𑌚𑌾𑌣𑌕𑍍𑌯 𑌨𑍀𑌤𑌿 – 𑌤𑍍𑌰𑌯𑍋𑌦𑌶𑍋𑌽𑌧𑍍𑌯𑌾𑌯𑌃Download PDF

𑌮𑍁𑌹𑍂𑌰𑍍𑌤𑌮𑌪𑌿 𑌜𑍀𑌵𑍇𑌚𑍍𑌚 𑌨𑌰𑌃 𑌶𑍁𑌕𑍍𑌲𑍇𑌨 𑌕𑌰𑍍𑌮𑌣𑌾 ।
𑌨 𑌕𑌲𑍍𑌪𑌮𑌪𑌿 𑌕𑌷𑍍𑌟𑍇𑌨 𑌲𑍋𑌕𑌦𑍍𑌵𑌯𑌵𑌿𑌰𑍋𑌧𑌿𑌨𑌾 ॥ 01 ॥

𑌗𑌤𑍇 𑌶𑍋𑌕𑍋 𑌨 𑌕𑌰𑍍𑌤𑌵𑍍𑌯𑍋 𑌭𑌵𑌿𑌷𑍍𑌯𑌂 𑌨𑍈𑌵 𑌚𑌿𑌂𑌤𑌯𑍇𑌤𑍍 ।
𑌵𑌰𑍍𑌤𑌮𑌾𑌨𑍇𑌨 𑌕𑌾𑌲𑍇𑌨 𑌵𑌰𑍍𑌤𑌯𑌂𑌤𑌿 𑌵𑌿𑌚𑌕𑍍𑌷𑌣𑌾𑌃 ॥ 02 ॥

𑌸𑍍𑌵𑌭𑌾𑌵𑍇𑌨 𑌹𑌿 𑌤𑍁𑌷𑍍𑌯𑌂𑌤𑌿 𑌦𑍇𑌵𑌾𑌃 𑌸𑌤𑍍𑌪𑍁𑌰𑍁𑌷𑌾𑌃 𑌪𑌿𑌤𑌾 ।
𑌜𑍍𑌞𑌾𑌤𑌯𑌃 𑌸𑍍𑌨𑌾𑌨𑌪𑌾𑌨𑌾𑌭𑍍𑌯𑌾𑌂 𑌵𑌾𑌕𑍍𑌯𑌦𑌾𑌨𑍇𑌨 𑌪𑌂𑌡𑌿𑌤𑌾𑌃 ॥ 03 ॥

𑌆𑌯𑍁𑌃 𑌕𑌰𑍍𑌮 𑌚 𑌵𑌿𑌤𑍍𑌤𑌂 𑌚 𑌵𑌿𑌦𑍍𑌯𑌾 𑌨𑌿𑌧𑌨𑌮𑍇𑌵 𑌚 ।
𑌪𑌂𑌚𑍈𑌤𑌾𑌨𑌿 𑌹𑌿 𑌸𑍃𑌜𑍍𑌯𑌂𑌤𑍇 𑌗𑌰𑍍𑌭𑌸𑍍𑌥𑌸𑍍𑌯𑍈𑌵 𑌦𑍇𑌹𑌿𑌨𑌃 ॥ 04 (4.1) ॥

𑌅𑌹𑍋 𑌬𑌤 𑌵𑌿𑌚𑌿𑌤𑍍𑌰𑌾𑌣𑌿 𑌚𑌰𑌿𑌤𑌾𑌨𑌿 𑌮𑌹𑌾𑌤𑍍𑌮𑌨𑌾𑌮𑍍 ।
𑌲𑌕𑍍𑌷𑍍𑌮𑍀𑌂 𑌤𑍃𑌣𑌾𑌯 𑌮𑌨𑍍𑌯𑌂𑌤𑍇 𑌤𑌦𑍍𑌭𑌾𑌰𑍇𑌣 𑌨𑌮𑌂𑌤𑌿 𑌚 ॥ 05 ॥

