ওং শ্রী পরমাত্মনে নমঃ
অথ দ্বাদশোঽধ্যাযঃ
ভক্তিযোগঃ
অর্জুন উবাচ
এবং সততযুক্তা যে ভক্তাস্ত্বাং পর্যুপাসতে ।
যে চাপ্যক্ষরমব্যক্তং তেষাং কে যোগবিত্তমাঃ ॥1॥
শ্রী ভগবানুবাচ
ময্যাবেশ্য মনো যে মাং নিত্যযুক্তা উপাসতে ।
শ্রদ্ধযা পরযোপেতাঃ তে মে যুক্ততমা মতাঃ ॥2॥
যে ত্বক্ষরমনির্দেশ্যম্ অব্যক্তং পর্যুপাসতে ।
সর্বত্রগমচিংত্যং চ কূটস্থমচলং ধ্রুবম্ ॥3॥
সন্নিযম্যেংদ্রিযগ্রামং সর্বত্র সমবুদ্ধযঃ ।
তে প্রাপ্নুবংতি মামেব সর্বভূতহিতে রতাঃ ॥4॥
ক্লেশোঽধিকতরস্তেষাম্ অব্যক্তাসক্তচেতসাম্ ।
অব্যক্তা হি গতির্দুঃখং দেহবদ্ভিরবাপ্যতে ॥5॥
যে তু সর্বাণি কর্মাণি মযি সন্ন্যস্য মত্পরাঃ ।
অনন্যেনৈব যোগেন মাং ধ্যাযংত উপাসতে ॥6॥
তেষামহং সমুদ্ধর্তা মৃত্যুসংসারসাগরাত্ ।
ভবামি নচিরাত্পার্থ ময্যাবেশিতচেতসাম্ ॥7॥
ময্যেব মন আধত্স্ব মযি বুদ্ধিং নিবেশয ।
নিবসিষ্যসি ময্যেব অত ঊর্ধ্বং ন সংশযঃ ॥8॥
অথ চিত্তং সমাধাতুং ন শক্নোষি মযি স্থিরম্ ।
অভ্যাসযোগেন ততঃ মামিচ্ছাপ্তুং ধনংজয ॥9॥
অভ্যাসেঽপ্যসমর্থোঽসি মত্কর্মপরমো ভব ।
মদর্থমপি কর্মাণি কুর্বন্সিদ্ধিমবাপ্স্যসি ॥10॥
অথৈতদপ্যশক্তোঽসি কর্তুং মদ্যোগমাশ্রিতঃ ।
সর্বকর্মফলত্যাগং ততঃ কুরু যতাত্মবান্ ॥11॥
শ্রেযো হি জ্ঞানমভ্যাসাত্ জ্ঞানাদ্ধ্যানং বিশিষ্যতে ।
ধ্যানাত্কর্মফলত্যাগঃ ত্যাগাচ্ছাংতিরনংতরম্ ॥12॥
অদ্বেষ্টা সর্বভূতানাং মৈত্রঃ করুণ এব চ ।
নির্মমো নিরহংকারঃ সমদুঃখসুখঃ ক্ষমী ॥13॥
সংতুষ্টঃ সততং যোগী যতাত্মা দৃঢনিশ্চযঃ ।
ময্যর্পিতমনোবুদ্ধিঃ যো মদ্ভক্তঃ স মে প্রিযঃ ॥14॥
যস্মান্নোদ্বিজতে লোকঃ লোকান্নোদ্বিজতে চ যঃ ।
হর্ষামর্ষভযোদ্বেগৈঃ মুক্তো যঃ স চ মে প্রিযঃ ॥15॥
অনপেক্ষঃ শুচির্দক্ষঃ উদাসীনো গতব্যথঃ ।
সর্বারংভপরিত্যাগী যো মদ্ভক্তঃ স মে প্রিযঃ ॥16॥
যো ন হৃষ্যতি ন দ্বেষ্টি ন শোচতি ন কাংক্ষতি ।
শুভাশুভপরিত্যাগী ভক্তিমান্যঃ স মে প্রিযঃ ॥17॥
সমঃ শত্রৌ চ মিত্রে চ তথা মানাপমানযোঃ ।
শীতোষ্ণসুখদুঃখেষু সমঃ সংগবিবর্জিতঃ ॥18॥
তুল্যনিংদাস্তুতির্মৌনী সংতুষ্টো যেন কেনচিত্ ।
অনিকেতঃ স্থিরমতিঃ ভক্তিমান্মে প্রিযো নরঃ ॥19॥
যে তু ধর্ম্যামৃতমিদং যথোক্তং পর্যুপাসতে ।
শ্রদ্দধানা মত্পরমাঃ ভক্তাস্তেঽতীব মে প্রিযাঃ ॥20॥
॥ ওং তত্সদিতি শ্রীমদ্ভগবদ্গীতাসু উপনিষত্সু ব্রহ্মবিদ্যাযাং যোগশাস্ত্রে
শ্রীকৃষ্ণার্জুনসংবাদে ভক্তিযোগো নাম দ্বাদশোঽধ্যাযঃ ॥