𑌵𑌿𑌵𑍇𑌕 𑌚𑍂𑌡𑌾𑌮𑌣𑌿Download PDF

𑌸𑌰𑍍𑌵𑌵𑍇𑌦𑌾𑌂𑌤𑌸𑌿𑌦𑍍𑌧𑌾𑌂𑌤𑌗𑍋𑌚𑌰𑌂 𑌤𑌮𑌗𑍋𑌚𑌰𑌮𑍍 ।
𑌗𑍋𑌵𑌿𑌂𑌦𑌂 𑌪𑌰𑌮𑌾𑌨𑌂𑌦𑌂 𑌸𑌦𑍍𑌗𑍁𑌰𑍁𑌂 𑌪𑍍𑌰𑌣𑌤𑍋𑌽𑌸𑍍𑌮𑍍𑌯𑌹𑌮𑍍 ॥ 1॥

𑌜𑌂𑌤𑍂𑌨𑌾𑌂 𑌨𑌰𑌜𑌨𑍍𑌮 𑌦𑍁𑌰𑍍𑌲𑌭𑌮𑌤𑌃 𑌪𑍁𑌂𑌸𑍍𑌤𑍍𑌵𑌂 𑌤𑌤𑍋 𑌵𑌿𑌪𑍍𑌰𑌤𑌾
𑌤𑌸𑍍𑌮𑌾𑌦𑍍𑌵𑍈𑌦𑌿𑌕𑌧𑌰𑍍𑌮𑌮𑌾𑌰𑍍𑌗𑌪𑌰𑌤𑌾 𑌵𑌿𑌦𑍍𑌵𑌤𑍍𑌤𑍍𑌵𑌮𑌸𑍍𑌮𑌾𑌤𑍍𑌪𑌰𑌮𑍍 ।
𑌆𑌤𑍍𑌮𑌾𑌨𑌾𑌤𑍍𑌮𑌵𑌿𑌵𑍇𑌚𑌨𑌂 𑌸𑍍𑌵𑌨𑍁𑌭𑌵𑍋 𑌬𑍍𑌰𑌹𑍍𑌮𑌾𑌤𑍍𑌮𑌨𑌾 𑌸𑌂𑌸𑍍𑌥𑌿𑌤𑌿𑌃
𑌮𑍁𑌕𑍍𑌤𑌿𑌰𑍍𑌨𑍋 𑌶𑌤𑌜𑌨𑍍𑌮𑌕𑍋𑌟𑌿𑌸𑍁𑌕𑍃𑌤𑍈𑌃 𑌪𑍁𑌣𑍍𑌯𑍈𑌰𑍍𑌵𑌿𑌨𑌾 𑌲𑌭𑍍𑌯𑌤𑍇 ॥ 2॥ (𑌪𑌾𑌠𑌭𑍇𑌦𑌃 – 𑌶𑌤𑌕𑍋𑌟𑌿𑌜𑌨𑍍𑌮𑌸𑍁 𑌕𑍃𑌤𑍈𑌃)

𑌦𑍁𑌰𑍍𑌲𑌭𑌂 𑌤𑍍𑌰𑌯𑌮𑍇𑌵𑍈𑌤𑌦𑍍𑌦𑍇𑌵𑌾𑌨𑍁𑌗𑍍𑌰𑌹𑌹𑍇𑌤𑍁𑌕𑌮𑍍 ।
𑌮𑌨𑍁𑌷𑍍𑌯𑌤𑍍𑌵𑌂 𑌮𑍁𑌮𑍁𑌕𑍍𑌷𑍁𑌤𑍍𑌵𑌂 𑌮𑌹𑌾𑌪𑍁𑌰𑍁𑌷𑌸𑌂𑌶𑍍𑌰𑌯𑌃 ॥ 3॥

𑌲𑌬𑍍𑌧𑍍𑌵𑌾 𑌕𑌥𑌂𑌚𑌿𑌨𑍍𑌨𑌰𑌜𑌨𑍍𑌮 𑌦𑍁𑌰𑍍𑌲𑌭𑌂 (𑌪𑌾𑌠𑌭𑍇𑌦𑌃 – 𑌕𑌥𑌂𑌚𑌿𑌨𑍍)
𑌤𑌤𑍍𑌰𑌾𑌪𑌿 𑌪𑍁𑌂𑌸𑍍𑌤𑍍𑌵𑌂 𑌶𑍍𑌰𑍁𑌤𑌿𑌪𑌾𑌰𑌦𑌰𑍍𑌶𑌨𑌮𑍍 ।
𑌯𑌸𑍍𑌤𑍍𑌵𑌾𑌤𑍍𑌮𑌮𑍁𑌕𑍍𑌤𑍌 𑌨 𑌯𑌤𑍇𑌤 𑌮𑍂𑌢𑌧𑍀𑌃
𑌸 𑌹𑍍𑌯𑌾𑌤𑍍𑌮𑌹𑌾 𑌸𑍍𑌵𑌂 𑌵𑌿𑌨𑌿𑌹𑌂𑌤𑍍𑌯𑌸𑌦𑍍𑌗𑍍𑌰𑌹𑌾𑌤𑍍 ॥ 4॥ (𑌪𑌾𑌠𑌭𑍇𑌦𑌃 – 𑌆𑌤𑍍𑌮𑌹𑌾 𑌸𑍍𑌵𑌂)

𑌇𑌤𑌃 𑌕𑍋 𑌨𑍍𑌵𑌸𑍍𑌤𑌿 𑌮𑍂𑌢𑌾𑌤𑍍𑌮𑌾 𑌯𑌸𑍍𑌤𑍁 𑌸𑍍𑌵𑌾𑌰𑍍𑌥𑍇 𑌪𑍍𑌰𑌮𑌾𑌦𑍍𑌯𑌤𑌿 ।
𑌦𑍁𑌰𑍍𑌲𑌭𑌂 𑌮𑌾𑌨𑍁𑌷𑌂 𑌦𑍇𑌹𑌂 𑌪𑍍𑌰𑌾𑌪𑍍𑌯 𑌤𑌤𑍍𑌰𑌾𑌪𑌿 𑌪𑍌𑌰𑍁𑌷𑌮𑍍 ॥ 5॥

𑌵𑌦𑌂𑌤𑍁 𑌶𑌾𑌸𑍍𑌤𑍍𑌰𑌾𑌣𑌿 𑌯𑌜𑌂𑌤𑍁 𑌦𑍇𑌵𑌾𑌨𑍍 (𑌪𑌾𑌠𑌭𑍇𑌦𑌃 – 𑌪𑌠𑌂𑌤𑍁)
𑌕𑍁𑌰𑍍𑌵𑌂𑌤𑍁 𑌕𑌰𑍍𑌮𑌾𑌣𑌿 𑌭𑌜𑌂𑌤𑍁 𑌦𑍇𑌵𑌤𑌾𑌃 ।
𑌆𑌤𑍍𑌮𑍈𑌕𑍍𑌯𑌬𑍋𑌧𑍇𑌨 𑌵𑌿𑌨𑌾𑌪𑌿 𑌮𑍁𑌕𑍍𑌤𑌿- (𑌪𑌾𑌠𑌭𑍇𑌦𑌃 – 𑌵𑌿𑌨𑌾 𑌵𑌿𑌮𑍁𑌕𑍍𑌤𑌿𑌃 𑌨)
𑌰𑍍𑌨 𑌸𑌿𑌧𑍍𑌯𑌤𑌿 𑌬𑍍𑌰𑌹𑍍𑌮𑌶𑌤𑌾𑌂𑌤𑌰𑍇𑌽𑌪𑌿 ॥ 6॥

𑌅𑌮𑍃𑌤𑌤𑍍𑌤𑍍𑌵𑌸𑍍𑌯 𑌨𑌾𑌶𑌾𑌸𑍍𑌤𑌿 𑌵𑌿𑌤𑍍𑌤𑍇𑌨𑍇𑌤𑍍𑌯𑍇𑌵 𑌹𑌿 𑌶𑍍𑌰𑍁𑌤𑌿𑌃 ।
𑌬𑍍𑌰𑌵𑍀𑌤𑌿 𑌕𑌰𑍍𑌮𑌣𑍋 𑌮𑍁𑌕𑍍𑌤𑍇𑌰𑌹𑍇𑌤𑍁𑌤𑍍𑌵𑌂 𑌸𑍍𑌫𑍁𑌟𑌂 𑌯𑌤𑌃 ॥ 𑍭॥

𑌅𑌤𑍋 𑌵𑌿𑌮𑍁𑌕𑍍𑌤𑍍𑌯𑍈 𑌪𑍍𑌰𑌯𑌤𑍇𑌤 𑌵𑌿𑌦𑍍𑌵𑌾𑌨𑍍
𑌸𑌨𑍍𑌨𑍍𑌯𑌸𑍍𑌤𑌬𑌾𑌹𑍍𑌯𑌾𑌰𑍍𑌥𑌸𑍁𑌖𑌸𑍍𑌪𑍃𑌹𑌃 𑌸𑌨𑍍 ।
𑌸𑌂𑌤𑌂 𑌮𑌹𑌾𑌂𑌤𑌂 𑌸𑌮𑍁𑌪𑍇𑌤𑍍𑌯 𑌦𑍇𑌶𑌿𑌕𑌂
𑌤𑍇𑌨𑍋𑌪𑌦𑌿𑌷𑍍𑌟𑌾𑌰𑍍𑌥𑌸𑌮𑌾𑌹𑌿𑌤𑌾𑌤𑍍𑌮𑌾 ॥ 𑍮॥

𑌉𑌦𑍍𑌧𑌰𑍇𑌦𑌾𑌤𑍍𑌮𑌨𑌾𑌽𑌽𑌤𑍍𑌮𑌾𑌨𑌂 𑌮𑌗𑍍𑌨𑌂 𑌸𑌂𑌸𑌾𑌰𑌵𑌾𑌰𑌿𑌧𑍌 ।
𑌯𑍋𑌗𑌾𑌰𑍂𑌢𑌤𑍍𑌵𑌮𑌾𑌸𑌾𑌦𑍍𑌯 𑌸𑌮𑍍𑌯𑌗𑍍𑌦𑌰𑍍𑌶𑌨𑌨𑌿𑌷𑍍𑌠𑌯𑌾 ॥ 𑍯॥

𑌸𑌨𑍍𑌨𑍍𑌯𑌸𑍍𑌯 𑌸𑌰𑍍𑌵𑌕𑌰𑍍𑌮𑌾𑌣𑌿 𑌭𑌵𑌬𑌂𑌧𑌵𑌿𑌮𑍁𑌕𑍍𑌤𑌯𑍇 ।
𑌯𑌤𑍍𑌯𑌤𑌾𑌂 𑌪𑌂𑌡𑌿𑌤𑍈𑌰𑍍𑌧𑍀𑌰𑍈𑌰𑌾𑌤𑍍𑌮𑌾𑌭𑍍𑌯𑌾𑌸 𑌉𑌪𑌸𑍍𑌥𑌿𑌤𑍈𑌃 ॥ 10॥

𑌚𑌿𑌤𑍍𑌤𑌸𑍍𑌯 𑌶𑍁𑌦𑍍𑌧𑌯𑍇 𑌕𑌰𑍍𑌮 𑌨 𑌤𑍁 𑌵𑌸𑍍𑌤𑍂𑌪𑌲𑌬𑍍𑌧𑌯𑍇 ।
𑌵𑌸𑍍𑌤𑍁𑌸𑌿𑌦𑍍𑌧𑌿𑌰𑍍𑌵𑌿𑌚𑌾𑌰𑍇𑌣 𑌨 𑌕𑌿𑌂𑌚𑌿𑌤𑍍𑌕𑌰𑍍𑌮𑌕𑍋𑌟𑌿𑌭𑌿𑌃 ॥ 11॥

𑌸𑌮𑍍𑌯𑌗𑍍𑌵𑌿𑌚𑌾𑌰𑌤𑌃 𑌸𑌿𑌦𑍍𑌧𑌾 𑌰𑌜𑍍𑌜𑍁𑌤𑌤𑍍𑌤𑍍𑌵𑌾𑌵𑌧𑌾𑌰𑌣𑌾 ।
𑌭𑍍𑌰𑌾𑌂𑌤𑍋𑌦𑌿𑌤𑌮𑌹𑌾𑌸𑌰𑍍𑌪𑌭𑌯𑌦𑍁𑌃𑌖𑌵𑌿𑌨𑌾𑌶𑌿𑌨𑍀 ॥ 12॥ (𑌪𑌾𑌠𑌭𑍇𑌦𑌃 – 𑌭𑍍𑌰𑌾𑌂𑌤𑍍𑌯𑍋)
𑌅𑌰𑍍𑌥𑌸𑍍𑌯 𑌨𑌿𑌶𑍍𑌚𑌯𑍋 𑌦𑍃𑌷𑍍𑌟𑍋 𑌵𑌿𑌚𑌾𑌰𑍇𑌣 𑌹𑌿𑌤𑍋𑌕𑍍𑌤𑌿𑌤𑌃 ।
𑌨 𑌸𑍍𑌨𑌾𑌨𑍇𑌨 𑌨 𑌦𑌾𑌨𑍇𑌨 𑌪𑍍𑌰𑌾𑌣𑌾𑌯𑌾𑌮𑌶𑌤𑍇𑌨 𑌵𑌾 ॥ 13॥

𑌅𑌧𑌿𑌕𑌾𑌰𑌿𑌣𑌮𑌾𑌶𑌾𑌸𑍍𑌤𑍇 𑌫𑌲𑌸𑌿𑌦𑍍𑌧𑌿𑌰𑍍𑌵𑌿𑌶𑍇𑌷𑌤𑌃 ।
𑌉𑌪𑌾𑌯𑌾 𑌦𑍇𑌶𑌕𑌾𑌲𑌾𑌦𑍍𑌯𑌾𑌃 𑌸𑌂𑌤𑍍𑌯𑌸𑍍𑌮𑌿𑌨𑍍𑌸𑌹𑌕𑌾𑌰𑌿𑌣𑌃 ॥ 14॥ (𑌪𑌾𑌠𑌭𑍇𑌦𑌃 – 𑌸𑌂𑌤𑍍𑌯𑌸𑍍𑌯𑌾𑌂)
𑌅𑌤𑍋 𑌵𑌿𑌚𑌾𑌰𑌃 𑌕𑌰𑍍𑌤𑌵𑍍𑌯𑍋 𑌜𑌿𑌜𑍍𑌞𑌾𑌸𑍋𑌰𑌾𑌤𑍍𑌮𑌵𑌸𑍍𑌤𑍁𑌨𑌃 ॥

𑌸𑌮𑌾𑌸𑌾𑌦𑍍𑌯 𑌦𑌯𑌾𑌸𑌿𑌂𑌧𑍁𑌂 𑌗𑍁𑌰𑍁𑌂 𑌬𑍍𑌰𑌹𑍍𑌮𑌵𑌿𑌦𑍁𑌤𑍍𑌤𑌮𑌮𑍍 ॥ 15॥

𑌮𑍇𑌧𑌾𑌵𑍀 𑌪𑍁𑌰𑍁𑌷𑍋 𑌵𑌿𑌦𑍍𑌵𑌾𑌨𑍂𑌹𑌾𑌪𑍋𑌹𑌵𑌿𑌚𑌕𑍍𑌷𑌣𑌃 ।
𑌅𑌧𑌿𑌕𑌾𑌰𑍍𑌯𑌾𑌤𑍍𑌮𑌵𑌿𑌦𑍍𑌯𑌾𑌯𑌾𑌮𑍁𑌕𑍍𑌤𑌲𑌕𑍍𑌷𑌣𑌲𑌕𑍍𑌷𑌿𑌤𑌃 ॥ 16॥

𑌵𑌿𑌵𑍇𑌕𑌿𑌨𑍋 𑌵𑌿𑌰𑌕𑍍𑌤𑌸𑍍𑌯 𑌶𑌮𑌾𑌦𑌿𑌗𑍁𑌣𑌶𑌾𑌲𑌿𑌨𑌃 ।
𑌮𑍁𑌮𑍁𑌕𑍍𑌷𑍋𑌰𑍇𑌵 𑌹𑌿 𑌬𑍍𑌰𑌹𑍍𑌮𑌜𑌿𑌜𑍍𑌞𑌾𑌸𑌾𑌯𑍋𑌗𑍍𑌯𑌤𑌾 𑌮𑌤𑌾 ॥ 1𑍭॥

𑌸𑌾𑌧𑌨𑌾𑌨𑍍𑌯𑌤𑍍𑌰 𑌚𑌤𑍍𑌵𑌾𑌰𑌿 𑌕𑌥𑌿𑌤𑌾𑌨𑌿 𑌮𑌨𑍀𑌷𑌿𑌭𑌿𑌃 ।
𑌯𑍇𑌷𑍁 𑌸𑌤𑍍𑌸𑍍𑌵𑍇𑌵 𑌸𑌨𑍍𑌨𑌿𑌷𑍍𑌠𑌾 𑌯𑌦𑌭𑌾𑌵𑍇 𑌨 𑌸𑌿𑌧𑍍𑌯𑌤𑌿 ॥ 1𑍮॥

𑌆𑌦𑍌 𑌨𑌿𑌤𑍍𑌯𑌾𑌨𑌿𑌤𑍍𑌯𑌵𑌸𑍍𑌤𑍁𑌵𑌿𑌵𑍇𑌕𑌃 𑌪𑌰𑌿𑌗𑌣𑍍𑌯𑌤𑍇 ।
𑌇𑌹𑌾𑌮𑍁𑌤𑍍𑌰𑌫𑌲𑌭𑍋𑌗𑌵𑌿𑌰𑌾𑌗𑌸𑍍𑌤𑌦𑌨𑌂𑌤𑌰𑌮𑍍 ।
𑌶𑌮𑌾𑌦𑌿𑌷𑌟𑍍𑌕𑌸𑌂𑌪𑌤𑍍𑌤𑌿𑌰𑍍𑌮𑍁𑌮𑍁𑌕𑍍𑌷𑍁𑌤𑍍𑌵𑌮𑌿𑌤𑌿 𑌸𑍍𑌫𑍁𑌟𑌮𑍍 ॥ 1𑍯॥

𑌬𑍍𑌰𑌹𑍍𑌮 𑌸𑌤𑍍𑌯𑌂 𑌜𑌗𑌨𑍍𑌮𑌿𑌥𑍍𑌯𑍇𑌤𑍍𑌯𑍇𑌵𑌂𑌰𑍂𑌪𑍋 𑌵𑌿𑌨𑌿𑌶𑍍𑌚𑌯𑌃 ।
𑌸𑍋𑌽𑌯𑌂 𑌨𑌿𑌤𑍍𑌯𑌾𑌨𑌿𑌤𑍍𑌯𑌵𑌸𑍍𑌤𑍁𑌵𑌿𑌵𑍇𑌕𑌃 𑌸𑌮𑍁𑌦𑌾𑌹𑍃𑌤𑌃 ॥ 20॥

𑌤𑌦𑍍𑌵𑍈𑌰𑌾𑌗𑍍𑌯𑌂 𑌜𑌿𑌹𑌾𑌸𑌾 𑌯𑌾 𑌦𑌰𑍍𑌶𑌨𑌶𑍍𑌰𑌵𑌣𑌾𑌦𑌿𑌭𑌿𑌃 । (𑌪𑌾𑌠𑌭𑍇𑌦𑌃 – 𑌜𑍁𑌗𑍁𑌪𑍍𑌸𑌾 𑌯𑌾)
𑌦𑍇𑌹𑌾𑌦𑌿𑌬𑍍𑌰𑌹𑍍𑌮𑌪𑌰𑍍𑌯𑌂𑌤𑍇 𑌹𑍍𑌯𑌨𑌿𑌤𑍍𑌯𑍇 𑌭𑍋𑌗𑌵𑌸𑍍𑌤𑍁𑌨𑌿 ॥ 21॥ (𑌪𑌾𑌠𑌭𑍇𑌦𑌃 – 𑌭𑍋𑌗𑍍𑌯𑌵𑌸𑍍𑌤𑍁𑌨𑌿)
𑌵𑌿𑌰𑌜𑍍𑌯 𑌵𑌿𑌷𑌯𑌵𑍍𑌰𑌾𑌤𑌾𑌦𑍍𑌦𑍋𑌷𑌦𑍃𑌷𑍍𑌟𑍍𑌯𑌾 𑌮𑍁𑌹𑍁𑌰𑍍𑌮𑍁𑌹𑍁𑌃 ।
𑌸𑍍𑌵𑌲𑌕𑍍𑌷𑍍𑌯𑍇 𑌨𑌿𑌯𑌤𑌾𑌵𑌸𑍍𑌥𑌾 𑌮𑌨𑌸𑌃 𑌶𑌮 𑌉𑌚𑍍𑌯𑌤𑍇 ॥ 22॥

𑌵𑌿𑌷𑌯𑍇𑌭𑍍𑌯𑌃 𑌪𑌰𑌾𑌵𑌰𑍍𑌤𑍍𑌯 𑌸𑍍𑌥𑌾𑌪𑌨𑌂 𑌸𑍍𑌵𑌸𑍍𑌵𑌗𑍋𑌲𑌕𑍇 ।
𑌉𑌭𑌯𑍇𑌷𑌾𑌮𑌿𑌂𑌦𑍍𑌰𑌿𑌯𑌾𑌣𑌾𑌂 𑌸 𑌦𑌮𑌃 𑌪𑌰𑌿𑌕𑍀𑌰𑍍𑌤𑌿𑌤𑌃 ।
𑌬𑌾𑌹𑍍𑌯𑌾𑌨𑌾𑌲𑌂𑌬𑌨𑌂 𑌵𑍃𑌤𑍍𑌤𑍇𑌰𑍇𑌷𑍋𑌪𑌰𑌤𑌿𑌰𑍁𑌤𑍍𑌤𑌮𑌾 ॥ 23॥

𑌸𑌹𑌨𑌂 𑌸𑌰𑍍𑌵𑌦𑍁𑌃𑌖𑌾𑌨𑌾𑌮𑌪𑍍𑌰𑌤𑍀𑌕𑌾𑌰𑌪𑍂𑌰𑍍𑌵𑌕𑌮𑍍 ।
𑌚𑌿𑌂𑌤𑌾𑌵𑌿𑌲𑌾𑌪𑌰𑌹𑌿𑌤𑌂 𑌸𑌾 𑌤𑌿𑌤𑌿𑌕𑍍𑌷𑌾 𑌨𑌿𑌗𑌦𑍍𑌯𑌤𑍇 ॥ 24॥

𑌶𑌾𑌸𑍍𑌤𑍍𑌰𑌸𑍍𑌯 𑌗𑍁𑌰𑍁𑌵𑌾𑌕𑍍𑌯𑌸𑍍𑌯 𑌸𑌤𑍍𑌯𑌬𑍁𑌦𑍍𑌧𑍍𑌯𑌵𑌧𑌾𑌰𑌣𑌮𑍍 । (𑌪𑌾𑌠𑌭𑍇𑌦𑌃 – 𑌸𑌤𑍍𑌯𑌬𑍁𑌦𑍍𑌧𑍍𑌯𑌾𑌵𑌧𑌾𑌰𑌣𑌾)
𑌸𑌾 𑌶𑍍𑌰𑌦𑍍𑌧𑌾 𑌕𑌥𑌿𑌤𑌾 𑌸𑌦𑍍𑌭𑌿𑌰𑍍𑌯𑌯𑌾 𑌵𑌸𑍍𑌤𑍂𑌪𑌲𑌭𑍍𑌯𑌤𑍇 ॥ 25॥

𑌸𑌰𑍍𑌵𑌦𑌾 𑌸𑍍𑌥𑌾𑌪𑌨𑌂 𑌬𑍁𑌦𑍍𑌧𑍇𑌃 𑌶𑍁𑌦𑍍𑌧𑍇 𑌬𑍍𑌰𑌹𑍍𑌮𑌣𑌿 𑌸𑌰𑍍𑌵𑌦𑌾 । (𑌪𑌾𑌠𑌭𑍇𑌦𑌃 – 𑌸𑌮𑍍𑌯𑌗𑌾𑌸𑍍𑌥𑌾𑌪𑌨𑌂)
𑌤𑌤𑍍𑌸𑌮𑌾𑌧𑌾𑌨𑌮𑌿𑌤𑍍𑌯𑍁𑌕𑍍𑌤𑌂 𑌨 𑌤𑍁 𑌚𑌿𑌤𑍍𑌤𑌸𑍍𑌯 𑌲𑌾𑌲𑌨𑌮𑍍 ॥ 26॥

𑌅𑌹𑌂𑌕𑌾𑌰𑌾𑌦𑌿𑌦𑍇𑌹𑌾𑌂𑌤𑌾𑌨𑍍 𑌬𑌂𑌧𑌾𑌨𑌜𑍍𑌞𑌾𑌨𑌕𑌲𑍍𑌪𑌿𑌤𑌾𑌨𑍍 ।
𑌸𑍍𑌵𑌸𑍍𑌵𑌰𑍂𑌪𑌾𑌵𑌬𑍋𑌧𑍇𑌨 𑌮𑍋𑌕𑍍𑌤𑍁𑌮𑌿𑌚𑍍𑌛𑌾 𑌮𑍁𑌮𑍁𑌕𑍍𑌷𑍁𑌤𑌾 ॥ 2𑍭॥

𑌮𑌂𑌦𑌮𑌧𑍍𑌯𑌮𑌰𑍂𑌪𑌾𑌪𑌿 𑌵𑍈𑌰𑌾𑌗𑍍𑌯𑍇𑌣 𑌶𑌮𑌾𑌦𑌿𑌨𑌾 ।
𑌪𑍍𑌰𑌸𑌾𑌦𑍇𑌨 𑌗𑍁𑌰𑍋𑌃 𑌸𑍇𑌯𑌂 𑌪𑍍𑌰𑌵𑍃𑌦𑍍𑌧𑌾 𑌸𑍂𑌯𑌤𑍇 𑌫𑌲𑌮𑍍 ॥ 2𑍮॥

𑌵𑍈𑌰𑌾𑌗𑍍𑌯𑌂 𑌚 𑌮𑍁𑌮𑍁𑌕𑍍𑌷𑍁𑌤𑍍𑌵𑌂 𑌤𑍀𑌵𑍍𑌰𑌂 𑌯𑌸𑍍𑌯 𑌤𑍁 𑌵𑌿𑌦𑍍𑌯𑌤𑍇 ।
𑌤𑌸𑍍𑌮𑌿𑌨𑍍𑌨𑍇𑌵𑌾𑌰𑍍𑌥𑌵𑌂𑌤𑌃 𑌸𑍍𑌯𑍁𑌃 𑌫𑌲𑌵𑌂𑌤𑌃 𑌶𑌮𑌾𑌦𑌯𑌃 ॥ 2𑍯॥

𑌏𑌤𑌯𑍋𑌰𑍍𑌮𑌂𑌦𑌤𑌾 𑌯𑌤𑍍𑌰 𑌵𑌿𑌰𑌕𑍍𑌤𑌤𑍍𑌵𑌮𑍁𑌮𑍁𑌕𑍍𑌷𑌯𑍋𑌃 ।
𑌮𑌰𑍌 𑌸𑌲𑌿𑌲𑌵𑌤𑍍𑌤𑌤𑍍𑌰 𑌶𑌮𑌾𑌦𑍇𑌰𑍍𑌭𑌾𑌨𑌮𑌾𑌤𑍍𑌰𑌤𑌾 ॥ 30॥

𑌮𑍋𑌕𑍍𑌷𑌕𑌾𑌰𑌣𑌸𑌾𑌮𑌗𑍍𑌰𑍍𑌯𑌾𑌂 𑌭𑌕𑍍𑌤𑌿𑌰𑍇𑌵 𑌗𑌰𑍀𑌯𑌸𑍀 ।
𑌸𑍍𑌵𑌸𑍍𑌵𑌰𑍂𑌪𑌾𑌨𑍁𑌸𑌂𑌧𑌾𑌨𑌂 𑌭𑌕𑍍𑌤𑌿𑌰𑌿𑌤𑍍𑌯𑌭𑌿𑌧𑍀𑌯𑌤𑍇 ॥ 31॥

𑌸𑍍𑌵𑌾𑌤𑍍𑌮𑌤𑌤𑍍𑌤𑍍𑌵𑌾𑌨𑍁𑌸𑌂𑌧𑌾𑌨𑌂 𑌭𑌕𑍍𑌤𑌿𑌰𑌿𑌤𑍍𑌯𑌪𑌰𑍇 𑌜𑌗𑍁𑌃 ।
𑌉𑌕𑍍𑌤𑌸𑌾𑌧𑌨𑌸𑌂𑌪𑌨𑍍𑌨𑌸𑍍𑌤𑌤𑍍𑌤𑍍𑌵𑌜𑌿𑌜𑍍𑌞𑌾𑌸𑍁𑌰𑌾𑌤𑍍𑌮𑌨𑌃 ।
𑌉𑌪𑌸𑍀𑌦𑍇𑌦𑍍𑌗𑍁𑌰𑍁𑌂 𑌪𑍍𑌰𑌾𑌜𑍍𑌞𑌂 𑌯𑌸𑍍𑌮𑌾𑌦𑍍𑌬𑌂𑌧𑌵𑌿𑌮𑍋𑌕𑍍𑌷𑌣𑌮𑍍 ॥ 32॥

𑌶𑍍𑌰𑍋𑌤𑍍𑌰𑌿𑌯𑍋𑌽𑌵𑍃𑌜𑌿𑌨𑍋𑌽𑌕𑌾𑌮𑌹𑌤𑍋 𑌯𑍋 𑌬𑍍𑌰𑌹𑍍𑌮𑌵𑌿𑌤𑍍𑌤𑌮𑌃 ।
𑌬𑍍𑌰𑌹𑍍𑌮𑌣𑍍𑌯𑍁𑌪𑌰𑌤𑌃 𑌶𑌾𑌂𑌤𑍋 𑌨𑌿𑌰𑌿𑌂𑌧𑌨 𑌇𑌵𑌾𑌨𑌲𑌃 ।
𑌅𑌹𑍇𑌤𑍁𑌕𑌦𑌯𑌾𑌸𑌿𑌂𑌧𑍁𑌰𑍍𑌬𑌂𑌧𑍁𑌰𑌾𑌨𑌮𑌤𑌾𑌂 𑌸𑌤𑌾𑌮𑍍 ॥ 33॥

𑌤𑌮𑌾𑌰𑌾𑌧𑍍𑌯 𑌗𑍁𑌰𑍁𑌂 𑌭𑌕𑍍𑌤𑍍𑌯𑌾 𑌪𑍍𑌰𑌹𑍍𑌵𑌪𑍍𑌰𑌶𑍍𑌰𑌯𑌸𑍇𑌵𑌨𑍈𑌃 । (𑌪𑌾𑌠𑌭𑍇𑌦𑌃 – 𑌪𑍍𑌰𑌹𑍍𑌵𑌃)
𑌪𑍍𑌰𑌸𑌨𑍍𑌨𑌂 𑌤𑌮𑌨𑍁𑌪𑍍𑌰𑌾𑌪𑍍𑌯 𑌪𑍃𑌚𑍍𑌛𑍇𑌜𑍍𑌜𑍍𑌞𑌾𑌤𑌵𑍍𑌯𑌮𑌾𑌤𑍍𑌮𑌨𑌃 ॥ 34॥

𑌸𑍍𑌵𑌾𑌮𑌿𑌨𑍍𑌨𑌮𑌸𑍍𑌤𑍇 𑌨𑌤𑌲𑍋𑌕𑌬𑌂𑌧𑍋
𑌕𑌾𑌰𑍁𑌣𑍍𑌯𑌸𑌿𑌂𑌧𑍋 𑌪𑌤𑌿𑌤𑌂 𑌭𑌵𑌾𑌬𑍍𑌧𑍌 ।
𑌮𑌾𑌮𑍁𑌦𑍍𑌧𑌰𑌾𑌤𑍍𑌮𑍀𑌯𑌕𑌟𑌾𑌕𑍍𑌷𑌦𑍃𑌷𑍍𑌟𑍍𑌯𑌾
𑌋𑌜𑍍𑌵𑍍𑌯𑌾𑌤𑌿𑌕𑌾𑌰𑍁𑌣𑍍𑌯𑌸𑍁𑌧𑌾𑌭𑌿𑌵𑍃𑌷𑍍𑌟𑍍𑌯𑌾 ॥ 35॥

𑌦𑍁𑌰𑍍𑌵𑌾𑌰𑌸𑌂𑌸𑌾𑌰𑌦𑌵𑌾𑌗𑍍𑌨𑌿𑌤𑌪𑍍𑌤𑌂
𑌦𑍋𑌧𑍂𑌯𑌮𑌾𑌨𑌂 𑌦𑍁𑌰𑌦𑍃𑌷𑍍𑌟𑌵𑌾𑌤𑍈𑌃 ।
𑌭𑍀𑌤𑌂 𑌪𑍍𑌰𑌪𑌨𑍍𑌨𑌂 𑌪𑌰𑌿𑌪𑌾𑌹𑌿 𑌮𑍃𑌤𑍍𑌯𑍋𑌃
𑌶𑌰𑌣𑍍𑌯𑌮𑌨𑍍𑌯𑌦𑍍𑌯𑌦𑌹𑌂 𑌨 𑌜𑌾𑌨𑍇 ॥ 36॥ (𑌪𑌾𑌠𑌭𑍇𑌦𑌃 – 𑌅𑌨𑍍𑌯𑌂)

𑌶𑌾𑌂𑌤𑌾 𑌮𑌹𑌾𑌂𑌤𑍋 𑌨𑌿𑌵𑌸𑌂𑌤𑌿 𑌸𑌂𑌤𑍋
𑌵𑌸𑌂𑌤𑌵𑌲𑍍𑌲𑍋𑌕𑌹𑌿𑌤𑌂 𑌚𑌰𑌂𑌤𑌃 ।
𑌤𑍀𑌰𑍍𑌣𑌾𑌃 𑌸𑍍𑌵𑌯𑌂 𑌭𑍀𑌮𑌭𑌵𑌾𑌰𑍍𑌣𑌵𑌂 𑌜𑌨𑌾-
𑌨𑌹𑍇𑌤𑍁𑌨𑌾𑌨𑍍𑌯𑌾𑌨𑌪𑌿 𑌤𑌾𑌰𑌯𑌂𑌤𑌃 ॥ 3𑍭॥

𑌅𑌯𑌂 𑌸𑍍𑌵𑌭𑌾𑌵𑌃 𑌸𑍍𑌵𑌤 𑌏𑌵 𑌯𑌤𑍍𑌪𑌰-
𑌶𑍍𑌰𑌮𑌾𑌪𑌨𑍋𑌦𑌪𑍍𑌰𑌵𑌣𑌂 𑌮𑌹𑌾𑌤𑍍𑌮𑌨𑌾𑌮𑍍 ।
𑌸𑍁𑌧𑌾𑌂𑌶𑍁𑌰𑍇𑌷 𑌸𑍍𑌵𑌯𑌮𑌰𑍍𑌕𑌕𑌰𑍍𑌕𑌶-
𑌪𑍍𑌰𑌭𑌾𑌭𑌿𑌤𑌪𑍍𑌤𑌾𑌮𑌵𑌤𑌿 𑌕𑍍𑌷𑌿𑌤𑌿𑌂 𑌕𑌿𑌲 ॥ 3𑍮॥

𑌬𑍍𑌰𑌹𑍍𑌮𑌾𑌨𑌂𑌦𑌰𑌸𑌾𑌨𑍁𑌭𑍂𑌤𑌿𑌕𑌲𑌿𑌤𑍈𑌃 𑌪𑍂𑌤𑍈𑌃 𑌸𑍁𑌶𑍀𑌤𑍈𑌰𑍍𑌯𑍁𑌤𑍈- (𑌪𑌾𑌠𑌭𑍇𑌦𑌃 – 𑌸𑍁𑌶𑍀𑌤𑍈𑌃 𑌸𑌿𑌤𑍈𑌃)
𑌰𑍍𑌯𑍁𑌷𑍍𑌮𑌦𑍍𑌵𑌾𑌕𑍍𑌕𑌲𑌶𑍋𑌜𑍍𑌝𑌿𑌤𑍈𑌃 𑌶𑍍𑌰𑍁𑌤𑌿𑌸𑍁𑌖𑍈𑌰𑍍𑌵𑌾𑌕𑍍𑌯𑌾𑌮𑍃𑌤𑍈𑌃 𑌸𑍇𑌚𑌯 ।
𑌸𑌂𑌤𑌪𑍍𑌤𑌂 𑌭𑌵𑌤𑌾𑌪𑌦𑌾𑌵𑌦𑌹𑌨𑌜𑍍𑌵𑌾𑌲𑌾𑌭𑌿𑌰𑍇𑌨𑌂 𑌪𑍍𑌰𑌭𑍋
𑌧𑌨𑍍𑌯𑌾𑌸𑍍𑌤𑍇 𑌭𑌵𑌦𑍀𑌕𑍍𑌷𑌣𑌕𑍍𑌷𑌣𑌗𑌤𑍇𑌃 𑌪𑌾𑌤𑍍𑌰𑍀𑌕𑍃𑌤𑌾𑌃 𑌸𑍍𑌵𑍀𑌕𑍃𑌤𑌾𑌃 ॥ 3𑍯॥

𑌕𑌥𑌂 𑌤𑌰𑍇𑌯𑌂 𑌭𑌵𑌸𑌿𑌂𑌧𑍁𑌮𑍇𑌤𑌂
𑌕𑌾 𑌵𑌾 𑌗𑌤𑌿𑌰𑍍𑌮𑍇 𑌕𑌤𑌮𑍋𑌽𑌸𑍍𑌤𑍍𑌯𑍁𑌪𑌾𑌯𑌃 ।
𑌜𑌾𑌨𑍇 𑌨 𑌕𑌿𑌂𑌚𑌿𑌤𑍍𑌕𑍃𑌪𑌯𑌾𑌽𑌵 𑌮𑌾𑌂 𑌪𑍍𑌰𑌭𑍋
𑌸𑌂𑌸𑌾𑌰𑌦𑍁𑌃𑌖𑌕𑍍𑌷𑌤𑌿𑌮𑌾𑌤𑌨𑍁𑌷𑍍𑌵 ॥ 40॥

𑌤𑌥𑌾 𑌵𑌦𑌂𑌤𑌂 𑌶𑌰𑌣𑌾𑌗𑌤𑌂 𑌸𑍍𑌵𑌂
𑌸𑌂𑌸𑌾𑌰𑌦𑌾𑌵𑌾𑌨𑌲𑌤𑌾𑌪𑌤𑌪𑍍𑌤𑌮𑍍 ।
𑌨𑌿𑌰𑍀𑌕𑍍𑌷𑍍𑌯 𑌕𑌾𑌰𑍁𑌣𑍍𑌯𑌰𑌸𑌾𑌰𑍍𑌦𑍍𑌰𑌦𑍃𑌷𑍍𑌟𑍍𑌯𑌾
𑌦𑌦𑍍𑌯𑌾𑌦𑌭𑍀𑌤𑌿𑌂 𑌸𑌹𑌸𑌾 𑌮𑌹𑌾𑌤𑍍𑌮𑌾 ॥ 41॥

𑌵𑌿𑌦𑍍𑌵𑌾𑌨𑍍 𑌸 𑌤𑌸𑍍𑌮𑌾 𑌉𑌪𑌸𑌤𑍍𑌤𑌿𑌮𑍀𑌯𑍁𑌷𑍇
𑌮𑍁𑌮𑍁𑌕𑍍𑌷𑌵𑍇 𑌸𑌾𑌧𑍁 𑌯𑌥𑍋𑌕𑍍𑌤𑌕𑌾𑌰𑌿𑌣𑍇 ।
𑌪𑍍𑌰𑌶𑌾𑌂𑌤𑌚𑌿𑌤𑍍𑌤𑌾𑌯 𑌶𑌮𑌾𑌨𑍍𑌵𑌿𑌤𑌾𑌯
𑌤𑌤𑍍𑌤𑍍𑌵𑍋𑌪𑌦𑍇𑌶𑌂 𑌕𑍃𑌪𑌯𑍈𑌵 𑌕𑍁𑌰𑍍𑌯𑌾𑌤𑍍 ॥ 42॥

𑌮𑌾 𑌭𑍈𑌷𑍍𑌟 𑌵𑌿𑌦𑍍𑌵𑌂𑌸𑍍𑌤𑌵 𑌨𑌾𑌸𑍍𑌤𑍍𑌯𑌪𑌾𑌯𑌃
𑌸𑌂𑌸𑌾𑌰𑌸𑌿𑌂𑌧𑍋𑌸𑍍𑌤𑌰𑌣𑍇𑌽𑌸𑍍𑌤𑍍𑌯𑍁𑌪𑌾𑌯𑌃 ।
𑌯𑍇𑌨𑍈𑌵 𑌯𑌾𑌤𑌾 𑌯𑌤𑌯𑍋𑌽𑌸𑍍𑌯 𑌪𑌾𑌰𑌂
𑌤𑌮𑍇𑌵 𑌮𑌾𑌰𑍍𑌗𑌂 𑌤𑌵 𑌨𑌿𑌰𑍍𑌦𑌿𑌶𑌾𑌮𑌿 ॥ 43॥

𑌅𑌸𑍍𑌤𑍍𑌯𑍁𑌪𑌾𑌯𑍋 𑌮𑌹𑌾𑌨𑍍𑌕𑌶𑍍𑌚𑌿𑌤𑍍𑌸𑌂𑌸𑌾𑌰𑌭𑌯𑌨𑌾𑌶𑌨𑌃 ।
𑌤𑍇𑌨 𑌤𑍀𑌰𑍍𑌤𑍍𑌵𑌾 𑌭𑌵𑌾𑌂𑌭𑍋𑌧𑌿𑌂 𑌪𑌰𑌮𑌾𑌨𑌂𑌦𑌮𑌾𑌪𑍍𑌸𑍍𑌯𑌸𑌿 ॥ 44॥

𑌵𑍇𑌦𑌾𑌂𑌤𑌾𑌰𑍍𑌥𑌵𑌿𑌚𑌾𑌰𑍇𑌣 𑌜𑌾𑌯𑌤𑍇 𑌜𑍍𑌞𑌾𑌨𑌮𑍁𑌤𑍍𑌤𑌮𑌮𑍍 ।
𑌤𑍇𑌨𑌾𑌤𑍍𑌯𑌂𑌤𑌿𑌕𑌸𑌂𑌸𑌾𑌰𑌦𑍁𑌃𑌖𑌨𑌾𑌶𑍋 𑌭𑌵𑌤𑍍𑌯𑌨𑍁 ॥ 45॥

𑌶𑍍𑌰𑌦𑍍𑌧𑌾𑌭𑌕𑍍𑌤𑌿𑌧𑍍𑌯𑌾𑌨𑌯𑍋𑌗𑌾𑌨𑍍𑌮𑍁𑌮𑍁𑌕𑍍𑌷𑍋𑌃
𑌮𑍁𑌕𑍍𑌤𑍇𑌰𑍍𑌹𑍇𑌤𑍂𑌨𑍍𑌵𑌕𑍍𑌤𑌿 𑌸𑌾𑌕𑍍𑌷𑌾𑌚𑍍𑌛𑍍𑌰𑍁𑌤𑍇𑌰𑍍𑌗𑍀𑌃 ।
𑌯𑍋 𑌵𑌾 𑌏𑌤𑍇𑌷𑍍𑌵𑍇𑌵 𑌤𑌿𑌷𑍍𑌠𑌤𑍍𑌯𑌮𑍁𑌷𑍍𑌯
𑌮𑍋𑌕𑍍𑌷𑍋𑌽𑌵𑌿𑌦𑍍𑌯𑌾𑌕𑌲𑍍𑌪𑌿𑌤𑌾𑌦𑍍𑌦𑍇𑌹𑌬𑌂𑌧𑌾𑌤𑍍 ॥ 46॥

𑌅𑌜𑍍𑌞𑌾𑌨𑌯𑍋𑌗𑌾𑌤𑍍𑌪𑌰𑌮𑌾𑌤𑍍𑌮𑌨𑌸𑍍𑌤𑌵
𑌹𑍍𑌯𑌨𑌾𑌤𑍍𑌮𑌬𑌂𑌧𑌸𑍍𑌤𑌤 𑌏𑌵 𑌸𑌂𑌸𑍃𑌤𑌿𑌃 ।
𑌤𑌯𑍋𑌰𑍍𑌵𑌿𑌵𑍇𑌕𑍋𑌦𑌿𑌤𑌬𑍋𑌧𑌵𑌹𑍍𑌨𑌿𑌃
𑌅𑌜𑍍𑌞𑌾𑌨𑌕𑌾𑌰𑍍𑌯𑌂 𑌪𑍍𑌰𑌦𑌹𑍇𑌤𑍍𑌸𑌮𑍂𑌲𑌮𑍍 ॥ 4𑍭॥

𑌶𑌿𑌷𑍍𑌯 𑌉𑌵𑌾𑌚 ।
𑌕𑍃𑌪𑌯𑌾 𑌶𑍍𑌰𑍂𑌯𑌤𑌾𑌂 𑌸𑍍𑌵𑌾𑌮𑌿𑌨𑍍𑌪𑍍𑌰𑌶𑍍𑌨𑍋𑌽𑌯𑌂 𑌕𑍍𑌰𑌿𑌯𑌤𑍇 𑌮𑌯𑌾 ।
𑌯𑌦𑍁𑌤𑍍𑌤𑌰𑌮𑌹𑌂 𑌶𑍍𑌰𑍁𑌤𑍍𑌵𑌾 𑌕𑍃𑌤𑌾𑌰𑍍𑌥𑌃 𑌸𑍍𑌯𑌾𑌂 𑌭𑌵𑌨𑍍𑌮𑍁𑌖𑌾𑌤𑍍 ॥ 4𑍮॥

𑌕𑍋 𑌨𑌾𑌮 𑌬𑌂𑌧𑌃 𑌕𑌥𑌮𑍇𑌷 𑌆𑌗𑌤𑌃
𑌕𑌥𑌂 𑌪𑍍𑌰𑌤𑌿𑌷𑍍𑌠𑌾𑌸𑍍𑌯 𑌕𑌥𑌂 𑌵𑌿𑌮𑍋𑌕𑍍𑌷𑌃 ।
𑌕𑍋𑌽𑌸𑌾𑌵𑌨𑌾𑌤𑍍𑌮𑌾 𑌪𑌰𑌮𑌃 𑌕 𑌆𑌤𑍍𑌮𑌾
𑌤𑌯𑍋𑌰𑍍𑌵𑌿𑌵𑍇𑌕𑌃 𑌕𑌥𑌮𑍇𑌤𑌦𑍁𑌚𑍍𑌯𑌤𑌾𑌮𑍍 ॥ 4𑍯॥

𑌶𑍍𑌰𑍀𑌗𑍁𑌰𑍁𑌵𑌾𑌚 ।
𑌧𑌨𑍍𑌯𑍋𑌽𑌸𑌿 𑌕𑍃𑌤𑌕𑍃𑌤𑍍𑌯𑍋𑌽𑌸𑌿 𑌪𑌾𑌵𑌿𑌤𑌂 𑌤𑍇 𑌕𑍁𑌲𑌂 𑌤𑍍𑌵𑌯𑌾 । (𑌪𑌾𑌠𑌭𑍇𑌦𑌃 – 𑌪𑌾𑌵𑌿𑌤𑌂)
𑌯𑌦𑌵𑌿𑌦𑍍𑌯𑌾𑌬𑌂𑌧𑌮𑍁𑌕𑍍𑌤𑍍𑌯𑌾 𑌬𑍍𑌰𑌹𑍍𑌮𑍀𑌭𑌵𑌿𑌤𑍁𑌮𑌿𑌚𑍍𑌛𑌸𑌿 ॥ 50॥

𑌋𑌣𑌮𑍋𑌚𑌨𑌕𑌰𑍍𑌤𑌾𑌰𑌃 𑌪𑌿𑌤𑍁𑌃 𑌸𑌂𑌤𑌿 𑌸𑍁𑌤𑌾𑌦𑌯𑌃 ।
𑌬𑌂𑌧𑌮𑍋𑌚𑌨𑌕𑌰𑍍𑌤𑌾 𑌤𑍁 𑌸𑍍𑌵𑌸𑍍𑌮𑌾𑌦𑌨𑍍𑌯𑍋 𑌨 𑌕𑌶𑍍𑌚𑌨 ॥ 51॥

𑌮𑌸𑍍𑌤𑌕𑌨𑍍𑌯𑌸𑍍𑌤𑌭𑌾𑌰𑌾𑌦𑍇𑌰𑍍𑌦𑍁𑌃𑌖𑌮𑌨𑍍𑌯𑍈𑌰𑍍𑌨𑌿𑌵𑌾𑌰𑍍𑌯𑌤𑍇 ।
𑌕𑍍𑌷𑍁𑌧𑌾𑌦𑌿𑌕𑍃𑌤𑌦𑍁𑌃𑌖𑌂 𑌤𑍁 𑌵𑌿𑌨𑌾 𑌸𑍍𑌵𑍇𑌨 𑌨 𑌕𑍇𑌨𑌚𑌿𑌤𑍍 ॥ 52॥

𑌪𑌥𑍍𑌯𑌮𑍌𑌷𑌧𑌸𑍇𑌵𑌾 𑌚 𑌕𑍍𑌰𑌿𑌯𑌤𑍇 𑌯𑍇𑌨 𑌰𑍋𑌗𑌿𑌣𑌾 ।
𑌆𑌰𑍋𑌗𑍍𑌯𑌸𑌿𑌦𑍍𑌧𑌿𑌰𑍍𑌦𑍃𑌷𑍍𑌟𑌾𑌽𑌸𑍍𑌯 𑌨𑌾𑌨𑍍𑌯𑌾𑌨𑍁𑌷𑍍𑌠𑌿𑌤𑌕𑌰𑍍𑌮𑌣𑌾 ॥ 53॥

𑌵𑌸𑍍𑌤𑍁𑌸𑍍𑌵𑌰𑍂𑌪𑌂 𑌸𑍍𑌫𑍁𑌟𑌬𑍋𑌧𑌚𑌕𑍍𑌷𑍁𑌷𑌾
𑌸𑍍𑌵𑍇𑌨𑍈𑌵 𑌵𑍇𑌦𑍍𑌯𑌂 𑌨 𑌤𑍁 𑌪𑌂𑌡𑌿𑌤𑍇𑌨 ।
𑌚𑌂𑌦𑍍𑌰𑌸𑍍𑌵𑌰𑍂𑌪𑌂 𑌨𑌿𑌜𑌚𑌕𑍍𑌷𑍁𑌷𑍈𑌵
𑌜𑍍𑌞𑌾𑌤𑌵𑍍𑌯𑌮𑌨𑍍𑌯𑍈𑌰𑌵𑌗𑌮𑍍𑌯𑌤𑍇 𑌕𑌿𑌮𑍍 ॥ 54॥

𑌅𑌵𑌿𑌦𑍍𑌯𑌾𑌕𑌾𑌮𑌕𑌰𑍍𑌮𑌾𑌦𑌿𑌪𑌾𑌶𑌬𑌂𑌧𑌂 𑌵𑌿𑌮𑍋𑌚𑌿𑌤𑍁𑌮𑍍 ।
𑌕𑌃 𑌶𑌕𑍍𑌨𑍁𑌯𑌾𑌦𑍍𑌵𑌿𑌨𑌾𑌽𑌽𑌤𑍍𑌮𑌾𑌨𑌂 𑌕𑌲𑍍𑌪𑌕𑍋𑌟𑌿𑌶𑌤𑍈𑌰𑌪𑌿 ॥ 55॥

𑌨 𑌯𑍋𑌗𑍇𑌨 𑌨 𑌸𑌾𑌂𑌖𑍍𑌯𑍇𑌨 𑌕𑌰𑍍𑌮𑌣𑌾 𑌨𑍋 𑌨 𑌵𑌿𑌦𑍍𑌯𑌯𑌾 ।
𑌬𑍍𑌰𑌹𑍍𑌮𑌾𑌤𑍍𑌮𑍈𑌕𑌤𑍍𑌵𑌬𑍋𑌧𑍇𑌨 𑌮𑍋𑌕𑍍𑌷𑌃 𑌸𑌿𑌧𑍍𑌯𑌤𑌿 𑌨𑌾𑌨𑍍𑌯𑌥𑌾 ॥ 56॥

𑌵𑍀𑌣𑌾𑌯𑌾 𑌰𑍂𑌪𑌸𑍌𑌂𑌦𑌰𑍍𑌯𑌂 𑌤𑌂𑌤𑍍𑌰𑍀𑌵𑌾𑌦𑌨𑌸𑍌𑌷𑍍𑌠𑌵𑌮𑍍 ।
𑌪𑍍𑌰𑌜𑌾𑌰𑌂𑌜𑌨𑌮𑌾𑌤𑍍𑌰𑌂 𑌤𑌨𑍍𑌨 𑌸𑌾𑌮𑍍𑌰𑌾𑌜𑍍𑌯𑌾𑌯 𑌕𑌲𑍍𑌪𑌤𑍇 ॥ 5𑍭॥

𑌵𑌾𑌗𑍍𑌵𑍈𑌖𑌰𑍀 𑌶𑌬𑍍𑌦𑌝𑌰𑍀 𑌶𑌾𑌸𑍍𑌤𑍍𑌰𑌵𑍍𑌯𑌾𑌖𑍍𑌯𑌾𑌨𑌕𑍌𑌶𑌲𑌮𑍍 ।
𑌵𑍈𑌦𑍁𑌷𑍍𑌯𑌂 𑌵𑌿𑌦𑍁𑌷𑌾𑌂 𑌤𑌦𑍍𑌵𑌦𑍍𑌭𑍁𑌕𑍍𑌤𑌯𑍇 𑌨 𑌤𑍁 𑌮𑍁𑌕𑍍𑌤𑌯𑍇 ॥ 5𑍮॥

𑌅𑌵𑌿𑌜𑍍𑌞𑌾𑌤𑍇 𑌪𑌰𑍇 𑌤𑌤𑍍𑌤𑍍𑌵𑍇 𑌶𑌾𑌸𑍍𑌤𑍍𑌰𑌾𑌧𑍀𑌤𑌿𑌸𑍍𑌤𑍁 𑌨𑌿𑌷𑍍𑌫𑌲𑌾 ।
𑌵𑌿𑌜𑍍𑌞𑌾𑌤𑍇𑌽𑌪𑌿 𑌪𑌰𑍇 𑌤𑌤𑍍𑌤𑍍𑌵𑍇 𑌶𑌾𑌸𑍍𑌤𑍍𑌰𑌾𑌧𑍀𑌤𑌿𑌸𑍍𑌤𑍁 𑌨𑌿𑌷𑍍𑌫𑌲𑌾 ॥ 5𑍯॥

𑌶𑌬𑍍𑌦𑌜𑌾𑌲𑌂 𑌮𑌹𑌾𑌰𑌣𑍍𑌯𑌂 𑌚𑌿𑌤𑍍𑌤𑌭𑍍𑌰𑌮𑌣𑌕𑌾𑌰𑌣𑌮𑍍 ।
𑌅𑌤𑌃 𑌪𑍍𑌰𑌯𑌤𑍍𑌨𑌾𑌜𑍍𑌜𑍍𑌞𑌾𑌤𑌵𑍍𑌯𑌂 𑌤𑌤𑍍𑌤𑍍𑌵𑌜𑍍𑌞𑍈𑌸𑍍𑌤𑌤𑍍𑌤𑍍𑌵𑌮𑌾𑌤𑍍𑌮𑌨𑌃 ॥ 60॥ 𑌤𑌤𑍍𑌤𑍍𑌵𑌜𑍍𑌞𑌾𑌤𑍍𑌤𑌤𑍍𑌤𑍍𑌵
𑌅𑌜𑍍𑌞𑌾𑌨𑌸𑌰𑍍𑌪𑌦𑌷𑍍𑌟𑌸𑍍𑌯 𑌬𑍍𑌰𑌹𑍍𑌮𑌜𑍍𑌞𑌾𑌨𑍌𑌷𑌧𑌂 𑌵𑌿𑌨𑌾 ।
𑌕𑌿𑌮𑍁 𑌵𑍇𑌦𑍈𑌶𑍍𑌚 𑌶𑌾𑌸𑍍𑌤𑍍𑌰𑍈𑌶𑍍𑌚 𑌕𑌿𑌮𑍁 𑌮𑌂𑌤𑍍𑌰𑍈𑌃 𑌕𑌿𑌮𑍌𑌷𑌧𑍈𑌃 ॥ 61॥

𑌨 𑌗𑌚𑍍𑌛𑌤𑌿 𑌵𑌿𑌨𑌾 𑌪𑌾𑌨𑌂 𑌵𑍍𑌯𑌾𑌧𑌿𑌰𑍌𑌷𑌧𑌶𑌬𑍍𑌦𑌤𑌃 ।
𑌵𑌿𑌨𑌾𑌽𑌪𑌰𑍋𑌕𑍍𑌷𑌾𑌨𑍁𑌭𑌵𑌂 𑌬𑍍𑌰𑌹𑍍𑌮𑌶𑌬𑍍𑌦𑍈𑌰𑍍𑌨 𑌮𑍁𑌚𑍍𑌯𑌤𑍇 ॥ 62॥

𑌅𑌕𑍃𑌤𑍍𑌵𑌾 𑌦𑍃𑌶𑍍𑌯𑌵𑌿𑌲𑌯𑌮𑌜𑍍𑌞𑌾𑌤𑍍𑌵𑌾 𑌤𑌤𑍍𑌤𑍍𑌵𑌮𑌾𑌤𑍍𑌮𑌨𑌃 ।
𑌬𑍍𑌰𑌹𑍍𑌮𑌶𑌬𑍍𑌦𑍈𑌃 𑌕𑍁𑌤𑍋 𑌮𑍁𑌕𑍍𑌤𑌿𑌰𑍁𑌕𑍍𑌤𑌿𑌮𑌾𑌤𑍍𑌰𑌫𑌲𑍈𑌰𑍍𑌨𑍃𑌣𑌾𑌮𑍍 ॥ 63॥ (𑌪𑌾𑌠𑌭𑍇𑌦𑌃 – 𑌬𑌾𑌹𑍍𑌯𑌶𑌬𑍍𑌦𑍈𑌃)

𑌅𑌕𑍃𑌤𑍍𑌵𑌾 𑌶𑌤𑍍𑌰𑍁𑌸𑌂𑌹𑌾𑌰𑌮𑌗𑌤𑍍𑌵𑌾𑌖𑌿𑌲𑌭𑍂𑌶𑍍𑌰𑌿𑌯𑌮𑍍 ।
𑌰𑌾𑌜𑌾𑌹𑌮𑌿𑌤𑌿 𑌶𑌬𑍍𑌦𑌾𑌨𑍍𑌨𑍋 𑌰𑌾𑌜𑌾 𑌭𑌵𑌿𑌤𑍁𑌮𑌰𑍍𑌹𑌤𑌿 ॥ 64॥

𑌆𑌪𑍍𑌤𑍋𑌕𑍍𑌤𑌿𑌂 𑌖𑌨𑌨𑌂 𑌤𑌥𑍋𑌪𑌰𑌿𑌶𑌿𑌲𑌾𑌦𑍍𑌯𑍁𑌤𑍍𑌕𑌰𑍍𑌷𑌣𑌂 𑌸𑍍𑌵𑍀𑌕𑍃𑌤𑌿𑌂 (𑌪𑌾𑌠𑌭𑍇𑌦𑌃 – 𑌪𑌰𑌿𑌶𑌿𑌲𑌾𑌪𑌾𑌕𑌰𑍍𑌷𑌣𑌂)
𑌨𑌿𑌕𑍍𑌷𑍇𑌪𑌃 𑌸𑌮𑌪𑍇𑌕𑍍𑌷𑌤𑍇 𑌨 𑌹𑌿 𑌬𑌹𑌿𑌃𑌶𑌬𑍍𑌦𑍈𑌸𑍍𑌤𑍁 𑌨𑌿𑌰𑍍𑌗𑌚𑍍𑌛𑌤𑌿 ।
𑌤𑌦𑍍𑌵𑌦𑍍𑌬𑍍𑌰𑌹𑍍𑌮𑌵𑌿𑌦𑍋𑌪𑌦𑍇𑌶𑌮𑌨𑌨𑌧𑍍𑌯𑌾𑌨𑌾𑌦𑌿𑌭𑌿𑌰𑍍𑌲𑌭𑍍𑌯𑌤𑍇
𑌮𑌾𑌯𑌾𑌕𑌾𑌰𑍍𑌯𑌤𑌿𑌰𑍋𑌹𑌿𑌤𑌂 𑌸𑍍𑌵𑌮𑌮𑌲𑌂 𑌤𑌤𑍍𑌤𑍍𑌵𑌂 𑌨 𑌦𑍁𑌰𑍍𑌯𑍁𑌕𑍍𑌤𑌿𑌭𑌿𑌃 ॥ 65॥

𑌤𑌸𑍍𑌮𑌾𑌤𑍍𑌸𑌰𑍍𑌵𑌪𑍍𑌰𑌯𑌤𑍍𑌨𑍇𑌨 𑌭𑌵𑌬𑌂𑌧𑌵𑌿𑌮𑍁𑌕𑍍𑌤𑌯𑍇 ।
𑌸𑍍𑌵𑍈𑌰𑍇𑌵 𑌯𑌤𑍍𑌨𑌃 𑌕𑌰𑍍𑌤𑌵𑍍𑌯𑍋 𑌰𑍋𑌗𑌾𑌦𑌾𑌵𑌿𑌵 𑌪𑌂𑌡𑌿𑌤𑍈𑌃 ॥ 66॥ (𑌪𑌾𑌠𑌭𑍇𑌦𑌃 – 𑌰𑍋𑌗𑌾𑌦𑍇𑌰𑌿𑌵)

𑌯𑌸𑍍𑌤𑍍𑌵𑌯𑌾𑌦𑍍𑌯 𑌕𑍃𑌤𑌃 𑌪𑍍𑌰𑌶𑍍𑌨𑍋 𑌵𑌰𑍀𑌯𑌾𑌂𑌛𑌾𑌸𑍍𑌤𑍍𑌰𑌵𑌿𑌨𑍍𑌮𑌤𑌃 । (𑌪𑌾𑌠𑌭𑍇𑌦𑌃 – 𑌸𑌮𑍍𑌮𑌤𑌃)
𑌸𑍂𑌤𑍍𑌰𑌪𑍍𑌰𑌾𑌯𑍋 𑌨𑌿𑌗𑍂𑌢𑌾𑌰𑍍𑌥𑍋 𑌜𑍍𑌞𑌾𑌤𑌵𑍍𑌯𑌶𑍍𑌚 𑌮𑍁𑌮𑍁𑌕𑍍𑌷𑍁𑌭𑌿𑌃 ॥ 6𑍭॥

𑌶𑌋𑌣𑍁𑌷𑍍𑌵𑌾𑌵𑌹𑌿𑌤𑍋 𑌵𑌿𑌦𑍍𑌵𑌨𑍍𑌯𑌨𑍍𑌮𑌯𑌾 𑌸𑌮𑍁𑌦𑍀𑌰𑍍𑌯𑌤𑍇 ।
𑌤𑌦𑍇𑌤𑌚𑍍𑌛𑍍𑌰𑌵𑌣𑌾𑌤𑍍𑌸𑌦𑍍𑌯𑍋 𑌭𑌵𑌬𑌂𑌧𑌾𑌦𑍍𑌵𑌿𑌮𑍋𑌕𑍍𑌷𑍍𑌯𑌸𑍇 ॥ 6𑍮॥

𑌮𑍋𑌕𑍍𑌷𑌸𑍍𑌯 𑌹𑍇𑌤𑍁𑌃 𑌪𑍍𑌰𑌥𑌮𑍋 𑌨𑌿𑌗𑌦𑍍𑌯𑌤𑍇
𑌵𑍈𑌰𑌾𑌗𑍍𑌯𑌮𑌤𑍍𑌯𑌂𑌤𑌮𑌨𑌿𑌤𑍍𑌯𑌵𑌸𑍍𑌤𑍁𑌷𑍁 ।
𑌤𑌤𑌃 𑌶𑌮𑌶𑍍𑌚𑌾𑌪𑌿 𑌦𑌮𑌸𑍍𑌤𑌿𑌤𑌿𑌕𑍍𑌷𑌾
𑌨𑍍𑌯𑌾𑌸𑌃 𑌪𑍍𑌰𑌸𑌕𑍍𑌤𑌾𑌖𑌿𑌲𑌕𑌰𑍍𑌮𑌣𑌾𑌂 𑌭𑍃𑌶𑌮𑍍 ॥ 6𑍯॥

𑌤𑌤𑌃 𑌶𑍍𑌰𑍁𑌤𑌿𑌸𑍍𑌤𑌨𑍍𑌮𑌨𑌨𑌂 𑌸𑌤𑌤𑍍𑌤𑍍𑌵-
𑌧𑍍𑌯𑌾𑌨𑌂 𑌚𑌿𑌰𑌂 𑌨𑌿𑌤𑍍𑌯𑌨𑌿𑌰𑌂𑌤𑌰𑌂 𑌮𑍁𑌨𑍇𑌃 ।
𑌤𑌤𑍋𑌽𑌵𑌿𑌕𑌲𑍍𑌪𑌂 𑌪𑌰𑌮𑍇𑌤𑍍𑌯 𑌵𑌿𑌦𑍍𑌵𑌾𑌨𑍍
𑌇𑌹𑍈𑌵 𑌨𑌿𑌰𑍍𑌵𑌾𑌣𑌸𑍁𑌖𑌂 𑌸𑌮𑍃𑌚𑍍𑌛𑌤𑌿 ॥ 𑍭0॥

𑌯𑌦𑍍𑌬𑍋𑌦𑍍𑌧𑌵𑍍𑌯𑌂 𑌤𑌵𑍇𑌦𑌾𑌨𑍀𑌮𑌾𑌤𑍍𑌮𑌾𑌨𑌾𑌤𑍍𑌮𑌵𑌿𑌵𑍇𑌚𑌨𑌮𑍍 ।
𑌤𑌦𑍁𑌚𑍍𑌯𑌤𑍇 𑌮𑌯𑌾 𑌸𑌮𑍍𑌯𑌕𑍍 𑌶𑍍𑌰𑍁𑌤𑍍𑌵𑌾𑌤𑍍𑌮𑌨𑍍𑌯𑌵𑌧𑌾𑌰𑌯 ॥ 𑍭1॥

𑌮𑌜𑍍𑌜𑌾𑌸𑍍𑌥𑌿𑌮𑍇𑌦𑌃𑌪𑌲𑌰𑌕𑍍𑌤𑌚𑌰𑍍𑌮-
𑌤𑍍𑌵𑌗𑌾𑌹𑍍𑌵𑌯𑍈𑌰𑍍𑌧𑌾𑌤𑍁𑌭𑌿𑌰𑍇𑌭𑌿𑌰𑌨𑍍𑌵𑌿𑌤𑌮𑍍 ।
𑌪𑌾𑌦𑍋𑌰𑍁𑌵𑌕𑍍𑌷𑍋𑌭𑍁𑌜𑌪𑍃𑌷𑍍𑌠𑌮𑌸𑍍𑌤𑌕𑍈𑌃
𑌅𑌂𑌗𑍈𑌰𑍁𑌪𑌾𑌂𑌗𑍈𑌰𑍁𑌪𑌯𑍁𑌕𑍍𑌤𑌮𑍇𑌤𑌤𑍍 ॥ 𑍭2॥

𑌅𑌹𑌮𑍍𑌮𑌮𑍇𑌤𑌿 𑌪𑍍𑌰𑌥𑌿𑌤𑌂 𑌶𑌰𑍀𑌰𑌂
𑌮𑍋𑌹𑌾𑌸𑍍𑌪𑌦𑌂 𑌸𑍍𑌥𑍂𑌲𑌮𑌿𑌤𑍀𑌰𑍍𑌯𑌤𑍇 𑌬𑍁𑌧𑍈𑌃 ।
𑌨𑌭𑍋𑌨𑌭𑌸𑍍𑌵𑌦𑍍𑌦𑌹𑌨𑌾𑌂𑌬𑍁𑌭𑍂𑌮𑌯𑌃
𑌸𑍂𑌕𑍍𑌷𑍍𑌮𑌾𑌣𑌿 𑌭𑍂𑌤𑌾𑌨𑌿 𑌭𑌵𑌂𑌤𑌿 𑌤𑌾𑌨𑌿 ॥ 𑍭3॥

𑌪𑌰𑌸𑍍𑌪𑌰𑌾𑌂𑌶𑍈𑌰𑍍𑌮𑌿𑌲𑌿𑌤𑌾𑌨𑌿 𑌭𑍂𑌤𑍍𑌵𑌾
𑌸𑍍𑌥𑍂𑌲𑌾𑌨𑌿 𑌚 𑌸𑍍𑌥𑍂𑌲𑌶𑌰𑍀𑌰𑌹𑍇𑌤𑌵𑌃 ।
𑌮𑌾𑌤𑍍𑌰𑌾𑌸𑍍𑌤𑌦𑍀𑌯𑌾 𑌵𑌿𑌷𑌯𑌾 𑌭𑌵𑌂𑌤𑌿
𑌶𑌬𑍍𑌦𑌾𑌦𑌯𑌃 𑌪𑌂𑌚 𑌸𑍁𑌖𑌾𑌯 𑌭𑍋𑌕𑍍𑌤𑍁𑌃 ॥ 𑍭4॥

𑌯 𑌏𑌷𑍁 𑌮𑍂𑌢𑌾 𑌵𑌿𑌷𑌯𑍇𑌷𑍁 𑌬𑌦𑍍𑌧𑌾
𑌰𑌾𑌗𑍋𑌰𑍁𑌪𑌾𑌶𑍇𑌨 𑌸𑍁𑌦𑍁𑌰𑍍𑌦𑌮𑍇𑌨 ।
𑌆𑌯𑌾𑌂𑌤𑌿 𑌨𑌿𑌰𑍍𑌯𑌾𑌂𑌤𑍍𑌯𑌧 𑌊𑌰𑍍𑌧𑍍𑌵𑌮𑍁𑌚𑍍𑌚𑍈𑌃
𑌸𑍍𑌵𑌕𑌰𑍍𑌮𑌦𑍂𑌤𑍇𑌨 𑌜𑌵𑍇𑌨 𑌨𑍀𑌤𑌾𑌃 ॥ 𑍭5॥

𑌶𑌬𑍍𑌦𑌾𑌦𑌿𑌭𑌿𑌃 𑌪𑌂𑌚𑌭𑌿𑌰𑍇𑌵 𑌪𑌂𑌚
𑌪𑌂𑌚𑌤𑍍𑌵𑌮𑌾𑌪𑍁𑌃 𑌸𑍍𑌵𑌗𑍁𑌣𑍇𑌨 𑌬𑌦𑍍𑌧𑌾𑌃 ।
𑌕𑍁𑌰𑌂𑌗𑌮𑌾𑌤𑌂𑌗𑌪𑌤𑌂𑌗𑌮𑍀𑌨-
𑌭𑍃𑌂𑌗𑌾 𑌨𑌰𑌃 𑌪𑌂𑌚𑌭𑌿𑌰𑌂𑌚𑌿𑌤𑌃 𑌕𑌿𑌮𑍍 ॥ 𑍭6॥

𑌦𑍋𑌷𑍇𑌣 𑌤𑍀𑌵𑍍𑌰𑍋 𑌵𑌿𑌷𑌯𑌃 𑌕𑍃𑌷𑍍𑌣𑌸𑌰𑍍𑌪𑌵𑌿𑌷𑌾𑌦𑌪𑌿 ।
𑌵𑌿𑌷𑌂 𑌨𑌿𑌹𑌂𑌤𑌿 𑌭𑍋𑌕𑍍𑌤𑌾𑌰𑌂 𑌦𑍍𑌰𑌷𑍍𑌟𑌾𑌰𑌂 𑌚𑌕𑍍𑌷𑍁𑌷𑌾𑌪𑍍𑌯𑌯𑌮𑍍 ॥ 𑍭𑍭॥

𑌵𑌿𑌷𑌯𑌾𑌶𑌾𑌮𑌹𑌾𑌪𑌾𑌶𑌾𑌦𑍍𑌯𑍋 𑌵𑌿𑌮𑍁𑌕𑍍𑌤𑌃 𑌸𑍁𑌦𑍁𑌸𑍍𑌤𑍍𑌯𑌜𑌾𑌤𑍍 ।
𑌸 𑌏𑌵 𑌕𑌲𑍍𑌪𑌤𑍇 𑌮𑍁𑌕𑍍𑌤𑍍𑌯𑍈 𑌨𑌾𑌨𑍍𑌯𑌃 𑌷𑌟𑍍𑌶𑌾𑌸𑍍𑌤𑍍𑌰𑌵𑍇𑌦𑍍𑌯𑌪𑌿 ॥ 𑍭𑍮॥

