পঠংতো নামানি প্রমদভরসিংধৌ নিপতিতাঃ
স্মরংতো রূপং তে বরদ কথযংতো গুণকথাঃ ।
চরংতো যে ভক্তাস্ত্বযি খলু রমংতে পরমমূ-
নহং ধন্যান্ মন্যে সমধিগতসর্বাভিলষিতান্ ॥1॥
গদক্লিষ্টং কষ্টং তব চরণসেবারসভরেঽ-
প্যনাসক্তং চিত্তং ভবতি বত বিষ্ণো কুরু দযাম্ ।
ভবত্পাদাংভোজস্মরণরসিকো নামনিবহা-
নহং গাযং গাযং কুহচন বিবত্স্যামি বিজনে ॥2॥
কৃপা তে জাতা চেত্কিমিব ন হি লভ্যং তনুভৃতাং
মদীযক্লেশৌঘপ্রশমনদশা নাম কিযতী ।
ন কে কে লোকেঽস্মিন্ননিশমযি শোকাভিরহিতা
ভবদ্ভক্তা মুক্তাঃ সুখগতিমসক্তা বিদধতে ॥3॥
মুনিপ্রৌঢা রূঢা জগতি খলু গূঢাত্মগতযো
ভবত্পাদাংভোজস্মরণবিরুজো নারদমুখাঃ ।
চরংতীশ স্বৈরং সততপরিনির্ভাতপরচি –
ত্সদানংদাদ্বৈতপ্রসরপরিমগ্নাঃ কিমপরম্ ॥4॥
ভবদ্ভক্তিঃ স্ফীতা ভবতু মম সৈব প্রশমযে-
দশেষক্লেশৌঘং ন খলু হৃদি সংদেহকণিকা ।
ন চেদ্ব্যাসস্যোক্তিস্তব চ বচনং নৈগমবচো
ভবেন্মিথ্যা রথ্যাপুরুষবচনপ্রাযমখিলম্ ॥5॥
ভবদ্ভক্তিস্তাবত্ প্রমুখমধুরা ত্বত্ গুণরসাত্
কিমপ্যারূঢা চেদখিলপরিতাপপ্রশমনী ।
পুনশ্চাংতে স্বাংতে বিমলপরিবোধোদযমিল-
ন্মহানংদাদ্বৈতং দিশতি কিমতঃ প্রার্থ্যমপরম্ ॥6॥
বিধূয ক্লেশান্মে কুরু চরণযুগ্মং ধৃতরসং
ভবত্ক্ষেত্রপ্রাপ্তৌ করমপি চ তে পূজনবিধৌ ।
ভবন্মূর্ত্যালোকে নযনমথ তে পাদতুলসী-
পরিঘ্রাণে ঘ্রাণং শ্রবণমপি তে চারুচরিতে ॥7॥
প্রভূতাধিব্যাধিপ্রসভচলিতে মামকহৃদি
ত্বদীযং তদ্রূপং পরমসুখচিদ্রূপমুদিযাত্ ।
উদংচদ্রোমাংচো গলিতবহুহর্ষাশ্রুনিবহো
যথা বিস্মর্যাসং দুরুপশমপীডাপরিভবান্ ॥8॥
মরুদ্গেহাধীশ ত্বযি খলু পরাংচোঽপি সুখিনো
ভবত্স্নেহী সোঽহং সুবহু পরিতপ্যে চ কিমিদম্ ।
অকীর্তিস্তে মা ভূদ্বরদ গদভারং প্রশমযন্
ভবত্ ভক্তোত্তংসং ঝটিতি কুরু মাং কংসদমন ॥9॥
কিমুক্তৈর্ভূযোভিস্তব হি করুণা যাবদুদিযা-
দহং তাবদ্দেব প্রহিতবিবিধার্তপ্রলপিতঃ ।
পুরঃ ক্লৃপ্তে পাদে বরদ তব নেষ্যামি দিবসা-
ন্যথাশক্তি ব্যক্তং নতিনুতিনিষেবা বিরচযন্ ॥10॥