ত্বত্সেবোত্কস্সৌভরির্নাম পূর্বং
কালিংদ্যংতর্দ্বাদশাব্দং তপস্যন্ ।
মীনব্রাতে স্নেহবান্ ভোগলোলে
তার্ক্ষ্যং সাক্ষাদৈক্ষতাগ্রে কদাচিত্ ॥1॥
ত্বদ্বাহং তং সক্ষুধং তৃক্ষসূনুং
মীনং কংচিজ্জক্ষতং লক্ষযন্ সঃ ।
তপ্তশ্চিত্তে শপ্তবানত্র চেত্ত্বং
জংতূন্ ভোক্তা জীবিতং চাপি মোক্তা ॥2॥
তস্মিন্ কালে কালিযঃ ক্ষ্বেলদর্পাত্
সর্পারাতেঃ কল্পিতং ভাগমশ্নন্ ।
তেন ক্রোধাত্ত্বত্পদাংভোজভাজা
পক্ষক্ষিপ্তস্তদ্দুরাপং পযোঽগাত্ ॥3॥
ঘোরে তস্মিন্ সূরজানীরবাসে
তীরে বৃক্ষা বিক্ষতাঃ ক্ষ্বেলবেগাত্ ।
পক্ষিব্রাতাঃ পেতুরভ্রে পতংতঃ
কারুণ্যার্দ্রং ত্বন্মনস্তেন জাতম্ ॥4॥
কালে তস্মিন্নেকদা সীরপাণিং
মুক্ত্বা যাতে যামুনং কাননাংতম্ ।
ত্বয্যুদ্দামগ্রীষ্মভীষ্মোষ্মতপ্তা
গোগোপালা ব্যাপিবন্ ক্ষ্বেলতোযম্ ॥5॥
নশ্যজ্জীবান্ বিচ্যুতান্ ক্ষ্মাতলে তান্
বিশ্বান্ পশ্যন্নচ্যুত ত্বং দযার্দ্রঃ ।
প্রাপ্যোপাংতং জীবযামাসিথ দ্রাক্
পীযূষাংভোবর্ষিভিঃ শ্রীকটক্ষৈঃ ॥6॥
কিং কিং জাতো হর্ষবর্ষাতিরেকঃ
সর্বাংগেষ্বিত্যুত্থিতা গোপসংঘাঃ ।
দৃষ্ট্বাঽগ্রে ত্বাং ত্বত্কৃতং তদ্বিদংত-
স্ত্বামালিংগন্ দৃষ্টনানাপ্রভাবাঃ ॥7॥
গাবশ্চৈবং লব্ধজীবাঃ ক্ষণেন
স্ফীতানংদাস্ত্বাং চ দৃষ্ট্বা পুরস্তাত্ ।
দ্রাগাবব্রুঃ সর্বতো হর্ষবাষ্পং
ব্যামুংচংত্যো মংদমুদ্যন্নিনাদাঃ ॥8॥
রোমাংচোঽযং সর্বতো নঃ শরীরে
ভূযস্যংতঃ কাচিদানংদমূর্ছা ।
আশ্চর্যোঽযং ক্ষ্বেলবেগো মুকুংদে-
ত্যুক্তো গোপৈর্নংদিতো বংদিতোঽভূঃ ॥9॥
এবং ভক্তান্ মুক্তজীবানপি ত্বং
মুগ্ধাপাংগৈরস্তরোগাংস্তনোষি ।
তাদৃগ্ভূতস্ফীতকারুণ্যভূমা
রোগাত্ পাযা বাযুগেহাধিবাস ॥10॥