নে॒য-ঙ্কৃ॒ষ্ণগ্রী॑ব-ম্পুরো॒ধাযা॒গ্॒ স্পর্ধ॑মান আগ্নে॒যো বৈ ব্রা᳚হ্ম॒ণ-স্সৌ॒ম্যো রা॑জ॒ন্যো॑-ঽভিত॑-স্সৌ॒ম্যমা᳚গ্নে॒যৌ ভ॑বত॒-স্তেজ॑সৈ॒ব ব্রহ্ম॑ণোভ॒যতো॑ রা॒ষ্ট্র-ম্পরি॑ গৃহ্ণাত্যেক॒ধা স॒মা বৃ॑ঙ্ক্তে পু॒র এ॑ন-ন্দধতে ॥ 15 ॥
(ল॒ভে॒ত॒ বরু॑ণং – বঁ॒শৈ – তামবিং॑-বঁ॒শামা॑দি॒ত্যেভ্যঃ॒ কামা॑য – ম॒ল্হা আ ল॑ভেত॒ – তান্যে॒ব – সৈবাস্মি॒ন্থ্ – সোমঃ॑ – স্বে॒তো ভ॑বতি॒ – ত্রিচ॑ত্বারিগ্ম্শচ্চ ) (অ. 2)
দে॒বা॒সু॒রা এ॒ষু লো॒কেষ্ব॑স্পর্ধন্ত॒ স এ॒তং-বিঁষ্ণু॑-র্বাম॒নম॑পশ্য॒-ত্তগ্গ্ স্বাযৈ॑ দে॒বতা॑যা॒ আ-ঽল॑ভত॒ ততো॒ বৈ স ই॒মাং-লোঁ॒কান॒ভ্য॑জযদ্- বৈষ্ণ॒বং-বাঁ॑ম॒নমা ল॑ভেত॒ স্পর্ধ॑মানো॒ বিষ্ণু॑রে॒ব ভূ॒ত্বেমা-ল্লোঁ॒কান॒ভি জ॑যতি॒ বিষ॑ম॒ আ ল॑ভেত॒ বিষ॑মা ইব॒ হীমে লো॒কা-স্সমৃ॑দ্ধ্যা॒ ইন্দ্রা॑য মন্যু॒মতে॒ মন॑স্বতে ল॒লাম॑-ম্প্রাশৃ॒ঙ্গমা ল॑ভেত সঙ্গ্রা॒মে [ ] 16
সংযঁ॑ত্ত ইন্দ্রি॒যেণ॒ বৈ ম॒ন্যুনা॒ মন॑সা সঙ্গ্রা॒ম-ঞ্জ॑য॒তীন্দ্র॑মে॒ব ম॑ন্যু॒মন্ত॒-ম্মন॑স্বন্ত॒গ্গ্॒ স্বেন॑ ভাগ॒ধেযে॒নোপ॑ ধাবতি॒ স এ॒বাস্মি॑ন্নিন্দ্রি॒য-ম্ম॒ন্যু-ম্মনো॑ দধাতি॒ জয॑তি॒ তগ্ম্ স॑গ্রা॒ম্মমিন্দ্রা॑য ম॒রুত্ব॑তে পৃশ্ঞিস॒ক্থমা ল॑ভেত॒ গ্রাম॑কাম॒ ইন্দ্র॑মে॒ব ম॒রুত্ব॑ন্ত॒গ্গ্॒ স্বেন॑ ভাগ॒ধেযে॒নোপ॑ ধাবতি॒ স এ॒বাস্মৈ॑ স জা॒তা-ন্প্রয॑চ্ছতি গ্রা॒ম্যে॑ব ভ॑বতি॒ যদৃ॑ষ॒ভস্তেনৈ॒- [যদৃ॑ষ॒ভস্তেন॑, ঐ॒ন্দ্রো য-ত্পৃশ্ঞি॒স্তেন॑] 17
-ন্দ্রো য-ত্পৃশ্ঞি॒স্তেন॑ মারু॒ত-স্সমৃ॑দ্ধ্যৈ প॒শ্চা-ত্পৃ॑শ্ঞিস॒ক্থো ভ॑বতি পশ্চাদন্ব-বসা॒যিনী॑মে॒বাস্মৈ॒ বিশ॑-ঙ্করোতি সৌ॒ম্য-ম্ব॒ভ্রুমা ল॑ভে॒তান্ন॑কাম-স্সৌ॒ম্যং-বাঁ অন্ন॒গ্ম্॒ সোম॑মে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মা॒ অন্ন॒-ম্প্রয॑॑চ্ছত্যন্না॒দ এ॒ব ভ॑বতি ব॒ভ্রুর্ভ॑বত্যে॒তদ্বা অন্ন॑স্য রূ॒পগ্ম্ সমৃ॑দ্ধ্যৈ সৌ॒ম্য-ম্ব॒ভ্রুমা ল॑ভেত॒ যমলগ্ম্॑ [যমল᳚ম্, রা॒জ্যায॒] 18
রা॒জ্যায॒ সন্তগ্ম্॑ রা॒জ্য-ন্নোপ॒নমে᳚-থ্সৌ॒ম্যং-বৈঁ রা॒জ্যগ্ম্ সোম॑মে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মৈ॑ রা॒জ্য-ম্প্রয॑চ্ছ॒ত্যুপৈ॑নগ্ম্ রা॒জ্য-ন্ন॑মতি ব॒ভ্রুর্ভ॑বত্যে॒ত-দ্বৈ সোম॑স্য রূ॒পগ্ম্ সমৃ॑দ্ধ্যা॒ ইন্দ্রা॑য বৃত্র॒তুরে॑ ল॒লাম॑-ম্প্রাশৃ॒ঙ্গমা ল॑ভেত গ॒তশ্রীঃ᳚ প্রতি॒ষ্ঠাকা॑মঃ পা॒প্মান॑মে॒ব বৃ॒ত্র-ন্তী॒র্ত্বা প্র॑তি॒ষ্ঠা-ঙ্গ॑চ্ছ॒তীন্দ্রা॑যাভিমাতি॒ঘ্নে ল॒লাম॑-ম্প্রাশৃ॒ঙ্গমা [ল॒লাম॑-ম্প্রাশৃ॒ঙ্গমা, ল॒ভে॒ত॒ যঃ পা॒প্মনা॑] 19
ল॑ভেত॒ যঃ পা॒প্মনা॑ গৃহী॒ত-স্স্যা-ত্পা॒প্মা বা অ॒ভিমা॑তি॒রিন্দ্র॑মে॒বা- ভি॑মাতি॒হন॒গ্গ্॒ স্বেন॑ ভাগ॒ধেযে॒নোপ॑ ধাবতি॒ স এ॒বাস্মা᳚-ত্পা॒প্মান॑ম॒ভিমা॑তি॒-ম্প্রণু॑দত॒ ইন্দ্রা॑য ব॒জ্রিণে॑ ল॒লাম॑-ম্প্রাশৃ॒ঙ্গমা ল॑ভেত॒ যমলগ্ম্॑ রা॒জ্যায॒ সন্তগ্ম্॑ রা॒জ্য-ন্নোপ॒নমে॒দিন্দ্র॑মে॒ব ব॒জ্রিণ॒গ্গ্॒ স্বেন॑ ভাগ॒ধেযে॒নোপ॑ ধাবতি॒ স এ॒বাস্মৈ॒ বজ্র॒-ম্প্র য॑চ্ছতি॒ স এ॑নং॒ বঁজ্রো॒ ভূত্যা॑ ইন্ধ॒ উপৈ॑নগ্ম্ রা॒জ্য-ন্ন॑মতি ল॒লামঃ॑ প্রাশৃ॒ঙ্গো ভ॑বত্যে॒তদ্বৈ বজ্র॑স্য রূ॒পগ্ম্ সমৃ॑দ্ধ্যৈ ॥ 20
(স॒গ্রা॒ম্মে – তেনা – ল॑ – মভিমাতি॒ঘ্নে ল॒লাম॑-ম্প্রাশৃ॒ঙ্গমৈ – নং॒ – পঞ্চ॑দশ চ ) (অ. 3)