𑌆𑌪𑌾𑌤𑌵𑍈𑌰𑌾𑌗𑍍𑌯𑌵𑌤𑍋 𑌮𑍁𑌮𑍁𑌕𑍍𑌷𑍂𑌨𑍍
𑌭𑌵𑌾𑌬𑍍𑌧𑌿𑌪𑌾𑌰𑌂 𑌪𑍍𑌰𑌤𑌿𑌯𑌾𑌤𑍁𑌮𑍁𑌦𑍍𑌯𑌤𑌾𑌨𑍍 ।
𑌆𑌶𑌾𑌗𑍍𑌰𑌹𑍋 𑌮𑌜𑍍𑌜𑌯𑌤𑍇𑌽𑌂𑌤𑌰𑌾𑌲𑍇
𑌨𑌿𑌗𑍃𑌹𑍍𑌯 𑌕𑌂𑌠𑍇 𑌵𑌿𑌨𑌿𑌵𑌰𑍍𑌤𑍍𑌯 𑌵𑍇𑌗𑌾𑌤𑍍 ॥ 𑍭𑍯॥

𑌵𑌿𑌷𑌯𑌾𑌖𑍍𑌯𑌗𑍍𑌰𑌹𑍋 𑌯𑍇𑌨 𑌸𑍁𑌵𑌿𑌰𑌕𑍍𑌤𑍍𑌯𑌸𑌿𑌨𑌾 𑌹𑌤𑌃 ।
𑌸 𑌗𑌚𑍍𑌛𑌤𑌿 𑌭𑌵𑌾𑌂𑌭𑍋𑌧𑍇𑌃 𑌪𑌾𑌰𑌂 𑌪𑍍𑌰𑌤𑍍𑌯𑍂𑌹𑌵𑌰𑍍𑌜𑌿𑌤𑌃 ॥ 𑍮0॥

𑌵𑌿𑌷𑌮𑌵𑌿𑌷𑌯𑌮𑌾𑌰𑍍𑌗𑍈𑌰𑍍𑌗𑌚𑍍𑌛𑌤𑍋𑌽𑌨𑌚𑍍𑌛𑌬𑍁𑌦𑍍𑌧𑍇𑌃 (𑌪𑌾𑌠𑌭𑍇𑌦𑌃 – 𑌵𑌿𑌷𑌯𑌮𑌾𑌰𑍍𑌗𑍇 𑌗𑌚𑍍𑌛𑌤𑍋)
𑌪𑍍𑌰𑌤𑌿𑌪𑌦𑌮𑌭𑌿𑌯𑌾𑌤𑍋 𑌮𑍃𑌤𑍍𑌯𑍁𑌰𑌪𑍍𑌯𑍇𑌷 𑌵𑌿𑌦𑍍𑌧𑌿 । (𑌪𑌾𑌠𑌭𑍇𑌦𑌃 – 𑌪𑍍𑌰𑌤𑌿𑌪𑌦𑌮𑌭𑌿𑌘𑌾𑌤𑍋 𑌮𑍃𑌤𑍍𑌯𑍁𑌰𑌪𑍍𑌯𑍇𑌷 𑌸𑌿𑌦𑍍𑌧𑌃)
𑌹𑌿𑌤𑌸𑍁𑌜𑌨𑌗𑍁𑌰𑍂𑌕𑍍𑌤𑍍𑌯𑌾 𑌗𑌚𑍍𑌛𑌤𑌃 𑌸𑍍𑌵𑌸𑍍𑌯 𑌯𑍁𑌕𑍍𑌤𑍍𑌯𑌾
𑌪𑍍𑌰𑌭𑌵𑌤𑌿 𑌫𑌲𑌸𑌿𑌦𑍍𑌧𑌿𑌃 𑌸𑌤𑍍𑌯𑌮𑌿𑌤𑍍𑌯𑍇𑌵 𑌵𑌿𑌦𑍍𑌧𑌿 ॥ 𑍮1॥

𑌮𑍋𑌕𑍍𑌷𑌸𑍍𑌯 𑌕𑌾𑌂𑌕𑍍𑌷𑌾 𑌯𑌦𑌿 𑌵𑍈 𑌤𑌵𑌾𑌸𑍍𑌤𑌿
𑌤𑍍𑌯𑌜𑌾𑌤𑌿𑌦𑍂𑌰𑌾𑌦𑍍𑌵𑌿𑌷𑌯𑌾𑌨𑍍𑌵𑌿𑌷𑌂 𑌯𑌥𑌾 ।
𑌪𑍀𑌯𑍂𑌷𑌵𑌤𑍍𑌤𑍋𑌷𑌦𑌯𑌾𑌕𑍍𑌷𑌮𑌾𑌰𑍍𑌜𑌵-
𑌪𑍍𑌰𑌶𑌾𑌂𑌤𑌿𑌦𑌾𑌂𑌤𑍀𑌰𑍍𑌭𑌜 𑌨𑌿𑌤𑍍𑌯𑌮𑌾𑌦𑌰𑌾𑌤𑍍 ॥ 𑍮2॥

𑌅𑌨𑍁𑌕𑍍𑌷𑌣𑌂 𑌯𑌤𑍍𑌪𑌰𑌿𑌹𑍃𑌤𑍍𑌯 𑌕𑍃𑌤𑍍𑌯𑌂
𑌅𑌨𑌾𑌦𑍍𑌯𑌵𑌿𑌦𑍍𑌯𑌾𑌕𑍃𑌤𑌬𑌂𑌧𑌮𑍋𑌕𑍍𑌷𑌣𑌮𑍍 ।
𑌦𑍇𑌹𑌃 𑌪𑌰𑌾𑌰𑍍𑌥𑍋𑌽𑌯𑌮𑌮𑍁𑌷𑍍𑌯 𑌪𑍋𑌷𑌣𑍇
𑌯𑌃 𑌸𑌜𑍍𑌜𑌤𑍇 𑌸 𑌸𑍍𑌵𑌮𑌨𑍇𑌨 𑌹𑌂𑌤𑌿 ॥ 𑍮3॥

𑌶𑌰𑍀𑌰𑌪𑍋𑌷𑌣𑌾𑌰𑍍𑌥𑍀 𑌸𑌨𑍍 𑌯 𑌆𑌤𑍍𑌮𑌾𑌨𑌂 𑌦𑌿𑌦𑍃𑌕𑍍𑌷𑌤𑌿 । (𑌪𑌾𑌠𑌭𑍇𑌦𑌃 – 𑌦𑌿𑌦𑍃𑌕𑍍𑌷𑌤𑍇)
𑌗𑍍𑌰𑌾𑌹𑌂 𑌦𑌾𑌰𑍁𑌧𑌿𑌯𑌾 𑌧𑍃𑌤𑍍𑌵𑌾 𑌨𑌦𑍀𑌂 𑌤𑌰𑍍𑌤𑍁𑌂 𑌸 𑌗𑌚𑍍𑌛𑌤𑌿 ॥ 𑍮4॥ (𑌪𑌾𑌠𑌭𑍇𑌦𑌃 – 𑌸 𑌇𑌚𑍍𑌛𑌤𑌿)

𑌮𑍋𑌹 𑌏𑌵 𑌮𑌹𑌾𑌮𑍃𑌤𑍍𑌯𑍁𑌰𑍍𑌮𑍁𑌮𑍁𑌕𑍍𑌷𑍋𑌰𑍍𑌵𑌪𑍁𑌰𑌾𑌦𑌿𑌷𑍁 ।
𑌮𑍋𑌹𑍋 𑌵𑌿𑌨𑌿𑌰𑍍𑌜𑌿𑌤𑍋 𑌯𑍇𑌨 𑌸 𑌮𑍁𑌕𑍍𑌤𑌿𑌪𑌦𑌮𑌰𑍍𑌹𑌤𑌿 ॥ 𑍮5॥

𑌮𑍋𑌹𑌂 𑌜𑌹𑌿 𑌮𑌹𑌾𑌮𑍃𑌤𑍍𑌯𑍁𑌂 𑌦𑍇𑌹𑌦𑌾𑌰𑌸𑍁𑌤𑌾𑌦𑌿𑌷𑍁 ।
𑌯𑌂 𑌜𑌿𑌤𑍍𑌵𑌾 𑌮𑍁𑌨𑌯𑍋 𑌯𑌾𑌂𑌤𑌿 𑌤𑌦𑍍𑌵𑌿𑌷𑍍𑌣𑍋𑌃 𑌪𑌰𑌮𑌂 𑌪𑌦𑌮𑍍 ॥ 𑍮6॥

𑌤𑍍𑌵𑌙𑍍𑌮𑌾𑌂𑌸𑌰𑍁𑌧𑌿𑌰𑌸𑍍𑌨𑌾𑌯𑍁𑌮𑍇𑌦𑍋𑌮𑌜𑍍𑌜𑌾𑌸𑍍𑌥𑌿𑌸𑌂𑌕𑍁𑌲𑌮𑍍 ।
𑌪𑍂𑌰𑍍𑌣𑌂 𑌮𑍂𑌤𑍍𑌰𑌪𑍁𑌰𑍀𑌷𑌾𑌭𑍍𑌯𑌾𑌂 𑌸𑍍𑌥𑍂𑌲𑌂 𑌨𑌿𑌂𑌦𑍍𑌯𑌮𑌿𑌦𑌂 𑌵𑌪𑍁𑌃 ॥ 𑍮𑍭॥

𑌪𑌂𑌚𑍀𑌕𑍃𑌤𑍇𑌭𑍍𑌯𑍋 𑌭𑍂𑌤𑍇𑌭𑍍𑌯𑌃 𑌸𑍍𑌥𑍂𑌲𑍇𑌭𑍍𑌯𑌃 𑌪𑍂𑌰𑍍𑌵𑌕𑌰𑍍𑌮𑌣𑌾 ।
𑌸𑌮𑍁𑌤𑍍𑌪𑌨𑍍𑌨𑌮𑌿𑌦𑌂 𑌸𑍍𑌥𑍂𑌲𑌂 𑌭𑍋𑌗𑌾𑌯𑌤𑌨𑌮𑌾𑌤𑍍𑌮𑌨𑌃 ।
𑌅𑌵𑌸𑍍𑌥𑌾 𑌜𑌾𑌗𑌰𑌸𑍍𑌤𑌸𑍍𑌯 𑌸𑍍𑌥𑍂𑌲𑌾𑌰𑍍𑌥𑌾𑌨𑍁𑌭𑌵𑍋 𑌯𑌤𑌃 ॥ 𑍮𑍮॥

𑌬𑌾𑌹𑍍𑌯𑍇𑌂𑌦𑍍𑌰𑌿𑌯𑍈𑌃 𑌸𑍍𑌥𑍂𑌲𑌪𑌦𑌾𑌰𑍍𑌥𑌸𑍇𑌵𑌾𑌂
𑌸𑍍𑌰𑌕𑍍𑌚𑌂𑌦𑌨𑌸𑍍𑌤𑍍𑌰𑍍𑌯𑌾𑌦𑌿𑌵𑌿𑌚𑌿𑌤𑍍𑌰𑌰𑍂𑌪𑌾𑌮𑍍 ।
𑌕𑌰𑍋𑌤𑌿 𑌜𑍀𑌵𑌃 𑌸𑍍𑌵𑌯𑌮𑍇𑌤𑌦𑌾𑌤𑍍𑌮𑌨𑌾
𑌤𑌸𑍍𑌮𑌾𑌤𑍍𑌪𑍍𑌰𑌶𑌸𑍍𑌤𑌿𑌰𑍍𑌵𑌪𑍁𑌷𑍋𑌽𑌸𑍍𑌯 𑌜𑌾𑌗𑌰𑍇 ॥ 𑍮𑍯॥

𑌸𑌰𑍍𑌵𑍋𑌽𑌪𑌿 𑌬𑌾𑌹𑍍𑌯𑌸𑌂𑌸𑌾𑌰𑌃 𑌪𑍁𑌰𑍁𑌷𑌸𑍍𑌯 𑌯𑌦𑌾𑌶𑍍𑌰𑌯𑌃 ।
𑌵𑌿𑌦𑍍𑌧𑌿 𑌦𑍇𑌹𑌮𑌿𑌦𑌂 𑌸𑍍𑌥𑍂𑌲𑌂 𑌗𑍃𑌹𑌵𑌦𑍍𑌗𑍃𑌹𑌮𑍇𑌧𑌿𑌨𑌃 ॥ 𑍯0॥

𑌸𑍍𑌥𑍂𑌲𑌸𑍍𑌯 𑌸𑌂𑌭𑌵𑌜𑌰𑌾𑌮𑌰𑌣𑌾𑌨𑌿 𑌧𑌰𑍍𑌮𑌾𑌃
𑌸𑍍𑌥𑍌𑌲𑍍𑌯𑌾𑌦𑌯𑍋 𑌬𑌹𑍁𑌵𑌿𑌧𑌾𑌃 𑌶𑌿𑌶𑍁𑌤𑌾𑌦𑍍𑌯𑌵𑌸𑍍𑌥𑌾𑌃 ।
𑌵𑌰𑍍𑌣𑌾𑌶𑍍𑌰𑌮𑌾𑌦𑌿𑌨𑌿𑌯𑌮𑌾 𑌬𑌹𑍁𑌧𑌾𑌽𑌽𑌮𑌯𑌾𑌃 𑌸𑍍𑌯𑍁𑌃
𑌪𑍂𑌜𑌾𑌵𑌮𑌾𑌨𑌬𑌹𑍁𑌮𑌾𑌨𑌮𑍁𑌖𑌾 𑌵𑌿𑌶𑍇𑌷𑌾𑌃 ॥ 𑍯1॥

𑌬𑍁𑌦𑍍𑌧𑍀𑌂𑌦𑍍𑌰𑌿𑌯𑌾𑌣𑌿 𑌶𑍍𑌰𑌵𑌣𑌂 𑌤𑍍𑌵𑌗𑌕𑍍𑌷𑌿
𑌘𑍍𑌰𑌾𑌣𑌂 𑌚 𑌜𑌿𑌹𑍍𑌵𑌾 𑌵𑌿𑌷𑌯𑌾𑌵𑌬𑍋𑌧𑌨𑌾𑌤𑍍 ।
𑌵𑌾𑌕𑍍𑌪𑌾𑌣𑌿𑌪𑌾𑌦𑌾 𑌗𑍁𑌦𑌮𑌪𑍍𑌯𑍁𑌪𑌸𑍍𑌥𑌃 (𑌪𑌾𑌠𑌭𑍇𑌦𑌃 – 𑌉𑌪𑌸𑍍𑌥𑌂)
𑌕𑌰𑍍𑌮𑍇𑌂𑌦𑍍𑌰𑌿𑌯𑌾𑌣𑌿 𑌪𑍍𑌰𑌵𑌣𑍇𑌨 𑌕𑌰𑍍𑌮𑌸𑍁 ॥ 𑍯2॥ (𑌪𑌾𑌠𑌭𑍇𑌦𑌃 – 𑌪𑍍𑌰𑌵𑌣𑌾𑌨𑌿)

𑌨𑌿𑌗𑌦𑍍𑌯𑌤𑍇𑌽𑌂𑌤𑌃𑌕𑌰𑌣𑌂 𑌮𑌨𑍋𑌧𑍀𑌃
𑌅𑌹𑌂𑌕𑍃𑌤𑌿𑌶𑍍𑌚𑌿𑌤𑍍𑌤𑌮𑌿𑌤𑌿 𑌸𑍍𑌵𑌵𑍃𑌤𑍍𑌤𑌿𑌭𑌿𑌃 ।
𑌮𑌨𑌸𑍍𑌤𑍁 𑌸𑌂𑌕𑌲𑍍𑌪𑌵𑌿𑌕𑌲𑍍𑌪𑌨𑌾𑌦𑌿𑌭𑌿𑌃
𑌬𑍁𑌦𑍍𑌧𑌿𑌃 𑌪𑌦𑌾𑌰𑍍𑌥𑌾𑌧𑍍𑌯𑌵𑌸𑌾𑌯𑌧𑌰𑍍𑌮𑌤𑌃 ॥ 𑍯3॥

𑌅𑌤𑍍𑌰𑌾𑌭𑌿𑌮𑌾𑌨𑌾𑌦𑌹𑌮𑌿𑌤𑍍𑌯𑌹𑌂𑌕𑍃𑌤𑌿𑌃 ।
𑌸𑍍𑌵𑌾𑌰𑍍𑌥𑌾𑌨𑍁𑌸𑌂𑌧𑌾𑌨𑌗𑍁𑌣𑍇𑌨 𑌚𑌿𑌤𑍍𑌤𑌮𑍍 ॥ 𑍯4॥

𑌪𑍍𑌰𑌾𑌣𑌾𑌪𑌾𑌨𑌵𑍍𑌯𑌾𑌨𑍋𑌦𑌾𑌨𑌸𑌮𑌾𑌨𑌾 𑌭𑌵𑌤𑍍𑌯𑌸𑍌 𑌪𑍍𑌰𑌾𑌣𑌃 ।
𑌸𑍍𑌵𑌯𑌮𑍇𑌵 𑌵𑍃𑌤𑍍𑌤𑌿𑌭𑍇𑌦𑌾𑌦𑍍𑌵𑌿𑌕𑍃𑌤𑌿𑌭𑍇𑌦𑌾𑌤𑍍𑌸𑍁𑌵𑌰𑍍𑌣𑌸𑌲𑌿𑌲𑌾𑌦𑌿𑌵𑌤𑍍 ॥ 𑍯5॥ (𑌪𑌾𑌠𑌭𑍇𑌦𑌃 – 𑌵𑌿𑌕𑍃𑌤𑍇𑌰𑍍𑌭𑍇𑌦𑌾𑌤𑍍𑌸𑍁𑌵𑌰𑍍𑌣𑌸𑌲𑌿𑌲𑌮𑌿𑌵)

𑌵𑌾𑌗𑌾𑌦𑌿 𑌪𑌂𑌚 𑌶𑍍𑌰𑌵𑌣𑌾𑌦𑌿 𑌪𑌂𑌚
𑌪𑍍𑌰𑌾𑌣𑌾𑌦𑌿 𑌪𑌂𑌚𑌾𑌭𑍍𑌰𑌮𑍁𑌖𑌾𑌨𑌿 𑌪𑌂𑌚 ।
𑌬𑍁𑌦𑍍𑌧𑍍𑌯𑌾𑌦𑍍𑌯𑌵𑌿𑌦𑍍𑌯𑌾𑌪𑌿 𑌚 𑌕𑌾𑌮𑌕𑌰𑍍𑌮𑌣𑍀
𑌪𑍁𑌰𑍍𑌯𑌷𑍍𑌟𑌕𑌂 𑌸𑍂𑌕𑍍𑌷𑍍𑌮𑌶𑌰𑍀𑌰𑌮𑌾𑌹𑍁𑌃 ॥ 𑍯6॥

𑌇𑌦𑌂 𑌶𑌰𑍀𑌰𑌂 𑌶‍𑌋𑌣𑍁 𑌸𑍂𑌕𑍍𑌷𑍍𑌮𑌸𑌂𑌜𑍍𑌞𑌿𑌤𑌂
𑌲𑌿𑌂𑌗𑌂 𑌤𑍍𑌵𑌪𑌂𑌚𑍀𑌕𑍃𑌤𑌭𑍂𑌤𑌸𑌂𑌭𑌵𑌮𑍍 ।
𑌸𑌵𑌾𑌸𑌨𑌂 𑌕𑌰𑍍𑌮𑌫𑌲𑌾𑌨𑍁𑌭𑌾𑌵𑌕𑌂
𑌸𑍍𑌵𑌾𑌜𑍍𑌞𑌾𑌨𑌤𑍋𑌽𑌨𑌾𑌦𑌿𑌰𑍁𑌪𑌾𑌧𑌿𑌰𑌾𑌤𑍍𑌮𑌨𑌃 ॥ 𑍯𑍭॥

𑌸𑍍𑌵𑌪𑍍𑌨𑍋 𑌭𑌵𑌤𑍍𑌯𑌸𑍍𑌯 𑌵𑌿𑌭𑌕𑍍𑌤𑍍𑌯𑌵𑌸𑍍𑌥𑌾
𑌸𑍍𑌵𑌮𑌾𑌤𑍍𑌰𑌶𑍇𑌷𑍇𑌣 𑌵𑌿𑌭𑌾𑌤𑌿 𑌯𑌤𑍍𑌰 ।
𑌸𑍍𑌵𑌪𑍍𑌨𑍇 𑌤𑍁 𑌬𑍁𑌦𑍍𑌧𑌿𑌃 𑌸𑍍𑌵𑌯𑌮𑍇𑌵 𑌜𑌾𑌗𑍍𑌰𑌤𑍍
𑌕𑌾𑌲𑍀𑌨𑌨𑌾𑌨𑌾𑌵𑌿𑌧𑌵𑌾𑌸𑌨𑌾𑌭𑌿𑌃 ॥ 𑍯𑍮॥

𑌕𑌰𑍍𑌤𑍍𑌰𑌾𑌦𑌿𑌭𑌾𑌵𑌂 𑌪𑍍𑌰𑌤𑌿𑌪𑌦𑍍𑌯 𑌰𑌾𑌜𑌤𑍇
𑌯𑌤𑍍𑌰 𑌸𑍍𑌵𑌯𑌂 𑌭𑌾𑌤𑌿 𑌹𑍍𑌯𑌯𑌂 𑌪𑌰𑌾𑌤𑍍𑌮𑌾 । (𑌪𑌾𑌠𑌭𑍇𑌦𑌃 – 𑌸𑍍𑌵𑌯𑌂𑌜𑍍𑌯𑍋𑌤𑌿𑌰𑌯𑌂)
𑌧𑍀𑌮𑌾𑌤𑍍𑌰𑌕𑍋𑌪𑌾𑌧𑌿𑌰𑌶𑍇𑌷𑌸𑌾𑌕𑍍𑌷𑍀
𑌨 𑌲𑌿𑌪𑍍𑌯𑌤𑍇 𑌤𑌤𑍍𑌕𑍃𑌤𑌕𑌰𑍍𑌮𑌲𑍇𑌶𑍈𑌃 । 𑌕𑌰𑍍𑌮𑌲𑍇𑌪𑍈𑌃
𑌯𑌸𑍍𑌮𑌾𑌦𑌸𑌂𑌗𑌸𑍍𑌤𑌤 𑌏𑌵 𑌕𑌰𑍍𑌮𑌭𑌿𑌃
𑌨 𑌲𑌿𑌪𑍍𑌯𑌤𑍇 𑌕𑌿𑌂𑌚𑌿𑌦𑍁𑌪𑌾𑌧𑌿𑌨𑌾 𑌕𑍃𑌤𑍈𑌃 ॥ 𑍯𑍯॥

𑌸𑌰𑍍𑌵𑌵𑍍𑌯𑌾𑌪𑍃𑌤𑌿𑌕𑌰𑌣𑌂 𑌲𑌿𑌂𑌗𑌮𑌿𑌦𑌂 𑌸𑍍𑌯𑌾𑌚𑍍𑌚𑌿𑌦𑌾𑌤𑍍𑌮𑌨𑌃 𑌪𑍁𑌂𑌸𑌃 ।
𑌵𑌾𑌸𑍍𑌯𑌾𑌦𑌿𑌕𑌮𑌿𑌵 𑌤𑌕𑍍𑌷𑍍𑌣𑌸𑍍𑌤𑍇𑌨𑍈𑌵𑌾𑌤𑍍𑌮𑌾 𑌭𑌵𑌤𑍍𑌯𑌸𑌂𑌗𑍋𑌽𑌯𑌮𑍍 ॥ 100॥

𑌅𑌂𑌧𑌤𑍍𑌵𑌮𑌂𑌦𑌤𑍍𑌵𑌪𑌟𑍁𑌤𑍍𑌵𑌧𑌰𑍍𑌮𑌾𑌃
𑌸𑍌𑌗𑍁𑌣𑍍𑌯𑌵𑍈𑌗𑍁𑌣𑍍𑌯𑌵𑌶𑌾𑌦𑍍𑌧𑌿 𑌚𑌕𑍍𑌷𑍁𑌷𑌃 ।
𑌬𑌾𑌧𑌿𑌰𑍍𑌯𑌮𑍂𑌕𑌤𑍍𑌵𑌮𑍁𑌖𑌾𑌸𑍍𑌤𑌥𑍈𑌵
𑌶𑍍𑌰𑍋𑌤𑍍𑌰𑌾𑌦𑌿𑌧𑌰𑍍𑌮𑌾 𑌨 𑌤𑍁 𑌵𑍇𑌤𑍍𑌤𑍁𑌰𑌾𑌤𑍍𑌮𑌨𑌃 ॥ 101॥

𑌉𑌚𑍍𑌛𑍍𑌵𑌾𑌸𑌨𑌿𑌃𑌶𑍍𑌵𑌾𑌸𑌵𑌿𑌜𑍃𑌂𑌭𑌣𑌕𑍍𑌷𑍁-
𑌤𑍍𑌪𑍍𑌰𑌸𑍍𑌯𑌂𑌦𑌨𑌾𑌦𑍍𑌯𑍁𑌤𑍍𑌕𑍍𑌰𑌮𑌣𑌾𑌦𑌿𑌕𑌾𑌃 𑌕𑍍𑌰𑌿𑌯𑌾𑌃 । (𑌪𑌾𑌠𑌭𑍇𑌦𑌃 – 𑌪𑍍𑌰𑌸𑍍𑌪𑌂𑌦𑌨𑌾𑌦𑍍𑌯𑍍)
𑌪𑍍𑌰𑌾𑌣𑌾𑌦𑌿𑌕𑌰𑍍𑌮𑌾𑌣𑌿 𑌵𑌦𑌂𑌤𑌿 𑌤𑌜𑍍𑌞𑌾𑌃 (𑌪𑌾𑌠𑌭𑍇𑌦𑌃 – 𑌤𑌜𑍍𑌜𑍍𑌞𑌾𑌃)
𑌪𑍍𑌰𑌾𑌣𑌸𑍍𑌯 𑌧𑌰𑍍𑌮𑌾𑌵𑌶𑌨𑌾𑌪𑌿𑌪𑌾𑌸𑍇 ॥ 102॥

𑌅𑌂𑌤𑌃𑌕𑌰𑌣𑌮𑍇𑌤𑍇𑌷𑍁 𑌚𑌕𑍍𑌷𑍁𑌰𑌾𑌦𑌿𑌷𑍁 𑌵𑌰𑍍𑌷𑍍𑌮𑌣𑌿 ।
𑌅𑌹𑌮𑌿𑌤𑍍𑌯𑌭𑌿𑌮𑌾𑌨𑍇𑌨 𑌤𑌿𑌷𑍍𑌠𑌤𑍍𑌯𑌾𑌭𑌾𑌸𑌤𑍇𑌜𑌸𑌾 ॥ 103॥

𑌅𑌹𑌂𑌕𑌾𑌰𑌃 𑌸 𑌵𑌿𑌜𑍍𑌞𑍇𑌯𑌃 𑌕𑌰𑍍𑌤𑌾 𑌭𑍋𑌕𑍍𑌤𑌾𑌭𑌿𑌮𑌾𑌨𑍍𑌯𑌯𑌮𑍍 ।
𑌸𑌤𑍍𑌤𑍍𑌵𑌾𑌦𑌿𑌗𑍁𑌣𑌯𑍋𑌗𑍇𑌨 𑌚𑌾𑌵𑌸𑍍𑌥𑌾𑌤𑍍𑌰𑌯𑌮𑌶𑍍𑌨𑍁𑌤𑍇 ॥ 104॥ (𑌪𑌾𑌠𑌭𑍇𑌦𑌃 – 𑌯𑍋𑌗𑍇𑌨𑌾𑌵𑌸𑍍𑌥𑌾𑌤𑍍𑌰𑌿𑌤𑌯𑌮𑍍𑌶𑍍𑌨𑍁𑌤𑍇)

𑌵𑌿𑌷𑌯𑌾𑌣𑌾𑌮𑌾𑌨𑍁𑌕𑍂𑌲𑍍𑌯𑍇 𑌸𑍁𑌖𑍀 𑌦𑍁𑌃𑌖𑍀 𑌵𑌿𑌪𑌰𑍍𑌯𑌯𑍇 ।
𑌸𑍁𑌖𑌂 𑌦𑍁𑌃𑌖𑌂 𑌚 𑌤𑌦𑍍𑌧𑌰𑍍𑌮𑌃 𑌸𑌦𑌾𑌨𑌂𑌦𑌸𑍍𑌯 𑌨𑌾𑌤𑍍𑌮𑌨𑌃 ॥ 105॥

𑌆𑌤𑍍𑌮𑌾𑌰𑍍𑌥𑌤𑍍𑌵𑍇𑌨 𑌹𑌿 𑌪𑍍𑌰𑍇𑌯𑌾𑌨𑍍𑌵𑌿𑌷𑌯𑍋 𑌨 𑌸𑍍𑌵𑌤𑌃 𑌪𑍍𑌰𑌿𑌯𑌃 ।
𑌸𑍍𑌵𑌤 𑌏𑌵 𑌹𑌿 𑌸𑌰𑍍𑌵𑍇𑌷𑌾𑌮𑌾𑌤𑍍𑌮𑌾 𑌪𑍍𑌰𑌿𑌯𑌤𑌮𑍋 𑌯𑌤𑌃 ।
𑌤𑌤 𑌆𑌤𑍍𑌮𑌾 𑌸𑌦𑌾𑌨𑌂𑌦𑍋 𑌨𑌾𑌸𑍍𑌯 𑌦𑍁𑌃𑌖𑌂 𑌕𑌦𑌾𑌚𑌨 ॥ 106॥

𑌯𑌤𑍍𑌸𑍁𑌷𑍁𑌪𑍍𑌤𑍌 𑌨𑌿𑌰𑍍𑌵𑌿𑌷𑌯 𑌆𑌤𑍍𑌮𑌾𑌨𑌂𑌦𑍋𑌽𑌨𑍁𑌭𑍂𑌯𑌤𑍇 ।
𑌶𑍍𑌰𑍁𑌤𑌿𑌃 𑌪𑍍𑌰𑌤𑍍𑌯𑌕𑍍𑌷𑌮𑍈𑌤𑌿𑌹𑍍𑌯𑌮𑌨𑍁𑌮𑌾𑌨𑌂 𑌚 𑌜𑌾𑌗𑍍𑌰𑌤𑌿 ॥ 10𑍭॥

𑌅𑌵𑍍𑌯𑌕𑍍𑌤𑌨𑌾𑌮𑍍𑌨𑍀 𑌪𑌰𑌮𑍇𑌶𑌶𑌕𑍍𑌤𑌿𑌃
𑌅𑌨𑌾𑌦𑍍𑌯𑌵𑌿𑌦𑍍𑌯𑌾 𑌤𑍍𑌰𑌿𑌗𑍁𑌣𑌾𑌤𑍍𑌮𑌿𑌕𑌾 𑌪𑌰𑌾 ।
𑌕𑌾𑌰𑍍𑌯𑌾𑌨𑍁𑌮𑍇𑌯𑌾 𑌸𑍁𑌧𑌿𑌯𑍈𑌵 𑌮𑌾𑌯𑌾
𑌯𑌯𑌾 𑌜𑌗𑌤𑍍𑌸𑌰𑍍𑌵𑌮𑌿𑌦𑌂 𑌪𑍍𑌰𑌸𑍂𑌯𑌤𑍇 ॥ 10𑍮॥

𑌸𑌨𑍍𑌨𑌾𑌪𑍍𑌯𑌸𑌨𑍍𑌨𑌾𑌪𑍍𑌯𑍁𑌭𑌯𑌾𑌤𑍍𑌮𑌿𑌕𑌾 𑌨𑍋
𑌭𑌿𑌨𑍍𑌨𑌾𑌪𑍍𑌯𑌭𑌿𑌨𑍍𑌨𑌾𑌪𑍍𑌯𑍁𑌭𑌯𑌾𑌤𑍍𑌮𑌿𑌕𑌾 𑌨𑍋 ।
𑌸𑌾𑌂𑌗𑌾𑌪𑍍𑌯𑌨𑌂𑌗𑌾 𑌹𑍍𑌯𑍁𑌭𑌯𑌾𑌤𑍍𑌮𑌿𑌕𑌾 𑌨𑍋 (𑌪𑌾𑌠𑌭𑍇𑌦𑌃 – 𑌅𑌨𑌂𑌗𑌾𑌪𑍍𑌯𑍁𑌭𑌯𑌾𑌤𑍍𑌮𑌿𑌕𑌾)
𑌮𑌹𑌾𑌦𑍍𑌭𑍁𑌤𑌾𑌽𑌨𑌿𑌰𑍍𑌵𑌚𑌨𑍀𑌯𑌰𑍂𑌪𑌾 ॥ 10𑍯॥

𑌶𑍁𑌦𑍍𑌧𑌾𑌦𑍍𑌵𑌯𑌬𑍍𑌰𑌹𑍍𑌮𑌵𑌿𑌬𑍋𑌧𑌨𑌾𑌶𑍍𑌯𑌾
𑌸𑌰𑍍𑌪𑌭𑍍𑌰𑌮𑍋 𑌰𑌜𑍍𑌜𑍁𑌵𑌿𑌵𑍇𑌕𑌤𑍋 𑌯𑌥𑌾 ।
𑌰𑌜𑌸𑍍𑌤𑌮𑌃𑌸𑌤𑍍𑌤𑍍𑌵𑌮𑌿𑌤𑌿 𑌪𑍍𑌰𑌸𑌿𑌦𑍍𑌧𑌾
𑌗𑍁𑌣𑌾𑌸𑍍𑌤𑌦𑍀𑌯𑌾𑌃 𑌪𑍍𑌰𑌥𑌿𑌤𑍈𑌃 𑌸𑍍𑌵𑌕𑌾𑌰𑍍𑌯𑍈𑌃 ॥ 110॥

𑌵𑌿𑌕𑍍𑌷𑍇𑌪𑌶𑌕𑍍𑌤𑍀 𑌰𑌜𑌸𑌃 𑌕𑍍𑌰𑌿𑌯𑌾𑌤𑍍𑌮𑌿𑌕𑌾
𑌯𑌤𑌃 𑌪𑍍𑌰𑌵𑍃𑌤𑍍𑌤𑌿𑌃 𑌪𑍍𑌰𑌸𑍃𑌤𑌾 𑌪𑍁𑌰𑌾𑌣𑍀 ।
𑌰𑌾𑌗𑌾𑌦𑌯𑍋𑌽𑌸𑍍𑌯𑌾𑌃 𑌪𑍍𑌰𑌭𑌵𑌂𑌤𑌿 𑌨𑌿𑌤𑍍𑌯𑌂
𑌦𑍁𑌃𑌖𑌾𑌦𑌯𑍋 𑌯𑍇 𑌮𑌨𑌸𑍋 𑌵𑌿𑌕𑌾𑌰𑌾𑌃 ॥ 111॥

𑌕𑌾𑌮𑌃 𑌕𑍍𑌰𑍋𑌧𑍋 𑌲𑍋𑌭𑌦𑌂𑌭𑌾𑌦𑍍𑌯𑌸𑍂𑌯𑌾 (𑌪𑌾𑌠𑌭𑍇𑌦𑌃 – 𑌲𑍋𑌭𑌦𑌂𑌭𑌾𑌭𑍍𑌯𑌸𑍂𑌯𑌾)
𑌅𑌹𑌂𑌕𑌾𑌰𑍇𑌰𑍍𑌷𑍍𑌯𑌾𑌮𑌤𑍍𑌸𑌰𑌾𑌦𑍍𑌯𑌾𑌸𑍍𑌤𑍁 𑌘𑍋𑌰𑌾𑌃 ।
𑌧𑌰𑍍𑌮𑌾 𑌏𑌤𑍇 𑌰𑌾𑌜𑌸𑌾𑌃 𑌪𑍁𑌂𑌪𑍍𑌰𑌵𑍃𑌤𑍍𑌤𑌿-
𑌰𑍍𑌯𑌸𑍍𑌮𑌾𑌦𑍇𑌷𑌾 𑌤𑌦𑍍𑌰𑌜𑍋 𑌬𑌂𑌧𑌹𑍇𑌤𑍁𑌃 ॥ 112॥ (𑌪𑌾𑌠𑌭𑍇𑌦𑌃 – 𑌯𑌸𑍍𑌮𑌾𑌦𑍇𑌤𑌤𑍍𑌤𑌦𑍍𑌰𑌜𑍋)

𑌏𑌷𑌾𑌽𑌽𑌵𑍃𑌤𑌿𑌰𑍍𑌨𑌾𑌮 𑌤𑌮𑍋𑌗𑍁𑌣𑌸𑍍𑌯
𑌶𑌕𑍍𑌤𑌿𑌰𑍍𑌮𑌯𑌾 𑌵𑌸𑍍𑌤𑍍𑌵𑌵𑌭𑌾𑌸𑌤𑍇𑌽𑌨𑍍𑌯𑌥𑌾 । 𑌶𑌕𑍍𑌤𑌿𑌰𑍍𑌯𑌯𑌾
𑌸𑍈𑌷𑌾 𑌨𑌿𑌦𑌾𑌨𑌂 𑌪𑍁𑌰𑍁𑌷𑌸𑍍𑌯 𑌸𑌂𑌸𑍃𑌤𑍇𑌃
𑌵𑌿𑌕𑍍𑌷𑍇𑌪𑌶𑌕𑍍𑌤𑍇𑌃 𑌪𑍍𑌰𑌵𑌣𑌸𑍍𑌯 𑌹𑍇𑌤𑍁𑌃 ॥ 113॥ (𑌪𑌾𑌠𑌭𑍇𑌦𑌃 – 𑌪𑍍𑌰𑌸𑌰𑌸𑍍𑌯)

𑌪𑍍𑌰𑌜𑍍𑌞𑌾𑌵𑌾𑌨𑌪𑌿 𑌪𑌂𑌡𑌿𑌤𑍋𑌽𑌪𑌿 𑌚𑌤𑍁𑌰𑍋𑌽𑌪𑍍𑌯𑌤𑍍𑌯𑌂𑌤𑌸𑍂𑌕𑍍𑌷𑍍𑌮𑌾𑌤𑍍𑌮𑌦𑍃𑌗𑍍- (𑌪𑌾𑌠𑌭𑍇𑌦𑌃 – 𑌸𑍂𑌕𑍍𑌷𑍍𑌮𑌾𑌰𑍍𑌥𑌦𑍃𑌗𑍍)
𑌵𑍍𑌯𑌾𑌲𑍀𑌢𑌸𑍍𑌤𑌮𑌸𑌾 𑌨 𑌵𑍇𑌤𑍍𑌤𑌿 𑌬𑌹𑍁𑌧𑌾 𑌸𑌂𑌬𑍋𑌧𑌿𑌤𑍋𑌽𑌪𑌿 𑌸𑍍𑌫𑍁𑌟𑌮𑍍 ।
𑌭𑍍𑌰𑌾𑌂𑌤𑍍𑌯𑌾𑌰𑍋𑌪𑌿𑌤𑌮𑍇𑌵 𑌸𑌾𑌧𑍁 𑌕𑌲𑌯𑌤𑍍𑌯𑌾𑌲𑌂𑌬𑌤𑍇 𑌤𑌦𑍍𑌗𑍁𑌣𑌾𑌨𑍍
𑌹𑌂𑌤𑌾𑌸𑍌 𑌪𑍍𑌰𑌬𑌲𑌾 𑌦𑍁𑌰𑌂𑌤𑌤𑌮𑌸𑌃 𑌶𑌕𑍍𑌤𑌿𑌰𑍍𑌮𑌹𑌤𑍍𑌯𑌾𑌵𑍃𑌤𑌿𑌃 ॥ 114॥

𑌅𑌭𑌾𑌵𑌨𑌾 𑌵𑌾 𑌵𑌿𑌪𑌰𑍀𑌤𑌭𑌾𑌵𑌨𑌾𑌽- (𑌪𑌾𑌠𑌭𑍇𑌦𑌃 – 𑌵𑌿𑌪𑌰𑍀𑌤𑌭𑌾𑌵𑌨𑌾)
𑌸𑌂𑌭𑌾𑌵𑌨𑌾 𑌵𑌿𑌪𑍍𑌰𑌤𑌿𑌪𑌤𑍍𑌤𑌿𑌰𑌸𑍍𑌯𑌾𑌃 ।
𑌸𑌂𑌸𑌰𑍍𑌗𑌯𑍁𑌕𑍍𑌤𑌂 𑌨 𑌵𑌿𑌮𑍁𑌂𑌚𑌤𑌿 𑌧𑍍𑌰𑍁𑌵𑌂
𑌵𑌿𑌕𑍍𑌷𑍇𑌪𑌶𑌕𑍍𑌤𑌿𑌃 𑌕𑍍𑌷𑌪𑌯𑌤𑍍𑌯𑌜𑌸𑍍𑌰𑌮𑍍 ॥ 115॥

𑌅𑌜𑍍𑌞𑌾𑌨𑌮𑌾𑌲𑌸𑍍𑌯𑌜𑌡𑌤𑍍𑌵𑌨𑌿𑌦𑍍𑌰𑌾-
𑌪𑍍𑌰𑌮𑌾𑌦𑌮𑍂𑌢𑌤𑍍𑌵𑌮𑍁𑌖𑌾𑌸𑍍𑌤𑌮𑍋𑌗𑍁𑌣𑌾𑌃 ।
𑌏𑌤𑍈𑌃 𑌪𑍍𑌰𑌯𑍁𑌕𑍍𑌤𑍋 𑌨 𑌹𑌿 𑌵𑍇𑌤𑍍𑌤𑌿 𑌕𑌿𑌂𑌚𑌿𑌤𑍍
𑌨𑌿𑌦𑍍𑌰𑌾𑌲𑍁𑌵𑌤𑍍𑌸𑍍𑌤𑌂𑌭𑌵𑌦𑍇𑌵 𑌤𑌿𑌷𑍍𑌠𑌤𑌿 ॥ 116॥

𑌸𑌤𑍍𑌤𑍍𑌵𑌂 𑌵𑌿𑌶𑍁𑌦𑍍𑌧𑌂 𑌜𑌲𑌵𑌤𑍍𑌤𑌥𑌾𑌪𑌿
𑌤𑌾𑌭𑍍𑌯𑌾𑌂 𑌮𑌿𑌲𑌿𑌤𑍍𑌵𑌾 𑌸𑌰𑌣𑌾𑌯 𑌕𑌲𑍍𑌪𑌤𑍇 ।
𑌯𑌤𑍍𑌰𑌾𑌤𑍍𑌮𑌬𑌿𑌂𑌬𑌃 𑌪𑍍𑌰𑌤𑌿𑌬𑌿𑌂𑌬𑌿𑌤𑌃 𑌸𑌨𑍍
𑌪𑍍𑌰𑌕𑌾𑌶𑌯𑌤𑍍𑌯𑌰𑍍𑌕 𑌇𑌵𑌾𑌖𑌿𑌲𑌂 𑌜𑌡𑌮𑍍 ॥ 11𑍭॥

𑌮𑌿𑌶𑍍𑌰𑌸𑍍𑌯 𑌸𑌤𑍍𑌤𑍍𑌵𑌸𑍍𑌯 𑌭𑌵𑌂𑌤𑌿 𑌧𑌰𑍍𑌮𑌾𑌃
𑌤𑍍𑌵𑌮𑌾𑌨𑌿𑌤𑌾𑌦𑍍𑌯𑌾 𑌨𑌿𑌯𑌮𑌾 𑌯𑌮𑌾𑌦𑍍𑌯𑌾𑌃 ।
𑌶𑍍𑌰𑌦𑍍𑌧𑌾 𑌚 𑌭𑌕𑍍𑌤𑌿𑌶𑍍𑌚 𑌮𑍁𑌮𑍁𑌕𑍍𑌷𑍁𑌤𑌾 𑌚
𑌦𑍈𑌵𑍀 𑌚 𑌸𑌂𑌪𑌤𑍍𑌤𑌿𑌰𑌸𑌨𑍍𑌨𑌿𑌵𑍃𑌤𑍍𑌤𑌿𑌃 ॥ 11𑍮॥

𑌵𑌿𑌶𑍁𑌦𑍍𑌧𑌸𑌤𑍍𑌤𑍍𑌵𑌸𑍍𑌯 𑌗𑍁𑌣𑌾𑌃 𑌪𑍍𑌰𑌸𑌾𑌦𑌃
𑌸𑍍𑌵𑌾𑌤𑍍𑌮𑌾𑌨𑍁𑌭𑍂𑌤𑌿𑌃 𑌪𑌰𑌮𑌾 𑌪𑍍𑌰𑌶𑌾𑌂𑌤𑌿𑌃 ।
𑌤𑍃𑌪𑍍𑌤𑌿𑌃 𑌪𑍍𑌰𑌹𑌰𑍍𑌷𑌃 𑌪𑌰𑌮𑌾𑌤𑍍𑌮𑌨𑌿𑌷𑍍𑌠𑌾
𑌯𑌯𑌾 𑌸𑌦𑌾𑌨𑌂𑌦𑌰𑌸𑌂 𑌸𑌮𑍃𑌚𑍍𑌛𑌤𑌿 ॥ 11𑍯॥

𑌅𑌵𑍍𑌯𑌕𑍍𑌤𑌮𑍇𑌤𑌤𑍍𑌤𑍍𑌰𑌿𑌗𑍁𑌣𑍈𑌰𑍍𑌨𑌿𑌰𑍁𑌕𑍍𑌤𑌂
𑌤𑌤𑍍𑌕𑌾𑌰𑌣𑌂 𑌨𑌾𑌮 𑌶𑌰𑍀𑌰𑌮𑌾𑌤𑍍𑌮𑌨𑌃 ।
𑌸𑍁𑌷𑍁𑌪𑍍𑌤𑌿𑌰𑍇𑌤𑌸𑍍𑌯 𑌵𑌿𑌭𑌕𑍍𑌤𑍍𑌯𑌵𑌸𑍍𑌥𑌾
𑌪𑍍𑌰𑌲𑍀𑌨𑌸𑌰𑍍𑌵𑍇𑌂𑌦𑍍𑌰𑌿𑌯𑌬𑍁𑌦𑍍𑌧𑌿𑌵𑍃𑌤𑍍𑌤𑌿𑌃 ॥ 120॥

𑌸𑌰𑍍𑌵𑌪𑍍𑌰𑌕𑌾𑌰𑌪𑍍𑌰𑌮𑌿𑌤𑌿𑌪𑍍𑌰𑌶𑌾𑌂𑌤𑌿𑌃
𑌬𑍀𑌜𑌾𑌤𑍍𑌮𑌨𑌾𑌵𑌸𑍍𑌥𑌿𑌤𑌿𑌰𑍇𑌵 𑌬𑍁𑌦𑍍𑌧𑍇𑌃 ।
𑌸𑍁𑌷𑍁𑌪𑍍𑌤𑌿𑌰𑍇𑌤𑌸𑍍𑌯 𑌕𑌿𑌲 𑌪𑍍𑌰𑌤𑍀𑌤𑌿𑌃 (𑌪𑌾𑌠𑌭𑍇𑌦𑌃 – 𑌸𑍁𑌷𑍁𑌪𑍍𑌤𑌿𑌰𑌤𑍍𑌰𑌾𑌸𑍍𑌯)
𑌕𑌿𑌂𑌚𑌿𑌨𑍍𑌨 𑌵𑍇𑌦𑍍𑌮𑍀𑌤𑌿 𑌜𑌗𑌤𑍍𑌪𑍍𑌰𑌸𑌿𑌦𑍍𑌧𑍇𑌃 ॥ 121॥

𑌦𑍇𑌹𑍇𑌂𑌦𑍍𑌰𑌿𑌯𑌪𑍍𑌰𑌾𑌣𑌮𑌨𑍋𑌽𑌹𑌮𑌾𑌦𑌯𑌃
𑌸𑌰𑍍𑌵𑍇 𑌵𑌿𑌕𑌾𑌰𑌾 𑌵𑌿𑌷𑌯𑌾𑌃 𑌸𑍁𑌖𑌾𑌦𑌯𑌃 ।
𑌵𑍍𑌯𑍋𑌮𑌾𑌦𑌿𑌭𑍂𑌤𑌾𑌨𑍍𑌯𑌖𑌿𑌲𑌂 𑌚 𑌵𑌿𑌶𑍍𑌵𑌂
𑌅𑌵𑍍𑌯𑌕𑍍𑌤𑌪𑌰𑍍𑌯𑌂𑌤𑌮𑌿𑌦𑌂 𑌹𑍍𑌯𑌨𑌾𑌤𑍍𑌮𑌾 ॥ 122॥

𑌮𑌾𑌯𑌾 𑌮𑌾𑌯𑌾𑌕𑌾𑌰𑍍𑌯𑌂 𑌸𑌰𑍍𑌵𑌂 𑌮𑌹𑌦𑌾𑌦𑌿𑌦𑍇𑌹𑌪𑌰𑍍𑌯𑌂𑌤𑌮𑍍 ।
𑌅𑌸𑌦𑌿𑌦𑌮𑌨𑌾𑌤𑍍𑌮𑌤𑌤𑍍𑌤𑍍𑌵𑌂 𑌵𑌿𑌦𑍍𑌧𑌿 𑌤𑍍𑌵𑌂 𑌮𑌰𑍁𑌮𑌰𑍀𑌚𑌿𑌕𑌾𑌕𑌲𑍍𑌪𑌮𑍍 ॥ 123॥

𑌅𑌥 𑌤𑍇 𑌸𑌂𑌪𑍍𑌰𑌵𑌕𑍍𑌷𑍍𑌯𑌾𑌮𑌿 𑌸𑍍𑌵𑌰𑍂𑌪𑌂 𑌪𑌰𑌮𑌾𑌤𑍍𑌮𑌨𑌃 ।
𑌯𑌦𑍍𑌵𑌿𑌜𑍍𑌞𑌾𑌯 𑌨𑌰𑍋 𑌬𑌂𑌧𑌾𑌨𑍍𑌮𑍁𑌕𑍍𑌤𑌃 𑌕𑍈𑌵𑌲𑍍𑌯𑌮𑌶𑍍𑌨𑍁𑌤𑍇 ॥ 124॥

𑌅𑌸𑍍𑌤𑌿 𑌕𑌶𑍍𑌚𑌿𑌤𑍍𑌸𑍍𑌵𑌯𑌂 𑌨𑌿𑌤𑍍𑌯𑌮𑌹𑌂𑌪𑍍𑌰𑌤𑍍𑌯𑌯𑌲𑌂𑌬𑌨𑌃 ।
𑌅𑌵𑌸𑍍𑌥𑌾𑌤𑍍𑌰𑌯𑌸𑌾𑌕𑍍𑌷𑍀 𑌸𑌨𑍍𑌪𑌂𑌚𑌕𑍋𑌶𑌵𑌿𑌲𑌕𑍍𑌷𑌣𑌃 ॥ 125॥

𑌯𑍋 𑌵𑌿𑌜𑌾𑌨𑌾𑌤𑌿 𑌸𑌕𑌲𑌂 𑌜𑌾𑌗𑍍𑌰𑌤𑍍𑌸𑍍𑌵𑌪𑍍𑌨𑌸𑍁𑌷𑍁𑌪𑍍𑌤𑌿𑌷𑍁 ।
𑌬𑍁𑌦𑍍𑌧𑌿𑌤𑌦𑍍𑌵𑍃𑌤𑍍𑌤𑌿𑌸𑌦𑍍𑌭𑌾𑌵𑌮𑌭𑌾𑌵𑌮𑌹𑌮𑌿𑌤𑍍𑌯𑌯𑌮𑍍 ॥ 126॥

𑌯𑌃 𑌪𑌶𑍍𑌯𑌤𑌿 𑌸𑍍𑌵𑌯𑌂 𑌸𑌰𑍍𑌵𑌂 𑌯𑌂 𑌨 𑌪𑌶𑍍𑌯𑌤𑌿 𑌕𑌶𑍍𑌚𑌨 । (𑌪𑌾𑌠𑌭𑍇𑌦𑌃 – 𑌕𑌿𑌂𑌚𑌨)
𑌯𑌶𑍍𑌚𑍇𑌤𑌯𑌤𑌿 𑌬𑍁𑌦𑍍𑌧𑍍𑌯𑌾𑌦𑌿 𑌨 𑌤𑌦𑍍𑌯𑌂 𑌚𑍇𑌤𑌯𑌤𑍍𑌯𑌯𑌮𑍍 ॥ 12𑍭॥

𑌯𑍇𑌨 𑌵𑌿𑌶𑍍𑌵𑌮𑌿𑌦𑌂 𑌵𑍍𑌯𑌾𑌪𑍍𑌤𑌂 𑌯𑌂 𑌨 𑌵𑍍𑌯𑌾𑌪𑍍𑌨𑍋𑌤𑌿 𑌕𑌿𑌂𑌚𑌨 ।
𑌆𑌭𑌾𑌰𑍂𑌪𑌮𑌿𑌦𑌂 𑌸𑌰𑍍𑌵𑌂 𑌯𑌂 𑌭𑌾𑌂𑌤𑌮𑌨𑍁𑌭𑌾𑌤𑍍𑌯𑌯𑌮𑍍 ॥ 12𑍮॥

𑌯𑌸𑍍𑌯 𑌸𑌨𑍍𑌨𑌿𑌧𑌿𑌮𑌾𑌤𑍍𑌰𑍇𑌣 𑌦𑍇𑌹𑍇𑌂𑌦𑍍𑌰𑌿𑌯𑌮𑌨𑍋𑌧𑌿𑌯𑌃 ।
𑌵𑌿𑌷𑌯𑍇𑌷𑍁 𑌸𑍍𑌵𑌕𑍀𑌯𑍇𑌷𑍁 𑌵𑌰𑍍𑌤𑌂𑌤𑍇 𑌪𑍍𑌰𑍇𑌰𑌿𑌤𑌾 𑌇𑌵 ॥ 12𑍯॥

𑌅𑌹𑌂𑌕𑌾𑌰𑌾𑌦𑌿𑌦𑍇𑌹𑌾𑌂𑌤𑌾 𑌵𑌿𑌷𑌯𑌾𑌶𑍍𑌚 𑌸𑍁𑌖𑌾𑌦𑌯𑌃 ।
𑌵𑍇𑌦𑍍𑌯𑌂𑌤𑍇 𑌘𑌟𑌵𑌦𑍍𑌯𑍇𑌨 𑌨𑌿𑌤𑍍𑌯𑌬𑍋𑌧𑌸𑍍𑌵𑌰𑍂𑌪𑌿𑌣𑌾 ॥ 130॥

𑌏𑌷𑍋𑌽𑌂𑌤𑌰𑌾𑌤𑍍𑌮𑌾 𑌪𑍁𑌰𑍁𑌷𑌃 𑌪𑍁𑌰𑌾𑌣𑍋
𑌨𑌿𑌰𑌂𑌤𑌰𑌾𑌖𑌂𑌡𑌸𑍁𑌖𑌾𑌨𑍁𑌭𑍂𑌤𑌿𑌃 ।
𑌸𑌦𑍈𑌕𑌰𑍂𑌪𑌃 𑌪𑍍𑌰𑌤𑌿𑌬𑍋𑌧𑌮𑌾𑌤𑍍𑌰𑍋
𑌯𑍇𑌨𑍇𑌷𑌿𑌤𑌾 𑌵𑌾𑌗𑌸𑌵𑌶𑍍𑌚𑌰𑌂𑌤𑌿 ॥ 131॥

𑌅𑌤𑍍𑌰𑍈𑌵 𑌸𑌤𑍍𑌤𑍍𑌵𑌾𑌤𑍍𑌮𑌨𑌿 𑌧𑍀𑌗𑍁𑌹𑌾𑌯𑌾𑌂
𑌅𑌵𑍍𑌯𑌾𑌕𑍃𑌤𑌾𑌕𑌾𑌶 𑌉𑌶𑌤𑍍𑌪𑍍𑌰𑌕𑌾𑌶𑌃 । (𑌪𑌾𑌠𑌭𑍇𑌦𑌃 – 𑌉𑌰𑍁𑌪𑍍𑌰𑌕𑌾𑌶𑌃)
𑌆𑌕𑌾𑌶 𑌉𑌚𑍍𑌚𑍈 𑌰𑌵𑌿𑌵𑌤𑍍𑌪𑍍𑌰𑌕𑌾𑌶𑌤𑍇
𑌸𑍍𑌵𑌤𑍇𑌜𑌸𑌾 𑌵𑌿𑌶𑍍𑌵𑌮𑌿𑌦𑌂 𑌪𑍍𑌰𑌕𑌾𑌶𑌯𑌨𑍍 ॥ 132॥

𑌜𑍍𑌞𑌾𑌤𑌾 𑌮𑌨𑍋𑌽𑌹𑌂𑌕𑍃𑌤𑌿𑌵𑌿𑌕𑍍𑌰𑌿𑌯𑌾𑌣𑌾𑌂
𑌦𑍇𑌹𑍇𑌂𑌦𑍍𑌰𑌿𑌯𑌪𑍍𑌰𑌾𑌣𑌕𑍃𑌤𑌕𑍍𑌰𑌿𑌯𑌾𑌣𑌾𑌮𑍍 ।
𑌅𑌯𑍋𑌽𑌗𑍍𑌨𑌿𑌵𑌤𑍍𑌤𑌾𑌨𑌨𑍁𑌵𑌰𑍍𑌤𑌮𑌾𑌨𑍋
𑌨 𑌚𑍇𑌷𑍍𑌟𑌤𑍇 𑌨𑍋 𑌵𑌿𑌕𑌰𑍋𑌤𑌿 𑌕𑌿𑌂𑌚𑌨 ॥ 133॥

𑌨 𑌜𑌾𑌯𑌤𑍇 𑌨𑍋 𑌮𑍍𑌰𑌿𑌯𑌤𑍇 𑌨 𑌵𑌰𑍍𑌧𑌤𑍇
𑌨 𑌕𑍍𑌷𑍀𑌯𑌤𑍇 𑌨𑍋 𑌵𑌿𑌕𑌰𑍋𑌤𑌿 𑌨𑌿𑌤𑍍𑌯𑌃 ।
𑌵𑌿𑌲𑍀𑌯𑌮𑌾𑌨𑍇𑌽𑌪𑌿 𑌵𑌪𑍁𑌷𑍍𑌯𑌮𑍁𑌷𑍍𑌮𑌿-
𑌨𑍍𑌨 𑌲𑍀𑌯𑌤𑍇 𑌕𑍁𑌂𑌭 𑌇𑌵𑌾𑌂𑌬𑌰𑌂 𑌸𑍍𑌵𑌯𑌮𑍍 ॥ 134॥

𑌪𑍍𑌰𑌕𑍃𑌤𑌿𑌵𑌿𑌕𑍃𑌤𑌿𑌭𑌿𑌨𑍍𑌨𑌃 𑌶𑍁𑌦𑍍𑌧𑌬𑍋𑌧𑌸𑍍𑌵𑌭𑌾𑌵𑌃
𑌸𑌦𑌸𑌦𑌿𑌦𑌮𑌶𑍇𑌷𑌂 𑌭𑌾𑌸𑌯𑌨𑍍𑌨𑌿𑌰𑍍𑌵𑌿𑌶𑍇𑌷𑌃 ।
𑌵𑌿𑌲𑌸𑌤𑌿 𑌪𑌰𑌮𑌾𑌤𑍍𑌮𑌾 𑌜𑌾𑌗𑍍𑌰𑌦𑌾𑌦𑌿𑌷𑍍𑌵𑌵𑌸𑍍𑌥𑌾-
𑌸𑍍𑌵𑌹𑌮𑌹𑌮𑌿𑌤𑌿 𑌸𑌾𑌕𑍍𑌷𑌾𑌤𑍍𑌸𑌾𑌕𑍍𑌷𑌿𑌰𑍂𑌪𑍇𑌣 𑌬𑍁𑌦𑍍𑌧𑍇𑌃 ॥ 135॥

𑌨𑌿𑌯𑌮𑌿𑌤𑌮𑌨𑌸𑌾𑌮𑍁𑌂 𑌤𑍍𑌵𑌂 𑌸𑍍𑌵𑌮𑌾𑌤𑍍𑌮𑌾𑌨𑌮𑌾𑌤𑍍𑌮-
𑌨𑍍𑌯𑌯𑌮𑌹𑌮𑌿𑌤𑌿 𑌸𑌾𑌕𑍍𑌷𑌾𑌦𑍍𑌵𑌿𑌦𑍍𑌧𑌿 𑌬𑍁𑌦𑍍𑌧𑌿𑌪𑍍𑌰𑌸𑌾𑌦𑌾𑌤𑍍 ।
𑌜𑌨𑌿𑌮𑌰𑌣𑌤𑌰𑌂𑌗𑌾𑌪𑌾𑌰𑌸𑌂𑌸𑌾𑌰𑌸𑌿𑌂𑌧𑍁𑌂
𑌪𑍍𑌰𑌤𑌰 𑌭𑌵 𑌕𑍃𑌤𑌾𑌰𑍍𑌥𑍋 𑌬𑍍𑌰𑌹𑍍𑌮𑌰𑍂𑌪𑍇𑌣 𑌸𑌂𑌸𑍍𑌥𑌃 ॥ 136॥

𑌅𑌤𑍍𑌰𑌾𑌨𑌾𑌤𑍍𑌮𑌨𑍍𑌯𑌹𑌮𑌿𑌤𑌿 𑌮𑌤𑌿𑌰𑍍𑌬𑌂𑌧 𑌏𑌷𑍋𑌽𑌸𑍍𑌯 𑌪𑍁𑌂𑌸𑌃
𑌪𑍍𑌰𑌾𑌪𑍍𑌤𑍋𑌽𑌜𑍍𑌞𑌾𑌨𑌾𑌜𑍍𑌜𑌨𑌨𑌮𑌰𑌣𑌕𑍍𑌲𑍇𑌶𑌸𑌂𑌪𑌾𑌤𑌹𑍇𑌤𑍁𑌃 ।
𑌯𑍇𑌨𑍈𑌵𑌾𑌯𑌂 𑌵𑌪𑍁𑌰𑌿𑌦𑌮𑌸𑌤𑍍𑌸𑌤𑍍𑌯𑌮𑌿𑌤𑍍𑌯𑌾𑌤𑍍𑌮𑌬𑍁𑌦𑍍𑌧𑍍𑌯𑌾
𑌪𑍁𑌷𑍍𑌯𑌤𑍍𑌯𑍁𑌕𑍍𑌷𑌤𑍍𑌯𑌵𑌤𑌿 𑌵𑌿𑌷𑌯𑍈𑌸𑍍𑌤𑌂𑌤𑍁𑌭𑌿𑌃 𑌕𑍋𑌶𑌕𑍃𑌦𑍍𑌵𑌤𑍍 ॥ 13𑍭॥

𑌅𑌤𑌸𑍍𑌮𑌿𑌂𑌸𑍍𑌤𑌦𑍍𑌬𑍁𑌦𑍍𑌧𑌿𑌃 𑌪𑍍𑌰𑌭𑌵𑌤𑌿 𑌵𑌿𑌮𑍂𑌢𑌸𑍍𑌯 𑌤𑌮𑌸𑌾
𑌵𑌿𑌵𑍇𑌕𑌾𑌭𑌾𑌵𑌾𑌦𑍍𑌵𑍈 𑌸𑍍𑌫𑍁𑌰𑌤𑌿 𑌭𑍁𑌜𑌗𑍇 𑌰𑌜𑍍𑌜𑍁𑌧𑌿𑌷𑌣𑌾 ।
𑌤𑌤𑍋𑌽𑌨𑌰𑍍𑌥𑌵𑍍𑌰𑌾𑌤𑍋 𑌨𑌿𑌪𑌤𑌤𑌿 𑌸𑌮𑌾𑌦𑌾𑌤𑍁𑌰𑌧𑌿𑌕𑌃
𑌤𑌤𑍋 𑌯𑍋𑌽𑌸𑌦𑍍𑌗𑍍𑌰𑌾𑌹𑌃 𑌸 𑌹𑌿 𑌭𑌵𑌤𑌿 𑌬𑌂𑌧𑌃 𑌶𑌋𑌣𑍁 𑌸𑌖𑍇 ॥ 13𑍮॥

𑌅𑌖𑌂𑌡𑌨𑌿𑌤𑍍𑌯𑌾𑌦𑍍𑌵𑌯𑌬𑍋𑌧𑌶𑌕𑍍𑌤𑍍𑌯𑌾
𑌸𑍍𑌫𑍁𑌰𑌂𑌤𑌮𑌾𑌤𑍍𑌮𑌾𑌨𑌮𑌨𑌂𑌤𑌵𑍈𑌭𑌵𑌮𑍍 ।
𑌸𑌮𑌾𑌵𑍃𑌣𑍋𑌤𑍍𑌯𑌾𑌵𑍃𑌤𑌿𑌶𑌕𑍍𑌤𑌿𑌰𑍇𑌷𑌾
𑌤𑌮𑍋𑌮𑌯𑍀 𑌰𑌾𑌹𑍁𑌰𑌿𑌵𑌾𑌰𑍍𑌕𑌬𑌿𑌂𑌬𑌮𑍍 ॥ 13𑍯॥

𑌤𑌿𑌰𑍋𑌭𑍂𑌤𑍇 𑌸𑍍𑌵𑌾𑌤𑍍𑌮𑌨𑍍𑌯𑌮𑌲𑌤𑌰𑌤𑍇𑌜𑍋𑌵𑌤𑌿 𑌪𑍁𑌮𑌾𑌨𑍍
𑌅𑌨𑌾𑌤𑍍𑌮𑌾𑌨𑌂 𑌮𑍋𑌹𑌾𑌦𑌹𑌮𑌿𑌤𑌿 𑌶𑌰𑍀𑌰𑌂 𑌕𑌲𑌯𑌤𑌿 ।
𑌤𑌤𑌃 𑌕𑌾𑌮𑌕𑍍𑌰𑍋𑌧𑌪𑍍𑌰𑌭𑍃𑌤𑌿𑌭𑌿𑌰𑌮𑍁𑌂 𑌬𑌂𑌧𑌨𑌗𑍁𑌣𑍈𑌃 (𑌪𑌾𑌠𑌭𑍇𑌦𑌃 – 𑌬𑌂𑌧𑌕𑌗𑍁𑌣𑍈𑌃)
𑌪𑌰𑌂 𑌵𑌿𑌕𑍍𑌷𑍇𑌪𑌾𑌖𑍍𑌯𑌾 𑌰𑌜𑌸 𑌉𑌰𑍁𑌶𑌕𑍍𑌤𑌿𑌰𑍍𑌵𑍍𑌯𑌥𑌯𑌤𑌿 ॥ 140॥

𑌮𑌹𑌾𑌮𑍋𑌹𑌗𑍍𑌰𑌾𑌹𑌗𑍍𑌰𑌸𑌨𑌗𑌲𑌿𑌤𑌾𑌤𑍍𑌮𑌾𑌵𑌗𑌮𑌨𑍋
𑌧𑌿𑌯𑍋 𑌨𑌾𑌨𑌾𑌵𑌸𑍍𑌥𑌾𑌂 𑌸𑍍𑌵𑌯𑌮𑌭𑌿𑌨𑌯𑌂𑌸𑍍𑌤𑌦𑍍𑌗𑍁𑌣𑌤𑌯𑌾 । (𑌪𑌾𑌠𑌭𑍇𑌦𑌃 – 𑌨𑌾𑌨𑌾𑌵𑌸𑍍𑌥𑌾𑌃)
𑌅𑌪𑌾𑌰𑍇 𑌸𑌂𑌸𑌾𑌰𑍇 𑌵𑌿𑌷𑌯𑌵𑌿𑌷𑌪𑍂𑌰𑍇 𑌜𑌲𑌨𑌿𑌧𑍌
𑌨𑌿𑌮𑌜𑍍𑌯𑍋𑌨𑍍𑌮𑌜𑍍𑌯𑌾𑌯𑌂 𑌭𑍍𑌰𑌮𑌤𑌿 𑌕𑍁𑌮𑌤𑌿𑌃 𑌕𑍁𑌤𑍍𑌸𑌿𑌤𑌗𑌤𑌿𑌃 ॥ 141॥

𑌭𑌾𑌨𑍁𑌪𑍍𑌰𑌭𑌾𑌸𑌂𑌜𑌨𑌿𑌤𑌾𑌭𑍍𑌰𑌪𑌂𑌕𑍍𑌤𑌿𑌃
𑌭𑌾𑌨𑍁𑌂 𑌤𑌿𑌰𑍋𑌧𑌾𑌯 𑌵𑌿𑌜𑍃𑌂𑌭𑌤𑍇 𑌯𑌥𑌾 ।
𑌆𑌤𑍍𑌮𑍋𑌦𑌿𑌤𑌾𑌹𑌂𑌕𑍃𑌤𑌿𑌰𑌾𑌤𑍍𑌮𑌤𑌤𑍍𑌤𑍍𑌵𑌂
𑌤𑌥𑌾 𑌤𑌿𑌰𑍋𑌧𑌾𑌯 𑌵𑌿𑌜𑍃𑌂𑌭𑌤𑍇 𑌸𑍍𑌵𑌯𑌮𑍍 ॥ 142॥

𑌕𑌵𑌲𑌿𑌤𑌦𑌿𑌨𑌨𑌾𑌥𑍇 𑌦𑍁𑌰𑍍𑌦𑌿𑌨𑍇 𑌸𑌾𑌂𑌦𑍍𑌰𑌮𑍇𑌘𑍈𑌃
𑌵𑍍𑌯𑌥𑌯𑌤𑌿 𑌹𑌿𑌮𑌝𑌂𑌝𑌾𑌵𑌾𑌯𑍁𑌰𑍁𑌗𑍍𑌰𑍋 𑌯𑌥𑍈𑌤𑌾𑌨𑍍 ।
𑌅𑌵𑌿𑌰𑌤𑌤𑌮𑌸𑌾𑌽𑌽𑌤𑍍𑌮𑌨𑍍𑌯𑌾𑌵𑍃𑌤𑍇 𑌮𑍂𑌢𑌬𑍁𑌦𑍍𑌧𑌿𑌂
𑌕𑍍𑌷𑌪𑌯𑌤𑌿 𑌬𑌹𑍁𑌦𑍁𑌃𑌖𑍈𑌸𑍍𑌤𑍀𑌵𑍍𑌰𑌵𑌿𑌕𑍍𑌷𑍇𑌪𑌶𑌕𑍍𑌤𑌿𑌃 ॥ 143॥

𑌏𑌤𑌾𑌭𑍍𑌯𑌾𑌮𑍇𑌵 𑌶𑌕𑍍𑌤𑌿𑌭𑍍𑌯𑌾𑌂 𑌬𑌂𑌧𑌃 𑌪𑍁𑌂𑌸𑌃 𑌸𑌮𑌾𑌗𑌤𑌃 ।
𑌯𑌾𑌭𑍍𑌯𑌾𑌂 𑌵𑌿𑌮𑍋𑌹𑌿𑌤𑍋 𑌦𑍇𑌹𑌂 𑌮𑌤𑍍𑌵𑌾𑌽𑌽𑌤𑍍𑌮𑌾𑌨𑌂 𑌭𑍍𑌰𑌮𑌤𑍍𑌯𑌯𑌮𑍍 ॥ 144॥

𑌬𑍀𑌜𑌂 𑌸𑌂𑌸𑍃𑌤𑌿𑌭𑍂𑌮𑌿𑌜𑌸𑍍𑌯 𑌤𑍁 𑌤𑌮𑍋 𑌦𑍇𑌹𑌾𑌤𑍍𑌮𑌧𑍀𑌰𑌂𑌕𑍁𑌰𑍋
𑌰𑌾𑌗𑌃 𑌪𑌲𑍍𑌲𑌵𑌮𑌂𑌬𑍁 𑌕𑌰𑍍𑌮 𑌤𑍁 𑌵𑌪𑍁𑌃 𑌸𑍍𑌕𑌂𑌧𑍋𑌽𑌸𑌵𑌃 𑌶𑌾𑌖𑌿𑌕𑌾𑌃 ।
𑌅𑌗𑍍𑌰𑌾𑌣𑍀𑌂𑌦𑍍𑌰𑌿𑌯𑌸𑌂𑌹𑌤𑌿𑌶𑍍𑌚 𑌵𑌿𑌷𑌯𑌾𑌃 𑌪𑍁𑌷𑍍𑌪𑌾𑌣𑌿 𑌦𑍁𑌃𑌖𑌂 𑌫𑌲𑌂
𑌨𑌾𑌨𑌾𑌕𑌰𑍍𑌮𑌸𑌮𑍁𑌦𑍍𑌭𑌵𑌂 𑌬𑌹𑍁𑌵𑌿𑌧𑌂 𑌭𑍋𑌕𑍍𑌤𑌾𑌤𑍍𑌰 𑌜𑍀𑌵𑌃 𑌖𑌗𑌃 ॥ 145॥

𑌅𑌜𑍍𑌞𑌾𑌨𑌮𑍂𑌲𑍋𑌽𑌯𑌮𑌨𑌾𑌤𑍍𑌮𑌬𑌂𑌧𑍋
𑌨𑍈𑌸𑌰𑍍𑌗𑌿𑌕𑍋𑌽𑌨𑌾𑌦𑌿𑌰𑌨𑌂𑌤 𑌈𑌰𑌿𑌤𑌃 ।
𑌜𑌨𑍍𑌮𑌾𑌪𑍍𑌯𑌯𑌵𑍍𑌯𑌾𑌧𑌿𑌜𑌰𑌾𑌦𑌿𑌦𑍁𑌃𑌖-
𑌪𑍍𑌰𑌵𑌾𑌹𑌪𑌾𑌤𑌂 𑌜𑌨𑌯𑌤𑍍𑌯𑌮𑍁𑌷𑍍𑌯 ॥ 146॥

