ଗୀର୍ଵାଣୈରର୍ଥ୍ୟମାନୋ ଦଶମୁଖନିଧନଂ କୋସଲେଷ୍ଵୃଶ୍ୟଶୃଂଗେ
ପୁତ୍ରୀୟାମିଷ୍ଟିମିଷ୍ଟ୍ଵା ଦଦୁଷି ଦଶରଥକ୍ଷ୍ମାଭୃତେ ପାୟସାଗ୍ର୍ୟମ୍ ।
ତଦ୍ଭୁକ୍ତ୍ୟା ତତ୍ପୁରଂଧ୍ରୀଷ୍ଵପି ତିସୃଷୁ ସମଂ ଜାତଗର୍ଭାସୁ ଜାତୋ
ରାମସ୍ତ୍ଵଂ ଲକ୍ଷ୍ମଣେନ ସ୍ଵୟମଥ ଭରତେନାପି ଶତ୍ରୁଘ୍ନନାମ୍ନା ॥1॥
କୋଦଂଡୀ କୌଶିକସ୍ୟ କ୍ରତୁଵରମଵିତୁଂ ଲକ୍ଷ୍ମଣେନାନୁୟାତୋ
ୟାତୋଽଭୂସ୍ତାତଵାଚା ମୁନିକଥିତମନୁଦ୍ଵଂଦ୍ଵଶାଂତାଧ୍ଵଖେଦଃ ।
ନୃଣାଂ ତ୍ରାଣାୟ ବାଣୈର୍ମୁନିଵଚନବଲାତ୍ତାଟକାଂ ପାଟୟିତ୍ଵା
ଲବ୍ଧ୍ଵାସ୍ମାଦସ୍ତ୍ରଜାଲଂ ମୁନିଵନମଗମୋ ଦେଵ ସିଦ୍ଧାଶ୍ରମାଖ୍ୟମ୍ ॥2॥
ମାରୀଚଂ ଦ୍ରାଵୟିତ୍ଵା ମଖଶିରସି ଶରୈରନ୍ୟରକ୍ଷାଂସି ନିଘ୍ନନ୍
କଲ୍ୟାଂ କୁର୍ଵନ୍ନହଲ୍ୟାଂ ପଥି ପଦରଜସା ପ୍ରାପ୍ୟ ଵୈଦେହଗେହମ୍ ।
ଭିଂଦାନଶ୍ଚାଂଦ୍ରଚୂଡଂ ଧନୁରଵନିସୁତାମିଂଦିରାମେଵ ଲବ୍ଧ୍ଵା
ରାଜ୍ୟଂ ପ୍ରାତିଷ୍ଠଥାସ୍ତ୍ଵଂ ତ୍ରିଭିରପି ଚ ସମଂ ଭ୍ରାତୃଵୀରୈସ୍ସଦାରୈଃ ॥3॥
ଆରୁଂଧାନେ ରୁଷାଂଧେ ଭୃଗୁକୁଲ ତିଲକେ ସଂକ୍ରମୟ୍ୟ ସ୍ଵତେଜୋ
ୟାତେ ୟାତୋଽସ୍ୟୟୋଧ୍ୟାଂ ସୁଖମିହ ନିଵସନ୍ କାଂତୟା କାଂତମୂର୍ତେ ।
ଶତ୍ରୁଘ୍ନେନୈକଦାଥୋ ଗତଵତି ଭରତେ ମାତୁଲସ୍ୟାଧିଵାସଂ
ତାତାରବ୍ଧୋଽଭିଷେକସ୍ତଵ କିଲ ଵିହତଃ କେକୟାଧୀଶପୁତ୍ର୍ୟା ॥4॥
ତାତୋକ୍ତ୍ୟା ୟାତୁକାମୋ ଵନମନୁଜଵଧୂସଂୟୁତଶ୍ଚାପଧାରଃ
ପୌରାନାରୁଧ୍ୟ ମାର୍ଗେ ଗୁହନିଲୟଗତସ୍ତ୍ଵଂ ଜଟାଚୀରଧାରୀ।
ନାଵା ସଂତୀର୍ୟ ଗଂଗାମଧିପଦଵି ପୁନସ୍ତଂ ଭରଦ୍ଵାଜମାରା-
ନ୍ନତ୍ଵା ତଦ୍ଵାକ୍ୟହେତୋରତିସୁଖମଵସଶ୍ଚିତ୍ରକୂଟେ ଗିରୀଂଦ୍ରେ ॥5॥