অ॒সাবা॑দি॒ত্যো ন ব্য॑রোচত॒ তস্মৈ॑ দে॒বাঃ প্রায॑শ্চিত্তিমৈচ্ছ॒-ন্তস্মা॑ এ॒তা-ন্দশ॑র্ষভা॒মা-ঽল॑ভন্ত॒ তযৈ॒বাস্মি॒-ন্রুচ॑মদধু॒র্যো ব্র॑হ্মবর্চ॒সকা॑ম॒-স্স্যা-ত্তস্মা॑ এ॒তা-ন্দশ॑র্ষভা॒মা ল॑ভেতা॒-মুমে॒বা-ঽঽদি॒ত্যগ্গ্ স্বেন॑ ভাগ॒ধেযে॒নোপ॑ ধাবতি॒ স এ॒বাস্মি॑-ন্ব্রহ্মবর্চ॒স-ন্দ॑ধাতি ব্রহ্মবর্চ॒স্যে॑ব ভ॑বতি ব॒সন্তা᳚ প্রা॒তস্ত্রী-ল্লঁ॒লামা॒না ল॑ভেত গ্রী॒ষ্মে ম॒দ্ধ্যন্দি॑নে॒ – [ম॒দ্ধ্যন্দি॑নে, ত্রীঞ্ছি॑তি পৃ॒ষ্ঠাঞ্ছ॒রদ্য॑পরা॒হ্ণে] 21
ত্রীঞ্ছি॑তি পৃ॒ষ্ঠাঞ্ছ॒রদ্য॑পরা॒হ্ণে ত্রীঞ্ছি॑তি॒বারা॒-ন্ত্রীণি॒ বা আ॑দি॒ত্যস্য॒ তেজাগ্ম্॑সি ব॒সন্তা᳚ প্রা॒তর্গ্রী॒ষ্মে ম॒দ্ধ্যন্দি॑নে শ॒রদ্য॑পরা॒হ্ণে যাব॑ন্ত্যে॒ব তেজাগ্ম্॑সি॒ তান্যে॒বাব॑ রুন্ধে॒ ত্রয॑স্ত্রয॒ আ ল॑ভ্যন্তে-ঽভি পূ॒র্বমে॒বাস্মি॒-ন্তেজো॑ দধাতি সংবঁথ্স॒র-ম্প॒র্যাল॑ভ্যন্তে সংবঁথ্স॒রো বৈ ব্র॑হ্মবর্চ॒সস্য॑ প্রদা॒তা সং॑বঁথ্স॒র এ॒বাস্মৈ᳚ ব্রহ্মবর্চ॒স-ম্প্র য॑চ্ছতি ব্রহ্মবর্চ॒স্যে॑ব ভ॑বতি সংবঁথ্স॒রস্য॑ প॒রস্তা᳚-ত্প্রাজাপ॒ত্য-ঙ্কদ্রু॒- [ প্রাজাপ॒ত্য-ঙ্কদ্রু᳚ম্, আ ল॑ভেত] 22
-মা ল॑ভেত প্র॒জাপ॑তি॒-স্সর্বা॑ দে॒বতা॑ দে॒বতা᳚স্বে॒ব প্রতি॑তিষ্ঠতি॒ যদি॑ বিভী॒যা-দ্দু॒শ্চর্মা॑ ভবিষ্যা॒মীতি॑ সোমাপৌ॒ষ্ণগ্গ্ শ্যা॒মমা ল॑ভেত সৌ॒ম্যো বৈ দে॒বত॑যা॒ পুরু॑ষঃ পৌ॒ষ্ণাঃ প॒শব॒-স্স্বযৈ॒বাস্মৈ॑ দে॒বত॑যা প॒শুভি॒স্ত্বচ॑-ঙ্করোতি॒ ন দু॒শ্চর্মা॑ ভবতি দে॒বাশ্চ॒ বৈ য॒মশ্চা॒স্মি-ল্লোঁ॒কে᳚-ঽস্পর্ধন্ত॒ স য॒মো দে॒বানা॑মিন্দ্রি॒যং-বীঁ॒র্য॑মযুবত॒ তদ্য॒মস্য॑ [তদ্য॒মস্য॑, য॒ম॒ত্ব-ন্তে] 23
যম॒ত্ব-ন্তে দে॒বা অ॑মন্যন্ত য॒মো বা ই॒দম॑ভূ॒-দ্য-দ্ব॒যগ্গ্ স্ম ইতি॒ তে প্র॒জাপ॑তি॒মুপা॑ধাব॒ন্-থ্স এ॒তৌ প্র॒জাপ॑তিরা॒ত্মন॑ উক্ষব॒শৌ নির॑মিমীত॒ তে দে॒বা বৈ᳚ষ্ণাবরু॒ণীং-বঁ॒শামা-ঽল॑ভন্তৈ॒ন্দ্রমু॒ক্ষাণ॒ন্তং-বঁরু॑ণেনৈ॒ব গ্রা॑হযি॒ত্বা বিষ্ণু॑না য॒জ্ঞেন॒ প্রাণু॑দন্তৈ॒ন্দ্রেণৈ॒-বাস্যে᳚ন্দ্রি॒যম॑-বৃঞ্জত॒ যো ভ্রাতৃ॑ব্যবা॒ন্-থ্স্যা-থ্স স্পর্ধ॑মানো বৈষ্ণাবরু॒ণীং- [বৈষ্ণাবরু॒ণীম্, ব॒শামা] 24
-বঁ॒শামা ল॑ভেতৈ॒ন্দ্রমু॒ক্ষাণং॒-বঁরু॑ণেনৈ॒ব ভ্রাতৃ॑ব্য-ঙ্গ্রাহযি॒ত্বা বিষ্ণু॑না য॒জ্ঞেন॒ প্রণু॑দত ঐ॒ন্দ্রেণৈ॒বাস্যে᳚ন্দ্রি॒যং-বৃঁ॑ঙ্ক্তে॒ ভব॑ত্যা॒ত্মনা॒ পরা᳚স্য॒ ভ্রাতৃ॑ব্যো ভব॒তীন্দ্রো॑ বৃ॒ত্রম॑হ॒-ন্তং-বৃঁ॒ত্রো হ॒ত-ষ্ষো॑ড॒শভি॑-র্ভো॒গৈর॑সিনা॒-ত্তস্য॑ বৃ॒ত্রস্য॑ শীর্ষ॒তো গাব॒ উদা॑য॒-ন্তা বৈ॑দে॒হ্যো॑-ঽভব॒-ন্তাসা॑মৃষ॒ভো জ॒ঘনে-ঽনূদৈ॒-ত্তমিন্দ্রো॑- [জ॒ঘনে-ঽনূদৈ॒-ত্তমিন্দ্রঃ॑, অ॒চা॒য॒থ্সো॑-ঽমন্যত॒] 25
-ঽচায॒থ্সো॑-ঽমন্যত॒ যো বা ই॒মমা॒লভে॑ত॒ মুচ্যে॑তা॒স্মা-ত্পা॒প্মন॒ ইতি॒ স আ᳚গ্নে॒য-ঙ্কৃ॒ষ্ণগ্রী॑ব॒মা ল॑ভতৈ॒ন্দ্রমৃ॑ষ॒ভ-ন্তস্যা॒গ্নিরে॒ব স্বেন॑ ভাগ॒ধেযে॒নোপ॑ সৃত-ষ্ষোডশ॒ধা বৃ॒ত্রস্য॑ ভো॒গানপ্য॑দহদৈ॒ন্দ্রেণে᳚ন্দ্রি॒য- মা॒ত্মন্ন॑ধত্ত॒ যঃ পা॒প্মনা॑ গৃহী॒ত-স্স্যা-থ্স আ᳚গ্নে॒য-ঙ্কৃ॒ষ্ণগ্রী॑ব॒মা ল॑ভেতৈ॒ন্দ্রমৃ॑ষ॒ভ-ম॒গ্নিরে॒বাস্য॒ স্বেন॑ ভাগ॒ধেযে॒নোপ॑সৃতঃ [ ] 26
পা॒প্মান॒মপি॑ দহত্যৈ॒ন্দ্রেণে᳚ন্দ্রি॒যমা॒ত্ম-ন্ধ॑ত্তে॒ মুচ্য॑তে পা॒প্মনো॒ ভব॑ত্যে॒ব দ্যা॑বাপৃথি॒ব্যা᳚-ন্ধে॒নুমা ল॑ভেত॒ জ্যোগ॑পরুদ্ধো॒ ঽনযো॒র্॒হি বা এ॒ষো-ঽপ্র॑তিষ্ঠি॒তো-ঽথৈ॒ষ জ্যোগপ॑রুদ্ধো॒ দ্যাবা॑পৃথি॒বী এ॒ব স্বেন॑ ভাগ॒ধেযে॒নোপ॑ ধাবতি॒ তে এ॒বৈন॑-ম্প্রতি॒ষ্ঠা-ঙ্গ॑মযতঃ॒ প্রত্যে॒ব তি॑ষ্ঠতি পর্যা॒রিণী॑ ভবতি পর্যা॒রীব॒ হ্যে॑তস্য॑ রা॒ষ্ট্রং-যোঁ জ্যোগ॑পরুদ্ধ॒-স্সমৃ॑দ্ধ্যৈ বায॒ব্যং॑- [বায॒ব্য᳚ম্, ব॒থ্সমা] 27
