𑌮𑌨𑍀𑌷𑌾 𑌪𑌂𑌚𑌕𑌮𑍍Download PDF

𑌸𑌤𑍍𑌯𑌾𑌚𑌾𑌰𑍍𑌯𑌸𑍍𑌯 𑌗𑌮𑌨𑍇 𑌕𑌦𑌾𑌚𑌿𑌨𑍍𑌮𑍁𑌕𑍍𑌤𑌿 𑌦𑌾𑌯𑌕𑌮𑍍 ।
𑌕𑌾𑌶𑍀𑌕𑍍𑌶𑍇𑌤𑍍𑌰𑌂 𑌪𑍍𑌰𑌤𑌿 𑌸𑌹 𑌗𑍌𑌰𑍍𑌯𑌾 𑌮𑌾𑌰𑍍𑌗𑍇 𑌤𑍁 𑌶𑌂𑌕𑌰𑌮𑍍 ॥ (𑌅𑌨𑍁𑌷𑍍𑌟𑍁𑌪𑍍)

𑌅𑌂𑌤𑍍𑌯𑌵𑍇𑌷𑌧𑌰𑌂 𑌦𑍃𑌷𑍍𑌟𑍍𑌵𑌾 𑌗𑌚𑍍𑌛 𑌗𑌚𑍍𑌛𑍇𑌤𑌿 𑌚𑌾𑌬𑍍𑌰𑌵𑍀𑌤𑍍 ।
𑌶𑌂𑌕𑌰𑌃𑌸𑍋𑌽𑌪𑌿 𑌚𑌾𑌂𑌡𑌲𑌸𑍍𑌤𑌂 𑌪𑍁𑌨𑌃 𑌪𑍍𑌰𑌾𑌹 𑌶𑌂𑌕𑌰𑌮𑍍 ॥ (𑌅𑌨𑍁𑌷𑍍𑌟𑍁𑌪𑍍)

𑌅𑌨𑍍𑌨𑌮𑌯𑌾𑌦𑌨𑍍𑌨𑌮𑌯𑌮𑌥𑌵𑌾 𑌚𑍈𑌤𑌨𑍍𑌯𑌮𑍇𑌵 𑌚𑍈𑌤𑌨𑍍𑌯𑌾𑌤𑍍 ।
𑌯𑌤𑌿𑌵𑌰 𑌦𑍂𑌰𑍀𑌕𑌰𑍍𑌤𑍁𑌂 𑌵𑌾𑌂𑌛𑌸𑌿 𑌕𑌿𑌂 𑌬𑍍𑌰𑍂𑌹𑌿 𑌗𑌚𑍍𑌛 𑌗𑌚𑍍𑌛𑍇𑌤𑌿 ॥ (𑌆𑌰𑍍𑌯𑌾 𑌵𑍃𑌤𑍍𑌤)

𑌪𑍍𑌰𑌤𑍍𑌯𑌗𑍍𑌵𑌸𑍍𑌤𑍁𑌨𑌿 𑌨𑌿𑌸𑍍𑌤𑌰𑌂𑌗𑌸𑌹𑌜𑌾𑌨𑌂𑌦𑌾𑌵𑌬𑍋𑌧𑌾𑌂𑌬𑍁𑌧𑍌
𑌵𑌿𑌪𑍍𑌰𑍋𑌽𑌯𑌂 𑌶𑍍𑌵𑌪𑌚𑍋𑌽𑌯𑌮𑌿𑌤𑍍𑌯𑌪𑌿 𑌮𑌹𑌾𑌨𑍍𑌕𑍋𑌽𑌯𑌂 𑌵𑌿𑌭𑍇𑌦𑌭𑍍𑌰𑌮𑌃 ।
𑌕𑌿𑌂 𑌗𑌂𑌗𑌾𑌂𑌬𑍁𑌨𑌿 𑌬𑌿𑌂𑌬𑌿𑌤𑍇𑌽𑌂𑌬𑌰𑌮𑌣𑍌 𑌚𑌾𑌂𑌡𑌾𑌲𑌵𑍀𑌥𑍀𑌪𑌯𑌃
𑌪𑍂𑌰𑍇 𑌵𑌾𑌽𑌂𑌤𑌰𑌮𑌸𑍍𑌤𑌿 𑌕𑌾𑌂𑌚𑌨𑌘𑌟𑍀𑌮𑍃𑌤𑍍𑌕𑍁𑌂𑌭𑌯𑍋𑌰𑍍𑌵𑌾𑌽𑌂𑌬𑌰𑍇 ॥ (𑌶𑌾𑌰𑍍𑌦𑍂𑌲 𑌵𑌿𑌕𑍍𑌰𑍀𑌡𑌿𑌤)