ଶ୍ରୁତ୍ଵା ପୁତ୍ରାର୍ତିଖିନ୍ନଂ ଖଲୁ ଭରତମୁଖାତ୍ ସ୍ଵର୍ଗୟାତଂ ସ୍ଵତାତଂ
ତପ୍ତୋ ଦତ୍ଵାଽଂବୁ ତସ୍ମୈ ନିଦଧିଥ ଭରତେ ପାଦୁକାଂ ମେଦିନୀଂ ଚ
ଅତ୍ରିଂ ନତ୍ଵାଽଥ ଗତ୍ଵା ଵନମତିଵିପୁଲଂ ଦଂଡକଂ ଚଂଡକାୟଂ
ହତ୍ଵା ଦୈତ୍ୟଂ ଵିରାଧଂ ସୁଗତିମକଲୟଶ୍ଚାରୁ ଭୋଃ ଶାରଭଂଗୀମ୍ ॥6॥
ନତ୍ଵାଽଗସ୍ତ୍ୟଂ ସମସ୍ତାଶରନିକରସପତ୍ରାକୃତିଂ ତାପସେଭ୍ୟଃ
ପ୍ରତ୍ୟଶ୍ରୌଷୀଃ ପ୍ରିୟୈଷୀ ତଦନୁ ଚ ମୁନିନା ଵୈଷ୍ଣଵେ ଦିଵ୍ୟଚାପେ ।
ବ୍ରହ୍ମାସ୍ତ୍ରେ ଚାପି ଦତ୍ତେ ପଥି ପିତୃସୁହୃଦଂ ଵୀକ୍ଷ୍ୟ ଭୂୟୋ ଜଟାୟୁଂ
ମୋଦାତ୍ ଗୋଦାତଟାଂତେ ପରିରମସି ପୁରା ପଂଚଵଟ୍ୟାଂ ଵଧୂଟ୍ୟା ॥7॥
ପ୍ରାପ୍ତାୟାଃ ଶୂର୍ପଣଖ୍ୟା ମଦନଚଲଧୃତେରର୍ଥନୈର୍ନିସ୍ସହାତ୍ମା
ତାଂ ସୌମିତ୍ରୌ ଵିସୃଜ୍ୟ ପ୍ରବଲତମରୁଷା ତେନ ନିର୍ଲୂନନାସାମ୍ ।
ଦୃଷ୍ଟ୍ଵୈନାଂ ରୁଷ୍ଟଚିତ୍ତଂ ଖରମଭିପତିତଂ ଦୂଷଣଂ ଚ ତ୍ରିମୂର୍ଧଂ
ଵ୍ୟାହିଂସୀରାଶରାନପ୍ୟୟୁତସମଧିକାଂସ୍ତତ୍କ୍ଷଣାଦକ୍ଷତୋଷ୍ମା ॥8॥
ସୋଦର୍ୟାପ୍ରୋକ୍ତଵାର୍ତାଵିଵଶଦଶମୁଖାଦିଷ୍ଟମାରୀଚମାୟା-
ସାରଂଗ ସାରସାକ୍ଷ୍ୟା ସ୍ପୃହିତମନୁଗତଃ ପ୍ରାଵଧୀର୍ବାଣଘାତମ୍ ।
ତନ୍ମାୟାକ୍ରଂଦନିର୍ୟାପିତଭଵଦନୁଜାଂ ରାଵଣସ୍ତାମହାର୍ଷୀ-
ତ୍ତେନାର୍ତୋଽପି ତ୍ଵମଂତଃ କିମପି ମୁଦମଧାସ୍ତଦ୍ଵଧୋପାୟଲାଭାତ୍ ॥9॥
ଭୂୟସ୍ତନ୍ଵୀଂ ଵିଚିନ୍ଵନ୍ନହୃତ ଦଶମୁଖସ୍ତ୍ଵଦ୍ଵଧୂଂ ମଦ୍ଵଧେନେ-
ତ୍ୟୁକ୍ତ୍ଵା ୟାତେ ଜଟାୟୌ ଦିଵମଥ ସୁହୃଦଃ ପ୍ରାତନୋଃ ପ୍ରେତକାର୍ୟମ୍ ।
ଗୃହ୍ଣାନଂ ତଂ କବଂଧଂ ଜଘନିଥ ଶବରୀଂ ପ୍ରେକ୍ଷ୍ୟ ପଂପାତଟେ ତ୍ଵଂ
ସଂପ୍ରାପ୍ତୋ ଵାତସୂନୁଂ ଭୃଶମୁଦିତମନାଃ ପାହି ଵାତାଲୟେଶ ॥10॥