সুংদরগোপালং উরবনমালং নযনবিশালং দুঃখহরং
বৃংদাবনচংদ্রমানংদকংদং পরমানংদং ধরণিধরম্ ।
বল্লভঘনশ্যামং পূর্ণকামং অত্যভিরামং প্রীতিকরং
ভজ নংদকুমারং সর্বসুখসারং তত্ত্ববিচারং ব্রহ্মপরম্ ॥ 1 ॥
সুংদরবারিজবদনং নির্জিতমদনং আনংদসদনং মুকুটধরং
গুংজাকৃতিহারং বিপিনবিহারং পরমোদারং চীরহরম্ ।
বল্লভপটপীতং কৃত উপবীতং করনবনীতং বিবুধবরং
ভজ নংদকুমারং সর্বসুখসারং তত্ত্ববিচারং ব্রহ্মপরম্ ॥ 2 ॥
শোভিতসুখমূলং যমুনাকূলং নিপট অতূলং সুখদতরং
মুখমংডিতরেণুং চারিতধেনুং বাদিতবেণুং মধুরসুরম্ ।
বল্লভমতিবিমলং শুভপদকমলং নখরুচি অমলং তিমিরহরং
ভজ নংদকুমারং সর্বসুখসারং তত্ত্ববিচারং ব্রহ্মপরম্ ॥ 3 ॥
শিরমুকুটসুদেশং কুংচিতকেশং নটবরবেষং কামবরং
মাযাকৃতমনুজং হলধর অনুজং প্রতিহতদনুজং ভারহরম্ ।
বল্লভব্রজপালং সুভগসুচালং হিতমনুকালং ভাববরং
ভজ নংদকুমারং সর্বসুখসারং তত্ত্ববিচারং ব্রহ্মপরম্ ॥ 4 ॥
ইংদীবরভাসং প্রকটসরাসং কুসুমবিকাসং বংশধরং
হৃত্মন্মথমানং রূপনিধানং কৃতকলগানং চিত্তহরম্ ।
বল্লভমৃদুহাসং কুংজনিবাসং বিবিধবিলাসং কেলিকরং
ভজ নংদকুমারং সর্বসুখসারং তত্ত্ববিচারং ব্রহ্মপরম্ ॥ 5 ॥
অতিপরমপ্রবীণং পালিতদীনং ভক্তাধীনং কর্মকরং
মোহনমতিধীরং ফণিবলবীরং হতপরবীরং তরলতরম্ ।
বল্লভব্রজরমণং বারিজবদনং হলধরশমনং শৈলধরং
ভজ নংদকুমারং সর্বসুখসারং তত্ত্ববিচারং ব্রহ্মপরম্ ॥ 6 ॥
জলধরদ্যুতিঅংগং ললিতত্রিভংগং বহুকৃতিরংগং রসিকবরং
গোকুলপরিবারং মদনাকারং কুংজবিহারং গূঢতরম্ ।
বল্লভব্রজচংদ্রং সুভগসুছংদং কৃত আনংদং ভ্রাংতিহরং
ভজ নংদকুমারং সর্বসুখসারং তত্ত্ববিচারং ব্রহ্মপরম্ ॥ 7 ॥
বংদিতযুগচরণং পাবনকরণং জগদুদ্ধরণং বিমলধরং
কালিযশিরগমনং কৃতফণিনমনং ঘাতিতযমনং মৃদুলতরম্ ।
বল্লভদুঃখহরণং নির্মলচরণং অশরণশরণং মুক্তিকরং
ভজ নংদকুমারং সর্বসুখসারং তত্ত্ববিচারং ব্রহ্মপরম্ ॥ 8 ॥
ইতি শ্রীমদ্বল্লভাচার্যবিরচিতং শ্রীনংদকুমারাষ্টকম্ ॥