𑌜𑌾𑌗𑍍𑌰𑌤𑍍𑌸𑍍𑌵𑌪𑍍𑌨𑌸𑍁𑌷𑍁𑌪𑍍𑌤𑌿𑌷𑍁 𑌸𑍍𑌫𑍁𑌟𑌤𑌰𑌾 𑌯𑌾 𑌸𑌂𑌵𑌿𑌦𑍁𑌜𑍍𑌜𑍃𑌂𑌭𑌤𑍇
𑌯𑌾 𑌬𑍍𑌰𑌹𑍍𑌮𑌾𑌦𑌿𑌪𑌿𑌪𑍀𑌲𑌿𑌕𑌾𑌂𑌤𑌤𑌨𑍁𑌷𑍁 𑌪𑍍𑌰𑍋𑌤𑌾 𑌜𑌗𑌤𑍍𑌸𑌾𑌕𑍍𑌷𑌿𑌣𑍀 ।
𑌸𑍈𑌵𑌾𑌹𑌂 𑌨 𑌚 𑌦𑍃𑌶𑍍𑌯𑌵𑌸𑍍𑌤𑍍𑌵𑌿𑌤𑌿 𑌦𑍃𑌢𑌪𑍍𑌰𑌜𑍍𑌞𑌾𑌪𑌿 𑌯𑌸𑍍𑌯𑌾𑌸𑍍𑌤𑌿 𑌚𑍇-
𑌚𑍍𑌚𑌾𑌂𑌡𑌾𑌲𑍋𑌽𑌸𑍍𑌤𑍁 𑌸 𑌤𑍁 𑌦𑍍𑌵𑌿𑌜𑍋𑌽𑌸𑍍𑌤𑍁 𑌗𑍁𑌰𑍁𑌰𑌿𑌤𑍍𑌯𑍇𑌷𑌾 𑌮𑌨𑍀𑌷𑌾 𑌮𑌮 ॥ 1॥

𑌬𑍍𑌰𑌹𑍍𑌮𑍈𑌵𑌾𑌹𑌮𑌿𑌦𑌂 𑌜𑌗𑌚𑍍𑌚 𑌸𑌕𑌲𑌂 𑌚𑌿𑌨𑍍𑌮𑌾𑌤𑍍𑌰𑌵𑌿𑌸𑍍𑌤𑌾𑌰𑌿𑌤𑌂
𑌸𑌰𑍍𑌵𑌂 𑌚𑍈𑌤𑌦𑌵𑌿𑌦𑍍𑌯𑌯𑌾 𑌤𑍍𑌰𑌿𑌗𑍁𑌣𑌯𑌾𑌽𑌶𑍇𑌷𑌂 𑌮𑌯𑌾 𑌕𑌲𑍍𑌪𑌿𑌤𑌮𑍍 ।
𑌇𑌤𑍍𑌥𑌂 𑌯𑌸𑍍𑌯 𑌦𑍃𑌢𑌾 𑌮𑌤𑌿𑌃 𑌸𑍁𑌖𑌤𑌰𑍇 𑌨𑌿𑌤𑍍𑌯𑍇 𑌪𑌰𑍇 𑌨𑌿𑌰𑍍𑌮𑌲𑍇
𑌚𑌾𑌂𑌡𑌾𑌲𑍋𑌽𑌸𑍍𑌤𑍁 𑌸 𑌤𑍁 𑌦𑍍𑌵𑌿𑌜𑍋𑌽𑌸𑍍𑌤𑍁 𑌗𑍁𑌰𑍁𑌰𑌿𑌤𑍍𑌯𑍇𑌷𑌾 𑌮𑌨𑍀𑌷𑌾 𑌮𑌮 ॥ 2॥

𑌶𑌶𑍍𑌵𑌨𑍍𑌨𑌶𑍍𑌵𑌰𑌮𑍇𑌵 𑌵𑌿𑌶𑍍𑌵𑌮𑌖𑌿𑌲𑌂 𑌨𑌿𑌶𑍍𑌚𑌿𑌤𑍍𑌯 𑌵𑌾𑌚𑌾 𑌗𑍁𑌰𑍋-
𑌰𑍍𑌨𑌿𑌤𑍍𑌯𑌂 𑌬𑍍𑌰𑌹𑍍𑌮 𑌨𑌿𑌰𑌂𑌤𑌰𑌂 𑌵𑌿𑌮𑍃𑌶𑌤𑌾 𑌨𑌿𑌰𑍍𑌵𑍍𑌯𑌾𑌜𑌶𑌾𑌂𑌤𑌾𑌤𑍍𑌮𑌨𑌾 ।
𑌭𑍂𑌤𑌂 𑌭𑌾𑌵𑌿 𑌚 𑌦𑍁𑌷𑍍𑌕𑍃𑌤𑌂 𑌪𑍍𑌰𑌦𑌹𑌤𑌾 𑌸𑌂𑌵𑌿𑌨𑍍𑌮𑌯𑍇 𑌪𑌾𑌵𑌕𑍇
𑌪𑍍𑌰𑌾𑌰𑌬𑍍𑌧𑌾𑌯 𑌸𑌮𑌰𑍍𑌪𑌿𑌤𑌂 𑌸𑍍𑌵𑌵𑌪𑍁𑌰𑌿𑌤𑍍𑌯𑍇𑌷𑌾 𑌮𑌨𑍀𑌷𑌾 𑌮𑌮 ॥ 3॥