-বঁ॒থ্সমা ল॑ভেত বা॒যুর্বা অ॒নযো᳚র্ব॒থ্স ই॒মে বা এ॒তস্মৈ॑ লো॒কা অপ॑শুষ্কা॒ বিডপ॑শু॒ষ্কা-ঽথৈ॒ষ জ্যোগপ॑রুদ্ধো বা॒যুমে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মা॑ ই॒মাং-লোঁ॒কান্. বিশ॒-ম্প্রদা॑পযতি॒ প্রাস্মা॑ ই॒মে লো॒কা-স্স্নু॑বন্তিভুঞ্জ॒ত্যে॑নং॒-বিঁডুপ॑তিষ্ঠতে ॥ 28 ॥
(ম॒ধ্যন্দি॑নে॒ – কদ্রুং॑ – যঁ॒মস্য॒ – স্পর্ধ॑মানো বৈষ্ণাবরু॒ণীং -তমিন্দ্রো᳚ – ঽস্য॒ স্বেন॑ ভাগ॒ধেযে॒নোপ॑সৃতো – বায॒ব্যং॑ – দ্বিচ॑ত্বারিগ্ম্শচ্চ) (অ. 4)
ইন্দ্রো॑ ব॒লস্য॒ বিল॒মপৌ᳚র্ণো॒-থ্স য উ॑ত্ত॒মঃ প॒শুরাসী॒-ত্ত-ম্পৃ॒ষ্ঠ-ম্প্রতি॑ স॒গৃংহ্যোদ॑ক্খিদ॒-ত্তগ্ম্ স॒হস্র॑-ম্প॒শবো-ঽনূদা॑য॒ন্-থ্স উ॑ন্ন॒তো॑-ঽভব॒দ্যঃ প॒শুকা॑ম॒-স্স্যা-থ্স এ॒তমৈ॒ন্দ্রমু॑ন্ন॒তমা ল॑ভে॒তেন্দ্র॑মে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মৈ॑ প॒শূ-ন্প্রয॑চ্ছতি পশু॒মানে॒ব ভ॑বত্যুন্ন॒তো [ভ॑বত্যুন্ন॒তঃ, ভ॒ব॒তি॒ সা॒হ॒স্রী] 29
ভ॑বতি সাহ॒স্রী বা এ॒ষা ল॒ক্ষ্মী যদু॑ন্ন॒তো ল॒ক্ষ্মিযৈ॒ ব প॒শূনব॑ রুন্ধে য॒দা স॒হস্র॑-ম্প॒শূ-ন্প্রা᳚প্নু॒যাদথ॑ বৈষ্ণ॒বং-বাঁ॑ ম॒নমা ল॑ভেতৈ॒তস্মি॒ন্. বৈ ত-থ্স॒হস্র॒মদ্ধ্য॑তিষ্ঠ॒-ত্তস্মা॑দে॒ষ বা॑ম॒ন-স্সমী॑ষিতঃ প॒শুভ্য॑ এ॒ব প্রজা॑তেভ্যঃ প্রতি॒ষ্ঠা-ন্দ॑ধাতি॒ কো॑-ঽর্হতি স॒হস্র॑-ম্প॒শূ-ন্প্রাপ্তু॒মিত্যা॑হু-রহোরা॒ত্রাণ্যে॒ব স॒হস্রগ্ম্॑ স॒ম্পাদ্যা-ঽঽল॑ভেত প॒শবো॒ [প॒শবঃ॑, বা অ॑হোরা॒ত্রাণি॑] 30
বা অ॑হোরা॒ত্রাণি॑ প॒শূনে॒ব প্রজা॑তা-ন্প্রতি॒ষ্ঠা-ঙ্গ॑ময॒-ত্যোষ॑ধীভ্যো বে॒হত॒মা ল॑ভেত প্র॒জাকা॑ম॒ ওষ॑ধযো॒ বা এ॒ত-ম্প্র॒জাযৈ॒ পরি॑বাধন্তে॒ যো-ঽল॑-ম্প্র॒জাযৈ॒ স-ন্প্র॒জা-ন্ন বি॒ন্দত॒ ওষ॑ধযঃ॒ খলু॒ বা এ॒তস্যৈ॒ সূতু॒মপি॑ ঘ্নন্তি॒ যা বে॒হ-দ্ভব॒ত্যোষ॑ধীরে॒ব স্বেন॑ ভাগ॒ধেযে॒নোপ॑ ধাবতি॒ তা এ॒বাস্মৈ॒ স্বাদ্যোনেঃ᳚ প্র॒জা-ম্প্র জ॑নযন্তি বি॒ন্দতে᳚ [ ] 31
প্র॒জামাপো॒ বা ওষ॑ধ॒যো-ঽস॒-ত্পুরু॑ষ॒ আপ॑ এ॒বাস্মা॒ অস॑ত॒-স্সদ্দ॑দতি॒ তস্মা॑দাহু॒র্যশ্চৈ॒বং-বেঁদ॒ যশ্চ॒ নাপ॒স্ত্বাবাস॑ত॒-স্সদ্দ॑দ॒তী-ত্যৈ॒ন্দ্রীগ্ম্ সূ॒তব॑শা॒মা ল॑ভেত॒ ভূতি॑কা॒মো-ঽজা॑তো॒ বা এ॒ষ যো-ঽল॒-ম্ভূত্যৈ॒ স-ন্ভূতি॒-ন্ন প্রা॒প্নোতীন্দ্র॒-ঙ্খলু॒ বা এ॒ষা সূ॒ত্বা ব॒শা-ঽভ॑ব॒- [ব॒শা-ঽভ॑বত্, ইন্দ্র॑মে॒ব] 32
-দিন্দ্র॑মে॒ব স্বেন॑ ভাগ॒ধেযে॒নোপ॑ ধাবতি॒ স এ॒বৈন॒-ম্ভূতি॑-ঙ্গমযতি॒ ভব॑ত্যে॒ব যগ্ম্ সূ॒ত্বা ব॒শা স্যা-ত্তমৈ॒ন্দ্রমে॒বা-ঽঽ ল॑ভেতৈ॒তদ্বাব তদি॑ন্দ্রি॒যগ্ম্ সা॒ক্ষাদে॒বেন্দ্রি॒যমব॑ রুন্ধ ঐন্দ্রা॒গ্ন-ম্পু॑নরু-থ্সৃ॒ষ্টমা ল॑ভেত॒ য আ তৃ॒তীযা॒-ত্পুরু॑ষা॒-থ্সোম॒-ন্ন পিবে॒-দ্বিচ্ছি॑ন্নো॒ বা এ॒তস্য॑ সোমপী॒থো যো ব্রা᳚হ্ম॒ণ-স্সন্না [ ] 33
তৃ॒তীযা॒-ত্পুরু॑ষা॒-থ্সোম॒-ন্ন পিব॑তীন্দ্রা॒গ্নী এ॒ব স্বেন॑ ভাগ॒ধেযে॒নোপ॑ ধাবতি॒ তাবে॒বাস্মৈ॑ সোমপী॒থ-ম্প্রয॑চ্ছত॒ উপৈ॑নগ্ম্ সোমপী॒থো ন॑মতি॒ যদৈ॒ন্দ্রো ভব॑তীন্দ্রি॒যং-বৈঁ সো॑মপী॒থ ই॑ন্দ্রি॒যমে॒ব সো॑মপী॒থমব॑ রুন্ধে॒ যদা᳚গ্নে॒যো ভব॑ত্যাগ্নে॒যো বৈ ব্রা᳚হ্ম॒ণ-স্স্বামে॒ব দে॒বতা॒মনু॒ সন্ত॑নোতি পুনরুথ্সৃ॒ষ্টো ভ॑বতি পুনরুথ্সৃ॒ষ্ট ই॑ব॒ হ্যে॑তস্য॑ [হ্যে॑তস্য॑, সো॒ম॒পী॒থ-স্সমৃ॑দ্ধ্যৈ] 34
