𑌚𑌾𑌣𑌕𑍍𑌯 𑌨𑍀𑌤𑌿 – 𑌦𑍍𑌵𑌿𑌤𑍀𑌯𑍋𑌽𑌧𑍍𑌯𑌾𑌯𑌃Download PDF

𑌅𑌨𑍃𑌤𑌂 𑌸𑌾𑌹𑌸𑌂 𑌮𑌾𑌯𑌾 𑌮𑍂𑌰𑍍𑌖𑌤𑍍𑌵𑌮𑌤𑌿𑌲𑍋𑌭𑌿𑌤𑌾 ।
𑌅𑌶𑍌𑌚𑌤𑍍𑌵𑌂 𑌨𑌿𑌰𑍍𑌦𑌯𑌤𑍍𑌵𑌂 𑌸𑍍𑌤𑍍𑌰𑍀𑌣𑌾𑌂 𑌦𑍋𑌷𑌾𑌃 𑌸𑍍𑌵𑌭𑌾𑌵𑌜𑌾𑌃 ॥ 01 ॥

𑌭𑍋𑌜𑍍𑌯𑌂 𑌭𑍋𑌜𑌨𑌶𑌕𑍍𑌤𑌿𑌶𑍍𑌚 𑌰𑌤𑌿𑌶𑌕𑍍𑌤𑌿𑌰𑍍𑌵𑌰𑌾𑌂𑌗𑌨𑌾 ।
𑌵𑌿𑌭𑌵𑍋 𑌦𑌾𑌨𑌶𑌕𑍍𑌤𑌿𑌶𑍍𑌚 𑌨𑌾𑌲𑍍𑌪𑌸𑍍𑌯 𑌤𑌪𑌸𑌃 𑌫𑌲𑌮𑍍 ॥ 02 ॥

𑌯𑌸𑍍𑌯 𑌪𑍁𑌤𑍍𑌰𑍋 𑌵𑌶𑍀𑌭𑍂𑌤𑍋 𑌭𑌾𑌰𑍍𑌯𑌾 𑌛𑌂𑌦𑌾𑌨𑍁𑌗𑌾𑌮𑌿𑌨𑍀 ।
𑌵𑌿𑌭𑌵𑍇 𑌯𑌶𑍍𑌚 𑌸𑌂𑌤𑍁𑌷𑍍𑌟𑌸𑍍𑌤𑌸𑍍𑌯 𑌸𑍍𑌵𑌰𑍍𑌗 𑌇𑌹𑍈𑌵 𑌹𑌿 ॥ 03 ॥

𑌤𑍇 𑌪𑍁𑌤𑍍𑌰𑌾 𑌯𑍇 𑌪𑌿𑌤𑍁𑌰𑍍𑌭𑌕𑍍𑌤𑌾𑌃 𑌸 𑌪𑌿𑌤𑌾 𑌯𑌸𑍍𑌤𑍁 𑌪𑍋𑌷𑌕𑌃 ।
𑌤𑌨𑍍𑌮𑌿𑌤𑍍𑌰𑌂 𑌯𑌤𑍍𑌰 𑌵𑌿𑌶𑍍𑌵𑌾𑌸𑌃 𑌸𑌾 𑌭𑌾𑌰𑍍𑌯𑌾 𑌯𑌤𑍍𑌰 𑌨𑌿𑌰𑍍𑌵𑍃𑌤𑌿𑌃 ॥ 04 ॥

𑌪𑌰𑍋𑌕𑍍𑌷𑍇 𑌕𑌾𑌰𑍍𑌯𑌹𑌂𑌤𑌾𑌰𑌂 𑌪𑍍𑌰𑌤𑍍𑌯𑌕𑍍𑌷𑍇 𑌪𑍍𑌰𑌿𑌯𑌵𑌾𑌦𑌿𑌨𑌮𑍍 ।
𑌵𑌰𑍍𑌜𑌯𑍇𑌤𑍍𑌤𑌾𑌦𑍃𑌶𑌂 𑌮𑌿𑌤𑍍𑌰𑌂 𑌵𑌿𑌷𑌕𑍁𑌂𑌭𑌂 𑌪𑌯𑍋𑌮𑍁𑌖𑌮𑍍 ॥ 05 ॥