𑌨𑌾𑌸𑍍𑌤𑍍𑌰𑍈𑌰𑍍𑌨 𑌶𑌸𑍍𑌤𑍍𑌰𑍈𑌰𑌨𑌿𑌲𑍇𑌨 𑌵𑌹𑍍𑌨𑌿𑌨𑌾
𑌛𑍇𑌤𑍍𑌤𑍁𑌂 𑌨 𑌶𑌕𑍍𑌯𑍋 𑌨 𑌚 𑌕𑌰𑍍𑌮𑌕𑍋𑌟𑌿𑌭𑌿𑌃 ।
𑌵𑌿𑌵𑍇𑌕𑌵𑌿𑌜𑍍𑌞𑌾𑌨𑌮𑌹𑌾𑌸𑌿𑌨𑌾 𑌵𑌿𑌨𑌾
𑌧𑌾𑌤𑍁𑌃 𑌪𑍍𑌰𑌸𑌾𑌦𑍇𑌨 𑌶𑌿𑌤𑍇𑌨 𑌮𑌂𑌜𑍁𑌨𑌾 ॥ 14𑍭॥

𑌶𑍍𑌰𑍁𑌤𑌿𑌪𑍍𑌰𑌮𑌾𑌣𑍈𑌕𑌮𑌤𑍇𑌃 𑌸𑍍𑌵𑌧𑌰𑍍𑌮
𑌨𑌿𑌷𑍍𑌠𑌾 𑌤𑌯𑍈𑌵𑌾𑌤𑍍𑌮𑌵𑌿𑌶𑍁𑌦𑍍𑌧𑌿𑌰𑌸𑍍𑌯 ।
𑌵𑌿𑌶𑍁𑌦𑍍𑌧𑌬𑍁𑌦𑍍𑌧𑍇𑌃 𑌪𑌰𑌮𑌾𑌤𑍍𑌮𑌵𑍇𑌦𑌨𑌂
𑌤𑍇𑌨𑍈𑌵 𑌸𑌂𑌸𑌾𑌰𑌸𑌮𑍂𑌲𑌨𑌾𑌶𑌃 ॥ 14𑍮॥

𑌕𑍋𑌶𑍈𑌰𑌨𑍍𑌨𑌮𑌯𑌾𑌦𑍍𑌯𑍈𑌃 𑌪𑌂𑌚𑌭𑌿𑌰𑌾𑌤𑍍𑌮𑌾 𑌨 𑌸𑌂𑌵𑍃𑌤𑍋 𑌭𑌾𑌤𑌿 ।
𑌨𑌿𑌜𑌶𑌕𑍍𑌤𑌿𑌸𑌮𑍁𑌤𑍍𑌪𑌨𑍍𑌨𑍈𑌃 𑌶𑍈𑌵𑌾𑌲𑌪𑌟𑌲𑍈𑌰𑌿𑌵𑌾𑌂𑌬𑍁 𑌵𑌾𑌪𑍀𑌸𑍍𑌥𑌮𑍍 ॥ 14𑍯॥

𑌤𑌚𑍍𑌛𑍈𑌵𑌾𑌲𑌾𑌪𑌨𑌯𑍇 𑌸𑌮𑍍𑌯𑌕𑍍 𑌸𑌲𑌿𑌲𑌂 𑌪𑍍𑌰𑌤𑍀𑌯𑌤𑍇 𑌶𑍁𑌦𑍍𑌧𑌮𑍍 ।
𑌤𑍃𑌷𑍍𑌣𑌾𑌸𑌂𑌤𑌾𑌪𑌹𑌰𑌂 𑌸𑌦𑍍𑌯𑌃 𑌸𑍌𑌖𑍍𑌯𑌪𑍍𑌰𑌦𑌂 𑌪𑌰𑌂 𑌪𑍁𑌂𑌸𑌃 ॥ 150॥

𑌪𑌂𑌚𑌾𑌨𑌾𑌮𑌪𑌿 𑌕𑍋𑌶𑌾𑌨𑌾𑌮𑌪𑌵𑌾𑌦𑍇 𑌵𑌿𑌭𑌾𑌤𑍍𑌯𑌯𑌂 𑌶𑍁𑌦𑍍𑌧𑌃 ।
𑌨𑌿𑌤𑍍𑌯𑌾𑌨𑌂𑌦𑍈𑌕𑌰𑌸𑌃 𑌪𑍍𑌰𑌤𑍍𑌯𑌗𑍍𑌰𑍂𑌪𑌃 𑌪𑌰𑌃 𑌸𑍍𑌵𑌯𑌂𑌜𑍍𑌯𑍋𑌤𑌿𑌃 ॥ 151॥

𑌆𑌤𑍍𑌮𑌾𑌨𑌾𑌤𑍍𑌮𑌵𑌿𑌵𑍇𑌕𑌃 𑌕𑌰𑍍𑌤𑌵𑍍𑌯𑍋 𑌬𑌂𑌧𑌮𑍁𑌕𑍍𑌤𑌯𑍇 𑌵𑌿𑌦𑍁𑌷𑌾 ।
𑌤𑍇𑌨𑍈𑌵𑌾𑌨𑌂𑌦𑍀 𑌭𑌵𑌤𑌿 𑌸𑍍𑌵𑌂 𑌵𑌿𑌜𑍍𑌞𑌾𑌯 𑌸𑌚𑍍𑌚𑌿𑌦𑌾𑌨𑌂𑌦𑌮𑍍 ॥ 152॥

𑌮𑍁𑌂𑌜𑌾𑌦𑌿𑌷𑍀𑌕𑌾𑌮𑌿𑌵 𑌦𑍃𑌶𑍍𑌯𑌵𑌰𑍍𑌗𑌾𑌤𑍍
𑌪𑍍𑌰𑌤𑍍𑌯𑌂𑌚𑌮𑌾𑌤𑍍𑌮𑌾𑌨𑌮𑌸𑌂𑌗𑌮𑌕𑍍𑌰𑌿𑌯𑌮𑍍 ।
𑌵𑌿𑌵𑌿𑌚𑍍𑌯 𑌤𑌤𑍍𑌰 𑌪𑍍𑌰𑌵𑌿𑌲𑌾𑌪𑍍𑌯 𑌸𑌰𑍍𑌵𑌂
𑌤𑌦𑌾𑌤𑍍𑌮𑌨𑌾 𑌤𑌿𑌷𑍍𑌠𑌤𑌿 𑌯𑌃 𑌸 𑌮𑍁𑌕𑍍𑌤𑌃 ॥ 153॥

𑌦𑍇𑌹𑍋𑌽𑌯𑌮𑌨𑍍𑌨𑌭𑌵𑌨𑍋𑌽𑌨𑍍𑌨𑌮𑌯𑌸𑍍𑌤𑍁 𑌕𑍋𑌶- (𑌪𑌾𑌠𑌭𑍇𑌦𑌃 – 𑌕𑍋𑌶𑍋)
𑌶𑍍𑌚𑌾𑌨𑍍𑌨𑍇𑌨 𑌜𑍀𑌵𑌤𑌿 𑌵𑌿𑌨𑌶𑍍𑌯𑌤𑌿 𑌤𑌦𑍍𑌵𑌿𑌹𑍀𑌨𑌃 । (𑌪𑌾𑌠𑌭𑍇𑌦𑌃 – 𑌹𑍍𑌯𑌨𑍍𑌨𑍇𑌨)
𑌤𑍍𑌵𑌕𑍍𑌚𑌰𑍍𑌮𑌮𑌾𑌂𑌸𑌰𑍁𑌧𑌿𑌰𑌾𑌸𑍍𑌥𑌿𑌪𑍁𑌰𑍀𑌷𑌰𑌾𑌶𑌿-
𑌰𑍍𑌨𑌾𑌯𑌂 𑌸𑍍𑌵𑌯𑌂 𑌭𑌵𑌿𑌤𑍁𑌮𑌰𑍍𑌹𑌤𑌿 𑌨𑌿𑌤𑍍𑌯𑌶𑍁𑌦𑍍𑌧𑌃 ॥ 154॥

𑌪𑍂𑌰𑍍𑌵𑌂 𑌜𑌨𑍇𑌰𑌧𑌿𑌮𑍃𑌤𑍇𑌰𑌪𑌿 𑌨𑌾𑌯𑌮𑌸𑍍𑌤𑌿 (𑌪𑌾𑌠𑌭𑍇𑌦𑌃 – 𑌜𑌨𑍇𑌰𑌪𑌿𑌮𑍃𑌤𑍇𑌰𑌥)
𑌜𑌾𑌤𑌕𑍍𑌷𑌣𑌃 𑌕𑍍𑌷𑌣𑌗𑍁𑌣𑍋𑌽𑌨𑌿𑌯𑌤𑌸𑍍𑌵𑌭𑌾𑌵𑌃 ।
𑌨𑍈𑌕𑍋 𑌜𑌡𑌶𑍍𑌚 𑌘𑌟𑌵𑌤𑍍𑌪𑌰𑌿𑌦𑍃𑌶𑍍𑌯𑌮𑌾𑌨𑌃
𑌸𑍍𑌵𑌾𑌤𑍍𑌮𑌾 𑌕𑌥𑌂 𑌭𑌵𑌤𑌿 𑌭𑌾𑌵𑌵𑌿𑌕𑌾𑌰𑌵𑍇𑌤𑍍𑌤𑌾 ॥ 155॥

𑌪𑌾𑌣𑌿𑌪𑌾𑌦𑌾𑌦𑌿𑌮𑌾𑌂𑌦𑍇𑌹𑍋 𑌨𑌾𑌤𑍍𑌮𑌾 𑌵𑍍𑌯𑌂𑌗𑍇𑌽𑌪𑌿 𑌜𑍀𑌵𑌨𑌾𑌤𑍍 ।
𑌤𑌤𑍍𑌤𑌚𑍍𑌛𑌕𑍍𑌤𑍇𑌰𑌨𑌾𑌶𑌾𑌚𑍍𑌚 𑌨 𑌨𑌿𑌯𑌮𑍍𑌯𑍋 𑌨𑌿𑌯𑌾𑌮𑌕𑌃 ॥ 156॥

𑌦𑍇𑌹𑌤𑌦𑍍𑌧𑌰𑍍𑌮𑌤𑌤𑍍𑌕𑌰𑍍𑌮𑌤𑌦𑌵𑌸𑍍𑌥𑌾𑌦𑌿𑌸𑌾𑌕𑍍𑌷𑌿𑌣𑌃 ।
𑌸𑌤 𑌏𑌵 𑌸𑍍𑌵𑌤𑌃𑌸𑌿𑌦𑍍𑌧𑌂 𑌤𑌦𑍍𑌵𑍈𑌲𑌕𑍍𑌷𑌣𑍍𑌯𑌮𑌾𑌤𑍍𑌮𑌨𑌃 ॥ 15𑍭॥

𑌶𑌲𑍍𑌯𑌰𑌾𑌶𑌿𑌰𑍍𑌮𑌾𑌂𑌸𑌲𑌿𑌪𑍍𑌤𑍋 𑌮𑌲𑌪𑍂𑌰𑍍𑌣𑍋𑌽𑌤𑌿𑌕𑌶𑍍𑌮𑌲𑌃 ।
𑌕𑌥𑌂 𑌭𑌵𑍇𑌦𑌯𑌂 𑌵𑍇𑌤𑍍𑌤𑌾 𑌸𑍍𑌵𑌯𑌮𑍇𑌤𑌦𑍍𑌵𑌿𑌲𑌕𑍍𑌷𑌣𑌃 ॥ 15𑍮॥

𑌤𑍍𑌵𑌙𑍍𑌮𑌾𑌂𑌸𑌮𑍇𑌦𑍋𑌽𑌸𑍍𑌥𑌿𑌪𑍁𑌰𑍀𑌷𑌰𑌾𑌶𑌾-
𑌵𑌹𑌮𑍍𑌮𑌤𑌿𑌂 𑌮𑍂𑌢𑌜𑌨𑌃 𑌕𑌰𑍋𑌤𑌿 ।
𑌵𑌿𑌲𑌕𑍍𑌷𑌣𑌂 𑌵𑍇𑌤𑍍𑌤𑌿 𑌵𑌿𑌚𑌾𑌰𑌶𑍀𑌲𑍋
𑌨𑌿𑌜𑌸𑍍𑌵𑌰𑍂𑌪𑌂 𑌪𑌰𑌮𑌾𑌰𑍍𑌥𑌭𑍂𑌤𑌮𑍍 ॥ 15𑍯॥

𑌦𑍇𑌹𑍋𑌽𑌹𑌮𑌿𑌤𑍍𑌯𑍇𑌵 𑌜𑌡𑌸𑍍𑌯 𑌬𑍁𑌦𑍍𑌧𑌿𑌃
𑌦𑍇𑌹𑍇 𑌚 𑌜𑍀𑌵𑍇 𑌵𑌿𑌦𑍁𑌷𑌸𑍍𑌤𑍍𑌵𑌹𑌂𑌧𑍀𑌃 ।
𑌵𑌿𑌵𑍇𑌕𑌵𑌿𑌜𑍍𑌞𑌾𑌨𑌵𑌤𑍋 𑌮𑌹𑌾𑌤𑍍𑌮𑌨𑍋
𑌬𑍍𑌰𑌹𑍍𑌮𑌾𑌹𑌮𑌿𑌤𑍍𑌯𑍇𑌵 𑌮𑌤𑌿𑌃 𑌸𑌦𑌾𑌤𑍍𑌮𑌨𑌿 ॥ 160॥

𑌅𑌤𑍍𑌰𑌾𑌤𑍍𑌮𑌬𑍁𑌦𑍍𑌧𑌿𑌂 𑌤𑍍𑌯𑌜 𑌮𑍂𑌢𑌬𑍁𑌦𑍍𑌧𑍇
𑌤𑍍𑌵𑌙𑍍𑌮𑌾𑌂𑌸𑌮𑍇𑌦𑍋𑌽𑌸𑍍𑌥𑌿𑌪𑍁𑌰𑍀𑌷𑌰𑌾𑌶𑍌 ।
𑌸𑌰𑍍𑌵𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌨𑌿𑌰𑍍𑌵𑌿𑌕𑌲𑍍𑌪𑍇
𑌕𑍁𑌰𑍁𑌷𑍍𑌵 𑌶𑌾𑌂𑌤𑌿𑌂 𑌪𑌰𑌮𑌾𑌂 𑌭𑌜𑌸𑍍𑌵 ॥ 161॥

𑌦𑍇𑌹𑍇𑌂𑌦𑍍𑌰𑌿𑌯𑌾𑌦𑌾𑌵𑌸𑌤𑌿 𑌭𑍍𑌰𑌮𑍋𑌦𑌿𑌤𑌾𑌂
𑌵𑌿𑌦𑍍𑌵𑌾𑌨𑌹𑌂𑌤𑌾𑌂 𑌨 𑌜𑌹𑌾𑌤𑌿 𑌯𑌾𑌵𑌤𑍍 ।
𑌤𑌾𑌵𑌨𑍍𑌨 𑌤𑌸𑍍𑌯𑌾𑌸𑍍𑌤𑌿 𑌵𑌿𑌮𑍁𑌕𑍍𑌤𑌿𑌵𑌾𑌰𑍍𑌤𑌾-
𑌪𑍍𑌯𑌸𑍍𑌤𑍍𑌵𑍇𑌷 𑌵𑍇𑌦𑌾𑌂𑌤𑌨𑌯𑌾𑌂𑌤𑌦𑌰𑍍𑌶𑍀 ॥ 162॥

𑌛𑌾𑌯𑌾𑌶𑌰𑍀𑌰𑍇 𑌪𑍍𑌰𑌤𑌿𑌬𑌿𑌂𑌬𑌗𑌾𑌤𑍍𑌰𑍇
𑌯𑌤𑍍𑌸𑍍𑌵𑌪𑍍𑌨𑌦𑍇𑌹𑍇 𑌹𑍃𑌦𑌿 𑌕𑌲𑍍𑌪𑌿𑌤𑌾𑌂𑌗𑍇 ।
𑌯𑌥𑌾𑌤𑍍𑌮𑌬𑍁𑌦𑍍𑌧𑌿𑌸𑍍𑌤𑌵 𑌨𑌾𑌸𑍍𑌤𑌿 𑌕𑌾𑌚𑌿-
𑌜𑍍𑌜𑍀𑌵𑌚𑍍𑌛𑌰𑍀𑌰𑍇 𑌚 𑌤𑌥𑍈𑌵 𑌮𑌾𑌽𑌸𑍍𑌤𑍁 ॥ 163॥

𑌦𑍇𑌹𑌾𑌤𑍍𑌮𑌧𑍀𑌰𑍇𑌵 𑌨𑍃𑌣𑌾𑌮𑌸𑌦𑍍𑌧𑌿𑌯𑌾𑌂
𑌜𑌨𑍍𑌮𑌾𑌦𑌿𑌦𑍁𑌃𑌖𑌪𑍍𑌰𑌭𑌵𑌸𑍍𑌯 𑌬𑍀𑌜𑌮𑍍 ।
𑌯𑌤𑌸𑍍𑌤𑌤𑌸𑍍𑌤𑍍𑌵𑌂 𑌜𑌹𑌿 𑌤𑌾𑌂 𑌪𑍍𑌰𑌯𑌤𑍍𑌨𑌾𑌤𑍍
𑌤𑍍𑌯𑌕𑍍𑌤𑍇 𑌤𑍁 𑌚𑌿𑌤𑍍𑌤𑍇 𑌨 𑌪𑍁𑌨𑌰𑍍𑌭𑌵𑌾𑌶𑌾 ॥ 164॥

𑌕𑌰𑍍𑌮𑍇𑌂𑌦𑍍𑌰𑌿𑌯𑍈𑌃 𑌪𑌂𑌚𑌭𑌿𑌰𑌂𑌚𑌿𑌤𑍋𑌽𑌯𑌂
𑌪𑍍𑌰𑌾𑌣𑍋 𑌭𑌵𑍇𑌤𑍍𑌪𑍍𑌰𑌾𑌣𑌮𑌯𑌸𑍍𑌤𑍁 𑌕𑍋𑌶𑌃 ॥

𑌯𑍇𑌨𑌾𑌤𑍍𑌮𑌵𑌾𑌨𑌨𑍍𑌨𑌮𑌯𑍋𑌽𑌨𑍁𑌪𑍂𑌰𑍍𑌣𑌃
𑌪𑍍𑌰𑌵𑌰𑍍𑌤𑌤𑍇𑌽𑌸𑍌 𑌸𑌕𑌲𑌕𑍍𑌰𑌿𑌯𑌾𑌸𑍁 ॥ 165॥

𑌨𑍈𑌵𑌾𑌤𑍍𑌮𑌾𑌪𑌿 𑌪𑍍𑌰𑌾𑌣𑌮𑌯𑍋 𑌵𑌾𑌯𑍁𑌵𑌿𑌕𑌾𑌰𑍋 (𑌪𑌾𑌠𑌭𑍇𑌦𑌃 – 𑌨𑍈𑌵𑌾𑌤𑍍𑌮𑌾𑌯𑌂)
𑌗𑌂𑌤𑌾𑌽𑌽𑌗𑌂𑌤𑌾 𑌵𑌾𑌯𑍁𑌵𑌦𑌂𑌤𑌰𑍍𑌬𑌹𑌿𑌰𑍇𑌷𑌃 ।
𑌯𑌸𑍍𑌮𑌾𑌤𑍍𑌕𑌿𑌂𑌚𑌿𑌤𑍍𑌕𑍍𑌵𑌾𑌪𑌿 𑌨 𑌵𑍇𑌤𑍍𑌤𑍀𑌷𑍍𑌟𑌮𑌨𑌿𑌷𑍍𑌟𑌂
𑌸𑍍𑌵𑌂 𑌵𑌾𑌨𑍍𑌯𑌂 𑌵𑌾 𑌕𑌿𑌂𑌚𑌨 𑌨𑌿𑌤𑍍𑌯𑌂 𑌪𑌰𑌤𑌂𑌤𑍍𑌰𑌃 ॥ 166॥

𑌜𑍍𑌞𑌾𑌨𑍇𑌂𑌦𑍍𑌰𑌿𑌯𑌾𑌣𑌿 𑌚 𑌮𑌨𑌶𑍍𑌚 𑌮𑌨𑍋𑌮𑌯𑌃 𑌸𑍍𑌯𑌾𑌤𑍍
𑌕𑍋𑌶𑍋 𑌮𑌮𑌾𑌹𑌮𑌿𑌤𑌿 𑌵𑌸𑍍𑌤𑍁𑌵𑌿𑌕𑌲𑍍𑌪𑌹𑍇𑌤𑍁𑌃 ।
𑌸𑌂𑌜𑍍𑌞𑌾𑌦𑌿𑌭𑍇𑌦𑌕𑌲𑌨𑌾𑌕𑌲𑌿𑌤𑍋 𑌬𑌲𑍀𑌯𑌾𑌂-
𑌸𑍍𑌤𑌤𑍍𑌪𑍂𑌰𑍍𑌵𑌕𑍋𑌶𑌮𑌭𑌿𑌪𑍂𑌰𑍍𑌯 𑌵𑌿𑌜𑍃𑌂𑌭𑌤𑍇 𑌯𑌃 ॥ 16𑍭॥ (𑌪𑌾𑌠𑌭𑍇𑌦𑌃 – 𑌅𑌨𑍁𑌪𑍂𑌰𑍍𑌯)
𑌪𑌂𑌚𑍇𑌂𑌦𑍍𑌰𑌿𑌯𑍈𑌃 𑌪𑌂𑌚𑌭𑌿𑌰𑍇𑌵 𑌹𑍋𑌤𑍃𑌭𑌿𑌃
𑌪𑍍𑌰𑌚𑍀𑌯𑌮𑌾𑌨𑍋 𑌵𑌿𑌷𑌯𑌾𑌜𑍍𑌯𑌧𑌾𑌰𑌯𑌾 ।
𑌜𑌾𑌜𑍍𑌵𑌲𑍍𑌯𑌮𑌾𑌨𑍋 𑌬𑌹𑍁𑌵𑌾𑌸𑌨𑍇𑌂𑌧𑌨𑍈𑌃
𑌮𑌨𑍋𑌮𑌯𑌾𑌗𑍍𑌨𑌿𑌰𑍍𑌦𑌹𑌤𑌿 𑌪𑍍𑌰𑌪𑌂𑌚𑌮𑍍 ॥ 16𑍮॥ (𑌪𑌾𑌠𑌭𑍇𑌦𑌃 – 𑌮𑌨𑍋𑌮𑌯𑍋𑌽𑌗𑍍𑌨𑌿𑌰𑍍𑌦𑌹𑌤𑌿)

𑌨 𑌹𑍍𑌯𑌸𑍍𑌤𑍍𑌯𑌵𑌿𑌦𑍍𑌯𑌾 𑌮𑌨𑌸𑍋𑌽𑌤𑌿𑌰𑌿𑌕𑍍𑌤𑌾
𑌮𑌨𑍋 𑌹𑍍𑌯𑌵𑌿𑌦𑍍𑌯𑌾 𑌭𑌵𑌬𑌂𑌧𑌹𑍇𑌤𑍁𑌃 ।
𑌤𑌸𑍍𑌮𑌿𑌨𑍍𑌵𑌿𑌨𑌷𑍍𑌟𑍇 𑌸𑌕𑌲𑌂 𑌵𑌿𑌨𑌷𑍍𑌟𑌂
𑌵𑌿𑌜𑍃𑌂𑌭𑌿𑌤𑍇𑌽𑌸𑍍𑌮𑌿𑌨𑍍𑌸𑌕𑌲𑌂 𑌵𑌿𑌜𑍃𑌂𑌭𑌤𑍇 ॥ 16𑍯॥

𑌸𑍍𑌵𑌪𑍍𑌨𑍇𑌽𑌰𑍍𑌥𑌶𑍂𑌨𑍍𑌯𑍇 𑌸𑍃𑌜𑌤𑌿 𑌸𑍍𑌵𑌶𑌕𑍍𑌤𑍍𑌯𑌾
𑌭𑍋𑌕𑍍𑌤𑍍𑌰𑌾𑌦𑌿𑌵𑌿𑌶𑍍𑌵𑌂 𑌮𑌨 𑌏𑌵 𑌸𑌰𑍍𑌵𑌮𑍍 ।
𑌤𑌥𑍈𑌵 𑌜𑌾𑌗𑍍𑌰𑌤𑍍𑌯𑌪𑌿 𑌨𑍋 𑌵𑌿𑌶𑍇𑌷𑌃
𑌤𑌤𑍍𑌸𑌰𑍍𑌵𑌮𑍇𑌤𑌨𑍍𑌮𑌨𑌸𑍋 𑌵𑌿𑌜𑍃𑌂𑌭𑌣𑌮𑍍 ॥ 1𑍭0॥

𑌸𑍁𑌷𑍁𑌪𑍍𑌤𑌿𑌕𑌾𑌲𑍇 𑌮𑌨𑌸𑌿 𑌪𑍍𑌰𑌲𑍀𑌨𑍇
𑌨𑍈𑌵𑌾𑌸𑍍𑌤𑌿 𑌕𑌿𑌂𑌚𑌿𑌤𑍍𑌸𑌕𑌲𑌪𑍍𑌰𑌸𑌿𑌦𑍍𑌧𑍇𑌃 ।
𑌅𑌤𑍋 𑌮𑌨𑌃𑌕𑌲𑍍𑌪𑌿𑌤 𑌏𑌵 𑌪𑍁𑌂𑌸𑌃
𑌸𑌂𑌸𑌾𑌰 𑌏𑌤𑌸𑍍𑌯 𑌨 𑌵𑌸𑍍𑌤𑍁𑌤𑍋𑌽𑌸𑍍𑌤𑌿 ॥ 1𑍭1॥

𑌵𑌾𑌯𑍁𑌨𑌾𑌽𑌽𑌨𑍀𑌯𑌤𑍇 𑌮𑍇𑌘𑌃 𑌪𑍁𑌨𑌸𑍍𑌤𑍇𑌨𑍈𑌵 𑌨𑍀𑌯𑌤𑍇 । (𑌪𑌾𑌠𑌭𑍇𑌦𑌃 – 𑌵𑌾𑌯𑍁𑌨𑌾 𑌨𑍀𑌯𑌤𑍇 𑌮𑍇𑌘𑌃 𑌪𑍁𑌨𑌸𑍍𑌤𑍇𑌨𑍈𑌵 𑌲𑍀𑌯𑌤𑍇)
𑌮𑌨𑌸𑌾 𑌕𑌲𑍍𑌪𑍍𑌯𑌤𑍇 𑌬𑌂𑌧𑍋 𑌮𑍋𑌕𑍍𑌷𑌸𑍍𑌤𑍇𑌨𑍈𑌵 𑌕𑌲𑍍𑌪𑍍𑌯𑌤𑍇 ॥ 1𑍭2॥

𑌦𑍇𑌹𑌾𑌦𑌿𑌸𑌰𑍍𑌵𑌵𑌿𑌷𑌯𑍇 𑌪𑌰𑌿𑌕𑌲𑍍𑌪𑍍𑌯 𑌰𑌾𑌗𑌂
𑌬𑌧𑍍𑌨𑌾𑌤𑌿 𑌤𑍇𑌨 𑌪𑍁𑌰𑍁𑌷𑌂 𑌪𑌶𑍁𑌵𑌦𑍍𑌗𑍁𑌣𑍇𑌨 ।
𑌵𑍈𑌰𑌸𑍍𑌯𑌮𑌤𑍍𑌰 𑌵𑌿𑌷𑌵𑌤𑍍 𑌸𑍁𑌵𑌿𑌧𑌾𑌯 𑌪𑌶𑍍𑌚𑌾𑌦𑍍
𑌏𑌨𑌂 𑌵𑌿𑌮𑍋𑌚𑌯𑌤𑌿 𑌤𑌨𑍍𑌮𑌨 𑌏𑌵 𑌬𑌂𑌧𑌾𑌤𑍍 ॥ 1𑍭3॥

𑌤𑌸𑍍𑌮𑌾𑌨𑍍𑌮𑌨𑌃 𑌕𑌾𑌰𑌣𑌮𑌸𑍍𑌯 𑌜𑌂𑌤𑍋𑌃
𑌬𑌂𑌧𑌸𑍍𑌯 𑌮𑍋𑌕𑍍𑌷𑌸𑍍𑌯 𑌚 𑌵𑌾 𑌵𑌿𑌧𑌾𑌨𑍇 ।
𑌬𑌂𑌧𑌸𑍍𑌯 𑌹𑍇𑌤𑍁𑌰𑍍𑌮𑌲𑌿𑌨𑌂 𑌰𑌜𑍋𑌗𑍁𑌣𑍈𑌃
𑌮𑍋𑌕𑍍𑌷𑌸𑍍𑌯 𑌶𑍁𑌦𑍍𑌧𑌂 𑌵𑌿𑌰𑌜𑌸𑍍𑌤𑌮𑌸𑍍𑌕𑌮𑍍 ॥ 1𑍭4॥

𑌵𑌿𑌵𑍇𑌕𑌵𑍈𑌰𑌾𑌗𑍍𑌯𑌗𑍁𑌣𑌾𑌤𑌿𑌰𑍇𑌕𑌾-
𑌚𑍍𑌛𑍁𑌦𑍍𑌧𑌤𑍍𑌵𑌮𑌾𑌸𑌾𑌦𑍍𑌯 𑌮𑌨𑍋 𑌵𑌿𑌮𑍁𑌕𑍍𑌤𑍍𑌯𑍈 ।
𑌭𑌵𑌤𑍍𑌯𑌤𑍋 𑌬𑍁𑌦𑍍𑌧𑌿𑌮𑌤𑍋 𑌮𑍁𑌮𑍁𑌕𑍍𑌷𑍋-
𑌸𑍍𑌤𑌾𑌭𑍍𑌯𑌾𑌂 𑌦𑍃𑌢𑌾𑌭𑍍𑌯𑌾𑌂 𑌭𑌵𑌿𑌤𑌵𑍍𑌯𑌮𑌗𑍍𑌰𑍇 ॥ 1𑍭5॥

𑌮𑌨𑍋 𑌨𑌾𑌮 𑌮𑌹𑌾𑌵𑍍𑌯𑌾𑌘𑍍𑌰𑍋 𑌵𑌿𑌷𑌯𑌾𑌰𑌣𑍍𑌯𑌭𑍂𑌮𑌿𑌷𑍁 ।
𑌚𑌰𑌤𑍍𑌯𑌤𑍍𑌰 𑌨 𑌗𑌚𑍍𑌛𑌂𑌤𑍁 𑌸𑌾𑌧𑌵𑍋 𑌯𑍇 𑌮𑍁𑌮𑍁𑌕𑍍𑌷𑌵𑌃 ॥ 1𑍭6॥

𑌮𑌨𑌃 𑌪𑍍𑌰𑌸𑍂𑌤𑍇 𑌵𑌿𑌷𑌯𑌾𑌨𑌶𑍇𑌷𑌾𑌨𑍍
𑌸𑍍𑌥𑍂𑌲𑌾𑌤𑍍𑌮𑌨𑌾 𑌸𑍂𑌕𑍍𑌷𑍍𑌮𑌤𑌯𑌾 𑌚 𑌭𑍋𑌕𑍍𑌤𑍁𑌃 ।
𑌶𑌰𑍀𑌰𑌵𑌰𑍍𑌣𑌾𑌶𑍍𑌰𑌮𑌜𑌾𑌤𑌿𑌭𑍇𑌦𑌾𑌨𑍍
𑌗𑍁𑌣𑌕𑍍𑌰𑌿𑌯𑌾𑌹𑍇𑌤𑍁𑌫𑌲𑌾𑌨𑌿 𑌨𑌿𑌤𑍍𑌯𑌮𑍍 ॥ 1𑍭𑍭॥

𑌅𑌸𑌂𑌗𑌚𑌿𑌦𑍍𑌰𑍂𑌪𑌮𑌮𑍁𑌂 𑌵𑌿𑌮𑍋𑌹𑍍𑌯
𑌦𑍇𑌹𑍇𑌂𑌦𑍍𑌰𑌿𑌯𑌪𑍍𑌰𑌾𑌣𑌗𑍁𑌣𑍈𑌰𑍍𑌨𑌿𑌬𑌦𑍍𑌧𑍍𑌯 ।
𑌅𑌹𑌮𑍍𑌮𑌮𑍇𑌤𑌿 𑌭𑍍𑌰𑌮𑌯𑌤𑍍𑌯𑌜𑌸𑍍𑌰𑌂
𑌮𑌨𑌃 𑌸𑍍𑌵𑌕𑍃𑌤𑍍𑌯𑍇𑌷𑍁 𑌫𑌲𑍋𑌪𑌭𑍁𑌕𑍍𑌤𑌿𑌷𑍁 ॥ 1𑍭𑍮॥

𑌅𑌧𑍍𑌯𑌾𑌸𑌦𑍋𑌷𑌾𑌤𑍍𑌪𑍁𑌰𑍁𑌷𑌸𑍍𑌯 𑌸𑌂𑌸𑍃𑌤𑌿𑌃 (𑌪𑌾𑌠𑌭𑍇𑌦𑌃 – 𑌅𑌧𑍍𑌯𑌾𑌸𑌯𑍋𑌗𑌾𑌤𑍍)
𑌅𑌧𑍍𑌯𑌾𑌸𑌬𑌂𑌧𑌸𑍍𑌤𑍍𑌵𑌮𑍁𑌨𑍈𑌵 𑌕𑌲𑍍𑌪𑌿𑌤𑌃 ।
𑌰𑌜𑌸𑍍𑌤𑌮𑍋𑌦𑍋𑌷𑌵𑌤𑍋𑌽𑌵𑌿𑌵𑍇𑌕𑌿𑌨𑍋
𑌜𑌨𑍍𑌮𑌾𑌦𑌿𑌦𑍁𑌃𑌖𑌸𑍍𑌯 𑌨𑌿𑌦𑌾𑌨𑌮𑍇𑌤𑌤𑍍 ॥ 1𑍭𑍯॥

𑌅𑌤𑌃 𑌪𑍍𑌰𑌾𑌹𑍁𑌰𑍍𑌮𑌨𑍋𑌽𑌵𑌿𑌦𑍍𑌯𑌾𑌂 𑌪𑌂𑌡𑌿𑌤𑌾𑌸𑍍𑌤𑌤𑍍𑌤𑍍𑌵𑌦𑌰𑍍𑌶𑌿𑌨𑌃 ।
𑌯𑍇𑌨𑍈𑌵 𑌭𑍍𑌰𑌾𑌮𑍍𑌯𑌤𑍇 𑌵𑌿𑌶𑍍𑌵𑌂 𑌵𑌾𑌯𑍁𑌨𑍇𑌵𑌾𑌭𑍍𑌰𑌮𑌂𑌡𑌲𑌮𑍍 ॥ 1𑍮0॥

𑌤𑌨𑍍𑌮𑌨𑌃𑌶𑍋𑌧𑌨𑌂 𑌕𑌾𑌰𑍍𑌯𑌂 𑌪𑍍𑌰𑌯𑌤𑍍𑌨𑍇𑌨 𑌮𑍁𑌮𑍁𑌕𑍍𑌷𑍁𑌣𑌾 ।
𑌵𑌿𑌶𑍁𑌦𑍍𑌧𑍇 𑌸𑌤𑌿 𑌚𑍈𑌤𑌸𑍍𑌮𑌿𑌨𑍍𑌮𑍁𑌕𑍍𑌤𑌿𑌃 𑌕𑌰𑌫𑌲𑌾𑌯𑌤𑍇 ॥ 1𑍮1॥

𑌮𑍋𑌕𑍍𑌷𑍈𑌕𑌸𑌕𑍍𑌤𑍍𑌯𑌾 𑌵𑌿𑌷𑌯𑍇𑌷𑍁 𑌰𑌾𑌗𑌂
𑌨𑌿𑌰𑍍𑌮𑍂𑌲𑍍𑌯 𑌸𑌨𑍍𑌨𑍍𑌯𑌸𑍍𑌯 𑌚 𑌸𑌰𑍍𑌵𑌕𑌰𑍍𑌮 ।
𑌸𑌚𑍍𑌛𑍍𑌰𑌦𑍍𑌧𑌯𑌾 𑌯𑌃 𑌶𑍍𑌰𑌵𑌣𑌾𑌦𑌿𑌨𑌿𑌷𑍍𑌠𑍋
𑌰𑌜𑌃𑌸𑍍𑌵𑌭𑌾𑌵𑌂 𑌸 𑌧𑍁𑌨𑍋𑌤𑌿 𑌬𑍁𑌦𑍍𑌧𑍇𑌃 ॥ 1𑍮2॥

𑌮𑌨𑍋𑌮𑌯𑍋 𑌨𑌾𑌪𑌿 𑌭𑌵𑍇𑌤𑍍𑌪𑌰𑌾𑌤𑍍𑌮𑌾
𑌹𑍍𑌯𑌾𑌦𑍍𑌯𑌂𑌤𑌵𑌤𑍍𑌤𑍍𑌵𑌾𑌤𑍍𑌪𑌰𑌿𑌣𑌾𑌮𑌿𑌭𑌾𑌵𑌾𑌤𑍍 ।
𑌦𑍁𑌃𑌖𑌾𑌤𑍍𑌮𑌕𑌤𑍍𑌵𑌾𑌦𑍍𑌵𑌿𑌷𑌯𑌤𑍍𑌵𑌹𑍇𑌤𑍋𑌃
𑌦𑍍𑌰𑌷𑍍𑌟𑌾 𑌹𑌿 𑌦𑍃𑌶𑍍𑌯𑌾𑌤𑍍𑌮𑌤𑌯𑌾 𑌨 𑌦𑍃𑌷𑍍𑌟𑌃 ॥ 1𑍮3॥

𑌬𑍁𑌦𑍍𑌧𑌿𑌰𑍍𑌬𑍁𑌦𑍍𑌧𑍀𑌂𑌦𑍍𑌰𑌿𑌯𑍈𑌃 𑌸𑌾𑌰𑍍𑌧𑌂 𑌸𑌵𑍃𑌤𑍍𑌤𑌿𑌃 𑌕𑌰𑍍𑌤𑍃𑌲𑌕𑍍𑌷𑌣𑌃 ।
𑌵𑌿𑌜𑍍𑌞𑌾𑌨𑌮𑌯𑌕𑍋𑌶𑌃 𑌸𑍍𑌯𑌾𑌤𑍍𑌪𑍁𑌂𑌸𑌃 𑌸𑌂𑌸𑌾𑌰𑌕𑌾𑌰𑌣𑌮𑍍 ॥ 1𑍮4॥

𑌅𑌨𑍁𑌵𑍍𑌰𑌜𑌚𑍍𑌚𑌿𑌤𑍍𑌪𑍍𑌰𑌤𑌿𑌬𑌿𑌂𑌬𑌶𑌕𑍍𑌤𑌿𑌃
𑌵𑌿𑌜𑍍𑌞𑌾𑌨𑌸𑌂𑌜𑍍𑌞𑌃 𑌪𑍍𑌰𑌕𑍃𑌤𑍇𑌰𑍍𑌵𑌿𑌕𑌾𑌰𑌃 ।
𑌜𑍍𑌞𑌾𑌨𑌕𑍍𑌰𑌿𑌯𑌾𑌵𑌾𑌨𑌹𑌮𑌿𑌤𑍍𑌯𑌜𑌸𑍍𑌰𑌂
𑌦𑍇𑌹𑍇𑌂𑌦𑍍𑌰𑌿𑌯𑌾𑌦𑌿𑌷𑍍𑌵𑌭𑌿𑌮𑌨𑍍𑌯𑌤𑍇 𑌭𑍃𑌶𑌮𑍍 ॥ 1𑍮5॥

𑌅𑌨𑌾𑌦𑌿𑌕𑌾𑌲𑍋𑌽𑌯𑌮𑌹𑌂𑌸𑍍𑌵𑌭𑌾𑌵𑍋
𑌜𑍀𑌵𑌃 𑌸𑌮𑌸𑍍𑌤𑌵𑍍𑌯𑌵𑌹𑌾𑌰𑌵𑍋𑌢𑌾 ।
𑌕𑌰𑍋𑌤𑌿 𑌕𑌰𑍍𑌮𑌾𑌣𑍍𑌯𑌪𑌿 𑌪𑍂𑌰𑍍𑌵𑌵𑌾𑌸𑌨𑌃 (𑌪𑌾𑌠𑌭𑍇𑌦𑌃 – 𑌕𑌰𑍍𑌮𑌾𑌣𑍍𑌯𑌨𑍁)
𑌪𑍁𑌣𑍍𑌯𑌾𑌨𑍍𑌯𑌪𑍁𑌣𑍍𑌯𑌾𑌨𑌿 𑌚 𑌤𑌤𑍍𑌫𑌲𑌾𑌨𑌿 ॥ 1𑍮6॥

𑌭𑍁𑌂𑌕𑍍𑌤𑍇 𑌵𑌿𑌚𑌿𑌤𑍍𑌰𑌾𑌸𑍍𑌵𑌪𑌿 𑌯𑍋𑌨𑌿𑌷𑍁 𑌵𑍍𑌰𑌜-
𑌨𑍍𑌨𑌾𑌯𑌾𑌤𑌿 𑌨𑌿𑌰𑍍𑌯𑌾𑌤𑍍𑌯𑌧 𑌊𑌰𑍍𑌧𑍍𑌵𑌮𑍇𑌷𑌃 ।
𑌅𑌸𑍍𑌯𑍈𑌵 𑌵𑌿𑌜𑍍𑌞𑌾𑌨𑌮𑌯𑌸𑍍𑌯 𑌜𑌾𑌗𑍍𑌰𑌤𑍍-
𑌸𑍍𑌵𑌪𑍍𑌨𑌾𑌦𑍍𑌯𑌵𑌸𑍍𑌥𑌾𑌃 𑌸𑍁𑌖𑌦𑍁𑌃𑌖𑌭𑍋𑌗𑌃 ॥ 1𑍮𑍭॥

𑌦𑍇𑌹𑌾𑌦𑌿𑌨𑌿𑌷𑍍𑌠𑌾𑌶𑍍𑌰𑌮𑌧𑌰𑍍𑌮𑌕𑌰𑍍𑌮-
𑌗𑍁𑌣𑌾𑌭𑌿𑌮𑌾𑌨𑌃 𑌸𑌤𑌤𑌂 𑌮𑌮𑍇𑌤𑌿 ।
𑌵𑌿𑌜𑍍𑌞𑌾𑌨𑌕𑍋𑌶𑍋𑌽𑌯𑌮𑌤𑌿𑌪𑍍𑌰𑌕𑌾𑌶𑌃
𑌪𑍍𑌰𑌕𑍃𑌷𑍍𑌟𑌸𑌾𑌨𑍍𑌨𑌿𑌧𑍍𑌯𑌵𑌶𑌾𑌤𑍍𑌪𑌰𑌾𑌤𑍍𑌮𑌨𑌃 ।
𑌅𑌤𑍋 𑌭𑌵𑌤𑍍𑌯𑍇𑌷 𑌉𑌪𑌾𑌧𑌿𑌰𑌸𑍍𑌯
𑌯𑌦𑌾𑌤𑍍𑌮𑌧𑍀𑌃 𑌸𑌂𑌸𑌰𑌤𑌿 𑌭𑍍𑌰𑌮𑍇𑌣 ॥ 1𑍮𑍮॥

𑌯𑍋𑌽𑌯𑌂 𑌵𑌿𑌜𑍍𑌞𑌾𑌨𑌮𑌯𑌃 𑌪𑍍𑌰𑌾𑌣𑍇𑌷𑍁 𑌹𑍃𑌦𑌿 𑌸𑍍𑌫𑍁𑌰𑌤𑍍𑌯𑌯𑌂 𑌜𑍍𑌯𑍋𑌤𑌿𑌃 । (𑌪𑌾𑌠𑌭𑍇𑌦𑌃 – 𑌸𑍍𑌫𑍁𑌰𑌤𑍍𑌸𑍍𑌵𑌯𑌂𑌜𑍍𑌯𑍋𑌤𑌿𑌃)
𑌕𑍂𑌟𑌸𑍍𑌥𑌃 𑌸𑌨𑍍𑌨𑌾𑌤𑍍𑌮𑌾 𑌕𑌰𑍍𑌤𑌾 𑌭𑍋𑌕𑍍𑌤𑌾 𑌭𑌵𑌤𑍍𑌯𑍁𑌪𑌾𑌧𑌿𑌸𑍍𑌥𑌃 ॥ 1𑍮𑍯॥

𑌸𑍍𑌵𑌯𑌂 𑌪𑌰𑌿𑌚𑍍𑌛𑍇𑌦𑌮𑍁𑌪𑍇𑌤𑍍𑌯 𑌬𑍁𑌦𑍍𑌧𑍇𑌃
𑌤𑌾𑌦𑌾𑌤𑍍𑌮𑍍𑌯𑌦𑍋𑌷𑍇𑌣 𑌪𑌰𑌂 𑌮𑍃𑌷𑌾𑌤𑍍𑌮𑌨𑌃 ।
𑌸𑌰𑍍𑌵𑌾𑌤𑍍𑌮𑌕𑌃 𑌸𑌨𑍍𑌨𑌪𑌿 𑌵𑍀𑌕𑍍𑌷𑌤𑍇 𑌸𑍍𑌵𑌯𑌂
𑌸𑍍𑌵𑌤𑌃 𑌪𑍃𑌥𑌕𑍍𑌤𑍍𑌵𑍇𑌨 𑌮𑍃𑌦𑍋 𑌘𑌟𑌾𑌨𑌿𑌵 ॥ 1𑍯0॥

𑌉𑌪𑌾𑌧𑌿𑌸𑌂𑌬𑌂𑌧𑌵𑌶𑌾𑌤𑍍𑌪𑌰𑌾𑌤𑍍𑌮𑌾
𑌹𑍍𑌯𑍁𑌪𑌾𑌧𑌿𑌧𑌰𑍍𑌮𑌾𑌨𑌨𑍁𑌭𑌾𑌤𑌿 𑌤𑌦𑍍𑌗𑍁𑌣𑌃 । (𑌪𑌾𑌠𑌭𑍇𑌦𑌃 – 𑌽𑌪𑍍𑌯𑍁𑌪𑌾𑌧𑌿)
𑌅𑌯𑍋𑌵𑌿𑌕𑌾𑌰𑌾𑌨𑌵𑌿𑌕𑌾𑌰𑌿𑌵𑌹𑍍𑌨𑌿𑌵𑌤𑍍
𑌸𑌦𑍈𑌕𑌰𑍂𑌪𑍋𑌽𑌪𑌿 𑌪𑌰𑌃 𑌸𑍍𑌵𑌭𑌾𑌵𑌾𑌤𑍍 ॥ 1𑍯1॥

𑌶𑌿𑌷𑍍𑌯 𑌉𑌵𑌾𑌚 ।
𑌭𑍍𑌰𑌮𑍇𑌣𑌾𑌪𑍍𑌯𑌨𑍍𑌯𑌥𑌾 𑌵𑌾𑌽𑌸𑍍𑌤𑍁 𑌜𑍀𑌵𑌭𑌾𑌵𑌃 𑌪𑌰𑌾𑌤𑍍𑌮𑌨𑌃 ।
𑌤𑌦𑍁𑌪𑌾𑌧𑍇𑌰𑌨𑌾𑌦𑌿𑌤𑍍𑌵𑌾𑌨𑍍𑌨𑌾𑌨𑌾𑌦𑍇𑌰𑍍𑌨𑌾𑌶 𑌇𑌷𑍍𑌯𑌤𑍇 ॥ 1𑍯2॥

𑌅𑌤𑍋𑌽𑌸𑍍𑌯 𑌜𑍀𑌵𑌭𑌾𑌵𑍋𑌽𑌪𑌿 𑌨𑌿𑌤𑍍𑌯𑌾 𑌭𑌵𑌤𑌿 𑌸𑌂𑌸𑍃𑌤𑌿𑌃 ।
𑌨 𑌨𑌿𑌵𑌰𑍍𑌤𑍇𑌤 𑌤𑌨𑍍𑌮𑍋𑌕𑍍𑌷𑌃 𑌕𑌥𑌂 𑌮𑍇 𑌶𑍍𑌰𑍀𑌗𑍁𑌰𑍋 𑌵𑌦 ॥ 1𑍯3॥

𑌶𑍍𑌰𑍀𑌗𑍁𑌰𑍁𑌰𑍁𑌵𑌾𑌚 ।
𑌸𑌮𑍍𑌯𑌕𑍍𑌪𑍃𑌷𑍍𑌟𑌂 𑌤𑍍𑌵𑌯𑌾 𑌵𑌿𑌦𑍍𑌵𑌨𑍍𑌸𑌾𑌵𑌧𑌾𑌨𑍇𑌨 𑌤𑌚𑍍𑌛𑍃𑌣𑍁 ।
𑌪𑍍𑌰𑌾𑌮𑌾𑌣𑌿𑌕𑍀 𑌨 𑌭𑌵𑌤𑌿 𑌭𑍍𑌰𑌾𑌂𑌤𑍍𑌯𑌾 𑌮𑍋𑌹𑌿𑌤𑌕𑌲𑍍𑌪𑌨𑌾 ॥ 1𑍯4॥

𑌭𑍍𑌰𑌾𑌂𑌤𑌿𑌂 𑌵𑌿𑌨𑌾 𑌤𑍍𑌵𑌸𑌂𑌗𑌸𑍍𑌯 𑌨𑌿𑌷𑍍𑌕𑍍𑌰𑌿𑌯𑌸𑍍𑌯 𑌨𑌿𑌰𑌾𑌕𑍃𑌤𑍇𑌃 ।
𑌨 𑌘𑌟𑍇𑌤𑌾𑌰𑍍𑌥𑌸𑌂𑌬𑌂𑌧𑍋 𑌨𑌭𑌸𑍋 𑌨𑍀𑌲𑌤𑌾𑌦𑌿𑌵𑌤𑍍 ॥ 1𑍯5॥

𑌸𑍍𑌵𑌸𑍍𑌯 𑌦𑍍𑌰𑌷𑍍𑌟𑍁𑌰𑍍𑌨𑌿𑌰𑍍𑌗𑍁𑌣𑌸𑍍𑌯𑌾𑌕𑍍𑌰𑌿𑌯𑌸𑍍𑌯
𑌪𑍍𑌰𑌤𑍍𑌯𑌗𑍍𑌬𑍋𑌧𑌾𑌨𑌂𑌦𑌰𑍂𑌪𑌸𑍍𑌯 𑌬𑍁𑌦𑍍𑌧𑍇𑌃 ।
𑌭𑍍𑌰𑌾𑌂𑌤𑍍𑌯𑌾 𑌪𑍍𑌰𑌾𑌪𑍍𑌤𑍋 𑌜𑍀𑌵𑌭𑌾𑌵𑍋 𑌨 𑌸𑌤𑍍𑌯𑍋
𑌮𑍋𑌹𑌾𑌪𑌾𑌯𑍇 𑌨𑌾𑌸𑍍𑌤𑍍𑌯𑌵𑌸𑍍𑌤𑍁𑌸𑍍𑌵𑌭𑌾𑌵𑌾𑌤𑍍 ॥ 1𑍯6॥

𑌯𑌾𑌵𑌦𑍍𑌭𑍍𑌰𑌾𑌂𑌤𑌿𑌸𑍍𑌤𑌾𑌵𑌦𑍇𑌵𑌾𑌸𑍍𑌯 𑌸𑌤𑍍𑌤𑌾
𑌮𑌿𑌥𑍍𑌯𑌾𑌜𑍍𑌞𑌾𑌨𑍋𑌜𑍍𑌜𑍃𑌂𑌭𑌿𑌤𑌸𑍍𑌯 𑌪𑍍𑌰𑌮𑌾𑌦𑌾𑌤𑍍 ।
𑌰𑌜𑍍𑌜𑍍𑌵𑌾𑌂 𑌸𑌰𑍍𑌪𑍋 𑌭𑍍𑌰𑌾𑌂𑌤𑌿𑌕𑌾𑌲𑍀𑌨 𑌏𑌵
𑌭𑍍𑌰𑌾𑌂𑌤𑍇𑌰𑍍𑌨𑌾𑌶𑍇 𑌨𑍈𑌵 𑌸𑌰𑍍𑌪𑍋𑌽𑌪𑌿 𑌤𑌦𑍍𑌵𑌤𑍍 ॥ 1𑍯𑍭॥ (𑌪𑌾𑌠𑌭𑍇𑌦𑌃 – 𑌸𑌰𑍍𑌪𑍋𑌽𑌸𑍍𑌤𑌿)

𑌅𑌨𑌾𑌦𑌿𑌤𑍍𑌵𑌮𑌵𑌿𑌦𑍍𑌯𑌾𑌯𑌾𑌃 𑌕𑌾𑌰𑍍𑌯𑌸𑍍𑌯𑌾𑌪𑌿 𑌤𑌥𑍇𑌷𑍍𑌯𑌤𑍇 ।
𑌉𑌤𑍍𑌪𑌨𑍍𑌨𑌾𑌯𑌾𑌂 𑌤𑍁 𑌵𑌿𑌦𑍍𑌯𑌾𑌯𑌾𑌮𑌾𑌵𑌿𑌦𑍍𑌯𑌕𑌮𑌨𑌾𑌦𑍍𑌯𑌪𑌿 ॥ 1𑍯𑍮॥

𑌪𑍍𑌰𑌬𑍋𑌧𑍇 𑌸𑍍𑌵𑌪𑍍𑌨𑌵𑌤𑍍𑌸𑌰𑍍𑌵𑌂 𑌸𑌹𑌮𑍂𑌲𑌂 𑌵𑌿𑌨𑌶𑍍𑌯𑌤𑌿 ।
𑌅𑌨𑌾𑌦𑍍𑌯𑌪𑍀𑌦𑌂 𑌨𑍋 𑌨𑌿𑌤𑍍𑌯𑌂 𑌪𑍍𑌰𑌾𑌗𑌭𑌾𑌵 𑌇𑌵 𑌸𑍍𑌫𑍁𑌟𑌮𑍍 ॥ 1𑍯𑍯॥

𑌅𑌨𑌾𑌦𑍇𑌰𑌪𑌿 𑌵𑌿𑌧𑍍𑌵𑌂𑌸𑌃 𑌪𑍍𑌰𑌾𑌗𑌭𑌾𑌵𑌸𑍍𑌯 𑌵𑍀𑌕𑍍𑌷𑌿𑌤𑌃 ।
𑌯𑌦𑍍𑌬𑍁𑌦𑍍𑌧𑍍𑌯𑍁𑌪𑌾𑌧𑌿𑌸𑌂𑌬𑌂𑌧𑌾𑌤𑍍𑌪𑌰𑌿𑌕𑌲𑍍𑌪𑌿𑌤𑌮𑌾𑌤𑍍𑌮𑌨𑌿 ॥ 200॥

𑌜𑍀𑌵𑌤𑍍𑌵𑌂 𑌨 𑌤𑌤𑍋𑌽𑌨𑍍𑌯𑌸𑍍𑌤𑍁 𑌸𑍍𑌵𑌰𑍂𑌪𑍇𑌣 𑌵𑌿𑌲𑌕𑍍𑌷𑌣𑌃 । (𑌪𑌾𑌠𑌭𑍇𑌦𑌃 – 𑌤𑌤𑍋𑌽𑌨𑍍𑌯𑌤𑍍𑌤𑍁)
𑌸𑌂𑌬𑌂𑌧𑌸𑍍𑌤𑍍𑌵𑌾𑌤𑍍𑌮𑌨𑍋 𑌬𑍁𑌦𑍍𑌧𑍍𑌯𑌾 𑌮𑌿𑌥𑍍𑌯𑌾𑌜𑍍𑌞𑌾𑌨𑌪𑍁𑌰𑌃𑌸𑌰𑌃 ॥ 201॥ (𑌪𑌾𑌠𑌭𑍇𑌦𑌃 – 𑌸𑌂𑌬𑌂𑌧𑌃 𑌸𑍍𑌵𑌾𑌤𑍍𑌮𑌨𑍋)

𑌵𑌿𑌨𑌿𑌵𑍃𑌤𑍍𑌤𑌿𑌰𑍍𑌭𑌵𑍇𑌤𑍍𑌤𑌸𑍍𑌯 𑌸𑌮𑍍𑌯𑌗𑍍𑌜𑍍𑌞𑌾𑌨𑍇𑌨 𑌨𑌾𑌨𑍍𑌯𑌥𑌾 ।
𑌬𑍍𑌰𑌹𑍍𑌮𑌾𑌤𑍍𑌮𑍈𑌕𑌤𑍍𑌵𑌵𑌿𑌜𑍍𑌞𑌾𑌨𑌂 𑌸𑌮𑍍𑌯𑌗𑍍𑌜𑍍𑌞𑌾𑌨𑌂 𑌶𑍍𑌰𑍁𑌤𑍇𑌰𑍍𑌮𑌤𑌮𑍍 ॥ 202॥

𑌤𑌦𑌾𑌤𑍍𑌮𑌾𑌨𑌾𑌤𑍍𑌮𑌨𑍋𑌃 𑌸𑌮𑍍𑌯𑌗𑍍𑌵𑌿𑌵𑍇𑌕𑍇𑌨𑍈𑌵 𑌸𑌿𑌧𑍍𑌯𑌤𑌿 ।
𑌤𑌤𑍋 𑌵𑌿𑌵𑍇𑌕𑌃 𑌕𑌰𑍍𑌤𑌵𑍍𑌯𑌃 𑌪𑍍𑌰𑌤𑍍𑌯𑌗𑌾𑌤𑍍𑌮𑌸𑌦𑌾𑌤𑍍𑌮𑌨𑍋𑌃 ॥ 203॥ (𑌪𑌾𑌠𑌭𑍇𑌦𑌃 – 𑌪𑍍𑌰𑌤𑍍𑌯𑌗𑌾𑌤𑍍𑌮𑌾𑌸𑌦𑌾𑌤𑍍𑌮𑌨𑍋𑌃)

𑌜𑌲𑌂 𑌪𑌂𑌕𑌵𑌦𑌤𑍍𑌯𑌂𑌤𑌂 𑌪𑌂𑌕𑌾𑌪𑌾𑌯𑍇 𑌜𑌲𑌂 𑌸𑍍𑌫𑍁𑌟𑌮𑍍 । (𑌪𑌾𑌠𑌭𑍇𑌦𑌃 – 𑌪𑌂𑌕𑌵𑌦𑌸𑍍𑌪𑌷𑍍𑌟𑌂)
𑌯𑌥𑌾 𑌭𑌾𑌤𑌿 𑌤𑌥𑌾𑌤𑍍𑌮𑌾𑌪𑌿 𑌦𑍋𑌷𑌾𑌭𑌾𑌵𑍇 𑌸𑍍𑌫𑍁𑌟𑌪𑍍𑌰𑌭𑌃 ॥ 204॥

𑌅𑌸𑌨𑍍𑌨𑌿𑌵𑍃𑌤𑍍𑌤𑍌 𑌤𑍁 𑌸𑌦𑌾𑌤𑍍𑌮𑌨𑌾 𑌸𑍍𑌫𑍁𑌟𑌂
𑌪𑍍𑌰𑌤𑍀𑌤𑌿𑌰𑍇𑌤𑌸𑍍𑌯 𑌭𑌵𑍇𑌤𑍍𑌪𑍍𑌰𑌤𑍀𑌚𑌃 ।
𑌤𑌤𑍋 𑌨𑌿𑌰𑌾𑌸𑌃 𑌕𑌰𑌣𑍀𑌯 𑌏𑌵
𑌸𑌦𑌾𑌤𑍍𑌮𑌨𑌃 𑌸𑌾𑌧𑍍𑌵𑌹𑌮𑌾𑌦𑌿𑌵𑌸𑍍𑌤𑍁𑌨𑌃 ॥ 205॥ (𑌪𑌾𑌠𑌭𑍇𑌦𑌃 – 𑌅𑌸𑌦𑌾𑌤𑍍𑌮𑌨𑌃)

𑌅𑌤𑍋 𑌨𑌾𑌯𑌂 𑌪𑌰𑌾𑌤𑍍𑌮𑌾 𑌸𑍍𑌯𑌾𑌦𑍍𑌵𑌿𑌜𑍍𑌞𑌾𑌨𑌮𑌯𑌶𑌬𑍍𑌦𑌭𑌾𑌕𑍍 ।
𑌵𑌿𑌕𑌾𑌰𑌿𑌤𑍍𑌵𑌾𑌜𑍍𑌜𑌡𑌤𑍍𑌵𑌾𑌚𑍍𑌚 𑌪𑌰𑌿𑌚𑍍𑌛𑌿𑌨𑍍𑌨𑌤𑍍𑌵𑌹𑍇𑌤𑍁𑌤𑌃 ।
𑌦𑍃𑌶𑍍𑌯𑌤𑍍𑌵𑌾𑌦𑍍𑌵𑍍𑌯𑌭𑌿𑌚𑌾𑌰𑌿𑌤𑍍𑌵𑌾𑌨𑍍𑌨𑌾𑌨𑌿𑌤𑍍𑌯𑍋 𑌨𑌿𑌤𑍍𑌯 𑌇𑌷𑍍𑌯𑌤𑍇 ॥ 206॥

𑌆𑌨𑌂𑌦𑌪𑍍𑌰𑌤𑌿𑌬𑌿𑌂𑌬𑌚𑍁𑌂𑌬𑌿𑌤𑌤𑌨𑍁𑌰𑍍𑌵𑍃𑌤𑍍𑌤𑌿𑌸𑍍𑌤𑌮𑍋𑌜𑍃𑌂𑌭𑌿𑌤𑌾
𑌸𑍍𑌯𑌾𑌦𑌾𑌨𑌂𑌦𑌮𑌯𑌃 𑌪𑍍𑌰𑌿𑌯𑌾𑌦𑌿𑌗𑍁𑌣𑌕𑌃 𑌸𑍍𑌵𑍇𑌷𑍍𑌟𑌾𑌰𑍍𑌥𑌲𑌾𑌭𑍋𑌦𑌯𑌃 ।
𑌪𑍁𑌣𑍍𑌯𑌸𑍍𑌯𑌾𑌨𑍁𑌭𑌵𑍇 𑌵𑌿𑌭𑌾𑌤𑌿 𑌕𑍃𑌤𑌿𑌨𑌾𑌮𑌾𑌨𑌂𑌦𑌰𑍂𑌪𑌃 𑌸𑍍𑌵𑌯𑌂
𑌸𑌰𑍍𑌵𑍋 𑌨𑌂𑌦𑌤𑌿 𑌯𑌤𑍍𑌰 𑌸𑌾𑌧𑍁 𑌤𑌨𑍁𑌭𑍃𑌨𑍍𑌮𑌾𑌤𑍍𑌰𑌃 𑌪𑍍𑌰𑌯𑌤𑍍𑌨𑌂 𑌵𑌿𑌨𑌾 ॥ 20𑍭॥ (𑌪𑌾𑌠𑌭𑍇𑌦𑌃 – 𑌭𑍂𑌤𑍍𑌵𑌾 𑌨𑌂𑌦𑌤𑌿)

𑌆𑌨𑌂𑌦𑌮𑌯𑌕𑍋𑌶𑌸𑍍𑌯 𑌸𑍁𑌷𑍁𑌪𑍍𑌤𑍌 𑌸𑍍𑌫𑍂𑌰𑍍𑌤𑌿𑌰𑍁𑌤𑍍𑌕𑌟𑌾 ।
𑌸𑍍𑌵𑌪𑍍𑌨𑌜𑌾𑌗𑌰𑌯𑍋𑌰𑍀𑌷𑌦𑌿𑌷𑍍𑌟𑌸𑌂𑌦𑌰𑍍𑌶𑌨𑌾𑌦𑌿𑌨𑌾 ॥ 20𑍮॥

𑌨𑍈𑌵𑌾𑌯𑌮𑌾𑌨𑌂𑌦𑌮𑌯𑌃 𑌪𑌰𑌾𑌤𑍍𑌮𑌾
𑌸𑍋𑌪𑌾𑌧𑌿𑌕𑌤𑍍𑌵𑌾𑌤𑍍𑌪𑍍𑌰𑌕𑍃𑌤𑍇𑌰𑍍𑌵𑌿𑌕𑌾𑌰𑌾𑌤𑍍 ।
𑌕𑌾𑌰𑍍𑌯𑌤𑍍𑌵𑌹𑍇𑌤𑍋𑌃 𑌸𑍁𑌕𑍃𑌤𑌕𑍍𑌰𑌿𑌯𑌾𑌯𑌾
𑌵𑌿𑌕𑌾𑌰𑌸𑌂𑌘𑌾𑌤𑌸𑌮𑌾𑌹𑌿𑌤𑌤𑍍𑌵𑌾𑌤𑍍 ॥ 20𑍯॥

𑌪𑌂𑌚𑌾𑌨𑌾𑌮𑌪𑌿 𑌕𑍋𑌶𑌾𑌨𑌾𑌂 𑌨𑌿𑌷𑍇𑌧𑍇 𑌯𑍁𑌕𑍍𑌤𑌿𑌤𑌃 𑌶𑍍𑌰𑍁𑌤𑍇𑌃 । (𑌪𑌾𑌠𑌭𑍇𑌦𑌃 – 𑌯𑍁𑌕𑍍𑌤𑌿𑌤𑌃 𑌕𑍃𑌤𑍇)
𑌤𑌨𑍍𑌨𑌿𑌷𑍇𑌧𑌾𑌵𑌧𑌿 𑌸𑌾𑌕𑍍𑌷𑍀 𑌬𑍋𑌧𑌰𑍂𑌪𑍋𑌽𑌵𑌶𑌿𑌷𑍍𑌯𑌤𑍇 ॥ 210॥ (𑌪𑌾𑌠𑌭𑍇𑌦𑌃 – 𑌤𑌨𑍍𑌨𑌿𑌷𑍇𑌧𑌾𑌵𑌧𑌿𑌃)

𑌯𑍋𑌽𑌯𑌮𑌾𑌤𑍍𑌮𑌾 𑌸𑍍𑌵𑌯𑌂𑌜𑍍𑌯𑍋𑌤𑌿𑌃 𑌪𑌂𑌚𑌕𑍋𑌶𑌵𑌿𑌲𑌕𑍍𑌷𑌣𑌃 ।
𑌅𑌵𑌸𑍍𑌥𑌾𑌤𑍍𑌰𑌯𑌸𑌾𑌕𑍍𑌷𑍀 𑌸𑌨𑍍𑌨𑌿𑌰𑍍𑌵𑌿𑌕𑌾𑌰𑍋 𑌨𑌿𑌰𑌂𑌜𑌨𑌃 ।
𑌸𑌦𑌾𑌨𑌂𑌦𑌃 𑌸 𑌵𑌿𑌜𑍍𑌞𑍇𑌯𑌃 𑌸𑍍𑌵𑌾𑌤𑍍𑌮𑌤𑍍𑌵𑍇𑌨 𑌵𑌿𑌪𑌶𑍍𑌚𑌿𑌤𑌾 ॥ 211॥

𑌶𑌿𑌷𑍍𑌯 𑌉𑌵𑌾𑌚 ।
𑌮𑌿𑌥𑍍𑌯𑌾𑌤𑍍𑌵𑍇𑌨 𑌨𑌿𑌷𑌿𑌦𑍍𑌧𑍇𑌷𑍁 𑌕𑍋𑌶𑍇𑌷𑍍𑌵𑍇𑌤𑍇𑌷𑍁 𑌪𑌂𑌚𑌸𑍁 ।
𑌸𑌰𑍍𑌵𑌾𑌭𑌾𑌵𑌂 𑌵𑌿𑌨𑌾 𑌕𑌿𑌂𑌚𑌿𑌨𑍍𑌨 𑌪𑌶𑍍𑌯𑌾𑌮𑍍𑌯𑌤𑍍𑌰 𑌹𑍇 𑌗𑍁𑌰𑍋 ।
𑌵𑌿𑌜𑍍𑌞𑍇𑌯𑌂 𑌕𑌿𑌮𑍁 𑌵𑌸𑍍𑌤𑍍𑌵𑌸𑍍𑌤𑌿 𑌸𑍍𑌵𑌾𑌤𑍍𑌮𑌨𑌾𑌽𑌽𑌤𑍍𑌮𑌵𑌿𑌪𑌶𑍍𑌚𑌿𑌤𑌾 ॥ 212॥ (𑌪𑌾𑌠𑌭𑍇𑌦𑌃 – 𑌸𑍍𑌵𑌾𑌤𑍍𑌮𑌨𑌾𑌤𑍍𑌰 𑌵𑌿𑌪𑌶𑍍𑌚𑌿𑌤𑌾)

𑌶𑍍𑌰𑍀𑌗𑍁𑌰𑍁𑌰𑍁𑌵𑌾𑌚 ।
𑌸𑌤𑍍𑌯𑌮𑍁𑌕𑍍𑌤𑌂 𑌤𑍍𑌵𑌯𑌾 𑌵𑌿𑌦𑍍𑌵𑌨𑍍𑌨𑌿𑌪𑍁𑌣𑍋𑌽𑌸𑌿 𑌵𑌿𑌚𑌾𑌰𑌣𑍇 ।
𑌅𑌹𑌮𑌾𑌦𑌿𑌵𑌿𑌕𑌾𑌰𑌾𑌸𑍍𑌤𑍇 𑌤𑌦𑌭𑌾𑌵𑍋𑌽𑌯𑌮𑌪𑍍𑌯𑌨𑍁 ॥ 213॥ (𑌪𑌾𑌠𑌭𑍇𑌦𑌃 – 𑌽𑌯𑌮𑌪𑍍𑌯𑌥)

𑌸𑌰𑍍𑌵𑍇 𑌯𑍇𑌨𑌾𑌨𑍁𑌭𑍂𑌯𑌂𑌤𑍇 𑌯𑌃 𑌸𑍍𑌵𑌯𑌂 𑌨𑌾𑌨𑍁𑌭𑍂𑌯𑌤𑍇 ।
𑌤𑌮𑌾𑌤𑍍𑌮𑌾𑌨𑌂 𑌵𑍇𑌦𑌿𑌤𑌾𑌰𑌂 𑌵𑌿𑌦𑍍𑌧𑌿 𑌬𑍁𑌦𑍍𑌧𑍍𑌯𑌾 𑌸𑍁𑌸𑍂𑌕𑍍𑌷𑍍𑌮𑌯𑌾 ॥ 214॥

𑌤𑌤𑍍𑌸𑌾𑌕𑍍𑌷𑌿𑌕𑌂 𑌭𑌵𑍇𑌤𑍍𑌤𑌤𑍍𑌤𑌦𑍍𑌯𑌦𑍍𑌯𑌦𑍍𑌯𑍇𑌨𑌾𑌨𑍁𑌭𑍂𑌯𑌤𑍇 ।
𑌕𑌸𑍍𑌯𑌾𑌪𑍍𑌯𑌨𑌨𑍁𑌭𑍂𑌤𑌾𑌰𑍍𑌥𑍇 𑌸𑌾𑌕𑍍𑌷𑌿𑌤𑍍𑌵𑌂 𑌨𑍋𑌪𑌯𑍁𑌜𑍍𑌯𑌤𑍇 ॥ 215॥ (𑌪𑌾𑌠𑌭𑍇𑌦𑌃 – 𑌨𑍋𑌪𑌪𑌦𑍍𑌯𑌤𑍇)

𑌅𑌸𑍌 𑌸𑍍𑌵𑌸𑌾𑌕𑍍𑌷𑌿𑌕𑍋 𑌭𑌾𑌵𑍋 𑌯𑌤𑌃 𑌸𑍍𑌵𑍇𑌨𑌾𑌨𑍁𑌭𑍂𑌯𑌤𑍇 ।
𑌅𑌤𑌃 𑌪𑌰𑌂 𑌸𑍍𑌵𑌯𑌂 𑌸𑌾𑌕𑍍𑌷𑌾𑌤𑍍𑌪𑍍𑌰𑌤𑍍𑌯𑌗𑌾𑌤𑍍𑌮𑌾 𑌨 𑌚𑍇𑌤𑌰𑌃 ॥ 216॥