সোমপী॒থ-স্সমৃ॑দ্ধ্যৈ ব্রাহ্মণস্প॒ত্য-ন্তূ॑প॒রমা ল॑ভেতা-ভি॒চর॒-ন্ব্রহ্ম॑ণ॒স্পতি॑মে॒ব স্বেন॑ ভাগ॒ধেযে॒নোপ॑ ধাবতি॒ তস্মা॑ এ॒বৈন॒মা বৃ॑শ্চতি তা॒জগার্তি॒-মার্চ্ছ॑তি তূপ॒রো ভ॑বতি ক্ষু॒রপ॑বি॒র্বা এ॒ষা ল॒ক্ষ্মী য-ত্তূ॑প॒র-স্সমৃ॑দ্ধ্যৈ॒ স্ফ্যো যূপো॑ ভবতি॒ বজ্রো॒ বৈ স্ফ্যো বজ্র॑মে॒বাস্মৈ॒ প্রহ॑রতি শর॒ময॑-ম্ব॒র্॒হি-শ্শৃ॒ণাত্যে॒বৈনং॒-বৈঁভী॑দক ই॒দ্ধ্মো ভি॒নত্ত্যে॒বৈন᳚ম্ ॥ 35 ॥
(ভ॒ব॒ত্যু॒ন্ন॒তঃ – প॒শবো॑ – জনযন্তি বি॒ন্দতে॑ – ঽভব॒থ্ – সন্নৈ – তস্যে॒ – ধ্ম – স্ত্রীণি॑ চ) (অ. 5)
বা॒র্॒হ॒স্প॒ত্যগ্ম্ শি॑তিপৃ॒ষ্ঠমা ল॑ভেত॒ গ্রাম॑কামো॒ যঃ কা॒মযে॑ত পৃ॒ষ্ঠগ্ম্ স॑মা॒নানাগ্॑ স্যা॒মিতি॒ বৃহ॒স্পতি॑মে॒ব স্বেন॑ ভাগ॒ধেযে॒নোপ॑ ধাবতি॒ স এ॒বৈন॑-ম্পৃ॒ষ্ঠগ্ম্ স॑মা॒নানা᳚-ঙ্করোতি গ্রা॒ম্যে॑ব ভ॑বতি শিতিপৃ॒ষ্ঠো ভ॑বতি বার্হস্প॒ত্যো হ্যে॑ষ দে॒বত॑যা॒ সমৃ॑দ্ধ্যৈ পৌ॒ষ্ণগ্গ্ শ্যা॒মমা ল॑ভে॒তান্ন॑কা॒মো-ঽন্নং॒-বৈঁ পূ॒ষা পূ॒ষণ॑মে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মা॒ [এ॒বাস্মৈ᳚, অন্ন॒-ম্প্র] 36
অন্ন॒-ম্প্র য॑চ্ছত্যন্না॒দ এ॒ব ভ॑বতি শ্যা॒মো ভ॑বত্যে॒তদ্বা অন্ন॑স্য রূ॒পগ্ম্ সমৃ॑দ্ধ্যৈ মারু॒ত-ম্পৃশ্ঞি॒মা ল॑ভে॒তা-ঽন্ন॑-কা॒মো-ঽন্নং॒-বৈঁ ম॒রুতো॑ম॒রুত॑ এ॒ব স্বেন॑ ভাগ॒ধেযে॒নোপ॑ ধাবতি॒ ত এ॒বাস্মা॒ অন্ন॒-ম্প্রয॑চ্ছন্ত্যন্না॒দএ॒ব ভ॑বতি॒ পৃশ্ঞি॑ র্ভবত্যে॒তদ্বা অন্ন॑স্য রূ॒পগ্ম্ সমৃ॑দ্ধ্যা ঐ॒ন্দ্রম॑রু॒ণমা ল॑ভেতেন্দ্রি॒যকা॑ম॒ ইন্দ্র॑মে॒ব [ ] 37
স্বেন॑ ভাগ॒ধেযে॒নোপ॑ ধাবতি॒ স এ॒বাস্মি॑ন্নিন্দ্রি॒য-ন্দ॑ধাতীন্দ্রিযা॒ব্যে॑ব ভ॑বত্যরু॒ণো ভ্রূমা᳚-ন্ভবত্যে॒তদ্বা ইন্দ্র॑স্য রূ॒পগ্ম্ সমৃ॑দ্ধ্যৈ সাবি॒ত্রমু॑পদ্ধ্ব॒স্তমা ল॑ভেত স॒নিকা॑ম-স্সবি॒তা বৈ প্র॑স॒বানা॑মীশে সবি॒তার॑মে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মৈ॑ স॒নি-ম্প্রসু॑বতি॒ দান॑কামা অস্মৈ প্র॒জা ভ॑বন্ত্যুপদ্ধ্ব॒স্তো ভ॑বতি সাবি॒ত্রো হ্যে॑ষ [সাবি॒ত্রো হ্যে॑ষঃ, দে॒বত॑যা॒ সমৃ॑দ্ধ্যৈ] 38
দে॒বত॑যা॒ সমৃ॑দ্ধ্যৈ বৈশ্বদে॒ব-ম্ব॑হুরূ॒পমা ল॑ভে॒তা-ঽন্ন॑কামোবৈশ্বদে॒বং-বাঁ অন্নং॒-বিঁশ্বা॑নে॒ব দে॒বান্-থ্স্বেন॑ ভাগ॒ধেযে॒নোপ॑ ধাবতি॒ত এ॒বাস্মা॒ অন্ন॒-ম্প্রয॑চ্ছন্ত্যন্না॒দ এ॒ব ভ॑বতি বহুরূ॒পো ভ॑বতিবহুরূ॒পগ্গ্ হ্যন্ন॒গ্ম্॒ সমৃ॑দ্ধ্যৈ বৈশ্বদে॒ব-ম্ব॑হুরূ॒পমা ল॑ভেত॒ গ্রাম॑কামো বৈশ্বদে॒বা বৈ স॑জা॒তা বিশ্বা॑নে॒ব দে॒বান্-থ্স্বেন॑ ভাগ॒ধেযে॒নোপ॑ ধাবতি॒ ত এ॒বা-ঽস্মৈ॑ [এ॒বা-ঽস্মৈ᳚, স॒জা॒তা-ন্প্র য॑চ্ছন্তি] 39
সজা॒তা-ন্প্র য॑চ্ছন্তি গ্রা॒ম্যে॑ব ভ॑বতি বহুরূ॒পো ভ॑বতি বহুদেব॒ত্যো᳚(1॒) হ্যে॑ষ সমৃ॑দ্ধ্যৈ প্রাজাপ॒ত্য-ন্তূ॑প॒রমা ল॑ভেত॒ যস্যানা᳚জ্ঞাতমিব॒ জ্যোগা॒মযে᳚-ত্প্রাজাপ॒ত্যো বৈ পুরু॑ষঃ প্র॒জাপ॑তিঃ॒ খলু॒ বৈ তস্য॑ বেদ॒ যস্যানা᳚জ্ঞাতমিব॒ জ্যোগা॒ময॑তি প্র॒জাপ॑তিমে॒ব স্বেন॑ ভাগ॒ধেযে॒নোপ॑ ধাবতি॒ স এ॒বৈন॒-ন্তস্মা॒-থ্স্রামা᳚-ন্মুঞ্চতি তূপ॒রো ভ॑বতি প্রাজাপ॒ত্যো হ্যে॑ -ষ দে॒বত॑যা॒ সমৃ॑দ্ধ্যৈ ॥ 40 ॥
(অ॒স্মা॒ – ইন্দ্র॑মে॒বৈ – ষ – স॑জা॒তা বিশ্বা॑নে॒ব দে॒বান্-থ্স্বেন॑ ভাগ॒ধেযে॒নোপ॑ ধাবতি॒ ত এ॒বাস্মৈ᳚ – প্রাজাপ॒ত্যো হি – ত্রীণি॑ চ) (অ. 11)