𑌨 𑌵𑌿𑌶𑍍𑌵𑌸𑍇𑌤𑍍𑌕𑍁𑌮𑌿𑌤𑍍𑌰𑍇 𑌚 𑌮𑌿𑌤𑍍𑌰𑍇 𑌚𑌾𑌪𑌿 𑌨 𑌵𑌿𑌶𑍍𑌵𑌸𑍇𑌤𑍍 ।
𑌕𑌦𑌾𑌚𑌿𑌤𑍍𑌕𑍁𑌪𑌿𑌤𑌂 𑌮𑌿𑌤𑍍𑌰𑌂 𑌸𑌰𑍍𑌵𑌂 𑌗𑍁𑌹𑍍𑌯𑌂 𑌪𑍍𑌰𑌕𑌾𑌶𑌯𑍇𑌤𑍍 ॥ 06 ॥

𑌮𑌨𑌸𑌾 𑌚𑌿𑌂𑌤𑌿𑌤𑌂 𑌕𑌾𑌰𑍍𑌯𑌂 𑌵𑌾𑌚𑌾 𑌨𑍈𑌵 𑌪𑍍𑌰𑌕𑌾𑌶𑌯𑍇𑌤𑍍 ।
𑌮𑌂𑌤𑍍𑌰𑍇𑌣 𑌰𑌕𑍍𑌷𑌯𑍇𑌦𑍍𑌗𑍂𑌢𑌂 𑌕𑌾𑌰𑍍𑌯𑍇 𑌚𑌾𑌪𑌿 𑌨𑌿𑌯𑍋𑌜𑌯𑍇𑌤𑍍 ॥ 0𑍭 ॥

𑌕𑌷𑍍𑌟𑌂 𑌚 𑌖𑌲𑍁 𑌮𑍂𑌰𑍍𑌖𑌤𑍍𑌵𑌂 𑌕𑌷𑍍𑌟𑌂 𑌚 𑌖𑌲𑍁 𑌯𑍌𑌵𑌨𑌮𑍍 ।
𑌕𑌷𑍍𑌟𑌾𑌤𑍍𑌕𑌷𑍍𑌟𑌤𑌰𑌂 𑌚𑍈𑌵 𑌪𑌰𑌗𑍇𑌹𑌨𑌿𑌵𑌾𑌸𑌨𑌮𑍍 ॥ 0𑍮 ॥

𑌶𑍈𑌲𑍇 𑌶𑍈𑌲𑍇 𑌚 𑌮𑌾𑌣𑌿𑌕𑍍𑌯𑌂 𑌮𑍌𑌕𑍍𑌤𑌿𑌕𑌂 𑌨 𑌗𑌜𑍇 𑌗𑌜𑍇 ।
𑌸𑌾𑌧𑌵𑍋 𑌨 𑌹𑌿 𑌸𑌰𑍍𑌵𑌤𑍍𑌰 𑌚𑌂𑌦𑌨𑌂 𑌨 𑌵𑌨𑍇 𑌵𑌨𑍇 ॥ 0𑍯 ॥

𑌪𑍁𑌤𑍍𑌰𑌾𑌶𑍍𑌚 𑌵𑌿𑌵𑌿𑌧𑍈𑌃 𑌶𑍀𑌲𑍈𑌰𑍍𑌨𑌿𑌯𑍋𑌜𑍍𑌯𑌾𑌃 𑌸𑌤𑌤𑌂 𑌬𑍁𑌧𑍈𑌃 ।
𑌨𑍀𑌤𑌿𑌜𑍍𑌞𑌾𑌃 𑌶𑍀𑌲𑌸𑌂𑌪𑌨𑍍𑌨𑌾 𑌭𑌵𑌂𑌤𑌿 𑌕𑍁𑌲𑌪𑍂𑌜𑌿𑌤𑌾𑌃 ॥ 10 ॥