𑌯𑌾 𑌤𑌿𑌰𑍍𑌯𑌙𑍍𑌨𑌰𑌦𑍇𑌵𑌤𑌾𑌭𑌿𑌰𑌹𑌮𑌿𑌤𑍍𑌯𑌂𑌤𑌃 𑌸𑍍𑌫𑍁𑌟𑌾 𑌗𑍃𑌹𑍍𑌯𑌤𑍇
𑌯𑌦𑍍𑌭𑌾𑌸𑌾 𑌹𑍃𑌦𑌯𑌾𑌕𑍍𑌷𑌦𑍇𑌹𑌵𑌿𑌷𑌯𑌾 𑌭𑌾𑌂𑌤𑌿 𑌸𑍍𑌵𑌤𑍋𑌽𑌚𑍇𑌤𑌨𑌾𑌃 ।
𑌤𑌾𑌂 𑌭𑌾𑌸𑍍𑌯𑍈𑌃 𑌪𑌿𑌹𑌿𑌤𑌾𑌰𑍍𑌕𑌮𑌂𑌡𑌲𑌨𑌿𑌭𑌾𑌂 𑌸𑍍𑌫𑍂𑌰𑍍𑌤𑌿𑌂 𑌸𑌦𑌾 𑌭𑌾𑌵𑌯-
𑌨𑍍𑌯𑍋𑌗𑍀 𑌨𑌿𑌰𑍍𑌵𑍃𑌤𑌮𑌾𑌨𑌸𑍋 𑌹𑌿 𑌗𑍁𑌰𑍁𑌰𑌿𑌤𑍍𑌯𑍇𑌷𑌾 𑌮𑌨𑍀𑌷𑌾 𑌮𑌮 ॥ 4॥

𑌯𑌤𑍍𑌸𑍌𑌖𑍍𑌯𑌾𑌂𑌬𑍁𑌧𑌿𑌲𑍇𑌶𑌲𑍇𑌶𑌤 𑌇𑌮𑍇 𑌶𑌕𑍍𑌰𑌾𑌦𑌯𑍋 𑌨𑌿𑌰𑍍𑌵𑍃𑌤𑌾
𑌯𑌚𑍍𑌚𑌿𑌤𑍍𑌤𑍇 𑌨𑌿𑌤𑌰𑌾𑌂 𑌪𑍍𑌰𑌶𑌾𑌂𑌤𑌕𑌲𑌨𑍇 𑌲𑌬𑍍𑌧𑍍𑌵𑌾 𑌮𑍁𑌨𑌿𑌰𑍍𑌨𑌿𑌰𑍍𑌵𑍃𑌤𑌃 ।
𑌯𑌸𑍍𑌮𑌿𑌨𑍍𑌨𑌿𑌤𑍍𑌯𑌸𑍁𑌖𑌾𑌂𑌬𑍁𑌧𑍌 𑌗𑌲𑌿𑌤𑌧𑍀𑌰𑍍𑌬𑍍𑌰𑌹𑍍𑌮𑍈𑌵 𑌨 𑌬𑍍𑌰𑌹𑍍𑌮𑌵𑌿𑌦𑍍
𑌯𑌃 𑌕𑌶𑍍𑌚𑌿𑌤𑍍𑌸 𑌸𑍁𑌰𑍇𑌂𑌦𑍍𑌰𑌵𑌂𑌦𑌿𑌤𑌪𑌦𑍋 𑌨𑍂𑌨𑌂 𑌮𑌨𑍀𑌷𑌾 𑌮𑌮 ॥ 5॥

𑌦𑌾𑌸𑌸𑍍𑌤𑍇𑌽𑌹𑌂 𑌦𑍇𑌹𑌦𑍃𑌷𑍍𑌟𑍍𑌯𑌾𑌽𑌸𑍍𑌮𑌿 𑌶𑌂𑌭𑍋
𑌜𑌾𑌤𑌸𑍍𑌤𑍇𑌂𑌽𑌶𑍋 𑌜𑍀𑌵𑌦𑍃𑌷𑍍𑌟𑍍𑌯𑌾 𑌤𑍍𑌰𑌿𑌦𑍃𑌷𑍍𑌟𑍇 ।
𑌸𑌰𑍍𑌵𑌸𑍍𑌯𑌾𑌽𑌽𑌤𑍍𑌮𑌨𑍍𑌨𑌾𑌤𑍍𑌮𑌦𑍃𑌷𑍍𑌟𑍍𑌯𑌾 𑌤𑍍𑌵𑌮𑍇𑌵𑍇-
𑌤𑍍𑌯𑍇𑌵𑌂 𑌮𑍇 𑌧𑍀𑌰𑍍𑌨𑌿𑌶𑍍𑌚𑌿𑌤𑌾 𑌸𑌰𑍍𑌵𑌶𑌾𑌸𑍍𑌤𑍍𑌰𑍈𑌃 ॥

॥ 𑌇𑌤𑌿 𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌗𑌵𑌤𑌃 𑌕𑍃𑌤𑍌 𑌮𑌨𑍀𑌷𑌾𑌪𑌂𑌚𑌕𑌂 𑌸𑌂𑌪𑍂𑌰𑍍𑌣𑌮𑍍 ॥