ব॒ষ॒ট্কা॒রো বৈ গা॑যত্রি॒যৈ শিরো᳚-ঽচ্ছিন॒-ত্তস্যৈ॒ রসঃ॒ পরা॑পত॒-ত্ত-ম্বৃহ॒স্পতি॒ রুপা॑-ঽগৃহ্ণা॒থ্সা শি॑তিপৃ॒ষ্ঠা ব॒শা-ঽভ॑ব॒দ্যো দ্বি॒তীযঃ॑ প॒রা-ঽপ॑ত॒-ত্ত-ম্মি॒ত্রাবরু॑ণা॒-বুপা॑গৃহ্ণীতা॒গ্ম্॒ সা দ্বি॑রূ॒পা ব॒শা-ঽভ॑ব॒-দ্যস্তৃ॒তীযঃ॑ প॒রাপ॑ত॒-ত্তং-বিঁশ্বে॑ দে॒বা উপা॑গৃহ্ণ॒ন্-থ্সা ব॑হুরূ॒পা ব॒শা ভ॑ব॒দ্য-শ্চ॑তু॒র্থঃ প॒রাপ॑ত॒-থ্স পৃ॑থি॒বী-ম্প্রা-ঽবি॑শ॒-ত্ত-ম্বৃহ॒স্পতি॑র॒- [বৃহ॒স্পতি॑র॒ভি, অ॒গৃ॒হ্ণা॒-দস্ত্বে॒বা-ঽযং-] 41
-ভ্য॑গৃহ্ণা॒-দস্ত্বে॒বা-ঽয-ম্ভোগা॒যেতি॒ স উ॑ক্ষব॒শ-স্সম॑ভব॒-দ্যল্লোহি॑ত-ম্প॒রাপ॑ত॒-ত্ত-দ্রু॒দ্র উপা॑-ঽগৃহ্ণা॒-থ্সা রৌ॒দ্রী রোহি॑ণী ব॒শা-ঽভ॑ব-দ্বার্হস্প॒ত্যাগ্ম্ শি॑তিপৃ॒ষ্ঠামা ল॑ভেত ব্রহ্মবর্চ॒সকা॑মো॒ বৃহ॒স্পতি॑মে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মি॑-ন্ব্রহ্মবর্চ॒স-ন্দ॑ধাতি ব্রহ্মবর্চ॒স্যে॑ব ভ॑বতি॒ ছন্দ॑সাং॒-বাঁ এ॒ষ রসো॒ যদ্ব॒শা রস॑ ইব॒ খলু॒ [খলু॑, বৈ] 42
বৈ ব্র॑হ্মবর্চ॒স-ঞ্ছন্দ॑সামে॒ব রসে॑ন॒ রস॑-ম্ব্রহ্মবর্চ॒সমব॑ রুন্ধে মৈত্রাবরু॒ণী-ন্দ্বি॑রূ॒পামা ল॑ভেত॒ বৃষ্টি॑কামো মৈ॒ত্রং-বাঁ অহ॑র্বারু॒ণী রাত্রি॑রহোরা॒ত্রাভ্যা॒-ঙ্খলু॒ বৈ প॒র্জন্যো॑ বর্ষতি মি॒ত্রাবরু॑ণাবে॒ব স্বেন॑ ভাগ॒ধেযে॒নোপ॑ ধাবতি॒ তাবে॒বাস্মা॑ অহোরা॒ত্রাভ্যা᳚-ম্প॒র্জন্যং॑-বঁর্ষযত॒-শ্ছন্দ॑সাং॒-বাঁ এ॒ষ রসো॒ যদ্ব॒শা রস॑ ইব॒ খলু॒ বৈ বৃষ্টি॒-শ্ছন্দ॑সামে॒ব রসে॑ন॒ [রসে॑ন, রসং॒-বৃঁষ্টি॒মব॑ রুন্ধে] 43
রসং॒-বৃঁষ্টি॒মব॑ রুন্ধে মৈত্রাবরু॒ণী-ন্দ্বি॑রূ॒পামা ল॑ভেত প্র॒জাকা॑মো মৈ॒ত্রং-বাঁ অহ॑র্বারু॒ণী রাত্রি॑রহোরা॒ত্রাভ্যা॒-ঙ্খলু॒ বৈ প্র॒জাঃ প্রজা॑যন্তে মি॒ত্রাবরু॑ণাবে॒ব স্বেন॑ ভাগ॒ধেযে॒নোপ॑ ধাবতি॒ তাবে॒বাস্মা॑ অহোরা॒ত্রাভ্যা᳚-ম্প্র॒জা-ম্প্রজ॑নযত॒-শ্ছন্দ॑সাং॒-বাঁ এ॒ষ রসো॒ যদ্ব॒শা রস॑ ইব॒ খলু॒ বৈ প্র॒জা ছন্দ॑সামে॒ব রসে॑ন॒ রস॑-ম্প্র॒জামব॑- [রস॑-ম্প্র॒জামব॑, রু॒ন্ধে॒ বৈ॒শ্ব॒দে॒বীম্-] 44
-রুন্ধে বৈশ্বদে॒বী-ম্ব॑হুরূ॒পামা ল॑ভে॒তান্ন॑কামো বৈশ্বদে॒বং-বাঁ অন্নং॒-বিঁশ্বা॑নে॒ব দে॒বান্-থ্স্বেন॑ ভাগ॒ধেযে॒নোপ॑ ধাবতি॒ ত এ॒বাস্মা॒ অন্নং॒ প্রয॑চ্ছন্ত্যন্না॒দ এ॒ব ভ॑বতি॒ ছন্দ॑সাং॒-বাঁ এ॒ষ রসো॒ যদ্ব॒শা রস॑ ইব॒ খলু॒ বা অন্ন॒-ঞ্ছন্দ॑সামে॒ব রসে॑ন॒ রস॒মন্ন॒মব॑ রুন্ধে বৈশ্বদে॒বী-ম্ব॑হুরূ॒পামা ল॑ভেত॒ গ্রাম॑কামো বৈশ্বদে॒বা বৈ [বৈ, স॒জা॒তা বিশ্বা॑নে॒ব] 45
স॑জা॒তা বিশ্বা॑নে॒ব দে॒বান্-থ্স্বেন॑ ভাগ॒ধেযে॒নোপ॑ ধাবতি॒ ত এ॒বাস্মৈ॑ সজা॒তা-ন্প্র য॑চ্ছন্তি গ্রা॒ম্যে॑ব ভ॑বতি॒ ছন্দ॑সাং॒-বাঁ এ॒ষ রসো॒ যদ্ব॒শা রস॑ ইব॒ খলু॒ বৈ স॑জা॒তা-শ্ছন্দ॑সামে॒ব রসে॑ন॒ রসগ্ম্॑ সজা॒তানব॑ রুন্ধে বার্হস্প॒ত্য- মু॑ক্ষব॒শমা ল॑ভেত ব্রহ্মবর্চ॒সকা॑মো॒ বৃহ॒স্পতি॑মে॒ব স্বেন॑ ভাগ॒ধেযে॒নোপ॑ ধাবতি॒ স এ॒বা-ঽস্মি॑-ন্ব্রহ্মবর্চ॒সং- [এ॒বা-ঽস্মি॑-ন্ব্রহ্মবর্চ॒সম্, দ॒ধা॒তি॒ ব্র॒হ্ম॒ব॒র্চ॒স্যে॑ব] 46
-দ॑ধাতি ব্রহ্মবর্চ॒স্যে॑ব ভ॑বতি॒ বশং॒-বাঁ এ॒ষ চ॑রতি॒ যদু॒ক্ষাবশ॑ ইব॒ খলু॒ বৈ ব্র॑হ্মবর্চ॒সং-বঁশে॑নৈ॒ব বশ॑-ম্ব্রহ্মবর্চ॒সমব॑ রুন্ধেরৌ॒দ্রীগ্ম্রোহি॑ণী॒মা ল॑ভেতাভি॒চর॑-ন্রু॒দ্রমে॒ব স্বেন॑ ভাগ॒ধেযে॒নোপ॑ ধাবতি॒ তস্মা॑ এ॒বৈন॒মা বৃ॑শ্চতি তা॒জগার্তি॒মার্চ্ছ॑তি॒ রোহি॑ণী ভবতি রৌ॒দ্রী হ্যে॑ষা দে॒বত॑যা॒ সমৃ॑দ্ধ্যৈ॒ স্ফ্যো যূপো॑ ভবতি॒ বজ্রো॒ বৈ স্ফ্যো বজ্র॑মে॒বাস্মৈ॒ প্র হ॑রতি শর॒ময॑-ম্ব॒র্॒হি-শ্শৃ॒ণাত্যে॒বৈনং॒-বৈঁভী॑দক ই॒দ্ধ্মো ভি॒নত্ত্যে॒বৈন᳚ম্ ॥ 47 ॥
