ভবত্প্রভাবাবিদুরা হি গোপাস্তরুপ্রপাতাদিকমত্র গোষ্ঠে ।
অহেতুমুত্পাতগণং বিশংক্য প্রযাতুমন্যত্র মনো বিতেনুঃ ॥1॥
তত্রোপনংদাভিধগোপবর্যো জগৌ ভবত্প্রেরণযৈব নূনম্ ।
ইতঃ প্রতীচ্যাং বিপিনং মনোজ্ঞং বৃংদাবনং নাম বিরাজতীতি ॥2॥
বৃহদ্বনং তত্ খলু নংদমুখ্যা বিধায গৌষ্ঠীনমথ ক্ষণেন ।
ত্বদন্বিতত্বজ্জননীনিবিষ্টগরিষ্ঠযানানুগতা বিচেলুঃ ॥3॥
অনোমনোজ্ঞধ্বনিধেনুপালীখুরপ্রণাদাংতরতো বধূভিঃ ।
ভবদ্বিনোদালপিতাক্ষরাণি প্রপীয নাজ্ঞাযত মার্গদৈর্ঘ্যম্ ॥4॥
নিরীক্ষ্য বৃংদাবনমীশ নংদত্প্রসূনকুংদপ্রমুখদ্রুমৌঘম্ ।
অমোদথাঃ শাদ্বলসাংদ্রলক্ষ্ম্যা হরিন্মণীকুট্টিমপুষ্টশোভম্ ॥5॥
নবাকনির্ব্যূঢনিবাসভেদেষ্বশেষগোপেষু সুখাসিতেষু ।
বনশ্রিযং গোপকিশোরপালীবিমিশ্রিতঃ পর্যগলোকথাস্ত্বম্ ॥6॥
অরালমার্গাগতনির্মলাপাং মরালকূজাকৃতনর্মলাপাম্ ।
নিরংতরস্মেরসরোজবক্ত্রাং কলিংদকন্যাং সমলোকযস্ত্বম্ ॥7॥
মযূরকেকাশতলোভনীযং মযূখমালাশবলং মণীনাম্ ।
বিরিংচলোকস্পৃশমুচ্চশৃংগৈর্গিরিং চ গোবর্ধনমৈক্ষথাস্ত্বম্ ॥8॥
সমং ততো গোপকুমারকৈস্ত্বং সমংততো যত্র বনাংতমাগাঃ ।
ততস্ততস্তাং কুটিলামপশ্যঃ কলিংদজাং রাগবতীমিবৈকাম্ ॥9॥
তথাবিধেঽস্মিন্ বিপিনে পশব্যে সমুত্সুকো বত্সগণপ্রচারে ।
চরন্ সরামোঽথ কুমারকৈস্ত্বং সমীরগেহাধিপ পাহি রোগাত্ ॥10॥