𑌜𑌾𑌗𑍍𑌰𑌤𑍍𑌸𑍍𑌵𑌪𑍍𑌨𑌸𑍁𑌷𑍁𑌪𑍍𑌤𑌿𑌷𑍁 𑌸𑍍𑌫𑍁𑌟𑌤𑌰𑌂 𑌯𑍋𑌽𑌸𑍌 𑌸𑌮𑍁𑌜𑍍𑌜𑍃𑌂𑌭𑌤𑍇
𑌪𑍍𑌰𑌤𑍍𑌯𑌗𑍍𑌰𑍂𑌪𑌤𑌯𑌾 𑌸𑌦𑌾𑌹𑌮𑌹𑌮𑌿𑌤𑍍𑌯𑌂𑌤𑌃 𑌸𑍍𑌫𑍁𑌰𑌨𑍍𑌨𑍈𑌕𑌧𑌾 । (𑌪𑌾𑌠𑌭𑍇𑌦𑌃 – 𑌸𑍍𑌫𑍁𑌰𑌨𑍍𑌨𑍇𑌕𑌧𑌾)
𑌨𑌾𑌨𑌾𑌕𑌾𑌰𑌵𑌿𑌕𑌾𑌰𑌭𑌾𑌗𑌿𑌨 𑌇𑌮𑌾𑌨𑍍 𑌪𑌶𑍍𑌯𑌨𑍍𑌨𑌹𑌂𑌧𑍀𑌮𑍁𑌖𑌾𑌨𑍍 (𑌪𑌾𑌠𑌭𑍇𑌦𑌃 – 𑌭𑌾𑌜𑌿𑌨)
𑌨𑌿𑌤𑍍𑌯𑌾𑌨𑌂𑌦𑌚𑌿𑌦𑌾𑌤𑍍𑌮𑌨𑌾 𑌸𑍍𑌫𑍁𑌰𑌤𑌿 𑌤𑌂 𑌵𑌿𑌦𑍍𑌧𑌿 𑌸𑍍𑌵𑌮𑍇𑌤𑌂 𑌹𑍃𑌦𑌿 ॥ 21𑍭॥

𑌘𑌟𑍋𑌦𑌕𑍇 𑌬𑌿𑌂𑌬𑌿𑌤𑌮𑌰𑍍𑌕𑌬𑌿𑌂𑌬-
𑌮𑌾𑌲𑍋𑌕𑍍𑌯 𑌮𑍂𑌢𑍋 𑌰𑌵𑌿𑌮𑍇𑌵 𑌮𑌨𑍍𑌯𑌤𑍇 ।
𑌤𑌥𑌾 𑌚𑌿𑌦𑌾𑌭𑌾𑌸𑌮𑍁𑌪𑌾𑌧𑌿𑌸𑌂𑌸𑍍𑌥𑌂
𑌭𑍍𑌰𑌾𑌂𑌤𑍍𑌯𑌾𑌹𑌮𑌿𑌤𑍍𑌯𑍇𑌵 𑌜𑌡𑍋𑌽𑌭𑌿𑌮𑌨𑍍𑌯𑌤𑍇 ॥ 21𑍮॥

𑌘𑌟𑌂 𑌜𑌲𑌂 𑌤𑌦𑍍𑌗𑌤𑌮𑌰𑍍𑌕𑌬𑌿𑌂𑌬𑌂
𑌵𑌿𑌹𑌾𑌯 𑌸𑌰𑍍𑌵𑌂 𑌵𑌿𑌨𑌿𑌰𑍀𑌕𑍍𑌷𑍍𑌯𑌤𑍇𑌽𑌰𑍍𑌕𑌃 । (𑌪𑌾𑌠𑌭𑍇𑌦𑌃 – 𑌦𑌿𑌵𑌿 𑌵𑍀𑌕𑍍𑌷𑍍𑌯𑌤𑍇𑌽𑌰𑍍𑌕𑌃)
𑌤𑌟𑌸𑍍𑌥 𑌏𑌤𑌤𑍍𑌤𑍍𑌰𑌿𑌤𑌯𑌾𑌵𑌭𑌾𑌸𑌕𑌃 (𑌪𑌾𑌠𑌭𑍇𑌦𑌃 – 𑌤𑌟𑌸𑍍𑌥𑌿𑌤𑌃 𑌤𑌤𑍍𑌤𑍍𑌰𑌿)
𑌸𑍍𑌵𑌯𑌂𑌪𑍍𑌰𑌕𑌾𑌶𑍋 𑌵𑌿𑌦𑍁𑌷𑌾 𑌯𑌥𑌾 𑌤𑌥𑌾 ॥ 21𑍯॥

𑌦𑍇𑌹𑌂 𑌧𑌿𑌯𑌂 𑌚𑌿𑌤𑍍𑌪𑍍𑌰𑌤𑌿𑌬𑌿𑌂𑌬𑌮𑍇𑌵𑌂 (𑌪𑌾𑌠𑌭𑍇𑌦𑌃 – 𑌚𑌿𑌤𑍍𑌪𑍍𑌰𑌤𑌿𑌬𑌿𑌂𑌬𑌮𑍇𑌤𑌂)
𑌵𑌿𑌸𑍃𑌜𑍍𑌯 𑌬𑍁𑌦𑍍𑌧𑍌 𑌨𑌿𑌹𑌿𑌤𑌂 𑌗𑍁𑌹𑌾𑌯𑌾𑌮𑍍 ।
𑌦𑍍𑌰𑌷𑍍𑌟𑌾𑌰𑌮𑌾𑌤𑍍𑌮𑌾𑌨𑌮𑌖𑌂𑌡𑌬𑍋𑌧𑌂
𑌸𑌰𑍍𑌵𑌪𑍍𑌰𑌕𑌾𑌶𑌂 𑌸𑌦𑌸𑌦𑍍𑌵𑌿𑌲𑌕𑍍𑌷𑌣𑌮𑍍 ॥ 220॥

𑌨𑌿𑌤𑍍𑌯𑌂 𑌵𑌿𑌭𑍁𑌂 𑌸𑌰𑍍𑌵𑌗𑌤𑌂 𑌸𑍁𑌸𑍂𑌕𑍍𑌷𑍍𑌮𑌂
𑌅𑌂𑌤𑌰𑍍𑌬𑌹𑌿𑌃𑌶𑍂𑌨𑍍𑌯𑌮𑌨𑌨𑍍𑌯𑌮𑌾𑌤𑍍𑌮𑌨𑌃 ।
𑌵𑌿𑌜𑍍𑌞𑌾𑌯 𑌸𑌮𑍍𑌯𑌙𑍍𑌨𑌿𑌜𑌰𑍂𑌪𑌮𑍇𑌤𑌤𑍍
𑌪𑍁𑌮𑌾𑌨𑍍 𑌵𑌿𑌪𑌾𑌪𑍍𑌮𑌾 𑌵𑌿𑌰𑌜𑍋 𑌵𑌿𑌮𑍃𑌤𑍍𑌯𑍁𑌃 ॥ 221॥

𑌵𑌿𑌶𑍋𑌕 𑌆𑌨𑌂𑌦𑌘𑌨𑍋 𑌵𑌿𑌪𑌶𑍍𑌚𑌿𑌤𑍍
𑌸𑍍𑌵𑌯𑌂 𑌕𑍁𑌤𑌶𑍍𑌚𑌿𑌨𑍍𑌨 𑌬𑌿𑌭𑍇𑌤𑌿 𑌕𑌶𑍍𑌚𑌿𑌤𑍍 ।
𑌨𑌾𑌨𑍍𑌯𑍋𑌽𑌸𑍍𑌤𑌿 𑌪𑌂𑌥𑌾 𑌭𑌵𑌬𑌂𑌧𑌮𑍁𑌕𑍍𑌤𑍇𑌃
𑌵𑌿𑌨𑌾 𑌸𑍍𑌵𑌤𑌤𑍍𑌤𑍍𑌵𑌾𑌵𑌗𑌮𑌂 𑌮𑍁𑌮𑍁𑌕𑍍𑌷𑍋𑌃 ॥ 222॥

𑌬𑍍𑌰𑌹𑍍𑌮𑌾𑌭𑌿𑌨𑍍𑌨𑌤𑍍𑌵𑌵𑌿𑌜𑍍𑌞𑌾𑌨𑌂 𑌭𑌵𑌮𑍋𑌕𑍍𑌷𑌸𑍍𑌯 𑌕𑌾𑌰𑌣𑌮𑍍 ।
𑌯𑍇𑌨𑌾𑌦𑍍𑌵𑌿𑌤𑍀𑌯𑌮𑌾𑌨𑌂𑌦𑌂 𑌬𑍍𑌰𑌹𑍍𑌮 𑌸𑌂𑌪𑌦𑍍𑌯𑌤𑍇 𑌬𑍁𑌧𑍈𑌃 ॥ 223॥ (𑌪𑌾𑌠𑌭𑍇𑌦𑌃 – 𑌸𑌂𑌪𑌦𑍍𑌯𑌤𑍇 𑌬𑍁𑌧𑌃)

𑌬𑍍𑌰𑌹𑍍𑌮𑌭𑍂𑌤𑌸𑍍𑌤𑍁 𑌸𑌂𑌸𑍃𑌤𑍍𑌯𑍈 𑌵𑌿𑌦𑍍𑌵𑌾𑌨𑍍𑌨𑌾𑌵𑌰𑍍𑌤𑌤𑍇 𑌪𑍁𑌨𑌃 ।
𑌵𑌿𑌜𑍍𑌞𑌾𑌤𑌵𑍍𑌯𑌮𑌤𑌃 𑌸𑌮𑍍𑌯𑌗𑍍𑌬𑍍𑌰𑌹𑍍𑌮𑌾𑌭𑌿𑌨𑍍𑌨𑌤𑍍𑌵𑌮𑌾𑌤𑍍𑌮𑌨𑌃 ॥ 224॥

𑌸𑌤𑍍𑌯𑌂 𑌜𑍍𑌞𑌾𑌨𑌮𑌨𑌂𑌤𑌂 𑌬𑍍𑌰𑌹𑍍𑌮 𑌵𑌿𑌶𑍁𑌦𑍍𑌧𑌂 𑌪𑌰𑌂 𑌸𑍍𑌵𑌤𑌃𑌸𑌿𑌦𑍍𑌧𑌮𑍍 ।
𑌨𑌿𑌤𑍍𑌯𑌾𑌨𑌂𑌦𑍈𑌕𑌰𑌸𑌂 𑌪𑍍𑌰𑌤𑍍𑌯𑌗𑌭𑌿𑌨𑍍𑌨𑌂 𑌨𑌿𑌰𑌂𑌤𑌰𑌂 𑌜𑌯𑌤𑌿 ॥ 225॥

𑌸𑌦𑌿𑌦𑌂 𑌪𑌰𑌮𑌾𑌦𑍍𑌵𑍈𑌤𑌂 𑌸𑍍𑌵𑌸𑍍𑌮𑌾𑌦𑌨𑍍𑌯𑌸𑍍𑌯 𑌵𑌸𑍍𑌤𑍁𑌨𑍋𑌽𑌭𑌾𑌵𑌾𑌤𑍍 ।
𑌨 𑌹𑍍𑌯𑌨𑍍𑌯𑌦𑌸𑍍𑌤𑌿 𑌕𑌿𑌂𑌚𑌿𑌤𑍍 𑌸𑌮𑍍𑌯𑌕𑍍 𑌪𑌰𑌮𑌾𑌰𑍍𑌥𑌤𑌤𑍍𑌤𑍍𑌵𑌬𑍋𑌧𑌦𑌶𑌾𑌯𑌾𑌮𑍍 ॥ 226॥ (𑌪𑌾𑌠𑌭𑍇𑌦𑌃 – 𑌪𑌰𑌤𑌤𑍍𑌤𑍍𑌵𑌬𑍋𑌧𑌸𑍁𑌦𑌶𑌾𑌯𑌾𑌮𑍍)

𑌯𑌦𑌿𑌦𑌂 𑌸𑌕𑌲𑌂 𑌵𑌿𑌶𑍍𑌵𑌂 𑌨𑌾𑌨𑌾𑌰𑍂𑌪𑌂 𑌪𑍍𑌰𑌤𑍀𑌤𑌮𑌜𑍍𑌞𑌾𑌨𑌾𑌤𑍍 ।
𑌤𑌤𑍍𑌸𑌰𑍍𑌵𑌂 𑌬𑍍𑌰𑌹𑍍𑌮𑍈𑌵 𑌪𑍍𑌰𑌤𑍍𑌯𑌸𑍍𑌤𑌾𑌶𑍇𑌷𑌭𑌾𑌵𑌨𑌾𑌦𑍋𑌷𑌮𑍍 ॥ 22𑍭॥

𑌮𑍃𑌤𑍍𑌕𑌾𑌰𑍍𑌯𑌭𑍂𑌤𑍋𑌽𑌪𑌿 𑌮𑍃𑌦𑍋 𑌨 𑌭𑌿𑌨𑍍𑌨𑌃
𑌕𑍁𑌂𑌭𑍋𑌽𑌸𑍍𑌤𑌿 𑌸𑌰𑍍𑌵𑌤𑍍𑌰 𑌤𑍁 𑌮𑍃𑌤𑍍𑌸𑍍𑌵𑌰𑍂𑌪𑌾𑌤𑍍 ।
𑌨 𑌕𑍁𑌂𑌭𑌰𑍂𑌪𑌂 𑌪𑍃𑌥𑌗𑌸𑍍𑌤𑌿 𑌕𑍁𑌂𑌭𑌃
𑌕𑍁𑌤𑍋 𑌮𑍃𑌷𑌾 𑌕𑌲𑍍𑌪𑌿𑌤𑌨𑌾𑌮𑌮𑌾𑌤𑍍𑌰𑌃 ॥ 22𑍮॥

𑌕𑍇𑌨𑌾𑌪𑌿 𑌮𑍃𑌦𑍍𑌭𑌿𑌨𑍍𑌨𑌤𑌯𑌾 𑌸𑍍𑌵𑌰𑍂𑌪𑌂
𑌘𑌟𑌸𑍍𑌯 𑌸𑌂𑌦𑌰𑍍𑌶𑌯𑌿𑌤𑍁𑌂 𑌨 𑌶𑌕𑍍𑌯𑌤𑍇 ।
𑌅𑌤𑍋 𑌘𑌟𑌃 𑌕𑌲𑍍𑌪𑌿𑌤 𑌏𑌵 𑌮𑍋𑌹𑌾-
𑌨𑍍𑌮𑍃𑌦𑍇𑌵 𑌸𑌤𑍍𑌯𑌂 𑌪𑌰𑌮𑌾𑌰𑍍𑌥𑌭𑍂𑌤𑌮𑍍 ॥ 22𑍯॥

𑌸𑌦𑍍𑌬𑍍𑌰𑌹𑍍𑌮𑌕𑌾𑌰𑍍𑌯𑌂 𑌸𑌕𑌲𑌂 𑌸𑌦𑍇𑌵𑌂 (𑌪𑌾𑌠𑌭𑍇𑌦𑌃 – 𑌸𑌦𑍈𑌵)
𑌤𑌨𑍍𑌮𑌾𑌤𑍍𑌰𑌮𑍇𑌤𑌨𑍍𑌨 𑌤𑌤𑍋𑌽𑌨𑍍𑌯𑌦𑌸𑍍𑌤𑌿 । (𑌪𑌾𑌠𑌭𑍇𑌦𑌃 – 𑌸𑌨𑍍𑌮𑌾𑌤𑍍𑌰𑌮𑍇𑌤𑌨𑍍𑌨)
𑌅𑌸𑍍𑌤𑍀𑌤𑌿 𑌯𑍋 𑌵𑌕𑍍𑌤𑌿 𑌨 𑌤𑌸𑍍𑌯 𑌮𑍋𑌹𑍋
𑌵𑌿𑌨𑌿𑌰𑍍𑌗𑌤𑍋 𑌨𑌿𑌦𑍍𑌰𑌿𑌤𑌵𑌤𑍍𑌪𑍍𑌰𑌜𑌲𑍍𑌪𑌃 ॥ 230॥

𑌬𑍍𑌰𑌹𑍍𑌮𑍈𑌵𑍇𑌦𑌂 𑌵𑌿𑌶𑍍𑌵𑌮𑌿𑌤𑍍𑌯𑍇𑌵 𑌵𑌾𑌣𑍀
𑌶𑍍𑌰𑍌𑌤𑍀 𑌬𑍍𑌰𑍂𑌤𑍇𑌽𑌥𑌰𑍍𑌵𑌨𑌿𑌷𑍍𑌠𑌾 𑌵𑌰𑌿𑌷𑍍𑌠𑌾 ।
𑌤𑌸𑍍𑌮𑌾𑌦𑍇𑌤𑌦𑍍𑌬𑍍𑌰𑌹𑍍𑌮𑌮𑌾𑌤𑍍𑌰𑌂 𑌹𑌿 𑌵𑌿𑌶𑍍𑌵𑌂
𑌨𑌾𑌧𑌿𑌷𑍍𑌠𑌾𑌨𑌾𑌦𑍍𑌭𑌿𑌨𑍍𑌨𑌤𑌾𑌽𑌽𑌰𑍋𑌪𑌿𑌤𑌸𑍍𑌯 ॥ 231॥

𑌸𑌤𑍍𑌯𑌂 𑌯𑌦𑌿 𑌸𑍍𑌯𑌾𑌜𑍍𑌜𑌗𑌦𑍇𑌤𑌦𑌾𑌤𑍍𑌮𑌨𑍋𑌽
𑌨𑌂𑌤𑌤𑍍𑌤𑍍𑌵𑌹𑌾𑌨𑌿𑌰𑍍𑌨𑌿𑌗𑌮𑌾𑌪𑍍𑌰𑌮𑌾𑌣𑌤𑌾 ।
𑌅𑌸𑌤𑍍𑌯𑌵𑌾𑌦𑌿𑌤𑍍𑌵𑌮𑌪𑍀𑌶𑌿𑌤𑍁𑌃 𑌸𑍍𑌯𑌾-
𑌨𑍍𑌨𑍈𑌤𑌤𑍍𑌤𑍍𑌰𑌯𑌂 𑌸𑌾𑌧𑍁 𑌹𑌿𑌤𑌂 𑌮𑌹𑌾𑌤𑍍𑌮𑌨𑌾𑌮𑍍 ॥ 232॥

𑌈𑌶𑍍𑌵𑌰𑍋 𑌵𑌸𑍍𑌤𑍁𑌤𑌤𑍍𑌤𑍍𑌵𑌜𑍍𑌞𑍋 𑌨 𑌚𑌾𑌹𑌂 𑌤𑍇𑌷𑍍𑌵𑌵𑌸𑍍𑌥𑌿𑌤𑌃 ।
𑌨 𑌚 𑌮𑌤𑍍𑌸𑍍𑌥𑌾𑌨𑌿 𑌭𑍂𑌤𑌾𑌨𑍀𑌤𑍍𑌯𑍇𑌵𑌮𑍇𑌵 𑌵𑍍𑌯𑌚𑍀𑌕𑍍𑌲𑍃𑌪𑌤𑍍 ॥ 233॥ (𑌪𑌾𑌠𑌭𑍇𑌦𑌃 – 𑌵𑍍𑌯𑌚𑍀𑌕𑌥𑌤𑍍)

𑌯𑌦𑌿 𑌸𑌤𑍍𑌯𑌂 𑌭𑌵𑍇𑌦𑍍𑌵𑌿𑌶𑍍𑌵𑌂 𑌸𑍁𑌷𑍁𑌪𑍍𑌤𑌾𑌵𑍁𑌪𑌲𑌭𑍍𑌯𑌤𑌾𑌮𑍍 ।
𑌯𑌨𑍍𑌨𑍋𑌪𑌲𑌭𑍍𑌯𑌤𑍇 𑌕𑌿𑌂𑌚𑌿𑌦𑌤𑍋𑌽𑌸𑌤𑍍𑌸𑍍𑌵𑌪𑍍𑌨𑌵𑌨𑍍𑌮𑍃𑌷𑌾 ॥ 234॥

𑌅𑌤𑌃 𑌪𑍃𑌥𑌙𑍍𑌨𑌾𑌸𑍍𑌤𑌿 𑌜𑌗𑌤𑍍𑌪𑌰𑌾𑌤𑍍𑌮𑌨𑌃
𑌪𑍃𑌥𑌕𑍍𑌪𑍍𑌰𑌤𑍀𑌤𑌿𑌸𑍍𑌤𑍁 𑌮𑍃𑌷𑌾 𑌗𑍁𑌣𑌾𑌦𑌿𑌵𑌤𑍍 । 𑌗𑍁𑌣𑌾𑌹𑌿𑌵𑌤𑍍
𑌆𑌰𑍋𑌪𑌿𑌤𑌸𑍍𑌯𑌾𑌸𑍍𑌤𑌿 𑌕𑌿𑌮𑌰𑍍𑌥𑌵𑌤𑍍𑌤𑌾𑌽-
𑌧𑌿𑌷𑍍𑌠𑌾𑌨𑌮𑌾𑌭𑌾𑌤𑌿 𑌤𑌥𑌾 𑌭𑍍𑌰𑌮𑍇𑌣 ॥ 235॥

𑌭𑍍𑌰𑌾𑌂𑌤𑌸𑍍𑌯 𑌯𑌦𑍍𑌯𑌦𑍍𑌭𑍍𑌰𑌮𑌤𑌃 𑌪𑍍𑌰𑌤𑍀𑌤𑌂
𑌬𑍍𑌰𑌹𑍍𑌮𑍈𑌵 𑌤𑌤𑍍𑌤𑌦𑍍𑌰𑌜𑌤𑌂 𑌹𑌿 𑌶𑍁𑌕𑍍𑌤𑌿𑌃 ।
𑌇𑌦𑌂𑌤𑌯𑌾 𑌬𑍍𑌰𑌹𑍍𑌮 𑌸𑌦𑍈𑌵 𑌰𑍂𑌪𑍍𑌯𑌤𑍇 (𑌪𑌾𑌠𑌭𑍇𑌦𑌃 – 𑌸𑌦𑍇𑌵)
𑌤𑍍𑌵𑌾𑌰𑍋𑌪𑌿𑌤𑌂 𑌬𑍍𑌰𑌹𑍍𑌮𑌣𑌿 𑌨𑌾𑌮𑌮𑌾𑌤𑍍𑌰𑌮𑍍 ॥ 236॥

𑌅𑌤𑌃 𑌪𑌰𑌂 𑌬𑍍𑌰𑌹𑍍𑌮 𑌸𑌦𑌦𑍍𑌵𑌿𑌤𑍀𑌯𑌂
𑌵𑌿𑌶𑍁𑌦𑍍𑌧𑌵𑌿𑌜𑍍𑌞𑌾𑌨𑌘𑌨𑌂 𑌨𑌿𑌰𑌂𑌜𑌨𑌮𑍍 ।
𑌪𑍍𑌰𑌶𑌾𑌂𑌤𑌮𑌾𑌦𑍍𑌯𑌂𑌤𑌵𑌿𑌹𑍀𑌨𑌮𑌕𑍍𑌰𑌿𑌯𑌂
𑌨𑌿𑌰𑌂𑌤𑌰𑌾𑌨𑌂𑌦𑌰𑌸𑌸𑍍𑌵𑌰𑍂𑌪𑌮𑍍 ॥ 23𑍭॥

𑌨𑌿𑌰𑌸𑍍𑌤𑌮𑌾𑌯𑌾𑌕𑍃𑌤𑌸𑌰𑍍𑌵𑌭𑍇𑌦𑌂
𑌨𑌿𑌤𑍍𑌯𑌂 𑌸𑍁𑌖𑌂 𑌨𑌿𑌷𑍍𑌕𑌲𑌮𑌪𑍍𑌰𑌮𑍇𑌯𑌮𑍍 । (𑌪𑌾𑌠𑌭𑍇𑌦𑌃 – 𑌨𑌿𑌤𑍍𑌯𑌂 𑌧𑍍𑌰𑍁𑌵𑌂)
𑌅𑌰𑍂𑌪𑌮𑌵𑍍𑌯𑌕𑍍𑌤𑌮𑌨𑌾𑌖𑍍𑌯𑌮𑌵𑍍𑌯𑌯𑌂
𑌜𑍍𑌯𑍋𑌤𑌿𑌃 𑌸𑍍𑌵𑌯𑌂 𑌕𑌿𑌂𑌚𑌿𑌦𑌿𑌦𑌂 𑌚𑌕𑌾𑌸𑍍𑌤𑌿 ॥ 23𑍮॥

𑌜𑍍𑌞𑌾𑌤𑍃𑌜𑍍𑌞𑍇𑌯𑌜𑍍𑌞𑌾𑌨𑌶𑍂𑌨𑍍𑌯𑌮𑌨𑌂𑌤𑌂 𑌨𑌿𑌰𑍍𑌵𑌿𑌕𑌲𑍍𑌪𑌕𑌮𑍍 ।
𑌕𑍇𑌵𑌲𑌾𑌖𑌂𑌡𑌚𑌿𑌨𑍍𑌮𑌾𑌤𑍍𑌰𑌂 𑌪𑌰𑌂 𑌤𑌤𑍍𑌤𑍍𑌵𑌂 𑌵𑌿𑌦𑍁𑌰𑍍𑌬𑍁𑌧𑌾𑌃 ॥ 23𑍯॥

𑌅𑌹𑍇𑌯𑌮𑌨𑍁𑌪𑌾𑌦𑍇𑌯𑌂 𑌮𑌨𑍋𑌵𑌾𑌚𑌾𑌮𑌗𑍋𑌚𑌰𑌮𑍍 ।
𑌅𑌪𑍍𑌰𑌮𑍇𑌯𑌮𑌨𑌾𑌦𑍍𑌯𑌂𑌤𑌂 𑌬𑍍𑌰𑌹𑍍𑌮 𑌪𑍂𑌰𑍍𑌣𑌮𑌹𑌂 𑌮𑌹𑌃 ॥ 240॥ (𑌪𑌾𑌠𑌭𑍇𑌦𑌃 – 𑌪𑍂𑌰𑍍𑌣𑌂 𑌮𑌹𑌨𑍍𑌮𑌹𑌃)

𑌤𑌤𑍍𑌤𑍍𑌵𑌂𑌪𑌦𑌾𑌭𑍍𑌯𑌾𑌮𑌭𑌿𑌧𑍀𑌯𑌮𑌾𑌨𑌯𑍋𑌃
𑌬𑍍𑌰𑌹𑍍𑌮𑌾𑌤𑍍𑌮𑌨𑍋𑌃 𑌶𑍋𑌧𑌿𑌤𑌯𑍋𑌰𑍍𑌯𑌦𑍀𑌤𑍍𑌥𑌮𑍍 । (𑌪𑌾𑌠𑌭𑍇𑌦𑌃 – 𑌶𑍋𑌧𑌿𑌤𑌯𑍋𑌰𑍍𑌯𑌦𑌿𑌤𑍍𑌥𑌮𑍍)
𑌶𑍍𑌰𑍁𑌤𑍍𑌯𑌾 𑌤𑌯𑍋𑌸𑍍𑌤𑌤𑍍𑌤𑍍𑌵𑌮𑌸𑍀𑌤𑌿 𑌸𑌮𑍍𑌯𑌗𑍍
𑌏𑌕𑌤𑍍𑌵𑌮𑍇𑌵 𑌪𑍍𑌰𑌤𑌿𑌪𑌾𑌦𑍍𑌯𑌤𑍇 𑌮𑍁𑌹𑍁𑌃 ॥ 241-

𑌏𑌕𑍍𑌯𑌂 𑌤𑌯𑍋𑌰𑍍𑌲𑌕𑍍𑌷𑌿𑌤𑌯𑍋𑌰𑍍𑌨 𑌵𑌾𑌚𑍍𑌯𑌯𑍋𑌃
𑌨𑌿𑌗𑌦𑍍𑌯𑌤𑍇𑌽𑌨𑍍𑌯𑍋𑌨𑍍𑌯𑌵𑌿𑌰𑍁𑌦𑍍𑌧𑌧𑌰𑍍𑌮𑌿𑌣𑍋𑌃 ।
𑌖𑌦𑍍𑌯𑍋𑌤𑌭𑌾𑌨𑍍𑌵𑍋𑌰𑌿𑌵 𑌰𑌾𑌜𑌭𑍃𑌤𑍍𑌯𑌯𑍋𑌃
𑌕𑍂𑌪𑌾𑌂𑌬𑍁𑌰𑌾𑌶𑍍𑌯𑍋𑌃 𑌪𑌰𑌮𑌾𑌣𑍁𑌮𑍇𑌰𑍍𑌵𑍋𑌃 ॥ 242॥

𑌤𑌯𑍋𑌰𑍍𑌵𑌿𑌰𑍋𑌧𑍋𑌽𑌯𑌮𑍁𑌪𑌾𑌧𑌿𑌕𑌲𑍍𑌪𑌿𑌤𑍋
𑌨 𑌵𑌾𑌸𑍍𑌤𑌵𑌃 𑌕𑌶𑍍𑌚𑌿𑌦𑍁𑌪𑌾𑌧𑌿𑌰𑍇𑌷𑌃 ।
𑌈𑌶𑌸𑍍𑌯 𑌮𑌾𑌯𑌾 𑌮𑌹𑌦𑌾𑌦𑌿𑌕𑌾𑌰𑌣𑌂
𑌜𑍀𑌵𑌸𑍍𑌯 𑌕𑌾𑌰𑍍𑌯𑌂 𑌶𑌋𑌣𑍁 𑌪𑌂𑌚𑌕𑍋𑌶𑌮𑍍 ॥ 243॥ (𑌪𑌾𑌠𑌭𑍇𑌦𑌃 – 𑌪𑌂𑌚𑌕𑍋𑌶𑌾𑌃)

𑌏𑌤𑌾𑌵𑍁𑌪𑌾𑌧𑍀 𑌪𑌰𑌜𑍀𑌵𑌯𑍋𑌸𑍍𑌤𑌯𑍋𑌃
𑌸𑌮𑍍𑌯𑌙𑍍𑌨𑌿𑌰𑌾𑌸𑍇 𑌨 𑌪𑌰𑍋 𑌨 𑌜𑍀𑌵𑌃 ।
𑌰𑌾𑌜𑍍𑌯𑌂 𑌨𑌰𑍇𑌂𑌦𑍍𑌰𑌸𑍍𑌯 𑌭𑌟𑌸𑍍𑌯 𑌖𑍇𑌟𑌕𑍍-
𑌸𑍍𑌤𑌯𑍋𑌰𑌪𑍋𑌹𑍇 𑌨 𑌭𑌟𑍋 𑌨 𑌰𑌾𑌜𑌾 ॥ 244॥

𑌅𑌥𑌾𑌤 𑌆𑌦𑍇𑌶 𑌇𑌤𑌿 𑌶𑍍𑌰𑍁𑌤𑌿𑌃 𑌸𑍍𑌵𑌯𑌂
𑌨𑌿𑌷𑍇𑌧𑌤𑌿 𑌬𑍍𑌰𑌹𑍍𑌮𑌣𑌿 𑌕𑌲𑍍𑌪𑌿𑌤𑌂 𑌦𑍍𑌵𑌯𑌮𑍍 ।
𑌶𑍍𑌰𑍁𑌤𑌿𑌪𑍍𑌰𑌮𑌾𑌣𑌾𑌨𑍁𑌗𑍃𑌹𑍀𑌤𑌬𑍋𑌧𑌾- (𑌪𑌾𑌠𑌭𑍇𑌦𑌃 – 𑌪𑍍𑌰𑌮𑌾𑌣𑌾𑌨𑍁𑌗𑍃𑌹𑍀𑌤𑌯𑍁𑌕𑍍𑌤𑍍𑌯𑌾)
𑌤𑍍𑌤𑌯𑍋𑌰𑍍𑌨𑌿𑌰𑌾𑌸𑌃 𑌕𑌰𑌣𑍀𑌯 𑌏𑌵 ॥ 245॥

𑌨𑍇𑌦𑌂 𑌨𑍇𑌦𑌂 𑌕𑌲𑍍𑌪𑌿𑌤𑌤𑍍𑌵𑌾𑌨𑍍𑌨 𑌸𑌤𑍍𑌯𑌂
𑌰𑌜𑍍𑌜𑍁𑌦𑍃𑌷𑍍𑌟𑌵𑍍𑌯𑌾𑌲𑌵𑌤𑍍𑌸𑍍𑌵𑌪𑍍𑌨𑌵𑌚𑍍𑌚 । (𑌪𑌾𑌠𑌭𑍇𑌦𑌃 – 𑌰𑌜𑍍𑌜𑍌)
𑌇𑌤𑍍𑌥𑌂 𑌦𑍃𑌶𑍍𑌯𑌂 𑌸𑌾𑌧𑍁𑌯𑍁𑌕𑍍𑌤𑍍𑌯𑌾 𑌵𑍍𑌯𑌪𑍋𑌹𑍍𑌯
𑌜𑍍𑌞𑍇𑌯𑌃 𑌪𑌶𑍍𑌚𑌾𑌦𑍇𑌕𑌭𑌾𑌵𑌸𑍍𑌤𑌯𑍋𑌰𑍍𑌯𑌃 ॥ 246॥

𑌤𑌤𑌸𑍍𑌤𑍁 𑌤𑍌 𑌲𑌕𑍍𑌷𑌣𑌯𑌾 𑌸𑍁𑌲𑌕𑍍𑌷𑍍𑌯𑍌
𑌤𑌯𑍋𑌰𑌖𑌂𑌡𑍈𑌕𑌰𑌸𑌤𑍍𑌵𑌸𑌿𑌦𑍍𑌧𑌯𑍇 ।
𑌨𑌾𑌲𑌂 𑌜𑌹𑌤𑍍𑌯𑌾 𑌨 𑌤𑌥𑌾𑌽𑌜𑌹𑌤𑍍𑌯𑌾
𑌕𑌿𑌂𑌤𑍂𑌭𑌯𑌾𑌰𑍍𑌥𑌾𑌤𑍍𑌮𑌿𑌕𑌯𑍈𑌵 𑌭𑌾𑌵𑍍𑌯𑌮𑍍 ॥ 24𑍭॥ (𑌪𑌾𑌠𑌭𑍇𑌦𑌃 – 𑌭𑌯𑌾𑌰𑍍𑌥𑍈𑌕𑌤𑌯𑍈𑌵)

𑌸 𑌦𑍇𑌵𑌦𑌤𑍍𑌤𑍋𑌽𑌯𑌮𑌿𑌤𑍀𑌹 𑌚𑍈𑌕𑌤𑌾
𑌵𑌿𑌰𑍁𑌦𑍍𑌧𑌧𑌰𑍍𑌮𑌾𑌂𑌶𑌮𑌪𑌾𑌸𑍍𑌯 𑌕𑌥𑍍𑌯𑌤𑍇 ।
𑌯𑌥𑌾 𑌤𑌥𑌾 𑌤𑌤𑍍𑌤𑍍𑌵𑌮𑌸𑍀𑌤𑌿𑌵𑌾𑌕𑍍𑌯𑍇
𑌵𑌿𑌰𑍁𑌦𑍍𑌧𑌧𑌰𑍍𑌮𑌾𑌨𑍁𑌭𑌯𑌤𑍍𑌰 𑌹𑌿𑌤𑍍𑌵𑌾 ॥ 24𑍮॥

𑌸𑌂𑌲𑌕𑍍𑌷𑍍𑌯 𑌚𑌿𑌨𑍍𑌮𑌾𑌤𑍍𑌰𑌤𑌯𑌾 𑌸𑌦𑌾𑌤𑍍𑌮𑌨𑍋𑌃
𑌅𑌖𑌂𑌡𑌭𑌾𑌵𑌃 𑌪𑌰𑌿𑌚𑍀𑌯𑌤𑍇 𑌬𑍁𑌧𑍈𑌃 ।
𑌏𑌵𑌂 𑌮𑌹𑌾𑌵𑌾𑌕𑍍𑌯𑌶𑌤𑍇𑌨 𑌕𑌥𑍍𑌯𑌤𑍇
𑌬𑍍𑌰𑌹𑍍𑌮𑌾𑌤𑍍𑌮𑌨𑍋𑌰𑍈𑌕𑍍𑌯𑌮𑌖𑌂𑌡𑌭𑌾𑌵𑌃 ॥ 24𑍯॥

𑌅𑌸𑍍𑌥𑍂𑌲𑌮𑌿𑌤𑍍𑌯𑍇𑌤𑌦𑌸𑌨𑍍𑌨𑌿𑌰𑌸𑍍𑌯
𑌸𑌿𑌦𑍍𑌧𑌂 𑌸𑍍𑌵𑌤𑍋 𑌵𑍍𑌯𑍋𑌮𑌵𑌦𑌪𑍍𑌰𑌤𑌰𑍍𑌕𑍍𑌯𑌮𑍍 ।
𑌅𑌤𑍋 𑌮𑍃𑌷𑌾𑌮𑌾𑌤𑍍𑌰𑌮𑌿𑌦𑌂 𑌪𑍍𑌰𑌤𑍀𑌤𑌂
𑌜𑌹𑍀𑌹𑌿 𑌯𑌤𑍍𑌸𑍍𑌵𑌾𑌤𑍍𑌮𑌤𑌯𑌾 𑌗𑍃𑌹𑍀𑌤𑌮𑍍 ।
𑌬𑍍𑌰𑌹𑍍𑌮𑌾𑌹𑌮𑌿𑌤𑍍𑌯𑍇𑌵 𑌵𑌿𑌶𑍁𑌦𑍍𑌧𑌬𑍁𑌦𑍍𑌧𑍍𑌯𑌾
𑌵𑌿𑌦𑍍𑌧𑌿 𑌸𑍍𑌵𑌮𑌾𑌤𑍍𑌮𑌾𑌨𑌮𑌖𑌂𑌡𑌬𑍋𑌧𑌮𑍍 ॥ 250॥

𑌮𑍃𑌤𑍍𑌕𑌾𑌰𑍍𑌯𑌂 𑌸𑌕𑌲𑌂 𑌘𑌟𑌾𑌦𑌿 𑌸𑌤𑌤𑌂 𑌮𑍃𑌨𑍍𑌮𑌾𑌤𑍍𑌰𑌮𑍇𑌵𑌾𑌹𑌿𑌤𑌂 (𑌪𑌾𑌠𑌭𑍇𑌦𑌃 – 𑌮𑍃𑌨𑍍𑌮𑌾𑌤𑍍𑌰𑌮𑍇𑌵𑌾𑌭𑌿𑌤𑌃)
𑌤𑌦𑍍𑌵𑌤𑍍𑌸𑌜𑍍𑌜𑌨𑌿𑌤𑌂 𑌸𑌦𑌾𑌤𑍍𑌮𑌕𑌮𑌿𑌦𑌂 𑌸𑌨𑍍𑌮𑌾𑌤𑍍𑌰𑌮𑍇𑌵𑌾𑌖𑌿𑌲𑌮𑍍 ।
𑌯𑌸𑍍𑌮𑌾𑌨𑍍𑌨𑌾𑌸𑍍𑌤𑌿 𑌸𑌤𑌃 𑌪𑌰𑌂 𑌕𑌿𑌮𑌪𑌿 𑌤𑌤𑍍𑌸𑌤𑍍𑌯𑌂 𑌸 𑌆𑌤𑍍𑌮𑌾 𑌸𑍍𑌵𑌯𑌂
𑌤𑌸𑍍𑌮𑌾𑌤𑍍𑌤𑌤𑍍𑌤𑍍𑌵𑌮𑌸𑌿 𑌪𑍍𑌰𑌶𑌾𑌂𑌤𑌮𑌮𑌲𑌂 𑌬𑍍𑌰𑌹𑍍𑌮𑌾𑌦𑍍𑌵𑌯𑌂 𑌯𑌤𑍍𑌪𑌰𑌮𑍍 ॥ 251॥

𑌨𑌿𑌦𑍍𑌰𑌾𑌕𑌲𑍍𑌪𑌿𑌤𑌦𑍇𑌶𑌕𑌾𑌲𑌵𑌿𑌷𑌯𑌜𑍍𑌞𑌾𑌤𑍍𑌰𑌾𑌦𑌿 𑌸𑌰𑍍𑌵𑌂 𑌯𑌥𑌾
𑌮𑌿𑌥𑍍𑌯𑌾 𑌤𑌦𑍍𑌵𑌦𑌿𑌹𑌾𑌪𑌿 𑌜𑌾𑌗𑍍𑌰𑌤𑌿 𑌜𑌗𑌤𑍍𑌸𑍍𑌵𑌾𑌜𑍍𑌞𑌾𑌨𑌕𑌾𑌰𑍍𑌯𑌤𑍍𑌵𑌤𑌃 ।
𑌯𑌸𑍍𑌮𑌾𑌦𑍇𑌵𑌮𑌿𑌦𑌂 𑌶𑌰𑍀𑌰𑌕𑌰𑌣𑌪𑍍𑌰𑌾𑌣𑌾𑌹𑌮𑌾𑌦𑍍𑌯𑌪𑍍𑌯𑌸𑌤𑍍
𑌤𑌸𑍍𑌮𑌾𑌤𑍍𑌤𑌤𑍍𑌤𑍍𑌵𑌮𑌸𑌿 𑌪𑍍𑌰𑌶𑌾𑌂𑌤𑌮𑌮𑌲𑌂 𑌬𑍍𑌰𑌹𑍍𑌮𑌾𑌦𑍍𑌵𑌯𑌂 𑌯𑌤𑍍𑌪𑌰𑌮𑍍 ॥ 252॥

𑌯𑌤𑍍𑌰 𑌭𑍍𑌰𑌾𑌂𑌤𑍍𑌯𑌾 𑌕𑌲𑍍𑌪𑌿𑌤𑌂 𑌤𑌦𑍍𑌵𑌿𑌵𑍇𑌕𑍇 (𑌪𑌾𑌠𑌭𑍇𑌦𑌃 – 𑌯𑌦𑍍𑌵𑌿𑌵𑍇𑌕𑍇)
𑌤𑌤𑍍𑌤𑌨𑍍𑌮𑌾𑌤𑍍𑌰𑌂 𑌨𑍈𑌵 𑌤𑌸𑍍𑌮𑌾𑌦𑍍𑌵𑌿𑌭𑌿𑌨𑍍𑌨𑌮𑍍 ।
𑌸𑍍𑌵𑌪𑍍𑌨𑍇 𑌨𑌷𑍍𑌟𑌂 𑌸𑍍𑌵𑌪𑍍𑌨𑌵𑌿𑌶𑍍𑌵𑌂 𑌵𑌿𑌚𑌿𑌤𑍍𑌰𑌂
𑌸𑍍𑌵𑌸𑍍𑌮𑌾𑌦𑍍𑌭𑌿𑌨𑍍𑌨𑌂 𑌕𑌿𑌨𑍍𑌨𑍁 𑌦𑍃𑌷𑍍𑌟𑌂 𑌪𑍍𑌰𑌬𑍋𑌧𑍇 ॥ 253॥

𑌜𑌾𑌤𑌿𑌨𑍀𑌤𑌿𑌕𑍁𑌲𑌗𑍋𑌤𑍍𑌰𑌦𑍂𑌰𑌗𑌂
𑌨𑌾𑌮𑌰𑍂𑌪𑌗𑍁𑌣𑌦𑍋𑌷𑌵𑌰𑍍𑌜𑌿𑌤𑌮𑍍 ।
𑌦𑍇𑌶𑌕𑌾𑌲𑌵𑌿𑌷𑌯𑌾𑌤𑌿𑌵𑌰𑍍𑌤𑌿 𑌯𑌦𑍍
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 254॥

𑌯𑌤𑍍𑌪𑌰𑌂 𑌸𑌕𑌲𑌵𑌾𑌗𑌗𑍋𑌚𑌰𑌂
𑌗𑍋𑌚𑌰𑌂 𑌵𑌿𑌮𑌲𑌬𑍋𑌧𑌚𑌕𑍍𑌷𑍁𑌷𑌃 ।
𑌶𑍁𑌦𑍍𑌧𑌚𑌿𑌦𑍍𑌘𑌨𑌮𑌨𑌾𑌦𑌿 𑌵𑌸𑍍𑌤𑍁 𑌯𑌦𑍍
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 255॥

𑌷𑌡𑍍𑌭𑌿𑌰𑍂𑌰𑍍𑌮𑌿𑌭𑌿𑌰𑌯𑍋𑌗𑌿 𑌯𑍋𑌗𑌿𑌹𑍃𑌦𑍍-
𑌭𑌾𑌵𑌿𑌤𑌂 𑌨 𑌕𑌰𑌣𑍈𑌰𑍍𑌵𑌿𑌭𑌾𑌵𑌿𑌤𑌮𑍍 ।
𑌬𑍁𑌦𑍍𑌧𑍍𑌯𑌵𑍇𑌦𑍍𑌯𑌮𑌨𑌵𑌦𑍍𑌯𑌮𑌸𑍍𑌤𑌿 𑌯𑌦𑍍 (𑌪𑌾𑌠𑌭𑍇𑌦𑌃 – 𑌭𑍂𑌤𑌿 𑌯𑌦𑍍)
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 256॥

𑌭𑍍𑌰𑌾𑌂𑌤𑌿𑌕𑌲𑍍𑌪𑌿𑌤𑌜𑌗𑌤𑍍𑌕𑌲𑌾𑌶𑍍𑌰𑌯𑌂
𑌸𑍍𑌵𑌾𑌶𑍍𑌰𑌯𑌂 𑌚 𑌸𑌦𑌸𑌦𑍍𑌵𑌿𑌲𑌕𑍍𑌷𑌣𑌮𑍍 ।
𑌨𑌿𑌷𑍍𑌕𑌲𑌂 𑌨𑌿𑌰𑍁𑌪𑌮𑌾𑌨𑌵𑌦𑍍𑌧𑌿 𑌯𑌦𑍍 (𑌪𑌾𑌠𑌭𑍇𑌦𑌃 – 𑌨𑌿𑌰𑍁𑌪𑌮𑌾𑌨𑌮𑍃𑌦𑍍𑌧𑌿𑌮𑌤𑍍)
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 25𑍭॥

𑌜𑌨𑍍𑌮𑌵𑍃𑌦𑍍𑌧𑌿𑌪𑌰𑌿𑌣𑌤𑍍𑌯𑌪𑌕𑍍𑌷𑌯-
𑌵𑍍𑌯𑌾𑌧𑌿𑌨𑌾𑌶𑌨𑌵𑌿𑌹𑍀𑌨𑌮𑌵𑍍𑌯𑌯𑌮𑍍 ।
𑌵𑌿𑌶𑍍𑌵𑌸𑍃𑌷𑍍𑌟𑍍𑌯𑌵𑌵𑌿𑌘𑌾𑌤𑌕𑌾𑌰𑌣𑌂 (𑌪𑌾𑌠𑌭𑍇𑌦𑌃 – 𑌵𑌨𑌘𑌾𑌤𑌕𑌾𑌰𑌣𑌂)
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 25𑍮॥

𑌅𑌸𑍍𑌤𑌭𑍇𑌦𑌮𑌨𑌪𑌾𑌸𑍍𑌤𑌲𑌕𑍍𑌷𑌣𑌂
𑌨𑌿𑌸𑍍𑌤𑌰𑌂𑌗𑌜𑌲𑌰𑌾𑌶𑌿𑌨𑌿𑌶𑍍𑌚𑌲𑌮𑍍 ।
𑌨𑌿𑌤𑍍𑌯𑌮𑍁𑌕𑍍𑌤𑌮𑌵𑌿𑌭𑌕𑍍𑌤𑌮𑍂𑌰𑍍𑌤𑌿 𑌯𑌦𑍍
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 25𑍯॥

𑌏𑌕𑌮𑍇𑌵 𑌸𑌦𑌨𑍇𑌕𑌕𑌾𑌰𑌣𑌂
𑌕𑌾𑌰𑌣𑌾𑌂𑌤𑌰𑌨𑌿𑌰𑌾𑌸𑍍𑌯𑌕𑌾𑌰𑌣𑌮𑍍 । (𑌪𑌾𑌠𑌭𑍇𑌦𑌃 – 𑌸𑌕𑌾𑌰𑌣𑌮𑍍)
𑌕𑌾𑌰𑍍𑌯𑌕𑌾𑌰𑌣𑌵𑌿𑌲𑌕𑍍𑌷𑌣𑌂 𑌸𑍍𑌵𑌯𑌂
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 260॥

𑌨𑌿𑌰𑍍𑌵𑌿𑌕𑌲𑍍𑌪𑌕𑌮𑌨𑌲𑍍𑌪𑌮𑌕𑍍𑌷𑌰𑌂
𑌯𑌤𑍍𑌕𑍍𑌷𑌰𑌾𑌕𑍍𑌷𑌰𑌵𑌿𑌲𑌕𑍍𑌷𑌣𑌂 𑌪𑌰𑌮𑍍 ।
𑌨𑌿𑌤𑍍𑌯𑌮𑌵𑍍𑌯𑌯𑌸𑍁𑌖𑌂 𑌨𑌿𑌰𑌂𑌜𑌨𑌂
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 261॥

𑌯𑌦𑍍𑌵𑌿𑌭𑌾𑌤𑌿 𑌸𑌦𑌨𑍇𑌕𑌧𑌾 𑌭𑍍𑌰𑌮𑌾-
𑌨𑍍𑌨𑌾𑌮𑌰𑍂𑌪𑌗𑍁𑌣𑌵𑌿𑌕𑍍𑌰𑌿𑌯𑌾𑌤𑍍𑌮𑌨𑌾 ।
𑌹𑍇𑌮𑌵𑌤𑍍𑌸𑍍𑌵𑌯𑌮𑌵𑌿𑌕𑍍𑌰𑌿𑌯𑌂 𑌸𑌦𑌾
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 262॥

𑌯𑌚𑍍𑌚𑌕𑌾𑌸𑍍𑌤𑍍𑌯𑌨𑌪𑌰𑌂 𑌪𑌰𑌾𑌤𑍍𑌪𑌰𑌂
𑌪𑍍𑌰𑌤𑍍𑌯𑌗𑍇𑌕𑌰𑌸𑌮𑌾𑌤𑍍𑌮𑌲𑌕𑍍𑌷𑌣𑌮𑍍 ।
𑌸𑌤𑍍𑌯𑌚𑌿𑌤𑍍𑌸𑍁𑌖𑌮𑌨𑌂𑌤𑌮𑌵𑍍𑌯𑌯𑌂
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 263॥

𑌉𑌕𑍍𑌤𑌮𑌰𑍍𑌥𑌮𑌿𑌮𑌮𑌾𑌤𑍍𑌮𑌨𑌿 𑌸𑍍𑌵𑌯𑌂
𑌭𑌾𑌵𑌯𑍇𑌤𑍍𑌪𑍍𑌰𑌥𑌿𑌤𑌯𑍁𑌕𑍍𑌤𑌿𑌭𑌿𑌰𑍍𑌧𑌿𑌯𑌾 । (𑌪𑌾𑌠𑌭𑍇𑌦𑌃 – 𑌭𑌾𑌵𑌯 𑌪𑍍𑌰𑌥𑌿𑌤)
𑌸𑌂𑌶𑌯𑌾𑌦𑌿𑌰𑌹𑌿𑌤𑌂 𑌕𑌰𑌾𑌂𑌬𑍁𑌵𑌤𑍍
𑌤𑍇𑌨 𑌤𑌤𑍍𑌤𑍍𑌵𑌨𑌿𑌗𑌮𑍋 𑌭𑌵𑌿𑌷𑍍𑌯𑌤𑌿 ॥ 264॥

𑌸𑌂𑌬𑍋𑌧𑌮𑌾𑌤𑍍𑌰𑌂 𑌪𑌰𑌿𑌶𑍁𑌦𑍍𑌧𑌤𑌤𑍍𑌤𑍍𑌵𑌂 (𑌪𑌾𑌠𑌭𑍇𑌦𑌃 – 𑌸𑍍𑌵𑌂 𑌬𑍋𑌧𑌮𑌾𑌤𑍍𑌰𑌂)
𑌵𑌿𑌜𑍍𑌞𑌾𑌯 𑌸𑌂𑌘𑍇 𑌨𑍃𑌪𑌵𑌚𑍍𑌚 𑌸𑍈𑌨𑍍𑌯𑍇 ।
𑌤𑌦𑌾𑌶𑍍𑌰𑌯𑌃 𑌸𑍍𑌵𑌾𑌤𑍍𑌮𑌨𑌿 𑌸𑌰𑍍𑌵𑌦𑌾 𑌸𑍍𑌥𑌿𑌤𑍋 (𑌪𑌾𑌠𑌭𑍇𑌦𑌃 – 𑌤𑌦𑌾𑌤𑍍𑌮𑌨𑍈𑌵𑌾𑌤𑍍𑌮𑌨𑌿)
𑌵𑌿𑌲𑌾𑌪𑌯 𑌬𑍍𑌰𑌹𑍍𑌮𑌣𑌿 𑌵𑌿𑌶𑍍𑌵𑌜𑌾𑌤𑌮𑍍 ॥ 265॥ (𑌪𑌾𑌠𑌭𑍇𑌦𑌃 – 𑌦𑍃𑌶𑍍𑌯𑌜𑌾𑌤𑌮𑍍)

𑌬𑍁𑌦𑍍𑌧𑍌 𑌗𑍁𑌹𑌾𑌯𑌾𑌂 𑌸𑌦𑌸𑌦𑍍𑌵𑌿𑌲𑌕𑍍𑌷𑌣𑌂
𑌬𑍍𑌰𑌹𑍍𑌮𑌾𑌸𑍍𑌤𑌿 𑌸𑌤𑍍𑌯𑌂 𑌪𑌰𑌮𑌦𑍍𑌵𑌿𑌤𑍀𑌯𑌮𑍍 ।
𑌤𑌦𑌾𑌤𑍍𑌮𑌨𑌾 𑌯𑍋𑌽𑌤𑍍𑌰 𑌵𑌸𑍇𑌦𑍍𑌗𑍁𑌹𑌾𑌯𑌾𑌂
𑌪𑍁𑌨𑌰𑍍𑌨 𑌤𑌸𑍍𑌯𑌾𑌂𑌗𑌗𑍁𑌹𑌾𑌪𑍍𑌰𑌵𑍇𑌶𑌃 ॥ 266॥

𑌜𑍍𑌞𑌾𑌤𑍇 𑌵𑌸𑍍𑌤𑍁𑌨𑍍𑌯𑌪𑌿 𑌬𑌲𑌵𑌤𑍀 𑌵𑌾𑌸𑌨𑌾𑌽𑌨𑌾𑌦𑌿𑌰𑍇𑌷𑌾
𑌕𑌰𑍍𑌤𑌾 𑌭𑍋𑌕𑍍𑌤𑌾𑌪𑍍𑌯𑌹𑌮𑌿𑌤𑌿 𑌦𑍃𑌢𑌾 𑌯𑌾𑌽𑌸𑍍𑌯 𑌸𑌂𑌸𑌾𑌰𑌹𑍇𑌤𑍁𑌃 ।
𑌪𑍍𑌰𑌤𑍍𑌯𑌗𑍍𑌦𑍃𑌷𑍍𑌟𑍍𑌯𑌾𑌽𑌽𑌤𑍍𑌮𑌨𑌿 𑌨𑌿𑌵𑌸𑌤𑌾 𑌸𑌾𑌪𑌨𑍇𑌯𑌾 𑌪𑍍𑌰𑌯𑌤𑍍𑌨𑌾-
𑌨𑍍𑌮𑍁𑌕𑍍𑌤𑌿𑌂 𑌪𑍍𑌰𑌾𑌹𑍁𑌸𑍍𑌤𑌦𑌿𑌹 𑌮𑍁𑌨𑌯𑍋 𑌵𑌾𑌸𑌨𑌾𑌤𑌾𑌨𑌵𑌂 𑌯𑌤𑍍 ॥ 26𑍭॥

𑌅𑌹𑌂 𑌮𑌮𑍇𑌤𑌿 𑌯𑍋 𑌭𑌾𑌵𑍋 𑌦𑍇𑌹𑌾𑌕𑍍𑌷𑌾𑌦𑌾𑌵𑌨𑌾𑌤𑍍𑌮𑌨𑌿 ।
𑌅𑌧𑍍𑌯𑌾𑌸𑍋𑌽𑌯𑌂 𑌨𑌿𑌰𑌸𑍍𑌤𑌵𑍍𑌯𑍋 𑌵𑌿𑌦𑍁𑌷𑌾 𑌸𑍍𑌵𑌾𑌤𑍍𑌮𑌨𑌿𑌷𑍍𑌠𑌯𑌾 ॥ 26𑍮॥

𑌜𑍍𑌞𑌾𑌤𑍍𑌵𑌾 𑌸𑍍𑌵𑌂 𑌪𑍍𑌰𑌤𑍍𑌯𑌗𑌾𑌤𑍍𑌮𑌾𑌨𑌂 𑌬𑍁𑌦𑍍𑌧𑌿𑌤𑌦𑍍𑌵𑍃𑌤𑍍𑌤𑌿𑌸𑌾𑌕𑍍𑌷𑌿𑌣𑌮𑍍 ।
𑌸𑍋𑌽𑌹𑌮𑌿𑌤𑍍𑌯𑍇𑌵 𑌸𑌦𑍍𑌵𑍃𑌤𑍍𑌤𑍍𑌯𑌾𑌽𑌨𑌾𑌤𑍍𑌮𑌨𑍍𑌯𑌾𑌤𑍍𑌮𑌮𑌤𑌿𑌂 𑌜𑌹𑌿 ॥ 26𑍯॥

𑌲𑍋𑌕𑌾𑌨𑍁𑌵𑌰𑍍𑌤𑌨𑌂 𑌤𑍍𑌯𑌕𑍍𑌤𑍍𑌵𑌾 𑌤𑍍𑌯𑌕𑍍𑌤𑍍𑌵𑌾 𑌦𑍇𑌹𑌾𑌨𑍁𑌵𑌰𑍍𑌤𑌨𑌮𑍍 ।
𑌶𑌾𑌸𑍍𑌤𑍍𑌰𑌾𑌨𑍁𑌵𑌰𑍍𑌤𑌨𑌂 𑌤𑍍𑌯𑌕𑍍𑌤𑍍𑌵𑌾 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 2𑍭0॥

𑌲𑍋𑌕𑌵𑌾𑌸𑌨𑌯𑌾 𑌜𑌂𑌤𑍋𑌃 𑌶𑌾𑌸𑍍𑌤𑍍𑌰𑌵𑌾𑌸𑌨𑌯𑌾𑌪𑌿 𑌚 ।
𑌦𑍇𑌹𑌵𑌾𑌸𑌨𑌯𑌾 𑌜𑍍𑌞𑌾𑌨𑌂 𑌯𑌥𑌾𑌵𑌨𑍍𑌨𑍈𑌵 𑌜𑌾𑌯𑌤𑍇 ॥ 2𑍭1

𑌸𑌂𑌸𑌾𑌰𑌕𑌾𑌰𑌾𑌗𑍃𑌹𑌮𑍋𑌕𑍍𑌷𑌮𑌿𑌚𑍍𑌛𑍋-
𑌰𑌯𑍋𑌮𑌯𑌂 𑌪𑌾𑌦𑌨𑌿𑌬𑌂𑌧𑌶𑌋𑌂𑌖𑌲𑌮𑍍 । (𑌪𑌾𑌠𑌭𑍇𑌦𑌃 – 𑌨𑌿𑌬𑌦𑍍𑌧)
𑌵𑌦𑌂𑌤𑌿 𑌤𑌜𑍍𑌜𑍍𑌞𑌾𑌃 𑌪𑌟𑍁 𑌵𑌾𑌸𑌨𑌾𑌤𑍍𑌰𑌯𑌂
𑌯𑍋𑌽𑌸𑍍𑌮𑌾𑌦𑍍𑌵𑌿𑌮𑍁𑌕𑍍𑌤𑌃 𑌸𑌮𑍁𑌪𑍈𑌤𑌿 𑌮𑍁𑌕𑍍𑌤𑌿𑌮𑍍 ॥ 2𑍭2॥

𑌜𑌲𑌾𑌦𑌿𑌸𑌂𑌸𑌰𑍍𑌗𑌵𑌶𑌾𑌤𑍍𑌪𑍍𑌰𑌭𑍂𑌤- (𑌪𑌾𑌠𑌭𑍇𑌦𑌃 – 𑌜𑌲𑌾𑌦𑌿𑌸𑌂𑌪𑌰𑍍𑌕𑌵𑌶𑌾𑌤𑍍)
𑌦𑍁𑌰𑍍𑌗𑌂𑌧𑌧𑍂𑌤𑌾𑌽𑌗𑌰𑍁𑌦𑌿𑌵𑍍𑌯𑌵𑌾𑌸𑌨𑌾 ।
𑌸𑌂𑌘𑌰𑍍𑌷𑌣𑍇𑌨𑍈𑌵 𑌵𑌿𑌭𑌾𑌤𑌿 𑌸𑌮𑍍𑌯-
𑌗𑍍𑌵𑌿𑌧𑍂𑌯𑌮𑌾𑌨𑍇 𑌸𑌤𑌿 𑌬𑌾𑌹𑍍𑌯𑌗𑌂𑌧𑍇 ॥ 2𑍭3॥

𑌅𑌂𑌤𑌃𑌶𑍍𑌰𑌿𑌤𑌾𑌨𑌂𑌤𑌦𑍁𑌰𑌂𑌤𑌵𑌾𑌸𑌨𑌾-
𑌧𑍂𑌲𑍀𑌵𑌿𑌲𑌿𑌪𑍍𑌤𑌾 𑌪𑌰𑌮𑌾𑌤𑍍𑌮𑌵𑌾𑌸𑌨𑌾 ।
𑌪𑍍𑌰𑌜𑍍𑌞𑌾𑌤𑌿𑌸𑌂𑌘𑌰𑍍𑌷𑌣𑌤𑍋 𑌵𑌿𑌶𑍁𑌦𑍍𑌧𑌾
𑌪𑍍𑌰𑌤𑍀𑌯𑌤𑍇 𑌚𑌂𑌦𑌨𑌗𑌂𑌧𑌵𑌤𑍍 𑌸𑍍𑌫𑍁𑌟𑌮𑍍 ॥ 2𑍭4॥ (𑌪𑌾𑌠𑌭𑍇𑌦𑌃 – 𑌸𑍍𑌫𑍁𑌟𑌾)

𑌅𑌨𑌾𑌤𑍍𑌮𑌵𑌾𑌸𑌨𑌾𑌜𑌾𑌲𑍈𑌸𑍍𑌤𑌿𑌰𑍋𑌭𑍂𑌤𑌾𑌤𑍍𑌮𑌵𑌾𑌸𑌨𑌾 ।
𑌨𑌿𑌤𑍍𑌯𑌾𑌤𑍍𑌮𑌨𑌿𑌷𑍍𑌠𑌯𑌾 𑌤𑍇𑌷𑌾𑌂 𑌨𑌾𑌶𑍇 𑌭𑌾𑌤𑌿 𑌸𑍍𑌵𑌯𑌂 𑌸𑍍𑌫𑍁𑌟𑌮𑍍 ॥ 2𑍭5॥ (𑌪𑌾𑌠𑌭𑍇𑌦𑌃 – 𑌸𑍍𑌫𑍁𑌟𑌾)

𑌯𑌥𑌾 𑌯𑌥𑌾 𑌪𑍍𑌰𑌤𑍍𑌯𑌗𑌵𑌸𑍍𑌥𑌿𑌤𑌂 𑌮𑌨𑌃
𑌤𑌥𑌾 𑌤𑌥𑌾 𑌮𑍁𑌂𑌚𑌤𑌿 𑌬𑌾𑌹𑍍𑌯𑌵𑌾𑌸𑌨𑌾𑌮𑍍 । (𑌪𑌾𑌠𑌭𑍇𑌦𑌃 – 𑌬𑌾𑌹𑍍𑌯𑌵𑌾𑌸𑌨𑌾𑌃)
𑌨𑌿𑌃𑌶𑍇𑌷𑌮𑍋𑌕𑍍𑌷𑍇 𑌸𑌤𑌿 𑌵𑌾𑌸𑌨𑌾𑌨𑌾𑌂
𑌆𑌤𑍍𑌮𑌾𑌨𑍁𑌭𑍂𑌤𑌿𑌃 𑌪𑍍𑌰𑌤𑌿𑌬𑌂𑌧𑌶𑍂𑌨𑍍𑌯𑌾 ॥ 2𑍭6॥

𑌸𑍍𑌵𑌾𑌤𑍍𑌮𑌨𑍍𑌯𑍇𑌵 𑌸𑌦𑌾 𑌸𑍍𑌥𑌿𑌤𑍍𑌵𑌾 𑌮𑌨𑍋 𑌨𑌶𑍍𑌯𑌤𑌿 𑌯𑍋𑌗𑌿𑌨𑌃 । (𑌪𑌾𑌠𑌭𑍇𑌦𑌃 – 𑌸𑍍𑌥𑌿𑌤𑍍𑌯𑌾)
𑌵𑌾𑌸𑌨𑌾𑌨𑌾𑌂 𑌕𑍍𑌷𑌯𑌶𑍍𑌚𑌾𑌤𑌃 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 2𑍭𑍭॥

𑌤𑌮𑍋 𑌦𑍍𑌵𑌾𑌭𑍍𑌯𑌾𑌂 𑌰𑌜𑌃 𑌸𑌤𑍍𑌤𑍍𑌵𑌾𑌤𑍍𑌸𑌤𑍍𑌤𑍍𑌵𑌂 𑌶𑍁𑌦𑍍𑌧𑍇𑌨 𑌨𑌶𑍍𑌯𑌤𑌿 ।
𑌤𑌸𑍍𑌮𑌾𑌤𑍍𑌸𑌤𑍍𑌤𑍍𑌵𑌮𑌵𑌷𑍍𑌟𑌭𑍍𑌯 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 2𑍭𑍮॥

𑌪𑍍𑌰𑌾𑌰𑌬𑍍𑌧𑌂 𑌪𑍁𑌷𑍍𑌯𑌤𑌿 𑌵𑌪𑍁𑌰𑌿𑌤𑌿 𑌨𑌿𑌶𑍍𑌚𑌿𑌤𑍍𑌯 𑌨𑌿𑌶𑍍𑌚𑌲𑌃 ।
𑌧𑍈𑌰𑍍𑌯𑌮𑌾𑌲𑌂𑌬𑍍𑌯 𑌯𑌤𑍍𑌨𑍇𑌨 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 2𑍭𑍯॥

𑌨𑌾𑌹𑌂 𑌜𑍀𑌵𑌃 𑌪𑌰𑌂 𑌬𑍍𑌰𑌹𑍍𑌮𑍇𑌤𑍍𑌯𑌤𑌦𑍍𑌵𑍍𑌯𑌾𑌵𑍃𑌤𑍍𑌤𑌿𑌪𑍂𑌰𑍍𑌵𑌕𑌮𑍍 ।
𑌵𑌾𑌸𑌨𑌾𑌵𑍇𑌗𑌤𑌃 𑌪𑍍𑌰𑌾𑌪𑍍𑌤𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 2𑍮0॥

𑌶𑍍𑌰𑍁𑌤𑍍𑌯𑌾 𑌯𑍁𑌕𑍍𑌤𑍍𑌯𑌾 𑌸𑍍𑌵𑌾𑌨𑍁𑌭𑍂𑌤𑍍𑌯𑌾 𑌜𑍍𑌞𑌾𑌤𑍍𑌵𑌾 𑌸𑌾𑌰𑍍𑌵𑌾𑌤𑍍𑌮𑍍𑌯𑌮𑌾𑌤𑍍𑌮𑌨𑌃 ।
𑌕𑍍𑌵𑌚𑌿𑌦𑌾𑌭𑌾𑌸𑌤𑌃 𑌪𑍍𑌰𑌾𑌪𑍍𑌤𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 2𑍮1॥

𑌅𑌨𑌾𑌦𑌾𑌨𑌵𑌿𑌸𑌰𑍍𑌗𑌾𑌭𑍍𑌯𑌾𑌮𑍀𑌷𑌨𑍍𑌨𑌾𑌸𑍍𑌤𑌿 𑌕𑍍𑌰𑌿𑌯𑌾 𑌮𑍁𑌨𑍇𑌃 । (𑌪𑌾𑌠𑌭𑍇𑌦𑌃 – 𑌅𑌨𑍍𑌨𑌾𑌦𑌾𑌨𑌵𑌿𑌸𑌰𑍍𑌗𑌾)
𑌤𑌦𑍇𑌕𑌨𑌿𑌷𑍍𑌠𑌯𑌾 𑌨𑌿𑌤𑍍𑌯𑌂 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 2𑍮2॥

𑌤𑌤𑍍𑌤𑍍𑌵𑌮𑌸𑍍𑌯𑌾𑌦𑌿𑌵𑌾𑌕𑍍𑌯𑍋𑌤𑍍𑌥𑌬𑍍𑌰𑌹𑍍𑌮𑌾𑌤𑍍𑌮𑍈𑌕𑌤𑍍𑌵𑌬𑍋𑌧𑌤𑌃 ।
𑌬𑍍𑌰𑌹𑍍𑌮𑌣𑍍𑌯𑌾𑌤𑍍𑌮𑌤𑍍𑌵𑌦𑌾𑌰𑍍𑌢𑍍𑌯𑌾𑌯 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 2𑍮3॥

𑌅𑌹𑌂𑌭𑌾𑌵𑌸𑍍𑌯 𑌦𑍇𑌹𑍇𑌽𑌸𑍍𑌮𑌿𑌨𑍍𑌨𑌿𑌃𑌶𑍇𑌷𑌵𑌿𑌲𑌯𑌾𑌵𑌧𑌿 ।
𑌸𑌾𑌵𑌧𑌾𑌨𑍇𑌨 𑌯𑍁𑌕𑍍𑌤𑌾𑌤𑍍𑌮𑌾 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 2𑍮4॥

𑌪𑍍𑌰𑌤𑍀𑌤𑌿𑌰𑍍𑌜𑍀𑌵𑌜𑌗𑌤𑍋𑌃 𑌸𑍍𑌵𑌪𑍍𑌨𑌵𑌦𑍍𑌭𑌾𑌤𑌿 𑌯𑌾𑌵𑌤𑌾 ।
𑌤𑌾𑌵𑌨𑍍𑌨𑌿𑌰𑌂𑌤𑌰𑌂 𑌵𑌿𑌦𑍍𑌵𑌨𑍍𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 2𑍮5॥

𑌨𑌿𑌦𑍍𑌰𑌾𑌯𑌾 𑌲𑍋𑌕𑌵𑌾𑌰𑍍𑌤𑌾𑌯𑌾𑌃 𑌶𑌬𑍍𑌦𑌾𑌦𑍇𑌰𑌪𑌿 𑌵𑌿𑌸𑍍𑌮𑍃𑌤𑍇𑌃 ।
𑌕𑍍𑌵𑌚𑌿𑌨𑍍𑌨𑌾𑌵𑌸𑌰𑌂 𑌦𑌤𑍍𑌤𑍍𑌵𑌾 𑌚𑌿𑌂𑌤𑌯𑌾𑌤𑍍𑌮𑌾𑌨𑌮𑌾𑌤𑍍𑌮𑌨𑌿 ॥ 2𑍮6॥

𑌮𑌾𑌤𑌾𑌪𑌿𑌤𑍍𑌰𑍋𑌰𑍍𑌮𑌲𑍋𑌦𑍍𑌭𑍂𑌤𑌂 𑌮𑌲𑌮𑌾𑌂𑌸𑌮𑌯𑌂 𑌵𑌪𑍁𑌃 ।
𑌤𑍍𑌯𑌕𑍍𑌤𑍍𑌵𑌾 𑌚𑌾𑌂𑌡𑌾𑌲𑌵𑌦𑍍𑌦𑍂𑌰𑌂 𑌬𑍍𑌰𑌹𑍍𑌮𑍀𑌭𑍂𑌯 𑌕𑍃𑌤𑍀 𑌭𑌵 ॥ 2𑍮𑍭॥

𑌘𑌟𑌾𑌕𑌾𑌶𑌂 𑌮𑌹𑌾𑌕𑌾𑌶 𑌇𑌵𑌾𑌤𑍍𑌮𑌾𑌨𑌂 𑌪𑌰𑌾𑌤𑍍𑌮𑌨𑌿 ।
𑌵𑌿𑌲𑌾𑌪𑍍𑌯𑌾𑌖𑌂𑌡𑌭𑌾𑌵𑍇𑌨 𑌤𑍂𑌷𑍍𑌣𑍀 𑌭𑌵 𑌸𑌦𑌾 𑌮𑍁𑌨𑍇 ॥ 2𑍮𑍮॥ (𑌪𑌾𑌠𑌭𑍇𑌦𑌃 – 𑌤𑍂𑌷𑍍𑌣𑍀𑌂)

𑌸𑍍𑌵𑌪𑍍𑌰𑌕𑌾𑌶𑌮𑌧𑌿𑌷𑍍𑌠𑌾𑌨𑌂 𑌸𑍍𑌵𑌯𑌂𑌭𑍂𑌯 𑌸𑌦𑌾𑌤𑍍𑌮𑌨𑌾 ।
𑌬𑍍𑌰𑌹𑍍𑌮𑌾𑌂𑌡𑌮𑌪𑌿 𑌪𑌿𑌂𑌡𑌾𑌂𑌡𑌂 𑌤𑍍𑌯𑌜𑍍𑌯𑌤𑌾𑌂 𑌮𑌲𑌭𑌾𑌂𑌡𑌵𑌤𑍍 ॥ 2𑍮𑍯॥

𑌚𑌿𑌦𑌾𑌤𑍍𑌮𑌨𑌿 𑌸𑌦𑌾𑌨𑌂𑌦𑍇 𑌦𑍇𑌹𑌾𑌰𑍂𑌢𑌾𑌮𑌹𑌂𑌧𑌿𑌯𑌮𑍍 ।
𑌨𑌿𑌵𑍇𑌶𑍍𑌯 𑌲𑌿𑌂𑌗𑌮𑍁𑌤𑍍𑌸𑍃𑌜𑍍𑌯 𑌕𑍇𑌵𑌲𑍋 𑌭𑌵 𑌸𑌰𑍍𑌵𑌦𑌾 ॥ 2𑍯0॥

