ওং স॒হ না॑ববতু । স॒হ নৌ॑ ভুনক্তু । স॒হ বী॒র্যং॑ করবাবহৈ ।
তে॒জ॒স্বিনা॒বধী॑তমস্তু॒ মা বি॑দ্বিষা॒বহৈ᳚ ॥
ওং শাংতিঃ॒ শাংতিঃ॒ শাংতিঃ॑ ॥
ওং অথ পুরুষো হ বৈ নারাযণোঽকামযত প্রজাঃ সৃ॑জেযে॒তি ।
না॒রা॒য॒ণাত্প্রা॑ণো জা॒যতে । মনঃ সর্বেংদ্রি॑যাণি॒ চ ।
খং-বাঁযুর্জ্যোতিরাপঃ পৃথিবী বিশ্ব॑স্য ধা॒রিণী ।
না॒রা॒য॒ণাদ্ব্র॑হ্মা জা॒যতে ।
না॒রা॒য॒ণাদ্রু॑দ্রো জা॒যতে ।
না॒রা॒য॒ণাদিং॑দ্রো জা॒যতে ।
না॒রা॒য॒ণাত্প্রজাপতযঃ প্র॑জাযং॒তে ।
না॒রা॒য॒ণাদ্দ্বাদশাদিত্যা রুদ্রা বসবস্সর্বাণি চ ছং॑দাগ্ম্॒সি ।
না॒রা॒য॒ণাদেব সমু॑ত্পদ্যং॒তে ।
না॒রা॒য॒ণে প্র॑বর্তং॒তে ।
না॒রা॒য॒ণে প্র॑লীযং॒তে ॥
ওম্ । অথ নিত্যো না॑রায॒ণঃ । ব্র॒হ্মা না॑রায॒ণঃ ।
শি॒বশ্চ॑ নারায॒ণঃ । শ॒ক্রশ্চ॑ নারায॒ণঃ ।
দ্যা॒বা॒পৃ॒থি॒ব্যৌ চ॑ নারায॒ণঃ । কা॒লশ্চ॑ নারায॒ণঃ ।
দি॒শশ্চ॑ নারায॒ণঃ । ঊ॒র্ধ্বশ্চ॑ নারায॒ণঃ ।
অ॒ধশ্চ॑ নারায॒ণঃ । অং॒ত॒র্ব॒হিশ্চ॑ নারায॒ণঃ ।
নারাযণ এবে॑দগ্ম্ স॒র্বম্ ।
যদ্ভূ॒তং-যঁচ্চ॒ ভব্যম্᳚ ।
নিষ্কলো নিরংজনো নির্বিকল্পো নিরাখ্যাতঃ শুদ্ধো দেব
একো॑ নারায॒ণঃ । ন দ্বি॒তীযো᳚স্তি॒ কশ্চি॑ত্ ।
য এ॑বং-বেঁ॒দ ।
স বিষ্ণুরেব ভবতি স বিষ্ণুরে॑ব ভ॒বতি ॥
ওমিত্য॑গ্রে ব্যা॒হরেত্ । নম ই॑তি প॒শ্চাত্ ।
না॒রা॒য॒ণাযেত্যু॑পরি॒ষ্টাত্ ।
ওমি॑ত্যেকা॒ক্ষরম্ । নম ইতি॑ দ্বে অ॒ক্ষরে ।
না॒রা॒য॒ণাযেতি পংচা᳚ক্ষরা॒ণি ।
এতদ্বৈ নারাযণস্যাষ্টাক্ষ॑রং প॒দম্ ।
যো হ বৈ নারাযণস্যাষ্টাক্ষরং পদ॑মধ্যে॒তি ।
অনপব্রবস্সর্বমা॑যুরে॒তি ।
বিংদতে প্রা॑জাপ॒ত্যগ্ম্ রাযস্পোষং॑ গৌপ॒ত্যম্ ।
ততোঽমৃতত্বমশ্নুতে ততোঽমৃতত্বমশ্নু॑ত ই॒তি ।
য এ॑বং-বেঁ॒দ ॥
প্রত্যগানংদং ব্রহ্ম পুরুষং প্রণব॑স্বরূ॒পম্ ।
অকার উকার মকা॑র ই॒তি ।
তানেকধা সমভরত্তদেত॑দোমি॒তি ।
যমুক্ত্বা॑ মুচ্য॑তে যো॒গী॒ জ॒ন্ম॒সংসা॑রবং॒ধনাত্ ।
ওং নমো নারাযণাযেতি মং॑ত্রোপা॒সকঃ ।
বৈকুংঠভুবনলোকং॑ গমি॒ষ্যতি ।
তদিদং পরং পুংডরীকং-বিঁ॑জ্ঞান॒ঘনম্ ।
তস্মাত্তদিদা॑বন্মা॒ত্রম্ ।
ব্রহ্মণ্যো দেব॑কীপু॒ত্রো॒ ব্রহ্মণ্যো ম॑ধুসূ॒দনোম্ ।
সর্বভূতস্থমেকং॑ নারা॒যণম্ ।
কারণরূপমকার প॑রব্র॒হ্মোম্ ।
এতদথর্ব শিরো॑যোঽধী॒তে প্রা॒তর॑ধীযা॒নো॒ রাত্রিকৃতং পাপং॑ নাশ॒যতি ।
সা॒যম॑ধীযা॒নো॒ দিবসকৃতং পাপং॑ নাশ॒যতি ।
মাধ্যংদিনমাদিত্যাভিমুখো॑ঽধীযা॒নঃ॒ পংচপাতকোপপাতকা᳚ত্প্রমু॒চ্যতে ।
সর্ব বেদ পারাযণ পু॑ণ্যং-লঁ॒ভতে ।
নারাযণসাযুজ্যম॑বাপ্নো॒তি॒ নারাযণ সাযুজ্যম॑বাপ্নো॒তি ।
য এ॑বং-বেঁ॒দ । ইত্যু॑প॒নিষ॑ত্ ॥
ওং স॒হ না॑ববতু । স॒হ নৌ॑ ভুনক্তু । স॒হ বী॒র্যং॑ করবাবহৈ ।
তে॒জ॒স্বিনা॒বধী॑তমস্তু॒ মা বি॑দ্বিষা॒বহৈ᳚ ॥
ওং শাংতিঃ॒ শাংতিঃ॒ শাংতিঃ॑ ॥