𑌮𑌾𑌤𑌾 𑌶𑌤𑍍𑌰𑍁𑌃 𑌪𑌿𑌤𑌾 𑌵𑍈𑌰𑍀 𑌯𑌾𑌭𑍍𑌯𑌾𑌂 𑌬𑌾𑌲𑌾 𑌨 𑌪𑌾𑌠𑌿𑌤𑌾𑌃 ।
𑌸𑌭𑌾𑌮𑌧𑍍𑌯𑍇 𑌨 𑌶𑍋𑌭𑌂𑌤𑍇 𑌹𑌂𑌸𑌮𑌧𑍍𑌯𑍇 𑌬𑌕𑍋 𑌯𑌥𑌾 ॥ 11 ॥

𑌲𑌾𑌲𑌨𑌾𑌦𑍍𑌬𑌹𑌵𑍋 𑌦𑍋𑌷𑌾𑌸𑍍𑌤𑌾𑌡𑌨𑍇 𑌬𑌹𑌵𑍋 𑌗𑍁𑌣𑌾𑌃 ।
𑌤𑌸𑍍𑌮𑌾𑌤𑍍𑌪𑍁𑌤𑍍𑌰𑌂 𑌚 𑌶𑌿𑌷𑍍𑌯𑌂 𑌚 𑌤𑌾𑌡𑌯𑍇𑌨𑍍𑌨 𑌤𑍁 𑌲𑌾𑌲𑌯𑍇𑌤𑍍 ॥ 12 ॥

𑌶𑍍𑌲𑍋𑌕𑍇𑌨 𑌵𑌾 𑌤𑌦𑌰𑍍𑌧𑍇𑌨 𑌤𑌦𑌰𑍍𑌧𑌾𑌰𑍍𑌧𑌾𑌕𑍍𑌷𑌰𑍇𑌣 𑌵𑌾 ।
𑌅𑌬𑌂𑌧𑍍𑌯𑌂 𑌦𑌿𑌵𑌸𑌂 𑌕𑍁𑌰𑍍𑌯𑌾𑌦𑍍𑌦𑌾𑌨𑌾𑌧𑍍𑌯𑌯𑌨𑌕𑌰𑍍𑌮𑌭𑌿𑌃 ॥ 13 ॥

𑌕𑌾𑌂𑌤𑌾𑌵𑌿𑌯𑍋𑌗𑌃 𑌸𑍍𑌵𑌜𑌨𑌾𑌪𑌮𑌾𑌨𑌂
𑌋𑌣𑌸𑍍𑌯 𑌶𑍇𑌷𑌂 𑌕𑍁𑌨𑍃𑌪𑌸𑍍𑌯 𑌸𑍇𑌵𑌾 ।
𑌦𑌾𑌰𑌿𑌦𑍍𑌰𑍍𑌯𑌭𑌾𑌵𑌾𑌦𑍍𑌵𑌿𑌮𑍁𑌖𑌂 𑌚 𑌮𑌿𑌤𑍍𑌰𑌂
𑌵𑌿𑌨𑌾𑌗𑍍𑌨𑌿𑌨𑌾 𑌪𑌂𑌚 𑌦𑌹𑌂𑌤𑌿 𑌕𑌾𑌯𑌮𑍍 ॥ 14 ॥

𑌨𑌦𑍀𑌤𑍀𑌰𑍇 𑌚 𑌯𑍇 𑌵𑍃𑌕𑍍𑌷𑌾𑌃 𑌪𑌰𑌗𑍇𑌹𑍇𑌷𑍁 𑌕𑌾𑌮𑌿𑌨𑍀 ।
𑌮𑌂𑌤𑍍𑌰𑌹𑍀𑌨𑌾𑌶𑍍𑌚 𑌰𑌾𑌜𑌾𑌨𑌃 𑌶𑍀𑌘𑍍𑌰𑌂 𑌨𑌶𑍍𑌯𑌂𑌤𑍍𑌯𑌸𑌂𑌶𑌯𑌮𑍍 ॥ 15 ॥