𑌯𑌸𑍍𑌯 𑌸𑍍𑌨𑍇𑌹𑍋 𑌭𑌯𑌂 𑌤𑌸𑍍𑌯 𑌸𑍍𑌨𑍇𑌹𑍋 𑌦𑍁𑌃𑌖𑌸𑍍𑌯 𑌭𑌾𑌜𑌨𑌮𑍍 ।
𑌸𑍍𑌨𑍇𑌹𑌮𑍂𑌲𑌾𑌨𑌿 𑌦𑍁𑌃𑌖𑌾𑌨𑌿 𑌤𑌾𑌨𑌿 𑌤𑍍𑌯𑌕𑍍𑌤𑍍𑌵𑌾 𑌵𑌸𑍇𑌤𑍍 𑌸𑍁𑌖𑌮𑍍 ॥ 06 ॥

𑌅𑌨𑌾𑌗𑌤𑌵𑌿𑌧𑌾𑌤𑌾 𑌚 𑌪𑍍𑌰𑌤𑍍𑌯𑍁𑌤𑍍𑌪𑌨𑍍𑌨𑌮𑌤𑌿𑌸𑍍𑌤𑌥𑌾 ।
𑌦𑍍𑌵𑌾𑌵𑍇𑌤𑍌 𑌸𑍁𑌖𑌮𑍇𑌧𑍇𑌤𑍇 𑌯𑌦𑍍𑌭𑌵𑌿𑌷𑍍𑌯𑍋 𑌵𑌿𑌨𑌶𑍍𑌯𑌤𑌿 ॥ 0𑍭 ॥

𑌰𑌾𑌜𑍍𑌞𑌿 𑌧𑌰𑍍𑌮𑌿𑌣𑌿 𑌧𑌰𑍍𑌮𑌿𑌷𑍍𑌠𑌾𑌃 𑌪𑌾𑌪𑍇 𑌪𑌾𑌪𑌾𑌃 𑌸𑌮𑍇 𑌸𑌮𑌾𑌃 ।
𑌰𑌾𑌜𑌾𑌨𑌮𑌨𑍁𑌵𑌰𑍍𑌤𑌂𑌤𑍇 𑌯𑌥𑌾 𑌰𑌾𑌜𑌾 𑌤𑌥𑌾 𑌪𑍍𑌰𑌜𑌾𑌃 ॥ 0𑍮 ॥

𑌜𑍀𑌵𑌂𑌤𑌂 𑌮𑍃𑌤𑌵𑌨𑍍𑌮𑌨𑍍𑌯𑍇 𑌦𑍇𑌹𑌿𑌨𑌂 𑌧𑌰𑍍𑌮𑌵𑌰𑍍𑌜𑌿𑌤𑌮𑍍 ।
𑌮𑍃𑌤𑍋 𑌧𑌰𑍍𑌮𑍇𑌣 𑌸𑌂𑌯𑍁𑌕𑍍𑌤𑍋 𑌦𑍀𑌰𑍍𑌘𑌜𑍀𑌵𑍀 𑌨 𑌸𑌂𑌶𑌯𑌃 ॥ 0𑍯 ॥

𑌧𑌰𑍍𑌮𑌾𑌰𑍍𑌥𑌕𑌾𑌮𑌮𑍋𑌕𑍍𑌷𑌾𑌣𑌾𑌂 𑌯𑌸𑍍𑌯𑍈𑌕𑍋𑌽𑌪𑌿 𑌨 𑌵𑌿𑌦𑍍𑌯𑌤𑍇 ।
𑌅𑌜𑌾𑌗𑌲𑌸𑍍𑌤𑌨𑌸𑍍𑌯𑍇𑌵 𑌤𑌸𑍍𑌯 𑌜𑌨𑍍𑌮 𑌨𑌿𑌰𑌰𑍍𑌥𑌕𑌮𑍍 ॥ 10 ॥

