ত্বং হি ব্রহ্মৈব সাক্ষাত্ পরমুরুমহিমন্নক্ষরাণামকার-
স্তারো মংত্রেষু রাজ্ঞাং মনুরসি মুনিষু ত্বং ভৃগুর্নারদোঽপি ।
প্রহ্লাদো দানবানাং পশুষু চ সুরভিঃ পক্ষিণাং বৈনতেযো
নাগানামস্যনংতস্সুরসরিদপি চ স্রোতসাং বিশ্বমূর্তে ॥1॥
ব্রহ্মণ্যানাং বলিস্ত্বং ক্রতুষু চ জপযজ্ঞোঽসি বীরেষু পার্থো
ভক্তানামুদ্ধবস্ত্বং বলমসি বলিনাং ধাম তেজস্বিনাং ত্বম্ ।
নাস্ত্যংতস্ত্বদ্বিভূতের্বিকসদতিশযং বস্তু সর্বং ত্বমেব
ত্বং জীবস্ত্বং প্রধানং যদিহ ভবদৃতে তন্ন কিংচিত্ প্রপংচে ॥2॥
ধর্মং বর্ণাশ্রমাণাং শ্রুতিপথবিহিতং ত্বত্পরত্বেন ভক্ত্যা
কুর্বংতোঽংতর্বিরাগে বিকসতি শনকৈঃ সংত্যজংতো লভংতে ।
সত্তাস্ফূর্তিপ্রিযত্বাত্মকমখিলপদার্থেষু ভিন্নেষ্বভিন্নং
নির্মূলং বিশ্বমূলং পরমমহমিতি ত্বদ্বিবোধং বিশুদ্ধম্ ॥3॥
জ্ঞানং কর্মাপি ভক্তিস্ত্রিতযমিহ ভবত্প্রাপকং তত্র তাব-
ন্নির্বিণ্ণানামশেষে বিষয ইহ ভবেত্ জ্ঞানযোগেঽধিকারঃ ।
সক্তানাং কর্মযোগস্ত্বযি হি বিনিহিতো যে তু নাত্যংতসক্তাঃ
নাপ্যত্যংতং বিরক্তাস্ত্বযি চ ধৃতরসা ভক্তিযোগো হ্যমীষাম্ ॥4॥
জ্ঞানং ত্বদ্ভক্ততাং বা লঘু সুকৃতবশান্মর্ত্যলোকে লভংতে
তস্মাত্তত্রৈব জন্ম স্পৃহযতি ভগবন্ নাকগো নারকো বা ।
আবিষ্টং মাং তু দৈবাদ্ভবজলনিধিপোতাযিতে মর্ত্যদেহে
ত্বং কৃত্বা কর্ণধারং গুরুমনুগুণবাতাযিতস্তারযেথাঃ ॥5॥
অব্যক্তং মার্গযংতঃ শ্রুতিভিরপি নযৈঃ কেবলজ্ঞানলুব্ধাঃ
ক্লিশ্যংতেঽতীব সিদ্ধিং বহুতরজনুষামংত এবাপ্নুবংতি ।
দূরস্থঃ কর্মযোগোঽপি চ পরমফলে নন্বযং ভক্তিযোগ-
স্ত্বামূলাদেব হৃদ্যস্ত্বরিতমযি ভবত্প্রাপকো বর্ধতাং মে ॥6॥
জ্ঞানাযৈবাতিযত্নং মুনিরপবদতে ব্রহ্মতত্ত্বং তু শৃণ্বন্
গাঢং ত্বত্পাদভক্তিং শরণমযতি যস্তস্য মুক্তিঃ করাগ্রে ।
ত্বদ্ধ্যানেঽপীহ তুল্যা পুনরসুকরতা চিত্তচাংচল্যহেতো-
রভ্যাসাদাশু শক্যং তদপি বশযিতুং ত্বত্কৃপাচারুতাভ্যাম্ ॥7॥
নির্বিণ্ণঃ কর্মমার্গে খলু বিষমতমে ত্বত্কথাদৌ চ গাঢং
জাতশ্রদ্ধোঽপি কামানযি ভুবনপতে নৈব শক্নোমি হাতুম্ ।
তদ্ভূযো নিশ্চযেন ত্বযি নিহিতমনা দোষবুদ্ধ্যা ভজংস্তান্
পুষ্ণীযাং ভক্তিমেব ত্বযি হৃদযগতে মংক্ষু নংক্ষ্যংতি সংগাঃ ॥8॥
কশ্চিত্ ক্লেশার্জিতার্থক্ষযবিমলমতির্নুদ্যমানো জনৌঘৈঃ
প্রাগেবং প্রাহ বিপ্রো ন খলু মম জনঃ কালকর্মগ্রহা বা।
চেতো মে দুঃখহেতুস্তদিহ গুণগণং ভাবযত্সর্বকারী-
ত্যুক্ত্বা শাংতো গতস্ত্বাং মম চ কুরু বিভো তাদৃশী চিত্তশাংতিম্ ॥9॥
ঐলঃ প্রাগুর্বশীং প্রত্যতিবিবশমনাঃ সেবমানশ্চিরং তাং
গাঢং নির্বিদ্য ভূযো যুবতিসুখমিদং ক্ষুদ্রমেবেতি গাযন্ ।
ত্বদ্ভক্তিং প্রাপ্য পূর্ণঃ সুখতরমচরত্তদ্বদুদ্ধূতসংগং
ভক্তোত্তংসং ক্রিযা মাং পবনপুরপতে হংত মে রুংধি রোগান্ ॥10॥