রুচিরকংপিতকুংডলমংডলঃ সুচিরমীশ ননর্তিথ পন্নগে ।
অমরতাডিতদুংদুভিসুংদরং বিযতি গাযতি দৈবতযৌবতে ॥1॥
নমতি যদ্যদমুষ্য শিরো হরে পরিবিহায তদুন্নতমুন্নতম্ ।
পরিমথন্ পদপংকরুহা চিরং ব্যহরথাঃ করতালমনোহরম্ ॥2॥
ত্বদবভগ্নবিভুগ্নফণাগণে গলিতশোণিতশোণিতপাথসি ।
ফণিপতাববসীদতি সন্নতাস্তদবলাস্তব মাধব পাদযোঃ ॥3॥
অযি পুরৈব চিরায পরিশ্রুতত্বদনুভাববিলীনহৃদো হি তাঃ ।
মুনিভিরপ্যনবাপ্যপথৈঃ স্তবৈর্নুনুবুরীশ ভবংতমযংত্রিতম্ ॥4॥
ফণিবধূগণভক্তিবিলোকনপ্রবিকসত্করুণাকুলচেতসা ।
ফণিপতির্ভবতাঽচ্যুত জীবিতস্ত্বযি সমর্পিতমূর্তিরবানমত্ ॥5॥
রমণকং ব্রজ বারিধিমধ্যগং ফণিরিপুর্ন করোতি বিরোধিতাম্ ।
ইতি ভবদ্বচনান্যতিমানযন্ ফণিপতির্নিরগাদুরগৈঃ সমম্ ॥6॥
ফণিবধূজনদত্তমণিব্রজজ্বলিতহারদুকূলবিভূষিতঃ ।
তটগতৈঃ প্রমদাশ্রুবিমিশ্রিতৈঃ সমগথাঃ স্বজনৈর্দিবসাবধৌ ॥7॥
নিশি পুনস্তমসা ব্রজমংদিরং ব্রজিতুমক্ষম এব জনোত্করে ।
স্বপতি তত্র ভবচ্চরণাশ্রযে দবকৃশানুররুংধ সমংততঃ ॥8॥
প্রবুধিতানথ পালয পালযেত্যুদযদার্তরবান্ পশুপালকান্ ।
অবিতুমাশু পপাথ মহানলং কিমিহ চিত্রমযং খলু তে মুখম্ ॥9॥
শিখিনি বর্ণত এব হি পীততা পরিলসত্যধুনা ক্রিযযাঽপ্যসৌ ।
ইতি নুতঃ পশুপৈর্মুদিতৈর্বিভো হর হরে দুরিতৈঃসহ মে গদান্ ॥10॥