ભવાનિ સ્તોતું ત્વાં પ્રભવતિ ચતુર્ભિર્ન વદનૈઃ
પ્રજાનામીશાનસ્ત્રિપુરમથનઃ પંચભિરપિ ।
ન ષડ્ભિઃ સેનાનીર્દશશતમુખૈરપ્યહિપતિઃ
તદાન્યેષાં કેષાં કથય કથમસ્મિન્નવસરઃ ॥ 1॥
ઘૃતક્ષીરદ્રાક્ષામધુમધુરિમા કૈરપિ પદૈઃ
વિશિષ્યાનાખ્યેયો ભવતિ રસનામાત્ર વિષયઃ ।
તથા તે સૌંદર્યં પરમશિવદૃઙ્માત્રવિષયઃ
કથંકારં બ્રૂમઃ સકલનિગમાગોચરગુણે ॥ 2॥
મુખે તે તાંબૂલં નયનયુગળે કજ્જલકલા
લલાટે કાશ્મીરં વિલસતિ ગળે મૌક્તિકલતા ।
સ્ફુરત્કાંચી શાટી પૃથુકટિતટે હાટકમયી
ભજામિ ત્વાં ગૌરીં નગપતિકિશોરીમવિરતમ્ ॥ 3॥
વિરાજન્મંદારદ્રુમકુસુમહારસ્તનતટી
નદદ્વીણાનાદશ્રવણવિલસત્કુંડલગુણા
નતાંગી માતંગી રુચિરગતિભંગી ભગવતી
સતી શંભોરંભોરુહચટુલચક્ષુર્વિજયતે ॥ 4॥
નવીનાર્કભ્રાજન્મણિકનકભૂષણપરિકરૈઃ
વૃતાંગી સારંગીરુચિરનયનાંગીકૃતશિવા ।
તડિત્પીતા પીતાંબરલલિતમંજીરસુભગા
મમાપર્ણા પૂર્ણા નિરવધિસુખૈરસ્તુ સુમુખી ॥ 5॥
હિમાદ્રેઃ સંભૂતા સુલલિતકરૈઃ પલ્લવયુતા
સુપુષ્પા મુક્તાભિર્ભ્રમરકલિતા ચાલકભરૈઃ ।
કૃતસ્થાણુસ્થાના કુચફલનતા સૂક્તિસરસા
રુજાં હંત્રી ગંત્રી વિલસતિ ચિદાનંદલતિકા ॥ 6॥
સપર્ણામાકીર્ણાં કતિપયગુણૈઃ સાદરમિહ
શ્રયંત્યન્યે વલ્લીં મમ તુ મતિરેવં વિલસતિ ।
અપર્ણૈકા સેવ્યા જગતિ સકલૈર્યત્પરિવૃતઃ
પુરાણોઽપિ સ્થાણુઃ ફલતિ કિલ કૈવલ્યપદવીમ્ ॥ 7॥
વિધાત્રી ધર્માણાં ત્વમસિ સકલામ્નાયજનની
ત્વમર્થાનાં મૂલં ધનદનમનીયાંઘ્રિકમલે ।
ત્વમાદિઃ કામાનાં જનનિ કૃતકંદર્પવિજયે
સતાં મુક્તેર્બીજં ત્વમસિ પરમબ્રહ્મમહિષી ॥ 8॥
પ્રભૂતા ભક્તિસ્તે યદપિ ન મમાલોલમનસઃ
ત્વયા તુ શ્રીમત્યા સદયમવલોક્યોઽહમધુના ।
પયોદઃ પાનીયં દિશતિ મધુરં ચાતકમુખે
ભૃશં શંકે કૈર્વા વિધિભિરનુનીતા મમ મતિઃ ॥ 9॥
કૃપાપાંગાલોકં વિતર તરસા સાધુચરિતે
ન તે યુક્તોપેક્ષા મયિ શરણદીક્ષામુપગતે ।
ન ચેદિષ્ટં દદ્યાદનુપદમહો કલ્પલતિકા
વિશેષઃ સામાન્યૈઃ કથમિતરવલ્લીપરિકરૈઃ ॥ 10॥
મહાંતં વિશ્વાસં તવ ચરણપંકેરુહયુગે