𑌯𑌤𑍍𑌰𑍈𑌷 𑌜𑌗𑌦𑌾𑌭𑌾𑌸𑍋 𑌦𑌰𑍍𑌪𑌣𑌾𑌂𑌤𑌃 𑌪𑍁𑌰𑌂 𑌯𑌥𑌾 ।
𑌤𑌦𑍍𑌬𑍍𑌰𑌹𑍍𑌮𑌾𑌹𑌮𑌿𑌤𑌿 𑌜𑍍𑌞𑌾𑌤𑍍𑌵𑌾 𑌕𑍃𑌤𑌕𑍃𑌤𑍍𑌯𑍋 𑌭𑌵𑌿𑌷𑍍𑌯𑌸𑌿 ॥ 2𑍯1॥

𑌯𑌤𑍍𑌸𑌤𑍍𑌯𑌭𑍂𑌤𑌂 𑌨𑌿𑌜𑌰𑍂𑌪𑌮𑌾𑌦𑍍𑌯𑌂
𑌚𑌿𑌦𑌦𑍍𑌵𑌯𑌾𑌨𑌂𑌦𑌮𑌰𑍂𑌪𑌮𑌕𑍍𑌰𑌿𑌯𑌮𑍍 ।
𑌤𑌦𑍇𑌤𑍍𑌯 𑌮𑌿𑌥𑍍𑌯𑌾𑌵𑌪𑍁𑌰𑍁𑌤𑍍𑌸𑍃𑌜𑍇𑌤 (𑌪𑌾𑌠𑌭𑍇𑌦𑌃 – 𑌸𑍃𑌜𑍈𑌤)
𑌶𑍈𑌲𑍂𑌷𑌵𑌦𑍍𑌵𑍇𑌷𑌮𑍁𑌪𑌾𑌤𑍍𑌤𑌮𑌾𑌤𑍍𑌮𑌨𑌃 ॥ 2𑍯2॥

𑌸𑌰𑍍𑌵𑌾𑌤𑍍𑌮𑌨𑌾 𑌦𑍃𑌶𑍍𑌯𑌮𑌿𑌦𑌂 𑌮𑍃𑌷𑍈𑌵
𑌨𑍈𑌵𑌾𑌹𑌮𑌰𑍍𑌥𑌃 𑌕𑍍𑌷𑌣𑌿𑌕𑌤𑍍𑌵𑌦𑌰𑍍𑌶𑌨𑌾𑌤𑍍 ।
𑌜𑌾𑌨𑌾𑌮𑍍𑌯𑌹𑌂 𑌸𑌰𑍍𑌵𑌮𑌿𑌤𑌿 𑌪𑍍𑌰𑌤𑍀𑌤𑌿𑌃
𑌕𑍁𑌤𑍋𑌽𑌹𑌮𑌾𑌦𑍇𑌃 𑌕𑍍𑌷𑌣𑌿𑌕𑌸𑍍𑌯 𑌸𑌿𑌧𑍍𑌯𑍇𑌤𑍍 ॥ 2𑍯3॥

𑌅𑌹𑌂𑌪𑌦𑌾𑌰𑍍𑌥𑌸𑍍𑌤𑍍𑌵𑌹𑌮𑌾𑌦𑌿𑌸𑌾𑌕𑍍𑌷𑍀
𑌨𑌿𑌤𑍍𑌯𑌂 𑌸𑍁𑌷𑍁𑌪𑍍𑌤𑌾𑌵𑌪𑌿 𑌭𑌾𑌵𑌦𑌰𑍍𑌶𑌨𑌾𑌤𑍍 ।
𑌬𑍍𑌰𑍂𑌤𑍇 𑌹𑍍𑌯𑌜𑍋 𑌨𑌿𑌤𑍍𑌯 𑌇𑌤𑌿 𑌶𑍍𑌰𑍁𑌤𑌿𑌃 𑌸𑍍𑌵𑌯𑌂
𑌤𑌤𑍍𑌪𑍍𑌰𑌤𑍍𑌯𑌗𑌾𑌤𑍍𑌮𑌾 𑌸𑌦𑌸𑌦𑍍𑌵𑌿𑌲𑌕𑍍𑌷𑌣𑌃 ॥ 2𑍯4॥

𑌵𑌿𑌕𑌾𑌰𑌿𑌣𑌾𑌂 𑌸𑌰𑍍𑌵𑌵𑌿𑌕𑌾𑌰𑌵𑍇𑌤𑍍𑌤𑌾
𑌨𑌿𑌤𑍍𑌯𑌾𑌵𑌿𑌕𑌾𑌰𑍋 𑌭𑌵𑌿𑌤𑍁𑌂 𑌸𑌮𑌰𑍍𑌹𑌤𑌿 । (𑌪𑌾𑌠𑌭𑍇𑌦𑌃 – 𑌨𑌿𑌤𑍍𑌯𑍋𑌽𑌵𑌿𑌕𑌾𑌰𑍋)
𑌮𑌨𑍋𑌰𑌥𑌸𑍍𑌵𑌪𑍍𑌨𑌸𑍁𑌷𑍁𑌪𑍍𑌤𑌿𑌷𑍁 𑌸𑍍𑌫𑍁𑌟𑌂
𑌪𑍁𑌨𑌃 𑌪𑍁𑌨𑌰𑍍𑌦𑍃𑌷𑍍𑌟𑌮𑌸𑌤𑍍𑌤𑍍𑌵𑌮𑍇𑌤𑌯𑍋𑌃 ॥ 2𑍯5॥

𑌅𑌤𑍋𑌽𑌭𑌿𑌮𑌾𑌨𑌂 𑌤𑍍𑌯𑌜 𑌮𑌾𑌂𑌸𑌪𑌿𑌂𑌡𑍇
𑌪𑌿𑌂𑌡𑌾𑌭𑌿𑌮𑌾𑌨𑌿𑌨𑍍𑌯𑌪𑌿 𑌬𑍁𑌦𑍍𑌧𑌿𑌕𑌲𑍍𑌪𑌿𑌤𑍇 ।
𑌕𑌾𑌲𑌤𑍍𑌰𑌯𑌾𑌬𑌾𑌧𑍍𑌯𑌮𑌖𑌂𑌡𑌬𑍋𑌧𑌂
𑌜𑍍𑌞𑌾𑌤𑍍𑌵𑌾 𑌸𑍍𑌵𑌮𑌾𑌤𑍍𑌮𑌾𑌨𑌮𑍁𑌪𑍈𑌹𑌿 𑌶𑌾𑌂𑌤𑌿𑌮𑍍 ॥ 2𑍯6॥

𑌤𑍍𑌯𑌜𑌾𑌭𑌿𑌮𑌾𑌨𑌂 𑌕𑍁𑌲𑌗𑍋𑌤𑍍𑌰𑌨𑌾𑌮-
𑌰𑍂𑌪𑌾𑌶𑍍𑌰𑌮𑍇𑌷𑍍𑌵𑌾𑌰𑍍𑌦𑍍𑌰𑌶𑌵𑌾𑌶𑍍𑌰𑌿𑌤𑍇𑌷𑍁 ।
𑌲𑌿𑌂𑌗𑌸𑍍𑌯 𑌧𑌰𑍍𑌮𑌾𑌨𑌪𑌿 𑌕𑌰𑍍𑌤𑍃𑌤𑌾𑌦𑍀𑌂-
𑌸𑍍𑌤𑍍𑌯𑌕𑍍𑌤𑍍𑌵𑌾 𑌭𑌵𑌾𑌖𑌂𑌡𑌸𑍁𑌖𑌸𑍍𑌵𑌰𑍂𑌪𑌃 ॥ 2𑍯𑍭॥

𑌸𑌂𑌤𑍍𑌯𑌨𑍍𑌯𑍇 𑌪𑍍𑌰𑌤𑌿𑌬𑌂𑌧𑌾𑌃 𑌪𑍁𑌂𑌸𑌃 𑌸𑌂𑌸𑌾𑌰𑌹𑍇𑌤𑌵𑍋 𑌦𑍃𑌷𑍍𑌟𑌾𑌃 ।
𑌤𑍇𑌷𑌾𑌮𑍇𑌵𑌂 𑌮𑍂𑌲𑌂 𑌪𑍍𑌰𑌥𑌮𑌵𑌿𑌕𑌾𑌰𑍋 𑌭𑌵𑌤𑍍𑌯𑌹𑌂𑌕𑌾𑌰𑌃 ॥ 2𑍯𑍮॥ (𑌪𑌾𑌠𑌭𑍇𑌦𑌃 – 𑌤𑍇𑌷𑌾𑌮𑍇𑌷𑌾𑌂)

𑌯𑌾𑌵𑌤𑍍𑌸𑍍𑌯𑌾𑌤𑍍𑌸𑍍𑌵𑌸𑍍𑌯 𑌸𑌂𑌬𑌂𑌧𑍋𑌽𑌹𑌂𑌕𑌾𑌰𑍇𑌣 𑌦𑍁𑌰𑌾𑌤𑍍𑌮𑌨𑌾 ।
𑌤𑌾𑌵𑌨𑍍𑌨 𑌲𑍇𑌶𑌮𑌾𑌤𑍍𑌰𑌾𑌪𑌿 𑌮𑍁𑌕𑍍𑌤𑌿𑌵𑌾𑌰𑍍𑌤𑌾 𑌵𑌿𑌲𑌕𑍍𑌷𑌣𑌾 ॥ 2𑍯𑍯॥

𑌅𑌹𑌂𑌕𑌾𑌰𑌗𑍍𑌰𑌹𑌾𑌨𑍍𑌮𑍁𑌕𑍍𑌤𑌃 𑌸𑍍𑌵𑌰𑍂𑌪𑌮𑍁𑌪𑌪𑌦𑍍𑌯𑌤𑍇 ।
𑌚𑌂𑌦𑍍𑌰𑌵𑌦𑍍𑌵𑌿𑌮𑌲𑌃 𑌪𑍂𑌰𑍍𑌣𑌃 𑌸𑌦𑌾𑌨𑌂𑌦𑌃 𑌸𑍍𑌵𑌯𑌂𑌪𑍍𑌰𑌭𑌃 ॥ 300॥

𑌯𑍋 𑌵𑌾 𑌪𑍁𑌰𑍇 𑌸𑍋𑌽𑌹𑌮𑌿𑌤𑌿 𑌪𑍍𑌰𑌤𑍀𑌤𑍋 (𑌪𑌾𑌠𑌭𑍇𑌦𑌃 – 𑌪𑍁𑌰𑍈𑌷𑍋𑌽𑌹𑌮𑌿𑌤𑌿)
𑌬𑍁𑌦𑍍𑌧𑍍𑌯𑌾 𑌪𑍍𑌰𑌕𑍍𑌲𑍃𑌪𑍍𑌤𑌸𑍍𑌤𑌮𑌸𑌾𑌽𑌤𑌿𑌮𑍂𑌢𑌯𑌾 । (𑌪𑌾𑌠𑌭𑍇𑌦𑌃 – 𑌬𑍁𑌦𑍍𑌧𑍍𑌯𑌾𑌽𑌵𑌿𑌵𑌿𑌕𑍍𑌤𑌸𑍍𑌤𑌮𑌸𑌾)
𑌤𑌸𑍍𑌯𑍈𑌵 𑌨𑌿𑌃𑌶𑍇𑌷𑌤𑌯𑌾 𑌵𑌿𑌨𑌾𑌶𑍇
𑌬𑍍𑌰𑌹𑍍𑌮𑌾𑌤𑍍𑌮𑌭𑌾𑌵𑌃 𑌪𑍍𑌰𑌤𑌿𑌬𑌂𑌧𑌶𑍂𑌨𑍍𑌯𑌃 ॥ 301॥

𑌬𑍍𑌰𑌹𑍍𑌮𑌾𑌨𑌂𑌦𑌨𑌿𑌧𑌿𑌰𑍍𑌮𑌹𑌾𑌬𑌲𑌵𑌤𑌾𑌽𑌹𑌂𑌕𑌾𑌰𑌘𑍋𑌰𑌾𑌹𑌿𑌨𑌾
𑌸𑌂𑌵𑍇𑌷𑍍𑌟𑍍𑌯𑌾𑌤𑍍𑌮𑌨𑌿 𑌰𑌕𑍍𑌷𑍍𑌯𑌤𑍇 𑌗𑍁𑌣𑌮𑌯𑍈𑌶𑍍𑌚𑌂𑌡𑍇𑌸𑍍𑌤𑍍𑌰𑌿𑌭𑌿𑌰𑍍𑌮𑌸𑍍𑌤𑌕𑍈𑌃 (𑌪𑌾𑌠𑌭𑍇𑌦𑌃 – 𑌚𑌂𑌡𑍈)
𑌵𑌿𑌜𑍍𑌞𑌾𑌨𑌾𑌖𑍍𑌯𑌮𑌹𑌾𑌸𑌿𑌨𑌾 𑌶𑍍𑌰𑍁𑌤𑌿𑌮𑌤𑌾 𑌵𑌿𑌚𑍍𑌛𑌿𑌦𑍍𑌯 𑌶𑍀𑌰𑍍𑌷𑌤𑍍𑌰𑌯𑌂 (𑌪𑌾𑌠𑌭𑍇𑌦𑌃 – 𑌦𑍍𑌯𑍁𑌤𑌿𑌮𑌤𑌾)
𑌨𑌿𑌰𑍍𑌮𑍂𑌲𑍍𑌯𑌾𑌹𑌿𑌮𑌿𑌮𑌂 𑌨𑌿𑌧𑌿𑌂 𑌸𑍁𑌖𑌕𑌰𑌂 𑌧𑍀𑌰𑍋𑌽𑌨𑍁𑌭𑍋𑌕𑍍𑌤𑍁𑌂𑌕𑍍𑌷𑌮𑌃 ॥ 302॥

𑌯𑌾𑌵𑌦𑍍𑌵𑌾 𑌯𑌤𑍍𑌕𑌿𑌂𑌚𑌿𑌦𑍍𑌵𑌿𑌷𑌦𑍋𑌷𑌸𑍍𑌫𑍂𑌰𑍍𑌤𑌿𑌰𑌸𑍍𑌤𑌿 𑌚𑍇𑌦𑍍𑌦𑍇𑌹𑍇 ।
𑌕𑌥𑌮𑌾𑌰𑍋𑌗𑍍𑌯𑌾𑌯 𑌭𑌵𑍇𑌤𑍍𑌤𑌦𑍍𑌵𑌦𑌹𑌂𑌤𑌾𑌪𑌿 𑌯𑍋𑌗𑌿𑌨𑍋 𑌮𑍁𑌕𑍍𑌤𑍍𑌯𑍈 ॥ 303॥

𑌅𑌹𑌮𑍋𑌽𑌤𑍍𑌯𑌂𑌤𑌨𑌿𑌵𑍃𑌤𑍍𑌤𑍍𑌯𑌾 𑌤𑌤𑍍𑌕𑍃𑌤𑌨𑌾𑌨𑌾𑌵𑌿𑌕𑌲𑍍𑌪𑌸𑌂𑌹𑍃𑌤𑍍𑌯𑌾 ।
𑌪𑍍𑌰𑌤𑍍𑌯𑌕𑍍𑌤𑌤𑍍𑌤𑍍𑌵𑌵𑌿𑌵𑍇𑌕𑌾𑌦𑌿𑌦𑌮𑌹𑌮𑌸𑍍𑌮𑍀𑌤𑌿 𑌵𑌿𑌂𑌦𑌤𑍇 𑌤𑌤𑍍𑌤𑍍𑌵𑌮𑍍 ॥ 304॥ (𑌪𑌾𑌠𑌭𑍇𑌦𑌃 – 𑌵𑌿𑌵𑍇𑌕𑌾𑌦𑌯𑌮𑍍)

𑌅𑌹𑌂𑌕𑌾𑌰𑍇 𑌕𑌰𑍍𑌤𑌰𑍍𑌯𑌹𑌮𑌿𑌤𑌿 𑌮𑌤𑌿𑌂 𑌮𑍁𑌂𑌚 𑌸𑌹𑌸𑌾 (𑌪𑌾𑌠𑌭𑍇𑌦𑌃 – 𑌅𑌹𑌂𑌕𑌰𑍍𑌤𑌰𑍍𑌯𑌸𑍍𑌮𑌿𑌨𑍍𑌨𑌹𑌮𑌿𑌤𑌿)
𑌵𑌿𑌕𑌾𑌰𑌾𑌤𑍍𑌮𑌨𑍍𑌯𑌾𑌤𑍍𑌮𑌪𑍍𑌰𑌤𑌿𑌫𑌲𑌜𑍁𑌷𑌿 𑌸𑍍𑌵𑌸𑍍𑌥𑌿𑌤𑌿𑌮𑍁𑌷𑌿 ।
𑌯𑌦𑌧𑍍𑌯𑌾𑌸𑌾𑌤𑍍𑌪𑍍𑌰𑌾𑌪𑍍𑌤𑌾 𑌜𑌨𑌿𑌮𑍃𑌤𑌿𑌜𑌰𑌾𑌦𑍁𑌃𑌖𑌬𑌹𑍁𑌲𑌾
𑌪𑍍𑌰𑌤𑍀𑌚𑌶𑍍𑌚𑌿𑌨𑍍𑌮𑍂𑌰𑍍𑌤𑍇𑌸𑍍𑌤𑌵 𑌸𑍁𑌖𑌤𑌨𑍋𑌃 𑌸𑌂𑌸𑍃𑌤𑌿𑌰𑌿𑌯𑌮𑍍 ॥ 305॥

𑌸𑌦𑍈𑌕𑌰𑍂𑌪𑌸𑍍𑌯 𑌚𑌿𑌦𑌾𑌤𑍍𑌮𑌨𑍋 𑌵𑌿𑌭𑍋-
𑌰𑌾𑌨𑌂𑌦𑌮𑍂𑌰𑍍𑌤𑍇𑌰𑌨𑌵𑌦𑍍𑌯𑌕𑍀𑌰𑍍𑌤𑍇𑌃 ।
𑌨𑍈𑌵𑌾𑌨𑍍𑌯𑌥𑌾 𑌕𑍍𑌵𑌾𑌪𑍍𑌯𑌵𑌿𑌕𑌾𑌰𑌿𑌣𑌸𑍍𑌤𑍇
𑌵𑌿𑌨𑌾𑌹𑌮𑌧𑍍𑌯𑌾𑌸𑌮𑌮𑍁𑌷𑍍𑌯 𑌸𑌂𑌸𑍃𑌤𑌿𑌃 ॥ 306॥

𑌤𑌸𑍍𑌮𑌾𑌦𑌹𑌂𑌕𑌾𑌰𑌮𑌿𑌮𑌂 𑌸𑍍𑌵𑌶𑌤𑍍𑌰𑍁𑌂
𑌭𑍋𑌕𑍍𑌤𑍁𑌰𑍍𑌗𑌲𑍇 𑌕𑌂𑌟𑌕𑌵𑌤𑍍𑌪𑍍𑌰𑌤𑍀𑌤𑌮𑍍 ।
𑌵𑌿𑌚𑍍𑌛𑌿𑌦𑍍𑌯 𑌵𑌿𑌜𑍍𑌞𑌾𑌨𑌮𑌹𑌾𑌸𑌿𑌨𑌾 𑌸𑍍𑌫𑍁𑌟𑌂
𑌭𑍁𑌂𑌕𑍍𑌷𑍍𑌵𑌾𑌤𑍍𑌮𑌸𑌾𑌮𑍍𑌰𑌾𑌜𑍍𑌯𑌸𑍁𑌖𑌂 𑌯𑌥𑍇𑌷𑍍𑌟𑌮𑍍 ॥ 30𑍭॥

𑌤𑌤𑍋𑌽𑌹𑌮𑌾𑌦𑍇𑌰𑍍𑌵𑌿𑌨𑌿𑌵𑌰𑍍𑌤𑍍𑌯 𑌵𑍃𑌤𑍍𑌤𑌿𑌂
𑌸𑌂𑌤𑍍𑌯𑌕𑍍𑌤𑌰𑌾𑌗𑌃 𑌪𑌰𑌮𑌾𑌰𑍍𑌥𑌲𑌾𑌭𑌾𑌤𑍍 ।
𑌤𑍂𑌷𑍍𑌣𑍀𑌂 𑌸𑌮𑌾𑌸𑍍𑌸𑍍𑌵𑌾𑌤𑍍𑌮𑌸𑍁𑌖𑌾𑌨𑍁𑌭𑍂𑌤𑍍𑌯𑌾
𑌪𑍂𑌰𑍍𑌣𑌾𑌤𑍍𑌮𑌨𑌾 𑌬𑍍𑌰𑌹𑍍𑌮𑌣𑌿 𑌨𑌿𑌰𑍍𑌵𑌿𑌕𑌲𑍍𑌪𑌃 ॥ 30𑍮॥

𑌸𑌮𑍂𑌲𑌕𑍃𑌤𑍍𑌤𑍋𑌽𑌪𑌿 𑌮𑌹𑌾𑌨𑌹𑌂 𑌪𑍁𑌨𑌃
𑌵𑍍𑌯𑍁𑌲𑍍𑌲𑍇𑌖𑌿𑌤𑌃 𑌸𑍍𑌯𑌾𑌦𑍍𑌯𑌦𑌿 𑌚𑍇𑌤𑌸𑌾 𑌕𑍍𑌷𑌣𑌮𑍍 ।
𑌸𑌂𑌜𑍀𑌵𑍍𑌯 𑌵𑌿𑌕𑍍𑌷𑍇𑌪𑌶𑌤𑌂 𑌕𑌰𑍋𑌤𑌿
𑌨𑌭𑌸𑍍𑌵𑌤𑌾 𑌪𑍍𑌰𑌾𑌵𑍃𑌷𑌿 𑌵𑌾𑌰𑌿𑌦𑍋 𑌯𑌥𑌾 ॥ 30𑍯॥

𑌨𑌿𑌗𑍃𑌹𑍍𑌯 𑌶𑌤𑍍𑌰𑍋𑌰𑌹𑌮𑍋𑌽𑌵𑌕𑌾𑌶𑌃
𑌕𑍍𑌵𑌚𑌿𑌨𑍍𑌨 𑌦𑍇𑌯𑍋 𑌵𑌿𑌷𑌯𑌾𑌨𑍁𑌚𑌿𑌂𑌤𑌯𑌾 ।
𑌸 𑌏𑌵 𑌸𑌂𑌜𑍀𑌵𑌨𑌹𑍇𑌤𑍁𑌰𑌸𑍍𑌯
𑌪𑍍𑌰𑌕𑍍𑌷𑍀𑌣𑌜𑌂𑌬𑍀𑌰𑌤𑌰𑍋𑌰𑌿𑌵𑌾𑌂𑌬𑍁 ॥ 310॥

𑌦𑍇𑌹𑌾𑌤𑍍𑌮𑌨𑌾 𑌸𑌂𑌸𑍍𑌥𑌿𑌤 𑌏𑌵 𑌕𑌾𑌮𑍀
𑌵𑌿𑌲𑌕𑍍𑌷𑌣𑌃 𑌕𑌾𑌮𑌯𑌿𑌤𑌾 𑌕𑌥𑌂 𑌸𑍍𑌯𑌾𑌤𑍍 ।
𑌅𑌤𑍋𑌽𑌰𑍍𑌥𑌸𑌂𑌧𑌾𑌨𑌪𑌰𑌤𑍍𑌵𑌮𑍇𑌵
𑌭𑍇𑌦𑌪𑍍𑌰𑌸𑌕𑍍𑌤𑍍𑌯𑌾 𑌭𑌵𑌬𑌂𑌧𑌹𑍇𑌤𑍁𑌃 ॥ 311॥

𑌕𑌾𑌰𑍍𑌯𑌪𑍍𑌰𑌵𑌰𑍍𑌧𑌨𑌾𑌦𑍍𑌬𑍀𑌜𑌪𑍍𑌰𑌵𑍃𑌦𑍍𑌧𑌿𑌃 𑌪𑌰𑌿𑌦𑍃𑌶𑍍𑌯𑌤𑍇 ।
𑌕𑌾𑌰𑍍𑌯𑌨𑌾𑌶𑌾𑌦𑍍𑌬𑍀𑌜𑌨𑌾𑌶𑌸𑍍𑌤𑌸𑍍𑌮𑌾𑌤𑍍𑌕𑌾𑌰𑍍𑌯𑌂 𑌨𑌿𑌰𑍋𑌧𑌯𑍇𑌤𑍍 ॥ 312॥

𑌵𑌾𑌸𑌨𑌾𑌵𑍃𑌦𑍍𑌧𑌿𑌤𑌃 𑌕𑌾𑌰𑍍𑌯𑌂 𑌕𑌾𑌰𑍍𑌯𑌵𑍃𑌦𑍍𑌧𑍍𑌯𑌾 𑌚 𑌵𑌾𑌸𑌨𑌾 ।
𑌵𑌰𑍍𑌧𑌤𑍇 𑌸𑌰𑍍𑌵𑌥𑌾 𑌪𑍁𑌂𑌸𑌃 𑌸𑌂𑌸𑌾𑌰𑍋 𑌨 𑌨𑌿𑌵𑌰𑍍𑌤𑌤𑍇 ॥ 313॥

𑌸𑌂𑌸𑌾𑌰𑌬𑌂𑌧𑌵𑌿𑌚𑍍𑌛𑌿𑌤𑍍𑌤𑍍𑌯𑍈 𑌤𑌦𑍍 𑌦𑍍𑌵𑌯𑌂 𑌪𑍍𑌰𑌦𑌹𑍇𑌦𑍍𑌯𑌤𑌿𑌃 ।
𑌵𑌾𑌸𑌨𑌾𑌵𑍃𑌦𑍍𑌧𑌿𑌰𑍇𑌤𑌾𑌭𑍍𑌯𑌾𑌂 𑌚𑌿𑌂𑌤𑌯𑌾 𑌕𑍍𑌰𑌿𑌯𑌯𑌾 𑌬𑌹𑌿𑌃 ॥ 314॥ (𑌪𑌾𑌠𑌭𑍇𑌦𑌃 – 𑌵𑌾𑌸𑌨𑌾 𑌪𑍍𑌰𑍇𑌰𑍍𑌯𑌤𑍇 𑌹𑍍𑌯𑌂𑌤𑌃)

𑌤𑌾𑌭𑍍𑌯𑌾𑌂 𑌪𑍍𑌰𑌵𑌰𑍍𑌧𑌮𑌾𑌨𑌾 𑌸𑌾 𑌸𑍂𑌤𑍇 𑌸𑌂𑌸𑍃𑌤𑌿𑌮𑌾𑌤𑍍𑌮𑌨𑌃 ।
𑌤𑍍𑌰𑌯𑌾𑌣𑌾𑌂 𑌚 𑌕𑍍𑌷𑌯𑍋𑌪𑌾𑌯𑌃 𑌸𑌰𑍍𑌵𑌾𑌵𑌸𑍍𑌥𑌾𑌸𑍁 𑌸𑌰𑍍𑌵𑌦𑌾 ॥ 315॥

𑌸𑌰𑍍𑌵𑌤𑍍𑌰 𑌸𑌰𑍍𑌵𑌤𑌃 𑌸𑌰𑍍𑌵𑌬𑍍𑌰𑌹𑍍𑌮𑌮𑌾𑌤𑍍𑌰𑌾𑌵𑌲𑍋𑌕𑌨𑍈𑌃 । (𑌪𑌾𑌠𑌭𑍇𑌦𑌃 – 𑌮𑌾𑌤𑍍𑌰𑌾𑌵𑌲𑍋𑌕𑌨𑌮𑍍)
𑌸𑌦𑍍𑌭𑌾𑌵𑌵𑌾𑌸𑌨𑌾𑌦𑌾𑌰𑍍𑌢𑍍𑌯𑌾𑌤𑍍𑌤𑌤𑍍𑌤𑍍𑌰𑌯𑌂 𑌲𑌯𑌮𑌶𑍍𑌨𑍁𑌤𑍇 ॥ 316॥

𑌕𑍍𑌰𑌿𑌯𑌾𑌨𑌾𑌶𑍇 𑌭𑌵𑍇𑌚𑍍𑌚𑌿𑌂𑌤𑌾𑌨𑌾𑌶𑍋𑌽𑌸𑍍𑌮𑌾𑌦𑍍𑌵𑌾𑌸𑌨𑌾𑌕𑍍𑌷𑌯𑌃 ।
𑌵𑌾𑌸𑌨𑌾𑌪𑍍𑌰𑌕𑍍𑌷𑌯𑍋 𑌮𑍋𑌕𑍍𑌷𑌃 𑌸𑌾 𑌜𑍀𑌵𑌨𑍍𑌮𑍁𑌕𑍍𑌤𑌿𑌰𑌿𑌷𑍍𑌯𑌤𑍇 ॥ 31𑍭॥ (𑌪𑌾𑌠𑌭𑍇𑌦𑌃 – 𑌸)

𑌸𑌦𑍍𑌵𑌾𑌸𑌨𑌾𑌸𑍍𑌫𑍂𑌰𑍍𑌤𑌿𑌵𑌿𑌜𑍃𑌂𑌭𑌣𑍇 𑌸𑌤𑌿
𑌹𑍍𑌯𑌸𑍌 𑌵𑌿𑌲𑍀𑌨𑌾𑌪𑍍𑌯𑌹𑌮𑌾𑌦𑌿𑌵𑌾𑌸𑌨𑌾 । (𑌪𑌾𑌠𑌭𑍇𑌦𑌃 – 𑌵𑌿𑌲𑍀𑌨𑌾 𑌤𑍍𑌵𑌹𑌮𑌾𑌦𑌿𑌵𑌾𑌸𑌨𑌾)
𑌅𑌤𑌿𑌪𑍍𑌰𑌕𑍃𑌷𑍍𑌟𑌾𑌪𑍍𑌯𑌰𑍁𑌣𑌪𑍍𑌰𑌭𑌾𑌯𑌾𑌂
𑌵𑌿𑌲𑍀𑌯𑌤𑍇 𑌸𑌾𑌧𑍁 𑌯𑌥𑌾 𑌤𑌮𑌿𑌸𑍍𑌰𑌾 ॥ 31𑍮॥

𑌤𑌮𑌸𑍍𑌤𑌮𑌃𑌕𑌾𑌰𑍍𑌯𑌮𑌨𑌰𑍍𑌥𑌜𑌾𑌲𑌂
𑌨 𑌦𑍃𑌶𑍍𑌯𑌤𑍇 𑌸𑌤𑍍𑌯𑍁𑌦𑌿𑌤𑍇 𑌦𑌿𑌨𑍇𑌶𑍇 ।
𑌤𑌥𑌾𑌽𑌦𑍍𑌵𑌯𑌾𑌨𑌂𑌦𑌰𑌸𑌾𑌨𑍁𑌭𑍂𑌤𑍌
𑌨𑍈𑌵𑌾𑌸𑍍𑌤𑌿 𑌬𑌂𑌧𑍋 𑌨 𑌚 𑌦𑍁𑌃𑌖𑌗𑌂𑌧𑌃 ॥ 31𑍯॥

𑌦𑍃𑌶𑍍𑌯𑌂 𑌪𑍍𑌰𑌤𑍀𑌤𑌂 𑌪𑍍𑌰𑌵𑌿𑌲𑌾𑌪𑌯𑌨𑍍𑌸𑌨𑍍 (𑌪𑌾𑌠𑌭𑍇𑌦𑌃 – 𑌪𑍍𑌰𑌵𑌿𑌲𑌾𑌪𑌯𑌨𑍍𑌸𑍍𑌵𑌯𑌂)
𑌸𑌨𑍍𑌮𑌾𑌤𑍍𑌰𑌮𑌾𑌨𑌂𑌦𑌘𑌨𑌂 𑌵𑌿𑌭𑌾𑌵𑌯𑌨𑍍 ।
𑌸𑌮𑌾𑌹𑌿𑌤𑌃 𑌸𑌨𑍍𑌬𑌹𑌿𑌰𑌂𑌤𑌰𑌂 𑌵𑌾
𑌕𑌾𑌲𑌂 𑌨𑌯𑍇𑌥𑌾𑌃 𑌸𑌤𑌿 𑌕𑌰𑍍𑌮𑌬𑌂𑌧𑍇 ॥ 320॥

𑌪𑍍𑌰𑌮𑌾𑌦𑍋 𑌬𑍍𑌰𑌹𑍍𑌮𑌨𑌿𑌷𑍍𑌠𑌾𑌯𑌾𑌂 𑌨 𑌕𑌰𑍍𑌤𑌵𑍍𑌯𑌃 𑌕𑌦𑌾𑌚𑌨 ।
𑌪𑍍𑌰𑌮𑌾𑌦𑍋 𑌮𑍃𑌤𑍍𑌯𑍁𑌰𑌿𑌤𑍍𑌯𑌾𑌹 𑌭𑌗𑌵𑌾𑌨𑍍𑌬𑍍𑌰𑌹𑍍𑌮𑌣𑌃 𑌸𑍁𑌤𑌃 ॥ 321॥

𑌨 𑌪𑍍𑌰𑌮𑌾𑌦𑌾𑌦𑌨𑌰𑍍𑌥𑍋𑌽𑌨𑍍𑌯𑍋 𑌜𑍍𑌞𑌾𑌨𑌿𑌨𑌃 𑌸𑍍𑌵𑌸𑍍𑌵𑌰𑍂𑌪𑌤𑌃 ।
𑌤𑌤𑍋 𑌮𑍋𑌹𑌸𑍍𑌤𑌤𑍋𑌽𑌹𑌂𑌧𑍀𑌸𑍍𑌤𑌤𑍋 𑌬𑌂𑌧𑌸𑍍𑌤𑌤𑍋 𑌵𑍍𑌯𑌥𑌾 ॥ 322॥

𑌵𑌿𑌷𑌯𑌾𑌭𑌿𑌮𑍁𑌖𑌂 𑌦𑍃𑌷𑍍𑌟𑍍𑌵𑌾 𑌵𑌿𑌦𑍍𑌵𑌾𑌂𑌸𑌮𑌪𑌿 𑌵𑌿𑌸𑍍𑌮𑍃𑌤𑌿𑌃 ।
𑌵𑌿𑌕𑍍𑌷𑍇𑌪𑌯𑌤𑌿 𑌧𑍀𑌦𑍋𑌷𑍈𑌰𑍍𑌯𑍋𑌷𑌾 𑌜𑌾𑌰𑌮𑌿𑌵 𑌪𑍍𑌰𑌿𑌯𑌮𑍍 ॥ 323॥

𑌯𑌥𑌾𑌪𑌕𑍃𑌷𑍍𑌟𑌂 𑌶𑍈𑌵𑌾𑌲𑌂 𑌕𑍍𑌷𑌣𑌮𑌾𑌤𑍍𑌰𑌂 𑌨 𑌤𑌿𑌷𑍍𑌠𑌤𑌿 ।
𑌆𑌵𑍃𑌣𑍋𑌤𑌿 𑌤𑌥𑌾 𑌮𑌾𑌯𑌾 𑌪𑍍𑌰𑌾𑌜𑍍𑌞𑌂 𑌵𑌾𑌪𑌿 𑌪𑌰𑌾𑌙𑍍𑌮𑍁𑌖𑌮𑍍 ॥ 324॥

𑌲𑌕𑍍𑌷𑍍𑌯𑌚𑍍𑌯𑍁𑌤𑌂 𑌚𑍇𑌦𑍍𑌯𑌦𑌿 𑌚𑌿𑌤𑍍𑌤𑌮𑍀𑌷𑌦𑍍
𑌬𑌹𑌿𑌰𑍍𑌮𑍁𑌖𑌂 𑌸𑌨𑍍𑌨𑌿𑌪𑌤𑍇𑌤𑍍𑌤𑌤𑌸𑍍𑌤𑌤𑌃 ।
𑌪𑍍𑌰𑌮𑌾𑌦𑌤𑌃 𑌪𑍍𑌰𑌚𑍍𑌯𑍁𑌤𑌕𑍇𑌲𑌿𑌕𑌂𑌦𑍁𑌕𑌃
𑌸𑍋𑌪𑌾𑌨𑌪𑌂𑌕𑍍𑌤𑍌 𑌪𑌤𑌿𑌤𑍋 𑌯𑌥𑌾 𑌤𑌥𑌾 ॥ 325॥

𑌵𑌿𑌷𑌯𑍇𑌷𑍍𑌵𑌾𑌵𑌿𑌶𑌚𑍍𑌚𑍇𑌤𑌃 𑌸𑌂𑌕𑌲𑍍𑌪𑌯𑌤𑌿 𑌤𑌦𑍍𑌗𑍁𑌣𑌾𑌨𑍍 ।
𑌸𑌮𑍍𑌯𑌕𑍍𑌸𑌂𑌕𑌲𑍍𑌪𑌨𑌾𑌤𑍍𑌕𑌾𑌮𑌃 𑌕𑌾𑌮𑌾𑌤𑍍𑌪𑍁𑌂𑌸𑌃 𑌪𑍍𑌰𑌵𑌰𑍍𑌤𑌨𑌮𑍍 ॥ 326॥

𑌅𑌤𑌃 𑌪𑍍𑌰𑌮𑌾𑌦𑌾𑌨𑍍𑌨 𑌪𑌰𑍋𑌽𑌸𑍍𑌤𑌿 𑌮𑍃𑌤𑍍𑌯𑍁𑌃
𑌵𑌿𑌵𑍇𑌕𑌿𑌨𑍋 𑌬𑍍𑌰𑌹𑍍𑌮𑌵𑌿𑌦𑌃 𑌸𑌮𑌾𑌧𑍌 ।
𑌸𑌮𑌾𑌹𑌿𑌤𑌃 𑌸𑌿𑌦𑍍𑌧𑌿𑌮𑍁𑌪𑍈𑌤𑌿 𑌸𑌮𑍍𑌯𑌕𑍍
𑌸𑌮𑌾𑌹𑌿𑌤𑌾𑌤𑍍𑌮𑌾 𑌭𑌵 𑌸𑌾𑌵𑌧𑌾𑌨𑌃 ॥ 32𑍭॥

𑌤𑌤𑌃 𑌸𑍍𑌵𑌰𑍂𑌪𑌵𑌿𑌭𑍍𑌰𑌂𑌶𑍋 𑌵𑌿𑌭𑍍𑌰𑌷𑍍𑌟𑌸𑍍𑌤𑍁 𑌪𑌤𑌤𑍍𑌯𑌧𑌃 ।
𑌪𑌤𑌿𑌤𑌸𑍍𑌯 𑌵𑌿𑌨𑌾 𑌨𑌾𑌶𑌂 𑌪𑍁𑌨𑌰𑍍𑌨𑌾𑌰𑍋𑌹 𑌈𑌕𑍍𑌷𑍍𑌯𑌤𑍇 ॥ 32𑍮॥

𑌸𑌂𑌕𑌲𑍍𑌪𑌂 𑌵𑌰𑍍𑌜𑌯𑍇𑌤𑍍𑌤𑌸𑍍𑌮𑌾𑌤𑍍𑌸𑌰𑍍𑌵𑌾𑌨𑌰𑍍𑌥𑌸𑍍𑌯 𑌕𑌾𑌰𑌣𑌮𑍍 ।
𑌅𑌪𑌥𑍍𑌯𑌾𑌨𑌿 𑌹𑌿 𑌵𑌸𑍍𑌤𑍂𑌨𑌿 𑌵𑍍𑌯𑌾𑌧𑌿𑌗𑍍𑌰𑌸𑍍𑌤𑍋 𑌯𑌥𑍋𑌤𑍍𑌸𑍃𑌜𑍇 ।
𑌜𑍀𑌵𑌤𑍋 𑌯𑌸𑍍𑌯 𑌕𑍈𑌵𑌲𑍍𑌯𑌂 𑌵𑌿𑌦𑍇𑌹𑍇 𑌸 𑌚 𑌕𑍇𑌵𑌲𑌃 ।
𑌯𑌤𑍍𑌕𑌿𑌂𑌚𑌿𑌤𑍍 𑌪𑌶𑍍𑌯𑌤𑍋 𑌭𑍇𑌦𑌂 𑌭𑌯𑌂 𑌬𑍍𑌰𑍂𑌤𑍇 𑌯𑌜𑍁𑌃𑌶𑍍𑌰𑍁𑌤𑌿𑌃 ॥ 32𑍯॥

𑌯𑌦𑌾 𑌕𑌦𑌾 𑌵𑌾𑌪𑌿 𑌵𑌿𑌪𑌶𑍍𑌚𑌿𑌦𑍇𑌷
𑌬𑍍𑌰𑌹𑍍𑌮𑌣𑍍𑌯𑌨𑌂𑌤𑍇𑌽𑌪𑍍𑌯𑌣𑍁𑌮𑌾𑌤𑍍𑌰𑌭𑍇𑌦𑌮𑍍 ।
𑌪𑌶𑍍𑌯𑌤𑍍𑌯𑌥𑌾𑌮𑍁𑌷𑍍𑌯 𑌭𑌯𑌂 𑌤𑌦𑍈𑌵
𑌯𑌦𑍍𑌵𑍀𑌕𑍍𑌷𑌿𑌤𑌂 𑌭𑌿𑌨𑍍𑌨𑌤𑌯𑌾 𑌪𑍍𑌰𑌮𑌾𑌦𑌾𑌤𑍍 ॥ 330॥ (𑌪𑌾𑌠𑌭𑍇𑌦𑌃 – 𑌯𑌦𑍀𑌕𑍍𑌷𑌿𑌤𑌂)

𑌶𑍍𑌰𑍁𑌤𑌿𑌸𑍍𑌮𑍃𑌤𑌿𑌨𑍍𑌯𑌾𑌯𑌶𑌤𑍈𑌰𑍍𑌨𑌿𑌷𑌿𑌦𑍍𑌧𑍇
𑌦𑍃𑌶𑍍𑌯𑍇𑌽𑌤𑍍𑌰 𑌯𑌃 𑌸𑍍𑌵𑌾𑌤𑍍𑌮𑌮𑌤𑌿𑌂 𑌕𑌰𑍋𑌤𑌿 ।
𑌉𑌪𑍈𑌤𑌿 𑌦𑍁𑌃𑌖𑍋𑌪𑌰𑌿 𑌦𑍁𑌃𑌖𑌜𑌾𑌤𑌂
𑌨𑌿𑌷𑌿𑌦𑍍𑌧𑌕𑌰𑍍𑌤𑌾 𑌸 𑌮𑌲𑌿𑌮𑍍𑌲𑍁𑌚𑍋 𑌯𑌥𑌾 ॥ 331॥

𑌸𑌤𑍍𑌯𑌾𑌭𑌿𑌸𑌂𑌧𑌾𑌨𑌰𑌤𑍋 𑌵𑌿𑌮𑍁𑌕𑍍𑌤𑍋
𑌮𑌹𑌤𑍍𑌤𑍍𑌵𑌮𑌾𑌤𑍍𑌮𑍀𑌯𑌮𑍁𑌪𑍈𑌤𑌿 𑌨𑌿𑌤𑍍𑌯𑌮𑍍 ।
𑌮𑌿𑌥𑍍𑌯𑌾𑌭𑌿𑌸𑌂𑌧𑌾𑌨𑌰𑌤𑌸𑍍𑌤𑍁 𑌨𑌶𑍍𑌯𑍇𑌦𑍍
𑌦𑍃𑌷𑍍𑌟𑌂 𑌤𑌦𑍇𑌤𑌦𑍍𑌯𑌦𑌚𑍌𑌰𑌚𑍌𑌰𑌯𑍋𑌃 ॥ 332॥ (𑌪𑌾𑌠𑌭𑍇𑌦𑌃 – 𑌚𑍋𑌰𑌚𑍋𑌰𑌯𑍋𑌃)

𑌯𑌤𑌿𑌰𑌸𑌦𑌨𑍁𑌸𑌂𑌧𑌿𑌂 𑌬𑌂𑌧𑌹𑍇𑌤𑍁𑌂 𑌵𑌿𑌹𑌾𑌯
𑌸𑍍𑌵𑌯𑌮𑌯𑌮𑌹𑌮𑌸𑍍𑌮𑍀𑌤𑍍𑌯𑌾𑌤𑍍𑌮𑌦𑍃𑌷𑍍𑌟𑍍𑌯𑍈𑌵 𑌤𑌿𑌷𑍍𑌠𑍇𑌤𑍍
𑌸𑍁𑌖𑌯𑌤𑌿 𑌨𑌨𑍁 𑌨𑌿𑌷𑍍𑌠𑌾 𑌬𑍍𑌰𑌹𑍍𑌮𑌣𑌿 𑌸𑍍𑌵𑌾𑌨𑍁𑌭𑍂𑌤𑍍𑌯𑌾
𑌹𑌰𑌤𑌿 𑌪𑌰𑌮𑌵𑌿𑌦𑍍𑌯𑌾𑌕𑌾𑌰𑍍𑌯𑌦𑍁𑌃𑌖𑌂 𑌪𑍍𑌰𑌤𑍀𑌤𑌮𑍍 ॥ 333॥

𑌬𑌾𑌹𑍍𑌯𑌾𑌨𑍁𑌸𑌂𑌧𑌿𑌃 𑌪𑌰𑌿𑌵𑌰𑍍𑌧𑌯𑍇𑌤𑍍𑌫𑌲𑌂 (𑌪𑌾𑌠𑌭𑍇𑌦𑌃 – 𑌬𑌾𑌹𑍍𑌯𑌾𑌭𑌿𑌸𑌂𑌧𑌿𑌃)
𑌦𑍁𑌰𑍍𑌵𑌾𑌸𑌨𑌾𑌮𑍇𑌵 𑌤𑌤𑌸𑍍𑌤𑌤𑍋𑌽𑌧𑌿𑌕𑌾𑌮𑍍 ।
𑌜𑍍𑌞𑌾𑌤𑍍𑌵𑌾 𑌵𑌿𑌵𑍇𑌕𑍈𑌃 𑌪𑌰𑌿𑌹𑍃𑌤𑍍𑌯 𑌬𑌾𑌹𑍍𑌯𑌂
𑌸𑍍𑌵𑌾𑌤𑍍𑌮𑌾𑌨𑍁𑌸𑌂𑌧𑌿𑌂 𑌵𑌿𑌦𑌧𑍀𑌤 𑌨𑌿𑌤𑍍𑌯𑌮𑍍 ॥ 334॥

𑌬𑌾𑌹𑍍𑌯𑍇 𑌨𑌿𑌰𑍁𑌦𑍍𑌧𑍇 𑌮𑌨𑌸𑌃 𑌪𑍍𑌰𑌸𑌨𑍍𑌨𑌤𑌾
𑌮𑌨𑌃𑌪𑍍𑌰𑌸𑌾𑌦𑍇 𑌪𑌰𑌮𑌾𑌤𑍍𑌮𑌦𑌰𑍍𑌶𑌨𑌮𑍍 ।
𑌤𑌸𑍍𑌮𑌿𑌨𑍍𑌸𑍁𑌦𑍃𑌷𑍍𑌟𑍇 𑌭𑌵𑌬𑌂𑌧𑌨𑌾𑌶𑍋
𑌬𑌹𑌿𑌰𑍍𑌨𑌿𑌰𑍋𑌧𑌃 𑌪𑌦𑌵𑍀 𑌵𑌿𑌮𑍁𑌕𑍍𑌤𑍇𑌃 ॥ 335॥

𑌕𑌃 𑌪𑌂𑌡𑌿𑌤𑌃 𑌸𑌨𑍍𑌸𑌦𑌸𑌦𑍍𑌵𑌿𑌵𑍇𑌕𑍀
𑌶𑍍𑌰𑍁𑌤𑌿𑌪𑍍𑌰𑌮𑌾𑌣𑌃 𑌪𑌰𑌮𑌾𑌰𑍍𑌥𑌦𑌰𑍍𑌶𑍀 ।
𑌜𑌾𑌨𑌨𑍍𑌹𑌿 𑌕𑍁𑌰𑍍𑌯𑌾𑌦𑌸𑌤𑍋𑌽𑌵𑌲𑌂𑌬𑌂
𑌸𑍍𑌵𑌪𑌾𑌤𑌹𑍇𑌤𑍋𑌃 𑌶𑌿𑌶𑍁𑌵𑌨𑍍𑌮𑍁𑌮𑍁𑌕𑍍𑌷𑍁𑌃 ॥ 336॥

𑌦𑍇𑌹𑌾𑌦𑌿𑌸𑌂𑌸𑌕𑍍𑌤𑌿𑌮𑌤𑍋 𑌨 𑌮𑍁𑌕𑍍𑌤𑌿𑌃
𑌮𑍁𑌕𑍍𑌤𑌸𑍍𑌯 𑌦𑍇𑌹𑌾𑌦𑍍𑌯𑌭𑌿𑌮𑌤𑍍𑌯𑌭𑌾𑌵𑌃 ।
𑌸𑍁𑌪𑍍𑌤𑌸𑍍𑌯 𑌨𑍋 𑌜𑌾𑌗𑌰𑌣𑌂 𑌨 𑌜𑌾𑌗𑍍𑌰𑌤𑌃
𑌸𑍍𑌵𑌪𑍍𑌨𑌸𑍍𑌤𑌯𑍋𑌰𑍍𑌭𑌿𑌨𑍍𑌨𑌗𑍁𑌣𑌾𑌶𑍍𑌰𑌯𑌤𑍍𑌵𑌾𑌤𑍍 ॥ 33𑍭॥

𑌅𑌂𑌤𑌰𑍍𑌬𑌹𑌿𑌃 𑌸𑍍𑌵𑌂 𑌸𑍍𑌥𑌿𑌰𑌜𑌂𑌗𑌮𑍇𑌷𑍁
𑌜𑍍𑌞𑌾𑌤𑍍𑌵𑌾𑌽𑌽𑌤𑍍𑌮𑌨𑌾𑌧𑌾𑌰𑌤𑌯𑌾 𑌵𑌿𑌲𑍋𑌕𑍍𑌯 । (𑌪𑌾𑌠𑌭𑍇𑌦𑌃 – 𑌜𑍍𑌞𑌾𑌨𑌾𑌤𑍍𑌮𑌨𑍍)
𑌤𑍍𑌯𑌕𑍍𑌤𑌾𑌖𑌿𑌲𑍋𑌪𑌾𑌧𑌿𑌰𑌖𑌂𑌡𑌰𑍂𑌪𑌃
𑌪𑍂𑌰𑍍𑌣𑌾𑌤𑍍𑌮𑌨𑌾 𑌯𑌃 𑌸𑍍𑌥𑌿𑌤 𑌏𑌷 𑌮𑍁𑌕𑍍𑌤𑌃 ॥ 33𑍮॥

𑌸𑌰𑍍𑌵𑌾𑌤𑍍𑌮𑌨𑌾 𑌬𑌂𑌧𑌵𑌿𑌮𑍁𑌕𑍍𑌤𑌿𑌹𑍇𑌤𑍁𑌃
𑌸𑌰𑍍𑌵𑌾𑌤𑍍𑌮𑌭𑌾𑌵𑌾𑌨𑍍𑌨 𑌪𑌰𑍋𑌽𑌸𑍍𑌤𑌿 𑌕𑌶𑍍𑌚𑌿𑌤𑍍 ।
𑌦𑍃𑌶𑍍𑌯𑌾𑌗𑍍𑌰𑌹𑍇 𑌸𑌤𑍍𑌯𑍁𑌪𑌪𑌦𑍍𑌯𑌤𑍇𑌽𑌸𑍌
𑌸𑌰𑍍𑌵𑌾𑌤𑍍𑌮𑌭𑌾𑌵𑍋𑌽𑌸𑍍𑌯 𑌸𑌦𑌾𑌤𑍍𑌮𑌨𑌿𑌷𑍍𑌠𑌯𑌾 ॥ 33𑍯॥

𑌦𑍃𑌶𑍍𑌯𑌸𑍍𑌯𑌾𑌗𑍍𑌰𑌹𑌣𑌂 𑌕𑌥𑌂 𑌨𑍁 𑌘𑌟𑌤𑍇 𑌦𑍇𑌹𑌾𑌤𑍍𑌮𑌨𑌾 𑌤𑌿𑌷𑍍𑌠𑌤𑍋
𑌬𑌾𑌹𑍍𑌯𑌾𑌰𑍍𑌥𑌾𑌨𑍁𑌭𑌵𑌪𑍍𑌰𑌸𑌕𑍍𑌤𑌮𑌨𑌸𑌸𑍍𑌤𑌤𑍍𑌤𑌤𑍍𑌕𑍍𑌰𑌿𑌯𑌾𑌂 𑌕𑍁𑌰𑍍𑌵𑌤𑌃 ।
𑌸𑌨𑍍𑌨𑍍𑌯𑌸𑍍𑌤𑌾𑌖𑌿𑌲𑌧𑌰𑍍𑌮𑌕𑌰𑍍𑌮𑌵𑌿𑌷𑌯𑍈𑌰𑍍𑌨𑌿𑌤𑍍𑌯𑌾𑌤𑍍𑌮𑌨𑌿𑌷𑍍𑌠𑌾𑌪𑌰𑍈𑌃
𑌤𑌤𑍍𑌤𑍍𑌵𑌜𑍍𑌞𑍈𑌃 𑌕𑌰𑌣𑍀𑌯𑌮𑌾𑌤𑍍𑌮𑌨𑌿 𑌸𑌦𑌾𑌨𑌂𑌦𑍇𑌚𑍍𑌛𑍁𑌭𑌿𑌰𑍍𑌯𑌤𑍍𑌨𑌤𑌃 ॥ 340॥

𑌸𑌰𑍍𑌵𑌾𑌤𑍍𑌮𑌸𑌿𑌦𑍍𑌧𑌯𑍇 𑌭𑌿𑌕𑍍𑌷𑍋𑌃 𑌕𑍃𑌤𑌶𑍍𑌰𑌵𑌣𑌕𑌰𑍍𑌮𑌣𑌃 । (𑌪𑌾𑌠𑌭𑍇𑌦𑌃 – 𑌸𑌾𑌰𑍍𑌵𑌾𑌤𑍍𑌮𑍍𑌯)
𑌸𑌮𑌾𑌧𑌿𑌂 𑌵𑌿𑌦𑌧𑌾𑌤𑍍𑌯𑍇𑌷𑌾 𑌶𑌾𑌂𑌤𑍋 𑌦𑌾𑌂𑌤 𑌇𑌤𑌿 𑌶𑍍𑌰𑍁𑌤𑌿𑌃 ॥ 341॥

𑌆𑌰𑍂𑌢𑌶𑌕𑍍𑌤𑍇𑌰𑌹𑌮𑍋 𑌵𑌿𑌨𑌾𑌶𑌃
𑌕𑌰𑍍𑌤𑍁𑌨𑍍𑌨 𑌶𑌕𑍍𑌯 𑌸𑌹𑌸𑌾𑌪𑌿 𑌪𑌂𑌡𑌿𑌤𑍈𑌃 । (𑌪𑌾𑌠𑌭𑍇𑌦𑌃 – 𑌕𑌰𑍍𑌤𑍁𑌂 𑌨)
𑌯𑍇 𑌨𑌿𑌰𑍍𑌵𑌿𑌕𑌲𑍍𑌪𑌾𑌖𑍍𑌯𑌸𑌮𑌾𑌧𑌿𑌨𑌿𑌶𑍍𑌚𑌲𑌾𑌃
𑌤𑌾𑌨𑌂𑌤𑌰𑌾𑌽𑌨𑌂𑌤𑌭𑌵𑌾 𑌹𑌿 𑌵𑌾𑌸𑌨𑌾𑌃 ॥ 342॥

𑌅𑌹𑌂𑌬𑍁𑌦𑍍𑌧𑍍𑌯𑍈𑌵 𑌮𑍋𑌹𑌿𑌨𑍍𑌯𑌾 𑌯𑍋𑌜𑌯𑌿𑌤𑍍𑌵𑌾𑌽𑌽𑌵𑍃𑌤𑍇𑌰𑍍𑌬𑌲𑌾𑌤𑍍 ।
𑌵𑌿𑌕𑍍𑌷𑍇𑌪𑌶𑌕𑍍𑌤𑌿𑌃 𑌪𑍁𑌰𑍁𑌷𑌂 𑌵𑌿𑌕𑍍𑌷𑍇𑌪𑌯𑌤𑌿 𑌤𑌦𑍍𑌗𑍁𑌣𑍈𑌃 ॥ 343॥

𑌵𑌿𑌕𑍍𑌷𑍇𑌪𑌶𑌕𑍍𑌤𑌿𑌵𑌿𑌜𑌯𑍋 𑌵𑌿𑌷𑌮𑍋 𑌵𑌿𑌧𑌾𑌤𑍁𑌂
𑌨𑌿𑌃𑌶𑍇𑌷𑌮𑌾𑌵𑌰𑌣𑌶𑌕𑍍𑌤𑌿𑌨𑌿𑌵𑍃𑌤𑍍𑌤𑍍𑌯𑌭𑌾𑌵𑍇 ।
𑌦𑍃𑌗𑍍𑌦𑍃𑌶𑍍𑌯𑌯𑍋𑌃 𑌸𑍍𑌫𑍁𑌟𑌪𑌯𑍋𑌜𑌲𑌵𑌦𑍍𑌵𑌿𑌭𑌾𑌗𑍇
𑌨𑌶𑍍𑌯𑍇𑌤𑍍𑌤𑌦𑌾𑌵𑌰𑌣𑌮𑌾𑌤𑍍𑌮𑌨𑌿 𑌚 𑌸𑍍𑌵𑌭𑌾𑌵𑌾𑌤𑍍 ।
𑌨𑌿𑌃𑌸𑌂𑌶𑌯𑍇𑌨 𑌭𑌵𑌤𑌿 𑌪𑍍𑌰𑌤𑌿𑌬𑌂𑌧𑌶𑍂𑌨𑍍𑌯𑍋
𑌵𑌿𑌕𑍍𑌷𑍇𑌪𑌣𑌂 𑌨 𑌹𑌿 𑌤𑌦𑌾 𑌯𑌦𑌿 𑌚𑍇𑌨𑍍𑌮𑍃𑌷𑌾𑌰𑍍𑌥𑍇 ॥ 344॥ (𑌪𑌾𑌠𑌭𑍇𑌦𑌃 – 𑌨𑌿𑌕𑍍𑌷𑍇𑌪𑌣𑌂)

𑌸𑌮𑍍𑌯𑌗𑍍𑌵𑌿𑌵𑍇𑌕𑌃 𑌸𑍍𑌫𑍁𑌟𑌬𑍋𑌧𑌜𑌨𑍍𑌯𑍋
𑌵𑌿𑌭𑌜𑍍𑌯 𑌦𑍃𑌗𑍍𑌦𑍃𑌶𑍍𑌯𑌪𑌦𑌾𑌰𑍍𑌥𑌤𑌤𑍍𑌤𑍍𑌵𑌮𑍍 ।
𑌛𑌿𑌨𑌤𑍍𑌤𑌿 𑌮𑌾𑌯𑌾𑌕𑍃𑌤𑌮𑍋𑌹𑌬𑌂𑌧𑌂
𑌯𑌸𑍍𑌮𑌾𑌦𑍍𑌵𑌿𑌮𑍁𑌕𑍍𑌤𑌸𑍍𑌤𑍁 𑌪𑍁𑌨𑌰𑍍𑌨 𑌸𑌂𑌸𑍃𑌤𑌿𑌃 ॥ 345॥ (𑌪𑌾𑌠𑌭𑍇𑌦𑌃 – 𑌵𑌿𑌮𑍁𑌕𑍍𑌤𑌸𑍍𑌯)

𑌪𑌰𑌾𑌵𑌰𑍈𑌕𑌤𑍍𑌵𑌵𑌿𑌵𑍇𑌕𑌵𑌹𑍍𑌨𑌿𑌃
𑌦𑌹𑌤𑍍𑌯𑌵𑌿𑌦𑍍𑌯𑌾𑌗𑌹𑌨𑌂 𑌹𑍍𑌯𑌶𑍇𑌷𑌮𑍍 ।
𑌕𑌿𑌂 𑌸𑍍𑌯𑌾𑌤𑍍𑌪𑍁𑌨𑌃 𑌸𑌂𑌸𑌰𑌣𑌸𑍍𑌯 𑌬𑍀𑌜𑌂
𑌅𑌦𑍍𑌵𑍈𑌤𑌭𑌾𑌵𑌂 𑌸𑌮𑍁𑌪𑍇𑌯𑍁𑌷𑍋𑌽𑌸𑍍𑌯 ॥ 346॥

𑌆𑌵𑌰𑌣𑌸𑍍𑌯 𑌨𑌿𑌵𑍃𑌤𑍍𑌤𑌿𑌰𑍍𑌭𑌵𑌤𑌿 𑌹𑌿 𑌸𑌮𑍍𑌯𑌕𑍍𑌪𑌦𑌾𑌰𑍍𑌥𑌦𑌰𑍍𑌶𑌨𑌤𑌃 ।
𑌮𑌿𑌥𑍍𑌯𑌾𑌜𑍍𑌞𑌾𑌨𑌵𑌿𑌨𑌾𑌶𑌸𑍍𑌤𑌦𑍍𑌵𑌿𑌕𑍍𑌷𑍇𑌪𑌜𑌨𑌿𑌤𑌦𑍁𑌃𑌖𑌨𑌿𑌵𑍃𑌤𑍍𑌤𑌿𑌃 ॥ 34𑍭॥

𑌏𑌤𑌤𑍍𑌤𑍍𑌰𑌿𑌤𑌯𑌂 𑌦𑍃𑌷𑍍𑌟𑌂 𑌸𑌮𑍍𑌯𑌗𑍍𑌰𑌜𑍍𑌜𑍁𑌸𑍍𑌵𑌰𑍂𑌪𑌵𑌿𑌜𑍍𑌞𑌾𑌨𑌾𑌤𑍍 ।
𑌤𑌸𑍍𑌮𑌾𑌦𑍍𑌵𑌸𑍍𑌤𑍁𑌸𑌤𑌤𑍍𑌤𑍍𑌵𑌂 𑌜𑍍𑌞𑌾𑌤𑌵𑍍𑌯𑌂 𑌬𑌂𑌧𑌮𑍁𑌕𑍍𑌤𑌯𑍇 𑌵𑌿𑌦𑍁𑌷𑌾 ॥ 34𑍮॥

𑌅𑌯𑍋𑌽𑌗𑍍𑌨𑌿𑌯𑍋𑌗𑌾𑌦𑌿𑌵 𑌸𑌤𑍍𑌸𑌮𑌨𑍍𑌵𑌯𑌾𑌨𑍍
𑌮𑌾𑌤𑍍𑌰𑌾𑌦𑌿𑌰𑍂𑌪𑍇𑌣 𑌵𑌿𑌜𑍃𑌂𑌭𑌤𑍇 𑌧𑍀𑌃 ।
𑌤𑌤𑍍𑌕𑌾𑌰𑍍𑌯𑌮𑍇𑌤𑌦𑍍𑌦𑍍𑌵𑌿𑌤𑌯𑌂 𑌯𑌤𑍋 𑌮𑍃𑌷𑌾 (𑌪𑌾𑌠𑌭𑍇𑌦𑌃 – 𑌤𑌤𑍍𑌕𑌾𑌰𑍍𑌯𑌮𑍇𑌵 𑌤𑍍𑌰𑌿𑌤𑌯𑌂)
𑌦𑍃𑌷𑍍𑌟𑌂 𑌭𑍍𑌰𑌮𑌸𑍍𑌵𑌪𑍍𑌨𑌮𑌨𑍋𑌰𑌥𑍇𑌷𑍁 ॥ 34𑍯॥

𑌤𑌤𑍋 𑌵𑌿𑌕𑌾𑌰𑌾𑌃 𑌪𑍍𑌰𑌕𑍃𑌤𑍇𑌰𑌹𑌮𑍍𑌮𑍁𑌖𑌾
𑌦𑍇𑌹𑌾𑌵𑌸𑌾𑌨𑌾 𑌵𑌿𑌷𑌯𑌾𑌶𑍍𑌚 𑌸𑌰𑍍𑌵𑍇 ।
𑌕𑍍𑌷𑌣𑍇𑌽𑌨𑍍𑌯𑌥𑌾𑌭𑌾𑌵𑌿𑌤𑌯𑌾 𑌹𑍍𑌯𑌮𑍀𑌷𑌾- (𑌪𑌾𑌠𑌭𑍇𑌦𑌃 – 𑌭𑌾𑌵𑌿𑌨 𑌏𑌷 𑌆𑌤𑍍𑌮𑌾)
𑌮𑌸𑌤𑍍𑌤𑍍𑌵𑌮𑌾𑌤𑍍𑌮𑌾 𑌤𑍁 𑌕𑌦𑌾𑌪𑌿 𑌨𑌾𑌨𑍍𑌯𑌥𑌾 ॥ 350॥ (𑌪𑌾𑌠𑌭𑍇𑌦𑌃 – 𑌮𑌸𑌤𑍍𑌤𑍍𑌵𑌮𑌾𑌤𑍍𑌮𑌾 𑌤𑍁 𑌕𑌦𑌾𑌪𑌿)

𑌨𑌿𑌤𑍍𑌯𑌾𑌦𑍍𑌵𑌯𑌾𑌖𑌂𑌡𑌚𑌿𑌦𑍇𑌕𑌰𑍂𑌪𑍋
𑌬𑍁𑌦𑍍𑌧𑍍𑌯𑌾𑌦𑌿𑌸𑌾𑌕𑍍𑌷𑍀 𑌸𑌦𑌸𑌦𑍍𑌵𑌿𑌲𑌕𑍍𑌷𑌣𑌃 ।
𑌅𑌹𑌂𑌪𑌦𑌪𑍍𑌰𑌤𑍍𑌯𑌯𑌲𑌕𑍍𑌷𑌿𑌤𑌾𑌰𑍍𑌥𑌃
𑌪𑍍𑌰𑌤𑍍𑌯𑌕𑍍 𑌸𑌦𑌾𑌨𑌂𑌦𑌘𑌨𑌃 𑌪𑌰𑌾𑌤𑍍𑌮𑌾 ॥ 351॥

𑌇𑌤𑍍𑌥𑌂 𑌵𑌿𑌪𑌶𑍍𑌚𑌿𑌤𑍍𑌸𑌦𑌸𑌦𑍍𑌵𑌿𑌭𑌜𑍍𑌯
𑌨𑌿𑌶𑍍𑌚𑌿𑌤𑍍𑌯 𑌤𑌤𑍍𑌤𑍍𑌵𑌂 𑌨𑌿𑌜𑌬𑍋𑌧𑌦𑍃𑌷𑍍𑌟𑍍𑌯𑌾 ।
𑌜𑍍𑌞𑌾𑌤𑍍𑌵𑌾 𑌸𑍍𑌵𑌮𑌾𑌤𑍍𑌮𑌾𑌨𑌮𑌖𑌂𑌡𑌬𑍋𑌧𑌂
𑌤𑍇𑌭𑍍𑌯𑍋 𑌵𑌿𑌮𑍁𑌕𑍍𑌤𑌃 𑌸𑍍𑌵𑌯𑌮𑍇𑌵 𑌶𑌾𑌮𑍍𑌯𑌤𑌿 ॥ 352॥

𑌅𑌜𑍍𑌞𑌾𑌨𑌹𑍃𑌦𑌯𑌗𑍍𑌰𑌂𑌥𑍇𑌰𑍍𑌨𑌿𑌃𑌶𑍇𑌷𑌵𑌿𑌲𑌯𑌸𑍍𑌤𑌦𑌾 ।
𑌸𑌮𑌾𑌧𑌿𑌨𑌾𑌽𑌵𑌿𑌕𑌲𑍍𑌪𑍇𑌨 𑌯𑌦𑌾𑌽𑌦𑍍𑌵𑍈𑌤𑌾𑌤𑍍𑌮𑌦𑌰𑍍𑌶𑌨𑌮𑍍 ॥ 353॥

𑌤𑍍𑌵𑌮𑌹𑌮𑌿𑌦𑌮𑌿𑌤𑍀𑌯𑌂 𑌕𑌲𑍍𑌪𑌨𑌾 𑌬𑍁𑌦𑍍𑌧𑌿𑌦𑍋𑌷𑌾𑌤𑍍
𑌪𑍍𑌰𑌭𑌵𑌤𑌿 𑌪𑌰𑌮𑌾𑌤𑍍𑌮𑌨𑍍𑌯𑌦𑍍𑌵𑌯𑍇 𑌨𑌿𑌰𑍍𑌵𑌿𑌶𑍇𑌷𑍇 ।
𑌪𑍍𑌰𑌵𑌿𑌲𑌸𑌤𑌿 𑌸𑌮𑌾𑌧𑌾𑌵𑌸𑍍𑌯 𑌸𑌰𑍍𑌵𑍋 𑌵𑌿𑌕𑌲𑍍𑌪𑍋
𑌵𑌿𑌲𑌯𑌨𑌮𑍁𑌪𑌗𑌚𑍍𑌛𑍇𑌦𑍍𑌵𑌸𑍍𑌤𑍁𑌤𑌤𑍍𑌤𑍍𑌵𑌾𑌵𑌧𑍃𑌤𑍍𑌯𑌾 ॥ 354॥

𑌶𑌾𑌂𑌤𑍋 𑌦𑌾𑌂𑌤𑌃 𑌪𑌰𑌮𑍁𑌪𑌰𑌤𑌃 𑌕𑍍𑌷𑌾𑌂𑌤𑌿𑌯𑍁𑌕𑍍𑌤𑌃 𑌸𑌮𑌾𑌧𑌿𑌂
𑌕𑍁𑌰𑍍𑌵𑌨𑍍𑌨𑌿𑌤𑍍𑌯𑌂 𑌕𑌲𑌯𑌤𑌿 𑌯𑌤𑌿𑌃 𑌸𑍍𑌵𑌸𑍍𑌯 𑌸𑌰𑍍𑌵𑌾𑌤𑍍𑌮𑌭𑌾𑌵𑌮𑍍 ।
𑌤𑍇𑌨𑌾𑌵𑌿𑌦𑍍𑌯𑌾𑌤𑌿𑌮𑌿𑌰𑌜𑌨𑌿𑌤𑌾𑌨𑍍𑌸𑌾𑌧𑍁 𑌦𑌗𑍍𑌧𑍍𑌵𑌾 𑌵𑌿𑌕𑌲𑍍𑌪𑌾𑌨𑍍
𑌬𑍍𑌰𑌹𑍍𑌮𑌾𑌕𑍃𑌤𑍍𑌯𑌾 𑌨𑌿𑌵𑌸𑌤𑌿 𑌸𑍁𑌖𑌂 𑌨𑌿𑌷𑍍𑌕𑍍𑌰𑌿𑌯𑍋 𑌨𑌿𑌰𑍍𑌵𑌿𑌕𑌲𑍍𑌪𑌃 ॥ 355॥

𑌸𑌮𑌾𑌹𑌿𑌤𑌾 𑌯𑍇 𑌪𑍍𑌰𑌵𑌿𑌲𑌾𑌪𑍍𑌯 𑌬𑌾𑌹𑍍𑌯𑌂
𑌶𑍍𑌰𑍋𑌤𑍍𑌰𑌾𑌦𑌿 𑌚𑍇𑌤𑌃 𑌸𑍍𑌵𑌮𑌹𑌂 𑌚𑌿𑌦𑌾𑌤𑍍𑌮𑌨𑌿 ।
𑌤 𑌏𑌵 𑌮𑍁𑌕𑍍𑌤𑌾 𑌭𑌵𑌪𑌾𑌶𑌬𑌂𑌧𑍈𑌃
𑌨𑌾𑌨𑍍𑌯𑍇 𑌤𑍁 𑌪𑌾𑌰𑍋𑌕𑍍𑌷𑍍𑌯𑌕𑌥𑌾𑌭𑌿𑌧𑌾𑌯𑌿𑌨𑌃 ॥ 356॥

𑌉𑌪𑌾𑌧𑌿𑌭𑍇𑌦𑌾𑌤𑍍𑌸𑍍𑌵𑌯𑌮𑍇𑌵 𑌭𑌿𑌦𑍍𑌯𑌤𑍇 (𑌪𑌾𑌠𑌭𑍇𑌦𑌃 – 𑌯𑍋𑌗𑌾𑌤𑍍𑌸𑍍𑌵𑌯𑌮𑍇𑌵)
𑌚𑍋𑌪𑌾𑌧𑍍𑌯𑌪𑍋𑌹𑍇 𑌸𑍍𑌵𑌯𑌮𑍇𑌵 𑌕𑍇𑌵𑌲𑌃 ।
𑌤𑌸𑍍𑌮𑌾𑌦𑍁𑌪𑌾𑌧𑍇𑌰𑍍𑌵𑌿𑌲𑌯𑌾𑌯 𑌵𑌿𑌦𑍍𑌵𑌾𑌨𑍍
𑌵𑌸𑍇𑌤𑍍𑌸𑌦𑌾𑌽𑌕𑌲𑍍𑌪𑌸𑌮𑌾𑌧𑌿𑌨𑌿𑌷𑍍𑌠𑌯𑌾 ॥ 35𑍭॥