𑌬𑌲𑌂 𑌵𑌿𑌦𑍍𑌯𑌾 𑌚 𑌵𑌿𑌪𑍍𑌰𑌾𑌣𑌾𑌂 𑌰𑌾𑌜𑍍𑌞𑌾𑌂 𑌸𑍈𑌨𑍍𑌯𑌂 𑌬𑌲𑌂 𑌤𑌥𑌾 ।
𑌬𑌲𑌂 𑌵𑌿𑌤𑍍𑌤𑌂 𑌚 𑌵𑍈𑌶𑍍𑌯𑌾𑌨𑌾𑌂 𑌶𑍂𑌦𑍍𑌰𑌾𑌣𑌾𑌂 𑌪𑌾𑌰𑌿𑌚𑌰𑍍𑌯𑌕𑌮𑍍 ॥ 16 ॥

𑌨𑌿𑌰𑍍𑌧𑌨𑌂 𑌪𑍁𑌰𑍁𑌷𑌂 𑌵𑍇𑌶𑍍𑌯𑌾 𑌪𑍍𑌰𑌜𑌾 𑌭𑌗𑍍𑌨𑌂 𑌨𑍃𑌪𑌂 𑌤𑍍𑌯𑌜𑍇𑌤𑍍 ।
𑌖𑌗𑌾 𑌵𑍀𑌤𑌫𑌲𑌂 𑌵𑍃𑌕𑍍𑌷𑌂 𑌭𑍁𑌕𑍍𑌤𑍍𑌵𑌾 𑌚𑌾𑌭𑍍𑌯𑌾𑌗𑌤𑍋 𑌗𑍃𑌹𑌮𑍍 ॥ 1𑍭 ॥

𑌗𑍃𑌹𑍀𑌤𑍍𑌵𑌾 𑌦𑌕𑍍𑌷𑌿𑌣𑌾𑌂 𑌵𑌿𑌪𑍍𑌰𑌾𑌸𑍍𑌤𑍍𑌯𑌜𑌂𑌤𑌿 𑌯𑌜𑌮𑌾𑌨𑌕𑌮𑍍 ।
𑌪𑍍𑌰𑌾𑌪𑍍𑌤𑌵𑌿𑌦𑍍𑌯𑌾 𑌗𑍁𑌰𑍁𑌂 𑌶𑌿𑌷𑍍𑌯𑌾 𑌦𑌗𑍍𑌧𑌾𑌰𑌣𑍍𑌯𑌂 𑌮𑍃𑌗𑌾𑌸𑍍𑌤𑌥𑌾 ॥ 1𑍮 ॥

𑌦𑍁𑌰𑌾𑌚𑌾𑌰𑍀 𑌦𑍁𑌰𑌾𑌦𑍃𑌷𑍍𑌟𑌿𑌰𑍍𑌦𑍁𑌰𑌾𑌵𑌾𑌸𑍀 𑌚 𑌦𑍁𑌰𑍍𑌜𑌨𑌃 ।
𑌯𑌨𑍍𑌮𑍈𑌤𑍍𑌰𑍀 𑌕𑍍𑌰𑌿𑌯𑌤𑍇 𑌪𑍁𑌂𑌭𑌿𑌰𑍍𑌨𑌰𑌃 𑌶𑍀𑌘𑍍𑌰𑌂 𑌵𑌿𑌨𑌶𑍍𑌯𑌤𑌿 ॥ 1𑍯 ॥

𑌸𑌮𑌾𑌨𑍇 𑌶𑍋𑌭𑌤𑍇 𑌪𑍍𑌰𑍀𑌤𑌿𑌃 𑌰𑌾𑌜𑍍𑌞𑌿 𑌸𑍇𑌵𑌾 𑌚 𑌶𑍋𑌭𑌤𑍇 ।
𑌵𑌾𑌣𑌿𑌜𑍍𑌯𑌂 𑌵𑍍𑌯𑌵𑌹𑌾𑌰𑍇𑌷𑍁 𑌦𑌿𑌵𑍍𑌯𑌾 𑌸𑍍𑌤𑍍𑌰𑍀 𑌶𑍋𑌭𑌤𑍇 𑌗𑍃𑌹𑍇 ॥ 20 ॥