નિધાયાન્યન્નૈવાશ્રિતમિહ મયા દૈવતમુમે ।
તથાપિ ત્વચ્ચેતો યદિ મયિ ન જાયેત સદયં
નિરાલંબો લંબોદરજનનિ કં યામિ શરણમ્ ॥ 11॥
અયઃ સ્પર્શે લગ્નં સપદિ લભતે હેમપદવીં
યથા રથ્યાપાથઃ શુચિ ભવતિ ગંગૌઘમિલિતમ્ ।
તથા તત્તત્પાપૈરતિમલિનમંતર્મમ યદિ
ત્વયિ પ્રેમ્ણાસક્તં કથમિવ ન જાયેત વિમલમ્ ॥ 12॥
ત્વદન્યસ્માદિચ્છાવિષયફલલાભે ન નિયમઃ
ત્વમર્થાનામિચ્છાધિકમપિ સમર્થા વિતરણે ।
ઇતિ પ્રાહુઃ પ્રાંચઃ કમલભવનાદ્યાસ્ત્વયિ મનઃ
ત્વદાસક્તં નક્તં દિવમુચિતમીશાનિ કુરુ તત્ ॥ 13॥
સ્ફુરન્નાનારત્નસ્ફટિકમયભિત્તિપ્રતિફલ
ત્ત્વદાકારં ચંચચ્છશધરકલાસૌધશિખરમ્ ।
મુકુંદબ્રહ્મેંદ્રપ્રભૃતિપરિવારં વિજયતે
તવાગારં રમ્યં ત્રિભુવનમહારાજગૃહિણિ ॥ 14॥
નિવાસઃ કૈલાસે વિધિશતમખાદ્યાઃ સ્તુતિકરાઃ
કુટુંબં ત્રૈલોક્યં કૃતકરપુટઃ સિદ્ધિનિકરઃ ।
મહેશઃ પ્રાણેશસ્તદવનિધરાધીશતનયે
ન તે સૌભાગ્યસ્ય ક્વચિદપિ મનાગસ્તિ તુલના ॥ 15॥
વૃષો વૃદ્ધો યાનં વિષમશનમાશા નિવસનં
શ્મશાનં ક્રીડાભૂર્ભુજગનિવહો ભૂષણવિધિઃ
સમગ્રા સામગ્રી જગતિ વિદિતૈવ સ્મરરિપોઃ
યદેતસ્યૈશ્વર્યં તવ જનનિ સૌભાગ્યમહિમા ॥ 16॥
અશેષબ્રહ્માંડપ્રલયવિધિનૈસર્ગિકમતિઃ
શ્મશાનેષ્વાસીનઃ કૃતભસિતલેપઃ પશુપતિઃ ।
દધૌ કંઠે હાલાહલમખિલભૂગોલકૃપયા
ભવત્યાઃ સંગત્યાઃ ફલમિતિ ચ કલ્યાણિ કલયે ॥ 17॥
ત્વદીયં સૌંદર્યં નિરતિશયમાલોક્ય પરયા
ભિયૈવાસીદ્ગંગા જલમયતનુઃ શૈલતનયે ।
તદેતસ્યાસ્તસ્માદ્વદનકમલં વીક્ષ્ય કૃપયા
પ્રતિષ્ઠામાતન્વન્નિજશિરસિવાસેન ગિરિશઃ ॥ 18॥
વિશાલશ્રીખંડદ્રવમૃગમદાકીર્ણઘુસૃણ
પ્રસૂનવ્યામિશ્રં ભગવતિ તવાભ્યંગસલિલમ્ ।
સમાદાય સ્રષ્ટા ચલિતપદપાંસૂન્નિજકરૈઃ
સમાધત્તે સૃષ્ટિં વિબુધપુરપંકેરુહદૃશામ્ ॥ 19॥
વસંતે સાનંદે કુસુમિતલતાભિઃ પરિવૃતે
સ્ફુરન્નાનાપદ્મે સરસિ કલહંસાલિસુભગે ।
સખીભિઃ ખેલંતીં મલયપવનાંદોલિતજલે
સ્મરેદ્યસ્ત્વાં તસ્ય જ્વરજનિતપીડાપસરતિ ॥ 20॥
॥ ઇતિ શ્રીમચ્છંકરાચાર્યવિરચિતા આનંદલહરી સંપૂર્ણા ॥