বলসমেতবলানুগতো ভবান্ পুরমগাহত ভীষ্মকমানিতঃ ।
দ্বিজসুতং ত্বদুপাগমবাদিনং ধৃতরসা তরসা প্রণনাম সা ॥1॥
ভুবনকাংতমবেক্ষ্য ভবদ্বপুর্নৃপসুতস্য নিশম্য চ চেষ্টিতম্ ।
বিপুলখেদজুষাং পুরবাসিনাং সরুদিতৈরুদিতৈরগমন্নিশা ॥2॥
তদনু বংদিতুমিংদুমুখী শিবাং বিহিতমংগলভূষণভাসুরা ।
নিরগমত্ ভবদর্পিতজীবিতা স্বপুরতঃ পুরতঃ সুভটাবৃতা ॥3॥
কুলবধূভিরুপেত্য কুমারিকা গিরিসুতাং পরিপূজ্য চ সাদরম্ ।
মুহুরযাচত তত্পদপংকজে নিপতিতা পতিতাং তব কেবলম্ ॥4॥
সমবলোককুতূহলসংকুলে নৃপকুলে নিভৃতং ত্বযি চ স্থিতে ।
নৃপসুতা নিরগাদ্গিরিজালযাত্ সুরুচিরং রুচিরংজিতদিঙ্মুখা ॥5॥
ভুবনমোহনরূপরুচা তদা বিবশিতাখিলরাজকদংবযা ।
ত্বমপি দেব কটাক্ষবিমোক্ষণৈঃ প্রমদযা মদযাংচকৃষে মনাক্ ॥6॥
ক্বনু গমিষ্যসি চংদ্রমুখীতি তাং সরসমেত্য করেণ হরন্ ক্ষণাত্ ।
সমধিরোপ্য রথং ত্বমপাহৃথা ভুবি ততো বিততো নিনদো দ্বিষাম্ ॥7॥
ক্ব নু গতঃ পশুপাল ইতি ক্রুধা কৃতরণা যদুভিশ্চ জিতা নৃপাঃ ।
ন তু ভবানুদচাল্যত তৈরহো পিশুনকৈঃ শুনকৈরিব কেসরী ॥8॥
তদনু রুক্মিণমাগতমাহবে বধমুপেক্ষ্য নিবধ্য বিরূপযন্ ।
হৃতমদং পরিমুচ্য বলোক্তিভিঃ পুরমযা রমযা সহ কাংতযা ॥9॥
নবসমাগমলজ্জিতমানসাং প্রণযকৌতুকজৃংভিতমন্মথাম্ ।
অরমযঃ খলু নাথ যথাসুখং রহসি তাং হসিতাংশুলসন্মুখীম্ ॥10॥
বিবিধনর্মভিরেবমহর্নিশং প্রমদমাকলযন্ পুনরেকদা ।
ঋজুমতেঃ কিল বক্রগিরা ভবান্ বরতনোরতনোদতিলোলতাম্ ॥11॥
তদধিকৈরথ লালনকৌশলৈঃ প্রণযিনীমধিকং সুখযন্নিমাম্ ।
অযি মুকুংদ ভবচ্চরিতানি নঃ প্রগদতাং গদতাংতিমপাকুরু ॥12॥