(অ॒ভি – খলু॒ – বৃষ্টি॒-শ্ছন্দ॑সামে॒ব রসে॑ন – প্র॒জামব॑ – বৈশ্বদে॒বা বৈ – ব্র॑হ্মবর্চ॒সং – যূঁপ॒ – একা॒ন্নবিগ্ম্॑শ॒তিশ্চ॑) (অ. 7)
অ॒সাবা॑দি॒ত্যো ন ব্য॑রোচত॒ তস্মৈ॑ দে॒বাঃ প্রায॑শ্চিত্তিমৈচ্ছ॒-ন্তস্মা॑ এ॒তাগ্ম্ সৌ॒রীগ্ শ্বে॒তাং-বঁ॒শামা-ঽল॑ভন্ত॒ তযৈ॒বাস্মি॒-ন্রুচ॑মদধু॒র্যো ব্র॑হ্মবর্চ॒সকা॑ম॒-স্স্যা-ত্তস্মা॑ এ॒তাগ্ম্ সৌ॒রীগ্ শ্বে॒তাং-বঁ॒শামা ল॑ভেতা॒মুমে॒বা ঽঽদি॒ত্যগ্গ্ স্বেন॑ ভাগ॒ধেযে॒নোপ॑ ধাবতি॒ স এ॒বাস্মি॑-ন্ব্রহ্মবর্চ॒স-ন্দ॑ধাতি ব্রহ্মবর্চ॒স্যে॑ব ভ॑বতি বৈ॒ল্॒বো যূপো॑ ভবত্য॒সৌ [ ] 48
বা আ॑দি॒ত্যো যতো-ঽজা॑যত॒ ততো॑ বি॒ল্ব॑ উদ॑তিষ্ঠ॒-থ্সযো᳚ন্যে॒ব ব্র॑হ্মবর্চ॒সমব॑ রুন্ধে ব্রাহ্মণস্প॒ত্যা-ম্ব॑ভ্রুক॒র্ণীমা ল॑ভেতা-ভি॒চর॑ন্-বারু॒ণ-ন্দশ॑কপাল-ম্পু॒রস্তা॒-ন্নির্ব॑পে॒-দ্বরু॑ণেনৈ॒ব ভ্রাতৃ॑ব্য-ঙ্গ্রাহযি॒ত্বা ব্রহ্ম॑ণা স্তৃণুতে বভ্রুক॒র্ণী ভ॑বত্যে॒তদ্বৈ ব্রহ্ম॑ণো রূ॒পগ্ম্ সমৃ॑দ্ধ্যৈ॒ স্ফ্যো যূপো॑ ভবতি॒ বজ্রো॒ বৈ স্ফ্যো বজ্র॑মে॒বাস্মৈ॒ প্র হ॑রতি শর॒ময॑-ম্ব॒র্॒হি-শ্শৃ॒ণা- [-ব॒র্॒হি-শ্শৃ॒ণাতি॑, এ॒বৈনং॒-বৈঁভী॑দক] 49
-ত্যে॒বৈনং॒-বৈঁভী॑দক ই॒দ্ধ্মো ভি॒নত্ত্যে॒বৈনং॑-বৈঁষ্ণ॒বং-বাঁ॑ম॒নমা ল॑ভেত॒ যং-যঁ॒জ্ঞো নোপ॒নমে॒-দ্বিষ্ণু॒র্বৈ য॒জ্ঞো বিষ্ণু॑মে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মৈ॑ য॒জ্ঞ-ম্প্র য॑চ্ছ॒ত্যুপৈ॑নং-যঁ॒জ্ঞো ন॑মতি বাম॒নো ভ॑বতি বৈষ্ণ॒বো হ্যে॑ষ দে॒বত॑যা॒ সমৃ॑দ্ধ্যৈ ত্বা॒ষ্ট্রং-বঁ॑ড॒ব মা ল॑ভেত প॒শুকা॑ম॒স্ত্বষ্টা॒ বৈ প॑শূ॒না-ম্মি॑থু॒নানাং᳚- [বৈ প॑শূ॒না-ম্মি॑থু॒নানা᳚ম্, প্র॒জ॒ন॒যি॒তা] 50
প্রজনযি॒তা ত্বষ্টা॑রমে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মৈ॑ প॒শূ-ন্মি॑থু॒না-ন্প্র জ॑নযতি প্র॒জা হি বা এ॒তস্মি॑-ন্প॒শবঃ॒ প্রবি॑ষ্টা॒ অথৈ॒ষ পুমা॒ন্থ্সন্ ব॑ড॒ব-স্সা॒ক্ষাদে॒ব প্র॒জা-ম্প॒শূনব॑ রুন্ধে মৈ॒ত্রগ্গ্ শ্বে॒তমা ল॑ভেত সঙ্গ্রা॒মে সংযঁ॑ত্তে সম॒যকা॑মো মি॒ত্রমে॒ব স্বেন॑ ভাগ॒ধেযে॒নোপ॑ ধাবতি॒ স এ॒বৈন॑-ম্মি॒ত্রেণ॒ স-ন্ন॑যতি – [অ-ন্ন॑যতি, বি॒শা॒লো ভ॑বতি॒] 51
বিশা॒লো ভ॑বতি॒ ব্যব॑সাযযত্যে॒বৈন॑-ম্প্রাজাপ॒ত্য-ঙ্কৃ॒ষ্ণমা ল॑ভেত॒ বৃষ্টি॑কামঃ প্র॒জাপ॑তি॒র্বৈ বৃষ্ট্যা॑ ঈশে প্র॒জাপ॑তিমে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মৈ॑ প॒র্জন্যং॑-বঁর্ষযতি কৃ॒ষ্ণো ভ॑বত্যে॒তদ্বৈ বৃষ্ট্যৈ॑ রূ॒পগ্ম্ রূ॒পেণৈ॒ব বৃষ্টি॒মব॑ রুন্ধে শ॒বলো॑ ভবতি বি॒দ্যুত॑মে॒বাস্মৈ॑ জনযি॒ত্বা ব॑র্ষযত্যবাশৃ॒ঙ্গো ভ॑বতি॒ বৃষ্টি॑মে॒বাস্মৈ॒ নি য॑চ্ছতি ॥ 52 ॥
(অ॒সৌ – শৃ॒ণাতি॑ – মিথু॒নানাং᳚ – নযতি – যচ্ছতি) (অ. 8)
বরু॑ণগ্ম্ সুষুবা॒ণম॒ন্নাদ্য॒-ন্নোপা॑নম॒-থ্স এ॒তাং-বাঁ॑রু॒ণী-ঙ্কৃ॒ষ্ণাং-বঁ॒শাম॑পশ্য॒-ত্তাগ্ স্বাযৈ॑ দে॒বতা॑যা॒ আল॑ভত॒ ততো॒ বৈ তম॒ন্না-দ্য॒মুপা॑-ঽনম॒-দ্যমল॑-ম॒ন্নাদ্যা॑য॒ সন্ত॑ম॒ন্নাদ্য॒-ন্নোপ॒নমে॒-থ্স এ॒তাং বাঁ॑রু॒ণী-ঙ্কৃ॒ষ্ণাং-বঁ॒শামা ল॑ভেত॒ বরু॑ণমে॒ব স্বেন॑ ভাগ॒ধেযে॒নোপ॑ ধাবতি॒ স এ॒বাস্মা॒ অন্ন॒-ম্প্র য॑চ্ছত্যন্না॒দ [অন্ন॒-ম্প্র য॑চ্ছত্যন্না॒দঃ, এ॒ব ভ॑বতি] 53