𑌦𑌹𑍍𑌯𑌮𑌾𑌨𑌾𑌃 𑌸𑍁𑌤𑍀𑌵𑍍𑌰𑍇𑌣 𑌨𑍀𑌚𑌾𑌃 𑌪𑌰𑌯𑌶𑍋𑌽𑌗𑍍𑌨𑌿𑌨𑌾 ।
𑌅𑌶𑌕𑍍𑌤𑌾𑌸𑍍𑌤𑌤𑍍𑌪𑌦𑌂 𑌗𑌂𑌤𑍁𑌂 𑌤𑌤𑍋 𑌨𑌿𑌂𑌡𑌾𑌂 𑌪𑍍𑌰𑌕𑍁𑌰𑍍𑌵𑌤𑍇 ॥ 11 ॥

𑌬𑌂𑌧𑌾𑌯 𑌵𑌿𑌷𑌯𑌾𑌸𑌂𑌗𑍋 𑌮𑍁𑌕𑍍𑌤𑍍𑌯𑍈 𑌨𑌿𑌰𑍍𑌵𑌿𑌷𑌯𑌂 𑌮𑌨𑌃 ।
𑌮𑌨 𑌏𑌵 𑌮𑌨𑍁𑌷𑍍𑌯𑌾𑌣𑌾𑌂 𑌕𑌾𑌰𑌣𑌂 𑌬𑌂𑌧𑌮𑍋𑌕𑍍𑌷𑌯𑍋𑌃 ॥ 12 ॥

𑌦𑍇𑌹𑌾𑌭𑌿𑌮𑌾𑌨𑍇 𑌗𑌲𑌿𑌤𑌂 𑌜𑍍𑌞𑌾𑌨𑍇𑌨 𑌪𑌰𑌮𑌾𑌤𑍍𑌮𑌨𑌿 ।
𑌯𑌤𑍍𑌰 𑌯𑌤𑍍𑌰 𑌮𑌨𑍋 𑌯𑌾𑌤𑌿 𑌤𑌤𑍍𑌰 𑌤𑌤𑍍𑌰 𑌸𑌮𑌾𑌧𑌯𑌃 ॥ 13 ॥

𑌈𑌪𑍍𑌸𑌿𑌤𑌂 𑌮𑌨𑌸𑌃 𑌸𑌰𑍍𑌵𑌂 𑌕𑌸𑍍𑌯 𑌸𑌂𑌪𑌦𑍍𑌯𑌤𑍇 𑌸𑍁𑌖𑌮𑍍 ।
𑌦𑍈𑌵𑌾𑌯𑌤𑍍𑌤𑌂 𑌯𑌤𑌃 𑌸𑌰𑍍𑌵𑌂 𑌤𑌸𑍍𑌮𑌾𑌤𑍍𑌸𑌂𑌤𑍋𑌷𑌮𑌾𑌶𑍍𑌰𑌯𑍇𑌤𑍍 ॥ 14 ॥