𑌸𑌤𑌿 𑌸𑌕𑍍𑌤𑍋 𑌨𑌰𑍋 𑌯𑌾𑌤𑌿 𑌸𑌦𑍍𑌭𑌾𑌵𑌂 𑌹𑍍𑌯𑍇𑌕𑌨𑌿𑌷𑍍𑌠𑌯𑌾 ।
𑌕𑍀𑌟𑌕𑍋 𑌭𑍍𑌰𑌮𑌰𑌂 𑌧𑍍𑌯𑌾𑌯𑌨𑍍 𑌭𑍍𑌰𑌮𑌰𑌤𑍍𑌵𑌾𑌯 𑌕𑌲𑍍𑌪𑌤𑍇 ॥ 35𑍮॥

𑌕𑍍𑌰𑌿𑌯𑌾𑌂𑌤𑌰𑌾𑌸𑌕𑍍𑌤𑌿𑌮𑌪𑌾𑌸𑍍𑌯 𑌕𑍀𑌟𑌕𑍋
𑌧𑍍𑌯𑌾𑌯𑌨𑍍𑌨𑌲𑌿𑌤𑍍𑌵𑌂 𑌹𑍍𑌯𑌲𑌿𑌭𑌾𑌵𑌮𑍃𑌚𑍍𑌛𑌤𑌿 । (𑌪𑌾𑌠𑌭𑍇𑌦𑌃 – 𑌧𑍍𑌯𑌾𑌯𑌨𑍍𑌯𑌥𑌾𑌲𑌿𑌂)
𑌤𑌥𑍈𑌵 𑌯𑍋𑌗𑍀 𑌪𑌰𑌮𑌾𑌤𑍍𑌮𑌤𑌤𑍍𑌤𑍍𑌵𑌂
𑌧𑍍𑌯𑌾𑌤𑍍𑌵𑌾 𑌸𑌮𑌾𑌯𑌾𑌤𑌿 𑌤𑌦𑍇𑌕𑌨𑌿𑌷𑍍𑌠𑌯𑌾 ॥ 35𑍯॥

𑌅𑌤𑍀𑌵 𑌸𑍂𑌕𑍍𑌷𑍍𑌮𑌂 𑌪𑌰𑌮𑌾𑌤𑍍𑌮𑌤𑌤𑍍𑌤𑍍𑌵𑌂
𑌨 𑌸𑍍𑌥𑍂𑌲𑌦𑍃𑌷𑍍𑌟𑍍𑌯𑌾 𑌪𑍍𑌰𑌤𑌿𑌪𑌤𑍍𑌤𑍁𑌮𑌰𑍍𑌹𑌤𑌿 ।
𑌸𑌮𑌾𑌧𑌿𑌨𑌾𑌤𑍍𑌯𑌂𑌤𑌸𑍁𑌸𑍂𑌕𑍍𑌷𑍍𑌮𑌵𑍃𑌤𑍍𑌤𑍍𑌯𑌾
𑌜𑍍𑌞𑌾𑌤𑌵𑍍𑌯𑌮𑌾𑌰𑍍𑌯𑍈𑌰𑌤𑌿𑌶𑍁𑌦𑍍𑌧𑌬𑍁𑌦𑍍𑌧𑌿𑌭𑌿𑌃 ॥ 360॥

𑌯𑌥𑌾 𑌸𑍁𑌵𑌰𑍍𑌣𑌂 𑌪𑍁𑌟𑌪𑌾𑌕𑌶𑍋𑌧𑌿𑌤𑌂
𑌤𑍍𑌯𑌕𑍍𑌤𑍍𑌵𑌾 𑌮𑌲𑌂 𑌸𑍍𑌵𑌾𑌤𑍍𑌮𑌗𑍁𑌣𑌂 𑌸𑌮𑍃𑌚𑍍𑌛𑌤𑌿 ।
𑌤𑌥𑌾 𑌮𑌨𑌃 𑌸𑌤𑍍𑌤𑍍𑌵𑌰𑌜𑌸𑍍𑌤𑌮𑍋𑌮𑌲𑌂
𑌧𑍍𑌯𑌾𑌨𑍇𑌨 𑌸𑌂𑌤𑍍𑌯𑌜𑍍𑌯 𑌸𑌮𑍇𑌤𑌿 𑌤𑌤𑍍𑌤𑍍𑌵𑌮𑍍 ॥ 361॥

𑌨𑌿𑌰𑌂𑌤𑌰𑌾𑌭𑍍𑌯𑌾𑌸𑌵𑌶𑌾𑌤𑍍𑌤𑌦𑌿𑌤𑍍𑌥𑌂
𑌪𑌕𑍍𑌵𑌂 𑌮𑌨𑍋 𑌬𑍍𑌰𑌹𑍍𑌮𑌣𑌿 𑌲𑍀𑌯𑌤𑍇 𑌯𑌦𑌾 ।
𑌤𑌦𑌾 𑌸𑌮𑌾𑌧𑌿𑌃 𑌸𑌵𑌿𑌕𑌲𑍍𑌪𑌵𑌰𑍍𑌜𑌿𑌤𑌃 (𑌪𑌾𑌠𑌭𑍇𑌦𑌃 – 𑌸 𑌵𑌿𑌕𑌲𑍍𑌪𑌵𑌰𑍍𑌜𑌿𑌤𑌃)
𑌸𑍍𑌵𑌤𑍋𑌽𑌦𑍍𑌵𑌯𑌾𑌨𑌂𑌦𑌰𑌸𑌾𑌨𑍁𑌭𑌾𑌵𑌕𑌃 ॥ 362॥

𑌸𑌮𑌾𑌧𑌿𑌨𑌾𑌽𑌨𑍇𑌨 𑌸𑌮𑌸𑍍𑌤𑌵𑌾𑌸𑌨𑌾-
𑌗𑍍𑌰𑌂𑌥𑍇𑌰𑍍𑌵𑌿𑌨𑌾𑌶𑍋𑌽𑌖𑌿𑌲𑌕𑌰𑍍𑌮𑌨𑌾𑌶𑌃 ।
𑌅𑌂𑌤𑌰𑍍𑌬𑌹𑌿𑌃 𑌸𑌰𑍍𑌵𑌤 𑌏𑌵 𑌸𑌰𑍍𑌵𑌦𑌾
𑌸𑍍𑌵𑌰𑍂𑌪𑌵𑌿𑌸𑍍𑌫𑍂𑌰𑍍𑌤𑌿𑌰𑌯𑌤𑍍𑌨𑌤𑌃 𑌸𑍍𑌯𑌾𑌤𑍍 ॥ 363॥

𑌶𑍍𑌰𑍁𑌤𑍇𑌃 𑌶𑌤𑌗𑍁𑌣𑌂 𑌵𑌿𑌦𑍍𑌯𑌾𑌨𑍍𑌮𑌨𑌨𑌂 𑌮𑌨𑌨𑌾𑌦𑌪𑌿 ।
𑌨𑌿𑌦𑌿𑌧𑍍𑌯𑌾𑌸𑌂 𑌲𑌕𑍍𑌷𑌗𑍁𑌣𑌮𑌨𑌂𑌤𑌂 𑌨𑌿𑌰𑍍𑌵𑌿𑌕𑌲𑍍𑌪𑌕𑌮𑍍 ॥ 364॥

𑌨𑌿𑌰𑍍𑌵𑌿𑌕𑌲𑍍𑌪𑌕𑌸𑌮𑌾𑌧𑌿𑌨𑌾 𑌸𑍍𑌫𑍁𑌟𑌂
𑌬𑍍𑌰𑌹𑍍𑌮𑌤𑌤𑍍𑌤𑍍𑌵𑌮𑌵𑌗𑌮𑍍𑌯𑌤𑍇 𑌧𑍍𑌰𑍁𑌵𑌮𑍍 ।
𑌨𑌾𑌨𑍍𑌯𑌥𑌾 𑌚𑌲𑌤𑌯𑌾 𑌮𑌨𑍋𑌗𑌤𑍇𑌃
𑌪𑍍𑌰𑌤𑍍𑌯𑌯𑌾𑌂𑌤𑌰𑌵𑌿𑌮𑌿𑌶𑍍𑌰𑌿𑌤𑌂 𑌭𑌵𑍇𑌤𑍍 ॥ 365॥

𑌅𑌤𑌃 𑌸𑌮𑌾𑌧𑌤𑍍𑌸𑍍𑌵 𑌯𑌤𑍇𑌂𑌦𑍍𑌰𑌿𑌯𑌃 𑌸𑌨𑍍
𑌨𑌿𑌰𑌂𑌤𑌰𑌂 𑌶𑌾𑌂𑌤𑌮𑌨𑌾𑌃 𑌪𑍍𑌰𑌤𑍀𑌚𑌿 ।
𑌵𑌿𑌧𑍍𑌵𑌂𑌸𑌯 𑌧𑍍𑌵𑌾𑌂𑌤𑌮𑌨𑌾𑌦𑍍𑌯𑌵𑌿𑌦𑍍𑌯𑌯𑌾
𑌕𑍃𑌤𑌂 𑌸𑌦𑍇𑌕𑌤𑍍𑌵𑌵𑌿𑌲𑍋𑌕𑌨𑍇𑌨 ॥ 366॥

𑌯𑍋𑌗𑌸𑍍𑌯 𑌪𑍍𑌰𑌥𑌮𑌦𑍍𑌵𑌾𑌰𑌂 𑌵𑌾𑌙𑍍𑌨𑌿𑌰𑍋𑌧𑍋𑌽𑌪𑌰𑌿𑌗𑍍𑌰𑌹𑌃 । (𑌪𑌾𑌠𑌭𑍇𑌦𑌃 – 𑌪𑍍𑌰𑌥𑌮𑌂 𑌦𑍍𑌵𑌾𑌰𑌂)
𑌨𑌿𑌰𑌾𑌶𑌾 𑌚 𑌨𑌿𑌰𑍀𑌹𑌾 𑌚 𑌨𑌿𑌤𑍍𑌯𑌮𑍇𑌕𑌾𑌂𑌤𑌶𑍀𑌲𑌤𑌾 ॥ 36𑍭॥

𑌏𑌕𑌾𑌂𑌤𑌸𑍍𑌥𑌿𑌤𑌿𑌰𑌿𑌂𑌦𑍍𑌰𑌿𑌯𑍋𑌪𑌰𑌮𑌣𑍇 𑌹𑍇𑌤𑍁𑌰𑍍𑌦𑌮𑌶𑍍𑌚𑍇𑌤𑌸𑌃
𑌸𑌂𑌰𑍋𑌧𑍇 𑌕𑌰𑌣𑌂 𑌶𑌮𑍇𑌨 𑌵𑌿𑌲𑌯𑌂 𑌯𑌾𑌯𑌾𑌦𑌹𑌂𑌵𑌾𑌸𑌨𑌾 ।
𑌤𑍇𑌨𑌾𑌨𑌂𑌦𑌰𑌸𑌾𑌨𑍁𑌭𑍂𑌤𑌿𑌰𑌚𑌲𑌾 𑌬𑍍𑌰𑌾𑌹𑍍𑌮𑍀 𑌸𑌦𑌾 𑌯𑍋𑌗𑌿𑌨𑌃
𑌤𑌸𑍍𑌮𑌾𑌚𑍍𑌚𑌿𑌤𑍍𑌤𑌨𑌿𑌰𑍋𑌧 𑌏𑌵 𑌸𑌤𑌤𑌂 𑌕𑌾𑌰𑍍𑌯𑌃 𑌪𑍍𑌰𑌯𑌤𑍍𑌨𑍋 𑌮𑍁𑌨𑍇𑌃 ॥ 36𑍮॥ 𑌪𑍍𑌰𑌯𑌤𑍍𑌨𑌾𑌨𑍍𑌮𑍁𑌨𑍇𑌃
𑌵𑌾𑌚𑌂 𑌨𑌿𑌯𑌚𑍍𑌛𑌾𑌤𑍍𑌮𑌨𑌿 𑌤𑌂 𑌨𑌿𑌯𑌚𑍍𑌛
𑌬𑍁𑌦𑍍𑌧𑍌 𑌧𑌿𑌯𑌂 𑌯𑌚𑍍𑌛 𑌚 𑌬𑍁𑌦𑍍𑌧𑌿𑌸𑌾𑌕𑍍𑌷𑌿𑌣𑌿 ।
𑌤𑌂 𑌚𑌾𑌪𑌿 𑌪𑍂𑌰𑍍𑌣𑌾𑌤𑍍𑌮𑌨𑌿 𑌨𑌿𑌰𑍍𑌵𑌿𑌕𑌲𑍍𑌪𑍇
𑌵𑌿𑌲𑌾𑌪𑍍𑌯 𑌶𑌾𑌂𑌤𑌿𑌂 𑌪𑌰𑌮𑌾𑌂 𑌭𑌜𑌸𑍍𑌵 ॥ 36𑍯॥

𑌦𑍇𑌹𑌪𑍍𑌰𑌾𑌣𑍇𑌂𑌦𑍍𑌰𑌿𑌯𑌮𑌨𑍋𑌬𑍁𑌦𑍍𑌧𑍍𑌯𑌾𑌦𑌿𑌭𑌿𑌰𑍁𑌪𑌾𑌧𑌿𑌭𑌿𑌃 ।
𑌯𑍈𑌰𑍍𑌯𑍈𑌰𑍍𑌵𑍃𑌤𑍍𑌤𑍇𑌃𑌸𑌮𑌾𑌯𑍋𑌗𑌸𑍍𑌤𑌤𑍍𑌤𑌦𑍍𑌭𑌾𑌵𑍋𑌽𑌸𑍍𑌯 𑌯𑍋𑌗𑌿𑌨𑌃 ॥ 3𑍭0॥

𑌤𑌨𑍍𑌨𑌿𑌵𑍃𑌤𑍍𑌤𑍍𑌯𑌾 𑌮𑍁𑌨𑍇𑌃 𑌸𑌮𑍍𑌯𑌕𑍍 𑌸𑌰𑍍𑌵𑍋𑌪𑌰𑌮𑌣𑌂 𑌸𑍁𑌖𑌮𑍍 ।
𑌸𑌂𑌦𑍃𑌶𑍍𑌯𑌤𑍇 𑌸𑌦𑌾𑌨𑌂𑌦𑌰𑌸𑌾𑌨𑍁𑌭𑌵𑌵𑌿𑌪𑍍𑌲𑌵𑌃 ॥ 3𑍭1॥

𑌅𑌂𑌤𑌸𑍍𑌤𑍍𑌯𑌾𑌗𑍋 𑌬𑌹𑌿𑌸𑍍𑌤𑍍𑌯𑌾𑌗𑍋 𑌵𑌿𑌰𑌕𑍍𑌤𑌸𑍍𑌯𑍈𑌵 𑌯𑍁𑌜𑍍𑌯𑌤𑍇 ।
𑌤𑍍𑌯𑌜𑌤𑍍𑌯𑌂𑌤𑌰𑍍𑌬𑌹𑌿𑌃𑌸𑌂𑌗𑌂 𑌵𑌿𑌰𑌕𑍍𑌤𑌸𑍍𑌤𑍁 𑌮𑍁𑌮𑍁𑌕𑍍𑌷𑌯𑌾 ॥ 3𑍭2॥

𑌬𑌹𑌿𑌸𑍍𑌤𑍁 𑌵𑌿𑌷𑌯𑍈𑌃 𑌸𑌂𑌗𑌂 𑌤𑌥𑌾𑌂𑌤𑌰𑌹𑌮𑌾𑌦𑌿𑌭𑌿𑌃 । (𑌪𑌾𑌠𑌭𑍇𑌦𑌃 – 𑌸𑌂𑌗𑌃)
𑌵𑌿𑌰𑌕𑍍𑌤 𑌏𑌵 𑌶𑌕𑍍𑌨𑍋𑌤𑌿 𑌤𑍍𑌯𑌕𑍍𑌤𑍁𑌂 𑌬𑍍𑌰𑌹𑍍𑌮𑌣𑌿 𑌨𑌿𑌷𑍍𑌠𑌿𑌤𑌃 ॥ 3𑍭3॥

𑌵𑍈𑌰𑌾𑌗𑍍𑌯𑌬𑍋𑌧𑍌 𑌪𑍁𑌰𑍁𑌷𑌸𑍍𑌯 𑌪𑌕𑍍𑌷𑌿𑌵𑌤𑍍
𑌪𑌕𑍍𑌷𑍌 𑌵𑌿𑌜𑌾𑌨𑍀𑌹𑌿 𑌵𑌿𑌚𑌕𑍍𑌷𑌣 𑌤𑍍𑌵𑌮𑍍 ।
𑌵𑌿𑌮𑍁𑌕𑍍𑌤𑌿𑌸𑍌𑌧𑌾𑌗𑍍𑌰𑌲𑌤𑌾𑌧𑌿𑌰𑍋𑌹𑌣𑌂
𑌤𑌾𑌭𑍍𑌯𑌾𑌂 𑌵𑌿𑌨𑌾 𑌨𑌾𑌨𑍍𑌯𑌤𑌰𑍇𑌣 𑌸𑌿𑌧𑍍𑌯𑌤𑌿 ॥ 3𑍭4॥

𑌅𑌤𑍍𑌯𑌂𑌤𑌵𑍈𑌰𑌾𑌗𑍍𑌯𑌵𑌤𑌃 𑌸𑌮𑌾𑌧𑌿𑌃
𑌸𑌮𑌾𑌹𑌿𑌤𑌸𑍍𑌯𑍈𑌵 𑌦𑍃𑌢𑌪𑍍𑌰𑌬𑍋𑌧𑌃 ।
𑌪𑍍𑌰𑌬𑍁𑌦𑍍𑌧𑌤𑌤𑍍𑌤𑍍𑌵𑌸𑍍𑌯 𑌹𑌿 𑌬𑌂𑌧𑌮𑍁𑌕𑍍𑌤𑌿𑌃
𑌮𑍁𑌕𑍍𑌤𑌾𑌤𑍍𑌮𑌨𑍋 𑌨𑌿𑌤𑍍𑌯𑌸𑍁𑌖𑌾𑌨𑍁𑌭𑍂𑌤𑌿𑌃 ॥ 3𑍭5॥

𑌵𑍈𑌰𑌾𑌗𑍍𑌯𑌾𑌨𑍍𑌨 𑌪𑌰𑌂 𑌸𑍁𑌖𑌸𑍍𑌯 𑌜𑌨𑌕𑌂 𑌪𑌶𑍍𑌯𑌾𑌮𑌿 𑌵𑌶𑍍𑌯𑌾𑌤𑍍𑌮𑌨𑌃
𑌤𑌚𑍍𑌚𑍇𑌚𑍍𑌛𑍁𑌦𑍍𑌧𑌤𑌰𑌾𑌤𑍍𑌮𑌬𑍋𑌧𑌸𑌹𑌿𑌤𑌂 𑌸𑍍𑌵𑌾𑌰𑌾𑌜𑍍𑌯𑌸𑌾𑌮𑍍𑌰𑌾𑌜𑍍𑌯𑌧𑍁𑌕𑍍 ।
𑌏𑌤𑌦𑍍𑌦𑍍𑌵𑌾𑌰𑌮𑌜𑌸𑍍𑌰𑌮𑍁𑌕𑍍𑌤𑌿𑌯𑍁𑌵𑌤𑍇𑌰𑍍𑌯𑌸𑍍𑌮𑌾𑌤𑍍𑌤𑍍𑌵𑌮𑌸𑍍𑌮𑌾𑌤𑍍𑌪𑌰𑌂
𑌸𑌰𑍍𑌵𑌤𑍍𑌰𑌾𑌸𑍍𑌪𑍃𑌹𑌯𑌾 𑌸𑌦𑌾𑌤𑍍𑌮𑌨𑌿 𑌸𑌦𑌾 𑌪𑍍𑌰𑌜𑍍𑌞𑌾𑌂 𑌕𑍁𑌰𑍁 𑌶𑍍𑌰𑍇𑌯𑌸𑍇 ॥ 3𑍭6॥

𑌆𑌶𑌾𑌂 𑌛𑌿𑌂𑌦𑍍𑌧𑌿 𑌵𑌿𑌷𑍋𑌪𑌮𑍇𑌷𑍁 𑌵𑌿𑌷𑌯𑍇𑌷𑍍𑌵𑍇𑌷𑍈𑌵 𑌮𑍃𑌤𑍍𑌯𑍋𑌃 𑌕𑍃𑌤𑌿- (𑌪𑌾𑌠𑌭𑍇𑌦𑌃 – 𑌮𑍃𑌤𑍍𑌯𑍋𑌃 𑌸𑍃𑌤𑌿)
𑌸𑍍𑌤𑍍𑌯𑌕𑍍𑌤𑍍𑌵𑌾 𑌜𑌾𑌤𑌿𑌕𑍁𑌲𑌾𑌶𑍍𑌰𑌮𑍇𑌷𑍍𑌵𑌭𑌿𑌮𑌤𑌿𑌂 𑌮𑍁𑌂𑌚𑌾𑌤𑌿𑌦𑍂𑌰𑌾𑌤𑍍𑌕𑍍𑌰𑌿𑌯𑌾𑌃 ।
𑌦𑍇𑌹𑌾𑌦𑌾𑌵𑌸𑌤𑌿 𑌤𑍍𑌯𑌜𑌾𑌤𑍍𑌮𑌧𑌿𑌷𑌣𑌾𑌂 𑌪𑍍𑌰𑌜𑍍𑌞𑌾𑌂 𑌕𑍁𑌰𑍁𑌷𑍍𑌵𑌾𑌤𑍍𑌮𑌨𑌿
𑌤𑍍𑌵𑌂 𑌦𑍍𑌰𑌷𑍍𑌟𑌾𑌸𑍍𑌯𑌮𑌨𑍋𑌽𑌸𑌿 𑌨𑌿𑌰𑍍𑌦𑍍𑌵𑌯𑌪𑌰𑌂 𑌬𑍍𑌰𑌹𑍍𑌮𑌾𑌸𑌿 𑌯𑌦𑍍𑌵𑌸𑍍𑌤𑍁𑌤𑌃 ॥ 3𑍭𑍭॥ (𑌪𑌾𑌠𑌭𑍇𑌦𑌃 – 𑌦𑍍𑌰𑌷𑍍𑌟𑌾𑌸𑍍𑌯𑌮𑌲𑍋)

𑌲𑌕𑍍𑌷𑍍𑌯𑍇 𑌬𑍍𑌰𑌹𑍍𑌮𑌣𑌿 𑌮𑌾𑌨𑌸𑌂 𑌦𑍃𑌢𑌤𑌰𑌂 𑌸𑌂𑌸𑍍𑌥𑌾𑌪𑍍𑌯 𑌬𑌾𑌹𑍍𑌯𑍇𑌂𑌦𑍍𑌰𑌿𑌯𑌂
𑌸𑍍𑌵𑌸𑍍𑌥𑌾𑌨𑍇 𑌵𑌿𑌨𑌿𑌵𑍇𑌶𑍍𑌯 𑌨𑌿𑌶𑍍𑌚𑌲𑌤𑌨𑍁𑌶𑍍𑌚𑍋𑌪𑍇𑌕𑍍𑌷𑍍𑌯 𑌦𑍇𑌹𑌸𑍍𑌥𑌿𑌤𑌿𑌮𑍍 ।
𑌬𑍍𑌰𑌹𑍍𑌮𑌾𑌤𑍍𑌮𑍈𑌕𑍍𑌯𑌮𑍁𑌪𑍇𑌤𑍍𑌯 𑌤𑌨𑍍𑌮𑌯𑌤𑌯𑌾 𑌚𑌾𑌖𑌂𑌡𑌵𑍃𑌤𑍍𑌤𑍍𑌯𑌾𑌽𑌨𑌿𑌶𑌂
𑌬𑍍𑌰𑌹𑍍𑌮𑌾𑌨𑌂𑌦𑌰𑌸𑌂 𑌪𑌿𑌬𑌾𑌤𑍍𑌮𑌨𑌿 𑌮𑍁𑌦𑌾 𑌶𑍂𑌨𑍍𑌯𑍈𑌃 𑌕𑌿𑌮𑌨𑍍𑌯𑍈𑌰𑍍𑌭𑍃𑌶𑌮𑍍 ॥ 3𑍭𑍮॥ (𑌪𑌾𑌠𑌭𑍇𑌦𑌃 – 𑌕𑌿𑌮𑌨𑍍𑌯𑍈𑌰𑍍𑌭𑍍𑌰𑌮𑍈𑌃)

𑌅𑌨𑌾𑌤𑍍𑌮𑌚𑌿𑌂𑌤𑌨𑌂 𑌤𑍍𑌯𑌕𑍍𑌤𑍍𑌵𑌾 𑌕𑌶𑍍𑌮𑌲𑌂 𑌦𑍁𑌃𑌖𑌕𑌾𑌰𑌣𑌮𑍍 ।
𑌚𑌿𑌂𑌤𑌯𑌾𑌤𑍍𑌮𑌾𑌨𑌮𑌾𑌨𑌂𑌦𑌰𑍂𑌪𑌂 𑌯𑌨𑍍𑌮𑍁𑌕𑍍𑌤𑌿𑌕𑌾𑌰𑌣𑌮𑍍 ॥ 3𑍭𑍯॥

𑌏𑌷 𑌸𑍍𑌵𑌯𑌂𑌜𑍍𑌯𑍋𑌤𑌿𑌰𑌶𑍇𑌷𑌸𑌾𑌕𑍍𑌷𑍀
𑌵𑌿𑌜𑍍𑌞𑌾𑌨𑌕𑍋𑌶𑍋 𑌵𑌿𑌲𑌸𑌤𑍍𑌯𑌜𑌸𑍍𑌰𑌮𑍍 । 𑌵𑌿𑌜𑍍𑌞𑌾𑌨𑌕𑍋𑌶𑍇
𑌲𑌕𑍍𑌷𑍍𑌯𑌂 𑌵𑌿𑌧𑌾𑌯𑍈𑌨𑌮𑌸𑌦𑍍𑌵𑌿𑌲𑌕𑍍𑌷𑌣-
𑌮𑌖𑌂𑌡𑌵𑍃𑌤𑍍𑌤𑍍𑌯𑌾𑌽𑌽𑌤𑍍𑌮𑌤𑌯𑌾𑌽𑌨𑍁𑌭𑌾𑌵𑌯 ॥ 3𑍮0॥

𑌏𑌤𑌮𑌚𑍍𑌛𑌿𑌨𑍍𑌨𑌯𑌾 𑌵𑍃𑌤𑍍𑌤𑍍𑌯𑌾 𑌪𑍍𑌰𑌤𑍍𑌯𑌯𑌾𑌂𑌤𑌰𑌶𑍂𑌨𑍍𑌯𑌯𑌾 ।
𑌉𑌲𑍍𑌲𑍇𑌖𑌯𑌨𑍍𑌵𑌿𑌜𑌾𑌨𑍀𑌯𑌾𑌤𑍍𑌸𑍍𑌵𑌸𑍍𑌵𑌰𑍂𑌪𑌤𑌯𑌾 𑌸𑍍𑌫𑍁𑌟𑌮𑍍 ॥ 3𑍮1॥

𑌅𑌤𑍍𑌰𑌾𑌤𑍍𑌮𑌤𑍍𑌵𑌂 𑌦𑍃𑌢𑍀𑌕𑍁𑌰𑍍𑌵𑌨𑍍𑌨𑌹𑌮𑌾𑌦𑌿𑌷𑍁 𑌸𑌂𑌤𑍍𑌯𑌜𑌨𑍍 ।
𑌉𑌦𑌾𑌸𑍀𑌨𑌤𑌯𑌾 𑌤𑍇𑌷𑍁 𑌤𑌿𑌷𑍍𑌠𑍇𑌤𑍍𑌸𑍍𑌫𑍁𑌟𑌘𑌟𑌾𑌦𑌿𑌵𑌤𑍍 ॥ 3𑍮2॥ (𑌪𑌾𑌠𑌭𑍇𑌦𑌃 – 𑌤𑌿𑌷𑍍𑌠𑍇𑌦𑍍𑌘𑌟𑌪𑌟𑌾𑌦𑌿𑌵𑌤𑍍)

𑌵𑌿𑌶𑍁𑌦𑍍𑌧𑌮𑌂𑌤𑌃𑌕𑌰𑌣𑌂 𑌸𑍍𑌵𑌰𑍂𑌪𑍇
𑌨𑌿𑌵𑍇𑌶𑍍𑌯 𑌸𑌾𑌕𑍍𑌷𑌿𑌣𑍍𑌯𑌵𑌬𑍋𑌧𑌮𑌾𑌤𑍍𑌰𑍇 ।
𑌶𑌨𑍈𑌃 𑌶𑌨𑍈𑌰𑍍𑌨𑌿𑌶𑍍𑌚𑌲𑌤𑌾𑌮𑍁𑌪𑌾𑌨𑌯𑌨𑍍
𑌪𑍂𑌰𑍍𑌣𑌂 𑌸𑍍𑌵𑌮𑍇𑌵𑌾𑌨𑍁𑌵𑌿𑌲𑍋𑌕𑌯𑍇𑌤𑍍𑌤𑌤𑌃 ॥ 3𑍮3॥ (𑌪𑌾𑌠𑌭𑍇𑌦𑌃 – 𑌪𑍂𑌰𑍍𑌣𑌤𑍍𑌵𑌮𑍇𑌵𑌾𑌨𑍁)

𑌦𑍇𑌹𑍇𑌂𑌦𑍍𑌰𑌿𑌯𑌪𑍍𑌰𑌾𑌣𑌮𑌨𑍋𑌽𑌹𑌮𑌾𑌦𑌿𑌭𑌿𑌃
𑌸𑍍𑌵𑌾𑌜𑍍𑌞𑌾𑌨𑌕𑍍𑌲𑍃𑌪𑍍𑌤𑍈𑌰𑌖𑌿𑌲𑍈𑌰𑍁𑌪𑌾𑌧𑌿𑌭𑌿𑌃 ।
𑌵𑌿𑌮𑍁𑌕𑍍𑌤𑌮𑌾𑌤𑍍𑌮𑌾𑌨𑌮𑌖𑌂𑌡𑌰𑍂𑌪𑌂
𑌪𑍂𑌰𑍍𑌣𑌂 𑌮𑌹𑌾𑌕𑌾𑌶𑌮𑌿𑌵𑌾𑌵𑌲𑍋𑌕𑌯𑍇𑌤𑍍 ॥ 3𑍮4॥

𑌘𑌟𑌕𑌲𑌶𑌕𑍁𑌸𑍂𑌲𑌸𑍂𑌚𑌿𑌮𑍁𑌖𑍍𑌯𑍈𑌃
𑌗𑌗𑌨𑌮𑍁𑌪𑌾𑌧𑌿𑌶𑌤𑍈𑌰𑍍𑌵𑌿𑌮𑍁𑌕𑍍𑌤𑌮𑍇𑌕𑌮𑍍 ।
𑌭𑌵𑌤𑌿 𑌨 𑌵𑌿𑌵𑌿𑌧𑌂 𑌤𑌥𑍈𑌵 𑌶𑍁𑌦𑍍𑌧𑌂
𑌪𑌰𑌮𑌹𑌮𑌾𑌦𑌿𑌵𑌿𑌮𑍁𑌕𑍍𑌤𑌮𑍇𑌕𑌮𑍇𑌵 ॥ 3𑍮5॥

𑌬𑍍𑌰𑌹𑍍𑌮𑌾𑌦𑌿𑌸𑍍𑌤𑌂𑌬𑌪𑌰𑍍𑌯𑌂𑌤𑌾 𑌮𑍃𑌷𑌾𑌮𑌾𑌤𑍍𑌰𑌾 𑌉𑌪𑌾𑌧𑌯𑌃 । (𑌪𑌾𑌠𑌭𑍇𑌦𑌃 – 𑌬𑍍𑌰𑌹𑍍𑌮𑌾𑌦𑍍𑌯𑌾𑌃 𑌸𑍍𑌤𑌂𑌬)
𑌤𑌤𑌃 𑌪𑍂𑌰𑍍𑌣𑌂 𑌸𑍍𑌵𑌮𑌾𑌤𑍍𑌮𑌾𑌨𑌂 𑌪𑌶𑍍𑌯𑍇𑌦𑍇𑌕𑌾𑌤𑍍𑌮𑌨𑌾 𑌸𑍍𑌥𑌿𑌤𑌮𑍍 ॥ 3𑍮6॥

𑌯𑌤𑍍𑌰 𑌭𑍍𑌰𑌾𑌂𑌤𑍍𑌯𑌾 𑌕𑌲𑍍𑌪𑌿𑌤𑌂 𑌤𑌦𑍍𑌵𑌿𑌵𑍇𑌕𑍇 (𑌪𑌾𑌠𑌭𑍇𑌦𑌃 – 𑌯𑌦𑍍𑌵𑌿𑌵𑍇𑌕𑍇)
𑌤𑌤𑍍𑌤𑌨𑍍𑌮𑌾𑌤𑍍𑌰𑌂 𑌨𑍈𑌵 𑌤𑌸𑍍𑌮𑌾𑌦𑍍𑌵𑌿𑌭𑌿𑌨𑍍𑌨𑌮𑍍 ।
𑌭𑍍𑌰𑌾𑌂𑌤𑍇𑌰𑍍𑌨𑌾𑌶𑍇 𑌭𑌾𑌤𑌿 𑌦𑍃𑌷𑍍𑌟𑌾𑌹𑌿𑌤𑌤𑍍𑌤𑍍𑌵𑌂 (𑌪𑌾𑌠𑌭𑍇𑌦𑌃 – 𑌭𑍍𑌰𑌾𑌂𑌤𑌿𑌦𑍃𑌷𑍍𑌟𑌾)
𑌰𑌜𑍍𑌜𑍁𑌸𑍍𑌤𑌦𑍍𑌵𑌦𑍍𑌵𑌿𑌶𑍍𑌵𑌮𑌾𑌤𑍍𑌮𑌸𑍍𑌵𑌰𑍂𑌪𑌮𑍍 ॥ 3𑍮𑍭॥

𑌸𑍍𑌵𑌯𑌂 𑌬𑍍𑌰𑌹𑍍𑌮𑌾 𑌸𑍍𑌵𑌯𑌂 𑌵𑌿𑌷𑍍𑌣𑍁𑌃 𑌸𑍍𑌵𑌯𑌮𑌿𑌂𑌦𑍍𑌰𑌃 𑌸𑍍𑌵𑌯𑌂 𑌶𑌿𑌵𑌃 ।
𑌸𑍍𑌵𑌯𑌂 𑌵𑌿𑌶𑍍𑌵𑌮𑌿𑌦𑌂 𑌸𑌰𑍍𑌵𑌂 𑌸𑍍𑌵𑌸𑍍𑌮𑌾𑌦𑌨𑍍𑌯𑌨𑍍𑌨 𑌕𑌿𑌂𑌚𑌨 ॥ 3𑍮𑍮॥

𑌅𑌂𑌤𑌃 𑌸𑍍𑌵𑌯𑌂 𑌚𑌾𑌪𑌿 𑌬𑌹𑌿𑌃 𑌸𑍍𑌵𑌯𑌂 𑌚
𑌸𑍍𑌵𑌯𑌂 𑌪𑍁𑌰𑌸𑍍𑌤𑌾𑌤𑍍 𑌸𑍍𑌵𑌯𑌮𑍇𑌵 𑌪𑌶𑍍𑌚𑌾𑌤𑍍 ।
𑌸𑍍𑌵𑌯𑌂 𑌹𑍍𑌯𑌾𑌵𑌾𑌚𑍍𑌯𑌾𑌂 𑌸𑍍𑌵𑌯𑌮𑌪𑍍𑌯𑍁𑌦𑍀𑌚𑍍𑌯𑌾𑌂 (𑌪𑌾𑌠𑌭𑍇𑌦𑌃 – 𑌹𑍍𑌯𑌵𑌾𑌚𑍍𑌯𑌾𑌂)
𑌤𑌥𑍋𑌪𑌰𑌿𑌷𑍍𑌟𑌾𑌤𑍍𑌸𑍍𑌵𑌯𑌮𑌪𑍍𑌯𑌧𑌸𑍍𑌤𑌾𑌤𑍍 ॥ 3𑍮𑍯॥

𑌤𑌰𑌂𑌗𑌫𑍇𑌨𑌭𑍍𑌰𑌮𑌬𑍁𑌦𑍍𑌬𑍁𑌦𑌾𑌦𑌿
𑌸𑌰𑍍𑌵𑌂 𑌸𑍍𑌵𑌰𑍂𑌪𑍇𑌣 𑌜𑌲𑌂 𑌯𑌥𑌾 𑌤𑌥𑌾 ।
𑌚𑌿𑌦𑍇𑌵 𑌦𑍇𑌹𑌾𑌦𑍍𑌯𑌹𑌮𑌂𑌤𑌮𑍇𑌤𑌤𑍍
𑌸𑌰𑍍𑌵𑌂 𑌚𑌿𑌦𑍇𑌵𑍈𑌕𑌰𑌸𑌂 𑌵𑌿𑌶𑍁𑌦𑍍𑌧𑌮𑍍 ॥ 3𑍯0॥

𑌸𑌦𑍇𑌵𑍇𑌦𑌂 𑌸𑌰𑍍𑌵𑌂 𑌜𑌗𑌦𑌵𑌗𑌤𑌂 𑌵𑌾𑌙𑍍𑌮𑌨𑌸𑌯𑍋𑌃
𑌸𑌤𑍋𑌽𑌨𑍍𑌯𑌨𑍍𑌨𑌾𑌸𑍍𑌤𑍍𑌯𑍇𑌵 𑌪𑍍𑌰𑌕𑍃𑌤𑌿𑌪𑌰𑌸𑍀𑌮𑍍𑌨𑌿 𑌸𑍍𑌥𑌿𑌤𑌵𑌤𑌃 ।
𑌪𑍃𑌥𑌕𑍍 𑌕𑌿𑌂 𑌮𑍃𑌤𑍍𑌸𑍍𑌨𑌾𑌯𑌾𑌃 𑌕𑌲𑌶𑌘𑌟𑌕𑍁𑌂𑌭𑌾𑌦𑍍𑌯𑌵𑌗𑌤𑌂
𑌵𑌦𑌤𑍍𑌯𑍇𑌷 𑌭𑍍𑌰𑌾𑌂𑌤𑌸𑍍𑌤𑍍𑌵𑌮𑌹𑌮𑌿𑌤𑌿 𑌮𑌾𑌯𑌾𑌮𑌦𑌿𑌰𑌯𑌾 ॥ 3𑍯1॥

𑌕𑍍𑌰𑌿𑌯𑌾𑌸𑌮𑌭𑌿𑌹𑌾𑌰𑍇𑌣 𑌯𑌤𑍍𑌰 𑌨𑌾𑌨𑍍𑌯𑌦𑌿𑌤𑌿 𑌶𑍍𑌰𑍁𑌤𑌿𑌃 ।
𑌬𑍍𑌰𑌵𑍀𑌤𑌿 𑌦𑍍𑌵𑍈𑌤𑌰𑌾𑌹𑌿𑌤𑍍𑌯𑌂 𑌮𑌿𑌥𑍍𑌯𑌾𑌧𑍍𑌯𑌾𑌸𑌨𑌿𑌵𑍃𑌤𑍍𑌤𑌯𑍇 ॥ 3𑍯2॥

𑌆𑌕𑌾𑌶𑌵𑌨𑍍𑌨𑌿𑌰𑍍𑌮𑌲𑌨𑌿𑌰𑍍𑌵𑌿𑌕𑌲𑍍𑌪𑌂 (𑌪𑌾𑌠𑌭𑍇𑌦𑌃 – 𑌨𑌿𑌰𑍍𑌵𑌿𑌕𑌲𑍍𑌪)
𑌨𑌿𑌃𑌸𑍀𑌮𑌨𑌿𑌃𑌸𑍍𑌪𑌂𑌦𑌨𑌨𑌿𑌰𑍍𑌵𑌿𑌕𑌾𑌰𑌮𑍍 ।
𑌅𑌂𑌤𑌰𑍍𑌬𑌹𑌿𑌃𑌶𑍂𑌨𑍍𑌯𑌮𑌨𑌨𑍍𑌯𑌮𑌦𑍍𑌵𑌯𑌂
𑌸𑍍𑌵𑌯𑌂 𑌪𑌰𑌂 𑌬𑍍𑌰𑌹𑍍𑌮 𑌕𑌿𑌮𑌸𑍍𑌤𑌿 𑌬𑍋𑌧𑍍𑌯𑌮𑍍 ॥ 3𑍯3॥

𑌵𑌕𑍍𑌤𑌵𑍍𑌯𑌂 𑌕𑌿𑌮𑍁 𑌵𑌿𑌦𑍍𑌯𑌤𑍇𑌽𑌤𑍍𑌰 𑌬𑌹𑍁𑌧𑌾 𑌬𑍍𑌰𑌹𑍍𑌮𑍈𑌵 𑌜𑍀𑌵𑌃 𑌸𑍍𑌵𑌯𑌂
𑌬𑍍𑌰𑌹𑍍𑌮𑍈𑌤𑌜𑍍𑌜𑌗𑌦𑌾𑌤𑌤𑌂 𑌨𑍁 𑌸𑌕𑌲𑌂 𑌬𑍍𑌰𑌹𑍍𑌮𑌾𑌦𑍍𑌵𑌿𑌤𑍀𑌯𑌂 𑌶𑍍𑌰𑍁𑌤𑌿𑌃 । (𑌪𑌾𑌠𑌭𑍇𑌦𑌃 – 𑌜𑌗𑌦𑌾𑌪𑌰𑌾𑌣𑍁 𑌸𑌕𑌲𑌂)
𑌬𑍍𑌰𑌹𑍍𑌮𑍈𑌵𑌾𑌹𑌮𑌿𑌤𑌿 𑌪𑍍𑌰𑌬𑍁𑌦𑍍𑌧𑌮𑌤𑌯𑌃 𑌸𑌂𑌤𑍍𑌯𑌕𑍍𑌤𑌬𑌾𑌹𑍍𑌯𑌾𑌃 𑌸𑍍𑌫𑍁𑌟𑌂
𑌬𑍍𑌰𑌹𑍍𑌮𑍀𑌭𑍂𑌯 𑌵𑌸𑌂𑌤𑌿 𑌸𑌂𑌤𑌤𑌚𑌿𑌦𑌾𑌨𑌂𑌦𑌾𑌤𑍍𑌮𑌨𑍈𑌤𑌦𑍍𑌧𑍍𑌰𑍁𑌵𑌮𑍍 ॥ 3𑍯4॥ (𑌪𑌾𑌠𑌭𑍇𑌦𑌃 – 𑌆𑌨𑌂𑌦𑌾𑌤𑍍𑌮𑌨𑍈𑌵 𑌧𑍍𑌰𑍁𑌵𑌮𑍍)

𑌜𑌹𑌿 𑌮𑌲𑌮𑌯𑌕𑍋𑌶𑍇𑌽𑌹𑌂𑌧𑌿𑌯𑍋𑌤𑍍𑌥𑌾𑌪𑌿𑌤𑌾𑌶𑌾𑌂
𑌪𑍍𑌰𑌸𑌭𑌮𑌨𑌿𑌲𑌕𑌲𑍍𑌪𑍇 𑌲𑌿𑌂𑌗𑌦𑍇𑌹𑍇𑌽𑌪𑌿 𑌪𑌶𑍍𑌚𑌾𑌤𑍍 ।
𑌨𑌿𑌗𑌮𑌗𑌦𑌿𑌤𑌕𑍀𑌰𑍍𑌤𑌿𑌂 𑌨𑌿𑌤𑍍𑌯𑌮𑌾𑌨𑌂𑌦𑌮𑍂𑌰𑍍𑌤𑌿𑌂
𑌸𑍍𑌵𑌯𑌮𑌿𑌤𑌿 𑌪𑌰𑌿𑌚𑍀𑌯 𑌬𑍍𑌰𑌹𑍍𑌮𑌰𑍂𑌪𑍇𑌣 𑌤𑌿𑌷𑍍𑌠 ॥ 3𑍯5॥

𑌶𑌵𑌾𑌕𑌾𑌰𑌂 𑌯𑌾𑌵𑌦𑍍𑌭𑌜𑌤𑌿 𑌮𑌨𑍁𑌜𑌸𑍍𑌤𑌾𑌵𑌦𑌶𑍁𑌚𑌿𑌃
𑌪𑌰𑍇𑌭𑍍𑌯𑌃 𑌸𑍍𑌯𑌾𑌤𑍍𑌕𑍍𑌲𑍇𑌶𑍋 𑌜𑌨𑌨𑌮𑌰𑌣𑌵𑍍𑌯𑌾𑌧𑌿𑌨𑌿𑌲𑌯𑌃 । (𑌪𑌾𑌠𑌭𑍇𑌦𑌃 – 𑌵𑍍𑌯𑌾𑌧𑌿𑌨𑌿𑌰𑌯𑌾𑌃)
𑌯𑌦𑌾𑌤𑍍𑌮𑌾𑌨𑌂 𑌶𑍁𑌦𑍍𑌧𑌂 𑌕𑌲𑌯𑌤𑌿 𑌶𑌿𑌵𑌾𑌕𑌾𑌰𑌮𑌚𑌲𑌮𑍍
𑌤𑌦𑌾 𑌤𑍇𑌭𑍍𑌯𑍋 𑌮𑍁𑌕𑍍𑌤𑍋 𑌭𑌵𑌤𑌿 𑌹𑌿 𑌤𑌦𑌾𑌹 𑌶𑍍𑌰𑍁𑌤𑌿𑌰𑌪𑌿 ॥ 3𑍯6॥

𑌸𑍍𑌵𑌾𑌤𑍍𑌮𑌨𑍍𑌯𑌾𑌰𑍋𑌪𑌿𑌤𑌾𑌶𑍇𑌷𑌾𑌭𑌾𑌸𑌵𑌸𑍍𑌤𑍁𑌨𑌿𑌰𑌾𑌸𑌤𑌃 ।
𑌸𑍍𑌵𑌯𑌮𑍇𑌵 𑌪𑌰𑌂 𑌬𑍍𑌰𑌹𑍍𑌮 𑌪𑍂𑌰𑍍𑌣𑌮𑌦𑍍𑌵𑌯𑌮𑌕𑍍𑌰𑌿𑌯𑌮𑍍 ॥ 3𑍯𑍭॥

𑌸𑌮𑌾𑌹𑌿𑌤𑌾𑌯𑌾𑌂 𑌸𑌤𑌿 𑌚𑌿𑌤𑍍𑌤𑌵𑍃𑌤𑍍𑌤𑍌
𑌪𑌰𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌨𑌿𑌰𑍍𑌵𑌿𑌕𑌲𑍍𑌪𑍇 ।
𑌨 𑌦𑍃𑌶𑍍𑌯𑌤𑍇 𑌕𑌶𑍍𑌚𑌿𑌦𑌯𑌂 𑌵𑌿𑌕𑌲𑍍𑌪𑌃
𑌪𑍍𑌰𑌜𑌲𑍍𑌪𑌮𑌾𑌤𑍍𑌰𑌃 𑌪𑌰𑌿𑌶𑌿𑌷𑍍𑌯𑌤𑍇 𑌯𑌤𑌃 ॥ 3𑍯𑍮॥ (𑌪𑌾𑌠𑌭𑍇𑌦𑌃 – 𑌤𑌤𑌃)

𑌅𑌸𑌤𑍍𑌕𑌲𑍍𑌪𑍋 𑌵𑌿𑌕𑌲𑍍𑌪𑍋𑌽𑌯𑌂 𑌵𑌿𑌶𑍍𑌵𑌮𑌿𑌤𑍍𑌯𑍇𑌕𑌵𑌸𑍍𑌤𑍁𑌨𑌿 ।
𑌨𑌿𑌰𑍍𑌵𑌿𑌕𑌾𑌰𑍇 𑌨𑌿𑌰𑌾𑌕𑌾𑌰𑍇 𑌨𑌿𑌰𑍍𑌵𑌿𑌶𑍇𑌷𑍇 𑌭𑌿𑌦𑌾 𑌕𑍁𑌤𑌃 ॥ 3𑍯𑍯॥

𑌦𑍍𑌰𑌷𑍍𑌟𑍁𑌦𑌰𑍍𑌶𑌨𑌦𑍃𑌶𑍍𑌯𑌾𑌦𑌿𑌭𑌾𑌵𑌶𑍂𑌨𑍍𑌯𑍈𑌕𑌵𑌸𑍍𑌤𑍁𑌨𑌿 । (𑌪𑌾𑌠𑌭𑍇𑌦𑌃 – 𑌦𑍍𑌰𑌷𑍍𑌟𑍃𑌦𑌰𑍍𑌶𑌨)
𑌨𑌿𑌰𑍍𑌵𑌿𑌕𑌾𑌰𑍇 𑌨𑌿𑌰𑌾𑌕𑌾𑌰𑍇 𑌨𑌿𑌰𑍍𑌵𑌿𑌶𑍇𑌷𑍇 𑌭𑌿𑌦𑌾 𑌕𑍁𑌤𑌃 ॥ 400॥

𑌕𑌲𑍍𑌪𑌾𑌰𑍍𑌣𑌵 𑌇𑌵𑌾𑌤𑍍𑌯𑌂𑌤𑌪𑌰𑌿𑌪𑍂𑌰𑍍𑌣𑍈𑌕𑌵𑌸𑍍𑌤𑍁𑌨𑌿 ।
𑌨𑌿𑌰𑍍𑌵𑌿𑌕𑌾𑌰𑍇 𑌨𑌿𑌰𑌾𑌕𑌾𑌰𑍇 𑌨𑌿𑌰𑍍𑌵𑌿𑌶𑍇𑌷𑍇 𑌭𑌿𑌦𑌾 𑌕𑍁𑌤𑌃 ॥ 401॥

𑌤𑍇𑌜𑌸𑍀𑌵 𑌤𑌮𑍋 𑌯𑌤𑍍𑌰 𑌪𑍍𑌰𑌲𑍀𑌨𑌂 𑌭𑍍𑌰𑌾𑌂𑌤𑌿𑌕𑌾𑌰𑌣𑌮𑍍 । (𑌪𑌾𑌠𑌭𑍇𑌦𑌃 – 𑌯𑌤𑍍𑌰 𑌵𑌿𑌲𑍀𑌨𑌂)
𑌅𑌦𑍍𑌵𑌿𑌤𑍀𑌯𑍇 𑌪𑌰𑍇 𑌤𑌤𑍍𑌤𑍍𑌵𑍇 𑌨𑌿𑌰𑍍𑌵𑌿𑌶𑍇𑌷𑍇 𑌭𑌿𑌦𑌾 𑌕𑍁𑌤𑌃 ॥ 402॥

𑌏𑌕𑌾𑌤𑍍𑌮𑌕𑍇 𑌪𑌰𑍇 𑌤𑌤𑍍𑌤𑍍𑌵𑍇 𑌭𑍇𑌦𑌵𑌾𑌰𑍍𑌤𑌾 𑌕𑌥𑌂 𑌵𑌸𑍇𑌤𑍍 । (𑌪𑌾𑌠𑌭𑍇𑌦𑌃 – 𑌕𑌥𑌂 𑌭𑌵𑍇𑌤𑍍)
𑌸𑍁𑌷𑍁𑌪𑍍𑌤𑍌 𑌸𑍁𑌖𑌮𑌾𑌤𑍍𑌰𑌾𑌯𑌾𑌂 𑌭𑍇𑌦𑌃 𑌕𑍇𑌨𑌾𑌵𑌲𑍋𑌕𑌿𑌤𑌃 ॥ 403॥

𑌨 𑌹𑍍𑌯𑌸𑍍𑌤𑌿 𑌵𑌿𑌶𑍍𑌵𑌂 𑌪𑌰𑌤𑌤𑍍𑌤𑍍𑌵𑌬𑍋𑌧𑌾𑌤𑍍
𑌸𑌦𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌨𑌿𑌰𑍍𑌵𑌿𑌕𑌲𑍍𑌪𑍇 ।
𑌕𑌾𑌲𑌤𑍍𑌰𑌯𑍇 𑌨𑌾𑌪𑍍𑌯𑌹𑌿𑌰𑍀𑌕𑍍𑌷𑌿𑌤𑍋 𑌗𑍁𑌣𑍇
𑌨 𑌹𑍍𑌯𑌂𑌬𑍁𑌬𑌿𑌂𑌦𑍁𑌰𑍍𑌮𑍃𑌗𑌤𑍃𑌷𑍍𑌣𑌿𑌕𑌾𑌯𑌾𑌮𑍍 ॥ 404॥

𑌮𑌾𑌯𑌾𑌮𑌾𑌤𑍍𑌰𑌮𑌿𑌦𑌂 𑌦𑍍𑌵𑍈𑌤𑌮𑌦𑍍𑌵𑍈𑌤𑌂 𑌪𑌰𑌮𑌾𑌰𑍍𑌥𑌤𑌃 ।
𑌇𑌤𑌿 𑌬𑍍𑌰𑍂𑌤𑍇 𑌶𑍍𑌰𑍁𑌤𑌿𑌃 𑌸𑌾𑌕𑍍𑌷𑌾𑌤𑍍𑌸𑍁𑌷𑍁𑌪𑍍𑌤𑌾𑌵𑌨𑍁𑌭𑍂𑌯𑌤𑍇 ॥ 405॥

𑌅𑌨𑌨𑍍𑌯𑌤𑍍𑌵𑌮𑌧𑌿𑌷𑍍𑌠𑌾𑌨𑌾𑌦𑌾𑌰𑍋𑌪𑍍𑌯𑌸𑍍𑌯 𑌨𑌿𑌰𑍀𑌕𑍍𑌷𑌿𑌤𑌮𑍍 ।
𑌪𑌂𑌡𑌿𑌤𑍈 𑌰𑌜𑍍𑌜𑍁𑌸𑌰𑍍𑌪𑌾𑌦𑍌 𑌵𑌿𑌕𑌲𑍍𑌪𑍋 𑌭𑍍𑌰𑌾𑌂𑌤𑌿𑌜𑍀𑌵𑌨𑌃 ॥ 406॥

𑌚𑌿𑌤𑍍𑌤𑌮𑍂𑌲𑍋 𑌵𑌿𑌕𑌲𑍍𑌪𑍋𑌽𑌯𑌂 𑌚𑌿𑌤𑍍𑌤𑌾𑌭𑌾𑌵𑍇 𑌨 𑌕𑌶𑍍𑌚𑌨 ।
𑌅𑌤𑌶𑍍𑌚𑌿𑌤𑍍𑌤𑌂 𑌸𑌮𑌾𑌧𑍇𑌹𑌿 𑌪𑍍𑌰𑌤𑍍𑌯𑌗𑍍𑌰𑍂𑌪𑍇 𑌪𑌰𑌾𑌤𑍍𑌮𑌨𑌿 ॥ 40𑍭॥

𑌕𑌿𑌮𑌪𑌿 𑌸𑌤𑌤𑌬𑍋𑌧𑌂 𑌕𑍇𑌵𑌲𑌾𑌨𑌂𑌦𑌰𑍂𑌪𑌂
𑌨𑌿𑌰𑍁𑌪𑌮𑌮𑌤𑌿𑌵𑍇𑌲𑌂 𑌨𑌿𑌤𑍍𑌯𑌮𑍁𑌕𑍍𑌤𑌂 𑌨𑌿𑌰𑍀𑌹𑌮𑍍 ।
𑌨𑌿𑌰𑌵𑌧𑌿𑌗𑌗𑌨𑌾𑌭𑌂 𑌨𑌿𑌷𑍍𑌕𑌲𑌂 𑌨𑌿𑌰𑍍𑌵𑌿𑌕𑌲𑍍𑌪𑌂
𑌹𑍃𑌦𑌿 𑌕𑌲𑌯𑌤𑌿 𑌵𑌿𑌦𑍍𑌵𑌾𑌨𑍍 𑌬𑍍𑌰𑌹𑍍𑌮 𑌪𑍂𑌰𑍍𑌣𑌂 𑌸𑌮𑌾𑌧𑍌 ॥ 40𑍮॥

𑌪𑍍𑌰𑌕𑍃𑌤𑌿𑌵𑌿𑌕𑍃𑌤𑌿𑌶𑍂𑌨𑍍𑌯𑌂 𑌭𑌾𑌵𑌨𑌾𑌤𑍀𑌤𑌭𑌾𑌵𑌂
𑌸𑌮𑌰𑌸𑌮𑌸𑌮𑌾𑌨𑌂 𑌮𑌾𑌨𑌸𑌂𑌬𑌂𑌧𑌦𑍂𑌰𑌮𑍍 ।
𑌨𑌿𑌗𑌮𑌵𑌚𑌨𑌸𑌿𑌦𑍍𑌧𑌂 𑌨𑌿𑌤𑍍𑌯𑌮𑌸𑍍𑌮𑌤𑍍𑌪𑍍𑌰𑌸𑌿𑌦𑍍𑌧𑌂
𑌹𑍃𑌦𑌿 𑌕𑌲𑌯𑌤𑌿 𑌵𑌿𑌦𑍍𑌵𑌾𑌨𑍍 𑌬𑍍𑌰𑌹𑍍𑌮 𑌪𑍂𑌰𑍍𑌣𑌂 𑌸𑌮𑌾𑌧𑍌 ॥ 40𑍯॥

𑌅𑌜𑌰𑌮𑌮𑌰𑌮𑌸𑍍𑌤𑌾𑌭𑌾𑌵𑌵𑌸𑍍𑌤𑍁𑌸𑍍𑌵𑌰𑍂𑌪𑌂 (𑌪𑌾𑌠𑌭𑍇𑌦𑌃 – 𑌭𑌾𑌸𑌵𑌸𑍍𑌤𑍁)
𑌸𑍍𑌤𑌿𑌮𑌿𑌤𑌸𑌲𑌿𑌲𑌰𑌾𑌶𑌿𑌪𑍍𑌰𑌖𑍍𑌯𑌮𑌾𑌖𑍍𑌯𑌾𑌵𑌿𑌹𑍀𑌨𑌮𑍍 ।
𑌶𑌮𑌿𑌤𑌗𑍁𑌣𑌵𑌿𑌕𑌾𑌰𑌂 𑌶𑌾𑌶𑍍𑌵𑌤𑌂 𑌶𑌾𑌂𑌤𑌮𑍇𑌕𑌂
𑌹𑍃𑌦𑌿 𑌕𑌲𑌯𑌤𑌿 𑌵𑌿𑌦𑍍𑌵𑌾𑌨𑍍 𑌬𑍍𑌰𑌹𑍍𑌮 𑌪𑍂𑌰𑍍𑌣𑌂 𑌸𑌮𑌾𑌧𑍌 ॥ 410॥

𑌸𑌮𑌾𑌹𑌿𑌤𑌾𑌂𑌤𑌃𑌕𑌰𑌣𑌃 𑌸𑍍𑌵𑌰𑍂𑌪𑍇
𑌵𑌿𑌲𑍋𑌕𑌯𑌾𑌤𑍍𑌮𑌾𑌨𑌮𑌖𑌂𑌡𑌵𑍈𑌭𑌵𑌮𑍍 ।
𑌵𑌿𑌚𑍍𑌛𑌿𑌂𑌦𑍍𑌧𑌿 𑌬𑌂𑌧𑌂 𑌭𑌵𑌗𑌂𑌧𑌗𑌂𑌧𑌿𑌤𑌂 (𑌪𑌾𑌠𑌭𑍇𑌦𑌃 – 𑌗𑌂𑌧𑌗𑌂𑌧𑌿𑌲𑌂)
𑌯𑌤𑍍𑌨𑍇𑌨 𑌪𑍁𑌂𑌸𑍍𑌤𑍍𑌵𑌂 𑌸𑌫𑌲𑍀𑌕𑍁𑌰𑍁𑌷𑍍𑌵 ॥ 411-

𑌸𑌰𑍍𑌵𑍋𑌪𑌾𑌧𑌿𑌵𑌿𑌨𑌿𑌰𑍍𑌮𑍁𑌕𑍍𑌤𑌂 𑌸𑌚𑍍𑌚𑌿𑌦𑌾𑌨𑌂𑌦𑌮𑌦𑍍𑌵𑌯𑌮𑍍 ।
𑌭𑌾𑌵𑌯𑌾𑌤𑍍𑌮𑌾𑌨𑌮𑌾𑌤𑍍𑌮𑌸𑍍𑌥𑌂 𑌨 𑌭𑍂𑌯𑌃 𑌕𑌲𑍍𑌪𑌸𑍇𑌽𑌧𑍍𑌵𑌨𑍇 ॥ 412॥

𑌛𑌾𑌯𑍇𑌵 𑌪𑍁𑌂𑌸𑌃 𑌪𑌰𑌿𑌦𑍃𑌶𑍍𑌯𑌮𑌾𑌨-
𑌮𑌾𑌭𑌾𑌸𑌰𑍂𑌪𑍇𑌣 𑌫𑌲𑌾𑌨𑍁𑌭𑍂𑌤𑍍𑌯𑌾 ।
𑌶𑌰𑍀𑌰𑌮𑌾𑌰𑌾𑌚𑍍𑌛𑌵𑌵𑌨𑍍𑌨𑌿𑌰𑌸𑍍𑌤𑌂
𑌪𑍁𑌨𑌰𑍍𑌨 𑌸𑌂𑌧𑌤𑍍𑌤 𑌇𑌦𑌂 𑌮𑌹𑌾𑌤𑍍𑌮𑌾 ॥ 413॥

𑌸𑌤𑌤𑌵𑌿𑌮𑌲𑌬𑍋𑌧𑌾𑌨𑌂𑌦𑌰𑍂𑌪𑌂 𑌸𑌮𑍇𑌤𑍍𑌯 (𑌪𑌾𑌠𑌭𑍇𑌦𑌃 – 𑌸𑍍𑌵𑌮𑍇𑌤𑍍𑌯)
𑌤𑍍𑌯𑌜 𑌜𑌡𑌮𑌲𑌰𑍂𑌪𑍋𑌪𑌾𑌧𑌿𑌮𑍇𑌤𑌂 𑌸𑍁𑌦𑍂𑌰𑍇 ।
𑌅𑌥 𑌪𑍁𑌨𑌰𑌪𑌿 𑌨𑍈𑌷 𑌸𑍍𑌮𑌰𑍍𑌯𑌤𑌾𑌂 𑌵𑌾𑌂𑌤𑌵𑌸𑍍𑌤𑍁 (𑌪𑌾𑌠𑌭𑍇𑌦𑌃 – 𑌪𑍁𑌨𑌰𑌪𑌿 𑌨𑍈𑌵)
𑌸𑍍𑌮𑌰𑌣𑌵𑌿𑌷𑌯𑌭𑍂𑌤𑌂 𑌕𑌲𑍍𑌪𑌤𑍇 𑌕𑍁𑌤𑍍𑌸𑌨𑌾𑌯 ॥ 414॥

𑌸𑌮𑍂𑌲𑌮𑍇𑌤𑌤𑍍𑌪𑌰𑌿𑌦𑌾𑌹𑍍𑌯 𑌵𑌹𑍍𑌨𑍌 (𑌪𑌾𑌠𑌭𑍇𑌦𑌃 – 𑌪𑌰𑌿𑌦𑌹𑍍𑌯)
𑌸𑌦𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌨𑌿𑌰𑍍𑌵𑌿𑌕𑌲𑍍𑌪𑍇 ।
𑌤𑌤𑌃 𑌸𑍍𑌵𑌯𑌂 𑌨𑌿𑌤𑍍𑌯𑌵𑌿𑌶𑍁𑌦𑍍𑌧𑌬𑍋𑌧𑌾-
𑌨𑌂𑌦𑌾𑌤𑍍𑌮𑌨𑌾 𑌤𑌿𑌷𑍍𑌠𑌤𑌿 𑌵𑌿𑌦𑍍𑌵𑌰𑌿𑌷𑍍𑌠𑌃 ॥ 415॥

𑌪𑍍𑌰𑌾𑌰𑌬𑍍𑌧𑌸𑍂𑌤𑍍𑌰𑌗𑍍𑌰𑌥𑌿𑌤𑌂 𑌶𑌰𑍀𑌰𑌂
𑌪𑍍𑌰𑌯𑌾𑌤𑍁 𑌵𑌾 𑌤𑌿𑌷𑍍𑌠𑌤𑍁 𑌗𑍋𑌰𑌿𑌵 𑌸𑍍𑌰𑌕𑍍 ।
𑌨 𑌤𑌤𑍍𑌪𑍁𑌨𑌃 𑌪𑌶𑍍𑌯𑌤𑌿 𑌤𑌤𑍍𑌤𑍍𑌵𑌵𑍇𑌤𑍍𑌤𑌾-
𑌽𑌽𑌨𑌂𑌦𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌲𑍀𑌨𑌵𑍃𑌤𑍍𑌤𑌿𑌃 ॥ 416॥

𑌅𑌖𑌂𑌡𑌾𑌨𑌂𑌦𑌮𑌾𑌤𑍍𑌮𑌾𑌨𑌂 𑌵𑌿𑌜𑍍𑌞𑌾𑌯 𑌸𑍍𑌵𑌸𑍍𑌵𑌰𑍂𑌪𑌤𑌃 ।
𑌕𑌿𑌮𑌿𑌚𑍍𑌛𑌨𑍍 𑌕𑌸𑍍𑌯 𑌵𑌾 𑌹𑍇𑌤𑍋𑌰𑍍𑌦𑍇𑌹𑌂 𑌪𑍁𑌷𑍍𑌣𑌾𑌤𑌿 𑌤𑌤𑍍𑌤𑍍𑌵𑌵𑌿𑌤𑍍 ॥ 41𑍭॥

𑌸𑌂𑌸𑌿𑌦𑍍𑌧𑌸𑍍𑌯 𑌫𑌲𑌂 𑌤𑍍𑌵𑍇𑌤𑌜𑍍𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌯𑍋𑌗𑌿𑌨𑌃 ।
𑌬𑌹𑌿𑌰𑌂𑌤𑌃 𑌸𑌦𑌾𑌨𑌂𑌦𑌰𑌸𑌾𑌸𑍍𑌵𑌾𑌦𑌨𑌮𑌾𑌤𑍍𑌮𑌨𑌿 ॥ 41𑍮॥

𑌵𑍈𑌰𑌾𑌗𑍍𑌯𑌸𑍍𑌯 𑌫𑌲𑌂 𑌬𑍋𑌧𑍋 𑌬𑍋𑌧𑌸𑍍𑌯𑍋𑌪𑌰𑌤𑌿𑌃 𑌫𑌲𑌮𑍍 ।
𑌸𑍍𑌵𑌾𑌨𑌂𑌦𑌾𑌨𑍁𑌭𑌵𑌾𑌚𑍍𑌛𑌾𑌂𑌤𑌿𑌰𑍇𑌷𑍈𑌵𑍋𑌪𑌰𑌤𑍇𑌃 𑌫𑌲𑌮𑍍 ॥ 41𑍯॥

𑌯𑌦𑍍𑌯𑍁𑌤𑍍𑌤𑌰𑍋𑌤𑍍𑌤𑌰𑌾𑌭𑌾𑌵𑌃 𑌪𑍂𑌰𑍍𑌵𑌪𑍂𑌰𑍍𑌵𑌂𑌤𑍁 𑌨𑌿𑌷𑍍𑌫𑌲𑌮𑍍 ।
𑌨𑌿𑌵𑍃𑌤𑍍𑌤𑌿𑌃 𑌪𑌰𑌮𑌾 𑌤𑍃𑌪𑍍𑌤𑌿𑌰𑌾𑌨𑌂𑌦𑍋𑌽𑌨𑍁𑌪𑌮𑌃 𑌸𑍍𑌵𑌤𑌃 ॥ 420॥

𑌦𑍃𑌷𑍍𑌟𑌦𑍁𑌃𑌖𑍇𑌷𑍍𑌵𑌨𑍁𑌦𑍍𑌵𑍇𑌗𑍋 𑌵𑌿𑌦𑍍𑌯𑌾𑌯𑌾𑌃 𑌪𑍍𑌰𑌸𑍍𑌤𑍁𑌤𑌂 𑌫𑌲𑌮𑍍 ।
𑌯𑌤𑍍𑌕𑍃𑌤𑌂 𑌭𑍍𑌰𑌾𑌂𑌤𑌿𑌵𑍇𑌲𑌾𑌯𑌾𑌂 𑌨𑌾𑌨𑌾 𑌕𑌰𑍍𑌮 𑌜𑍁𑌗𑍁𑌪𑍍𑌸𑌿𑌤𑌮𑍍 ।
𑌪𑌶𑍍𑌚𑌾𑌨𑍍𑌨𑌰𑍋 𑌵𑌿𑌵𑍇𑌕𑍇𑌨 𑌤𑌤𑍍𑌕𑌥𑌂 𑌕𑌰𑍍𑌤𑍁𑌮𑌰𑍍𑌹𑌤𑌿 ॥ 421॥

𑌵𑌿𑌦𑍍𑌯𑌾𑌫𑌲𑌂 𑌸𑍍𑌯𑌾𑌦𑌸𑌤𑍋 𑌨𑌿𑌵𑍃𑌤𑍍𑌤𑌿𑌃
𑌪𑍍𑌰𑌵𑍃𑌤𑍍𑌤𑌿𑌰𑌜𑍍𑌞𑌾𑌨𑌫𑌲𑌂 𑌤𑌦𑍀𑌕𑍍𑌷𑌿𑌤𑌮𑍍 ।
𑌤𑌜𑍍𑌜𑍍𑌞𑌾𑌜𑍍𑌞𑌯𑍋𑌰𑍍𑌯𑌨𑍍𑌮𑍃𑌗𑌤𑍃𑌷𑍍𑌣𑌿𑌕𑌾𑌦𑍌
𑌨𑍋𑌚𑍇𑌦𑍍𑌵𑌿𑌦𑌾𑌂 𑌦𑍃𑌷𑍍𑌟𑌫𑌲𑌂 𑌕𑌿𑌮𑌸𑍍𑌮𑌾𑌤𑍍 ॥ 422॥ (𑌪𑌾𑌠𑌭𑍇𑌦𑌃 – 𑌨𑍋𑌚𑍇𑌦𑍍𑌵𑌿𑌦𑍋)

𑌅𑌜𑍍𑌞𑌾𑌨𑌹𑍃𑌦𑌯𑌗𑍍𑌰𑌂𑌥𑍇𑌰𑍍𑌵𑌿𑌨𑌾𑌶𑍋 𑌯𑌦𑍍𑌯𑌶𑍇𑌷𑌤𑌃 ।
𑌅𑌨𑌿𑌚𑍍𑌛𑍋𑌰𑍍𑌵𑌿𑌷𑌯𑌃 𑌕𑌿𑌂 𑌨𑍁 𑌪𑍍𑌰𑌵𑍃𑌤𑍍𑌤𑍇𑌃 𑌕𑌾𑌰𑌣𑌂 𑌸𑍍𑌵𑌤𑌃 ॥ 423॥ (𑌪𑌾𑌠𑌭𑍇𑌦𑌃 – 𑌵𑌿𑌦𑍁𑌷𑌃 𑌕𑌿𑌂)

𑌵𑌾𑌸𑌨𑌾𑌨𑍁𑌦𑌯𑍋 𑌭𑍋𑌗𑍍𑌯𑍇 𑌵𑍈𑌰𑌾𑌗𑍍𑌯𑌸𑍍𑌯 𑌤𑌦𑌾𑌵𑌧𑌿𑌃 ।
𑌅𑌹𑌂𑌭𑌾𑌵𑍋𑌦𑌯𑌾𑌭𑌾𑌵𑍋 𑌬𑍋𑌧𑌸𑍍𑌯 𑌪𑌰𑌮𑌾𑌵𑌧𑌿𑌃 ।
𑌲𑍀𑌨𑌵𑍃𑌤𑍍𑌤𑍈𑌰𑌨𑍁𑌤𑍍𑌪𑌤𑍍𑌤𑌿𑌰𑍍𑌮𑌰𑍍𑌯𑌾𑌦𑍋𑌪𑌰𑌤𑍇𑌸𑍍𑌤𑍁 𑌸𑌾 ॥ 424॥ (𑌪𑌾𑌠𑌭𑍇𑌦𑌃 – 𑌵𑍃𑌤𑍍𑌤𑍇𑌰)

𑌬𑍍𑌰𑌹𑍍𑌮𑌾𑌕𑌾𑌰𑌤𑌯𑌾 𑌸𑌦𑌾 𑌸𑍍𑌥𑌿𑌤𑌤𑌯𑌾 𑌨𑌿𑌰𑍍𑌮𑍁𑌕𑍍𑌤𑌬𑌾𑌹𑍍𑌯𑌾𑌰𑍍𑌥𑌧𑍀-
𑌰𑌨𑍍𑌯𑌾𑌵𑍇𑌦𑌿𑌤𑌭𑍋𑌗𑍍𑌯𑌭𑍋𑌗𑌕𑌲𑌨𑍋 𑌨𑌿𑌦𑍍𑌰𑌾𑌲𑍁𑌵𑌦𑍍𑌬𑌾𑌲𑌵𑌤𑍍 ।
𑌸𑍍𑌵𑌪𑍍𑌨𑌾𑌲𑍋𑌕𑌿𑌤𑌲𑍋𑌕𑌵𑌜𑍍𑌜𑌗𑌦𑌿𑌦𑌂 𑌪𑌶𑍍𑌯𑌨𑍍𑌕𑍍𑌵𑌚𑌿𑌲𑍍𑌲𑌬𑍍𑌧𑌧𑍀-
𑌰𑌾𑌸𑍍𑌤𑍇 𑌕𑌶𑍍𑌚𑌿𑌦𑌨𑌂𑌤𑌪𑍁𑌣𑍍𑌯𑌫𑌲𑌭𑍁𑌗𑍍𑌧𑌨𑍍𑌯𑌃 𑌸 𑌮𑌾𑌨𑍍𑌯𑍋 𑌭𑍁𑌵𑌿 ॥ 425॥