এ॒ব ভ॑বতি কৃ॒ষ্ণা ভ॑বতি বারু॒ণী হ্যে॑ষা দে॒বত॑যা॒ সমৃ॑দ্ধ্যৈ মৈ॒ত্রগ্গ্ শ্বে॒তমা ল॑ভেত বারু॒ণ-ঙ্কৃ॒ষ্ণম॒পা-ঞ্চৌষ॑ধীনা-ঞ্চ স॒ধাংবঁন্ন॑কামো মৈ॒ত্রীর্বা ওষ॑ধযো বারু॒ণীরাপো॒-ঽপা-ঞ্চ॒ খলু॒ বা ওষ॑ধীনা-ঞ্চ॒ রস॒মুপ॑ জীবামো মি॒ত্রাবরু॑ণাবে॒ব স্বেন॑ ভাগ॒ধেযে॒নোপ॑ ধাবতি॒ তাবে॒বাস্মা॒ অন্ন॒-ম্প্রয॑চ্ছতো-ঽন্না॒দ এ॒ব ভ॑ব- [এ॒ব ভ॑বতি, অ॒পা-ঞ্চৌষ॑ধীনা-ঞ্চ] 54
(শিখণ্ডি প্রচতিঃ)
-ত্য॒পা-ঞ্চৌষ॑ধীনা-ঞ্চ স॒ধাংবাঁ ল॑ভত উ॒ভয॒স্যা-ব॑রুদ্ধ্যৈ॒বিশা॑খো॒ যূপো॑ ভবতি॒ দ্বে হ্যে॑তে দে॒বতে॒ সমৃ॑দ্ধ্যৈ মৈ॒ত্রগ্গ্ শ্বে॒তমা ল॑ভেত বারু॒ণ-ঙ্কৃ॒ষ্ণ-ঞ্জ্যোগা॑মযাবী॒-য-ন্মৈ॒ত্রো ভব॑তি মি॒ত্রেণৈ॒বা-ঽস্মৈ॒ বরু॑ণগ্ম্ শমযতি॒ য-দ্বা॑রু॒ণ-স্সা॒ক্ষাদে॒বৈনং॑-বঁরুণপা॒শা-ন্মু॑ঞ্চত্যু॒ত যদী॒তাসু॒র্ভব॑তি॒ জীব॑ত্যে॒ব দে॒বা বৈ পুষ্টি॒-ন্না-ঽবি॑ন্দ॒ন্- [না-ঽবি॑ন্দন্ন্, তা-ম্মি॑থু॒নে॑] 55
-তা-ম্মি॑থু॒নে॑ ঽপশ্য॒-ন্তস্যা॒-ন্ন সম॑রাধয॒ন্তা-ব॒শ্বিনা॑-বব্রূতা-মা॒বযো॒র্বা এ॒ষা মৈতস্যাং᳚ বঁদদ্ধ্ব॒মিতি॒ সাশ্বিনো॑রে॒বাভ॑ব॒দ্যঃ পুষ্টি॑কাম॒-স্স্যা-থ্স এ॒তামা᳚শ্বি॒নীং-যঁ॒মীং-বঁ॒শামা ল॑ভেতা॒-ঽশ্বিনা॑বে॒ব স্বেন॑ ভাগ॒ধেযে॒নোপ॑ ধাবতি॒ তাবে॒বাস্মি॒-ন্পুষ্টি॑-ন্ধত্তঃ॒ পুষ্য॑তি প্র॒জযা॑ প॒শুভিঃ॑ ॥ 56 ॥
(অ॒ন্না॒দো᳚ – ঽন্না॒দ এ॒ব ভ॑বত্য – বিন্দ॒ন্ – পঞ্চ॑চত্বারিগ্ম্শচ্চ) (অ. 9)
আ॒শ্বি॒ন-ন্ধূ॒ম্রল॑লাম॒ মা ল॑ভেত॒ যো দুর্ব্রা᳚হ্মণ॒-স্সোম॒-ম্পিপা॑সে-দ॒শ্বিনৌ॒ বৈ দে॒বানা॒-মসো॑মপাবাস্তা॒-ন্তৌ প॒শ্চা সো॑মপী॒থ-ম্প্রাপ্নু॑তা-ম॒শ্বিনা॑-বে॒তস্য॑ দে॒বতা॒ যো দুর্ব্রা᳚হ্মণ॒-স্সোম॒-ম্পিপা॑সত্য॒শ্বিনা॑বে॒ব স্বেন॑ ভাগ॒ধেযে॒নোপ॑ ধাবতি॒-তা-বে॒বা-ঽস্মৈ॑ সোমপী॒থ-ম্প্র য॑চ্ছত॒ উপৈ॑নগ্ম্ সোমপী॒থো ন॑মতি॒ য-দ্ধূ॒ম্রো ভব॑তি ধূম্রি॒মাণ॑-মে॒বা-ঽস্মা॒-দপ॑ হন্তি ল॒লামো॑ [ল॒লামঃ॑, ভ॒ব॒তি মু॒খ॒ত] 57
ভবতি মুখ॒ত এ॒বাস্মি॒-ন্তেজো॑ দধাতি বায॒ব্য॑-ঙ্গোমৃ॒গমা ল॑ভেত॒ যমজ॑ঘ্নিবাগ্ম্ সমভি॒শগ্ম্ সে॑যু॒রপূ॑তা॒ বা এ॒তং-বাঁগৃ॑চ্ছতি॒ যমজ॑ঘ্নিবাগ্ম্ সমভি॒শগ্ম্ স॑ন্তি॒ নৈষ গ্রা॒ম্যঃ প॒শুর্নার॒ণ্যো য-দ্গো॑মৃ॒গো নেবৈ॒ষ গ্রামে॒ নার॑ণ্যে॒ যমজ॑ঘ্নিবাগ্ম্ সমভি॒শগ্ম্ স॑ন্তি বা॒যুর্বৈ দে॒বানা᳚-ম্প॒বিত্রং॑-বাঁ॒যুমে॒ব স্বেন॑ ভাগ॒ধেযে॒নোপ॑ ধাবতি॒ স এ॒বৈ- [স এ॒ব, এ॒ন॒-ম্প॒ব॒য॒তি॒ পরা॑চী॒] 58
-ন॑-ম্পবযতি॒ পরা॑চী॒ বা এ॒তস্মৈ᳚ ব্যু॒চ্ছন্তী॒ ব্যু॑চ্ছতি॒ তমঃ॑ পা॒প্মান॒-ম্প্রবি॑শতি॒ যস্যা᳚-ঽঽশ্বি॒নে শ॒স্যমা॑নে॒ সূর্যো॒ না-ঽঽবির্ভব॑তি সৌ॒র্য-ম্ব॑হুরূ॒পমা ল॑ভেতা॒-ঽমু-মে॒বা-ঽঽদি॒ত্যগ্গ্ স্বেন॑ ভাগ॒ধেযে॒নোপ॑ ধাবতি॒ স এ॒বাস্মা॒-ত্তমঃ॑ পা॒প্মান॒মপ॑ হন্তি প্র॒তীচ্য॑স্মৈ ব্যু॒চ্ছন্তী॒ ব্যু॑চ্ছ॒ত্যপ॒ তমঃ॑ পা॒প্মানগ্ম্॑ হতে ॥ 59 ॥
(ল॒লামঃ॒ – স এ॒ব – ষট্চ॑ত্বারিগ্ম্শচ্চ) (অ. 10)
ইন্দ্রং॑-বোঁ বি॒শ্বত॒স্পরী, ন্দ্র॒-ন্নরো॒, মরু॑তো॒ যদ্ধ॑ বো দি॒বো, যা ব॒-শ্শর্ম॑ ॥ ভরে॒ষ্বিন্দ্রগ্ম্॑ সু॒হবগ্ম্॑ হবামহে ঽগ্ম্হো॒মুচগ্ম্॑ সু॒কৃত॒-ন্দৈব্য॒-ঞ্জন᳚ম্ । অ॒গ্নি-ম্মি॒ত্রং-বঁরু॑ণগ্ম্ সা॒তযে॒ ভগ॒-ন্দ্যাবা॑পৃথি॒বী ম॒রুত॑-স্স্ব॒স্তযে᳚ ॥ ম॒মত্তু॑ নঃ॒ পরি॑জ্মা বস॒র্॒হা ম॒মত্তু॒ বাতো॑ অ॒পাং-বৃঁষ॑ণ্বান্ন্ । শি॒শী॒তমি॑ন্দ্রাপর্বতা যু॒ব-ন্ন॒স্তন্নো॒ বিশ্বে॑ বরিবস্যন্তু দে॒বাঃ ॥ প্রি॒যা বো॒ নাম॑ – [প্রি॒যা বো॒ নাম॑, হু॒বে॒ তু॒রাণা᳚ম্ ।] 60