𑌯𑌥𑌾 𑌧𑍇𑌨𑍁𑌸𑌹𑌸𑍍𑌰𑍇𑌷𑍁 𑌵𑌤𑍍𑌸𑍋 𑌗𑌚𑍍𑌛𑌤𑌿 𑌮𑌾𑌤𑌰𑌮𑍍 ।
𑌤𑌥𑌾 𑌯𑌚𑍍𑌚 𑌕𑍃𑌤𑌂 𑌕𑌰𑍍𑌮 𑌕𑌰𑍍𑌤𑌾𑌰𑌮𑌨𑍁𑌗𑌚𑍍𑌛𑌤𑌿 ॥ 15 ॥

𑌅𑌨𑌵𑌸𑍍𑌥𑌿𑌤𑌕𑌾𑌰𑍍𑌯𑌸𑍍𑌯 𑌨 𑌜𑌨𑍇 𑌨 𑌵𑌨𑍇 𑌸𑍁𑌖𑌮𑍍 ।
𑌜𑌨𑍋 𑌦𑌹𑌤𑌿 𑌸𑌂𑌸𑌰𑍍𑌗𑌾𑌦𑍍𑌵𑌨𑌂 𑌸𑌂𑌗𑌵𑌿𑌵𑌰𑍍𑌜𑌨𑌾𑌤𑍍 ॥ 16 ॥

𑌖𑌨𑌿𑌤𑍍𑌵𑌾 𑌹𑌿 𑌖𑌨𑌿𑌤𑍍𑌰𑍇𑌣 𑌭𑍂𑌤𑌲𑍇 𑌵𑌾𑌰𑌿 𑌵𑌿𑌂𑌦𑌤𑌿 ।
𑌤𑌥𑌾 𑌗𑍁𑌰𑍁𑌗𑌤𑌾𑌂 𑌵𑌿𑌦𑍍𑌯𑌾𑌂 𑌶𑍁𑌶𑍍𑌰𑍂𑌷𑍁𑌰𑌧𑌿𑌗𑌚𑍍𑌛𑌤𑌿 ॥ 1𑍭 ॥

𑌕𑌰𑍍𑌮𑌾𑌯𑌤𑍍𑌤𑌂 𑌫𑌲𑌂 𑌪𑍁𑌂𑌸𑌾𑌂 𑌬𑍁𑌦𑍍𑌧𑌿𑌃 𑌕𑌰𑍍𑌮𑌾𑌨𑍁𑌸𑌾𑌰𑌿𑌣𑍀 ।
𑌤𑌥𑌾𑌪𑌿 𑌸𑍁𑌧𑌿𑌯𑌶𑍍𑌚𑌾𑌰𑍍𑌯𑌾 𑌸𑍁𑌵𑌿𑌚𑌾𑌰𑍍𑌯𑍈𑌵 𑌕𑍁𑌰𑍍𑌵𑌤𑍇 ॥ 1𑍮 ॥

𑌏𑌕𑌾𑌕𑍍𑌷𑌰𑌪𑍍𑌰𑌦𑌾𑌤𑌾𑌰𑌂 𑌯𑍋 𑌗𑍁𑌰𑍁𑌂 𑌨𑌾𑌭𑌿𑌵𑌂𑌦𑌤𑍇 ।
𑌶𑍍𑌵𑌾𑌨𑌯𑍋𑌨𑌿𑌶𑌤𑌂 𑌗𑌤𑍍𑌵𑌾 𑌚𑌾𑌂𑌡𑌾𑌲𑍇𑌷𑍍𑌵𑌭𑌿𑌜𑌾𑌯𑌤𑍇 ॥ 1𑍯 ॥

𑌯𑍁𑌗𑌾𑌂𑌤𑍇 𑌪𑍍𑌰𑌚𑌲𑍇𑌨𑍍𑌮𑍇𑌰𑍁𑌃 𑌕𑌲𑍍𑌪𑌾𑌂𑌤𑍇 𑌸𑌪𑍍𑌤 𑌸𑌾𑌗𑌰𑌾𑌃 ।
𑌸𑌾𑌧𑌵𑌃 𑌪𑍍𑌰𑌤𑌿𑌪𑌨𑍍𑌨𑌾𑌰𑍍𑌥𑌾𑌨𑍍𑌨 𑌚𑌲𑌂𑌤𑌿 𑌕𑌦𑌾𑌚𑌨 ॥ 20 ॥

𑌪𑍃𑌥𑌿𑌵𑍍𑌯𑌾𑌂 𑌤𑍍𑌰𑍀𑌣𑌿 𑌰𑌤𑍍𑌨𑌾𑌨𑌿 𑌜𑌲𑌮𑌨𑍍𑌨𑌂 𑌸𑍁𑌭𑌾𑌷𑌿𑌤𑌮𑍍 ।
𑌮𑍂𑌢𑍈𑌃 𑌪𑌾𑌷𑌾𑌣𑌖𑌂𑌡𑍇𑌷𑍁 𑌰𑌤𑍍𑌨𑌸𑌂𑌜𑍍𑌞𑌾 𑌵𑌿𑌧𑍀𑌯𑌤𑍇 ॥ 21 ॥