𑌸𑍍𑌥𑌿𑌤𑌪𑍍𑌰𑌜𑍍𑌞𑍋 𑌯𑌤𑌿𑌰𑌯𑌂 𑌯𑌃 𑌸𑌦𑌾𑌨𑌂𑌦𑌮𑌶𑍍𑌨𑍁𑌤𑍇 ।
𑌬𑍍𑌰𑌹𑍍𑌮𑌣𑍍𑌯𑍇𑌵 𑌵𑌿𑌲𑍀𑌨𑌾𑌤𑍍𑌮𑌾 𑌨𑌿𑌰𑍍𑌵𑌿𑌕𑌾𑌰𑍋 𑌵𑌿𑌨𑌿𑌷𑍍𑌕𑍍𑌰𑌿𑌯𑌃 ॥ 426॥

𑌬𑍍𑌰𑌹𑍍𑌮𑌾𑌤𑍍𑌮𑌨𑍋𑌃 𑌶𑍋𑌧𑌿𑌤𑌯𑍋𑌰𑍇𑌕𑌭𑌾𑌵𑌾𑌵𑌗𑌾𑌹𑌿𑌨𑍀 ।
𑌨𑌿𑌰𑍍𑌵𑌿𑌕𑌲𑍍𑌪𑌾 𑌚 𑌚𑌿𑌨𑍍𑌮𑌾𑌤𑍍𑌰𑌾 𑌵𑍃𑌤𑍍𑌤𑌿𑌃 𑌪𑍍𑌰𑌜𑍍𑌞𑍇𑌤𑌿 𑌕𑌥𑍍𑌯𑌤𑍇 ।
𑌸𑍁𑌸𑍍𑌥𑌿𑌤𑌾𑌽𑌸𑍌 𑌭𑌵𑍇𑌦𑍍𑌯𑌸𑍍𑌯 𑌸𑍍𑌥𑌿𑌤𑌪𑍍𑌰𑌜𑍍𑌞𑌃 𑌸 𑌉𑌚𑍍𑌯𑌤𑍇 ॥ 42𑍭॥

𑌯𑌸𑍍𑌯 𑌸𑍍𑌥𑌿𑌤𑌾 𑌭𑌵𑍇𑌤𑍍𑌪𑍍𑌰𑌜𑍍𑌞𑌾 𑌯𑌸𑍍𑌯𑌾𑌨𑌂𑌦𑍋 𑌨𑌿𑌰𑌂𑌤𑌰𑌃 ।
𑌪𑍍𑌰𑌪𑌂𑌚𑍋 𑌵𑌿𑌸𑍍𑌮𑍃𑌤𑌪𑍍𑌰𑌾𑌯𑌃 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇 ॥ 42𑍮॥

𑌲𑍀𑌨𑌧𑍀𑌰𑌪𑌿 𑌜𑌾𑌗𑌰𑍍𑌤𑌿 𑌜𑌾𑌗𑍍𑌰𑌦𑍍𑌧𑌰𑍍𑌮𑌵𑌿𑌵𑌰𑍍𑌜𑌿𑌤𑌃 ।
𑌬𑍋𑌧𑍋 𑌨𑌿𑌰𑍍𑌵𑌾𑌸𑌨𑍋 𑌯𑌸𑍍𑌯 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇 ॥ 42𑍯॥

𑌶𑌾𑌂𑌤𑌸𑌂𑌸𑌾𑌰𑌕𑌲𑌨𑌃 𑌕𑌲𑌾𑌵𑌾𑌨𑌪𑌿 𑌨𑌿𑌷𑍍𑌕𑌲𑌃 ।
𑌯𑌸𑍍𑌯 𑌚𑌿𑌤𑍍𑌤𑌂 𑌵𑌿𑌨𑌿𑌶𑍍𑌚𑌿𑌂𑌤𑌂 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇 ॥ 430॥ (𑌪𑌾𑌠𑌭𑍇𑌦𑌃 – 𑌯𑌃 𑌸𑌚𑌿𑌤𑍍𑌤𑍋𑌽𑌪𑌿 𑌨𑌿𑌶𑍍𑌚𑌿𑌤𑍍𑌤𑌃)

𑌵𑌰𑍍𑌤𑌮𑌾𑌨𑍇𑌽𑌪𑌿 𑌦𑍇𑌹𑍇𑌽𑌸𑍍𑌮𑌿𑌂𑌛𑌾𑌯𑌾𑌵𑌦𑌨𑍁𑌵𑌰𑍍𑌤𑌿𑌨𑌿 ।
𑌅𑌹𑌂𑌤𑌾𑌮𑌮𑌤𑌾𑌽𑌭𑌾𑌵𑍋 𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌮𑍍 ॥ 431॥

𑌅𑌤𑍀𑌤𑌾𑌨𑌨𑍁𑌸𑌂𑌧𑌾𑌨𑌂 𑌭𑌵𑌿𑌷𑍍𑌯𑌦𑌵𑌿𑌚𑌾𑌰𑌣𑌮𑍍 ।
𑌔𑌦𑌾𑌸𑍀𑌨𑍍𑌯𑌮𑌪𑌿 𑌪𑍍𑌰𑌾𑌪𑍍𑌤𑌂 𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌮𑍍 ॥ 432॥ (𑌪𑌾𑌠𑌭𑍇𑌦𑌃 – 𑌪𑍍𑌰𑌾𑌪𑍍𑌤𑍇)

𑌗𑍁𑌣𑌦𑍋𑌷𑌵𑌿𑌶𑌿𑌷𑍍𑌟𑍇𑌽𑌸𑍍𑌮𑌿𑌨𑍍𑌸𑍍𑌵𑌭𑌾𑌵𑍇𑌨 𑌵𑌿𑌲𑌕𑍍𑌷𑌣𑍇 ।
𑌸𑌰𑍍𑌵𑌤𑍍𑌰 𑌸𑌮𑌦𑌰𑍍𑌶𑌿𑌤𑍍𑌵𑌂 𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌮𑍍 ॥ 433॥

𑌇𑌷𑍍𑌟𑌾𑌨𑌿𑌷𑍍𑌟𑌾𑌰𑍍𑌥𑌸𑌂𑌪𑍍𑌰𑌾𑌪𑍍𑌤𑍌 𑌸𑌮𑌦𑌰𑍍𑌶𑌿𑌤𑌯𑌾𑌽𑌽𑌤𑍍𑌮𑌨𑌿 ।
𑌉𑌭𑌯𑌤𑍍𑌰𑌾𑌵𑌿𑌕𑌾𑌰𑌿𑌤𑍍𑌵𑌂 𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌮𑍍 ॥ 434॥

𑌬𑍍𑌰𑌹𑍍𑌮𑌾𑌨𑌂𑌦𑌰𑌸𑌾𑌸𑍍𑌵𑌾𑌦𑌾𑌸𑌕𑍍𑌤𑌚𑌿𑌤𑍍𑌤𑌤𑌯𑌾 𑌯𑌤𑍇𑌃 ।
𑌅𑌂𑌤𑌰𑍍𑌬𑌹𑌿𑌰𑌵𑌿𑌜𑍍𑌞𑌾𑌨𑌂 𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌮𑍍 ॥ 435॥

𑌦𑍇𑌹𑍇𑌂𑌦𑍍𑌰𑌿𑌯𑌾𑌦𑍌 𑌕𑌰𑍍𑌤𑌵𑍍𑌯𑍇 𑌮𑌮𑌾𑌹𑌂𑌭𑌾𑌵𑌵𑌰𑍍𑌜𑌿𑌤𑌃 ।
𑌔𑌦𑌾𑌸𑍀𑌨𑍍𑌯𑍇𑌨 𑌯𑌸𑍍𑌤𑌿𑌷𑍍𑌠𑍇𑌤𑍍𑌸 𑌜𑍀𑌵𑌨𑍍𑌮𑍁𑌕𑍍𑌤𑌲𑌕𑍍𑌷𑌣𑌃 ॥ 436॥ (𑌪𑌾𑌠𑌭𑍇𑌦𑌃 – 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇)

𑌵𑌿𑌜𑍍𑌞𑌾𑌤 𑌆𑌤𑍍𑌮𑌨𑍋 𑌯𑌸𑍍𑌯 𑌬𑍍𑌰𑌹𑍍𑌮𑌭𑌾𑌵𑌃 𑌶𑍍𑌰𑍁𑌤𑍇𑌰𑍍𑌬𑌲𑌾𑌤𑍍 ।
𑌭𑌵𑌬𑌂𑌧𑌵𑌿𑌨𑌿𑌰𑍍𑌮𑍁𑌕𑍍𑌤𑌃 𑌸 𑌜𑍀𑌵𑌨𑍍𑌮𑍁𑌕𑍍𑌤𑌲𑌕𑍍𑌷𑌣𑌃 ॥ 43𑍭॥ (𑌪𑌾𑌠𑌭𑍇𑌦𑌃 – 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇)

𑌦𑍇𑌹𑍇𑌂𑌦𑍍𑌰𑌿𑌯𑍇𑌷𑍍𑌵𑌹𑌂𑌭𑌾𑌵 𑌇𑌦𑌂𑌭𑌾𑌵𑌸𑍍𑌤𑌦𑌨𑍍𑌯𑌕𑍇 ।
𑌯𑌸𑍍𑌯 𑌨𑍋 𑌭𑌵𑌤𑌃 𑌕𑍍𑌵𑌾𑌪𑌿 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇 ॥ 43𑍮॥

𑌜𑍀𑌵𑍇𑌶𑍋𑌭𑌯𑌸𑌂𑌸𑌾𑌰𑌰𑍂𑌪𑌦𑍁𑌰𑍍𑌵𑌾𑌸𑌨𑍋𑌜𑍍𑌝𑌿𑌤𑌾 ।
𑌸𑌾 𑌸𑌰𑍍𑌵𑌦𑌾 𑌭𑌵𑍇𑌦𑍍𑌯𑌸𑍍𑌯 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇 ॥

𑌨 𑌪𑍍𑌰𑌤𑍍𑌯𑌗𑍍𑌬𑍍𑌰𑌹𑍍𑌮𑌣𑍋𑌰𑍍𑌭𑍇𑌦𑌂 𑌕𑌦𑌾𑌪𑌿 𑌬𑍍𑌰𑌹𑍍𑌮𑌸𑌰𑍍𑌗𑌯𑍋𑌃 ।
𑌪𑍍𑌰𑌜𑍍𑌞𑌯𑌾 𑌯𑍋 𑌵𑌿𑌜𑌾𑌨𑌿𑌤𑌿 𑌸 𑌜𑍀𑌵𑌨𑍍𑌮𑍁𑌕𑍍𑌤𑌲𑌕𑍍𑌷𑌣𑌃 ॥ 43𑍯॥ (𑌪𑌾𑌠𑌭𑍇𑌦𑌃 – 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇)
𑌸𑌾𑌧𑍁𑌭𑌿𑌃 𑌪𑍂𑌜𑍍𑌯𑌮𑌾𑌨𑍇𑌽𑌸𑍍𑌮𑌿𑌨𑍍𑌪𑍀𑌡𑍍𑌯𑌮𑌾𑌨𑍇𑌽𑌪𑌿 𑌦𑍁𑌰𑍍𑌜𑌨𑍈𑌃 ।
𑌸𑌮𑌭𑌾𑌵𑍋 𑌭𑌵𑍇𑌦𑍍𑌯𑌸𑍍𑌯 𑌸 𑌜𑍀𑌵𑌨𑍍𑌮𑍁𑌕𑍍𑌤𑌲𑌕𑍍𑌷𑌣𑌃 ॥ 440॥ (𑌪𑌾𑌠𑌭𑍇𑌦𑌃 – 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇)

𑌯𑌤𑍍𑌰 𑌪𑍍𑌰𑌵𑌿𑌷𑍍𑌟𑌾 𑌵𑌿𑌷𑌯𑌾𑌃 𑌪𑌰𑍇𑌰𑌿𑌤𑌾
𑌨𑌦𑍀𑌪𑍍𑌰𑌵𑌾𑌹𑌾 𑌇𑌵 𑌵𑌾𑌰𑌿𑌰𑌾𑌶𑍌 ।
𑌲𑌿𑌨𑌂𑌤𑌿 𑌸𑌨𑍍𑌮𑌾𑌤𑍍𑌰𑌤𑌯𑌾 𑌨 𑌵𑌿𑌕𑍍𑌰𑌿𑌯𑌾𑌂
𑌉𑌤𑍍𑌪𑌾𑌦𑌯𑌂𑌤𑍍𑌯𑍇𑌷 𑌯𑌤𑌿𑌰𑍍𑌵𑌿𑌮𑍁𑌕𑍍𑌤𑌃 ॥ 441॥

𑌵𑌿𑌜𑍍𑌞𑌾𑌤𑌬𑍍𑌰𑌹𑍍𑌮𑌤𑌤𑍍𑌤𑍍𑌵𑌸𑍍𑌯 𑌯𑌥𑌾𑌪𑍂𑌰𑍍𑌵𑌂 𑌨 𑌸𑌂𑌸𑍃𑌤𑌿𑌃 ।
𑌅𑌸𑍍𑌤𑌿 𑌚𑍇𑌨𑍍𑌨 𑌸 𑌵𑌿𑌜𑍍𑌞𑌾𑌤𑌬𑍍𑌰𑌹𑍍𑌮𑌭𑌾𑌵𑍋 𑌬𑌹𑌿𑌰𑍍𑌮𑍁𑌖𑌃 ॥ 442॥

𑌪𑍍𑌰𑌾𑌚𑍀𑌨𑌵𑌾𑌸𑌨𑌾𑌵𑍇𑌗𑌾𑌦𑌸𑍌 𑌸𑌂𑌸𑌰𑌤𑍀𑌤𑌿 𑌚𑍇𑌤𑍍 ।
𑌨 𑌸𑌦𑍇𑌕𑌤𑍍𑌵𑌵𑌿𑌜𑍍𑌞𑌾𑌨𑌾𑌨𑍍𑌮𑌂𑌦𑍀 𑌭𑌵𑌤𑌿 𑌵𑌾𑌸𑌨𑌾 ॥ 443॥

𑌅𑌤𑍍𑌯𑌂𑌤𑌕𑌾𑌮𑍁𑌕𑌸𑍍𑌯𑌾𑌪𑌿 𑌵𑍃𑌤𑍍𑌤𑌿𑌃 𑌕𑍁𑌂𑌠𑌤𑌿 𑌮𑌾𑌤𑌰𑌿 ।
𑌤𑌥𑍈𑌵 𑌬𑍍𑌰𑌹𑍍𑌮𑌣𑌿 𑌜𑍍𑌞𑌾𑌤𑍇 𑌪𑍂𑌰𑍍𑌣𑌾𑌨𑌂𑌦𑍇 𑌮𑌨𑍀𑌷𑌿𑌣𑌃 ॥ 444॥

𑌨𑌿𑌦𑌿𑌧𑍍𑌯𑌾𑌸𑌨𑌶𑍀𑌲𑌸𑍍𑌯 𑌬𑌾𑌹𑍍𑌯𑌪𑍍𑌰𑌤𑍍𑌯𑌯 𑌈𑌕𑍍𑌷𑍍𑌯𑌤𑍇 ।
𑌬𑍍𑌰𑌵𑍀𑌤𑌿 𑌶𑍍𑌰𑍁𑌤𑌿𑌰𑍇𑌤𑌸𑍍𑌯 𑌪𑍍𑌰𑌾𑌰𑌬𑍍𑌧𑌂 𑌫𑌲𑌦𑌰𑍍𑌶𑌨𑌾𑌤𑍍 ॥ 445॥

𑌸𑍁𑌖𑌾𑌦𑍍𑌯𑌨𑍁𑌭𑌵𑍋 𑌯𑌾𑌵𑌤𑍍𑌤𑌾𑌵𑌤𑍍𑌪𑍍𑌰𑌾𑌰𑌬𑍍𑌧𑌮𑌿𑌷𑍍𑌯𑌤𑍇 ।
𑌫𑌲𑍋𑌦𑌯𑌃 𑌕𑍍𑌰𑌿𑌯𑌾𑌪𑍂𑌰𑍍𑌵𑍋 𑌨𑌿𑌷𑍍𑌕𑍍𑌰𑌿𑌯𑍋 𑌨 𑌹𑌿 𑌕𑍁𑌤𑍍𑌰𑌚𑌿𑌤𑍍 ॥ 446॥

𑌅𑌹𑌂 𑌬𑍍𑌰𑌹𑍍𑌮𑍇𑌤𑌿 𑌵𑌿𑌜𑍍𑌞𑌾𑌨𑌾𑌤𑍍𑌕𑌲𑍍𑌪𑌕𑍋𑌟𑌿𑌶𑌤𑌾𑌰𑍍𑌜𑌿𑌤𑌮𑍍 ।
𑌸𑌂𑌚𑌿𑌤𑌂 𑌵𑌿𑌲𑌯𑌂 𑌯𑌾𑌤𑌿 𑌪𑍍𑌰𑌬𑍋𑌧𑌾𑌤𑍍𑌸𑍍𑌵𑌪𑍍𑌨𑌕𑌰𑍍𑌮𑌵𑌤𑍍 ॥ 44𑍭॥

𑌯𑌤𑍍𑌕𑍃𑌤𑌂 𑌸𑍍𑌵𑌪𑍍𑌨𑌵𑍇𑌲𑌾𑌯𑌾𑌂 𑌪𑍁𑌣𑍍𑌯𑌂 𑌵𑌾 𑌪𑌾𑌪𑌮𑍁𑌲𑍍𑌬𑌣𑌮𑍍 ।
𑌸𑍁𑌪𑍍𑌤𑍋𑌤𑍍𑌥𑌿𑌤𑌸𑍍𑌯 𑌕𑌿𑌂𑌤𑌤𑍍𑌸𑍍𑌯𑌾𑌤𑍍𑌸𑍍𑌵𑌰𑍍𑌗𑌾𑌯 𑌨𑌰𑌕𑌾𑌯 𑌵𑌾 ॥ 44𑍮॥

𑌸𑍍𑌵𑌮𑌸𑌂𑌗𑌮𑍁𑌦𑌾𑌸𑍀𑌨𑌂 𑌪𑌰𑌿𑌜𑍍𑌞𑌾𑌯 𑌨𑌭𑍋 𑌯𑌥𑌾 ।
𑌨 𑌶𑍍𑌲𑌿𑌷𑍍𑌯𑌤𑌿 𑌚 𑌯𑌤𑍍𑌕𑌿𑌂𑌚𑌿𑌤𑍍𑌕𑌦𑌾𑌚𑌿𑌦𑍍𑌭𑌾𑌵𑌿𑌕𑌰𑍍𑌮𑌭𑌿𑌃 ॥ 44𑍯॥ (𑌪𑌾𑌠𑌭𑍇𑌦𑌃 – 𑌶𑍍𑌲𑌿𑌷𑍍𑌯𑌤𑍇 𑌯𑌤𑌿𑌃 𑌕𑌿𑌂𑌚𑌿𑌤𑍍)

𑌨 𑌨𑌭𑍋 𑌘𑌟𑌯𑍋𑌗𑍇𑌨 𑌸𑍁𑌰𑌾𑌗𑌂𑌧𑍇𑌨 𑌲𑌿𑌪𑍍𑌯𑌤𑍇 ।
𑌤𑌥𑌾𑌤𑍍𑌮𑍋𑌪𑌾𑌧𑌿𑌯𑍋𑌗𑍇𑌨 𑌤𑌦𑍍𑌧𑌰𑍍𑌮𑍈𑌰𑍍𑌨𑍈𑌵 𑌲𑌿𑌪𑍍𑌯𑌤𑍇 ॥ 450॥

𑌜𑍍𑌞𑌾𑌨𑍋𑌦𑌯𑌾𑌤𑍍𑌪𑍁𑌰𑌾𑌰𑌬𑍍𑌧𑌂 𑌕𑌰𑍍𑌮𑌜𑍍𑌞𑌾𑌨𑌾𑌨𑍍𑌨 𑌨𑌶𑍍𑌯𑌤𑌿 ।
𑌅𑌦𑌤𑍍𑌵𑌾 𑌸𑍍𑌵𑌫𑌲𑌂 𑌲𑌕𑍍𑌷𑍍𑌯𑌮𑍁𑌦𑍍𑌦𑌿𑌶𑍍𑌯𑍋𑌤𑍍𑌸𑍃𑌷𑍍𑌟𑌬𑌾𑌣𑌵𑌤𑍍 ॥ 451॥

𑌵𑍍𑌯𑌾𑌘𑍍𑌰𑌬𑍁𑌦𑍍𑌧𑍍𑌯𑌾 𑌵𑌿𑌨𑌿𑌰𑍍𑌮𑍁𑌕𑍍𑌤𑍋 𑌬𑌾𑌣𑌃 𑌪𑌶𑍍𑌚𑌾𑌤𑍍𑌤𑍁 𑌗𑍋𑌮𑌤𑍌 ।
𑌨 𑌤𑌿𑌷𑍍𑌠𑌤𑌿 𑌛𑌿𑌨𑌤𑍍𑌯𑍇𑌵 𑌲𑌕𑍍𑌷𑍍𑌯𑌂 𑌵𑍇𑌗𑍇𑌨 𑌨𑌿𑌰𑍍𑌭𑌰𑌮𑍍 ॥ 452॥

𑌪𑍍𑌰𑌾𑌰𑌬𑍍𑌧𑌂 𑌬𑌲𑌵𑌤𑍍𑌤𑌰𑌂 𑌖𑌲𑍁 𑌵𑌿𑌦𑌾𑌂 𑌭𑍋𑌗𑍇𑌨 𑌤𑌸𑍍𑌯 𑌕𑍍𑌷𑌯𑌃
𑌸𑌮𑍍𑌯𑌗𑍍𑌜𑍍𑌞𑌾𑌨𑌹𑍁𑌤𑌾𑌶𑌨𑍇𑌨 𑌵𑌿𑌲𑌯𑌃 𑌪𑍍𑌰𑌾𑌕𑍍𑌸𑌂𑌚𑌿𑌤𑌾𑌗𑌾𑌮𑌿𑌨𑌾𑌮𑍍 ।
𑌬𑍍𑌰𑌹𑍍𑌮𑌾𑌤𑍍𑌮𑍈𑌕𑍍𑌯𑌮𑌵𑍇𑌕𑍍𑌷𑍍𑌯 𑌤𑌨𑍍𑌮𑌯𑌤𑌯𑌾 𑌯𑍇 𑌸𑌰𑍍𑌵𑌦𑌾 𑌸𑌂𑌸𑍍𑌥𑌿𑌤𑌾𑌃
𑌤𑍇𑌷𑌾𑌂 𑌤𑌤𑍍𑌤𑍍𑌰𑌿𑌤𑌯𑌂 𑌨𑌹𑌿 𑌕𑍍𑌵𑌚𑌿𑌦𑌪𑌿 𑌬𑍍𑌰𑌹𑍍𑌮𑍈𑌵 𑌤𑍇 𑌨𑌿𑌰𑍍𑌗𑍁𑌣𑌮𑍍 ॥ 453॥

𑌉𑌪𑌾𑌧𑌿𑌤𑌾𑌦𑌾𑌤𑍍𑌮𑍍𑌯𑌵𑌿𑌹𑍀𑌨𑌕𑍇𑌵𑌲-
𑌬𑍍𑌰𑌹𑍍𑌮𑌾𑌤𑍍𑌮𑌨𑍈𑌵𑌾𑌤𑍍𑌮𑌨𑌿 𑌤𑌿𑌷𑍍𑌠𑌤𑍋 𑌮𑍁𑌨𑍇𑌃 ।
𑌪𑍍𑌰𑌾𑌰𑌬𑍍𑌧𑌸𑌦𑍍𑌭𑌾𑌵𑌕𑌥𑌾 𑌨 𑌯𑍁𑌕𑍍𑌤𑌾
𑌸𑍍𑌵𑌪𑍍𑌨𑌾𑌰𑍍𑌥𑌸𑌂𑌬𑌂𑌧𑌕𑌥𑍇𑌵 𑌜𑌾𑌗𑍍𑌰𑌤𑌃 ॥ 454॥

𑌨 𑌹𑌿 𑌪𑍍𑌰𑌬𑍁𑌦𑍍𑌧𑌃 𑌪𑍍𑌰𑌤𑌿𑌭𑌾𑌸𑌦𑍇𑌹𑍇
𑌦𑍇𑌹𑍋𑌪𑌯𑍋𑌗𑌿𑌨𑍍𑌯𑌪𑌿 𑌚 𑌪𑍍𑌰𑌪𑌂𑌚𑍇 ।
𑌕𑌰𑍋𑌤𑍍𑌯𑌹𑌂𑌤𑌾𑌂 𑌮𑌮𑌤𑌾𑌮𑌿𑌦𑌂𑌤𑌾𑌂
𑌕𑌿𑌂𑌤𑍁 𑌸𑍍𑌵𑌯𑌂 𑌤𑌿𑌷𑍍𑌠𑌤𑌿 𑌜𑌾𑌗𑌰𑍇𑌣 ॥ 455॥

𑌨 𑌤𑌸𑍍𑌯 𑌮𑌿𑌥𑍍𑌯𑌾𑌰𑍍𑌥𑌸𑌮𑌰𑍍𑌥𑌨𑍇𑌚𑍍𑌛𑌾
𑌨 𑌸𑌂𑌗𑍍𑌰𑌹𑌸𑍍𑌤𑌜𑍍𑌜𑌗𑌤𑍋𑌽𑌪𑌿 𑌦𑍃𑌷𑍍𑌟𑌃 ।
𑌤𑌤𑍍𑌰𑌾𑌨𑍁𑌵𑍃𑌤𑍍𑌤𑌿𑌰𑍍𑌯𑌦𑌿 𑌚𑍇𑌨𑍍𑌮𑍃𑌷𑌾𑌰𑍍𑌥𑍇
𑌨 𑌨𑌿𑌦𑍍𑌰𑌯𑌾 𑌮𑍁𑌕𑍍𑌤 𑌇𑌤𑍀𑌷𑍍𑌯𑌤𑍇 𑌧𑍍𑌰𑍁𑌵𑌮𑍍 ॥ 456॥

𑌤𑌦𑍍𑌵𑌤𑍍𑌪𑌰𑍇 𑌬𑍍𑌰𑌹𑍍𑌮𑌣𑌿 𑌵𑌰𑍍𑌤𑌮𑌾𑌨𑌃
𑌸𑌦𑌾𑌤𑍍𑌮𑌨𑌾 𑌤𑌿𑌷𑍍𑌠𑌤𑌿 𑌨𑌾𑌨𑍍𑌯𑌦𑍀𑌕𑍍𑌷𑌤𑍇 ।
𑌸𑍍𑌮𑍃𑌤𑌿𑌰𑍍𑌯𑌥𑌾 𑌸𑍍𑌵𑌪𑍍𑌨𑌵𑌿𑌲𑍋𑌕𑌿𑌤𑌾𑌰𑍍𑌥𑍇
𑌤𑌥𑌾 𑌵𑌿𑌦𑌃 𑌪𑍍𑌰𑌾𑌶𑌨𑌮𑍋𑌚𑌨𑌾𑌦𑍌 ॥ 45𑍭॥

𑌕𑌰𑍍𑌮𑌣𑌾 𑌨𑌿𑌰𑍍𑌮𑌿𑌤𑍋 𑌦𑍇𑌹𑌃 𑌪𑍍𑌰𑌾𑌰𑌬𑍍𑌧𑌂 𑌤𑌸𑍍𑌯 𑌕𑌲𑍍𑌪𑍍𑌯𑌤𑌾𑌮𑍍 ।
𑌨𑌾𑌨𑌾𑌦𑍇𑌰𑌾𑌤𑍍𑌮𑌨𑍋 𑌯𑍁𑌕𑍍𑌤𑌂 𑌨𑍈𑌵𑌾𑌤𑍍𑌮𑌾 𑌕𑌰𑍍𑌮𑌨𑌿𑌰𑍍𑌮𑌿𑌤𑌃 ॥ 45𑍮॥

𑌅𑌜𑍋 𑌨𑌿𑌤𑍍𑌯𑌃 𑌶𑌾𑌶𑍍𑌵𑌤 𑌇𑌤𑌿 𑌬𑍍𑌰𑍂𑌤𑍇 𑌶𑍍𑌰𑍁𑌤𑌿𑌰𑌮𑍋𑌘𑌵𑌾𑌕𑍍 । (𑌪𑌾𑌠𑌭𑍇𑌦𑌃 – 𑌅𑌜𑍋 𑌨𑌿𑌤𑍍𑌯 𑌇𑌤𑌿 𑌬𑍍𑌰𑍂𑌤𑍇 𑌶𑍍𑌰𑍁𑌤𑌿𑌰𑍇𑌷𑌾 𑌤𑍍𑌵𑌮𑍋𑌘𑌵𑌾𑌕𑍍)
𑌤𑌦𑌾𑌤𑍍𑌮𑌨𑌾 𑌤𑌿𑌷𑍍𑌠𑌤𑍋𑌽𑌸𑍍𑌯 𑌕𑍁𑌤𑌃 𑌪𑍍𑌰𑌾𑌰𑌬𑍍𑌧𑌕𑌲𑍍𑌪𑌨𑌾 ॥ 45𑍯॥

𑌪𑍍𑌰𑌾𑌰𑌬𑍍𑌧𑌂 𑌸𑌿𑌧𑍍𑌯𑌤𑌿 𑌤𑌦𑌾 𑌯𑌦𑌾 𑌦𑍇𑌹𑌾𑌤𑍍𑌮𑌨𑌾 𑌸𑍍𑌥𑌿𑌤𑌿𑌃 ।
𑌦𑍇𑌹𑌾𑌤𑍍𑌮𑌭𑌾𑌵𑍋 𑌨𑍈𑌵𑍇𑌷𑍍𑌟𑌃 𑌪𑍍𑌰𑌾𑌰𑌬𑍍𑌧𑌂 𑌤𑍍𑌯𑌜𑍍𑌯𑌤𑌾𑌮𑌤𑌃 ॥ 460॥

𑌶𑌰𑍀𑌰𑌸𑍍𑌯𑌾𑌪𑌿 𑌪𑍍𑌰𑌾𑌰𑌬𑍍𑌧𑌕𑌲𑍍𑌪𑌨𑌾 𑌭𑍍𑌰𑌾𑌂𑌤𑌿𑌰𑍇𑌵 𑌹𑌿 ।
𑌅𑌧𑍍𑌯𑌸𑍍𑌤𑌸𑍍𑌯 𑌕𑍁𑌤𑌃 𑌸𑌤𑍍𑌤𑍍𑌵𑌮𑌸𑌤𑍍𑌯𑌸𑍍𑌯 𑌕𑍁𑌤𑍋 𑌜𑌨𑌿𑌃 । (𑌪𑌾𑌠𑌭𑍇𑌦𑌃 – 𑌸𑌤𑍍𑌤𑍍𑌵𑌮𑌸𑌤𑍍𑌤𑍍𑌵𑌸𑍍𑌯)
𑌅𑌜𑌾𑌤𑌸𑍍𑌯 𑌕𑍁𑌤𑍋 𑌨𑌾𑌶𑌃 𑌪𑍍𑌰𑌾𑌰𑌬𑍍𑌧𑌮𑌸𑌤𑌃 𑌕𑍁𑌤𑌃 ॥ 461॥

𑌜𑍍𑌞𑌾𑌨𑍇𑌨𑌾𑌜𑍍𑌞𑌾𑌨𑌕𑌾𑌰𑍍𑌯𑌸𑍍𑌯 𑌸𑌮𑍂𑌲𑌸𑍍𑌯 𑌲𑌯𑍋 𑌯𑌦𑌿 ।
𑌤𑌿𑌷𑍍𑌠𑌤𑍍𑌯𑌯𑌂 𑌕𑌥𑌂 𑌦𑍇𑌹 𑌇𑌤𑌿 𑌶𑌂𑌕𑌾𑌵𑌤𑍋 𑌜𑌡𑌾𑌨𑍍 ॥ 462॥

𑌸𑌮𑌾𑌧𑌾𑌤𑍁𑌂 𑌬𑌾𑌹𑍍𑌯𑌦𑍃𑌷𑍍𑌟𑍍𑌯𑌾 𑌪𑍍𑌰𑌾𑌰𑌬𑍍𑌧𑌂 𑌵𑌦𑌤𑌿 𑌶𑍍𑌰𑍁𑌤𑌿𑌃 ।
𑌨 𑌤𑍁 𑌦𑍇𑌹𑌾𑌦𑌿𑌸𑌤𑍍𑌯𑌤𑍍𑌵𑌬𑍋𑌧𑌨𑌾𑌯 𑌵𑌿𑌪𑌶𑍍𑌚𑌿𑌤𑌾𑌮𑍍 ।
𑌯𑌤𑌃 𑌶𑍍𑌰𑍁𑌤𑍇𑌰𑌭𑌿𑌪𑍍𑌰𑌾𑌯𑌃 𑌪𑌰𑌮𑌾𑌰𑍍𑌥𑍈𑌕𑌗𑍋𑌚𑌰𑌃 ॥ 463॥

𑌪𑌰𑌿𑌪𑍂𑌰𑍍𑌣𑌮𑌨𑌾𑌦𑍍𑌯𑌂𑌤𑌮𑌪𑍍𑌰𑌮𑍇𑌯𑌮𑌵𑌿𑌕𑍍𑌰𑌿𑌯𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌂𑌚𑌨 ॥ 464॥

𑌸𑌦𑍍𑌘𑌨𑌂 𑌚𑌿𑌦𑍍𑌘𑌨𑌂 𑌨𑌿𑌤𑍍𑌯𑌮𑌾𑌨𑌂𑌦𑌘𑌨𑌮𑌕𑍍𑌰𑌿𑌯𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌂𑌚𑌨 ॥ 465॥

𑌪𑍍𑌰𑌤𑍍𑌯𑌗𑍇𑌕𑌰𑌸𑌂 𑌪𑍂𑌰𑍍𑌣𑌮𑌨𑌂𑌤𑌂 𑌸𑌰𑍍𑌵𑌤𑍋𑌮𑍁𑌖𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌂𑌚𑌨 ॥ 466॥

𑌅𑌹𑍇𑌯𑌮𑌨𑍁𑌪𑌾𑌦𑍇𑌯𑌮𑌨𑌾𑌦𑍇𑌯𑌮𑌨𑌾𑌶𑍍𑌰𑌯𑌮𑍍 । 𑌮𑌨𑌾𑌧𑍇𑌯𑌮𑌨𑌾
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌂𑌚𑌨 ॥ 46𑍭॥

𑌨𑌿𑌰𑍍𑌗𑍁𑌣𑌂 𑌨𑌿𑌷𑍍𑌕𑌲𑌂 𑌸𑍂𑌕𑍍𑌷𑍍𑌮𑌂 𑌨𑌿𑌰𑍍𑌵𑌿𑌕𑌲𑍍𑌪𑌂 𑌨𑌿𑌰𑌂𑌜𑌨𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌂𑌚𑌨 ॥ 46𑍮॥

𑌅𑌨𑌿𑌰𑍂𑌪𑍍𑌯 𑌸𑍍𑌵𑌰𑍂𑌪𑌂 𑌯𑌨𑍍𑌮𑌨𑍋𑌵𑌾𑌚𑌾𑌮𑌗𑍋𑌚𑌰𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌂𑌚𑌨 ॥ 46𑍯॥

𑌸𑌤𑍍𑌸𑌮𑍃𑌦𑍍𑌧𑌂 𑌸𑍍𑌵𑌤𑌃𑌸𑌿𑌦𑍍𑌧𑌂 𑌶𑍁𑌦𑍍𑌧𑌂 𑌬𑍁𑌦𑍍𑌧𑌮𑌨𑍀𑌦𑍃𑌶𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌂𑌚𑌨 ॥ 4𑍭0॥

𑌨𑌿𑌰𑌸𑍍𑌤𑌰𑌾𑌗𑌾 𑌵𑌿𑌨𑌿𑌰𑌸𑍍𑌤𑌭𑍋𑌗𑌾𑌃 (𑌪𑌾𑌠𑌭𑍇𑌦𑌃 – 𑌨𑌿𑌰𑌪𑌾𑌸𑍍𑌤𑌭𑍋𑌗𑌾𑌃)
𑌶𑌾𑌂𑌤𑌾𑌃 𑌸𑍁𑌦𑌾𑌂𑌤𑌾 𑌯𑌤𑌯𑍋 𑌮𑌹𑌾𑌂𑌤𑌃 ।
𑌵𑌿𑌜𑍍𑌞𑌾𑌯 𑌤𑌤𑍍𑌤𑍍𑌵𑌂 𑌪𑌰𑌮𑍇𑌤𑌦𑌂𑌤𑍇
𑌪𑍍𑌰𑌾𑌪𑍍𑌤𑌾𑌃 𑌪𑌰𑌾𑌂 𑌨𑌿𑌰𑍍𑌵𑍃𑌤𑌿𑌮𑌾𑌤𑍍𑌮𑌯𑍋𑌗𑌾𑌤𑍍 ॥ 4𑍭1॥

𑌭𑌵𑌾𑌨𑌪𑍀𑌦𑌂 𑌪𑌰𑌤𑌤𑍍𑌤𑍍𑌵𑌮𑌾𑌤𑍍𑌮𑌨𑌃
𑌸𑍍𑌵𑌰𑍂𑌪𑌮𑌾𑌨𑌂𑌦𑌘𑌨𑌂 𑌵𑌿𑌚𑌾𑌰𑍍𑌯 । (𑌪𑌾𑌠𑌭𑍇𑌦𑌃 – 𑌨𑌿𑌚𑌾𑌯𑍍𑌯)
𑌵𑌿𑌧𑍂𑌯 𑌮𑍋𑌹𑌂 𑌸𑍍𑌵𑌮𑌨𑌃𑌪𑍍𑌰𑌕𑌲𑍍𑌪𑌿𑌤𑌂
𑌮𑍁𑌕𑍍𑌤𑌃 𑌕𑍃𑌤𑌾𑌰𑍍𑌥𑍋 𑌭𑌵𑌤𑍁 𑌪𑍍𑌰𑌬𑍁𑌦𑍍𑌧𑌃 ॥ 4𑍭2॥

𑌸𑌮𑌾𑌧𑌿𑌨𑌾 𑌸𑌾𑌧𑍁𑌵𑌿𑌨𑌿𑌶𑍍𑌚𑌲𑌾𑌤𑍍𑌮𑌨𑌾 (𑌪𑌾𑌠𑌭𑍇𑌦𑌃 – 𑌸𑍁𑌨𑌿𑌶𑍍𑌚𑌲𑌾𑌤𑍍𑌮𑌨𑌾)
𑌪𑌶𑍍𑌯𑌾𑌤𑍍𑌮𑌤𑌤𑍍𑌤𑍍𑌵𑌂 𑌸𑍍𑌫𑍁𑌟𑌬𑍋𑌧𑌚𑌕𑍍𑌷𑍁𑌷𑌾 ।
𑌨𑌿𑌃𑌸𑌂𑌶𑌯𑌂 𑌸𑌮𑍍𑌯𑌗𑌵𑍇𑌕𑍍𑌷𑌿𑌤𑌶𑍍𑌚𑍇-
𑌚𑍍𑌛𑍍𑌰𑍁𑌤𑌃 𑌪𑌦𑌾𑌰𑍍𑌥𑍋 𑌨 𑌪𑍁𑌨𑌰𑍍𑌵𑌿𑌕𑌲𑍍𑌪𑍍𑌯𑌤𑍇 ॥ 4𑍭3॥ (𑌪𑌾𑌠𑌭𑍇𑌦𑌃 – 𑌪𑍁𑌨𑌰𑍍𑌵𑌿𑌕𑌲𑍍𑌪𑌤𑍇)

𑌸𑍍𑌵𑌸𑍍𑌯𑌾𑌵𑌿𑌦𑍍𑌯𑌾𑌬𑌂𑌧𑌸𑌂𑌬𑌂𑌧𑌮𑍋𑌕𑍍𑌷𑌾-
𑌤𑍍𑌸𑌤𑍍𑌯𑌜𑍍𑌞𑌾𑌨𑌾𑌨𑌂𑌦𑌰𑍂𑌪𑌾𑌤𑍍𑌮𑌲𑌬𑍍𑌧𑍌 ।
𑌶𑌾𑌸𑍍𑌤𑍍𑌰𑌂 𑌯𑍁𑌕𑍍𑌤𑌿𑌰𑍍𑌦𑍇𑌶𑌿𑌕𑍋𑌕𑍍𑌤𑌿𑌃 𑌪𑍍𑌰𑌮𑌾𑌣𑌂
𑌚𑌾𑌂𑌤𑌃𑌸𑌿𑌦𑍍𑌧𑌾 𑌸𑍍𑌵𑌾𑌨𑍁𑌭𑍂𑌤𑌿𑌃 𑌪𑍍𑌰𑌮𑌾𑌣𑌮𑍍 ॥ 4𑍭4॥

𑌬𑌂𑌧𑍋 𑌮𑍋𑌕𑍍𑌷𑌶𑍍𑌚 𑌤𑍃𑌪𑍍𑌤𑌿𑌶𑍍𑌚 𑌚𑌿𑌂𑌤𑌾𑌽𑌽𑌰𑍋𑌗𑍍𑌯𑌕𑍍𑌷𑍁𑌧𑌾𑌦𑌯𑌃 ।
𑌸𑍍𑌵𑍇𑌨𑍈𑌵 𑌵𑍇𑌦𑍍𑌯𑌾 𑌯𑌜𑍍𑌜𑍍𑌞𑌾𑌨𑌂 𑌪𑌰𑍇𑌷𑌾𑌮𑌾𑌨𑍁𑌮𑌾𑌨𑌿𑌕𑌮𑍍 ॥ 4𑍭5॥

𑌤𑌟𑌸𑍍𑌥𑌿𑌤𑌾 𑌬𑍋𑌧𑌯𑌂𑌤𑌿 𑌗𑍁𑌰𑌵𑌃 𑌶𑍍𑌰𑍁𑌤𑌯𑍋 𑌯𑌥𑌾 ।
𑌪𑍍𑌰𑌜𑍍𑌞𑌯𑍈𑌵 𑌤𑌰𑍇𑌦𑍍𑌵𑌿𑌦𑍍𑌵𑌾𑌨𑍀𑌶𑍍𑌵𑌰𑌾𑌨𑍁𑌗𑍃𑌹𑍀𑌤𑌯𑌾 ॥ 4𑍭6॥

𑌸𑍍𑌵𑌾𑌨𑍁𑌭𑍂𑌤𑍍𑌯𑌾 𑌸𑍍𑌵𑌯𑌂 𑌜𑍍𑌞𑌾𑌤𑍍𑌵𑌾 𑌸𑍍𑌵𑌮𑌾𑌤𑍍𑌮𑌾𑌨𑌮𑌖𑌂𑌡𑌿𑌤𑌮𑍍 ।
𑌸𑌂𑌸𑌿𑌦𑍍𑌧𑌃 𑌸𑌮𑍍𑌮𑍁𑌖𑌂 𑌤𑌿𑌷𑍍𑌠𑍇𑌨𑍍𑌨𑌿𑌰𑍍𑌵𑌿𑌕𑌲𑍍𑌪𑌾𑌤𑍍𑌮𑌨𑌾𑌽𑌽𑌤𑍍𑌮𑌨𑌿 ॥ 4𑍭𑍭॥ (𑌪𑌾𑌠𑌭𑍇𑌦𑌃 – 𑌸𑍁𑌸𑍁𑌖𑌂 𑌤𑌿𑌷𑍍𑌠𑍇𑌨𑍍)
𑌵𑍇𑌦𑌾𑌂𑌤𑌸𑌿𑌦𑍍𑌧𑌾𑌂𑌤𑌨𑌿𑌰𑍁𑌕𑍍𑌤𑌿𑌰𑍇𑌷𑌾
𑌬𑍍𑌰𑌹𑍍𑌮𑍈𑌵 𑌜𑍀𑌵𑌃 𑌸𑌕𑌲𑌂 𑌜𑌗𑌚𑍍𑌚 ।
𑌅𑌖𑌂𑌡𑌰𑍂𑌪𑌸𑍍𑌥𑌿𑌤𑌿𑌰𑍇𑌵 𑌮𑍋𑌕𑍍𑌷𑍋
𑌬𑍍𑌰𑌹𑍍𑌮𑌾𑌦𑍍𑌵𑌿𑌤𑍀𑌯𑍇 𑌶𑍍𑌰𑍁𑌤𑌯𑌃 𑌪𑍍𑌰𑌮𑌾𑌣𑌮𑍍 ॥ 4𑍭𑍮॥ (𑌪𑌾𑌠𑌭𑍇𑌦𑌃 – 𑌬𑍍𑌰𑌹𑍍𑌮𑌾𑌦𑍍𑌵𑌿𑌤𑍀𑌯𑌂)

𑌇𑌤𑌿 𑌗𑍁𑌰𑍁𑌵𑌚𑌨𑌾𑌚𑍍𑌛𑍍𑌰𑍁𑌤𑌿𑌪𑍍𑌰𑌮𑌾𑌣𑌾𑌤𑍍
𑌪𑌰𑌮𑌵𑌗𑌮𑍍𑌯 𑌸𑌤𑌤𑍍𑌤𑍍𑌵𑌮𑌾𑌤𑍍𑌮𑌯𑍁𑌕𑍍𑌤𑍍𑌯𑌾 ।
𑌪𑍍𑌰𑌶𑌮𑌿𑌤𑌕𑌰𑌣𑌃 𑌸𑌮𑌾𑌹𑌿𑌤𑌾𑌤𑍍𑌮𑌾
𑌕𑍍𑌵𑌚𑌿𑌦𑌚𑌲𑌾𑌕𑍃𑌤𑌿𑌰𑌾𑌤𑍍𑌮𑌨𑌿𑌷𑍍𑌠𑌤𑍋𑌽𑌭𑍂𑌤𑍍 ॥ 4𑍭𑍯॥ (𑌪𑌾𑌠𑌭𑍇𑌦𑌃 – 𑌆𑌤𑍍𑌮𑌨𑌿𑌷𑍍𑌠𑌿𑌤𑍋)

𑌕𑌿𑌂𑌚𑌿𑌤𑍍𑌕𑌾𑌲𑌂 𑌸𑌮𑌾𑌧𑌾𑌯 𑌪𑌰𑍇 𑌬𑍍𑌰𑌹𑍍𑌮𑌣𑌿 𑌮𑌾𑌨𑌸𑌮𑍍 । (𑌪𑌾𑌠𑌭𑍇𑌦𑌃 – 𑌕𑌂𑌚𑌿𑌤𑍍𑌕𑌾𑌲𑌂)
𑌉𑌤𑍍𑌥𑌾𑌯 𑌪𑌰𑌮𑌾𑌨𑌂𑌦𑌾𑌦𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 4𑍮0॥ (𑌪𑌾𑌠𑌭𑍇𑌦𑌃 – 𑌵𑍍𑌯𑍁𑌤𑍍𑌥𑌾𑌯)

𑌬𑍁𑌦𑍍𑌧𑌿𑌰𑍍𑌵𑌿𑌨𑌷𑍍𑌟𑌾 𑌗𑌲𑌿𑌤𑌾 𑌪𑍍𑌰𑌵𑍃𑌤𑍍𑌤𑌿𑌃
𑌬𑍍𑌰𑌹𑍍𑌮𑌾𑌤𑍍𑌮𑌨𑍋𑌰𑍇𑌕𑌤𑌯𑌾𑌽𑌧𑌿𑌗𑌤𑍍𑌯𑌾 ।
𑌇𑌦𑌂 𑌨 𑌜𑌾𑌨𑍇𑌽𑌪𑍍𑌯𑌨𑌿𑌦𑌂 𑌨 𑌜𑌾𑌨𑍇
𑌕𑌿𑌂 𑌵𑌾 𑌕𑌿𑌯𑌦𑍍𑌵𑌾 𑌸𑍁𑌖𑌮𑌸𑍍𑌤𑍍𑌯𑌪𑌾𑌰𑌮𑍍 ॥ 4𑍮1॥ (𑌪𑌾𑌠𑌭𑍇𑌦𑌃 – 𑌸𑍁𑌖𑌮𑌸𑍍𑌯 𑌪𑌾𑌰𑌮𑍍)

𑌵𑌾𑌚𑌾 𑌵𑌕𑍍𑌤𑍁𑌮𑌶𑌕𑍍𑌯𑌮𑍇𑌵 𑌮𑌨𑌸𑌾 𑌮𑌂𑌤𑍁𑌂 𑌨 𑌵𑌾 𑌶𑌕𑍍𑌯𑌤𑍇
𑌸𑍍𑌵𑌾𑌨𑌂𑌦𑌾𑌮𑍃𑌤𑌪𑍂𑌰𑌪𑍂𑌰𑌿𑌤𑌪𑌰𑌬𑍍𑌰𑌹𑍍𑌮𑌾𑌂𑌬𑍁𑌧𑍇𑌰𑍍𑌵𑍈𑌭𑌵𑌮𑍍 ।
𑌅𑌂𑌭𑍋𑌰𑌾𑌶𑌿𑌵𑌿𑌶𑍀𑌰𑍍𑌣𑌵𑌾𑌰𑍍𑌷𑌿𑌕𑌶𑌿𑌲𑌾𑌭𑌾𑌵𑌂 𑌭𑌜𑌨𑍍𑌮𑍇 𑌮𑌨𑍋
𑌯𑌸𑍍𑌯𑌾𑌂𑌶𑌾𑌂𑌶𑌲𑌵𑍇 𑌵𑌿𑌲𑍀𑌨𑌮𑌧𑍁𑌨𑌾𑌽𑌽𑌨𑌂𑌦𑌾𑌤𑍍𑌮𑌨𑌾 𑌨𑌿𑌰𑍍𑌵𑍃𑌤𑌮𑍍 ॥ 4𑍮2॥

𑌕𑍍𑌵 𑌗𑌤𑌂 𑌕𑍇𑌨 𑌵𑌾 𑌨𑍀𑌤𑌂 𑌕𑍁𑌤𑍍𑌰 𑌲𑍀𑌨𑌮𑌿𑌦𑌂 𑌜𑌗𑌤𑍍 ।
𑌅𑌧𑍁𑌨𑍈𑌵 𑌮𑌯𑌾 𑌦𑍃𑌷𑍍𑌟𑌂 𑌨𑌾𑌸𑍍𑌤𑌿 𑌕𑌿𑌂 𑌮𑌹𑌦𑌦𑍍𑌭𑍁𑌤𑌮𑍍 ॥ 4𑍮3॥

𑌕𑌿𑌂 𑌹𑍇𑌯𑌂 𑌕𑌿𑌮𑍁𑌪𑌾𑌦𑍇𑌯𑌂 𑌕𑌿𑌮𑌨𑍍𑌯𑌤𑍍𑌕𑌿𑌂 𑌵𑌿𑌲𑌕𑍍𑌷𑌣𑌮𑍍 ।
𑌅𑌖𑌂𑌡𑌾𑌨𑌂𑌦𑌪𑍀𑌯𑍂𑌷𑌪𑍂𑌰𑍍𑌣𑍇 𑌬𑍍𑌰𑌹𑍍𑌮𑌮𑌹𑌾𑌰𑍍𑌣𑌵𑍇 ॥ 4𑍮4॥

𑌨 𑌕𑌿𑌂𑌚𑌿𑌦𑌤𑍍𑌰 𑌪𑌶𑍍𑌯𑌾𑌮𑌿 𑌨 𑌶𑌋𑌣𑍋𑌮𑌿 𑌨 𑌵𑍇𑌦𑍍𑌮𑍍𑌯𑌹𑌮𑍍 ।
𑌸𑍍𑌵𑌾𑌤𑍍𑌮𑌨𑍈𑌵 𑌸𑌦𑌾𑌨𑌂𑌦𑌰𑍂𑌪𑍇𑌣𑌾𑌸𑍍𑌮𑌿 𑌵𑌿𑌲𑌕𑍍𑌷𑌣𑌃 ॥ 4𑍮5॥

𑌨𑌮𑍋 𑌨𑌮𑌸𑍍𑌤𑍇 𑌗𑍁𑌰𑌵𑍇 𑌮𑌹𑌾𑌤𑍍𑌮𑌨𑍇
𑌵𑌿𑌮𑍁𑌕𑍍𑌤𑌸𑌂𑌗𑌾𑌯 𑌸𑌦𑍁𑌤𑍍𑌤𑌮𑌾𑌯 ।
𑌨𑌿𑌤𑍍𑌯𑌾𑌦𑍍𑌵𑌯𑌾𑌨𑌂𑌦𑌰𑌸𑌸𑍍𑌵𑌰𑍂𑌪𑌿𑌣𑍇
𑌭𑍂𑌮𑍍𑌨𑍇 𑌸𑌦𑌾𑌽𑌪𑌾𑌰𑌦𑌯𑌾𑌂𑌬𑍁𑌧𑌾𑌮𑍍𑌨𑍇 ॥ 4𑍮6॥

𑌯𑌤𑍍𑌕𑌟𑌾𑌕𑍍𑌷𑌶𑌶𑌿𑌸𑌾𑌂𑌦𑍍𑌰𑌚𑌂𑌦𑍍𑌰𑌿𑌕𑌾-
𑌪𑌾𑌤𑌧𑍂𑌤𑌭𑌵𑌤𑌾𑌪𑌜𑌶𑍍𑌰𑌮𑌃 ।
𑌪𑍍𑌰𑌾𑌪𑍍𑌤𑌵𑌾𑌨𑌹𑌮𑌖𑌂𑌡𑌵𑍈𑌭𑌵𑌾-
𑌨𑌂𑌦𑌮𑌾𑌤𑍍𑌮𑌪𑌦𑌮𑌕𑍍𑌷𑌯𑌂 𑌕𑍍𑌷𑌣𑌾𑌤𑍍 ॥ 4𑍮𑍭॥

𑌧𑌨𑍍𑌯𑍋𑌽𑌹𑌂 𑌕𑍃𑌤𑌕𑍃𑌤𑍍𑌯𑍋𑌽𑌹𑌂 𑌵𑌿𑌮𑍁𑌕𑍍𑌤𑍋𑌽𑌹𑌂 𑌭𑌵𑌗𑍍𑌰𑌹𑌾𑌤𑍍 ।
𑌨𑌿𑌤𑍍𑌯𑌾𑌨𑌂𑌦𑌸𑍍𑌵𑌰𑍂𑌪𑍋𑌽𑌹𑌂 𑌪𑍂𑌰𑍍𑌣𑍋𑌽𑌹𑌂 𑌤𑍍𑌵𑌦𑌨𑍁𑌗𑍍𑌰𑌹𑌾𑌤𑍍 ॥ 4𑍮𑍮॥

𑌅𑌸𑌂𑌗𑍋𑌽𑌹𑌮𑌨𑌂𑌗𑍋𑌽𑌹𑌮𑌲𑌿𑌂𑌗𑍋𑌽𑌹𑌮𑌭𑌂𑌗𑍁𑌰𑌃 ।
𑌪𑍍𑌰𑌶𑌾𑌂𑌤𑍋𑌽𑌹𑌮𑌨𑌂𑌤𑍋𑌽𑌹𑌮𑌮𑌲𑍋𑌽𑌹𑌂 𑌚𑌿𑌰𑌂𑌤𑌨𑌃 ॥ 4𑍮𑍯॥ (𑌪𑌾𑌠𑌭𑍇𑌦𑌃 – 𑌽𑌹𑌮𑌤𑌾𑌂𑌤𑍋𑌽𑌹𑌂)

𑌅𑌕𑌰𑍍𑌤𑌾𑌹𑌮𑌭𑍋𑌕𑍍𑌤𑌾𑌹𑌮𑌵𑌿𑌕𑌾𑌰𑍋𑌽𑌹𑌮𑌕𑍍𑌰𑌿𑌯𑌃 ।
𑌶𑍁𑌦𑍍𑌧𑌬𑍋𑌧𑌸𑍍𑌵𑌰𑍂𑌪𑍋𑌽𑌹𑌂 𑌕𑍇𑌵𑌲𑍋𑌽𑌹𑌂 𑌸𑌦𑌾𑌶𑌿𑌵𑌃 ॥ 4𑍯0॥

𑌦𑍍𑌰𑌷𑍍𑌟𑍁𑌃 𑌶𑍍𑌰𑍋𑌤𑍁𑌰𑍍𑌵𑌕𑍍𑌤𑍁𑌃 𑌕𑌰𑍍𑌤𑍁𑌰𑍍𑌭𑍋𑌕𑍍𑌤𑍁𑌰𑍍𑌵𑌿𑌭𑌿𑌨𑍍𑌨 𑌏𑌵𑌾𑌹𑌮𑍍 ।
𑌨𑌿𑌤𑍍𑌯𑌨𑌿𑌰𑌂𑌤𑌰𑌨𑌿𑌷𑍍𑌕𑍍𑌰𑌿𑌯𑌨𑌿𑌃𑌸𑍀𑌮𑌾𑌸𑌂𑌗𑌪𑍂𑌰𑍍𑌣𑌬𑍋𑌧𑌾𑌤𑍍𑌮𑌾 ॥ 4𑍯1॥

𑌨𑌾𑌹𑌮𑌿𑌦𑌂 𑌨𑌾𑌹𑌮𑌦𑍋𑌽𑌪𑍍𑌯𑍁𑌭𑌯𑍋𑌰𑌵𑌭𑌾𑌸𑌕𑌂 𑌪𑌰𑌂 𑌶𑍁𑌦𑍍𑌧𑌮𑍍 ।
𑌬𑌾𑌹𑍍𑌯𑌾𑌭𑍍𑌯𑌂𑌤𑌰𑌶𑍂𑌨𑍍𑌯𑌂 𑌪𑍂𑌰𑍍𑌣𑌂 𑌬𑍍𑌰𑌹𑍍𑌮𑌾𑌦𑍍𑌵𑌿𑌤𑍀𑌯𑌮𑍇𑌵𑌾𑌹𑌮𑍍 ॥ 4𑍯2॥

𑌨𑌿𑌰𑍁𑌪𑌮𑌮𑌨𑌾𑌦𑌿𑌤𑌤𑍍𑌤𑍍𑌵𑌂 𑌤𑍍𑌵𑌮𑌹𑌮𑌿𑌦𑌮𑌦 𑌇𑌤𑌿 𑌕𑌲𑍍𑌪𑌨𑌾𑌦𑍂𑌰𑌮𑍍 ।
𑌨𑌿𑌤𑍍𑌯𑌾𑌨𑌂𑌦𑍈𑌕𑌰𑌸𑌂 𑌸𑌤𑍍𑌯𑌂 𑌬𑍍𑌰𑌹𑍍𑌮𑌾𑌦𑍍𑌵𑌿𑌤𑍀𑌯𑌮𑍇𑌵𑌾𑌹𑌮𑍍 ॥ 4𑍯3॥

𑌨𑌾𑌰𑌾𑌯𑌣𑍋𑌽𑌹𑌂 𑌨𑌰𑌕𑌾𑌂𑌤𑌕𑍋𑌽𑌹𑌂
𑌪𑍁𑌰𑌾𑌂𑌤𑌕𑍋𑌽𑌹𑌂 𑌪𑍁𑌰𑍁𑌷𑍋𑌽𑌹𑌮𑍀𑌶𑌃 ।
𑌅𑌖𑌂𑌡𑌬𑍋𑌧𑍋𑌽𑌹𑌮𑌶𑍇𑌷𑌸𑌾𑌕𑍍𑌷𑍀
𑌨𑌿𑌰𑍀𑌶𑍍𑌵𑌰𑍋𑌽𑌹𑌂 𑌨𑌿𑌰𑌹𑌂 𑌚 𑌨𑌿𑌰𑍍𑌮𑌮𑌃 ॥ 4𑍯4॥

𑌸𑌰𑍍𑌵𑍇𑌷𑍁 𑌭𑍂𑌤𑍇𑌷𑍍𑌵𑌹𑌮𑍇𑌵 𑌸𑌂𑌸𑍍𑌥𑌿𑌤𑍋
𑌜𑍍𑌞𑌾𑌨𑌾𑌤𑍍𑌮𑌨𑌾𑌽𑌂𑌤𑌰𑍍𑌬𑌹𑌿𑌰𑌾𑌶𑍍𑌰𑌯𑌃 𑌸𑌨𑍍 ।
𑌭𑍋𑌕𑍍𑌤𑌾 𑌚 𑌭𑍋𑌗𑍍𑌯𑌂 𑌸𑍍𑌵𑌯𑌮𑍇𑌵 𑌸𑌰𑍍𑌵𑌂
𑌯𑌦𑍍𑌯𑌤𑍍𑌪𑍃𑌥𑌗𑍍𑌦𑍃𑌷𑍍𑌟𑌮𑌿𑌦𑌂𑌤𑌯𑌾 𑌪𑍁𑌰𑌾 ॥ 4𑍯5॥

𑌮𑌯𑍍𑌯𑌖𑌂𑌡𑌸𑍁𑌖𑌾𑌂𑌭𑍋𑌧𑍌 𑌬𑌹𑍁𑌧𑌾 𑌵𑌿𑌶𑍍𑌵𑌵𑍀𑌚𑌯𑌃 ।
𑌉𑌤𑍍𑌪𑌦𑍍𑌯𑌂𑌤𑍇 𑌵𑌿𑌲𑍀𑌯𑌂𑌤𑍇 𑌮𑌾𑌯𑌾𑌮𑌾𑌰𑍁𑌤𑌵𑌿𑌭𑍍𑌰𑌮𑌾𑌤𑍍 ॥ 4𑍯6॥

𑌸𑍍𑌥𑍁𑌲𑌾𑌦𑌿𑌭𑌾𑌵𑌾 𑌮𑌯𑌿 𑌕𑌲𑍍𑌪𑌿𑌤𑌾 𑌭𑍍𑌰𑌮𑌾-
𑌦𑌾𑌰𑍋𑌪𑌿𑌤𑌾𑌨𑍁𑌸𑍍𑌫𑍁𑌰𑌣𑍇𑌨 𑌲𑍋𑌕𑍈𑌃 ।
𑌕𑌾𑌲𑍇 𑌯𑌥𑌾 𑌕𑌲𑍍𑌪𑌕𑌵𑌤𑍍𑌸𑌰𑌾𑌯-
𑌣𑌰𑍍𑌤𑍍𑌵𑌾𑌦𑌯𑍋 𑌨𑌿𑌷𑍍𑌕𑌲𑌨𑌿𑌰𑍍𑌵𑌿𑌕𑌲𑍍𑌪𑍇 ॥ 4𑍯𑍭॥

𑌆𑌰𑍋𑌪𑌿𑌤𑌂 𑌨𑌾𑌶𑍍𑌰𑌯𑌦𑍂𑌷𑌕𑌂 𑌭𑌵𑍇𑌤𑍍
𑌕𑌦𑌾𑌪𑌿 𑌮𑍂𑌢𑍈𑌰𑌤𑌿𑌦𑍋𑌷𑌦𑍂𑌷𑌿𑌤𑍈𑌃 । 𑌮𑍂𑌢𑍈𑌰𑍍𑌮𑌤𑌿
𑌨𑌾𑌰𑍍𑌦𑍍𑌰𑍀𑌕𑌰𑍋𑌤𑍍𑌯𑍂𑌷𑌰𑌭𑍂𑌮𑌿𑌭𑌾𑌗𑌂
𑌮𑌰𑍀𑌚𑌿𑌕𑌾𑌵𑌾𑌰𑌿 𑌮𑌹𑌾𑌪𑍍𑌰𑌵𑌾𑌹𑌃 ॥ 4𑍯𑍮॥

𑌆𑌕𑌾𑌶𑌵𑌲𑍍𑌲𑍇𑌪𑌵𑌿𑌦𑍂𑌰𑌗𑍋𑌽𑌹𑌂 (𑌪𑌾𑌠𑌭𑍇𑌦𑌃 – 𑌆𑌕𑌾𑌶𑌵𑌤𑍍 𑌕𑌲𑍍𑌪𑌵𑌿)
𑌆𑌦𑌿𑌤𑍍𑌯𑌵𑌦𑍍𑌭𑌾𑌸𑍍𑌯𑌵𑌿𑌲𑌕𑍍𑌷𑌣𑍋𑌽𑌹𑌮𑍍 ।
𑌅𑌹𑌾𑌰𑍍𑌯𑌵𑌨𑍍𑌨𑌿𑌤𑍍𑌯𑌵𑌿𑌨𑌿𑌶𑍍𑌚𑌲𑍋𑌽𑌹𑌂
𑌅𑌂𑌭𑍋𑌧𑌿𑌵𑌤𑍍𑌪𑌾𑌰𑌵𑌿𑌵𑌰𑍍𑌜𑌿𑌤𑍋𑌽𑌹𑌮𑍍 ॥ 4𑍯𑍯॥

𑌨 𑌮𑍇 𑌦𑍇𑌹𑍇𑌨 𑌸𑌂𑌬𑌂𑌧𑍋 𑌮𑍇𑌘𑍇𑌨𑍇𑌵 𑌵𑌿𑌹𑌾𑌯𑌸𑌃 ।
𑌅𑌤𑌃 𑌕𑍁𑌤𑍋 𑌮𑍇 𑌤𑌦𑍍𑌧𑌰𑍍𑌮𑌾 𑌜𑌾𑌗𑍍𑌰𑌤𑍍𑌸𑍍𑌵𑌪𑍍𑌨𑌸𑍁𑌷𑍁𑌪𑍍𑌤𑌯𑌃 ॥ 500॥

𑌉𑌪𑌾𑌧𑌿𑌰𑌾𑌯𑌾𑌤𑌿 𑌸 𑌏𑌵 𑌗𑌚𑍍𑌛𑌤𑌿
𑌸 𑌏𑌵 𑌕𑌰𑍍𑌮𑌾𑌣𑌿 𑌕𑌰𑍋𑌤𑌿 𑌭𑍁𑌂𑌕𑍍𑌤𑍇 ।
𑌸 𑌏𑌵 𑌜𑍀𑌰𑍍𑌯𑌨𑍍 𑌮𑍍𑌰𑌿𑌯𑌤𑍇 𑌸𑌦𑌾𑌹𑌂 (𑌪𑌾𑌠𑌭𑍇𑌦𑌃 – 𑌏𑌵 𑌜𑍀𑌵𑌨𑍍)
𑌕𑍁𑌲𑌾𑌦𑍍𑌰𑌿𑌵𑌨𑍍𑌨𑌿𑌶𑍍𑌚𑌲 𑌏𑌵 𑌸𑌂𑌸𑍍𑌥𑌿𑌤𑌃 ॥ 501॥

𑌨 𑌮𑍇 𑌪𑍍𑌰𑌵𑍃𑌤𑍍𑌤𑌿𑌰𑍍𑌨 𑌚 𑌮𑍇 𑌨𑌿𑌵𑍃𑌤𑍍𑌤𑌿𑌃
𑌸𑌦𑍈𑌕𑌰𑍂𑌪𑌸𑍍𑌯 𑌨𑌿𑌰𑌂𑌶𑌕𑌸𑍍𑌯 ।
𑌏𑌕𑌾𑌤𑍍𑌮𑌕𑍋 𑌯𑍋 𑌨𑌿𑌵𑌿𑌡𑍋 𑌨𑌿𑌰𑌂𑌤𑌰𑍋 (𑌪𑌾𑌠𑌭𑍇𑌦𑌃 – 𑌨𑌿𑌬𑌿𑌡𑍋)
𑌵𑍍𑌯𑍋𑌮𑍇𑌵 𑌪𑍂𑌰𑍍𑌣𑌃 𑌸 𑌕𑌥𑌂 𑌨𑍁 𑌚𑍇𑌷𑍍𑌟𑌤𑍇 ॥ 502॥

𑌪𑍁𑌣𑍍𑌯𑌾𑌨𑌿 𑌪𑌾𑌪𑌾𑌨𑌿 𑌨𑌿𑌰𑌿𑌂𑌦𑍍𑌰𑌿𑌯𑌸𑍍𑌯
𑌨𑌿𑌶𑍍𑌚𑍇𑌤𑌸𑍋 𑌨𑌿𑌰𑍍𑌵𑌿𑌕𑍃𑌤𑍇𑌰𑍍𑌨𑌿𑌰𑌾𑌕𑍃𑌤𑍇𑌃 ।
𑌕𑍁𑌤𑍋 𑌮𑌮𑌾𑌖𑌂𑌡𑌸𑍁𑌖𑌾𑌨𑍁𑌭𑍂𑌤𑍇𑌃
𑌬𑍍𑌰𑍂𑌤𑍇 𑌹𑍍𑌯𑌨𑌨𑍍𑌵𑌾𑌗𑌤𑌮𑌿𑌤𑍍𑌯𑌪𑌿 𑌶𑍍𑌰𑍁𑌤𑌿𑌃 ॥ 503॥

𑌛𑌾𑌯𑌯𑌾 𑌸𑍍𑌪𑍃𑌷𑍍𑌟𑌮𑍁𑌷𑍍𑌣𑌂 𑌵𑌾 𑌶𑍀𑌤𑌂 𑌵𑌾 𑌸𑍁𑌷𑍍𑌠𑍁 𑌦𑍁𑌃𑌷𑍍𑌠𑍁 𑌵𑌾 ।
𑌨 𑌸𑍍𑌪𑍃𑌶𑌤𑍍𑌯𑍇𑌵 𑌯𑌤𑍍𑌕𑌿𑌂𑌚𑌿𑌤𑍍𑌪𑍁𑌰𑍁𑌷𑌂 𑌤𑌦𑍍𑌵𑌿𑌲𑌕𑍍𑌷𑌣𑌮𑍍 ॥ 504॥

𑌨 𑌸𑌾𑌕𑍍𑌷𑌿𑌣𑌂 𑌸𑌾𑌕𑍍𑌷𑍍𑌯𑌧𑌰𑍍𑌮𑌾𑌃 𑌸𑌂𑌸𑍍𑌪𑍃𑌶𑌂𑌤𑌿 𑌵𑌿𑌲𑌕𑍍𑌷𑌣𑌮𑍍 ।
𑌅𑌵𑌿𑌕𑌾𑌰𑌮𑍁𑌦𑌾𑌸𑍀𑌨𑌂 𑌗𑍃𑌹𑌧𑌰𑍍𑌮𑌾𑌃 𑌪𑍍𑌰𑌦𑍀𑌪𑌵𑌤𑍍 ।
𑌦𑍇𑌹𑍇𑌂𑌦𑍍𑌰𑌿𑌯𑌮𑌨𑍋𑌧𑌰𑍍𑌮𑌾 𑌨𑍈𑌵𑌾𑌤𑍍𑌮𑌾𑌨𑌂 𑌸𑍍𑌪𑍃𑌶𑌂𑌤𑍍𑌯𑌹𑍋 ॥ 505॥ 𑌏𑌕𑍍𑌷𑍍𑌤𑍍𑌰

𑌰𑌵𑍇𑌰𑍍𑌯𑌥𑌾 𑌕𑌰𑍍𑌮𑌣𑌿 𑌸𑌾𑌕𑍍𑌷𑌿𑌭𑌾𑌵𑍋
𑌵𑌹𑍍𑌨𑍇𑌰𑍍𑌯𑌥𑌾 𑌦𑌾𑌹𑌨𑌿𑌯𑌾𑌮𑌕𑌤𑍍𑌵𑌮𑍍 । (𑌪𑌾𑌠𑌭𑍇𑌦𑌃 – 𑌵𑌾𑌽𑌯𑌸𑌿 𑌦𑌾𑌹𑌕𑌤𑍍𑌵𑌮𑍍)
𑌰𑌜𑍍𑌜𑍋𑌰𑍍𑌯𑌥𑌾𑌽𑌽𑌰𑍋𑌪𑌿𑌤𑌵𑌸𑍍𑌤𑍁𑌸𑌂𑌗𑌃
𑌤𑌥𑍈𑌵 𑌕𑍂𑌟𑌸𑍍𑌥𑌚𑌿𑌦𑌾𑌤𑍍𑌮𑌨𑍋 𑌮𑍇 ॥ 506॥

𑌕𑌰𑍍𑌤𑌾𑌪𑌿 𑌵𑌾 𑌕𑌾𑌰𑌯𑌿𑌤𑌾𑌪𑌿 𑌨𑌾𑌹𑌂
𑌭𑍋𑌕𑍍𑌤𑌾𑌪𑌿 𑌵𑌾 𑌭𑍋𑌜𑌯𑌿𑌤𑌾𑌪𑌿 𑌨𑌾𑌹𑌮𑍍 ।
𑌦𑍍𑌰𑌷𑍍𑌟𑌾𑌪𑌿 𑌵𑌾 𑌦𑌰𑍍𑌶𑌯𑌿𑌤𑌾𑌪𑌿 𑌨𑌾𑌹𑌂
𑌸𑍋𑌽𑌹𑌂 𑌸𑍍𑌵𑌯𑌂𑌜𑍍𑌯𑍋𑌤𑌿𑌰𑌨𑍀𑌦𑍃𑌗𑌾𑌤𑍍𑌮𑌾 ॥ 50𑍭॥