হুবে তু॒রাণা᳚ম্ । আ য-ত্তৃ॒পন্ম॑রুতো বাবশা॒নাঃ ॥ শ্রি॒যসে॒ ক-ম্ভা॒নুভি॒-স্স-ম্মি॑মিক্ষিরে॒ তে র॒শ্মিভি॒স্ত ঋক্ব॑ভি-স্সুখা॒দযঃ॑ । তে বাশী॑মন্ত ই॒ষ্মিণো॒ অভী॑রবো বি॒দ্রে প্রি॒যস্য॒ মারু॑তস্য॒ ধাম্নঃ॑ ॥ অ॒গ্নিঃ প্র॑থ॒মো বসু॑ভির্নো অব্যা॒-থ্সোমো॑ রু॒দ্রেভি॑র॒ভি র॑ক্ষত॒ ত্মনা᳚ । ইন্দ্রো॑ ম॒রুদ্ভি॑র্-ঋতু॒ধা কৃ॑ণোত্বাদি॒ত্যৈর্নো॒ বরু॑ণ॒-স্সগ্ম্ শি॑শাতু ॥ স-ন্নো॑ দে॒বো বসু॑ভির॒গ্নি-স্সগ্ম্ [বসু॑ভির॒গ্নি-স্সম্, সোম॑স্ত॒নূভী॑ রু॒দ্রিযা॑ভিঃ ।] 61
সোম॑স্ত॒নূভী॑ রু॒দ্রিযা॑ভিঃ । সমিন্দ্রো॑ ম॒রুদ্ভি॑ র্য॒জ্ঞিযৈ॒-স্সমা॑দি॒ত্যৈর্নো॒ বরু॑ণো অজিজ্ঞিপত্ ॥ যথা॑-ঽঽদি॒ত্যা বসু॑ভি-স্সম্বভূ॒বু-র্ম॒রুদ্ভী॑ রু॒দ্রা-স্স॒মজা॑নতা॒ভি । এ॒বা ত্রি॑ণাম॒ন্ন-হৃ॑ণীযমানা॒ বিশ্বে॑ দে॒বা-স্সম॑নসো ভবন্তু ॥ কুত্রা॑ চি॒দ্যস্য॒ সমৃ॑তৌ র॒ণ্বা নরো॑ নৃ॒ষদ॑নে । অর্হ॑ন্তশ্চি॒-দ্যমি॑ন্ধ॒তে স॑জ॒ন্নয॑ন্তি জ॒ন্তবঃ॑ ॥ সং-যঁদি॒ষো বনা॑মহে॒ সগ্ম্ হ॒ব্যা মানু॑ষাণাম্ । উ॒ত দ্যু॒ম্নস্য॒ শব॑স [শব॑সঃ, ঋ॒তস্য॑ র॒শ্মিমা দ॑দে ।] 62
ঋ॒তস্য॑ র॒শ্মিমা দ॑দে ॥ য॒জ্ঞো দে॒বানা॒-ম্প্রত্যে॑তি সু॒ম্নমাদি॑ত্যাসো॒ ভব॑তা মৃড॒যন্তঃ॑ । আ বো॒-ঽর্বাচী॑ সুম॒তির্ব॑বৃত্যাদ॒গ্ম্॒ হোশ্চি॒দ্যা ব॑রিবো॒বিত্ত॒রা-ঽস॑ত্ ॥ শুচি॑র॒প-স্সূ॒যব॑সা অদ॑ব্ধ॒ উপ॑ ক্ষেতি বৃ॒দ্ধব॑যা-স্সু॒বীরঃ॑ । নকি॒ষ্টং(2) ঘ্ন॒ন্ত্যন্তি॑তো॒ ন দূ॒রাদ্য আ॑দি॒ত্যানা॒-ম্ভব॑তি॒ প্রণী॑তৌ ॥ ধা॒রয॑ন্ত আদি॒ত্যাসো॒ জগ॒থ্স্থা দে॒বা বিশ্ব॑স্য॒ ভুব॑নস্য গো॒পাঃ । দী॒র্ঘাধি॑যো॒ রক্ষ॑মাণা [রক্ষ॑মাণাঃ, অ॒সু॒র্য॑মৃ॒তাবা॑ন॒-] 63
অসু॒র্য॑মৃ॒তাবা॑ন॒-শ্চয॑মানা ঋ॒ণানি॑ ॥ তি॒স্রো ভূমী᳚র্ধারয॒-ন্ত্রীগ্ম্ রু॒ত দ্যূ-ন্ত্রীণি॑ ব্র॒তা বি॒দথে॑ অ॒ন্তরে॑ষাম্ । ঋ॒তেনা॑-ঽঽদিত্যা॒ মহি॑ বো মহি॒ত্ব-ন্তদ॑র্যমন্ বরুণ মিত্র॒ চারু॑ ॥ ত্যান্নু ক্ষ॒ত্রিযা॒গ্ম্॒ অব॑ আদি॒ত্যান্. যা॑চিষামহে । সু॒মৃ॒ডী॒কাগ্ম্ অ॒ভিষ্ট॑যে ॥ ন দ॑ক্ষি॒ণা বিচি॑কিতে॒ ন স॒ব্যা ন প্রা॒চীন॑মাদিত্যা॒ নোত প॒শ্চা । পা॒ক্যা॑ চিদ্বসবো ধী॒র্যা॑ চি- [ধী॒র্যা॑ চিত্, যু॒ষ্মানী॑তো॒] 64
-দ্যু॒ষ্মানী॑তো॒ অভ॑য॒-ঞ্জ্যোতি॑রশ্যাম্ ॥ আ॒দি॒ত্যানা॒মব॑সা॒ নূত॑নেন সক্ষী॒মহি॒ শর্ম॑ণা॒ শন্ত॑মেন । অ॒না॒গা॒স্ত্বে অ॑দিতি॒ত্বে তু॒রাস॑ ই॒মং-যঁ॒জ্ঞ-ন্দ॑ধতু॒ শ্রোষ॑মাণাঃ ॥ ই॒ম-ম্মে॑ বরুণ শ্রুধী॒ হব॑ম॒দ্যা চ॑ মৃডয । ত্বাম॑ব॒স্যুরা চ॑কে ॥ তত্ত্বা॑ যামি॒ ব্রহ্ম॑ণা॒ বন্দ॑মান॒-স্তদা শা᳚স্তে॒ যজ॑মানো হ॒বির্ভিঃ॑ । অহে॑ডমানো বরুণে॒হ বো॒দ্ধ্যুরু॑শগ্ম্স॒ মা ন॒ আযুঃ॒ প্রমো॑ষীঃ ॥ 65 ॥
(নামা॒ – ঽগ্নি-স্সগ্ম্ – শব॑সো॒ – রক্ষ॑মাণা – ধী॒র্যা॑-ঞ্চি॒দে – কা॒ন্ন প॑ঞ্চা॒শচ্চ॑) (অ. 11)
(বা॒য॒ব্যং॑ – প্রা॒জপ॑তি॒স্তা বরু॑ণং – দেবাসু॒রা এ॒ষ্ব॑ – সাবা॑দি॒ত্যো দশ॑র্ষভা॒-মিন্দ্রো॑ ব॒লস্য॑ – বার্হস্প॒ত্যং – বঁ॑ষট্কা॒রো॑ – ঽসৌসৌ॒রীং॒ – বঁ॑রুণ -মাশ্বি॒ন – মিন্দ্রং॑-বোঁ॒ নর॒ – একাদ॑শ)
(বা॒য॒ব্য॑ – মাগ্নে॒যী-ঙ্কৃ॑ষ্ণগ্রী॒বী – ম॒সাবা॑দি॒ত্যো – বা অ॑হোরা॒ত্রাণি॑ – বষট্কা॒রঃ – প্র॑জনযি॒তা – হু॑বে তু॒রাণাং॒ – পঞ্চ॑ষষ্টিঃ )
(বা॒য॒ব্য॑ম্, প্রমো॑ষীঃ)
॥ হরিঃ॑ ওম্ ॥
॥ কৃষ্ণ যজুর্বেদীয তৈত্তিরীয সংহিতাযা-ন্দ্বিতীযকাণ্ডে প্রথমঃ প্রশ্ন-স্সমাপ্তঃ ॥