𑌚𑌲𑌤𑍍𑌯𑍁𑌪𑌾𑌧𑍌 𑌪𑍍𑌰𑌤𑌿𑌬𑌿𑌂𑌬𑌲𑍌𑌲𑍍𑌯-
𑌮𑍌𑌪𑌾𑌧𑌿𑌕𑌂 𑌮𑍂𑌢𑌧𑌿𑌯𑍋 𑌨𑌯𑌂𑌤𑌿 ।
𑌸𑍍𑌵𑌬𑌿𑌂𑌬𑌭𑍂𑌤𑌂 𑌰𑌵𑌿𑌵𑌦𑍍𑌵𑌿𑌨𑌿𑌷𑍍𑌕𑍍𑌰𑌿𑌯𑌂
𑌕𑌰𑍍𑌤𑌾𑌸𑍍𑌮𑌿 𑌭𑍋𑌕𑍍𑌤𑌾𑌸𑍍𑌮𑌿 𑌹𑌤𑍋𑌽𑌸𑍍𑌮𑌿 𑌹𑍇𑌤𑌿 ॥ 50𑍮॥

𑌜𑌲𑍇 𑌵𑌾𑌪𑌿 𑌸𑍍𑌥𑌲𑍇 𑌵𑌾𑌪𑌿 𑌲𑍁𑌠𑌤𑍍𑌵𑍇𑌷 𑌜𑌡𑌾𑌤𑍍𑌮𑌕𑌃 ।
𑌨𑌾𑌹𑌂 𑌵𑌿𑌲𑌿𑌪𑍍𑌯𑍇 𑌤𑌦𑍍𑌧𑌰𑍍𑌮𑍈𑌰𑍍𑌘𑌟𑌧𑌰𑍍𑌮𑍈𑌰𑍍𑌨𑌭𑍋 𑌯𑌥𑌾 ॥ 50𑍯॥

𑌕𑌰𑍍𑌤𑍃𑌤𑍍𑌵𑌭𑍋𑌕𑍍𑌤𑍃𑌤𑍍𑌵𑌖𑌲𑌤𑍍𑌵𑌮𑌤𑍍𑌤𑌤𑌾-
𑌜𑌡𑌤𑍍𑌵𑌬𑌦𑍍𑌧𑌤𑍍𑌵𑌵𑌿𑌮𑍁𑌕𑍍𑌤𑌤𑌾𑌦𑌯𑌃 ।
𑌬𑍁𑌦𑍍𑌧𑍇𑌰𑍍𑌵𑌿𑌕𑌲𑍍𑌪𑌾 𑌨 𑌤𑍁 𑌸𑌂𑌤𑌿 𑌵𑌸𑍍𑌤𑍁𑌤𑌃
𑌸𑍍𑌵𑌸𑍍𑌮𑌿𑌨𑍍𑌪𑌰𑍇 𑌬𑍍𑌰𑌹𑍍𑌮𑌣𑌿 𑌕𑍇𑌵𑌲𑍇𑌽𑌦𑍍𑌵𑌯𑍇 ॥ 510॥

𑌸𑌂𑌤𑍁 𑌵𑌿𑌕𑌾𑌰𑌾𑌃 𑌪𑍍𑌰𑌕𑍃𑌤𑍇𑌰𑍍𑌦𑌶𑌧𑌾 𑌶𑌤𑌧𑌾 𑌸𑌹𑌸𑍍𑌰𑌧𑌾 𑌵𑌾𑌪𑌿 ।
𑌕𑌿𑌂 𑌮𑍇𑌽𑌸𑌂𑌗𑌚𑌿𑌤𑌸𑍍𑌤𑍈𑌰𑍍𑌨 𑌘𑌨𑌃 𑌕𑍍𑌵𑌚𑌿𑌦𑌂𑌬𑌰𑌂 𑌸𑍍𑌪𑍃𑌶𑌤𑌿 ॥ 511॥ (𑌪𑌾𑌠𑌭𑍇𑌦𑌃 – 𑌤𑍈𑌃 𑌕𑌿𑌂 𑌮𑍇𑌽𑌸𑌂𑌗𑌚𑌿𑌤𑍇𑌰𑍍𑌨 𑌹𑍍𑌯𑌂𑌬𑍁𑌦𑌡𑌂𑌬𑌰𑍋𑌽𑌂𑌬𑌰𑌂)

𑌅𑌵𑍍𑌯𑌕𑍍𑌤𑌾𑌦𑌿𑌸𑍍𑌥𑍂𑌲𑌪𑌰𑍍𑌯𑌂𑌤𑌮𑍇𑌤𑌤𑍍
𑌵𑌿𑌶𑍍𑌵𑌂 𑌯𑌤𑍍𑌰𑌾𑌭𑌾𑌸𑌮𑌾𑌤𑍍𑌰𑌂 𑌪𑍍𑌰𑌤𑍀𑌤𑌮𑍍 ।
𑌵𑍍𑌯𑍋𑌮𑌪𑍍𑌰𑌖𑍍𑌯𑌂 𑌸𑍂𑌕𑍍𑌷𑍍𑌮𑌮𑌾𑌦𑍍𑌯𑌂𑌤𑌹𑍀𑌨𑌂
𑌬𑍍𑌰𑌹𑍍𑌮𑌾𑌦𑍍𑌵𑍈𑌤𑌂 𑌯𑌤𑍍𑌤𑌦𑍇𑌵𑌾𑌹𑌮𑌸𑍍𑌮𑌿 ॥ 512॥

𑌸𑌰𑍍𑌵𑌾𑌧𑌾𑌰𑌂 𑌸𑌰𑍍𑌵𑌵𑌸𑍍𑌤𑍁𑌪𑍍𑌰𑌕𑌾𑌶𑌂
𑌸𑌰𑍍𑌵𑌾𑌕𑌾𑌰𑌂 𑌸𑌰𑍍𑌵𑌗𑌂 𑌸𑌰𑍍𑌵𑌶𑍂𑌨𑍍𑌯𑌮𑍍 ।
𑌨𑌿𑌤𑍍𑌯𑌂 𑌶𑍁𑌦𑍍𑌧𑌂 𑌨𑌿𑌶𑍍𑌚𑌲𑌂 𑌨𑌿𑌰𑍍𑌵𑌿𑌕𑌲𑍍𑌪𑌂 (𑌪𑌾𑌠𑌭𑍇𑌦𑌃 – 𑌨𑌿𑌷𑍍𑌕𑌲𑌂)
𑌬𑍍𑌰𑌹𑍍𑌮𑌾𑌦𑍍𑌵𑍈𑌤𑌂 𑌯𑌤𑍍𑌤𑌦𑍇𑌵𑌾𑌹𑌮𑌸𑍍𑌮𑌿 ॥ 513॥

𑌯𑌤𑍍𑌪𑍍𑌰𑌤𑍍𑌯𑌸𑍍𑌤𑌾𑌶𑍇𑌷𑌮𑌾𑌯𑌾𑌵𑌿𑌶𑍇𑌷𑌂
𑌪𑍍𑌰𑌤𑍍𑌯𑌗𑍍𑌰𑍂𑌪𑌂 𑌪𑍍𑌰𑌤𑍍𑌯𑌯𑌾𑌗𑌮𑍍𑌯𑌮𑌾𑌨𑌮𑍍 ।
𑌸𑌤𑍍𑌯𑌜𑍍𑌞𑌾𑌨𑌾𑌨𑌂𑌤𑌮𑌾𑌨𑌂𑌦𑌰𑍂𑌪𑌂
𑌬𑍍𑌰𑌹𑍍𑌮𑌾𑌦𑍍𑌵𑍈𑌤𑌂 𑌯𑌤𑍍𑌤𑌦𑍇𑌵𑌾𑌹𑌮𑌸𑍍𑌮𑌿 ॥ 514॥

𑌨𑌿𑌷𑍍𑌕𑍍𑌰𑌿𑌯𑍋𑌽𑌸𑍍𑌮𑍍𑌯𑌵𑌿𑌕𑌾𑌰𑍋𑌽𑌸𑍍𑌮𑌿
𑌨𑌿𑌷𑍍𑌕𑌲𑍋𑌽𑌸𑍍𑌮𑌿 𑌨𑌿𑌰𑌾𑌕𑍃𑌤𑌿𑌃 ।
𑌨𑌿𑌰𑍍𑌵𑌿𑌕𑌲𑍍𑌪𑍋𑌽𑌸𑍍𑌮𑌿 𑌨𑌿𑌤𑍍𑌯𑍋𑌽𑌸𑍍𑌮𑌿
𑌨𑌿𑌰𑌾𑌲𑌂𑌬𑍋𑌽𑌸𑍍𑌮𑌿 𑌨𑌿𑌰𑍍𑌦𑍍𑌵𑌯𑌃 ॥ 515॥

𑌸𑌰𑍍𑌵𑌾𑌤𑍍𑌮𑌕𑍋𑌽𑌹𑌂 𑌸𑌰𑍍𑌵𑍋𑌽𑌹𑌂 𑌸𑌰𑍍𑌵𑌾𑌤𑍀𑌤𑍋𑌽𑌹𑌮𑌦𑍍𑌵𑌯𑌃 ।
𑌕𑍇𑌵𑌲𑌾𑌖𑌂𑌡𑌬𑍋𑌧𑍋𑌽𑌹𑌮𑌾𑌨𑌂𑌦𑍋𑌽𑌹𑌂 𑌨𑌿𑌰𑌂𑌤𑌰𑌃 ॥ 516॥

𑌸𑍍𑌵𑌾𑌰𑌾𑌜𑍍𑌯𑌸𑌾𑌮𑍍𑌰𑌾𑌜𑍍𑌯𑌵𑌿𑌭𑍂𑌤𑌿𑌰𑍇𑌷𑌾
𑌭𑌵𑌤𑍍𑌕𑍃𑌪𑌾𑌶𑍍𑌰𑍀𑌮𑌹𑌿𑌮𑌪𑍍𑌰𑌸𑌾𑌦𑌾𑌤𑍍 ।
𑌪𑍍𑌰𑌾𑌪𑍍𑌤𑌾 𑌮𑌯𑌾 𑌶𑍍𑌰𑍀𑌗𑍁𑌰𑌵𑍇 𑌮𑌹𑌾𑌤𑍍𑌮𑌨𑍇
𑌨𑌮𑍋 𑌨𑌮𑌸𑍍𑌤𑍇𑌽𑌸𑍍𑌤𑍁 𑌪𑍁𑌨𑌰𑍍𑌨𑌮𑍋𑌽𑌸𑍍𑌤𑍁 ॥ 51𑍭॥

𑌮𑌹𑌾𑌸𑍍𑌵𑌪𑍍𑌨𑍇 𑌮𑌾𑌯𑌾𑌕𑍃𑌤𑌜𑌨𑌿𑌜𑌰𑌾𑌮𑍃𑌤𑍍𑌯𑍁𑌗𑌹𑌨𑍇
𑌭𑍍𑌰𑌮𑌂𑌤𑌂 𑌕𑍍𑌲𑌿𑌶𑍍𑌯𑌂𑌤𑌂 𑌬𑌹𑍁𑌲𑌤𑌰𑌤𑌾𑌪𑍈𑌰𑌨𑍁𑌦𑌿𑌨𑌮𑍍 । (𑌪𑌾𑌠𑌭𑍇𑌦𑌃 – 𑌰𑌨𑍁𑌕𑌲𑌮𑍍)
𑌅𑌹𑌂𑌕𑌾𑌰𑌵𑍍𑌯𑌾𑌘𑍍𑌰𑌵𑍍𑌯𑌥𑌿𑌤𑌮𑌿𑌮𑌮𑌤𑍍𑌯𑌂𑌤𑌕𑍃𑌪𑌯𑌾
𑌪𑍍𑌰𑌬𑍋𑌧𑍍𑌯 𑌪𑍍𑌰𑌸𑍍𑌵𑌾𑌪𑌾𑌤𑍍𑌪𑌰𑌮𑌵𑌿𑌤𑌵𑌾𑌨𑍍𑌮𑌾𑌮𑌸𑌿 𑌗𑍁𑌰𑍋 ॥ 51𑍮॥

𑌨𑌮𑌸𑍍𑌤𑌸𑍍𑌮𑍈 𑌸𑌦𑍈𑌕𑌸𑍍𑌮𑍈 𑌕𑌸𑍍𑌮𑍈𑌚𑌿𑌨𑍍𑌮𑌹𑌸𑍇 𑌨𑌮𑌃 । (𑌪𑌾𑌠𑌭𑍇𑌦𑌃 – 𑌸𑌦𑍇𑌕𑌸𑍍𑌮𑍈 𑌨𑌮𑌶𑍍𑌚𑌿𑌨𑍍𑌮𑌹𑌸𑍇 𑌮𑍁𑌹𑍁𑌃)
𑌯𑌦𑍇𑌤𑌦𑍍𑌵𑌿𑌶𑍍𑌵𑌰𑍂𑌪𑍇𑌣 𑌰𑌾𑌜𑌤𑍇 𑌗𑍁𑌰𑍁𑌰𑌾𑌜 𑌤𑍇 ॥ 51𑍯॥

𑌇𑌤𑌿 𑌨𑌤𑌮𑌵𑌲𑍋𑌕𑍍𑌯 𑌶𑌿𑌷𑍍𑌯𑌵𑌰𑍍𑌯𑌂
𑌸𑌮𑌧𑌿𑌗𑌤𑌾𑌤𑍍𑌮𑌸𑍁𑌖𑌂 𑌪𑍍𑌰𑌬𑍁𑌦𑍍𑌧𑌤𑌤𑍍𑌤𑍍𑌵𑌮𑍍 ।
𑌪𑍍𑌰𑌮𑍁𑌦𑌿𑌤𑌹𑍃𑌦𑌯𑌂 𑌸 𑌦𑍇𑌶𑌿𑌕𑍇𑌂𑌦𑍍𑌰𑌃 (𑌪𑌾𑌠𑌭𑍇𑌦𑌃 – 𑌹𑍃𑌦𑌯𑌃)
𑌪𑍁𑌨𑌰𑌿𑌦𑌮𑌾𑌹 𑌵𑌚𑌃 𑌪𑌰𑌂 𑌮𑌹𑌾𑌤𑍍𑌮𑌾 ॥ 520॥

𑌬𑍍𑌰𑌹𑍍𑌮𑌪𑍍𑌰𑌤𑍍𑌯𑌯𑌸𑌂𑌤𑌤𑌿𑌰𑍍𑌜𑌗𑌦𑌤𑍋 𑌬𑍍𑌰𑌹𑍍𑌮𑍈𑌵 𑌤𑌤𑍍𑌸𑌰𑍍𑌵𑌤𑌃 (𑌪𑌾𑌠𑌭𑍇𑌦𑌃 – 𑌸𑌤𑍍𑌸𑌰𑍍𑌵𑌤𑌃)
𑌪𑌶𑍍𑌯𑌾𑌧𑍍𑌯𑌾𑌤𑍍𑌮𑌦𑍃𑌶𑌾 𑌪𑍍𑌰𑌶𑌾𑌂𑌤𑌮𑌨𑌸𑌾 𑌸𑌰𑍍𑌵𑌾𑌸𑍍𑌵𑌵𑌸𑍍𑌥𑌾𑌸𑍍𑌵𑌪𑌿 ।
𑌰𑍂𑌪𑌾𑌦𑌨𑍍𑌯𑌦𑌵𑍇𑌕𑍍𑌷𑌿𑌤𑌂 𑌕𑌿𑌮𑌭𑌿𑌤𑌶𑍍𑌚𑌕𑍍𑌷𑍁𑌷𑍍𑌮𑌤𑌾𑌂 𑌦𑍃𑌶𑍍𑌯𑌤𑍇 (𑌪𑌾𑌠𑌭𑍇𑌦𑌃 – 𑌵𑌿𑌦𑍍𑌯𑌤𑍇)
𑌤𑌦𑍍𑌵𑌦𑍍𑌬𑍍𑌰𑌹𑍍𑌮𑌵𑌿𑌦𑌃 𑌸𑌤𑌃 𑌕𑌿𑌮𑌪𑌰𑌂 𑌬𑍁𑌦𑍍𑌧𑍇𑌰𑍍𑌵𑌿𑌹𑌾𑌰𑌾𑌸𑍍𑌪𑌦𑌮𑍍 ॥ 521॥

𑌕𑌸𑍍𑌤𑌾𑌂 𑌪𑌰𑌾𑌨𑌂𑌦𑌰𑌸𑌾𑌨𑍁𑌭𑍂𑌤𑌿-
𑌮𑍃𑌤𑍍𑌸𑍃𑌜𑍍𑌯 𑌶𑍂𑌨𑍍𑌯𑍇𑌷𑍁 𑌰𑌮𑍇𑌤 𑌵𑌿𑌦𑍍𑌵𑌾𑌨𑍍 । (𑌪𑌾𑌠𑌭𑍇𑌦𑌃 – 𑌮𑍁𑌤𑍍𑌸𑍃𑌜𑍍𑌯
𑌚𑌂𑌦𑍍𑌰𑍇 𑌮𑌹𑌾𑌹𑍍𑌲𑌾𑌦𑌿𑌨𑌿 𑌦𑍀𑌪𑍍𑌯𑌮𑌾𑌨𑍇)
𑌚𑌿𑌤𑍍𑌰𑍇𑌂𑌦𑍁𑌮𑌾𑌲𑍋𑌕𑌯𑌿𑌤𑍁𑌂 𑌕 𑌇𑌚𑍍𑌛𑍇𑌤𑍍 ॥ 522॥

𑌅𑌸𑌤𑍍𑌪𑌦𑌾𑌰𑍍𑌥𑌾𑌨𑍁𑌭𑌵𑍇𑌨 𑌕𑌿𑌂𑌚𑌿𑌨𑍍
𑌨 𑌹𑍍𑌯𑌸𑍍𑌤𑌿 𑌤𑍃𑌪𑍍𑌤𑌿𑌰𑍍𑌨 𑌚 𑌦𑍁𑌃𑌖𑌹𑌾𑌨𑌿𑌃 ।
𑌤𑌦𑌦𑍍𑌵𑌯𑌾𑌨𑌂𑌦𑌰𑌸𑌾𑌨𑍁𑌭𑍂𑌤𑍍𑌯𑌾
𑌤𑍃𑌪𑍍𑌤𑌃 𑌸𑍁𑌖𑌂 𑌤𑌿𑌷𑍍𑌠 𑌸𑌦𑌾𑌤𑍍𑌮𑌨𑌿𑌷𑍍𑌠𑌯𑌾 ॥ 523॥

𑌸𑍍𑌵𑌮𑍇𑌵 𑌸𑌰𑍍𑌵𑌥𑌾 𑌪𑌶𑍍𑌯𑌨𑍍𑌮𑌨𑍍𑌯𑌮𑌾𑌨𑌃 𑌸𑍍𑌵𑌮𑌦𑍍𑌵𑌯𑌮𑍍 । (𑌪𑌾𑌠𑌭𑍇𑌦𑌃 – 𑌸𑌰𑍍𑌵𑌤𑌃)
𑌸𑍍𑌵𑌾𑌨𑌂𑌦𑌮𑌨𑍁𑌭𑍁𑌂𑌜𑌾𑌨𑌃 𑌕𑌾𑌲𑌂 𑌨𑌯 𑌮𑌹𑌾𑌮𑌤𑍇 ॥ 524॥

𑌅𑌖𑌂𑌡𑌬𑍋𑌧𑌾𑌤𑍍𑌮𑌨𑌿 𑌨𑌿𑌰𑍍𑌵𑌿𑌕𑌲𑍍𑌪𑍇
𑌵𑌿𑌕𑌲𑍍𑌪𑌨𑌂 𑌵𑍍𑌯𑍋𑌮𑍍𑌨𑌿 𑌪𑍁𑌰𑌪𑍍𑌰𑌕𑌲𑍍𑌪𑌨𑌮𑍍 ।
𑌤𑌦𑌦𑍍𑌵𑌯𑌾𑌨𑌂𑌦𑌮𑌯𑌾𑌤𑍍𑌮𑌨𑌾 𑌸𑌦𑌾
𑌶𑌾𑌂𑌤𑌿𑌂 𑌪𑌰𑌾𑌮𑍇𑌤𑍍𑌯 𑌭𑌜𑌸𑍍𑌵 𑌮𑍌𑌨𑌮𑍍 ॥ 525॥

𑌤𑍂𑌷𑍍𑌣𑍀𑌮𑌵𑌸𑍍𑌥𑌾 𑌪𑌰𑌮𑍋𑌪𑌶𑌾𑌂𑌤𑌿𑌃
𑌬𑍁𑌦𑍍𑌧𑍇𑌰𑌸𑌤𑍍𑌕𑌲𑍍𑌪𑌵𑌿𑌕𑌲𑍍𑌪𑌹𑍇𑌤𑍋𑌃 ।
𑌬𑍍𑌰𑌹𑍍𑌮𑌾𑌤𑍍𑌮𑌨𑍋 𑌬𑍍𑌰𑌹𑍍𑌮𑌵𑌿𑌦𑍋 𑌮𑌹𑌾𑌤𑍍𑌮𑌨𑍋
𑌯𑌤𑍍𑌰𑌾𑌦𑍍𑌵𑌯𑌾𑌨𑌂𑌦𑌸𑍁𑌖𑌂 𑌨𑌿𑌰𑌂𑌤𑌰𑌮𑍍 ॥ 526॥

𑌨𑌾𑌸𑍍𑌤𑌿 𑌨𑌿𑌰𑍍𑌵𑌾𑌸𑌨𑌾𑌨𑍍𑌮𑍌𑌨𑌾𑌤𑍍𑌪𑌰𑌂 𑌸𑍁𑌖𑌕𑍃𑌦𑍁𑌤𑍍𑌤𑌮𑌮𑍍 ।
𑌵𑌿𑌜𑍍𑌞𑌾𑌤𑌾𑌤𑍍𑌮𑌸𑍍𑌵𑌰𑍂𑌪𑌸𑍍𑌯 𑌸𑍍𑌵𑌾𑌨𑌂𑌦𑌰𑌸𑌪𑌾𑌯𑌿𑌨𑌃 ॥ 52𑍭॥

𑌗𑌚𑍍𑌛𑌂𑌸𑍍𑌤𑌿𑌷𑍍𑌠𑌨𑍍𑌨𑍁𑌪𑌵𑌿𑌶𑌂𑌛𑌯𑌾𑌨𑍋 𑌵𑌾𑌽𑌨𑍍𑌯𑌥𑌾𑌪𑌿 𑌵𑌾 ।
𑌯𑌥𑍇𑌚𑍍𑌛𑌯𑌾 𑌵𑌸𑍇𑌦𑍍𑌵𑌿𑌦𑍍𑌵𑌾𑌨𑌾𑌤𑍍𑌮𑌾𑌰𑌾𑌮𑌃 𑌸𑌦𑌾 𑌮𑍁𑌨𑌿𑌃 ॥ 52𑍮॥

𑌨 𑌦𑍇𑌶𑌕𑌾𑌲𑌾𑌸𑌨𑌦𑌿𑌗𑍍𑌯𑌮𑌾𑌦𑌿-
𑌲𑌕𑍍𑌷𑍍𑌯𑌾𑌦𑍍𑌯𑌪𑍇𑌕𑍍𑌷𑌾𑌽𑌪𑍍𑌰𑌤𑌿𑌬𑌦𑍍𑌧𑌵𑍃𑌤𑍍𑌤𑍇𑌃 । (𑌪𑌾𑌠𑌭𑍇𑌦𑌃 – 𑌪𑍍𑌰𑌤𑌿𑌬𑌦𑍍𑌧
𑌸𑌂𑌸𑌿𑌦𑍍𑌧𑌤𑌤𑍍𑌤𑍍𑌵𑌸𑍍𑌯 𑌮𑌹𑌾𑌤𑍍𑌮𑌨𑍋𑌽𑌸𑍍𑌤𑌿)
𑌸𑍍𑌵𑌵𑍇𑌦𑌨𑍇 𑌕𑌾 𑌨𑌿𑌯𑌮𑌾𑌦𑍍𑌯𑌵𑌸𑍍𑌥𑌾 ॥ 52𑍯॥

𑌘𑌟𑍋𑌽𑌯𑌮𑌿𑌤𑌿 𑌵𑌿𑌜𑍍𑌞𑌾𑌤𑍁𑌂 𑌨𑌿𑌯𑌮𑌃 𑌕𑍋𑌽𑌨𑍍𑌵𑌵𑍇𑌕𑍍𑌷𑌤𑍇 । (𑌪𑌾𑌠𑌭𑍇𑌦𑌃 – 𑌅𑌪𑍇𑌕𑍍𑌷𑍍𑌯𑌤𑍇)
𑌵𑌿𑌨𑌾 𑌪𑍍𑌰𑌮𑌾𑌣𑌸𑍁𑌷𑍍𑌠𑍁𑌤𑍍𑌵𑌂 𑌯𑌸𑍍𑌮𑌿𑌨𑍍𑌸𑌤𑌿 𑌪𑌦𑌾𑌰𑍍𑌥𑌧𑍀𑌃 ॥ 530॥

𑌅𑌯𑌮𑌾𑌤𑍍𑌮𑌾 𑌨𑌿𑌤𑍍𑌯𑌸𑌿𑌦𑍍𑌧𑌃 𑌪𑍍𑌰𑌮𑌾𑌣𑍇 𑌸𑌤𑌿 𑌭𑌾𑌸𑌤𑍇 ।
𑌨 𑌦𑍇𑌶𑌂 𑌨𑌾𑌪𑌿 𑌵𑌾 𑌕𑌾𑌲𑌂 𑌨 𑌶𑍁𑌦𑍍𑌧𑌿𑌂 𑌵𑌾𑌪𑍍𑌯𑌪𑍇𑌕𑍍𑌷𑌤𑍇 ॥ 531॥

𑌦𑍇𑌵𑌦𑌤𑍍𑌤𑍋𑌽𑌹𑌮𑌿𑌤𑍍𑌯𑍇𑌤𑌦𑍍𑌵𑌿𑌜𑍍𑌞𑌾𑌨𑌂 𑌨𑌿𑌰𑌪𑍇𑌕𑍍𑌷𑌕𑌮𑍍 ।
𑌤𑌦𑍍𑌵𑌦𑍍𑌬𑍍𑌰𑌹𑍍𑌮𑌵𑌿𑌦𑍋𑌽𑌪𑍍𑌯𑌸𑍍𑌯 𑌬𑍍𑌰𑌹𑍍𑌮𑌾𑌹𑌮𑌿𑌤𑌿 𑌵𑍇𑌦𑌨𑌮𑍍 ॥ 532॥

𑌭𑌾𑌨𑍁𑌨𑍇𑌵 𑌜𑌗𑌤𑍍𑌸𑌰𑍍𑌵𑌂 𑌭𑌾𑌸𑌤𑍇 𑌯𑌸𑍍𑌯 𑌤𑍇𑌜𑌸𑌾 ।
𑌅𑌨𑌾𑌤𑍍𑌮𑌕𑌮𑌸𑌤𑍍𑌤𑍁𑌚𑍍𑌛𑌂 𑌕𑌿𑌂 𑌨𑍁 𑌤𑌸𑍍𑌯𑌾𑌵𑌭𑌾𑌸𑌕𑌮𑍍 ॥ 533॥

𑌵𑍇𑌦𑌶𑌾𑌸𑍍𑌤𑍍𑌰𑌪𑍁𑌰𑌾𑌣𑌾𑌨𑌿 𑌭𑍂𑌤𑌾𑌨𑌿 𑌸𑌕𑌲𑌾𑌨𑍍𑌯𑌪𑌿 ।
𑌯𑍇𑌨𑌾𑌰𑍍𑌥𑌵𑌂𑌤𑌿 𑌤𑌂 𑌕𑌿𑌨𑍍𑌨𑍁 𑌵𑌿𑌜𑍍𑌞𑌾𑌤𑌾𑌰𑌂 𑌪𑍍𑌰𑌕𑌾𑌶𑌯𑍇𑌤𑍍 ॥ 534॥

𑌏𑌷 𑌸𑍍𑌵𑌯𑌂𑌜𑍍𑌯𑍋𑌤𑌿𑌰𑌨𑌂𑌤𑌶𑌕𑍍𑌤𑌿𑌃
𑌆𑌤𑍍𑌮𑌾𑌽𑌪𑍍𑌰𑌮𑍇𑌯𑌃 𑌸𑌕𑌲𑌾𑌨𑍁𑌭𑍂𑌤𑌿𑌃 ।
𑌯𑌮𑍇𑌵 𑌵𑌿𑌜𑍍𑌞𑌾𑌯 𑌵𑌿𑌮𑍁𑌕𑍍𑌤𑌬𑌂𑌧𑍋
𑌜𑌯𑌤𑍍𑌯𑌯𑌂 𑌬𑍍𑌰𑌹𑍍𑌮𑌵𑌿𑌦𑍁𑌤𑍍𑌤𑌮𑍋𑌤𑍍𑌤𑌮𑌃 ॥ 535॥

𑌨 𑌖𑌿𑌦𑍍𑌯𑌤𑍇 𑌨𑍋 𑌵𑌿𑌷𑌯𑍈𑌃 𑌪𑍍𑌰𑌮𑍋𑌦𑌤𑍇
𑌨 𑌸𑌜𑍍𑌜𑌤𑍇 𑌨𑌾𑌪𑌿 𑌵𑌿𑌰𑌜𑍍𑌯𑌤𑍇 𑌚 ।
𑌸𑍍𑌵𑌸𑍍𑌮𑌿𑌨𑍍𑌸𑌦𑌾 𑌕𑍍𑌰𑍀𑌡𑌤𑌿 𑌨𑌂𑌦𑌤𑌿 𑌸𑍍𑌵𑌯𑌂
𑌨𑌿𑌰𑌂𑌤𑌰𑌾𑌨𑌂𑌦𑌰𑌸𑍇𑌨 𑌤𑍃𑌪𑍍𑌤𑌃 ॥ 536॥

𑌕𑍍𑌷𑍁𑌧𑌾𑌂 𑌦𑍇𑌹𑌵𑍍𑌯𑌥𑌾𑌂 𑌤𑍍𑌯𑌕𑍍𑌤𑍍𑌵𑌾 𑌬𑌾𑌲𑌃 𑌕𑍍𑌰𑍀𑌡𑌤𑌿 𑌵𑌸𑍍𑌤𑍁𑌨𑌿𑌃 । (𑌪𑌾𑌠𑌭𑍇𑌦𑌃 – 𑌵𑌸𑍍𑌤𑍁𑌨𑌿)
𑌤𑌥𑍈𑌵 𑌵𑌿𑌦𑍍𑌵𑌾𑌨𑍍 𑌰𑌮𑌤𑍇 𑌨𑌿𑌰𑍍𑌮𑌮𑍋 𑌨𑌿𑌰𑌹𑌂 𑌸𑍁𑌖𑍀 ॥ 53𑍭॥

𑌚𑌿𑌂𑌤𑌾𑌶𑍂𑌨𑍍𑌯𑌮𑌦𑍈𑌨𑍍𑌯𑌭𑍈𑌕𑍍𑌷𑌮𑌶𑌨𑌂 𑌪𑌾𑌨𑌂 𑌸𑌰𑌿𑌦𑍍𑌵𑌾𑌰𑌿𑌷𑍁
𑌸𑍍𑌵𑌾𑌤𑌂𑌤𑍍𑌰𑍍𑌯𑍇𑌣 𑌨𑌿𑌰𑌂𑌕𑍁𑌶𑌾 𑌸𑍍𑌥𑌿𑌤𑌿𑌰𑌭𑍀𑌰𑍍𑌨𑌿𑌦𑍍𑌰𑌾 𑌶𑍍𑌮𑌶𑌾𑌨𑍇 𑌵𑌨𑍇 ।
𑌵𑌸𑍍𑌤𑍍𑌰𑌂 𑌕𑍍𑌷𑌾𑌲𑌨𑌶𑍋𑌷𑌣𑌾𑌦𑌿𑌰𑌹𑌿𑌤𑌂 𑌦𑌿𑌗𑍍𑌵𑌾𑌸𑍍𑌤𑍁 𑌶𑌯𑍍𑌯𑌾 𑌮𑌹𑍀
𑌸𑌂𑌚𑌾𑌰𑍋 𑌨𑌿𑌗𑌮𑌾𑌂𑌤𑌵𑍀𑌥𑌿𑌷𑍁 𑌵𑌿𑌦𑌾𑌂 𑌕𑍍𑌰𑍀𑌡𑌾 𑌪𑌰𑍇 𑌬𑍍𑌰𑌹𑍍𑌮𑌣𑌿 ॥ 53𑍮॥

𑌵𑌿𑌮𑌾𑌨𑌮𑌾𑌲𑌂𑌬𑍍𑌯 𑌶𑌰𑍀𑌰𑌮𑍇𑌤𑌦𑍍
𑌭𑍁𑌨𑌕𑍍𑌤𑍍𑌯𑌶𑍇𑌷𑌾𑌨𑍍𑌵𑌿𑌷𑌯𑌾𑌨𑍁𑌪𑌸𑍍𑌥𑌿𑌤𑌾𑌨𑍍 ।
𑌪𑌰𑍇𑌚𑍍𑌛𑌯𑌾 𑌬𑌾𑌲𑌵𑌦𑌾𑌤𑍍𑌮𑌵𑍇𑌤𑍍𑌤𑌾
𑌯𑍋𑌽𑌵𑍍𑌯𑌕𑍍𑌤𑌲𑌿𑌂𑌗𑍋𑌽𑌨𑌨𑍁𑌷𑌕𑍍𑌤𑌬𑌾𑌹𑍍𑌯𑌃 ॥ 53𑍯॥

𑌦𑌿𑌗𑌂𑌬𑌰𑍋 𑌵𑌾𑌪𑌿 𑌚 𑌸𑌾𑌂𑌬𑌰𑍋 𑌵𑌾
𑌤𑍍𑌵𑌗𑌂𑌬𑌰𑍋 𑌵𑌾𑌪𑌿 𑌚𑌿𑌦𑌂𑌬𑌰𑌸𑍍𑌥𑌃 ।
𑌉𑌨𑍍𑌮𑌤𑍍𑌤𑌵𑌦𑍍𑌵𑌾𑌪𑌿 𑌚 𑌬𑌾𑌲𑌵𑌦𑍍𑌵𑌾
𑌪𑌿𑌶𑌾𑌚𑌵𑌦𑍍𑌵𑌾𑌪𑌿 𑌚𑌰𑌤𑍍𑌯𑌵𑌨𑍍𑌯𑌾𑌮𑍍 ॥ 540॥

𑌕𑌾𑌮𑌾𑌨𑍍𑌨𑌿𑌷𑍍𑌕𑌾𑌮𑌰𑍂𑌪𑍀 𑌸𑌂𑌶𑍍𑌚𑌰𑌤𑍍𑌯𑍇𑌕𑌚𑌰𑍋 𑌮𑍁𑌨𑌿𑌃 । (𑌪𑌾𑌠𑌭𑍇𑌦𑌃 – 𑌕𑌾𑌮𑌾𑌨𑍍𑌨𑍀 𑌕𑌾𑌮𑌰𑍂𑌪𑍀)
𑌸𑍍𑌵𑌾𑌤𑍍𑌮𑌨𑍈𑌵 𑌸𑌦𑌾 𑌤𑍁𑌷𑍍𑌟𑌃 𑌸𑍍𑌵𑌯𑌂 𑌸𑌰𑍍𑌵𑌾𑌤𑍍𑌮𑌨𑌾 𑌸𑍍𑌥𑌿𑌤𑌃 ॥ 541॥

𑌕𑍍𑌵𑌚𑌿𑌨𑍍𑌮𑍂𑌢𑍋 𑌵𑌿𑌦𑍍𑌵𑌾𑌨𑍍 𑌕𑍍𑌵𑌚𑌿𑌦𑌪𑌿 𑌮𑌹𑌾𑌰𑌾𑌜𑌵𑌿𑌭𑌵𑌃
𑌕𑍍𑌵𑌚𑌿𑌦𑍍𑌭𑍍𑌰𑌾𑌂𑌤𑌃 𑌸𑍌𑌮𑍍𑌯𑌃 𑌕𑍍𑌵𑌚𑌿𑌦𑌜𑌗𑌰𑌾𑌚𑌾𑌰𑌕𑌲𑌿𑌤𑌃 ।
𑌕𑍍𑌵𑌚𑌿𑌤𑍍𑌪𑌾𑌤𑍍𑌰𑍀𑌭𑍂𑌤𑌃 𑌕𑍍𑌵𑌚𑌿𑌦𑌵𑌮𑌤𑌃 𑌕𑍍𑌵𑌾𑌪𑍍𑌯𑌵𑌿𑌦𑌿𑌤𑌃
𑌚𑌰𑌤𑍍𑌯𑍇𑌵𑌂 𑌪𑍍𑌰𑌾𑌜𑍍𑌞𑌃 𑌸𑌤𑌤𑌪𑌰𑌮𑌾𑌨𑌂𑌦𑌸𑍁𑌖𑌿𑌤𑌃 ॥ 542॥

𑌨𑌿𑌰𑍍𑌧𑌨𑍋𑌽𑌪𑌿 𑌸𑌦𑌾 𑌤𑍁𑌷𑍍𑌟𑍋𑌽𑌪𑍍𑌯𑌸𑌹𑌾𑌯𑍋 𑌮𑌹𑌾𑌬𑌲𑌃 ।
𑌨𑌿𑌤𑍍𑌯𑌤𑍃𑌪𑍍𑌤𑍋𑌽𑌪𑍍𑌯𑌭𑍁𑌂𑌜𑌾𑌨𑍋𑌽𑌪𑍍𑌯𑌸𑌮𑌃 𑌸𑌮𑌦𑌰𑍍𑌶𑌨𑌃 ॥ 543॥

𑌅𑌪𑌿 𑌕𑍁𑌰𑍍𑌵𑌨𑍍𑌨𑌕𑍁𑌰𑍍𑌵𑌾𑌣𑌶𑍍𑌚𑌾𑌭𑍋𑌕𑍍𑌤𑌾 𑌫𑌲𑌭𑍋𑌗𑍍𑌯𑌪𑌿 ।
𑌶𑌰𑍀𑌰𑍍𑌯𑌪𑍍𑌯𑌶𑌰𑍀𑌰𑍍𑌯𑍇𑌷 𑌪𑌰𑌿𑌚𑍍𑌛𑌿𑌨𑍍𑌨𑍋𑌽𑌪𑌿 𑌸𑌰𑍍𑌵𑌗𑌃 ॥ 544॥

𑌅𑌶𑌰𑍀𑌰𑌂 𑌸𑌦𑌾 𑌸𑌂𑌤𑌮𑌿𑌮𑌂 𑌬𑍍𑌰𑌹𑍍𑌮𑌵𑌿𑌦𑌂 𑌕𑍍𑌵𑌚𑌿𑌤𑍍 ।
𑌪𑍍𑌰𑌿𑌯𑌾𑌪𑍍𑌰𑌿𑌯𑍇 𑌨 𑌸𑍍𑌪𑍃𑌶𑌤𑌸𑍍𑌤𑌥𑍈𑌵 𑌚 𑌶𑍁𑌭𑌾𑌶𑍁𑌭𑍇 ॥ 545॥

𑌸𑍍𑌥𑍂𑌲𑌾𑌦𑌿𑌸𑌂𑌬𑌂𑌧𑌵𑌤𑍋𑌽𑌭𑌿𑌮𑌾𑌨𑌿𑌨𑌃
𑌸𑍁𑌖𑌂 𑌚 𑌦𑍁𑌃𑌖𑌂 𑌚 𑌶𑍁𑌭𑌾𑌶𑍁𑌭𑍇 𑌚 ।
𑌵𑌿𑌧𑍍𑌵𑌸𑍍𑌤𑌬𑌂𑌧𑌸𑍍𑌯 𑌸𑌦𑌾𑌤𑍍𑌮𑌨𑍋 𑌮𑍁𑌨𑍇𑌃
𑌕𑍁𑌤𑌃 𑌶𑍁𑌭𑌂 𑌵𑌾𑌽𑌪𑍍𑌯𑌶𑍁𑌭𑌂 𑌫𑌲𑌂 𑌵𑌾 ॥ 546॥

𑌤𑌮𑌸𑌾 𑌗𑍍𑌰𑌸𑍍𑌤𑌵𑌦𑍍𑌭𑌾𑌨𑌾𑌦𑌗𑍍𑌰𑌸𑍍𑌤𑍋𑌽𑌪𑌿 𑌰𑌵𑌿𑌰𑍍𑌜𑌨𑍈𑌃 ।
𑌗𑍍𑌰𑌸𑍍𑌤 𑌇𑌤𑍍𑌯𑍁𑌚𑍍𑌯𑌤𑍇 𑌭𑍍𑌰𑌾𑌂𑌤𑍍𑌯𑌾𑌂 𑌹𑍍𑌯𑌜𑍍𑌞𑌾𑌤𑍍𑌵𑌾 𑌵𑌸𑍍𑌤𑍁𑌲𑌕𑍍𑌷𑌣𑌮𑍍 ॥ 54𑍭॥ (𑌪𑌾𑌠𑌭𑍇𑌦𑌃 – 𑌭𑍍𑌰𑌾𑌂𑌤𑍍𑌯𑌾)
𑌤𑌦𑍍𑌵𑌦𑍍𑌦𑍇𑌹𑌾𑌦𑌿𑌬𑌂𑌧𑍇𑌭𑍍𑌯𑍋 𑌵𑌿𑌮𑍁𑌕𑍍𑌤𑌂 𑌬𑍍𑌰𑌹𑍍𑌮𑌵𑌿𑌤𑍍𑌤𑌮𑌮𑍍 ।
𑌪𑌶𑍍𑌯𑌂𑌤𑌿 𑌦𑍇𑌹𑌿𑌵𑌨𑍍𑌮𑍂𑌢𑌾𑌃 𑌶𑌰𑍀𑌰𑌾𑌭𑌾𑌸𑌦𑌰𑍍𑌶𑌨𑌾𑌤𑍍 ॥ 54𑍮॥

𑌅𑌹𑌿𑌰𑍍𑌨𑌿𑌰𑍍𑌲𑍍𑌵𑌯𑌨𑍀𑌂 𑌵𑌾𑌯𑌂 𑌮𑍁𑌕𑍍𑌤𑍍𑌵𑌾 𑌦𑍇𑌹𑌂 𑌤𑍁 𑌤𑌿𑌷𑍍𑌠𑌤𑌿 । (𑌪𑌾𑌠𑌭𑍇𑌦𑌃 – 𑌅𑌹𑌿𑌨𑌿)
𑌇𑌤𑌸𑍍𑌤𑌤𑌶𑍍𑌚𑌾𑌲𑍍𑌯𑌮𑌾𑌨𑍋 𑌯𑌤𑍍𑌕𑌿𑌂𑌚𑌿𑌤𑍍𑌪𑍍𑌰𑌾𑌣𑌵𑌾𑌯𑍁𑌨𑌾 ॥ 54𑍯॥

𑌸𑍍𑌤𑍍𑌰𑍋𑌤𑌸𑌾 𑌨𑍀𑌯𑌤𑍇 𑌦𑌾𑌰𑍁 𑌯𑌥𑌾 𑌨𑌿𑌮𑍍𑌨𑍋𑌨𑍍𑌨𑌤𑌸𑍍𑌥𑌲𑌮𑍍 ।
𑌦𑍈𑌵𑍇𑌨 𑌨𑍀𑌯𑌤𑍇 𑌦𑍇𑌹𑍋 𑌯𑌥𑌾𑌕𑌾𑌲𑍋𑌪𑌭𑍁𑌕𑍍𑌤𑌿𑌷𑍁 ॥ 550॥

𑌪𑍍𑌰𑌾𑌰𑌬𑍍𑌧𑌕𑌰𑍍𑌮𑌪𑌰𑌿𑌕𑌲𑍍𑌪𑌿𑌤𑌵𑌾𑌸𑌨𑌾𑌭𑌿𑌃
𑌸𑌂𑌸𑌾𑌰𑌿𑌵𑌚𑍍𑌚𑌰𑌤𑌿 𑌭𑍁𑌕𑍍𑌤𑌿𑌷𑍁 𑌮𑍁𑌕𑍍𑌤𑌦𑍇𑌹𑌃 ।
𑌸𑌿𑌦𑍍𑌧𑌃 𑌸𑍍𑌵𑌯𑌂 𑌵𑌸𑌤𑌿 𑌸𑌾𑌕𑍍𑌷𑌿𑌵𑌦𑌤𑍍𑌰 𑌤𑍂𑌷𑍍𑌣𑍀𑌂
𑌚𑌕𑍍𑌰𑌸𑍍𑌯 𑌮𑍂𑌲𑌮𑌿𑌵 𑌕𑌲𑍍𑌪𑌵𑌿𑌕𑌲𑍍𑌪𑌶𑍂𑌨𑍍𑌯𑌃 ॥ 551॥

𑌨𑍈𑌵𑍇𑌂𑌦𑍍𑌰𑌿𑌯𑌾𑌣𑌿 𑌵𑌿𑌷𑌯𑍇𑌷𑍁 𑌨𑌿𑌯𑍁𑌂𑌕𑍍𑌤 𑌏𑌷
𑌨𑍈𑌵𑌾𑌪𑌯𑍁𑌂𑌕𑍍𑌤 𑌉𑌪𑌦𑌰𑍍𑌶𑌨𑌲𑌕𑍍𑌷𑌣𑌸𑍍𑌥𑌃 ।
𑌨𑍈𑌵 𑌕𑍍𑌰𑌿𑌯𑌾𑌫𑌲𑌮𑌪𑍀𑌷𑌦𑌵𑍇𑌕𑍍𑌷𑌤𑍇 𑌸 (𑌪𑌾𑌠𑌭𑍇𑌦𑌃 – 𑌅𑌪𑍀𑌷𑌦𑌪𑍇𑌕𑍍𑌷𑌤𑍇 𑌸𑌃)
𑌸𑍍𑌵𑌾𑌨𑌂𑌦𑌸𑌾𑌂𑌦𑍍𑌰𑌰𑌸𑌪𑌾𑌨𑌸𑍁𑌮𑌤𑍍𑌤𑌚𑌿𑌤𑍍𑌤𑌃 ॥ 552॥

𑌲𑌕𑍍𑌷𑍍𑌯𑌾𑌲𑌕𑍍𑌷𑍍𑌯𑌗𑌤𑌿𑌂 𑌤𑍍𑌯𑌕𑍍𑌤𑍍𑌵𑌾 𑌯𑌸𑍍𑌤𑌿𑌷𑍍𑌠𑍇𑌤𑍍𑌕𑍇𑌵𑌲𑌾𑌤𑍍𑌮𑌨𑌾 ।
𑌶𑌿𑌵 𑌏𑌵 𑌸𑍍𑌵𑌯𑌂 𑌸𑌾𑌕𑍍𑌷𑌾𑌦𑌯𑌂 𑌬𑍍𑌰𑌹𑍍𑌮𑌵𑌿𑌦𑍁𑌤𑍍𑌤𑌮𑌃 ॥ 553॥

𑌜𑍀𑌵𑌨𑍍𑌨𑍇𑌵 𑌸𑌦𑌾 𑌮𑍁𑌕𑍍𑌤𑌃 𑌕𑍃𑌤𑌾𑌰𑍍𑌥𑍋 𑌬𑍍𑌰𑌹𑍍𑌮𑌵𑌿𑌤𑍍𑌤𑌮𑌃 ।
𑌉𑌪𑌾𑌧𑌿𑌨𑌾𑌶𑌾𑌦𑍍𑌬𑍍𑌰𑌹𑍍𑌮𑍈𑌵 𑌸𑌨𑍍 𑌬𑍍𑌰𑌹𑍍𑌮𑌾𑌪𑍍𑌯𑍇𑌤𑌿 𑌨𑌿𑌰𑍍𑌦𑍍𑌵𑌯𑌮𑍍 ॥ 554॥

𑌶𑍈𑌲𑍂𑌷𑍋 𑌵𑍇𑌷𑌸𑌦𑍍𑌭𑌾𑌵𑌾𑌭𑌾𑌵𑌯𑍋𑌶𑍍𑌚 𑌯𑌥𑌾 𑌪𑍁𑌮𑌾𑌨𑍍 ।
𑌤𑌥𑍈𑌵 𑌬𑍍𑌰𑌹𑍍𑌮𑌵𑌿𑌚𑍍𑌛𑍍𑌰𑍇𑌷𑍍𑌠𑌃 𑌸𑌦𑌾 𑌬𑍍𑌰𑌹𑍍𑌮𑍈𑌵 𑌨𑌾𑌪𑌰𑌃 ॥ 555॥

𑌯𑌤𑍍𑌰 𑌕𑍍𑌵𑌾𑌪𑌿 𑌵𑌿𑌶𑍀𑌰𑍍𑌣𑌂 𑌸𑌤𑍍𑌪𑌰𑍍𑌣𑌮𑌿𑌵 𑌤𑌰𑍋𑌰𑍍𑌵𑌪𑍁𑌃 𑌪𑌤𑌤𑌾𑌤𑍍 । (𑌪𑌾𑌠𑌭𑍇𑌦𑌃 – 𑌵𑌿𑌶𑍀𑌰𑍍𑌣𑌂 𑌪𑌰𑍍𑌣𑌮𑌿𑌵)
𑌬𑍍𑌰𑌹𑍍𑌮𑍀𑌭𑍂𑌤𑌸𑍍𑌯 𑌯𑌤𑍇𑌃 𑌪𑍍𑌰𑌾𑌗𑍇𑌵 𑌤𑌚𑍍𑌚𑌿𑌦𑌗𑍍𑌨𑌿𑌨𑌾 𑌦𑌗𑍍𑌧𑌮𑍍 ॥ 556॥

𑌸𑌦𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌤𑌿𑌷𑍍𑌠𑌤𑍋 𑌮𑍁𑌨𑍇𑌃
𑌪𑍂𑌰𑍍𑌣𑌾𑌽𑌦𑍍𑌵𑌯𑌾𑌨𑌂𑌦𑌮𑌯𑌾𑌤𑍍𑌮𑌨𑌾 𑌸𑌦𑌾 ।
𑌨 𑌦𑍇𑌶𑌕𑌾𑌲𑌾𑌦𑍍𑌯𑍁𑌚𑌿𑌤𑌪𑍍𑌰𑌤𑍀𑌕𑍍𑌷𑌾
𑌤𑍍𑌵𑌙𑍍𑌮𑌾𑌂𑌸𑌵𑌿𑌟𑍍𑌪𑌿𑌂𑌡𑌵𑌿𑌸𑌰𑍍𑌜𑌨𑌾𑌯 ॥ 55𑍭॥

𑌦𑍇𑌹𑌸𑍍𑌯 𑌮𑍋𑌕𑍍𑌷𑍋 𑌨𑍋 𑌮𑍋𑌕𑍍𑌷𑍋 𑌨 𑌦𑌂𑌡𑌸𑍍𑌯 𑌕𑌮𑌂𑌡𑌲𑍋𑌃 ।
𑌅𑌵𑌿𑌦𑍍𑌯𑌾𑌹𑍃𑌦𑌯𑌗𑍍𑌰𑌂𑌥𑌿𑌮𑍋𑌕𑍍𑌷𑍋 𑌮𑍋𑌕𑍍𑌷𑍋 𑌯𑌤𑌸𑍍𑌤𑌤𑌃 ॥ 55𑍮॥

𑌕𑍁𑌲𑍍𑌯𑌾𑌯𑌾𑌮𑌥 𑌨𑌦𑍍𑌯𑌾𑌂 𑌵𑌾 𑌶𑌿𑌵𑌕𑍍𑌷𑍇𑌤𑍍𑌰𑍇𑌽𑌪𑌿 𑌚𑌤𑍍𑌵𑌰𑍇 ।
𑌪𑌰𑍍𑌣𑌂 𑌪𑌤𑌤𑌿 𑌚𑍇𑌤𑍍𑌤𑍇𑌨 𑌤𑌰𑍋𑌃 𑌕𑌿𑌂 𑌨𑍁 𑌶𑍁𑌭𑌾𑌶𑍁𑌭𑌮𑍍 ॥ 55𑍯॥

𑌪𑌤𑍍𑌰𑌸𑍍𑌯 𑌪𑍁𑌷𑍍𑌪𑌸𑍍𑌯 𑌫𑌲𑌸𑍍𑌯 𑌨𑌾𑌶𑌵𑌦𑍍-
𑌦𑍇𑌹𑍇𑌂𑌦𑍍𑌰𑌿𑌯𑌪𑍍𑌰𑌾𑌣𑌧𑌿𑌯𑌾𑌂 𑌵𑌿𑌨𑌾𑌶𑌃 ।
𑌨𑍈𑌵𑌾𑌤𑍍𑌮𑌨𑌃 𑌸𑍍𑌵𑌸𑍍𑌯 𑌸𑌦𑌾𑌤𑍍𑌮𑌕𑌸𑍍𑌯𑌾-
𑌨𑌂𑌦𑌾𑌕𑍃𑌤𑍇𑌰𑍍𑌵𑍃𑌕𑍍𑌷𑌵𑌦𑌸𑍍𑌤𑌿 𑌚𑍈𑌷𑌃 ॥ 560॥ (𑌪𑌾𑌠𑌭𑍇𑌦𑌃 – 𑌵𑌦𑌾𑌸𑍍𑌤 𑌏𑌷𑌃)

𑌪𑍍𑌰𑌜𑍍𑌞𑌾𑌨𑌘𑌨 𑌇𑌤𑍍𑌯𑌾𑌤𑍍𑌮𑌲𑌕𑍍𑌷𑌣𑌂 𑌸𑌤𑍍𑌯𑌸𑍂𑌚𑌕𑌮𑍍 ।
𑌅𑌨𑍂𑌦𑍍𑌯𑍌𑌪𑌾𑌧𑌿𑌕𑌸𑍍𑌯𑍈𑌵 𑌕𑌥𑌯𑌂𑌤𑌿 𑌵𑌿𑌨𑌾𑌶𑌨𑌮𑍍 ॥ 561॥

𑌅𑌵𑌿𑌨𑌾𑌶𑍀 𑌵𑌾 𑌅𑌰𑍇𑌽𑌯𑌮𑌾𑌤𑍍𑌮𑍇𑌤𑌿 𑌶𑍍𑌰𑍁𑌤𑌿𑌰𑌾𑌤𑍍𑌮𑌨𑌃 ।
𑌪𑍍𑌰𑌬𑍍𑌰𑌵𑍀𑌤𑍍𑌯𑌵𑌿𑌨𑌾𑌶𑌿𑌤𑍍𑌵𑌂 𑌵𑌿𑌨𑌶𑍍𑌯𑌤𑍍𑌸𑍁 𑌵𑌿𑌕𑌾𑌰𑌿𑌷𑍁 ॥ 562॥

𑌪𑌾𑌷𑌾𑌣𑌵𑍃𑌕𑍍𑌷𑌤𑍃𑌣𑌧𑌾𑌨𑍍𑌯𑌕𑌡𑌂𑌕𑌰𑌾𑌦𑍍𑌯𑌾 (𑌪𑌾𑌠𑌭𑍇𑌦𑌃 – 𑌕𑌟𑌾𑌂𑌬𑌰𑌾𑌦𑍍𑌯𑌾)
𑌦𑌗𑍍𑌧𑌾 𑌭𑌵𑌂𑌤𑌿 𑌹𑌿 𑌮𑍃𑌦𑍇𑌵 𑌯𑌥𑌾 𑌤𑌥𑍈𑌵 ।
𑌦𑍇𑌹𑍇𑌂𑌦𑍍𑌰𑌿𑌯𑌾𑌸𑍁𑌮𑌨 𑌆𑌦𑌿 𑌸𑌮𑌸𑍍𑌤𑌦𑍃𑌶𑍍𑌯𑌂
𑌜𑍍𑌞𑌾𑌨𑌾𑌗𑍍𑌨𑌿𑌦𑌗𑍍𑌧𑌮𑍁𑌪𑌯𑌾𑌤𑌿 𑌪𑌰𑌾𑌤𑍍𑌮𑌭𑌾𑌵𑌮𑍍 ॥ 563॥

𑌵𑌿𑌲𑌕𑍍𑌷𑌣𑌂 𑌯𑌥𑌾 𑌧𑍍𑌵𑌾𑌂𑌤𑌂 𑌲𑍀𑌯𑌤𑍇 𑌭𑌾𑌨𑍁𑌤𑍇𑌜𑌸𑌿 ।
𑌤𑌥𑍈𑌵 𑌸𑌕𑌲𑌂 𑌦𑍃𑌶𑍍𑌯𑌂 𑌬𑍍𑌰𑌹𑍍𑌮𑌣𑌿 𑌪𑍍𑌰𑌵𑌿𑌲𑍀𑌯𑌤𑍇 ॥ 564॥

𑌘𑌟𑍇 𑌨𑌷𑍍𑌟𑍇 𑌯𑌥𑌾 𑌵𑍍𑌯𑍋𑌮 𑌵𑍍𑌯𑍋𑌮𑍈𑌵 𑌭𑌵𑌤𑌿 𑌸𑍍𑌫𑍁𑌟𑌮𑍍 ।
𑌤𑌥𑍈𑌵𑍋𑌪𑌾𑌧𑌿𑌵𑌿𑌲𑌯𑍇 𑌬𑍍𑌰𑌹𑍍𑌮𑍈𑌵 𑌬𑍍𑌰𑌹𑍍𑌮𑌵𑌿𑌤𑍍𑌸𑍍𑌵𑌯𑌮𑍍 ॥ 565॥

𑌕𑍍𑌷𑍀𑌰𑌂 𑌕𑍍𑌷𑍀𑌰𑍇 𑌯𑌥𑌾 𑌕𑍍𑌷𑌿𑌪𑍍𑌤𑌂 𑌤𑍈𑌲𑌂 𑌤𑍈𑌲𑍇 𑌜𑌲𑌂 𑌜𑌲𑍇 ।
𑌸𑌂𑌯𑍁𑌕𑍍𑌤𑌮𑍇𑌕𑌤𑌾𑌂 𑌯𑌾𑌤𑌿 𑌤𑌥𑌾𑌽𑌽𑌤𑍍𑌮𑌨𑍍𑌯𑌾𑌤𑍍𑌮𑌵𑌿𑌨𑍍𑌮𑍁𑌨𑌿𑌃 ॥ 566॥

𑌏𑌵𑌂 𑌵𑌿𑌦𑍇𑌹𑌕𑍈𑌵𑌲𑍍𑌯𑌂 𑌸𑌨𑍍𑌮𑌾𑌤𑍍𑌰𑌤𑍍𑌵𑌮𑌖𑌂𑌡𑌿𑌤𑌮𑍍 ।
𑌬𑍍𑌰𑌹𑍍𑌮𑌭𑌾𑌵𑌂 𑌪𑍍𑌰𑌪𑌦𑍍𑌯𑍈𑌷 𑌯𑌤𑌿𑌰𑍍𑌨𑌾𑌵𑌰𑍍𑌤𑌤𑍇 𑌪𑍁𑌨𑌃 ॥ 56𑍭॥

𑌸𑌦𑌾𑌤𑍍𑌮𑍈𑌕𑌤𑍍𑌵𑌵𑌿𑌜𑍍𑌞𑌾𑌨𑌦𑌗𑍍𑌧𑌾𑌵𑌿𑌦𑍍𑌯𑌾𑌦𑌿𑌵𑌰𑍍𑌷𑍍𑌮𑌣𑌃 ।
𑌅𑌮𑍁𑌷𑍍𑌯 𑌬𑍍𑌰𑌹𑍍𑌮𑌭𑍂𑌤𑌤𑍍𑌵𑌾𑌦𑍍 𑌬𑍍𑌰𑌹𑍍𑌮𑌣𑌃 𑌕𑍁𑌤 𑌉𑌦𑍍𑌭𑌵𑌃 ॥ 56𑍮॥

𑌮𑌾𑌯𑌾𑌕𑍍𑌲𑍃𑌪𑍍𑌤𑍌 𑌬𑌂𑌧𑌮𑍋𑌕𑍍𑌷𑍌 𑌨 𑌸𑍍𑌤𑌃 𑌸𑍍𑌵𑌾𑌤𑍍𑌮𑌨𑌿 𑌵𑌸𑍍𑌤𑍁𑌤𑌃 ।
𑌯𑌥𑌾 𑌰𑌜𑍍𑌜𑍌 𑌨𑌿𑌷𑍍𑌕𑍍𑌰𑌿𑌯𑌾𑌯𑌾𑌂 𑌸𑌰𑍍𑌪𑌾𑌭𑌾𑌸𑌵𑌿𑌨𑌿𑌰𑍍𑌗𑌮𑍌 ॥ 56𑍯॥

𑌆𑌵𑍃𑌤𑍇𑌃 𑌸𑌦𑌸𑌤𑍍𑌤𑍍𑌵𑌾𑌭𑍍𑌯𑌾𑌂 𑌵𑌕𑍍𑌤𑌵𑍍𑌯𑍇 𑌬𑌂𑌧𑌮𑍋𑌕𑍍𑌷𑌣𑍇 ।
𑌨𑌾𑌵𑍃𑌤𑌿𑌰𑍍𑌬𑍍𑌰𑌹𑍍𑌮𑌣𑌃 𑌕𑌾𑌚𑌿𑌦𑌨𑍍𑌯𑌾𑌭𑌾𑌵𑌾𑌦𑌨𑌾𑌵𑍃𑌤𑌮𑍍 ।
𑌯𑌦𑍍𑌯𑌸𑍍𑌤𑍍𑌯𑌦𑍍𑌵𑍈𑌤𑌹𑌾𑌨𑌿𑌃 𑌸𑍍𑌯𑌾𑌦𑍍 𑌦𑍍𑌵𑍈𑌤𑌂 𑌨𑍋 𑌸𑌹𑌤𑍇 𑌶𑍍𑌰𑍁𑌤𑌿𑌃 ॥ 5𑍭0॥

𑌬𑌂𑌧𑌂𑌚 𑌮𑍋𑌕𑍍𑌷𑌂𑌚 𑌮𑍃𑌷𑍈𑌵 𑌮𑍂𑌢𑌾
𑌬𑍁𑌦𑍍𑌧𑍇𑌰𑍍𑌗𑍁𑌣𑌂 𑌵𑌸𑍍𑌤𑍁𑌨𑌿 𑌕𑌲𑍍𑌪𑌯𑌂𑌤𑌿 ।
𑌦𑍃𑌗𑌾𑌵𑍃𑌤𑌿𑌂 𑌮𑍇𑌘𑌕𑍃𑌤𑌾𑌂 𑌯𑌥𑌾 𑌰𑌵𑍌
𑌯𑌤𑍋𑌽𑌦𑍍𑌵𑌯𑌾𑌽𑌸𑌂𑌗𑌚𑌿𑌦𑍇𑌤𑌦𑌕𑍍𑌷𑌰𑌮𑍍 ॥ 5𑍭1॥ (𑌪𑌾𑌠𑌭𑍇𑌦𑌃 – 𑌚𑌿𑌦𑍇𑌕𑌮𑌕𑍍𑌷𑌰𑌮𑍍)

𑌅𑌸𑍍𑌤𑍀𑌤𑌿 𑌪𑍍𑌰𑌤𑍍𑌯𑌯𑍋 𑌯𑌶𑍍𑌚 𑌯𑌶𑍍𑌚 𑌨𑌾𑌸𑍍𑌤𑍀𑌤𑌿 𑌵𑌸𑍍𑌤𑍁𑌨𑌿 ।
𑌬𑍁𑌦𑍍𑌧𑍇𑌰𑍇𑌵 𑌗𑍁𑌣𑌾𑌵𑍇𑌤𑍌 𑌨 𑌤𑍁 𑌨𑌿𑌤𑍍𑌯𑌸𑍍𑌯 𑌵𑌸𑍍𑌤𑍁𑌨𑌃 ॥ 5𑍭2॥

𑌅𑌤𑌸𑍍𑌤𑍌 𑌮𑌾𑌯𑌯𑌾 𑌕𑍍𑌲𑍃𑌪𑍍𑌤𑍌 𑌬𑌂𑌧𑌮𑍋𑌕𑍍𑌷𑍌 𑌨 𑌚𑌾𑌤𑍍𑌮𑌨𑌿 ।
𑌨𑌿𑌷𑍍𑌕𑌲𑍇 𑌨𑌿𑌷𑍍𑌕𑍍𑌰𑌿𑌯𑍇 𑌶𑌾𑌂𑌤𑍇 𑌨𑌿𑌰𑌵𑌦𑍍𑌯𑍇 𑌨𑌿𑌰𑌂𑌜𑌨𑍇 ।
𑌅𑌦𑍍𑌵𑌿𑌤𑍀𑌯𑍇 𑌪𑌰𑍇 𑌤𑌤𑍍𑌤𑍍𑌵𑍇 𑌵𑍍𑌯𑍋𑌮𑌵𑌤𑍍𑌕𑌲𑍍𑌪𑌨𑌾 𑌕𑍁𑌤𑌃 ॥ 5𑍭3॥

𑌨 𑌨𑌿𑌰𑍋𑌧𑍋 𑌨 𑌚𑍋𑌤𑍍𑌪𑌤𑍍𑌤𑌿𑌰𑍍𑌨 𑌬𑌦𑍍𑌧𑍋 𑌨 𑌚 𑌸𑌾𑌧𑌕𑌃 ।
𑌨 𑌮𑍁𑌮𑍁𑌕𑍍𑌷𑍁𑌰𑍍𑌨 𑌵𑍈 𑌮𑍁𑌕𑍍𑌤 𑌇𑌤𑍍𑌯𑍇𑌷𑌾 𑌪𑌰𑌮𑌾𑌰𑍍𑌥𑌤𑌾 ॥ 5𑍭4॥

𑌸𑌕𑌲𑌨𑌿𑌗𑌮𑌚𑍂𑌡𑌾𑌸𑍍𑌵𑌾𑌂𑌤𑌸𑌿𑌦𑍍𑌧𑌾𑌂𑌤𑌰𑍂𑌪𑌂
𑌪𑌰𑌮𑌿𑌦𑌮𑌤𑌿𑌗𑍁𑌹𑍍𑌯𑌂 𑌦𑌰𑍍𑌶𑌿𑌤𑌂 𑌤𑍇 𑌮𑌯𑌾𑌦𑍍𑌯 ।
𑌅𑌪𑌗𑌤𑌕𑌲𑌿𑌦𑍋𑌷𑌂 𑌕𑌾𑌮𑌨𑌿𑌰𑍍𑌮𑍁𑌕𑍍𑌤𑌬𑍁𑌦𑍍𑌧𑌿𑌂 (𑌪𑌾𑌠𑌭𑍇𑌦𑌃 – 𑌬𑍁𑌦𑍍𑌧𑌿𑌃)
𑌸𑍍𑌵𑌸𑍁𑌤𑌵𑌦𑌸𑌕𑍃𑌤𑍍𑌤𑍍𑌵𑌾𑌂 𑌭𑌾𑌵𑌯𑌿𑌤𑍍𑌵𑌾 𑌮𑍁𑌮𑍁𑌕𑍍𑌷𑍁𑌮𑍍 ॥ 5𑍭5॥

𑌇𑌤𑌿 𑌶𑍍𑌰𑍁𑌤𑍍𑌵𑌾 𑌗𑍁𑌰𑍋𑌰𑍍𑌵𑌾𑌕𑍍𑌯𑌂 𑌪𑍍𑌰𑌶𑍍𑌰𑌯𑍇𑌣 𑌕𑍃𑌤𑌾𑌨𑌤𑌿𑌃 ।
𑌸 𑌤𑍇𑌨 𑌸𑌮𑌨𑍁𑌜𑍍𑌞𑌾𑌤𑍋 𑌯𑌯𑍌 𑌨𑌿𑌰𑍍𑌮𑍁𑌕𑍍𑌤𑌬𑌂𑌧𑌨𑌃 ॥ 5𑍭6॥

𑌗𑍁𑌰𑍁𑌰𑍇𑌵 𑌸𑌦𑌾𑌨𑌂𑌦𑌸𑌿𑌂𑌧𑍌 𑌨𑌿𑌰𑍍𑌮𑌗𑍍𑌨𑌮𑌾𑌨𑌸𑌃 । (𑌪𑌾𑌠𑌭𑍇𑌦𑌃 – 𑌗𑍁𑌰𑍁𑌰𑍇𑌷)
𑌪𑌾𑌵𑌯𑌨𑍍𑌵𑌸𑍁𑌧𑌾𑌂 𑌸𑌰𑍍𑌵𑌾𑌂 𑌵𑌿𑌚𑌚𑌾𑌰 𑌨𑌿𑌰𑌂𑌤𑌰𑌃 ॥ 5𑍭𑍭॥

𑌇𑌤𑍍𑌯𑌾𑌚𑌾𑌰𑍍𑌯𑌸𑍍𑌯 𑌶𑌿𑌷𑍍𑌯𑌸𑍍𑌯 𑌸𑌂𑌵𑌾𑌦𑍇𑌨𑌾𑌤𑍍𑌮𑌲𑌕𑍍𑌷𑌣𑌮𑍍 ।
𑌨𑌿𑌰𑍂𑌪𑌿𑌤𑌂 𑌮𑍁𑌮𑍁𑌕𑍍𑌷𑍂𑌣𑌾𑌂 𑌸𑍁𑌖𑌬𑍋𑌧𑍋𑌪𑌪𑌤𑍍𑌤𑌯𑍇 ॥ 5𑍭𑍮॥

𑌹𑌿𑌤𑌮𑌿𑌦𑌮𑍁𑌪𑌦𑍇𑌶𑌮𑌾𑌦𑍍𑌰𑌿𑌯𑌂𑌤𑌾𑌂
𑌵𑌿𑌹𑌿𑌤𑌨𑌿𑌰𑌸𑍍𑌤𑌸𑌮𑌸𑍍𑌤𑌚𑌿𑌤𑍍𑌤𑌦𑍋𑌷𑌾𑌃 ।
𑌭𑌵𑌸𑍁𑌖𑌵𑌿𑌰𑌤𑌾𑌃 𑌪𑍍𑌰𑌶𑌾𑌂𑌤𑌚𑌿𑌤𑍍𑌤𑌾𑌃 (𑌪𑌾𑌠𑌭𑍇𑌦𑌃 – 𑌸𑍁𑌖𑌵𑌿𑌮𑍁𑌖𑌾𑌃)
𑌶𑍍𑌰𑍁𑌤𑌿𑌰𑌸𑌿𑌕𑌾 𑌯𑌤𑌯𑍋 𑌮𑍁𑌮𑍁𑌕𑍍𑌷𑌵𑍋 𑌯𑍇 ॥ 5𑍭𑍯॥

𑌸𑌂𑌸𑌾𑌰𑌾𑌧𑍍𑌵𑌨𑌿 𑌤𑌾𑌪𑌭𑌾𑌨𑍁𑌕𑌿𑌰𑌣𑌪𑍍𑌰𑍋𑌦𑍍𑌭𑍂𑌤𑌦𑌾𑌹𑌵𑍍𑌯𑌥𑌾-
𑌖𑌿𑌨𑍍𑌨𑌾𑌨𑌾𑌂 𑌜𑌲𑌕𑌾𑌂𑌕𑍍𑌷𑌯𑌾 𑌮𑌰𑍁𑌭𑍁𑌵𑌿 𑌭𑍍𑌰𑌾𑌂𑌤𑍍𑌯𑌾 𑌪𑌰𑌿𑌭𑍍𑌰𑌾𑌮𑍍𑌯𑌤𑌾𑌮𑍍 ।
𑌅𑌤𑍍𑌯𑌾𑌸𑌨𑍍𑌨𑌸𑍁𑌧𑌾𑌂𑌬𑍁𑌧𑌿𑌂 𑌸𑍁𑌖𑌕𑌰𑌂 𑌬𑍍𑌰𑌹𑍍𑌮𑌾𑌦𑍍𑌵𑌯𑌂 𑌦𑌰𑍍𑌶𑌯-
𑌤𑍍𑌯𑍇𑌷𑌾 𑌶𑌂𑌕𑌰𑌭𑌾𑌰𑌤𑍀 𑌵𑌿𑌜𑌯𑌤𑍇 𑌨𑌿𑌰𑍍𑌵𑌾𑌣𑌸𑌂𑌦𑌾𑌯𑌿𑌨𑍀 ॥ 5𑍮0॥

॥ 𑌇𑌤𑌿 𑌶𑌂𑌕𑌰𑌾𑌚𑌾𑌰𑍍𑌯𑌵𑌿𑌰𑌚𑌿𑌤𑌂 𑌵𑌿𑌵𑍇𑌕𑌚𑍂𑌡𑌾𑌮𑌣𑌿𑌃 ॥

॥ 𑌓𑌂 𑌤𑌤𑍍𑌸𑌤𑍍 ॥